੯. ਰਤਨਵਗ੍ਗੋ

੧. ਅਨ੍ਤੇਪੁਰਸਿਕ੍ਖਾਪਦ-ਅਤ੍ਥਯੋਜਨਾ

੪੯੪. ਰਾਜਵਗ੍ਗਸ੍ਸ ਪਠਮੇ ਪਰਿਤ੍ਤਕੋਤਿ ਗੁਣੇਨ ਖੁਦ੍ਦਕੋ. ਪਾਸਾਦਵਰਸਦ੍ਦਸ੍ਸ ਉਪਰਿਸਦ੍ਦੇਨ ਸਮ੍ਬਨ੍ਧਿਤਬ੍ਬਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਪਾਸਾਦਵਰਸ੍ਸ ਉਪਰਿ ਗਤੋ’’ਤਿ. ਇਮਿਨਾ ਪਾਸਾਦਵਰਸ੍ਸ ਉਪਰਿ ਉਪਰਿਪਾਸਾਦਵਰਂ, ਤਂ ਗਤੋ ਉਪਗਤੋਤਿ ਉਪਰਿਪਾਸਾਦਵਰਗਤੋਤਿ ਵਚਨਤ੍ਥਂ ਦਸ੍ਸੇਤਿ. ਅਯ੍ਯਾਨਨ੍ਤਿ ਭਿਕ੍ਖੂਨਂ. ‘‘ਕਾਰਣਾ’’ਤਿ ਇਮਿਨਾ ‘‘ਵਾਹਸਾ’’ਤਿ ਪਦਸ੍ਸਤ੍ਥਂ ਦਸ੍ਸੇਤਿ. ਤੇਹੀਤਿ ਅਯ੍ਯੇਹਿ.

੪੯੭. ਅਨ੍ਤਰਨ੍ਤਿ ਖਣਂ, ਓਕਾਸਂ ਵਾ ਵਿਵਰਂ ਵਾ. ਘਾਤੇਤੁਨ੍ਤਿ ਹਨਿਤੁਂ. ਇਚ੍ਛਤੀਤਿ ਇਮਿਨਾ ਪਤ੍ਥਧਾਤੁਯਾ ਯਾਚਨਤ੍ਥਂ ਦਸ੍ਸੇਤਿ. ‘‘ਰਾਜਨ੍ਤੇਪੁਰਂ ਹਤ੍ਥਿਸਮ੍ਮਦ੍ਦ’’ਨ੍ਤਿਆਦੀਸੁ ਵਚਨਤ੍ਥੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਹਤ੍ਥਿਸਮ੍ਮਦ੍ਦਨ੍ਤਿ ਹਤ੍ਥਿਸਮ੍ਬਾਧਟ੍ਠਾਨਂ. ਅਸ੍ਸੇਹਿ ਸਮ੍ਮਦ੍ਦੋ ਏਤ੍ਥਾਤਿ ਅਸ੍ਸਸਮ੍ਮਦ੍ਦੋ. ਰਥੇਹਿ ਸਮ੍ਮਦ੍ਦੋ ਏਤ੍ਥਾਤਿ ਰਥਸਮ੍ਮਦ੍ਦੋਤਿ ਵਚਨਤ੍ਥਂ ਅਤਿਦਿਸਨ੍ਤੋ ਆਹ ‘‘ਏਸੇਵ ਨਯੋ’’ਤਿ. ‘‘ਸਮ੍ਮਤ੍ਤ’’ਨ੍ਤਿ ਪਠਮਕ੍ਖਰੇਨ ਪਾਠਸ੍ਸ ਸਮ੍ਬਾਧਸ੍ਸ ਅਵਾਚਕਤ੍ਤਾ ਵੁਤ੍ਤਂ ‘‘ਤਂ ਨ ਗਹੇਤਬ੍ਬ’’ਨ੍ਤਿ. ਤਤ੍ਥਾਤਿ ਪਾਠੇ. ‘‘ਹਤ੍ਥੀਨਂ ਸਮ੍ਮਦ੍ਦ’’ਨ੍ਤਿ ਇਮਿਨਾ ਉਤ੍ਤਰਪਦਸ੍ਸ ਸਮ੍ਮਦ੍ਦਨਂ ਸਮ੍ਮਦ੍ਦਨ੍ਤਿ ਭਾਵਤ੍ਥਂ ਦਸ੍ਸੇਤਿ, ਪੁਰਿਮਪਦੇਨ ਛਟ੍ਠੀਸਮਾਸਞ੍ਚ. ਪੁਰਿਮਪਾਠੇ ਪਨ ਉਤ੍ਤਰਪਦਸ੍ਸ ਅਧਿਕਰਣਤ੍ਥਞ੍ਚ ਪੁਬ੍ਬਪਦੇਨ ਤਤਿਯਾਸਮਾਸਞ੍ਚ ਦਸ੍ਸੇਤਿ. ਬਾਹਿਰਤ੍ਥਸਮਾਸੋਤਿਪਿ ਵੁਚ੍ਚਤਿ. ਪਚ੍ਛਿਮਪਾਠੇ ‘‘ਹਤ੍ਥਿਸਮ੍ਮਦ੍ਦ’’ਨ੍ਤਿਆਦਿਪਦਸ੍ਸ ਲਿਙ੍ਗਵਿਪਲ੍ਲਾਸਞ੍ਚ ‘‘ਅਤ੍ਥੀ’’ਤਿ ਪਾਠਸੇਸੇਨ ਯੋਜੇਤਬ੍ਬਤਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਹਤ੍ਥਿਸਮ੍ਮਦ੍ਦੋ ਅਤ੍ਥੀ’’ਤਿ. ਰਜਿਤਬ੍ਬਾਨੀਤਿ ਰਜਨੀਯਾਨਿ, ਰਜਿਤੁਂ ਅਰਹਾਨੀਤਿ ਅਤ੍ਥੋ. ਇਮਿਨਾ ਸਮ੍ਬਨ੍ਧਕਾਲੇ ਪੁਰਿਮਪਾਠੇ ਰਞ੍ਞੋ ਅਨ੍ਤੇਪੁਰੇਤਿ ਵਿਭਤ੍ਤਿਵਿਪਲ੍ਲਾਸੋ ਕਾਤਬ੍ਬੋਤਿ. ਪਚ੍ਛਿਮਪਾਠੇ ਪਨ ਮੁਖ੍ਯਤੋਵ ਯੁਜ੍ਜਤਿ. ਤੇਨ ਵੁਤ੍ਤਂ ‘‘ਤਸ੍ਮਿਂ ਅਨ੍ਤੇਪੁਰੇ’’ਤਿ.

੪੯੮. ਅਵਸਿਤ੍ਤਸ੍ਸਾਤਿ ਖਤ੍ਤਿਯਾਭਿਸੇਕੇਨ ਅਭਿਸਿਤ੍ਤਸ੍ਸ. ਇਤੋਤਿ ਸਯਨਿਘਰਤੋ. ਇਮਿਨਾ ਪਞ੍ਚਮੀਬਾਹਿਰਸਮਾਸਂ ਦਸ੍ਸੇਤਿ. ਰਞ੍ਞੋ ਰਤਿਜਨਨਟ੍ਠੇਨ ਰਤਨਂ ਵੁਚ੍ਚਤਿ ਮਹੇਸੀ. ਮਹੇਸੀਤਿ ਚ ਸਾਭਿਸੇਕਾ ਦੇਵੀ. ਨਿਪੁਬ੍ਬ ਗਮੁਧਾਤੁਸ੍ਸ ਨਿਪੁਬ੍ਬਕਮੁਧਾਤੁਯਾ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਨਿਗ੍ਗਤਨ੍ਤਿ ਨਿਕ੍ਖਨ੍ਤ’’ਨ੍ਤਿ. ਪਠਮਂ.

੨. ਰਤਨਸਿਕ੍ਖਾਪਦਂ

੫੦੨. ਦੁਤਿਯੇ ਪਮੁਸ੍ਸਿਤ੍ਵਾਤਿ ਸਤਿਵਿਪ੍ਪਵਾਸੇਨ ਪਮੁਸ੍ਸਿਤ੍ਵਾ. ਪੁਣ੍ਣਪਤ੍ਤਨ੍ਤਿ ਤੁਟ੍ਠਿਦਾਯਂ. ਤਞ੍ਹਿ ਮਨੋਰਥਪੁਣ੍ਣੇਨ ਪਤ੍ਤਬ੍ਬਭਾਗਤ੍ਤਾ ‘‘ਪੁਣ੍ਣਪਤ੍ਤ’’ਨ੍ਤਿ ਵੁਚ੍ਚਤਿ. ਤਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਸਤਤੋ ਪਞ੍ਚ ਕਹਾਪਣਾ’’ਤਿ. ਇਧ ਪਨ ਕਹਾਪਣਾਨਂ ਪਞ੍ਚਸਤਤ੍ਤਾ ਪਞ੍ਚਵੀਸਕਹਾਪਣਾ ਅਧਿਪ੍ਪੇਤਾ. ਆਭਰਣਸਦ੍ਦਸ੍ਸ ਅਲਙ੍ਕਾਰਸਦ੍ਦੇਨ ਪਰਿਯਾਯਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਲਙ੍ਕਾਰ’’ਨ੍ਤਿ. ‘‘ਮਹਾਲਤਂ ਨਾਮਾ’’ਤਿ ਇਮਿਨਾ ਨ ਯੋ ਵਾ ਸੋ ਵਾ ਅਲਙ੍ਕਾਰੋ, ਅਥ ਖੋ ਵਿਸੇਸਾਲਙ੍ਕਾਰੋਤਿ ਦਸ੍ਸੇਤਿ. ਮਹਨ੍ਤਾਨਿ ਮਾਲਾਕਮ੍ਮਲਤਾਕਮ੍ਮਾਨਿ ਏਤ੍ਥਾਤਿ ਮਹਾਲਤਾ. ਲਤਾਗਹਣੇਨ ਹਿ ਮਾਲਾਪਿ ਗਹਿਤਾ. ਨਵਹਿ ਕੋਟੀਹਿ ਅਗ੍ਘਂ ਇਮਸ੍ਸਾਤਿ ਨਵਕੋਟਿਅਗ੍ਘਨਕਂ, ਨਵਕੋਟਿਸਙ੍ਖਾਤਂ ਅਗ੍ਘਂ ਅਰਹਤੀਤਿ ਵਾ ਨਵਕੋਟਿਅਗ੍ਘਨਕਂ.

੫੦੪. ਅਨ੍ਤੇ ਸਮੀਪੇ ਵਸਨਸੀਲਤ੍ਤਾ ਪਰਿਚਾਰਿਕੋ ‘‘ਅਨ੍ਤੇਵਾਸੀ’’ਤਿ ਵੁਚ੍ਚਤੀਤਿ ਆਹ ‘‘ਪਰਿਚਾਰਿਕੋ’’ਤਿ.

੫੦੬. ਦ੍ਵੇ ਲੇਡ੍ਡੁਪਾਤਾਤਿ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਦ੍ਵੇ ਲੇਡ੍ਡੁਪਾਤਾ. ਸਙ੍ਘ…ਪੇ… ਨਵਕਮ੍ਮਾਨਂ ਅਤ੍ਥਾਯ ਉਗ੍ਗਣ੍ਹਨ੍ਤਸ੍ਸ ਵਾ ਉਗ੍ਗਣ੍ਹਾਪੇਨ੍ਤਸ੍ਸ ਵਾ ਦੁਕ੍ਕਟਨ੍ਤਿ ਯੋਜਨਾ. ਅਵਸੇਸਨ੍ਤਿ ਜਾਤਰੂਪਰਜਤਤੋ ਅਵਸੇਸਂ. ਮਾਤੁਕਣ੍ਣਪਿਲ਼ਨ੍ਧਨਤਾਲਪਣ੍ਣਮ੍ਪੀਤਿ ਮਾਤੁਯਾ ਕਣ੍ਣੇ ਪਿਲ਼ਨ੍ਧਿਤਤਾਲਪਣ੍ਣਮ੍ਪਿ, ਪਟਿਸਾਮੇਨ੍ਤਸ੍ਸਾਤਿ ਸਮ੍ਬਨ੍ਧੋ.

‘‘ਕਪ੍ਪਿਯਭਣ੍ਡਂ ਹੋਤੀ’’ਤਿ ਇਮਿਨਾ ਅਕਪ੍ਪਿਯਭਣ੍ਡਂ ਨ ਵਟ੍ਟਤੀਤਿ ਦਸ੍ਸੇਤਿ. ਇਦਨ੍ਤਿ ਭਣ੍ਡਂ. ਪਲਿਬੋਧੋ ਨਾਮਾਤਿ ਅਤ੍ਤਨੋ ਪਲਿਬੋਧੋ ਨਾਮ. ਛਨ੍ਦੇਨਪੀਤਿ ਵਡ੍ਢਕੀਆਦੀਨਂ ਛਨ੍ਦਹੇਤੁਨਾਪਿ. ਭਯੇਨਪੀਤਿ ਰਾਜਵਲ੍ਲਭਾਨਂ ਭਯਹੇਤੁਨਾਪਿ. ਬਲਕ੍ਕਾਰੇਨਾਤਿ ਕਰਣਂ ਕਾਰੋ, ਬਲੇਨ ਕਾਰੋ ਬਲਕ੍ਕਾਰੋ, ਤੇਨ, ਬਲਕ੍ਕਾਰੋ ਹੁਤ੍ਵਾ ਪਾਤੇਤ੍ਵਾਤਿ ਅਤ੍ਥੋ.

ਤਤ੍ਥਾਤਿ ਮਹਾਰਾਮੇ. ਯਤ੍ਥਾਤਿ ਯਸ੍ਮਿਂ ਠਾਨੇ, ਸਙ੍ਕਾ ਉਪ੍ਪਜ੍ਜਤੀਤਿ ਸਮ੍ਬਨ੍ਧੋ. ਮਹਾਜਨਸਞ੍ਚਰਣਟ੍ਠਾਨੇਸੂਤਿ ਬਹੂਨਂ ਜਨਾਨਂ ਸਞ੍ਚਰਣਸਙ੍ਖਾਤੇਸੁ ਠਾਨੇਸੁ. ਨਗਹੇਤਬ੍ਬਸ੍ਸ ਹੇਤੁਂ ਦਸ੍ਸੇਤੁਂ ਵੁਤ੍ਤਂ ‘‘ਪਲਿਬੋਧੋ ਨ ਹੋਤੀ’’ਤਿ. ਯਸ੍ਮਾ ਪਲਿਬੋਧੋ ਨ ਹੋਤਿ, ਤਸ੍ਮਾ ਨ ਗਹੇਤਬ੍ਬਨ੍ਤਿ ਅਧਿਪ੍ਪਾਯੋ. ਏਕੋਤਿ ਏਕੋ ਭਿਕ੍ਖੁ ਪਸ੍ਸਤੀਤਿ ਸਮ੍ਬਨ੍ਧੋ. ਓਕ੍ਕਮ੍ਮਾਤਿ ਓਕ੍ਕਮਿਤ੍ਵਾ.

ਰੂਪਸਦ੍ਦੋ ਭਣ੍ਡਪਰਿਯਾਯੋਤਿ ਆਹ ‘‘ਭਣ੍ਡ’’ਨ੍ਤਿ. ਭਣ੍ਡਂ ਰੂਪਂ ਨਾਮਾਤਿ ਯੋਜਨਾ. ਭਣ੍ਡਿਕਨ੍ਤਿ ਭਣ੍ਡੇਨ ਨਿਯੁਤ੍ਤਂ ਪੁਟਕਂ. ਗਣੇਤ੍ਵਾਤਿ ਗਣਨਂ ਕਤ੍ਵਾ. ਨਿਮਿਤ੍ਤਨ੍ਤੀਤਿ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ. ਲਞ੍ਛਨਾਦਿ ਨਿਮਿਤ੍ਤਂ ਨਾਮਾਤਿ ਹਿ ਯੋਜਨਾ. ਲਞ੍ਛਨਾਦੀਤਿ ਆਦਿਸਦ੍ਦੇਨ ਨੀਲਪਿਲੋਤਿਕਾਦਯੋ ਸਙ੍ਗਣ੍ਹਾਤਿ. ਲਾਖਾਯਾਤਿ ਜਤੁਨਾ.

ਪਤਿਰੂਪਾ ਨਾਮ ਇਧ ਲਜ੍ਜਿਕੁਕ੍ਕੁਚ੍ਚਕਾਤਿ ਆਹ ‘‘ਲਜ੍ਜਿਨੋ ਕੁਕ੍ਕੁਚ੍ਚਕਾ’’ਤਿ. ਥਾਵਰਨ੍ਤਿ ਜਙ੍ਗਮਾ ਅਞ੍ਞਂ ਥਾਵਰਂ. ਅਦ੍ਧੁਨੋਤਿ ਕਾਲਸ੍ਸ. ਸਮਾਦਪੇਤ੍ਵਾਤਿ ਅਞ੍ਞੇ ਸਮਾਦਪੇਤ੍ਵਾ. ਉਦ੍ਦਿਸ੍ਸ ਅਰਿਯਾ ਤਿਟ੍ਠਨ੍ਤਿ, ਏਸਾ ਅਰਿਯਾਨ ਯਾਚਨਾ’’ਤਿ (ਜਾ. ੧.੭.੫੯) ਵੁਤ੍ਤਨਯੇਨ ਯਾਚਿਤ੍ਵਾਤਿ ਅਤ੍ਥੋ.

੫੦੭. ਰਤਨਸਮ੍ਮਤਨ੍ਤਿ ਮਨੁਸ੍ਸਾਨਂ ਉਪਭੋਗਪਰਿਭੋਗਨ੍ਤਿ. ਦੁਤਿਯਂ.

੩. ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦਂ

੫੦੮. ਤਤਿਯੇ ‘‘ਤਿਰਚ੍ਛਾਨਭੂਤਂ ਕਥ’’ਨ੍ਤਿ ਇਮਿਨਾ ‘‘ਤਿਰਚ੍ਛਾਨਕਥ’’ਨ੍ਤਿ ਪਦਸ੍ਸ ਤੁਲ੍ਯਨਿਸ੍ਸਿਤਸਮਾਸਂ ਦਸ੍ਸੇਤਿ. ਰਾਜਪਟਿਸਂਯੁਤ੍ਤਨ੍ਤਿ ਰਾਜੂਹਿ ਪਟਿਸਂਯੁਤ੍ਤਂ.

੫੧੨. ਸਮ੍ਬਹੁਲਾ ਭਿਕ੍ਖੂਤਿ ਸਮ੍ਬਨ੍ਧੋ. ਤਸ੍ਮਿਂ ਗਾਮੇਤਿ ਤਸ੍ਮਿਂ ਪਠਮਪਵਿਸਨਗਾਮੇ. ਤਂ ਕਮ੍ਮਨ੍ਤਿ ਤਂ ਇਚ੍ਛਿਤਕਮ੍ਮਂ. ਅਨ੍ਤਰਾਤਿ ਗਾਮਵਿਹਾਰਾਨਮਨ੍ਤਰੇ. ਭੁਮ੍ਮਤ੍ਥੇ ਚੇਤਂ ਨਿਸ੍ਸਕ੍ਕਵਚਨਂ.

ਕੁਲਘਰੇ ਵਾਤਿ ਞਾਤਿਕੁਲਉਪਟ੍ਠਾਕਕੁਲਘਰੇ ਵਾ. ਤੇਲਭਿਕ੍ਖਾਯ ਵਾਤਿ ਤੇਲਯਾਚਨਤ੍ਥਾਯ ਵਾ. ਪਸ੍ਸੇਤਿ ਅਤ੍ਤਨੋ ਪਸ੍ਸੇ ਸਮੀਪੇਤਿ ਵੁਤ੍ਤਂ ਹੋਤਿ. ਤੇਨਾਤਿ ਗਾਮਮਜ੍ਝਮਗ੍ਗੇਨ. ਅਨੋਕ੍ਕਮ੍ਮਾਤਿ ਅਨੋਕ੍ਕਮਿਤ੍ਵਾ, ਅਪਕ੍ਕਮਿਤ੍ਵਾਤਿ ਅਤ੍ਥੋਤਿ. ਤਤਿਯਂ.

੪. ਸੂਚਿਘਰਸਿਕ੍ਖਾਪਦਂ

੫੧੭. ਚਤੁਤ੍ਥੇ ਕਕਾਰਸ੍ਸ ਪਦਪੂਰਣਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਭੇਦਨਮੇਵ ਭੇਦਨਕ’’ਨ੍ਤਿ. ਅਸ੍ਸਤ੍ਥਿਅਤ੍ਥੇ ਅਪਚ੍ਚਯੋਤਿ ਆਹ ‘‘ਤਂ ਅਸ੍ਸ ਅਤ੍ਥੀ’’ਤਿ. ਅਸ੍ਸਾਤਿ ਪਾਚਿਤ੍ਤਿਯਸ੍ਸ. ਪਠਮਂ ਸੂਚਿਘਰਂ ਭਿਨ੍ਦਿਤ੍ਵਾ ਪਚ੍ਛਾ ਪਾਚਿਤ੍ਤਿਯਂ ਦੇਸੇਤਬ੍ਬਨ੍ਤਿ ਅਤ੍ਥੋ. ਅਰਣਿਧਨੁਕੇਤਿ ਅਰਣਿਯਾ ਧਨੁਕੇ. ਵੇਧਕੇਤਿ ਕਾਯਬਨ੍ਧਨਵੇਧਕੇਤਿ. ਚਤੁਤ੍ਥਂ.

੫. ਮਞ੍ਚਸਿਕ੍ਖਾਪਦਂ

੫੨੨. ਪਞ੍ਚਮੇ ਛੇਦਨਮੇਵ ਛੇਦਨਕਂ, ਤਮਸ੍ਸਤ੍ਥੀਤਿ ਛੇਦਨਕਨ੍ਤਿ ਅਤ੍ਥਂ ਸਨ੍ਧਾਯ ਵੁਤ੍ਤਂ ‘‘ਵੁਤ੍ਤਨਯਮੇਵਾ’’ਤਿ.

ਨਿਖਣਿਤ੍ਵਾਤਿ ਪਮਾਣਾਤਿਰੇਕਂ ਨਿਖਣਿਤ੍ਵਾ. ਉਤ੍ਤਾਨਂ ਵਾ ਕਤ੍ਵਾਤਿ ਹੇਟ੍ਠੁਪਰਿ ਪਰਿਵਤ੍ਤਨਂ ਵਾ ਕਤ੍ਵਾ. ਠਪੇਤ੍ਵਾਤਿ ਲਮ੍ਬਣਵਸੇਨ ਠਪੇਤ੍ਵਾਤਿ. ਪਞ੍ਚਮਂ.

੬. ਤੂਲੋਨਦ੍ਧਸਿਕ੍ਖਾਪਦਂ

੫੨੬. ਛਟ੍ਠੇ ਏਤ੍ਥਾਤਿ ਮਞ੍ਚਪੀਠੇ. ਅਵਨਹਿਤਬ੍ਬਨ੍ਤਿ ਓਨਦ੍ਧਂ, ਤੂਲੇਨ ਓਨਦ੍ਧਂ ਤੂਲੋਨਦ੍ਧਨ੍ਤਿ ਅਤ੍ਥੋਪਿ ਯੁਜ੍ਜਤਿ. ਤੂਲਂ ਪਕ੍ਖਿਪਿਤ੍ਵਾਤਿ ਮਞ੍ਚਪੀਠੇ ਚਿਮਿਲਿਕਂ ਪਤ੍ਥਰਿਤ੍ਵਾ ਤਸ੍ਸੁਪਰਿ ਤੂਲਂ ਪਕ੍ਖਿਪਿਤ੍ਵਾਤਿ ਅਤ੍ਥੋਤਿ. ਛਟ੍ਠਂ.

੭. ਨਿਸੀਦਨਸਿਕ੍ਖਾਪਦਂ

੫੩੧. ਸਤ੍ਤਮੇ ਕਤ੍ਥਾਤਿ ਕਿਸ੍ਮਿਂ ਖਨ੍ਧਕੇ, ਕਿਸ੍ਮਿਂ ਵਤ੍ਥੁਸ੍ਮਿਂ ਵਾ. ਹੀਤਿ ਸਚ੍ਚਂ. ਤਤ੍ਥਾਤਿ ਚੀਵਰਕ੍ਖਨ੍ਧਕੇ, ਪਣੀਤਭੋਜਨਵਤ੍ਥੁਸ੍ਮਿਂ ਵਾ. ‘‘ਯਥਾ ਨਾਮਾ’’ਤਿ ਇਮਿਨਾ ‘‘ਸੇਯ੍ਯਥਾਪੀ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ, ‘‘ਪੁਰਾਣੋ ਚਮ੍ਮਕਾਰੋ’’ਤਿ ਇਮਿਨਾ ‘‘ਪੁਰਾਣਾਸਿਕੋਟ੍ਠੋ’’ਤਿ ਪਦਸ੍ਸ. ਚਮ੍ਮਕਾਰੋ ਹਿ ਅਸਿਨਾ ਚਮ੍ਮਂ ਕੁਟਤਿ ਛਿਨ੍ਦਤੀਤਿ ‘‘ਅਸਿਕੋਟ੍ਠੋ’’ਤਿ ਵੁਚ੍ਚਤਿ. ਵਤ੍ਥੁਪ੍ਪਨ੍ਨਕਾਲਮੁਪਨਿਧਾਯ ਵੁਤ੍ਤਂ ‘‘ਪੁਰਾਣੋ’’ਤਿ. ਤਮੇਵੂਪਮਂ ਪਾਕਟਂ ਕਰੋਨ੍ਤੋ ਆਹ ‘‘ਯਥਾ ਹੀ’’ਤਿ. ਹੀਤਿ ਤਪ੍ਪਾਕਟੀਕਰਣਂ, ਤਂ ਪਾਕਟਂ ਕਰਿਸ੍ਸਾਮੀਤਿ ਹਿ ਅਤ੍ਥੋ. ਚਮ੍ਮਕਾਰੋ ਕਡ੍ਢਤੀਤਿ ਸਮ੍ਬਨ੍ਧੋ. ਵਿਤ੍ਥਤਨ੍ਤਿ ਵਿਸਾਲਂ. ਸੋਪੀਤਿ ਉਦਾਯੀਪਿ. ਤਂ ਨਿਸੀਦਨਂ ਕਡ੍ਢਤੀਤਿ ਯੋਜਨਾ. ਤੇਨਾਤਿ ਕਡ੍ਢਨਹੇਤੁਨਾ. ਤਨ੍ਤਿ ਉਦਾਯਿਂ. ਸਨ੍ਥਤਸਦਿਸਨ੍ਤਿ ਸਨ੍ਥਤੇਨ ਸਦਿਸਂ. ਏਕਸ੍ਮਿਂ ਅਨ੍ਤੇਤਿ ਏਕਸ੍ਮਿਂ ਕੋਟ੍ਠਾਸੇ, ਫਾਲੇਤ੍ਵਾਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਕਣ੍ਡੁਪਟਿਚ੍ਛਾਦਿਸਿਕ੍ਖਾਪਦਂ

੫੩੭. ਅਟ੍ਠਮੇ ‘‘ਕਤ੍ਥਾ’’ਤਿਆਦੀਨਿ ਵੁਤ੍ਤਨਯਾਨੇਵ.

੫੩੯. ‘‘ਯਸ੍ਸਾ’’ਤਿ ਪਦਸ੍ਸ ਵਿਸਯਂ ਦਸ੍ਸੇਤੁਂ ਵੁਤ੍ਤਂ ‘‘ਭਿਕ੍ਖੁਨੋ’’ਤਿ. ‘‘ਨਾਭਿਯਾ ਹੇਟ੍ਠਾ’’ਤਿ ਇਮਿਨਾ ਨਾਭਿਯਾ ਅਧੋ ਅਧੋਨਾਭੀਤਿ ਵਚਨਤ੍ਥਂ ਦਸ੍ਸੇਤਿ, ‘‘ਜਾਣੁਮਣ੍ਡਲਾਨਂ ਉਪਰੀ’’ਤਿ ਇਮਿਨਾ ਜਾਣੁਮਣ੍ਡਲਾਨਂ ਉਬ੍ਭ ਉਬ੍ਭਜਾਣੁਮਣ੍ਡਲਨ੍ਤਿ. ਉਬ੍ਭਸਦ੍ਦੋ ਹਿ ਉਪਰਿਪਰਿਯਾਯੋ ਸਤ੍ਤਮ੍ਯਨ੍ਤਨਿਪਾਤੋ. ਕਣ੍ਡੁਖਜ੍ਜੁਸਦ੍ਦਾਨਂ ਵੇਵਚਨਤ੍ਤਾ ਵੁਤ੍ਤਂ ‘‘ਕਣ੍ਡੂਤਿ ਖਜ੍ਜੂ’’ਤਿ. ਕਣ੍ਡਤਿ ਭੇਦਨਂ ਕਰੋਤੀਤਿ ਕਣ੍ਡੁ. ਖਜ੍ਜਤਿ ਬ੍ਯਧਨਂ ਕਰੋਤੀਤਿ ਖਜ੍ਜੁ. ਕੇਸੁਚਿ ਪੋਤ੍ਥਕੇਸੁ ‘‘ਕਚ੍ਛੂ’’ਤਿ ਪਾਠੋ ਅਤ੍ਥਿ, ਸੋ ਅਯੁਤ੍ਤੋ.

ਲੋਹਿਤਂ ਤੁਣ੍ਡਂ ਏਤਿਸ੍ਸਾਤਿ ਲੋਹਿਤਤੁਣ੍ਡਿਕਾ. ਪਿਲ਼ਯਤਿ ਵਿਬਾਧਯਤੀਤਿ ਪਿਲ਼ਕਾ. ਆ ਭੁਸੋ ਅਸੁਚਿਂ ਸਵਤਿ ਪਗ੍ਘਰਾਪੇਤੀਤਿ ਅਸ੍ਸਾਵੋਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਸੁਚਿਪਗ੍ਘਰਣ’’ਨ੍ਤਿ. ਅਰਿਸਞ੍ਚ ਭਗਨ੍ਦਰਾ ਚ ਮਧੁਮੇਹੋ ਚ. ਆਦਿਸਦ੍ਦੇਨ ਦੁਨ੍ਨਾਮਕਾਦਯੋ ਸਙ੍ਗਣ੍ਹਾਤਿ. ਤਤ੍ਥ ਅਰਿ ਵਿਯ ਈਸਤਿ ਅਭਿਭਵਤੀਤਿ ਅਰਿਸਂ. ਭਗਂ ਵੁਚ੍ਚਤਿ ਵਚ੍ਚਮਗ੍ਗਂ, ਤਂ ਦਰਤਿ ਫਾਲੇਤੀਤਿ ਭਗਨ੍ਦਰਾ, ਗੂਥਸਮੀਪੇ ਜਾਤੋ ਵਣਵਿਸੇਸੋ. ਮਧੁ ਵਿਯ ਮੁਤ੍ਤਾਦਿਂ ਮਿਹਤਿ ਸੇਚਤੀਤਿ ਮਧੁਮੇਹੋ, ਸੋ ਆਬਾਧੋ ਮੁਤ੍ਤਮੇਹੋ ਸੁਕ੍ਕਮੇਹੋ ਰਤ੍ਤਮੇਹੋਤਿ ਅਨੇਕਵਿਧੋ. ਥੁਲ੍ਲਸਦ੍ਦੋ ਮਹਨ੍ਤਪਰਿਯਾਯੋਤਿ ਆਹ ‘‘ਮਹਾ’’ਤਿ. ਅਟ੍ਠਮਂ.

੯. ਵਸ੍ਸਿਕਸਾਟਿਕਸਿਕ੍ਖਾਪਦਂ

੫੪੨. ਨਵਮੇ ਵਸ੍ਸੇ ਵਸ੍ਸਕਾਲੇ ਅਧਿਟ੍ਠਾਤਬ੍ਬਾਤਿ ਵਸ੍ਸਿਕਾ, ਵਸ੍ਸਿਕਾ ਚ ਸਾ ਸਾਟਿਕਾ ਚੇਤਿ ਵਸ੍ਸਿਕਸਾਟਿਕਾਤਿ. ਨਵਮਂ.

੧੦. ਨਨ੍ਦਤ੍ਥੇਰਸਿਕ੍ਖਾਪਦਂ

੫੪੭. ਦਸਮੇ ‘‘ਚਤੂਹਿ ਅਙ੍ਗੁਲੇਹੀ’’ਤਿ ਇਮਿਨਾ ਚਤੁਰੋ ਅਙ੍ਗੁਲਾ ਚਤੁਰਙ੍ਗੁਲਾਤਿ ਅਸਮਾਹਾਰਦਿਗੁਂ ਦਸ੍ਸੇਤਿ. ਊਨਕਪ੍ਪਮਾਣੋਤਿ ਭਗਵਤੋ ਲਾਮਕਪਮਾਣੋ. ਇਮਿਨਾ ਓਮਕਸਦ੍ਦਸ੍ਸ ਲਾਮਕਤ੍ਥਂ ਦਸ੍ਸੇਤੀਤਿ ਦਟ੍ਠਬ੍ਬਨ੍ਤਿ. ਦਸਮਂ.

ਰਤਨਵਗ੍ਗੋ ਨਵਮੋ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਸਂਵਣ੍ਣਨਾਯ

ਖੁਦ੍ਦਕਵਣ੍ਣਨਾਯ ਯੋਜਨਾ ਸਮਤ੍ਤਾ.