੫. ਸੁਨਕ੍ਖਤ੍ਤਸੁਤ੍ਤਵਣ੍ਣਨਾ

੫੫. ਹੇਟ੍ਠਿਮਮਗ੍ਗੇਹਿ ਞਾਤਮਰਿਯਾਦਾਯ ਪਜਾਨਨਤੋ ਅਞ੍ਞਾ, ਮਗ੍ਗਪਞ੍ਞਾ. ਤਸ੍ਸ ਫਲਭਾਵਤੋ ਅਗ੍ਗਫਲਪਞ੍ਞਾ, ਤਂਸਹਗਤਾ ਸਮ੍ਮਾਸਙ੍ਕਪ੍ਪਾਦਯੋ ਚ ‘‘ਅਞ੍ਞਾ’’ਤਿ ਵੁਤ੍ਤਾਤਿ ਆਹ ‘‘ਅਞ੍ਞਾਤਿ ਅਰਹਤ੍ਤ’’ਨ੍ਤਿ. ਚਤੂਹਿ ਪਦੇਹਿ ਕਥਿਤਾ, ‘‘ਪਰਿਚਿਣ੍ਣਾ ਮੇ ਭਗਵਾ’’ਤਿਆਦੀਸੁ ਵਿਯ ਨ ਏਕਪਦੇਨੇਵ. ‘‘ਲੋਕੁਤ੍ਤਰੋ ਧਮ੍ਮੋ ਅਧਿਗਤੋ ਮਯਾ’’ਤਿ ਮਞ੍ਞਨਾਮਤ੍ਤਂ ਅਧਿਮਾਨੋਤਿ ਦਸ੍ਸੇਨ੍ਤੋ, ‘‘ਅਪ੍ਪਤ੍ਤੇ ਪਤ੍ਤਸਞ੍ਞਿਨੋ’’ਤਿਆਦਿਮਾਹ.

੫੬. ਇਦਂ ਠਾਨਨ੍ਤਿ ਇਦਂ ਓਭਾਸਾਦਿਸਮ੍ਮੁਤਿਹੇਤੁਭੂਤਂ ਉਲ਼ਾਰਤਰਂ ਉਦਯਬ੍ਬਯਞਾਣਂ. ਉਲ਼ਾਰਤਰਭਾਵੇਨ ਹਿ ਤਂ ਮਗ੍ਗਫਲਪਞ੍ਞਾਯ ਪਚ੍ਚਯੋ ਹੁਤ੍ਵਾ ਯਾਥਾਵਤੋ ਦੁਬ੍ਬਿਞ੍ਞੇਯ੍ਯਤਾਯ ਵਿਪਸ੍ਸਕਂ ਵਿਸਂਵਾਦੇਤਿ. ਤੇਨਾਹ ‘‘ਅਵਿਭੂਤਂ ਅਨ੍ਧਕਾਰ’’ਨ੍ਤਿ. ਇਮਂ ਪਞ੍ਹਨ੍ਤਿ ਇਮਂ ਸੁਤ੍ਤਂ ਗਮ੍ਭੀਰਂ ਲੋਕੁਤ੍ਤਰਪਟਿਸਂਯੁਤ੍ਤਂ ਅਤ੍ਤਨਾ ਞਾਤੁਂ ਇਚ੍ਛਿਤਂ ਅਤ੍ਥਂ. ਉਗ੍ਗਹੇਤ੍ਵਾਤਿ ਕੇਵਲਂ ਪਿਟਕਸਮ੍ਪਾਦਨਵਸੇਨੇਵ ਉਗ੍ਗਣ੍ਹਿਤ੍ਵਾ. ਤੇਨਾਹ ‘‘ਅਜਾਨਿਤ੍ਵਾ’’ਤਿ. ਵਿਸੇਵਮਾਨਾਤਿ ਕਿਲੇਸਵਿਸੇ ਅਵਮਾਨੇਨ੍ਤਾ, ਸਾਸਨਸ੍ਸ ਵਾ ਅਨੁਪਕਾਰਵਿਰੂਪਪਚ੍ਚਯੇ ਸੇਵਮਾਨਾ. ਏਵਮਸ੍ਸਾਤਿ ਏਵਂ ਵੁਤ੍ਤਨਯੇਨ ਤੇਸਂ ਕਰਣਹੇਤੁ ਅਸ੍ਸ ਚਿਤ੍ਤਸ੍ਸ ਧਮ੍ਮਦੇਸਨਾਵਸੇਨ ਪਵਤ੍ਤਸ੍ਸ. ਅਞ੍ਞਥਾਭਾਵੋ ਅਦੇਸੇਤੁਕਾਮਤਾ ਹੋਤਿ. ਤਨ੍ਤਿ ਯਥਾਵੁਤ੍ਤਮਤ੍ਥਂ ਸਨ੍ਧਾਯ. ਏਤਨ੍ਤਿ ‘‘ਤਸ੍ਸਪਿ ਹੋਤਿ ਅਞ੍ਞਥਤ੍ਤ’’ਨ੍ਤਿ ਏਵਂ ਵੁਤ੍ਤਂ.

੫੮. ਕਿਲੇਸੇਹਿ ਆਮਸੀਯਤੀਤਿ ਆਮਿਸਂ, ਲੋਕੇਪਰਿਯਾਪਨ੍ਨਂ ਆਮਿਸਨ੍ਤਿ ਇਧ ਪਞ੍ਚ ਕਾਮਗੁਣਾ ਅਧਿਪ੍ਪੇਤਾਤਿ ਤੇਸੁ ਵਟ੍ਟਾਮਿਸਭਾਵੇਪਿ ਲਭਿਤੇ ਕਾਮਾਮਿਸਭਾਵੋ ਸਿਦ੍ਧੋਤਿ ਆਹ – ‘‘ਵਟ੍ਟਾਮਿਸਕਾਮਾਮਿਸਲੋਕਾਮਿਸਭੂਤੇਸੂ’’ਤਿ. ਕਾਮਗੁਣਾ ਹਿ ਵਟ੍ਟਸ੍ਸ ਵਡ੍ਢਨਤੋ ਵਟ੍ਟਾਮਿਸਂ, ਕਾਮੇਤਬ੍ਬਤੋ ਕਾਮਤਣ੍ਹਾਯ ਆਮਸਿਤਬ੍ਬਤੋ ਕਾਮਾਮਿਸਂ, ਯੇਭੂਯ੍ਯਤੋ ਸਤ੍ਤਲੋਕਸ੍ਸ ਆਮਿਸਭਾਵਤੋ ਲੋਕਾਮਿਸਂ. ਕਾਮਗੁਣਸਭਾਗਾਤਿ ਕਾਮਗੁਣਾਨੁਲੋਮਾ ਕਾਮਗੁਣਪਟਿਸਂਯੁਤ੍ਤਾ. ਆਨੇਞ੍ਜਸਮਾਪਤ੍ਤਿਪਟਿਸਂਯੁਤ੍ਤਾਯਾਤਿ ਕਿਲੇਸਿਞ੍ਜਨਰਹਿਤਤਾਯ ਇਧ ਆਨੇਞ੍ਜਾਤਿ ਅਧਿਪ੍ਪੇਤਾਹਿ ਹੇਟ੍ਠਿਮਾਹਿ ਅਰੂਪਸਮਾਪਤ੍ਤੀਹਿ ਪਟਿਸਂਯੁਤ੍ਤਾਯ. ਏਵਰੂਪੋਤਿ ਲੋਕਾਮਿਸਭੂਤੇਸੁ ਪਚ੍ਚਯੇਸੁ ਅਧਿਮੁਤ੍ਤੋ ਤਨ੍ਨਿਨ੍ਨੋ ਤਗ੍ਗਰੁਕੋ ਤਪ੍ਪਬ੍ਭਾਰੋ. ਏਤ੍ਤਾਵਤਾਤਿ ਏਵਂ ਸਦ੍ਧਾਨਂ ਮਨੁਸ੍ਸਾਨਂ ਦਸ੍ਸਨੇਨ ਤੇਸਂ ਪਵਤ੍ਤਿਤਾਸਯੇਨ ਚ. ਸੀਸਂ ਨਿਕ੍ਖਨ੍ਤਂ ਹੋਤੀਤਿ ਲਾਭਾਸਾਯ ਸੀਸਂ ਬਹਿ ਨਿਕ੍ਖਨ੍ਤਂ ਵਿਯ ਹੋਤਿ. ਉਦਰਂ ਫਲਿਤਨ੍ਤਿ ਅਤਿਬਹੁਭਣ੍ਡਂ ਪਕ੍ਖਿਪਿਯਮਾਨਂ ਪਸਿਬ੍ਬਕਂ ਵਿਯ ਲਦ੍ਧਬ੍ਬਸ੍ਸ ਅਤਿਪਹੂਤਭਾਵੇਨ ਉਦਰਂ ਫੀਤਂ ਹੋਤਿ.

੫੯. ਯਥਾ ਪੁਰਿਮਾ ਦ੍ਵੇ ਅਰੂਪਸਮਾਪਤ੍ਤਿਯੋ ਅਤ੍ਤਨੋ ਪਚ੍ਚਨੀਕਕਿਲੇਸੇਹਿ ਅਨਿਞ੍ਜਨਤੋ ‘‘ਅਨਿਞ੍ਜਾ’’ਤਿ ਵੁਚ੍ਚਨ੍ਤਿ, ਏਵਂ ਇਤਰਾਪਿ. ਤਂ ਪਵੁਤ੍ਤਨ੍ਤਿ ਲੋਕਾਮਿਸਸਂਯੋਜਨਂ ਵਿਗਤਂ.

੬੦. ਨਿਘਂਸਨ੍ਤਿ ‘‘ਏਤ੍ਤਕੋ ਅਯ’’ਨ੍ਤਿ ਪਰਿਚ੍ਛੇਦਨ੍ਤਿ ਅਤ੍ਥੋ. ਸਿਲੇਸੇਨਾਤਿ ਚਮ੍ਮਕਾਰਸਿਲੇਸਾਦਿਸਿਲੇਸੇਨ, ਵਜਿਰਲੇਪਸਿਲੇਸੇ ਵਤ੍ਤਬ੍ਬਮੇਵ ਨਤ੍ਥਿ. ਤਂ ਭਿਨ੍ਨਨ੍ਤਿ ਆਨੇਞ੍ਜਸਂਯੋਜਨਂ ਭਿਨ੍ਨਂ ਵਿਧਮਿਤਂ ਸਮਤਿਕ੍ਕਨ੍ਤਂ ਤਾਸੁ ਸਮਾਪਤ੍ਤੀਸੁ ਅਪੇਕ੍ਖਾਭਾਵਤੋ. ਅਜ੍ਝਾਸਯੇਨ ਅਸਮ੍ਬਦ੍ਧਤ੍ਤਾ ਵੁਤ੍ਤਂ – ‘‘ਦ੍ਵੇਧਾਭਿਨ੍ਨਾ ਸੇਲਾ ਵਿਯ ਹੋਤੀ’’ਤਿ. ਤੇਨਾਹ – ‘‘ਤਂ ਸਮਾਪਜ੍ਜਿਸ੍ਸਾਮੀਤਿ ਚਿਤ੍ਤਂ ਨ ਉਪ੍ਪਜ੍ਜਤੀ’’ਤਿ.

੬੧. ਵਨ੍ਤਨ੍ਤਿ ਛਡ੍ਡਿਤਂ, ਵਿਸ੍ਸਟ੍ਠਨ੍ਤਿ ਅਤ੍ਥੋ.

੬੨. ਉਪਰਿਸਮਾਪਤ੍ਤਿਲਾਭਿਨੋਤਿ ਏਤ੍ਥ ਉਪਰਿਸਮਾਪਤ੍ਤੀਤਿ ਅਰਹਤ੍ਤਫਲਸਮਾਪਤ੍ਤਿ ਅਧਿਪ੍ਪੇਤਾ, ਅਰਹਤੋ ਚ ਮਗ੍ਗਾਧਿਗਮੇਨੇਵ ਅਨਾਗਾਮਿਫਲਸਮਾਪਤ੍ਤਿ, ਸੇਕ੍ਖਾਨਂ ਵਿਸਯਾ ਹੇਟ੍ਠਿਮਾ ਫਲਸਮਾਪਤ੍ਤਿਯੋ ਪਟਿਪ੍ਪਸ੍ਸਦ੍ਧਾ. ਲੋਕਿਯਾ ਪਨ ਨਿਕਨ੍ਤਿਪ੍ਪਹਾਨੇਨ ਪਟਿਨਿਸ੍ਸਟ੍ਠਾਤਿ ਆਹ – ‘‘ਹੇਟ੍ਠਾ…ਪੇ… ਨ ਉਪ੍ਪਜ੍ਜਤੀ’’ਤਿ.

੬੩. ‘‘ਪਞ੍ਚ ਖੋ ਇਮੇ, ਸੁਨਕ੍ਖਤ੍ਤ, ਕਾਮਗੁਣਾ’’ਤਿਆਦਿਨਾ ਆਰਦ੍ਧਦੇਸਨਾ, ‘‘ਸਮ੍ਮਾ ਨਿਬ੍ਬਾਨਾਧਿਮੁਤ੍ਤੋ ਪੁਰਿਸਪੁਗ੍ਗਲੋ’’ਤਿ ਅਰਹਤ੍ਤਕਿਤ੍ਤਨੇਨ ਨਿਟ੍ਠਾਪਿਤਾਤਿ ਤਤੋ ਪਰਂ, ‘‘ਠਾਨਂ ਖੋ ਪਨਾ’’ਤਿਆਦਿਕਾ ਦੇਸਨਾ, ‘‘ਪਾਟਿਯੇਕ੍ਕੋ ਅਨੁਸਨ੍ਧੀ’’ਤਿ ਵੁਤ੍ਤਾ. ਤੇਨਾਹ ‘‘ਹੇਟ੍ਠਾ ਹੀ’’ਤਿਆਦਿ. ਤਤ੍ਥ ਯਥਾ ਖੀਣਾਸਵਸ੍ਸ ਸਮਾਪਤ੍ਤਿਲਾਭਿਨੋਤਿ ਯੋਜਨਾ, ਏਵਂ ਵਾ ਖੀਣਾਸਵਸ੍ਸ ਸੁਕ੍ਖਵਿਪਸ੍ਸਕਸ੍ਸਾਤਿ ਯੋਜੇਤਬ੍ਬਾ. ਪਟਿਕ੍ਖਿਤ੍ਤਂ ਅਟ੍ਠਕਥਾਯਂ. ਤਸ੍ਸ ਪਟਿਕ੍ਖੇਪਸ੍ਸ ਕਾਰਣਂ ਦਸ੍ਸੇਤੁਂ ‘‘ਸਮਾਪਤ੍ਤਿਲਾਭਿਨੋ ਹੀ’’ਤਿਆਦਿ ਵੁਤ੍ਤਂ. ਯਥਾ ਸੁਕ੍ਖਵਿਪਸ੍ਸਕੋ ਅਧਿਮਾਨਿਕੋ ਸਮਾਪਤ੍ਤਿਲਾਭਿਨੋ ਸਮਾਨਯੋਗਕ੍ਖਮੋ ਅਪ੍ਪਤ੍ਤੇ ਪਤ੍ਤਸਞ੍ਞਿਤਾਯ ਭੇਦਾਭਾਵਤੋ, ਏਵਂ ਸੁਕ੍ਖਵਿਪਸ੍ਸਕੋ ਖੀਣਾਸਵੋ ਸਮਾਨਯੋਗਕ੍ਖਮੋ ਖੀਣਾਸਵਭਾਵੇਨ ਵਿਸੇਸਾਭਾਵਤੋ, ਤਸ੍ਮਾ ‘‘ਸਮਾਪਤ੍ਤਿਲਾਭਿਮ੍ਹਿ ਕਥਿਤੇ ਇਤਰੋਪਿ ਕਥਿਤੋਵ ਹੋਤੀ’’ਤਿ ਵੁਤ੍ਤਂ. ਦ੍ਵਿਨ੍ਨਂ ਭਿਕ੍ਖੂਨਨ੍ਤਿ ਸਮਾਪਤ੍ਤਿਲਾਭਿਨੋ ਅਧਿਮਾਨਿਕਸ੍ਸ ਖੀਣਾਸਵਸ੍ਸ ਚ. ਤੇਨੇਵਾਹ ‘‘ਪੁਥੁਜ੍ਜਨਸ੍ਸ ਤਾਵਾ’’ਤਿਆਦਿ.

ਯਦਗ੍ਗੇਨਾਤਿ ਯੇਨ ਭਾਗੇਨ. ਯਦਿਪਿ ਖੀਣਾਸਵਸ੍ਸ ਅਸਪ੍ਪਾਯਾਰਮ੍ਮਣਂ ਕਿਲੇਸਾਨਂ ਉਪ੍ਪਤ੍ਤਿਯਾ ਪਚ੍ਚਯੋ ਨ ਹੋਤਿ ਤੇਸਂ ਸਬ੍ਬਸੋ ਸਮੁਚ੍ਛਿਨ੍ਨਤ੍ਤਾ. ਸਨ੍ਤਵਿਹਾਰਪਰਿਪਨ੍ਥੋ ਪਨ ਸਿਯਾ ਵਿਸਭਾਗਤੋਤਿ ਵੁਤ੍ਤਂ – ‘‘ਖੀਣਾਸਵਸ੍ਸਪਿ ਅਸਪ੍ਪਾਯਮੇਵਾ’’ਤਿ. ਤੇਨਾਹ – ‘‘ਵਿਸਂ ਨਾਮ…ਪੇ… ਵਿਸਮੇਵਾ’’ਤਿ. ਏਤੇਨ ‘‘ਯਥਾ ਵਿਸਜਾਨਨਂ ਅਪ੍ਪਮਾਣਂ, ਵਿਕਾਰੁਪ੍ਪਾਦਨਤੋ ਪਨ ਤਂ ਪਰਿਹਰਿਤਬ੍ਬਂ, ਏਵਂ ਪਰਿਞ੍ਞਾਤਮ੍ਪਿ ਵਤ੍ਤੁ ਅਤ੍ਥਵਿਸੇਸਾਭਾਵੇਨ ਏਕਰੂਪਮੇਵਾਤਿ ਤਂ ਪਰਿਹਰਿਤਬ੍ਬਮੇਵਾ’’ਤਿ ਦਸ੍ਸੇਤਿ. ਤੇਨਾਹ ‘‘ਨ ਹੀ’’ਤਿਆਦਿ. ਨ ਹਿ ਅਸਂਵੁਤੇਨ ਭਵਿਤਬ੍ਬਂ ਅਸਾਰੁਪ੍ਪਭਾਵਤੋ. ਯੁਤ੍ਤਪਯੁਤ੍ਤੇਨੇਵਾਤਿ ਸਭਾਗਾਰਮ੍ਮਣਸ੍ਸ ਆਲੋਕਨਾਦੀਸੁ ਯੁਤ੍ਤੇਨੇਵ ਭਵਿਤੁਂ ਵਟ੍ਟਤਿ.

੬੪. ਯਤ੍ਥ ਸਯਂ ਨਿਪਤਤਿ ਉਪ੍ਪਜ੍ਜਤਿ, ਤਸ੍ਸ ਸਨ੍ਤਾਨਸ੍ਸ ਵਿਪ੍ਪਸਨ੍ਨਵਸੇਨ ਰੁਪ੍ਪਨਤੋ, ਵਿਸਸਙ੍ਖਾਤਸ੍ਸ ਦੁਕ੍ਖਸ੍ਸ ਮੂਲਭਾਵਤੋ ਚ ‘‘ਅਵਿਜ੍ਜਾਸਙ੍ਖਾਤੋ ਵਿਸਦੋਸੋ’’ਤਿ ਵੁਤ੍ਤਂ. ਰੁਪ੍ਪਤੀਤਿ ਕਤ੍ਤਬ੍ਬਾਦਿਮੁਚ੍ਛਾਪਾਦਨੇਨ ਵਿਕਾਰਂ ਉਪ੍ਪਾਦੇਤਿ. ਅਨੁਦ੍ਧਂਸੇਯ੍ਯਾਤਿ ਵਿਬਾਧੇਯ੍ਯ. ਰਾਗੋ ਹਿ ਉਪ੍ਪਜ੍ਜਮਾਨੋਵ ਕੁਸਲਚਿਤ੍ਤਪ੍ਪਵਤ੍ਤਿਯਾ ਓਕਾਸਂ ਅਦੇਨ੍ਤੋ ਤਂ ਵਿਬਾਧਤਿ; ਤਥਾਭੂਤੋ ਸਦ੍ਧਾਸਿਨੇਹਸ੍ਸ ਸਮਥਵਿਪਸ੍ਸਨਾਭਿਵੁਡ੍ਢਿਯਾ ਵਮਨੇਨ ਚ ਤਂ ਵਿਸੋਸੇਤਿ ਮਿਲਾਪੇਤਿ. ਤੇਨਾਹ ‘‘ਸੋਸੇਯ੍ਯ ਮਿਲਾਪੇਯ੍ਯਾ’’ਤਿ. ਸਗਹਣਸੇਸਨ੍ਤਿ ਗਹੇਤਬ੍ਬਵਿਸਂ ਸਾਵਸੇਸਂ ਕਤ੍ਵਾਤਿ ਅਤ੍ਥੋ. ਨ ਅਲਂ ਨ ਸਮਤ੍ਥਨ੍ਤਿ ਅਨਲਂ. ਸੂਕਪਰਿਯਾਯੋ ਪਾਲ਼ਿਯਂ ਵੁਤ੍ਤੋ ਸੁਕ-ਸਦ੍ਦੋਤਿ ਆਹ – ‘‘ਵੀਹਿਸੁਕਾਦਿ ਚ ਸੂਕ’’ਨ੍ਤਿ.

ਸਉਪਾਦਾਨਸਲ੍ਲੁਦ੍ਧਾਰੋ ਵਿਯ ਅਪ੍ਪਹੀਨੋ ਅਵਿਜ੍ਜਾਵਿਸਦੋਸੋ ਦਟ੍ਠਬ੍ਬੋ ਮਹਾਨਤ੍ਥੁਪ੍ਪਾਦਨਤੋ. ਅਸਪ੍ਪਾਯ…ਪੇ… ਅਸਂਵੁਤਕਾਲੋ ਦਟ੍ਠਬ੍ਬੋ ਅਤ੍ਤਭਾਵਸ੍ਸ ਅਪਰਿਹਰਣਭਾਵਤੋ. ਮਰਣਂ ਵਿਯ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਨਂ ਅਧਿਸੀਲਸਙ੍ਖਾਤਸ੍ਸ ਆਯੁਨੋ ਅਪੇਤਤ੍ਤਾ. ਮਰਣਮਤ੍ਤਂ ਦੁਕ੍ਖਂ ਵਿਯ ਆਪਤ੍ਤਿਯਾ ਆਪਜ੍ਜਨਂ ਯਥਾਵੁਤ੍ਤਸ੍ਸ ਆਯੁਨੋ ਉਪਪੀਲ਼ਨਕਭਾਵਤੋ. ਇਮਿਨਾਵ ਨਯੇਨ ਓਪਮ੍ਮਸਂਸਨ੍ਦਨਨ੍ਤਿ ਏਤ੍ਥ ਅਨੁਪਾਦਿਸੇਸਸਲ੍ਲੁਦ੍ਧਾਰੋ ਵਿਯ ਪਹੀਨੋ ਅਵਿਜ੍ਜਾਵਿਸਦੋਸੋ; ਸਪ੍ਪਾਯ…ਪੇ… ਸੁਸਂਵੁਤਕਾਲੋ, ਤਦੁਭਯੇਨ ਵਣੇ ਪੁਥੁਤ੍ਤਂ ਨ ਗਤੇ ਮਰਣਾਭਾਵੋ ਵਿਯ ਸਿਕ੍ਖਾਯ ਅਪਚ੍ਚਕ੍ਖਾਨਂ, ਮਰਣਮਤ੍ਤਦੁਕ੍ਖਾਭਾਵੋ ਵਿਯ ਅਞ੍ਞਤਰਾਯ ਸਂਕਿਲਿਟ੍ਠਾਯ ਆਪਤ੍ਤਿਯਾ ਅਨਾਪਜ੍ਜਨਨ੍ਤਿ ਯੋਜਨਾ ਵੇਦਿਤਬ੍ਬਾ.

੬੫. ਸਤਿਯਾਤਿ ਏਤ੍ਥ ਯਸ੍ਮਾ ‘‘ਅਰਿਯਾਯਾ’’ਤਿ ਨ ਵਿਸੇਸਿਤਨ੍ਤਿ ਆਹ – ‘‘ਸਤਿ ਪਞ੍ਞਾਗਤਿਕਾ’’ਤਿਆਦਿ. ਪਞ੍ਞਾ ਚੇਤ੍ਥ ਲੋਕਿਯਾ ਅਧਿਪ੍ਪੇਤਾ, ਨ ਲੋਕੁਤ੍ਤਰਾਤਿ ਆਹ – ‘‘ਪਰਿਸੁਦ੍ਧਾਯ ਵਿਪਸ੍ਸਨਾਪਞ੍ਞਾਯਾ’’ਤਿ.

ਖੀਣਾਸਵਸ੍ਸ ਬਲਨ੍ਤਿ ਉਲ਼ਾਰਤਮੇਸੁ ਦਿਬ੍ਬਸਦਿਸੇਸੁਪਿ ਆਰਮ੍ਮਣੇਸੁ ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਅਨੁਪਨਮਨਹੇਤੁਭੂਤਂ ਸੁਸਂਵੁਤਕਾਰਿਸਙ੍ਖਾਤਂ ਖੀਣਾਸਵਬਲਂ ਦਸ੍ਸੇਨ੍ਤੋ, ‘‘ਸਂਵੁਤਕਾਰੀ’’ਤਿ ਵੁਤ੍ਤਂ, ਉਕ੍ਕਂਸਗਤਸਤਿਵੇਪੁਲ੍ਲਤ੍ਤਾ ਯਥਾ ਅਸਂਵਰਸ੍ਸ ਅਸਂਵਰੋ ਹੋਤਿ, ਏਵਂ ਸਤਿਸਮ੍ਪਜਞ੍ਞਬਲੇਨ ਚਕ੍ਖਾਦਿਦ੍ਵਾਰਾਨਿ ਸਂਵਰਿਤ੍ਵਾ ਦਸ੍ਸਨਾਦਿਕਿਚ੍ਚਕਾਰੀ. ਏਵਂ ਜਾਨਿਤ੍ਵਾਤਿ ‘‘ਉਪਧਿ ਦੁਕ੍ਖਸ੍ਸ ਮੂਲ’’ਨ੍ਤਿ ਏਵਂ ਵਿਪਸ੍ਸਨਾਪਞ੍ਞਾਸਹਿਤਾਯ ਮਗ੍ਗਪਞ੍ਞਾਯ ਜਾਨਿਤ੍ਵਾ. ਉਪਧੀਯਤਿ ਦੁਕ੍ਖਂ ਏਤੇਹੀਤਿ ਉਪਧੀ, ਕਿਲੇਸਾਤਿ ਆਹ – ‘‘ਕਿਲੇਸੁਪਧਿਪਹਾਨਾ ਨਿਰੁਪਧੀ’’ਤਿ. ਤਤੋ ਏਵ ਉਪਾਦੀਯਤਿ ਦੁਕ੍ਖਂ ਏਤੇਹੀਤਿ ਕਿਲੇਸਾ ‘‘ਉਪਾਦਾਨਾ’’ਤਿਪਿ ਵੁਚ੍ਚਨ੍ਤੀਤਿ ਆਹ – ‘‘ਨਿਰੁਪਾਦਾਨੋਤਿ ਅਤ੍ਥੋ’’ਤਿ. ਉਪਧੀ ਸਮ੍ਮਦੇਵ ਖੀਯਨ੍ਤਿ ਏਤ੍ਤਾਤਿ ਉਪਧਿਸਙ੍ਖਯੋ, ਨਿਬ੍ਬਾਨਨ੍ਤਿ ਆਹ – ‘‘ਉਪਧੀਨਂ ਸਙ੍ਖਯਭੂਤੇ ਨਿਬ੍ਬਾਨੇ’’ਤਿ. ਆਰਮ੍ਮਣਤੋਤਿ ਆਰਮ੍ਮਣਂ ਕਤ੍ਵਾ ਤਦਾਰਮ੍ਮਣਾਯ ਫਲਵਿਮੁਤ੍ਤਿਯਾ ਵਿਮੁਤ੍ਤੋ. ਕਾਮੁਪਧਿਸ੍ਮਿਂ ਕਾਯਂ ਉਪਸਂਹਰਿਸ੍ਸਤੀਤਿ ‘‘ਕਾਮੇਸੇਵਿਸ੍ਸਾਮੀ’’ਤਿ ਤਤ੍ਥ ਕਾਯਂ ਉਪਨਾਮੇਸ੍ਸਤਿ; ਕਾਯੂਪਸਂਹਾਰੋ ਤਾਵ ਤਿਟ੍ਠਤੁ, ਤਥਾ ਚਿਤ੍ਤਂ ਵਾ ਉਪ੍ਪਾਦੇਸ੍ਸਤੀਤਿ ਏਤਂ ਕਾਰਣਂ ਨਤ੍ਥੀਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸੁਨਕ੍ਖਤ੍ਤਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.