੫. ਅਚੇਲਕਵਗ੍ਗੋ

੧. ਅਚੇਲਕਸਿਕ੍ਖਾਪਦ-ਅਤ੍ਥਯੋਜਨਾ

੨੬੯. ਅਚੇਲਕਵਗ੍ਗਸ੍ਸ ਪਠਮੇ ਪਰਿਵਿਸਤਿ ਏਤ੍ਥਾਤਿ ਪਰਿਵੇਸਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਪਰਿਵੇਸਨਟ੍ਠਾਨ’’ਨ੍ਤਿ. ਪਰਿਬ੍ਬਾਜਕਪਬ੍ਬਜਸਦ੍ਦਾ ਸਮਾਨਾਤਿ ਆਹ ‘‘ਪਰਿਬ੍ਬਾਜਕਸਮਾਪਨ੍ਨੋਤਿ ਪਬ੍ਬਜ੍ਜਂ ਸਮਾਪਨ੍ਨੋ’’ਤਿ. ਤਿਤ੍ਥੇਨ ਸਮਂ ਪੂਰਤੀਤਿ ਸਮਤਿਤ੍ਥੀਕਂ, ਨਦੀਆਦੀਸੁ ਉਦਕਂ, ਸਮਤਿਤ੍ਥਿਕਂ ਵਿਯਾਤਿ ਸਮਤਿਤ੍ਥਿਕਂ, ਪਤ੍ਤਭਾਜਨੇਸੁ ਯਾਗੁਭਤ੍ਤਂ. ਤੇਸਨ੍ਤਿ ਮਾਤਾਪਿਤੂਨਂ ਦੇਨ੍ਤਸ੍ਸਾਤਿ ਸਮ੍ਬਨ੍ਧੋ. ‘‘ਦਾਪੇਤੀ’’ਤਿ ਏਤ੍ਥ ਦਾਧਾਤੁਯਾ ਸਮ੍ਪਦਾਨਸ੍ਸ ਸੁਵਿਜਾਨਿਤਤ੍ਤਾ ਤਂ ਅਦਸ੍ਸੇਤ੍ਵਾ ਕਾਰਿਤਕਮ੍ਮਮੇਵ ਦਸ੍ਸੇਨ੍ਤੋ ਆਹ ‘‘ਅਨੁਪਸਮ੍ਪਨ੍ਨੇਨਾ’’ਤਿ.

੨੭੩. ‘‘ਸਨ੍ਤਿਕੇ’’ਤਿਇਮਿਨਾ ‘‘ਉਪਨਿਕ੍ਖਿਪਿਤ੍ਵਾ’’ਤਿ ਏਤ੍ਥ ਉਪਸਦ੍ਦਸ੍ਸ ਸਮੀਪਤ੍ਥਂ ਦਸ੍ਸੇਤਿ. ਤੇਸਨ੍ਤਿ ਤਿਤ੍ਥਿਯਾਨਂ. ਤਤ੍ਥਾਤਿ ਭਾਜਨੇ. ਇਤੋਤਿ ਪਤ੍ਤਤੋ. ਇਧਾਤਿ ਮਯ੍ਹਂ ਭਾਜਨੇ. ਨਨ੍ਤਿ ਖਾਦਨੀਯਭੋਜਨੀਯਂ. ਤਸ੍ਸਾਤਿ ਤਿਤ੍ਥਿਯਸ੍ਸਾਤਿ. ਪਠਮਂ.

੨. ਉਯ੍ਯੋਜਨਸਿਕ੍ਖਾਪਦਂ

੨੭੪. ਦੁਤਿਯੇ ਪਟਿਕ੍ਕਮਨਅਸਨਸਾਲਸਦ੍ਦਾਨਂ ਪਰਿਯਾਯਤ੍ਤਾ ਵੁਤ੍ਤਂ ‘‘ਅਸਨਸਾਲਾਯਪੀ’’ਤਿ. ਭਤ੍ਤਸ੍ਸ ਵਿਸ੍ਸਜ੍ਜਨਂ ਭਤ੍ਤਵਿਸ੍ਸਗ੍ਗੋਤਿ ਕਤੇ ਭਤ੍ਤਕਿਚ੍ਚਨ੍ਤਿ ਆਹ ‘‘ਭਤ੍ਤਕਿਚ੍ਚ’’ਨ੍ਤਿ. ਸਮ੍ਭੂਧਾਤੁਸ੍ਸ ਪਪੁਬ੍ਬਅਪਧਾਤ੍ਵਤ੍ਥਤ੍ਤਾ ਵੁਤ੍ਤਂ ‘‘ਨ ਪਾਪੁਣੀ’’ਤਿ.

੨੭੬. ਵੁਤ੍ਤਾਵਸੇਸਨ੍ਤਿ ਵੁਤ੍ਤੇਹਿ ਮਾਤੁਗਾਮੇਨ ਸਦ੍ਧਿਂ ਹਸਿਤੁਕਾਮਤਾਦੀਹਿ ਅਵਸੇਸਂ. ਤਸ੍ਮਿਨ੍ਤਿ ਉਯ੍ਯੋਜਿਤਭਿਕ੍ਖੁਮ੍ਹਿ. ਅਤ੍ਥਤੋਤਿ ਵਿਜਹਨ੍ਤਵਿਜਹਿਤਭਿਕ੍ਖੂਨਂ ਅਵਿਨਾਭਾਵਸਙ੍ਖਾਤਅਤ੍ਥਤੋ. ਇਤਰੇਨਾਤਿ ਉਯ੍ਯੋਜਕਭਿਕ੍ਖੁਨਾ. ਤਤ੍ਥਾਤਿ ‘‘ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ’’ਤਿਵਚਨੇ. ਏਤ੍ਥਾਤਿ ਨਿਦ੍ਧਾਰਣਸਮੁਦਾਯੋ, ਦਸ੍ਸਨੂਪਚਾਰਸਵਨੂਪਚਾਰੇਸੂਤਿ ਅਤ੍ਥੋ. ‘‘ਤਥਾਤਿਇਮਿਨਾ ਦ੍ਵਾਦਸਹਤ੍ਥਪਮਾਣਂ ਅਤਿਦਿਸਤਿ. ਤੇਹੀਤਿ ਕੁਟ੍ਟਾਦੀਹਿ. ਤਸ੍ਸਾਤਿ ਦਸ੍ਸਨੂਪਚਾਰਾਤਿਕ੍ਕਮਸ੍ਸ. ‘‘ਵੁਤ੍ਤਪਕਾਰਮਨਾਚਾਰ’’ਨ੍ਤਿ ਇਮਿਨਾ ‘‘ਨ ਅਞ੍ਞੋ ਕੋਚਿ ਪਚ੍ਚਯੋ’’ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਦਸ੍ਸੇਤਿ, ‘‘ਕਾਰਣ’’ਨ੍ਤਿਇਮਿਨਾ ਪਚ੍ਚਯਸਦ੍ਦਸ੍ਸਤ੍ਥਂ.

੨੭੭. ਕਲਿਸਦ੍ਦਸ੍ਸ ਪਾਪਪਰਾਜਯਸਙ੍ਖਾਤੇਸੁ ਦ੍ਵੀਸੁ ਅਤ੍ਥੇਸੁ ਪਾਪਸਙ੍ਖਾਤੋ ਕੋਧੋਤਿ ਆਹ ‘‘ਕਲੀਤਿ ਕੋਧੋ’’ਤਿ. ‘‘ਆਣ’’ਨ੍ਤਿਇਮਿਨਾ ਸਾਸਨਸਦ੍ਦਸ੍ਸਤ੍ਥਂ ਦਸ੍ਸੇਤਿ. ਵੁਤ੍ਤਞ੍ਹਿ ‘‘ਆਣਾ ਚ ਸਾਸਨਂ ਞੇਯ੍ਯ’’ਨ੍ਤਿ. ਕੋਧਵਸੇਨ ਵਦਤੀਤਿ ਸਮ੍ਬਨ੍ਧੋ. ਦਸ੍ਸੇਤ੍ਵਾ ਵਦਤੀਤਿ ਯੋਜਨਾ. ਇਮਸ੍ਸ ਠਾਨਂ ਨਿਸਜ੍ਜਂ ਆਲੋਕਿਤਂ ਵਿਲੋਕਿਤਂ ਪਸ੍ਸਥ ਭੋਤਿ ਯੋਜਨਾ. ਇਮਿਨਾਪੀਤਿ ਅਮਨਾਪਵਚਨਂ ਵਚਨੇਨਾਪੀਤਿ. ਦੁਤਿਯਂ.

੩. ਸਭੋਜਨਸਿਕ੍ਖਾਪਦਂ

੨੭੯. ਤਤਿਯੇ ‘‘ਸਯਨਿਯਘਰੇ’’ਤਿ ਵਤ੍ਤਬ੍ਬੇ ਯਕਾਰਲੋਪਂ ਕਤ੍ਵਾ ‘‘ਸਯਨਿਘਰੇ’’ਤਿ ਵੁਤ੍ਤਨ੍ਤਿ ਆਹ ‘‘ਸਯਨਿਘਰੇ’’ਤਿ. ਯਤੋਤਿ ਏਤ੍ਥ ਤੋਸਦ੍ਦੋ ਪਠਮਾਦੀਸੁ ਅਤ੍ਥੇਸੁ ਦਿਸ੍ਸਤਿ. ‘‘ਯਤੋਨਿਦਾਨ’’ਨ੍ਤਿਆਦੀਸੁ (ਸੁ. ਨਿ. ੨੭੫) ਪਠਮਤ੍ਥੇ. ‘‘ਅਨ੍ਤਰਾਯੇ ਅਸੇਸਤੋ’’ਤਿਆਦੀਸੁ (ਧ. ਸ. ਅਟ੍ਠ. ਗਨ੍ਥਾਰਮ੍ਭਕਥਾ ੭) ਦੁਤਿਯਤ੍ਥੇ. ‘‘ਅਨਿਚ੍ਚਤੋ’’ਤਿਆਦੀਸੁ (ਪਟ੍ਠਾ. ੧.੧.੪੦੯) ਤਤਿਯਤ੍ਥੇ. ‘‘ਮਾਤਿਤੋ ਪਿਤਿਤੋ’’ਤਿਆਦੀਸੁ (ਦੀ. ਨਿ. ੧.੩੧੧) ਪਞ੍ਚਮ੍ਯਤ੍ਥੇ. ‘‘ਯਂ ਪਰਤੋ ਦਾਨਪਚ੍ਚਯਾ’’ਤਿਆਦੀਸੁ (ਜਾ. ੨.੨੨.੫੮੫) ਛਟ੍ਠ੍ਯਤ੍ਥੇ. ‘‘ਪੁਰਤੋ ਪਚ੍ਛਤੋ’’ਤਿਆਦੀਸੁ (ਪਾਚਿ. ੫੭੬) ਸਤ੍ਤਮ੍ਯਤ੍ਥੇ. ‘‘ਪਦਮਤੋ’’ਤਿਆਦੀਸੁ ਕਾਰਣਤ੍ਥੇ ਦਿਸ੍ਸਤਿ. ਇਧਾਪਿ ਕਾਰਣਤ੍ਥੇਯੇਵਾਤਿ ਆਹ ‘‘ਯਸ੍ਮਾ’’ਤਿ. ਯਸ੍ਮਾ ਕਾਰਣਾ ਅਯ੍ਯਸ੍ਸ ਭਿਕ੍ਖਾ ਦਿਨ੍ਨਾ, ਤਸ੍ਮਾ ਗਚ੍ਛਥ ਭਨ੍ਤੇ ਤੁਮ੍ਹੇਤਿ ਅਤ੍ਥੋ. ਯਨ੍ਤਿ ਭਿਕ੍ਖਂ. ਵੋਤਿ ਤੁਮ੍ਹੇਹਿ. ਅਧਿਪ੍ਪਾਯੋਤਿ ਪੁਰਿਸਸ੍ਸ ਅਜ੍ਝਾਸਯੋ. ‘‘ਪਰਿਯੁਟ੍ਠਿਤੋ’’ਤਿ ਸਾਮਞ੍ਞਤੋ ਵੁਤ੍ਤੇਪਿ ਅਤ੍ਥਪਕਰਣਾਦਿਤੋ ਰਾਗਪਰਿਯੁਟ੍ਠਿਤੋਵਾਧਿਪ੍ਪੇਤੋਤਿ ਆਹ ‘‘ਰਾਗਪਰਿਯੁਟ੍ਠਿਤੋ’’ਤਿ, ਰਾਗੇਨ ਪਰਿਭਵਿਤ੍ਵਾ ਉਟ੍ਠਿਤੋਤਿ ਅਤ੍ਥੋ.

੨੮੦. ਸਭੋਜਨਨ੍ਤਿ ਏਤ੍ਥ ਸਕਾਰੋ ਸਹਸਦ੍ਦਕਾਰਿਯੋ ਚ ਅਕਾਰੁਕਾਰਾਨਂ ਅਸਰੂਪਤ੍ਤਾ ਅਕਾਰਤੋ ਉਕਾਰਸ੍ਸ ਲੋਪੋ ਚ ਤੀਸੁ ਪਦੇਸੁ ਪਚ੍ਛਿਮਾਨਂ ਦ੍ਵਿਨ੍ਨਂ ਪਦਾਨਂ ਤੁਲ੍ਯਤ੍ਥਨਿਸ੍ਸਿਤਸਮਾਸੋ ਚ ਪੁਬ੍ਬਪਦੇਨ ਸਹ ਭੇਦਨਿਸ੍ਸਿਤਬਾਹਿਰਤ੍ਥਸਮਾਸੋ ਚ ਹੋਤਿ, ਇਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਹ ਉਭੋਹਿ ਜਨੇਹੀ’’ਤਿ. ਅਥ ਵਾ ਭੁਞ੍ਜਿਤਬ੍ਬਨ੍ਤਿ ਭੋਜਨਂ, ਸਂ ਵਿਜ੍ਜਤਿ ਭੋਜਨਂ ਅਸ੍ਮਿਂ ਕੁਲੇਤਿ ਸਭੋਜਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਅਥ ਵਾ’’ਤਿਆਦਿ. ਹੀਤਿ ਸਚ੍ਚਂ. ਤੇਨੇਵਾਤਿ ਤੇਨੇਵ ਅਞ੍ਞਮਞ੍ਞਂ ਭੁਞ੍ਜਿਤਬ੍ਬਤ੍ਤਾ. ਅਸ੍ਸਾਤਿ ‘‘ਸਭੋਜਨੇ’’ਤਿਪਦਸ੍ਸ. ਘਰੇਤਿ ਏਤ੍ਥ ਪੁਬ੍ਬੋ ਸਯਨਿਸਦ੍ਦੋ ਲੋਪੋਤਿ ਆਹ ‘‘ਸਯਨਿਘਰੇ’’ਤਿ. ਇਮਿਨਾ ‘‘ਦਤ੍ਤੋ’’ਤਿਆਦੀਸੁ ਵਿਯ ਪੁਬ੍ਬਪਦਲੋਪਸਮਾਸਂ ਦਸ੍ਸੇਤਿ. ਪਿਟ੍ਠਸਙ੍ਘਾਟਸ੍ਸਾਤਿ ਏਤ੍ਥ ਪਿਟ੍ਠਸਙ੍ਘਾਟੋ ਨਾਮ ਨ ਅਞ੍ਞਸ੍ਸ ਯਸ੍ਸ ਕਸ੍ਸਚਿ, ਅਥ ਖੋ ਸਯਨਿਘਰਗਬ੍ਭਸ੍ਸੇਵਾਤਿ ਆਹ ‘‘ਤਸ੍ਸ ਸਯਨਿਘਰਗਬ੍ਭਸ੍ਸਾ’’ਤਿ. ਯਥਾ ਵਾ ਤਥਾ ਵਾਤਿ ਯੇਨ ਵਾ ਤੇ ਨ ਵਾ ਆਕਾਰੇਨ. ਕਤਸ੍ਸਾਤਿ ਪਿਟ੍ਠਿਵਂਸਂ ਆਰੋਪੇਤ੍ਵਾ ਵਾ ਅਨਾਰੋਪੇਤ੍ਵਾ ਵਾ ਕਤਸ੍ਸਾਤਿ. ਤਤਿਯਂ.

੨੮੪. ਚਤੁਤ੍ਥਪਞ੍ਚਮੇਸੁ ਯਥਾ ਚ ਸਭੋਜਨਸਿਕ੍ਖਾਪਦਂ ਪਠਮਪਾਰਾਜਿਕਸਮੁਟ੍ਠਾਨਂ, ਏਵਮੇਵ ਤਾਨਿਪੀਤਿ ਯੋਜਨਾਤਿ. ਚਤੁਤ੍ਥਪਞ੍ਚਮਾਨਿ.

੬. ਚਾਰਿਤ੍ਤਸਿਕ੍ਖਾਪਦਂ

੨੯੪. ਛਟ੍ਠੇ ਕਸ੍ਮਾ ਤੇਹਿ ‘‘ਦੇਥਾਵੁਸੋ ਭਤ੍ਤ’’ਨ੍ਤਿ ਵੁਤ੍ਤਂ, ਨਨੁ ਭਿਕ੍ਖੂਨਂ ਏਵਂ ਵਤ੍ਤੁਂ ਨ ਵਟ੍ਟਤੀਤਿ ਆਹ ‘‘ਏਤ੍ਥ ਤਂ ਕਿਰਾ’’ਤਿਆਦਿ. ਤਸ੍ਮਾਤਿ ਯਸ੍ਮਾ ਅਭਿਹਟਂ ਅਹੋਸਿ, ਤਸ੍ਮਾ.

੨੯੫. ਇਦਂ ਪਨ ਵਚਨਂ ਆਹਾਤਿ ਸਮ੍ਬਨ੍ਧੋ. ਪਸਾਦਞ੍ਞਥਤ੍ਤਨ੍ਤਿ ਪਸਾਦਸ੍ਸ ਅਞ੍ਞੇਨਾਕਾਰੇਨ ਭਾਵੋ. ਨਨ੍ਤਿ ਖਾਦਨੀਯਂ. ‘‘ਗਹੇਤ੍ਵਾ ਆਗਮਂਸੂ’’ਤਿਇਮਿਨਾ ‘‘ਉਸ੍ਸਾਰਿਯਿਤ੍ਥਾ’’ਤਿ ਏਤ੍ਥ ਉਕਾਰਸ੍ਸ ਉਗ੍ਗਹਤ੍ਥਤਞ੍ਚ ਸਰਧਾਤੁਸ੍ਸ ਗਤ੍ਯਤ੍ਥਤਞ੍ਚ ਅਜ੍ਜਤਨਿਞੁਂਵਿਭਤ੍ਤਿਯਾ ਤ੍ਥਤ੍ਤਞ੍ਚ ਦਸ੍ਸੇਤਿ, ਉਗ੍ਗਹੇਤ੍ਵਾ ਸਾਰਿਂਸੁ ਅਗਮਂਸੂਤਿ ਅਤ੍ਥੋ.

੨੯੮. ਯਤ੍ਥਾਤਿ ਯਸ੍ਮਿਂ ਠਾਨੇ. ਠਿਤਸ੍ਸ ਭਿਕ੍ਖੁਨੋ ਚਿਤ੍ਤਂ ਉਪ੍ਪਨ੍ਨਨ੍ਤਿ ਯੋਜਨਾ. ਤਤੋਤਿ ਚਿਤ੍ਤੁਪ੍ਪਨ੍ਨਤੋ. ਯਨ੍ਤਿ ਭਿਕ੍ਖੁਂ. ਪਕਤਿਵਚਨੇਨਾਤਿ ਉਚ੍ਚਾਸਦ੍ਦਮਕਤ੍ਵਾ ਪਵਤ੍ਤੇਨ ਸਭਾਵਵਚਨੇਨ. ਅਨ੍ਤੋਵਿਹਾਰੇਤਿ ਵਚਨਸ੍ਸ ਅਤਿਸਮ੍ਬਾਧਤ੍ਤਾ ਅਯੁਤ੍ਤਭਾਵਂ ਮਞ੍ਞਮਾਨੋ ਆਹ ‘‘ਅਪਿ ਚ ਅਨ੍ਤੋਉਪਚਾਰਸੀਮਾਯਾ’’ਤਿ.

੩੦੨. ਗਾਮਸ੍ਸ ਅਨ੍ਤਰੇ ਆਰਾਮੋ ਤਿਟ੍ਠਤੀਤਿ ਅਨ੍ਤਰਾਰਾਮੋ ਵਿਹਾਰੋ, ਤਂ ਗਚ੍ਛਤੀਤਿ ਦਸ੍ਸੇਨ੍ਤੋ ਆਹ ‘‘ਅਨ੍ਤੋਗਾਮੇ’’ਤਿਆਦੀਤਿ. ਛਟ੍ਠਂ.

੭. ਮਹਾਨਾਮਸਿਕ੍ਖਾਪਦਂ

੩੦੩. ਸਤ੍ਤਮੇ ‘‘ਭਗਵਤੋ’’ਤਿਪਦਂ ‘‘ਚੂਲ਼ਪਿਤੁਪੁਤ੍ਤੋ’’ਤਿਪਦੇ ਸਮ੍ਬਨ੍ਧੋ, ‘‘ਮਹਲ੍ਲਕਤਰੋ’’ਤਿਪਦੇ ਅਪਾਦਾਨਂ. ਚੂਲ਼ਪਿਤੁਪੁਤ੍ਤੋਤਿ ਸੁਦ੍ਧੋਦਨੋ, ਸਕ੍ਕੋਦਨੋ, ਸੁਕ੍ਕੋਦਨੋ, ਧੋਤੋਦਨੋ, ਅਮਿਤੋਦਨੋਤਿ ਪਞ੍ਚ ਜਨਾ ਭਾਤਰੋ, ਅਮਿਤਾ, ਪਾਲਿਤਾਤਿ ਦ੍ਵੇ ਭਗਿਨਿਯੋ. ਤੇਸੁ ਭਗਵਾ ਚ ਨਨ੍ਦੋ ਚ ਜੇਟ੍ਠਭਾਤੁਭੂਤਸ੍ਸ ਸੁਦ੍ਧੋਦਨਸ੍ਸ ਪੁਤ੍ਤਾ, ਆਨਨ੍ਦੋ ਕਨਿਟ੍ਠਭਾਤੁਭੂਤਸ੍ਸ ਅਮਿਤੋਦਨਸ੍ਸ ਪੁਤ੍ਤੋ, ਮਹਾਨਾਮੋ ਚ ਅਨੁਰੁਦ੍ਧੋ ਚ ਤਤਿਯਸ੍ਸ ਸੁਕ੍ਕੋਦਨਸ੍ਸ ਪੁਤ੍ਤਾ. ਸਕ੍ਕੋਦਨਧੋਤੋਦਨਾਨਂ ਪੁਤ੍ਤਾ ਅਪਾਕਟਾ. ਤਿਸ੍ਸਤ੍ਥੇਰੋ ਅਮਿਤਾਯ ਨਾਮ ਭਗਿਨਿਯਾ ਪੁਤ੍ਤੋ, ਪਾਲਿਤਾਯ ਪੁਤ੍ਤਧੀਤਰਾ ਅਪਾਕਟਾ. ਤਸ੍ਮਾ ਚੂਲ਼ਪਿਤੁਨੋ ਸੁਕ੍ਕੋਦਨਸ੍ਸ ਪੁਤ੍ਤੋ ਚੂਲ਼ਪਿਤੁਪੁਤ੍ਤੋਤਿ ਅਤ੍ਥੋ ਦਟ੍ਠਬ੍ਬੋ. ਦ੍ਵੀਸੁ ਫਲੇਸੂਤਿ ਹੇਟ੍ਠਿਮੇਸੁ ਦ੍ਵੀਸੁ ਫਲੇਸੁ. ਉਸ੍ਸਨ੍ਨਸਦ੍ਦੋ ਬਹੁਪਰਿਯਾਯੋਤਿ ਆਹ ‘‘ਬਹੂ’’ਤਿ. ਵਜਤੋਤਿ ਗੋਟ੍ਠਤੋ. ਤਞ੍ਹਿ ਗਾਵੋ ਗੋਚਰਟ੍ਠਾਨਤੋ ਪਟਿਕ੍ਕਮਿਤ੍ਵਾ ਨਿਵਾਸਤ੍ਥਾਯ ਵਜਨ੍ਤਿ ਗਚ੍ਛਨ੍ਤਿ ਅਸ੍ਮਿਨ੍ਤਿ ਵਜੋਤਿ ਵੁਚ੍ਚਤਿ.

੩੦੬. ਤਸ੍ਮਿਂ ਸਮਯੇਤਿ ਤਸ੍ਮਿਂ ਪਵਾਰਣਸਮਯੇ. ‘‘ਏਤ੍ਤਕੇਹੀ’’ਤਿਪਦਸ੍ਸ ਨਾਮਵਸੇਨ ਵਾ ਪਰਿਮਾਣਵਸੇਨ ਵਾ ਦੁਵਿਧਸ੍ਸ ਅਤ੍ਥਸ੍ਸ ਅਧਿਪ੍ਪੇਤਤ੍ਤਾ ਵੁਤ੍ਤਂ ‘‘ਨਾਮਵਸੇਨ ਪਰਿਮਾਣਵਸੇਨਾ’’ਤਿ. ਤੇਸੁ ਨਾਮਂ ਸਨ੍ਧਾਯ ਏਤਂ ਨਾਮਂ ਏਤੇਸਂ ਭੇਸਜ੍ਜਾਨਨ੍ਤਿ ਏਤ੍ਤਕਾਨੀਤਿ ਵਚਨਤ੍ਥੋ ਕਾਤਬ੍ਬੋ, ਪਰਿਮਾਣਂ ਸਨ੍ਧਾਯ ਏਤਂ ਪਰਿਮਾਣਂ ਏਤੇਸਨ੍ਤਿ ਏਤ੍ਤਕਾਨੀਤਿ ਵਚਨਤ੍ਥੋ ਕਾਤਬ੍ਬੋ. ‘‘ਅਞ੍ਞਂ ਭੇਸਜ੍ਜ’’ਨ੍ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਪਾਦਾਨਂ ਨਾਮਂ ਵਾ ਪਰਿਮਾਣਂ ਵਾ ਭਵੇਯ੍ਯਾਤਿ ਆਹ ‘‘ਸਬ੍ਬਿਨਾ ਪਵਾਰਿਤੋ’’ਤਿਆਦਿ.

੩੧੦. ਯੇਤਿ ਦਾਯਕਾ, ਪਵਾਰਿਤਾ ਹੋਨ੍ਤੀਤਿ ਸਮ੍ਬਨ੍ਧੋਤਿ. ਸਤ੍ਤਮਂ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਂ

੩੧੧. ਅਟ੍ਠਮੇ ‘‘ਅਭਿਮੁਖ’’ਨ੍ਤਿਇਮਿਨਾ ਅਭਿਸਦ੍ਦਸ੍ਸਤ੍ਥਂ ਦਸ੍ਸੇਤਿ. ‘‘ਉਯ੍ਯਾਤੋ’’ਤਿਪਦਸ੍ਸ ਉਟ੍ਠਹਿਤ੍ਵਾ ਯਾਤੋਤਿ ਦਸ੍ਸੇਨ੍ਤੋ ਆਹ ‘‘ਨਗਰਤੋ ਨਿਗ੍ਗਤੋ’’ਤਿ. ‘‘ਕਤਉਯ੍ਯੋਗ’’ਨ੍ਤਿ ਇਮਿਨਾ ਉਟ੍ਠਹਿਤ੍ਵਾ ਯੁਞ੍ਜਤਿ ਗਚ੍ਛਤੀਤਿ ਉਯ੍ਯੁਤ੍ਤਾਤਿ ਦਸ੍ਸੇਤਿ. ਧਾਤੂਨ, ਮਨੇਕਤ੍ਥਤ੍ਤਾ ਵੁਤ੍ਤਂ ‘‘ਗਾਮਤੋ ਨਿਕ੍ਖਨ੍ਤ’’ਨ੍ਤਿ.

੩੧੪. ਦ੍ਵਾਦਸ ਪੁਰਿਸਾ ਇਮਸ੍ਸ ਹਤ੍ਥਿਨੋਤਿ ਦ੍ਵਾਦਸਪੁਰਿਸੋ, ਆਵੁਧੋ ਹਤ੍ਥੇਸੁ ਏਤੇਸਨ੍ਤਿ ਆਵੁਧਹਤ੍ਥਾ. ਨਿਨ੍ਨਨ੍ਤਿ ਨਿਨ੍ਨਟ੍ਠਾਨਂ, ਪਸ੍ਸਤੋ ਭਿਕ੍ਖੁਨੋਤਿ ਸਮ੍ਬਨ੍ਧੋਤਿ. ਅਟ੍ਠਮਂ.

੯. ਸੇਨਾਵਾਸਸਿਕ੍ਖਾਪਦਂ

੩੧੯. ਨਵਮੇ ‘‘ਤਿਟ੍ਠਤੁ ਵਾ’’ਤਿਆਦਿਨਾ ਵਸਨਾਕਾਰਂ ਦਸ੍ਸੇਤਿ. ਵਾਸਦ੍ਦੋ ‘‘ਚਙ੍ਕਮਤੁ ਵਾ’’ਤਿਅਤ੍ਥਂ ਸਮ੍ਪਿਣ੍ਡੇਤਿ. ਕਿਞ੍ਚਿ ਇਰਿਯਾਪਥਨ੍ਤਿ ਚਤੂਸੁ ਇਰਿਯਾਪਥੇਸੁ ਕਿਞ੍ਚਿ ਇਰਿਯਾਪਥਂ. ਯਥਾ ਰੁਦ੍ਧਮਾਨੇ ਸਞ੍ਚਾਰੋ ਛਿਜ੍ਜਤਿ, ਏਵਂ ਰੁਦ੍ਧਾ ਸਂਵੁਤਾ ਹੋਤੀਤਿ ਯੋਜਨਾ. ‘‘ਰੁਦ੍ਧੋ’’ਤਿ ਇਮਿਨਾ ‘‘ਪਲਿਬੁਦ੍ਧੋ’’ਤਿ ਏਤ੍ਥ ਪਰਿਪੁਬ੍ਬਸ੍ਸ ਬੁਧਿਧਾਤੁਸ੍ਸ ਅਧਿਪ੍ਪਾਯਤ੍ਥਂ ਦਸ੍ਸੇਤੀਤਿ. ਨਵਮਂ.

੧੦. ਉਯ੍ਯੋਧਿਕਸਿਕ੍ਖਾਪਦਂ

੩੨੨. ਦਸਮੇ ਯੁਜ੍ਝਨ੍ਤੀਤਿ ਸਂਪਹਰਨ੍ਤਿ. ‘‘ਬਲਸ੍ਸ ਅਗ੍ਗਂ ਏਤ੍ਥਾ’’ਤਿਇਮਿਨਾ ਭਿਨ੍ਨਾਧਿਕਰਣਬਾਹਿਰਤ੍ਥਸਮਾਸਂ ਦਸ੍ਸੇਤਿ. ‘‘ਜਾਨਨ੍ਤੀ’’ਤਿਪਦਂ ਅਤ੍ਥਸਮ੍ਪੁਣ੍ਣਤ੍ਥਾਯ ਪਕ੍ਖਿਤ੍ਤਂ. ਅਗ੍ਗਨ੍ਤਿ ਕੋਟ੍ਠਾਸਂ. ਬਲਂ ਗਣੀਯਤਿ ਏਤ੍ਥਾਤਿ ਬਲਗ੍ਗਨ੍ਤਿ ਵਚਨਤ੍ਥੋਪਿ ਯੁਜ੍ਜਤਿ. ਤੇਨਾਹ ‘‘ਬਲਗਣਨਟ੍ਠਾਨ’’ਨ੍ਤਿ. ਇਦਞ੍ਹਿ ਵਚਨਂ ਅਮ੍ਬਸੇਚਨਗਰੁਸਿਨਨਯੇਨ ਵੁਤ੍ਤਂ. ਕਥਂ? ‘‘ਬਲਗਣਨਟ੍ਠਾਨ’’ਨ੍ਤਿ ਵਦਨ੍ਤੇਨ ਅਟ੍ਠਕਥਾਚਰਿਯੇਨ ‘‘ਬਲਸ੍ਸ ਅਗ੍ਗਂ ਜਾਨਨ੍ਤਿ ਏਤ੍ਥਾਤਿ ਬਲਗ੍ਗ’’ਨ੍ਤਿ ਵਚਨਤ੍ਥਸ੍ਸ ਪਿਣ੍ਡਤ੍ਥੋ ਚ ਞਾਪੀਯਤਿ, ‘‘ਬਲਂ ਗਣੀਯਤਿ ਏਤ੍ਥਾਤਿ ਬਲਗ੍ਗ’’ਨ੍ਤਿ ਵਚਨਤ੍ਥੋ ਚ ਦਸ੍ਸੀਯਤਿ. ਵਿਯੂਹੀਯਤੇ ਸਮ੍ਪਿਣ੍ਡੀਯਤੇ ਬ੍ਯੂਹੋ, ਸੇਨਾਯ ਬ੍ਯੂਹੋ ਸੇਨਾਬ੍ਯੂਹੋਤਿ ਅਤ੍ਥਂ ਦਸ੍ਸੇਤਿ ‘‘ਸੇਨਾਯ ਵਿਯੂਹ’’ਨ੍ਤਿਆਦਿਨਾ. ਅਣਤਿ ਭੇਰਵਸਦ੍ਦਂ ਕਰੋਤੀਤਿ ਅਣੀਕਂ, ਮੁਦ੍ਧਜਣਕਾਰੋ, ਹਤ੍ਥੀਯੇਵ ਅਣੀਕਂ ਹਤ੍ਥਾਣੀਕਂ. ਏਸੇਵ ਨਯੋ ਸੇਸੇਸੁਪਿ. ਯੋ ਹਤ੍ਥੀ ਪੁਬ੍ਬੇ ਵੁਤ੍ਤੋ, ਤੇਨ ਹਤ੍ਥਿਨਾਤਿ ਯੋਜਨਾਤਿ. ਦਸਮਂ.

ਅਚੇਲਕਵਗ੍ਗੋ ਪਞ੍ਚਮੋ.