੩. ਕਿਨ੍ਤਿਸੁਤ੍ਤਵਣ੍ਣਨਾ

੩੪. ਭਵੋਤਿ ਪਰਿਤ੍ਤੋ. ਅਭਵੋਤਿ ਮਹਨ੍ਤੋ. ਵੁਦ੍ਧਿਅਤ੍ਥੋ ਹਿ ਅਯਂ ਅ-ਕਾਰੋ, ‘‘ਸਂਵਰਾਸਂਵਰੋ, ਫਲਾਫਲ’’ਨ੍ਤਿਆਦੀਸੁ ਵਿਯ, ਤਸ੍ਮਾ ਭਵਾਭਵਹੇਤੂਤਿ ਖੁਦ੍ਦਕਸ੍ਸ ਮਹਨ੍ਤਸ੍ਸ ਵਾ ਭਵਸ੍ਸ ਹੇਤੁ, ਤਂ ਪਚ੍ਚਾਸੀਸਮਾਨੋਤਿ ਅਤ੍ਥੋ. ਤੇਨਾਹ – ‘‘ਤਸ੍ਮਿਂ ਤਸ੍ਮਿਂ ਭਵੇ ਸੁਖਂ ਵੇਦਿਸ੍ਸਾਮੀ’’ਤਿਆਦਿ.

੩੫. ਲੋਕੁਤ੍ਤਰਬੋਧਿਪਕ੍ਖਿਯਧਮ੍ਮੇ ਉਦ੍ਦਿਸ੍ਸ ਪੁਥੁਜ੍ਜਨਾਨਂ ਵਿਵਾਦੋ ਸਮ੍ਭਵਤੀਤਿ ਆਹ – ‘‘ਲੋਕਿਯਲੋਕੁਤ੍ਤਰਾਵ ਕਥਿਤਾ’’ਤਿ. ਲੋਕਿਯਾਪਿ ਹਿ ਬੋਧਿਪਕ੍ਖਿਯਧਮ੍ਮਾ ਲੋਕੁਤ੍ਤਰਧਮ੍ਮਾਧਿਗਮਸ੍ਸ ਆਸਨ੍ਨਕਾਰਣਤ੍ਤਾ ਵਿਸੇਸਕਾਰਣਨ੍ਤਿ ਯਾਵ ਅਞ੍ਞੇਹਿ ਲੋਕਿਯਧਮ੍ਮੇਹਿ ਅਭਿਵਿਸਿਟ੍ਠੋਤਿ ਕਤ੍ਵਾ, ‘‘ਇਮੇਸੁ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੇਸੂ’’ਤਿ ਅਵਿਸੇਸੇਨ ਵੁਤ੍ਤਂ. ਅਤ੍ਥਤੋ ਨਾਨਂ ਹੋਤੀਤਿ ਅਤ੍ਥਤੋ ਭੇਦੋ ਹੋਤਿ ਬੋਧਿਪਕ੍ਖਿਯਧਮ੍ਮਾਨਂ ਸਮਧਿਗਤਤ੍ਤਾ. ਨ ਹਿ ਕਾਯਾਦਯੋ ਭਾਵੇਤਬ੍ਬਾ, ਸਤਿਯੇਵ ਪਨ ਭਾਵੇਤਬ੍ਬਾਤਿ. ਬ੍ਯਞ੍ਜਨਤੋ ਨਾਨਂ ਭੇਦਂ. ਇਮਿਨਾਪਿ ਕਾਰਣੇਨਾਤਿ ਇਮਾਯਪਿ ਯੁਤ੍ਤਿਯਾ. ਇਦਾਨਿ ਤਂ ਯੁਤ੍ਤਿਂ ਦਸ੍ਸੇਨ੍ਤੋ – ‘‘ਅਤ੍ਥਞ੍ਚ ਬ੍ਯਞ੍ਜਨਞ੍ਚਾ’’ਤਿਆਦਿਮਾਹ. ਤਤ੍ਥ ਸਮਾਨੇਤ੍ਵਾਤਿ ਸੁਤ੍ਤਨ੍ਤਰਤੋ ਸਮਾਨੇਤ੍ਵਾ, ਸੁਤ੍ਤਨ੍ਤਰਪਦੇਹਿ ਚ ਸਮਾਨੇਤ੍ਵਾ. ਅਞ੍ਞਥਾਤਿ ਅਞ੍ਞਤੋ, ਭੂਤਤੋ ਅਪਗਤਂ ਕਤ੍ਵਾਤਿ ਅਤ੍ਥੋ. ਮਿਚ੍ਛਾ ਰੋਪਿਤਭਾਵੋਤਿ ਅਯਾਥਾਵਤੋ ਠਪਿਤਭਾਵੋ. ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਵਿਞ੍ਞਾਪਨਕਾਰਣਮੇਵਾਤਿ ਅਵਿਪਰੀਤਤ੍ਥਸ੍ਸ ਸਦ੍ਦਸ੍ਸ ਚ ਬੁਜ੍ਝਨਹੇਤੁਤਾਯ.

੩੭. ਇਧ ਧਮ੍ਮਵਿਨਯਟ੍ਠਾਨੇ ਸਤਿਯੇਵ ਸਤਿਪਟ੍ਠਾਨਨ੍ਤਿ ਗਹਿਤਾ, ਅਤ੍ਥਤੋ ਸਮੇਤਿ ਨਾਮ ਯਾਥਾਵਤੋ ਅਤ੍ਥਸ੍ਸ ਗਹਿਤਤ੍ਤਾ. ਅਸਭਾਵਨਿਰੁਤ੍ਤਿਭਾਵਤੋ ਬ੍ਯਞ੍ਜਨਤੋ ਨਾਨਤ੍ਤਨ੍ਤਿ ਤਂ ਲਿਙ੍ਗਭੇਦੇਨ ਵਚਨਭੇਦੇਨ ਚ ਦਸ੍ਸੇਨ੍ਤੋ, ‘‘ਸਤਿਪਟ੍ਠਾਨੋਤਿ ਵਾ ਸਤਿਪਟ੍ਠਾਨਾਤਿ ਵਾ ਮਿਚ੍ਛਾ ਰੋਪੇਥਾ’’ਤਿ ਆਹ. ਅਪ੍ਪਮਤ੍ਤਕਨ੍ਤਿ ਅਣੁਮਤ੍ਤਂ ਸਲ੍ਲਹੁਕਂ, ਨ ਗਰੁਤਰਂ ਅਧਨਿਤਂ ਕਤ੍ਵਾ ਵਤ੍ਤਬ੍ਬਮ੍ਪਿ ਧਨਿਤਂ ਘੋਸਵਨ੍ਤਂ ਕਤ੍ਵਾ ਰੋਪਿਤੇ ਵੁਤ੍ਤਦੋਸਾਭਾਵਤੋਤਿ ਤੇਨਾਹ – ‘‘ਨਿਬ੍ਬੁਤਿਂ ਪਤ੍ਤੁਂ ਸਕ੍ਕਾ ਹੋਤੀ’’ਤਿ.

ਬ੍ਯਞ੍ਜਨਸ੍ਸ ਮਿਚ੍ਛਾਰੋਪਨਂ ਨ ਵਿਸੇਸਨ੍ਤਰਾਯਕਰਂ ਹੋਤੀਤਿ ਞਾਪਨਤ੍ਥਂ, ਚਤੁਸੁ ਮਗ੍ਗੇਸੁ ਪਞ੍ਹਂ ਕਥੇਤ੍ਵਾਵ ਪਰਿਨਿਬ੍ਬੁਤੋ. ਸੁਤ੍ਤਨ੍ਤਬ੍ਯਞ੍ਜਨਂ ਸਨ੍ਧਾਯੇਤਂ ਵੁਤ੍ਤਂ – ‘‘ਅਪ੍ਪਮਤ੍ਤਕਂ ਖੋ ਪਨਾ’’ਤਿ.

੩੮. ਅਥ ਚਤੁਤ੍ਥਵਾਰੇ ਵਿਵਾਦੋ ਕਸ੍ਮਾ ਜਾਤੋ? ਯਾਵਤਾ ਨੇਸਂ ਵਚਨਂ ਅਤ੍ਥਤੋ ਚੇਵ ਸਮੇਤਿ ਬ੍ਯਞ੍ਜਨਤੋ ਚਾਤਿ ਅਧਿਪ੍ਪਾਯੋ. ਸਞ੍ਞਾਯ ਵਿਵਾਦੋਤਿ ਕਿਞ੍ਚਾਪਿ ਸਮੇਤਿ ਅਤ੍ਥਤੋ ਚੇਵ ਬ੍ਯਞ੍ਜਨਤੋ ਚ, ਸਞ੍ਞਾ ਪਨ ਨੇਸਂ ਅਵਿਸੁਦ੍ਧਾ, ਤਾਯ ਸਞ੍ਞਾਯ ਵਸੇਨ ਵਿਵਾਦੋ ਜਾਤੋਤਿ ਦਸ੍ਸੇਨ੍ਤੋ ‘‘ਅਹ’’ਨ੍ਤਿਆਦਿਮਾਹ. ਅਹਂ ਸਤਿਪਟ੍ਠਾਨਨ੍ਤਿ ਵਦਾਮਿ, ਅਯਂ ਸਤਿਪਟ੍ਠਾਨੋਤਿ ਵਦਤੀਤਿ ਏਵਂ ਤੇਸਂ ਞਾਣਂ ਹੋਤੀਤਿ ਇਮਮਤ੍ਥਂ, ‘‘ਏਸੇਵ ਨਯੋ’’ਤਿ ਇਮਿਨਾ ਅਤਿਦਿਸਤਿ.

੩੯. ਨ ਚੋਦਨਤ੍ਥਾਯ ਵੇਗਾਯਿਤਬ੍ਬਨ੍ਤਿ ਸੀਘਂ ਸੀਘਂ ਨ ਚੋਦਨਾ ਕਾਤਬ੍ਬਾਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਏਕਚ੍ਚੋ ਕੋਧਨਭਾਵੇਨ ਏਵਂ ਪਟਿਪ੍ਫਰਿ, ਤਸ੍ਮਾ. ਅਨਾਦਾਨਦਿਟ੍ਠੀਤਿ ਆਦਿਯਿਤ੍ਵਾ ਅਨਭਿਨਿਵਿਸਨਤੋ ਅਨਾਦਾਨਦਿਟ੍ਠੀ ਅਦਲ਼੍ਹਗ੍ਗਾਹੀ. ਪਕ੍ਖਿਪਨ੍ਤੋ ਵਿਯਾਤਿ ਗਿਲਿਤ੍ਵਾ ਪਕ੍ਖਿਪਨ੍ਤੋ ਵਿਯ.

ਉਪਘਾਤੋਤਿ ਚਿਤ੍ਤਪ੍ਪਘਾਤੋ ਫਰਸੁਪਘਾਤੋ ਵਿਯ. ਵਣਘਟ੍ਟਿਤਸ੍ਸ ਵਿਯਾਤਿ ਵਣੇ ਘਟ੍ਟਿਤਸ੍ਸ ਵਿਯ ਦੁਕ੍ਖੁਪ੍ਪਤ੍ਤਿ ਚਿਤ੍ਤਦੁਕ੍ਖੁਪ੍ਪਤ੍ਤਿ. ਦ੍ਵੇ ਵਾਰੇ ਵਤ੍ਵਾਪਿ ਵਿਸਜ੍ਜੇਤੀਤਿ ਸੁਪ੍ਪਟਿਨਿਸ੍ਸਗ੍ਗੀ ਏਵਂ ਪਗੇਵ ਚੋਦਿਤਮਤ੍ਤੇ ਵਿਸ੍ਸਜ੍ਜੇਤਿ ਚੇਤਿ ਅਧਿਪ੍ਪਾਯੋ. ਕਥਨਵਸੇਨ ਚ ਕਾਯਚਿਤ੍ਤਕਿਲਮਥੋ. ਏਵਰੂਪੋਤਿ ਸਹਸਾ ਅਵਿਸ੍ਸਜ੍ਜੇਨ੍ਤੇਨ ਚੋਦਕਸ੍ਸ ਵਿਹੇਸਾਵਾਦੋ ਹੁਤ੍ਵਾਪਿ ਅਕ੍ਕੋਧਨਾਦਿਸਭਾਵੋ.

ਉਪੇਕ੍ਖਾਤਿ ਸਕੇਨ ਕਮ੍ਮੇਨ ਪਞ੍ਞਾਯਿਸ੍ਸਤੀਤਿ ਤਸ੍ਮਿਂ ਪੁਗ੍ਗਲੇ ਅਜ੍ਝੁਪੇਕ੍ਖਣਾ. ਉਪੇਕ੍ਖਂ ਅਤਿਮਞ੍ਞਤਿ ਨਾਮ ਤਸ੍ਸ ਅਨਾਚਾਰਸ੍ਸ ਅਨਜ੍ਝੁਪੇਕ੍ਖਣਤੋ.

੪੦. ਵਚਨਸਞ੍ਚਾਰੋਤਿ ਪੇਸੁਞ੍ਞਵਸੇਨ ਅਞ੍ਞਥਾਵਚਨੁਪਸਂਹਾਰੋ. ਦਿਟ੍ਠਿਪਲ਼ਾਸੋਤਿ ਯੁਗਗ੍ਗਾਹਵਸੇਨ ਲਦ੍ਧਿ. ਸਾ ਪਨ ਚਿਤ੍ਤਸ੍ਸ ਅਨਾਰਾਧਨਿਯਭਾਵੋ ਸਤ੍ਥੁਚਿਤ੍ਤਸ੍ਸ ਅਨਾਰਾਧਕਭਾਵੋ. ਕਲਹੋਤਿ ਅਧਿਕਰਣੁਪ੍ਪਾਦਵਸੇਨ ਪਵਤ੍ਤੋ ਵਿਗ੍ਗਹੋ ਭਣ੍ਡਨਸ੍ਸ ਪੁਬ੍ਬਭਾਗੋ.

ਯੇਨ ਕਾਰਣੇਨਾਤਿ ਯੇਨ ਧਮ੍ਮੇਨ ਸਤ੍ਥੁਸਾਸਨੇਨ. ਤਮੇਵ ਹਿ ਸਨ੍ਧਾਯ ਵਦਤਿ – ‘‘ਧਮ੍ਮੋਤਿ ਸਾਰਣੀਯਧਮ੍ਮੋ ਅਧਿਪ੍ਪੇਤੋ’’ਤਿ. ਏਤ੍ਥਾਤਿ ‘‘ਧਮ੍ਮਸ੍ਸ ਚਾਨੁਧਮ੍ਮ’’ਨ੍ਤਿ ਏਤ੍ਥ. ਧਮ੍ਮੋਤਿ ਸਮ੍ਬੁਦ੍ਧਸ੍ਸ ਤਸ੍ਸ ਤਥਾ ਪਵਤ੍ਤਂ ਬ੍ਯਾਕਰਣਂ ਯਥਾ ਵਿਵਾਦਾਪਨ੍ਨਾ ਸਞ੍ਞਤ੍ਤਿਂ ਗਚ੍ਛਨ੍ਤਿ. ਤੇਨਾਹ – ‘‘ਤੇਸਂ ਭਿਕ੍ਖੂਨਂ ਸਞ੍ਞਤ੍ਤਿਕਰਣ’’ਨ੍ਤਿ. ਤਦੇਵ ਬ੍ਯਾਕਰਣਂ ਅਨੁਧਮ੍ਮੋਤਿ ਭਿਕ੍ਖੁਨਾ ਵੁਚ੍ਚਮਾਨੋ ਅਨੁਪਵਤ੍ਤੋ ਧਮ੍ਮੋ. ਤੇਨਾਹ – ‘‘ਤਦੇਵ ਬ੍ਯਾਕਰੋਤਿ ਨਾਮਾ’’ਤਿ. ਕੋਚੀਤਿ ਯੋ ਕੋਚਿ. ਸਹਧਮ੍ਮਿਕੋ ਸਕਾਰਣੋ. ਅਞ੍ਞਤ੍ਥੋ ਅਯਂ ਕਿਂ ਸਦ੍ਦੋਤਿ ਆਹ ‘‘ਅਞ੍ਞੋ’’ਤਿ. ਅਸ੍ਸਾਤਿ ਵੁਤ੍ਤਨਯੇਨ ਪਟਿਪਨ੍ਨਭਿਕ੍ਖੁਨੋ, ਤਸ੍ਸ ਪਟਿਪਤ੍ਤਿ ਨ ਕੇਨਚਿ ਗਰਹਣੀਯਾ ਹੋਤੀਤਿ ਅਤ੍ਥੋ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.

ਕਿਨ੍ਤਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.