੬. ਸੁਰਾਪਾਨਵਗ੍ਗੋ

੧. ਸੁਰਾਪਾਨਸਿਕ੍ਖਾਪਦ-ਅਤ੍ਥਯੋਜਨਾ

੩੨੬. ਸੁਰਾਪਾਨਵਗ੍ਗਸ੍ਸ ਪਠਮੇ ਭਦ੍ਦਾ ਵਤਿ ਏਤ੍ਥਾਤਿ ਭਦ੍ਦਵਤਿਕਾਤਿ ਚ, ਭਦ੍ਦਾ ਵਤਿ ਭਦ੍ਦਵਤਿ, ਸਾ ਏਤ੍ਥ ਅਤ੍ਥੀਤਿ ਭਦ੍ਦਵਤਿਕਾਤਿ ਚ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਸੋ’’ਤਿਆਦਿ. ਸੋਤਿ ਗਾਮੋ ਲਭੀਤਿ ਸਮ੍ਬਨ੍ਧੋ. ਪਥਂ ਗਚ੍ਛਨ੍ਤੀਤਿ ਪਥਾਵਿਨੋਤਿ ਕਤੇ ਅਦ੍ਧਿਕਾਯੇਵਾਤਿ ਆਹ ‘‘ਅਦ੍ਧਿਕਾ’’ਤਿ. ਅਦ੍ਧਂ ਗਚ੍ਛਨ੍ਤੀਤਿ ਅਦ੍ਧਿਕਾ. ‘‘ਪਥਿਕਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ‘‘ਤੇਜਸਾ ਤੇਜ’’ਨ੍ਤਿਪਦਾਨਿ ਸਮ੍ਬਨ੍ਧਾਪੇਕ੍ਖਾਨਿ ਚ ਹੋਨ੍ਤਿ, ਪਦਾਨਂ ਸਮਾਨਤ੍ਤਾ ਸਮ੍ਬਨ੍ਧੋ ਚ ਸਮਾਨੋਤਿ ਮਞ੍ਞਿਤੁਂ ਸਕ੍ਕੁਣੇਯ੍ਯਾ ਚ ਹੋਨ੍ਤਿ, ਤਸ੍ਮਾ ਤੇਸਂ ਸਮ੍ਬਨ੍ਧਞ੍ਚ ਤਸ੍ਸ ਅਸਮਾਨਤਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਤ੍ਤਨੋ ਤੇਜਸਾ ਨਾਗਸ੍ਸ ਤੇਜ’’ਨ੍ਤਿ. ‘‘ਆਨੁਭਾਵੇਨਾ’’ਤਿਇਮਿਨਾ ਪਨ ਤੇਜਸਦ੍ਦਸ੍ਸ ਅਤ੍ਥਂ ਦਸ੍ਸੇਤਿ. ਕਪੋਤਸ੍ਸ ਪਾਦੋ ਕਪੋਤੋ ਉਪਚਾਰੇਨ, ਤਸ੍ਸ ਏਸੋ ਕਾਪੋਤੋ, ਵਣ੍ਣੋ. ਕਾਪੋਤੋ ਵਿਯ ਵਣ੍ਣੋ ਅਸ੍ਸਾਤਿ ਕਾਪੋਤਿਕਾਤਿ ਦਸ੍ਸੇਨ੍ਤੋ ਆਹ ‘‘ਕਪੋਤਪਾਦਸਮਵਣ੍ਣਰਤ੍ਤੋਭਾਸਾ’’ਤਿ. ਪਸਨ੍ਨਸਦ੍ਦਸ੍ਸ ਪਸਾਦਸਦ੍ਧਾਦਯੋ ਨਿਵਤ੍ਤੇਤੁਂ ‘‘ਸੁਰਾਮਣ੍ਡਸ੍ਸੇਤਂ ਅਧਿਵਚਨ’’ਨ੍ਤਿ ਵੁਤ੍ਤਂ. ਪਞ੍ਚਾਭਿਞ੍ਞਸ੍ਸ ਸਤੋਤਿ ਪਞ੍ਚਾਭਿਞ੍ਞਸ੍ਸ ਸਮਾਨਸ੍ਸ ਸਾਗਤਸ੍ਸਾਤਿ ਯੋਜਨਾ.

੩੨੮. ‘‘ਮਧੁਕਪੁਪ੍ਫਾਦੀਨਂ ਰਸੇਨ ਕਤੋ’’ਤਿਇਮਿਨਾ ਪੁਪ੍ਫਾਨਂ ਰਸੇਨ ਕਤੋ ਆਸਵੋ ਪੁਪ੍ਫਾਸਵੋਤਿ ਵਚਨਤ੍ਥਂ ਦਸ੍ਸੇਤਿ. ਏਸ ਨਯੋ ‘‘ਫਲਾਸਵੋ’’ਤਿਆਦੀਸੁਪਿ. ਸੁਰਾਮੇਰਯਾਨਂ ਵਿਸੇਸਂ ਦਸ੍ਸੇਤੁਂ ਵੁਤ੍ਤਂ ‘‘ਸੁਰਾ ਨਾਮਾ’’ਤਿਆਦਿ. ਪਿਟ੍ਠਕਿਣ੍ਣਪਕ੍ਖਿਤ੍ਤਾਤਿ ਪਿਟ੍ਠੇਨ ਚ ਕਿਣ੍ਣੇਨ ਚ ਪਕ੍ਖਿਤ੍ਤਾ ਕਤਾ ਵਾਰੁਣੀਤਿ ਸਮ੍ਬਨ੍ਧੋ. ਕਿਣ੍ਣਾਤਿ ਚ ਸੁਰਾਯ ਬੀਜਂ. ਤਞ੍ਹਿ ਕਿਰਨ੍ਤਿ ਨਾਨਾਸਮ੍ਭਾਰਾਨਿ ਮਿਸ੍ਸੀਭਵਨ੍ਤਿ ਏਤ੍ਥਾਤਿ ਕਿਣ੍ਣਾਤਿ ਵੁਚ੍ਚਤਿ. ਤਸ੍ਸਾਯੇਵ ਮਣ੍ਡੇਤਿ ਯੋਜਨਾ. ਸੁਰਨਾਮਕੇਨ ਏਕੇਨ ਵਨਚਰਕੇਨ ਕਤਾਤਿ ਸੁਰਾ. ਮਦਂ ਜਨੇਤੀਤਿ ਮੇਰਯਂ.

੩੨੯. ਲੋਣਸੋਵੀਰਕਨ੍ਤਿ ਏਵਂਨਾਮਕਂ ਪਾਨਂ. ਸੁਤ੍ਤਨ੍ਤਿਪਿ ਏਵਮੇਵ. ਤਸ੍ਮਿਨ੍ਤਿ ਸੂਪਸਂਪਾਕੇ. ਤੇਲਂ ਪਨ ਪਚਨ੍ਤੀਤਿ ਸਮ੍ਬਨ੍ਧੋ. ਨਤ੍ਥਿ ਤਿਖਿਣਂ ਮਜ੍ਜਂ ਏਤ੍ਥਾਤਿ ਅਤਿਖਿਣਮਜ੍ਜਂ, ਅਤਿਖਿਣਮਜ੍ਜੇ ਤਸ੍ਮਿਂਯੇਵ ਤੇਲੇਤਿ ਅਤ੍ਥੋ. ਯਂ ਪਨਾਤਿ ਤੇਲਂ ਪਨ. ਤਿਖਿਣਂ ਮਜ੍ਜਂ ਇਮਸ੍ਸ ਤੇਲਸ੍ਸਾਤਿ ਤਿਖਿਣਮਜ੍ਜਂ. ਯਤ੍ਥਾਤਿ ਤੇਲੇ. ਅਰਿਟ੍ਠੋਤਿ ਏਵਂਨਾਮਕਂ ਭੇਸਜ੍ਜਂ. ਤਨ੍ਤਿ ਅਰਿਟ੍ਠਂ, ‘‘ਸਨ੍ਧਾਯਾ’’ਤਿਪਦੇ ਅਵੁਤ੍ਤਕਮ੍ਮਂ. ਏਤਨ੍ਤਿ ‘‘ਅਮਜ੍ਜਂ ਅਰਿਟ੍ਠ’’ਨ੍ਤਿਵਚਨਂ, ‘‘ਵੁਤ੍ਤ’’ਨ੍ਤਿਪਦੇ ਵੁਤ੍ਤਕਮ੍ਮਨ੍ਤਿ. ਪਠਮਂ.

੨. ਅਙ੍ਗੁਲਿਪਤੋਦਕਸਿਕ੍ਖਾਪਦਂ

੩੩੦. ਦੁਤਿਯੇ ਅਙ੍ਗੁਲੀਹਿ ਪਤੁਜ੍ਜਨਂ ਅਙ੍ਗੁਲਿਪਤੋਦੋ, ਸੋਯੇਵ ਅਙ੍ਗੁਲਿਪਤੋਦਕੋਤਿ ਦਸ੍ਸੇਨ੍ਤੋ ਆਹ ‘‘ਅਙ੍ਗੁਲੀਹੀ’’ਤਿਆਦਿ. ਉਤ੍ਤਨ੍ਤੋਤਿ ਅਵਤਪਨ੍ਤੋ. ਅਵਤਪਨ੍ਤੋਤਿ ਚ ਅਤ੍ਥਤੋ ਕਿਲਮਨ੍ਤੋਯੇਵਾਤਿ ਆਹ ‘‘ਕਿਲਮਨ੍ਤੋ’’ਤਿ. ਕਿਲਮਨ੍ਤੋ ਹੁਤ੍ਵਾਤਿ ਯੋਜਨਾ. ਅਸ੍ਸਾਸਗਹਣੇਨ ਪਸ੍ਸਾਸੋਪਿ ਗਹੇਤਬ੍ਬੋਤਿ ਆਹ ‘‘ਅਸ੍ਸਾਸਪਸ੍ਸਾਸਸਞ੍ਚਾਰੋ’’ਤਿ. ਤਮ੍ਪੀਤਿ ਭਿਕ੍ਖੁਨਿਮ੍ਪੀਤਿ. ਦੁਤਿਯਂ.

੩. ਹਸਧਮ੍ਮਸਿਕ੍ਖਾਪਦਂ

੩੩੫. ਤਤਿਯੇ ਪਕਾਰੇਨ ਕਰੀਯਤਿ ਠਪੀਯਤੀਤਿ ਪਕਤਂ ਪਞ੍ਞਤ੍ਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਯਂ ਭਗਵਤਾ’’ਤਿਆਦਿ. ਯਨ੍ਤਿ ਸਿਕ੍ਖਾਪਦਂ.

੩੩੬. ਹਸਸਙ੍ਖਾਤੋ ਧਮ੍ਮੋ ਸਭਾਵੋ ਹਸਧਮ੍ਮੋਤਿ ਵੁਤ੍ਤੇ ਅਤ੍ਥਤੋ ਕੀਲ਼ਿਕਾਯੇਵਾਤਿ ਆਹ ‘‘ਕੀਲ਼ਿਕਾ ਵੁਚ੍ਚਤੀ’’ਤਿ.

੩੩੭. ਗੋਪ੍ਫਕਾਨਨ੍ਤਿ ਚਰਣਗਣ੍ਠਿਕਾਨਂ. ਤੇ ਹਿ ਪਾਦੇ ਪਾਦਂ ਠਪਨਕਾਲੇ ਅਞ੍ਞਮਞ੍ਞੂਪਰਿ ਠਪਨਤੋ ਗੋਪੀਯਨ੍ਤੀਤਿ ਗੋਪ੍ਫਾ, ਤੇ ਏਵ ਗੋਪ੍ਫਕਾਤਿ ਵੁਚ੍ਚਨ੍ਤਿ. ਪਾਦਸ੍ਸ ਹਿ ਉਪਰਿ ਪਾਦਂ ਠਪਨਕਾਲੇ ਏਕਸ੍ਸ ਉਪਰਿ ਏਕੋ ਨ ਠਪੇਤਬ੍ਬੋ. ਤੇਨਾਹ ਭਗਵਾ ‘‘ਪਾਦੇ ਪਾਦਂ ਅਚ੍ਚਾਧਾਯਾ’’ਤਿ (ਦੀ. ਨਿ. ੨.੧੯੬; ਮ. ਨਿ. ੧.੪੨੩; ਅ. ਨਿ. ੩.੧੬). ਓਟ੍ਠਜੋ ਦੁਤਿਯੋ. ਓਰੋਹਨ੍ਤਸ੍ਸ ਭਿਕ੍ਖੁਨੋਤਿ ਸਮ੍ਬਨ੍ਧੋ.

੩੩੮. ਫਿਯਾਰਿਤ੍ਤਾਦੀਹੀਤਿ ਆਦਿਸਦ੍ਦੇਨ ਲਙ੍ਕਾਰਾਦਯੋ ਸਙ੍ਗਣ੍ਹਾਤਿ. ਕੇਚਿ ਵਦਨ੍ਤੀਤਿ ਸਮ੍ਬਨ੍ਧੋ. ਪਤਨੁਪ੍ਪਤਨਵਾਰੇਸੂਤਿ ਪਤਨਵਾਰ ਉਪ੍ਪਤਨਵਾਰੇਸੁ. ਤਤ੍ਥਾਤਿ ਤਸ੍ਸਂ ਖਿਤ੍ਤਕਥਲਾਯਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਠਪੇਤ੍ਵਾ ਕੀਲ਼ਨ੍ਤਸ੍ਸਾਤਿ ਸਮ੍ਬਨ੍ਧੋ. ਲਿਖਿਤੁਂ ਵਟ੍ਟਤਿ ਕੀਲ਼ਾਧਿਪ੍ਪਾਯਸ੍ਸ ਵਿਰਹਿਤਤ੍ਤਾਤਿ ਅਧਿਪ੍ਪਾਯੋ. ਕੀਲ਼ਾਧਿਪ੍ਪਾਯੇਨ ਅਤ੍ਥਜੋਤਕਂ ਅਕ੍ਖਰਂ ਲਿਖਨ੍ਤਸ੍ਸਾਪਿ ਆਪਤ੍ਤਿਯੇਵਾਤਿ ਵਦਨ੍ਤਿ. ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇਤਿ. ਤਤਿਯਂ.

੪. ਅਨਾਦਰਿਯਸਿਕ੍ਖਾਪਦਂ

੩੪੨. ਚਤੁਤ੍ਥੇ ਧਮ੍ਮੋ ਨਾਮ ਤਨ੍ਤਿਯੇਵਾਤਿ ਆਹ ‘‘ਤਨ੍ਤੀ’’ਤਿ. ਪਵੇਣੀਤਿ ਤਸ੍ਸੇਵ ਵੇਵਚਨਂ. ‘‘ਤਂ ਵਾ ਨ ਸਿਕ੍ਖਿਤੁਕਾਮੋ’’ਤਿ ਏਤ੍ਥ ਤਂਸਦ੍ਦਸ੍ਸ ਅਤ੍ਥਮਾਵਿਕਾਤੁਂ ਵੁਤ੍ਤਂ ‘‘ਯੇਨ ਪਞ੍ਞਤ੍ਤੇਨਾ’’ਤਿ. ਵਿਨਯੇ ਅਪਞ੍ਞਤ੍ਤਂ ਸਨ੍ਧਾਯ ਵੁਤ੍ਤਂ ‘‘ਅਪਞ੍ਞਤ੍ਤੇਨਾ’’ਤਿ ਆਹ ‘‘ਸੁਤ੍ਤੇ ਵਾ ਅਭਿਧਮ੍ਮੇ ਵਾ ਆਗਤੇਨਾ’’ਤਿ.

੩੪੪. ਪਵੇਣਿਯਾਤਿ ਉਪਾਲਿਆਦਿਕਾਯ ਆਚਰਿਯਪਰਮ੍ਪਰਸਙ੍ਖਾਤਾਯ ਤਨ੍ਤਿਯਾ. ਕੁਰੁਨ੍ਦਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਮਹਾਪਚ੍ਚਰਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਤਂ ਸਬ੍ਬਨ੍ਤਿ ਕੁਰੁਨ੍ਦਿਵਾਦਮਹਾਪਚ੍ਚਰਿਵਾਦਸਙ੍ਖਾਤਂ ਸਬ੍ਬਂ ਤਂ ਵਚਨਂ. ਪਵੇਣਿਯਾ ਆਗਤੇਤਿ ਪਵੇਣਿਯਾ ਆਗਤਸਙ੍ਖਾਤੇ ਮਹਾਅਟ੍ਠਕਥਾਵਾਦੇਤਿ. ਚਤੁਤ੍ਥਂ.

੩੪੫. ਪਞ੍ਚਮੇ ਮਨੁਸ੍ਸਵਿਗ੍ਗਹੇਤਿ ਮਨੁਸ੍ਸਵਿਗ੍ਗਹਪਾਰਾਜਿਕੇਤਿ. ਪਞ੍ਚਮਂ.

੬. ਜੋਤਿਸਿਕ੍ਖਾਪਦਂ

੩੫੦. ਛਟ੍ਠੇ ਜਨਪਦਸ੍ਸ ਨਾਮਤ੍ਤਾ ਬਹੁਵਚਨਵਸੇਨ ‘‘ਭਗ੍ਗੇਸੂ’’ਤਿ ਪਾਲ਼ਿਯਂ ਵੁਤ੍ਤਂ. ਸੁਸੁਮਾਰਸਣ੍ਠਾਨੋ ਪਬ੍ਬਤਸਙ੍ਖਾਤੋ ਗਿਰਿ ਏਤ੍ਥਾਤਿ ਸੁਸੁਮਾਰਗਿਰਿ, ਏਤਸ੍ਸ ਵਾ ਮਾਪਿਤਕਾਲੇ ਸੁਸੁਮਾਰੋ ਗਿਰਤਿ ਸਦ੍ਦਂ ਨਿਗ੍ਗਿਰਤਿ ਏਤ੍ਥਾਤਿ ਸੁਸੁਮਾਰਗਿਰੀਤਿ ਅਤ੍ਥਮਨਪੇਕ੍ਖਿਤ੍ਵਾ ਵੁਤ੍ਤਂ ‘‘ਨਗਰਸ੍ਸ ਨਾਮ’’ਨ੍ਤਿ. ਤਂ ਪਨਾਤਿ ਵਨਂ ਪਨ. ‘‘ਮਿਗਾਨ’’ਨ੍ਤਿਆਦਿਨਾ ਮਿਗਾਨਂ ਅਭਯੋ ਦੀਯਤਿ ਏਤ੍ਥਾਤਿ ਮਿਗਦਾਯੋਤਿ ਅਤ੍ਥਂ ਦਸ੍ਸੇਤਿ.

੩੫੨. ‘‘ਜੋਤਿਕੇ’’ਤਿਪਦਸ੍ਸ ਜੋਤਿਸ੍ਸ ਅਗ੍ਗਿਸ੍ਸ ਕਰਣਂ ਜੋਤਿਕਨ੍ਤਿ ਦਸ੍ਸੇਤੁਂ ਵੁਤ੍ਤਂ ‘‘ਜੋਤਿਕਰਣੇ’’ਤਿ.

੩੫੪. ‘‘ਸਮਾਦਹਿਤੁਕਾਮਤਾਯਾ’’ਤਿਪਦਂ ‘‘ਅਰਣਿਸਣ੍ਠਾਪਨਤੋ’’ਤਿਪਦੇ ਹੇਤੁ. ਜਾਲਾਤਿ ਸਿਖਾ. ਸਾ ਹਿ ਜਲਤਿ ਦਿਬ੍ਬਤੀਤਿ ਜਾਲਾਤਿ ਵੁਚ੍ਚਤਿ.

ਪਤਿਲਾਤਂ ਉਕ੍ਖਿਪਤੀਤਿ ਏਤ੍ਥ ‘‘ਪਤਿਤਾਲਾਤ’’ਨ੍ਤਿ ਵਤ੍ਤਬ੍ਬੇ ਤਕਾਰਲੋਪਂ ਕਤ੍ਵਾ ਸਨ੍ਧਿਵਸੇਨ ਪਤਿਲਾਤਨ੍ਤਿ ਵੁਤ੍ਤਨ੍ਤਿ ਆਹ ‘‘ਅਲਾਤਂ ਪਤਿਤਂ ਉਕ੍ਖਿਪਤੀ’’ਤਿ. ਅਲਾਤਨ੍ਤਿ ਉਮ੍ਮੁਕ੍ਕਂ. ਤਞ੍ਹਿ ਆਦਿਤ੍ਤਂ ਹੁਤ੍ਵਾ ਅਤਿਉਣ੍ਹਤ੍ਤਾ ਨ ਲਾਤਬ੍ਬਂ ਨ ਗਣ੍ਹਿਤਬ੍ਬਨ੍ਤਿ ਅਲਾਤਨ੍ਤਿ ਵੁਚ੍ਚਤਿ. ਅਵਿਜ੍ਝਾਤਨ੍ਤਿ ਝਾਯਨਤੋ ਡਯ੍ਹਨਤੋ ਅਵਿਗਤਂ ਅਲਾਤਨ੍ਤਿ ਸਮ੍ਬਨ੍ਧੋ. ਝਾਯਨਂ ਡਯ੍ਹਨਂ ਝਾਤਂ, ਵਿਗਤਂ ਝਾਤਂ ਇਮਸ੍ਸਾਲਾਤਸ੍ਸਾਤਿ ਵਿਜ੍ਝਾਤਂ.

੩੫੬. ਪਦੀਪਾਦੀਨੀਤਿ ਪਦੀਪਜੋਤਿਕਾਦੀਨਿ. ਤਤ੍ਥਾਤਿ ਤਾਸੁ ਦੁਟ੍ਠਵਾਲ਼ਮਿਗਅਮਨੁਸ੍ਸਸਙ੍ਖਾਤਾਸੁ ਆਪਦਾਸੁ ਨਿਮਿਤ੍ਤਭੂਤਾਸੁ. ਨਿਮਿਤ੍ਤਤ੍ਥੇ ਚੇਤਂ ਭੁਮ੍ਮਵਚਨਨ੍ਤਿ. ਛਟ੍ਠਂ.

੭. ਨਹਾਨਸਿਕ੍ਖਾਪਦਂ

੩੬੬. ਸਤ੍ਤਮੇ ਪਾਰਂ ਗਚ੍ਛਨ੍ਤੋ ਨ ਕੇਵਲਂ ਸਉਦਕਾਯ ਨਦਿਯਾ ਏਵ ਨ੍ਹਾਯਿਤੁਂ ਵਟ੍ਟਤਿ, ਸੁਕ੍ਖਾਯ ਨਦਿਯਾਪਿ ਵਟ੍ਟਤੀਤਿ ਦਸ੍ਸੇਨ੍ਤੋ ਆਹ ‘‘ਸੁਕ੍ਖਾਯਾ’’ਤਿਆਦਿ. ਉਕ੍ਕਿਰਿਤ੍ਵਾਤਿ ਵਿਯੂਹਿਤ੍ਵਾ. ਆਵਾਟਾਯੇਵ ਖੁਦ੍ਦਕਟ੍ਠੇਨ ਆਵਾਟਕਾ, ਤੇਸੂਤਿ. ਸਤ੍ਤਮਂ.

੮. ਦੁਬ੍ਬਣ੍ਣਕਰਣਸਿਕ੍ਖਾਪਦਂ

੩੬੮. ਅਟ੍ਠਮੇ ਅਲਭੀਤਿ ਲਭੋਤਿ ਵਚਨਤ੍ਥੇ ਅਪਚ੍ਚਯਂ ਕਤ੍ਵਾ ਣਪਚ੍ਚਯਸ੍ਸ ਸ੍ਵਤ੍ਥਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਲਭੋਯੇਵ ਲਾਭੋ’’ਤਿ. ਅਪਚ੍ਚਯਮਕਤ੍ਵਾ ਪਕਤਿਯਾ ਣਪਚ੍ਚਯੋਪਿ ਯੁਤ੍ਤੋਯੇਵਾਤਿ ਦਟ੍ਠਬ੍ਬਂ. ਸਦ੍ਦਨ੍ਤਰੋਪਿ ਅਤ੍ਥਨ੍ਤਰਾਭਾਵਾ ਸਮਾਸੋ ਹੋਤੀਤਿ ਆਹ ‘‘ਨਵਚੀਵਰਲਾਭੇਨਾਤਿ ਵਤ੍ਤਬ੍ਬੇ’’ਤਿ. ਅਨੁਨਾਸਿਕਲੋਪਨ੍ਤਿ ‘‘ਨਵ’’ਨ੍ਤਿ ਏਤ੍ਥ ਨਿਗ੍ਗਹੀਤਸ੍ਸ ਵਿਨਾਸਂ. ਨਿਗ੍ਗਹੀਤਞ੍ਹਿ ਨਾਸਂ ਅਨੁਗਤਤ੍ਤਾ ‘‘ਅਨੁਨਾਸਿਕ’’ਨ੍ਤਿ ਵੁਚ੍ਚਤਿ, ਤਸ੍ਸ ਅਦਸ੍ਸਨ, ਮਕਤ੍ਵਾਤਿ ਅਤ੍ਥੋ. ਮਜ੍ਝੇ ਠਿਤਪਦਦ੍ਵਯੇਤਿ ‘‘ਨਵ’’ਨ੍ਤਿ ਚ ‘‘ਚੀਵਰਲਾਭੇਨਾ’’ਤਿ ਚ ਦ੍ਵਿਨ੍ਨਂ ਪਦਾਨਮਨ੍ਤਰੇ ‘‘ਠਿਤੇ ਪਨਾ’’ਤਿ ਚ ‘‘ਭਿਕ੍ਖੁਨਾ’’ਤਿ ਚ ਪਦਦ੍ਵਯੇ. ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਨਿਪਾਤੋਤਿ ਨਿਪਾਤਮਤ੍ਤਂ. ਅਲਭੀਤਿ ਲਭੋਤਿ ਵਚਨਤ੍ਥਸ੍ਸ ਅਭਿਧੇਯ੍ਯਤ੍ਥਂ ਦਸ੍ਸੇਤੁਂ ‘‘ਭਿਕ੍ਖੁਨਾ’’ਤਿ ਵੁਤ੍ਤਨ੍ਤਿ ਆਹ ‘‘ਭਿਕ੍ਖੁਨਾ’’ਤਿਆਦਿ. ਪਦਭਾਜਨੇ ਪਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਯਂ ਚੀਵਰਂ. ‘‘ਚੀਵਰ’’ਨ੍ਤਿ ਏਤ੍ਥ ਚੀਵਰਸਰੂਪਂ ਦਸ੍ਸੇਨ੍ਤੋ ਆਹ ‘‘ਯਂ ਨਿਵਾਸੇਤੁਂ ਵਾ’’ਤਿਆਦਿ. ਚਮ੍ਮਕਾਰਨੀਲਨ੍ਤਿ ਚਮ੍ਮਕਾਰਾਨਂ ਤਿਫਲੇ ਪਕ੍ਖਿਤ੍ਤਸ੍ਸ ਅਯਗੂਥਸ੍ਸ ਨੀਲਂ. ਮਹਾਪਚ੍ਚਰਿਯਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਦੁਬ੍ਬਣ੍ਣੋ ਕਰੀਯਤਿ ਅਨੇਨਾਤਿ ਦੁਬ੍ਬਣ੍ਣਕਰਣਂ, ਕਪ੍ਪਬਿਨ੍ਦੁਨ੍ਤਿ ਆਹ ‘‘ਕਪ੍ਪਬਿਨ੍ਦੁਂ ਸਨ੍ਧਾਯਾ’’ਤਿ. ਆਦਿਯਨ੍ਤੇਨ ਭਿਕ੍ਖੁਨਾ ਆਦਾਤਬ੍ਬਨ੍ਤਿ ਸਮ੍ਬਨ੍ਧੋ. ਕੋਣੇਸੂਤਿ ਅਨ੍ਤੇਸੁ. ਵਾਸਦ੍ਦੋ ਅਨਿਯਮਵਿਕਪ੍ਪਤ੍ਥੋ. ਅਕ੍ਖਿਮਣ੍ਡਲਮਤ੍ਤਂ ਵਾਤਿ ਅਕ੍ਖਿਮਣ੍ਡਲਸ੍ਸ ਪਮਾਣਂ ਵਾ ਕਪ੍ਪਬਿਨ੍ਦੂਤਿ ਸਮ੍ਬਨ੍ਧੋ. ਪਟ੍ਟੇ ਵਾਤਿ ਅਨੁਵਾਤਪਟ੍ਟੇ ਵਾ. ਗਣ੍ਠਿਯਂ ਵਾਤਿ ਗਣ੍ਠਿਕਪਟ੍ਟੇ ਵਾ. ਪਾਲ਼ਿਕਪ੍ਪੋਤਿ ਦ੍ਵੇ ਵਾ ਤਿਸ੍ਸੋ ਵਾ ਤਤੋ ਅਧਿਕਾ ਵਾ ਬਿਨ੍ਦੁਆਵਲੀ ਕਤ੍ਵਾ ਕਤੋ ਕਪ੍ਪੋ. ਕਣ੍ਣਿਕਕਪ੍ਪੋਤਿ ਕਣ੍ਣਿਕਂ ਵਿਯ ਬਿਨ੍ਦੁਗੋਚ੍ਛਕਂ ਕਤ੍ਵਾ ਕਤੋ ਕਪ੍ਪੋ. ਆਦਿਸਦ੍ਦੇਨ ਅਗ੍ਘਿਯਕਪ੍ਪਾਦਯੋ ਸਙ੍ਗਣ੍ਹਾਤਿ. ਸਬ੍ਬਤ੍ਥਾਤਿ ਸਬ੍ਬਾਸੁ ਅਟ੍ਠਕਥਾਸੁ. ਏਕੋਪਿ ਬਿਨ੍ਦੁ ਵਟ੍ਟੋਯੇਵ ਵਟ੍ਟਤੀਤਿ ਆਹ ‘‘ਏਕਂ ਵਟ੍ਟਬਿਨ੍ਦੁ’’ਨ੍ਤਿ.

੩੭੧. ਅਗ੍ਗਲ਼ਾਦੀਨੀਤਿ ਆਦਿਸਦ੍ਦੇਨ ਅਨੁਵਾਤਪਰਿਭਣ੍ਡੇ ਸਙ੍ਗਣ੍ਹਾਤੀਤਿ. ਅਟ੍ਠਮਂ.

੯. ਵਿਕਪ੍ਪਨਸਿਕ੍ਖਾਪਦਂ

੩੭੪. ਨਵਮੇ ਤਸ੍ਸਾਤਿ ਏਤ੍ਥ ਤਸਦ੍ਦਸ੍ਸ ਵਿਸਯੋ ਚੀਵਰਸਾਮਿਕੋਯੇਵਾਤਿ ਆਹ ‘‘ਚੀਵਰਸਾਮਿਕਸ੍ਸਾ’’ਤਿ. ਦੁਤਿਯਸ੍ਸ ਤਸਦ੍ਦਸ੍ਸ ਵਿਸਯੋ ਵਿਨਯਧਰੋਯੇਵਾਤਿ ਆਹ ‘‘ਯੇਨਾ’’ਤਿਆਦਿ. ‘‘ਅਵਿਸ੍ਸਾਸਨ੍ਤੋ’’ਤਿਪਦਸ੍ਸ ਕਿਰਿਯਾਵਿਸੇਸਨਭਾਵਂ ਦਸ੍ਸੇਤੁਂ ਵੁਤ੍ਤਂ ‘‘ਅਵਿਸ੍ਸਾਸੇਨਾ’’ਤਿ. ਤੇਨਾਤਿ ਵਿਨਯਧਰੇਨਾਤਿ. ਨਵਮਂ.

੧੦. ਚੀਵਰਾਪਨਿਧਾਨਸਿਕ੍ਖਾਪਦਂ

੩੭੭. ਦਸਮੇ ‘‘ਅਪਨੇਤ੍ਵਾ’’ਤਿਇਮਿਨਾ ਅਪਇਤ੍ਯੂਪਸਗ੍ਗਸ੍ਸ ਅਤ੍ਥਂ ਦਸ੍ਸੇਤਿ. ਨਿਧੇਨ੍ਤੀਤਿ ਨਿਗੂਹਿਤ੍ਵਾ ਠਪੇਨ੍ਤਿ. ਹਸਾਧਿਪ੍ਪਾਯੋਤਿ ਹਸਂ, ਹਸਨਤ੍ਥਾਯ ਵਾ ਅਧਿਪ੍ਪਾਯੋ. ਪਰਿਕ੍ਖਾਰਸ੍ਸ ਸਰੂਪਂ ਦਸ੍ਸੇਤੁਂ ਵੁਤ੍ਤਂ ‘‘ਪਤ੍ਤਤ੍ਥਵਿਕਾਦਿ’’ਨ੍ਤਿ. ਪਤ੍ਤਸ੍ਸ ਪਾਲ਼ਿਯਮਾਗਤਤ੍ਤਾ ਪਤ੍ਤਸ੍ਸ ਥਵਿਕਾਤਿ ਅਤ੍ਥੋਯੇਵ ਗਹੇਤਬ੍ਬੋ, ਨ ਪਤ੍ਤੋ ਚ ਥਵਿਕਾ ਚਾਤਿ. ‘‘ਸਮਣੇਨ ਨਾਮਾ’’ਤਿਪਦਂ ‘‘ਭਵਿਤੁ’’ਨ੍ਤਿਪਦੇ ਭਾਵਕਤ੍ਤਾਤਿ. ਦਸਮਂ.

ਸੁਰਾਪਾਨਵਗ੍ਗੋ ਛਟ੍ਠੋ.