੨੬. ਪਞ੍ਚਾਬਾਧਵਤ੍ਥੁਕਥਾ

੮੮. ਮਗਧੇਸੂਤਿ ਏਤ੍ਥ ਬਹੁਵਚਨਪਦੇਨ ਵੁਤ੍ਤਤ੍ਤਾ ਜਨਪਦਸ੍ਸ ਨਾਮਨ੍ਤਿ ਆਹ ‘‘ਮਗਧਨਾਮਕੇ ਜਨਪਦੇ’’ਤਿ. ਅਮਨੁਸ੍ਸਾਨਞ੍ਚਾਤਿ ਮਨੁਸ੍ਸੇਹਿ ਅਞ੍ਞਸਤ੍ਤਾਨਞ੍ਚ. ਉਸ੍ਸਨ੍ਨਸਦ੍ਦੋ ਚ ਉਸ੍ਸਦਸਦ੍ਦੋ ਚ ਵੁਡ੍ਢਿਪ੍ਪਤ੍ਤਪਰਿਯਾਯੋਤਿ ਆਹ ‘‘ਉਸ੍ਸਨ੍ਨਾ ਵੁਡ੍ਢਿਪ੍ਪਤ੍ਤਾ’’ਤਿ. ‘‘ਫਾਤਿਪ੍ਪਤ੍ਤਾ’’ਤਿ ਇਮਿਨਾ ਤਮੇਵਤ੍ਥਂ ਦਸ੍ਸੇਤਿ. ਤੇਹੀਤਿ ਕੁਟ੍ਠਾਦੀਹਿ ਪਞ੍ਚਹਿ ਆਬਾਧੇਹਿ.

ਤਤ੍ਥਾਤਿ ਕੁਟ੍ਠਾਦੀਸੁ ਪਞ੍ਚਸੁ ਆਬਾਧੇਸੁ. ਆਬਾਧਿਕਂ ਆਭੁਸੋ ਬਾਧਤਿ ਪੀਲ਼ੇਤੀਤਿ ਆਬਾਧੋ, ਅਙ੍ਗਪਚ੍ਚਙ੍ਗਂ ਕੁਟਤਿ ਛਿਨ੍ਦਤੀਤਿ ਕੁਟ੍ਠਂ. ‘‘ਰਤ੍ਤਕੁਟ੍ਠਂ ਵਾ’’ਤਿਆਦੀਸੁ ਵਾਸਦ੍ਦੇਨ ਸੇਤਕੁਟ੍ਠਾਦੀਨਿਪਿ ਸਙ੍ਗਣ੍ਹਾਤਿ. ਕੀਟਿਭ ਦਦ੍ਦੁ ਖਜ੍ਜੁ ਆਦਿਪ੍ਪਭੇਦਮ੍ਪੀਤਿ ਕੀਟਿਭੋ ਚ ਦਦ੍ਦੁ ਚ ਖਜ੍ਜੁ ਚ ਕੀਟਿਭਦਦ੍ਦੁਖਜ੍ਜੁਯੋ, ਤਾ ਆਦਯੋ ਯੇਸਂ ਕੁਟ੍ਠਾਨਨ੍ਤਿ ਕੀਟਿਭਦਦ੍ਦੁਖਜ੍ਜੁਆਦਯੋ, ਤੇਸਂ ਪਭੇਦੋ ਕੀਟਿਭਦਦ੍ਦੁ ਖਜ੍ਜੁਆਦਿਪ੍ਪਭੇਦੋ, ਤਮ੍ਪਿ. ਤਤ੍ਥ ਕੀਟਿਭੋਤਿ ਕੀਟ ਇਭੋਤਿ ਪਦਵਿਭਾਗੋ ਕਾਤਬ੍ਬੋ. ਤਤ੍ਥ ਕੀਟੋਤਿ ਕਿਮਿ. ਇਮਿਨਾ ਕੀਟਕੁਲਾਵਕਂ ‘‘ਕੀਟੋ’’ਤਿ ਗਹੇਤਬ੍ਬਂ, ਕੀਟੋ ਵਿਯਾਤਿ ਕੀਟੋ, ਕੁਟ੍ਠਵਿਸੇਸੋ. ਇਭੋਤਿ ਗਜੋ. ਇਮਿਨਾ ਗਜਸ੍ਸ ਸਬਲਂ ‘‘ਇਭੋ’’ਤਿ ਗਹੇਤਬ੍ਬਂ. ਇਭੋ ਵਿਯਾਤਿ ਇਭੋ, ਕੁਟ੍ਠਵਿਸੇਸੋ. ਕੀਟੋਯੇਵ ਇਭੋ ਕੀਟਿਭੋ, ਕੁਟ੍ਠਾਬਾਧਵਿਸੇਸੋ, ਯਂ ਲੋਕੇ ‘‘ਕੁਟ੍ਟਾਬਾਧ ਵਿਸੇਸੋ’’ਇਤਿ ਵੋਹਰਨ੍ਤਿ. ਦਦ੍ਦੂਤਿ ਕਚ੍ਛੁ. ਸਾ ਹਿ ਸਰੀਰਂ ਦਂਸਤਿ ਵਿਦਂਸਤਿ, ਹਿਂਸਤੀਤਿ ਵਾ ਦਦ੍ਦੁਤਿ ਵੁਚ੍ਚਤਿ. ਏਕਸ੍ਸ ਦਕਾਰਸ੍ਸ ਰਕਾਰਂ ਕਤ੍ਵਾ ‘‘ਦਦ੍ਦੁ’’ਤਿਪਿ ਪਾਠੋ. ਯਂ ਲੋਕੇ ‘‘ਪ੍ਵੇ:’’ਇਤਿ ਵੋਹਰਨ੍ਤਿ. ਖਜ੍ਜੂਤਿ ਕਣ੍ਡੁਵਨਂ. ਤਞ੍ਹਿ ਸਰੀਰਂ ਖਜ੍ਜਤਿ ਬ੍ਯਥਤਿ ਖਦਤਿ, ਹਿਂਸਤੀਤਿ ਵਾ ਖਜ੍ਜੂਤਿ ਵੁਚ੍ਚਤਿ. ਯਂ ਲੋਕੇ ‘‘ਖਜ੍ਜ’’ਇਤਿ ਵੋਹਰਨ੍ਤਿ. ‘‘ਕਚ੍ਛੂ’’ਤਿਪਿ ਪਾਠੋ, ਸੋ ਅਪਾਠੋ ਦਦ੍ਦੁਸਦ੍ਦੇਨ ਤਸ੍ਸ ਗਹਿਤਤ੍ਤਾ. ਤਨ੍ਤਿ ਕੁਟ੍ਠਂ. ਪਕਤਿਪਟਿਚ੍ਛਨ੍ਨਟ੍ਠਾਨੇਤਿ ਪਕਤਿਯਾ ਪਟਿਚ੍ਛਨ੍ਨਟ੍ਠਾਨੇ, ਯਥਾਨਿਵਤ੍ਥਪਾਰੁਤਟ੍ਠਾਨੇਤਿ ਅਤ੍ਥੋ. ਇਮਿਨਾ ਵਿਸੇਸਤੋ ਪਟਿਚ੍ਛਨ੍ਨਂ ਨਿਵਤ੍ਤੇਤਿ. ਅਵਡ੍ਢਨਕਪਕ੍ਖੇ ਠਿਤਂ ਸਚੇ ਹੋਤੀਤਿ ਯੋਜਨਾ. ਪਕਤਿਵਣ੍ਣੇਤਿ =੦੭ ਪਕਤਿਛਵਿਯਂ. ਯਥਾ ਅਵਣਾ ਛਵਿ ਹੋਤਿ, ਤਥਾਤਿ ਅਤ੍ਥੋ. ਇਦਂ ਵਣਵਤ੍ਥੁਂ ਸਨ੍ਧਾਯ ਨ ਵੁਤ੍ਤਂ.

ਮੇਦਗਣ੍ਡੋਤਿ ਮੇਦੋ ਅਸ੍ਮਿਂ ਅਤ੍ਥੀਤਿ ਮੇਦੋ, ਗਣ੍ਡਤਿ ਫੋਟੋ ਭਵਤੀਤਿ ਗਣ੍ਡੋ, ਮੇਦੋਯੇਵ ਗਣ੍ਡੋ ਮੇਦਗਣ੍ਡੋ. ਯਂ ਲੋਕੇ ‘‘ਮੇਦਗਣ੍ਡੋਇਤਿ ਵੋਹਰਨ੍ਤਿ. ਕੋਲਟ੍ਠੀਤਿ ਕੋਲਂ ਵੁਚ੍ਚਤਿ ਬਦਰਫਲਂ, ਤਸ੍ਸ ਅਟ੍ਠਿ ਕੋਲਟ੍ਠਿ. ਅਵਡ੍ਢਨਕਪਕ੍ਖੇ ਠਿਤੇ ਸਤੀਤਿ ਯੋਜਨਾ. ਸਞ੍ਛਵਿਨ੍ਤਿ ਸਂਵਿਜ੍ਜਮਾਨਛਵਿਂ, ਸਞ੍ਜਾਤਛਵਿਂ ਵਾ. ਉਣ੍ਣਿਗਣ੍ਡਾਤਿ ਉਦ੍ਧਂ ਨਮਨ੍ਤੀਤਿ ਉਣ੍ਣਿਯੋ, ਤਾਯੇਵ ਗਣ੍ਡਾ ਉਣ੍ਣਿਗਣ੍ਡਾ. ਯੇ ਲੋਕੇ ‘‘ਉਣ੍ਣਿਗਣ੍ਡਾ’’ ਇਤਿ ਵੋਹਰਨ੍ਤਿ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਸਰੀਰਪਦੇਸੇ. ਖੀਰਪੀਲ਼ਕਾਤਿ ਖੀਰਂ ਏਤ੍ਥ ਅਤ੍ਥੀਤਿ ਖੀਰਾ, ਤਾ ਏਵ ਪੀਲ਼ਕਾ ਖੀਰਪੀਲ਼ਕਾ. ਯਾ ਲੋਕੇ ‘‘ਖੀਰਪੀਲ਼ਕਾ’’ ਇਤਿ ਚ ਇਤਿ ਚ ਵੋਹਰਨ੍ਤਿ. ਤਾਸੂਤਿ ਪੀਲ਼ਕਾਸੁ. ਖੀਰਪੀਲ਼ਕਾ ਨਾਮ ਗਣ੍ਡਾ ਹੋਨ੍ਤੀਤਿ ਸਮ੍ਬਨ੍ਧੋ. ਖਰਪੀਲ਼ਕਾਤਿ ਖਰਸਭਾਵਾ ਪੀਲ਼ਕਾ. ਖਰਸਭਾਵਤ੍ਤਾ ਤੇਨ ਸਤ੍ਤਾ ਮਰਣਮ੍ਪਿ ਗਚ੍ਛਨ੍ਤਿ, ਮਰਣਮਤ੍ਤਮ੍ਪਿ ਦੁਕ੍ਖਂ. ਯਾ ਲੋਕੇ ਇਤਿ ‘‘ਖੀਰਪੀਲ਼ਕਾ’’ ਵੋਹਰਨ੍ਤਿ. ਪਦੁਮਕਣ੍ਣਿਕਾ ਨਾਮ ਗਣ੍ਡਾ ਹੋਨ੍ਤੀਤਿ ਸਮ੍ਬਨ੍ਧੋ. ਪਦੁਮਸ੍ਸ ਕਣ੍ਣਿਕਾ ਵਿਯ ਪਦੁਮਕਣ੍ਣਿਕਾ. ਯਾ ਲੋਕੇ ‘‘ਪਦੁਮਕਣ੍ਣਿਕਾ’’ਇਤਿ ਵੋਹਰਨ੍ਤਿ. ਸਾਸਪਬੀਜਕਾ ਨਾਮ ਗਣ੍ਡਾਤਿ ਸਮ੍ਬਨ੍ਧੋ. ਸਾਸਪਸ੍ਸ ਬੀਜਂ ਪਮਾਣਮੇਤਾਸਨ੍ਤਿ ਸਾਸਪਬੀਜਕਾ. ਯਾ ਲੋਕੇ ‘‘ਸਾਸਪਬੀਜਕਾ’’ ਇਤਿ ਵੋਹਰਨ੍ਤਿ. ਤਾ ਸਬ੍ਬਾਤਿ ਸਬ੍ਬਾ ਤਾ ਪੀਲ਼ਕਾ, ਗਣ੍ਡਜਾਤਿਯੋ ਵਾ. ਤਾਸੂਤਿ ਪੀਲ਼ਕਾਸੁ, ਗਣ੍ਡਜਾਤੀਸੁ ਵਾ.

ਪਦੁਮਪੁਣ੍ਡਰੀਕਪਤ੍ਤਵਣ੍ਣਨ੍ਤਿ ਪਦੁਮਂ ਨਾਮ ਰਤ੍ਤਂ, ਪੁਣ੍ਡਰੀਕਂ ਨਾਮ ਸੇਤਂ, ਤੇਸਂ ਪੁਪ੍ਫਪਤ੍ਤਸ੍ਸ ਵਣ੍ਣਂ ਵਿਯ ਵਣ੍ਣਮੇਤਸ੍ਸਾਤਿ ਪਦੁਮਪੁਣ੍ਡਰੀਕਪਤ੍ਤਵਣ੍ਣਂ, ਸਙ੍ਖਕੁਟ੍ਠਂ. ਯਂ ਲੋਕੇ ‘‘ਪਦੁਮਪੁਣ੍ਡਰੀਕਪਤ੍ਤਵਣ੍ਣਂ, ਸਙ੍ਖਕੁਟ੍ਠਂ’’ ਇਤਿ ਵੋਹਰਨ੍ਤਿ. ਯੇਨਾਤਿ ਕੁਟ੍ਠੇਨ. ਗੁਨ੍ਨਂ ਸਰੀਰਂ ਸਬਲਂ ਵਿਯ ਮਨੁਸ੍ਸਾਨਂ ਸਰੀਰਂ ਸਬਲਂ ਹੋਤੀਤਿ ਯੋਜਨਾ. ਤਸ੍ਮਿਨ੍ਤਿ ਕਿਲਾਸੇ. ਸੋਸਬ੍ਯਾਧੀਤਿ ਖਯਰੋਗੋ. ਸੋ ਹਿ ਯਸ੍ਮਾ ਮਂਸਲੋਹਿਤਾਦੀਨਿ ਸੋਸਾਪੇਤਿ, ਤਸ੍ਮਾ ਸੋਸੋਤਿ ਵੁਚ੍ਚਤਿ. ਯਂ ਲੋਕੇ ‘‘ਸਾਂਸ’’ ਇਤਿ ਚ ‘‘ਸੋਸਬ੍ਯਾਧਿ’’ ਇਤਿ ਚ ਵੋਹਰਨ੍ਤਿ. ਤਸ੍ਮਿਨ੍ਤਿ ਸੋਸਬ੍ਯਾਧਿਮ੍ਹਿ. ਅਪਮਾਰੋਤਿ ਅਪਸ੍ਮਾਰੋ. ਸੋ ਹਿ ਸਾਰਤੋ ਅਪਗਤਤ੍ਤਾ ‘‘ਅਪਮਾਰੋ’’ਤਿ ਵੁਚ੍ਚਤਿ ਸਕਾਰਸ੍ਸ ਮਕਾਰਂ ਕਤ੍ਵਾ. ਯਂ ਲੋਕੇ ‘‘ਅਪਮਾਰ’’ ਇਤਿ ਚ ‘‘ਅਰੂ?’’ਇਤਿ ਚ ਵੋਹਰਨ੍ਤਿ. ਤਤ੍ਥਾਤਿ ਦ੍ਵੀਸੁ ਉਮ੍ਮਾਦੇਸੁ. ਆਧਾਰੇ ਚੇਤਂ ਭੁਮ੍ਮਵਚਨਂ. ਦੁਤ੍ਤਿਕਿਚ੍ਛੋ ਹੋਤੀਤਿ ਸਮ੍ਬਨ੍ਧੋ.