੨੫. ਅਞ੍ਞਤਿਤ੍ਥਿਯਪੁਬ੍ਬਵਤ੍ਥੁਕਥਾ

੮੬. ਯੋ ਪਨਾਤਿ ਯੋ ਪਨ ਅਞ੍ਞਤਿਤ੍ਥਿਯਪੁਬ੍ਬੋ. ਅਞ੍ਞੋਪੀਤਿ ਪਸੂਰਤੋ ਅਪਰੋਪਿ. ਇਧਾਤਿ ਇਮਸ੍ਮਿਂ ਸਾਸਨੇ. ਤਸ੍ਮਿਨ੍ਤਿ ਅਞ੍ਞਤਿਤ੍ਥਿਯਪੁਬ੍ਬੇ. ਤਤ੍ਥਾਤਿ ‘‘ਯੋ ਸੋ ਭਿਕ੍ਖਵੇ ਅਞ੍ਞੋਪੀ’’ਤਿਆਦਿਵਚਨੇ. ਅਯਨ੍ਤਿ ਪਰਿਵਾਸੋ. ਨਗ੍ਗਪਰਿਬ੍ਬਾਜਕਸ੍ਸੇਵਾਤਿ ਵਤ੍ਵਾ ਤਸ੍ਸ ਭੇਦਂ ਦਸ੍ਸੇਤੁਂ ਵੁਤ੍ਤਂ ‘‘ਆਜੀਵਕਸ੍ਸ ਵਾ ਅਚੇਲਕਸ੍ਸ ਵਾ’’ਤਿ. ਤਤ੍ਥ ਆਜੀਵਕੋ ਉਪਰਿ ਏਕਮੇਵ ਵਤ੍ਥਂ ਉਪਕਚ੍ਛਕੇ ਪਵੇਸੇਤ੍ਵਾ ਪਰਿਦਹਤਿ, ਹੇਟ੍ਠਾ ਨਗ੍ਗੋ. ਅਚੇਲਕੋ ਪਨ ਸਬ੍ਬੇਨ ਸਬ੍ਬਂ ਨਗ੍ਗੋਯੇਵ. ਸੋਪੀਤਿ =੦੩ ਨਗ੍ਗਪਰਿਬ੍ਬਾਜਕੋਪਿ. ਵਾਲਕਮ੍ਬਲਾਦੀਨਨ੍ਤਿ ਵਾਲੇਨ ਕਤਂ ਕਮ੍ਬਲਂ, ਆਦਿਸਦ੍ਦੇਨ ਕੇਸਕਮ੍ਬਲਾਦਯੋ ਸਙ੍ਗਣ੍ਹਾਤਿ. ਅਸ੍ਸਾਤਿ ਪਰਿਬ੍ਬਾਜਕਸ੍ਸ. ਅਞ੍ਞਸ੍ਸਾਤਿ ਨਗ੍ਗਪਰਿਬ੍ਬਾਜਕਤੋ ਅਪਰਸ੍ਸ. ਪਣ੍ਡਰਙ੍ਗਾਦਿਕਸ੍ਸਾਤਿ ਪਣ੍ਡਰਂ ਸੇਤਵਤ੍ਥਂ ਅਙ੍ਗੇ ਸਰੀਰੇ ਏਤਸ੍ਸਤ੍ਥੀਤਿ ਪਣ੍ਡਰਙ੍ਗੋ, ਆਦਿਸਦ੍ਦੇਨ ਨੀਲਙ੍ਗਾਦਯੋ ਸਙ੍ਗਣ੍ਹਾਤਿ.

ਏਵਨ੍ਤਿ ਇਮਿਨਾ ਕੇਸਮਸ੍ਸੁਓਰੋਪਨਾਦਿਨਾ. ਪਬ੍ਬਾਜੇਨ੍ਤੇਹਿ ਭਿਕ੍ਖੂਹੀਤਿ ਸਮ੍ਬਨ੍ਧੋ. ਤਸ੍ਮਿਨ੍ਤਿ ਅਞ੍ਞਤਿਤ੍ਥਿਯਪੁਬ੍ਬੇ, ਨਿਸਿਨ੍ਨੇਯੇਵਾਤਿ ਯੋਜਨਾ. ਅਨਾਦਰੇ ਚੇਤਂ ਭੁਮ੍ਮਵਚਨਂ. ਤਸ੍ਸਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ. ਨਯਿਮੇਤਿ ਨ ਇਮੇ, ਭਿਕ੍ਖੂਤਿ ਸਮ੍ਬਨ੍ਧੋ. ਤਨ੍ਤਿ ਅਞ੍ਞਤਿਤ੍ਥਿਯਪੁਬ੍ਬਂ.

੮੭. ‘‘ਏਵਂ ਖੋ…ਪੇ… ਅਨਾਰਾਧਕੋ’’ਤਿ ਅਯਂ ਕਥਾ ਮਾਤਿਕਾਤਿ ਯੋਜਨਾ. ਅਸ੍ਸਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ. ਤਸ੍ਸੇਵਾਤਿ ਤਸ੍ਸਾਯੇਵ ਮਾਤਿਕਾਯ. ਤਤ੍ਥਾਤਿ ਵਿਭਙ੍ਗੇ. ਅਤਿਕਾਲੇਨਾਤਿ ਏਤ੍ਥ ਭਤ੍ਤਕਿਚ੍ਚਂ ਕਤ੍ਵਾ ਵਤ੍ਤਕਰਣਵੇਲਾਯੇਵ ਅਤਿਕਾਲੋ ਨਾਮਾਤਿ ਦਸ੍ਸੇਨ੍ਤੋ ਆਹ ‘‘ਵਤ੍ਤਕਰਣਵੇਲਾਯਮੇਵਾ’’ਤਿ. ਇਮਿਨਾ ਭੁਮ੍ਮਤ੍ਥੇ ਕਰਣਵਚਨਨ੍ਤਿਪਿ ਦਸ੍ਸੇਤਿ. ਤਤ੍ਥੇਵਾਤਿ ਕੁਲਘਰੇਸੁਯੇਵ. ਅਞ੍ਞਦਤ੍ਥੂਤਿ ਏਕਂਸੇਨ, ‘‘ਕਰੋਨ੍ਤੋ’’ਤਿ ਇਮਿਨਾ ਪਾਠਸੇਸਂ ਦਸ੍ਸੇਤਿ. ਏਵਮ੍ਪਿ ਕਰੋਨ੍ਤੋ ਅਞ੍ਞਤਿਤ੍ਥਿਯਪੁਬ੍ਬੋਤਿ ਯੋਜਨਾ. ‘‘ਸਮ੍ਪਾਦਕੋ’’ਤਿ ਇਮਿਨਾ ਅਨਾਰਾਧਕੋਤਿ ਏਤ੍ਥ ਆਰਾਧਸਦ੍ਦਸ੍ਸ ਸਾਧਨਤ੍ਥਂ ਦਸ੍ਸੇਤਿ, ਤੋਸਨਤ੍ਥਾਦਯੋ ਨਿਵਤ੍ਤੇਤਿ.

ਅਜ੍ਝਾਚਾਰਤ੍ਥਿਕਾ ਵਿਸਨ੍ਤਿ ਪਵਿਸਨ੍ਤਿ ਏਤ੍ਥਾਤਿ ਵੇਸਿਯਾ, ਸੋਭਣਰੂਪਸਙ੍ਖਾਤਂ ਵੇਸਂ ਧਾਰੇਤੀਤਿ ਵਾ ਵੇਸਿਯਾ. ਤੇਨ ਵੁਤ੍ਤਂ ‘‘ਸੁਲਭਜ੍ਝਾਚਾਰਾ’’ਤਿਆਦਿ. ਆਮਿਸੋਯੇਵ ਕਿਞ੍ਜਕ੍ਖੋ ਅਪ੍ਪਮਤ੍ਤਕਟ੍ਠੇਨਾਤਿ ਆਮਿਸਕਿਞ੍ਜਕ੍ਖੋ, ਵਿਸੇਸਨਪਰਪਦੋ. ਅਥ ਵਾ ਆਮਿਸੋ ਚ ਤਤੋ ਅਞ੍ਞੋ ਕਿਞ੍ਜਕ੍ਖੋ ਚ ਆਮਿਸਕਿਞ੍ਜਕ੍ਖਂ, ਤਸ੍ਸ ਸਮ੍ਪਦਾਨਂ ਆਮਿਸਕਿਞ੍ਜਕ੍ਖਸਮ੍ਪਦਾਨਂ. ਕਿਞ੍ਜਕ੍ਖਸਦ੍ਦੋ ਕੇਸਰਸ੍ਸੇਵ ਮੁਖ੍ਯਤੋ ਵਾਚਕੋ, ਅਪ੍ਪਮਤ੍ਤਕਸ੍ਸ ਪਨ ਰੂਲ਼੍ਹੀਵਸੇਨ. ਵਿਧਵਾਤਿ ਏਤ੍ਥ ਧਵਸਦ੍ਦੋ ਪਤਿਨੋਯੇਵ ਵਾਚਕੋ, ਨ ਰੁਕ੍ਖਵਿਸੇਸਸ੍ਸਾਤਿ ਦਸ੍ਸੇਨ੍ਤੋ ਆਹ ‘‘ਮਤਪਤਿਕਾ ਵਾ’’ਤਿਆਦਿ. ਇਮੇਹਿ ਪਦੇਹਿ ਮਤਵਸੇਨ ਵਾ ਪਵੁਤ੍ਥਵਸੇਨ ਵਾ ਵਿਗਤੋ ਧਵੋ ਏਤਾਸਂ, ਧਵੇਨ ਵਾ ਵਿਗਤਾਤਿ ਵਿਧਵਾਤਿ ਵਚਨਤ੍ਥਂ ਦਸ੍ਸੇਤਿ. ਤਾਤਿ ਵਿਧਵਾ. ਯੋਬ੍ਬਨਪਤ੍ਤਤ੍ਤਾ ਵਾ ਯੋਬ੍ਬਨਾਤੀਤਤ੍ਤਾ ਵਾ ਥੁਲ੍ਲਾ ਮਹਨ੍ਤਾ ਕੁਮਾਰਿਕਾਤਿ ਥੁਲ੍ਲਕੁਮਾਰਿਕਾਤਿ ਦਸ੍ਸੇਨ੍ਤੋ ਆਹ ‘‘ਯੋਬ੍ਬਨਪਤ੍ਤਾ’’ਤਿਆਦਿ. ਪਣ੍ਡਕਾਤਿ ਏਤ੍ਥ ਆਸਿਤ੍ਤਪਣ੍ਡਕਾਦੀਸੁ ਪਞ੍ਚਸੁ ਪਣ੍ਡਕੇਸੁ ਨਪੁਂਸਕਪਣ੍ਡਕੋਵਾਧਿਪ੍ਪੇਤੋਤਿ ਆਹ ‘‘ਨਪੁਂਸਕਾ’’ਤਿ. ਸਮਾਨਪਬ੍ਬਜ੍ਜਾਤਿ ਭਿਕ੍ਖੂਹਿ ਸਮਾਨਪਬ੍ਬਜ੍ਜਾ. ਤਤੋਤਿ ਵਿਸ੍ਸਾਸਤੋ.

ਤਤ੍ਥਾਤਿ ਵੇਸਿਯਾਦੀਸੁ. ਤਾਸਨ੍ਤਿ ਵੇਸਿਯਾਨਂ. ਸੋਤਿ ਅਞ੍ਞਤਿਤ੍ਥਿਯਪੁਬ੍ਬੋ. ਸਬ੍ਬਤ੍ਥਾਤਿ ਸਬ੍ਬੇਸੁ =੦੪ ਵਿਧਵਾਦੀਸੁ. ਗਨ੍ਤਬ੍ਬਤਂ ਦਸ੍ਸੇਨ੍ਤੋ ਆਹ ‘‘ਸਚੇ ਪਨਾ’’ਤਿਆਦਿ. ਤਥਾਤਿ ਯਥਾ ਗਨ੍ਤਬ੍ਬਤ੍ਤਂ ਵੁਤ੍ਤਂ, ਤਥਾ.

ਉਚ੍ਚਾਵਚਾਨੀਤਿ ਏਤ੍ਥ ਉਦ੍ਧਂ ਚਯਤਿ ਵਡ੍ਢਤੀਤਿ ਉਚ੍ਚਂ, ਚਯਤੋ ਅਵਗਤੋ ਵਿਯੋਗੋਤਿ ਅਵਚਂ. ਉਚ੍ਚਞ੍ਚ ਅਵਚਞ੍ਚ ਉਚ੍ਚਾਵਚਾਨੀਤਿ ਵਚਨਤ੍ਥੇਨ ਮਹਨ੍ਤਖੁਦ੍ਦਕਤ੍ਥੋਤਿ ਆਹ ‘‘ਮਹਨ੍ਤਖੁਦ੍ਦਕਾਨੀ’’ਤਿ. ‘‘ਕਮ੍ਮਾਨੀ’’ਤਿ ਇਮਿਨਾ ‘‘ਕਰਣੀਯਾਨੀ’’ਤਿਪਦਸ੍ਸ ਸਰੂਪਂ ਦਸ੍ਸੇਤਿ. ਤਂਦਸ੍ਸਨੇਨ ਚ ਕਤ੍ਤਬ੍ਬਾਨੀਤਿ ਕਰਣੀਯਾਨੀਤਿ ਵਚਨਤ੍ਥੋ ਕਾਤਬ੍ਬੋ. ਤਤ੍ਥਾਤਿ ਮਹਨ੍ਤਖੁਦ੍ਦਕੇਸੁ ਕਮ੍ਮੇਸੁ. ਤਤ੍ਥ ਨ ਦਕ੍ਖੋਤਿ ਏਤ੍ਥ ਤਸਦ੍ਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਤੇਸੁ ਤੇਸੁ ਨਵਕਮ੍ਮੇਸੂ’’ਤਿ. ‘‘ਉਟ੍ਠਾਨਵੀਰਿਯਸਮ੍ਪਨ੍ਨੋ’’ਤਿ ਇਮਿਨਾ ਨਤ੍ਥਿ ਅਲਸੋ ਕੋਸਜ੍ਜਂ ਏਤਸ੍ਸਾਤਿ ਅਨਲਸੋਤਿ ਵਚਨਤ੍ਥਂ ਦਸ੍ਸੇਤਿ. ਤਤ੍ਰਾਤਿ ਏਤ੍ਥ ਤ੍ਰਪਚ੍ਚਯੋ ਸਤ੍ਤਮ੍ਯਤ੍ਥੇ ਵਿਚ੍ਛਾਜੋਤਕੋਤਿ ਆਹ ‘‘ਤੇਸੁ ਤੇਸੂ’’ਤਿ. ‘‘ਠਾਨੁਪ੍ਪਤ੍ਤਿਕਾਯ ਵੀਮਂਸਾਯਾ’’ਤਿ ਵੁਤ੍ਤਵਚਨਸ੍ਸਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਦਮੇਵ’’ਨ੍ਤਿਆਦਿ. ‘‘ਤਸ੍ਮਿਂਯੇਵ ਖਣੇ ਉਪ੍ਪਨ੍ਨਪਞ੍ਞਾਯਾ’’ਤਿ ਇਮਿਨਾ ‘‘ਠਾਨੁਪ੍ਪਤ੍ਤਿਕਾਯਾ’’ਤਿ ਏਤ੍ਥ ਠਾਨਸਦ੍ਦੋ ਤਙ੍ਖਣਤ੍ਥੋਤਿ ਦਸ੍ਸੇਤਿ. ਅਲਂ ਕਾਤੁਨ੍ਤਿ ਏਤ੍ਥ ਅਲਂਸਦ੍ਦੋ ਭੂਸਨਵਾਰਣਪਰਿਯਤ੍ਤਸਙ੍ਖਾਤੇਸੁ ਤੀਸੁ ਅਤ੍ਥੇਸੁ ਪਰਿਯਤ੍ਤਤ੍ਥੋਤਿ ਆਹ ‘‘ਕਾਤੁਂ ਸਮਤ੍ਥੋ’’ਤਿ.

ਤਿਬ੍ਬਚ੍ਛਨ੍ਦੋਤਿ ਤਿਖਿਣਛਨ੍ਦੋ. ‘‘ਬਲਵਚ੍ਛਨ੍ਦੋ’’ਤਿ ਇਮਿਨਾ ਅਧਿਪ੍ਪਾਯਤ੍ਥਂ ਦਸ੍ਸੇਤਿ. ਲੋਕਿਯਸਮਾਧਿਭਾਵਨਾਯਾਤਿ ਲੋਕਿਯਾਯ ਅਟ੍ਠਸਮਾਪਤ੍ਤਿਸਙ੍ਖਾਤਾਯ ਸਮਾਧਿਭਾਵਨਾਯ.

ਇਧਾਗਤੋਤਿ ਇਮਸ੍ਮਿਂ ਸਾਸਨੇ ਆਗਤੋ. ਤਿਤ੍ਥਾਯਤਨਸਾਮਿਕਸ੍ਸਾਤਿ ਤਰਨ੍ਤਿ ਉਪ੍ਲਵਨ੍ਤਿ ਸਤ੍ਤਾ ਉਮ੍ਮੁਜ੍ਜਨਿਮੁਜ੍ਜਂ ਕਰੋਨ੍ਤਿ ਏਤ੍ਥਾਤਿ ਤਿਤ੍ਥਂ, ਦ੍ਵਾਸਟ੍ਠਿ ਦਿਟ੍ਠਿਯੋ. ਤਮੇਵ ਆਯਤਨਂ ਦਿਟ੍ਠਿਗਤਿਕਾਨਨ੍ਤਿ ਤਿਤ੍ਥਾਯਤਨਂ. ਅਥ ਵਾ ਤਿਤ੍ਥਮੇਤੇਸਮਤ੍ਥੀਤਿ ਤਿਤ੍ਥਿਨੋ, ਤੇਸਮਾਯਤਨਂ ਤਿਤ੍ਥਾਯਤਨਂ, ਤਸ੍ਸ ਸਾਮਿਕੋ ਤਿਤ੍ਥਾਯਤਨਸਾਮਿਕੋ, ਤਸ੍ਸ. ਤਸ੍ਸ ਦਿਟ੍ਠਿਯਾਤਿ ਏਤ੍ਥ ਦਿਟ੍ਠਿਸਦ੍ਦੋ ਲਦ੍ਧਿਪਰਿਯਾਯੋਤਿ ਆਹ ‘‘ਤਸ੍ਸ ਸਨ੍ਤਕਾਯ ਲਦ੍ਧਿਯਾ’’ਤਿ. ਕਸ੍ਮਾ ਸਾ ਲਦ੍ਧਿ ‘‘ਖਨ੍ਤੀ’’ਤਿ ਚ ‘‘ਰੁਚੀ’’ਤਿ ਚ ‘‘ਆਦਾਯੋ’’ਤਿ ਚ ਵੁਚ੍ਚਤੀਤਿ ਆਹ ‘‘ਇਦਾਨੀ’’ਤਿਆਦਿ. ਸਾਯੇਵ ਲਦ੍ਧਿ ਖਮਤਿ ਚੇਵ ਰੁਚ੍ਚਤਿ ਚ ਗਹਿਤਾ ਚਾਤਿ ਯੋਜਨਾ. ਤਸ੍ਸ ਤਿਤ੍ਥਕਰਸ੍ਸਾਤਿ ਕਤ੍ਵਤ੍ਥੇ ਸਾਮਿਵਚਨਂ. ਤਸ੍ਸਾਤਿ ਤਿਤ੍ਥਾਯਤਨਸਾਮਿਕਸ੍ਸ. ਭਞ੍ਞਮਾਨਾਯਾਤਿ ਭਣਿਯਮਾਨਾਯ. ਅਨਭਿਰਦ੍ਧੋਤਿ ਏਤ੍ਥ ਅਨਭਿਰਾਧਿਤੋ ਅਪਰਿਤੋਸਿਤਚਿਤ੍ਤੋਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਪਰਿਪੁਣ੍ਣਸਙ੍ਕਪ੍ਪੋ, ਨੋ ਪਗ੍ਗਹਿਤਚਿਤ੍ਤੋ’’ਤਿ. ਯਦਿਦਨ੍ਤਿ ਯਂ ਇਦਂ ‘‘ਅਨਤ੍ਤਮਨਤ੍ਤ’’ਨ੍ਤਿ ਵਾ ‘‘ਅਤ੍ਤਮਨਤ੍ਤ’’ਨ੍ਤਿ ਵਾ ਸਮ੍ਬਨ੍ਧੋ. ਇਮਿਨਾ ‘‘ਇਦ’’ਨ੍ਤਿਪਦਸ੍ਸ ਅਨਿਯਮਂ ਦਸ੍ਸੇਤਿ. ਇਮੇਤਿ ਭਿਕ੍ਖੂ. ਯਞ੍ਚ ਅਨਤ੍ਤਮਨਤ੍ਤਨ੍ਤਿ ਯੋਜਨਾ. ਤਸ੍ਸੇਵਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਏਵ ਅਨਤ੍ਤਮਨਤ੍ਤਨ੍ਤਿ ਸਮ੍ਬਨ੍ਧੋ. ਇਦਨ੍ਤਿ ਦ੍ਵੇ ਅਤ੍ਤਮਨਤ੍ਤਾਨਿ, ਦ੍ਵੇ ਅਨਤ੍ਤਮਨਤ੍ਤਾਨੀਤਿ ਚਤੁਬ੍ਬਿਧਂ ਇਦਂ ਧਮ੍ਮਜਾਤਂ. ਸਙ੍ਘਾਟਨੀਯਨ੍ਤਿ ਸਙ੍ਘਟਿਤਬ੍ਬਂ, ਸਨ੍ਨਿਚਯਂ ਕਾਤਬ੍ਬਨ੍ਤਿ ਅਤ੍ਥੋ. ‘‘ਅਨਾਰਾਧਕੇ’’ਤਿਆਦਿਨਾ ਅਨਾਰਾਧਨੀਯਸ੍ਮਿਨ੍ਤਿ =੦੫ ਏਤ੍ਥ ਨ ਆਰਾਧੇਤਿ ਵਤ੍ਤਂ ਅਨੇਨ ਕਮ੍ਮੇਨਾਤਿ ਅਨਾਰਾਧਨੀਯਨ੍ਤਿ ਵਚਨਤ੍ਥਂ ਦਸ੍ਸੇਤਿ. ਇਦਨ੍ਤਿ ਚਤੁਬ੍ਬਿਧਂ. ਲਿਙ੍ਗਨ੍ਤਿ ਕਾਰਣਂ. ਲਕ੍ਖਣਨ੍ਤਿ ਚਿਹਨਂ. ਇਤੋਤਿ ਅਟ੍ਠਙ੍ਗਤੋ ਨੀਹਟੇਨਾਤਿ ਸਮ੍ਬਨ੍ਧੋ. ਵੁਤ੍ਤਵਿਪਲ੍ਲਾਸੇਨਾਤਿ ਕਣ੍ਹਪਕ੍ਖੇ ਵੁਤ੍ਤਵਿਪਰੀਤੇਨ.

ਸੁਕ੍ਕਪਕ੍ਖੇ ਅਟ੍ਠਙ੍ਗਾਨਿ ਸਮੋਧਾਨੇਤ੍ਵਾ ਦਸ੍ਸੇਨ੍ਤੋ ਆਹ ‘‘ਨਾਤਿਕਾਲੇਨ ਗਾਮਪਵੇਸਨਂ ਨਾਤਿਦਿਵਾ ਪਟਿਕ੍ਕਮਨ’’ਨ੍ਤਿਆਦਿ. ਕਣ੍ਹਪਕ੍ਖੇਪਿ ਇਮਿਨਾ ਨਯੇਨ ਅਟ੍ਠਙ੍ਗਾਨਿ ਸਮੋਧਾਨੇਤਬ੍ਬਾਨਿ. ‘‘ਪਰਿਤੋਸਕੋ’’ਤਿ ਇਮਿਨਾ ਆਰਾਧਕਸਦ੍ਦਸ੍ਸ ਤੋਸਨਤ੍ਥਂ ਦਸ੍ਸੇਤਿ. ਹੇਟ੍ਠਾ ਪਨ ‘‘ਸਮ੍ਪਾਦਕੋ’’ਤਿ ਵੁਤ੍ਤਤ੍ਤਾ ਸਾਧਨਤ੍ਥਂ ਦਸ੍ਸੇਤੀਤਿ ਦਟ੍ਠਬ੍ਬਂ.

ਉਪਸਮ੍ਪਦਮਾਲ਼ਕੇਪੀਤਿ ਉਪਸਮ੍ਪਾਦਟ੍ਠਾਨੇ ਏਕਕੂਟਯੁਤ੍ਤੇ ਅਨੇਕਕੋਣੇ ਪਤਿਸ੍ਸਯਵਿਸੇਸੇਪਿ. ਸੋ ਹਿ ਏਕਕੂਟਂ ਕਤ੍ਵਾ ਅਨੇਕੇਹਿ ਕੋਣੇਹਿ ਮਲੀਯਤਿ ਵਿਭੂਸੀਯਤੀਤਿ ਮਾਲ਼ੋਤਿ ਵੁਚ੍ਚਤਿ. ‘‘ਚਤ੍ਤਾਰੋ ਮਾਸੇ ਪਰਿਵਸਿਤਬ੍ਬ’’ਨ੍ਤਿਵਚਨਂ ਅਸਦਿਸੂਪਮਾਯ ਪਾਕਟਂ ਕਰੋਨ੍ਤੋ ‘‘ਯਥਾ ਪਨਾ’’ਤਿਆਦਿਮਾਹ. ਹੀਤਿ ਸਚ੍ਚਂ. ਅਸ੍ਸਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ. ਪਰਿਵਸਨ੍ਤੋ ਅਞ੍ਞਤਿਤ੍ਥਿਯਪੁਬ੍ਬੋਤਿ ਸਮ੍ਬਨ੍ਧੋ. ਅਨ੍ਤਰਾਤਿ ਚਤੁਮਾਸਸ੍ਸ ਅਬ੍ਭਨ੍ਤਰੇ. ਕੁਪ੍ਪਨਸਭਾਵੋਤਿ ਨਸ੍ਸਨਸਭਾਵੋ. ਪਰਿਗ੍ਗਣ੍ਹਾਤੀਤਿ ਪਰਿਚ੍ਛਿਨ੍ਦਿਤ੍ਵਾ ਗਣ੍ਹਾਤਿ. ਨਾਮਰੂਪਂ ਵਵਤ੍ਥਪੇਤੀਤਿ ‘‘ਇਦਂ ਨਾਮਂ, ਇਦਂ ਰੂਪ’’ਨ੍ਤਿ ਵਵਤ੍ਥਪੇਤਿ. ਲਕ੍ਖਣਨ੍ਤਿ ਨਮਨਰੁਪ੍ਪਨਲਕ੍ਖਣਂ, ਅਨਿਚ੍ਚਾਦਿਲਕ੍ਖਣਂ ਵਾ. ਸੋਤਾਪਤ੍ਤਿਮਗ੍ਗਸ੍ਸ ਦਿਟ੍ਠਿਵਿਚਿਕਿਚ੍ਛਾਪਹਾਨਂ ਸਨ੍ਧਾਯ ਵੁਤ੍ਤਂ ‘‘ਸਮੂਹਤਾਨਿ…ਪੇ… ਸਲ੍ਲ’’ਨ੍ਤਿ. ਅਬ੍ਬੁਲ਼੍ਹਨ੍ਤਿ ਆਵਹਿਯਿਤ੍ਥਾਤਿ ਅਬ੍ਬੁਲ਼੍ਹਂ, ਉਦ੍ਧਂ ਵਹਿਯਿਤ੍ਥਾਤਿ ਅਤ੍ਥੋ. ਆਤ੍ਯੂਪਸਗ੍ਗੋ ਹਿ ਉਦ੍ਧਙ੍ਗਮਤ੍ਥੋ. ਤਂਦਿਵਸਮੇਵਾਤਿ ਤਸ੍ਮਿਂ ਸੋਤਾਪਤ੍ਤਿਮਗ੍ਗਸ੍ਸ ਪਟਿਲਭਨਦਿਵਸੇਯੇਵ. ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਤਦਹੇਵਾਤਿ ਤਸ੍ਮਿਂ ਸੋਤਾਪਨ੍ਨਭਵਨਅਹਨਿ ਏਵ.

ਤਸ੍ਸਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ. ਪਾਲ਼ਿਯਂ ਪਤ੍ਤਸ੍ਸ ਅਨਾਗਤਤ੍ਤਾ ਵੁਤ੍ਤਂ ‘‘ਪਤ੍ਤਮ੍ਪਿ ਤਥੇਵਾ’’ਤਿ. ਯਥਾ ਉਪਜ੍ਝਾਯਮੂਲਕਂ ਚੀਵਰਂ ਪਰਿਯੇਸਿਤਬ੍ਬਂ, ਪਤ੍ਤਮ੍ਪਿ ਤਥੇਵਾਤਿ ਅਤ੍ਥੋ. ਇਦਨ੍ਤਿ ਪਤ੍ਤਚੀਵਰਂ. ਇਮਸ੍ਸਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ. ਅਞ੍ਞੇਤਿ ਉਪਜ੍ਝਾਯਤੋ ਅਪਰੇ. ਤੇਹਿਪੀਤਿ ਅਞ੍ਞੇਹਿਪਿ. ਵਿਲੋਮਾਤਿ ਪਟਿਲੋਮਾ. ਆਯਤ੍ਤਨ੍ਤਿ ਅਧੀਨਂ. ਆਯਤ੍ਤਜੀਵਿਕਤ੍ਤਾਤਿ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਉਪਜ੍ਝਾਯੇਨ ਆਯਤ੍ਤਜੀਵਿਕਤ੍ਤਾ. ਤਸ੍ਸਾਤਿ ਉਪਜ੍ਝਾਯਸ੍ਸ. ਵਚਨਕਰੋਤਿ ਵਚਨਂ ਕਰੋ. ਵਾਕ੍ਯੇਪਿ ਸਮਾਸੇਪਿ ਵਚਨਸਦ੍ਦਸ੍ਸ ‘‘ਤਸ੍ਸਾ’’ਤਿ ਪਦਮੇਵ ਅਪੇਕ੍ਖਤ੍ਤਾ ‘‘ਵਚਨਕਰੋ’’ਤਿ ਸਮਾਸੋ ਹੋਤਿ. ਏਸੇਵ ਨਯੋ ‘‘ਉਪਜ੍ਝਾਯੇਨ ਆਯਤ੍ਤਜੀਵਕਤ੍ਤਾ’’ਤਿ ਏਤ੍ਥਾਪਿ. ਤੇਨਾਤਿ ਵਚਨਕਰਹੇਤੁਨਾ.

ਅਗ੍ਗਿਪਰਿਚਰਣਕਾਤਿ =੦੬ ਅਗ੍ਗਿਪੂਜਕਾ. ਇਮਿਨਾ ਅਗ੍ਗਿਂ ਪਰਿਚਰਨ੍ਤੀਤਿ ਅਗ੍ਗਿਕਾਤਿ ਵਚਨਤ੍ਥਂ ਦਸ੍ਸੇਤਿ. ਤਾਪਸਾਤਿ ਜਟਾਧਰਾ. ਤੇ ਹਿ ਯਸ੍ਮਾ ਜਟਾ ਚ ਤਪੋ ਚ ਏਤੇਸਮਤ੍ਥਿ, ਤਸ੍ਮਾ ‘‘ਜਟਿਲਾ’’ਤਿ ਚ ‘‘ਤਾਪਸਾ’’ਤਿ ਚ ਵੁਚ੍ਚਨ੍ਤਿ. ਏਤੇਤਿ ਜਟਿਲਕਾ. ‘‘ਕਿਰਿਯਂ ਨ ਪਟਿਬਾਹਨ੍ਤੀ’’ਤਿ ਵੁਤ੍ਤਵਚਨਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਤ੍ਥਿ ਕਮ੍ਮਂ, ਅਤ੍ਥਿ ਕਮ੍ਮਵਿਪਾਕੋ’’ਤਿ. ਏਤਦੇਵ ਪਬ੍ਬਜ੍ਜਨ੍ਤਿ ਏਤਂ ਏਵ ਤਾਪਸਪਬ੍ਬਜ੍ਜਂ. ਏਤੇਸਨ੍ਤਿ ਜਟਿਲਾਨਂ. ਸਾਸਨੇਤਿ ਬੁਦ੍ਧਸ੍ਸ ਸਾਸਨੇ. ਤੇਸਨ੍ਤਿ ਞਾਤੀਨਂ, ਇਮਂ ਪਰਿਹਾਰਨ੍ਤਿ ਸਮ੍ਬਨ੍ਧੋ. ਤੇਤਿ ਞਾਤਯੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਞਾਤਿਸੇਟ੍ਠਸ੍ਸਾਤਿ ਞਾਤਿਯੇਵ ਸੇਟ੍ਠੋ, ਞਾਤੀਨਂ ਵਾਤਿ ਞਾਤਿਸੇਟ੍ਠੋ, ਤਸ੍ਸ, ਬੁਦ੍ਧਸ੍ਸਾਤਿ ਸਮ੍ਬਨ੍ਧੋ.