੨੮. ਚੋਰਵਤ੍ਥੁਕਥਾ

੯੧. ਦਿਟ੍ਠਪੁਬ੍ਬੋਤਿ ਅਙ੍ਗੁਲਿਮਾਲੋ ਪੁਬ੍ਬੇ ਦਿਟ੍ਠੋ. ਅਯਨ੍ਤਿ ਚੋਰੋ. ਸੋਤਿ ਅਙ੍ਗੁਲਿਮਾਲੋ. ਅਞ੍ਞੇਸਂ ਸਨ੍ਤਿਕਾ ਵਚਨਂ ਸੁਣਨ੍ਤੀਤਿ ਯੋਜਨਾ. ਤੇਤਿ ਮਨੁਸ੍ਸਾ. ਉਬ੍ਬਿਜ੍ਜਨ੍ਤਿਪੀਤਿ ਕਾਯੇਨ ਉਬ੍ਬਿਜ੍ਜਨ੍ਤਿਪਿ. ਉਤ੍ਤਸਨ੍ਤਿਪੀਤਿ ਚਿਤ੍ਤੇਨ ਉਤ੍ਤਸਨ੍ਤਿਪਿ. ਅਙ੍ਗੁਲਿਮਾਲੋ ਭਿਕ੍ਖੂਹਿ ਨ ਪਬ੍ਬਾਜਿਤੋ, ਨਨੁ ਭਗਵਤਾ ਪਨ ਸਯਂ ਪਬ੍ਬਾਜਿਤੋ, ਅਥ ਕਸ੍ਮਾ ‘‘ਨ ਭਿਕ੍ਖਵੇ’’ਤਿ ਵੁਤ੍ਤਨ੍ਤਿ ਆਹ ‘‘ਭਗਵਾ ਸਯਂ ਧਮ੍ਮਸ੍ਸਾਮੀ’’ਤਿ. ਧਮ੍ਮਸ੍ਸਾਮੀਤਿ ਚ ਧਮ੍ਮਸ੍ਸ ਇਸ੍ਸਰੋ, ਧਮ੍ਮੇਨ ਵਾ ਦੇਵਮਨੁਸ੍ਸਾਨਂ ਇਸ੍ਸਰੋ, ਅਧਿਪਤੀਤਿ ਅਤ੍ਥੋ. ਭਿਕ੍ਖੂਨਂ ਅਕਰਣਤ੍ਥਾਯ ਭਿਕ੍ਖੂਨਂ ਸਿਕ੍ਖਾਪਦਨ੍ਤਿ ਯੋਜਨਾ. ਤਤ੍ਥਾਤਿ ‘‘ਨ ਭਿਕ੍ਖਵੇ’’ਤਿਆਦਿਵਚਨੇ. ‘‘ਧਜਂ ਬਨ੍ਧਿਤ੍ਵਾ’’ਤਿਆਦਿਨਾ ਧਜਸ੍ਸ ਬਨ੍ਧਨਂ ਧਜਬਨ੍ਧੋ, ਧਜਬਨ੍ਧੋ ਵਿਯਾਤਿ ਧਜਬਨ੍ਧੋ, ਧਜਬਨ੍ਧੋ ਹੁਤ੍ਵਾ ਚਰਤੀਤਿ ਧਜਬਨ੍ਧੋਤਿ ਵਚਨਤ੍ਥਂ ਦਸ੍ਸੇਤਿ. ਤਸ੍ਮਾਤਿ ਯਸ੍ਮਾ ਧਜਬਨ੍ਧੋ, ਤਸ੍ਮਾ. ਯੋਤਿ ਚੋਰੋ. ਪਨ੍ਥਦੁਹਨਂ ਵਾਤਿ ਪਨ੍ਥੇ ਦੁਹਨਂ ਵਾ. ਪਞ੍ਞਾਯਤਿ ਚਾਤਿ ਏਤ੍ਥ ਚਸਦ੍ਦੋ ਵਾਕ੍ਯਸਮ੍ਪਿਣ੍ਡਨਤ੍ਥੋ. ਨ ਕੇਵਲਞ੍ਹਿ ਵਿਚਰਤਿਯੇਵ, ਅਥ ਖੋ ਪਞ੍ਞਾਯਤਿ ਚਾਤਿ ਅਤ੍ਥੋ. ਇਦਨ੍ਤਿ ਚੋਰਕਮ੍ਮਂ. ਰਜ੍ਜਨ੍ਤਿ ਰਾਜਭਾਵਂ. ਸੋਤਿ ਰਾਜਪੁਤ੍ਤੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਮਿਨ੍ਤਿ ਰਾਜਪੁਤ੍ਤੇ. ਪੁਬ੍ਬੇਤਿ ਪੁਬ੍ਬਕਾਲੇ. ਤਨ੍ਤਿ ਚੋਰਂ. ਏਵਨ੍ਤਿ ਇਮਿਨਾਕਾਰੇਨ, ਜਾਨਨ੍ਤਿ ਚੇਤਿ ਯੋਜਨਾ. ਅਦਿਸ੍ਸਮਾਨਾਤਿ ਅਤ੍ਤਾਨਂ ਅਪਞ੍ਞਾਯਮਾਨਾ. ਇਦਂ ਸਨ੍ਧਿਚ੍ਛੇਦਾਦਿਚੋਰੇ ਸਨ੍ਧਾਯ ਵੁਤ੍ਤਂ, ਨ ਅਮ੍ਬਲਬੁਜਾਦਿਚੋਰੇ. ਪਚ੍ਛਾਪੀਤਿ ਥੇਯ੍ਯਕਰਣਤੋ ਪਚ੍ਛਾਪਿ. ਤੇਪੀਤਿ ਚੋਰੇਪਿ.

੯੨. ਭਯੇਨਾਤਿ ਭਯਤੋ. ਏਤੇ ਪਨਾਤਿ ਭਿਕ੍ਖੂ ਪਨ. ਲਦ੍ਧਾਭਯਤ੍ਤਾਤਿ ਰਾਜਤੋ ਲਦ੍ਧੋ ਅਭਯੋ ਇਮੇਹੀਤਿ ਲਦ੍ਧਾਭਯਾ, ਤੇਸਂ ਭਾਵੋ ਲਦ੍ਧਾਭਯਤ੍ਤਂ, ਤਸ੍ਮਾ. ਕਾਰਭੇਦਕੋਤਿ ਏਤ੍ਥ ਕਾਰਸਦ੍ਦੋ ਰੁਕ੍ਖਵਿਸੇਸੇ =੦੯ ਚ ਸਕ੍ਕਾਰੇ ਚ ਬਨ੍ਧਨਾਲਯੇ ਚ ਪਵਤ੍ਤਤਿ, ਇਧ ਪਨ ਬਨ੍ਧਨਾਲਯੇਤਿ ਦਸ੍ਸੇਨ੍ਤੋ ਆਹ ‘‘ਕਾਰਂ ਵੁਚ੍ਚਤਿ ਬਨ੍ਧਨਾਗਾਰ’’ਨ੍ਤਿ. ਬਨ੍ਧਨਾਗਾਰਞ੍ਹਿ ਕਰੋਨ੍ਤਿ ਤਂ ਪਵੇਸਿਤੇ ਜਨੇ ਹਿਂਸਨ੍ਤਿ ਏਤ੍ਥਾਤਿ ‘‘ਕਾਰਾ’’ਤਿ ਵੁਚ੍ਚਤਿ. ਇਧਾਤਿ ‘‘ਕਾਰਭੇਦਕੋ’’ਤਿਪਦੇ. ਦੀਪਬਨ੍ਧਨਂ ਵਾ ਹੋਤੂਤਿ ਯੋਜਨਾ. ਇਮੇਹਿ ਪਦੇਹਿ ਨ ਕੇਵਲਂ ਬਨ੍ਧਨਾਗਾਰਂਯੇਵ ਕਾਰਾ ਨਾਮ ਹੋਤਿ, ਅਥ ਖੋ ਅਨ੍ਦੁਬਨ੍ਧਨਾਦੀਨਿਪਿ ਕਾਰਾਯੇਵ ਨਾਮਾਤਿ ਦਸ੍ਸੇਤਿ. ਯੋਤਿ ਚੋਰੋ. ਏਤੇਸੂਤਿ ਬਨ੍ਧਨੇਸੁ. ਮੁਞ੍ਚਿਤ੍ਵਾ ਵਾਤਿ ਰਜ੍ਜੁਬਨ੍ਧਨਂ ਨਿਬ੍ਬੇਠੇਤ੍ਵਾ ਵਾ. ਇਮੇਹਿ ਪਦੇਹਿ ਨ ਕੇਵਲਂ ਕਾਰਾਯ ਭਿਨ੍ਦਨਤੋ ਏਵ ਕਾਰਭੇਦਕੋ ਨਾਮ ਹੋਤਿ, ਅਥ ਖੋ ਛਿਨ੍ਦਨਮੁਞ੍ਚਨਵਿਵਰਣੇਹਿਪਿ ਕਾਰਭੇਦਕੋਯੇਵ ਨਾਮਾਤਿ ਦਸ੍ਸੇਤਿ. ਦੀਪਨ੍ਤਰਨ੍ਤਿ ਬਨ੍ਧਨਦੀਪਤੋ ਅਨ੍ਤਰਂ ਅਞ੍ਞਂ ਦੀਪਨ੍ਤਿ ਅਤ੍ਥੋ. ਚਕ੍ਕਵਾਲ਼ਬਨ੍ਧਨਂ ਭਿਨ੍ਦਿਤ੍ਵਾ ਚਕ੍ਕਵਾਲ਼ਨ੍ਤਰਂ ਗਤੋ ਅਟ੍ਠਕਥਾਯਂ ਨ ਵੁਤ੍ਤੋ. ਸੋਤਿ ਨਚੋਰਕੋ. ਗਾਮਨਿਗਮਪਟ੍ਟਨਾਦੀਨੀਤਿ ਏਤ੍ਥ ਪਟ੍ਟਨਨ੍ਤਿ ਨਾਵਾਪਟ੍ਟਨਂ, ਸਕਟਪਟ੍ਟਨਞ੍ਚ. ਕੇਣਿਯਾਤਿ ਰਞ੍ਞੋ ਦਾਤਬ੍ਬਆਯੇਨ. ਤਨ੍ਤਿ ਕੇਣਿਂ. ਨਿਧਾਨਨ੍ਤਿ ਨਿਕ੍ਖਣਿਤ੍ਵਾ ਠਪਿਤਂ ਧਨਂ. ਉਪਸਂਹਰਿਤ੍ਵਾਤਿ ਰਾਜਾਦੀਨਂ ਸਨ੍ਤਿਕਂ ਹਰਿਤ੍ਵਾ. ਤਨ੍ਤਿ ਕਸਿਕਮ੍ਮਾਦੀਹਿ ਸਮ੍ਪਾਦੇਤ੍ਵਾ ਜੀਵਨ੍ਤਂ. ਤਤ੍ਥੇਵਾਤਿ ਬਨ੍ਧਾਪਿਤਟ੍ਠਾਨੇਯੇਵ.

੯੩. ਯਤ੍ਥਾਤਿ ਯਸ੍ਮਿਂ ਠਾਨੇ. ਯੋ ਕੋਚਿ ਪਲਾਤੋਤਿ ਸਮ੍ਬਨ੍ਧੋ. ਨਨ੍ਤਿ ਯਂ ਕਿਞ੍ਚਿ ਜਨਂ, ਲਿਖਾਪੇਤੀਤਿ ਯੋਜਨਾ. ਪਣ੍ਣੇ ਵਾਤਿ ਕੁਸੇ ਵਾ. ਅਸ੍ਸਾਤਿ ਜਨਸ੍ਸ. ਦਣ੍ਡਨ੍ਤਿ ਧਨਦਣ੍ਡਂ. ਲਿਖਿਤਕੋਤਿ ਲਿਖਿਤਬ੍ਬੋਤਿ ਲਿਖਿਤੋ, ਸੋਯੇਵ ਲਿਖਿਤਕੋ.

੯੪. ਯੋ ਪਨ ਕਸਾਹਿ ਹਞ੍ਞਤੀਤਿ ਸਮ੍ਬਨ੍ਧੋ. ਇਮਿਨਾ ਅਞ੍ਞੇਹਿ ਕਸਾਹਿ ਹਞ੍ਞਤੀਤਿ ਕਸਾਹਤੋਤਿ ਵਚਨਤ੍ਥਂ ਦਸ੍ਸੇਤਿ. ‘‘ਅਯਮੇਵ ਤੇ ਦਣ੍ਡੋ ਹੋਤੂ’’ਤਿ ਇਮਿਨਾ ਕਤਂ ਦਣ੍ਡਕਮ੍ਮਂ ਇਮਸ੍ਸਾਤਿ ਕਤਦਣ੍ਡਕਮ੍ਮੋਤਿ ਵਚਨਤ੍ਥਂ ਦਸ੍ਸੇਤਿ. ਅਲ੍ਲਵਣੋਤਿ ਤਿਨ੍ਤਵਣੋ. ਘਾਤੇਤ੍ਵਾਤਿ ਹਨਿਤ੍ਵਾ ਪਹਰਿਤ੍ਵਾਤਿ ਅਤ੍ਥੋ. ਗਣ੍ਡਿਗਣ੍ਡਿਯੋਤਿ ਫੋਟਫੋਟਾ. ਸਨ੍ਨਿਸਿਨ੍ਨਾਸੂਤਿ ਗਣ੍ਡੀਸੁ ਪਕਤਿਸਰੀਰੇਨ ਸਮਂ ਨਿਸਿਨ੍ਨਾਸੁ.

੯੫. ਕਤਦਣ੍ਡਕਮ੍ਮਭਾਵੋ ਤਾਵ ਪੁਰਿਮਨਯੇਨੇਵ ਵੇਦਿਤਬ੍ਬੋ ਹੋਤੁ, ਕਥਂ ਪਨ ਲਕ੍ਖਣਾਹਤਭਾਵੋ ਵੇਦਿਤਬ੍ਬੋਤਿ ਆਹ ‘‘ਯਸ੍ਸ ਪਨਾ’’ਤਿਆਦਿ. ਤਤ੍ਥ ਤਤ੍ਤੇਨਾਤਿ ਤਾਪੇਨ. ਲਕ੍ਖਣਨ੍ਤਿ ਸਞ੍ਞਾਣਂ. ਸੋਤਿ ਜਨੋ. ਭੁਜਿਸ੍ਸੋਤਿ ਭੁਜੋ ਏਤਸ੍ਸਤ੍ਥੀਤਿ ਭੁਜਿਸ੍ਸੋ (ਮ. ਨਿ. ਟੀ. ੨.੪੨੬). ਪਰੇਹਿ ਅਪਾਲਿਤੋ ਚ ਅਨਜ੍ਝੋਹਰਾਪਿਤੋ ਚ ਹੁਤ੍ਵਾ ਸਯਮੇਵ ਅਤ੍ਤਾਨਂ ਪਾਲਨੇਨ ਚ ਭੋਜਨਂ ਅਜ੍ਝੋਹਰਣੇਨ ਚ ਸਮਨ੍ਨਾਗਤੋਤਿ ਵੁਤ੍ਤਂ ਹੋਤਿ. ਅਸ੍ਸਾਤਿ ਲਕ੍ਖਣਾਹਤਸ੍ਸ. ਵਣਾਤਿ ਅਰੂਨਿ. ਤਾਨਿ ਹਿ ਯਸ੍ਮਾ ਵਣਨ੍ਤਿ ਗਤ੍ਤਾਨਿ ਵਿਚੁਣ੍ਣਾਨਿ ਕਰੋਨ੍ਤਿ, ਤਸ੍ਮਾ ਵਣਾਤਿ ਵੁਚ੍ਚਨ੍ਤਿ. ਰੂਲ਼੍ਹਾਤਿ ਤਰੁਣਮਂਸੇਨ ਰੁਹਾ. ਤਿਮਣ੍ਡਲਵਤ੍ਥਸ੍ਸ ਲਕ੍ਖਣਾਹਤਸ੍ਸ ਜਨਸ੍ਸਾਤਿ ਸਮ੍ਬਨ੍ਧੋ.