੪੧. ਰਾਹੁਲਵਤ੍ਥੁਕਥਾ
੧੦੫. ਕਪਿਲਵਤ੍ਥੂਤਿ ਏਤ੍ਥ ਕਪਿਲੋਤਿ ਕਲ਼ਾਰਵਣ੍ਣੋ ਇਸਿ ਵੁਚ੍ਚਤਿ, ਸੋ ਵਸਤਿ ਏਤ੍ਥਾਤਿ ਕਪਿਲਵਤ੍ਥੁ, ਅਸ੍ਸਮੋ. ਤਸ੍ਮਿਂ ਠਾਨੇ ਮਾਪਿਤਤ੍ਤਾ ਨਗਰਮ੍ਪਿ ਕਪਿਲਵਤ੍ਥੂਤਿ (ਦੀ. ਨਿ. ਅਟ੍ਠ. ੧.੨੬੭; ਸੁ. ਨਿ. ਅਟ੍ਠ. ੨.੩੬੨) ਵੁਚ੍ਚਤਿ. ਅਯਨ੍ਤਿ ਵਕ੍ਖਮਾਨਕਥਾ. ਸੁਦ੍ਧੋਦਨਮਹਾਰਾਜਾਤਿ ਏਤ੍ਥ ਸੁਦ੍ਧੋਦਨੋਤਿ ਤਸ੍ਸ ਰਞ੍ਞੋ ਨਾਮਂ. ਅਥ ਵਾ ਸੁਦ੍ਧਂ ਓਦਨਂ ਇਮਸ੍ਸਾਤਿ ਸੁਦ੍ਧੋਦਨੋ, ਸੋਯੇਵ ਮਹਾਰਾਜਾ ਸੁਦ੍ਧੋਦਨਮਹਾਰਾਜਾ. ਵਿਹਰਤਿ ਕਿਰਾਤਿ ਸਮ੍ਬਨ੍ਧੋ. ਸੋਤਿ ਸੁਦ੍ਧੋਦਨਮਹਾਰਾਜਾ. ਰਾਜਗਹਨ੍ਤਿ ਰਾਜਗਹਨਗਰਂ. ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ. ਆਯਾਚਾਮੀਤਿ ਹਿ ਅਤ੍ਥੋ. ਮੇਤਿ ਮਮ, ਪੁਤ੍ਤਨ੍ਤਿ ਸਮ੍ਬਨ੍ਧੋ, ਅਨਾਦਰੇ ਵਾ ਸਾਮਿਵਚਨਂ. ਸੋਤਿ ਅਮਚ੍ਚੋ. ਸਾਧੂਤਿ ਸਮ੍ਪਟਿਚ੍ਛਨਤ੍ਥੇ ਨਿਪਾਤੋ. ਏਵਨ੍ਤਿ ਹਿ ਅਤ੍ਥੋ. ਅਥਾਤਿ ਤਸ੍ਮਿਂ ਨਿਸੀਦਨਕਾਲੇ. ਅਸ੍ਸਾਤਿ ਪੁਰਿਸਸਹਸ੍ਸਪਰਿਵਾਰਸ੍ਸ ਅਮਚ੍ਚਸ੍ਸ. ਤਤੋਤਿ ਯਾਚਨਕਾਰਣਾ. ਨਨ੍ਤਿ ਪੁਰਿਸਸਹਸ੍ਸਪਰਿਵਾਰਂ ਅਮਚ੍ਚਂ. ਤਤ੍ਥੇਵਾਤਿ ਰਾਜਗਹੇਯੇਵ. ਤੇਪੀਤਿ ਅਟ੍ਠ ਦੂਤਾਪਿ. ਤੇਤਿ ਨਵ ਦੂਤਾ.
ਅਥਾਤਿ ਤਤੋ ਪਚ੍ਛਾ. ਏਕਦਿਵਸਜਾਤਕਨ੍ਤਿ ਏਕਸ੍ਮਿਂ ਦਿਵਸੇ ਜਾਤਕਂ. ਸੋਤਿ ਕਾਲ਼ੁਦਾਯੀਅਮਚ੍ਚੋ. ਪਬ੍ਬਜਿਤ੍ਵਾਪੀਤਿ ਪਿਸਦ੍ਦੇਨ ‘‘ਅਪਬ੍ਬਜਿਤ੍ਵਾਪੀ’’ਤਿ ਅਤ੍ਥਂ ਸਮ੍ਪਿਣ੍ਡੇਤਿ. ਤਥੇਵਾਤਿ ਯਥਾ ਨਵ ਦੂਤਾ ਸਪਰਿਵਾਰਾ ਅਰਹਤ੍ਤਂ ਪਾਪੁਣਿਂਸੁ, ਤਥੇਵਾਤਿ ਅਤ੍ਥੋ. ਸੋਤਿ ਕਾਲ਼ੁਦਾਯੀ. ਸਮ੍ਭਤੇਸੂਤਿ ਸਮ੍ਭਰਿਤੇਸੁ ਗਹੇਤ੍ਵਾ ਨਿਟ੍ਠਾਪਿਤੇਸੂਤਿ ਅਤ੍ਥੋ. ਵਿਸ੍ਸਟ੍ਠਕਮ੍ਮੇਸੂਤਿ ਵਿਸ੍ਸਟ੍ਠਾ ਕਮ੍ਮਨ੍ਤਾ ਏਤੇਸਨ੍ਤਿ ਵਿਸ੍ਸਟ੍ਠਕਮ੍ਮਨ੍ਤਾ, ਤੇਸੁ. ਸੁਪੁਪ੍ਫਿਤੇਸੂਤਿ ਸੁਨ੍ਦਰਪੁਪ੍ਫਸਞ੍ਜਾਤੇਸੁ. ਪਟਿਪਜ੍ਜਨਕ੍ਖਮੇਤਿ ਪਟਿਪਜ੍ਜਨਤ੍ਥਾਯ ਖਮੇ ਯੋਗ੍ਯੇ. ਗਮਨਵਣ੍ਣਂ ਸਂਵਣ੍ਣੇਸੀਤਿ ਸਮ੍ਬਨ੍ਧੋ. ਸਟ੍ਠਿਮਤ੍ਤਾਹੀਤਿ (ਬੁ. ਵਂ. ਅਟ੍ਠ. ਨਿਦਾਨਕਥਾ ੨) ਸਟ੍ਠਿਪਮਾਣਾਹਿ. ਏਤਨ੍ਤਿ ਏਤਂ ਸਂਵਣ੍ਣਸ੍ਸ ਕਾਰਣਂ ਕਿਨ੍ਤਿ ਪੁਚ੍ਛਿ. ਚਾਰਿਕਂ ਪਕ੍ਕਮਿਤੁਂ ਕਾਲੋਤਿ ਯੋਜਨਾ. ਤੇਨ ਹੀਤਿ ਉਯ੍ਯੋਜਨਤ੍ਥੇ ਨਿਪਾਤੋ. ਭਗਵਾ ਪਕ੍ਕਾਮੀਤਿ ਸਮ੍ਬਨ੍ਧੋ. ਪਰਿਵੁਤੋਤਿ ਪਰਿਸਮਨ੍ਤਤੋ ਵੁਤੋ ਆਵੁਤੋ ਨਿਵੁਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਅਤੁਰਿਤਚਾਰਿਕਨ੍ਤਿ ਅਜਵਨਚਾਰਿਕਂ.
ਏਵਨ੍ਤਿ ਇਮਿਨਾ ਨਯੇਨ. ਭਗਵਤਿ ਪਕ੍ਕਨ੍ਤੇ ਚ ਸਤੀਤਿ ਯੋਜਨਾ. ਨਿਕ੍ਖਨ੍ਤਦਿਵਸਤੋਤਿ ਫਗ੍ਗੁਣਪੁਣ੍ਣਮਿਯਾ ਪਾਟਿਪਦਦਿਵਸਤੋ. ਉਤ੍ਤਮਭੋਜਨਰਸਸ੍ਸਾਤਿ ਉਤ੍ਤਮਭੋਜਨਰਸੇਨ. ਦਸ੍ਸਥਾਤਿ ਦਦੇਯ੍ਯਾਥ. ਤੇਨੇਵਾਤਿ ਸਦ੍ਧਾਯ ਉਪ੍ਪਾਦਨਕਾਰਣੇਨੇਵ. ਨਨ੍ਤਿ ਕਾਲ਼ੁਦਾਯਿਂ. ਭਗਵਾ ਠਪੇਸੀਤਿ ਸਮ੍ਬਨ੍ਧੋ. ਏਤਦਗ੍ਗਨ੍ਤਿ ਏਸੋ ਅਗ੍ਗੋ. ਯਦਿਦਨ੍ਤਿ ਯੋ ਅਯਂ. ਏਤਦਗ੍ਗੇਤਿ ਏਤਦਗ੍ਗਟ੍ਠਾਨੇ.
ਸਾਕਿਯਾਪਿ ਖੋ ਪਹਿਣਿਂਸੂਤਿ ਸਮ੍ਬਨ੍ਧੋ. ਞਾਤਿਸੇਟ੍ਠਨ੍ਤਿ ਞਾਤੀਨਂ ਸੇਟ੍ਠਂ, ਞਾਤਿਯੇਵ ਵਾ ਸੇਟ੍ਠਂ, ਭਗਵਨ੍ਤਨ੍ਤਿ ਯੋਜਨਾ. ਨਿਗ੍ਰੋਧਸਕ੍ਕਸ੍ਸਾਤਿ ਨਿਗ੍ਰੋਧਨਾਮਕਸ੍ਸ ਸਕ੍ਕਸ੍ਸ. ਤਤ੍ਥਾਤਿ ਨਿਗ੍ਰੋਧਸਕ੍ਕਸ੍ਸ ਆਰਾਮੇ. ਪਚ੍ਚੁਗ੍ਗਮਨਨ੍ਤਿ ਪਟਿਮੁਖਂ ਉਟ੍ਠਹਿਤ੍ਵਾ ਗਮਨਂ. ਤਤੋਤਿ ਪਹਿਣਤੋ, ਪਰਨ੍ਤਿ ਸਮ੍ਬਨ੍ਧੋ. ਰਾਜਕੁਮਾਰੇ ਚ ਰਾਜਕੁਮਾਰਿਕਾਯੋ ਚ ਪਹਿਣਿਂਸੂਤਿ ਯੋਜਨਾ. ਤੇਸਨ੍ਤਿ ਰਾਜਕੁਮਾਰਰਾਜਕੁਮਾਰਿਕਾਨਂ. ਤਤ੍ਰਾਤਿ ਨਿਗ੍ਰੋਧਾਰਾਮੇ. ਮਾਨੋ ਜਾਤਿ ਸਭਾਵੋ ਏਤੇਸਨ੍ਤਿ ਮਾਨਜਾਤਿਕਾ, ਮਾਨੇਨ, ਮਾਨੋ ਵਾ ਥਦ੍ਧੋ ਏਤੇਸਨ੍ਤਿ ਮਾਨਥਦ੍ਧਾ. ਤੇਤਿ ਸਾਕਿਯਾ, ਆਹਂਸੂਤਿ ਸਮ੍ਬਨ੍ਧੋ.
ਤੇਸੂਤਿ ਸਾਕਿਯੇਸੁ. ਨੇਤਿ ਞਾਤਯੋ. ਵੁਟ੍ਠਾਯਾਤਿ ਚਤੁਤ੍ਥਜ੍ਝਾਨਤੋ ਵੁਟ੍ਠਹਿਤ੍ਵਾ. ਤੇਸਨ੍ਤਿ ਞਾਤੀਨਂ. ਕਣ੍ਡਮ੍ਬਰੁਕ੍ਖਮੂਲੇਤਿ ਕਣ੍ਡਨਾਮਕੇਨ ਉਯ੍ਯਾਨਪਾਲੇਨ ਰੋਪਿਮਸ੍ਸ ਅਮ੍ਬਰੁਕ੍ਖਸ੍ਸ ਆਸਨ੍ਨੇ. ਰਾਜਾਤਿ ਸੁਦ੍ਧੋਦਨਮਹਾਰਾਜਾ. ਵੋਤਿ ਤੁਮ੍ਹਾਕਂ, ਪਾਦੇਤਿ ਸਮ੍ਬਨ੍ਧੋ. ਅਯਨ੍ਤਿ ਵਨ੍ਦਨਾ. ਜਮ੍ਬੁਚ੍ਛਾਯਾਯਾਤਿ ਜਮ੍ਬੁਰੁਕ੍ਖਸ੍ਸ ਛਾਯਾਯ. ਇਤਿ ਆਹਾਤਿ ਯੋਜਨਾ.
ਸਿਖਾਪ੍ਪਤ੍ਤੋਤਿ ਅਗ੍ਗਪ੍ਪਤ੍ਤੋ, ਕੋਟਿਪ੍ਪਤ੍ਤੋਤਿ ਅਤ੍ਥੋ. ਤਤੋਤਿ ਨਿਸੀਦਨਤੋ, ਪਰਨ੍ਤਿ ਸਮ੍ਬਨ੍ਧੋ. ਪੋਕ੍ਖਰਵਸ੍ਸਨ੍ਤਿ ਪਦੁਮਵਨੇ ਵੁਟ੍ਠਵਸ੍ਸਸਦਿਸਂ. ਤਮ੍ਬਵਣ੍ਣਨ੍ਤਿ ਲੋਹਿਤਵਣ੍ਣਂ. ਤਨ੍ਤਿ ਅਪਤਨਂ ਭਗਵਾ ਕਥੇਸੀਤਿ ਸਮ੍ਬਨ੍ਧੋ.
ਦੁਤਿਯਦਿਵਸੇਤਿ ਕਪਿਲਵਤ੍ਥੁਂ ਪਤ੍ਤਦਿਵਸਤੋ ਦੁਤਿਯੇ ਦਿਵਸੇ. ਇਨ੍ਦਖੀਲੇਤਿ ਨਗਰਸ੍ਸ ਉਮ੍ਮਾਰੇ. ਕਥਨ੍ਤਿ ਕੇਨਾਕਾਰੇਨ ਚਰਿਂਸੁ ਨੁ ਖੋਤਿ ਯੋਜਨਾ. ਅਗਮਂਸੁ ਕਿਂ ਚਰਿਂਸੁ ਕਿਨ੍ਤਿ ਯੋਜਨਾ. ਸਪਦਾਨਚਾਰਨ੍ਤਿ ਘਰਪਟਿਪਾਟਿਖਣ੍ਡਨਵਿਰਹਿਤੇਨ ਸਹ ਪਵਤ੍ਤਂ ਚਾਰਂ. ਤਤੋਤਿ ਆਵਜ੍ਜਨਤੋ, ਪਰਨ੍ਤਿ ਸਮ੍ਬਨ੍ਧੋ. ਅਯਮੇਵ ਵਂਸੋਤਿ ਪੁਬ੍ਬਬੁਦ੍ਧਾਨਂ ਅਯਮੇਵ ਵਂਸੋ. ਅਯਂ ਪਵੇਣੀਤਿ ਤਸ੍ਸੇਵ ਵੇਵਚਨਂ. ਅਨੁਸਿਕ੍ਖਨ੍ਤਾਤਿ ਅਨੁ ਪਟਿਭਾਗਂ ਸਿਕ੍ਖਨ੍ਤਾ. ਨਿਵਿਟ੍ਠਗੇਹਤੋਤਿ ਨਿਵਾਸਨਤ੍ਥਾਯ ਵਿਸਿਤਗੇਹਤੋ. ਅਯ੍ਯੋਤਿ ਅਧਿਪੋ ਸਾਮੀਤਿ ਅਤ੍ਥੋ. ਸਿਦ੍ਧਤ੍ਥਕੁਮਾਰੋਤਿ ਸਬ੍ਬਲੋਕਸ੍ਸ ਸਿਦ੍ਧੋ ਅਤ੍ਥੋ ਅਸ੍ਮਿਂ ਅਤ੍ਥੀਤਿ ਸਿਦ੍ਧਤ੍ਥੋ, ਸੋਯੇਵ ਕੁਮਾਰੋ ਸਿਦ੍ਧਤ੍ਥਕੁਮਾਰੋ. ਸੀਹਪਞ੍ਜਰਨ੍ਤਿ ਵਾਤਪਾਨਂ. ਤਞ੍ਹਿ ਸੀਹਰੂਪਂ ਦਸ੍ਸੇਤ੍ਵਾ ਕਤਪਞ੍ਜਰਤ੍ਤਾ ਸੀਹਪਞ੍ਜਰਨ੍ਤਿ ਵੁਚ੍ਚਤਿ. ਦਸ੍ਸਨਬ੍ਯਾਵਟੋਤਿ ਦਸ੍ਸਨੇ, ਦਸ੍ਸਨਤ੍ਥਾਯ ਵਾ ਬ੍ਯਾਵਟੋ. ਰਾਹੁਲਮਾਤਾਪਿ ਦੇਵੀ ਆਰੋਚੇਸੀਤਿ ਸਮ੍ਬਨ੍ਧੋ. ਕਪਾਲਹਤ੍ਥੋਤਿ ਕਪਾਲੋ ਹਤ੍ਥੇਸੁ ਅਸ੍ਸ ਭਗਵਤੋਤਿ ਕਪਾਲਹਤ੍ਥੋ, ਹੁਤ੍ਵਾਤਿ ਸਮ੍ਬਨ੍ਧੋ. ਨਾਨਾਵਿਰਾਗਸਮੁਜ੍ਜਲਾਯਾਤਿ ਨਾਨਾਠਾਨੇਸੁ ਵਿਰਾਗਾਯ ਸਮੁਜ੍ਜਲਾਯ. ਵਿਰੋਚਮਾਨਂ ਭਗਵਨ੍ਤਨ੍ਤਿ ਸਮ੍ਬਨ੍ਧੋ.
ਉਣ੍ਹੀਸਤੋਤਿ ਸਿਰੋਵੇਠਨਤੋ. ਤਞ੍ਹਿ ਉਪਰਿਸੀਸੇ ਨਹਤਿ ਬਨ੍ਧਤਿ, ਨਹੀਯਤਿ ਬਨ੍ਧੀਯਤੀਤਿ ਵਾ ਉਣ੍ਹੀਸੋਤਿ ਵੁਚ੍ਚਤਿ. ਨਰਸੀਹਗਾਥਾਹਿ ਨਾਮਾਤਿ ਨਰਸੀਹਗਾਥਾਨਾਮਕਾਹਿ. ਤਾ ਹਿ ਯਸ੍ਮਾ ਨਰੋਯੇਵ ਸਬ੍ਬਸਤ੍ਤਾਨਂ ਸੀਹੋ ਸੇਟ੍ਠੋ, ਨਰਾਨਂ, ਨਰੇਸੁ ਵਾ ਸੀਹੋ ਸੇਟ੍ਠੋਤਿ ਨਰਸੀਹੋ, ਤਸ੍ਸ ਪਕਾਸਕਾ ਗਾਥਾ ਹੋਨ੍ਤਿ, ਤਸ੍ਮਾ ਨਰਸੀਹਗਾਥਾਤਿ ਵੁਚ੍ਚਨ੍ਤਿ. ਰਞ੍ਞੋਤਿ ਸਸ੍ਸੁਰਰਞ੍ਞੋ, ਮਾਤੁਲਰਞ੍ਞੋ ਵਾ. ਸਂਵਿਗ੍ਗਹਦਯੋਤਿ ਚਲਨਚਿਤ੍ਤੋ. ਸਣ੍ਠਾਪਯਮਾਨੋਤਿ ਸੁਟ੍ਠੁ ਠਾਪਯਮਾਨੋ. ਤੁਰਿਤਤੁਰਿਤਨ੍ਤਿ ਤੁਰਿਤਤੋ ਤੁਰਿਤਂ, ਅਤਿਸੀਘਨ੍ਤਿ ਅਤ੍ਥੋ. ਕਿਂ ਭਨ੍ਤੇਤਿ ਕਿਂ ਕਾਰਣਾ ਭਨ੍ਤੇ. ਅਹੁਵਤ੍ਥਾਤਿ ਹਿਯ੍ਯਤ੍ਤਨੀਮਜ੍ਝਿਮਪੁਰਿਸਸਙ੍ਖਾਤਾਯ ਤ੍ਥਵਿਭਤ੍ਤਿਯਾ ਹੂਧਾਤੁਸ੍ਸ ਊਕਾਰਸ੍ਸ ਉਵਾਦੇਸੋ ਹੋਤਿ, ਤਸ੍ਮਾ ਤੁਮ੍ਹੇ ਏਵਂਸਞ੍ਞਿਨੋ ਅਹੁਵਤ੍ਥਾਤਿ ਯੋਜਨਾ. ਵਂਸਚਾਰਿਤ੍ਤਮੇਤਨ੍ਤਿ ਏਤਂ ਪਿਣ੍ਡਾਯ ਚਰਣਂ ਵਂਸਤੋ ਪਵੇਣਿਤੋ ਚਾਰਿਤ੍ਤਂ. ਤਤ੍ਥ ਚਾਤਿ ਮਹਾਸਮ੍ਮਤਖਤ੍ਤਿਯਵਂਸੇ ਚ. ਅਯਨ੍ਤਿ ਮਹਾਸਮ੍ਮਤਖਤ੍ਤਿਯਵਂਸੋ. ਅਨ੍ਤਰਵੀਥਿਯਨ੍ਤਿ ਵੀਥਿਯਾ ਮਜ੍ਝੇ. ਠਿਤੋਵ ਆਹਾਤਿ ਸਮ੍ਬਨ੍ਧੋ.
ਉਤ੍ਤਿਟ੍ਠੇਤਿ ਉਦ੍ਦਿਸ੍ਸ, ਉਟ੍ਠਹਿਤ੍ਵਾ ਵਾ ਪਿਣ੍ਡਾਯ ਤਿਟ੍ਠਨੇ. ਧਮ੍ਮਂ ਸੁਚਰਿਤਨ੍ਤਿ ਸੁਟ੍ਠੁ ਚਰਿਤਬ੍ਬਂ ਭਿਕ੍ਖਾਚਰਿਯਸਙ੍ਖਾਤਂ ਧਮ੍ਮਂ. ਚਰੇਤਿ ਚਰੇਯ੍ਯ. ਧਮ੍ਮਚਾਰੀਤਿ ਭਿਕ੍ਖਾਚਰਿਯਸਙ੍ਖਾਤਂ ਧਮ੍ਮਂ ਚਰਣਸੀਲੋ ਸਮਣੋ. ਸੁਖਂ ਸੇਤੀਤਿ ਉਪਲਕ੍ਖਣਵਸੇਨ ਵੁਤ੍ਤਂ. ਸੇਸਇਰਿਯਾਪਥਾਪਿ ਲਕ੍ਖਣਹਾਰਵਸੇਨ ਗਹੇਤਬ੍ਬਾ ਸਮਾਨਕਿਚ੍ਚਤ੍ਤਾ. ਅਸ੍ਮਿਞ੍ਚ ਲੋਕੇ ਪਰਮ੍ਹਿ ਚ ਲੋਕੇਤਿ ਯੋਜਨਾ.
ਨ ਤਂ ਦੁਚ੍ਚਰਿਤਂ ਚਰੇਤਿ ਵੇਸਿਯਾਦਿਗੋਚਰਸਙ੍ਖਾਤਂ ਦੁਟ੍ਠੁ ਚਰਿਤਬ੍ਬਂ ਤਂ ਧਮ੍ਮਂ ਨ ਚਰੇਯ੍ਯ.
ਏਤ੍ਥ ਚ ਪਠਮਗਾਥਂ ਅਨ੍ਤਰਵੀਥਿਯਂ ਕਥੇਤ੍ਵਾ ਰਾਜਾਨਂ ਸੋਤਾਪਤ੍ਤਿਫਲੇ ਪਤਿਟ੍ਠਾਪੇਸਿ, ਦੁਤਿਯਗਾਥਂ ਪਿਤੁਨਿਵੇਸਨੇ ਕਥੇਤ੍ਵਾ ਮਹਾਪਜਾਪਤਿਂ ਸੋਤਾਪਤ੍ਤਿਫਲੇ, ਰਾਜਾਨਂ ਸਕਦਾਗਾਮਿਫਲੇ ਪਤਿਟ੍ਠਾਪੇਸੀਤਿ ਦਟ੍ਠਬ੍ਬਂ. ਧਮ੍ਮਪਾਲਜਾਤਕਂ ਸੁਤ੍ਵਾਤਿ ਪੁਨ ਅਪਰਸ੍ਮਿਂ ਦਿਵਸੇ (ਜਾ. ਅਟ੍ਠ. ੪.੯੮ ਆਦਯੋ; ਧ. ਪ. ਅਟ੍ਠ. ੧.ਨਨ੍ਦਤ੍ਥੇਰਵਤ੍ਥੁ) ਧਮ੍ਮਪਾਲਜਾਤਕਂ (ਜਾ. ਅਟ੍ਠ. ੪.ਮਹਾਧਮ੍ਮਪਾਲਜਾਤਕਵਣ੍ਣਨਾ) ਸੁਤ੍ਵਾ. ਮਰਣਸਮਯੇਤਿ ਮਰਣਾਸਨ੍ਨਕਾਲੇ, ਮਰਣਸਮਯਸਮੀਪੇ ਵਾ, ਸਮੀਪਤ੍ਥੇ ਚੇਤਂ ਭੁਮ੍ਮਵਚਨਂ.
ਸੋਤਾਪਤ੍ਤਿਫਲਂ ਸਚ੍ਛਿਕਤ੍ਵਾ ਪਰਿਵਿਸੀਤਿ ਸਮ੍ਬਨ੍ਧੋ. ਸਬ੍ਬਂ ਇਤ੍ਥਾਗਾਰਨ੍ਤਿ ਸਬ੍ਬੋ ਓਰੋਧੋ. ਸੋ ਹਿ ਇਤ੍ਥੀਨਂ ਅਗਾਰਨ੍ਤਿ ਇਤ੍ਥਾਗਾਰਨ੍ਤਿ ਵੁਚ੍ਚਤਿ. ਇਮਿਨਾ ਵਚਨਤ੍ਥੇਨ ਅਗਾਰਮੇਵ ਮੁਖ੍ਯਤੋ ਲਬ੍ਭਤਿ, ਰਾਜਿਤ੍ਥਿਯੋ ਪਨ ਉਪਚਾਰੇਨਾਤਿ ਦਟ੍ਠਬ੍ਬਂ. ਸਾ ਪਨਾਤਿ ਰਾਹੁਲਮਾਤਾ ਪਨ. ਪਰਿਜਨੇਨਾਤਿ ਪਰਿਵਾਰੇਨ. ਨਨ੍ਤਿ ਅਯ੍ਯਪੁਤ੍ਤਂ. ‘‘ਰਾਜਾਨ’’ਨ੍ਤਿਪਦਂ ‘‘ਗਾਹਾਪੇਤ੍ਵਾ’’ਤਿਪਦੇ ਕਾਰਿਤਕਮ੍ਮਂ, ‘‘ਪਤ੍ਤ’’ਨ੍ਤਿਪਦਂ ਤਤ੍ਥੇਵ ਧਾਤੁਕਮ੍ਮਂ. ਰਾਜਧੀਤਾਯਾਤਿ ਸੁਪ੍ਪਬੁਦ੍ਧਰਞ੍ਞੋ ਧੀਤਾਯ. ਸਾਤਿ ਰਾਜਧੀਤਾ. ਗੋਪ੍ਫਕੇਸੂਤਿ ਚਰਣਗਣ੍ਠੀਸੁ ਭਗਵਨ੍ਤਂ ਗਹੇਤ੍ਵਾਤਿ ਯੋਜਨਾ. ਅਥ ਵਾ ਭਗਵਤੋ ਗੋਪ੍ਫਕੇ ਗਹੇਤ੍ਵਾਤਿ ਯੋਜਨਾ. ਏਵਞ੍ਹਿ ਸਤਿ ਉਪਯੋਗਤ੍ਥੇ ਭੁਮ੍ਮਵਚਨਨ੍ਤਿ ਦਟ੍ਠਬ੍ਬਂ.
ਰਾਜਾ ਕਥੇਸੀਤਿ ਸਮ੍ਬਨ੍ਧੋ. ਅਨਚ੍ਛਰਿਯਨ੍ਤਿ ਨ ਅਚ੍ਛਰਿਯਂ, ਅਚ੍ਛਰਂ ਪਹਰਿਤੁਂ ਨ ਯੋਗ੍ਯਨ੍ਤਿ ਅਤ੍ਥੋ. ਰਾਜਧੀਤਾ ਯਂ ਅਤ੍ਤਾਨਂ ਰਕ੍ਖਿ, ਇਦਂ ਅਨਚ੍ਛਰਿਯਨ੍ਤਿ ਯੋਜਨਾ.
ਤਂਦਿਵਸਮੇਵਾਤਿ ਤਸ੍ਮਿਂ ਦੁਤਿਯਦਿਵਸੇਯੇਵ. ਕੇਸਵਿਸਜ੍ਜਨਨ੍ਤਿ ਰਾਜਚੂਲ਼ਾਮਣਿਬਨ੍ਧਨਤ੍ਥਂ ਕੁਮਾਰਕਾਲੇ ਬਨ੍ਧਿਤਸਿਖਾਵੇਣਿਸਙ੍ਖਾਤਸ੍ਸ ਕੇਸਸ੍ਸ ਵਿਸਜ੍ਜਨਂ, ਮੋਚਨਨ੍ਤਿ ਅਤ੍ਥੋ. ਪਟ੍ਟਬਨ੍ਧੋਤਿ ਅਸੁਕੋ ਨਾਮ ਰਾਜਾਤਿ ਨਲਾਟੇ ਸੁਵਣ੍ਣਮਯਸ੍ਸ ਪਟ੍ਟਸ੍ਸ ਬਨ੍ਧਨਂ. ਘਰਮਙ੍ਗਲਨ੍ਤਿ ਅਭਿਨਵਘਰਂ ਪਵੇਸਨਮਙ੍ਗਲਂ. ਆਵਾਹਮਙ੍ਗਲਨ੍ਤਿ ਆਵਾਹੇ ਪਵਤ੍ਤਂ ਮਙ੍ਗਲਂ. ਛਤ੍ਤਮਙ੍ਗਲਨ੍ਤਿ ਰਾਜਛਤ੍ਤੁਸ੍ਸਾਪਨਕਾਲੇ ਪਵਤ੍ਤਂ ਮਙ੍ਗਲਂ. ਮਙ੍ਗਲਂ ਵਤ੍ਵਾਤਿ ਮਙ੍ਗਲਸਂਯੁਤ੍ਤਂ ਧਮ੍ਮਕਥਂ ਕਥੇਤ੍ਵਾ. ਜਨਪਦਕਲ੍ਯਾਣੀਤਿ ਜਨਪਦਮ੍ਹਿ ਕਲ੍ਯਾਣਸਮਨ੍ਨਾਗਤਾ. ਤੁਵਟ੍ਟਂ ਖੋਤਿ ਖਿਪ੍ਪਮੇਵ. ਸੋਪੀਤਿ ਨਨ੍ਦਰਾਜਕੁਮਾਰੋਪਿ. ਇਤੀਤਿਆਦਿ ਨਿਗਮਨਂ. ਦੁਤਿਯਦਿਵਸੇਤਿ ਕਪਿਲਵਤ੍ਥੁਪਤ੍ਤਦਿਵਸਤੋ ਦੁਤਿਯੇ ਦਿਵਸੇ. ਧਮ੍ਮਪਦਅਟ੍ਠਕਥਾਯਂ (ਧ. ਪ. ਅਟ੍ਠ. ੧.ਨਨ੍ਦਤ੍ਥੇਰਵਤ੍ਥੁ; ਥੇਰਗਾ. ਅਟ੍ਠ. ੧.ਨਨ੍ਦਤ੍ਥੇਰਗਾਥਾਵਣ੍ਣਨਾ) ਪਨ ‘‘ਤਤਿਯਦਿਵਸੇ ਨਨ੍ਦਂ ਪਬ੍ਬਾਜੇਸੀ’’ਤਿ ਵੁਤ੍ਤਂ.
ਸਤ੍ਤਮੇ ਦਿਵਸੇਤਿ ਕਪਿਲਵਤ੍ਥੁਪਤ੍ਤਦਿਵਸਤੋਯੇਵ ਸਤ੍ਤਮੇ ਦਿਵਸੇ. ਏਤਂ ਸਮਣਂ ਪਸ੍ਸਾਤਿ ਯੋਜਨਾ. ਬ੍ਰਹ੍ਮਰੂਪਵਣ੍ਣਨ੍ਤਿ ਬ੍ਰਹ੍ਮੁਨੋ ਰੂਪਸਙ੍ਖਾਤੋ ਵਣ੍ਣੋ ਵਿਯ ਵਣ੍ਣੋ ਇਮਸ੍ਸਾਤਿ ਬ੍ਰਹ੍ਮਰੂਪਵਣ੍ਣੋ, ਤਂ. ਅਯਨ੍ਤਿ ਅਯਂ ਸਮਣੋ. ਤ੍ਯਸ੍ਸਾਤਿ ਤੇ ਅਸ੍ਸ. ਤੇਤਿ ਨਿਧਯੋ. ਅਸ੍ਸਾਤਿ ਸਮਣਸ੍ਸ. ਨਨ੍ਤਿ ਸਮਣਂ. ਯਾਚਾਤਿ ਯਾਚਾਹਿ. ਅਯਂ ਦ੍ਵਿਕਮ੍ਮਿਕਧਾਤੁ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪੁਤ੍ਤੋ ਪਿਤੁਸਨ੍ਤਕਸ੍ਸ ਸਾਮਿਕੋ, ਇਤਿ ਤਸ੍ਮਾ ਮੇ ਦੇਹੀਤਿ ਯੋਜਨਾ. ਅਨੁਰੂਪਂ ਵਚਨਨ੍ਤਿ ਸਮ੍ਬਨ੍ਧੋ. ਭਗਵਨ੍ਤਂ ਅਨੁਬਨ੍ਧੀਤਿ ਭਗਵਤੋ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਿ.
ਨ ਵਿਸਹਤੀਤਿ ਨ ਸਮਤ੍ਥੇਤਿ. ਅਯਂ ਕੁਮਾਰੋ ਪਿਤੁਸਨ੍ਤਕਂ ਯਂ ਧਨਂ ਇਚ੍ਛਤਿ, ਤਨ੍ਤਿ ਯੋਜਨਾ. ਵਟ੍ਟਾਨੁਗਤਨ੍ਤਿ ਵਟ੍ਟਦੁਕ੍ਖਂ ਅਨੁਗਤਂ. ਸਵਿਘਾਤਕਨ੍ਤਿ ਵਿਘਾਤਕੇਹਿ ਪਞ੍ਚਹਿ ਵੇਰੇਹਿ ਸਹਿਤਂ. ਅਸ੍ਸਾਤਿ ਕੁਮਾਰਸ੍ਸ. ਨਨ੍ਤਿ ਕੁਮਾਰਂ. ਅਯਨ੍ਤਿ ਕੁਮਾਰੋ. ਦਾਯਜ੍ਜਨ੍ਤਿ ਦਾਯਸਙ੍ਖਾਤਂ ਮਾਤਾਪਿਤੂਨਂ ਧਨਂ ਆਦਦਾਤੀਤਿ ਦਾਯਾਦੋ, ਪੁਤ੍ਤੋ, ਤਸ੍ਸ ਇਦਨ੍ਤਿ ਦਾਯਜ੍ਜਂ, ਮਾਤਾਪਿਤੂਨਂ ਧਨਂ.
‘‘ਕਥਾਹਂ ਭਨ੍ਤੇ ਰਾਹੁਲਕੁਮਾਰਂ ਪਬ੍ਬਾਜੇਮੀ’’ਤਿ ਕਸ੍ਮਾ ਆਹ, ਨਨੁ ਆਯਸ੍ਮਾ ਸਾਰਿਪੁਤ੍ਤੋ ਬਾਰਾਣਸਿਯਂ ਤੀਹਿ ਸਰਣਗਮਨੇਹਿ ਅਨੁਞ੍ਞਾਤਂ ਪਬ੍ਬਜ੍ਜਂ ਨ ਜਾਨਾਤੀਤਿ ਆਹ ‘‘ਇਦਾਨੀ’’ਤਿਆਦਿ. ਯਾ ਸਾ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਨੁਞ੍ਞਾਤਾਤਿ ਯੋਜਨਾ. ਤਤੋਤਿ ਪਬ੍ਬਜ੍ਜਾਉਪਸਮ੍ਪਦਤੋ. ਉਪਸਮ੍ਪਦਂ ਪਟਿਕ੍ਖਿਪਿਤ੍ਵਾਤਿ ਸਮ੍ਬਨ੍ਧੋ. ਵਿਮਤੀਤਿ ਵਿਵਿਧਾ ਇਚ੍ਛਾ. ਇਮਞ੍ਚ ਪਨਤ੍ਥਨ੍ਤਿ ਇਮਮੇਵ ਵਿਮਤਿਸਙ੍ਖਾਤਮਤ੍ਥਂ. ਧਮ੍ਮਸੇਨਾਪਤਿ ਆਹਾਤਿ ਸਮ੍ਬਨ੍ਧੋ. ਭਗਵਤੋ ਤਂ ਅਜ੍ਝਾਸਯਨ੍ਤਿ ਯੋਜਨਾ.
‘‘ਅਥ ਖੋ…ਪੇ… ਪਬ੍ਬਾਜੇਸੀ’’ਤਿ ਏਤ੍ਥ ਕਿਂ ਕੁਮਾਰਸ੍ਸ ਕੇਸਚ੍ਛੇਦਨਾਦੀਨਿ ਸਬ੍ਬਕਿਚ੍ਚਾਨਿ ਆਯਸ੍ਮਾ ਸਾਰਿਪੁਤ੍ਤੋਯੇਵ ਕਰੋਤੀਤਿ ਆਹ ‘‘ਮਹਾਮੋਗ੍ਗਲ੍ਲਾਨਤ੍ਥੇਰੋ’’ਤਿਆਦਿ. ਓਵਾਦਾਚਰਿਯੋਤਿ ਨਿਵਾਸਨਪਾਰੁਪਨਾਦੀਸੁ ਸੇਖਿਯਵਤ੍ਤੇਸੁ, ਆਭਿਸਮਾਚਾਰਿਕੇਸੁ ਚ ਓਵਾਦਕੋ ਆਚਰਿਯੋ. ਅਥ ਕਸ੍ਮਾ ‘‘ਆਯਸ੍ਮਾ ਸਾਰਿਪੁਤ੍ਤੋ ਰਾਹੁਲਕੁਮਾਰਂ ਪਬ੍ਬਾਜੇਸੀ’’ਤਿ ਵੁਤ੍ਤਨ੍ਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਤਤ੍ਥਾਤਿ ਤਸ੍ਸਂ ਪਬ੍ਬਜ੍ਜਾਉਪਸਮ੍ਪਦਾਯਂ. ਨ ਆਚਰਿਯੋਤਿ ਪਬ੍ਬਜ੍ਜਾਚਰਿਯੋ ਚ ਓਵਾਦਾਚਰਿਯੋ ਚ ਨ ਇਸ੍ਸਰੋ.
ਉਪ੍ਪਨ੍ਨਸਂਵੇਗੇਨ ਹਦਯੇਨਾਤਿ ਏਤ੍ਥ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਉਪ੍ਪਨ੍ਨਸਂਵੇਗੋ ਹਦਯੋ ਹੁਤ੍ਵਾਤਿ ਹਿ ਯੋਜਨਾ. ਸਬ੍ਬਨ੍ਤਿ ਸਬ੍ਬਂ ਵਚਨਂ.
ਤਤ੍ਥਾਤਿ ਪੁਰਿਮਵਚਨਾਪੇਕ੍ਖਂ. ਅਵਿਸੇਸੇਨਾਤਿ ‘‘ਧਨ’’ਨ੍ਤਿ ਵਾ ‘‘ਅਞ੍ਞ’’ਨ੍ਤਿ ਵਾ ‘‘ਸਾਵਜ੍ਜ’’ਨ੍ਤਿ ਵਾ ‘‘ਅਨਵਜ੍ਜ’’ਨ੍ਤਿ ਵਾ ਵਿਸੇਸਮਕਤ੍ਵਾ ਸਾਮਞ੍ਞੇਨ. ਨ ਚ ਬੁਦ੍ਧਾਨਨ੍ਤਿ ਏਤ੍ਥ ਚਸਦ੍ਦੇਨ ਨ ਕੇਵਲਂ ਅਪਟਿਰੂਪਮੇਵ, ਅਥ ਖੋ ਬੁਦ੍ਧਾਨਞ੍ਚ ਨ ਆਚਿਣ੍ਣਨ੍ਤਿ ਅਤ੍ਥਂ ਦਸ੍ਸੇਤਿ. ਯਨ੍ਤਿ ਯਂ ਵਰਂ. ਤਥਾ ਨਨ੍ਦੇਤਿ ਏਤ੍ਥ ਤਥਾਸਦ੍ਦਸ੍ਸ ਉਪਮੇਯ੍ਯਤ੍ਥਜੋਤਕਭਾਵਂ ਦਸ੍ਸੇਨ੍ਤੋ ਆਹ ‘‘ਯਥੇਵ ਕਿਰਾ’’ਤਿਆਦਿ. ਯਥੇਵ ਬੋਧਿਸਤ੍ਤਂ ਬ੍ਯਾਕਰਿਂਸੁ, ਏਵਂ ਨਨ੍ਦਮ੍ਪਿ ਰਾਹੁਲਮ੍ਪਿ ਬ੍ਯਾਕਰਿਂਸੁ ਕਿਰਾਤਿ ਯੋਜਨਾ. ਪਾਲ਼ਿਯਂ ਪਨ ਯਥਾ ਭਗਵਤਿ ਮੇ ਭਨ੍ਤੇ ਪਬ੍ਬਜਿਤੇ ਅਨਪ੍ਪਕਂ ਦੁਕ੍ਖਂ ਅਹੋਸਿ, ਤਥਾ ਨਨ੍ਦੇ ਪਬ੍ਬਜਿਤੇ ਅਨਪ੍ਪਕਂ ਦੁਕ੍ਖਂ ਅਹੋਸਿ, ਤਥਾ ਰਾਹੁਲੇ ਪਬ੍ਬਜਿਤੇ ਅਧਿਮਤ੍ਤਂ ਦੁਕ੍ਖਂ ਅਹੋਸੀਤਿ ਯੋਜਨਾ. ਨੇਮਿਤ੍ਤਕਾਤਿ ਸੁਭਾਸੁਭਨਿਮਿਤ੍ਤਂ ਕਥੇਨ੍ਤੀਤਿ ਨੇਮਿਤ੍ਤਕਾ. ਪੁਤ੍ਤਸ੍ਸਾਤਿ ਜੇਟ੍ਠਪੁਤ੍ਤਸ੍ਸ ਸਿਦ੍ਧਤ੍ਥਕੁਮਾਰਸ੍ਸ. ਪਬ੍ਬਜ੍ਜਾਯਾਤਿ ਪਬ੍ਬਜ੍ਜਾਹੇਤੁ ਪਬ੍ਬਜ੍ਜਾਕਾਰਣਾ, ਪਬ੍ਬਜ੍ਜਾਨਿਮਿਤ੍ਤਂ ਵਾ. ਤਤੋਤਿ ਭਗਵਤੋ ਪਬ੍ਬਜ੍ਜਤੋ. ਤਮ੍ਪੀਤਿ ਨਨ੍ਦਮ੍ਪਿ. ਇਤੀਤਿ ਈਦਿਸਂ. ਭਗਵਤੋ ਪਬ੍ਬਜ੍ਜਾਯ ਮਹਨ੍ਤਂ ਇਚ੍ਛਾਵਿਘਾਤਸਦਿਸਨ੍ਤਿ ਅਤ੍ਥੋ. ਤਮ੍ਪੀਤਿ ਰਾਹੁਲਮ੍ਪਿ. ਤੇਨਾਤਿ ਪਬ੍ਬਜ੍ਜਾਹੇਤੁਨਾ. ਅਸ੍ਸਾਤਿ ਰਞ੍ਞੋ. ਉਪ੍ਪਜ੍ਜੀਤਿ ਸਮ੍ਬਨ੍ਧੋ. ਇਤੋਤਿ ਸੋਕੁਪ੍ਪਤ੍ਤਿਤੋ ਵਰਯਾਚਨਤੋ ਵਾ.
ਸੋਤਿ ਰਾਜਾ. ਯਤ੍ਰ ਹਿ ਨਾਮਾਤਿ ਯੋ ਨਾਮ. ਅਹਮ੍ਪਿ ਨਾਮ ਯੋ ਯਾਦਿਸੋ ਬੁਦ੍ਧਮਾਮਕੋ ਧਮ੍ਮਮਾਮਕੋ ਸਙ੍ਘਮਾਮਕੋ ਸਮਾਨੋ, ਸੋ ਤਾਦਿਸੋ ਅਹਮ੍ਪਿ ਨ ਸਕ੍ਕੋਮੀਤਿ ਯੋਜਨਾ. ਅਞ੍ਞੇਤਿ ਮਯਾ ਅਪਰੇ. ਦੁਕ੍ਖਨ੍ਤਿ ਞਾਤਿਵਿਯੋਗਦੁਕ੍ਖਂ. ਨਿਯ੍ਯਾਨਿਕਕਾਰਣਨ੍ਤਿ ਮਨੁਸ੍ਸਾਨਂ ਗਰਹਉਪਵਾਦਅਕ੍ਕੋਸਤੋ ਨਿਯ੍ਯਾਨਿਕਂ ਕਾਰਣਂ.
ਤਤ੍ਥਾਤਿ ‘‘ਅਨਨੁਞ੍ਞਾਤੋ’’ਤਿਆਦਿਵਚਨੇ. ਜਨੇਤੀਤਿ ਜਨਨੀ, ਮਾਤਾ. ਜਨੇਤੀਤਿ ਜਨਕੋ, ਪਿਤਾ. ਇਮਿਨਾ ਪੋਸਾਵਨਿਕਮਾਤਾਪਿਤਰੋ ਨਿਵਤ੍ਤੇਤਿ. ਮਾਤਾ ਵਾ ਮਤਾ ਹੋਤੀਤਿ ਯੋਜਨਾ. ਸੋ ਏਵ ਵਾਤਿ ਪੁਤ੍ਤੋ ਏਵ ਵਾ. ਅਨੁਞ੍ਞਾਤੋਮ੍ਹੀਤਿ ਵਦਤੀਤਿ ਸਚ੍ਚੇਨ ਵਾ ਅਲਿਕੇਨ ਵਾ ‘‘ਅਨੁਞ੍ਞਾਤੋਮ੍ਹੀ’’ਤਿ ਵਦਤਿ. ਮਾਤਾ ਵਾ ਸਯਂ ਪਬ੍ਬਜਿਤਾਤਿ ਯੋਜਨਾ. ਪਿਤਸ੍ਸਾਤਿ ਪਿਤਾ ਅਸ੍ਸ. ਅਸ੍ਸਾਤਿ ਪੁਤ੍ਤਸ੍ਸ. ਵਿਪ੍ਪਵੁਤ੍ਥੋਤਿ ਮਾਤੁਯਾ ਕੇਨਚਿ ਕਾਰਣੇਨ ਪਵਾਸੋ.
ਚੂਲ਼ਮਾਤਾਦੀਨਨ੍ਤਿਆਦਿਸਦ੍ਦੇਨ ਮਹਾਮਾਤਾਦੀਨਿ ਸਙ੍ਗਣ੍ਹਾਤਿ. ਪੋਸਨਕਾਤਿ ਵਡ੍ਢਨਕਾ. ਤੇਸੁਪੀਤਿ ਪੋਸਨਕਮਾਤਾਪਿਤਰੇਸੁਪਿ.
ਯਂ ਪਨ ਪੁਤ੍ਤਂ ਨਾਨੁਜਾਨਨ੍ਤੀਤਿ ਸਮ੍ਬਨ੍ਧੋ. ਜੀਵਸ੍ਸੇਵਾਤਿ ਤਸ੍ਸ ਜੀਵਸ੍ਸ ਏਵ, ਪਬ੍ਬਾਜੇਨ੍ਤਸ੍ਸ ਵਾ ਭਿਕ੍ਖੁਸ੍ਸ, ਨ ਦੇਸਨ੍ਤਰਗਮਨਾਦੀਨਮਤ੍ਥਾਯਾਤਿ ਅਤ੍ਥੋ. ਤੇਸਨ੍ਤਿ ਮਾਤਾਪਿਤੂਨਂ.
ਮਹਾਕਨ੍ਤਾਰੋਤਿ ਕੇਨ ਉਦਕੇਨ ਤਰਿਤਬ੍ਬੋਤਿ ਕਨ੍ਤਾਰੋ, ਨਿਰੁਦਕਕਨ੍ਤਾਰੋਵ ਮੁਖ੍ਯਤੋ ਲਬ੍ਭਤਿ, ਵਾਲ਼ਕਨ੍ਤਾਰੋ ਚੋਰਕਨ੍ਤਾਰੋ ਅਮਨੁਸ੍ਸਕਨ੍ਤਾਰੋ ਦੁਬ੍ਭਿਕ੍ਖਕਨ੍ਤਾਰੋ ਮਰੁਕਨ੍ਤਾਰੋਤਿ ਇਮੇ ਪਞ੍ਚ ਕਨ੍ਤਾਰਾ ਰੂਲ਼੍ਹੀਵਸੇਨ. ਮਹਨ੍ਤੋ ਕਨ੍ਤਾਰੋ ਮਹਾਕਨ੍ਤਾਰੋ.
ਯਾਵਤਕੇਤਿ ਏਤ੍ਥ ਯਾਵਸਦ੍ਦੋ ਪਮਾਣਤ੍ਥੋਤਿ ਆਹ ‘‘ਯਤ੍ਤਕੇ’’ਤਿ.