੩੩. ਇਣਾਯਿਕਵਤ੍ਥੁਕਥਾ

੯੬. ਇਣਾਯਿਕੋ ਨਾਮਾਤਿ ਏਤ੍ਥ ਇਣਨ੍ਤਿ ਉਦ੍ਧਾਰੋ. ਸੋ ਹਿ ਯਸ੍ਮਾ ਏਤਿ ਵੁਦ੍ਧਿਂ ਗਚ੍ਛਤਿ, ਤਸ੍ਮਾ ਇਣਨ੍ਤਿ ਵੁਚ੍ਚਤਿ. ਤਂ ਗਣ੍ਹਾਤਿ, ਧਾਰੇਤੀਤਿ ਵਾ ਇਣਾਯਿਕੋ. ਯਂ ਵਾਤਿ ਜਨਂ ਵਾ ਆਠਪੇਤ੍ਵਾਤਿ ਸਮ੍ਬਨ੍ਧੋ. ਆਠਪੇਤ੍ਵਾਤਿ ਚ ਪੇਸਨਤ੍ਥਾਯ ਧਨਸਾਮਿਕਸ੍ਸ ਸਨ੍ਤਿਕੇ ਠਪੇਤ੍ਵਾਤਿ ਅਤ੍ਥੋ. ਆਕਾਰੋ ਹਿ ਪੇਸਨਤ੍ਥਵਾਚਕੋ. ਸੋਪੀਤਿ ਪਿਸਦ੍ਦੋ ਪੁਰਿਮਜਨੇ ਅਪੇਕ੍ਖਤਿ. ‘‘ਧਾਰੇਤੀ’’ਤਿ ਇਮਿਨਾ ਆਯਿਕਪਚ੍ਚਯੋ ਧਾਰਣਤ੍ਥੇ ਹੋਤੀਤਿ ਦਸ੍ਸੇਤਿ. ਅਞ੍ਞੇਤਿ ਮਾਤਾਪਿਤੂਹਿ ਅਞ੍ਞੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤੇਤਿ ਅਞ੍ਞੇ ਞਾਤਕਾ, ਤਂ ਆਠਪੇਤੁਂ ਯਸ੍ਮਾ ਨ ਇਸ੍ਸਰਾ, ਤਸ੍ਮਾ ਨ ਇਣਾਯਿਕੋਤਿ ਯੋਜਨਾ. ਇਤਰਨ੍ਤਿ ਨਇਣਾਯਿਕਤੋ ਅਞ੍ਞਂ. ਅਸ੍ਸਾਤਿ ਜਨਸ੍ਸ. ਨਨ੍ਤਿ ਤਂ ਜਨਂ. ਤੇਸੂਤਿ ਞਾਤਿਸਾਲੋਹਿਤਾਦੀਸੁ. ਤਥਾਰੂਪਸ੍ਸਾਤਿ ਅਤ੍ਤਨੋ ਞਾਤਿਸਾਲੋਹਿਤਸ੍ਸਾਤਿ ਅਤ੍ਥੋ. ਆਰੋਚੇਤਬ੍ਬਾਕਾਰਂ ਦਸ੍ਸੇਨ੍ਤੋ ਆਹ ‘‘ਸਹੇਤੁਕੋ’’ਤਿਆਦਿ. ਤਤ੍ਥ ਸਹੇਤੁਕੋਤਿ ਭਬ੍ਬੋ. ਸੋਤਿ ਉਪਟ੍ਠਾਕੋ. ਪਟਿਪਜ੍ਜਤੀਤਿ ਪਟਿਦਦਾਤਿ. ਏਤਨ੍ਤਿ ਕਪ੍ਪਿਯਭਣ੍ਡਂ. ਅਜਾਨਿਤ੍ਵਾਤਿ ਇਣਾਯਿਕਭਾਵਮਜਾਨਿਤ੍ਵਾ. ਪਸ੍ਸਨ੍ਤੇਨਾਤਿ ਇਣਾਯਿਕਂ ਪਸ੍ਸਨ੍ਤੇਨ. ‘‘ਅਪਸ੍ਸਨ੍ਤਸ੍ਸ ਗੀਵਾ ਨ ਹੋਤੀ’’ਤਿ ਇਮਿਨਾ ਪਸ੍ਸਿਤ੍ਵਾ ਅਦਸ੍ਸੇਨ੍ਤਸ੍ਸ ਗੀਵਾ ਹੋਤੀਤਿ ਦਸ੍ਸੇਤਿ.

ਪੁਚ੍ਛਿਯਮਾਨੋਪੀਤਿ ‘‘ਕਿਂ ਤ੍ਵਂ ਇਣਾਯਿਕੋਸੀ’’ਤਿ ਪੁਚ੍ਛਿਯਮਾਨੋਪਿ. ਤਨ੍ਤਿ ਇਣਾਯਿਕਂ. ਤਤ੍ਥਾਤਿ ਅਞ੍ਞਸ੍ਮਿਂ ਦੇਸੇ. ਤਨ੍ਤਿ ਇਣਸਾਮਿਕਂ. ਸੋਤਿ ਇਣਸਾਮਿਕੋ. ਅਯਨ੍ਤਿ ਇਣਾਯਿਕੋ. ਅਯਨ੍ਤਿ ਵਚਨਾ. ਤਤ੍ਥਾਤਿ ਇਣਾਯਿਕਸ੍ਸ ਪਬ੍ਬਾਜਨੇ. ਸਾਮੀਚੀਤਿ ਅਨੁਧਮ੍ਮਤਾ.

ਨਨ੍ਤਿ ਇਣਾਯਿਕਂ. ਸੋਤਿ ਇਣਸਾਮਿਕੋ. ਅਸ੍ਸਾਤਿ ਥੇਰਸ੍ਸ. ਗੀਵਾ ਨ ਹੋਤੀਤਿ ਸਮ੍ਬਨ੍ਧੋ. ਅਚ੍ਛਤੂਤਿ ਆਸਤੁ ਉਪਵੇਸਤੂਤਿ ਅਤ੍ਥੋ. ਸੋਤਿ ਇਣਾਯਿਕੋ. ਈਦਿਸੋਤਿ ਸਹੇਤੁਕੋ ਵਤ੍ਤਸਮ੍ਪਨ੍ਨੋਤਿ ਅਤ੍ਥੋ. ਅਤਿਆਰਾਧਕੋਤਿ ਵਤ੍ਤਾਚਾਰੇਨ ਥੇਰਸ੍ਸ ਅਤਿਤੋਸਕੋ.