੨੭. ਰਾਜਭਟਵਤ੍ਥੁਕਥਾ

੯੦. ਉਚ੍ਚਿਨਥਾਤਿ ਏਤ੍ਥ ਚਿਧਾਤੁਯਾ ਵਡ੍ਢਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਵਡ੍ਢੇਥਾ’’ਤਿ. ਸੋਤਾਪਨ੍ਨਤ੍ਤਾਤਿ ਬਿਮ੍ਬਿਸਾਰਰਞ੍ਞੋ =੦੮ ਸੋਤਾਪਨ੍ਨਭਾਵਤੋ. ਘਾਤੇਥਾਤਿ ਜੀਵਿਤਾ ਵੋਰੋਪੇਥ. ਹਨਥਾਤਿ ਪਹਰਥ. ਤਤੋਤਿ ਉਪਜ੍ਝਾਯਤੋ. ਆਚਰਿਯੋ ਸੇਟ੍ਠੋਤਿ ਸਮ੍ਬਨ੍ਧੋ. ਤਤੋਤਿ ਆਚਰਿਯਤੋ. ਇਦਨ੍ਤਿ ਵਚਨਂ, ਆਗਤਨ੍ਤਿ ਸਮ੍ਬਨ੍ਧੋ. ਆਹਂਸੁ ਵੋਹਾਰਿਕਾ ਮਹਾਮਤ੍ਤਾ ਮੁਸਾਵਾਦੇਨਾਤਿ ਯੋਜਨਾ. ਅਮਚ੍ਚੋਤਿ ਸਬ੍ਬਰਾਜਕਿਚ੍ਚੇਸੁ ਅਮਾ ਸਹ ਰਞ੍ਞਾ ਭਵਤੀਤਿ ਅਮਚ੍ਚੋ. ਅਮਾਸਦ੍ਦੋ ਸਹਤ੍ਥੇ ਨਿਪਾਤੋ. ‘‘ਅਮਾ’’ਤਿ ਨਿਪਾਤਤੋ ਭਵਤ੍ਥੇ ਅਚ੍ਚਪਚ੍ਚਯੋ (ਮੋਗ੍ਗਲ੍ਲਾਨੇ ੪.੨੩ ਸੁਤ੍ਤੇ). ਮਹਾਮਤ੍ਤੋਤਿ ਮਹਨ੍ਤੋ ਮਤ੍ਤਾ ਇਸ੍ਸਰਿਯਾ ਏਤਸ੍ਸਾਤਿ ਮਹਾਮਤ੍ਤੋ. ਮਤ੍ਤਾਸਦ੍ਦੋ ਹੇਤ੍ਥ ਇਸ੍ਸਰਿਯਵਾਚਕੋ. ਸੇਵਕੋਤਿ ਰਾਜਾਨਂ ਸੇਵਤਿ ਭਜਤੀਤਿ ਸੇਵਕੋ. ਭਤ੍ਤਵੇਤਨਭਟੋਤਿ ਭਤ੍ਤਵੇਤਨਾਨਮਤ੍ਥਾਯ ਭਟੋ. ਤਸ੍ਸਾਤਿ ਰਾਜਭਟਸ੍ਸ. ਪੁਤ੍ਤਨਤ੍ਤਭਾਤੁਕਾਦਯੋਤਿਆਦਿਸਦ੍ਦੇਨ ਭਾਗਿਨੇਯ੍ਯਾਦਯੋ ਸਙ੍ਗਣ੍ਹਾਤਿ. ਯੋ ਪਨਾਤਿ ਰਾਜਭਟੋ ਪਨ. ਨਿਯ੍ਯਾਤੇਤੀਤਿ ਅਪ੍ਪੇਤਿ. ਤਂ ਠਾਨਨ੍ਤਿ ਤਂ ਰਾਜਭਟਟ੍ਠਾਨਂ. ਯੇਨ ਵਾਤਿ ਕਮ੍ਮਕਾਰੇਨ ਵਾ. ਯਂਕਮ੍ਮਕਾਰਣਾਤਿ ਯਸ੍ਸ ਕਮ੍ਮਸ੍ਸ ਕਾਰਣਾ. ਯੋ ਵਾਤਿ ਰਾਜਭਟੋ ਵਾ. ਪਬ੍ਬਜਸ੍ਸੂਤਿ ਪਬ੍ਬਾਜੇਹਿ.