੧੦. ਦਨ੍ਤਪੋਨਸਿਕ੍ਖਾਪਦਂ

੨੬੩. ਦਸਮੇ ਦਨ੍ਤਕਟ੍ਠਨ੍ਤਿ ਦਨ੍ਤਪੋਨਂ. ਤਞ੍ਹਿ ਦਨ੍ਤੋ ਕਸੀਯਤਿ ਵਿਲੇਖੀਯਤਿ ਅਨੇਨਾਤਿ ‘‘ਦਨ੍ਤਕਟ੍ਠ’’ਨ੍ਤਿ ਵੁਚ੍ਚਤਿ. ‘‘ਸਬ੍ਬ’’ਨ੍ਤਿ ਆਦਿਨਾ ਸਬ੍ਬਮੇਵ ਪਂਸੁਕੂਲਂ ਸਬ੍ਬਪਂਸੁਕੂਲਂ, ਤਮਸ੍ਸਤ੍ਥੀਤਿ ‘‘ਸਬ੍ਬਪਂਸੁਕੂਲਿਕੋ’’ਤਿ ਅਤ੍ਥਂ ਦਸ੍ਸੇਤਿ. ਸੋਤਿ ਭਿਕ੍ਖੁ ਪਰਿਭੁਞ੍ਜਤਿ ਕਿਰਾਤਿ ਸਮ੍ਬਨ੍ਧੋ. ਸੁਸਾਨੇਤਿ ਆਲ਼ਹਨੇ. ਤਞ੍ਹਿ ਛਵਾਨਂ ਸਯਨਟ੍ਠਾਨਤ੍ਤਾ ‘‘ਸੁਸਾਨ’’ਨ੍ਤਿ ਵੁਚ੍ਚਤਿ ਨਿਰੁਤ੍ਤਿਨਯੇਨ. ਤਤ੍ਥਾਤਿ ਸੁਸਾਨੇ. ਪੁਨ ਤਤ੍ਥਾਤਿ ਏਵਮੇਵ. ਅਯ੍ਯਸਰੂਪਞ੍ਚ ਵੋਸਾਟਿਤਕਸਰੂਪਞ੍ਚ ਦਸ੍ਸੇਤੁਂ ਵੁਤ੍ਤਂ ‘‘ਅਯ੍ਯਵੋਸਾਟਿਤਕਾਨੀਤਿ ਏਤ੍ਥਾ’’ਤਿ. ਤਤ੍ਥ ‘‘ਅਯ੍ਯਾ…ਪੇ… ਪਿਤਾਮਹਾ’’ਤਿਇਮਿਨਾ ਅਯ੍ਯਸਰੂਪਂ ਦਸ੍ਸੇਤਿ. ‘‘ਵੋ…ਪੇ… ਭੋਜਨੀਯਾਨੀ’’ਤਿਇਮਿਨਾ ਵੋਸਾਟਿਤਕਸਰੂਪਂ. ਅਯ੍ਯਸਙ੍ਖਾਤਾਨਂ ਪਿਤਿਪਿਤਾਮਹਾਨਂ ਅਤ੍ਥਾਯ, ਤੇ ਵਾ ਉਦ੍ਦਿਸ੍ਸ ਛਡ੍ਡਿਤਾਨਿ ਵੋਸਾਟਿਤਕਸਙ੍ਖਤਾਨਿ ਖਾਦਨੀਯਭੋਜਨੀਯਾਨਿ ਅਯ੍ਯਵੋਸਾਟਿਤਕਾਨੀਤਿ ਵਿਗ੍ਗਹੋ ਕਾਤਬ੍ਬੋ. ਮਨੁਸ੍ਸਾ ਠਪੇਨ੍ਤਿ ਕਿਰਾਤਿ ਸਮ੍ਬਨ੍ਧੋ. ਯਨ੍ਤਿ ਖਾਦਨੀਯਭੋਜਨੀਯਂ. ਤੇਸਨ੍ਤਿ ਞਾਤਕਾਨਂ. ਪਿਣ੍ਡਂ ਪਿਣ੍ਡਂ ਕਤ੍ਵਾਤਿ ਸਙ੍ਘਾਟਂ ਸਙ੍ਘਾਟਂ ਕਤ੍ਵਾ. ਅਞ੍ਞਨ੍ਤਿ ਵੁਤ੍ਤਖਾਦਨੀਯਭੋਜਨੀਯਤੋ ਅਞ੍ਞਂ. ਉਮ੍ਮਾਰੇਪੀਤਿ ਸੁਸਾਨਸ੍ਸ ਇਨ੍ਦਖੀਲੇਪਿ. ਸੋ ਹਿ ਉਦ੍ਧਟੋ ਕਿਲੇਸਮਾਰੋ ਏਤ੍ਥਾਤਿ ‘‘ਉਮ੍ਮਾਰੋ’’ਤਿ ਵੁਚ੍ਚਤਿ. ਬੋਧਿਸਤ੍ਤੋ ਹਿ ਅਭਿਨਿਕ੍ਖਮਨਕਾਲੇ ਪੁਤ੍ਤਂ ਚੁਮ੍ਬਿਸ੍ਸਾਮੀਤਿ ਓਵਰਕਸ੍ਸ ਇਨ੍ਦਖੀਲੇ ਠਤ੍ਵਾ ਪਸ੍ਸਨ੍ਤੋ ਮਾਤਰਂ ਪੁਤ੍ਤਸ੍ਸ ਨਲਾਟੇ ਹਤ੍ਥਂ ਠਪੇਤ੍ਵਾ ਸਯਨ੍ਤਿਂ ਦਿਸ੍ਵਾ ‘‘ਸਚੇ ਮੇ ਪੁਤ੍ਤਂ ਗਣ੍ਹੇਯ੍ਯਂ, ਮਾਤਾ ਤਸ੍ਸ ਪਬੁਜ੍ਝੇਯ੍ਯ, ਪਬੁਜ੍ਝਮਾਨਾਯ ਅਨ੍ਤਰਾਯੋ ਭਵੇਯ੍ਯਾ’’ਤਿ ਅਭਿਨਿਕ੍ਖਮਨਨ੍ਤਰਾਯਭਯੇਨ ਪੁਤ੍ਤਦਾਰੇ ਪਰਿਚ੍ਚਜਿਤ੍ਵਾ ਇਨ੍ਦਖੀਲਤੋ ਨਿਵਤ੍ਤਿਤ੍ਵਾ ਮਹਾਭਿਨਿਕ੍ਖਮਨਂ ਨਿਕ੍ਖਮਿ. ਤਸ੍ਮਾ ਬੋਧਿਸਤ੍ਤਸ੍ਸ ਠਤ੍ਵਾ ਪੁਤ੍ਤਦਾਰੇਸੁ ਅਪੇਕ੍ਖਾਸਙ੍ਖਾਤਸ੍ਸ ਮਾਰਸ੍ਸ ਉਦ੍ਧਟਟ੍ਠਾਨਤ੍ਤਾ ਸੋ ਇਨ੍ਦਖੀਲੋ ਨਿਪ੍ਪਰਿਯਾਯੇਨ ‘‘ਉਮ੍ਮਾਰੋ’’ਤਿ ਵੁਚ੍ਚਤਿ, ਅਞ੍ਞੇ ਪਨ ਰੂਲ਼੍ਹੀਵਸੇਨ. ਥਿਰੋਤਿ ਥਦ੍ਧੋ. ਘਨਬਦ੍ਧੋਤਿ ਘਨੇਨ ਬਦ੍ਧੋ. ਕਥਿਨੇਨ ਮਂਸੇਨ ਆਬਦ੍ਧੋਤਿ ਅਤ੍ਥੋ. ਵਠਤਿ ਥੂਲੋ ਭਵਤੀਤਿ ਵਠੋ, ਮੁਦ੍ਧਜਦੁਤਿਯੋਯਂ, ਸੋ ਅਸ੍ਸਤ੍ਥੀਤਿ ਵਠਰੋਤਿ ਦਸ੍ਸੇਨ੍ਤੋ ਆਹ ‘‘ਵਠਰੋਤਿ ਥੂਲੋ’’ਤਿ. ‘‘ਸਲ੍ਲਕ੍ਖੇਮਾ’’ਤਿਇਮਿਨਾ ‘‘ਮਞ੍ਞੇ’’ਤਿ ਏਤ੍ਥ ਮਨਧਾਤੁ ਸਲ੍ਲਕ੍ਖਣਤ੍ਥੋ, ਮਕਾਰਸ੍ਸੇਕਾਰੋਤਿ ਦਸ੍ਸੇਤਿ. ਹੀਤਿ ਸਚ੍ਚਂ. ਤੇਸਨ੍ਤਿ ਮਨੁਸ੍ਸਾਨਂ.

੨੬੪. ਸਮ੍ਮਾਤਿ ਅਵਿਪਰੀਤਂ. ਅਸਲ੍ਲਕ੍ਖੇਤ੍ਵਾਤਿ ਆਹਾਰਸਦ੍ਦਸ੍ਸ ਖਾਦਨੀਯਭੋਜਨੀਯਾਦੀਸੁ ਨਿਰੂਲ਼੍ਹਭਾਵਂ ਅਮਞ੍ਞਿਤ੍ਵਾ. ਭਗਵਾ ਪਨ ਠਪੇਸੀਤਿ ਸਮ੍ਬਨ੍ਧੋ. ਯਥਾਉਪ੍ਪਨ੍ਨਸ੍ਸਾਤਿ ਯੇਨਾਕਾਰੇਨ ਉਪ੍ਪਨ੍ਨਸ੍ਸ. ਪਿਤਾ ਪੁਤ੍ਤਸਙ੍ਖਾਤੇ ਦਾਰਕੇ ਸਞ੍ਞਾਪੇਨ੍ਤੋ ਵਿਯ ਭਗਵਾ ਤੇ ਭਿਕ੍ਖੂ ਸਞ੍ਞਾਪੇਨ੍ਤੋਤਿ ਯੋਜਨਾ.

੨੬੫. ਏਤਦੇਵਾਤਿ ਤਿਣ੍ਣਮਾਕਾਰਾਨਮਞ੍ਞਤਰਵਸੇਨ ਅਦਿਨ੍ਨਮੇਵ ਸਨ੍ਧਾਯਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ਮਾਤਿਕਾਯਂ ‘‘ਦਿਨ੍ਨ’’ਨ੍ਤਿ ਵੁਤ੍ਤਟ੍ਠਾਨਂ ਨਤ੍ਥਿ, ਅਥ ਕਸ੍ਮਾ ਪਦਭਾਜਨੇਯੇਵ ਵੁਤ੍ਤਨ੍ਤਿ ਆਹ ‘‘ਦਿਨ੍ਨਨ੍ਤਿ ਇਦ’’ਨ੍ਤਿਆਦਿ. ‘‘ਦਿਨ੍ਨ’’ਨ੍ਤਿ ਇਦਂ ਉਦ੍ਧਟਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ‘‘ਦਿਨ੍ਨ’’ਨ੍ਤਿ ਪਦਸ੍ਸ. ਨਿਦ੍ਦੇਸੇ ਚ ‘‘ਕਾਯੇਨ…ਪੇ… ਦੇਨ੍ਤੇ’’ਤਿ ਉਦ੍ਧਟਨ੍ਤਿ ਯੋਜਨਾ. ਏਵਨ੍ਤਿ ਇਮੇਹਿ ਤੀਹਾਕਾਰੇਹਿ ਦਦਮਾਨੇਤਿ ਸਮ੍ਬਨ੍ਧੋ. ਏਵਨ੍ਤਿ ਇਮੇਹਿ ਦ੍ਵੀਹਾਕਾਰੇਹਿ. ਆਦੀਯਮਾਨਨ੍ਤਿ ਸਮ੍ਬਨ੍ਧੋ. ਰਥਰੇਣੁਮ੍ਪੀਤਿ ਰਥਿਕਵੀਥਿਯਂ ਉਟ੍ਠਿਤਪਂਸੁਮ੍ਪਿ. ਪੁਬ੍ਬੇਤਿ ਪਠਮਪਵਾਰਣਸਿਕ੍ਖਾਪਦੇ. ਏਵਂ ਪਟਿਗ੍ਗਹਿਤਂ ਏਤਂ ਆਹਾਰਂ ਦਿਨ੍ਨਂ ਨਾਮ ਵੁਚ੍ਚਤੀਤਿ ਯੋਜਨਾ. ‘‘ਏਤਮੇਵਾ’’ਤਿ ਏਵਸ੍ਸ ਸਮ੍ਭਵਤੋ ਤਸ੍ਸ ਫਲਂ ਦਸ੍ਸੇਤੁਂ ਵੁਤ੍ਤਂ ‘‘ਨ ਇਦ’’ਨ੍ਤਿਆਦਿ. ਨਿਸ੍ਸਟ੍ਠਂ ਨ ਵੁਚ੍ਚਤੀਤਿ ਯੋਜਨਾ.

ਤਤ੍ਥਾਤਿ ‘‘ਕਾਯੇਨਾ’’ਤਿਆਦਿਵਚਨੇ. ਹੀਤਿ ਸਚ੍ਚਂ. ਨਤ੍ਥੁ ਕਰੀਯਤਿ ਇਮਾਯਾਤਿ ਨਤ੍ਥੁਕਰਣੀ, ਤਾਯ. ਨਾਸਾਪੁਟੇਨ ਪਟਿਗ੍ਗਣ੍ਹਾਤੀਤਿ ਸਮ੍ਬਨ੍ਧੋ. ਅਕਲ੍ਲਕੋਤਿ ਗਿਲਾਨੋ. ਹੀਤਿ ਸਚ੍ਚਂ. ਕਾਯੇਨ ਪਟਿਬਦ੍ਧੋ ਕਾਯਪਟਿਬਦ੍ਧੋ ਕਟਚ੍ਛੁਆਦੀਤਿ ਆਹ ‘‘ਕਟਚ੍ਛੁਆਦੀਸੂ’’ਤਿਆਦਿ. ਹੀਤਿ ਸਚ੍ਚਂ. ਪਾਤਿਯਮਾਨਨ੍ਤਿ ਪਾਤਾਪਿਯਮਾਨਂ.

ਏਤ੍ਥਾਤਿ ਇਮਸ੍ਮਿਂ ਸਿਕ੍ਖਾਪਦੇ. ‘‘ਪਞ੍ਚਹਙ੍ਗੇਹੀ’’ਤਿ ਪਦਸ੍ਸ ਵਿਤ੍ਥਾਰਂ ਦਸ੍ਸੇਨ੍ਤੋ ਆਹ ‘‘ਥਾਮਮਜ੍ਝਿਮਸ੍ਸਾ’’ਤਿਆਦਿ. ਤਨ੍ਤਿ ਦਾਤਬ੍ਬਵਤ੍ਥੁਂ.

ਤਤ੍ਥਾਤਿ ‘‘ਹਤ੍ਥਪਾਸੋ ਪਞ੍ਞਾਯਤੀ’’ਤਿਵਚਨੇ. ਗਚ੍ਛਨ੍ਤੋਪਿ ਠਿਤੇਨੇਵ ਸਙ੍ਗਹਿਤੋ. ਭੂਮਟ੍ਠਸ੍ਸਾਤਿ ਭੂਮਿਯਂ ਠਿਤਸ੍ਸ. ਆਕਾਸਟ੍ਠਸ੍ਸਾਤਿ ਆਕਾਸੇ ਠਿਤਸ੍ਸ. ‘‘ਹਤ੍ਥਂ ਅਙ੍ਗ’’ਨ੍ਤਿ ਪਦੇਹਿ ਅਵਯਵਿਸਮ੍ਬਨ੍ਧੋ ਕਾਤਬ੍ਬੋ. ਵੁਤ੍ਤਨਯੇਨੇਵਾਤਿ ‘‘ਭੂਮਟ੍ਠਸ੍ਸ ਚ ਸੀਸੇਨਾ’’ਤਿਆਦਿਨਾ ਵੁਤ੍ਤਨਯੇਨੇਵ. ਪਕ੍ਖੀਤਿ ਸਕੁਣੋ. ਸੋ ਹਿ ਪਕ੍ਖਯੁਤ੍ਤਤ੍ਤਾ ਪਕ੍ਖੀਤਿ ਵੁਚ੍ਚਤਿ. ਹਤ੍ਥੀਤਿ ਕੁਞ੍ਜਰੋ. ਸੋ ਹਿ ਸੋਣ੍ਡਸਙ੍ਖਾਤਹਤ੍ਥਯੁਤ੍ਤਤ੍ਤਾ ਹਤ੍ਥੀਤਿ ਵੁਚ੍ਚਤਿ. ਅਦ੍ਧੇਨ ਅਟ੍ਠਮਂ ਰਤਨਮਸ੍ਸਾਤਿ ਅਦ੍ਧਟ੍ਠਮਰਤਨੋ, ਹਤ੍ਥੀ, ਤਸ੍ਸ. ਤੇਨਾਤਿ ਹਤ੍ਥਿਨਾ.

ਏਕੋ ਦਾਯਕੋ ਵਦਤੀਤਿ ਸਮ੍ਬਨ੍ਧੋ. ਓਣਮਤੀਤਿ ਹੇਟ੍ਠਾ ਨਮਤਿ. ਏਤ੍ਤਾਵਤਾਤਿ ਏਕਦੇਸਸਮ੍ਪਟਿਚ੍ਛਨਮਤ੍ਤੇਨ. ਤਤੋਤਿ ਸਮ੍ਪਟਿਚ੍ਛਨਤੋ. ਉਗ੍ਘਾਟੇਤ੍ਵਾਤਿ ਵਿਵਰਿਤ੍ਵਾ. ਕਾਜੇਨਾਤਿ ਬ੍ਯਾਭਙ੍ਗਿਯਾ. ਸਾ ਹਿ ਕਚਤਿ ਬਨ੍ਧਤਿ ਵਿਵਿਧਂ ਭਾਰਂ ਅਸ੍ਮਿਨ੍ਤਿ ਕਾਚੋਤਿ ਵੁਚ੍ਚਤਿ, ਚਕਾਰਸ੍ਸ ਜਕਾਰੇ ਕਤੇ ਕਾਜੋਪਿ ਯੁਤ੍ਤੋਯੇਵ. ਤਿਂਸ ਹਤ੍ਥਾ ਰਤਨਾਨਿ ਇਮਸ੍ਸਾਤਿ ਤਿਂਸਹਤ੍ਥੋ, ਵੇਣੁ. ਗੁਲ਼ਕੁਮ੍ਭੋਤਿ ਫਾਣਿਤੇਨ ਪੂਰਿਤੋ ਘਟੋ. ਪਟਿਗ੍ਗਹਿਤਮੇਵਾਤਿ ਕੁਮ੍ਭੇਸੁ ਹਤ੍ਥਪਾਸਤੋ ਬਹਿ ਠਿਤੇਸੁਪਿ ਅਭਿਹਾਰਕਸ੍ਸ ਹਤ੍ਥਪਾਸੇ ਠਿਤਤ੍ਤਾ ਪਟਿਗ੍ਗਹਿਤਮੇਵਾਤਿ ਵੁਤ੍ਤਂ ਹੋਤਿ. ਉਚ੍ਛੁਯਨ੍ਤਦੋਣਿਤੋਤਿ ਉਚ੍ਛੁਂ ਪੀਲ਼ਨਯਨ੍ਤਸ੍ਸ ਅਮ੍ਬਣਤੋ.

ਬਹੂ ਪਤ੍ਤਾ ਠਪਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਠਿਤਸ੍ਸ ਭਿਕ੍ਖੁਨੋ ਹਤ੍ਥਪਾਸੇਤਿ ਯੋਜਨਾ. ਠਤ੍ਵਾ ਫੁਸਿਤ੍ਵਾ ‘‘ਨਿਸਿਨ੍ਨਸ੍ਸ ਭਿਕ੍ਖੁਨੋ’’ਤਿ ਪਾਠਸੇਸੇਨ ਯੋਜੇਤਬ੍ਬਂ. ਠਿਤੇਨ ਵਾ ਨਿਸਿਨ੍ਨੇਨ ਵਾ ਨਿਪਨ੍ਨੇਨ ਵਾ ਦਾਯਕੇਨ ਦਿਯ੍ਯਤੀਤਿ ਸਮ੍ਬਨ੍ਧੋ.

ਪਥਵਿਯਂ ਠਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਯਂ ਯਨ੍ਤਿ ਯਂ ਯਂ ਪਤ੍ਤਂ. ਯਤ੍ਥ ਕਤ੍ਥਚੀਤਿ ਯੇਸੁ ਕੇਸੁਚੀਤਿ ਸਮ੍ਬਨ੍ਧੋ. ਤਨ੍ਤਿ ਤਂ ਵਚਨਂ.

ਤਤ੍ਥ ਤਸ੍ਮਿਂ ਠਾਨੇ ਜਾਤੋ ਤਤ੍ਥਜਾਤੋ, ਅਲੁਤ੍ਤਸਮਾਸੋਯਂ, ਸੋਯੇਵ ਤਤ੍ਥਜਾਤਕੋ, ਤਸ੍ਮਿਂ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਜਾਤਕੇ ਨ ਰੁਹਤਿ ਯਥਾ, ਏਵਂ ਨ ਰੁਹਤਿਯੇਵਾਤਿ ਯੋਜਨਾ. ਥਾਮਮਜ੍ਝਿਮੇਨ ਪੁਰਿਸੇਨ ਸੁਟ੍ਠੁ ਹਰਿਤਬ੍ਬਨ੍ਤਿ ਸਂਹਾਰਿਯਂ, ਤਂਯੇਵ ਸਂਹਾਰਿਮਂ ਯਕਾਰਸ੍ਸ ਮਕਾਰਂ ਕਤ੍ਵਾ, ਨ ਸਂਹਾਰਿਮਂ ਅਸਂਹਾਰਿਮਂ, ਤਸ੍ਮਿਂ. ਤੇਪੀਤਿ ਤੇ ਅਸਂਹਾਰਿਮਾਪਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਤ੍ਥਜਾਤਕਸਙ੍ਖੇਪੂਪਗਾਤਿ ਤਤ੍ਥਜਾਤਕੇ ਸਮੋਧਾਨੇਤ੍ਵਾ ਖੇਪਂ ਪਕ੍ਖੇਪਂ ਉਪਗਤਾ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਇਦਞ੍ਹਿ ਵਾਕ੍ਯਨ੍ਤਰਤ੍ਤਾ ਪੁਨਪ੍ਪੁਨਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਾਨੀਤਿ ਤਿਨ੍ਤਿਣਿਕਾਦਿਪਣ੍ਣਾਨਿ. ਸਨ੍ਧਾਰੇਤੁਨ੍ਤਿ ਸਮ੍ਮਾ ਧਾਰੇਤੁਂ. ਠਿਤੋ ਦਾਯਕੋਤਿ ਸਮ੍ਬਨ੍ਧੋ.

ਲਦ੍ਧਸ੍ਸ ਲਦ੍ਧਸ੍ਸ ਵਤ੍ਥੁਸ੍ਸ ਸਨ੍ਨਿਧਿਟ੍ਠਾਨਤ੍ਤਾ, ਪਕ੍ਖਿਤ੍ਤਟ੍ਠਾਨਤ੍ਤਾ ਵਾ ਥਵੀਯਤਿ ਪਸਂਸੀਯਤੀਤਿ ਥਵਿਕਾ, ਤਤੋ. ਪੁਞ੍ਛਿਤ੍ਵਾ ਪਟਿਗ੍ਗਹੇਤ੍ਵਾਤਿ ‘‘ਪੁਞ੍ਛਿਤ੍ਵਾ ਵਾ ਪਟਿਗ੍ਗਹੇਤ੍ਵਾ ਵਾ’’ਤਿ ਅਨਿਯਮਵਿਕਪ੍ਪਤ੍ਥੋ ਵਾਸਦ੍ਦੋ ਅਜ੍ਝਾਹਰਿਤਬ੍ਬੋ. ਤੇਸੁ ਤੇਸੁ ਵਤ੍ਥੂਸੁ ਰਞ੍ਜਤਿ ਲਗ੍ਗਤੀਤਿ ਰਜੋ, ਤਂ. ਵਿਨਯੇ ਪਞ੍ਞਤ੍ਤਂ ਦੁਕ੍ਕਟਂ ਵਿਨਯਦੁਕ੍ਕਟਂ. ਤਂ ਪਨਾਤਿ ਭਿਕ੍ਖਂ ਪਨ. ਪਟਿਗ੍ਗਹੇਤ੍ਵਾ ਦੇਥਾਤਿ ਮਂ ਪਟਿਗ੍ਗਹਾਪੇਤ੍ਵਾ ਮਮ ਦੇਥਾਤਿ ਅਧਿਪ੍ਪਾਯੋ.

ਤਤੋ ਤਤੋਤਿ ਤਸ੍ਮਾ ਤਸ੍ਮਾ ਠਾਨਾ ਉਟ੍ਠਾਪੇਤ੍ਵਾਤਿ ਸਮ੍ਬਨ੍ਧੋ. ਤਨ੍ਤਿ ਭਿਕ੍ਖਂ. ਤਸ੍ਸਾਤਿ ਅਨੁਪਸਮ੍ਪਨ੍ਨਸ੍ਸ.

ਸੋ ਵਤ੍ਤਬ੍ਬੋਤਿ ਸੋ ਦਿਯ੍ਯਮਾਨੋ ਭਿਕ੍ਖੁ ਦਾਯਕੇਨ ਭਿਕ੍ਖੁਨਾ ਵਤ੍ਤਬ੍ਬੋਤਿ ਯੋਜਨਾ. ਇਮਨ੍ਤਿ ਸਰਜਪਤ੍ਤਂ. ਤੇਨਾਤਿ ਦਿਯ੍ਯਮਾਨਭਿਕ੍ਖੁਨਾ. ਤਥਾ ਕਾਤਬ੍ਬਨ੍ਤਿ ਯਥਾ ਦਾਯਕੇਨ ਭਿਕ੍ਖੁਨਾ ਵੁਤ੍ਤਂ, ਤਥਾ ਕਾਤਬ੍ਬਨ੍ਤਿ ਅਤ੍ਥੋ. ਉਪ੍ਲਵਤੀਤਿ ਉਪਰਿ ਗਚ੍ਛਤਿ, ਪ੍ਲੁ ਗਤਿਯਨ੍ਤਿ ਹਿ ਧਾਤੁਪਾਠੇਸੁ (ਸਦ੍ਦਨੀਤਿਧਾਤੁਮਾਲਾਯਂ ੧੬ ਲ਼ਕਾਰਨ੍ਤਧਾਤੁ) ਵੁਤ੍ਤਂ. ਏਤ੍ਥ ਉਇਤਿ ਉਪਸਗ੍ਗਸ੍ਸ ਅਤ੍ਥਦਸ੍ਸਨਤ੍ਥਂ ‘‘ਉਪਰੀ’’ਤਿ ਵੁਤ੍ਤਂ, ਪਕਾਰਲਕਾਰਸਂਯੋਗੋ ਦਟ੍ਠਬ੍ਬੋ. ਪੋਤ੍ਥਕੇਸੁ ਪਨ ‘‘ਉਪ੍ਪਿਲਵਤੀ’’ਤਿ ਲਿਖਨ੍ਤਿ, ਸੋ ਅਪਾਠੋ. ਕਞ੍ਜਿਕਨ੍ਤਿ ਬਿਲਙ੍ਗਂ. ਤਞ੍ਹਿ ਕੇਨ ਜਲੇਨ ਅਞ੍ਜਿਯਂ ਅਭਿਬ੍ਯਤ੍ਤਂ ਅਸ੍ਸਾਤਿ ‘‘ਕਞ੍ਜਿਯ’’ਨ੍ਤਿ ਵੁਚ੍ਚਤਿ, ਤਮੇਵ ਕਞ੍ਜਿਕਂ ਯਕਾਰਸ੍ਸ ਕਕਾਰਂ ਕਤ੍ਵਾ. ਤਂ ਪਵਾਹੇਤ੍ਵਾ, ਅਪਨੇਤ੍ਵਾਤਿ ਅਤ੍ਥੋ. ਯਤ੍ਥਾਤਿ ਯਸ੍ਮਿਂ ਠਾਨੇ. ਸੁਕ੍ਖਮੇਵ ਭਤ੍ਤਂ ਭਜਿਤਬ੍ਬਟ੍ਠੇਨ ਸੇਵਿਤਬ੍ਬਟ੍ਠੇਨਾਤਿ ਸੁਕ੍ਖਭਤ੍ਤਂ, ਤਸ੍ਮਿਂ. ਪੁਰਤੋਤਿ ਭਿਕ੍ਖੁਸ੍ਸ ਪੁਰਤੋ, ਪੁਬ੍ਬੇ ਵਾ. ਫੁਸਿਤਾਨੀਤਿ ਬਿਨ੍ਦੂਨਿ. ਤਾਨਿ ਹਿ ਸਮ੍ਬਾਧਟ੍ਠਾਨੇਸੁਪਿ ਫੁਸਨ੍ਤੀਤਿ ਫੁਸਿਤਾਨੀਤਿ ਵੁਚ੍ਚਨ੍ਤਿ.

ਉਲ਼ੁਙ੍ਕੋਤਿ ਕੋਸਿਯਸਕੁਣਨਾਮੋ ਦੀਘਦਣ੍ਡਕੋ ਏਕੋ ਭਾਜਨਵਿਸੇਸੋ, ਤੇਨ. ਥੇਵਾਤਿ ਫੁਸਿਤਾਨਿ. ਤਾਨਿ ਹਿ ਸਮ੍ਬਾਧਟ੍ਠਾਨੇਸੁਪਿ ਫੁਸਿਤਤ੍ਤਾ ਥਵੀਯਨ੍ਤਿ ਪਸਂਸੀਯਨ੍ਤੀਤਿ ‘‘ਥੇਵਾ’’ਤਿ ਵੁਚ੍ਚਨ੍ਤਿ. ਚਰੁਕੇਨਾਤਿ ਚਰੀਯਤਿ ਭਕ੍ਖੀਯਤੀਤਿ ਚਰੁ, ਹਬ੍ਯਪਾਕੋ, ਤਂ ਕਰੋਤਿ ਅਨੇਨਾਤਿ ਚਰੁਕਂ, ਥਾਲ੍ਯਾਦਿਕਂ ਖੁਦ੍ਦਕਭਾਜਨਂ, ਤੇਨ ਆਕਿਰਿਯਮਾਨੇਤਿ ਸਮ੍ਬਨ੍ਧੋ. ਕਾਲ਼ਵਣ੍ਣਕਾਮੇਹਿ ਮਾਨੀਯਤੀਤਿ ਮਸਿ. ਖਾਦਤੀਤਿ ਛਾਰੋ ਖਕਾਰਸ੍ਸ ਛਕਾਰਂ, ਦਕਾਰਸ੍ਸ ਚ ਰਕਾਰਂ ਕਤ੍ਵਾ, ਖਾਰਰਸੋ, ਸੋ ਇਮਿਸ੍ਸਤ੍ਥੀਤਿ ਛਾਰਿਕਾ. ਉਪ੍ਪਤਿਤ੍ਵਾਤਿ ਉਦ੍ਧਂ ਗਨ੍ਤ੍ਵਾ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਫਾਲੇਤ੍ਵਾਤਿ ਛਿਨ੍ਦਿਤ੍ਵਾ. ਦੇਨ੍ਤਾਨਂ ਅਨੁਪਸਮ੍ਪਨ੍ਨਾਨਨ੍ਤਿ ਸਮ੍ਬਨ੍ਧੋ. ਪਾਯਾਸਸ੍ਸਾਤਿ ਪਾਯਾਸੇਨ. ਤਥਾਪੀਤਿ ਤੇਨ ਮੁਖਵਟ੍ਟਿਯਾ ਗਹਣਾਕਾਰੇਨਪਿ.

ਆਭੋਗਂ ਕਤ੍ਵਾਤਿ ‘‘ਪਟਿਗ੍ਗਹੇਸ੍ਸਾਮੀ’’ਤਿ ਮਨਸਿਕਾਰਂ ਕਤ੍ਵਾ. ਸੋਤਿ ਨਿਦ੍ਦਂ ਓਕ੍ਕਨ੍ਤੋ ਭਿਕ੍ਖੁ. ਵਟ੍ਟਤਿਯੇਵਾਤਿ ਆਭੋਗਸ੍ਸ ਕਤਤ੍ਤਾ ਵਟ੍ਟਤਿਯੇਵ. ਅਨਾਦਰਨ੍ਤਿ ਅਨਾਦਰੇਨ, ਕਰਣਤ੍ਥੇ ਚੇਤਂ ਉਪਯੋਗਵਚਨਂ, ਅਨਾਦਰਂ ਹੁਤ੍ਵਾਤਿ ਵਾ ਯੋਜੇਤਬ੍ਬਂ. ਕੇਚੀਤਿ ਅਭਯਗਿਰਿਵਾਸਿਨੋ. ਕਾਯੇਨ ਪਟਿਬਦ੍ਧੋ ਕਾਯਪਟਿਬਦ੍ਧੋ, ਤੇਨ ਪਟਿਬਦ੍ਧੋ ਕਾਯਪਟਿਬਦ੍ਧਪਟਿਬਦ੍ਧੋ, ਤੇਨ. ਵਚਨਮਤ੍ਤਮੇਵਾਤਿ ‘‘ਪਟਿਬਦ੍ਧਪਟਿਬਦ੍ਧ’’ਨ੍ਤਿ ਏਕਂ ਅਤਿਰੇਕਂ ਪਟਿਬਦ੍ਧਵਚਨਮਤ੍ਤਮੇਵ ਨਾਨਂ, ਅਤ੍ਥਤੋ ਪਨ ਕਾਯਪਟਿਬਦ੍ਧਮੇਵਾਤਿ ਅਧਿਪ੍ਪਾਯੋ. ਯਮ੍ਪੀਤਿ ਯਮ੍ਪਿ ਵਤ੍ਥੁ. ਤਤ੍ਰਾਤਿ ਤਸ੍ਮਿਂ ਵਟ੍ਟਨੇ. ਤਨ੍ਤਿ ਅਨੁਜਾਨਨਂ.

ਨੇਯ੍ਯੋ ਅਧਿਪ੍ਪਾਯਂ ਨੇਤ੍ਵਾ ਞਾਤੋ ਅਤ੍ਥੋ ਇਮਸ੍ਸਾਤਿ ਨੇਯ੍ਯਤ੍ਥਂ. ਏਤ੍ਥਾਤਿ ਸੁਤ੍ਤੇ, ਸੁਤ੍ਤਸ੍ਸ ਵਾ. ਯਨ੍ਤਿ ਵਤ੍ਥੁ ਪਤਤੀਤਿ ਸਮ੍ਬਨ੍ਧੋ. ਪਰਿਗਲ਼ਿਤ੍ਵਾਤਿ ਭਸ੍ਸਿਤ੍ਵਾ. ਸੁਦ੍ਧਾਯਾਤਿ ਨਿਰਜਾਯ. ਸਾਮਨ੍ਤਿ ਸਯਂ. ਪੁਞ੍ਛਿਤ੍ਵਾ ਵਾਤਿਆਦੀਸੁ ਤਯੋ ਵਾਸਦ੍ਦਾ ਅਨਿਯਮਵਿਕਪ੍ਪਤ੍ਥਾ. ਪੁਞ੍ਛਿਤਾਦੀਸੁ ਹਿ ਏਕਸ੍ਮਿਂ ਕਿਚ੍ਚੇ ਕਤੇ ਇਤਰਕਿਚ੍ਚਂ ਕਾਤਬ੍ਬਂ ਨਤ੍ਥੀਤਿ ਅਧਿਪ੍ਪਾਯੋ. ਤੇਨਾਤਿ ਤੇਨ ਭਿਕ੍ਖੁਨਾ, ‘‘ਆਹਰਾਪੇਤੁਮ੍ਪੀ’’ਤਿਪਦੇ ਕਾਰਿਤਕਮ੍ਮਂ. ‘‘ਕਸ੍ਮਾ ਨ ਵਟ੍ਟਤੀ’’ਤਿ ਪੁਚ੍ਛਾ. ਹੀਤਿ ਵਿਤ੍ਥਾਰੋ. ਵਦਨ੍ਤੇਨ ਭਗਵਤਾਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੁਤ੍ਤਵਚਨੇਸੁ. ‘‘ਪਰਿਚ੍ਚਤ੍ਤਂ ਤਂ ਭਿਕ੍ਖਵੇ ਦਾਯਕੇਹੀ’’ਤਿ ਵਚਨੇਨਾਤਿ ਯੋਜਨਾ. ਅਧਿਪ੍ਪਾਯੋਤਿ ਨੀਤਤ੍ਥੋ ਅਧਿਪ੍ਪਾਯੋ, ਨਿਪ੍ਪਰਿਯਾਯੇਨ ਇਤਤ੍ਥੋ ਞਾਤਤ੍ਥੋ ਅਧਿਪ੍ਪਾਯੋਤਿ ਵੁਤ੍ਤਂ ਹੋਤਿ.

ਏਵਂ ਨੀਤਤ੍ਥਮਧਿਪ੍ਪਾਯਂ ਦਸ੍ਸੇਤ੍ਵਾ ਨੇਯ੍ਯਤ੍ਥ, ਮਧਿਪ੍ਪਾਯਂ ਦਸ੍ਸੇਨ੍ਤੋ ਆਹ ‘‘ਯਸ੍ਮਾ ਚਾ’’ਤਿ ਆਦਿ. ਤਨ੍ਤਿ ਪਰਿਭੁਞ੍ਜਨਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਦੁਤਿਯਦਿਵਸੇਪੀਤਿ ਪਿਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਅਪਰਦਿਵਸੇਪੀਤਿ ਅਤ੍ਥੋ. ਅਧਿਪ੍ਪਾਯੋਤਿ ਨੇਯ੍ਯਤ੍ਥੋ ਅਧਿਪ੍ਪਾਯੋ ਨੇਤ੍ਵਾ ਇਯ੍ਯਤ੍ਥੋ ਞਾਤਤ੍ਥੋ ਅਧਿਪ੍ਪਾਯੋਤਿ ਵੁਤ੍ਤਂ ਹੋਤਿ.

ਭੁਞ੍ਜਨ੍ਤਾਨਂ ਭਿਕ੍ਖੂਨਨ੍ਤਿ ਸਮ੍ਬਨ੍ਧੋ. ਹੀਤਿ ਵਿਤ੍ਥਾਰੋ. ਦਨ੍ਤਾਤਿ ਦਸਨਾ. ਤੇ ਹਿ ਦਂਸੀਯਨ੍ਤਿ ਭਕ੍ਖੀਯਨ੍ਤਿ ਏਤੇਹੀਤਿ ‘‘ਦਨ੍ਤਾ’’ਤਿ ਵੁਚ੍ਚਨ੍ਤਿ. ਸਤ੍ਥਂਯੇਵ ਸਤ੍ਥਕਂ ਖੁਦ੍ਦਕਟ੍ਠੇਨ, ਤੇਨ ਪਟਿਗ੍ਗਹਿਤੇਨ ਸਤ੍ਥਕੇਨ. ਏਤਨ੍ਤਿ ਮਲਂ. ਤਨ੍ਤਿ ਲੋਹਗਨ੍ਧਮਤ੍ਤਂ. ਪਰਿਹਰਨ੍ਤੀਤਿ ਪਟਿਗ੍ਗਹੇਤ੍ਵਾ ਹਰਨ੍ਤਿ. ਹੀਤਿ ਸਚ੍ਚਂ, ਯਸ੍ਮਾ ਵਾ. ਤਂ ਸਤ੍ਥਕਂ ਪਰਿਭੋਗਤ੍ਥਾਯ ਯਸ੍ਮਾ ਨ ਪਰਿਹਰਨ੍ਤਿ, ਤਸ੍ਮਾ ਏਸੇਵ ਨਯੋਤਿ ਅਤ੍ਥੋ. ਉਗ੍ਗਹਿਤਪਚ੍ਚਯਾ, ਸਨ੍ਨਿਧਿਪਚ੍ਚਯਾ ਵਾ ਦੋਸੋ ਨਤ੍ਥੀਤਿ ਵੁਤ੍ਤਂ ਹੋਤਿ. ਤਤ੍ਥਾਤਿ ਤੇਸੁ ਤਕ੍ਕਖੀਰੇਸੁ. ਨੀਲਿਕਾਤਿ ਨੀਲਵਣ੍ਣਾ ਸ੍ਨੇਹਾ. ਆਮਕਤਕ੍ਕਾਦੀਸੂਤਿ ਅਪਕ੍ਕੇਸੁ ਤਕ੍ਕਖੀਰੇਸੁ.

ਕਿਲਿਟ੍ਠਉਦਕਨ੍ਤਿ ਸਮਲਂ ਉਦਕਂ. ਤਸ੍ਸਾਤਿ ਸਾਮਣੇਰਸ੍ਸ. ਪਤ੍ਤਗਤਂ ਓਦਨਨ੍ਤਿ ਸਮ੍ਬਨ੍ਧੋ. ਅਸ੍ਸਾਤਿ ਸਾਮਣੇਰਸ੍ਸ. ਉਗ੍ਗਹਿਤਕੋਤਿ ਅਵਗਹਿਤਕੋ. ‘‘ਉਞ੍ਞਾਤੋ’’ਤਿਆਦੀਸੁ (ਸਂ. ਨਿ. ੧.੧੧੨) ਵਿਯ ਉਕਾਰੋ ਓਕਾਰਵਿਪਰੀਤੋ ਹੋਤਿ, ਅਪਟਿਗ੍ਗਹੇਤ੍ਵਾ ਗਹਿਤਤ੍ਤਾ ਦੁਗ੍ਗਹਿਤਕੋਤਿ ਵੁਤ੍ਤਂ ਹੋਤਿ.

ਏਤੇਨਾਤਿ ਓਦਨੇਨ. ਪਟਿਗ੍ਗਹਿਤਮੇਵ ਹੋਤਿ ਹਤ੍ਥਤੋ ਅਮੁਤ੍ਤਤ੍ਤਾਤਿ ਅਧਿਪ੍ਪਾਯੋ.

ਪੁਨ ਪਟਿਗ੍ਗਹੇਤਬ੍ਬਂ ਸਾਪੇਕ੍ਖੇ ਸਤੀਤਿ ਅਧਿਪ੍ਪਾਯੋ. ਏਤ੍ਤੋਤਿ ਇਤੋ ਪਤ੍ਤਤੋ. ਸਾਮਣੇਰੋ ਪਕ੍ਖਿਪਤੀਤਿ ਸਮ੍ਬਨ੍ਧੋ. ਤਤੋਤਿ ਪਤ੍ਤਤੋ. ਕੇਚੀਤਿ ਅਭਯਗਿਰਿਵਾਸਿਨੋ. ਤਨ੍ਤਿ ‘‘ਪੁਨ ਪਟਿਗ੍ਗਹੇਤਬ੍ਬ’’ਨ੍ਤਿ ਵਦਨ੍ਤਾਨਂ ਕੇਸਞ੍ਚਿ ਆਚਰਿਯਾਨਂ ਵਚਨਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਯਨ੍ਤਿ ਪੂਵਭਤ੍ਤਾਦਿ.

ਅਤ੍ਤਨੋ ਵਾਤਿ ਸਾਮਣੇਰਸ੍ਸ ਵਾ. ਸਾਮਣੇਰਾਤਿ ਆਮਨ੍ਤਨਂ. ਤਸ੍ਸਾਤਿ ਸਾਮਣੇਰਸ੍ਸ. ਭਾਜਨੇਤਿ ਯਾਗੁਪਚਨਕਭਾਜਨੇ. ਯਾਗੁਕੁਟਨ੍ਤਿ ਯਾਗੁਯਾ ਪੂਰਿਤਂ ਕੁਟਂ. ਤਨ੍ਤਿ ਯਾਗੁਕੁਟਂ. ‘‘ਭਿਕ੍ਖੁਨਾ ਪਟਿਗ੍ਗਣ੍ਹਾਪੇਤੁ’’ਨ੍ਤਿ ਕਾਰਿਤਕਮ੍ਮਂ ਉਪਨੇਤਬ੍ਬਂ. ਗੀਵਂ ਠਪੇਤ੍ਵਾ ਆਵਜ੍ਜੇਤੀਤਿ ਸਮ੍ਬਨ੍ਧੋ. ਆਵਜ੍ਜੇਤੀਤਿ ਪਰਿਣਾਮੇਤਿ.

ਪਟਿਗ੍ਗਹਣੂਪਗਂ ਭਾਰਨ੍ਤਿ ਥਾਮਮਜ੍ਝਿਮੇਨ ਪੁਰਿਸੇਨ ਸਂਹਾਰਿਮਂ ਭਾਰਂ. ਬਲਵਤਾ ਸਾਮਣੇਰੇਨਾਤਿ ਸਮ੍ਬਨ੍ਧੋ. ਤੇਲਘਟਂ ਵਾਤਿ ਤੇਲੇਨ ਪਕ੍ਖਿਤ੍ਤਂ ਘਟਂ ਵਾ. ਲਗ੍ਗੇਨ੍ਤੀਤਿ ਲਮ੍ਬੇਨ੍ਤਿ. ਅਯਮੇਵ ਵਾ ਪਾਠੋ.

ਨਾਗਸ੍ਸ ਦਨ੍ਤੋ ਵਿਯਾਤਿ ਨਾਗਦਨ੍ਤਕੋ, ਸਦਿਸਤ੍ਥੇ ਕੋ. ਅਙ੍ਕੀਯਤੇ ਲਕ੍ਖੀਯਤੇ ਅਨੇਨਾਤਿ ਅਙ੍ਕੁਸੋ, ਗਜਮਤ੍ਥਕਮ੍ਹਿ ਵਿਜ੍ਝਨਕਣ੍ਡਕੋ. ਅਙ੍ਕੁਸੋ ਵਿਯਾਤਿ ਅਙ੍ਕੁਸਕੋ, ਤਸ੍ਮਿਂ ਅਙ੍ਕੁਸਕੇ ਵਾ ਲਗ੍ਗਿਤਾ ਹੋਨ੍ਤੀਤਿ ਸਮ੍ਬਨ੍ਧੋ. ਗਣ੍ਹਤੋਤਿ ਗਣ੍ਹਨ੍ਤਸ੍ਸ. ਮਞ੍ਚਸ੍ਸ ਹੇਟ੍ਠਾ ਹੇਟ੍ਠਾਮਞ੍ਚੋ, ਤਸ੍ਮਿਂ. ਤਨ੍ਤਿ ਤੇਲਥਾਲਕਂ.

ਆਰੋਹਨ੍ਤੇਹਿ ਚ ਓਰੋਹਨ੍ਤੇਹਿ ਚ ਨਿਚ੍ਚਂ ਸੇਵੀਯਤੀਤਿ ਨਿਸ੍ਸੇਣੀ, ਤਸ੍ਸਾ ਮਜ੍ਝਂ ਨਿਸ੍ਸੇਣਿਮਜ੍ਝਂ, ਤਸ੍ਮਿਂ. ਕਣ੍ਣੇ ਉਟ੍ਠਿਤਂ ਕਣ੍ਣਿਕਂ, ਕਣ੍ਣਮਲਂ, ਕਣ੍ਣਿਕਂ ਵਿਯ ਕਣ੍ਣਿਕਂ, ਯਥਾ ਹਿ ਕਣ੍ਣਮਲਂ ਕਣ੍ਣਤੋ ਉਟ੍ਠਹਿਤ੍ਵਾ ਸਯਂ ਪਵਤ੍ਤਤਿ, ਏਵਂ ਤੇਲਾਦਿਤੋ ਉਟ੍ਠਹਿਤ੍ਵਾ ਸਯਂ ਪਵਤ੍ਤਤੀਤਿ ਵੁਤ੍ਤਂ ਹੋਤਿ. ਘਨਚੁਣ੍ਣਨ੍ਤਿ ਕਥਿਨਚੁਣ੍ਣਂ. ਤਂਸਮੁਟ੍ਠਾਨਮੇਵ ਨਾਮਾਤਿ ਤਤੋ ਤੇਲਾਦਿਤੋ ਸਮੁਟ੍ਠਾਨਮੇਵ ਨਾਮ ਹੋਤੀਤਿ ਅਤ੍ਥੋ. ਏਤਨ੍ਤਿ ਕਣ੍ਣਿਕਾਦਿ. ਇਦਂ ਪਦਂ ਪੁਬ੍ਬਾਪਰਾਪੇਕ੍ਖਂ.

ਯੋਤ੍ਤੇਨਾਤਿ ਰਜ੍ਜੁਨਾ. ਅਞ੍ਞੋ ਦੇਤੀਤਿ ਸਮ੍ਬਨ੍ਧੋ.

ਪਵਿਸਨ੍ਤੇ ਚ ਨਿਕ੍ਖਮਨ੍ਤੇ ਚ ਵਰਤਿ ਆਵਰਤਿ ਇਮਾਯਾਤਿ ਵਤਿ, ਤਂ. ਉਚ੍ਛੂਤਿ ਰਸਾਲੋ. ਸੋ ਹਿ ਉਸਤਿ ਵਿਸਂ ਦਾਹੇਤੀਤਿ ਉਚ੍ਛੂਤਿ ਵੁਚ੍ਚਤਿ, ਤਂ. ਤਿਮ੍ਬਰੁਸਕਨ੍ਤਿ ਤਿਨ੍ਦੁਕਂ. ਤਞ੍ਹਿ ਤੇਮੇਤਿ ਭੁਞ੍ਜਨ੍ਤਂ ਪੁਗ੍ਗਲਂ ਅਦ੍ਦੇਤਿ ਰਸੇਨਾਤਿ ਤਿਮ੍ਬੋ, ਰੁਸਤਿ ਖੁਦ੍ਦਿਤਂ ਨਾਸੇਤੀਤਿ ਰੁਸਕੋ, ਤਿਮ੍ਬੋ ਚ ਸੋ ਰੁਸਕੋ ਚਾਤਿ ‘‘ਤਿਮ੍ਬਰੁਸਕੋ’’ਤਿ ਵੁਚ੍ਚਤਿ, ਤਂ. ਵਤਿਦਣ੍ਡਕੇਸੂਤਿ ਵਤਿਯਾ ਅਤ੍ਥਾਯ ਨਿਕ੍ਖਣਿਤੇਸੁ ਦਣ੍ਡਕੇਸੁ. ਮਯਂ ਪਨਾਤਿ ਸਙ੍ਗਹਕਾਰਾਚਰਿਯਭੂਤਾ ਬੁਦ੍ਧਘੋਸਨਾਮਕਾ ਮਯਂ ਪਨ, ਅਤ੍ਤਾਨਂ ਸਨ੍ਧਾਯ ਬਹੁਵਚਨਵਸੇਨ ਵੁਤ੍ਤਂ. ਨ ਪੁਥੁਲੋ ਪਾਕਾਰੋਤਿ ਅਡ੍ਢਤੇਯ੍ਯਹਤ੍ਥਪਾਸਾਨਤਿਕ੍ਕਮਂ ਸਨ੍ਧਾਯ ਵੁਤ੍ਤਂ. ਹਤ੍ਥਸਤਮ੍ਪੀਤਿ ਰਤਨਸਤਮ੍ਪਿ.

ਸੋਤਿ ਸਾਮਣੇਰੋ. ਭਿਕ੍ਖੁਸ੍ਸ ਦੇਤੀਤਿ ਯੋਜਨਾ. ਅਪਰੋਤਿ ਸਾਮਣੇਰੋ.

ਫਲਂ ਇਮਿਸ੍ਸਤ੍ਥੀਤਿ ਫਲਿਨੀ, ਇਨਪਚ੍ਚਯੋ ਇਤ੍ਥਿਲਿਙ੍ਗਜੋਤਕੋ ਈ, ਤਂ ਸਾਖਨ੍ਤਿ ਯੋਜਨਾ. ਫਲਿਨਿਸਾਖਨ੍ਤਿ ਸਮਾਸਤੋਪਿ ਪਾਠੋ ਅਤ੍ਥਿ. ਮਚ੍ਛਿਕਵਾਰਣਤ੍ਥਨ੍ਤਿ ਮਧੁਫਾਣਿਤਾਦੀਹਿ ਮਕ੍ਖਨਟ੍ਠਾਨੇ ਨਿਲੀਯਨ੍ਤੀਤਿ ਮਕ੍ਖਿਕਾ, ਤਾਯੇਵ ਮਚ੍ਛਿਕਾ ਖਕਾਰਸ੍ਸ ਛਕਾਰਂ ਕਤ੍ਵਾ, ਤਾਸਂ ਨਿਵਾਰਣਾਯ. ਮੂਲਪਟਿਗ੍ਗਹਮੇਵਾਤਿ ਮੂਲੇ ਪਟਿਗ੍ਗਹਣਮੇਵ, ਪਠਮਪਟਿਗ੍ਗਹਮੇਵਾਤਿ ਵੁਤ੍ਤਂ ਹੋਤਿ.

ਭਿਕ੍ਖੁ ਗਚ੍ਛਤੀਤਿ ਸਮ੍ਬਨ੍ਧੋ. ਅਰਿਤ੍ਤੇਨਾਤਿ ਕੇਨਿਪਾਤੇਨ. ਤਞ੍ਹਿ ਅਰਤਿ ਨਾਵਾ ਗਚ੍ਛਤਿ ਅਨੇਨਾਤਿ ਅਰਿਤ੍ਤਂ, ਤੇਨ. ਤਨ੍ਤਿ ਪਟਿਗ੍ਗਹਣਾਰਹਂ ਭਣ੍ਡਂ. ਅਨੁਪਸਮ੍ਪਨ੍ਨੇਨਾਤਿ ਕਾਰਿਤਕਮ੍ਮਂ. ਤਸ੍ਮਿਮ੍ਪੀਤਿ ਚਾਟਿਕੁਣ੍ਡਕੇਪਿ. ਤਨ੍ਤਿ ਅਨੁਪਸਮ੍ਪਨ੍ਨਂ.

ਪਾਥੇਯ੍ਯਤਣ੍ਡੁਲੇਤਿ ਪਥਸ੍ਸ ਹਿਤੇ ਤਣ੍ਡੁਲੇ. ਤੇਸਨ੍ਤਿ ਸਾਮਣੇਰਾਨਂ. ਇਤਰੇਹੀਤਿ ਭਿਕ੍ਖੂਹਿ ਗਹਿਤਤਣ੍ਡੁਲੇਹਿ. ਸਬ੍ਬੇਹਿ ਭਿਕ੍ਖੂਹਿ ਭੁਤ੍ਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਭਿਕ੍ਖੂਹਿ ਗਹਿਤੇਹਿ ਸਾਮਣੇਰਸ੍ਸ ਤਣ੍ਡੁਲੇਹਿ ਯਾਗੁਪਚਨੇ ਨ ਦਿਸ੍ਸਤੀਤਿ ਸਮ੍ਬਨ੍ਧੋ. ਕਾਰਣਨ੍ਤਿ ਪਰਿਵਤ੍ਤੇਤ੍ਵਾ ਭੁਤ੍ਤਸ੍ਸ ਚ ਅਪਰਿਵਤ੍ਤੇਤ੍ਵਾ ਭੁਤ੍ਤਸ੍ਸ ਚ ਕਾਰਣਂ.

ਭਤ੍ਤਂ ਪਚਿਤੁਕਾਮੋ ਸਾਮਣੇਰੋਤਿ ਯੋਜਨਾ. ਭਿਕ੍ਖੁਨਾ ਆਰੋਪੇਤਬ੍ਬਂ, ਅਗ੍ਗਿ ਨ ਕਾਤਬ੍ਬੋਤਿ ਸਮ੍ਬਨ੍ਧੋ. ਪੁਨ ਪਟਿਗ੍ਗਹਣਕਿਚ੍ਚਂ ਨਤ੍ਥਿ ਮੂਲੇ ਪਟਿਗ੍ਗਹਿਤਤ੍ਤਾਤਿ ਅਧਿਪ੍ਪਾਯੋ.

ਅਸ੍ਸਾਤਿ ਸਾਮਣੇਰਸ੍ਸ. ਤਤੋਤਿ ਅਗ੍ਗਿਜਾਲਨਤੋ.

ਤਤ੍ਤੇ ਉਦਕੇਤਿ ਉਦਕੇ ਤਾਪੇ. ਤਤੋਤਿ ਤਣ੍ਡੁਲਪਕ੍ਖਿਪਨਤੋ.

ਪਿਧਾਨਨ੍ਤਿ ਉਕ੍ਖਲਿਪਿਧਾਨਂ. ਤਸ੍ਸੇਵਾਤਿ ਹਤ੍ਥਕੁਕ੍ਕੁਚ੍ਚਕਸ੍ਸ ਭਿਕ੍ਖੁਨੋ ਏਵ. ਦਬ੍ਬਿਂ ਵਾਤਿ ਕਟਚ੍ਛੁਂ ਵਾ. ਸੋ ਹਿ ਦਰੀਯਤਿ ਵਿਲੋਲ਼ੀਯਤਿ ਇਮਾਯਾਤਿ ਦਬ੍ਬੀਤਿ ਵੁਚ੍ਚਤਿ.

ਤਤ੍ਰਾਤਿ ਤਸ੍ਮਿਂ ਠਪਨੇ. ਤਸ੍ਸੇਵਾਤਿ ਲੋਲਭਿਕ੍ਖੁਸ੍ਸੇਵ. ਤਤੋਤਿ ਪਤ੍ਤਤੋ. ਪੁਨ ਤਤੋਤਿ ਸਾਖਾਦਿਤੋ. ਤਤ੍ਥਾਤਿ ਫਲਰੁਕ੍ਖੇ.

ਵਿਤਕ੍ਕਂ ਸੋਧੇਤੁਨ੍ਤਿ ‘‘ਮਯ੍ਹਮ੍ਪਿ ਦਸ੍ਸਤੀ’’ਤਿ ਵਿਤਕ੍ਕਂ ਸੋਧੇਤੁਂ. ਤਤੋਤਿ ਅਮ੍ਬਫਲਾਦਿਤੋ.

ਪੁਨ ਤਤੋਤਿ ਮਾਤਾਪਿਤੂਨਮਤ੍ਥਾਯ ਗਹਿਤਤੇਲਾਦਿਤੋ. ਤੇਤਿ ਮਾਤਾਪਿਤਰੋ. ਤਤੋਯੇਵਾਤਿ ਤੇਹਿਯੇਵ ਤਣ੍ਡੁਲੇਹਿ ਸਮ੍ਪਾਦੇਤ੍ਵਾਤਿ ਸਮ੍ਬਨ੍ਧੋ.

ਏਤ੍ਥਾਤਿ ਤਾਪਿਤਉਦਕੇ. ਅਮੁਞ੍ਚਨ੍ਤੇਨੇਵ ਹਤ੍ਥੇਨਾਤਿ ਯੋਜਨਾ. ਅਙ੍ਗਨ੍ਤਿ ਵਿਨਾਸਂ ਗਚ੍ਛਨ੍ਤੀਤਿ ਅਙ੍ਗਾਰਾ. ਦਰੀਯਨ੍ਤਿ ਫਲੀਯਨ੍ਤੀਤਿ ਦਾਰੂਨਿ.

ਵੁਤ੍ਤੋ ਸਾਮਣੇਰੋਤਿ ਯੋਜਨਾ.

ਗਵਤਿ ਪਰਿਭੁਞ੍ਜਨ੍ਤਾਨਂ ਵਿਸ੍ਸਟ੍ਠਂ ਸਦ੍ਦਂ ਕਰੋਤੀਤਿ ਗੁਲ਼ੋ, ਗੁਲ਼ਤਿ ਵਿਸਤੋ ਜੀਵਿਤਂ ਰਕ੍ਖਤੀਤਿ ਵਾ ਗੁਲ਼ੋ, ਤਂ ਭਾਜੇਨ੍ਤੋ ਭਿਕ੍ਖੂਤਿ ਸਮ੍ਬਨ੍ਧੋ. ਤਸ੍ਸਾਤਿ ਲੋਲਸਾਮਣੇਰਸ੍ਸ.

ਧੂਮਸ੍ਸਤ੍ਥਾਯ ਵਟ੍ਟੀਯਤਿ ਵਟ੍ਟਿਤ੍ਵਾ ਕਰੀਯਤੀਤਿ ਧੂਮਵਟ੍ਟਿ, ਤਂ. ਮੁਖੀਯਤਿ ਵਿਪਰੀਯਤੀਤਿ ਮੁਖਂ. ਕਂ ਵੁਚ੍ਚਤਿ ਸੀਸਂ, ਤਂ ਤਿਟ੍ਠਤਿ ਏਤ੍ਥਾਤਿ ਕਣ੍ਠੋ.

ਭਤ੍ਤੁਗ੍ਗਾਰੋਤਿ ਉਦ੍ਧਂ ਗਿਰਤਿ ਨਿਗ੍ਗਿਰਤੀਤਿ ਉਗ੍ਗਾਰੋ, ਭਤ੍ਤਮੇਵ ਉਗ੍ਗਾਰੋ ਭਤ੍ਤੁਗ੍ਗਾਰੋ, ਉਗ੍ਗਾਰਭਤ੍ਤਨ੍ਤਿ ਅਤ੍ਥੋ. ਦਨ੍ਤਨ੍ਤਰੇਤਿ ਦਨ੍ਤਵਿਵਰੇ.

ਉਪਕਟ੍ਠੇ ਕਾਲੇਤਿ ਆਸਨ੍ਨੇ ਮਜ੍ਝਨ੍ਹਿਕੇ ਕਾਲੇ. ਕਕ੍ਖਾਰੇਤ੍ਵਾਤਿ ਸਞ੍ਚਿਤ੍ਵਾ. ਤਸ੍ਸ ਅਤ੍ਥਂ ਦਸ੍ਸੇਤੁਂ ਵੁਤ੍ਤਂ ‘‘ਦ੍ਵੇ ਤਯੋ ਖੇਲ਼ਪਿਣ੍ਡੇ ਪਾਤੇਤ੍ਵਾ’’ਤਿ. ਫਲ਼ੁਸਙ੍ਖਾਤਂ ਸਿਙ੍ਗਂ ਵਿਸਾਣਂ ਅਸ੍ਮਿਂ ਅਤ੍ਥੀਤਿ ਸਿਙ੍ਗੀ, ਸੋਯੇਵ ਕਟੁਕਭਯੇਹਿ ਵਿਰਮਿਤਬ੍ਬਤ੍ਤਾ ਸਿਙ੍ਗੀਵੇਰੋਤਿ ਵੁਚ੍ਚਤਿ. ਅਙ੍ਕੀਯਤਿ ਰੁਕ੍ਖੋ ਨਵਂ ਉਗ੍ਗਤੋਤਿ ਲਕ੍ਖੀਯਤਿ ਏਤੇਹੀਤਿ ਅਙ੍ਕੁਰਾ, ਸਮਂ ਲੋਣੇਨ ਉਦਕਂ, ਸਮਂ ਵਾ ਉਦਕੇਨ ਲੋਣਂ ਅਸ੍ਮਿਨ੍ਤਿ ਸਮੁਦ੍ਦੋ, ਤਸ੍ਸ ਉਦਕਂ ਅਵਯਵੀਅਵਯਵਭਾਵੇਨਾਤਿ ਸਮੁਦ੍ਦੋਦਕਂ, ਤੇਨ ਅਪਟਿਗ੍ਗਹਿਤੇਨਾਤਿ ਸਮ੍ਬਨ੍ਧੋ. ਫਾਣਤਿ ਗੁਲ਼ਤੋ ਥਦ੍ਧਭਾਵਂ ਗਚ੍ਛਤੀਤਿ ਫਾਣਿਤਂ. ਕਰੇਨ ਹਤ੍ਥੇਨ ਗਹਿਤਬ੍ਬਾਤਿ ਕਰਕਾ, ਵਸ੍ਸੋਪਲਂ, ਕਰੇਨ ਗਣ੍ਹਿਤੁਮਰਹਾਤਿ ਅਤ੍ਥੋ. ਕਤਕਟ੍ਠਿਨਾਤਿ ਕਤਕਨਾਮਕਸ੍ਸ ਏਕਸ੍ਸ ਰੁਕ੍ਖਵਿਸੇਸਸ੍ਸ ਅਟ੍ਠਿਨਾ. ਤਨ੍ਤਿ ਉਦਕਂ. ਕਪਿਤ੍ਥੋਤਿ ਏਕਸ੍ਸ ਅਮ੍ਬਿਲਫਲਸ੍ਸ ਰੁਕ੍ਖਵਿਸੇਸਸ੍ਸ ਨਾਮਂ.

ਬਹਲਨ੍ਤਿ ਆਵਿਲਂ. ਸਨ੍ਦਿਤ੍ਵਾਤਿ ਵਿਸਨ੍ਦਿਤ੍ਵਾ. ਕਕੁਧਸੋਬ੍ਭਾਦਯੋਤਿ ਕਕੁਧਰੁਕ੍ਖਸਮੀਪੇ ਠਿਤਾ ਸੋਬ੍ਭਾਦਯੋ. ਰੁਕ੍ਖਤੋਤਿ ਕਕੁਧਰੁਕ੍ਖਤੋ. ਪਰਿਤ੍ਤਨ੍ਤਿ ਅਪ੍ਪਕਂ.

ਪਾਨੀਯਘਟੇ ਪਕ੍ਖਿਤ੍ਤਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ਤਨ੍ਤਿ ਵਾਸਮਤ੍ਤਂ ਉਦਕਂ. ਤਤ੍ਥੇਵਾਤਿ ਠਪਿਤਪੁਪ੍ਫਵਾਸਿਤਪਾਨੀਯੇਯੇਵ. ਠਪਿਤਂ ਦਨ੍ਤਕਟ੍ਠਨ੍ਤਿ ਸਮ੍ਬਨ੍ਧੋ. ਅਜਾਨਨ੍ਤਸ੍ਸ ਭਿਕ੍ਖੁਸ੍ਸਾਤਿ ਯੋਜਨਾ. ਅਨਾਦਰੇ ਚੇਤਂ ਸਾਮਿਵਚਨਂ. ਹੀਤਿ ਸਚ੍ਚਂ, ਯਸ੍ਮਾ ਵਾ.

ਕਿਂ ਮਹਾਭੂਤਂ ਵਟ੍ਟਤਿ, ਕਿਂ ਨ ਵਟ੍ਟਤੀਤਿ ਯੋਜਨਾ. ਯਂ ਪਨਾਤਿ ਮਹਾਭੂਤਂ ਪਨ. ਅਙ੍ਗਲਗ੍ਗਨ੍ਤਿ ਅਙ੍ਗੇਸੁ ਲਗ੍ਗਂ, ਮਹਾਭੂਤਨ੍ਤਿ ਸਮ੍ਬਨ੍ਧੋ. ਏਤ੍ਥਾਤਿ ਸੇਦੇ. ਸੁਝਾਪਿਤਨ੍ਤਿ ਅਙ੍ਗਾਰਸਦਿਸਂ ਕਤ੍ਵਾ ਸੁਟ੍ਠੁ ਝਾਪਿਤਂ.

ਚਤ੍ਤਾਰੀਤਿ ਪਥਵੀ ਛਾਰਿਕਾ ਗੂਥਂ ਮੁਤ੍ਤਨ੍ਤਿ ਚਤ੍ਤਾਰਿ. ਮਹਾਵਿਕਟਾਨੀਤਿ ਮਹਨ੍ਤਾਨਿ ਸਪ੍ਪਦਟ੍ਠਕ੍ਖਣਸਙ੍ਖਾਤੇ ਵਿਕਾਰਕਾਲੇ ਕਤ੍ਤਬ੍ਬਾਨਿ ਓਸਧਾਨਿ. ਏਤ੍ਥਾਤਿ ‘‘ਅਸਤਿ ਕਪ੍ਪਿਯਕਾਰਕੇ’’ਤਿ ਵਚਨੇ. ਕਾਲੋਦਿਸ੍ਸਂ ਨਾਮਾਤਿ ਬ੍ਯਾਧੋਦਿਸ੍ਸ, ਪੁਗ੍ਗਲੋਦਿਸ੍ਸ, ਕਾਲੋਦਿਸ੍ਸ, ਸਮਯੋਦਿਸ੍ਸ, ਦੇਸੋਦਿਸ੍ਸ, ਵਸੋਦਿਸ੍ਸ, ਭੇਸਜ੍ਜੋਦਿਸ੍ਸਸਙ੍ਖਾਤੇਸੁ ਸਤ੍ਤਸੁ ਓਦਿਸ੍ਸੇਸੁ ਕਾਲੋਦਿਸ੍ਸਂ ਨਾਮਾਤਿ ਅਤ੍ਥੋ. ਦਸਮਂ.

ਭੋਜਨਵਗ੍ਗੋ ਚਤੁਤ੍ਥੋ.