੪. ਸਾਮਗਾਮਸੁਤ੍ਤਵਣ੍ਣਨਾ

੪੧. ਦ੍ਵੇਧਿਕਜਾਤਾਤਿ ਜਾਤਦ੍ਵੇਧਿਕਾ ਸਞ੍ਜਾਤਭੇਦਾ. ਦ੍ਵੇਜ੍ਝਜਾਤਾਤਿ ਦੁਵਿਧਭਾਵਂ ਪਤ੍ਤਾ. ਭਣ੍ਡਨ੍ਤਿ ਪਰਿਭਾਸਨ੍ਤਿ ਏਤੇਨਾਤਿ ਭਣ੍ਡਨਂ, ਵਿਰੁਦ੍ਧਚਿਤ੍ਤਤਾ. ਤਨ੍ਤਿ ਭਣ੍ਡਨਂ. ਧਮ੍ਮਵਿਨਯਨ੍ਤਿ ਪਾਵਚਨਂ. ਵਿਤੁਜ੍ਜਨ੍ਤਾ ਮੁਖਸਤ੍ਤੀਹਿ. ਸਹਿਤਂ ਮੇਤਿ ਮਯ੍ਹਂ ਵਚਨਂ ਸਹਿਤਂ ਸਿਲਿਟ੍ਠਂ ਪੁਬ੍ਬਾਪਰਸਮ੍ਬਨ੍ਧਂ ਅਤ੍ਥਯੁਤ੍ਤਂ. ਤੇਨਾਹ ‘‘ਅਤ੍ਥਸਂਹਿਤ’’ਨ੍ਤਿ. ਅਧਿਚਿਣ੍ਣਨ੍ਤਿ ਆਚਿਣ੍ਣਂ. ਵਿਪਰਾਵਤ੍ਤਨ੍ਤਿ ਵਿਰੋਧਦਸ੍ਸਨਵਸੇਨ ਪਰਾਵਤ੍ਤਿਤਂ, ਪਰਾਵਤ੍ਤਂ ਦੂਸਿਤਨ੍ਤਿ ਅਤ੍ਥੋ. ਤੇਨਾਹ – ‘‘ਚਿਰਕਾਲਵਸੇਨ…ਪੇ… ਨਿਵਤ੍ਤ’’ਨ੍ਤਿ. ਪਰਿਯੇਸਮਾਨੋ ਚਰ, ਤਤ੍ਥ ਤਤ੍ਥ ਗਨ੍ਤ੍ਵਾ ਸਿਕ੍ਖਾਹੀਤਿ ਅਤ੍ਥੋ. ਸਚੇ ਸਕ੍ਕੋਸਿ, ਇਦਾਨਿਮੇਵ ਮਯਾ ਵੇਠਿਤਦੋਸਂ ਨਿਬ੍ਬੇਠੇਹਿ. ਮਰਣਮੇਵਾਤਿ ਅਞ੍ਞਮਞ੍ਞਘਾਤਵਸੇਨ ਮਰਣਮੇਵ.

ਨਾਟਪੁਤ੍ਤਸ੍ਸ ਇਮੇਤਿ ਨਾਟਪੁਤ੍ਤਿਯਾ. ਤੇ ਪਨ ਤਸ੍ਸ ਸਿਸ੍ਸਾਤਿ ਆਹ ‘‘ਅਨ੍ਤੇਵਾਸਿਕੇਸੂ’’ਤਿ. ਪੁਰਿਮਪਟਿਪਤ੍ਤਿਤੋ ਪਟਿਨਿਵਤ੍ਤਨਂ ਪਟਿਵਾਨਂ, ਤਂ ਰੂਪਂ ਸਭਾਵੋ ਏਤੇਸਨ੍ਤਿ ਪਟਿਵਾਨਰੂਪਾ. ਤੇਨਾਹ ‘‘ਨਿਵਤ੍ਤਨਸਭਾਵਾ’’ਤਿ. ਕਥਨਂ ਅਤ੍ਥਸ੍ਸ ਆਚਿਕ੍ਖਨਂ. ਪਵੇਦਨਂ ਤਸ੍ਸ ਹੇਤੁਦਾਹਰਣਾਨਿ ਆਹਰਿਤ੍ਵਾ ਬੋਧਨਂ. ਨ ਉਪਸਮਾਯ ਸਂਵਤ੍ਤਤੀਤਿ ਅਨੁਪਸਮਸਂਵਤ੍ਤਨਂ, ਤਦੇਵ ਅਨੁਪਸਮਸਂਵਤ੍ਤਨਿਕਂ, ਤਸ੍ਮਿਂ. ਸਮੁਸ੍ਸਿਤਂ ਹੁਤ੍ਵਾ ਪਤਿਟ੍ਠਾਹੇਤੁਭਾਵਤੋ ਥੂਪਂ ਪਤਿਟ੍ਠਾਤਿ ਆਹ – ‘‘ਭਿਨ੍ਨਥੂਪੇਤਿ ਭਿਨ੍ਨਪਤਿਟ੍ਠੇ’’ਤਿ. ਥੂਪੋਤਿ ਵਾ ਧਮ੍ਮਸ੍ਸ ਨਿਯ੍ਯਾਨਭਾਵੋ ਵੇਦਿਤਬ੍ਬੋ, ਅਞ੍ਞਧਮ੍ਮੇ ਅਭਿਭੁਯ੍ਯ ਸਮੁਸ੍ਸਿਤਟ੍ਠੇਨ. ਸੋ ਨਿਗਣ੍ਠਸ੍ਸ ਸਮਯੇ ਕੇਹਿਚਿ ਅਭਿਨ੍ਨਸਮ੍ਮਤੋਪਿ ਭਿਨ੍ਨੋ ਵਿਨਟ੍ਠੋਯੇਵ ਸਬ੍ਬੇਨ ਸਬ੍ਬਂ ਅਭਾਵਤੋਤਿ ਭਿਨ੍ਨਥੂਪੋ. ਸੋ ਏਵ ਨਿਯ੍ਯਾਨਭਾਵੋ ਵਟ੍ਟਦੁਕ੍ਖਤੋ ਮੁਚ੍ਚਿਤੁਕਾਮਾਨਂ ਪਟਿਸਰਣਂ, ਤਂ ਏਤ੍ਥ ਨਤ੍ਥੀਤਿ ਅਪ੍ਪਟਿਸਰਣੋ, ਤਸ੍ਮਿਂ ਭਿਨ੍ਨਥੂਪੇ ਅਪ੍ਪਟਿਸਰਣੇਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ.

ਆਚਰਿਯਪ੍ਪਮਾਣਨ੍ਤਿ ਆਚਰਿਯਮੁਟ੍ਠਿ ਹੁਤ੍ਵਾ ਪਮਾਣਭੂਤਂ. ਨਾਨਾਨੀਹਾਰੇਨਾਤਿ ਨਾਨਾਕਾਰੇਨ. ‘‘ਵਿਵਾਦੋ ਨ ਉਪ੍ਪਜ੍ਜੀ’’ਤਿ ਵਤ੍ਵਾ ਤਸ੍ਸ ਅਨੁਪ੍ਪਤ੍ਤਿਕਾਰਣਂ ਦਸ੍ਸੇਨ੍ਤੋ, ‘‘ਸਤ੍ਥਾ ਹਿ…ਪੇ… ਅਵਿਵਾਦਕਾਰਣਂ ਕਤ੍ਵਾਵ ਪਰਿਨਿਬ੍ਬਾਯੀ’’ਤਿ ਵਤ੍ਵਾ ਤਂ ਵਿਵਰਿਤੁਂ ‘‘ਭਗਵਤਾ ਹੀ’’ਤਿਆਦਿ ਵੁਤ੍ਤਂ. ਪਤਿਟ੍ਠਾ ਚ ਅਵਸ੍ਸਯੋ ਚ, ‘‘ਅਯਂ ਧਮ੍ਮੋ ਅਯਂ ਵਿਨਯੋ ਇਦਂ ਸਤ੍ਥੁਸਾਸਨ’’ਨ੍ਤਿ ਵਿਨਿਚ੍ਛਯਨੇ ਮਹਾਪਦੇਸਾ, ਪਞ੍ਹਬ੍ਯਾਕਰਣਾਨਿ ਚ, ਯਸ੍ਮਾ ਤੇਸੁ ਪਤਿਟ੍ਠਾਯ ਤੇ ਅਵਸ੍ਸਾਯ ਧਮ੍ਮਵਿਨਯਧਰਾ ਚ ਨਿਚ੍ਛਯਂ ਗਚ੍ਛਨ੍ਤਿ. ਤਥਾ ਹਿ ਸੁਤ੍ਤਨ੍ਤਮਹਾਪਦੇਸਤੋ ਵਿਨਯੇ ਕੇਨਚਿ ਪੁਚ੍ਛਿਤੋ ਅਤ੍ਥੋ ਚਤੁਨ੍ਨਂ ਪਞ੍ਹਬ੍ਯਾਕਰਣਾਨਂ ਵਸੇਨ ਸੁਵਿਨਿਚ੍ਛਿਤਰੂਪੋ, ਤਸ੍ਮਾ ਧਮ੍ਮਵਿਨਯੋ ਇਧ ਸਤ੍ਥੁ ਕਿਚ੍ਚਂ ਕਾਤੁਂ ਸਕ੍ਕੋਤੀਤਿ ਆਹ – ‘‘ਤੇਨੇਵਾ’’ਤਿਆਦਿ, ਤਸ੍ਮਾ ਉਲ਼ਾਰਾਯ ਦੇਸਨਾਯ ਭਾਜਨਨ੍ਤਿ ਅਧਿਪ੍ਪਾਯੋ.

੪੨. ਪਟਿਪਵਿਟ੍ਠਂ ਕਤ੍ਵਾ ਆਹਰਿਤਬ੍ਬਤੋ, ਸਚ੍ਚਂ ਕਾਰਿਤਬ੍ਬਤੋ ਪਾਭਤਂ ਮੂਲਨ੍ਤਿ ਆਹ – ‘‘ਕਥਾਪਾਭਤ’’ਨ੍ਤਿ, ਧਮ੍ਮਕਥਾਯ ਮੂਲਕਾਰਣਨ੍ਤਿ ਅਤ੍ਥੋ. ਯੇਸਂ ਵਸੇਨ ਵਿਵਾਦੋ ਉਪ੍ਪਨ੍ਨੋ, ਤੇਯੇਵ ਅਧਮ੍ਮਵਾਦਿਨੋ, ਤੇਸਂ ਤਾਵ ਸੋ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤੁ, ਤਤੋ ਅਞ੍ਞੇਸਂ ਦੇਵਮਨੁਸ੍ਸਾਨਂ ਕਥਨ੍ਤਿ, ਚੋਦਨਾ ਪਰਮ੍ਪਰਾਯ ਸਂਕਿਲੇਸਵਤ੍ਥੁਭਾਵਤੋਤਿ ਪਰਿਹਾਰੋ. ਤੇਨਾਹ – ‘‘ਕੋਸਮ੍ਬਕਕ੍ਖਨ੍ਧਕੇ ਵਿਯਾ’’ਤਿਆਦਿ.

੪੩. ਅਭਿਞ੍ਞਾ ਦੇਸਿਤਾਤਿ ਅਭਿਵਿਸਿਟ੍ਠਾਯ ਪਞ੍ਞਾਯ ਜਾਨਿਤ੍ਵਾ ਬੋਧਿਤਾ. ਪਤਿਸ੍ਸਯਮਾਨਰੂਪਾਤਿ ਅਪਦਿਸ੍ਸ ਪਤਿਸ੍ਸਯਮਾਨਾ ਗਰੁਕਵਸੇਨ ਨਿਸ੍ਸਯਮਾਨਸਭਾਵਾ. ਤੇਨਾਹ – ‘‘ਉਪਨਿਸ੍ਸਾਯ ਵਿਹਰਨ੍ਤੀ’’ਤਿ, ਗਰੁਤਰਂ ਨਿਸ੍ਸਯਂ ਕਤ੍ਵਾ ਵਿਹਰਨ੍ਤੀਤਿ ਅਤ੍ਥੋ. ਪਰਿਵਾਰੇ ਪਞ੍ਞਤ੍ਤਾਨੀਤਿ, ‘‘ਆਜੀਵਹੇਤੁ ਆਜੀਵਕਾਰਣਾ’’ਤਿ, ਏਵਂ ਨਿਦ੍ਧਾਰੇਤ੍ਵਾ ਪਰਿਵਾਰਪਾਲ਼ਿਯਂ (ਪਰਿ. ੩੩੬) ਆਸਙ੍ਕਰਵਸੇਨ ਠਪਿਤਾਨਿ. ‘‘ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾ’’ਤਿ (ਪਾਰਾ. ੩੯, ੪੨, ੪੩) ਵਿਭਙ੍ਗਪਾਠਵਸੇਨੇਵ ਹਿ ਤਾਨਿ ਭਗਵਤਾ ਪਞ੍ਞਤ੍ਤਾਨਿ. ਤਾਨਿ ਠਪੇਤ੍ਵਾ ਸੇਸਾਨਿ ਸਬ੍ਬਸਿਕ੍ਖਾਪਦਾਨਿ ਅਧਿਪਾਤਿਮੋਕ੍ਖਂ ਨਾਮਾਤਿ, ਇਦਂ ਗੋਬਲੀਬਦ੍ਦਞਾਯੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ ਤੇਸਮ੍ਪਿ ਅਧਿਪਾਤਿਮੋਕ੍ਖਭਾਵਤੋ.

ਤਤ੍ਰਾਯਂ ਨਯੋਤਿ ਤਸ੍ਮਿਂ ਸੁਪ੍ਪਜਹਨਾਯ ਅਪ੍ਪਮਤ੍ਤਕਭਾਵੇ ਅਯਂ ਵਕ੍ਖਮਾਨੋ. ਤਾਨੀਤਿ ਪਣੀਤਭੋਜਨਾਨਿ. ਯੋ ਕੋਚੀਤਿ ਭਿਕ੍ਖੁ ਵਾ ਭਿਕ੍ਖੁਨੀ ਵਾ. ਦੁਕ੍ਕਟਵਤ੍ਥੁਕਨ੍ਤਿ ਯਂ ਕਿਞ੍ਚਿ ਦੁਕ੍ਕਟਾਪਤ੍ਤਿਵਤ੍ਥੁਕਂ. ਤੇਨਾਤਿ ਸੁਪ੍ਪਜਹਨਭਾਵੇਨ ਮੂਲਾਪਤ੍ਤਿਵੀਤਿਕ੍ਕਮਸ੍ਸ ਅਣੁਮਤ੍ਤਤਾਯ.

ਪੁਬ੍ਬਭਾਗਮਗ੍ਗਨ੍ਤਿ ਲੋਕਿਯਮਗ੍ਗਂ. ਤਤ੍ਰਾਤਿ ਤਸ੍ਮਿਂ ਪੁਬ੍ਬਭਾਗਮਗ੍ਗਂ ਨਿਸ੍ਸਾਯ ਵਿਵਾਦੁਪ੍ਪਾਦੇ. ਓਭਾਸਞਾਣਨ੍ਤਿ ਓਭਾਸਸ੍ਸ ਉਪ੍ਪਤ੍ਤਿਹੇਤੁਭੂਤਂ ਞਾਣਂ. ਤਤ੍ਥ ਪਨ ਸੋ ਮਗ੍ਗਸਞ੍ਞਿਭਾਵੇਨ ਮਗ੍ਗੋ ਚ ਚਤੁਬ੍ਬਿਧੋਤਿ ਸੁਤਤ੍ਤਾ, ‘‘ਪਟ੍ਠਮਮਗ੍ਗੋ ਨਾਮਾ’’ਤਿਆਦਿਮਾਹ. ਏਵਨ੍ਤਿ ਏਵਂ ਅਸਨ੍ਦਿਦ੍ਧਂ ਅਪਰਿਸਙ੍ਕਿਤਂ ਪਰਿਚ੍ਚਤ੍ਤਂ ਕਤ੍ਵਾ ਕਮ੍ਮਟ੍ਠਾਨਂ ਕਥੇਤੁਂ ਨ ਸਕ੍ਕੋਤਿ.

ਚੇਤਿਯਂ ਨ ਦਿਟ੍ਠਨ੍ਤਿ ਤਸ੍ਸ ਕਤਂ ਥੂਪਂ ਵਦਤਿ. ਨਿਨ੍ਦਿਯੇ ਪੁਥੁਜ੍ਜਨਭਾਵੇ ਠਿਤਂ ਪਾਸਂਸਂ ਅਰਿਯਭਾਵਂ ਆਰੋਪੇਤ੍ਵਾ ਤਂ ਮਿਚ੍ਛਾਲਦ੍ਧਿਂ ਅਭਿਨਿਵਿਸ੍ਸ ਪਗ੍ਗਯ੍ਹ ਵੋਹਰਣਤੋ ਸਗ੍ਗੋਪਿ ਮਗ੍ਗੋਪਿ ਵਾਰਿਤੋਯੇਵਾਤਿ. ਵੁਤ੍ਤਞ੍ਹੇਤਂ –

‘‘ਯੋ ਨਿਨ੍ਦਿਯਂ ਪਸਂਸਤਿ, ਤਂ ਵਾ ਨਿਨ੍ਦਤਿ ਯੋ ਪਸਂਸਿਯੋ;

ਵਿਚਿਨਾਤਿ ਮੁਖੇਨ ਸੋ ਕਲਿਂ, ਕਲਿਨਾ ਤੇਨ ਸੁਖਂ ਨ ਵਿਨ੍ਦਤੀ’’ਤਿ. (ਸੁ. ਨਿ. ੬੬੩; ਸਂ. ਨਿ. ੧.੧੮੦-੧੮੧; ਅ. ਨਿ. ੪.੩; ਨੇਤ੍ਤਿ. ੯੨);

‘‘ਖਣੇਨੇਵ ਅਰਹਤ੍ਤਂ ਪਾਪੁਣਿਤੁਂ ਸਮਤ੍ਥਕਮ੍ਮਟ੍ਠਾਨਕਥਂ ਆਚਿਕ੍ਖਿਸ੍ਸਾਮੀ’’ਤਿ ਹਿ ਇਮਿਨਾ ਤਤ੍ਥ ਕੋਹਞ੍ਞਮ੍ਪਿ ਦਿਸ੍ਸਤਿ; ਇਤਰੇਸੁ ਪਨ ਵਤ੍ਤਬ੍ਬਮੇਵ ਨਤ੍ਥਿ. ਉਪ੍ਪਾਟੇਤ੍ਵਾਤਿ ਉਦ੍ਧਰਿਤ੍ਵਾ. ‘‘ਅਥ ਤੇ ਭਿਕ੍ਖੂ’’ਤਿਆਦਿ ਸੇਸਂ ਨਾਮ. ‘‘ਅਮਤਂ ਤੇ ਪਰਿਭੁਞ੍ਜਨ੍ਤਿ, ਯੇ ਕਾਯਗਤਾਸਤਿਂ ਪਰਿਭੁਞ੍ਜਨ੍ਤੀ’’ਤਿ (ਅ. ਨਿ. ੧.੬੦੦) ਵਚਨਂ ਦੁਗ੍ਗਹਿਤਂ ਗਣ੍ਹਾਪੇਤ੍ਵਾ, ‘‘ਏਤ੍ਤਾਵਤਾ ਵੋ ਅਮਤਂ ਪਰਿਭੁਤ੍ਤਂ ਨਾਮ ਭਵਿਸ੍ਸਤੀ’’ਤਿ ਆਹ.

੪੪. ਏਵਨ੍ਤਿ ਆਕਾਰਲਕ੍ਖਣਮੇਤਂ, ਨ ਆਕਾਰਨਿਯਮਨਂ. ਤੇਨ ਇਮਿਨਾਵ ਕਾਰਣੇਨ ਚ ਯੋ ਵਿਵਾਦੋ ਉਪ੍ਪਜ੍ਜੇਯ੍ਯਾਤਿ ਵੁਤ੍ਤਂ ਹੋਤਿ. ਗਰੁਸ੍ਮਿਂ ਗਰੂਤਿ ਪਵਤ੍ਤਂ ਚਿਤ੍ਤਂ ਗਰੁਵਿਸਯਤ੍ਤਾ ਤਂਸਹਚਰਿਤਤ੍ਤਾ ਗਰੁ, ਤਸ੍ਸ ਭਾਵੋ ਗਾਰਵਂ, ਗਰੁਕਰਣਂ, ਤਂ ਏਤ੍ਥ ਨਤ੍ਥੀਤਿ ਅਗਾਰਵੋ. ਤੇਨਾਹ ‘‘ਗਾਰਵਵਿਰਹਿਤੋ’’ਤਿ. ਗਰੁਸ੍ਸ ਗਾਰਵਵਸੇਨ ਪਤਿਸ੍ਸਯਨਂ ਪਤਿਸ੍ਸੋਤਿ ਵੁਚ੍ਚਤਿ ਨੀਚਵੁਤ੍ਤਿਤਾ, ਤਪ੍ਪਟਿਪਕ੍ਖਤੋ ਅਪ੍ਪਤਿਸ੍ਸੋਤਿ ਆਹ – ‘‘ਅਪ੍ਪਤਿਸ੍ਸਯੋ ਅਨੀਚਵੁਤ੍ਤੀ’’ਤਿ. ਏਤ੍ਥ ਯਥਾਯਂ ਪੁਗ੍ਗਲੋ ਸਤ੍ਥਰਿ ਅਗਾਰਵੋ ਨਾਮ ਹੋਤਿ, ਤਂ ਦਸ੍ਸੇਤੁਂ, ‘‘ਏਤ੍ਥ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਤੀਸੁਕਾਲੇਸੁ ਉਪਟ੍ਠਾਨਂ ਨ ਯਾਤੀਤਿਆਦਿ ਸਮੁਦਾਯਕਿਤ੍ਤਨਅਨਵਸੇਸਦਸ੍ਸਨਂ, ਅਵਯਵਤੋ ਪਨ ਅਗਾਰਵਸਿਦ੍ਧਿ ਯਥਾ ਤਂ ਸਾਮਞ੍ਞਤੋ ਸਿਕ੍ਖਾਪਦਸਮਾਦਾਨਂ ਤਬ੍ਬਿਸੇਸੋ ਭੇਦੋ. ਏਸ ਨਯੋ ਸੇਸੇਸੁਪਿ.

ਸਕ੍ਕਚ੍ਚਂ ਨ ਗਚ੍ਛਤੀਤਿ ਆਦਰਵਸੇਨ ਨ ਗਚ੍ਛਤਿ. ਸਙ੍ਘੇ ਕਤੋਯੇਵ ਹੋਤਿ ਸਙ੍ਘਪਰਿਯਾਪਨ੍ਨਤ੍ਤਾ ਤਸ੍ਸ, ਯਥਾ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਂ ਏਕੇਨ ਭਿਕ੍ਖੁਨਾ ਪਟਿਗ੍ਗਹਿਤਂ ਸਙ੍ਘਸ੍ਸ ਦਿਨ੍ਨਮੇਵ ਹੋਤਿ. ਅਪਰਿਪੂਰਯਮਾਨੋਵ ਸਿਕ੍ਖਾਯ ਅਗਾਰਵੋ. ਤੇਨਾਹ ਭਗਵਾ – ‘‘ਸਿਕ੍ਖਾਯ ਨ ਪਰਿਪੂਰਕਾਰੀ’’ਤਿ (ਮ. ਨਿ. ੨.੧੩੫). ਅਤ੍ਤਨੋ ਪਰਿਸਾਯ ਉਪ੍ਪਨ੍ਨਂ ਵਿਵਾਦਮੂਲਂ ਵਿਸੇਸਤੋ ਅਤ੍ਤਨਾ ਵੂਪਸਮੇਤਬ੍ਬਤੋ ਅਤ੍ਤਨੋ ਚ ਅਨਤ੍ਥਾਵਹਤੋ ‘‘ਅਜ੍ਝਤ੍ਤ’’ਨ੍ਤ੍ਵੇਵ ਵੁਤ੍ਤਂ. ਏਸ ਨਯੋ ਬਹਿਦ੍ਧਾਤਿ ਏਤ੍ਥਾਪਿ.

੪੬. ਛਠਾਨਾਨੀਤਿ ਛਮੂਲਾਨਿ. ਯਥਾ ਸਮਨਵਸੇਨ ਸਮਥਾਨਂ ਵਿਵਾਦਾਦੀਸੁ ਅਧਿਕਤ੍ਤੁਭਾਵੋ, ਏਵਂ ਵਿਵਾਦਾਦੀਨਂ ਤੇਹਿ ਅਧਿਕਤ੍ਤਬ੍ਬਤਾਪੀਤਿ ਆਹ – ‘‘ਵੂਪਸਮਨਤ੍ਥਾਯ…ਪੇ… ਅਧਿਕਰਣਾਨੀ’’ਤਿ. ਤੇਨ ਅਧਿਕਰਣਸਦ੍ਦਸ੍ਸ ਕਮ੍ਮਤ੍ਥਤਂ ਆਹ. ਸਮਥਾ ਵਾ ਸਮਨਵਸੇਨ ਅਧਿਕਰੀਯਨ੍ਤਿ ਏਤ੍ਥਾਤਿ ਅਧਿਕਰਣਾਨਿ, ਵਿਵਾਦਾਦਯੋ.

ਵਿਵਾਦੋ ਉਪ੍ਪਨ੍ਨਮਤ੍ਤੋਵ ਹੁਤ੍ਵਾ ਪਰਤੋ ਕਕ੍ਖਲ਼ਤ੍ਥਾਯ ਸਂਵਤ੍ਤਨਤੋ ਯਂ ਵਤ੍ਥੁਂ ਨਿਸ੍ਸਾਯ ਪਠਮਂ ਉਪ੍ਪਨ੍ਨੋ ਵਿਵਾਦਾਨੁਸਾਰੇਨ ਮੂਲਕਂ ਵਿਯ ਅਨੁਬਨ੍ਧਰੋਗੋ ਤਮੇਵ ਤਦਞ੍ਞਂ ਵਾ ਵਤ੍ਥੁਂ ਕਤ੍ਵਾ ਪਵਡ੍ਢਨ੍ਤੋ ਵਿਵਾਦਾਧਿਕਰਣਂ ਪਤ੍ਵਾ ਉਪਰਿ ਵਡ੍ਢਤਿ ਨਾਮ, ਅਨੁਵਾਦਾਪਤ੍ਤਿਕਿਚ੍ਚਾਧਿਕਰਣਂ ਪਤ੍ਵਾ ਵਿਵਾਦਸ੍ਸ ਚ ਵਡ੍ਢਨਂ ਪਾਕਟਮੇਵ. ਤੇਨ ਵੁਤ੍ਤਂ – ‘‘ਚਤ੍ਤਾਰਿ ਅਧਿਕਰਣਾਨਿ ਪਤ੍ਵਾ ਉਪਰਿ ਵਡ੍ਢਨ੍ਤੋ ਸੋ ਵਿਵਾਦੋ’’ਤਿ. ਉਪ੍ਪਨ੍ਨਾਨਂ ਉਪ੍ਪਨ੍ਨਾਨਨ੍ਤਿ (ਦੀ. ਨਿ. ਟੀ. ੩.੩੩੧) ਉਟ੍ਠਿਤਾਨਂ ਉਟ੍ਠਿਤਾਨਂ. ਸਮਥਤ੍ਥਨ੍ਤਿ ਸਮਨਤ੍ਥਂ.

ਅਟ੍ਠਾਰਸਹਿ ਵਤ੍ਥੂਹੀਤਿ ਲਕ੍ਖਣਵਚਨਮੇਤਂ ਯਥਾ ‘‘ਯਦਿ ਮੇ ਬ੍ਯਾਧੀ ਦਾਹੇਯ੍ਯੁਂ. ਦਾਤਬ੍ਬਮਿਦਮੋਸਧ’’ਨ੍ਤਿ (ਸਂ. ਨਿ. ਟੀ. ੨.੩.੩੯-੪੨; ਕਙ੍ਖਾ. ਅਭਿ. ਟੀ. ਅਧਿਕਰਣਸਮਥਵਣ੍ਣਨਾ), ਤਸ੍ਮਾ ਤੇਸੁ ਅਞ੍ਞਤਰੇਨ ਵਿਵਦਨ੍ਤਾ, ‘‘ਅਟ੍ਠਾਰਸਹਿ ਵਤ੍ਥੂਹਿ ਵਿਵਦਨ੍ਤੀ’’ਤਿ ਵੁਚ੍ਚਨ੍ਤਿ. ਉਪਵਦਨਾਤਿ ਅਕ੍ਕੋਸੋ. ਚੋਦਨਾਤਿ ਅਨੁਯੋਗੋ.

ਅਧਿਕਰਣਸ੍ਸ ਸਮ੍ਮੁਖਾਵ ਵਿਨਯਨਤੋ ਸਮ੍ਮੁਖਾਵਿਨਯੋ. ਸਨ੍ਨਿਪਤਿਤਪਰਿਸਾਯ ਧਮ੍ਮਵਾਦੀਨਂ ਯੇਭੁਯ੍ਯਤਾਯ ਯੇਭੁਯ੍ਯਸਿਕਕਮ੍ਮਸ੍ਸ ਕਰਣਂ ਯੇਭੁਯ੍ਯਸਿਕਾ. ਕਾਰਕਸਙ੍ਘਸ੍ਸ ਸਾਮਗ੍ਗਿਵਸੇਨ ਸਮ੍ਮੁਖੀਭਾਵੋ, ਨ ਯਥਾ ਤਥਾ ਕਾਰਕਪੁਗ੍ਗਲਾਨਂ ਸਮ੍ਮੁਖਤਾਮਤ੍ਤਂ. ਭੂਤਤਾਤਿ ਤਚ੍ਛਤਾ. ਸਚ੍ਚਪਰਿਯਾਯੋ ਹਿ ਇਧ ਧਮ੍ਮ-ਸਦ੍ਦੋ ‘‘ਧਮ੍ਮਵਾਦੀ’’ਤਿਆਦੀਸੁ (ਦੀ. ਨਿ. ੧.੯) ਵਿਯ. ਵਿਨੇਤਿ ਏਤੇਨਾਤਿ ਵਿਨਯੋ, ਤਸ੍ਸ ਤਸ੍ਸ ਅਧਿਕਰਣਸ੍ਸ ਵੂਪਸਮਾਯ ਭਗਵਤਾ ਵੁਤ੍ਤਵਿਧਿ, ਤਸ੍ਸ ਵਿਨਯਸ੍ਸ ਸਮ੍ਮੁਖਤਾ ਵਿਨਯਸਮ੍ਮੁਖਤਾ. ਵਿਵਾਦਵਤ੍ਥੁਸਙ੍ਖਾਤੇ ਅਤ੍ਥੇ ਪਚ੍ਚਤ੍ਥਿਕਾ ਅਤ੍ਥਪਚ੍ਚਤ੍ਥਿਕਾ, ਤੇਸਂ ਅਤ੍ਥਪਚ੍ਚਤ੍ਥਿਕਾਨਂ. ਸਙ੍ਘਸਮ੍ਮੁਖਤਾ ਪਰਿਹਾਯਤਿ ਸਮ੍ਮਤਪੁਗ੍ਗਲੇਹੇਵ ਵੂਪਸਮਨਤੋ.

ਨਨ੍ਤਿ ਵਿਵਾਦਾਧਿਕਰਣਂ. ‘‘ਨ ਛਨ੍ਦਾਗਤਿਂ ਗਚ੍ਛਤੀ’’ਤਿਆਦਿਨਾ (ਪਰਿ. ੩੮੩) ਵੁਤ੍ਤਂ ਪਞ੍ਚਙ੍ਗਸਮਨ੍ਨਾਗਤਂ. ਗੁਲ਼੍ਹਕਾਦੀਸੁ ਅਲਜ੍ਜੁਸ੍ਸਨ੍ਨਾਯ ਪਰਿਸਾਯ ਗੁਲ਼੍ਹਕੋ ਸਲਾਕਗ੍ਗਾਹੋ ਕਾਤਬ੍ਬੋ; ਲਜ੍ਜੁਸ੍ਸਨ੍ਨਾਯ ਵਿਵਟਕੋ, ਬਾਲੁਸ੍ਸਨ੍ਨਾਯ ਸਕਣ੍ਣਜਪ੍ਪਕੋ. ਯਸ੍ਸਾ ਕਿਰਿਯਾਯ ਧਮ੍ਮਵਾਦਿਨੋ ਬਹੁਤਰਾ, ਸਾ ਯੇਭੁਯ੍ਯਸਿਕਾਤਿ ਆਹ – ‘‘ਧਮ੍ਮਵਾਦੀਨਂ ਯੇਭੁਯ੍ਯਤਾਯਾ’’ਤਿਆਦਿ.

ਏਵਂ ਵਿਨਿਚ੍ਛਿਤਨ੍ਤਿ ਆਪਤ੍ਤਿਂ ਦਸ੍ਸੇਤ੍ਵਾ ਰੋਪਨਵਸੇਨ ਵਿਨਿਚ੍ਛਿਤਂ, ਪਟਿਕਮ੍ਮਂ ਪਨ ਆਪਤ੍ਤਾਧਿਕਰਣਸਮਥੇ ਪਰਤੋ ਆਗਮਿਸ੍ਸਤਿ. ਨ ਸਮਣਸਾਰੁਪ੍ਪਂ ਅਸ੍ਸਾਮਣਕਂ, ਸਮਣੇਹਿ ਅਕਾਤਬ੍ਬਂ, ਤਸ੍ਮਿਂ. ਅਜ੍ਝਾਚਾਰੇ ਵੀਤਿਕ੍ਕਮੇਸਤਿ. ਪਟਿਚਰਤੋਤਿ ਪਟਿਚ੍ਛਾਦੇਨ੍ਤਸ੍ਸ. ਪਾਪੁਸ੍ਸਨ੍ਨਤਾਯ ਪਾਪਿਯੋ, ਪੁਗ੍ਗਲੋ, ਤਸ੍ਸ ਕਾਤਬ੍ਬਕਮ੍ਮਂ ਤਸ੍ਸਪਾਪਿਯਸਿਕਂ.

ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਨਤ੍ਥਿ ਪਟਿਞ੍ਞਾਯ, ਤਥਾਰੂਪਾਯ ਖਨ੍ਤਿਯਾ ਵਾ ਵਿਨਾ ਅਵੂਪਸਮਨਤੋ. ਏਤ੍ਥਾਤਿ ਆਪਤ੍ਤਿਦੇਸਨਾਯਂ. ਪਟਿਞ੍ਞਾਤੇ ਆਪਨ੍ਨਭਾਵਾਦਿਕੇ ਕਰਣਕਿਰਿਯਾ, ‘‘ਆਯਤਿਂ ਸਂਵਰੇਯ੍ਯਾਸੀ’’ਤਿ, ਪਰਿਵਾਸਦਾਨਾਦਿਵਸੇਨ ਚ ਪਵਤ੍ਤਂ ਵਚੀਕਮ੍ਮਂ ਪਟਿਞ੍ਞਾਤਕਰਣਂ.

ਯਥਾਨੁਰੂਪਨ੍ਤਿ ‘‘ਦ੍ਵੀਹਿ ਚਤੂਹਿ ਤਿਹਿ ਏਕੇਨਾ’’ਤਿ ਏਵਂ ਵੁਤ੍ਤਨਯੇਨ ਯਥਾਨੁਰੂਪਂ. ਏਤ੍ਥਾਤਿ ਇਮਸ੍ਮਿਂ ਸੁਤ੍ਤੇ, ਏਤਸ੍ਮਿਂ ਵਾ ਸਮਥਵਿਚਾਰੇ. ਵਿਨਿਚ੍ਛਯਨਯੋਤਿ ਵਿਨਿਚ੍ਛਯੇ ਨਯਮਤ੍ਤਂ. ਤੇਨਾਹ ‘‘ਵਿਤ੍ਥਾਰੋ ਪਨਾ’’ਤਿਆਦਿ.

੪੭. ਸਙ੍ਖੇਪਤੋਵ ਵੁਤ੍ਤੋ, ਨ ਸਮਥਕ੍ਖਨ੍ਧਕੇ ਵਿਯ ਵਿਤ੍ਥਾਰਤੋ. ਤਥਾਤਿ ਇਮਿਨਾ ‘‘ਧਮ੍ਮਾ’’ਤਿ ਪਦਂ ਆਕਡ੍ਢਤਿ, ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ, ਏਵਮਾਦਿਨਾ ਇਮਿਨਾ ਪਕਾਰੇਨਾਤਿ ਵਾਤਿ ਵੁਤ੍ਤਂ ਹੋਤਿ. ਬੋਧਿਪਕ੍ਖਿਯਧਮ੍ਮਾਨਂ ਏਕਨ੍ਤਾਨਵਜ੍ਜਭਾਵਤੋ ਨਤ੍ਥਿ ਅਧਮ੍ਮਭਾਵੋ, ਭਗਵਤੋ ਦੇਸਿਤਾਕਾਰਂ ਹਾਪੇਤ੍ਵਾ ਵਡ੍ਢੇਤ੍ਵਾ ਵਾ ਕਥਨਂ ਯਥਾਧਮ੍ਮਂ ਅਕਤਨ੍ਤਿ ਕਤ੍ਵਾ ਅਧਮ੍ਮਭਾਵੋਤਿ ਦਸ੍ਸੇਨ੍ਤੋ ਆਹ – ‘‘ਤਯੋ ਸਤਿਪਟ੍ਠਾਨਾ’’ਤਿਆਦਿ.

ਨਿਯ੍ਯਾਨਿਕਨ੍ਤਿ ਸਪਾਟਿਹੀਰਂ ਅਪ੍ਪਟਿਵਾਨਂ ਹੁਤ੍ਵਾ ਪਵਤ੍ਤਤਿ. ਤਥੇਵਾਤਿ ਇਮਿਨਾ ‘‘ਏਵਂ ਅਮ੍ਹਾਕ’’ਨ੍ਤਿਆਦਿਨਾ ਵੁਤ੍ਤਮਤ੍ਥਂ ਆਕਡ੍ਢਤਿ. ਭੂਤੇਨ…ਪੇ… ਕਾਤਬ੍ਬਕਮ੍ਮਂ ਧਮ੍ਮੋ ਨਾਮ ਯਥਾਧਮ੍ਮਂ ਕਰਣਤੋ, ਵੁਤ੍ਤਵਿਪਰਿਯਾਯਤੋ ਇਤੋ ਪਰਂ ਅਧਮ੍ਮੋ. ਅਯਂ ਵਿਨਯੋ ਨਾਮ ਰਾਗਾਦੀਨਂ ਸਂਵਰਣਤੋ ਪਹਾਨਤੋ ਪਟਿਸਙ੍ਖਾਨਤੋ ਚ. ਅਯਂ ਅਵਿਨਯੋ ਨਾਮ ਰਾਗਾਦੀਨਂ ਅਵਿਨਯਨਤੋ. ਅਯਂ ਵਿਨਯੋ ਨਾਮ ਯਥਾਵਿਨਯਕਰਣਤੋ, ਵੁਤ੍ਤਵਿਪਰਿਯਾਯੇਨ ਇਤਰੋ ਅਵਿਨਯੋ. ਵਤ੍ਥੁਸਮ੍ਪਤ੍ਤਿਆਦਿਨਾ ਏਵ ਸਬ੍ਬੇਸਂ ਵਿਨਯਕਮ੍ਮਾਨਂ ਅਕੁਪ੍ਪਤਾਤਿ ਆਹ – ‘‘ਵਤ੍ਥੁਸਮ੍ਪਤ੍ਤਿ…ਪੇ… ਅਯਂ ਵਿਨਯੋ ਨਾਮਾ’’ਤਿ, ਤਪ੍ਪਟਿਪਕ੍ਖਤੋ ਅਵਿਨਯੋ ਵੇਦਿਤਬ੍ਬੋ. ਤੇਨਾਹ ‘‘ਵਤ੍ਥੁਵਿਪਤ੍ਤੀ’’ਤਿਆਦਿ.

ਸਮ੍ਮਾਪਟਿਪਤ੍ਤਿਯਾ ਨਯਨਟ੍ਠੇਨ ਯਥਾਵੁਤ੍ਤੋ ਧਮ੍ਮੋ ਏਵ ਨੇਤ੍ਤਿ, ਤਤੋ ਏਵ ਸਤ੍ਤਸ੍ਸ ਵਿਯ ਰਜ੍ਜੁ ਅਸਿਥਿਲਪਵਤ੍ਤਿਹੇਤੁਤਾਯ ਧਮ੍ਮਰਜ੍ਜੂਤਿ ਅਤ੍ਥੋ ਵੁਤ੍ਤੋ. ਸੁਤ੍ਤਨ੍ਤਪਰਿਯਾਯੇਨ ਤਾਵ ਦਸ ਕੁਸਲਕਮ੍ਮਪਥਾ ਧਮ੍ਮੋਤਿ ਏਵਂ ਵੁਤ੍ਤਾ. ਸਾ ਏਵ ਵਾ ਹੋਤੁ ਧਮ੍ਮਨੇਤ੍ਤਿ, ਯੋ ਇਧ ਇਮਿਸ੍ਸਾ ਵਣ੍ਣਨਾਯ, ‘‘ਛਤ੍ਤਿਂਸ ਬੋਧਿਪਕ੍ਖਿਯਧਮ੍ਮਾ’’ਤਿਆਦਿਨਾ ਧਮ੍ਮੇਨ ਚ ਵਿਨਯੇਨ ਚ ਵੁਤ੍ਤੋ, ਸੋ ਏਵ ਵਾ ਧਮ੍ਮਨੇਤ੍ਤਿ ਹੋਤੂਤਿ ਆਨੇਤ੍ਵਾ ਯੋਜਨਾ. ਤਾਯ ਧਮ੍ਮਨੇਤ੍ਤਿਯਾ ਸਮੇਤਿ ਤਾਯ ਯਥਾਵੁਤ੍ਤਾਯ ਧਮ੍ਮਨੇਤ੍ਤਿਯਾ ਸਂਸਨ੍ਦਤਿ, ਏਕਲਕ੍ਖਣਮੇਵ ਹੋਤੀਤਿ ਅਤ੍ਥੋ. ਏਵਂ ਵਿਵਾਦਵਤ੍ਥੁਭੂਤੋ ਧਮ੍ਮੋ ਚੇ ‘‘ਧਮ੍ਮੋ’’ਤਿ, ਅਧਮ੍ਮੋ ਚੇ ‘‘ਅਧਮ੍ਮੋ’’ਤਿ, ਵਿਨਯੋ ਚੇ ‘‘ਵਿਨਯੋ’’ਤਿ, ਅਵਿਨਯੋ ਚੇ ‘‘ਅਵਿਨਯੋ’’ਤਿ ਨਿਚ੍ਛਿਨਨ੍ਤੇਨ ਏਕਚ੍ਚਾਨਂ ਵਿਵਾਦਾਧਿਕਰਣਮੇਵ ਦਸ੍ਸਿਤਂ ਤਸ੍ਸ ਵੂਪਸਮਧਮ੍ਮਾਨਂ ਅਪਰਿਯੋਸਾਪਿਤਤ੍ਤਾ.

੪੮. ਤਂ ਪਨੇਤਨ੍ਤਿ ਵਿਵਾਦਾਧਿਕਰਣਂ ਪਚ੍ਚਾਮਸਤਿ. ਵਾਰੇ ਅਤ੍ਥਸਂਵਣ੍ਣਨਾਵਸੇਨ ਪਤ੍ਤੇਪਿ. ਦ੍ਵੀਹੀਤਿ ਯਸ੍ਮਿਂ ਆਵਾਸੇ ਵਿਵਾਦਾਧਿਕਰਣਂ ਉਪ੍ਪਨ੍ਨਂ, ਤਤ੍ਥ ਵਾਸੀਹਿ ਦ੍ਵੀਹਿਪਿ ਭਿਕ੍ਖੂਹਿ ਅਤਿਰੇਕਤਰਾ.

੪੯. ਖਨ੍ਧਸਾਮਨ੍ਤਨ੍ਤਿ ਆਪਤ੍ਤਿਕ੍ਖਨ੍ਧਭਾਵੇਨ ਸਮੀਪਂ. ਆਪਤ੍ਤਿਸਾਮਨ੍ਤਂ ਨਾਮ ਪੁਬ੍ਬਭਾਗਾ ਆਪਜ੍ਜਿਤਬ੍ਬਆਪਤ੍ਤਿ. ਮੇਥੁਨਰਾਗਵਸੇਨ ਕਾਯਸਂਸਗ੍ਗੇ ਦੁਕ੍ਕਟਸ੍ਸ ਵਤ੍ਥੂਤਿ ਆਹ – ‘‘ਪਠਮਪਾਰਾਜਿਕਸ੍ਸ ਪੁਬ੍ਬਭਾਗੇ ਦੁਕ੍ਕਟ’’ਨ੍ਤਿ. ਸੇਸਾਨਂ ਤਿਣ੍ਣਂ ਪਾਰਾਜਿਕਾਨਂ ਪੁਬ੍ਬਭਾਗੇ ਥੁਲ੍ਲਚ੍ਚਯਮੇਵ.

੫੦. ਪਰਿਕ੍ਕਮਿਤ੍ਵਾ ਉਪਕ੍ਕਮਿਤ੍ਵਾ. ਆਪਤ੍ਤਾਧਿਕਰਣਂ ਦਸ੍ਸਿਤਂ ਤਤ੍ਥੇਵ ਵਿਸੇਸਤੋ ਪਟਿਞ੍ਞਾਯ ਕਾਰੇਤਬ੍ਬਤਾਯ ਇਚ੍ਛਿਤਬ੍ਬਤ੍ਤਾ.

੫੨. ਕਮ੍ਮਸ੍ਸ ਵਤ੍ਥੁ ਦਸ੍ਸਿਤਂ ਨ ਸਮਥੋਤਿ ਅਧਿਪ੍ਪਾਯੋ. ਨਨੁ ਚਾਯਂ ਸਮਥਾਧਿਕਾਰੋਤਿ? ਸਚ੍ਚਂ, ਸਮਥਸ੍ਸ ਪਨ ਕਾਰਣੇ ਦਸ੍ਸਿਤੇ ਸਮਥੋ ਦਸ੍ਸਿਤੋਵ ਹੋਤੀਤਿ ਦਸ੍ਸੇਤੁਂ ‘‘ਏਵਰੂਪਸ੍ਸ ਹੀ’’ਤਿਆਦਿ ਵੁਤ੍ਤਂ.

੫੩. ਇਦਂ ਕਮ੍ਮਨ੍ਤਿ ‘‘ਇਦਂ ਅਮ੍ਹਾਕਂ ਭਣ੍ਡਨਜਾਤਾਨ’’ਨ੍ਤਿਆਦਿਨਾ ਵੁਤ੍ਤਕਮ੍ਮਂ. ਤਿਣਵਤ੍ਥਾਰਕਸਦਿਸਤ੍ਤਾਤਿ ਤਂਸਦਿਸਤਾਯ ਤਬ੍ਬੋਹਾਰੋਤਿ ਦਸ੍ਸੇਤਿ ਯਥਾ – ‘‘ਏਸ ਬ੍ਰਹ੍ਮਦਤ੍ਤੋ’’ਤਿ. ਆਕਾਰਮਤ੍ਤਮੇਵ ਤਿਣਵਤ੍ਥਾਰਕਕਮ੍ਮਂ ਨਾਮ, ਨ ਪਨ ਤਸ੍ਸ ਸਬ੍ਬਸੋ ਕਰਣਵਿਧਾਨਂ. ਤੇਨਾਹ ‘‘ਖਨ੍ਧਕੇ’’ਤਿਆਦਿ. ਗਿਹੀਨਂ ਹੀਨੇਨ ਖੁਂਸਨਵਮ੍ਭਨਂ ਯਥਾ ‘‘ਤਿਲਸਂਗੁਲ਼ਿਕਾ ਨਤ੍ਥੀ’’ਤਿ. ਧਮ੍ਮਿਕਪਟਿਸ੍ਸਵੇਸੁ ਵਿਸਂਵਾਦਨਵਸੇਨ ਆਪਨ੍ਨਾ ਆਪਤ੍ਤਿ. ਅਸ੍ਸਾਤਿ ਕਿਚ੍ਚਾਧਿਕਰਣਸ੍ਸ. ਸਮ੍ਮੁਖਾਵਿਨਯੇਨੇਵ ਵੂਪਸਮੋ ਸਙ੍ਘਸਮ੍ਮੁਖਤਾਦਿਨਾਵ ਵੂਪਸਮਨਤੋ.

੫੪. ਸੋਤਾਪਤ੍ਤਿਫਲਸਚ੍ਛਿਕਿਰਿਯਵਚਨਤੋ ਕੋਸਮ੍ਬਿਯਸੁਤ੍ਤੇ (ਮ. ਨਿ. ੧.੪੯੨) ਸੋਤਾਪਤ੍ਤਿਮਗ੍ਗਸਮ੍ਮਾਦਿਟ੍ਠਿ ਕਥਿਤਾ, ਇਧ ਪਨ ‘‘ਦਿਟ੍ਠਿਸਾਮਞ੍ਞਗਤੋ ਵਿਹਰਤਿ’’ਚ੍ਚੇਵ ਵੁਤ੍ਤਤ੍ਤਾ, ‘‘ਇਮਸ੍ਮਿਂ ਸੁਤ੍ਤੇ ਸੋਤਾਪਤ੍ਤਿਫਲਸਮ੍ਮਾਦਿਟ੍ਠਿ ਵੁਤ੍ਤਾਤਿ ਵੇਦਿਤਬ੍ਬਾ’’ਤਿ ਵੁਤ੍ਤਂ. ਪਾਪਕਮ੍ਮਸ੍ਸ ਅਪ੍ਪਤਾ ਮਹਨ੍ਤਤਾ ਸਾਵਜ੍ਜਭਾਵਸ੍ਸ ਮੁਦੁਤਿਕ੍ਖਭਾਵੇਨ ਵੇਦਿਤਬ੍ਬਾਤਿ ਆਹ ‘‘ਅਣੁਨ੍ਤਿ ਅਪ੍ਪਸਾਵਜ੍ਜਂ. ਥੂਲਨ੍ਤਿ ਮਹਾਸਾਵਜ੍ਜ’’ਨ੍ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਸਾਮਗਾਮਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.