੩੪. ਦਾਸਵਤ੍ਥੁਕਥਾ

੯੭. ਦਾਸਾਤਿ ਚੇਟਕਾ. ਤੇ ਹਿ ਸਾਮਿਕੇਹਿ ਦੁਕ੍ਖੇ ਵਾ ਦੁਟ੍ਠਕਮ੍ਮੇ ਵਾ ਅਸੀਯਨ੍ਤਿ ਖਿਪੀਯਨ੍ਤੀਤਿ ਦਾਸਾਤਿ ਵੁਚ੍ਚਨ੍ਤਿ. ਤਤ੍ਥਾਤਿ ਚਤੂਸੁ ਦਾਸੇਸੁ. ‘‘ਘਰਦਾਸਿਯਾ ਪੁਤ੍ਤੋ’’ਤਿ ਇਮਿਨਾ ਅਨ੍ਤੋਗੇਹੇ ਘਰਦਾਸਿਯਾ ਕੁਚ੍ਛਿਮ੍ਹਿ ਜਾਤੋ ਅਨ੍ਤੋਜਾਤੋਤਿ ਵਚਨਤ੍ਥਂ ਦਸ੍ਸੇਤਿ. ਧਨਂ ਦਤ੍ਵਾ ਕੀਤੋ ਧਨਕ੍ਕੀਤੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਧਨਕ੍ਕੀਤੋ ਨਾਮਾ’’ਤਿਆਦਿ. ਧਨੇਨ ਕੀਤੋ ਧਨਕ੍ਕੀਤੋਤਿ ਵਚਨਤ੍ਥੋਪਿ ਯੁਤ੍ਤੋਯੇਵ. ਦਾਸਚਾਰਿਤ੍ਤਨ੍ਤਿ ਦੇਸਕਾਲਵਸੇਨ ਦਾਸਾਨਂ ਚਾਰਿਤ੍ਤਂ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਦੇਸੇ, ਕਾਲੇ ਵਾ.

ਕਰਮਰਾਨੀਤੋ ਨਾਮਾਤਿ ਏਤ੍ਥ ਕਰਮਰੋਤਿ ਵਨ੍ਦਿ. ਸੋ ਹਿ ਸਤ੍ਤੂਨਂ ਕਰੇਨ ਹਤ੍ਥੇਨ ਮਰਿਤਬ੍ਬਤ੍ਤਾ ਕਰਮਰੋਤਿ ਵੁਚ੍ਚਤਿ. ਕਰਮਰਭਾਵੇਨ ਆਨੀਤੋ ਕਰਮਰਾਨੀਤੋ. ਤਿਰੋਰਟ੍ਠਾ ਆਹਰਨ੍ਤੀਤਿ ਸਮ੍ਬਨ੍ਧੋ. ਉਪਲਾਪੇਤ੍ਵਾ ਵਾਤਿ ਪਲੋਭੇਤ੍ਵਾ ਵਾ. ਤਤੋਤਿ ਕਸ੍ਮਾਚਿ ਗਾਮਤੋ. ਮਨੁਸ੍ਸਾ ਏਵ ਮਾਨੁਸ੍ਸਕਾਨਿ. ਇਤ੍ਥਿਪੁਰਿਸਾਨਂ ਸਾਧਾਰਣਭਾਵੇਨ ਸਾਮਞ੍ਞਭਾਵਤੋ ਨਪੁਂਸਕਲਿਙ੍ਗਵਸੇਨ ਵੁਤ੍ਤਂ. ਪਿਸਦ੍ਦੇਨ ਨ ਕੇਵਲਂ ਧਨਾਨਿਯੇਵ ਆਹਰਨ੍ਤਿ, ਅਥ ਖੋ ਮਾਨੁਸ੍ਸਕਾਨਿਪੀਤਿ ਸਮ੍ਪਿਣ੍ਡੇਤਿ. ਤਤ੍ਥਾਤਿ ਮਾਨੁਸ੍ਸਕੇਸੁ. ਏਵਰੂਪੋ ਕਰਮਰਾਨੀਤੋ ਦਾਸੋ ਨ ਪਬ੍ਬਾਜੇਤਬ੍ਬੋਤਿ ਯੋਜਨਾ. ਸਬ੍ਬਸਾਧਾਰਣੇਨਾਤਿ ਬਨ੍ਧਨਾਗਾਰਸੋਧਨਕਾਲੇ ਸਬ੍ਬੇਸਂ ਸਾਧਾਰਣੇਨ.

ਦਾਸਬ੍ਯਨ੍ਤਿ ਦਾਸਸ੍ਸ ਭਾਵੋ ਦਾਸਬ੍ਯਂ, ਤਂ. ਤੇਨ ਵੁਤ੍ਤਂ ‘‘ਦਾਸਭਾਵ’’ਨ੍ਤਿ. ‘‘ਸਯਮੇਵਾ’’ਤਿ ਇਮਿਨਾ ਸਾਮਂਸਦ੍ਦੋ ਸਯਮਤ੍ਥੇ ਨਿਪਾਤੋਤਿ ਦਸ੍ਸੇਤਿ. ਭੁਜਿਸ੍ਸਿਤ੍ਥਿਯੋਤਿ ਰਞ੍ਞੋ ਭੁਜਿਸ੍ਸਿਤ੍ਥਿਯੋ. ਵਣ੍ਣਦਾਸੀਹੀਤਿ ਨਗਰਸੋਭਿਨੀਹਿ. ਤਾ ਹਿ ਵਣ੍ਣਸਮ੍ਪਨ੍ਨਦਾਸਿਭਾਵਤੋ ਵਣ੍ਣਦਾਸੀਤਿ ਵੁਚ੍ਚਨ੍ਤਿ. ਤਾਸਨ੍ਤਿ ਭੁਜਿਸ੍ਸਿਤ੍ਥੀਨਂ. ਪਣ੍ਣਨ੍ਤਿ ਦਾਸਿਪਣ੍ਣਂ. ਭਟਿਪੁਤ੍ਤਕਗਣਾਦੀਨਨ੍ਤਿ ਆਦਿਸਦ੍ਦੇਨ ਮਲ੍ਲਪੁਤ੍ਤਗਣਾਦਯੋ ਸਙ੍ਗਣ੍ਹਾਤਿ. ਇਮਿਨਾ ਬਹੁਸਾਮਿਕਦਾਸਂ ਦਸ੍ਸੇਤਿ. ਤੇਹੀਤਿ ਭਟਿਪੁਤ੍ਤਕਗਣਾਦੀਹਿ. ਅਦਿਨ੍ਨਾ ਨ ਪਬ੍ਬਾਜੇਤਬ੍ਬਾਤਿ ਬਹੂਸੁ ਸਾਮਿਕੇਸੁ ਏਕੇਨਪਿ ਅਦਿਨ੍ਨਾ ਨ ਪਬ੍ਬਾਜੇਤਬ੍ਬਾ. ਤੇਪੀਤਿ ਆਰਾਮਿਕਦਾਸੇਪਿ. ਇਮਸ੍ਮਿਂ ਆਰਾਮਿਕਦਾਸਪਬ੍ਬਾਜਨੇ ਅਟ੍ਠਕਥਾਵਾਦਂ ਦਸ੍ਸੇਨ੍ਤੋ ਆਹ ‘‘ਮਹਾਪਚ੍ਚਰਿਯ’’ਨ੍ਤਿਆਦਿ. ‘‘ਤਕ੍ਕ’’ਨ੍ਤਿ ਪਦਂ ‘‘ਆਸਿਤ੍ਤਕ’’ਇਤਿ ਪਦੇ ਕਮ੍ਮਂ. ‘‘ਸੀਸੇ’’ਤਿ ਪਦਂ ‘‘ਆਸਿਤ੍ਤਕ’’ਇਤਿ ਪਦੇ ਆਧਾਰੋ. ਕੇਸੁਚਿ ਜਨਪਦੇਸੁ ਦੇਸਚਾਰਿਤ੍ਤਵਸੇਨ ਸੀਸੇ ਤਕ੍ਕਸ੍ਸ ਆਸਿਞ੍ਚਨਂ ਦਾਸਾਨਂ ਭੁਜਿਸ੍ਸਕਰਣਨ੍ਤਿ ਅਧਿਪ੍ਪਾਯੋ. ‘‘ਆਰਾਮਿਕਂ ਦੇਮਾ’’ਤਿ ਵਚਨਂ ਦਾਸਾਨਂ ਭੁਜਿਸ੍ਸਵਚਨਨ੍ਤਿ ਵੁਤ੍ਤਂ ਹੋਤਿ. ਯੇਨ ਕੇਨਚਿ ਵੋਹਾਰੇਨਾਤਿ ‘‘ਆਰਾਮਿਕਂ ਦੇਮਾ’’ਤਿ ਵਾ ‘‘ਆਰਾਮਿਕਦਾਸਂ ਦੇਮਾ’’ਤਿ ਵਾ ‘‘ਕਪ੍ਪਿਯਕਾਰਕਂ ਦੇਮਾ’’ਤਿ ਵਾ ਯੇਨ ਕੇਨਚਿ ਵੋਹਾਰੇਨ. ਦ੍ਵੀਸੁ ਅਟ੍ਠਕਥਾਵਾਦੇਸੁ ਕੁਰੁਨ੍ਦਿਵਾਦਸ੍ਸ ਪਚ੍ਛਾ ਵੁਤ੍ਤਤ੍ਤਾ ਸੋਯੇਵ ਪਮਾਣਨ੍ਤਿ ਦਟ੍ਠਬ੍ਬਂ. ਦੁਗ੍ਗਤਮਨੁਸ੍ਸਾਤਿ ਦੁਕ੍ਖਂ ਗਤਮਨੁਸ੍ਸਾ. ਏਤੇਤਿ ਦੁਗ੍ਗਤਮਨੁਸ੍ਸੇ. ਤਂ ਪਬ੍ਬਾਜੇਤੁਂ ਨ ਵਟ੍ਟਤੀਤਿ ਮਾਤਾਪਿਤੂਨਂ ਦਾਸਭਾਵਂ ਉਪਗਤਕਾਲੇ ਜਾਤਂ ਪੁਤ੍ਤਂ ਸਨ੍ਧਾਯ ਵੁਤ੍ਤਂ. ਅਥ ਪਨ ਮਾਤਾਪਿਤਰੋ ਦਾਸਭਾਵਂ ਉਪਗਤਾ, ਨ ਪੁਤ੍ਤੋ, ਤਂ ਪਬ੍ਬਾਜੇਤੁਂ ਵਟ੍ਟਤਿ. ‘‘ਭਿਕ੍ਖੁਸ੍ਸਾ’’ਤਿਪਦਂ ‘‘ਞਾਤਕਾ ਵਾ ਉਪਟ੍ਠਾਕਾ ਵਾ’’ਤਿਪਦੇਸੁ ਸਾਮਿਸਮ੍ਬਨ੍ਧੋ, ‘‘ਦੇਨ੍ਤੀ’’ਤਿ ਪਦੇ ਸਮ੍ਪਦਾਨਂ. ਅਸ੍ਸਾਤਿ ਭਿਕ੍ਖੁਸ੍ਸ. ਇਮਨ੍ਤਿ ਦਾਸਂ. ਅਭਿਰਮਿਸ੍ਸਤੀਤਿ ਭਿਕ੍ਖੁਭਾਵੇ ਅਭਿਰਮਿਸ੍ਸਤਿ. ਵਿਬ੍ਭਮਿਸ੍ਸਤੀਤਿ ਵਿਨਿਵਤ੍ਤੇਤ੍ਵਾ ਗਿਹਿਭਾਵਂ ਭਮਿਸ੍ਸਤਿ. ਇਤਿ ਵਤ੍ਵਾ ਦੇਨ੍ਤੀਤਿ ਸਮ੍ਬਨ੍ਧੋ. ਨਿਸ੍ਸਾਮਿਕਦਾਸੋਤਿ ਪਰਿਗ੍ਗਾਹਕਸਾਮਿਕਵਿਰਹਿਤੋ ਦਾਸੋ. ਨਿਸ੍ਸਾਮਿਕਸ੍ਸ ਦਾਸਸ੍ਸ ਰਾਜਾ ਸਾਮੀ, ਤਸ੍ਮਾ ਰਞ੍ਞਾ ਅਪਰਿਗ੍ਗਹਿਤੇ ਅਤ੍ਤਨਾਵ ਅਤ੍ਤਾਨਂ ਭੁਜਿਸ੍ਸਂ ਕਾਤੁਂ ਵਟ੍ਟਤਿ. ਪਰਿਗ੍ਗਹਿਤੇ ਰਾਜਾਨਂ ਕਾਰਾਪੇਤੁਂ ਵਟ੍ਟਤਿ. ਅਜਾਨਨ੍ਤੋਤਿ ਅਤ੍ਤਨੋ ਦਾਸਭਾਵਮਜਾਨਨ੍ਤੋ.

ਅਨੁਰਾਧਪੁਰਾਤਿ ਅਨੁਰਾਧਨਗਰਤੋ ਨਿਕ੍ਖਮਿਤ੍ਵਾਤਿ ਸਮ੍ਬਨ੍ਧੋ. ਸੋਤਿ ਪੁਤ੍ਤੋ. ਇਧਾਤਿ ਰੋਹਣੇ. ਮਾਤਰਂ ਪੁਚ੍ਛਿਤ੍ਵਾਤਿ ਸਮ੍ਬਨ੍ਧੋ. ਆਗਮ੍ਮਾਤਿ ਆਗਨ੍ਤ੍ਵਾ. ਅਤਿਚ੍ਛਥਾਤਿ ਅਤਿਕ੍ਕਮਿਤ੍ਵਾ ਇਚ੍ਛਥ, ਇਧ ਕਿਞ੍ਚਿ ਦੇਯ੍ਯਧਮ੍ਮਂ ਨਤ੍ਥਿ, ਇਦਂ ਅਤਿਕ੍ਕਮਿਤ੍ਵਾ ਅਞ੍ਞਤ੍ਥ ਠਾਤੁਮਿਚ੍ਛਥਾਤਿ ਵੁਤ੍ਤਂ ਹੋਤਿ. ਤੇਤਿ ਘਰਸਾਮਿਕਾ. ਚਤੂਹਿ ਪਚ੍ਚਯੇਹਿ ਪਟਿਜਗ੍ਗਨ੍ਤਾ ਵਸਾਪੇਸੁਨ੍ਤਿ ਯੋਜਨਾ.