੫. ਤਲਸਤ੍ਤਿਕਸਿਕ੍ਖਾਪਦਂ

੪੫੪. ਪਞ੍ਚਮੇ ਤਲਨ੍ਤਿ ਹਤ੍ਥਤਲਂ. ਤਞ੍ਹਿ ਤਲਤਿ ਯਂਕਿਞ੍ਚਿ ਗਹਿਤਵਤ੍ਥੁ ਪਤਿਟ੍ਠਾਤਿ ਏਤ੍ਥਾਤਿ ‘‘ਤਲ’’ਨ੍ਤਿ ਵੁਚ੍ਚਤਿ. ਸਤ੍ਤੀਤਿ ਕੁਨ੍ਤੋ. ਸੋ ਹਿ ਸਕਤਿ ਵਿਜ੍ਝਿਤੁਂ ਸਮਤ੍ਥੇਤੀਤਿ ‘‘ਸਤ੍ਤੀ’’ਤਿ ਵੁਚ੍ਚਤਿ. ਤਲਮੇਵ ਸਤ੍ਤਿਸਦਿਸਤ੍ਤਾ ਤਲਸਤ੍ਤਿਕਂ, ਸਦਿਸਤ੍ਥੇ ਕੋ, ਤਂ ਤਲਸਤ੍ਤਿਕਂ ਉਪਚਾਰੇਨ ਗਹੇਤ੍ਵਾ ‘‘ਕਾਯਮ੍ਪੀ’’ਤਿ ਵੁਤ੍ਤਂ. ਕਾਯਤੋ ਅਞ੍ਞਂ ਵਤ੍ਥੁਮ੍ਪਿ ਤਲਸਤ੍ਤਿਕਸਙ੍ਖਾਤੇਨ ਕਾਯੇਨ ਗਹੇਤ੍ਵਾ ਉਗ੍ਗਿਰਤ੍ਤਾ ਵੁਤ੍ਤਂ ‘‘ਕਾਯਪਟਿਬਦ੍ਧਮ੍ਪੀ’’ਤਿ. ‘‘ਪਹਾਰਸਮੁਚ੍ਚਿਤਾ’’ਤਿ ਏਤ੍ਥ ਸਂਪੁਬ੍ਬੋ ਚ ਉਪੁਬ੍ਬੋ ਚ ਚਿਸਦ੍ਦੋ ਪਗੁਣਨਸਙ੍ਖਾਤੇ ਪਰਿਚਿਤੇ ਵਤ੍ਤਤੀਤਿ ਆਹ ‘‘ਪਹਾਰਪਰਿਚਿਤਾ’’ਤਿ. ਪਹਾਰੇਨ ਸਂ ਪੁਨਪ੍ਪੁਨਂ ਉਚ੍ਚਿਤਾ ਪਰਿਚਿਤਾਤਿ ਅਤ੍ਥੋ. ਇਮਮੇਵਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਪੁਬ੍ਬੇਪਿ…ਪੇ… ਅਤ੍ਥੋ’’ਤਿ. ਅਞ੍ਞਮ੍ਪਿ ਸਜ੍ਝਾਯਨਨਯਂ ਦਸ੍ਸੇਤੁਂ ਵੁਤ੍ਤਂ ‘‘ਪਹਾਰਸ੍ਸ ਉਬ੍ਬਿਗਾ’’ਤਿ. ਤਸ੍ਸਾਤਿ ਤਸ੍ਸ ਪਾਠਸ੍ਸ. ਪਹਾਰਸ੍ਸਾਤਿ ਪਹਾਰਤੋ. ਨਿਸ੍ਸਕ੍ਕਤ੍ਥੇ ਚੇਤਂ ਸਾਮਿਵਚਨਂ. ‘‘ਭੀਤਾ’’ਤਿ ਇਮਿਨਾ ‘‘ਉਬ੍ਬਿਗਾ’’ਤਿ ਏਤ੍ਥ ਉਪੁਬ੍ਬ ਵਿਜਧਾਤੁਸ੍ਸਤ੍ਥਂ ਦਸ੍ਸੇਤਿ.

੪੫੭-੮. ਵਿਰਦ੍ਧੋਤਿ ਪਣ੍ਣਕੋ ਹੁਤ੍ਵਾ. ਪੁਬ੍ਬੇਤਿ ਪੁਰਿਮਸਿਕ੍ਖਾਪਦੇ. ਵੁਤ੍ਤੇਸੁ ਵਤ੍ਥੂਸੂਤਿ ‘‘ਚੋਰਂ ਵਾ ਪਚ੍ਚਤ੍ਥੀਕਂ ਵਾ’’ਤਿਆਦਿਨਾ ਵੁਤ੍ਤੇਸੁ ਵਤ੍ਥੂਸੂਤਿ. ਪਞ੍ਚਮਂ.