੨੩. ਉਪਸਮ੍ਪਾਦੇਤਬ੍ਬਪਞ੍ਚਕਕਥਾ

੮੪. ਇਦਾਨਿ =੦੧ ਯਂ ਲਕ੍ਖਣਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਙ੍ਖੇਪਤੋਤਿ ਅਙ੍ਗਾਨਿ ਅਨੁਦ੍ਧਰਿਤ੍ਵਾ ਸਮਾਸਤੋ. ਤਤ੍ਥਾਤਿ ਯਂ ‘‘ਪਞ੍ਚਹਿ ਭਿਕ੍ਖਵੇ ਅਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ’’ਤਿਆਦਿਮਾਹ, ਤਤ੍ਥ. ਅਗੁਣਙ੍ਗੇਹੀਤਿ ਗੁਣਵਿਰਹਿਤੇਹਿ ਅਙ੍ਗੇਹਿ. ਸੋਤਿ ਭਿਕ੍ਖੁ. ਨ ਉਪਸਮ੍ਪਾਦੇਤਬ੍ਬਨ੍ਤਿ ਏਤ੍ਥ ਕਮ੍ਮਵਾਚਾਚਰਿਯੇਨ ਹੁਤ੍ਵਾ ਨ ਉਪਸਮ੍ਪਾਦੇਤਬ੍ਬਨ੍ਤਿ ਆਸਙ੍ਕਾ ਭਵੇਯ੍ਯਾਤਿ ਆਹ ‘‘ਉਪਜ੍ਝਾਯੇਨ ਹੁਤ੍ਵਾ ਨ ਉਪਸਮ੍ਪਾਦੇਤਬ੍ਬ’’ਨ੍ਤਿ. ਏਤ੍ਥਾਤਿ ਏਤੇਸੁ ਪਞ੍ਚਕੇਸੁ. ਆਦੀਸੂਤਿ ਏਤ੍ਥ ਪੁਬ੍ਬੋ ਨਿਦਸ੍ਸਨਤ੍ਥੋ ਇਤਿਸਦ੍ਦੋ ਲੋਪੋ ਹੋਤਿ. ਇਤਿਆਦੀਸੂਤਿ ਹਿ ਅਤ੍ਥੋ. ਅਯੁਤ੍ਤਵਸੇਨਾਤਿ ਅਨਨੁਰੂਪਵਸੇਨ. ਯੋਤਿ ਭਿਕ੍ਖੁ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਰੇ ਚ ਸਮਾਦਪੇਤੁਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਸੀਲਕ੍ਖਨ੍ਧਾਦਿਕੇ. ਪਰਿਹਰਤੀਤਿ ਪਰਿਸਂ ਪਰਿਸ੍ਸਯਤੋ ਹਰਤਿ ਅਪਨੇਤਿ. ਤਸ੍ਸਾਤਿ ਭਿਕ੍ਖੁਨੋ. ‘‘ਸੀਲਾਦੀਹੀ’’ਤਿਪਦਂ ‘‘ਪਰਿਹਾਯਤਿਯੇਵਾ’’ਤਿਪਦੇ ਅਪਾਦਾਨਂ, ‘‘ਨ ਵਡ੍ਢਤੀ’’ਤਿਪਦੇ ਕਰਣਂ. ਤਸ੍ਮਾਤਿਆਦਿ ਲਦ੍ਧਗੁਣਂ. ਤੇਨਾਤਿ ਭਿਕ੍ਖੁਨਾ. ਕਸ੍ਮਾ ਆਪਤ੍ਤਿਅਙ੍ਗਵਸੇਨ ਨ ਵੁਤ੍ਤਨ੍ਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਯਸ੍ਮਾ. ਤਸ੍ਸੇਵਾਤਿ ਖੀਣਾਸਵਸ੍ਸੇਵ. ਨ ਵਦੇਯ੍ਯਾਤਿ ਖੀਣਾਸਵਾਨਂ ਅਨਭਿਰਤਿਯਾ ਅਨੁਪ੍ਪਨ੍ਨਤ੍ਤਾ ਨ ਵਦੇਯ੍ਯ. ਯਦਿ ਨ ਖੀਣਾਸਵਸ੍ਸੇਵ ਉਪਜ੍ਝਾਯਾਚਰਿਯਭਾਵੋ ਅਨੁਞ੍ਞਾਤੋ, ਅਥ ਕਸ੍ਮਾ ਖੀਣਾਸਵਪਞ੍ਚਕੋ ਵੁਤ੍ਤੋਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਯਸ੍ਮਾ ਨ ਪਰਿਹਾਯਤੀਤਿ ਸਮ੍ਬਨ੍ਧੋ.

ਅਨ੍ਤਗ੍ਗਾਹਿਕਾਯਾਤਿ ਸਸ੍ਸਤੁਚ੍ਛੇਦਸਙ੍ਖਾਤਂ ਅਨ੍ਤਂ ਲਾਮਕਂ ਗਣ੍ਹਾਤਿ, ਗਣ੍ਹਾਪੇਤੀਤਿ ਵਾ ਅਨ੍ਤਗ੍ਗਾਹਿਕਾ, ਤਾਯ. ਦਿਟ੍ਠਿਯਾਤਿ ਮਿਚ੍ਛਾਦਿਟ੍ਠਿਯਾ. ਯਤ੍ਤਕਂ ਸੁਤਨ੍ਤਿ ਭਿਕ੍ਖੁਨੋਵਾਦਕਸਿਕ੍ਖਾਪਦੇ (ਪਾਚਿ. ਅਟ੍ਠ. ੧੪੫-੧੪੭) ਵੁਤ੍ਤਂ ਯਤ੍ਤਕਂ ਸੁਤਂ. ਤੇਨਾਤਿ ਸੁਤੇਨ ऋ. ਯਂ ਆਪਤ੍ਤਾਦਿ ਤੇਨ ਜਾਨਿਤਬ੍ਬਨ੍ਤਿ ਯੋਜਨਾ.

ਆਪਤ੍ਤਿਂ ਨ ਜਾਨਾਤੀਤਿ ਏਤ੍ਥ ਆਪਤ੍ਤਿਂ ਆਪਨ੍ਨੋਤਿ ਨ ਜਾਨਾਤੀਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਇਦਂ ਨਾਮਾ’’ਤਿਆਦਿ. ਤਤ੍ਥ ‘‘ਆਪਨ੍ਨੋ’’ਤਿ ਇਮਿਨਾ ‘‘ਆਪਤ੍ਤਿ’’ਨ੍ਤਿਪਦਂ ‘‘ਆਪਨ੍ਨੋ’’ਤਿਪਾਠਸੇਸੇਨ ਯੋਜੇਤਬ੍ਬਨ੍ਤਿ ਦਸ੍ਸੇਤਿ.

ਆਭਿਸਮਾਚਾਰਿਕਾਯਾਤਿ ਏਤ੍ਥ ਉਭਤੋਵਿਭਙ੍ਗਪਰਿਯਾਪਨ੍ਨਸੀਲਤੋ ਅਭਿਵਿਸੇਸੇਨ ਸਮ੍ਮਾ ਚਰਿਤਬ੍ਬਨ੍ਤਿ ਆਭਿਸਮਾਚਾਰਂ, ਖਨ੍ਧਕਪਰਿਯਾਪਨ੍ਨਂ ਵਤ੍ਤਪਟਿਪਤ੍ਤਿਸੀਲਂ, ਤਂ ਆਰਬ੍ਭ ਪਞ੍ਞਤ੍ਤਾ ਆਭਿਸਮਾਚਾਰਿਕਾ, ਖਨ੍ਧਕਪਰਿਯਾਪਨ੍ਨਾ ਸਿਕ੍ਖਾ, ਤਾਯ. ਆਦਿਬ੍ਰਹ੍ਮਚਾਰਿਯਕਾਯਾਤਿ ਏਤ੍ਥ ਮਗ੍ਗਸਙ੍ਖਾਤਸ੍ਸ ਬ੍ਰਹ੍ਮਚਰਿਯਸ੍ਸ ਆਦਿ ਮਰਿਯਾਦੋ ਆਦਿਬ੍ਰਹ੍ਮਚਰਿਯੋ, ਤਸ੍ਮਿਂ ਪਵਤ੍ਤਾ ਆਦਿਬ੍ਰਹ੍ਮਚਰਿਯਕਾ =੦੨, ਉਭਤੋਵਿਭਙ੍ਗਪਰਿਯਾਪਨ੍ਨਾ ਸਿਕ੍ਖਾ, ਤਾਯ. ਸੇਕ੍ਖਪਣ੍ਣਤ੍ਤਿਯਨ੍ਤਿ ਸਿਕ੍ਖਿਤਬ੍ਬਟ੍ਠੇਨ ਸਿਕ੍ਖਾ, ਸਾ ਏਵ ਭਗਵਤਾ ਪਞ੍ਞਤ੍ਤਤ੍ਤਾ ਸੇਕ੍ਖਪਣ੍ਣਤ੍ਤਿ. ਅਥ ਵਾ ਸਿਕ੍ਖਨਂ ਸਿਕ੍ਖਾ, ਤਾਯ ਸਿਕ੍ਖਨਤ੍ਥਾਯ ਭਗਵਤਾ ਪਞ੍ਞਪੀਯਤੀਤਿ ਸੇਕ੍ਖਪਣ੍ਣਤ੍ਤਿ ਉਭਤੋਵਿਭਙ੍ਗਪਰਿਯਾਪਨ੍ਨਸਿਕ੍ਖਾਯੇਵ, ਤਸ੍ਸਂ. ਅਭਿਧਮ੍ਮੇਤਿ ਏਤ੍ਥ ਸੁਤ੍ਤਨ੍ਤਪਾਲ਼ਿਤੋ ਅਭਿ ਅਤਿਰੇਕੋ, ਅਭਿਵਿਸਿਟ੍ਠੋ ਵਾ ਧਮ੍ਮੋ ਅਭਿਧਮ੍ਮੋਤਿ ਵੁਤ੍ਤੇ ਨਾਮਰੂਪਪਰਿਚ੍ਛੇਦਕਂ ਅਭਿਧਮ੍ਮਪਿਟਕਨ੍ਤਿ ਆਹ ‘‘ਨਾਮਰੂਪਪਰਿਚ੍ਛੇਦੇ’’ਤਿ. ਅਭਿਵਿਨਯੇਤਿ ਏਤ੍ਥ ਅਭਿਭਵਿਤ੍ਵਾ ਕਾਯਵਾਚਂ ਵਿਨੇਤੀਤਿ ਅਭਿਵਿਨਯੋ, ਅਭਿਭਵਿਤ੍ਵਾ ਕਾਯਵਾਚਂ ਵਿਨੇਤਿ ਏਤ੍ਥ, ਏਤੇਨਾਤਿ ਵਾ ਅਭਿਵਿਨਯੋਤਿ ਵੁਤ੍ਤੇ ਵਿਨਯਪਿਟਕਨ੍ਤਿ ਆਹ ‘‘ਸਕਲੇ ਵਿਨਯਪਿਟਕੇ’’ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਪਦੇਸੁ, ਸਬ੍ਬੇਸਂ ਵਾ ਪਦਾਨਂ. ਅਤ੍ਥੋ ਦਟ੍ਠਬ੍ਬੋਤਿ ਯੋਜਨਾ. ‘‘ਕਾਰਣੇਨਾ’’ਤਿ ਏਤ੍ਥ ਕਾਰਣਸਦ੍ਦੇਨ ‘‘ਧਮ੍ਮਤੋ’’ਤਿ ਏਤ੍ਥ ਧਮ੍ਮਸਦ੍ਦਸ੍ਸ ਸਭਾਵਤ੍ਥਾਦਯੋ ਨਿਵਾਰੇਤ੍ਵਾ ਕਾਰਣਤ੍ਥਤਂ ਦੀਪੇਤਿ, ਏਨਸਦ੍ਦੇਨ ਤੋਪਚ੍ਚਯਸ੍ਸ ਵਿਸੇਸਨਤ੍ਥਂ. ਇਤੀਤਿ ਏਵਂ ਯਥਾਵੁਤ੍ਤਨਯੇਨਾਤਿ ਅਤ੍ਥੋ. ਚਤੁਤ੍ਥੇਤਿ ਚਤੁਤ੍ਥਪਞ੍ਚਕੇ. ਚਤੁਤ੍ਥਪਞ੍ਚਕਤੋ ਤੀਣਿ ਪਦਾਨਿ, ਪਞ੍ਚਮਪਞ੍ਚਕਤੋ ਦ੍ਵੇ ਪਦਾਨਿ ਗਹੇਤ੍ਵਾ ਪਞ੍ਚਕਂ ਕਤ੍ਵਾ ਵੁਤ੍ਤਂ ‘‘ਚਤ੍ਤਾਰੋ ਪਞ੍ਚਕਾ’’ਤਿ. ਅਟ੍ਠਸੁ ਪਞ੍ਚਕੇਸੂਤਿ ਸਮ੍ਬਨ੍ਧੋ.

ਇਤਿ ਸੋਲ਼ਸਪਞ੍ਚਕਵਿਨਿਚ੍ਛਯੇ ਯੋਜਨਾ ਸਮਤ੍ਤਾ.