੮. ਸਹਧਮ੍ਮਿਕਵਗ੍ਗੋ

੧. ਸਹਧਮ੍ਮਿਕਸਿਕ੍ਖਾਪਦ-ਅਤ੍ਥਯੋਜਨਾ

੪੩੪. ਸਹਧਮ੍ਮਿਕਵਗ੍ਗਸ੍ਸ ਪਠਮੇ ਯਨ੍ਤਿ ਯਂ ਪਞ੍ਞਤ੍ਤਂ. ‘‘ਸਿਕ੍ਖਮਾਨੇਨਾ’’ਤਿ ਏਤ੍ਥ ਮਾਨਪਚ੍ਚਯਸ੍ਸ ਅਨਾਗਤਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਸਿਕ੍ਖਿਤੁਕਾਮੇਨਾ’’ਤਿ. ‘‘ਸਿਕ੍ਖਮਾਨੇਨਾ’’ਤਿਪਦਂ ‘‘ਭਿਕ੍ਖੁਨਾ’’ਤਿਪਦੇ ਏਵ ਨ ਕੇਵਲਂ ਕਾਰਕਵਿਸੇਸਨਂ ਹੋਤਿ, ਅਥ ਖੋ ‘‘ਅਞ੍ਞਾਤਬ੍ਬ’’ਨ੍ਤਿਆਦਿਪਦੇਸੁਪਿ ਕਿਰਿਯਾਵਿਸੇਸਨਂ ਹੋਤੀਤਿ ਦਸ੍ਸੇਨ੍ਤੋ ਆਹ ‘‘ਹੁਤ੍ਵਾ’’ਤਿ. ਪਦਤ੍ਥਤੋਤਿ ਪਦਤੋ ਚ ਅਤ੍ਥਤੋ ਚ, ਪਦਾਨਂ ਅਤ੍ਥਤੋ ਵਾਤਿ. ਪਠਮਂ.

੨. ਵਿਲੇਖਨਸਿਕ੍ਖਾਪਦਂ

੪੩੮. ਦੁਤਿਯੇ ਵਿਨਯੇ ਪਟਿਸਂਯੁਤ੍ਤਾ ਕਥਾ ਵਿਨਯਕਥਾਤਿ ਦਸ੍ਸੇਨ੍ਤੋ ਆਹ ‘‘ਵਿਨਯਕਥਾ ਨਾਮਾ’’ਤਿਆਦਿ. ਤਨ੍ਤਿ ਵਿਨਯਕਥਂ. ਪਦਭਾਜਨੇਨ ਵਣ੍ਣਨਾ ਵਿਨਯਸ੍ਸ ਵਣ੍ਣੋ ਨਾਮਾਤਿ ਯੋਜਨਾ. ਤਨ੍ਤਿ ਵਿਨਯਸ੍ਸ ਵਣ੍ਣਂ. ਪਰਿਯਾਪੁਣਨਂ ਪਰਿਯਤ੍ਤਿ, ਵਿਨਯਸ੍ਸ ਪਰਿਯਤ੍ਤਿ ਵਿਨਯਪਰਿਯਤ੍ਤਿ, ਵਿਨਯਪਰਿਯਤ੍ਤਿਸਙ੍ਖਾਤਂ ਮੂਲਮਸ੍ਸ ਵਣ੍ਣਸ੍ਸਾਤਿ ਵਿਨਯਪਰਿਯਤ੍ਤਿਮੂਲਕੋ, ਤਂ. ਵਿਨਯਧਰੋ ਲਭਤੀਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਤੇ ਸਬ੍ਬੇ ਭਗਵਾ ਭਾਸਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ.

ਅਸ੍ਸਾਤਿ ਵਿਨਯਧਰਸ੍ਸ. ਇਧਾਤਿ ਇਮਸ੍ਮਿਂ ਸਾਸਨੇ. ਅਲਜ੍ਜਿਤਾਤਿਆਦੀਸੁ ਕਰਣਤ੍ਥੇ ਪਚ੍ਚਤ੍ਤਵਚਨਂ. ਅਲਜ੍ਜਿਤਾਯਾਤਿ ਹਿ ਅਤ੍ਥੋ. ਤੇਨ ਵੁਤ੍ਤਂ ‘‘ਕਥਂ ਅਲਜ੍ਜਿਤਾਯਾ’’ਤਿਆਦਿ. ਚਾਤਿ ਸਚ੍ਚਂ. ‘‘ਸਞ੍ਚਿਚ੍ਚਾ’’ਤਿ ਪਦਂ ਤੀਸੁ ਵਾਕ੍ਯੇਸੁ ਯੋਜੇਤਬ੍ਬਂ. ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ, ਸਞ੍ਚਿਚ੍ਚ ਆਪਤ੍ਤਿਂ ਪਰਿਗੂਹਤਿ, ਸਞ੍ਚਿਚ੍ਚ ਅਗਤਿਗਮਨਞ੍ਚ ਗਚ੍ਛਤੀਤਿ ਅਤ੍ਥੋ. ਮਨ੍ਦੋਤਿ ਬਾਲੋ. ਮੋਮੂਹੋਤਿ ਅਤਿਸਮ੍ਮੂਲ਼੍ਹੋ. ਵਿਰਾਧੇਤੀਤਿ ਵਿਰਜ੍ਝਾਪੇਤਿ. ਕੁਕ੍ਕੁਚ੍ਚੇ ਉਪ੍ਪਨ੍ਨੇਤਿ ‘‘ਕਪ੍ਪਤਿ ਨੁ ਖੋ, ਨੋ’’ਤਿ ਵਿਨਯਕੁਕ੍ਕੁਚ੍ਚੇ ਉਪ੍ਪਨ੍ਨੇ. ਅਯਂ ਪਨਾਤਿ ਅਯਂ ਪੁਗ੍ਗਲੋ ਪਨ ਵੀਤਿਕ੍ਕਮਤਿਯੇਵਾਤਿ ਸਮ੍ਬਨ੍ਧੋ. ਅਚ੍ਛਮਂਸੇਨ ਸੂਕਰਮਂਸਸ੍ਸ ਵਣ੍ਣਸਣ੍ਠਾਨੇਨ ਸਦਿਸਤ੍ਤਾ, ਦੀਪਿਮਂਸੇਨ ਚ ਮਿਗਮਂਸਸ੍ਸ ਸਦਿਸਤ੍ਤਾ ਵੁਤ੍ਤਂ ‘‘ਅਚ੍ਛਮਂਸਂ ਸੂਕਰਮਂਸ’’ਨ੍ਤਿਆਦਿ.

ਆਪਤ੍ਤਿਂਚ ਸਤਿਸਮ੍ਮੋਸਾਯਾਤਿ ਏਤ੍ਥ ਚਸਦ੍ਦੋ ਅਵੁਤ੍ਤਵਾਕ੍ਯਸਮ੍ਪਿਣ੍ਡਨਤ੍ਥੋ, ਕਤ੍ਤਬ੍ਬਞ੍ਚ ਨ ਹਿ ਕਰੋਤੀਤਿ ਅਤ੍ਥੋ. ਏਵਨ੍ਤਿਆਦਿ ਨਿਗਮਨਂ.

ਏਵਂ ਅਵਿਨਯਧਰਸ੍ਸ ਦੋਸਂ ਦਸ੍ਸੇਤ੍ਵਾ ਵਿਨਯਧਰਸ੍ਸ ਗੁਣਂ ਦਸ੍ਸੇਨ੍ਤੋ ਆਹ ‘‘ਵਿਨਯਧਰੋ ਪਨਾ’’ਤਿਆਦਿ. ਸੋਤਿ ਵਿਨਯਧਰੋ. ਹੀਤਿ ਵਿਤ੍ਥਾਰੋ. ਪਰੂਪਵਾਦਨ੍ਤਿ ਪਰੇਸਂ ਉਪਵਾਦਂ. ਸੁਦ੍ਧਨ੍ਤੇਤਿ ਸੁਦ੍ਧਸ੍ਸ ਕੋਟ੍ਠਾਸੇ. ਤਤੋਤਿ ਪਤਿਟ੍ਠਾਨਤੋ ਪਰਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਵਿਨਯਧਰਸ੍ਸ. ਏਵਨ੍ਤਿਆਦਿ ਨਿਗਮਨਂ. ਅਸ੍ਸਾਤਿ ਵਿਨਯਧਰਸ੍ਸ. ਕੁਕ੍ਕੁਚ੍ਚਪਕਤਾਨਨ੍ਤਿ ਕੁਕ੍ਕੁਚ੍ਚੇਨ ਅਭਿਭੂਤਾਨਂ. ਸੋਤਿ ਵਿਨਯਧਰੋ. ਤੇਹੀਤਿ ਕੁਕ੍ਕੁਚ੍ਚਪਕਤੇਹਿ. ਸਙ੍ਘਮਜ੍ਝੇ ਕਥੇਨ੍ਤਸ੍ਸ ਅਵਿਨਯਧਰਸ੍ਸਾਤਿ ਯੋਜਨਾ. ਤਨ੍ਤਿ ਭਯਂ ਸਾਰਜ੍ਜਂ.

ਪਟਿਪਕ੍ਖਂ, ਪਟਿਵਿਰੁਦ੍ਧਂ ਵਾ ਅਤ੍ਥਯਨ੍ਤਿ ਇਚ੍ਛਨ੍ਤੀਤਿ ਪਚ੍ਚਤ੍ਥੀਕਾ, ਣ੍ਯਸਦ੍ਦੋ ਬਹੁਲਂ ਕਤ੍ਤਾਭਿਧਾਯਕੋ, ਅਤ੍ਤਨੋ ਪਚ੍ਚਤ੍ਥਿਕਾ ਅਤ੍ਤਪਚ੍ਚਤ੍ਥਿਕਾ. ਤਤ੍ਥਾਤਿ ਦੁਵਿਧੇਸੁ ਪਚ੍ਚਤ੍ਥਿਕੇਸੁ. ਇਮੇਤਿ ਮੇਤ੍ਤਿਯਭੁਮ੍ਮਜਕਵਡ੍ਢਲਿਚ੍ਛਵਿਨੋ. ਅਞ੍ਞੇਪਿ ਯੇ ਵਾ ਪਨ ਭਿਕ੍ਖੂਤਿ ਸਮ੍ਬਨ੍ਧੋ. ਅਰਿਟ੍ਠਭਿਕ੍ਖੁ ਚ ਕਣ੍ਟਕਸਾਮਣੇਰੋ ਚ ਵੇਸਾਲਿਕਵਜ੍ਜਿਪੁਤ੍ਤਕਾ ਚ ਅਰਿਟ੍ਠ…ਪੇ… ਵਜ੍ਜੀਪੁਤ੍ਤਕਾ. ਤੇ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਸਮ੍ਬਨ੍ਧੋ. ਪਰੂਪਹਾਰੋ ਚ ਅਞ੍ਞਾਣੋ ਚ ਕਙ੍ਖਾਪਰਵਿਤਰਣੋ ਚ ਪਰੂ…ਪੇ… ਵਿਤਰਣਾ. ਤੇ ਆਦਯੋ ਯੇਸਂ ਵਾਦਾਨਨ੍ਤਿ ਪਰੂ…ਪੇ… ਵਿਤਰਣਾਦਯੋ. ਤੇ ਏਵ ਵਾਦਾ ਏਤੇਸਨ੍ਤਿ ਪਰੂ…ਪੇ… ਵਿਤਰਣਾਦਿਵਾਦਾ. ਤੇ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਸਮ੍ਬਨ੍ਧੋ. ਅਬੁਦ੍ਧਸਾਸਨਂ ਬੁਦ੍ਧਸਾਸਨਨ੍ਤਿ ਵਤ੍ਵਾ ਕਤਪਗ੍ਗਹਾ ਮਹਾਸਙ੍ਘਿਕਾਦਯੋ ਚ ਸਾਸਨਪਚ੍ਚਤ੍ਥਿਕਾ ਨਾਮਾਤਿ ਯੋਜਨਾ. ਕਙ੍ਖਾਪਰਵਿਤਰਣਾਦੀਤਿ ਏਤ੍ਥ ਆਦਿਸਦ੍ਦੇਨ ਕਥਾਵਤ੍ਥੁਪਕਰਣੇ ਆਗਤਾ ਵਾਦਾ ਸਙ੍ਗਯ੍ਹਨ੍ਤਿ. ਮਹਾਸਙ੍ਘਿਕਾਦਯੋਤਿ ਏਤ੍ਥ ਆਦਿਸਦ੍ਦੇਨ ਦੀਪਵਂਸੇ ਆਗਤਾ ਗਣਾ ਸਙ੍ਗਯ੍ਹਨ੍ਤਿ. ਆਦਿਮ੍ਹਿ ‘‘ਵਿਪਰੀਤਦਸ੍ਸਨਾ’’ਤਿ ਪਦਂ ਸਬ੍ਬਪਦੇਹਿ ਯੋਜੇਤਬ੍ਬਂ. ‘‘ਸਹਧਮ੍ਮੇਨਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਹ ਕਾਰਣੇਨਾ’’ਤਿ. ਯਥਾਤਿ ਯੇਨਾਕਾਰੇਨ ਨਿਗ੍ਗਯ੍ਹਮਾਨੇਤਿ ਸਮ੍ਬਨ੍ਧੋ.

ਤਤ੍ਥਾਤਿ ਤਿਵਿਧੇਸੁ ਸਦ੍ਧਮ੍ਮੇਸੁ. ਮਹਾਵਤ੍ਤਾਨਿ ਸਨ੍ਤਿ, ਅਯਂ ਸਬ੍ਬੋਤਿ ਯੋਜਨਾ. ਚਤ੍ਤਾਰਿ ਫਲਾਨਿ ਚਾਤਿ ਲਿਙ੍ਗਵਿਪਲ੍ਲਾਸੇਨ ਯੋਜੇਤਬ੍ਬਂ. ਏਤ੍ਥ ਚਕਾਰੇਨ ਅਭਿਞ੍ਞਾਪਟਿਸਮ੍ਭਿਦਾ ਸਙ੍ਗਹਿਤਾ ਤਾਸਮ੍ਪਿ ਅਧਿਗਮਸਾਸਨਭਾਵਤੋ.

ਤਤ੍ਥਾਤਿ ਤਿਵਿਧੇਸੁ ਸਦ੍ਧਮ੍ਮੇਸੁ. ਕੇਚਿ ਥੇਰਾਤਿ ਧਮ੍ਮਕਥਿਕਾ ਕੇਚਿ ਥੇਰਾ. ‘‘ਯੋ ਖੋ’’ਤਿ ਕਣ੍ਠਜਦੁਤਿਯਕ੍ਖਰੇਨ ਪਠਿਤਬ੍ਬੋ. ਪੋਤ੍ਥਕੇਸੁ ਪਨ ‘‘ਯੋ ਵੋ’’ਤਿ ਵਕਾਰੇਨ ਪਾਠੋ ਅਤ੍ਥਿ, ਸੋ ਅਯੁਤ੍ਤੋ. ਕਸ੍ਮਾ? ‘‘ਸੋ ਵੋ’’ਤਿ ਪਰਤੋ ਵੁਤ੍ਤਤ੍ਤਾ, ਏਕਸ੍ਮਿਂ ਵਾਕ੍ਯੇ ਦ੍ਵਿਨ੍ਨਂ ਸਮਾਨਸੁਤਿਸਦ੍ਦਾਨਂ ਅਯੁਤ੍ਤਤ੍ਤਾ ਚ. ਕੇਚਿ ਥੇਰਾਤਿ ਪਂਸੁਕੂਲਿਕਾ ਕੇਚਿ ਥੇਰਾ ਆਹਂਸੂਤਿ ਸਮ੍ਬਨ੍ਧੋ. ਇਤਰੇ ਪਨ ਥੇਰਾਤਿ ਧਮ੍ਮਕਥਿਕਥੇਰੇਹਿ ਚ ਪਂਸੁਕੂਲਿਕਥੇਰੇਹਿ ਚ ਅਞ੍ਞੇ ਥੇਰਾ. ਤੇਤਿ ਪਞ੍ਚ ਭਿਕ੍ਖੂ ਕਰਿਸ੍ਸਨ੍ਤੀਤਿ ਸਮ੍ਬਨ੍ਧੋ. ਜਮ੍ਬੁਦੀਪਸ੍ਸ ਪਚ੍ਚਨ੍ਤੇ ਤਿਟ੍ਠਤੀਤਿ ਪਚ੍ਚਨ੍ਤਿਮੋ, ਤਸ੍ਮਿਂ. ਜਮ੍ਬੁਦੀਪਸ੍ਸ ਮਜ੍ਝੇ ਵੇਮਜ੍ਝੇ ਤਿਟ੍ਠਤੀਤਿ ਮਜ੍ਝਿਮੋ. ਅਥ ਵਾ ਮਜ੍ਝਾਨਂ ਸੁਦ੍ਧਾਨਂ ਬੁਦ੍ਧਾਦੀਨਂ ਨਿਵਾਸੋ ਮਜ੍ਝਿਮੋ, ਤਸ੍ਮਿਂ. ਵੀਸਤਿ ਵਗ੍ਗਾ ਇਮਸ੍ਸਾਤਿ ਵੀਸਤਿਵਗ੍ਗੋ, ਸੋਯੇਵ ਗਣੋ ਵੀਸਤਿਵਗ੍ਗਗਣੋ, ਤਂ. ਏਵਨ੍ਤਿਆਦਿ ਨਿਗਮਨਂ.

ਤਸ੍ਸਾਧੇਯ੍ਯੋਤਿ ਤਸ੍ਸਾਯਤ੍ਤੋ, ਤਸ੍ਸ ਸਨ੍ਤਕੋਤਿ ਵੁਤ੍ਤਂ ਹੋਤਿ. ਪਵਾਰਣਾ ਆਧੇਯ੍ਯਾ, ਸਙ੍ਘਕਮ੍ਮਂ ਆਧੇਯ੍ਯਂ, ਪਬ੍ਬਜ੍ਜਾ ਆਧੇਯ੍ਯਾ, ਉਪਸਮ੍ਪਦਾ ਆਧੇਯ੍ਯਾਤਿ ਯੋਜਨਾ.

ਯੇਪਿ ਇਮੇ ਨਵ ਉਪੋਸਥਾਤਿ ਸਮ੍ਬਨ੍ਧੋ. ਯਾਪਿ ਚ ਇਮਾ ਨਵ ਪਵਾਰਣਾਯੋਤਿ ਯੋਜਨਾ. ਤਸ੍ਸਾਤਿ ਵਿਨਯਧਰਸ੍ਸ. ਤਾਸਨ੍ਤਿ ਨਵਪਵਾਰਣਾਨਂ.

ਯਾਨਿਪਿ ਇਮਾਨਿ ਚਤ੍ਤਾਰਿ ਸਙ੍ਘਕਮ੍ਮਾਨੀਤਿ ਯੋਜੇਤਬ੍ਬਂ. ਏਤ੍ਥ ਚ ਤਾਨਿ ਵਿਨਯਧਰਾਯਤ੍ਤਾਨੇਵਾਤਿ ਪਾਠਸੇਸੋ ਅਜ੍ਝਾਹਰਿਤਬ੍ਬੋ.

ਯਾਪਿ ਚ ਅਯਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਕਾਤਬ੍ਬਾਤਿ ਯੋਜਨਾ. ਹੀਤਿ ਸਚ੍ਚਂ. ਅਞ੍ਞੋਤਿ ਵਿਨਯਧਰਤੋ ਪਰੋ. ਸੋ ਏਵਾਤਿ ਵਿਨਯਧਰੋ ਏਵ. ‘‘ਉਪਜ੍ਝ’’ਨ੍ਤਿ ਧਾਤੁਕਮ੍ਮਂ, ‘‘ਸਾਮਣੇਰੇਨਾ’’ਤਿ ਕਾਰਿਤਕਮ੍ਮਂ ਉਪਨੇਤਬ੍ਬਂ. ਏਤ੍ਥ ਚਾਤਿ ਉਪੋਸਥਾਦੀਸੁ ਚ. ਨਿਸ੍ਸਯਦਾਨਞ੍ਚ ਸਾਮਣੇਰੂਪਟ੍ਠਾਨਞ੍ਚ ਵਿਸੁਂ ਕਤ੍ਵਾ ਦ੍ਵਾਦਸਾਨਿਸਂਸੇ ਲਭਤੀਤਿਪਿ ਸਕ੍ਕਾ ਵਤ੍ਤੁਂ.

ਵਿਸੁਂ ਵਿਸੁਂ ਕਤ੍ਵਾਤਿ ‘‘ਪਞ੍ਚਾਤਿ ਚ…ਪੇ… ਏਕਾਦਸਾ’’ਤਿ ਚ ਕੋਟ੍ਠਾਸਂ ਕੋਟ੍ਠਾਸਂ ਕਤ੍ਵਾ, ਸਤ੍ਤ ਕੋਟ੍ਠਾਸੇ ਕਤ੍ਵਾ ਭਾਸਤੀਤਿ ਅਧਿਪ੍ਪਾਯੋ. ਥੋਮੇਤੀਤਿ ਸਮ੍ਮੁਖਾ ਥੋਮੇਤਿ. ਪਸਂਸਤੀਤਿ ਪਰਮ੍ਮੁਖਾ ਪਸਂਸਤਿ. ‘‘ਉਗ੍ਗਹੇਤਬ੍ਬ’’ਨ੍ਤਿਪਦਸ੍ਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਪਰਿਯਾਪੁਣਿਤਬ੍ਬ’’ਨ੍ਤਿ. ਅਦ੍ਧਨਿ ਦੀਘੇ ਸਾਧੂਤਿ ਅਦ੍ਧਨਿਯਂ ਅਦ੍ਧਕ੍ਖਮਂ ਅਦ੍ਧਯੋਗ੍ਯਨ੍ਤਿ ਅਤ੍ਥੋ ਸਾਧੁਅਤ੍ਥੇ ਨਿਯਪਚ੍ਚਯੋ (ਮੋਗ੍ਗਲ੍ਲਾਨੇ ੪.੩੩.੭੩).

ਥੇਰਾ ਚ ਨਵਾ ਚ ਮਜ੍ਝਿਮਾ ਚ ਬਹੂ ਤੇ ਭਿਕ੍ਖੂ ਪਰਿਯਾਪੁਣਨ੍ਤੀਤਿ ਯੋਜਨਾ.

੪੩੯. ‘‘ਉਦ੍ਦਿਸ੍ਸਮਾਨੇ’’ਤਿ ਪਦਸ੍ਸ ਕਮ੍ਮਰੂਪਤ੍ਤਂ ਦਸ੍ਸੇਤੁਂ ਵੁਤ੍ਤਂ ‘‘ਉਦ੍ਦਿਸਿਯਮਾਨੇ’’ਤਿ. ਸੋ ਪਨਾਤਿ ਪਾਤਿਮੋਕ੍ਖੋ ਪਨ. ਯਸ੍ਮਾ ਉਦ੍ਦਿਸ੍ਸਮਾਨੋ ਨਾਮ ਹੋਤਿ, ਤਸ੍ਮਾਤਿ ਯੋਜਨਾ. ਉਦ੍ਦਿਸਨ੍ਤੇ ਵਾਤਿ ਉਦ੍ਦਿਸਿਯਮਾਨੇ ਵਾ. ਉਦ੍ਦਿਸਾਪੇਨ੍ਤੇ ਵਾਤਿ ਉਦ੍ਦਿਸਾਪਿਯਮਾਨੇ ਵਾ. ਅਨ੍ਤਸਦ੍ਦੋ ਹਿ ਮਾਨਸਦ੍ਦਕਾਰਿਯੋ. ਯੋਤਿ ਭਿਕ੍ਖੁ. ਨਨ੍ਤਿ ਤਂ ਪਾਤਿਮੋਕ੍ਖਂ. ਚਸਦ੍ਦੋ ਖੁਦ੍ਦਾਨੁਖੁਦ੍ਦਕਪਦਸ੍ਸ ਦ੍ਵਨ੍ਨਵਾਕ੍ਯਂ ਦਸ੍ਸੇਤਿ, ਪੁਬ੍ਬਪਦੇ ਕਕਾਰਲੋਪੋ ਦਟ੍ਠਬ੍ਬੋ. ਤੇਸਨ੍ਤਿ ਖੁਦ੍ਦਾਨੁਖੁਦ੍ਦਾਕਾਨਂ. ਹੀਤਿ ਸਚ੍ਚਂ. ਏਤਾਨੀਤਿ ਖੁਦ੍ਦਾਨੁਖੁਦ੍ਦਕਾਨਿ. ਯੇਤਿ ਭਿਕ੍ਖੂ. ‘‘ਯਾਵ ਉਪ੍ਪਜ੍ਜਤਿਯੇਵ, ਤਾਵ ਸਂਵਤ੍ਤਨ੍ਤਿ ਇਤਿ ਵੁਤ੍ਤਂ ਹੋਤੀਤਿ ਯੋਜਨਾ ਇਮਸ੍ਸ ਨਯਸ੍ਸ ਪਾਠਸੇਸੇਹਿ ਯੋਜੇਤਬ੍ਬਤ੍ਤਾ. ਗਰੁਕਭਾਵਂ ਸਲ੍ਲਕ੍ਖੇਨ੍ਤੋ ਲਹੁਕਭਾਵਂ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਅਤਿਵਿਯਾਤਿ ਅਤਿ ਇ ਏਵ. ਇਕਾਰੋ ਹਿ ਸਨ੍ਧਿਵਸੇਨ ਅਦਸ੍ਸਨਂ ਗਤੋ. ਵਿਯਸਦ੍ਦੋ ਏਵਕਾਰਤ੍ਥਵਾਚਕੋ ‘‘ਵਰਮ੍ਹਾਕਂ ਭੁਸਾਮਿਵਾ’’ਤਿ ਏਤ੍ਥ (ਜਾ. ੧.੩.੧੦੮) ਇਵਸਦ੍ਦੋ ਵਿਯ, ਅਤਿ ਹੁਤ੍ਵਾ ਏਵਾਤਿ ਅਤ੍ਥੋ ਦਟ੍ਠਬ੍ਬੋ. ‘‘ਉਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਸਮੀਪੇ ਸਾਮਿਵਚਨਨ੍ਤਿ (ਰੁਪਸਿਦ੍ਧਿਯਂ ੩੧੬ ਸੁਤ੍ਤੇ) ਆਹ ‘‘ਉਪਸਮ੍ਪਨ੍ਨਸ੍ਸ ਸਨ੍ਤਿਕੇ’’ਤਿ. ਤਸ੍ਸਾਤਿ ਉਪਸਮ੍ਪਨ੍ਨਸ੍ਸ. ਤਸ੍ਮਿਨ੍ਤਿ ਵਿਨਯੇ. ਵਿਵਣ੍ਣੇਤੀਤਿ ਨ ਕੇਵਲਂ ਤਸ੍ਸੇਵ ਵਿਵਣ੍ਣਮਤ੍ਤਮੇਵ, ਅਥ ਖੋ ਨਿਨ੍ਦਤਿਯੇਵਾਤਿ ਆਹ ‘‘ਨਿਨ੍ਦਤੀ’’ਤਿ. ਗਰਹਤੀਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਨਿਨ੍ਦਤੀਤਿ ਉਪਸਮ੍ਪਨ੍ਨਸ੍ਸ ਸਮ੍ਮੁਖਾ ਨਿਨ੍ਦਤਿ. ਗਰਹਤੀਤਿ ਪਰਮ੍ਮੁਖਾ ਗਰਹਤੀਤਿ. ਦੁਤਿਯਂ.

੩. ਮੋਹਨਸਿਕ੍ਖਾਪਦਂ

੪੪੪. ਤਤਿਯੇ ਅਨੁਸਦ੍ਦੋ ਪਟਿਪਾਟਿਅਤ੍ਥਂ ਅਨ੍ਤੋਕਤ੍ਵਾ ਵਿਚ੍ਛਤ੍ਥਵਾਚਕੋਤਿ ਆਹ ‘‘ਅਨੁਪਟਿਪਾਟਿਯਾ ਅਦ੍ਧਮਾਸੇ ਅਦ੍ਧਮਾਸੇ’’ਤਿ. ਸੋਤਿ ਪਾਤਿਮੋਕ੍ਖੋ. ਉਪੋਸਥੇ ਉਪੋਸਥੇ ਉਦ੍ਦਿਸਿਤਬ੍ਬਨ੍ਤਿ ਅਨੁਪੋਸਥਿਕਂ. ਏਤ੍ਥਾਪਿ ਹਿ ਅਨੁਸਦ੍ਦੋ ਵਿਚ੍ਛਤ੍ਥਵਾਚਕੋ. ਸੋਤਿ ਪਾਤਿਮੋਕ੍ਖੋ. ਉਦ੍ਦਿਸਿਯਮਾਨੋ ਨਾਮ ਹੋਤੀਤਿ ਯੋਜਨਾ. ‘‘ਤਸ੍ਮਿਂ ਅਨਾਚਾਰੇ’’ਤਿ ਪਦੇਨ ‘‘ਤਤ੍ਥਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ‘‘ਯਂ ਆਪਤ੍ਤਿ’’ਨ੍ਤਿ ਪਦੇਨ ਯਂਸਦ੍ਦਸ੍ਸ ਵਿਸਯਂ ਦਸ੍ਸੇਤਿ. ਯਥਾਧਮ੍ਮੋਤਿ ਏਤ੍ਥ ਧਮ੍ਮਸਦ੍ਦੇਨ ਧਮ੍ਮੋ ਚ ਵਿਨਯੋ ਚ ਅਧਿਪ੍ਪੇਤੋਤਿ ਆਹ ‘‘ਧਮ੍ਮੋ ਚ ਵਿਨਯੋ ਚਾ’’ਤਿ. ਯਥਾਤਿ ਯੇਨਾਕਾਰੇਨ. ਸਾਧੁਸਦ੍ਦੋ ਸੁਨ੍ਦਰਤ੍ਥੋ, ਕਸਦ੍ਦੋ ਪਦਪੂਰਣੋਤਿ ਆਹ ‘‘ਸੁਟ੍ਠੂ’’ਤਿ. ਅਟ੍ਠਿਨ੍ਤਿ ਚ ‘‘ਕਤ੍ਵਾ’’ਤਿ ਚ ਦ੍ਵੇ ਪਦਾਨਿ ਦਟ੍ਠਬ੍ਬਾਨਿ. ‘‘ਅਟ੍ਠਿਕਤ੍ਵਾ’’ਤਿ ਵਾ ਏਕਂ ਪਦਂ. ਤਤ੍ਥ ਪੁਬ੍ਬਨਯੇ ਅਤ੍ਥੋ ਯਸ੍ਸਤ੍ਥੀਤਿ ਅਟ੍ਠਿ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ, ਤਂ ਅਟ੍ਠਿਂ. ਕਤ੍ਵਾਤਿ ਤ੍ਵਾਪਚ੍ਚਯਨ੍ਤਉਤ੍ਤਰਪਦੇਨ ਸਮਾਸੋ ਨ ਹੋਤਿ. ਅਟ੍ਠਿਕਭਾਵਨ੍ਤਿ ਏਤ੍ਥ ਇਕਸਦ੍ਦੇਨ ‘‘ਅਟ੍ਠੀ’’ਤਿ ਏਤ੍ਥ ਈਪਚ੍ਚਯਂ ਦਸ੍ਸੇਤਿ. ‘‘ਭਾਵ’’ਨ੍ਤਿਪਦੇਨ ਭਾਵਪਚ੍ਚਯੇਨ ਵਿਨਾ ਭਾਵਤ੍ਥਸ੍ਸ ਞਾਪੇਤਬ੍ਬਤਂ ਦਸ੍ਸੇਤਿ. ਅਤ੍ਥੋ ਪਨੇਵਂ ਦਟ੍ਠਬ੍ਬੋ – ਅਟ੍ਠਿਭਾਵਂ ਕਤ੍ਵਾਤਿ. ਪਚ੍ਛਿਮਨਯੇ ਅਤ੍ਥੋ ਯਸ੍ਸਤ੍ਥੀਤਿ ਅਟ੍ਠਿਕੋ ਪੁਰਿਮਨਯੇਨੇਵ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ. ਅਤ੍ਥਯਿਤਬ੍ਬੋ ਇਚ੍ਛਿਤਬ੍ਬੋਤਿ ਵਾ ਅਟ੍ਠਿਕੋ, ਅਟ੍ਠਿਕਇਤਿ ਨਾਮਸਦ੍ਦਤੋ ਤ੍ਵਾਪਚ੍ਚਯੋ ਕਾਤਬ੍ਬੋ. ‘‘ਅਟ੍ਠਿਕਤ੍ਵਾ’’ਤਿ ਇਦਂ ਪਦਂ ਕਿਰਿਯਾਵਿਸੇਸਨਂ. ਕਿਰਿਯਾਵਿਸੇਸਨੇ ਵਤ੍ਤਮਾਨੇ ਕਰਧਾਤੁ ਵਾ ਭੂਧਾਤੁ ਵਾ ਯੋਜੇਤਬ੍ਬਾਤਿ ਦਸ੍ਸੇਭੁਂ ਵੁਤ੍ਤਂ ‘‘ਕਤ੍ਵਾ ਹੁਤ੍ਵਾ’’ਤਿ. ਤਂ ਸਬ੍ਬਂ ਦਸ੍ਸੇਨ੍ਤੋ ਆਹ ‘‘ਅਟ੍ਠਿਕਤ੍ਵਾਤਿ ਅਟ੍ਠਿਕਭਾਵਂ ਕਤ੍ਵਾ, ਅਟ੍ਠਿਕੋ ਹੁਤ੍ਵਾ’’ਤਿ. ਤਤਿਯਂ.

੪. ਪਹਾਰਸਿਕ੍ਖਾਪਦਂ

੪੪੯. ਚਤੁਤ੍ਥੇ ਕਸ੍ਮਾ ਛਬ੍ਬਗ੍ਗਿਯਾ ਸਤ੍ਤਰਸਵਗ੍ਗਿਯਾਨਂ ਪਹਾਰਂ ਦੇਨ੍ਤਿ, ਨਨੁ ਅਕਾਰਣੇਨ ਪਹਾਰਂ ਦੇਨ੍ਤੀਤਿ ਆਹ ‘‘ਆਵੁਸੋ’’ਤਿਆਦਿ. ਇਮਿਨਾ ਯਥਾ ਵਦਨ੍ਤਿ, ਤਥਾ ਅਕਤਤ੍ਤਾ ਪਹਾਰਂ ਦੇਨ੍ਤੀਤਿ ਦਸ੍ਸੇਤਿ.

੪੫੧. ਸਚੇਪੀਤਿ ਏਤ੍ਥ ਪਿਸਦ੍ਦੇਨ ਸਚੇ ਅਮਰਤਿ, ਕਾ ਨਾਮ ਕਥਾ, ਪਾਚਿਤ੍ਤਿਯਮੇਵਾਤਿ ਦਸ੍ਸੇਤਿ. ਪਹਾਰੇਨਾਤਿ ਪਹਾਰਹੇਤੁਨਾ. ਯਥਾਤਿ ਯੇਨਾਕਾਰੇਨ. ਅਯਨ੍ਤਿ ਭਿਕ੍ਖੁ. ਨ ਵਿਰੋਚਤੀਤਿ ਨ ਸੋਭਤਿ.

੪੫੨. ‘‘ਅਨੁਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਅਕਾਰਸ੍ਸ ਅਞ੍ਞਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਗਹਟ੍ਠਸ੍ਸ ਵਾ’’ਤਿਆਦਿ. ਪਬ੍ਬਜਿਤਸ੍ਸ ਵਾਤਿ ਪਰਿਬ੍ਬਾਜਕਸ੍ਸ ਵਾ ਸਾਮਣੇਰਸ੍ਸ ਵਾ.

੪੫੩. ‘‘ਕੇਨਚੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਮਨੁਸ੍ਸੇਨ ਵਾ’’ਤਿਆਦਿ. ਤਤੋਤਿ ਵਿਹੇਠਨਤੋ, ਇਮਿਨਾ ਮੋਕ੍ਖਸ੍ਸ ਅਪਾਦਾਨਂ ਦਸ੍ਸੇਤਿ, ‘‘ਅਤ੍ਤਨੋ’’ਤਿ ਇਮਿਨਾ ਸਮ੍ਬਨ੍ਧਂ ਦਸ੍ਸੇਤਿ. ‘‘ਪਤ੍ਥਯਮਾਨੋ’’ਤਿ ਇਮਿਨਾ ‘‘ਅਧਿਪ੍ਪਾਯੋ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ਮੁਗ੍ਗਰੇਨ ਵਾਤਿ ਚਤੁਹਤ੍ਥਦਣ੍ਡਸ੍ਸ ਅਦ੍ਧੇਨ ਦਣ੍ਡੇਨ ਵਾ. ਸੋਤਿ ਚੋਰਾਦਿਕੋਤਿ. ਚਤੁਤ੍ਥਂ.

੫. ਤਲਸਤ੍ਤਿਕਸਿਕ੍ਖਾਪਦਂ

੪੫੪. ਪਞ੍ਚਮੇ ਤਲਨ੍ਤਿ ਹਤ੍ਥਤਲਂ. ਤਞ੍ਹਿ ਤਲਤਿ ਯਂਕਿਞ੍ਚਿ ਗਹਿਤਵਤ੍ਥੁ ਪਤਿਟ੍ਠਾਤਿ ਏਤ੍ਥਾਤਿ ‘‘ਤਲ’’ਨ੍ਤਿ ਵੁਚ੍ਚਤਿ. ਸਤ੍ਤੀਤਿ ਕੁਨ੍ਤੋ. ਸੋ ਹਿ ਸਕਤਿ ਵਿਜ੍ਝਿਤੁਂ ਸਮਤ੍ਥੇਤੀਤਿ ‘‘ਸਤ੍ਤੀ’’ਤਿ ਵੁਚ੍ਚਤਿ. ਤਲਮੇਵ ਸਤ੍ਤਿਸਦਿਸਤ੍ਤਾ ਤਲਸਤ੍ਤਿਕਂ, ਸਦਿਸਤ੍ਥੇ ਕੋ, ਤਂ ਤਲਸਤ੍ਤਿਕਂ ਉਪਚਾਰੇਨ ਗਹੇਤ੍ਵਾ ‘‘ਕਾਯਮ੍ਪੀ’’ਤਿ ਵੁਤ੍ਤਂ. ਕਾਯਤੋ ਅਞ੍ਞਂ ਵਤ੍ਥੁਮ੍ਪਿ ਤਲਸਤ੍ਤਿਕਸਙ੍ਖਾਤੇਨ ਕਾਯੇਨ ਗਹੇਤ੍ਵਾ ਉਗ੍ਗਿਰਤ੍ਤਾ ਵੁਤ੍ਤਂ ‘‘ਕਾਯਪਟਿਬਦ੍ਧਮ੍ਪੀ’’ਤਿ. ‘‘ਪਹਾਰਸਮੁਚ੍ਚਿਤਾ’’ਤਿ ਏਤ੍ਥ ਸਂਪੁਬ੍ਬੋ ਚ ਉਪੁਬ੍ਬੋ ਚ ਚਿਸਦ੍ਦੋ ਪਗੁਣਨਸਙ੍ਖਾਤੇ ਪਰਿਚਿਤੇ ਵਤ੍ਤਤੀਤਿ ਆਹ ‘‘ਪਹਾਰਪਰਿਚਿਤਾ’’ਤਿ. ਪਹਾਰੇਨ ਸਂ ਪੁਨਪ੍ਪੁਨਂ ਉਚ੍ਚਿਤਾ ਪਰਿਚਿਤਾਤਿ ਅਤ੍ਥੋ. ਇਮਮੇਵਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਪੁਬ੍ਬੇਪਿ…ਪੇ… ਅਤ੍ਥੋ’’ਤਿ. ਅਞ੍ਞਮ੍ਪਿ ਸਜ੍ਝਾਯਨਨਯਂ ਦਸ੍ਸੇਤੁਂ ਵੁਤ੍ਤਂ ‘‘ਪਹਾਰਸ੍ਸ ਉਬ੍ਬਿਗਾ’’ਤਿ. ਤਸ੍ਸਾਤਿ ਤਸ੍ਸ ਪਾਠਸ੍ਸ. ਪਹਾਰਸ੍ਸਾਤਿ ਪਹਾਰਤੋ. ਨਿਸ੍ਸਕ੍ਕਤ੍ਥੇ ਚੇਤਂ ਸਾਮਿਵਚਨਂ. ‘‘ਭੀਤਾ’’ਤਿ ਇਮਿਨਾ ‘‘ਉਬ੍ਬਿਗਾ’’ਤਿ ਏਤ੍ਥ ਉਪੁਬ੍ਬ ਵਿਜਧਾਤੁਸ੍ਸਤ੍ਥਂ ਦਸ੍ਸੇਤਿ.

੪੫੭-੮. ਵਿਰਦ੍ਧੋਤਿ ਪਣ੍ਣਕੋ ਹੁਤ੍ਵਾ. ਪੁਬ੍ਬੇਤਿ ਪੁਰਿਮਸਿਕ੍ਖਾਪਦੇ. ਵੁਤ੍ਤੇਸੁ ਵਤ੍ਥੂਸੂਤਿ ‘‘ਚੋਰਂ ਵਾ ਪਚ੍ਚਤ੍ਥੀਕਂ ਵਾ’’ਤਿਆਦਿਨਾ ਵੁਤ੍ਤੇਸੁ ਵਤ੍ਥੂਸੂਤਿ. ਪਞ੍ਚਮਂ.

੬. ਅਮੂਲਕਸਿਕ੍ਖਾਪਦਂ

੪੫੯. ਛਟ੍ਠੇ ਤੇਤਿ ਛਬ੍ਬਗ੍ਗਿਯਾ. ਚੋਦੇਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਆਕਿਣ੍ਣਦੋਸਤ੍ਤਾਤਿ ਤੇਸਂ ਆਕੁਲਆਦੀਨਵਤ੍ਤਾ. ਏਵਨ੍ਤਿ ਚੋਦਿਯਮਾਨੇ. ਅਤ੍ਤਪਰਿਤ੍ਤਾਣਨ੍ਤਿ ਅਤ੍ਤਨੋ ਪਰਿਸਮਨ੍ਤਤੋ ਤਾਣਂ ਰਕ੍ਖਨਂ ਕਰੋਨ੍ਤਾ ਚੋਦੇਨ੍ਤੀਤਿ ਯੋਜਨਾਤਿ. ਛਟ੍ਠਂ.

੭. ਸਞ੍ਚਿਚ੍ਚਸਿਕ੍ਖਾਪਦਂ

੪੬੪. ਸਤ੍ਤਮੇ ਉਪਪੁਬ੍ਬਦਹਧਾਤੁਸ੍ਸ ਸਕਮ੍ਮਿਕਤ੍ਤਾ ਕਾਰਿਤਨ੍ਤੋਗਧਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਉਪ੍ਪਾਦੇਨ੍ਤੀ’’ਤਿ. ‘‘ਅਨੁਪਸਮ੍ਪਨ੍ਨਸ੍ਸਾ’’ਤਿ ਏਤ੍ਥ ਅਕਾਰਸ੍ਸ ਸਦਿਸਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸਾਮਣੇਰਸ੍ਸਾ’’ਤਿ. ਸਾਮਣੇਰੋਪਿ ਹਿ ਉਪਸਮ੍ਪਨ੍ਨੇਨ ਸਦਿਸੋ ਹੋਤਿ ਸਣ੍ਠਾਨੇਨ ਚ ਪੁਰਿਸਭਾਵੇਨ ਚ. ਸਾਮਣੇਰਸ੍ਸ ਕੁਕ੍ਕੁਚ੍ਚਂ ਉਪਦਹਤੀਤਿ ਸਮ੍ਬਨ੍ਧੋ. ਨਿਸਿਨ੍ਨਂ ਮਞ੍ਞੇ, ਨਿਪਨ੍ਨਂ ਮਞ੍ਞੇ, ਭੁਤ੍ਤਂ ਮਞ੍ਞੇ, ਪੀਤਂ ਮਞ੍ਞੇ, ਕਤਂ ਮਞ੍ਞੇਤਿ ਯੋਜਨਾ. ਨਿਸਿਨ੍ਨਨ੍ਤਿ ਨਿਸੀਦਿਤਂ. ਨਿਪਨ੍ਨਨ੍ਤਿ ਨਿਪਜ੍ਜਿਤਨ੍ਤਿ. ਸਤ੍ਤਮਂ.

੮. ਉਪਸ੍ਸੁਤਿਸਿਕ੍ਖਾਪਦਂ

੪੭੧. ਅਟ੍ਠਮੇ ‘‘ਅਧਿਕਰਣਜਾਤਾਨ’’ਨ੍ਤਿ ਏਤ੍ਥ ਅਧਿਕਰਣਸ੍ਸ ਪਕਰਣਤੋ ਵਿਵਾਦਾਧਿਕਰਣਭਾਵਞ੍ਚ ਵਿਸੇਸਨਪਰਪਦਭਾਵਞ੍ਚ ਦਸ੍ਸੇਨ੍ਤੋ ਆਹ ‘‘ਉਪ੍ਪਨ੍ਨਵਿਵਾਦਾਧਿਕਰਣਾਨ’’ਨ੍ਤਿ. ਤਤ੍ਥ ਉਪ੍ਪਨ੍ਨਸਦ੍ਦੇਨ ਜਾਤਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਵਿਵਾਦਸਦ੍ਦੇਨ ਅਧਿਕਰਣਸ੍ਸ ਸਰੂਪਂ ਦਸ੍ਸੇਤਿ. ਸੁਯ੍ਯਤੀਤਿ ਸੁਤਿ ਵਚਨਂ, ਸੁਤਿਯਾ ਸਮੀਪਂ ਉਪਸ੍ਸੁਤਿ ਠਾਨਨ੍ਤਿ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਸੁਤਿਸਮੀਪ’’ਨ੍ਤਿ. ‘‘ਸਮੀਪ’’ਨ੍ਤਿ ਇਮਿਨਾ ਉਪਸਦ੍ਦਸ੍ਸਤ੍ਥਂ ਦਸ੍ਸੇਤਿ. ‘‘ਯਤ੍ਥਾ’’ਤਿਆਦਿਨਾ ‘‘ਉਪਸ੍ਸੁਤੀ’’ਤਿ ਏਤ੍ਥ ਉਪਸਦ੍ਦਸ੍ਸ ਪਧਾਨਤ੍ਤਾ ਤਸ੍ਸ ਸਰੂਪਂ ਦਸ੍ਸੇਤਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਮਨ੍ਤੇਨ੍ਤਨ੍ਤਿ ਏਤ੍ਥ ਉਪਯੋਗਵਚਨਸ੍ਸ ਭੁਮ੍ਮਤ੍ਥੇ ਅਧਿਪ੍ਪੇਤਤ੍ਤਾ ਵੁਤ੍ਤਂ ‘‘ਮਨ੍ਤਯਮਾਨੇ’’ਤਿ.

੪੭੩. ‘‘ਵੂਪਸਮਿਸ੍ਸਾਮੀ’’ਤਿ ਏਤ੍ਥ ਇਧਾਤੁਯਾ ਗਤ੍ਯਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਵੂਪਸਮਂ ਗਮਿਸ੍ਸਾਮੀ’’ਤਿ. ਅਕਾਰਕਭਾਵਨ੍ਤਿ ਨਿਦ੍ਦੋਸਭਾਵਂ. ਸੋਤੁਕਾਮਤਾਯ ਗਮਨਵਸੇਨ ਸਿਯਾ ਕਿਰਿਯਨ੍ਤਿ ਯੋਜਨਾ. ਪਰਤੋਪਿ ਏਸੇਵ ਨਯੋਤਿ. ਅਟ੍ਠਮਂ.

੯. ਕਮ੍ਮਪਟਿਬਾਹਨਸਿਕ੍ਖਾਪਦਂ

੪੭੪. ਨਵਮੇ ਮਯਨ੍ਤਿ ਛਬ੍ਬਗ੍ਗਿਯਨਾਮਕਾ ਅਮ੍ਹੇ. ਕਤਤ੍ਤਾਤਿ ਕਮ੍ਮਾਨਂ ਕਤਤ੍ਤਾ. ਧਮ੍ਮੋਤਿ ਭੂਤੋ ਸਭਾਵੋ. ਏਤੇਸੂਤਿ ਚਤੂਸੁ ਸਙ੍ਘਕਮ੍ਮੇਸੂਤਿ. ਨਵਮਂ.

੧੦. ਛਨ੍ਦਂ ਅਦਤ੍ਵਾਗਮਨਸਿਕ੍ਖਾਪਦਂ

੪੮੧. ਦਸਮੇ ਚੋਦੇਤਿ ਪਰਸ੍ਸ ਦੋਸਂ ਆਰੋਪੇਤੀਤਿ ਚੋਦਕੋ. ਤੇਨ ਚ ਚੋਦਕੇਨ ਚੋਦੇਤਬ੍ਬੋ ਦੋਸਂ ਆਰੋਪੇਤਬ੍ਬੋਤਿ ਚੁਦਿਤੋ, ਸੋਯੇਵ ਚੁਦਿਤਕੋ, ਤੇਨ ਚ. ‘‘ਅਨੁਵਿਜ੍ਜਕੋਤਿ ਚ ਵਿਨਯਧਰੋ. ਸੋ ਹਿ ਚੋਦਕਚੁਦਿਤਕਾਨਂ ਮਤਂ ਅਨੁਮਿਨੇਤ੍ਵਾ ਵਿਦਤਿ ਜਾਨਾਤੀਤਿ ਅਨੁਵਿਜ੍ਜਕੋ. ਏਤ੍ਤਾਵਤਾਪੀਤਿ ਏਤ੍ਤਕੇਨਪਿ ਪਮਾਣੇਨਾਤਿ. ਦਸਮਂ.

੧੧. ਦੁਬ੍ਬਲਸਿਕ੍ਖਾਪਦਂ

੪੮੪. ਏਕਾਦਸਮੇ ‘‘ਅਲਜ੍ਜੀਤਾ’’ਤਿਆਦੀਸੁ (ਪਰਿ. ੨੯੫) ਵਿਯ ਯਕਾਰਲੋਪੇਨ ਨਿਦ੍ਦੇਸੋਤਿ ਆਹ ‘‘ਯਥਾਮਿਤ੍ਤਤਾਯਾ’’ਤਿ. ‘‘ਯੋ ਯੋ’’ਤਿ ਇਮਿਨਾ ਯਥਾਸਦ੍ਦਸ੍ਸ ਵਿਚ੍ਛਤ੍ਥਂ ਦਸ੍ਸੇਤਿ. ਯਥਾਵੁਡ੍ਢਨ੍ਤਿਆਦੀਸੁ (ਚੂਲ਼ਵ. ੩੧੧ ਆਦਯੋ) ਵਿਯ ਯੋ ਯੋ ਮਿਤ੍ਤੋ ‘‘ਯਥਾਮਿਤ੍ਤ’’ਨ੍ਤਿ ਵਚਨਤ੍ਥੋ ਕਾਤਬ੍ਬੋ. ਸਬ੍ਬਪਦੇਸੂਤਿ ‘‘ਯਥਾਸਨ੍ਦਿਟ੍ਠਤਾ’’ਤਿਆਦੀਸੁ ਸਬ੍ਬੇਸੁ ਪਦੇਸੂਤਿ. ਏਕਾਦਸਮਂ.

੧੨. ਪਰਿਣਾਮਨਸਿਕ੍ਖਾਪਦਂ

੪੮੯. ਦ੍ਵਾਦਸਮੇ ਯਨ੍ਤਿ ਪਦਤ੍ਥਵਿਨਿਚ੍ਛਯਤ੍ਥਸਙ੍ਖਾਤਂ ਯਂ ਵਚਨਂ. ਤਤ੍ਥਾਤਿ ਤਿਂਸਕਕਣ੍ਡੇ. ਇਧਾਤਿ ਦ੍ਵੇਨਵੁਤਿਕਣ੍ਡੇ, ਸਿਕ੍ਖਾਪਦੇ ਵਾ. ਪੁਗ੍ਗਲਸ੍ਸਾਤਿ ਪਰਪੁਗ੍ਗਲਸ੍ਸਾਤਿ. ਦ੍ਵਾਦਸਮਂ.

ਸਹਧਮ੍ਮਿਕਵਗ੍ਗੋ ਅਟ੍ਠਮੋ.