੩. ਮਹਾਕਚ੍ਚਾਨਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾ

੨੭੯. ਉਣ੍ਹਭਾਵੇਨ ਤਪਨਤੋ ਤਪਂ ਉਦਕਂ ਏਤਸ੍ਸਾਤਿ ਤਪੋਦਾ, ਰਹਦੋ. ਤੇਨਾਹ ‘‘ਤਤ੍ਤੋਦਕਸ੍ਸ ਰਹਦਸ੍ਸਾ’’ਤਿ. ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ, ‘‘ਵੇਭਾਰਪਬ੍ਬਤਸ੍ਸਾ’’ਤਿਆਦਿ ਵੁਤ੍ਤਂ. ਤਤੋ ਉਦਕਰਹਦਤੋ, ਤਂ ਰਹਦਂ ਉਪਨਿਸ੍ਸਾਯਾਤਿ ਅਤ੍ਥੋ. ਨਾਗਭਵਨਾਗਤੋਪਿ ਹਿ ਸੋ ਰਹਦੋ ਤਤੋ ਉਪਰਿ ਮਨੁਸ੍ਸਲੋਕੇ ਜਲਾਸਯੇਨ ਸਮ੍ਬਦ੍ਧੋ ਹੋਤਿ. ਤੇਨ ਵੁਤ੍ਤਂ – ‘‘ਤਪੋਦਾ ਨਾਮ ਨਦੀ ਸਨ੍ਦਤੀ’’ਤਿ. ਏਦਿਸਾਤਿ ਕੁਥਿਤਾ ਉਣ੍ਹਾ, ਅਨ੍ਵਤ੍ਥਨਾਮਵਸੇਨ ਤਪੋਦਾਤਿ ਚ ਵੁਚ੍ਚਤੀਤਿ ਅਤ੍ਥੋ. ਪੇਤਲੋਕੋਤਿ ਪੇਤਾਨਂ ਵਸਨਟ੍ਠਾਨਂ ਪਚ੍ਚੇਕਨਿਰਯਂ ਸਨ੍ਧਾਯਾਹ. ਇਮਸ੍ਸ ਪਨ ਆਰਾਮਸ੍ਸਾਤਿ ਤਪੋਦਾਰਾਮਸ੍ਸ. ਤਤੋਤਿ ਤਪੋਦਾਸਙ੍ਖਾਤਨਦਿਤੋ. ਮਹਾਉਦਕਰਹਦੋਤਿ ਮਹਾਉਦਕਭਰਿਤਂ ਪਲ੍ਲਲਂ.

੨੮੦. ਸਮਿਦ੍ਧੋਤਿ ਉਲ਼ਾਰੋ, ਪਰਿਪੁਣ੍ਣੋਯੇਵਾਤਿ ਅਤ੍ਥੋ. ਆਦਿਮ੍ਹਿ ਬ੍ਰਹ੍ਮਚਰਿਯਮਸ੍ਸਾਤਿ ਆਦਿਬ੍ਰਹ੍ਮਚਰਿਯੋ, ਸੋ ਏਵ ਆਦਿਬ੍ਰਹ੍ਮਚਰਿਯਕੋ. ਤੇਨਾਹ ‘‘ਪੁਬ੍ਬਭਾਗਪ੍ਪਟਿਪਤ੍ਤਿਭੂਤੋ’’ਤਿ. ‘‘ਅਤੀਤਂ ਅਨਾਗਤਂ ਪਚ੍ਚੁਪ੍ਪਨ੍ਨ’’ਨ੍ਤਿ ਅਦ੍ਧਭੇਦਮੁਖੇਨ ਸਙ੍ਖਤਧਮ੍ਮਬੋਧਵਚਨਂ.

੨੮੨. ਕਾਮਂ ਖਨ੍ਧਾਦਿਵਸੇਨ ਵਿਭਜਨਂ ਸਾਧਾਰਣਂ, ਪਠਮਦੁਤਿਯਚਤੁਤ੍ਥਸੁਤ੍ਤੇਸੁ ਪਨ ਖਨ੍ਧਵਸੇਨ ਵਿਭਜਨਂ ਕਤ੍ਵਾ ਇਧ ਤਥਾ ਅਕਤ੍ਵਾ ਏਵਂ ਦੇਸਨਾਯ ਠਪਨਂ ਤਤੋ ਅਞ੍ਞਥਾ ਆਯਤਨਵਸੇਨ ਵਿਭਜਨਤ੍ਥਂ. ਏਵਂ ਵਿਭਿਨ੍ਨਾ ਹਿ ਸਙ੍ਖੇਪਵਿਤ੍ਥਾਰਤੋ ਅਨਵਸੇਸਾ ਸਮ੍ਮਸਨੁਪਗਾ ਧਮ੍ਮਾ ਵਿਭਜਿਤ੍ਵਾ ਦਸ੍ਸਿਤਾ ਹੋਨ੍ਤਿ; ਅਯਂ ਕਿਰੇਤ੍ਥ ਭਗਵਤੋ ਅਜ੍ਝਾਸਯੋ ਥੇਰੇਨ ਨਯਤੋ ਗਹਿਤੋਤਿ ਦਸ੍ਸੇਤੁਂ, ‘‘ਇਮਸ੍ਮਿਂ ਕਿਰਾ’’ਤਿਆਦਿ ਵੁਤ੍ਤਂ. ਤਤ੍ਥ ਦ੍ਵਾਦਸਾਯਤਨਵਸੇਨੇਵ ਮਾਤਿਕਂ ਠਪੇਸੀਤਿ ਲੋਕਿਯਾਨਿ ਦ੍ਵਾਦਸਾਯਤਨਾਨਿ ਏਵ ਸਨ੍ਧਾਯ ਮਾਤਿਕਂ ਠਪੇਸਿ, ਯਥਾ ਤੀਸੁ ਸੁਤ੍ਤੇਸੁ ਖਨ੍ਧਵਸੇਨ ਵਿਭਤ੍ਤਂ, ਏਵਂ ਯਦਿ ਭਗਵਤਾ ਇਧਾਪਿ ਵਿਭਜਨਂ ਇਚ੍ਛਿਤਂ ਸਿਯਾ, ਤਥਾ ਵਿਭਜੇਯ੍ਯ, ਯਸ੍ਮਾ ਪਨ ਤਥਾ ਅਵਿਭਜਿਤ੍ਵਾਵ ਗਨ੍ਧਕੁਟਿਂ ਪਵਿਟ੍ਠੋ, ਤਸ੍ਮਾ ਦ੍ਵਾਦਸਾਯਤਨਵਸੇਨੇਵੇਤ੍ਥ ਵਿਭਜਨਂ ਭਗਵਤਾ ਚ ਅਧਿਪ੍ਪੇਤਨ੍ਤਿ ਨਯਗ੍ਗਾਹੇ ਠਤ੍ਵਾ ਥੇਰੋ ਵਿਭਜਿ. ਤੇਨਾਹ – ‘‘ਨਯਂ ਪਟਿਲਭਿਤ੍ਵਾ ਏਵਮਾਹਾ’’ਤਿ. ਭਾਰਿਯਂ ਕਤਨ੍ਤਿ ਦੁਕ੍ਕਰਂ ਕਤਂ. ਅਪਦੇ ਪਦਂ ਦਸ੍ਸਿਤਂ ਆਕਾਸੇ ਪਦਂ ਕਤਂ ਸਾਧਾਰਣਸ੍ਸ ਅਤ੍ਥਸ੍ਸ ਵਿਸਿਟ੍ਠਵਿਸਯਤਾਯ ਦਸ੍ਸਿਤਤ੍ਤਾ. ਨਿਕਨ੍ਤਿਵਿਞ੍ਞਾਣਨ੍ਤਿ ਨਿਕਨ੍ਤਿਤਣ੍ਹਾਯ ਸਮ੍ਪਯੁਤ੍ਤਂ ਵਿਞ੍ਞਾਣਂ, ‘‘ਛਨ੍ਦਰਾਗਪ੍ਪਟਿਬਦ੍ਧਂ ਹੋਤੀ’’ਤਿ ਵਚਨਤੋ. ਮਨੋਤਿ ਭਵਙ੍ਗਚਿਤ੍ਤਂ ਮਨੋਦ੍ਵਾਰਿਕਜਵਨਾਨਂ ਦ੍ਵਾਰਭੂਤਂ.

੨੮੩. ਪਤ੍ਥਨਾਵਸੇਨ ਠਪੇਸੀਤਿ ਪਤ੍ਥਨਾਵਸੇਨ ਚਿਤ੍ਤਂ ਪਵਤ੍ਤੇਸਿ.

ਮਹਾਕਚ੍ਚਾਨਭਦ੍ਦੇਕਰਤ੍ਤਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ

ਸਮਤ੍ਤਾ.