੭. ਗਣਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾ

੭੪. ਯਥਾ ਹੇਟ੍ਠਿਮਸੋਪਾਨਫਲਕਂ ਓਰੋਹਨ੍ਤਸ੍ਸ ਪਚ੍ਛਿਮਂ ਨਾਮ ਹੋਤਿ, ਏਵਂ ਆਰੋਹਨ੍ਤਸ੍ਸ ਪਠਮਂ ਨਾਮ ਹੋਤੀਤਿ ਵੁਤ੍ਤਂ – ‘‘ਯਾਵ ਪਚ੍ਛਿਮਸੋਪਾਨਕਲ਼ੇਵਰਾਤਿ ਯਾਵ ਪਠਮਸੋਪਾਨਫਲਕਾ’’ਤਿ. ਵਤ੍ਥੁਂ ਸੋਧੇਤ੍ਵਾਤਿ ਵਤ੍ਥੁਵਿਜ੍ਜਾਚਰਿਯੇਨ ਵੁਤ੍ਤਵਿਧਿਨਾ ਪਾਸਾਦਵਤ੍ਥੁਨੋ ਸੋਧਨਵਿਧਿਂ ਕਤ੍ਵਾ. ਏਤ੍ਥਾਤਿ ਪਾਸਾਦਕਰਣੇ. ਸਤ੍ਤਧਾ ਭਿਨ੍ਨਸ੍ਸ ਵਾਲਗ੍ਗਸ੍ਸ ਅਂਸੁਕੋਟਿਵੇਧਕੋ ਵਾਲਵੇਧਿ ਨਾਮ. ਠਾਨਸਮ੍ਪਾਦਨਨ੍ਤਿ ਵੇਸਾਖਮਣ੍ਡਲਾਦੀਨਂ ਸਮ੍ਪਾਦਨਂ. ਮੁਟ੍ਠਿਕਰਣਾਦੀਹੀਤਿ ਉਸੁਮੁਟ੍ਠਿਕਰਣਜਿਯਾਗਾਹਜਿਯਾਵਿਜ੍ਝਾਦੀਹਿ. ਏਵਂ ਗਣਾਪੇਮਾਤਿ ਏਕਂ ਨਾਮ ਏਕਮੇਵ, ਦ੍ਵੇ ਦੁਕਾ ਚਤ੍ਤਾਰਿ, ਤੀਣਿ ਤਿਕਾਨਿ ਨਵ, ਚਤ੍ਤਾਰਿ ਚਤੁਕ੍ਕਾਨਿ ਸੋਲ਼ਸਾਤਿਆਦਿਨਾ ਏਵਂ ਗਣਨਂ ਸਿਕ੍ਖਾਪੇਮ.

੭੫. ਕੇਰਾਟਿਕਾ ਹੋਨ੍ਤੀਤਿ ਸਮਯਸ੍ਸ ਅਨੁਪਕ੍ਕਿਲਿਟ੍ਠਕਰਣਮਾਯਾਸਾਠੇਯ੍ਯੇਨ ਸਮਨ੍ਨਾਗਤਾ ਹੋਨ੍ਤਿ. ਤਂ ਦਮਨਂ ਜੀਵਿਤਹੇਤੁਪਿ ਨਾਤਿਕ੍ਕਮਤਿ, ਅਯਮਸ੍ਸ ਜਾਤਿਦੋਸਾਭਾਵੋ.

੭੬. ਸਤਿਸਮ੍ਪਜਞ੍ਞਾਹਿ ਸਮਙ੍ਗਿਭਾਵਤ੍ਥਾਯਾਤਿ ਸਤਤਵਿਹਾਰਿਭਾਵਸਾਧਨੇਹਿ ਸਤਿਸਮ੍ਪਜਞ੍ਞੇਹਿ ਸਮਨ੍ਨਾਗਮਤ੍ਥਾਯ. ਨਨੁ ਚ ਖੀਣਾਸਵਾ ਸਤਿਵੇਪੁਲ੍ਲਪ੍ਪਤ੍ਤਾ ਪਞ੍ਞਾਵੇਪੁਲ੍ਲਪ੍ਪਤ੍ਤਾ ਚ, ਕਥਂ ਤਸ੍ਸ ਸਤਿਸਮ੍ਪਜਞ੍ਞਂ ਪਯੋਗਸਾਧਨੀਯਂ ਪਵਤ੍ਤਨ੍ਤਿ ਆਹ ‘‘ਦ੍ਵੇ ਹੀ’’ਤਿਆਦਿ. ਸਤਤਵਿਹਾਰੀਤਿ ਸਤਤਂ ਸਮਾਪਤ੍ਤਿਵਿਹਾਰਿਬਹੁਲਾ, ਤਸ੍ਮਾ ਤੇ ਇਚ੍ਛਿਤਿਚ੍ਛਿਤਕ੍ਖਣੇ ਫਲਸਮਾਪਤ੍ਤਿਂ ਸਮਾਪਜ੍ਜਨ੍ਤਿ. ਵੁਤ੍ਤਵਿਪਰਿਯਾਯੇਨ ਨੋਸਤਤਵਿਹਾਰਿਨੋ ਦਟ੍ਠਬ੍ਬਾ. ਤੇਨਾਹ ‘‘ਤਤ੍ਥਾ’’ਤਿਆਦਿ. ਅਪ੍ਪੇਤੁਂ ਨ ਸਕ੍ਕੋਤਿ ਅਨਾਚਿਣ੍ਣਭਾਵਤੋ.

ਤਂ ਵਿਤਕ੍ਕੇਨ੍ਤੋਤਿ ‘‘ਸਾਮਣੇਰਸ੍ਸ ਸੇਨਾਸਨਂ ਨਤ੍ਥਿ, ਅਰਞ੍ਞਞ੍ਚ ਸੀਹਾਦੀਹਿ ਸਪਰਿਸ੍ਸਯਂ, ਕਿਂ ਨੁ ਖੋ ਤਸ੍ਸ ਭਵਿਸ੍ਸਤੀ’’ਤਿ ਤਂ ਵਿਤਕ੍ਕੇਨ੍ਤੋ. ਏਵਰੂਪੋਤਿ ਏਦਿਸੋ ਯਥਾਵੁਤ੍ਤਸਾਮਣੇਰਸਦਿਸੋ ਖੀਣਾਸਵੋ. ਇਮੇ ਧਮ੍ਮੇਤਿ ਇਮਸ੍ਮਿਂ ਸੁਤ੍ਤੇ ਆਗਤੇ ਸੀਲਾਦਿਧਮ੍ਮੇ. ਆਵਜ੍ਜਿਤ੍ਵਾਵਾਤਿ ਅਤ੍ਤਨੋ ਪਰਿਸੁਦ੍ਧਸੀਲਤਾਦਿਆਵਜ੍ਜਨਹੇਤੁ ਏਵ ਸਮਾਪਜ੍ਜਿਤੁਂ ਸਕ੍ਖਿਸ੍ਸਤਿ.

੭੮. ‘‘ਯੇਮੇ, ਭੋ ਗੋਤਮਾ’’ਤਿ ਵਚਨਸ੍ਸ ਸਮ੍ਬਨ੍ਧਂ ਦਸ੍ਸੇਤੁਂ, ‘‘ਤਥਾਗਤੇ ਕਿਰਾ’’ਤਿਆਦਿ ਵੁਤ੍ਤਂ. ਏਵਨ੍ਤਿ ‘‘ਯੇਮੇ, ਭੋ ਗੋਤਮਾ’’ਤਿਆਦਿਆਕਾਰੇਹਿ ਵਤ੍ਤੁਮਾਰਦ੍ਧੋ.

ਅਜ੍ਜਧਮ੍ਮੇਸੂਤਿ ਅਪੁਰਾਤਨਧਮ੍ਮੇਸੁ. ਤਕ੍ਕਨਮਤ੍ਤਾਨਿ ਹਿ ਤੇਹਿ ਕਪ੍ਪੇਤ੍ਵਾ ਸਯਂਪਟਿਭਾਨਂ ਵਿਰਚਿਤਾਨਿ. ਪੁਰਾਤਨਤਾਯ ਪਰਿਪੁਣ੍ਣਤਾਯ ਏਕਨ੍ਤਨਿਯ੍ਯਾਨਿਕਤਾਯ ਚ ਪਰਮੋ ਉਤ੍ਤਮੋ. ਤੇਨਾਹ – ‘‘ਤੇਸੁ…ਪੇ… ਉਤ੍ਤਮੋਤਿ ਅਤ੍ਥੋ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਗਣਕਮੋਗ੍ਗਲ੍ਲਾਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.