੨. ਉਯ੍ਯੋਜਨਸਿਕ੍ਖਾਪਦਂ

੨੭੪. ਦੁਤਿਯੇ ਪਟਿਕ੍ਕਮਨਅਸਨਸਾਲਸਦ੍ਦਾਨਂ ਪਰਿਯਾਯਤ੍ਤਾ ਵੁਤ੍ਤਂ ‘‘ਅਸਨਸਾਲਾਯਪੀ’’ਤਿ. ਭਤ੍ਤਸ੍ਸ ਵਿਸ੍ਸਜ੍ਜਨਂ ਭਤ੍ਤਵਿਸ੍ਸਗ੍ਗੋਤਿ ਕਤੇ ਭਤ੍ਤਕਿਚ੍ਚਨ੍ਤਿ ਆਹ ‘‘ਭਤ੍ਤਕਿਚ੍ਚ’’ਨ੍ਤਿ. ਸਮ੍ਭੂਧਾਤੁਸ੍ਸ ਪਪੁਬ੍ਬਅਪਧਾਤ੍ਵਤ੍ਥਤ੍ਤਾ ਵੁਤ੍ਤਂ ‘‘ਨ ਪਾਪੁਣੀ’’ਤਿ.

੨੭੬. ਵੁਤ੍ਤਾਵਸੇਸਨ੍ਤਿ ਵੁਤ੍ਤੇਹਿ ਮਾਤੁਗਾਮੇਨ ਸਦ੍ਧਿਂ ਹਸਿਤੁਕਾਮਤਾਦੀਹਿ ਅਵਸੇਸਂ. ਤਸ੍ਮਿਨ੍ਤਿ ਉਯ੍ਯੋਜਿਤਭਿਕ੍ਖੁਮ੍ਹਿ. ਅਤ੍ਥਤੋਤਿ ਵਿਜਹਨ੍ਤਵਿਜਹਿਤਭਿਕ੍ਖੂਨਂ ਅਵਿਨਾਭਾਵਸਙ੍ਖਾਤਅਤ੍ਥਤੋ. ਇਤਰੇਨਾਤਿ ਉਯ੍ਯੋਜਕਭਿਕ੍ਖੁਨਾ. ਤਤ੍ਥਾਤਿ ‘‘ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ’’ਤਿਵਚਨੇ. ਏਤ੍ਥਾਤਿ ਨਿਦ੍ਧਾਰਣਸਮੁਦਾਯੋ, ਦਸ੍ਸਨੂਪਚਾਰਸਵਨੂਪਚਾਰੇਸੂਤਿ ਅਤ੍ਥੋ. ‘‘ਤਥਾਤਿਇਮਿਨਾ ਦ੍ਵਾਦਸਹਤ੍ਥਪਮਾਣਂ ਅਤਿਦਿਸਤਿ. ਤੇਹੀਤਿ ਕੁਟ੍ਟਾਦੀਹਿ. ਤਸ੍ਸਾਤਿ ਦਸ੍ਸਨੂਪਚਾਰਾਤਿਕ੍ਕਮਸ੍ਸ. ‘‘ਵੁਤ੍ਤਪਕਾਰਮਨਾਚਾਰ’’ਨ੍ਤਿ ਇਮਿਨਾ ‘‘ਨ ਅਞ੍ਞੋ ਕੋਚਿ ਪਚ੍ਚਯੋ’’ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਦਸ੍ਸੇਤਿ, ‘‘ਕਾਰਣ’’ਨ੍ਤਿਇਮਿਨਾ ਪਚ੍ਚਯਸਦ੍ਦਸ੍ਸਤ੍ਥਂ.

੨੭੭. ਕਲਿਸਦ੍ਦਸ੍ਸ ਪਾਪਪਰਾਜਯਸਙ੍ਖਾਤੇਸੁ ਦ੍ਵੀਸੁ ਅਤ੍ਥੇਸੁ ਪਾਪਸਙ੍ਖਾਤੋ ਕੋਧੋਤਿ ਆਹ ‘‘ਕਲੀਤਿ ਕੋਧੋ’’ਤਿ. ‘‘ਆਣ’’ਨ੍ਤਿਇਮਿਨਾ ਸਾਸਨਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਵੁਤ੍ਤਞ੍ਹਿ ‘‘ਆਣਾ ਚ ਸਾਸਨਂ ਞੇਯ੍ਯ’’ਨ੍ਤਿ. ਕੋਧਵਸੇਨ ਵਦਤੀਤਿ ਸਮ੍ਬਨ੍ਧੋ. ਦਸ੍ਸੇਤ੍ਵਾ ਵਦਤੀਤਿ ਯੋਜਨਾ. ਇਮਸ੍ਸ ਠਾਨਂ ਨਿਸਜ੍ਜਂ ਆਲੋਕਿਤਂ ਵਿਲੋਕਿਤਂ ਪਸ੍ਸਥ ਭੋਤਿ ਯੋਜਨਾ. ਇਮਿਨਾਪੀਤਿ ਅਮਨਾਪਵਚਨਂ ਵਚਨੇਨਾਪੀਤਿ. ਦੁਤਿਯਂ.