ਪਾਚਿਤ੍ਤਿਯਯੋਜਨਾ
ਮਹਾਕਾਰੁਣਿਕਂ ਨਾਥਂ, ਅਭਿਨਤ੍ਵਾ ਸਮਾਸਤੋ;
ਪਾਚਿਤ੍ਯਾਦਿਵਣ੍ਣਨਾਯ, ਕਰਿਸ੍ਸਾਮਤ੍ਥਯੋਜਨਂ.
੫. ਪਾਚਿਤ੍ਤਿਯਕਣ੍ਡਂ
੧. ਮੁਸਾਵਾਦਸਿਕ੍ਖਾਪਦ-ਅਤ੍ਥਯੋਜਨਾ
ਖੁਦ੍ਦਕਾਨਨ੍ਤਿ ਸੁਖੁਮਾਪਤ੍ਤਿਪਕਾਸਕਤ੍ਤਾ ਅਪ੍ਪਕਾਨਂ, ਗਣਨਤੋ ਵਾ ਪਚੁਰਤ੍ਤਾ ਬਹੁਕਾਨਂ. ਯੇਸਂ ਸਿਕ੍ਖਾਪਦਾਨਨ੍ਤਿ ਸਮ੍ਬਨ੍ਧੋ. ‘‘ਯੇਸ’’ਨ੍ਤਿ ਪਦਂ ‘‘ਸਙ੍ਗਹੋ’’ਤਿ ਪਦੇ ਸਾਮ੍ਯਤ੍ਥਛਟ੍ਠੀ. ਸਙ੍ਗਹੀਯਤੇ ਸਙ੍ਗਹੋ. ‘‘ਨਵਹਿ ਵਗ੍ਗੇਹੀ’’ਤਿਪਦਂ ‘‘ਸਙ੍ਗਹੋ, ਸੁਪ੍ਪਤਿਟ੍ਠਿਤੋ’’ਤਿ ਪਦਦ੍ਵਯੇ ਕਰਣਂ. ਦਾਨੀਤਿ ਕਾਲਵਾਚਕੋ ਸਤ੍ਤਮ੍ਯਨ੍ਤਨਿਪਾਤੋ ਇਦਾਨਿ-ਪਰਿਯਾਯੋ, ਇਮਸ੍ਮਿਂ ਕਾਲੇਤਿ ਅਤ੍ਥੋ. ਤੇਸਨ੍ਤਿ ਖੁਦ੍ਦਕਾਨਂ, ਅਯਂ ਵਣ੍ਣਨਾਤਿ ਸਮ੍ਬਨ੍ਧੋ. ਭਵਤੀਤਿ ਏਤ੍ਥ ਤਿ-ਸਦ੍ਦੋ ਏਕਂਸਤ੍ਥੇ ਅਨਾਗਤਕਾਲਿਕੋ ਹੋਤਿ ‘‘ਨਿਰਯਂ ਨੂਨ ਗਚ੍ਛਾਮਿ, ਏਤ੍ਥ ਮੇ ਨਤ੍ਥਿ ਸਂਸਯੋ’’ਤਿਆਦੀਸੁ (ਜਾ. ੨.੨੨.੩੩੧) ਵਿਯ. ਕਿਞ੍ਚਾਪੇਤ੍ਥ ਹਿ ਯਥਾ ਏਕਂਸਵਾਚਕੋ ਨੂਨਸਦ੍ਦੋ ਅਤ੍ਥਿ, ਨ ਏਵਂ ‘‘ਭਵਤੀ’’ਤਿ ਪਦੇ, ਅਤ੍ਥਤੋ ਪਨ ਅਯਂ ਵਣ੍ਣਨਾ ਨੂਨ ਭਵਿਸ੍ਸਤੀਤਿ ਅਤ੍ਥੋ ਗਹੇਤਬ੍ਬੋ. ਅਥ ਵਾ ਅਵਸ੍ਸਮ੍ਭਾਵਿਯਤ੍ਥੇ ਅਨਾਗਤਕਾਲਵਾਚਕੋ ਹੋਤਿ ‘‘ਧੁਵਂ ਬੁਦ੍ਧੋ ਭਵਾਮਹ’’ਨ੍ਤਿਆਦੀਸੁ (ਬੁ. ਵਂ. ੨.੧੦੯-੧੧੪) ਵਿਯ. ਕਾਮਞ੍ਹੇਤ੍ਥ ਯਥਾ ਅਵਸ੍ਸਮ੍ਭਾਵਿਯਤ੍ਥਵਾਚਕੋ ਧੁਵਸਦ੍ਦੋ ਅਤ੍ਥਿ, ਨ ਏਵਂ ‘‘ਭਵਤੀ’’ਤਿ ਪਦੇ, ਅਤ੍ਥਤੋ ਪਨ ਧੁਵਂ ਭਵਿਸ੍ਸਤਿ ਅਯਂ ਵਣ੍ਣਨਾਤਿ ਅਤ੍ਥੋ ਗਹੇਤਬ੍ਬੋਤਿ ਦਟ੍ਠਬ੍ਬਂ.
੧. ‘‘ਤਤ੍ਥਾ’’ਤਿ ਪਦਂ ‘‘ਮੁਸਾਵਾਦਵਗ੍ਗਸ੍ਸਾ’’ਤਿ ਪਦੇ ਨਿਦ੍ਧਾਰਣਸਮੁਦਾਯੋ, ਤੇਸੁ ਨਵਸੁ ਵਗ੍ਗੇਸੂਤਿ ਅਤ੍ਥੋ. ਪਠਮਸਿਕ੍ਖਾਪਦੇਤਿ ਵਾ, ਤੇਸੁ ਖੁਦ੍ਦਕੇਸੁ ਸਿਕ੍ਖਾਪਦੇਸੂਤਿ ਅਤ੍ਥੋ. ਸਕ੍ਯਾਨਂ ਪੁਤ੍ਤੋਤਿ ਭਗਿਨੀਹਿ ਸਂਵਾਸਕਰਣਤੋ ਲੋਕਮਰਿਯਾਦਂ ਛਿਨ੍ਦਿਤੁਂ, ਜਾਤਿਸਮ੍ਭੇਦਤੋ ਵਾ ਰਕ੍ਖਿਤੁਂ ਸਕ੍ਕੁਣਨ੍ਤੀਤਿ ਸਕ੍ਯਾ. ਸਾਕਵਨਸਣ੍ਡੇ ਨਗਰਂ ਮਾਪੇਨ੍ਤੀਤਿ ਵਾ ਸਕ੍ਯਾ, ਪੁਬ੍ਬਰਾਜਾਨੋ. ਤੇਸਂ ਵਂਸੇ ਭੂਤਤ੍ਤਾ ਏਤਰਹਿਪਿ ਰਾਜਾਨੋ ਸਕ੍ਯਾ ਨਾਮ, ਤੇਸਂ ਪੁਤ੍ਤੋਤਿ ਅਤ੍ਥੋ. ‘‘ਬੁਦ੍ਧਕਾਲੇ’’ਤਿ ਪਦਂ ‘‘ਪਬ੍ਬਜਿਂਸੂ’’ਤਿ ਪਦੇ ਆਧਾਰੋ. ਸਕ੍ਯਕੁਲਤੋ ਨਿਕ੍ਖਮਿਤ੍ਵਾਤਿ ਸਮ੍ਬਨ੍ਧੋ. ‘‘ਵਾਦਕ੍ਖਿਤ੍ਤੋ’’ਤ੍ਯਾਦਿਨਾ ਵਾਦੇਨ ਖਿਤ੍ਤੋ, ਵਾਦਮ੍ਹਿ ਵਾਤਿ ਅਤ੍ਥਂ ਦਸ੍ਸੇਤਿ. ਯਤ੍ਰ ਯਤ੍ਰਾਤਿ ਯਸ੍ਸਂ ਯਸ੍ਸਂ ਦਿਟ੍ਠਿਯਂ ਪਵਤ੍ਤਤੀਤਿ ਸਮ੍ਬਨ੍ਧੋ. ਅਵਜਾਨਿਤ੍ਵਾਤਿ ਪਟਿਸ੍ਸਵੇਨ ਵਿਯੋਗਂ ਕਤ੍ਵਾ. ਅਵਸਦ੍ਦੋ ਹਿ ਵਿਯੋਗਤ੍ਥਵਾਚਕੋ. ‘‘ਅਪਜਾਨਿਤ੍ਵਾ’’ਤਿਪਿ ਪਾਠੋ, ਪਟਿਞ੍ਞਾਤਂ ਅਪਨੀਤਂ ਕਤ੍ਵਾਤਿ ਅਤ੍ਥੋ. ਦੋਸਨ੍ਤਿ ਅਯੁਤ੍ਤਿਦੋਸਂ, ਸਲ੍ਲਕ੍ਖੇਨ੍ਤੋ ਹੁਤ੍ਵਾਤਿ ਸਮ੍ਬਨ੍ਧੋ. ਕਥੇਨ੍ਤੋ ਕਥੇਨ੍ਤੋਤਿ ਅਨ੍ਤਸਦ੍ਦੋ ਮਾਨਸਦ੍ਦਕਾਰਿਯੋ. ਕਥਿਯਮਾਨੋ ਕਥਿਯਮਾਨੋਤਿ ਹਿ ਅਤ੍ਥੋ. ਪਟਿਜਾਨਿਤ੍ਵਾਤਿ ਪਟਿਞ੍ਞਾਤਂ ਕਤ੍ਵਾ. ਆਨਿਸਂਸਨ੍ਤਿ ਨਿਦ੍ਦੋਸਂ ਗੁਣਂ. ਪਟਿਪੁਬ੍ਬੋ ਚਰਸਦ੍ਦੋ ਪਟਿਚ੍ਛਾਦਨਤ੍ਥੋਤਿ ਆਹ ‘‘ਪਟਿਚਰਤਿ ਪਟਿਚ੍ਛਾਦੇਤੀ’’ਤਿ. ‘‘ਕਿਂ ਪਨ ਰੂਪਂ ਨਿਚ੍ਚਂ ਵਾ ਅਨਿਚ੍ਚਂ ਵਾ’’ਤਿ ਵੁਤ੍ਤੇ ‘‘ਅਨਿਚ੍ਚ’’ਨ੍ਤਿ ਵਦਤਿ. ਕਸ੍ਮਾਤਿ ਵੁਤ੍ਤੇ ‘‘ਜਾਨਿਤਬ੍ਬਤੋ’’ਤਿ ਵਦਤਿ. ਯਦਿ ਏਵਂ ਨਿਬ੍ਬਾਨਮ੍ਪਿ ਜਾਨਿਤਬ੍ਬਤ੍ਤਾ ਅਨਿਚ੍ਚਂ ਨਾਮ ਸਿਯਾਤਿ ਵੁਤ੍ਤੇ ਅਤ੍ਤਨੋ ਹੇਤੁਮ੍ਹਿ ਦੋਸਂ ਦਿਸ੍ਵਾ ਅਹਂ ‘‘ਜਾਨਿਤਬ੍ਬਤੋ’’ਤਿ ਹੇਤੁਂ ਨ ਵਦਾਮਿ, ‘‘ਜਾਤਿਧਮ੍ਮਤੋ’’ਤਿ ਪਨ ਵਦਾਮਿ. ਤਯਾ ਪਨ ਦੁਸ੍ਸੁਤਤ੍ਤਾ ਏਵਂ ਵੁਤ੍ਤਨ੍ਤਿ ਵਤ੍ਵਾ ਅਞ੍ਞੇਨਞ੍ਞਂ ਪਟਿਚਰਤਿ. ‘‘ਕੁਰੁਨ੍ਦਿਯ’’ਨ੍ਤਿ ਪਦਂ ‘‘ਵੁਤ੍ਤ’’ਨ੍ਤਿ ਪਦੇ ਆਧਾਰੋ. ਏਤਸ੍ਸਾਤਿ ‘‘ਰੂਪਂ ਅਨਿਚ੍ਚਂ ਜਾਨਿਤਬ੍ਬਤੋ’’ਤਿ ਵਚਨਸ੍ਸ. ਤਤ੍ਰਾਤਿ ਕੁਰੁਨ੍ਦਿਯਂ. ਤਸ੍ਸਾਤਿ ਪਟਿਜਾਨਨਾਵਜਾਨਨਸ੍ਸ. ‘‘ਪਟਿਚ੍ਛਾਦਨਤ੍ਥ’’ਨ੍ਤਿ ਪਦਂ ‘‘ਭਾਸਤੀ’’ਤਿਪਦੇ ਸਮ੍ਪਦਾਨਂ. ‘‘ਮਹਾਅਟ੍ਠਕਥਾਯ’’ਨ੍ਤਿਪਦਂ ‘‘ਵੁਤ੍ਤ’’ਨ੍ਤਿ ਪਦੇ ਆਧਾਰੋ. ‘‘ਦਿਵਾਟ੍ਠਾਨਾਦੀਸੂ’’ਤਿ ਪਦਂ ਉਪਨੇਤਬ੍ਬਂ. ਇਦਂ ‘‘ਅਸੁਕਸ੍ਮਿਂ ਨਾਮਪਦੇਸੇ’’ਤਿ ਪਦੇ ਨਿਦ੍ਧਾਰਣਸਮੁਦਾਯੋ.
੩. ਸਮ੍ਮਾ ਵਦਤਿ ਅਨੇਨਾਤਿ ਸਂਵਾਦਨਂ, ਉਜੁਜਾਤਿਕਚਿਤ੍ਤਂ, ਨ ਸਂਵਾਦਨਂ ਵਿਸਂਵਾਦਨਂ, ਵਞ੍ਚਨਾਧਿਪ੍ਪਾਯਵਸਪ੍ਪਵਤ੍ਤਂ ਚਿਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਵਿਸਂਵਾਦਨਚਿਤ੍ਤ’’ਨ੍ਤਿ. ‘‘ਵਾਚਾ’’ਤ੍ਯਾਦਿਨਾ ਵਚਤਿ ਏਤਾਯਾਤਿ ਵਾਚਾਤਿ ਅਤ੍ਥਂ ਦਸ੍ਸੇਤਿ. ਹੀਤਿ ਦਲ਼੍ਹੀਕਰਣਜੋਤਕਂ, ਤਦਮਿਨਾ ਸਚ੍ਚਨ੍ਤਿ ਅਤ੍ਥੋ. ‘‘ਵਾਚਾਯੇਵਾ’’ਤਿ ਪਦਂ ‘‘ਬ੍ਯਪ੍ਪਥੋ’’ਤਿ ਪਦੇ ਤੁਲ੍ਯਤ੍ਥਂ, ‘‘ਵੁਚ੍ਚਤੀ’’ਤਿ ਪਦੇ ਕਮ੍ਮਂ. ਪਥਸਦ੍ਦਪਰਤ੍ਤਾ ਵਾਚਾਸਦ੍ਦਸ੍ਸ ਬ੍ਯਾਦੇਸੋ ਕਤੋ. ਸੁਦ੍ਧਚੇਤਨਾ ਕਥਿਤਾਤਿ ਸਮ੍ਬਨ੍ਧੋ. ਤਂਸਮੁਟ੍ਠਿਤਸਦ੍ਦਸਹਿਤਾਤਿ ਤਾਯ ਚੇਤਨਾਯ ਸਮੁਟ੍ਠਿਤੇਨ ਸਦ੍ਦੇਨ ਸਹ ਪਵਤ੍ਤਾ ਚੇਤਨਾ ਕਥਿਤਾਤਿ ਯੋਜਨਾ.
‘‘ਏਵ’’ਨ੍ਤਿ ਪਦਂ ‘‘ਦਸ੍ਸੇਤ੍ਵਾ’’ਤਿ ਪਦੇ ਨਿਦਸ੍ਸਨਂ, ਕਰਣਂ ਵਾ. ‘‘ਦਸ੍ਸੇਤ੍ਵਾ’’ਤਿ ਪਦਂ ‘‘ਦਸ੍ਸੇਨ੍ਤੋ ਆਹਾ’’ਤਿ ਪਦਦ੍ਵਯੇ ਪੁਬ੍ਬਕਾਲਕਿਰਿਯਾ. ਅਨ੍ਤੇਤਿ ‘‘ਵਾਚਾ’’ਤਿਆਦੀਨਂ ਪਞ੍ਚਨ੍ਨਂ ਪਦਾਨਂ ਅਵਸਾਨੇ. ‘‘ਆਹਾ’’ਤਿ ਏਤ੍ਥ ਵਤ੍ਤਮਾਨ-ਤਿਵਚਨਸ੍ਸ ਅਕਾਰੋ ਪਚ੍ਚੁਪ੍ਪਨ੍ਨਕਾਲਵਾਚਕੇਨ ‘‘ਇਦਾਨੀ’’ਤਿ ਪਦੇਨ ਯੋਜਿਤਤ੍ਤਾ. ‘‘ਤਤ੍ਥਾ’’ਤਿ ਪਦਂ ‘‘ਅਤ੍ਥੋ ਵੇਦਿਤਬ੍ਬੋ’’ਤਿ ਪਦੇ ਆਧਾਰੋ. ਏਤ੍ਥਾਤਿ ‘‘ਅਦਿਟ੍ਠਂ ਦਿਟ੍ਠਂ ਮੇ’’ਤਿਆਦੀਸੁ. ‘‘ਪਾਲ਼ਿਯ’’ਨ੍ਤਿ ਪਦਂ ‘‘ਦੇਸਨਾ ਕਤਾ’’ਤਿ ਪਦੇ ਆਧਾਰੋ. ਨਿਸ੍ਸਿਤਵਿਞ੍ਞਾਣਵਸੇਨ ਅਵਤ੍ਵਾ ਨਿਸ੍ਸਯਪਸਾਦਵਸੇਨ ‘‘ਚਕ੍ਖੁਨਾ ਦਿਟ੍ਠ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਓਲ਼ਾਰਿਕੇਨੇਵਾ’’ਤਿ.
੪. ਤਸ੍ਸਾਤਿ ‘‘ਤੀਹਾਕਾਰੇਹੀ’’ਤਿਆਦਿਵਚਨਸ੍ਸ. ‘‘ਅਤ੍ਥੋ’’ਤਿ ਪਦਂ ‘‘ਵੇਦਿਤਬ੍ਬੋ’’ਤਿ ਪਦੇ ਕਮ੍ਮਂ. ਹੀਤਿ ਵਿਸੇਸਜੋਤਕਂ, ਵਿਸੇਸਂ ਕਥਯਿਸ੍ਸਾਮੀਤਿ ਅਤ੍ਥੋ. ਤਤ੍ਥਾਤਿ ਚਤੁਤ੍ਥਪਾਰਾਜਿਕੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.
੯. ਆਦੀਨਮ੍ਪੀਤਿ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ.
੧੧. ਮਨ੍ਦਸਦ੍ਦੋ ਜਲ਼ਤ੍ਥਵਾਚਕੋਤਿ ਆਹ ‘‘ਮਨ੍ਦਤ੍ਤਾ ਜਲ਼ਤ੍ਤਾ’’ਤਿ. ਯੋ ਪਨ ਅਞ੍ਞਂ ਭਣਤੀਤਿ ਸਮ੍ਬਨ੍ਧੋ. ‘‘ਸਾਮਣੇਰੇਨਾ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਕਤ੍ਤਾ. ਅਪਿਸਦ੍ਦੋ ਪੁਚ੍ਛਾਵਾਚਕੋ, ‘‘ਪਸ੍ਸਿਤ੍ਥਾ’’ਤਿ ਪਦੇਨ ਯੋਜੇਤਬ੍ਬੋ, ਅਪਿ ਪਸ੍ਸਿਤ੍ਥਾਤਿ ਅਤ੍ਥੋ. ‘‘ਅਦਿਟ੍ਠਂ ਦਿਟ੍ਠਂ ਮੇ’’ਤਿਆਦਿਵਚਨਤੋ ਅਞ੍ਞਾ ਪੂਰਣਕਥਾਪਿ ਤਾਵ ਅਤ੍ਥੀਤਿ ਦਸ੍ਸੇਨ੍ਤੋ ਆਹ ‘‘ਅਞ੍ਞਾ ਪੂਰਣਕਥਾ ਨਾਮ ਹੋਤੀ’’ਤਿ. ਅਪ੍ਪਤਾਯ ਊਨਸ੍ਸ ਅਤ੍ਥਸ੍ਸ ਪੂਰਣਵਸੇਨ ਪਵਤ੍ਤਾ ਕਥਾ ਪੂਰਣਕਥਾ. ਏਸਾ ਪੂਰਣਕਥਾ ਨਾਮ ਕਾਤਿ ਆਹ ‘‘ਏਕੋ’’ਤਿਆਦਿ. ਏਸਾ ਹਿ ਗਾਮੇ ਅਪ੍ਪਕਮ੍ਪਿ ਤੇਲਂ ਵਾ ਪੂਵਖਣ੍ਡਂ ਵਾ ਪਸ੍ਸਿਤ੍ਵਾ ਵਾ ਲਭਿਤ੍ਵਾ ਵਾ ਬਹੁਕਂ ਕਤ੍ਵਾ ਪੂਰਣਵਸੇਨ ਕਥਿਤਤ੍ਤਾ ਪੂਰਣਕਥਾ ਨਾਮ. ਬਹੁਕਾਨਿ ਤੇਲਾਨਿ ਵਾ ਪੂਵੇ ਵਾ ਪਸ੍ਸਨ੍ਤੋਪਿ ਲਭਨ੍ਤੋਪਿ ਅਪ੍ਪਕਂ ਕਤ੍ਵਾ ਊਨਵਸੇਨ ਕਥਿਤਤ੍ਤਾ ਊਨਕਥਾਪਿ ਅਤ੍ਥੀਤਿ ਸਕ੍ਕਾ ਵਤ੍ਤੁਂ. ਅਟ੍ਠਕਥਾਸੁ ਪਨ ਅਵੁਤ੍ਤਤ੍ਤਾ ਵੀਮਂਸਿਤ੍ਵਾ ਗਹੇਤਬ੍ਬਂ. ਬਹੁਕਾਯ ਪੂਰਣਸ੍ਸ ਅਤ੍ਥਸ੍ਸ ਊਨਵਸੇਨ ਪਵਤ੍ਤਾ ਕਥਾ ਊਨਕਥਾਤਿ ਵਿਗ੍ਗਹੋ ਕਾਤਬ੍ਬੋਤਿ. ਪਠਮਂ.
੨. ਓਮਸਵਾਦ ਸਿਕ੍ਖਾਪਦਂ
੧੨. ਦੁਤਿਯੇ ਮਸਧਾਤੁ ਵਿਜ੍ਝਨਤ੍ਥੇ ਪਵਤ੍ਤਤਿ ‘‘ਓਮਟ੍ਠਂ ਉਮ੍ਮਟ੍ਠ’’ਨ੍ਤਿਆਦੀਸੁ (ਸਂ. ਨਿ. ਅਟ੍ਠ. ੧.੧.੨੧) ਵਿਯਾਤਿ ਦਸ੍ਸੇਨ੍ਤੋ ਆਹ ‘‘ਓਮਸਨ੍ਤੀਤਿ ਓਵਿਜ੍ਝਨ੍ਤੀ’’ਤਿ.
੧੩. ‘‘ਇਦਂ ਵਤ੍ਥੁ’’ਨ੍ਤਿ ਪਦਂ ‘‘ਆਹਰੀ’’ਤਿ ਪਦੇ ਕਮ੍ਮਂ. ਨਨ੍ਦਿਤਬ੍ਬੋਤਿ ਨਨ੍ਦੋ ਵਣ੍ਣਬਲਾਦਿ, ਸੋ ਏਤਸ੍ਸਤ੍ਥੀਤਿ ਨਨ੍ਦੀ. ਵਿਸਾਲਾਨਿ ਮਹਨ੍ਤਾਨਿ ਵਿਸਾਣਾਨਿ ਏਤਸ੍ਸਤ੍ਥੀਤਿ ਵਿਸਾਲੋ, ਨਨ੍ਦੀ ਚ ਸੋ ਵਿਸਾਲੋ ਚੇਤਿ ਨਨ੍ਦਿਵਿਸਾਲੋਤਿ ਵਚਨਤ੍ਥਂ ਦਸ੍ਸੇਤਿ ‘‘ਨਨ੍ਦਿਵਿਸਾਲੋ ਨਾਮਾ’’ਤਿਆਦਿਨਾ. ਸੋਤਿ ਨਨ੍ਦਿਵਿਸਾਲੋ, ‘‘ਆਹਾ’’ਤਿ ਪਦੇ ਕਤ੍ਤਾ. ਤਤ੍ਥੇਵਾਤਿ ਯੁਞ੍ਜਿਤਟ੍ਠਾਨੇਯੇਵ. ਅਹੇਤੁਕਪਟਿਸਨ੍ਧਿਕਾਲੇਪੀਤਿ ਪਿ-ਸਦ੍ਦੋ ਅਨੁਗ੍ਗਹਤ੍ਥਵਾਚਕੋ, ਪਗੇਵ ਦ੍ਵਿਹੇਤੁਕ ਤਿਹੇਤੁਕ ਪਟਿਸਨ੍ਧਿਕਾਲੇਤਿ ਅਤ੍ਥੋ. ‘‘ਤੇਨ ਚਾ’’ਤਿ ਚਕਾਰਸ੍ਸ ਅਵੁਤ੍ਤਸਮ੍ਪਿਣ੍ਡਨਤ੍ਥਤ੍ਤਾ ‘‘ਅਤ੍ਤਨੋ ਕਮ੍ਮੇਨ ਚਾ’’ਤਿ ਅਤ੍ਥਂ ਸਮ੍ਪਿਣ੍ਡੇਤੀਤਿ ਆਹ ‘‘ਅਤ੍ਤਨੋ ਕਮ੍ਮੇਨ ਚਾ’’ਤਿ. ਅਤ੍ਤਨੋਤਿ ਨਨ੍ਦਿਵਿਸਾਲਸ੍ਸ.
੧੫. ਏਤ੍ਥਾਤਿ ਏਤਿਸ੍ਸਂ ਪਦਭਾਜਨਿਯਂ, ‘‘ਆਹਾ’’ਤਿ ਪਦੇ ਆਧਾਰੋ. ‘‘ਯਸ੍ਮਾ’’ਤਿ ਪਦਂ ਵਿਭਜਿਤੁਕਾਮੋ’’ਤਿ ਪਦੇ ਹੇਤੁ. ਅਟ੍ਠੁਪ੍ਪਤ੍ਤਿਯਂਯੇਵ ‘‘ਹੀਨੇਨਾਪੀ’’ਤਿ ਵਤ੍ਵਾ ਪਦਭਾਜਨਿਯਂ ਅਵੁਤ੍ਤਤ੍ਤਾ ਇਦਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਵੇਣੁਕਾਰਜਾਤੀਤਿ ਵਿਲੀਵਕਾਰਜਾਤਿ. ਨੇਸਾਦਜਾਤੀਤਿ ਏਤ੍ਥ ਕੇਵਟ੍ਟਜਾਤਿਪਿ ਸਙ੍ਗਹਿਤਾ.
ਪੁ ਵੁਚ੍ਚਤਿ ਕਰੀਸਂ, ਤਂ ਕੁਸਤਿ ਅਪਨੇਤੀਤਿ ਪੁਕ੍ਕੁਸੋ. ਪੁਪ੍ਫਂ ਵੁਚ੍ਚਤਿ ਕਰੀਸਂ, ਕੁਸੁਮਂ ਵਾ, ਤਂ ਛਡ੍ਡੇਤੀਤਿ ਪੁਪ੍ਫਛਡ੍ਡਕੋ.
ਕੁਟਤਿ ਛਿਨ੍ਦਤੀਤਿ ਕੋਟ੍ਠੋ, ਸੋਯੇਵ ਕੋਟ੍ਠਕੋ. ਯਕਾਰਭਕਾਰੇ ਏਕਤੋ ਯੋਜੇਤ੍ਵਾ ‘‘ਯਭਾ’’ਤਿ ਯੋ ਅਕ੍ਕੋਸੋ ਅਤ੍ਥਿ, ਏਸੋ ਹੀਨੋ ਨਾਮ ਅਕ੍ਕੋਸੋਤਿ ਯੋਜਨਾ.
੧੬. ਸਬ੍ਬਪਦੇਸੂਤਿ ਨਾਮਾਦੀਸੁ ਸਬ੍ਬਪਦੇਸੁ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਅਲਿਕਨ੍ਤਿ ਅਸਚ੍ਚਂ, ਮਿਚ੍ਛਾਵਾਚਨ੍ਤਿ ਸਮ੍ਬਨ੍ਧੋ. ਯੋਪਿ ਵਦਤੀਤਿ ਯੋਜਨਾ.
੨੬. ਪਰਿਹਰਿਤ੍ਵਾਤਿ ਪਰਿਮੁਖਂ ਕਥਨਂ ਅਪਨੇਤ੍ਵਾ. ਦਵਂ ਪਰਿਹਾਸਂ ਕਾਮੇਤੀਤਿ ਦਵਕਾਮੋ, ਤਸ੍ਸ ਭਾਵੋ ਦਵਕਮ੍ਯਂ, ਤਂਯੇਵ ਦਵਕਮ੍ਯਤਾ. ਅਨੁਪਸਮ੍ਪਨ੍ਨਨ੍ਤਿ ਏਤ੍ਥ ਅਕਾਰਸ੍ਸ ਸਦਿਸਤ੍ਥਮਗ੍ਗਹੇਤ੍ਵਾ ਅਞ੍ਞਤ੍ਥੋਵ ਗਹੇਤਬ੍ਬੋਤਿ ਆਹ ‘‘ਠਪੇਤ੍ਵਾ ਭਿਕ੍ਖੁ’’ਨ੍ਤਿਆਦਿ. ਯਦਿ ਹਿ ਸਦਿਸਤ੍ਥੋ ਭਵੇਯ੍ਯ, ਸਾਮਣੇਰੋਵ ਅਨੁਪਸਮ੍ਪਨ੍ਨੋ ਨਾਮ ਸਿਯਾ ਸਣ੍ਠਾਨੇਨ ਚ ਪੁਰਿਸਭਾਵੇਨ ਚ ਸਦਿਸਤ੍ਤਾ, ਤਸ੍ਮਾ ਅਞ੍ਞਤ੍ਥੋਵ ਗਹੇਤਬ੍ਬੋਤਿ ਦਟ੍ਠਬ੍ਬਂ. ਸਬ੍ਬਸਤ੍ਤਾਤਿ ਏਤ੍ਥ ਸਬ੍ਬਸਦ੍ਦੋ ਅਨਵਸੇਸਤ੍ਥੋ ਮਨੁਸ੍ਸੇ ਉਪਾਦਾਯ ਵਚਨਤ੍ਥਜਾਨਨਾਜਾਨਨਪਕਤਿਕਾਨਂ ਸਬ੍ਬਸਤ੍ਤਾਨਮ੍ਪਿ ਗਹਿਤਤ੍ਤਾ.
੩੫. ਅਤ੍ਥਪੁਰੇਕ੍ਖਾਰੋ ਨਾਮਾਤਿ ਵੇਦਿਤਬ੍ਬੋਤਿ ਸਮ੍ਬਨ੍ਧੋ. ਸਿਕ੍ਖਾਪਦਮਪੇਕ੍ਖਿਯ ਨਪੁਂਸਕਲਿਙ੍ਗਵਸੇਨ ‘‘ਕਿਰਿਯ’’ਨ੍ਤਿਆਦਿ ਵੁਤ੍ਤਂ. ਆਪਤ੍ਤਿਮਪੇਕ੍ਖਿਯ ਇਤ੍ਥਿਲਿਙ੍ਗਵਸੇਨ ‘‘ਕਿਰਿਯਾ’’ਤਿਆਦਿ ਵੁਤ੍ਤਂ. ਵਜ੍ਜਕਮ੍ਮਸਦ੍ਦਾ ਸਿਕ੍ਖਾਪਦਮਪੇਕ੍ਖਨ੍ਤਾਪਿ ਆਪਤ੍ਤਿ, ਮਪੇਕ੍ਖਨ੍ਤਾਪਿ ਨਿਯਤਨਪੁਂਸਕਲਿਙ੍ਗਤ੍ਤਾ ਨਪੁਂਸਕਾਯੇਵ, ਤਸ੍ਮਾ ਤੇ ਦ੍ਵੇ ਆਪਤ੍ਤਿਟ੍ਠਾਨੇ ਨ ਵੁਤ੍ਤਾਤਿ ਦਟ੍ਠਬ੍ਬਨ੍ਤਿ. ਦੁਤਿਯਂ.
੩. ਪੇਸੁਞ੍ਞਸਿਕ੍ਖਾਪਦਂ
੩੬. ਤਤਿਯੇ ‘‘ਜਾਤਭਣ੍ਡਨਾਨ’’ਨ੍ਤਿ ਵਤ੍ਤਬ੍ਬੇ ਅਗ੍ਯਾਹਿਤੋਤਿਆਦੀਸੁ ਵਿਯ ਵਿਸੇਸਨਪਰਨਿਪਾਤਵਸੇਨ ‘‘ਭਣ੍ਡਨਜਾਤਾਨ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਞ੍ਜਾਤਭਣ੍ਡਨਾਨ’’ਨ੍ਤਿ. ‘‘ਪੁਬ੍ਬਭਾਗੋ’’ਤਿ ਵਤ੍ਵਾ ਤਸ੍ਸ ਸਰੂਪਂ ਦਸ੍ਸੇਤਿ ‘‘ਇਮਿਨਾ ਚ ਇਮਿਨਾ ਚਾ’’ਤਿਆਦਿਨਾ. ਵਿਰੁਦ੍ਧਂ ਵਦਤਿ ਏਤੇਨਾਤਿ ਵਿਵਾਦੋ, ਵਿਗ੍ਗਾਹਿਕਕਥਾ, ਤਂ ਆਪਨ੍ਨਾਤਿ ਵਿਵਾਦਾਪਨ੍ਨਾ, ਤੇਸਂ. ਪਿਸਤਿ ਸਞ੍ਚੁਣ੍ਣੇਤੀਤਿ ਪਿਸੁਣੋ, ਪੁਗ੍ਗਲੋ, ਤਸ੍ਸ ਇਦਨ੍ਤਿ ਪੇਸੁਞ੍ਞਂ, ਵਚਨਨ੍ਤਿ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੇਸੁਞ੍ਞਨ੍ਤਿ ਪਿਸੁਣਵਾਚ’’ਨ੍ਤਿ.
੩੭. ਭਿਕ੍ਖੁਪੇਸੁਞ੍ਞੇਤਿ ਭਿਕ੍ਖੂਨਂ ਸਨ੍ਤਿਕਂ ਉਪਸਂਹਟੇ ਪੇਸੁਞ੍ਞਵਚਨੇਤਿ ਛਟ੍ਠੀਸਮਾਸੋ.
੩੮. ‘‘ਦਿਸ੍ਵਾ’’ਤਿ ਪਦਂ ‘‘ਭਣਨ੍ਤਸ੍ਸਾ’’ਤਿ ਪਦੇ ਪੁਬ੍ਬਕਾਲਕਿਰਿਯਾ, ਦਸ੍ਸਨਂ ਹੁਤ੍ਵਾਤਿ ਅਤ੍ਥੋ. ਤਤਿਯਂ.
੪. ਪਦਸੋਧਮ੍ਮਸਿਕ੍ਖਾਪਦਂ
੪੪. ਚਤੁਤ੍ਥੇ ਪਟਿਮੁਖਂ ਆਦਰੇਨ ਸੁਣਨ੍ਤੀਤਿ ਪਤਿਸ੍ਸਾ, ਨ ਪਤਿਸ੍ਸਾ ਅਪ੍ਪਤਿਸ੍ਸਾਤਿ ਦਸ੍ਸੇਨ੍ਤੋ ਆਹ ‘‘ਅਪ੍ਪਤਿਸ੍ਸਵਾ’’ਤਿ.
੪੫. ‘‘ਪਦਸੋ’’ਤਿ ਏਤ੍ਥ ਸੋ-ਪਚ੍ਚਯੋ ਵਿਚ੍ਛਤ੍ਥਵਾਚਕੋਤਿ ਆਹ ‘‘ਪਦਂ ਪਦ’’ਨ੍ਤਿ. ਤਤ੍ਥਾਤਿ ਤੇਸੁ ਚਤੁਬ੍ਬਿਧੇਸੁ. ਪਦਂ ਨਾਮ ਇਧ ਅਤ੍ਥਜੋਤਕਂ ਵਾ ਵਿਭਤ੍ਯਨ੍ਤਂ ਵਾ ਨ ਹੋਤਿ, ਅਥ ਖੋ ਲੋਕਿਯੇਹਿ ਲਕ੍ਖਿਤੋ ਗਾਥਾਯ ਚਤੁਤ੍ਥਂਸੋ ਪਾਦੋਵ ਅਧਿਪ੍ਪੇਤੋਤਿ ਆਹ ‘‘ਪਦਨ੍ਤਿ ਏਕੋ ਗਾਥਾਪਾਦੋ’’ਤਿ. ਅਨੁ ਪਚ੍ਛਾ ਵੁਤ੍ਤਪਦਤ੍ਤਾ ਦੁਤਿਯਪਾਦੋ ਅਨੁਪਦਂ ਨਾਮ. ਅਨੁ ਸਦਿਸਂ ਬ੍ਯਞ੍ਜਨਂ ਅਨੁਬ੍ਯਞ੍ਜਨਨ੍ਤਿ ਅਤ੍ਥਂ ਦਸ੍ਸੇਤਿ ‘‘ਅਨੁਬ੍ਯਞ੍ਜਨ’’ਨ੍ਤਿਆਦਿਨਾ. ਬ੍ਯਞ੍ਜਨਸਦ੍ਦੋ ਪਦ-ਪਰਿਯਾਯੋ. ਯਂਕਿਞ੍ਚਿ ਪਦਂ ਅਨੁਬ੍ਯਞ੍ਜਨਂ ਨਾਮ ਨ ਹੋਤਿ, ਪੁਰਿਮਪਦੇਨ ਪਨ ਸਦਿਸਂ ਪਚ੍ਛਿਮਪਦਮੇਵ ਅਨੁਬ੍ਯਞ੍ਜਨਂ ਨਾਮ.
ਵਾਚੇਨ੍ਤੋ ਹੁਤ੍ਵਾ ਨਿਟ੍ਠਾਪੇਤੀਤਿ ਯੋਜਨਾ. ‘‘ਏਕਮੇਕਂ ਪਦ’’ਨ੍ਤਿ ਪਦਂ ‘‘ਨਿਟ੍ਠਾਪੇਤੀ’’ਤਿ ਪਦੇ ਕਾਰਿਤਕਮ੍ਮਂ. ‘‘ਥੇਰੇਨਾ’’ਤਿ ਪਦਂ ‘‘ਵੁਤ੍ਤੇ’’ਤਿ ਪਦੇ ਕਤ੍ਤਾ, ‘‘ਏਕਤੋ’’ਤਿ ਪਦੇ ਸਹਤ੍ਥੋ. ਸਾਮਣੇਰੋ ਅਪਾਪੁਣਿਤ੍ਵਾ ਭਣਤੀਤਿ ਸਮ੍ਬਨ੍ਧੋ. ਮਤ੍ਤਮੇਵਾਤਿ ਏਤ੍ਥ ਏਵਸਦ੍ਦੋ ਮਤ੍ਤਸਦ੍ਦਸ੍ਸ ਅਵਧਾਰਣਤ੍ਥਂ ਦਸ੍ਸੇਤਿ, ਤੇਨ ਪਕਾਰਂ ਪਟਿਕ੍ਖਿਪਤਿ. ‘‘ਅਨਿਚ੍ਚ’’ਨ੍ਤਿ ਚ ‘‘ਅਨਿਚ੍ਚਾ’’ਤਿ ਚ ਦ੍ਵਿਨ੍ਨਂ ਪਦਾਨਂ ਸਤਿਪਿ ਲਿਙ੍ਗਵਿਸੇਸਤ੍ਤੇ ਅਨੁਬ੍ਯਞ੍ਜਨਤ੍ਤਾ ਆਪਤ੍ਤਿਮੋਕ੍ਖੋ ਨਤ੍ਥੀਤਿ ਆਹ ‘‘ਅਨੁਬ੍ਯਞ੍ਜਨਗਣਨਾਯ ਪਾਚਿਤ੍ਤਿਯਾ’’ਤਿ.
ਬ੍ਰਹ੍ਮਜਾਲਾਦੀਨੀਤਿ ਏਤ੍ਥ ਆਦਿਸਦ੍ਦੇਨ ਸਾਮਞ੍ਞਫਲਸੁਤ੍ਤਾਦੀਨਿ ਦੀਘਸੁਤ੍ਤਾਨਿ (ਦੀ. ਨਿ. ੧.੧੫੦ ਆਦਯੋ) ਸਙ੍ਗਹਿਤਾਨਿ. ਚਸਦ੍ਦੇਨ ਓਘਤਰਣਸੁਤ੍ਤਾਦੀਨਿ ਸਂਯੁਤ੍ਤਸੁਤ੍ਤਾਨਿ (ਸਂ. ਨਿ. ੧.੧) ਚ ਚਿਤ੍ਤਪਰਿਯਾਦਾਨਸੁਤ੍ਤਾਦੀਨਿ ਅਙ੍ਗੁਤ੍ਤਰਸੁਤ੍ਤਾਨਿ (ਅ. ਨਿ. ੧.੨ ਆਦਯੋ) ਚ ਸਙ੍ਗਹਿਤਾਨਿ. ਸੋਤਿ ਦੇਵਤਾਭਾਸਿਤੋ ਵੇਦਿਤਬ੍ਬੋਤਿ ਯੋਜਨਾ.
ਕਿਞ੍ਚਾਪਿ ਵਦਤੀਤਿ ਸਮ੍ਬਨ੍ਧੋ. ਏਤ੍ਥ ਚ ਕਿਞ੍ਚਾਪਿਸਦ੍ਦੋ ਗਰਹਤ੍ਥਵਾਚਕੋ, ਪਨਸਦ੍ਦੋ ਅਨੁਗ੍ਗਹਤ੍ਥਵਾਚਕੋ. ਮੇਣ੍ਡਕਮਿਲਿਨ੍ਦਪਞ੍ਹੇਸੂਤਿ ਮੇਣ੍ਡਕਪਞ੍ਹੇ ਚ ਮਿਲਿਨ੍ਦਪਞ੍ਹੇ ਚ. ਯਨ੍ਤਿ ਸੁਤ੍ਤਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਆਰਮ੍ਮਣਕਥਾ ਬੁਦ੍ਧਿਕਕਥਾ ਦਣ੍ਡਕਕਥਾ ਞਾਣਵਤ੍ਥੁਕਥਾਤਿ ਯੋਜੇਤਬ੍ਬਂ ਪੇਯ੍ਯਾਲਵਸੇਨ ਵੁਤ੍ਤਤ੍ਤਾ. ਇਮਾਯੋ ਪਕਰਣਾਨਿ ਨਾਮਾਤਿ ਵਦਨ੍ਤਿ. ਮਹਾਪਚ੍ਚਰਿਯਾਦੀਸੁ ਵਤ੍ਵਾ ਪਰਿਗ੍ਗਹਿਤੋਤਿ ਯੋਜਨਾ. ਯਨ੍ਤਿ ਸੁਤ੍ਤਂ.
੪੮. ਤਤ੍ਰਾਤਿ ‘‘ਏਕਤੋ ਉਦ੍ਦਿਸਾਪੇਨ੍ਤੋ’’ਤਿ ਵਚਨੇ. ਉਦ੍ਦਿਸਾਪੇਨ੍ਤੀਤਿ ਆਚਰਿਯਂ ਦੇਸਾਪੇਨ੍ਤਿ ਬਹੁਕਤ੍ਤਾਰਮਪੇਕ੍ਖਿਯ ਬਹੁਵਚਨਵਸੇਨ ਵੁਤ੍ਤਂ. ਤੇਹੀਤਿ ਉਪਸਮ੍ਪਨ੍ਨਾਨੁਪਸਮ੍ਪਨ੍ਨੇਹਿ. ਦ੍ਵੇਪੀਤਿ ਉਪਸਮ੍ਪਨ੍ਨੋ ਚ ਅਨੁਪਸਮ੍ਪਨ੍ਨੋ ਚ.
ਉਪਚਾਰਨ੍ਤਿ ਦ੍ਵਾਦਸਹਤ੍ਥੂਪਚਾਰਂ. ਯੇਸਨ੍ਤਿ ਭਿਕ੍ਖੂਨਂ. ਪਲਾਯਨਕਗਨ੍ਥਨ੍ਤਿ ਪਰਿਵਜ੍ਜੇਤ੍ਵਾ ਗਚ੍ਛਨ੍ਤਂ ਪਕਰਣਂ. ਸਾਮਣੇਰੋ ਗਣ੍ਹਾਤੀਤਿ ਯੋਜਨਾ.
ਓਪਾਤੇਤੀਤਿ ਅਵਪਾਤੇਤਿ, ਗਲ਼ਿਤਾਪੇਤੀਤਿ ਅਤ੍ਥੋ. ਸੁਤ੍ਤੇਪੀਤਿ ਵੇਯ੍ਯਾਕਰਣਸੁਤ੍ਤੇਪਿ. ਤਨ੍ਤਿ ਯੇਭੁਯ੍ਯੇਨ ਪਗੁਣਗਨ੍ਥਂ. ਪਰਿਸਙ੍ਕਮਾਨਨ੍ਤਿ ਸਾਰਜ੍ਜਮਾਨਂ. ਯਂ ਪਨ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਕਿਰਿਯਸਮੁਟ੍ਠਾਨਤ੍ਤਾਤਿ ਇਮਸ੍ਸ ਸਿਕ੍ਖਾਪਦਸ੍ਸ ਕਿਰਿਯਸਮੁਟ੍ਠਾਨਤ੍ਤਾਤਿ. ਚਤੁਤ੍ਥਂ.
੫. ਸਹਸੇਯ੍ਯਸਿਕ੍ਖਾਪਦਂ
੪੯. ਪਞ੍ਚਮੇ ਮੁਟ੍ਠਾ ਸਤਿ ਏਤੇਸਨ੍ਤਿ ਮੁਟ੍ਠਸ੍ਸਤੀ. ਨਤ੍ਥਿ ਸਮ੍ਪਜਾਨਂ ਏਤੇਸਨ੍ਤਿ ਅਸਮ੍ਪਜਾਨਾ. ਭਵਙ੍ਗੋਤਿਣ੍ਣਕਾਲੇਤਿ ਨਿਦ੍ਦੋਕ੍ਕਮਨਕਾਲੇ.
੫੦. ‘‘ਪਕਤਿਯਾ’’ਤਿ ਪਦਂ ‘‘ਦੇਨ੍ਤੀ’’ਤਿ ਪਦੇ ਵਿਸੇਸਨਂ. ਤੇ ਭਿਕ੍ਖੂ ਦੇਨ੍ਤੀਤਿ ਸਮ੍ਬਨ੍ਧੋ. ‘‘ਗਾਰਵੇਨਾ’’ਤਿ ਪਦਞ੍ਚ ‘‘ਸਿਕ੍ਖਾਕਾਮਤਾਯਾ’’ਤਿ ਪਦਞ੍ਚ ‘‘ਦੇਨ੍ਤੀ’’ਤਿ ਪਦੇ ਹੇਤੁ. ਸੀਸਸ੍ਸ ਉਪਧਾਨਂ ਉਸ੍ਸੀਸਂ, ਤਸ੍ਸ ਕਰੀਯਤੇ ਉਸ੍ਸੀਸਕਰਣਂ, ਤਂਯੇਵ ਅਤ੍ਥੋ ਪਯੋਜਨਂ ਉਸ੍ਸੀਸਕਰਣਤ੍ਥੋ, ਤਦਤ੍ਥਾਯ. ਤਤ੍ਰਾਤਿ ਪੁਰਿਮਵਚਨਾਪੇਕ੍ਖਂ, ‘‘ਸਿਕ੍ਖਾਕਾਮਤਾਯਾ’’ਤਿ ਵਚਨੇਤਿ ਅਤ੍ਥੋ. ਨਿਦਸ੍ਸਨਨ੍ਤਿ ਸੇਸੋ. ਅਥ ਵਾ ਸਿਕ੍ਖਾਕਾਮਤਾਯਾਤਿ ਪਚ੍ਚਤ੍ਤੇ ਭੁਮ੍ਮਵਚਨਂ. ‘‘ਇਦਮ੍ਪਿਸ੍ਸ ਹੋਤਿ ਸੀਲਸ੍ਮਿ’’ਨ੍ਤਿਆਦੀਸੁ (ਦੀ. ਨਿ. ੧.੧੯੫ ਆਦਯੋ) ਵਿਯ. ਇਦਮ੍ਪਿ ਸਿਕ੍ਖਾਕਾਮਤਾਯ ਅਯਂ ਸਿਕ੍ਖਾਕਾਮਤਾ ਸਿਕ੍ਖਾਕਾਮਭਾਵੋ ਹੋਤੀਤਿ ਯੋਜਨਾ. ਏਸ ਨਯੋ ‘‘ਤਤ੍ਰਿਦਂ ਸਮਨ੍ਤਪਾਸਾਦਿਕਾਯ ਸਮਨ੍ਤਪਾਸਾਦਿਕਤ੍ਤਸ੍ਮਿ’’ਨ੍ਤਿਆਦੀਸੁਪਿ. ਭਿਕ੍ਖੂ ਖਿਪਨ੍ਤੀਤਿ ਯੋਜਨਾ. ਤਨ੍ਤਿ ਆਯਸ੍ਮਨ੍ਤਂ ਰਾਹੁਲਂ. ਅਥਾਤਿ ਖਿਪਨਤੋ ਪਚ੍ਛਾ. ਇਦਨ੍ਤਿ ਵਤ੍ਥੁ. ਸਮ੍ਮੁਞ੍ਚਨਿਕਚਵਰਛਡ੍ਡਨਕਾਨਿ ਸਨ੍ਧਾਯ ਵੁਤ੍ਤਂ. ਤੇਨਾਯਸ੍ਮਤਾ ਰਾਹੁਲੇਨ ਪਾਤਿਤਂ ਨੁ ਖੋਤਿ ਯੋਜਨਾ. ਸੋ ਪਨਾਯਸ੍ਮਾ ਗਚ੍ਛਤੀਤਿ ਸਮ੍ਬਨ੍ਧੋ. ਅਪਰਿਭੋਗਾ ਅਞ੍ਞੇਸਨ੍ਤਿ ਅਞ੍ਞੇਹਿ ਨ ਪਰਿਭੁਞ੍ਜਿਤਬ੍ਬਾ.
੫੧. ਹੀਤਿ ਸਚ੍ਚਂ, ਯਸ੍ਮਾ ਵਾ. ਸਯਨਂ ਸੇਯ੍ਯਾ, ਕਾਯਪਸਾਰਣਕਿਰਿਯਾ, ਸਯਨ੍ਤਿ ਏਤ੍ਥਾਤਿ ਸੇਯ੍ਯਾ, ਮਞ੍ਚਪੀਠਾਦਿ. ਤਦੁਭਯਮ੍ਪਿ ਏਕਸੇਸੇਨ ਵਾ ਸਾਮਞ੍ਞਨਿਦ੍ਦੇਸੇਨ ਵਾ ਏਕਤੋ ਕਤ੍ਵਾ ‘‘ਸਹਸੇਯ੍ਯ’’ਨ੍ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਸੇਯ੍ਯਾ’’ਤਿਆਦਿ. ਤਤ੍ਥਾਤਿ ਦ੍ਵੀਸੁ ਸੇਯ੍ਯਾਸੁ. ਤਸ੍ਮਾਤਿ ਯਸ੍ਮਾ ਦ੍ਵੇ ਸੇਯ੍ਯਾ ਦਸ੍ਸਿਤਾ, ਤਸ੍ਮਾ. ‘‘ਸਬ੍ਬਚ੍ਛਨ੍ਨਾ’’ਤਿਆਦਿਨਾ ਲਕ੍ਖਣਂ ਵੁਤ੍ਤਨ੍ਤਿ ਯੋਜਨਾ. ਪਾਕਟਵੋਹਾਰਨ੍ਤਿ ਲੋਕੇ ਵਿਦਿਤਂ ਵਚਨਂ. ਦੁਸ੍ਸਕੁਟਿਯਨ੍ਤਿ ਦੁਸ੍ਸੇਨ ਛਾਦਿਤਕੁਟਿਯਂ. ਅਟ੍ਠਕਥਾਸੁ ਯਥਾਵੁਤ੍ਤੇ ਪਞ੍ਚਵਿਧਚ੍ਛਦਨੇਯੇਵ ਗਯ੍ਹਮਾਨੇ ਕੋ ਦੋਸੋਤਿ ਆਹ ‘‘ਪਞ੍ਚਵਿਧਚ੍ਛਦਨੇਯੇਵਾ’’ਤਿਆਦਿ. ਯਂ ਪਨ ਸੇਨਾਸਨਂ ਪਰਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਪਾਕਾਰੇਨ ਵਾਤਿ ਇਟ੍ਠਕਸਿਲਾਦਾਰੁਨਾ ਵਾ. ਅਞ੍ਞੇਨ ਵਾਤਿ ਕਿਲਞ੍ਜਾਦਿਨਾ ਵਾ. ਵਤ੍ਥੇਨਪੀਤਿ ਪਿਸਦ੍ਦੋ ਪਗੇਵ ਇਟ੍ਠਕਾਦਿਨਾਤਿ ਦਸ੍ਸੇਤਿ. ਯਸ੍ਸਾਤਿ ਸੇਨਾਸਨਸਙ੍ਖਾਤਾਯ ਸੇਯ੍ਯਾਯ. ਉਪਰੀਤਿ ਵਾ ਸਮਨ੍ਤਤੋਤਿ ਵਾ ਯੋਜਨਾ. ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਸਬ੍ਬਪਾਸਾਦਸ੍ਸ ਵਲ਼ਞ੍ਜਿਤਬ੍ਬਤਂ ਸਨ੍ਧਾਯ ਵੁਤ੍ਤਂ ‘‘ਏਕੂਪਚਾਰੋ’’ਤਿ. ਸਤਗਬ੍ਭਂ ਵਾ ਚਤੁਸ੍ਸਾਲਂ ਏਕੂਪਚਾਰਂ ਹੋਤੀਤਿ ਸਮ੍ਬਨ੍ਧੋ. ਤਨ੍ਤਿ ਸੇਨਾਸਨਸਙ੍ਖਾਤਂ ਸੇਯ੍ਯਂ.
ਤਤ੍ਥਾਤਿ ਸੇਨਾਸਨਸਙ੍ਖਾਤਾਯਂ ਸੇਯ੍ਯਾਯਂ. ਸਮ੍ਬਹੁਲਾ ਸਾਮਣੇਰਾ ਸਚੇ ਹੋਨ੍ਤਿ, ਏਕੋ ਭਿਕ੍ਖੁ ਸਚੇ ਹੋਤੀਤਿ ਯੋਜਨਾ. ‘‘ਸਾਮਣੇਰਾ’’ਤਿ ਇਦਂ ਪਚ੍ਚਾਸਨ੍ਨਵਸੇਨ ਵੁਤ੍ਤਂ, ਉਪਲਕ੍ਖਣਵਸੇਨ ਵਾ ਅਞ੍ਞੇਹਿਪਿ ਸਹਸੇਯ੍ਯਾਨਂ ਆਪਤ੍ਤਿਸਮ੍ਭਵਤੋ. ਤੇਤਿ ਸਾਮਣੇਰਾ. ਸਬ੍ਬੇਸਨ੍ਤਿ ਭਿਕ੍ਖੂਨਂ. ਤਸ੍ਸਾਤਿ ਸਾਮਣੇਰਸ੍ਸ. ਏਸੇਵ ਨਯੋਤਿ ਏਸੋ ਏਵ ਨਯੋ, ਨ ਅਞ੍ਞੋ ਨਯੋਤਿ ਅਤ੍ਥੋ. ਅਥ ਵਾ ਏਸੇਵ ਨਯੋਤਿ ਏਸੋ ਇਵ ਨਯੋ, ਏਸੋ ਏਤਾਦਿਸੋ ਨਯੋ ਇਵ ਅਯਂ ਨਯੋ ਦਟ੍ਠਬ੍ਬੋਤਿ ਅਤ੍ਥੋ.
ਅਪਿ ਚਾਤਿ ਏਕਂਸੇਨ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ਚਤੁਕ੍ਕਨ੍ਤਿ ਏਕਾਵਾਸਏਕਾਨੁਪਸਮ੍ਪਨ੍ਨਂ, ਏਕਾਵਾਸਨਾਨੁਪਸਮ੍ਪਨ੍ਨਂ, ਨਾਨਾਵਾਸਏਕਾਨੁਪਸਮ੍ਪਨ੍ਨਂ, ਨਾਨਾਵਾਸਨਾਨੁਪਸਮ੍ਪਨ੍ਨਨ੍ਤਿ ਚਤੁਸਮੂਹਂ, ਚਤੁਪਰਿਮਾਣਂ ਵਾ. ਯੋਤਿ ਭਿਕ੍ਖੁ. ਹਿਸਦ੍ਦੋ ਵਿਤ੍ਥਾਰਜੋਤਕੋ, ਤਂ ਵਚਨਂ ਵਿਤ੍ਥਾਰਯਿਸ੍ਸਾਮੀਤਿ ਅਤ੍ਥੋ, ਵਿਤ੍ਥਾਰੋ ਮਯਾ ਵੁਚ੍ਚਤੇਤਿ ਵਾ. ਦੇਵਸਿਕਨ੍ਤਿ ਦਿਵਸੇ ਦਿਵਸੇ. ਣਿਕਪਚ੍ਚਯੋ ਹਿ ਵਿਚ੍ਛਤ੍ਥਵਾਚਕੋ. ਯੋਪਿ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਾਪਿ ਆਪਤ੍ਤੀਤਿ ਯੋਜੇਤਬ੍ਬੋ. ਤਤ੍ਰਾਤਿ ‘‘ਤਿਰਚ੍ਛਾਨਗਤੇਨਾਪੀ’’ਤਿ ਵਚਨੇ.
‘‘ਅਪਦਾਨਂ ਅਹਿਮਚ੍ਛਾ, ਦ੍ਵਿਪਦਾਨਞ੍ਚ ਕੁਕ੍ਕੁਟੀ;
ਚਤੁਪ੍ਪਦਾਨਂ ਮਜ੍ਜਾਰੀ, ਵਤ੍ਥੁ ਪਾਰਾਜਿਕਸ੍ਸਿਮਾ’’ਤਿ. (ਪਾਰਾ. ਅਟ੍ਠ. ੧.੫੫);
ਇਮਂ ਗਾਥਂ ਸਨ੍ਧਾਯ ਵੁਤ੍ਤਂ ‘‘ਵੁਤ੍ਤਨਯੇਨੇਵਾ’’ਤਿ. ਤਸ੍ਮਾਤਿ ਯਸ੍ਮਾ ਵੇਦਿਤਬ੍ਬੋ, ਤਸ੍ਮਾ. ਗੋਧਾਤਿ ਕੁਣ੍ਡੋ. ਬਿਲ਼ਾਲੋਤਿ ਆਖੁਭੁਜੋ. ਮਙ੍ਗੁਸੋਤਿ ਨਕੁਲੋ.
ਅਸਮ੍ਬਦ੍ਧਭਿਤ੍ਤਿਕਸ੍ਸ ਕਤਪਾਸਾਦਸ੍ਸਾਤਿ ਯੋਜਨਾ. ਤੁਲਾਤਿ ਏਤ੍ਥ ਤੁਲਾ ਨਾਮ ਥਮ੍ਭਾਨ, ਮੁਪਰਿ ਦਕ੍ਖਿਣੁਤ੍ਤਰਵਿਤ੍ਥਾਰਵਸੇਨ ਠਪਿਤੋ ਦਾਰੁਵਿਸੇਸੋ ਥਲਤਿ ਥਮ੍ਭੇਸੁ ਪਤਿਟ੍ਠਾਤੀਤਿ ਕਤ੍ਵਾ. ਤਾ ਪਨ ਹੇਟ੍ਠਿਮਪਰਿਚ੍ਛੇਦਤੋ ਤਿਸ੍ਸੋ, ਉਕ੍ਕਟ੍ਠਪਰਿਚ੍ਛੇਦੇਨ ਪਨ ਪਞ੍ਚਸਤ੍ਤਨਵਾਦਯੋ. ਨਾਨੂਪਚਾਰੇ ਪਾਸਾਦੇਤਿ ਸਮ੍ਬਨ੍ਧੋ.
ਵਾਲ਼ਸਙ੍ਘਾਟਾਦੀਸੂਤਿ ਵਾਲ਼ਰੂਪਂ ਦਸ੍ਸੇਤ੍ਵਾ ਕਤੇਸੁ ਸਙ੍ਘਾਟਾਦੀਸੁ. ਆਦਿਸਦ੍ਦੇਨ ਤੁਲਂ ਸਙ੍ਗਣ੍ਹਾਤਿ. ਏਤ੍ਥ ਚ ਸਙ੍ਘਾਟੋ ਨਾਮ ਤੁਲਾਨ, ਮੁਪਰਿ ਪੁਬ੍ਬਪਚ੍ਛਿਮਾਯਾਮਵਸੇਨ ਠਪਿਤੋ ਕਟ੍ਠਵਿਸੇਸੋ ਸਮ੍ਮਾ ਘਟੇਨ੍ਤਿ ਏਤ੍ਥ ਗੋਪਾਨਸ੍ਯਾਦਯੋਤਿ ਕਤ੍ਵਾ. ਤੇ ਪਨ ਤਯੋ ਹੋਨ੍ਤਿ. ਨਿਬ੍ਬਕੋਸਬ੍ਭਨ੍ਤਰੇਤਿ ਛਦਨਕੋਟਿਅਬ੍ਭਨ੍ਤਰੇ. ਪਰਿਮਣ੍ਡਲਂ ਵਾ ਚਤੁਰਸ੍ਸਂ ਵਾ ਸੇਨਾਸਨਂ ਹੋਤੀਤਿ ਸਮ੍ਬਨ੍ਧੋ. ਤਤ੍ਰਾਤਿ ਤਸ੍ਮਿਂ ਸੇਨਾਸਨੇ. ਅਪਰਿਚ੍ਛਿਨ੍ਨੋ ਗਬ੍ਭਸ੍ਸ ਉਪਚਾਰੋ ਏਤੇਸਨ੍ਤਿ ਅਪਰਿਚ੍ਛਿਨ੍ਨਗਬ੍ਭੂਪਚਾਰਾ ਸਬ੍ਬਗਬ੍ਭਾ, ਤੇ ਪਵਿਸਨ੍ਤੀਤਿ ਅਤ੍ਥੋ. ਨਿਪਨ੍ਨਾਨਂ ਭਿਕ੍ਖੂਨਨ੍ਤਿ ਯੋਜਨਾ. ਤਤ੍ਰਾਤਿ ਤਸ੍ਮਿਂ ਪਮੁਖੇ. ਪਮੁਖਸ੍ਸ ਸਬ੍ਬਚ੍ਛਨ੍ਨਤ੍ਤਾ, ਸਬ੍ਬਪਰਿਚ੍ਛਨ੍ਨਤ੍ਤਾ ਚ ਆਪਤ੍ਤਿਂ ਕਰੋਤੀਤਿ ਯੋਜਨਾ. ਨਨੁ ਪਮੁਖੇ ਛਨ੍ਨਮੇਵ ਅਤ੍ਥਿ, ਨੋ ਪਰਿਚ੍ਛਨ੍ਨਨ੍ਤਿ ਆਹ ‘‘ਗਬ੍ਭਪਰਿਕ੍ਖੇਪੋ’’ਤਿਆਦਿ. ਹੀਤਿ ਸਚ੍ਚਂ.
ਯਂ ਪਨ ਅਨ੍ਧਕਟ੍ਠਕਥਾਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਜਗਤੀਤਿ ਪਥਵਿਯਾ ਚ ਮਨ੍ਦਿਰਾਲਿਨ੍ਦਵਤ੍ਥੁਸ੍ਸ ਚ ਨਾਮਮੇਤਂ. ਇਧ ਪਨ ਮਨ੍ਦਿਰਾਲਿਨ੍ਦਵਤ੍ਥੁਸਙ੍ਖਾਤਾ ਭੂਭੇਦਾ ਗਹਿਤਾ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਕਸ੍ਮਾ ਪਾਲ਼ਿਯਾ ਨ ਸਮੇਤੀਤਿ ਆਹ ‘‘ਦਸਹਤ੍ਥੁਬ੍ਬੇਧਾਪੀ’’ਤਿਆਦਿ. ਹੀਤਿ ਯਸ੍ਮਾ. ਤਤ੍ਥਾਤਿ ਅਨ੍ਧਕਟ੍ਠਕਥਾਯਂ. ਯੇਪਿ ਮਹਾਪਾਸਾਦਾ ਹੋਨ੍ਤੀਤਿ ਯੋਜਨਾ. ਤੇਸੁਪੀਤਿ ਮਹਾਪਾਸਾਦੇਸੁਪਿ.
ਸੁਧਾਛਦਨਮਣ੍ਡਪਸ੍ਸਾਤਿ ਏਤ੍ਥ ‘‘ਸੁਧਾ’’ਤਿ ਇਦਂ ਉਪਲਕ੍ਖਣਵਸੇਨ ਵੁਤ੍ਤਂ ਯੇਨ ਕੇਨਚਿ ਛਦਨਮਣ੍ਡਪਸ੍ਸਾਪਿ ਅਧਿਪ੍ਪੇਤਤ੍ਤਾ. ਮਣ੍ਡਂ ਵੁਚ੍ਚਤਿ ਸੂਰਿਯਰਸ੍ਮਿ, ਤਂ ਪਾਤਿ ਰਕ੍ਖਤਿ, ਤਤੋ ਵਾ ਜਨਨ੍ਤਿ ਮਣ੍ਡਪਂ. ਨਨੁ ਏਕੂਪਚਾਰਂ ਹੋਤਿ ਪਾਕਾਰਸ੍ਸ ਛਿਦ੍ਦਤ੍ਤਾਤਿ ਆਹ ‘‘ਨ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਵਲ਼ਞ੍ਜਨਤ੍ਥਾਯ ਏਵਾਤਿ ਏਵਕਾਰੋ ਯੋਜੇਤਬ੍ਬੋ. ਤੇਨਾਹ ‘‘ਨ ਵਲ਼ਞ੍ਜਨੂਪਚ੍ਛੇਦਨਤ੍ਥਾਯਾ’’ਤਿ. ਅਥ ਵਾ ‘‘ਸਦ੍ਦਨ੍ਤਰਤ੍ਥਾਪੋਹਨੇਨ ਸਦ੍ਦੋ ਅਤ੍ਥਂ ਵਦਤੀ’’ਤਿ (ਉਦਾ. ਅਟ੍ਠ. ੧; ਦੀ. ਨਿ. ਟਿ. ੧.੧; ਮ. ਨਿ. ਟੀ. ੧.ਮੂਲਪਰਿਯਾਯਸੁਤ੍ਤਵਣ੍ਣਨਾ; ਸਂ. ਨਿ. ਟੀ. ੧.੧.ਓਘਤਰਣਸੁਤ੍ਤਵਣ੍ਣਨਾ; ਅ. ਨਿ. ਟੀ. ੧.੧.ਰੁਪਾਦਿਵਗ੍ਗਵਣ੍ਣਨਾ) ਵੁਤ੍ਤਤ੍ਤਾ ‘‘ਨ ਵਲ਼ਞ੍ਜਨੂਪਚ੍ਛੇਦਨਤ੍ਥਾਯਾ’’ਤਿ ਵੁਤ੍ਤਂ. ਕਵਾਟਨ੍ਤਿ ਏਤ੍ਥ ਦ੍ਵਾਰਮੇਵ ਅਧਿਪ੍ਪੇਤਂ ਪਰਿਯਾਯੇਨ ਵੁਤ੍ਤਤ੍ਤਾ, ਅਸਤਿ ਚ ਦ੍ਵਾਰੇ ਕਵਾਟਸ੍ਸਾਭਾਵਤੋ. ਸਂਵਰਣਵਿਵਰਣਕਾਲੇ ਕਵਤਿ ਸਦ੍ਦਂ ਕਰੋਤੀਤਿ ਕਵਾਟਂ.
ਤਤ੍ਰਾਤਿ ‘‘ਏਕੂਪਚਾਰਤ੍ਤਾ’’ਤਿ ਵਚਨੇ. ਯਸ੍ਸਾਤਿ ਪਰਵਾਦਿਨੋ. ਅਨੁਯੋਗੋ ਸਿਯਾਤਿ ਯੋਜਨਾ. ਇਧਾਤਿ ਇਮਸ੍ਮਿਂ ਸਹਸੇਯ੍ਯਸਿਕ੍ਖਾਪਦੇ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਪਿਹਿਤਦ੍ਵਾਰੇ ਗਬ੍ਭੇ. ਸੋਤਿ ਪਰਵਾਦੀ. ਸਬ੍ਬਚ੍ਛਨ੍ਨਤ੍ਤਾ ਆਪਤ੍ਤਿ ਇਤਿ ਵੁਤ੍ਤੇਤਿ ਯੋਜਨਾ. ਏਸੇਵ ਨਯੋ ‘‘ਸਬ੍ਬਪਰਿਚ੍ਛਨ੍ਨਤਾ ਨ ਹੋਤੀ’’ਤਿ ਏਤ੍ਥਾਪਿ. ਪਚ੍ਚਾਗਮਿਸ੍ਸਤੀਤਿ ਪਤਿ ਆਗਮਿਸ੍ਸਤਿ, ਪੁਨ ਆਗਮਿਸ੍ਸਤੀਤਿ ਅਤ੍ਥੋ.
ਬ੍ਯਞ੍ਜਨਮਤ੍ਤੇਨੇਵਾਤਿ ‘‘ਸਬ੍ਬਚ੍ਛਨ੍ਨਾ’’ਤਿਆਦਿਅਕ੍ਖਰਪਦਮਤ੍ਤੇਨੇਵ, ਨ ਅਤ੍ਥਵਸੇਨ. ‘‘ਏਵਞ੍ਚ ਸਤੀ’’ਤਿ ਇਮਿਨਾ ਅਬ੍ਯਾਪਿਤਦੋਸਂ ਦਸ੍ਸੇਤਿ. ਤਤੋਤਿ ਅਨਾਪਤ੍ਤਿਤੋ, ਪਰਿਹਾਯੇਯ੍ਯਾਤਿ ਸਮ੍ਬਨ੍ਧੋ. ਤਸ੍ਮਾਤਿ ਯਸ੍ਮਾ ਅਨਿਯਤੇਸੁ ਵੁਤ੍ਤਂ, ਤਸ੍ਮਾ. ਤਤ੍ਥਾਤਿ ਅਨਿਯਤੇਸੁ. ਇਧਾਪੀਤਿ ਇਮਸ੍ਮਿਂ ਸਿਕ੍ਖਾਪਦੇਪਿ. ਯਂ ਯਨ੍ਤਿ ਸੇਨਾਸਨਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਸੇਨਾਸਨੇਸੁ, ਸਹਸੇਯ੍ਯਾਪਤ੍ਤਿ ਹੋਤੀਤਿ ਸਮ੍ਬਨ੍ਧੋ.
੫੩. ਦ੍ਵੀਸੁ ਅਟ੍ਠਕਥਾਵਾਦੇਸੁ ਮਹਾਅਟ੍ਠਕਥਾਵਾਦੋਵ ਯੁਤ੍ਤੋਤਿ ਸੋ ਪਚ੍ਛਾ ਵੁਤ੍ਤੋ.
ਇਮਿਨਾਪੀਤਿ ਸੇਨਮ੍ਬਮਣ੍ਡਪੇਨਾਪਿ. ਏਤਨ੍ਤਿ ਜਗਤਿਯਾ ਅਪਰਿਕ੍ਖਿਤ੍ਤਤਂ. ਯਥਾਤਿ ਯਂਸਦ੍ਦਤ੍ਥੋ ਤਤਿਯਨ੍ਤਨਿਪਾਤੋ, ਯੇਨ ਸੇਨਮ੍ਬਮਣ੍ਡਪੇਨਾਤਿ ਅਤ੍ਥੋਤਿ. ਪਞ੍ਚਮਂ.
੬. ਦੁਤਿਯਸਹਸੇਯ੍ਯਸਿਕ੍ਖਾਪਦਂ
੫੫. ਛਟ੍ਠੇ ਆਗਨ੍ਤੁਕਾ ਵਸਨ੍ਤਿ ਏਤ੍ਥਾਤਿ ਆਵਸਥੋ, ਆਵਸਥੋ ਚ ਸੋ ਅਗਾਰਞ੍ਚੇਤਿ ਆਵਸਥਾਗਾਰਨ੍ਤਿ ਦਸ੍ਸੇਨ੍ਤੋ ਆਹ ‘‘ਆਗਨ੍ਤੁਕਾਨਂ ਵਸਨਾਗਾਰ’’ਨ੍ਤਿ. ਮਨੁਸ੍ਸਾਨਂ ਸਨ੍ਤਿਕਾ ਵਚਨਂ ਸੁਤ੍ਵਾਤਿ ਵਚਨਸੇਸੋ ਯੋਜੇਤਬ੍ਬੋ. ਸਾਟਕਨ੍ਤਿ ਉਤ੍ਤਰਸਾਟਕਂ, ਨਿਵਤ੍ਥਵਤ੍ਥਨ੍ਤਿਪਿ ਵਦਨ੍ਤਿ. ਅਚ੍ਚਾਗਮ੍ਮਾਤਿ ਤ੍ਵਾਪਚ੍ਚਯਨ੍ਤਪਦਸ੍ਸ ਸਮ੍ਬਨ੍ਧਂ ਦਸ੍ਸੇਤੁਮਾਹ ‘‘ਪਵਤ੍ਤੋ’’ਤਿ. ਯਥਾ ਓਮਸਵਾਦਸਿਕ੍ਖਾਪਦੇ ਅਕ੍ਕੋਸੇਤੁਕਾਮਤਾਯ ਖਤ੍ਤਿਯਂ ‘‘ਚਣ੍ਡਾਲੋ’’ਤਿ ਵਦਤੋ ਅਲਿਕਂ ਭਣਤੋਪਿ ਮੁਸਾਵਾਦਸਿਕ੍ਖਾਪਦੇਨ ਅਨਾਪਤ੍ਤਿ, ਓਮਸਵਾਦਸਿਕ੍ਖਾਪਦੇਨੇਵ ਆਪਤ੍ਤਿ, ਏਵਮਿਧਾਪਿ ਮਾਤੁਗਾਮੇਨ ਸਹ ਸਯਤੋ ਪਠਮਸਹਸੇਯ੍ਯਸਿਕ੍ਖਾਪਦੇਨ ਅਨਾਪਤ੍ਤਿ, ਇਮਿਨਾਵ ਆਪਤ੍ਤੀਤਿ ਦਟ੍ਠਬ੍ਬਨ੍ਤਿ. ਛਟ੍ਠਂ.
੭. ਧਮ੍ਮਦੇਸਨਾਸਿਕ੍ਖਾਪਦਂ
੬੦. ਸਤ੍ਤਮੇ ਮਹਾਦ੍ਵਾਰੇਤਿ ਬਹਿ ਠਿਤੇ ਮਹਾਦ੍ਵਾਰੇ. ਆਗਮ੍ਮ, ਪਵਿਸਿਤ੍ਵਾ ਵਾ ਵਸਨਟ੍ਠਾਨਤ੍ਤਾ ਓਵਰਕੋ ਆਵਸਥੋ ਨਾਮਾਤਿ ਆਹ ‘‘ਓਵਰਕਦ੍ਵਾਰੇ’’ਤਿ. ਸੁਨਿਗ੍ਗਤੇਨਾਤਿ ਸੁਟ੍ਠੁ ਬਹਿ ਨਿਕ੍ਖਮਿਤ੍ਵਾ ਗਤੇਨ ਸਦ੍ਦੇਨ. ‘‘ਅਞ੍ਞਾਤੁ’’ਨ੍ਤਿ ਪਦਸ੍ਸ ‘‘ਨ ਞਾਤੁ’’ਨ੍ਤਿ ਅਤ੍ਥਂ ਪਟਿਕ੍ਖਿਪਨ੍ਤੋ ਆਹ ‘‘ਆਜਾਨਿਤੁ’’ਨ੍ਤਿ. ਇਮਿਨਾ ਨਕਾਰਵਿਕਾਰੋ ਅਇਤਿ ਨਿਪਾਤੋ ਨ ਹੋਤਿ, ਆਇਤਿ ਉਪਸਗ੍ਗੋਤਿ ਪਨ ਦਸ੍ਸੇਤਿ. ‘‘ਵਿਞ੍ਞੁਨਾ ਪੁਰਿਸੇਨਾ’’ਤਿ ਏਤ੍ਤਕਮੇਵ ਅਵਤ੍ਵਾ ‘‘ਪੁਰਿਸਵਿਗ੍ਗਹੇਨਾ’’ਤਿ ਵਦਨ੍ਤੋ ਮਨੁਸ੍ਸਪੁਰਿਸਵਿਗ੍ਗਹਂ ਗਹੇਤ੍ਵਾ ਠਿਤੇਨ ਯਕ੍ਖੇਨ ਪੇਤੇਨ ਤਿਰਚ੍ਛਾਨਗਤੇਨ ਸਦ੍ਧਿਂ ਠਿਤਾਯ ਮਾਤੁਗਾਮਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਨ ਯਕ੍ਖੇਨਾਤਿ ਯਕ੍ਖੇਨ ਸਦ੍ਧਿਂ ਠਿਤਾਯ ਮਾਤੁਗਾਮਸ੍ਸ ਦੇਸੇਤੁਂ ਨ ਵਟ੍ਟਤੀਤਿ ਯੋਜਨਾ. ਏਸ ਨਯੋ ‘‘ਨ ਪੇਤੇਨ, ਨ ਤਿਰਚ੍ਛਾਨਗਤੇਨਾ’’ਤਿ ਏਤ੍ਥਾਪਿ.
੬੬. ਛਪ੍ਪਞ੍ਚਵਾਚਾਹੀਤਿ ਏਤ੍ਥ ‘‘ਪਞ੍ਚਾ’’ਤਿ ਵਾਚਾਸਿਲਿਟ੍ਠਵਸੇਨ ਵੁਤ੍ਤਂ ਕਸ੍ਸਚਿ ਪਯੋਜਨਸ੍ਸਾਭਾਵਾ. ਤਤ੍ਥਾਤਿ ‘‘ਛਪ੍ਪਞ੍ਚਵਾਚਾਹੀ’’ਤਿ ਪਦੇ. ਏਕੋ ਗਾਥਾਪਾਦੋ ਏਕਾ ਵਾਚਾਤਿ ਵਦਨ੍ਤੋ ਚੁਣ੍ਣਿਯੇ ਵਿਭਤ੍ਯਨ੍ਤਂ ਏਕਂ ਪਦਂ ਏਕਾ ਵਾਚਾ ਨਾਮਾਤਿ ਦਸ੍ਸੇਤਿ, ਅਤ੍ਥਜੋਤਕਪਦਂ ਵਾ ਵਾਕ੍ਯਪਦਂ ਵਾ ਨ ਗਹੇਤਬ੍ਬਂ. ‘‘ਏਕਂ ਪਦਂ ਪਾਲ਼ਿਤੋ, ਪਞ੍ਚ ਅਟ੍ਠਕਥਾਤੋ’’ਤਿ ਇਮਿਨਾ ‘‘ਦ੍ਵੇ ਪਦਾਨਿ ਪਾਲ਼ਿਤੋ, ਚਤ੍ਤਾਰਿ ਅਟ੍ਠਕਥਾਤੋ’’ਤਿਆਦਿਨਯੋਪਿ ਗਹੇਤਬ੍ਬੋ. ਛਪਦਾਨਤਿਕ੍ਕਮੋਯੇਵ ਹਿ ਪਮਾਣਂ. ਤਸ੍ਮਿਨ੍ਤਿ ਏਤ੍ਥ ਸਤਿ ਵਿਭਤ੍ਤਿਵਿਪਲ੍ਲਾਸੇ ਲਿਙ੍ਗਸ੍ਸਾਪਿ ਵਿਪਲ੍ਲਾਸੋ ਹੋਤਿ ‘‘ਤਸ੍ਮਿ’’ਨ੍ਤਿ ਪੁਲ੍ਲਿਙ੍ਗੇਨ ਵੁਤ੍ਤਤ੍ਤਾ. ਸਤਿ ਚ ਵਿਭਤ੍ਤਿਵਿਪਲ੍ਲਾਸੇ ‘‘ਤਸ੍ਸਾ’’ਤਿ ਇਤ੍ਥਿਲਿਙ੍ਗਭਾਵੇਨ ਪਵਤ੍ਤਾ. ‘‘ਮਾਤੁਗਾਮਸ੍ਸਾ’’ਤਿ ਨਿਯਤਪੁਲ੍ਲਿਙ੍ਗਾਪੇਕ੍ਖਨਸ੍ਸ ਅਸਮ੍ਭਵਤੋ ਅਤ੍ਥਵਸੇਨ ‘‘ਏਕਿਸ੍ਸਾ’’ਤਿ ਇਤ੍ਥਿਲਿਙ੍ਗਭਾਵੇਨ ਵੁਤ੍ਤਂ. ਇਮਿਨਾ ਭੇਦਲਿਙ੍ਗਨਿਸ੍ਸਿਤੋ ਵਿਸੇਸਨਵਿਸੇਸ੍ਯੋਪਿ ਅਤ੍ਥੀਤਿ ਦਸ੍ਸੇਤਿ. ਤੁਮ੍ਹਾਕਨ੍ਤਿ ਨਿਦ੍ਧਾਰਣਸਮੁਦਾਯੋ. ‘‘ਸੁਣਾਥਾ’’ਤਿ ਅਵਤ੍ਵਾ ਆਭੋਗੋਪਿ ਵਟ੍ਟਤੀਤਿ ਆਹ ‘‘ਪਠਮ’’ਨ੍ਤਿਆਦਿ. ਪਠਮਨ੍ਤਿ ਚ ਪਠਮਮੇਵ. ਤੇਨ ਵੁਤ੍ਤਂ ‘‘ਨ ਪਚ੍ਛਾ’’ਤਿ. ਪੁਟ੍ਠੋ ਹੁਤ੍ਵਾ ਭਿਕ੍ਖੁ ਕਥੇਤੀਤਿ ਯੋਜਨਾਤਿ. ਸਤ੍ਤਮਂ.
੮. ਭੂਤਾਰੋਚਨਸਿਕ੍ਖਾਪਦਂ
੬੭. ਅਟ੍ਠਮੇ ਤਤ੍ਥਾਤਿ ਚਤੁਤ੍ਥਪਾਰਾਜਿਕਸਿਕ੍ਖਾਪਦੇ. ਇਧਾਤਿ ਭੂਤਾਰੋਚਨਸਿਕ੍ਖਾਪਦੇ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਯੁਤ੍ਤਵਾਚਾਤਿ ਪਚ੍ਚਯੇਹਿ ਯੁਤ੍ਤਾ ਵਾਚਾ. ਤਥਾਤਿ ਤਤੋ ਗੁਣਾਰੋਚਨਕਾਰਣਾ, ਅਰਿਯਾ ਸਾਦਿਯਿਂਸੂਤਿ ਯੋਜਨਾ.
ਯਤਸਦ੍ਦਾਨਂ ਨਿਚ੍ਚਸਮ੍ਬਨ੍ਧਤ੍ਤਾ ਵੁਤ੍ਤਂ ‘‘ਯੇ’’ਤਿਆਦਿ. ਸਬ੍ਬੇਪੀਤਿ ਪੁਥੁਜ੍ਜਨਾਰਿਯਾਪਿ. ਭੂਤਨ੍ਤਿ ਵਿਜ੍ਜਮਾਨਂ. ਕਸ੍ਮਾ ਸਬ੍ਬੇਪਿ ਪਟਿਜਾਨਿਂਸੁ, ਨਨੁ ਅਰਿਯੇਹਿ ਅਤ੍ਤਨੋ ਗੁਣਾਨਂ ਅਨਾਰੋਚਿਤਤ੍ਤਾ ਨ ਪਟਿਜਾਨਿਤਬ੍ਬਨ੍ਤਿ ਆਹ ‘‘ਅਰਿਯਾਨਮ੍ਪੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਰਿਯਾਨਮ੍ਪਿ ਅਬ੍ਭਨ੍ਤਰੇ ਉਤ੍ਤਰਿਮਨੁਸ੍ਸਧਮ੍ਮੋ ਯਸ੍ਮਾ ਭੂਤੋ ਹੋਤਿ, ਤਸ੍ਮਾ ਸਬ੍ਬੇਪਿ ‘‘ਭੂਤਂ ਭਗਵਾ’’ਤਿ ਪਟਿਜਾਨਿਂਸੂਤਿ ਯੋਜਨਾ. ਯਸ੍ਮਾ ਭਾਸਿਤੋ ਵਿਯ ਹੋਤਿ, ਤਸ੍ਮਾਤਿ ਯੋਜਨਾ. ਅਰਿਯਾ ਪਟਿਜਾਨਿਂਸੂਤਿ ਸਮ੍ਬਨ੍ਧੋ. ਅਨਾਦੀਨਵਦਸ੍ਸਿਨੋਤਿ ਦੋਸਸ੍ਸ ਅਦਸ੍ਸਨਧਮ੍ਮਾ. ਤੇਹੀਤਿ ਅਰਿਯੇਹਿ, ਭਾਸਿਤੋਤਿ ਸਮ੍ਬਨ੍ਧੋ. ਯਂ ਪਿਣ੍ਡਪਾਤਂ ਉਪ੍ਪਾਦੇਸੁਨ੍ਤਿ ਯੋਜਨਾ. ਅਞ੍ਞੇਤਿ ਪੁਥੁਜ੍ਜਨਾ. ਸਬ੍ਬਸਙ੍ਗਾਹਿਕੇਨੇਵਾਤਿ ਸਬ੍ਬੇਸਂ ਪੁਥੁਜ੍ਜਨਾਰਿਯਾਨਂ ਸਙ੍ਗਹਣੇ ਪਵਤ੍ਤੇਨੇਵ. ਸਿਕ੍ਖਾਪਦਵਿਭਙ੍ਗੇਪੀਤਿ ਸਿਕ੍ਖਾਪਦਸ੍ਸ ਪਦਭਾਜਨਿਯੇਪਿ. ਤਤ੍ਥਾਤਿ ਚਤੁਤ੍ਥਪਾਰਾਜਿਕੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ.
੭੭. ਉਤ੍ਤਰਿਮਨੁਸ੍ਸਧਮ੍ਮਮੇਵ ਸਨ੍ਧਾਯ ਵੁਤ੍ਤਂ, ਨ ਸੁਤਾਦਿਗੁਣਨ੍ਤਿ ਅਤ੍ਥੋ. ਅਨ੍ਤਰਾ ਵਾਤਿ ਪਰਿਨਿਬ੍ਬਾਨਕਾਲਤੋ ਅਞ੍ਞਸ੍ਮਿਂ ਕਾਲੇ ਵਾ. ਅਤਿਕਡ੍ਢਿਯਮਾਨੇਨਾਤਿ ਅਤਿਨਿਪ੍ਪੀਲ਼ਿਯਮਾਨੇਨ. ਉਮ੍ਮਤ੍ਤਕਸ੍ਸਾਤਿ ਇਦਂ ਪਨਾਤਿ ਏਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ. ਤੇਨ ‘‘ਖਿਤ੍ਤਚਿਤ੍ਤਸ੍ਸਾ’’ਤਿਆਦਿਂ ਸਙ੍ਗਣ੍ਹਾਤਿ. ਦਿਟ੍ਠਿਸਮ੍ਪਨ੍ਨਾਨਨ੍ਤਿ ਮਗ੍ਗਪਞ੍ਞਾਯ, ਫਲਪਞ੍ਞਾਯ ਚ ਸਮ੍ਪਨ੍ਨਾਨਂ. ਅਨਾਪਤ੍ਤੀਤਿ ਪਾਚਿਤ੍ਤਿਯਾਪਤ੍ਤਿਯਾ ਅਨਾਪਤ੍ਤਿ ਨ ਵਤ੍ਤਬ੍ਬਾ, ਆਪਤ੍ਤਿਯੇਵ ਹੋਤਿ, ਤਸ੍ਮਾ ‘‘ਉਮ੍ਮਤ੍ਤਕਸ੍ਸ ਅਨਾਪਤ੍ਤੀ’’ਤਿ ਨ ਵਤ੍ਤਬ੍ਬਨ੍ਤਿ ਅਧਿਪ੍ਪਾਯੋਤਿ. ਅਟ੍ਠਮਂ.
੯. ਦੁਟ੍ਠੁਲ੍ਲਾਰੋਚਨਸਿਕ੍ਖਾਪਦਂ
੭੮. ਨਵਮੇ ਤਤ੍ਰਾਤਿ ਤਸ੍ਸਂ ‘‘ਦੁਟ੍ਠੁਲ੍ਲਾ ਨਾਮਾ’’ਤਿਆਦਿਪਾਲ਼ਿਯਂ, ਤਾਸੁ ਵਾ ਪਾਲ਼ਿਅਟ੍ਠਕਥਾਸੁ. ਵਿਚਾਰਣਾਤਿ ਵੀਮਂਸਨਾ. ਉਪਸਮ੍ਪਨ੍ਨਸਦ੍ਦੇਤਿ ਉਪਸਮ੍ਪਨ੍ਨਸਦ੍ਦਤ੍ਥਭਾਵੇ. ਏਤ੍ਥ ਹਿ ਸਦ੍ਦੇ ਵੁਚ੍ਚਮਾਨੇ ਅਵਿਨਾਭਾਵਤੋ ਸਦ੍ਦੇਨ ਅਤ੍ਥੋਪਿ ਵੁਤ੍ਤੋ, ਵਿਨਾਪਿ ਭਾਵਪਚ੍ਚਯੇਨ ਭਾਵਤ੍ਥਸ੍ਸ ਞਾਤਬ੍ਬਤ੍ਤਾ ਭਾਵੋਪਿ ਗਹੇਤਬ੍ਬੋ, ਤਸ੍ਮਾ ਵੁਤ੍ਤਂ ‘‘ਉਪਸਮ੍ਪਨ੍ਨਸਦ੍ਦਤ੍ਥਭਾਵੇ’’ਤਿ. ਏਸੇਵ ਨਯੋ ‘‘ਦੁਟ੍ਠੁਲ੍ਲਸਦ੍ਦੇ’’ਤਿ ਏਤ੍ਥਾਪਿ. ਏਤਂ ਪਰਿਮਾਣਂ ਯਸ੍ਸਾਤਿ ਏਤਂ, ‘‘ਤੇਰਸ ਸਙ੍ਘਾਦਿਸੇਸਾ’’ਤਿ ਵਚਨਂ. ਏਤਂ ਏਵ ਵਤ੍ਤਬ੍ਬਂ, ਨ ‘‘ਚਤ੍ਤਾਰਿ ਚ ਪਾਰਾਜਿਕਾਨੀ’’ਤਿ ਇਦਨ੍ਤਿ ਅਤ੍ਥੋ. ਤਤ੍ਥਾਤਿ ਪਾਲ਼ਿਯਂ. ਕਸ੍ਸਚਿ ਵਿਮਤਿ ਭਵੇਯ੍ਯ, ਕਿਂ ਭਵੇਯ੍ਯਾਤਿ ਯੋਜਨਾ. ਆਪਤ੍ਤਿਂ ਆਰੋਚੇਨ੍ਤੇਨ ਅਕ੍ਕੋਸਨ੍ਤਸ੍ਸ ਸਮਾਨਤ੍ਤਾ ਵੁਤ੍ਤਂ ‘‘ਏਵਂ ਸਤੀ’’ਤਿਆਦਿ. ਪਾਚਿਤ੍ਤਿਯਮੇਵ ਚਾਤਿ ਚਸਦ੍ਦੋ ਬ੍ਯਤਿਰੇਕਤ੍ਥੋ, ਨ ਦੁਕ੍ਕਟਂ ਆਪਜ੍ਜਤੀਤਿ ਅਤ੍ਥੋ. ਹੀਤਿ ਸਚ੍ਚਂ. ਏਤਨ੍ਤਿ ਪਾਚਿਤ੍ਤਿਯਾਪਜ੍ਜਨਤਂ, ‘‘ਅਸੁਦ੍ਧੋ ਹੋਤਿ…ਪੇ… ਓਮਸਵਾਦਸ੍ਸਾ’’ਤਿ ਵਚਨਂ ਵਾ, ਵੁਤ੍ਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਪਾਲ਼ਿਯਂ. ਅਟ੍ਠਕਥਾਚਰਿਯਾਵੇਤਿ ਏਤ੍ਥ ਏਵਕਾਰੋ ਅਟ੍ਠਾਨਯੋਗੋ, ਪਮਾਣਨ੍ਤਿ ਏਤ੍ਥ ਯੋਜੇਤਬ੍ਬੋ, ਕਾਰਣਮੇਵਾਤਿ ਅਤ੍ਥੋ. ਤੇਨ ਵੁਤ੍ਤਂ ‘‘ਨ ਅਞ੍ਞਾ ਵਿਚਾਰਣਾ’’ਤਿ. ਅਥ ਵਾ ਅਞ੍ਞਾਤਿ ਸਾਮ੍ਯਤ੍ਥੇ ਪਚ੍ਚਤ੍ਤਵਚਨਮੇਤਂ, ਨ ਅਞ੍ਞੇਸਂ ਵਿਚਾਰਣਾ ਪਮਾਣਨ੍ਤਿ ਅਤ੍ਥੋ. ਏਵਞ੍ਹਿ ਸਤਿ ਏਵਕਾਰੋ ਠਾਨਯੋਗੋਵ. ਪੁਬ੍ਬੇਪਿ ਚਾਤਿ ਗਨ੍ਥਾਰਮ੍ਭਕਾਲੇਪਿ ਚ.
ਏਤਨ੍ਤਿ ਅਟ੍ਠਕਥਾਚਰਿਯਾਨਂ ਪਮਾਣਤਂ. ਸਂਵਰਤ੍ਥਾਯ ਏਵ, ਅਨਾਪਜ੍ਜਨਤ੍ਥਾਯ ਏਵ ਚ ਅਨੁਞ੍ਞਾਤਨ੍ਤਿ ਯੋਜਨਾ. ਤੇਨਾਹ ‘‘ਨ ਤਸ੍ਸ’’ਤ੍ਯਾਦਿ. ਤਸ੍ਮਾਤਿ ਯਸ੍ਮਾ ਭਿਕ੍ਖੁਭਾਵੋ ਨਾਮ ਨ ਅਤ੍ਥਿ, ਤਸ੍ਮਾ ਸੁਵੁਤ੍ਤਮੇਵਾਤਿ ਸਮ੍ਬਨ੍ਧੋ.
੮੦. ਸਾਤਿ ਭਿਕ੍ਖੁਸਮ੍ਮੁਤਿ, ਸਙ੍ਘੇਨ ਕਾਤਬ੍ਬਾਤਿ ਯੋਜਨਾ. ਕਤ੍ਥਚੀਤਿ ਕਿਸ੍ਮਿਞ੍ਚਿ ਠਾਨੇ. ਇਧਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਵੁਤ੍ਤਤ੍ਤਾ’’ਤਿ ਪਦਂ ‘‘ਕਾਤਬ੍ਬਾ’’ਤਿ ਪਦੇ ਹੇਤੁ. ਏਸਾਤਿ ਏਸੋ ਭਿਕ੍ਖੁ. ਹਿਤੇਸਿਤਾਯਾਤਿ ਹਿਤਸ੍ਸ ਏਸਿਤਾਯ, ਅਤ੍ਥਸ੍ਸ ਇਚ੍ਛਤਾਯਾਤਿ ਅਤ੍ਥੋ.
੮੨. ਸੇਸਾਨੀਤਿ ਆਦਿਮ੍ਹਿ ਪਞ੍ਚਸਿਕ੍ਖਾਪਦਤੋ ਸੇਸਾਨਿ ਉਪਰਿ ਪਞ੍ਚ ਸਿਕ੍ਖਾਪਦਾਨਿ. ਅਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ. ਘਟੇਤ੍ਵਾਤਿ ਸਮ੍ਬਨ੍ਧਂ ਕਤ੍ਵਾਤਿ. ਨਵਮਂ.
੧੦. ਪਥਵੀਖਣਨਸਿਕ੍ਖਾਪਦਂ
੮੬. ਦਸਮੇ ਭਗਵਾ ਦਸ੍ਸੇਤੀਤਿ ਯੋਜਨਾ. ਏਤ੍ਥਾਤਿ ਪਥਵਿਯਂ. ਤਤ੍ਥਾਤਿ ਤੇਸੁ ਪਾਸਾਣਾਦੀਸੁ. ਮੁਟ੍ਠਿਪ੍ਪਮਾਣਤੋਤਿ ਖਟਕਪਮਾਣਤੋ. ਸਾਤਿ ਅਦਡ੍ਢਪਥਵੀ. ਹਤ੍ਥਿਕੁਚ੍ਛਿਯਨ੍ਤਿ ਏਵਂਨਾਮਕੇ ਠਾਨੇ. ਏਕਪਚ੍ਛਿਪੂਰਂ ਪਥਵਿਨ੍ਤਿ ਸਮ੍ਬਨ੍ਧੋ. ਤੇਸਂਯੇਵਾਤਿ ਅਪ੍ਪਪਂਸੁਅਪ੍ਪਮਤ੍ਤਿਕਾਪਦਾਨਂ ਏਵ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਏਤਨ੍ਤਿ ਯੇਭੁਯ੍ਯੇਨਪਾਸਾਣਾਦਿਪਞ੍ਚਕਂ. ਤਨ੍ਤਿ ਕੁਸੀਤਂ. ਆਣਾਪੇਤ੍ਵਾਤਿ ਏਤ੍ਥ ‘‘ਆਣ ਪੇਸਨੇ’’ਤਿ ਧਾਤੁਪਾਠੇਸੁ ਵੁਤ੍ਤਤ੍ਤਾ ਆਣਧਾਤੁਯੇਵ ਪੇਸਨਸਙ੍ਖਾਤਂ ਹੇਤ੍ਵਤ੍ਥਂ ਵਦਤਿ, ਨ ਣਾਪੇਪਚ੍ਚਯੋ, ਸੋ ਪਨ ਧਾਤ੍ਵਤ੍ਥੇਯੇਵ ਵਤ੍ਤਤਿ. ਨ ਹਿ ਤਸ੍ਸ ਵਿਸੁਂ ਵੁਤ੍ਤੋ ਅਭਿਧੇਯ੍ਯੋ ਅਤ੍ਥਿ ਧਾਤ੍ਵਤ੍ਥਤੋ ਅਞ੍ਞਸ੍ਸ ਅਭਿਧੇਯ੍ਯਸ੍ਸਾਭਾਵਾ. ਤਾਵਾਤਿ ਪਠਮਂ ਪਾਲ਼ਿਮੁਤ੍ਤਕਵਿਨਿਚ੍ਛਯਸ੍ਸ, ਤਤੋ ਵਾ.
ਪੋਕ੍ਖਰਂ ਪਦੁਮਂ ਨੇਤੀਤਿ ਪੋਕ੍ਖਰਣੀ. ‘‘ਸੋਧੇਨ੍ਤੇਹੀ’’ਤਿ ਪਦਂ ‘‘ਉਸ੍ਸਿਞ੍ਚਿਤੁਂ ਅਪਨੇਤੁ’’ਨ੍ਤਿ ਪਦੇਸੁ ਭਾਵਕਤ੍ਤਾ. ਯੋਤਿ ‘‘ਤਨੁਕਦ੍ਦਮੋ’’ਤਿ ਪਦੇਨ ਯੋਜੇਤਬ੍ਬੋ. ਯੋ ਤਨੁਕਦ੍ਦਮੋਤਿ ਹਿ ਅਤ੍ਥੋ. ਕੁਟੇਹੀਤਿ ਘਟੇਹਿ. ਉਸ੍ਸਿਞ੍ਚਿਤੁਨ੍ਤਿ ਉਕ੍ਖਿਪਿਤ੍ਵਾ, ਉਦ੍ਧਰਿਤ੍ਵਾ ਵਾ ਸਿਞ੍ਚਿਤੁਂ. ਤਤ੍ਰਾਤਿ ਸੁਕ੍ਖਕਦ੍ਦਮੇ, ‘‘ਯੋ’’ਤਿ ਪਦੇ ਅਵਯਵੀਆਧਾਰੋ. ਯੋਤਿ ਸੁਕ੍ਖਕਦ੍ਦਮੋ.
ਤਟਨ੍ਤਿ ਕੂਲਂ. ਉਦਕਸਾਮਨ੍ਤਾਤਿ ਉਦਕਸ੍ਸ ਸਮੀਪੇ. ਓਮਕਚਤੁਮਾਸਨ੍ਤਿ ਚਤੁਮਾਸਤੋ ਊਨਕਂ. ਓਵਟ੍ਠਨ੍ਤਿ ਦੇਵੇਨ ਓਵਸ੍ਸਿਤਂ ਹੋਤਿ ਸਚੇਤਿ ਯੋਜਨਾ. ਪਤਤੀਤਿ ਤਟਂ ਪਤਤਿ. ਉਦਕੇਯੇਵਾਤਿ ਪਕਤਿਉਦਕੇਯੇਵ. ਉਦਕਸ੍ਸਾਤਿ ਵਸ੍ਸੋਦਕਸ੍ਸ. ਤਤ੍ਥਾਤਿ ਪਾਸਾਣਪਿਟ੍ਠਿਯਂ. ਪਠਮਮੇਵਾਤਿ ਸੋਣ੍ਡਿਖਣਨਤੋ ਪਠਮਂ ਏਵ. ਉਦਕੇ ਪਰਿਯਾਦਿਣ੍ਣੇਤਿ ਉਦਕੇ ਸੁਕ੍ਖੇ. ਪਚ੍ਛਾਤਿ ਉਦਕਪੂਰਤੋ ਪਚ੍ਛਾ. ਤਤ੍ਥਾਤਿ ਸੋਣ੍ਡਿਯਂ. ਉਦਕੇਯੇਵਾਤਿ ਮੂਲਉਦਕੇਯੇਵ. ਉਦਕਨ੍ਤਿ ਆਗਨ੍ਤੁਕਉਦਕਂ. ਅਲ੍ਲੀਯਤੀਤਿ ਪਿਟ੍ਠਿਪਾਸਾਣੇ ਲਗ੍ਗਤਿ. ਤਮ੍ਪੀਤਿ ਸੁਖੁਮਰਜਮ੍ਪਿ. ਅਕਤਪਬ੍ਭਾਰੇਤਿ ਵਲ਼ਞ੍ਜੇਨ ਅਕਤੇ ਪਬ੍ਭਾਰੇ. ਉਪਚਿਕਾਹਿ ਵਮੀਯਤਿ, ਘਰਗੋਲ਼ਿਕਾਦਯੋ ਵਾ ਸਤ੍ਤੇ ਵਮਤੀਤਿ ਵਮ੍ਮਿਕੋ.
ਗਾਵੀਨਂ ਖੁਰੋ ਕਣ੍ਟਕਸਦਿਸਤ੍ਤਾ ਗੋਕਣ੍ਟਕੋ ਨਾਮ, ਤੇਨ ਛਿਨ੍ਨੋ ਕਦ੍ਦਮੋ ‘‘ਗੋਕਣ੍ਟਕੋ’’ਤਿ ਵੁਚ੍ਚਤਿ. ਅਚ੍ਛਦਨਂ ਵਾ ਵਿਨਟ੍ਠਚ੍ਛਦਨਂ ਵਾ ਪੁਰਾਣਸੇਨਾਸਨਂ ਹੋਤੀਤਿ ਯੋਜਨਾ. ਤਤੋਤਿ ਪੁਰਾਣਸੇਨਾਸਨਤੋ, ਗਣ੍ਹਿਤੁਂ ਵਟ੍ਟਤੀਤਿ ਸਮ੍ਬਨ੍ਧੋ. ਅਵਸੇਸਨ੍ਤਿ ਵਿਨਟ੍ਠਚ੍ਛਦਨਤੋ. ਅਵਸੇਸਂ ਇਟ੍ਠਕਂ ਗਣ੍ਹਾਮਿ ਇਤਿ ਸਞ੍ਞਾਯਾਤਿ ਯੋਜੇਤਬ੍ਬੋ. ਤੇਨਾਤਿ ਇਟ੍ਠਕਾਦਿਨਾ. ਯਾ ਯਾਤਿ ਮਤ੍ਤਿਕਾ. ਅਤਿਨ੍ਤਾਤਿ ਅਨਲ੍ਲਾ, ਅਕਿਲਿਨ੍ਨਾਤਿ ਅਤ੍ਥੋ.
ਤਸ੍ਮਿਨ੍ਤਿ ਮਤ੍ਤਿਕਾਪੁਞ੍ਜੇ. ਸਬ੍ਬੋਤਿ ਸਕਲੋ ਮਤ੍ਤਿਕਾਪੁਞ੍ਜੋ. ਅਸ੍ਸਾਤਿ ਮਤ੍ਤਿਕਾਪੁਞ੍ਜਸ੍ਸ. ‘‘ਕਪ੍ਪਿਯਕਾਰਕੇਹੀ’’ਤਿ ਪਦਂ ‘‘ਅਪਨਾਮੇਤ੍ਵਾ’’ਤਿ ਪਦੇ ਕਾਰਿਤਕਮ੍ਮਂ. ਕਸ੍ਮਾ ਵਟ੍ਟਤੀਤਿ ਆਹ ‘‘ਉਦਕੇਨਾ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ.
ਤਤ੍ਥਾਤਿ ਮਤ੍ਤਿਕਾਪਾਕਾਰੇ. ਅਞ੍ਞਮ੍ਪੀਤਿ ਮਣ੍ਡਪਥਮ੍ਭਤੋ ਅਞ੍ਞਮ੍ਪਿ. ਤੇਨ ਅਪਦੇਸੇਨਾਤਿ ਤੇਨ ਪਾਸਾਣਾਦਿਪਵਟ੍ਟਨਲੇਸੇਨ.
ਪਸ੍ਸਾਵਧਾਰਾਯਾਤਿ ਮੁਤ੍ਤਸੋਤਾਯ. ਕਤ੍ਤਰਯਟ੍ਠਿਯਾਤਿ ਕਤ੍ਤਰਦਣ੍ਡੇਨ. ਏਤ੍ਥ ਹਿ ਕਤ੍ਤਰਯਤਿ ਅਙ੍ਗਪਚ੍ਚਙ੍ਗਾਨਂ ਸਿਥਿਲਭਾਵੇਨ ਸਿਥਿਲੋ ਹੁਤ੍ਵਾ ਭਵਤੀਤਿ ਕਤ੍ਵਾ ਕਤ੍ਤਰੋ ਵੁਚ੍ਚਤਿ ਜਿਣ੍ਣਮਨੁਸ੍ਸੋ, ਤੇਨ ਏਕਨ੍ਤਤੋ ਗਹੇਤਬ੍ਬਤ੍ਤਾ ਕਤ੍ਤਰੇਨ ਗਹਿਤਾ ਯਟ੍ਠਿ, ਕਤ੍ਤਰਸ੍ਸ ਯਟ੍ਠੀਤਿ ਵਾ ਕਤ੍ਵਾ ਕਤ੍ਤਰਯਟ੍ਠਿ ਵੁਚ੍ਚਤਿ ਕਤ੍ਤਰਦਣ੍ਡੋ. ਦਨ੍ਤਜਪਠਮਕ੍ਖਰੇਨ ਸਜ੍ਝਾਯਿਤਬ੍ਬੋ. ਵੀਰਿਯਸਮ੍ਪਗ੍ਗਹਣਤ੍ਥਨ੍ਤਿ ਵੀਰਿਯਸ੍ਸ ਸੁਟ੍ਠੁ ਪਗ੍ਗਣ੍ਹਨਤ੍ਥਂ, ਵੀਰਿਯਸ੍ਸ ਉਕ੍ਖਿਪਨਤ੍ਥਨ੍ਤਿ ਅਤ੍ਥੋ. ਕੇਚਿ ਭਿਕ੍ਖੂਤਿ ਯੋਜਨਾ.
੮੭. ਤਤ੍ਰਾਪੀਤਿ ਇਟ੍ਠਕਕਪਾਲਾਦੀਸੁਪਿ. ਹੀਤਿ ਸਚ੍ਚਂ. ਤੇਸਂ ਅਨੁਪਾਦਾਨਤ੍ਤਾਤਿ ਤੇਸਂ ਇਟ੍ਠਕਾਦੀਨਂ ਅਗ੍ਗਿਸ੍ਸ ਅਨਿਨ੍ਧਨਤ੍ਤਾ. ਹੀਤਿ ਸਚ੍ਚਂ, ਯਸ੍ਮਾਵਾ. ਤਾਨੀਤਿ ਇਟ੍ਠਕਾਦੀਨਿ. ਅਵਿਸਯਤ੍ਤਾਤਿ ਆਪਤ੍ਤਿਯਾ ਅਨੋਕਾਸਤ੍ਤਾ. ਤਿਣੁਕ੍ਕਨ੍ਤਿ ਤਿਣਮਯਂ ਉਕ੍ਕਂ. ਤਤ੍ਥੇਵਾਤਿ ਮਹਾਪਚ੍ਚਰਿਯਂ ਏਵ. ਅਰੀਯਤਿ ਅਗ੍ਗਿਨਿਪ੍ਫਾਦਨਤ੍ਥਂ ਘਂਸੀਯਤਿ ਏਤ੍ਥਾਤਿ ਅਰਣੀ, ਹੇਟ੍ਠਾ ਨਿਮਨ੍ਥਨੀਯਦਾਰੁ. ਸਹ ਧਨੁਨਾ ਏਤਿ ਪਵਤ੍ਤਤੀਤਿ ਸਹਿਤੋ, ਉਪਰਿ ਨਿਮਨ੍ਥਨਦਾਰੁ. ਅਰਣੀ ਚ ਸਹਿਤੋ ਚ ਅਰਣੀਸਹਿਤੋ, ਤੇਨ ਅਗ੍ਗਿਂ ਨਿਬ੍ਬਤ੍ਤੇਤ੍ਵਾਤਿ ਯੋਜਨਾ. ਯਥਾ ਕਰਿਯਮਾਨੇ ਨ ਡਯ੍ਹਤਿ, ਤਥਾ ਕਰੋਹੀਤਿ ਸਮ੍ਬਨ੍ਧੋ.
੮੮. ਆਵਾਟਂ ਜਾਨਾਤਿ ਆਵਾਟਂ ਕਾਤੁਂ, ਖਣਿਤੁਂ ਵਾ ਜਾਨਾਹੀਤਿ ਅਤ੍ਥੋ. ‘‘ਏਵਂ ਮਹਾਮਤ੍ਤਿਕਂ ਜਾਨ, ਥੁਸਮਤ੍ਤਿਕਂ ਜਾਨਾ’’ਤਿ ਏਤ੍ਥਾਪਿ ਯਥਾਲਾਭਂ ਸਮ੍ਪਦਾਨਵਾਚਕਪਦਂ ਅਜ੍ਝਾਹਰਿਤ੍ਵਾ ਯੋਜਨਾ ਕਾਤਬ੍ਬਾ. ਸਾਤਿ ਪਥਵੀ. ਤੇਨਾਤਿ ਪਵਟ੍ਟਨਾਦਿਨਾਤਿ. ਦਸਮਂ.
ਮੁਸਾਵਾਦਵਗ੍ਗੋ ਪਠਮੋ.
੨. ਭੂਤਗਾਮਵਗ੍ਗੋ
੧. ਭੂਤਗਾਮਸਿਕ੍ਖਾਪਦ-ਅਤ੍ਥਯੋਜਨਾ
੮੯. ਦੁਤਿਯਵਗ੍ਗਸ੍ਸ ਪਠਮੇ ਤਸ੍ਸਾਤਿ ਦੇਵਤਾਯ. ਉਕ੍ਖਿਤ੍ਤਂ ਫਰਸੁਨ੍ਤਿ ਉਦ੍ਧਂ ਖਿਤ੍ਤਂ ਕੁਠਾਰਿਂ. ਨਿਗ੍ਗਹੇਤੁਨ੍ਤਿ ਸਣ੍ਠਾਤੁਂ, ਨਿਵਤ੍ਤੇਤੁਂ ਵਾ. ਚਕ੍ਖੁਵਿਸਯਾਤੀਤੇਤਿ ਪਸਾਦਚਕ੍ਖੁਸ੍ਸ ਗੋਚਰਾਤਿਕ੍ਕਨ੍ਤੇ. ਮਹਾਰਾਜਸਨ੍ਤਿਕਾਤਿ ਵੇਸ੍ਸਵਣਮਹਾਰਾਜਸ੍ਸ ਸਨ੍ਤਿਕਾ. ਥਨਮੂਲੇਯੇਵਾਤਿ ਥਨਸਮੀਪੇਯੇਵ. ਹਿਮਵਨ੍ਤੇਤਿ ਹਿਮਉਗ੍ਗਿਰਣੇ ਵਨੇ, ਹਿਮਯੁਤ੍ਤੇ ਵਾ. ਤਤ੍ਥਾਤਿ ਹਿਮਵਨ੍ਤੇ, ਦੇਵਤਾਸਨ੍ਨਿਪਾਤੇ ਵਾ. ਰੁਕ੍ਖਧਮ੍ਮੋਤਿ ਰੁਕ੍ਖਸਭਾਵੋ. ਰੁਕ੍ਖਧਮ੍ਮੋ ਚ ਨਾਮ ਛੇਦਨਭੇਦਨਾਦੀਸੁ ਰੁਕ੍ਖਾਨਂ ਅਚੇਤਨਤ੍ਤਾ ਕੋਪਸ੍ਸ ਅਕਰਣਂ, ਤਸ੍ਮਿਂ ਰੁਕ੍ਖਧਮ੍ਮੇ ਠਿਤਾ ਦੇਵਤਾ ਰੁਕ੍ਖਧਮ੍ਮੇ ਠਿਤਾ ਨਾਮ, ਛੇਦਨਭੇਦਨਾਦੀਸੁ ਰੁਕ੍ਖਸ੍ਸ ਵਿਯ ਰੁਕ੍ਖਟ੍ਠਕਦੇਵਤਾਯ ਅਕੋਪਨਂ ਰੁਕ੍ਖਧਮ੍ਮੇ ਠਿਤਾ ਨਾਮਾਤਿ ਅਧਿਪ੍ਪਾਯੋ. ਤਤ੍ਥਾਤਿ ਤਾਸੁ ਸਨ੍ਨਿਪਾਤਦੇਵਤਾਸੁ. ਇਤੀਤਿ ਇਮਸ੍ਸ ਅਲਭਨਸ੍ਸ, ਇਮਸ੍ਮਿਂ ਅਲਭਨੇ ਵਾ, ਆਦੀਨਵਨ੍ਤਿ ਸਮ੍ਬਨ੍ਧੋ. ਭਗਵਤੋ ਚਾਤਿ ਚ-ਸਦ੍ਦੋ ‘‘ਪੁਬ੍ਬਚਰਿਤ’’ਨ੍ਤਿ ਏਤ੍ਥ ਯੋਜੇਤਬ੍ਬੋ. ਇਮਞ੍ਚ ਆਦੀਨਵਂ ਅਦ੍ਦਸ, ਭਗਵਤੋ ਪੁਬ੍ਬਚਰਿਤਞ੍ਚ ਅਨੁਸ੍ਸਰੀਤਿ ਵਾਕ੍ਯਸਮ੍ਪਿਣ੍ਡਨਵਸੇਨ ਯੋਜਨਾ ਕਾਤਬ੍ਬਾ. ਤੇਨਾਤਿ ਦਸ੍ਸਨਾਨੁਸ੍ਸਰਣਕਾਰਣੇਨ. ਅਸ੍ਸਾਤਿ ਦੇਵਤਾਯ. ਸਂਵਿਜ੍ਜਤਿ ਪਿਤਾ ਅਸ੍ਸਾਤਿ ਸਪਿਤਿਕੋ, ਪੁਤ੍ਤੋ. (ਤਾਵਾਤਿ ਅਤਿਵਿਯ, ਪਟਿਸਞ੍ਚਿਕ੍ਖਨ੍ਤਿਯਾਤਿ ਸਮ੍ਬਨ੍ਧੋ) ‘‘ਮਰਿਯਾਦਂ ਬਨ੍ਧਿਸ੍ਸਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਿਕ੍ਖਾਪਦਂ ਪਞ੍ਞਪੇਸ੍ਸਤੀ’’ਤਿ. ਇਤਿ ਪਟਿਸਞ੍ਚਿਕ੍ਖਨ੍ਤਿਯਾ ਅਸ੍ਸਾ ਦੇਵਤਾਯ ਏਤਦਹੋਸੀਤਿ ਯੋਜਨਾ.
ਯੋਤਿ ਯੋ ਕੋਚਿ ਜਨੋ. ਵੇਤਿ ਏਕਨ੍ਤੇਨ. ਉਪ੍ਪਤਿਤਨ੍ਤਿ ਉਪ੍ਪਜ੍ਜਨਵਸੇਨ ਅਤ੍ਤਨੋ ਉਪਰਿ ਪਤਿਤਂ. ਭਨ੍ਤਨ੍ਤਿ ਭਮਨ੍ਤਂ ਧਾਵਨ੍ਤਂ, ਵਾਰਯੇਤਿ ਨਿਵਾਰੇਯ੍ਯ ਨਿਗ੍ਗਣ੍ਹੇਯ੍ਯਾਤਿ ਅਤ੍ਥੋ. ਤਨ੍ਤਿ ਜਨਂ. ਅਯਂ ਪਨੇਤ੍ਥ ਯੋਜਨਾ – ਸਾਰਥਿ ਭਨ੍ਤਂ ਰਥਂ ਵਾਰਯੇ ਇਵ, ਤਥਾ ਯੋ ਵੇ ਉਪ੍ਪਤਿਤਂ ਕੋਧਂ ਵਾਰਯੇ, ਤਂ ਅਹਂ ਸਾਰਥਿਂ ਇਤਿ ਬ੍ਰੂਮਿ. ਇਤਰੋ ਕੋਧਨਿਵਾਰਕਤੋ ਅਞ੍ਞੋ ਰਾਜਉਪਰਾਜਾਦੀਨਂ ਸਾਰਥਿਭੂਤੋ ਜਨੋ ਰਸ੍ਮਿਗ੍ਗਾਹੋ ਰਜ੍ਜੁਗ੍ਗਾਹੋ ਨਾਮਾਤਿ.
ਦੁਤਿਯਗਾਥਾਯ ਵੇਜ੍ਜੋ ਵਿਸਟਂ ਵਿਤ੍ਥਤਂ ਸਪ੍ਪਵਿਸਂ ਸਪ੍ਪਸ੍ਸ ਆਸੀਵਿਸਸ੍ਸ ਵਿਸਂ ਗਰਲ਼ਂ ਓਸਧੇਹਿ ਭੇਸਜ੍ਜੇਨ, ਮਨ੍ਤੇਨ ਚ ਵਿਨੇਤਿ ਇਵ, ਤਥਾ ਯੋ ਭਿਕ੍ਖਵੇ ਉਪ੍ਪਤਿਤਂ ਕੋਧਂ ਮੇਤ੍ਤਾਯ ਵਿਨੇਤਿ, ਸੋ ਭਿਕ੍ਖੁ ਉਰਗੋ ਭੁਜਗੋ ਪੁਰਾਣਂ ਪੁਰੇ ਭਵਂ ਜਿਣ੍ਣਂ ਪੁਰਾਣਤ੍ਤਾ ਜਿਣ੍ਣਂ ਤਚਂ ਜਹਾਤਿ ਇਵ, ਤਥਾ ਓਰਪਾਰਂ ਅਪਾਰਸਙ੍ਖਾਤਂ ਪਞ੍ਚੋਰਮ੍ਭਾਗਿਯਸਂਯੋਜਨਂ ਜਹਾਤੀਤਿ ਯੋਜਨਾ ਕਾਤਬ੍ਬਾ.
ਤਤ੍ਰਾਤਿ ਦ੍ਵੀਸੁ ਗਾਥਾਸੁ. ਵਤ੍ਥੁ ਪਨ ਵਿਨਯੇ ਆਰੂਲ਼੍ਹਨ੍ਤਿ ਯੋਜਨਾ. ਅਥਾਤਿ ਪਚ੍ਛਾ. ਯਸ੍ਸ ਦੇਵਪੁਤ੍ਤਸ੍ਸਾਤਿ ਯੇਨ ਦੇਵਪੁਤ੍ਤੇਨ. ਪਰਿਗ੍ਗਹੋਤਿ ਪਰਿਚ੍ਛਿਨ੍ਦਿਤ੍ਵਾ ਗਹਿਤੋ. ਸੋਤਿ ਦੇਵਪੁਤ੍ਤੋ. ਤਤੋਤਿ ਉਪਗਮਨਤੋ. ਯਦਾ ਹੋਤਿ, ਤਦਾਤਿ ਯੋਜਨਾ. ਮਹੇਸਕ੍ਖਦੇਵਤਾਸੂਤਿ ਮਹਾਪਰਿਵਾਰਾਸੁ ਦੇਵਤਾਸੁ, ਮਹਾਤੇਜਾਸੁ ਵਾ. ਪਟਿਕ੍ਕਮਨ੍ਤੀਤਿ ਅਪੇਨ੍ਤਿ. ਦੇਵਤਾ ਯਮ੍ਪਿ ਪਞ੍ਹਂ ਪੁਚ੍ਛਨ੍ਤੀਤਿ ਯੋਜਨਾ. ਤਤ੍ਥੇਵਾਤਿ ਅਤ੍ਤਨੋ ਵਸਨਟ੍ਠਾਨੇਯੇਵ. ਉਪਟ੍ਠਾਨਨ੍ਤਿ ਉਪਟ੍ਠਾਨਤ੍ਥਾਯ, ਸਮ੍ਪਦਾਨਤ੍ਥੇ ਚੇਤਂ ਉਪਯੋਗਵਚਨਂ. ਅਥ ਵਾ ਉਪਗਨ੍ਤ੍ਵਾ ਤਿਟ੍ਠਤਿ ਏਤ੍ਥਾਤਿ ਉਪਟ੍ਠਾਨਂ, ਭਗਵਤੋ ਸਮੀਪਟ੍ਠਾਨਂ, ਤਂ ਆਗਨ੍ਤ੍ਵਾਤਿ ਅਤ੍ਥੋ. ਨਨ੍ਤਿ ਤਂ, ਅਯਮੇਵ ਵਾ ਪਾਠੋ.
੯੦. ‘‘ਭਵਨ੍ਤੀ’’ਤਿ ਇਮਿਨਾ ਵਿਰੂਲ਼੍ਹੇ ਮੂਲੇ ਨੀਲਭਾਵਂ ਆਪਜ੍ਜਿਤ੍ਵਾ ਵਡ੍ਢਮਾਨਕੇ ਤਰੁਣਰੁਕ੍ਖਗਚ੍ਛਾਦਿਕੇ ਦਸ੍ਸੇਤਿ. ‘‘ਅਹੁਵਤ੍ਥੁ’’ਨ੍ਤਿ ਇਮਿਨਾ ਪਨ ਵਡ੍ਢਿਤ੍ਵਾ ਠਿਤੇ ਮਹਨ੍ਤਰੁਕ੍ਖਗਚ੍ਛਾਦਿਕੇ ਦਸ੍ਸੇਤਿ. ‘‘ਅਹੁਵਤ੍ਥੁ’’ਨ੍ਤਿ ਚ ਹਿਯ੍ਯਤ੍ਤਨਿਸਙ੍ਖਾਤਾਯ ਤ੍ਥੁਂ-ਵਿਭਤ੍ਤਿਯਾ ਹੂ-ਧਾਤੁਸ੍ਸ ਊਕਾਰਸ੍ਸ ਉਵਾਦੇਸੋ ਹੋਤਿ. ਪੋਤ੍ਥਕੇਸੁ ਪਨ ‘‘ਅਹੁਵਤੀ’’ਤਿ ਪਾਠੋ ਦਿਸ੍ਸਤਿ, ਸੋ ਅਪਾਠੋਤਿ ਦਟ੍ਠਬ੍ਬੋ. ‘‘ਜਾਯਨ੍ਤੀ’’ਤਿ ਇਮਿਨਾ ਭੂ-ਧਾਤੁਸ੍ਸ ਸਤ੍ਤਤ੍ਥਭਾਵਂ ਦਸ੍ਸੇਤਿ, ‘‘ਵਡ੍ਢਨ੍ਤੀ’’ਤਿ ਇਮਿਨਾ ਵਡ੍ਢਨਤ੍ਥਭਾਵਂ. ਏਤਨ੍ਤਿ ‘‘ਭੂਤਗਾਮੋ’’ਤਿ ਨਾਮਂ. ਪੀਯਤੇ ਯਥਾਕਾਮਂ ਪਰਿਭੁਞ੍ਜੀਯਤੇ, ਪਾਤਬ੍ਬਂ ਪਰਿਭੁਞ੍ਜਿਤਬ੍ਬਨ੍ਤਿ ਵਾ ਪਾਤਬ੍ਯਂ, ਪਾਸਦ੍ਦੋ ਯਥਾਕਾਮਪਰਿਭੁਞ੍ਜਨਤ੍ਥੋ. ਤੇਨਾਹ – ‘‘ਛੇਦਨਭੇਦਨਾਦੀਹਿ ਯਥਾਰੁਚਿ ਪਰਿਭੁਞ੍ਜਿਤਬ੍ਬਤਾਤਿ ਅਤ੍ਥੋ’’ਤਿ.
੯੧. ‘‘ਇਦਾਨੀ’’ਤਿ ਪਦਂ ‘‘ਆਹਾ’’ਤਿ ਪਦੇ ਕਾਲਸਤ੍ਤਮੀ. ਯਸ੍ਮਿਨ੍ਤਿ ਬੀਜੇ. ਤਨ੍ਤਿ ਬੀਜਂ. ਪਞ੍ਚ ਬੀਜਜਾਤਾਨੀਤਿ ਏਤ੍ਥ ਜਾਤਸਦ੍ਦਸ੍ਸ ਤਬ੍ਭਾਵਤ੍ਥਤਂ ਸਨ੍ਧਾਯ ਅਟ੍ਠਕਥਾਸੁ ਏਵਂ ਵੁਤ੍ਤਂ. ਤਬ੍ਭਾਵਤ੍ਥਸ੍ਸ ‘‘ਮੂਲੇ ਜਾਯਨ੍ਤੀ’’ਤਿ ਇਮਾਯ ਪਾਲ਼ਿਯਾ ਅਸਂਸਨ੍ਦਨਤਂ ਸਨ੍ਧਾਯ ਵੁਤ੍ਤਂ ਸਙ੍ਗਹਕਾਰੇਨ ‘‘ਨ ਸਮੇਨ੍ਤੀ’’ਤਿ. ਅਟ੍ਠਕਥਾਚਰਿਯਾਨਂ ਮਤੇਨ ਸਤਿ ਜਾਤਸਦ੍ਦਸ੍ਸ ਤਬ੍ਭਾਵਤ੍ਥਭਾਵੇ ‘‘ਮੂਲੇ ਜਾਯਨ੍ਤੀ’’ਤਿਆਦੀਸੁ ਮੂਲੇ ਮੂਲਾਨਿ ਜਾਯਨ੍ਤੀਤਿ ਦੋਸੋ ਭਵੇਯ੍ਯਾਤਿ ਮਨਸਿ ਕਤ੍ਵਾ ਆਹ ‘‘ਨ ਹੀ’’ਤਿਆਦਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਾਨੀਤਿ ਰੁਕ੍ਖਾਦੀਨਿ. ਤਸ੍ਸਾਤਿ ‘‘ਭੂਤਗਾਮੋ ਨਾਮ ਪਞ੍ਚ ਬੀਜਜਾਤਾਨੀ’’ਤਿ ਪਦਸ੍ਸ. ਏਤਨ੍ਤਿ ‘‘ਬੀਜਜਾਤਾਨੀ’’ਤਿ ਨਾਮਂ. ਬੀਜੇਸੁ ਜਾਤਾਨਿ ਬੀਜਜਾਤਾਨੀਤਿ ਵੁਤ੍ਤੇ ‘‘ਮੂਲੇ ਜਾਯਨ੍ਤੀ’’ਤਿਆਦਿਨਾ ਸਮੇਤਿ. ਏਤੇਨਾਤਿ ‘‘ਬੀਜਤੋ’’ਤਿਆਦਿਨਾ ਸਙ੍ਗਹੋਤਿ ਸਮ੍ਬਨ੍ਧੋ.
‘‘ਯੇਹੀ’’ਤਿ ਪਦਂ ‘‘ਜਾਤਤ੍ਤਾ’’ਤਿ ਪਦੇ ਅਪਾਦਾਨਂ, ਹੇਤੁ ਵਾ ‘‘ਵੁਤ੍ਤਾਨੀ’’ਤਿ ਪਦੇ ਕਰਣਂ, ਕਤ੍ਤਾ ਵਾ. ਤੇਸਨ੍ਤਿ ਬੀਜਾਨਂ. ਰੁਕ੍ਖਾਦੀਨਂ ਵਿਰੁਹਨਂ ਜਨੇਤੀਤਿ ਬੀਜਂ. ‘‘ਬੀਜਤੋ’’ਤਿਆਦਿਨਾ ਕਾਰਿਯੋਪਚਾਰੇਨ ਕਾਰਣਸ੍ਸ ਦਸ੍ਸਿਤਤ੍ਤਾ ਕਾਰਣੂਪਚਾਰਂ ਪਦੀਪੇਤਿ. ਅਞ੍ਞਾਨਿਪਿ ਯਾਨਿ ਵਾ ਪਨ ਗਚ੍ਛਵਲ੍ਲਿਰੁਕ੍ਖਾਦੀਨਿ ਅਤ੍ਥਿ ਸਂਵਿਜ੍ਜਨ੍ਤਿ, ਤਾਨਿ ਗਚ੍ਛਵਲ੍ਲਿਰੁਕ੍ਖਾਦੀਨਿ ਜਾਯਨ੍ਤਿ ਸਞ੍ਜਾਯਨ੍ਤੀਤਿ ਯੋਜਨਾ. ਤਾਨੀਤਿ ਗਚ੍ਛਵਲ੍ਲਿਰੁਕ੍ਖਾਦੀਨਿ. ਤਞ੍ਚ ਮੂਲਂ, ਪਾਲ਼ਿਯਂ ਵੁਤ੍ਤਹਲਿਦ੍ਦਾਦਿ ਚ ਅਤ੍ਥਿ, ਸਬ੍ਬਮ੍ਪਿ ਏਤਂ ਮੂਲਬੀਜਂ ਨਾਮਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਬੀਜੇਸੁ, ਖਨ੍ਧਬੀਜੇਸੁ ਵਾ.
੯੨. ਸਞ੍ਞਾਵਸੇਨਾਤਿ ‘‘ਬੀਜ’’ਨ੍ਤਿ ਸਞ੍ਞਾਵਸੇਨ. ‘‘ਤਤ੍ਥਾ’’ਤਿ ਪਦਂ ‘‘ਵੇਦਿਤਬ੍ਬੋ’’ਤਿ ਪਦੇ ਆਧਾਰੋ. ‘‘ਯਥਾ’’ਤਿਆਦਿਨਾ ਕਾਰਣੋਪਚਾਰੇਨ ਕਾਰਿਯਸ੍ਸ ਵੁਤ੍ਤਤ੍ਤਾ ਫਲੂਪਚਾਰਂ ਦਸ੍ਸੇਤਿ. ਯਂ ਬੀਜਂ ਵੁਤ੍ਤਂ, ਤਂ ਦੁਕ੍ਕਟਵਤ੍ਥੂਤਿ ਯੋਜਨਾ. ਯਦੇਤਂ ਆਦਿਪਦਨ੍ਤਿ ਯੋਜੇਤਬ੍ਬਂ. ਤੇਨਾਤਿ ਆਦਿਪਦੇਨ. ਰਵੀਯਤਿ ਭਗਵਤਾ ਕਥੀਯਤੀਤਿ ਰੁਤਂ, ਪਾਲ਼ਿ, ਤਸ੍ਸ ਅਨੁਰੂਪਂ ਯਥਾਰੁਤਂ, ਪਾਲ਼ਿਅਨਤਿਕ੍ਕਨ੍ਤਨ੍ਤਿ ਅਤ੍ਥੋ.
ਏਤ੍ਥਾਤਿ ‘‘ਬੀਜੇ ਬੀਜਸਞ੍ਞੀ’’ਤਿਆਦਿਪਦੇ, ਇਮਸ੍ਮਿਂ ਸਿਕ੍ਖਾਪਦੇ ਵਾ. ਉਦਕੇ ਠਾਤਿ ਪਵਤ੍ਤਤੀਤਿ ਉਦਕਟ੍ਠੋ, ਏਵਂ ਥਲਟ੍ਠੋਪਿ. ਤਤ੍ਥਾਤਿ ਉਦਕਟ੍ਠਥਲਟ੍ਠੇਸੁ. ਸਾਸਪਸ੍ਸ ਮਤ੍ਤਂ ਪਮਾਣਂ ਅਸ੍ਸ ਸੇਵਾਲਸ੍ਸਾਤਿ ਸਾਸਪਮਤ੍ਤਿਕੋ. ਤਿਲਸ੍ਸ ਬੀਜਪਮਾਣਂ ਅਸ੍ਸ ਸੇਵਾਲਸ੍ਸਾਤਿ ਤਿਲਬੀਜਕੋ. ਪਮਾਣਤ੍ਥੇ ਕੋ. ਆਦਿਸਦ੍ਦੇਨ ਸਙ੍ਖਪਣਕਾਦਯੋ ਸੇਵਾਲੇ ਸਙ੍ਗਣ੍ਹਾਤਿ. ਤਤ੍ਥ ਤਿਲਬੀਜਪਮਾਣੋ ਜਲਸਣ੍ਠਿਤੋ ਨੀਲਾਦਿਵਣ੍ਣਯੁਤ੍ਤੋ ਸੇਵਾਲੋ ਤਿਲਬੀਜਂ ਨਾਮ, ਸਪਤ੍ਤੋ ਅਪ੍ਪਕਣ੍ਡੋ ਉਕ੍ਖਲਿਪਿਧਾਨਾਦਿਪਮਾਣੋ ਸਮੂਲੋ ਏਕੋ ਸੇਵਾਲਵਿਸੇਸੋ ਸਙ੍ਖੋ ਨਾਮ, ਭਮਰਸਣ੍ਠਾਨੋ ਨੀਲਵਣ੍ਣੋ ਏਕੋ ਸੇਵਾਲਵਿਸੇਸੋ ਪਣਕੋ ਨਾਮ. ਉਦਕਂ ਸੇਵਤੀਤਿ ਸੇਵਾਲੋ. ਤਤ੍ਥਾਤਿ ਸੇਵਾਲੇਸੁ. ਯੋਤਿ ਸੇਵਾਲੋ. ਪਤਿਟ੍ਠਿਤਂ ਸੇਵਾਲਨ੍ਤਿ ਸਮ੍ਬਨ੍ਧੋ. ਯਤ੍ਥ ਕਤ੍ਥਚੀਤਿ ਮੂਲੇ ਵਾ ਨਲ਼ੇ ਵਾ ਪਤ੍ਤੇ ਵਾ. ਉਦ੍ਧਰਿਤ੍ਵਾਤਿ ਉਪ੍ਪਾਟੇਤ੍ਵਾ. ‘‘ਹਤ੍ਥੇਹੀ’’ਤਿ ਪਦਂ ‘‘ਵਿਯੂਹਿਤ੍ਵਾ’’ਤਿ ਪਦੇ ਕਰਣਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਸ੍ਸਾਤਿ ਸੇਵਾਲਸ੍ਸ. ਏਤ੍ਤਾਵਤਾਤਿ ਇਤੋ ਚਿਤੋ ਚ ਵਿਯੂਹਨਮਤ੍ਤੇਨ. ਯੋ ਸੇਵਾਲੋ ਨਿਕ੍ਖਮਤਿ, ਤਂ ਸੇਵਾਲਨ੍ਤਿ ਯੋਜਨਾ. ਪਰਿਸ੍ਸਾਵਨਨ੍ਤਰੇਨਾਤਿ ਪਰਿਸ੍ਸਾਵਨਛਿਦ੍ਦੇਨ. ਉਪ੍ਪਲਾਨਿ ਅਸ੍ਮਿਂ ਗਚ੍ਛੇਤਿ ਉਪ੍ਪਲਿਨੀ. ਪਦੁਮਾਨਿ ਅਸ੍ਮਿਂ ਗਚ੍ਛੇਤਿ ਪਦੁਮਿਨੀ, ਇਨੋ, ਇਤ੍ਥਿਲਿਙ੍ਗਜੋਤਕੋ ਈ. ਤਤ੍ਥੇਵਾਤਿ ਉਦਕੇਯੇਵ. ਤਾਨੀਤਿ ਵਲ੍ਲੀਤਿਣਾਨਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਅਨਨ੍ਤਕੋਤਿ ਸਾਸਪਮਤ੍ਤਿਕੋ ਸੇਵਾਲੋ. ਸੋ ਹਿ ਨਤ੍ਥਿ ਅਤ੍ਤਤੋ ਅਨ੍ਤੋ ਲਾਮਕੋ ਸੇਵਾਲੋ ਏਤਸ੍ਸਾਤਿ ਕਤ੍ਵਾ ‘‘ਅਨਨ੍ਤਕੋ’’ਤਿ ਵੁਚ੍ਚਤਿ. ਅਤ੍ਤਨਾਯੇਵ ਹਿ ਸੁਖੁਮੋ, ਤਤੋ ਸੁਖੁਮੋ ਸੇਵਾਲੋ ਨਤ੍ਥੀਤਿ ਅਧਿਪ੍ਪਾਯੋ. ਤਤ੍ਥਾਤਿ ਦੁਕ੍ਕਟਵਤ੍ਥੁਭਾਵੇ. ਤਮ੍ਪੀਤਿ ‘‘ਸਮ੍ਪੁਣ੍ਣਭੂਤਗਾਮਂ ਨ ਹੋਤੀ’’ਤਿ ਵਚਨਮ੍ਪਿ. ਪਿਸਦ੍ਦੋ ਮਹਾਪਚ੍ਚਰਿਆਦਿਅਟ੍ਠਕਥਾਚਰਿਯਾਨਂ ਵਚਨਾਪੇਕ੍ਖੋ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਨ ਆਗਤੋ, ਤਸ੍ਮਾ ਨ ਸਮੇਤੀਤਿ ਯੋਜਨਾ. ਅਥਾਤਿ ਤਸ੍ਮਿਂ ਅਨਾਗਤੇ. ਏਤਨ੍ਤਿ ਅਨਨ੍ਤਕਸੇਵਾਲਾਦਿਂ. ਗਚ੍ਛਿਸ੍ਸਤੀਤਿ ਵਦੇਯ੍ਯਾਤਿ ਸਮ੍ਬਨ੍ਧੋ. ਤਮ੍ਪੀਤਿ ‘‘ਗਚ੍ਛਿਸ੍ਸਤੀ’’ਤਿ ਵਚਨਮ੍ਪਿ. ਪਿਸਦ੍ਦੋ ਪੁਰਿਮਟ੍ਠਕਥਾਚਰਿਯਾਨਂ ਵਚਨਾਪੇਕ੍ਖੋ.
ਅਭੂਤਗਾਮਮੂਲਤ੍ਤਾ ਤਾਦਿਸਸ੍ਸ ਬੀਜਗਾਮਸ੍ਸਾਤਿ ਏਤ੍ਥ ਬੀਜਗਾਮੋ ਤਿਵਿਧੋ ਹੋਤਿ – ਯੋ ਸਯਂ ਭੂਤਗਾਮਤੋ ਹੁਤ੍ਵਾ ਅਞ੍ਞਮ੍ਪਿ ਭੂਤਗਾਮਂ ਜਨੇਤਿ, ਅਮ੍ਬਟ੍ਠਿਆਦਿਕੋ. ਯੋ ਪਨ ਸਯਂ ਭੂਤਗਾਮਤੋ ਹੁਤ੍ਵਾ ਅਞ੍ਞਂ ਪਨ ਭੂਤਗਾਮਂ ਨ ਜਨੇਤਿ, ਤਾਲਨਾਲ਼ਿਕੇਰਾਦਿਖਾਣੁ. ਯੋ ਪਨ ਸਯਮ੍ਪਿ ਭੂਤਗਾਮਤੋ ਅਹੁਤ੍ਵਾ ਅਞ੍ਞਮ੍ਪਿ ਭੂਤਗਾਮਂ ਨ ਜਨੇਤਿ. ਪਾਨੀਯਘਟਾਦੀਨਂ ਬਹਿ ਸੇਵਾਲੋਤਿ. ਭੂਤਗਾਮੋ ਪਨ ਚਤੁਬ੍ਬਿਧੋ ਹੋਤਿ – ਯੋ ਸਯਂ ਬੀਜਗਾਮਤੋ ਹੁਤ੍ਵਾ ਅਞ੍ਞਮ੍ਪਿ ਬੀਜਗਾਮਂ ਜਨੇਤਿ, ਏਤਰਹਿ ਅਮ੍ਬਰੁਕ੍ਖਾਦਿਕੋ. ਯੋ ਪਨ ਸਯਂ ਬੀਜਗਾਮਤੋ ਅਹੁਤ੍ਵਾਵ ਅਞ੍ਞਂ ਬੀਜਗਾਮਂ ਜਨੇਤਿ, ਆਦਿਕਪ੍ਪਕਾਲੇ ਅਮ੍ਬਰੁਕ੍ਖਾਦਿਕੋ. ਯੋ ਪਨ ਸਯਂ ਬੀਜਗਾਮਤੋ ਹੁਤ੍ਵਾ ਅਞ੍ਞਂ ਪਨ ਬੀਜਗਾਮਂ ਨ ਜਨੇਤਿ, ਨੀਲਵਣ੍ਣੋ ਫਲਿਤਕਦਲੀਰੁਕ੍ਖਾਦਿਕੋ. ਯੋ ਪਨ ਸਯਮ੍ਪਿ ਬੀਜਗਾਮਤੋ ਅਹੁਤ੍ਵਾ ਅਞ੍ਞਮ੍ਪਿ ਬੀਜਗਾਮਂ ਨ ਜਨੇਤਿ, ਇਧ ਵੁਤ੍ਤੋ ਅਨਨ੍ਤਕਸੇਵਾਲਾਦਿਕੋਤਿ. ਤਤ੍ਥ ਚਤੁਤ੍ਥਂ ਭੂਤਗਾਮਂ ਸਨ੍ਧਾਯ ਵੁਤ੍ਤਂ ‘‘ਅਭੂਤਗਾਮਮੂਲਕਤ੍ਤਾ ਤਾਦਿਸਸ੍ਸ ਬੀਜਸ੍ਸਾ’’ਤਿ. ਅਯਂ ਪਨ ਤਤਿਯਬੀਜਗਾਮਸ੍ਸ ਚ ਚਤੁਤ੍ਥਭੂਤਗਾਮਸ੍ਸ ਚ ਵਿਸੇਸੋ – ਤਤਿਯਬੀਜਗਾਮੇ ਮੂਲਪਣ੍ਣਾਨਿ ਨ ਪਞ੍ਞਾਯਨ੍ਤਿ, ਚਤੁਤ੍ਥਭੂਤਗਾਮੇ ਤਾਨਿ ਪਞ੍ਞਾਯਨ੍ਤੀਤਿ. ਮੂਲਪਣ੍ਣਾਨਂ ਅਪਞ੍ਞਾਯਨਤ੍ਤਾ ਬੀਜਗਾਮੋਤਿ ਵੁਤ੍ਤੋ, ਤੇਸਂ ਪਞ੍ਞਾਯਨਤ੍ਤਾ ਭੂਤਗਾਮੋਤਿ ਵੁਤ੍ਤੋ. ਇਤਰਥਾ ਹਿ ਵਿਰੋਧੋ ਭਵੇਯ੍ਯਾਤਿ. ਅਤ੍ਤਨੋ ਵਾਦੇ ਪਾਚਿਤ੍ਤਿਯਭਾਵਤੋ ਗਰੁਕਂ, ਮਹਾਪਚ੍ਚਰਿਆਦੀਨਂ ਵਾਦੇ ਦੁਕ੍ਕਟਮਤ੍ਤਭਾਵਤੋ ਲਹੁਕਂ. ਏਤਨ੍ਤਿ ਠਾਨਂ.
ਏਵਂ ਉਦਕਟ੍ਠਂ ਦਸ੍ਸੇਤ੍ਵਾ ਥਲਟ੍ਠਂ ਦਸ੍ਸੇਨ੍ਤੋ ਆਹ ‘‘ਥਲਟ੍ਠੇ’’ਤਿਆਦਿ. ਥਲਟ੍ਠੇ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਤ੍ਥਾਤਿ ਹਰਿਤਖਾਣੂਸੁ. ਉਦ੍ਧਂ ਵਡ੍ਢਤੀਤਿ ਨਵਸਾਖਾਨਿਗ੍ਗਮਨੇਨ ਛਿਨ੍ਨਤੋ ਉਪਰਿ ਵਡ੍ਢਤਿ. ਸੋਤਿ ਖਾਣੁ. ਫਲਿਤਾਯ ਕਦਲਿਯਾ ਖਾਣੁ ਬੀਜਗਾਮੇਨ ਸਙ੍ਗਹਿਤੋਤਿ ਯੋਜਨਾ. ਫਲਂ ਸਞ੍ਜਾਤਂ ਏਤਿਸ੍ਸਾਤਿ ਫਲਿਤਾ. ਤਥਾਤਿ ‘‘ਭੂਤਗਾਮੇਨੇਵ ਸਙ੍ਗਹਿਤਾ’’ਤਿ ਪਦਾਨਿ ਆਕਡ੍ਢਤਿ. ਯਦਾਤਿ ਯਸ੍ਮਿਂ ਕਾਲੇ. ਰਤਨਪ੍ਪਮਾਣਾਪੀਤਿ ਹਤ੍ਥਪ੍ਪਮਾਣਾਪਿ. ਅਥਾਤਿ ਅਪਾਦਾਨਤ੍ਥੋ, ਤਤੋ ਰਾਸਿਕਰਣਤੋ ਅਞ੍ਞਨ੍ਤਿ ਅਤ੍ਥੋ. ਭੂਮਿਯਂ ਨਿਖਣਨ੍ਤੀਤਿ ਸਮ੍ਬਨ੍ਧੋ. ‘‘ਮੂਲੇਸੁ ਚੇਵ ਪਣ੍ਣੇਸੁ ਚਾ’’ਤਿ ਏਤ੍ਥ ਚਸਦ੍ਦੋ ਸਮੁਚ੍ਚਯਤ੍ਥੋਵ, ਨ ਵਿਕਪ੍ਪਤ੍ਥੋਤਿ ਆਹ ‘‘ਮੂਲਮਤ੍ਤੇਸੁ ਪਨਾ’’ਤਿਆਦਿ.
ਬੀਜਾਨੀਤਿ ਮੂਲਾਦਿਬੀਜਾਨਿ. ਠਪਿਤਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ‘‘ਉਪਰੀ’’ਤਿ ਪਦੇਨ ਹੇਟ੍ਠਾ ਮੂਲਾਨਿ ਚਾਤਿ ਅਤ੍ਥਂ ਨਯੇਨ ਞਾਪੇਤਿ. ਨ ਅਙ੍ਕੁਰੇ ਨਿਗ੍ਗਤਮਤ੍ਤੇਯੇਵ, ਅਥ ਖੋ ਹਰਿਤੇ ਨੀਲਪਣ੍ਣਵਣ੍ਣੇ ਜਾਤੇਯੇਵ ਭੂਤਗਾਮਸਙ੍ਗਹੋ ਕਾਤਬ੍ਬੋਤਿ ਆਹ ‘‘ਹਰਿਤੇ’’ਤਿਆਦਿ. ਤਾਲਟ੍ਠੀਨਂ ਮੂਲਨ੍ਤਿ ਸਮ੍ਬਨ੍ਧੋ. ਦਨ੍ਤਸੂਚਿ ਵਿਯਾਤਿ ਹਤ੍ਥਿਦਨ੍ਤਸੂਚਿ ਵਿਯ. ਯਥਾ ਅਸਮ੍ਪੁਣ੍ਣਭੂਤਗਾਮੋ ਤਤਿਯੋ ਕੋਟ੍ਠਾਸੋ ਨ ਆਗਤੋ, ਨ ਏਵਂ ਅਮੂਲਕਭੂਤਗਾਮੋ. ਸੋ ਪਨ ਆਗਤੋਯੇਵਾਤਿ ਆਹ ‘‘ਅਮੂਲਕਭੂਤਗਾਮੇ’’ਤਿ. ਅਮੂਲਿਕਲਤਾ ਵਿਯ ਅਮੂਲਕਭੂਤਗਾਮੇ ਸਙ੍ਗਹਂ ਗਚ੍ਛਤੀਤਿ ਅਤ੍ਥੋ.
ਵਨ੍ਦਾਕਾਤਿ ਰੁਕ੍ਖਾਦਨੀ. ਸਾ ਹਿ ਸਯਂ ਰੁਕ੍ਖਂ ਨਿਸ੍ਸਾਯ ਜਾਯਨ੍ਤੀਪਿ ਅਤ੍ਤਨੋ ਨਿਸ੍ਸਯਾਨਂ ਰੁਕ੍ਖਾਨਂ ਅਦਨਤ੍ਤਾ ਭਕ੍ਖਨਤ੍ਤਾ ਵਦੀਯਤਿ ਥੁਤੀਯਤੀਤਿ ‘‘ਵਨ੍ਦਾਕਾ’’ਤਿ ਵੁਚ੍ਚਤਿ. ਅਞ੍ਞਾ ਵਾਤਿ ਵਨ੍ਦਾਕਾਯ ਅਞ੍ਞਾ ਵਾ. ਤਨ੍ਤਿ ਵਨ੍ਦਾਕਾਦਿਂ. ਤਤੋਤਿ ਰੁਕ੍ਖਤੋ. ਵਨਨ੍ਤਿ ਖੁਦ੍ਦਕੋ ਗਚ੍ਛੋ. ਪਗੁਮ੍ਬੋਤਿ ਮਹਾਗਚ੍ਛੋ. ਦਣ੍ਡਕੋਤਿ ਰੁਕ੍ਖੋ ਦਣ੍ਡਯੋਗਤੋ. ਤਸ੍ਸਾਪੀਤਿ ਅਮੂਲਿਕਲਤਾਯਪਿ. ਅਯਮੇਵ ਵਿਨਿਚ੍ਛਯੋਤਿ ਵਨ੍ਦਾਕਾਦਿਕਸ੍ਸ ਵਿਨਿਚ੍ਛਯੋ ਵਿਯ ਅਯਂ ਵਿਨਿਚ੍ਛਯੋ ਦਟ੍ਠਬ੍ਬੋਤਿ ਯੋਜਨਾ. ‘‘ਦ੍ਵੇ ਤੀਣਿ ਪਤ੍ਤਾਨੀ’’ਤਿ ਵੁਤ੍ਤਤ੍ਤਾ ਏਕਪਤ੍ਤੋ ਸਞ੍ਜਾਯਨ੍ਤੋਪਿ ਅਗ੍ਗਬੀਜਸਙ੍ਗਹਂ ਗਚ੍ਛਤੀਤਿ ਅਤ੍ਥੋ. ‘‘ਅਨੁਪਸਮ੍ਪਨ੍ਨੇਨਾ’’ਤਿ ਪਦਂ ‘‘ਲਿਤ੍ਤਸ੍ਸਾ’’ਤਿ ਪਦੇ ਕਤ੍ਤਾ. ਨਿਦਾਘਸਮਯੇਤਿ ਗਿਮ੍ਹਕਾਲੇ. ਅਬ੍ਬੋਹਾਰਿਕੋਤਿ ਆਪਤ੍ਤਿਯਾ ਅਙ੍ਗਨ੍ਤਿ ਨ ਵੋਹਰਿਤਬ੍ਬੋ. ਵੋਹਰਿਤੁਂ ਨ ਅਰਹਤੀਤਿ ਅਤ੍ਥੋ. ਏਤਨ੍ਤਿ ਅਬ੍ਬੋਹਾਰਿਕਤਂ, ‘‘ਸਚੇ…ਪੇ… ਪਮਜ੍ਜਿਤਬ੍ਬਾ’’ਤਿ ਵਚਨਂ ਵਾ.
ਅਹਿਂ ਸਪ੍ਪਂ ਛਾਦੇਤੀਤਿ ਅਹਿਚ੍ਛਤ੍ਤਂ, ਤਂਯੇਵ ਅਹਿਚ੍ਛਤ੍ਤਕਂ. ਯਥਾਕਥਞ੍ਚਿ ਹਿ ਬ੍ਯੁਪ੍ਪਤ੍ਤਿ, ਰੁਲ਼੍ਹਿਯਾ ਅਤ੍ਥਵਿਨਿਚ੍ਛਯੋ. ਤਸ੍ਮਾਤਿ ਤਤੋ ਵਿਕੋਪਨਤੋ. ਤਤ੍ਥਾਤਿ ਅਹਿਚ੍ਛਤ੍ਤਕੇ. ਹੇਟ੍ਠਾ ‘‘ਉਦਕਪਪ੍ਪਟਕੋ’’ਤਿ ਵਤ੍ਵਾ ਇਧ ‘‘ਰੁਕ੍ਖਪਪ੍ਪਟਿਕਾਯਪੀ’’ਤਿ ਵੁਤ੍ਤਤ੍ਤਾ ਪਪ੍ਪਟਕਸਦ੍ਦੋ ਦ੍ਵਿਲਿਙ੍ਗੋਤਿ ਦਟ੍ਠਬ੍ਬੋ. ਤਨ੍ਤਿ ਪਪ੍ਪਟਿਕਂ. ਠਿਤਂ ਨਿਯ੍ਯਾਸਨ੍ਤਿ ਸਮ੍ਬਨ੍ਧੋ. ਏਵਂ ‘‘ਲਗ੍ਗ’’ਨ੍ਤਿ ਏਤ੍ਥਾਪਿ. ਹਤ੍ਥਕੁਕ੍ਕੁਚ੍ਚੇਨਾਤਿ ਹਤ੍ਥਲੋਲੇਨ. ‘‘ਛਿਨ੍ਦਨ੍ਤਸ੍ਸਾਪੀ’’ਤਿ ਪਦੇ ਹੇਤੁ.
ਵਾਸਤ੍ਥਿਕੇਨਾਤਿ ਵਾਸਂ ਇਚ੍ਛਨ੍ਤੇਨ. ‘‘ਓਚਿਨਾਪੇਤਬ੍ਬਾ’’ਤਿ ਪਦੇ ਕਤ੍ਤਾ. ਉਪ੍ਪਾਟੇਨ੍ਤੇਹੀਤਿ ਉਦ੍ਧਰਨ੍ਤੇਹਿ. ਤੇਸਨ੍ਤਿ ਸਾਮਣੇਰਾਨਂ. ਸਾਖਂ ਗਹਿਤਨ੍ਤਿ ਸਮ੍ਬਨ੍ਧੋ. ਠਪਿਤਸ੍ਸ ਸਿਙ੍ਗੀਵੇਰਸ੍ਸਾਤਿ ਯੋਜਨਾ.
ਛਿਜ੍ਜਨਕਨ੍ਤਿ ਛਿਜ੍ਜਨਯੁਤ੍ਤਂ, ਛਿਜ੍ਜਨਾਰਹਨ੍ਤਿ ਅਤ੍ਥੋ. ‘‘ਚਙ੍ਕਮਿਤਟ੍ਠਾਨਂ ਦਸ੍ਸੇਸ੍ਸਾਮੀ’’ਤਿ ਇਮਿਨਾ ਵਤ੍ਤਸੀਸੇਨ ਚਙ੍ਕਮਨਂ ਵਟ੍ਟਤੀਤਿ ਦਸ੍ਸੇਤਿ. ‘‘ਭਿਜ੍ਜਤੀ’’ਤਿ ਇਮਿਨਾ ਅਭਿਜ੍ਜਮਾਨੇ ਗਣ੍ਠਿਪਿ ਕਾਤਬ੍ਬੋਤਿ ਦਸ੍ਸੇਤਿ. ਦਾਰੁਮਕ੍ਕਟਕਨ੍ਤਿ ਮਕ੍ਕਟਸ੍ਸ ਹਤ੍ਥੋ ਮਕ੍ਕਟੋ ਉਪਚਾਰੇਨ, ਮਕ੍ਕਟੋ ਵਿਯਾਤਿ ਮਕ੍ਕਟਕੋ, ਸਦਿਸਤ੍ਥੇ ਕੋ. ਦਾਰੁਸਙ੍ਖਾਤੋ ਮਕ੍ਕਟਕੋ ਦਾਰੁਮਕ੍ਕਟਕੋ. ਤਂ ਆਕੋਟੇਨ੍ਤੀਤਿ ਸਮ੍ਬਨ੍ਧੋ. ਅਨਿਯਾਮਿਤਤ੍ਤਾਤਿ ਇਮਨ੍ਤਿ ਅਨਿਯਾਮਿਤਤ੍ਤਾ ਵਚਨਸ੍ਸ. ਇਦਂ ਮਹਾਸਾਮਞ੍ਞਂ, ਵਿਸੇਸਸਾਮਞ੍ਞਮ੍ਪਿ ਵਟ੍ਟਤੀਤਿ ਆਹ ‘‘ਨਾਮਂ ਗਹੇਤ੍ਵਾਪੀ’’ਤਿਆਦਿ. ਸਬ੍ਬਨ੍ਤਿ ਸਬ੍ਬਂ ਵਚਨਂ.
‘‘ਇਮਂ ਜਾਨਾਤਿਆਦੀਸੂ’’ਤਿ ਪਦਂ ‘‘ਏਵਮਤ੍ਥੋ ਦਟ੍ਠਬ੍ਬੋ’’ਤਿ ਪਦੇ ਆਧਾਰੋ. ਇਮਂ ਮੂਲਭੇਸਜ੍ਜਂ ਜਾਨਾਤਿ ਇਮਂ ਮੂਲਭੇਸਜ੍ਜਂ ਯੋਜਿਤੁਂ ਜਾਨਾਤਿ ਯੋਜਨਾ. ਏਤ੍ਤਾਵਤਾਤਿ ‘‘ਇਮਂ ਜਾਨਾ’’ਤਿਆਦਿਵਚਨਮਤ੍ਤੇਨ. ਕਪ੍ਪਿਯਨ੍ਤਿ ਸਮਣਵੋਹਾਰੇਨ, ਵੋਹਾਰਸ੍ਸ ਵਾ ਯੁਤ੍ਤਂ ਅਨੁਰੂਪਂ. ਏਤ੍ਥਾਤਿ ‘‘ਕਪ੍ਪਿਯਂ ਕਾਤਬ੍ਬ’’ਨ੍ਤਿ ਵਚਨੇ. ਨਿਬ੍ਬਟ੍ਟਬੀਜਮੇਵਾਤਿ ਫਲਤੋ ਨਿਬ੍ਬਟ੍ਟੇਤ੍ਵਾ ਵਿਸੁਂ ਕਤਂ ਬੀਜਂ ਏਵ. ਤਤ੍ਥਾਤਿ ਸੁਤ੍ਤੇ. ਕਰੋਨ੍ਤੇਨ ਭਿਕ੍ਖੁਨਾ ਕਾਤਬ੍ਬਨ੍ਤਿ ਯੋਜਨਾ. ‘‘ਕਪ੍ਪਿਯਨ੍ਤਿ ਵਤ੍ਵਾਵਾ’’ਤਿ ਇਮਿਨਾ ਪਠਮਂ ਕਤ੍ਵਾ ਅਗ੍ਗਿਸਤ੍ਥਨਖਾਨਿ ਉਦ੍ਧਰਿਤ੍ਵਾ ਪਚ੍ਛਾ ਵਤ੍ਤੁਂ ਨ ਵਟ੍ਟਤੀਤਿ ਦਸ੍ਸੇਤਿ. ਲੋਹਮਯਸਤ੍ਥਸ੍ਸਾਤਿ ਅਯਤਮ੍ਬਾਦਿਲੋਹਮਯਸ੍ਸ ਸਤ੍ਥਸ੍ਸ. ਤੇਹੀਤਿ ਮਨੁਸ੍ਸਾਦੀਨਂ ਨਖੇਹਿ. ਤੇਹੀਤਿ ਅਸ੍ਸਾਦੀਨਂ ਖੁਰੇਹਿ. ਤੇਹੀਤਿ ਹਤ੍ਥਿਨਖੇਹਿ. ਯੇਹੀਤਿ ਨਖੇਹਿ. ਤਤ੍ਥਜਾਤਕੇਹਿਪੀਤਿ ਤਸ੍ਮਿਂ ਸਤ੍ਥੇ ਜਾਤਕੇਹਿਪਿ, ਨਖੇਹੀਤਿ ਸਮ੍ਬਨ੍ਧੋ.
ਤਤ੍ਥਾਤਿ ਪੁਰਿਮਵਚਨਾਪੇਕ੍ਖਂ. ‘‘ਕਪ੍ਪਿਯਂ ਕਰੋਨ੍ਤੇਨਾ’’ਤਿਆਦਿਵਚਨਮਪੇਕ੍ਖਤਿ. ‘‘ਉਚ੍ਛੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਉਚ੍ਛੁਮੇਵ ਵਿਜ੍ਝਤਿ, ਪਗੇਵ. ‘‘ਦਾਰੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਉਚ੍ਛੁਂ ਵਿਜ੍ਝਤਿ, ‘‘ਦਾਰੁਂ ਕਪ੍ਪਿਯਂ ਕਰਿਸ੍ਸਾਮੀ’’ਤਿ ਦਾਰੁਮੇਵ ਵਾ ਵਿਜ੍ਝਤਿ, ਵਟ੍ਟਤਿ ਏਕਾਬਦ੍ਧਤ੍ਤਾਤਿ ਵਦਨ੍ਤਿ. ਤਨ੍ਤਿ ਰਜ੍ਜੁਂ ਵਾ ਵਲ੍ਲਿਂ ਵਾ. ਸਬ੍ਬਂ ਖਣ੍ਡਨ੍ਤਿ ਸਮ੍ਬਨ੍ਧੋ. ਤਤ੍ਥਾਤਿ ਮਰਿਚਪਕ੍ਕੇਸੁ. ਕਟਾਹਨ੍ਤਿ ਏਕਾਯ ਭਾਜਨਵਿਕਤਿਯਾ ਨਾਮਮੇਤਂ. ਇਧ ਪਨ ਬੀਜਾਨਂ ਭਾਜਨਭਾਵੇਨ ਤਂਸਦਿਸਤ੍ਤਾ ਫਲਫੇਗ੍ਗੁਪਿ ‘‘ਕਟਾਹ’’ਨ੍ਤਿ ਵੁਚ੍ਚਤਿ. ਏਕਾਬਦ੍ਧਨ੍ਤਿ ਕਟਾਹੇਨ ਏਕਤੋ ਆਬਦ੍ਧਂ.
ਤਾਨੀਤਿ ਤਿਣਾਨਿ. ਤੇਨਾਤਿ ਰੁਕ੍ਖਪਵਟ੍ਟਨਾਦਿਨਾ. ਤਤ੍ਰਾਤਿ ਤਸ੍ਮਿਂ ਠਪਨਪਾਤਨਟ੍ਠਾਨੇ. ‘‘ਮਨੁਸ੍ਸਵਿਗ੍ਗਹਪਾਰਾਜਿਕਵਣ੍ਣਨਾਯ’’ਨ੍ਤਿ ਪਦਂ ‘‘ਵੁਤ੍ਤ’’ਨ੍ਤਿ ਪਦੇ ਸਾਮਞ੍ਞਾਧਾਰੋ. ਭਿਕ੍ਖੁ ਅਜ੍ਝੋਤ੍ਥਟੋ ਹੋਤੀਤਿ ਸਮ੍ਬਨ੍ਧੋ. ਓਪਾਤੇਤਿ ਆਵਾਟੇ. ਸੋ ਹਿ ਅਵਪਤਨਟ੍ਠਾਨਤ੍ਤਾ ‘‘ਓਪਾਤੋ’’ਤਿ ਵੁਚ੍ਚਤਿ. ਰੁਕ੍ਖਨ੍ਤਿ ਅਜ੍ਝੋਤ੍ਥਟਰੁਕ੍ਖਂ. ਭੂਮਿਨ੍ਤਿ ਓਪਾਤਥਿਰਭੂਮਿਂ. ਜੀਵਿਤਹੇਤੂਤਿ ਨਿਮਿਤ੍ਤਤ੍ਥੇ ਪਚ੍ਚਤ੍ਤਵਚਨਂ, ਜੀਵਿਤਕਾਰਣਾਤਿ ਅਤ੍ਥੋ. ‘‘ਭਿਕ੍ਖੁਨਾ’’ਤਿ ਪਦਂ ‘‘ਨਿਕ੍ਖਾਮੇਤੁ’’ਨ੍ਤਿ ਪਦੇ ਭਾਵਕਤ੍ਤਾ, ਕਾਰਿਤਕਤ੍ਤਾ ਵਾ. ‘‘ਅਜ੍ਝੋਤ੍ਥਟਭਿਕ੍ਖੁ’’ਨ੍ਤਿ ਵਾ ‘‘ਓਪਾਤਭਿਕ੍ਖੁ’’ਨ੍ਤਿ ਵਾ ਕਾਰਿਤਕਮ੍ਮਂ ਅਜ੍ਝਾਹਰਿਤਬ੍ਬਂ. ਤਤ੍ਥਾਤਿ ਅਨਾਪਤ੍ਤਿਭਾਵੇ, ਅਨਾਪਤ੍ਤਿਭਾਵਸ੍ਸ ਵਾ. ਏਤਸ੍ਸਾਤਿ ਸੁਤ੍ਤਸ੍ਸ. ਪਰੋ ਪਨ ਕਾਰੁਞ੍ਞੇਨ ਕਰੋਤੀਤਿ ਸਮ੍ਬਨ੍ਧੋ. ਏਤਮ੍ਪੀਤਿ ਕਾਰੁਞ੍ਞਮ੍ਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾਤਿ. ਪਠਮਂ.
੨. ਅਞ੍ਞਵਾਦਕਸਿਕ੍ਖਾਪਦਂ
੯੪. ਦੁਤਿਯੇ ਅਨਾਚਾਰਨ੍ਤਿ ਅਚਰਿਤਬ੍ਬਂ ਕਾਯਵਚੀਦ੍ਵਾਰਵੀਤਿਕ੍ਕਮਂ. ਸਬ੍ਬਨਾਮਸ੍ਸ ਅਨਿਯਮਤ੍ਥਤ੍ਤਾ ਇਧ ਵਚਨਨ੍ਤਿ ਆਹ ‘‘ਅਞ੍ਞੇਨ ਵਚਨੇਨ ਅਞ੍ਞਂ ਵਚਨ’’ਨ੍ਤਿ. ਸੋਤਿ ਭਿਕ੍ਖੁ, ਵਦਤੀਤਿ ਸਮ੍ਬਨ੍ਧੋ. ਕੋਤਿ ਕੋ ਪੁਗ੍ਗਲੋ. ਕਿਨ੍ਤਿ ਕਿਂ ਆਪਤ੍ਤਿਂ. ਕਿਸ੍ਮਿਨ੍ਤਿ ਕਿਸ੍ਮਿਂ ਵਤ੍ਥੁਸ੍ਮਿਂ. ਕਿਨ੍ਤਿ ਕਿਂ ਕਮ੍ਮਂ. ਕਨ੍ਤਿ ਕਂ ਪੁਗ੍ਗਲਂ. ਕਿਨ੍ਤਿ ਕਿਂ ਵਚਨਂ.
ਏਤ੍ਥਾਤਿ ‘‘ਕੋ ਆਪਨ੍ਨੋ’’ਤਿਆਦਿਪਾਲ਼ਿਯਂ. ‘‘ਭਿਕ੍ਖੂਹੀ’’ਤਿ ਪਦਂ ‘‘ਵੁਤ੍ਤੋ’’ਤਿ ਪਦੇ ਕਤ੍ਤਾ. ਅਸਾਰੁਪ੍ਪਨ੍ਤਿ ਭਿਕ੍ਖੂਨਂ ਅਸਾਰੁਪ੍ਪਂ. ਏਸੋਤਿ ਏਸੋ ਅਤ੍ਥੋ, ਵਿਭਵੋਤਿ ਅਤ੍ਥੋ. ਏਤਨ੍ਤਿ ਵਤ੍ਥੁ. ਭਣਨ੍ਤੋ ਵਾ ਹੁਤ੍ਵਾ ਅਞ੍ਞੇਨਞ੍ਞਂ ਪਟਿਚਰਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਪਟਿਚ੍ਛਨ੍ਨਾਸਨੇ. ਸੋਤਨ੍ਤਿ ਸੋਤਦ੍ਵਾਰਂ. ਚਕ੍ਖੁਨ੍ਤਿ ਚਕ੍ਖੁਦ੍ਵਾਰਂ.
੯੮. ਅਞ੍ਞਨ੍ਤਿ ਪੁਚ੍ਛਿਤਤ੍ਥਤੋ ਅਞ੍ਞਂ ਅਪੁਚ੍ਛਿਤਮਤ੍ਥਂ. ਭਾਵਪ੍ਪਧਾਨੋਯਂ ਕਤ੍ਤੁਨਿਦ੍ਦੇਸੋਤਿ ਆਹ ‘‘ਅਞ੍ਞੇਨਞ੍ਞਂ ਪਟਿਚਰਣਸ੍ਸੇਤਂ ਨਾਮ’’ਨ੍ਤਿ. ਤੁਣ੍ਹੀਭਾਵਸ੍ਸਾਤਿ ਅਭਾਸਨਸ੍ਸ. ਆਤ੍ਯੂਪਸਗ੍ਗੋ ਲੁਤ੍ਤਨਿਦ੍ਦਿਟ੍ਠੋਤਿ ਆਹ ‘‘ਆਰੋਪੇਤੂ’’ਤਿ. ਏਵਂ ‘‘ਅਰੋਪਿਤੇ’’ਤਿ ਏਤ੍ਥਪਿ. ਤੇਨਾਹ ‘‘ਅਨਾਰੋਪਿਤੇ’’ਤਿ.
੧੦੧. ਤਨ੍ਤਿ ਅਞ੍ਞਵਾਦਕਵਿਹੇਸਕਰੋਪਨਕਮ੍ਮਂ. ਅਸ੍ਸਾਤਿ ਭਵੇਯ੍ਯ, ਹੋਤਿ ਵਾ.
੧੦੨. ਕਿਨ੍ਤਿ ਕਿਂ ਵਚਨਂ. ਯੇਨਾਤਿ ਯੇਨ ਬ੍ਯਾਧਿਨਾ ਕਥੇਤੁਂ ਨ ਸਕ੍ਕੋਤਿ, ਤਾਦਿਸੋ ਬ੍ਯਾਧਿ ਮੁਖੇ ਹੋਤੀਤਿ ਯੋਜਨਾ. ਤਪ੍ਪਚ੍ਚਯਾਤਿ ਤਤੋ ਕਥਿਤਕਾਰਣਾਤਿ. ਦੁਤਿਯਂ.
੩. ਉਜ੍ਝਾਪਨਕਸਿਕ੍ਖਾਪਦਂ
੧੦੩. ਤਤਿਯੇ ਭਿਕ੍ਖੂ ਉਜ੍ਝਾਪੇਨ੍ਤੀਤਿ ਏਤ੍ਥ ‘‘ਭਿਕ੍ਖੂ’’ਤਿ ਕਾਰਿਤਕਮ੍ਮਤ੍ਤਾ ਕਰਣਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਤੇਹਿ ਭਿਕ੍ਖੂਹੀ’’ਤਿ. ਓਕਾਰਵਿਪਰੀਤੋ ਉਕਾਰੋਤਿ ਚ ਝੇਸਦ੍ਦੋ ਞਾਣਤ੍ਥੋਤਿ ਚ ਦਸ੍ਸੇਨ੍ਤੋ ਆਹ ‘‘ਅਵਜਾਨਾਪੇਨ੍ਤੀ’’ਤਿ. ‘‘ਤਂ ਆਯਸ੍ਮਨ੍ਤ’’ਨ੍ਤਿ ਪਦਂ ‘‘ਅਵਜਾਨਾਪੇਨ੍ਤੀ’’ਤਿ ਪਦੇ ਧਾਤੁਕਮ੍ਮਂ. ਅਨੇਕਤ੍ਥਤ੍ਤਾ ਧਾਤੂਨਂ ਝੇਸਦ੍ਦੋ ਓਲੋਕਨਤ੍ਥੋ ਚ ਚਿਨ੍ਤਨਤ੍ਥੋ ਚ ਹੋਤਿ, ਤੇਨਾਹ ‘‘ਓਲੋਕਾਪੇਨ੍ਤੀ’’ਤਿਆਦਿ. ਏਤ੍ਥਾਤਿ ‘‘ਭਿਕ੍ਖੂ ਉਜ੍ਝਾਪੇਨ੍ਤੀ’’ਤਿ ਪਦੇ. ਛਨ੍ਦਾਯਾਤਿ ਛਨ੍ਦਤ੍ਥਂ. ਯੇਸਂ ਸੇਨਾਸਨਾਨਿ ਚ ਪਞ੍ਞਪੇਤਿ, ਭਤ੍ਤਾਨਿ ਚ ਉਦ੍ਦਿਸਤਿ, ਤੇਸਂ ਅਤ੍ਤਨਿ ਪੇਮਤ੍ਥਨ੍ਤਿ ਅਤ੍ਥੋ. ਅਟ੍ਠਕਥਾਯਂ ਪਨ ‘‘ਛਨ੍ਦਾਯਾਤਿ ਛਨ੍ਦੇਨਾ’’ਤਿ ਵੁਤ੍ਤਂ. ਇਮਿਨਾ ਲਿਙ੍ਗਵਿਪਲ੍ਲਾਸਨਯੋ ਵੁਤ੍ਤੋ. ਪਰੇਸਂ ਅਤ੍ਤਨੋ ਪੇਮੇਨਾਤਿ ਅਤ੍ਥੋ. ਪਕ੍ਖਪਾਤੇਨਾਤਿ ਅਤ੍ਤਨੋ ਪਕ੍ਖੇ ਪਾਤਾਪਨੇਨ.
੧੦੫. ਉਜ੍ਝਾਪੇਨ੍ਤਿ ਅਨੇਨਾਤਿ ਉਜ੍ਝਾਪਨਕਂ. ਖਿਯ੍ਯਨ੍ਤਿ ਅਨੇਨਾਤਿ ਖਿਯ੍ਯਨਕਨ੍ਤਿ ਦਸ੍ਸੇਨ੍ਤੋ ਆਹ ‘‘ਯੇਨ ਵਚਨੇਨਾ’’ਤਿਆਦਿ.
੧੦੬. ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤਂ ਮਙ੍ਕੁਕਤ੍ਤੁਕਾਮੋਤਿ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਉਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤ’’ਨ੍ਤਿਆਦਿ. ਸਮ੍ਬਜ੍ਝਨਂ ਸਮ੍ਬਨ੍ਧੋ, ਕਾਤਬ੍ਬੋਤਿ ਯੋਜਨਾ. ਉਪਸਮ੍ਪਨ੍ਨਸ੍ਸ ਸਙ੍ਘੇਨ ਸਮ੍ਮਤਸ੍ਸ ਅਵਣ੍ਣਂ ਕਤ੍ਤੁਕਾਮੋ ਅਯਸਂ ਕਤ੍ਤੁਕਾਮੋਤਿ ਵਿਭਤ੍ਤਿਵਿਪਰਿਣਾਮੇਨ ਸਮ੍ਬਨ੍ਧਂ ਦਸ੍ਸੇਨ੍ਤੋ ਆਹ ‘‘ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ’’ਤਿ. ‘‘ਵਸੇਨਾ’’ਤਿ ਪਦਂ ਵਿਭਤ੍ਤਿਵਿਪਰਿਣਾਮੋ ਕਾਤਬ੍ਬੋ’’ਤਿ ਪਦੇ ਵਿਸੇਸਨਂ. ਯਸ੍ਮਾ ਵਿਸੇਸੋ ਨਤ੍ਥਿ, ਤਸ੍ਮਾ ਕਤਨ੍ਤਿ ਯੋਜਨਾ. ਤਨ੍ਤਿ ‘‘ਖਿਯ੍ਯਨਕ’’ਨ੍ਤਿ ਪਦਂ. ਸੋ ਚ ਭਿਕ੍ਖੂਤਿ ਉਜ੍ਝਾਪਨਕੋ ਚ ਖਿਯ੍ਯਨਕੋ ਚ ਸੋ ਚ ਭਿਕ੍ਖੁ. ਅਥਾਤਿ ਤਸ੍ਮਾ ਉਜ੍ਝਾਪਨਕਖਿਯ੍ਯਨਕਕਰਤ੍ਤਾ. ਅਸ੍ਸਾਤਿ ਭਿਕ੍ਖੁਨੋ. ਅਸ੍ਸਾਤਿ ਭਵੇਯ੍ਯ.
‘‘ਉਪਸਮ੍ਪਨ੍ਨ’’ਨ੍ਤਿ ਪਦਂ ‘‘ਉਜ੍ਝਾਪੇਤੀ’’ਤਿ ਪਦੇ ਧਾਤੁਕਮ੍ਮਂ ‘‘ਅਨੁਪਸਮ੍ਪਨ੍ਨ’’ਨ੍ਤਿ ਪਦਂ ਕਾਰਿਤਕਮ੍ਮਂ, ‘‘ਅਨੁਪਸਮ੍ਪਨ੍ਨ’’ਨ੍ਤਿ ਪਦਂ ‘‘ਉਜ੍ਝਾਪੇਤੀ’’ਤਿ ਕਾਰਿਤਕਿਰਿਯਂ ਅਪੇਕ੍ਖਿਤ੍ਵਾ ਕਮ੍ਮਂ ਹੋਤਿ. ‘‘ਖਿਯ੍ਯਤੀ’’ਤਿ ਸੁਦ੍ਧਕਿਰਿਯਾਯ ਅਪੇਕ੍ਖਾਯ ਵਿਭਤ੍ਤਿਵਿਪਲ੍ਲਾਸੋ ਹੋਤੀਤਿ ਆਹ ‘‘ਤਸ੍ਸ ਵਾ’’ਤਿਆਦਿ. ਤਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ ਸਨ੍ਤਿਕੇਤਿ ਸਮ੍ਬਨ੍ਧੋ. ਤਨ੍ਤਿ ਸਙ੍ਘੇਨ ਸਮ੍ਮਤਂ ਉਪਸਮ੍ਪਨ੍ਨਂ. ‘‘ਸਙ੍ਘੇਨ ਅਸਮ੍ਮਤ’’ਨ੍ਤਿ ਏਤ੍ਥ ਨ ਅਪਲੋਕਨਕਮ੍ਮੇਨ ਅਸਮ੍ਮਤਂ, ਕਮ੍ਮਵਾਚਾਯ ਪਨ ਅਸਮ੍ਮਤਨ੍ਤਿ ਆਹ ‘‘ਕਮ੍ਮਵਾਚਾਯਾ’’ਤਿਆਦਿ. ਦ੍ਵੇ ਤਯੋ ਹੁਤ੍ਵਾ ਕਮ੍ਮਵਾਚਾਯ ਸਮ੍ਮਨਿਤੁਮਸਕ੍ਕੁਣੇਯ੍ਯਤ੍ਤਾ ਅਸਮ੍ਮਤਨ੍ਤਿ ਚ ਦਸ੍ਸੇਨ੍ਤੋ ਆਹ ‘‘ਯਤ੍ਰਾ’’ਤਿਆਦਿ. ਯਤ੍ਰਾਤਿ ਯਸ੍ਮਿਂ ਵਿਹਾਰੇ. ‘‘ਅਨੁਪਸਮ੍ਪਨ੍ਨਂ ਸਙ੍ਘੇਨ ਸਮ੍ਮਤ’’ਨ੍ਤਿ ਏਤ੍ਥ ਅਨੁਪਸਮ੍ਪਨ੍ਨਸ੍ਸ ਸਮ੍ਮੁਤਿਯੋ ਦਾਤੁਮਸਕ੍ਕੁਣੇਯ੍ਯਤ੍ਤਾ ਪੁਬ੍ਬਵੋਹਾਰਵਸੇਨ ਸਮ੍ਮਤਨ੍ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਕਿਞ੍ਚਾਪੀ’’ਤਿਆਦਿ. ਤਨ੍ਤਿ ਅਨੁਪਸਮ੍ਪਨ੍ਨਭਾਵੇ ਠਿਤਂ. ਬ੍ਯਤ੍ਤਸ੍ਸਾਤਿ ਵਿਯਤ੍ਤਸ੍ਸ. ਸਙ੍ਘੇਨ ਵਾ ਕਤੋਤਿ ਯੋਜਨਾਤਿ. ਤਤਿਯਂ.
੪. ਪਠਮਸੇਨਾਸਨਸਿਕ੍ਖਾਪਦਂ
੧੦੮. ਚਤੁਤ੍ਥੇ ਹਿਮਮੇਵ ਹਿਮਨ੍ਤੋ, ਹਿਮਨ੍ਤੇ ਨਿਯੁਤ੍ਤੋ ਹੇਮਨ੍ਤਿਕੋ, ਕਾਲੋਤਿ ਆਹ ‘‘ਹੇਮਨ੍ਤਕਾਲੇ’’ਤਿ. ਓਤਾਪੇਨ੍ਤਾ ਪਕ੍ਕਮਿਂਸੂਤਿ ਸਮ੍ਬਨ੍ਧੋ. ਕਾਲਸਦ੍ਦਸ੍ਸ ਸਮ੍ਬਨ੍ਧਿਸਦ੍ਦਤ੍ਤਾ ਸਮ੍ਬਨ੍ਧਾਪੇਕ੍ਖੋਤਿ ਆਹ ‘‘ਯਸ੍ਸ ਕਸ੍ਸਚੀ’’ਤਿ. ਹਿਮਵਸ੍ਸੇਨਾਤਿ ਹਿਮੇਨ ਚ ਵਸ੍ਸੇਨ ਚ.
੧੧੦. ‘‘ਵਸ੍ਸਿਕੋ’’ਤਿ ਨ ਸਙ੍ਕੇਤਾਤਿ ਅਵਸ੍ਸਿਕਸਙ੍ਕੇਤਾ. ‘‘ਅਟ੍ਠ ਮਾਸੇ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ‘‘ਅਵਸ੍ਸਿਕਸਙ੍ਕੇਤੇ’’ਤਿ ਵਿਸੇਸਿਤਤ੍ਤਾ ਹੇਮਨ੍ਤਿਕਗਿਮ੍ਹਿਕਮਾਸਾਯੇਵ ਗਹੇਤਬ੍ਬਾਤਿ ਆਹ ‘‘ਚਤ੍ਤਾਰੋ ਹੇਮਨ੍ਤਿਕੇ’’ਤਿਆਦਿ. ਯਤ੍ਥਾਤਿ ਯਸ੍ਮਿਂ ਰੁਕ੍ਖੇ. ਨ ਊਹਦਨ੍ਤੀਤਿ ਸਮ੍ਬਨ੍ਧੋ. ‘‘ਕਾਕਾ ਵਾ’’ਤਿ ਏਤ੍ਥ ਵਾਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨਾਹ ‘‘ਅਞ੍ਞੇ ਵਾ ਸਕੁਨ੍ਤਾ’’ਤਿ. ਤਸ੍ਮਾਤਿ ਯਸ੍ਮਾ ਅਨੁਜਾਨਾਤਿ, ਤਸ੍ਮਾ. ਯਤ੍ਥਾਤਿ ਯਸ੍ਮਿਂ ਰੁਕ੍ਖੇ, ਵਿਸ੍ਸਮਿਤ੍ਵਾ ਗਚ੍ਛਨ੍ਤੀਤਿ ਯੋਜਨਾ. ਯਸ੍ਮਿਨ੍ਤਿ ਰੁਕ੍ਖੇ, ਕਤ੍ਵਾ ਵਸਨ੍ਤੀਤਿ ਯੋਜਨਾ. ਅਟ੍ਠ ਮਾਸੇ ਏਵਾਤਿ ਸਮ੍ਭਵਤੋ ਆਹ ‘‘ਯੇਸੁ ਜਨਪਦੇਸੂ’’ਤਿਆਦਿ. ਤੇਸੁਪੀਤਿ ਜਨਪਦੇਸੁਪਿ. ਅਵਸ੍ਸਿਕਸਙ੍ਕੇਤੇ ਏਵਾਤਿ ਸਮ੍ਭਵਤੋ ਆਹ ‘‘ਯਤ੍ਥਾ’’ਤਿਆਦਿ. ਯਤ੍ਥਾਤਿ ਯੇਸੁ ਜਨਪਦੇਸੁ. ‘‘ਵਿਗਤਵਲਾਹਕਂ ਵਿਸੁਦ੍ਧਂ ਨਭਂ ਹੋਤੀ’’ਤਿ ਇਮਿਨਾ ਸਚੇ ਅਵਿਗਤਵਲਾਹਕਂ ਅਵਿਸੁਦ੍ਧਂ ਨਭਂ ਹੋਤਿ, ਨਿਕ੍ਖਿਪਿਤੁਂ ਨ ਵਟ੍ਟਤੀਤਿ ਦੀਪੇਤਿ. ‘‘ਏਵਰੂਪੇ ਕਾਲੇ’’ਤਿ ਪਦਂ ‘‘ਨਿਕ੍ਖਿਪਿਤੁਂ ਵਟ੍ਟਤੀ’’ਤਿ ਪਦੇ ਆਧਾਰੋ.
ਅਬ੍ਭੋਕਾਸਿਕੇਨਾਪੀਤਿ ਅਬ੍ਭੋਕਾਸਧੁਤਙ੍ਗਯੁਤ੍ਤੇਨਾਪਿ. ਪਿਸਦ੍ਦੋ ਰੁਕ੍ਖਮੂਲਿਕਸ੍ਸ ਅਪੇਕ੍ਖਕੋ. ਵਤ੍ਤਂ ਵਿਤ੍ਥਾਰੇਨ੍ਤੋ ਆਹ ‘‘ਤਸ੍ਸ ਹੀ’’ਤਿਆਦਿ. ਤਸ੍ਸਾਤਿ ਅਬ੍ਭੋਕਾਸਿਕਸ੍ਸ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਤਤ੍ਥੇਵਾਤਿ ਪੁਗ੍ਗਲਿਕਮਞ੍ਚਕੇਯੇਵ. ਸਙ੍ਘਿਕਂ ਮਞ੍ਚਨ੍ਤਿ ਸਮ੍ਬਨ੍ਧੋ. ਵੀਤਮਞ੍ਚਕੋਤਿ ਵਾਯਿਤਮਞ੍ਚਕੋ. ਤਸ੍ਮਿਨ੍ਤਿ ਵੀਤਮਞ੍ਚਕੇ. ਪੁਰਾਣਮਞ੍ਚਕੋ ਨਸ੍ਸਨ੍ਤੋਪਿ ਅਨਗ੍ਘੋਤਿ ਆਹ ‘‘ਪੁਰਾਣਮਞ੍ਚਕੋ ਗਹੇਤਬ੍ਬੋ’’ਤਿ. ਚਮ੍ਮੇਨ ਅਵਨਹਿਤਬ੍ਬੋਤਿ ਓਨਦ੍ਧੋ, ਸੋ ਏਵ ਓਨਦ੍ਧਕੋ. ਗਹੇਤ੍ਵਾ ਚ ਪਨ ਪਞ੍ਞਪੇਤ੍ਵਾ ਨਿਪਜ੍ਜਿਤੁਂ ਨ ਵਟ੍ਟਤੀਤਿ ਯੋਜਨਾ. ਅਸਮਯੇਤਿ ਵਸ੍ਸਿਕਸਙ੍ਖਾਤੇ ਅਕਾਲੇ. ਚਤੁਗ੍ਗੁਣੇਨਾਪੀਤਿ ਚਤੁਪਟਲੇਨਪਿ. ਵਟ੍ਟਨ੍ਤਿ ਵਲਾਹਕਾ ਆਵਟ੍ਟਨ੍ਤਿ ਅਸ੍ਮਿਂ ਸਮਯੇਤਿ ਵਟ੍ਟੁਲੋ, ਸੋ ਏਵ ਵਟ੍ਟਲਿਕੋ, ਸਤ੍ਤਾਹਂ ਵਟ੍ਟਲਿਕੋ, ਸਤ੍ਤਾਹੋ ਵਾ ਵਟ੍ਟਲਿਕੋ ਸਤ੍ਤਾਹਵਟ੍ਟਲਿਕੋ, ਸੋ ਆਦਿ ਯੇਸਂ ਤਾਨੀਤਿ ਸਤ੍ਤਾਹਵਟ੍ਟਲਿਕਾਦੀਨਿ. ਆਦਿਸਦ੍ਦੇਨ ਸਤ੍ਤਾਹਤੋ ਊਨਾਧਿਕਾਨਿ ਗਹੇਤਬ੍ਬਾਨਿ. ਕਾਯਾਨੁਗਤਿਕਤ੍ਤਾਤਿ ਕਾਯਂ ਅਨੁਗਮਕਤ੍ਤਾ ਕਾਯਸਦਿਸਤ੍ਤਾਤਿ ਅਤ੍ਥੋ.
ਪਣ੍ਣਕੁਟੀਸੂਤਿ ਪਣ੍ਣੇਨ ਛਾਦਿਤਕੁਟੀਸੁ. ਸਭਾਗਭਿਕ੍ਖੂਨਨ੍ਤਿ ਅਤ੍ਤਨਾ ਸਭਾਗਭਿਕ੍ਖੂਨਂ, ਸਨ੍ਤਿਕਨ੍ਤਿ ਸਮ੍ਬਨ੍ਧੋ. ਅਨੋਵਸ੍ਸਕੇ ਠਾਨੇਤਿ ਯੋਜਨਾ. ਲਗ੍ਗੇਤ੍ਵਾਤਿ ਲਮ੍ਬੇਤ੍ਵਾ, ਅਯਮੇਵ ਵਾ ਪਾਠੋ. ‘‘ਸਮ੍ਮਜ੍ਜਨਿ’’ਨ੍ਤਿ ਪਦਂ ‘‘ਗਹੇਤ੍ਵਾ’’ਤਿ ਪਦੇ ਅਵੁਤ੍ਤਕਮ੍ਮਂ, ‘‘ਠਪੇਤਬ੍ਬਾ’’ਤਿ ਪਦੇ ਵੁਤ੍ਤਕਮ੍ਮਂ. ਧੋਵਿਤ੍ਵਾਤਿ ਸਮ੍ਮਜ੍ਜਨਿਂ ਸੁਦ੍ਧਂ ਕਤ੍ਵਾ. ਉਪੋਸਥਾਗਾਰਾਦੀਸੂਤਿਆਦਿਸਦ੍ਦੇਨ ਪਰਿਵੇਣਾਦੀਨਿ ਗਹੇਤਬ੍ਬਾਨਿ.
ਯੋ ਪਨ ਭਿਕ੍ਖੁ ਗਨ੍ਤੁਕਾਮੋ ਹੋਤਿ, ਤੇਨਾਤਿ ਯੋਜਨਾ. ਤਤ੍ਥਾਤਿ ਸਾਲਾਯਂ. ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਿਸ੍ਮਿਞ੍ਚਿ ਠਾਨੇ. ਪਾਕਤਿਕਟ੍ਠਾਨੇਤਿ ਪਕਤਿਯਾ ਗਹਿਤਟ੍ਠਾਨੇ. ਤਤ੍ਰ ਤਤ੍ਰੇਵਾਤਿ ਤੇਸੁ ਤੇਸੁ ਚੇਤਿਯਙ੍ਗਣਾਦੀਸੁਯੇਵ. ਅਸਨਸਾਲਨ੍ਤਿ ਅਸਨ੍ਤਿ ਭਕ੍ਖਨ੍ਤਿ ਅਸ੍ਸਂ ਸਾਲਾਯਨ੍ਤਿ ਅਸਨਾ, ਅਸਨਾ ਚ ਸਾ ਸਾਲਾ ਚੇਤਿ ਅਸਨਸਾਲਾ, ਭੋਜਨਸਾਲਾਤਿ ਅਤ੍ਥੋ. ਤਤ੍ਰਾਤਿ ਤਸ੍ਸ ਸਮ੍ਮਜ੍ਜਨ੍ਤਸ੍ਸ, ਤਸ੍ਮਿਂ ‘‘ਵਤ੍ਤਂ ਜਾਨਿਤਬ੍ਬ’’ਨ੍ਤਿ ਪਾਠੇ ਵਾ. ਮਜ੍ਝਤੋਤਿ ਪਵਿਤ੍ਤਤੋ, ਸੁਦ੍ਧਟ੍ਠਾਨਤੋਤਿ ਅਤ੍ਥੋ. ਪਾਦਟ੍ਠਾਨਾਭਿਮੁਖਾਤਿ ਸਮ੍ਮਜ੍ਜਨ੍ਤਸ੍ਸ ਪਾਦਟ੍ਠਾਨਂ ਅਭਿਮੁਖਾ. ਵਾਲਿਕਾ ਹਰਿਤਬ੍ਬਾਤਿ ਪਂਸੁ ਚ ਵਾਲਿਕਾ ਚ ਅਪਨੇਤਬ੍ਬਾ. ਸਮ੍ਮੁਞ੍ਚਨੀਸਲਾਕਾਯ ਪਰਂ ਪੇਲ੍ਲੇਤਬ੍ਬਾਤਿ ਅਧਿਪ੍ਪਾਯੋ. ਬਹੀਤਿ ਸਮ੍ਮਜ੍ਜਿਤਬ੍ਬਤਲਤੋ ਬਹਿ.
੧੧੧. ਮਸਾਰਕੋਤੀਤਿ ਏਤ੍ਥ ਇਤਿਸਦ੍ਦੋ ਨਾਮਪਰਿਯਾਯੋ, ਮਸਾਰਕੋ ਨਾਮਾਤਿ ਅਤ੍ਥੋ. ਏਵਂ ਬੁਨ੍ਦਿਕਾਬਦ੍ਧੋਤੀਤਿਆਦੀਸੁਪਿ. ਪਾਦੇ ਮਸਿਤ੍ਵਾ ਵਿਜ੍ਝਿਤ੍ਵਾ ਤਤ੍ਥ ਅਟਨਿਯੋ ਪਵੇਸੇਤਬ੍ਬਾ ਏਤ੍ਥਾਤਿ ਮਸਾਰਕੋ. ਬੁਨ੍ਦੋ ਏਵ ਬੁਨ੍ਦਿਕੋ, ਪਾਦੋ, ਤਸ੍ਮਿਂ ਆਬਦ੍ਧਾ ਬਨ੍ਧਿਤਾ ਅਟਨੀ ਯਸ੍ਸਾਤਿ ਬੁਨ੍ਦਿਕਾਬਦ੍ਧੋ. ਕੁਲ਼ੀਰਸ੍ਸ ਪਾਦੋ ਵਿਯ ਪਾਦੋ ਯਸ੍ਸਾਤਿ ਕੁਲ਼ੀਰਪਾਦਕੋ, ਯਥਾ ਕੁਲ਼ੀਰੋ ਵਙ੍ਕਪਾਦੋ ਹੋਤਿ, ਏਵਂ ਵਙ੍ਕਪਾਦੋਤਿ ਵੁਤ੍ਤਂ ਹੋਤਿ. ਆਹਚ੍ਚ ਅਙ੍ਗੇ ਵਿਜ੍ਝਿਤ੍ਵਾ ਤਤ੍ਥ ਪਵੇਸਿਤੋ ਪਾਦੋ ਯਸ੍ਸਾਤਿ ਆਹਚ੍ਚਪਾਦਕੋ. ਆਣਿਨ੍ਤਿ ਅਗ੍ਗਖਿਲਂ. ਮਞ੍ਚਤਿ ਪੁਗ੍ਗਲਂ ਧਾਰੇਤੀਤਿ ਮਞ੍ਚੋ. ਪੀਠਤਿ ਵਿਸਮਦੁਕ੍ਖਂ ਹਿਂਸਤੀਤਿ ਪੀਠਂ. ਪਣਵੋਤਿ ਏਕੋ ਤੂਰਿਯਵਿਸੇਸੋ, ਤਸ੍ਸ ਸਣ੍ਠਾਨਂ ਕਤ੍ਵਾਤਿ ਅਤ੍ਥੋ. ਤਞ੍ਹਿ ਏਤਰਹਿ ਬੁਦ੍ਧਪਟਿਮਸ੍ਸ ਪਲ੍ਲਙ੍ਕਸਣ੍ਠਾਨਂ ਹੋਤਿ. ਤਨ੍ਤਿ ਕੋਚ੍ਛਂ. ਕਰੋਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੇਨਾਸਨਪਰਿਭੋਗੇ. ਹੀਤਿ ਸਚ੍ਚਂ. ਤਨ੍ਤਿ ਕੋਚ੍ਛਂ ਮਹਗ੍ਘਂ ਹੋਤਿ, ਮਹਗ੍ਘਤ੍ਤਾ ਭਦ੍ਦਪੀਠਨ੍ਤਿਪਿ ਵੁਚ੍ਚਤਿ. ਯੇਨਾਤਿ ਯੇਨ ਭਿਕ੍ਖੁਨਾ. ‘‘ਥਾਮਮਜ੍ਝਿਮਸ੍ਸਾ’’ਤਿ ਪਦੇਨ ਪਮਾਣਮਜ੍ਝਿਮਂ ਨਿਵਤ੍ਤੇਤਿ.
ਏਤ੍ਥਾਤਿ ‘‘ਅਨਾਪੁਚ੍ਛਂ ਵਾ ਗਚ੍ਛੇਯ੍ਯਾ’’ਤਿ ਪਦੇ. ਥੇਰੋ ਆਣਾਪੇਤੀਤਿ ਯੋਜਨਾ. ਆਣਾਪੇਤੀਤਿ ਚ ਆਣ-ਧਾਤੁਯਾ ਏਵ ਪੇਸਨਸਙ੍ਖਾਤਸ੍ਸ ਹੇਤ੍ਵਤ੍ਥਸ੍ਸ ਵਾਚਕਤ੍ਤਾ ਣਾਪੇਸਦ੍ਦੋ ਸ੍ਵਤ੍ਥੋਵ. ਸੋਤਿ ਦਹਰੋ. ਤਥਾਤਿ ਯਥਾ ਥੇਰੇਨ ਵੁਤ੍ਤੋ, ਤਥਾ ਕਤ੍ਵਾਤਿ ਅਤ੍ਥੋ. ਤਤ੍ਥਾਤਿ ਦਿਵਾਟ੍ਠਾਨੇ, ਮਞ੍ਚਪੀਠੇ ਵਾ. ਤਤੋਤਿ ਠਪਨਕਾਲਤੋ. ਪਰਿਬੁਨ੍ਧੇਤਿ ਹਿਂ ਸੇਤੀਤਿ ਪਲਿਬੋਧੋ, ਪਰਿਸਦ੍ਦੋ ਉਪਸਗ੍ਗੋ, ਸੋ ਵਿਕਾਰਵਸੇਨ ਅਞ੍ਞਥਾ ਜਾਤੋ. ਸੋ ਪਲਿਬੋਧੋ ਅਞ੍ਞਤ੍ਥ ਆਵਾਸਾਦਿਕੋ, ਇਧ ਪਨ ਸਨ੍ਥਰਾਪਿਤਮਞ੍ਚਾਦਿਕੋ. ਸਾਯਨ੍ਤਿ ਸਾਯਨ੍ਹੇ, ਭੁਮ੍ਮਤ੍ਥੇ ਚੇਤਂ ਉਪਯੋਗਵਚਨਂ. ਥੇਰੋ ਭਣਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਮਞ੍ਚਪੀਠੇ. ‘‘ਬਾਲੋ ਹੋਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਨੁਗ੍ਗਹਿਤਵਤ੍ਤੋ’’ਤਿ. ਅਨੁਗ੍ਗਹਿਤਂ ਵਤ੍ਤਂ ਯੇਨਾਤਿ ਅਨੁਗ੍ਗਹਿਤਵਤ੍ਤੋ, ਥੇਰੋ. ਤਜ੍ਜੇਤੀਤਿ ਉਬ੍ਬੇਜੇਤਿ. ਤਸ੍ਮਿਨ੍ਤਿ ਦਹਰੇ. ਅਸ੍ਸਾਤਿ ਥੇਰਸ੍ਸ.
ਆਣਤ੍ਤਿਕ੍ਖਣੇਯੇਵਾਤਿ ਥੇਰਸ੍ਸ ਪੇਸਨਕ੍ਖਣੇਯੇਵ. ਦਹਰੋ ਵਦਤੀਤਿ ਯੋਜਨਾ. ‘‘ਥੇਰੋ’’ਤਿ ਪਦਂ ‘‘ਵਤ੍ਵਾ ਗਚ੍ਛਤੀ’’ਤਿ ਪਦਦ੍ਵਯੇ ਕਤ੍ਤਾ, ‘‘ਕਾਰੇਤਬ੍ਬੋ’’ਤਿ ਪਦੇ ਕਮ੍ਮਂ. ਨਨ੍ਤਿ ਮਞ੍ਚਪੀਠਂ, ‘‘ਪਞ੍ਞਪੇਤ੍ਵਾ’’ਤਿਪਦਮਪੇਕ੍ਖਿਯ ਏਵਂ ਵੁਤ੍ਤਂ. ਨਨ੍ਤਿ ਦਹਰਂ ਵਾ. ‘‘ਵਤ੍ਵਾ’’ਤਿ ਪਦਮਪੇਕ੍ਖਿਯ ਏਵਂ ਵੁਤ੍ਤਂ. ਤਤ੍ਥੇਵਾਤਿ ਮਞ੍ਚਪੀਠੇਯੇਵ. ਅਸ੍ਸਾਤਿ ਥੇਰਸ੍ਸ. ਤਤ੍ਥਾਤਿ ਦਿਵਾਟ੍ਠਾਨੇ. ਭੋਜਨਸਾਲਤੋ ਅਞ੍ਞਤ੍ਥ ਗਚ੍ਛਨ੍ਤੋਤਿ ਭੋਜਨਸਾਲਤੋ ਨਿਕ੍ਖਮਿਤ੍ਵਾ ਮਞ੍ਚਪੀਠਪਞ੍ਞਾਪਨਟ੍ਠਾਨਤੋ ਅਞ੍ਞਂ ਠਾਨਂ ਗਚ੍ਛਨ੍ਤੋ, ਥੇਰੋਤਿ ਯੋਜਨਾ. ਤਤ੍ਥੇਵਾਤਿ ਦਿਵਾਟ੍ਠਾਨੇਯੇਵ. ਯਤ੍ਰਿਚ੍ਛਤੀਤਿ ਯਂ ਠਾਨਂ ਗਨ੍ਤੁਮਿਚ੍ਛਤੀਤਿ ਅਤ੍ਥੋ. ਅਨ੍ਤਰਸਨ੍ਨਿਪਾਤੇਤਿ ਸਕਲਂ ਅਹੋਰਤ੍ਤਂ ਅਸਨ੍ਨਿਪਾਤੇਤ੍ਵਾ ਅਨ੍ਤਰੇ ਸਨ੍ਨਿਪਾਤੇ ਸਤੀਤਿ ਯੋਜਨਾ.
ਤਤ੍ਥਾਤਿ ਤਸ੍ਮਿਂ ਠਾਨੇ. ਆਗਨ੍ਤੁਕਾ ਗਣ੍ਹਨ੍ਤੀਤਿ ਸਮ੍ਬਨ੍ਧੋ. ਤਤੋਤਿ ਗਣ੍ਹਨਤੋ. ਤੇਸਨ੍ਤਿ ਆਗਨ੍ਤੁਕਾਨਂ. ਯੇਹੀਤਿ ਆਵਾਸਿਕੋ ਵਾ ਹੋਤੁ, ਆਗਨ੍ਤੁਕੋ ਵਾ, ਯੇਹਿ ਭਿਕ੍ਖੂਹਿ. ਤੇਤਿ ਨਿਸਿਨ੍ਨਕਭਿਕ੍ਖੂ. ਉਦ੍ਧਂ ਪਾਲ਼ਿਪਾਠਂ ਸਾਰੇਤਿ ਪਵਤ੍ਤੇਤੀਤਿ ਉਸ੍ਸਾਰਕੋ. ਧਮ੍ਮਕਥਾਯਂ ਸਾਧੂਤਿ ਧਮ੍ਮਕਥਿਕੋ. ਤਸ੍ਮਿਨ੍ਤਿ ਉਸ੍ਸਾਰਕੇ ਵਾ ਧਮ੍ਮਕਥਿਕੇ ਵਾ. ਅਹੋਰਤ੍ਤਨ੍ਤਿ ਅਹੋ ਚ ਰਤ੍ਤਿ ਚ ਅਹੋਰਤ੍ਤਂ, ਅਚ੍ਚਨ੍ਤਸਂਯੋਗਪਦਂ. ਇਤਰਸ੍ਮਿਨ੍ਤਿ ਪਠਮਂ ਨਿਸਿਨ੍ਨਭਿਕ੍ਖੁਤੋ ਅਞ੍ਞਸ੍ਮਿਂ ਭਿਕ੍ਖੁਮ੍ਹੀਤਿ ਯੋਜਨਾ. ਅਨ੍ਤੋਉਪਚਾਰਟ੍ਠੇਯੇਵਾਤਿ ਲੇਡ੍ਡੁਪਾਤਸਙ੍ਖਾਤਸ੍ਸ ਉਪਚਾਰਸ੍ਸ ਅਨ੍ਤੋ ਠਿਤੇਯੇਵ, ਅਨਾਦਰੇ ਚੇਤਂ ਭੁਮ੍ਮਂ. ਸਬ੍ਬਤ੍ਥਾਤਿ ਆਪਤ੍ਤਿਵਾਰਅਨਾਪਤ੍ਤਿਵਾਰੇਸੁ.
੧੧੨. ਚਿਮਿਲਿਕਂ ਵਾਤਿਆਦੀਸੁ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਤਨ੍ਤਿ ਚਿਮਿਲਿਕਤ੍ਥਰਣਂ. ਉਤ੍ਤਰਿ ਅਤ੍ਥਰਿਤਬ੍ਬਨ੍ਤਿ ਉਤ੍ਤਰਤ੍ਥਰਣਨ੍ਤਿ ਦਸ੍ਸੇਨ੍ਤੋ ਆਹ ‘‘ਉਤ੍ਤਰਤ੍ਥਰਣਂ ਨਾਮਾ’’ਤਿਆਦਿ. ਭੂਮਿਯਨ੍ਤਿ ਸੁਧਾਦਿਪਰਿਕਮ੍ਮੇਨ ਅਕਤਾਯਂ ਪਕਤਿਭੂਮਿਯਂ. ਚਮ੍ਮਖਣ੍ਡੋਤਿ ਏਤ੍ਥ ਚਮ੍ਮਂਯੇਵ ਅਨ੍ਤੇ ਖਣ੍ਡਤ੍ਤਾ ਛਿਨ੍ਨਤ੍ਤਾ ਚਮ੍ਮਖਣ੍ਡੋਤਿ ਵੁਚ੍ਚਤਿ. ਨਨੁ ਸੀਹਚਮ੍ਮਾਦੀਨਿ ਨ ਕਪ੍ਪਨ੍ਤੀਤਿ ਆਹ ‘‘ਅਟ੍ਠਕਥਾਸੁ ਹੀ’’ਤਿਆਦਿ. ਹੀਤਿ ਸਚ੍ਚਂ. ਤਸ੍ਮਾਤਿ ਯਸ੍ਮਾ ਨ ਦਿਸ੍ਸਤਿ, ਤਸ੍ਮਾ. ਪਰਿਹਰਣੇਯੇਵਾਤਿ ਅਤ੍ਤਨੋ ਸਨ੍ਤਕਨ੍ਤਿ ਪਰਿਚ੍ਛਿਨ੍ਦਿਤ੍ਵਾ, ਪੁਗ੍ਗਲਿਕਨ੍ਤਿ ਵਾ ਪਰਿਗ੍ਗਹੇਤ੍ਵਾ ਤਂ ਤਂ ਠਾਨਂ ਹਰਣੇਯੇਵ. ਪਾਦੋ ਪੁਞ੍ਛੀਯਤਿ ਸੋਧੀਯਤਿ ਏਤਾਯਾਤਿ ਪਾਦਪੁਞ੍ਛਨੀਤਿ ਕਤ੍ਵਾ ਰਜ੍ਜੁਪਿਲੋਤਿਕਾਯੋ ਪਾਦਪੁਞ੍ਛਨੀਤਿ ਵੁਚ੍ਚਤੀਤਿ ਆਹ ‘‘ਪਾਦਪੁਞ੍ਛਨੀ ਨਾਮਾ’’ਤਿਆਦਿ. ਮਯਸਦ੍ਦਲੋਪਂ ਕਤ੍ਵਾ ਫਲਕਪੀਠਨ੍ਤਿ ਵੁਤ੍ਤਨ੍ਤਿ ਆਹ ‘‘ਫਲਕਪੀਠਂ ਨਾਮ ਫਲਕਮਯਂ ਪੀਠ’’ਨ੍ਤਿ. ਫਲਕਞ੍ਚ ਪੀਠਞ੍ਚ ਫਲਕਪੀਠਨ੍ਤਿ ਵਾ ਦਸ੍ਸੇਤੁਂ ਵੁਤ੍ਤਂ ‘‘ਅਥ ਵਾ’’ਤਿ. ਏਤੇਨਾਤਿ ‘‘ਫਲਕਪੀਠ’’ਨ੍ਤਿ ਪਦੇਨ. ‘‘ਸਙ੍ਗਹਿਤ’’ਨ੍ਤਿ ਪਦੇ ਕਰਣਂ, ਕਤ੍ਤਾ ਵਾ. ਬੀਜਨਿਪਤ੍ਤਕਨ੍ਤਿ ਚਤੁਰਸ੍ਸਬੀਜਨੀਯੇਵ ਸਕੁਣਪਤ੍ਤਸਦਿਸਤ੍ਤਾ ਬੀਜਨਿਪਤ੍ਤਕਂ, ਸਦਿਸਤ੍ਥੇ ਕੋ. ‘‘ਅਜ੍ਝੋਕਾਸੇ’’ਤਿ ਪਦਂ ‘‘ਪਚਿਤ੍ਵਾ’’ਤਿ ਪਦੇ ਆਧਾਰੋ. ਅਗ੍ਗਿਸਾਲਾਯਨ੍ਤਿ ਅਗ੍ਗਿਨਾ ਪਚਨਸਾਲਾਯਂ. ਪਬ੍ਭਾਰੇਤਿ ਲੇਣਸਦਿਸੇ ਪਬ੍ਭਾਰੇ. ਯਤ੍ਥਾਤਿ ਯਸ੍ਮਿਂ ਠਾਨੇ.
ਯਸ੍ਮਿਨ੍ਤਿ ਪੁਗ੍ਗਲੇ. ‘‘ਅਤ੍ਤਨੋ ਪੁਗ੍ਗਲਿਕਮਿਵ ਹੋਤੀ’’ਤਿ ਇਮਿਨਾ ਅਨਾਪਤ੍ਤੀਤਿ ਦਸ੍ਸੇਤਿ.
੧੧੩. ਯੋ ਭਿਕ੍ਖੁ ਵਾ ਲਜ੍ਜੀ ਹੋਤਿ, ਤਥਾਰੂਪਂ ਭਿਕ੍ਖੁਂ ਵਾ ਤਿ ਯੋਜਨਾ. ‘‘ਲਜ੍ਜੀ ਹੋਤੀ’’ਤਿ ਵਤ੍ਵਾ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਅਤ੍ਤਨੋ ਪਲਿਬੋਧਂ ਵਿਯ ਮਞ੍ਞਤੀ’’ਤਿ. ਯੋਤਿ ਆਪੁਚ੍ਛਕੋ ਭਿਕ੍ਖੁ. ‘‘ਕੇਨਚਿ ਉਪਦ੍ਦੁਤਂ ਹੋਤੀ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰੇਨ੍ਤੋ ਆਹ ‘‘ਸਚੇਪਿ ਹੀ’’ਤਿਆਦਿ. ਹਿਸਦ੍ਦੋ ਵਿਤ੍ਥਾਰਜੋਤਕੋ. ਵੁਡ੍ਢਤਰੋ ਭਿਕ੍ਖੁ ਗਣ੍ਹਾਤੀਤਿ ਸਮ੍ਬਨ੍ਧੋ. ਤਂ ਪਦੇਸਨ੍ਤਿ ਸੇਨਾਸਨਟ੍ਠਪਿਤਟ੍ਠਾਨਂ. ਆਪਦਾਸੂਤਿ ਵਿਪਤ੍ਤੀਸੂਤਿ. ਚਤੁਤ੍ਥਂ.
੫. ਦੁਤਿਯਸੇਨਾਸਨਸਿਕ੍ਖਾਪਦਂ
੧੧੬. ਪਞ੍ਚਮੇ ਮਞ੍ਚਕਭਿਸੀਤਿ ਮਞ੍ਚੇ ਅਤ੍ਥਰਿਤਬ੍ਬੋ ਮਞ੍ਚਕੋ, ਸੋਯੇਵ ਭਿਸੀਤਿ ਮਞ੍ਚਕਭਿਸਿ. ਏਵਂ ਪੀਠਕਭਿਸਿਪਿ. ਪਾਵਾਰੋ ਕੋਜਵੋਤਿ ਦ੍ਵੇਯੇਵ ਪਚ੍ਚਤ੍ਥਰਣਨ੍ਤਿ ਵੁਤ੍ਤਾਤਿ ਆਹ ‘‘ਪਾਵਾਰੋ’’ਤਿਆਦਿ. ਵੁਤ੍ਤਨ੍ਤਿ ਅਟ੍ਠਕਥਾਸੁ ਵੁਤ੍ਤਂ. ਦੁਤਿਯਾਤਿਕ੍ਕਮੇਤਿ ਦੁਤਿਯਪਾਦਾਤਿਕ੍ਕਮੇ. ਸੇਨਾਸਨਤੋਤਿ ਸਚੇ ਏਕਂ ਸੇਨਾਸਨਂ ਹੋਤਿ, ਤਤੋ. ਅਥ ਬਹੂਨਿ ਸੇਨਾਸਨਾਨਿ ਹੋਨ੍ਤਿ, ਸਬ੍ਬਪਚ੍ਛਿਮਸੇਨਾਸਨਤੋ. ਏਕੋ ਲੇਡ੍ਡੁਪਾਤੋ ਸੇਨਾਸਨਸ੍ਸ ਉਪਚਾਰੋ ਹੋਤਿ, ਏਕੋ ਪਰਿਕ੍ਖੇਪਾਰਹੋਤਿ ਆਹ ‘‘ਦ੍ਵੇ ਲੇਡ੍ਡੁਪਾਤਾ’’ਤਿ.
ਸਚੇ ਭਿਕ੍ਖੁ, ਸਾਮਣੇਰੋ, ਆਰਾਮਿਕੋ ਚਾਤਿ ਤਯੋ ਹੋਨ੍ਤਿ, ਭਿਕ੍ਖੁਂ ਅਨਾਪੁਚ੍ਛਿਤ੍ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਨ ਆਪੁਚ੍ਛਿਤਬ੍ਬੋ. ਅਥ ਸਾਮਣੇਰੋ, ਆਰਾਮਿਕੋ ਚਾਤਿ ਦ੍ਵੇ ਹੋਨ੍ਤਿ, ਸਾਮਣੇਰਂ ਅਨਾਪੁਚ੍ਛਿਤ੍ਵਾ ਆਰਾਮਿਕੋਵ ਨ ਆਪੁਚ੍ਛਿਤਬ੍ਬੋਤਿ ਦਸ੍ਸੇਨ੍ਤੋ ਆਹ ‘‘ਭਿਕ੍ਖੁਮ੍ਹਿ ਸਤੀ’’ਤਿਆਦਿ. ਤੀਸੁਪਿ ਅਸਨ੍ਤੇਸੁ ਆਪੁਚ੍ਛਿਤਬ੍ਬਵਿਧਿਂ ਦਸ੍ਸੇਤੁਂ ਵੁਤ੍ਤਂ ‘‘ਤਸ੍ਮਿਮ੍ਪਿ ਅਸਤੀ’’ਤਿਆਦਿ. ਯੇਨਾਤਿ ਉਪਾਸਕੇਨ, ‘‘ਕਾਰਿਤੋ’’ਤਿ ਪਦੇ ਕਤ੍ਤਾ. ਤਸ੍ਸਾਤਿ ਵਿਹਾਰਸਾਮਿਕਸ੍ਸ. ਤਸ੍ਮਿਮ੍ਪਿ ਅਸਤਿ ਗਨ੍ਤਬ੍ਬਨ੍ਤਿ ਯੋਜਨਾ. ਪਾਸਾਣੇਸੂਤਿ ਪਾਸਾਣਫਲਕੇਸੁ. ਸਚੇ ਉਸ੍ਸਹਤੀਤਿ ਸਚੇ ਸਕ੍ਕੋਤਿ. ਉਸ੍ਸਹਨ੍ਤੇਨ ਭਿਕ੍ਖੁਨਾ ਠਪੇਤਬ੍ਬਨ੍ਤਿ ਯੋਜਨਾ. ਤੇਪੀਤਿ ਉਪਾਸਕਾਪਿ, ਨ ਸਮ੍ਪਟਿਚ੍ਛਨ੍ਤੀਤਿ ਸਮ੍ਬਨ੍ਧੋ. ਤਤ੍ਥਾਤਿ ਦਾਰੁਭਣ੍ਡਾਦੀਸੁ.
ਪਰਿਚ੍ਛੇਦਾਕਾਰੇਨ ਵੇਣੀਯਤਿ ਦਿਸ੍ਸਤੀਤਿ ਪਰਿਵੇਣਂ. ‘‘ਅਥ ਖੋ’’ਤਿ ਪਦਂ ‘‘ਵੇਦਿਤਬ੍ਬ’’ਨ੍ਤਿ ਪਦੇ ਅਰੁਚਿਲਕ੍ਖਣਂ. ‘‘ਆਸਨ੍ਨੇ’’ਤਿ ਇਮਿਨਾ ਉਪਚਾਰਸਦ੍ਦਸ੍ਸ ਉਪਟ੍ਠਾਨਤ੍ਥਅਞ੍ਞਰੋਪਨਤ੍ਥੇ ਨਿਵਤ੍ਤੇਤਿ. ਯਸ੍ਮਾ ਵਮ੍ਮਿਕਰਾਸਿਯੇਵ ਹੋਤਿ, ਤਸ੍ਮਾਤਿ ਯੋਜਨਾ. ਉਪਚਿਨਨ੍ਤੀਤਿ ਉਪਚਿਕਾ, ਤਾਹਿ ਨਿਮਿਤ੍ਤਭੂਤਾਹਿ ਪਲੁਜ੍ਜਤਿ ਨਸ੍ਸਤੀਤਿ ਅਤ੍ਥੋ. ਸੇਨਾਸਨਨ੍ਤਿ ਵਿਹਾਰਂ. ਖਾਯਿਤੁਨ੍ਤਿ ਖਾਦਿਤੁਂ, ਅਯਮੇਵ ਵਾ ਪਾਠੋ. ਤਨ੍ਤਿ ਮਞ੍ਚਪੀਠਂ. ਮਞ੍ਚਪੀਠਂ ਵਿਹਾਰੇ ਅਪਞ੍ਞਪੇਤ੍ਵਾ ਵਿਹਾਰੂਪਚਾਰੇ ਪਞ੍ਞਾਪਨਸ੍ਸ ਵਿਸੇਸਫਲਂ ਦਸ੍ਸੇਤੁਂ ਆਹ ‘‘ਵਿਹਾਰੂਪਚਾਰੇ ਪਨਾ’’ਤਿਆਦਿ. ਵਿਹਾਰੂਪਚਾਰੇ ਪਞ੍ਞਪਿਤਨ੍ਤਿ ਸਮ੍ਬਨ੍ਧੋ.
੧੧੮. ‘‘ਗਚ੍ਛਨ੍ਤੇਨਾ’’ਤਿ ਪਦਂ ‘‘ਗਨ੍ਤਬ੍ਬ’’ਨ੍ਤਿ ਪਦੇ ਕਤ੍ਤਾ. ਤਥੇਵਾਤਿ ਯਥਾ ਪੁਰਿਮਭਿਕ੍ਖੁ ਕਰੋਤਿ, ਤਥੇਵ. ਵਸਨ੍ਤੇਨ ਭਿਕ੍ਖੁਨਾ ਪਟਿਸਾਮੇਤਬ੍ਬਨ੍ਤਿ ਯੋਜਨਾ. ਰਤ੍ਤਿਟ੍ਠਾਨਨ੍ਤਿ ਰਤ੍ਤਿਂ ਵਸਨਟ੍ਠਾਨਂ.
ਯਾ ਦੀਘਸਾਲਾ ਵਾ ਯਾ ਪਣ੍ਣਸਾਲਾ ਵਾ ਉਪਚਿਕਾਨਂ ਉਟ੍ਠਾਨਟ੍ਠਾਨਂ ਹੋਤਿ, ਤਤੋਤਿ ਯੋਜਨਾ. ਤਸ੍ਮਿਨ੍ਤਿ ਦੀਘਸਾਲਾਦਿਕੇ. ਹੀਤਿ ਸਚ੍ਚਂ, ਯਸ੍ਮਾ ਵਾ, ਸਨ੍ਤਿਟ੍ਠਨ੍ਤੀਤਿ ਸਮ੍ਬਨ੍ਧੋ. ਸਿਲੁਚ੍ਚਯੋਤਿ ਪਬ੍ਬਤੋ, ਤਸ੍ਮਿਂ ਲੇਣਂ ਸਿਲੁਚ੍ਚਯਲੇਣਂ, ਪਬ੍ਬਤਗੁਹਾਤਿ ਅਤ੍ਥੋ. ਉਪਚਿਕਾਸਙ੍ਕਾਤਿ ਉਪਚਿਕਾਨਂ ਉਟ੍ਠਾਨਟ੍ਠਾਨਨ੍ਤਿ ਆਸਙ੍ਕਾ. ਤਤੋਤਿ ਪਾਸਾਣਪਿਟ੍ਠਿਯਂ ਵਾ ਪਾਸਾਣਥਮ੍ਭੇਸੁ ਵਾ ਕਤਸੇਨਾਸਨਾਦਿਤੋ. ਆਗਨ੍ਤੁਕੋ ਯੋ ਭਿਕ੍ਖੁ ਅਨੁਵਤ੍ਤਨ੍ਤੋ ਵਸਤੀਤਿ ਸਮ੍ਬਨ੍ਧੋ. ਸੋਤਿ ਆਗਨ੍ਤੁਕੋ ਭਿਕ੍ਖੁ. ਪੁਨ ਸੋਤਿ ਆਗਨ੍ਤੁਕੋ ਭਿਕ੍ਖੁਯੇਵ. ਤਤੋਤਿ ਗਹੇਤ੍ਵਾ ਇਸ੍ਸਰਿਯੇਨ ਵਸਨਤੋ. ਉਭੋਪੀਤਿ ਆਵਾਸਿਕੋਪਿ ਆਗਨ੍ਤੁਕੋਪਿ ਦ੍ਵੇ ਭਿਕ੍ਖੂ. ਤੇਸੂਤਿ ਦ੍ਵੀਸੁ ਤੀਸੁ. ਪਚ੍ਛਿਮਸ੍ਸਾਤਿ ਸਬ੍ਬਪਚ੍ਛਿਮਸ੍ਸ. ਆਭੋਗੇਨਾਤਿ ਆਭੋਗਮਤ੍ਤੇਨ ਮੁਤ੍ਤਿ ਨਤ੍ਥਿ, ਆਪੁਚ੍ਛਿਤਬ੍ਬਮੇਵਾਤਿ ਅਧਿਪ੍ਪਾਯੋ. ਅਞ੍ਞਤੋਤਿ ਅਞ੍ਞਾਵਾਸਤੋ. ਅਞ੍ਞਤ੍ਰਾਤਿ ਅਞ੍ਞਸ੍ਮਿਂ ਆਵਾਸੇ. ਤਤ੍ਥੇਵਾਤਿ ਆਨੀਤਾਵਾਸੇਯੇਵ. ਤੇਨਾਤਿ ਵੁਡ੍ਢਤਰੇਨ, ‘‘ਸਮ੍ਪਟਿਚ੍ਛਿਤੇ’’ਤਿ ਪਦੇ ਕਤ੍ਤਾ. ਸਮ੍ਪਟਿਚ੍ਛਿਤੇਤਿ ਵੁਡ੍ਢਤਰੇਨ ਸਮ੍ਪਟਿਚ੍ਛਿਤੇਪਿ ਇਤਰਸ੍ਸ ਗਨ੍ਤੁਂ ਵਟ੍ਟਤਿ ਆਪੁਚ੍ਛਿਤਤ੍ਤਾਤਿ ਵਦਨ੍ਤਿ. ਨਟ੍ਠਂ ਵਾਤਿ ਨਟ੍ਠੇ ਵਾ ਸੇਨਾਸਨੇ ਸਤਿ ਗੀਵਾ ਨ ਹੋਤੀਤਿ ਯੋਜਨਾ. ਅਞ੍ਞਸ੍ਸਾਤਿ ਅਵਿਸ੍ਸਾਸਿਕਪੁਗ੍ਗਲਸ੍ਸ. ਨਟ੍ਠਾਨੀਤਿ ਨਟ੍ਠੇਸੁ ਮਞ੍ਚਪੀਠੇਸੁ ਸਨ੍ਤੇਸੁ.
ਵੁਡ੍ਢਤਰੋ ਭਿਕ੍ਖੁ ਚ ਇਸ੍ਸਰਿਯੋ ਚ ਯਕ੍ਖੋ ਚ ਸੀਹੋ ਚ ਵਾਲ਼ਮਿਗੋ ਚ ਕਣ੍ਹਸਪ੍ਪੋ ਚ ਵੁਡ੍ਢ…ਪੇ… ਕਣ੍ਹਸਪ੍ਪਾ, ਤੇ ਆਦਯੋ ਯੇਸਂ ਤੇਤਿ ਵੁਡ੍ਢ…ਪੇ… ਕਣ੍ਹਸਪ੍ਪਾਦਯੋ, ਤੇਸੁ. ਆਦਿਸਦ੍ਦੇਨ ਪੇਤਾਦਯੋ ਸਙ੍ਗਣ੍ਹਾਤਿ. ਯਤ੍ਥਾਤਿ ਯਸ੍ਮਿਂ ਠਾਨੇ. ਅਸ੍ਸਾਤਿ ਭਿਕ੍ਖੁਨੋ. ‘‘ਪਲਿਬੁਦ੍ਧੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਉਪਦ੍ਦੁਤੋ’’ਤਿ. ਪਞ੍ਚਮਂ.
੬. ਅਨੁਪਖਜ੍ਜਸਿਕ੍ਖਾਪਦਂ
੧੧੯. ਛਟ੍ਠੇ ਰੂਮ੍ਭਿਤ੍ਵਾਤਿ ਨਿਵਾਰੇਤ੍ਵਾ, ਆਵਰਣਂ ਕਤ੍ਵਾਤਿ ਅਤ੍ਥੋ. ਵਸ੍ਸਗ੍ਗੇਨਾਤਿ ਵਸ੍ਸਗਣਨਾਯ. ਅਨੁਪਖਜ੍ਜਾਤਿ ਏਤ੍ਥ ਖਦ ਹਿਂਸਾਯਨ੍ਤਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੫ ਦਕਾਰਨ੍ਤਧਾਤੁ) ਵੁਤ੍ਤਤ੍ਤਾ ਖਦਸਦ੍ਦੋ ਹਿਂਸਤ੍ਥੋ ਹੋਤਿ. ਅਨੁਸਮੀਪਂ ਉਪਗਨ੍ਤ੍ਵਾ ਖਦਨਂ ਹਿਂ ਸਨਂ ਨਾਮ ਅਨੁਸਮੀਪਂ ਪਵਿਸਨਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਅਨੁਪਵਿਸਿਤ੍ਵਾ’’ਤਿ.
੧੨੦. ‘‘ਜਾਨ’’ਨ੍ਤਿ ਏਤ੍ਥ ਜਾਨਨਾਕਾਰਂ ਦਸ੍ਸੇਤੁਂ ਵੁਤ੍ਤਂ ‘‘ਅਨੁਟ੍ਠਾਪਨੀਯੋ ਅਯ’’ਨ੍ਤਿ. ਤੇਨੇਵਾਤਿ ਜਾਨਨਹੇਤੁਨਾ ਏਵ. ਅਸ੍ਸਾਤਿ ‘‘ਜਾਨ’’ਨ੍ਤਿਪਦਸ੍ਸ. ਹੀਤਿ ਵਿਤ੍ਥਾਰਜੋਤਕੋ. ਸਙ੍ਘੋ ਪਨ ਦੇਤੀਤਿ ਸਮ੍ਬਨ੍ਧੋ. ਯਸ੍ਸਾਤਿ ਵੁਡ੍ਢਾਦੀਸੁ ਅਞ੍ਞਤਰਸ੍ਸ. ਏਤ੍ਥਾਤਿ ਵੁਡ੍ਢਗਿਲਾਨਾਦੀਸੁ. ਗਿਲਾਨਸ੍ਸਪਿ ਦੇਤੀਤਿ ਯੋਜਨਾ. ‘‘ਗਿਲਾਨੋ’’ਤਿ ਪਦਂ ‘‘ਨ ਪੀਲ਼ੇਤਬ੍ਬੋ, ਅਨੁਕਮ੍ਪਿਤਬ੍ਬੋ’’ਤਿਪਦਦ੍ਵਯੇ ਵੁਤ੍ਤਕਮ੍ਮਂ. ‘‘ਕਾਮਞ੍ਚਾ’’ਤਿ ਪਦਸ੍ਸ ਅਨੁਗ੍ਗਹਤ੍ਥਜੋਤਕਤ੍ਤਾ ਪਨਸਦ੍ਦੋ ਗਰਹਤ੍ਥਜੋਤਕੋ.
੧੨੧. ਮਞ੍ਚਪੀਠਾਨਂ ਉਪਚਾਰੋ ਨਾਮਾਤਿ ਸਮ੍ਬਨ੍ਧੋ. ਯਤੋਤਿ ਯਤੋ ਕੁਤੋਚਿ ਠਾਨਤੋ. ਯਾਵ ਮਞ੍ਚਪੀਠਂ ਅਤ੍ਥਿ, ਤਾਵ ਉਪਚਾਰੋ ਨਾਮਾਤਿ ਯੋਜਨਾ. ਤਸ੍ਮਿਂ ਉਪਚਾਰੇ ਠਿਤਸ੍ਸ ਭਿਕ੍ਖੁਨੋ ਉਪਚਾਰੇਤਿ ਸਮ੍ਬਨ੍ਧੋ.
‘‘ਅਭਿਨਿਸੀਦਤਿ ਵਾ ਅਭਿਨਿਪਜ੍ਜਤਿ ਵਾ’’ਤਿ ਏਤ੍ਥ ਵਾਸਦ੍ਦਸ੍ਸ ਅਨਿਯਮਵਿਕਪ੍ਪਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਅਭਿਨਿਸੀਦਨਮਤ੍ਤੇਨਾ’’ਤਿਆਦਿ.
੧੨੨. ਇਤੋਤਿ ਵਾਰਤੋ. ਇਧਾਤਿ ਇਮਸ੍ਮਿਂ ਪਾਚਿਤ੍ਤਿਯਵਾਰੇ. ਯਥਾ ਵੁਤ੍ਤੋ, ਏਵਨ੍ਤਿ ਸਮ੍ਬਨ੍ਧੋ. ਸਬ੍ਬਤ੍ਥੇਵਾਤਿ ਸਬ੍ਬੇਸੁ ਏਵ ਵਿਹਾਰਪਰਿਵੇਣੇਸੁ. ਅਸ੍ਸਾਤਿ ਵਿਸਭਾਗਪੁਗ੍ਗਲਸ੍ਸ. ਇਧਾਪੀਤਿ ਇਮਸ੍ਮਿਮ੍ਪਿ ਸਿਕ੍ਖਾਪਦੇ. ਤਤ੍ਥਾਤਿ ਵਿਸ੍ਸਾਸਿਕਪੁਗ੍ਗਲੇ.
੧੨੩. ਪਾਲ਼ਿਯਂ ‘‘ਆਪਦਾਸੂ’’ਤਿਪਦਂ ‘‘ਪਵਿਸਤੀ’’ਤਿ ਅਜ੍ਝਾਹਾਰਪਦੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਆਪਦਾਸੂਤਿਆਦੀ’’ਤਿ. ਛਟ੍ਠਂ.
੭. ਨਿਕ੍ਕਡ੍ਢਨਸਿਕ੍ਖਾਪਦਂ
੧੨੬. ਸਤ੍ਤਮੇ ਯੇ ਪਾਸਾਦਾ ਵਾ ਯਾਨਿ ਵਾ ਚਤੁਸ੍ਸਾਲਾਨੀਤਿ ਯੋਜਨਾ. ਚਤਸ੍ਸੋ ਭੂਮਿਯੋ ਏਤੇਸਨ੍ਤਿ ਚਤੁਭੂਮਕਾ. ਏਵਂ ਪਞ੍ਚਭੂਮਕਾ. ਕੋਟ੍ਠਕਾਨੀਤਿ ਦ੍ਵਾਰਕੋਟ੍ਠਕਾਨਿ. ‘‘ਪਾਸਾਦਾ’’ਤਿਪਦਮਪੇਕ੍ਖਿਯ ਵੁਤ੍ਤਂ ‘‘ਯੇ’’ਤਿਪਦਂ, ‘‘ਚਤੁਸ੍ਸਾਲਾਨੀ’’ਤਿਪਦੇ ਅਪੇਕ੍ਖਿਤੇ ‘‘ਯਾਨੀ’’ਤਿ ਲਿਙ੍ਗਵਿਪਲ੍ਲਾਸੋ ਹੋਤਿ. ਸੇਨਾਸਨੇਸੁ ਏਕੇਨ ਪਯੋਗੇਨ ਬਹੁਕੇ ਦ੍ਵਾਰੇ ਭਿਕ੍ਖੁਂ ਅਤਿਕ੍ਕਾਮੇਤੀਤਿ ਸਮ੍ਬਨ੍ਧੋ. ਨਾਨਾਪਯੋਗੇਹਿ ਨਾਨਾਦ੍ਵਾਰੇ ਭਿਕ੍ਖੁਂ ਅਤਿਕ੍ਕਾਮੇਨ੍ਤਸ੍ਸਾਤਿ ਯੋਜਨਾ. ‘‘ਦ੍ਵਾਰਗਣਨਾਯਾ’’ਤਿਇਮਿਨਾ ਪਯੋਗਗਣਨਾਯਾਤਿਪਿ ਅਤ੍ਥਂ ਞਾਪੇਤਿ ਅਤ੍ਥਤੋ ਪਾਕਟਤ੍ਤਾ. ਅਨਾਮਸਿਤ੍ਵਾਤਿ ਅਛੁਪਿਤ੍ਵਾ.
ਏਤ੍ਤਕਾਨੀਤਿ ਏਤਪਮਾਣਾਨਿ. ਤਸ੍ਸਾਤਿ ਨਿਕ੍ਕਡ੍ਢਿਯਮਾਨਸ੍ਸ ਭਿਕ੍ਖੁਸ੍ਸ. ਗਾਲ਼੍ਹਨ੍ਤਿ ਦਲ਼੍ਹਂ.
੧੨੭. ਇਧਾਪੀਤਿ ਇਮਸ੍ਮਿਮ੍ਪਿ ਸਿਕ੍ਖਾਪਦੇ. ਪਿਸਦ੍ਦੋ ਪੁਰਿਮਸਿਕ੍ਖਾਪਦਾਪੇਕ੍ਖੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਸਿਕ੍ਖਾਪਦੇਸੁ. ਯਤ੍ਰਾਤਿ ਯਸ੍ਮਿਂ ਸਿਕ੍ਖਾਪਦੇ.
੧੨੮. ਸੋਤਿ ਭਣ੍ਡਨਕਾਰਕਕਲਹਕਾਰਕੋ ਭਿਕ੍ਖੁ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਪਕ੍ਖਨ੍ਤਿ ਅਤ੍ਤਨੋ ਪਕ੍ਖਂ. ਨਿਕ੍ਕਡ੍ਢਿਯਮਾਨਪੁਗ੍ਗਲਪਕ੍ਖੇ ਉਮ੍ਮਤ੍ਤਕਸ੍ਸ ਨਿਕ੍ਕਡ੍ਢਤਿ ਵਾ ਨਿਕ੍ਕਡ੍ਢਾਪੇਤਿ ਵਾਤਿ ਸਮ੍ਬਨ੍ਧਿਤਬ੍ਬਂ. ਨਿਕ੍ਕਡ੍ਢਕਪੁਗ੍ਗਲਪਕ੍ਖੇ ਉਮ੍ਮਤ੍ਤਕਸ੍ਸ ਅਨਾਪਤ੍ਤੀਤਿ ਸਮ੍ਬਨ੍ਧਿਤਬ੍ਬਨ੍ਤਿ. ਸਤ੍ਤਮਂ.
੮. ਵੇਹਾਸਕੁਟਿਸਿਕ੍ਖਾਪਦਂ
੧੨੯. ਅਟ੍ਠਮੇ ਅਚ੍ਛਨ੍ਨਤਲਤ੍ਤਾ ਉਪਰਿ ਵੇਹਾਸੋ ਏਤਿਸ੍ਸਾਤਿ ਉਪਰਿਵੇਹਾਸਾ, ਸਾ ਚ ਸਾ ਕੁਟਿ ਚੇਤਿ ਉਪਰਿਵੇਹਾਸਕੁਟੀਤਿ ਦਸ੍ਸੇਨ੍ਤੋ ਆਹ ‘‘ਉਪਰਿਅਚ੍ਛਨ੍ਨਤਲਾਯਾ’’ਤਿ. ਤਸ੍ਸਾ ਕੁਟਿਯਾ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਦ੍ਵਿਭੂਮਿਕਕੁਟਿਯਾ ਵਾ’’ਤਿਆਦਿ. ‘‘ਮਞ੍ਚ’’ਨ੍ਤਿ ਪਦਂ ‘‘ਅਭੀ’’ਤਿਉਪਸਗ੍ਗੇਨ ਸਮ੍ਬਨ੍ਧਿਤਬ੍ਬਨ੍ਤਿ ਆਹ ‘‘ਅਭਿਭਵਿਤ੍ਵਾ’’ਤਿ. ‘‘ਨਿਸੀਦਤੀ’’ਤਿ ਕਿਰਿਯਾਪਦੇਨ ਵਾ ਯੋਜੇਤਬ੍ਬੋਤਿ ਆਹ ‘‘ਭੁਮ੍ਮਤ੍ਥੇ ਵਾ’’ਤਿਆਦਿ. ਏਤਨ੍ਤਿ ‘‘ਮਞ੍ਚ’’ਨ੍ਤਿਪਦੇ ਏਤਂ ਵਚਨਂ ਉਪਯੋਗਵਚਨਂ. ਅਥ ਵਾ ਏਤਨ੍ਤਿ ‘‘ਮਞ੍ਚ’’ਨ੍ਤਿਪਦਂ ਉਪਯੋਗਵਚਨਵਨ੍ਤਂ. ਏਤ੍ਥ ਚ ਪਚ੍ਛਿਮਸਮ੍ਬਨ੍ਧੇ ਅਭੀਤ੍ਯੂਪਸਗ੍ਗੋ ਪਦਾਲਙ੍ਕਾਰਮਤ੍ਤੋ ਪਦਵਿਭੂਸਨਮਤ੍ਤੋਤਿ ਆਹ ‘‘ਅਭੀਤਿ ਇਦਂ ਪਨਾ’’ਤਿਆਦਿ. ਪਦਸੋਭਣਤ੍ਥਨ੍ਤਿ ਪਦਸ੍ਸ ਅਲਙ੍ਕਾਰਤ੍ਥਂ ਵਿਭੂਸਨਤ੍ਥਂ ਪਦਸ੍ਸ ਫੁਲ੍ਲਿਤਤ੍ਥਨ੍ਤਿ ਅਧਿਪ੍ਪਾਯੋ. ਨਿਪਤਿਤ੍ਵਾਤਿ ਏਤ੍ਥ ਨੀਤ੍ਯੂਪਸਗ੍ਗੋ ਧਾਤ੍ਵਤ੍ਥਾਨੁਵਤ੍ਤਕੋਤਿ ਆਹ ‘‘ਪਤਿਤ੍ਵਾ’’ਤਿ. ਅਥ ਵਾ ਨਿਕ੍ਖਨ੍ਤਤ੍ਥਵਾਚਕੋਤਿ ਆਹ ‘‘ਨਿਕ੍ਖਮਿਤ੍ਵਾ ਵਾ’’ਤਿ. ਇਮਿਨਾ ਨੀਤ੍ਯੂਪਸਗ੍ਗਸ੍ਸ ਧਾਤ੍ਵਤ੍ਥਵਿਸੇਸਕਤਂ ਦੀਪੇਤਿ, ਨਿਕ੍ਖਨ੍ਤੋ ਹੁਤ੍ਵਾ ਪਤਿਤ੍ਵਾਤਿ ਅਤ੍ਥੋ. ਹੀਤਿ ਯਸ੍ਮਾ. ਆਣੀਤਿ ਅਗ੍ਗਖੀਲਾ.
੧੩੧. ਯਾ ਕੁਟਿ ਸੀਸਂ ਨ ਘਟ੍ਟੇਤਿ, ਸਾ ਅਸੀਸਘਟ੍ਟਾ ਨਾਮਾਤਿ ਯੋਜਨਾ. ‘‘ਪਮਾਣਮਜ੍ਝਿਮਸ੍ਸਾ’’ਤਿਇਮਿਨਾ ਥਾਮਮਜ੍ਝਿਮਂ ਨਿਵਤ੍ਤੇਤਿ. ਸਬ੍ਬਹੇਟ੍ਠਿਮਾਹੀਤਿ ਸਬ੍ਬੇਸਂ ਦਬ੍ਬਸਮ੍ਭਾਰਾਨਂ ਹੇਟ੍ਠਾ ਠਿਤਾਹਿ. ਤੁਲਾਹੀਤਿ ਗੇਹਥਮ੍ਭਾਨਮੁਪਰਿ ਵਿਤ੍ਥਾਰਵਸੇਨ ਠਿਤੇਹਿ ਕਟ੍ਠਵਿਸੇਸੇਹਿ. ਇਮਿਨਾ ਅਟ੍ਠਕਥਾਵਚਨੇਨ ਚ ਤੁਲਾਯ ਸਰੂਪਂ ਪਾਕਟਂ. ਕੇਚਿ ਪਨ ਤੁਲਾਯ ਸਰੂਪਂ ਅਞ੍ਞਥਾ ਵਦਨ੍ਤਿ. ਏਤੇਨਾਤਿ ‘‘ਮਜ੍ਝਿਮਸ੍ਸ ਪੁਰਿਸਸ੍ਸ ਅਸੀਸਘਟ੍ਟਾ’’ਤਿਵਚਨੇਨ ਦਸ੍ਸਿਤਾ ਹੋਤੀਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਯਾ ਕਾਚਿ ਕੁਟਿ ਵੁਚ੍ਚਤੀਤਿ ਯੋਜਨਾ. ਉਪਰੀਤਿ ਦ੍ਵਿਭੂਮਿਕਕੁਟਿਯਂ ਭੂਮਿਤੋ ਉਪਰਿ ਭੂਮਿਯਂ. ਅਚ੍ਛਨ੍ਨਤਲਾਤਿ ਅਨੁਲ੍ਲੋਚਤਲਾ, ਅਵਿਤਾਨਤਲਾਤਿ ਅਤ੍ਥੋ. ਇਧ ਪਨਾਤਿ ਇਮਸ੍ਮਿਂ ਪਨ ਸਿਕ੍ਖਾਪਦੇ.
੧੩੩. ਹੀਤਿ ਸਚ੍ਚਂ, ਯਸ੍ਮਾ ਵਾ. ਯਾਯਨ੍ਤਿ ਯਾ ਅਯਂ ਕੁਟਿ. ਤਤ੍ਥਾਤਿ ਤਸ੍ਸਂ ਸੀਸਘਟ੍ਟਕੁਟਿਯਂ. ਅਨੋਣਤੇਨ ਭਿਕ੍ਖੁਨਾਤਿ ਯੋਜਨਾ. ਯਸ੍ਸਾਤਿ ਕੁਟਿਯਾ. ਅਪਰਿਭੋਗਨ੍ਤਿ ਨ ਪਰਿਭੁਞ੍ਜਿਤਬ੍ਬਂ, ਨ ਪਰਿਭੁਞ੍ਜਨਾਰਹਨ੍ਤਿ ਅਤ੍ਥੋ. ਪਤਾਣੀਤਿ ਪਤਨਸ੍ਸ ਨਿਵਾਰਣਾ ਆਣਿ ਅਗ੍ਗਖੀਲਾ. ਸਾ ਹਿ ਆਬਨ੍ਧਂ ਨਯਤਿ ਪਵਤ੍ਤੇਤੀਤਿ ਆਣੀਤਿ ਵੁਚ੍ਚਤਿ. ਯਤ੍ਥਾਤਿ ਯਸ੍ਮਿਂ ਮਞ੍ਚਪੀਠੇ. ਨ ਨਿਪ੍ਪਤਨ੍ਤੀਤਿ ਨਿਕ੍ਖਨ੍ਤੋ ਹੁਤ੍ਵਾ ਨ ਪਤਨ੍ਤਿ. ਆਹਚ੍ਚਪਾਦਕੇਤਿ ਅਙ੍ਗੇ ਆਹਨਿਤ੍ਵਾ ਵਿਜ੍ਝਿਤ੍ਵਾ ਤਤ੍ਥ ਪਵੇਸਿਤਪਾਦਕੇ. ਨਾਗਦਨ੍ਤਕਾਦੀਸੂਤਿ ਨਾਗਸ੍ਸ ਦਨ੍ਤੋ ਵਿਯਾਤਿ ਨਾਗਦਨ੍ਤਕੋ, ਸਦਿਸਤ੍ਥੇ ਕੋ, ਸੋ ਆਦਿ ਯੇਸਂ ਤੇਤਿ ਨਾਗਦਨ੍ਤਕਾਦਯੋ, ਤੇਸੁ. ਆਦਿਸਦ੍ਦੇਨ ਭਿਤ੍ਤਿਖੀਲਾਦਯੋ ਸਙ੍ਗਣ੍ਹਾਤੀਤਿ. ਅਟ੍ਠਮਂ.
੯. ਮਹਲ੍ਲਕਵਿਹਾਰਸਿਕ੍ਖਾਪਦਂ
੧੩੫. ਨਵਮੇ ਪਿਟ੍ਠਸਙ੍ਘਾਟਸ੍ਸਾਤਿ ਦ੍ਵਾਰਬਾਹਾਯ. ਸਾ ਹਿ ਪਿਟ੍ਠੇ ਦ੍ਵਿਨ੍ਨਂ ਕਵਾਟਾਨਂ ਸਂ ਏਕਤੋ ਘਾਟੋ ਘਟਨਂ ਸਮਾਗਮੋ ਏਤਸ੍ਸਤ੍ਥੀਤਿ ਪਿਟ੍ਠਸਙ੍ਘਾਟੋਤਿ ਵੁਚ੍ਚਤਿ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਮਹਾਅਟ੍ਠਕਥਾਯਂ ਵੁਤ੍ਤਨ੍ਤਿ ਯੋਜਨਾ. ਤਨ੍ਤਿ ਮਹਾਅਟ੍ਠਕਥਾਯ ਵੁਤ੍ਤਵਚਨਂ. ਏਵਂ ‘‘ਤਦੇਵਾ’’ਤਿ ਏਤ੍ਥਾਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਭਗਵਤਾਪੀਤਿ ਨ ਮਹਾਅਟ੍ਠਕਥਾਚਰਿਯੇਹਿ ਏਵ ਵੁਤ੍ਤਂ, ਅਥ ਖੋ ਭਗਵਤਾਪਿ ਕਤੋਤਿ ਯੋਜਨਾ. ਦ੍ਵਾਰਬਨ੍ਧੇਨ ਅਗ੍ਗਲ਼ਸ੍ਸ ਅਵਿਨਾਭਾਵਤੋ ‘‘ਅਗ੍ਗਲ਼ਟ੍ਠਪਨਾਯਾ’’ਤਿ ਵੁਤ੍ਤੇਪਿ ਅਗ੍ਗਲ਼ੇਨ ਸਹ ਦ੍ਵਾਰਬਨ੍ਧਟ੍ਠਪਨਾਯਾਤਿ ਅਤ੍ਥੋਵ ਗਹੇਤਬ੍ਬੋਤਿ ਆਹ ‘‘ਸਕਵਾਟਕਦ੍ਵਾਰਬਨ੍ਧਟ੍ਠਪਨਾਯਾ’’ਤਿ. ਅਗ੍ਗਲ਼ੋਤਿ ਕਵਾਟਫਲਕੋ. ਇਮਮੇਵਤ੍ਥਨ੍ਤਿ ਮਯਾ ਵੁਤ੍ਤਂ ਇਮਂ ਏਵ ਅਤ੍ਥਂ ਸਨ੍ਧਾਯਾਤਿ ਸਮ੍ਬਨ੍ਧੋ. ਏਤ੍ਥਾਤਿ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਵਚਨੇ. ਅਧਿਪ੍ਪਾਯੋਤਿ ਭਗਵਤੋ ਅਭਿਸਨ੍ਧਿ. ਹਿ-ਸਦ੍ਦੋ ਵਿਤ੍ਥਾਰਜੋਤਕੋ. ਕਮ੍ਪਤੀਤਿ ਭੁਸਂ ਕਮ੍ਪਤਿ. ਚਲਤੀਤਿ ਈਸਂ ਚਲਤਿ. ਤੇਨਾਤਿ ਤੇਨ ਸਿਥਿਲਪਤਨਹੇਤੁਨਾ. ਮਾਤਿਕਾਯਂ, ਪਦਭਾਜਨੀਯਞ੍ਚ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਪਦਸ੍ਸ ਸਮ੍ਬਨ੍ਧਾਭਾਵਤੋ ਤਸ੍ਸ ਸਮ੍ਬਨ੍ਧਂ ਦਸ੍ਸੇਤੁਂ ਵੁਤ੍ਤਂ ‘‘ਤਤ੍ਥਾ’’ਤਿਆਦਿ. ਤਤ੍ਥ ਤਤ੍ਥਾਤਿ ‘‘ਅਗ੍ਗਲ਼ਟ੍ਠਪਨਾਯਾ’’ਤਿਵਚਨੇ ਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਅਤ੍ਥਸ੍ਸ ਕਾਰਣਸ੍ਸ ਉਪ੍ਪਤ੍ਤਿ ਅਤ੍ਥੁਪ੍ਪਤ੍ਤਿ, ਸਾਯੇਵ ਅਟ੍ਠੁਪ੍ਪਤ੍ਤੀਤਿ ਵੁਚ੍ਚਤਿ ਤ੍ਥਕਾਰਸ੍ਸ ਟ੍ਠਕਾਰਂ ਕਤ੍ਵਾ. ਅਧਿਕਾਰਤੋ ਦਟ੍ਠਬ੍ਬੋਤਿ ਯੋਜਨਾ.
ਯਂ ਪਨ ਵਚਨਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਸ੍ਸਾਤਿ ਮਹਾਵਿਹਾਰਸ੍ਸ. ਉਪਰੀਤਿ ਦ੍ਵਾਰਤੋ ਉਪਰਿ. ਤੀਸੁ ਦਿਸਾਸੂਤਿ ਉਭੋਸੁ ਪਸ੍ਸੇਸੁ, ਉਪਰੀਤਿ ਤੀਸੁ ਦਿਸਾਸੁ. ਤਤ੍ਰਾਪੀਤਿ ਖੁਦ੍ਦਕੇ ਵਿਹਾਰੇਪਿ. ਸਾਤਿ ਭਿਤ੍ਤਿ. ਅਪਰਿਪੂਰਉਪਚਾਰਾਪੀਤਿ ਸਮਨ੍ਤਾ ਕਵਾਟਪਮਾਣੇਨ ਅਪਰਿਪੂਰਉਪਚਾਰਾਪਿ. ਉਕ੍ਕਟ੍ਠਪਰਿਚ੍ਛੇਦੇਨਾਤਿ ਉਕ੍ਕਂਸਪਮਾਣੇਨ. ਹਤ੍ਥਪਾਸਤੋ ਅਤਿਰੇਕਂ ਨ ਲਿਮ੍ਪਿਤਬ੍ਬੋਤਿ ਅਧਿਪ੍ਪਾਯੋ. ਤੀਸੁ ਦਿਸਾਸੁ ਏਵ ਲਿਮ੍ਪਿਤਬ੍ਬੋ ਨ ਹੋਤਿ, ਲੇਪੋਕਾਸੇ ਸਤਿ ਅਧੋਭਾਗੇਪਿ ਲਿਮ੍ਪਿਤਬ੍ਬੋਤਿ ਆਹ ‘‘ਸਚੇ ਪਨਸ੍ਸਾ’’ਤਿਆਦਿ. ਅਸ੍ਸਾਤਿ ਵਿਹਾਰਸ੍ਸ. ਆਲੋਕਂ ਸਨ੍ਧੇਨ੍ਤਿ ਪਿਦਹਨ੍ਤੀਤਿ ‘‘ਆਲੋਕਸਨ੍ਧੀ’’ਤਿ ਵੁਤ੍ਤੇ ਵਾਤਪਾਨਕਵਾਟਕਾਯੇਵਾਤਿ ਦਸ੍ਸੇਨ੍ਤੋ ਆਹ ‘‘ਵਾਤਪਾਨਕਵਾਟਕਾ ਵੁਚ੍ਚਨ੍ਤੀ’’ਤਿ. ਵਾਤਂ ਪਿਵਤੀਤਿ ਵਾਤਪਾਨਂ, ਦ੍ਵਾਰਂ, ਤਸ੍ਮਿਂ ਠਿਤਾ ਕਵਾਟਕਾ ਵਾਤਪਾਨਕਵਾਟਕਾ. ਤੇਤਿ ਵਾਤਪਾਨਕਵਾਟਕਾ ਪਹਰਨ੍ਤੀਤਿ ਸਮ੍ਬਨ੍ਧੋ. ਏਤ੍ਥਾਤਿ ਆਲੋਕਸਨ੍ਧਿਮ੍ਹਿ. ਸਬ੍ਬਦਿਸਾਸੂਤਿ ਉਭੋਸੁ ਪਸ੍ਸੇਸੁ, ਹੇਟ੍ਠਾ, ਉਪਰੀਤਿ ਚਤੂਸੁ ਦਿਸਾਸੁ. ‘‘ਤਸ੍ਮਾ’’ਤਿਪਦਂ ‘‘ਲਿਮ੍ਪਿਤਬ੍ਬੋ ਵਾ ਲੇਪਾਪੇਤਬ੍ਬੋ ਵਾ’’ਤਿਪਦਦ੍ਵਯੇ ਹੇਤੁ. ਏਤ੍ਥਾਤਿ ‘‘ਆਲੋਕਸਨ੍ਧਿਪਰਿਕਮ੍ਮਾਯਾ’’ਤਿਪਦੇ.
ਇਮਿਨਾਤਿ ਸੇਤਵਣ੍ਣਾਦਿਨਾ. ਸਬ੍ਬਮੇਤਨ੍ਤਿ ਏਤਂ ਸਬ੍ਬਂ ਸੇਤਵਣ੍ਣਾਦਿਕਂ.
ਯਨ੍ਤਿ ਕਿਚ੍ਚਂ. ਕਤ੍ਤਬ੍ਬਂ ਕਿਚ੍ਚਨ੍ਤਿ ਸਮ੍ਬਨ੍ਧੋ. ਸਦ੍ਦਨ੍ਤਰਬ੍ਯਵਹਿਤੋਪਿ ਦ੍ਵਤ੍ਤਿਸਦ੍ਦੋ ਪਰਿਯਾਯਸਦ੍ਦੇਨ ਸਮਾਸੋ ਹੋਤੀਤਿ ਆਹ ‘‘ਛਦਨਸ੍ਸ ਦ੍ਵਤ੍ਤਿਪਰਿਯਾਯ’’ਨ੍ਤਿ. ਦ੍ਵੇ ਵਾ ਤਯੋ ਵਾ ਪਰਿਯਾਯਾ ਸਮਾਹਟਾਤਿ ਦ੍ਵਤ੍ਤਿਪਰਿਯਾਯਂ, ਸਮਾਹਾਰੇ ਦਿਗੁ, ਤਿਸਦ੍ਦੇ ਪਰੇ ਦ੍ਵਿਸ੍ਸ ਅਕਾਰੋ ਹੋਤਿ. ਪਰਿਕ੍ਖੇਪੋਤਿ ਅਨੁਕ੍ਕਮੇਨ ਪਰਿਕ੍ਖੇਪੋ. ਅਪਤ੍ਯੂਪਸਗ੍ਗਸ੍ਸ ਪਟਿਸੇਧਵਾਚਕਤ੍ਤਾ ‘‘ਅਹਰਿਤੇ’’ਤਿ ਵੁਤ੍ਤਂ. ਏਤ੍ਥਾਤਿ ‘‘ਅਪਹਰਿਤੇ’’ਤਿ ਪਦੇ. ‘‘ਹਰਿਤ’’ਨ੍ਤਿ ਇਮਿਨਾ ਅਧਿਪ੍ਪੇਤਨ੍ਤਿ ਸਮ੍ਬਨ੍ਧੋ. ਆਦਿਕਪ੍ਪਕਾਲੇ ਅਪਰਣ੍ਣਤੋ ਪੁਬ੍ਬੇ ਪਵਤ੍ਤਂ ਅਨ੍ਨਂ ਪੁਬ੍ਬਣ੍ਣਂ, ਅਪਰਸ੍ਮਿਂ ਪੁਬ੍ਬਣ੍ਣਤੋ ਪਚ੍ਛਾ ਪਵਤ੍ਤਂ ਅਨ੍ਨਂ ਅਪਰਣ੍ਣਂ, ਨਕਾਰਦ੍ਵਯਸ੍ਸ ਣਕਾਰਦ੍ਵਯਂ ਕਤ੍ਵਾ. ਤੇਨੇਵਾਤਿ ਅਧਿਪ੍ਪੇਤਤ੍ਤਾ ਏਵ.
ਵੁਤ੍ਤਨ੍ਤਿ ਵਪਿਤਂ, ਯਥਾ ‘‘ਸੁਮੇਧਭੂਤੋ ਭਗਵਾ’’ਤਿਏਤ੍ਥ ਬੋਧਿਂ ਅਸਮ੍ਪਤ੍ਤੋਪਿ ਬੋਧਿਸਤ੍ਤੋ ਸੁਮੇਧਭੂਤੋ ‘‘ਭਗਵਾ’’ਤਿ ਵੁਚ੍ਚਤਿ ਅਵਸ੍ਸਮ੍ਭਾਵਿਯਤ੍ਤਾ, ਏਵਂ ਹਰਿਤਂ ਅਸਮ੍ਪਤ੍ਤਮ੍ਪਿ ਖੇਤ੍ਤਂ ‘‘ਹਰਿਤ’’ਨ੍ਤਿ ਵੁਚ੍ਚਤਿ ਅਵਸ੍ਸਮ੍ਭਾਵਿਯਤ੍ਤਾਤਿ ਅਤ੍ਥਂ ਦਸ੍ਸੇਤਿ ‘‘ਯਸ੍ਮਿਮ੍ਪਿ ਖੇਤ੍ਤੇ’’ਤਿਆਦਿਨਾ.