੪. ਰਾਜਵਗ੍ਗੋ

੧. ਘਟਿਕਾਰਸੁਤ੍ਤਵਣ੍ਣਨਾ

੨੮੨. ਚਰਿਯਨ੍ਤਿ ਬੋਧਿਚਰਿਯਂ, ਬੋਧਿਸਮ੍ਭਾਰਸਮ੍ਭਰਣਵਸੇਨ ਪਵਤ੍ਤਿਤਂ ਬੋਧਿਸਤ੍ਤਪਟਿਪਤ੍ਤਿਨ੍ਤਿ ਅਤ੍ਥੋ. ਸੁਕਾਰਣਨ੍ਤਿ ਬੋਧਿਪਰਿਪਾਚਨਸ੍ਸ ਏਕਨ੍ਤਿਕਂ ਸੁਨ੍ਦਰਂ ਕਾਰਣਂ, ਕਸ੍ਸਪਸ੍ਸ ਭਗਵਤੋ ਪਯਿਰੁਪਾਸਨਾਦਿਂ ਸਨ੍ਧਾਯ ਵਦਤਿ. ਤਞ੍ਹਿ ਤੇਨ ਸਦ੍ਧਿਂ ਮਯਾ ਇਧ ਕਤਨ੍ਤਿ ਵਤ੍ਤਬ੍ਬਤਂ ਲਭਤਿ. ਮਨ੍ਦਹਸਿਤਨ੍ਤਿ ਈਸਕਂ ਹਸਿਤਂ. ਕੁਹਂ ਕੁਹਨ੍ਤਿ ਹਾਸ-ਸਦ੍ਦਸ੍ਸ ਅਨੁਕਰਣਮੇਤਂ. ਹਟ੍ਠਪਹਟ੍ਠਾਕਾਰਮਤ੍ਤਨ੍ਤਿ ਹਟ੍ਠਪਹਟ੍ਠਮਤ੍ਤਂ. ਯਥਾ ਗਹਿਤਸਙ੍ਕੇਤਾ ‘‘ਪਹਟ੍ਠੋ ਭਗਵਾ’’ਤਿ ਸਞ੍ਜਾਨਨ੍ਤਿ, ਏਵਂ ਆਕਾਰਦਸ੍ਸਨਮਤ੍ਤਂ.

ਇਦਾਨਿ ਇਮਿਨਾ ਪਸਙ੍ਗੇਨ ਤਾਸਂ ਸਮੁਟ੍ਠਾਨਂ ਵਿਭਾਗਤੋ ਦਸ੍ਸੇਤੁਂ ‘‘ਹਸਿਤਞ੍ਚ ਨਾਮੇਤ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਅਜ੍ਝੁਪੇਕ੍ਖਨਵਸੇਨਪਿ ਹਾਸੋ ਨ ਸਮ੍ਭਵਤਿ, ਪਗੇਵ ਦੋਮਨਸ੍ਸਵਸੇਨਾਤਿ ਆਹ ‘‘ਤੇਰਸਹਿ ਸੋਮਨਸ੍ਸਸਹਗਤਚਿਤ੍ਤੇਹੀ’’ਤਿ. ਨਨੁ ਚ ਕੇਚਿ ਕੋਧਵਸੇਨਪਿ ਹਸਨ੍ਤੀਤਿ? ਨ, ਤੇਸਮ੍ਪਿ ਯਂ ਤਂ ਕੋਧਵਤ੍ਥੁ, ਤਸ੍ਸ ਮਯਂ ਦਾਨਿ ਯਥਾਕਾਮਕਾਰਿਤਂ ਆਪਜ੍ਜਿਸ੍ਸਾਮਾਤਿ ਦੁਵਿਞ੍ਞੇਯ੍ਯਨ੍ਤਰੇਨ ਸੋਮਨਸ੍ਸਚਿਤ੍ਤੇਨੇਵ ਹਾਸਸ੍ਸ ਉਪ੍ਪਜ੍ਜਨਤੋ. ਤੇਸੂਤਿ ਪਞ੍ਚਸੁ ਸੋਮਨਸ੍ਸਸਹਗਤਚਿਤ੍ਤੇਸੁ. ਬਲਵਾਰਮ੍ਮਣੇਤਿ ਉਲ਼ਾਰਆਰਮ੍ਮਣੇ ਯਮਕਮਹਾਪਾਟਿਹਾਰਿਯਸਦਿਸੇ. ਦੁਬ੍ਬਲਾਰਮ੍ਮਣੇਤਿ ਅਨੁਲ਼ਾਰੇ ਆਰਮ੍ਮਣੇ. ਇਮਸ੍ਮਿਂ ਪਨ ਠਾਨੇ…ਪੇ… ਉਪ੍ਪਾਦੇਸੀਤਿ ਇਦਂ ਪੋਰਾਣਟ੍ਠਕਥਾਯਂ ਤਥਾ ਆਗਤਤ੍ਤਾ ਵੁਤ੍ਤਂ. ਨ ਅਹੇਤੁਕਸੋਮਨਸ੍ਸਸਹਗਤਚਿਤ੍ਤੇਨ ਭਗਵਤੋ ਸਿਤਂ ਹੋਤੀਤਿ ਦਸ੍ਸਨਤ੍ਥਂ.

ਅਭਿਧਮ੍ਮਟੀਕਾਯਂ (ਧ. ਸ. ਮੂਲਟੀ. ੫੬੮) ਪਨ ‘‘ਅਤੀਤਂਸਾਦੀਸੁ ਅਪ੍ਪਟਿਹਤਂ ਞਾਣਂ ਵਤ੍ਵਾ ‘ਇਮੇਹਿ ਤੀਹਿ ਧਮ੍ਮੇਹਿ ਸਮਨ੍ਨਾਗਤਸ੍ਸ ਬੁਦ੍ਧਸ੍ਸ ਭਗਵਤੋ ਸਬ੍ਬਂ ਕਾਯਕਮ੍ਮਂ ਞਾਣਪੁਬ੍ਬਙ੍ਗਮਂ ਞਾਣਾਨੁਪਰਿਵਤ੍ਤ’ਨ੍ਤਿਆਦਿਵਚਨਤੋ (ਮਹਾਨਿ. ੬੯, ੧੫੬; ਚੂਲ਼ਨਿ. ਮਾਘਰਾਜਮਾਣਵਪੁਚ੍ਛਾਨਿਦ੍ਦੇਸ ੮੫; ਪਟਿ. ਮ. ੩.੫; ਨੇਤ੍ਤਿ. ੧੫; ਦੀ. ਨਿ. ਅਟ੍ਠ. ੩.੩੦੫; ਵਿਭ. ਮੂਲਟੀ. ਸੁਤ੍ਤਨ੍ਤਭਾਜਨੀਯਵਣ੍ਣਨਾ; ਦੀ. ਨਿ. ਟੀ. ੩.੧੪੧, ੩੦੫) ‘ਭਗਵਤੋ ਇਦਂ ਚਿਤ੍ਤਂ ਉਪ੍ਪਜ੍ਜਤੀ’ਤਿ ਵੁਤ੍ਤਵਚਨਂ ਵਿਚਾਰੇਤਬ੍ਬ’’ਨ੍ਤਿ ਵੁਤ੍ਤਂ. ਤਤ੍ਥ ਇਮਿਨਾ ਹਸਿਤੁਪ੍ਪਾਦਚਿਤ੍ਤੇਨ ਪਵਤ੍ਤਿਯਮਾਨਮ੍ਪਿ ਭਗਵਤੋ ਸਿਤਕਰਣਂ ਪੁਬ੍ਬੇਨਿਵਾਸ-ਅਨਾਗਤਂਸ-ਸਬ੍ਬਞ੍ਞੁਤਞ੍ਞਾਣਾਨਂ ਅਨੁਵਤ੍ਤਕਤ੍ਤਾ ਞਾਣਾਨੁਪਰਿਵਤ੍ਤਿਯੇਵਾਤਿ, ਏਵਂ ਪਨ ਞਾਣਾਨੁਪਰਿਵਤ੍ਤਿਭਾਵੇ ਸਤਿ ਨ ਕੋਚਿ ਪਾਲ਼ਿਅਟ੍ਠਕਥਾਨਂ ਵਿਰੋਧੋ. ਤਥਾ ਹਿ ਅਭਿਧਮ੍ਮਟ੍ਠਕਥਾਯਂ (ਧ. ਸ. ਅਟ੍ਠ. ੫੬੮) ‘‘ਤੇਸਂ ਞਾਣਾਨਂ ਚਿਣ੍ਣਪਰਿਯਨ੍ਤੇ ਇਦਂ ਚਿਤ੍ਤਂ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਅਵਸ੍ਸਞ੍ਚ ਏਤਂ ਏਵਂ ਇਚ੍ਛਿਤਬ੍ਬਂ, ਅਞ੍ਞਥਾ ਆਵਜ੍ਜਨਸ੍ਸਪਿ ਭਗਵਤੋ ਪਵਤ੍ਤਿ ਤਥਾਰੂਪੇ ਕਾਲੇ ਨ ਸਂਯੁਜ੍ਜੇਯ੍ਯ, ਤਸ੍ਸਪਿ ਹਿ ਵਿਞ੍ਞਤ੍ਤਿਸਮੁਟ੍ਠਾਪਕਭਾਵਸ੍ਸ ਇਚ੍ਛਿਤਤ੍ਤਾ, ਤਥਾ ਹਿ ਵੁਤ੍ਤਂ – ‘‘ਏਵਞ੍ਚ ਕਤ੍ਵਾ ਮਨੋਦ੍ਵਾਰਾਵਜ੍ਜਨਸ੍ਸਪਿ ਵਿਞ੍ਞਤ੍ਤਿਸਮੁਟ੍ਠਾਪਕਤ੍ਤਂ ਉਪਪਨ੍ਨਂ ਹੋਤੀ’’ਤਿ, ਨ ਚ ਵਿਞ੍ਞਤ੍ਤਿਸਮੁਟ੍ਠਾਪਕਤ੍ਤੇ ਤਂਸਮੁਟ੍ਠਿਤਾਯ ਵਿਞ੍ਞਤ੍ਤਿਯਾ ਕਾਯਕਮ੍ਮਾਦਿਭਾਵਂ ਆਪਜ੍ਜਨਭਾਵੋ ਵਿਬਨ੍ਧਤੀਤਿ ਤਮੇਵ ਸਨ੍ਧਾਯ ਵਦਤਿ. ਤੇਨਾਹ ‘‘ਏਵਂ ਅਪ੍ਪਮਤ੍ਤਕਮ੍ਪੀ’’ਤਿ. ਸਤੇਰਿਤਾ ਵਿਜ੍ਜੁਲਤਾ ਨਾਮ ਸਤੇਰਤਾਵਿਜ੍ਜੁਲਤਾ. ਸਾ ਹਿ ਇਤਰਵਿਜ੍ਜੁਲਤਾ ਵਿਯ ਖਣਟ੍ਠਿਤਿਕਾ ਸੀਘਨਿਰੋਧਾ ਚ ਨ ਹੋਤਿ, ਅਪਿਚ ਖੋ ਦਨ੍ਧਨਿਰੋਧਾ, ਤਞ੍ਚ ਸਬ੍ਬਕਾਲਂ ਚਤੁਦੀਪਿਕਮਹਾਮੇਘਤੋਵ ਨਿਚ੍ਛਰਤਿ ਤੇਨਾਹ ‘‘ਚਾਤੁਦ੍ਦੀਪਿਕਮਹਾਮੇਘਮੁਖਤੋ’’ਤਿ. ਅਯਂ ਕਿਰ ਤਾਸਂ ਰਸ੍ਮਿਵਟ੍ਟੀਨਂ ਧਮ੍ਮਤਾ, ਯਦਿਦਂ ਤਿਕ੍ਖਤ੍ਤੁਂ ਸਿਰਵਰਂ ਪਦਕ੍ਖਿਣਂ ਕਤ੍ਵਾ ਦਾਠਗ੍ਗੇਸੁਯੇਵ ਅਨ੍ਤਰਧਾਨਂ.

੨੮੩. ਯਦਿਪਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਾਨਂ ਸਤਸਹਸ੍ਸਞ੍ਚ ਪਞ੍ਞਾਪਾਰਮਿਤਾ ਪਰਿਭਾਵਿਤਾ, ਤਥਾਪਿ ਇਦਾਨਿ ਤਂ ਬੁਦ੍ਧਨ੍ਤਰਂ ਤਸ੍ਸਾ ਪਟਿਪਾਦੇਤਬ੍ਬਤ੍ਤਾ ਵੁਤ੍ਤਂ ‘‘ਅਪਰਿਪਕ੍ਕਞਾਣਤ੍ਤਾ’’ਤਿ. ਕਾਮਞ੍ਚਸ੍ਸ ਞਾਣਾਯ ਇਦਾਨਿਪਿ ਪਟਿਪਾਦੇਤਬ੍ਬਤਾ ਅਤ੍ਥਿ, ਏਵਂ ਸਨ੍ਤੇਪਿ ਨਨੁ ਸਮ੍ਮਾਸਮ੍ਬੁਦ੍ਧੇਸੁ ਪਸਾਦੇਨ ਸਮ੍ਭਾਵਨਾਯ ਭਵਿਤਬ੍ਬਂ ਤਥਾ ਚਿਰਕਾਲਂ ਪਰਿਭਾਵਿਤਤ੍ਤਾ, ਕਥਂ ਤਤ੍ਥ ਹੀਲ਼ਨਾਤਿ ਆਹ ‘‘ਬ੍ਰਾਹ੍ਮਣਕੁਲੇ’’ਤਿਆਦਿ. ਚਿਰਕਾਲਪਰਿਚਿਤਾਪਿ ਹਿ ਗੁਣਭਾਵਨਾ ਅਪ੍ਪਕੇਨਪਿ ਅਕਲ੍ਯਾਣਮਿਤ੍ਤਸਂਸਗ੍ਗੇਨ ਵਿਪਰਿਵਤ੍ਤਤਿ ਅਞ੍ਞਥਤ੍ਤਂ ਗਚ੍ਛਤਿ. ਤੇਨ ਮਹਾਸਤ੍ਤੋਪਿ ਜਾਤਿਸਿਦ੍ਧਾਯਂ ਲਦ੍ਧਿਯਂ ਠਤ੍ਵਾ ਜਾਤਿਸਿਦ੍ਧੇਨ ਮਾਨੇਨ ਏਵਮਾਹ – ‘‘ਕਿਂ ਪਨ ਤੇਨ ਮੁਣ੍ਡਕੇਨ ਸਮਣਕੇਨ ਦਿਟ੍ਠੇਨਾ’’ਤਿ. ਤਥਾ ਹਿ ਵੁਤ੍ਤਂ ਅਟ੍ਠਕਥਾਯਂ –

‘‘ਤਸ੍ਮਾ ਅਕਲ੍ਯਾਣਜਨਂ, ਆਸੀਵਿਸਮਿਵੋਰਗਂ,

ਆਰਕਾ ਪਰਿਵਜ੍ਜੇਯ੍ਯ, ਭੂਤਿਕਾਮੋ ਵਿਚਕ੍ਖਣੋ’’ਤਿ. (ਦੀ. ਨਿ. ਅਟ੍ਠ. ੧.੧੭੦-੧੭੨);

ਨ੍ਹਾਨਚੁਣ੍ਣੇਨ ਸੁਤ੍ਤੇਨ ਕਤਾ ਸੋਤ੍ਤਿ, ਕੁਰੁਵਿਨ੍ਦਗੁਲ਼ਿਕਾ, ਸਾ ਏਵ ਸਿਨਾਯਨ੍ਤਿ ਕਾਯਂ ਵਿਸੋਧੇਨ੍ਤਿ ਏਤਾਯਾਤਿ ਸਿਨਾਨਂ. ਤੇਨਾਹ – ‘‘ਸੋਤ੍ਤਿ ਸਿਨਾਨਨ੍ਤਿ ਸਿਨਾਨਤ੍ਥਾਯ ਕਤਸੋਤ੍ਤਿ’’ਨ੍ਤਿ.

੨੮੪. ਅਰਿਯਪਰਿਹਾਰੇਨਾਤਿ ਅਰਿਯਾਨਂ ਪਰਿਹਾਰੇਨ, ਅਨਾਗਾਮੀਨਂ ਨ੍ਹਾਨਕਾਲੇ ਅਤ੍ਤਨੋ ਕਾਯਸ੍ਸ ਪਰਿਹਾਰਨਿਯਾਮੇਨਾਤਿ ਅਤ੍ਥੋ. ਅਤ੍ਤਨੋ ਞਾਣਸਮ੍ਪਤ੍ਤਿਯਾ ਵਿਭਵਸਮ੍ਪਤ੍ਤਿਯਾ ਪਸਨ੍ਨਕਾਰਂ ਕਾਤੁਂ ਸਕ੍ਖਿਸ੍ਸਤਿ. ਏਤਦਤ੍ਥਨ੍ਤਿ ‘‘ਅਹਿਤਨਿਵਾਰਣਂ, ਹਿਤੇ ਨਿਯੋਜਨਂ ਬ੍ਯਸਨੇ ਪਰਿਵਜ੍ਜਨ’’ਨ੍ਤਿ ਯਦਿਦਂ, ਏਤਦਤ੍ਥਂ ਮਿਤ੍ਤਾ ਨਾਮ ਹੋਨ੍ਤਿ. ਕੇਚਿ ‘‘ਯਾਵੇਤ੍ਥ ਅਹੁਪੀ’’ਤਿ ਪਠਨ੍ਤਿ, ਤੇਸਂ ਯਾਵ ਏਤ੍ਥ ਕੇਸਗ੍ਗਗਹਣਂ ਤਾਵ ਅਯਂ ਨਿਬਨ੍ਧੋ ਅਹੁਪੀਤਿ ਅਤ੍ਥੋ.

੨੮੫. ਸਤਿਪਟਿਲਾਭਤ੍ਥਾਯਾਤਿ ਬੋਧਿਯਾ ਮਹਾਭਿਨੀਹਾਰਂ ਕਤ੍ਵਾ ਬੋਧਿਸਮ੍ਭਾਰਪਟਿਪਦਾਯ ਪੂਰਣਭਾਵੇ ਸਤਿਯਾ ਪਟਿਲਾਭਤ੍ਥਾਯ. ਇਦਾਨਿ ਤਸ੍ਸ ਸਤੁਪ੍ਪਾਦਨੀਯਕਥਾਯ ਪਵਤ੍ਤਿਤਾਕਾਰਂ ਸਙ੍ਖੇਪੇਨੇਵ ਦਸ੍ਸੇਤੁਂ ‘‘ਤਸ੍ਸ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਨ ਲਾਮਕਟ੍ਠਾਨਂ ਓਤਿਣ੍ਣਸਤ੍ਤੋਤਿ ਇਮਿਨਾ ਮਹਾਸਤ੍ਤਸ੍ਸ ਪਣੀਤਾਧਿਮੁਤ੍ਤਤਂ ਦਸ੍ਸੇਤ੍ਵਾ ਏਵਂ ਪਣੀਤਾਧਿਮੁਤ੍ਤਿਕਸ੍ਸ ਪਮਾਦਕਿਰਿਯਾ ਨ ਯੁਤ੍ਤਾਤਿ ਦਸ੍ਸੇਨ੍ਤੋ ‘‘ਤਾਦਿਸਸ੍ਸ ਨਾਮ ਪਮਾਦਵਿਹਾਰੋ ਨ ਯੁਤ੍ਤੋ’’ਤਿ ਆਹ. ਤਦਾ ਬੋਧਿਸਤ੍ਤਸ੍ਸ ਨੇਕ੍ਖਮ੍ਮਜ੍ਝਾਸਯੋ ਤੇਲਪ੍ਪਦੀਪੋ ਵਿਯ ਵਿਸੇਸਤੋ ਨਿਬ੍ਬਤ੍ਤਿ, ਤਂ ਦਿਸ੍ਵਾ ਭਗਵਾ ਤਦਨੁਰੂਪਂ ਧਮ੍ਮਕਥਂ ਕਰੋਨ੍ਤੋ ‘‘ਤਾਦਿਸਸ੍ਸ…ਪੇ… ਕਥੇਸੀ’’ਤਿ. ਪਰਸਮੁਦ੍ਦਵਾਸੀ ਥੇਰਾ ਅਞ੍ਞਥਾ ਵਦਨ੍ਤਿ. ਅਟ੍ਠਕਥਾਯਂ ਪਨ ਨਾਯਂ ਬੁਦ੍ਧਾਨਂ ਭਾਰੋ, ਯਦਿਦਂ ਪੂਰਿਤਪਾਰਮੀਨਂ ਬੋਧਿਸਤ੍ਤਾਨਂ ਤਥਾ ਧਮ੍ਮਦੇਸਨਾ ਤੇਸਂ ਮਹਾਭਿਨੀਹਾਰਸਮਨਨ੍ਤਰਮ੍ਪਿ ਬੋਧਿਸਮ੍ਭਾਰਸ੍ਸ ਸਯਮ੍ਭੁਞਾਣੇਨੇਵ ਪਟਿਵਿਦਿਤਤ੍ਤਾ. ਤਸ੍ਮਾ ਬੋਧਿਸਤ੍ਤਭਾਵਪਵੇਦਨਮੇਵ ਤਸ੍ਸ ਭਗਵਾ ਅਕਾਸੀਤਿ ਦਸ੍ਸੇਤੁਂ ‘‘ਸਤਿਪਟਿਲਾਭਤ੍ਥਾਯਾ’’ਤਿਆਦਿ ਵੁਤ੍ਤਂ. ਸਤਿਪਟਿਲਾਭਤ੍ਥਾਯਾਤਿ ਸਮ੍ਮਾਪਟਿਪਤ੍ਤਿਯਾ ਉਜ੍ਜਲਨੇ ਪਾਕਟਕਰਸਤਿਪਟਿਲਾਭਾਯ.

੨੮੬. ਞਾਣਞ੍ਹਿ ਕਿਲੇਸਧਮ੍ਮਵਿਦਾਲਨਪਦਾਲਨੇਹਿ ਸਿਙ੍ਗਂ ਵਿਯਾਤਿ ਸਿਙ੍ਗਂ. ਤਞ੍ਹਿ ਪਟਿਪਤ੍ਤਿਯਾ ਉਪਤ੍ਥਮ੍ਭਿਤਂ ਉਸ੍ਸਿਤਂ ਨਾਮ ਹੋਤਿ, ਤਦਭਾਵੇ ਪਤਿਤਂ ਨਾਮ. ਕੇਚਿ ਪਨ ਵੀਰਿਯਂ ਸਿਙ੍ਗਨ੍ਤਿ ਵਦਨ੍ਤਿ. ਤਸ੍ਮਿਂ ਸਮ੍ਮਪ੍ਪਧਾਨਵਸੇਨ ਪਵਤ੍ਤੇ ਬਾਹਿਰਪਬ੍ਬਜ੍ਜਂ ਉਪਗਤਾਪਿ ਮਹਾਸਤ੍ਤਾ ਵਿਸੁਦ੍ਧਾਸਯਾ ਅਪ੍ਪਿਚ੍ਛਤਾਦਿਗੁਣਸਮਙ੍ਗਿਨੋ ਯਥਾਰਹਂ ਗਨ੍ਥਧੁਰਂ ਵਾਸਧੁਰਞ੍ਚ ਪਰਿਬ੍ਰੂਹਯਨ੍ਤਾ ਵਿਹਰਨ੍ਤਿ, ਪਗੇਵ ਬੁਦ੍ਧਸਾਸਨੇ ਅਪ੍ਪਿਚ੍ਛਤਾਦੀਹੀਤਿ ਆਹ ‘‘ਚਤੁਪਾਰਿਸੁਦ੍ਧਿਸੀਲੇ ਪਨਾ’’ਤਿਆਦਿ. ਵਿਪਸ੍ਸਨਂ ਬ੍ਰੂਹੇਨ੍ਤਾ ਸਿਖਾਪ੍ਪਤ੍ਤਵਿਪਸ੍ਸਨਾ ਹੋਨ੍ਤੀਤਿ ਵੁਤ੍ਤਂ – ‘‘ਯਾਵ ਅਨੁਲੋਮਞਾਣਂ ਆਹਚ੍ਚ ਤਿਟ੍ਠਨ੍ਤੀ’’ਤਿ, ਅਨੁਲੋਮਞਾਣਤੋ ਓਰਮੇਵ ਵਿਪਸ੍ਸਨਂ ਠਪੇਨ੍ਤੀਤਿ ਅਤ੍ਥੋ. ਮਗ੍ਗਫਲਤ੍ਥਂ ਵਾਯਾਮਂ ਨ ਕਰੋਨ੍ਤਿ ਪਞ੍ਞਾਪਾਰਮਿਤਾਯ ਸਬ੍ਬਞ੍ਞੁਤਞ੍ਞਾਣਗਬ੍ਭਸ੍ਸ ਅਪਰਿਪੁਣ੍ਣਤ੍ਤਾ ਅਪਰਿਪਕ੍ਕਤ੍ਤਾ ਚ.

੨੮੭. ਥੇਰੇਹੀਤਿ ਵੁਦ੍ਧਤਰੇਹਿ. ਨਿਵਾਸੇ ਸਤੀਤਿ ਯਸ੍ਮਿਂ ਠਾਨੇ ਪਬ੍ਬਜਿਤੋ, ਤਤ੍ਥੇਵ ਨਿਵਾਸੇ. ਵਪ੍ਪਕਾਲਤੋਤਿ ਸਸ੍ਸਾਨਂ ਵਪ੍ਪਕਾਲਤੋ. ਪੁਬ੍ਬੇ ਵਿਯ ਤਤੋ ਪਰਂ ਤਿਖਿਣੇਨ ਸੂਰਿਯਸਨ੍ਤਾਪੇਨ ਪਯੋਜਨਂ ਨਤ੍ਥੀਤਿ ਵੁਤ੍ਤਂ – ‘‘ਵਪ੍ਪਕਾਲੇ ਵਿਤਾਨਂ ਵਿਯ ਉਪਰਿ ਵਤ੍ਥਕਿਲਞ੍ਜਂ ਬਨ੍ਧਿਤ੍ਵਾ’’ਤਿ. ਪੁਟਕੇਤਿ ਕਲਾਪੇ.

੨੮੮. ਪਚ੍ਚਯਸਾਮਗ੍ਗਿਹੇਤੁਕਤ੍ਤਾ ਧਮ੍ਮਪ੍ਪਤ੍ਤਿਯਾ ਪਦੇਸਤੋ ਪਰਿਞ੍ਞਾਵਤ੍ਥੁਕਾਪਿ ਅਰਿਯਾ ਉਪਟ੍ਠਿਤੇ ਚਿਤ੍ਤਵਿਘਾਤਪਚ੍ਚਯੇ ਯਦੇਤਂ ਨਾਤਿਸਾਵਜ੍ਜਂ, ਤਦੇਵਂ ਗਣ੍ਹਨ੍ਤੀਤਿ ਅਯਮੇਤ੍ਥ ਧਮ੍ਮਤਾਤਿ ਆਹ – ‘‘ਅਲਾਭਂ ਆਰਬ੍ਭ ਚਿਤ੍ਤਞ੍ਞਥਤ੍ਤ’’ਨ੍ਤਿਆਦਿ. ਸੋਤਿ ਕਿਕੀ ਕਾਸਿਰਾਜਾ. ਬ੍ਰਾਹ੍ਮਣਭਤ੍ਤੋਤਿ ਬ੍ਰਾਹ੍ਮਣੇਸੁ ਭਤ੍ਤੋ. ਦੇਵੇਤਿ ਬ੍ਰਾਹ੍ਮਣੇ ਸਨ੍ਧਾਯਾਹ. ਭੂਮਿਦੇਵਾਤਿ ਤੇਸਂ ਸਮਞ੍ਞਾ, ਤਦਾ ਬ੍ਰਾਹ੍ਮਣਗਰੁਕੋ ਲੋਕੋ. ਤਦਾ ਹਿ ਕਸ੍ਸਪੋਪਿ ਭਗਵਾ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਧੀਤੁ ਅਵਣ੍ਣਂ ਵਤ੍ਵਾਤਿ, ‘‘ਮਹਾਰਾਜ, ਤਵ ਧੀਤਾ ਬ੍ਰਾਹ੍ਮਣਸਮਯਂ ਪਹਾਯ ਮੁਣ੍ਡਪਾਸਣ੍ਡਿਕਸਮਯਂ ਗਣ੍ਹੀ’’ਤਿਆਦਿਨਾ ਰਾਜਪੁਤ੍ਤਿਯਾ ਅਗੁਣਂ ਵਤ੍ਵਾ. ਵਰਂ ਗਣ੍ਹਿਂਸੁ ਞਾਤਕਾ. ਰਜ੍ਜਂ ਨਿਯ੍ਯਾਤੇਸਿ ‘‘ਮਾ ਮੇ ਵਚਨਂ ਮੁਸਾ ਅਹੋਸਿ, ਅਟ੍ਠਮੇ ਦਿਵਸੇ ਨਿਗ੍ਗਣ੍ਹਿਸ੍ਸਾਮੀ’’ਤਿ.

ਪਾਵਨਅਸ੍ਮਨਯਨਵਸੇਨ ਸਮ੍ਮਾ ਪਾਵੀਕਤਤ੍ਤਾ ਪਰਿਸੁਦ੍ਧਤਣ੍ਡੁਲਾਨਿ. ਪਾਲ਼ਿਯਂ ਤਣ੍ਡੁਲਪਟਿਭਸ੍ਤਾਨੀਤਿ ਤਣ੍ਡੁਲਖਣ੍ਡਾਨਿ. ਮੁਗ੍ਗਪਟਿਭਸ੍ਤਕਲ਼ਾਯਪਟਿਭਸ੍ਤੇਸੁਪਿ ਏਸੇਵ ਨਯੋ.

੨੮੯. ਕੋ ਨੁ ਖੋਤਿ ਭੁਮ੍ਮਤ੍ਥੇ ਪਚ੍ਚਤ੍ਤਵਚਨਨ੍ਤਿ ਆਹ – ‘‘ਕੁਹਿਂ ਨੁ ਖੋ’’ਤਿ ਪਾਰਿਪੂਰਿਂ ਯੋਜੀਯਨ੍ਤਿ ਬ੍ਯਞ੍ਜਨਭੋਜਨਾਨਿ ਏਤ੍ਥਾਤਿ ਪਰਿਯੋਗੋ, ਤਤੋ ਪਰਿਯੋਗਾ. ਤੇਨਾਹ ‘‘ਸੂਪਭਾਜਨਤੋ’’ਤਿ. ਸਞ੍ਞਂ ਦਤ੍ਵਾਤਿ ਵੁਤ੍ਤਂ ਸਬ੍ਬਂ ਆਚਿਕ੍ਖਿਤ੍ਵਾ ਤੁਮ੍ਹਾਕਂ ਅਤ੍ਥਾਯ ਸਮ੍ਪਾਦੇਤ੍ਵਾ ਨਿਕ੍ਖਿਤ੍ਤੋ ਉਪਟ੍ਠਾਕੋਤਿ ਭਗਵਤੋ ਆਰੋਚੇਥਾਤਿ ਸਞ੍ਞਂ ਦਤ੍ਵਾ. ਅਤਿਵਿਸ੍ਸਤ੍ਥੋਤਿ ਅਤਿਵਿਯ ਵਿਸ੍ਸਤ੍ਥੋ. ਪਞ੍ਚਵਣ੍ਣਾਤਿ ਖੁਦ੍ਦਿਕਾਦਿਵਸੇਨ ਪਞ੍ਚਪ੍ਪਕਾਰਾ.

੨੯੦. ਕਿਨ੍ਤਿ ਨਿਸ੍ਸਕ੍ਕੇ ਪਚ੍ਚਤ੍ਤਵਚਨਂ, ਕਸ੍ਮਾਤਿ ਅਤ੍ਥੋ? ਧਮ੍ਮਿਕੋਤਿ ਇਮਿਨਾ ਆਗਮਨਸੁਦ੍ਧਿਂ ਦਸ੍ਸੇਤਿ. ਭਿਕ੍ਖੂਨਂ ਪਤ੍ਤੇ ਭਤ੍ਤਸਦਿਸੋਤਿ ਇਮਿਨਾ ਉਪਾਸਕੇਨ ਸਤ੍ਥੁ ਪਰਿਚ੍ਚਤ੍ਤਭਾਵਂ ਤਤ੍ਥ ਸਤ੍ਥੁਨੋ ਚ ਅਪਰਿਸਙ੍ਕਤਂ ਦਸ੍ਸੇਤਿ. ਸਿਕ੍ਖਾਪਦਵੇਲਾ ਨਾਮ ਨਤ੍ਥੀਤਿ ਧਮ੍ਮਸ੍ਸਾਮਿਭਾਵਤੋ ਸਿਕ੍ਖਾਪਦਮਰਿਯਾਦਾ ਨਾਮ ਨਤ੍ਥਿ ਪਣ੍ਣਤ੍ਤਿਵਜ੍ਜੇ, ਪਕਤਿਵਜ੍ਜੇ ਪਨ ਸੇਤੁਘਾਤੋ ਏਵ.

੨੯੧. ਛਦਨਟ੍ਠਾਨੇ ਯਦਾਕਾਸਂ, ਤਦੇਵ ਤਸ੍ਸ ਗੇਹਸ੍ਸ ਛਦਨਨ੍ਤਿ ਆਕਾਸਚ੍ਛਦਨਂ. ਪਕਤਿਯਾ ਉਤੁਫਰਣਮੇਵਾਤਿ ਛਾਦਿਤੇ ਯਾਦਿਸਂ ਉਤੁ, ਛਦਨੇ ਉਤ੍ਤਿਣਭਾਵੇਪਿ ਤਮ੍ਹਿ ਗੇਹੇ ਤਾਦਿਸਮੇਵ ਉਤੁਫਰਣਂ ਅਹੋਸਿ. ਤੇਸਂਯੇਵਾਤਿ ਤੇਸਂ ਘਟਿਕਾਰਸ੍ਸ ਮਾਤਾਪਿਤੂਨਂ ਏਵ.

੨੯੨. ‘‘ਚਤਸ੍ਸੋ ਮੁਟ੍ਠਿਯੋ ਏਕੋ ਕੁਡੁਵੋ, ਚਤ੍ਤਾਰੋ ਕੁਡੁਵਾ ਏਕੋ ਪਤ੍ਥੋ, ਚਤ੍ਤਾਰੋ ਪਤ੍ਥਾ ਏਕੋ ਆਲ਼੍ਹਕੋ, ਚਤ੍ਤਾਰੋ ਆਲ਼੍ਹਕਾ ਏਕਂ ਦੋਣਂ, ਚਤ੍ਤਾਰਿ ਦੋਣਾਨਿ ਏਕਾ ਮਾਨਿਕਾ, ਚਤਸ੍ਸੋ ਮਾਨਿਕਾ ਏਕਾ ਖਾਰੀ, ਵੀਸਤਿ ਖਾਰਿਕਾ ਏਕੋ ਵਾਹੋਤਿ ਤਦੇਵ ਏਕਸਕਟ’’ਨ੍ਤਿ ਸੁਤ੍ਤਨਿਪਾਤਟ੍ਠਕਥਾਦੀਸੁ (ਸੁ. ਨਿ. ਅਟ੍ਠ. ੨.੬੬੨) ਵੁਤ੍ਤਂ, ਇਧ ਪਨ ‘‘ਦ੍ਵੇ ਸਕਟਾਨਿ ਏਕੋ ਵਾਹੋ’’ਤਿ ਵੁਤ੍ਤਂ. ਤੇਲਫਾਣਿਤਾਦਿਨ੍ਤਿ ਆਦਿ-ਸਦ੍ਦੇਨ ਸਪ੍ਪਿਆਦਿਂ ਮਰਿਚਾਦਿਕਟੁਕਭਣ੍ਡਞ੍ਚ ਸਙ੍ਗਣ੍ਹਾਤਿ. ਨਾਹਂ ਰਞ੍ਞਾ ਦਿਟ੍ਠਪੁਬ੍ਬੋ, ਕੁਤੋ ਪਰਿਪ੍ਫਸ੍ਸੋਤਿ ਅਧਿਪ੍ਪਾਯੋ. ਨਚ੍ਚਿਤ੍ਵਾਤਿ ਨਚ੍ਚਂ ਦਤ੍ਵਾ.

ਘਟਿਕਾਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੨. ਰਟ੍ਠਪਾਲਸੁਤ੍ਤਵਣ੍ਣਨਾ

੨੯੩. ਥੂਲਮੇਵ ਥੁਲ੍ਲਂ, ਥੁਲ੍ਲਾ ਵਿਪੁਲਾ ਮਹਨ੍ਤਾ ਕੋਟ੍ਠਾ ਜਾਤਾ ਇਮਸ੍ਸਾਤਿ ਥੁਲ੍ਲਕੋਟ੍ਠਿਕਨ੍ਤਿ ਓਦਨਪੂਪਪਹੂਤਵਸੇਨ ਲਦ੍ਧਨਾਮੋ ਨਿਗਮੋ. ਅਟ੍ਠਕਥਾਯਂ ਪਨ ਥੁਲ੍ਲਕੋਟ੍ਠਨ੍ਤਿ ਅਤ੍ਥੋ ਵੁਤ੍ਤੋ. ਤੇਨ ਪਾਲ਼ਿਯਂ ਇਕ-ਸਦ੍ਦੇਨ ਪਦਵਡ੍ਢਨਂ ਕਤਨ੍ਤਿ ਦਸ੍ਸੇਤਿ.

੨੯੪. ਰਟ੍ਠਪਾਲੋਤਿ ਇਦਂ ਤਸ੍ਸ ਕੁਲਪੁਤ੍ਤਸ੍ਸ ਨਾਮਂ. ਪਵੇਣਿਵਸੇਨ ਆਗਤਕੁਲਵਂਸਾਨੁਗਤਨ੍ਤਿ ਸਮੁਦਾਗਮਤੋ ਪਟ੍ਠਾਯ ਦਸ੍ਸੇਤੁਂ ‘‘ਕਸ੍ਮਾ ਰਟ੍ਠਪਾਲੋ’’ਤਿਆਦਿ ਵੁਤ੍ਤਂ. ਸਨ੍ਧਾਰੇਤੁਨ੍ਤਿ ਵਿਨਾਸਨਤੋ ਪੁਬ੍ਬੇ ਯਾਦਿਸਂ, ਤਥੇਵ ਸਮ੍ਮਦੇਵ ਧਾਰੇਤੁਂ ਸਮਤ੍ਥੋ. ਸਦ੍ਧਾਤਿ ਕਮ੍ਮਫਲਸਦ੍ਧਾਯ ਸਮ੍ਪਨ੍ਨਾ. ਸਾਮਣੇਰਂ ਦਿਸ੍ਵਾਤਿ ਸਿਕ੍ਖਾਕਾਮਤਾਯ ਏਤਦਗ੍ਗੇ ਠਪਿਯਮਾਨਂ ਦਿਸ੍ਵਾ.

ਸਹ ਰਞ੍ਞਾਤਿ ਸਰਾਜਿਕਂ, ਰਞ੍ਞਾ ਸਦ੍ਧਿਂ ਰਾਜਪਰਿਸਂ. ਚਾਤੁਵਣ੍ਣਨ੍ਤਿ ਬ੍ਰਾਹ੍ਮਣਾਦਿਚਤੁਵਣ੍ਣਸਮੁਦਾਯਂ. ਪੋਸੇਤੁਨ੍ਤਿ ਵਦ੍ਧੇਤੁਂ ਦਾਨਾਦੀਹਿ ਸਙ੍ਗਹਵਤ੍ਥੂਹਿ ਸਙ੍ਗਣ੍ਹਿਤੁਂ. ਯਂ ਕੁਲਂ. ਪਹੋਸ੍ਸਤੀਤਿ ਸਕ੍ਖਿਸ੍ਸਤਿ.

ਤੇਨ ਤੇਨ ਮੇ ਉਪਪਰਿਕ੍ਖਤੋਤਿ ‘‘ਕਾਮਾ ਨਾਮੇਤੇ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ, ਅਟ੍ਠਿਕਙ੍ਕਲੂਪਮਾ’’ਤਿ (ਮ. ਨਿ. ੧.੨੩੪; ਪਾਚਿ. ੪੧੭; ਮਹਾਨਿ. ੩, ੬) ਚ ਆਦਿਨਾ ਯੇਨ ਯੇਨ ਆਕਾਰੇਨ ਕਾਮੇਸੁ ਆਦੀਨਵਂ ਓਕਾਰਂ ਸਂਕਿਲੇਸਂ, ਤਬ੍ਬਿਪਰਿਯਾਯਤੋ ਨੇਕ੍ਖਮ੍ਮੇ ਆਨਿਸਂਸਂ ਗੁਣਂ ਪਕਾਸੇਨ੍ਤਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਤੇਨ ਤੇਨ ਪਕਾਰੇਨ ਉਪਪਰਿਕ੍ਖਤੋ ਵੀਮਂਸਨ੍ਤਸ੍ਸ ਮਯ੍ਹਂ ਏਵਂ ਹੋਤਿ ਏਵਂ ਉਪਟ੍ਠਾਤਿ. ਸਿਕ੍ਖਤ੍ਤਯਬ੍ਰਹ੍ਮਚਰਿਯਨ੍ਤਿ ਅਧਿਸੀਲਾਦਿਸਿਕ੍ਖਤ੍ਤਯਸਙ੍ਗਹਂ ਸੇਟ੍ਠਚਰਿਯਂ. ਅਖਣ੍ਡਾਦਿਭਾਵਾਪਾਦਨੇਨ ਅਖਣ੍ਡਂ ਲਕ੍ਖਣਵਚਨਞ੍ਹੇਤਂ. ਕਞ੍ਚਿਪਿ ਸਿਕ੍ਖੇਕਦੇਸਂ ਅਸੇਸੇਤ੍ਵਾ ਏਕਨ੍ਤੇਨੇਵ ਪਰਿਪੂਰੇਤਬ੍ਬਤਾਯ ਏਕਨ੍ਤਪਰਿਪੁਣ੍ਣਂ. ਚਿਤ੍ਤੁਪ੍ਪਾਦਮਤ੍ਤਮ੍ਪਿ ਸਂਕਿਲੇਸਮਲਂ ਅਨੁਪ੍ਪਾਦੇਤ੍ਵਾ ਅਚ੍ਚਨ੍ਤਮੇਵ ਵਿਸੁਦ੍ਧਂ ਕਤ੍ਵਾ ਪਰਿਹਰਿਤਬ੍ਬਤਾਯ ਏਕਨ੍ਤਪਰਿਸੁਦ੍ਧਂ. ਤਤੋ ਏਵ ਸਙ੍ਖਂ ਵਿਯ ਲਿਖਿਤਨ੍ਤਿ ਸਙ੍ਖਲਿਖਿਤਂ. ਤੇਨਾਹ ‘‘ਲਿਖਿਤਸਙ੍ਖਸਦਿਸ’’ਨ੍ਤਿ. ਦਾਠਿਕਾਪਿ ਮਸ੍ਸੁਗ੍ਗਹਣੇਨੇਵ ਗਹੇਤ੍ਵਾ ‘‘ਮਸ੍ਸੁ’’ਤ੍ਵੇਵ ਵੁਤ੍ਤਂ, ਉਤ੍ਤਰਾਧਰਮਸ੍ਸੁਨ੍ਤਿ ਅਤ੍ਥੋ. ਕਸਾਯੇਨ ਰਤ੍ਤਾਨਿ ਕਾਸਾਯਾਨਿ. ਅਨਨੁਞ੍ਞਾਤਂ ਪੁਤ੍ਤਂ ਨ ਪਬ੍ਬਾਜੇਤਿ ‘‘ਮਾਤਾਪਿਤੂਨਂ ਲੋਕਿਯਮਹਾਜਨਸ੍ਸ ਚਿਤ੍ਤਞ੍ਞਥਤ੍ਤਂ ਮਾ ਹੋਤੂ’’ਤਿ. ਤਥਾ ਹਿ ਸੁਦ੍ਧੋਦਨਮਹਾਰਾਜਸ੍ਸ ਤਥਾ ਵਰੋ ਦਿਨ੍ਨੋ.

੨੯੫. ਪਿਯਾਯਿਤਬ੍ਬਤੋ ਪਿਯੋਤਿ ਆਹ ‘‘ਪੀਤਿਜਨਕੋ’’ਤਿ. ਮਨਸ੍ਸ ਅਪ੍ਪਾਯਨਤੋ ਮਨਾਪੋਤਿ ਆਹ ‘‘ਮਨਵਡ੍ਢਨਕੋ’’ਤਿ. ਸੁਖੇਧਿਤੋ ਤਰੁਣਦਾਰਕਕਾਲੇ. ਤਤੋ ਪਰਞ੍ਚ ਸਪ੍ਪਿਖੀਰਾਦਿਸਾਦੁਰਸਮਨੁਞ੍ਞਭੋਜਨਾਦਿਆਹਾਰਸਮ੍ਪਤ੍ਤਿਯਾ ਸੁਖਪਰਿਭਤੋ. ਅਥ ਵਾ ਦਲ਼੍ਹਭਤ੍ਤਿਕਧਾਤਿਜਨਾਦਿਪਰਿਜਨਸਮ੍ਪਤ੍ਤਿਯਾ ਚੇਵ ਪਰਿਚ੍ਛਦਸਮ੍ਪਤ੍ਤਿਯਾ ਚ ਉਲ਼ਾਰਪਣੀਤਸੁਖਪਚ੍ਚਯੂਪਹਾਰੇਹਿ ਚ ਸੁਖੇਧਿਤੋ, ਅਕਿਚ੍ਛੇਨੇਵ ਦੁਕ੍ਖਪ੍ਪਚ੍ਚਯਵਿਨੋਦਨੇਨ ਸੁਖਪਰਿਭਤੋ. ਅਜ੍ਝਤ੍ਤਿਕਙ੍ਗਸਮ੍ਪਤ੍ਤਿਯਾ ਵਾ ਸੁਖੇਧਿਤੋ, ਬਾਹਿਰਙ੍ਗਸਮ੍ਪਤ੍ਤਿਯਾ ਸੁਖਪਰਿਭਤੋ. ਕਸ੍ਸਚੀਤਿ ਉਪਯੋਗਤ੍ਥੇ ਸਾਮਿਵਚਨਂ, ਕਿਞ੍ਚੀਤਿ ਵੁਤ੍ਤਂ ਹੋਤਿ, ਅਯਮੇਵ ਵਾ ਪਾਠੋ. ਤਥਾ ਹਿ ‘‘ਅਪ੍ਪਮਤ੍ਤਕਮ੍ਪਿ ਕਲਭਾਗਂ ਦੁਕ੍ਖਸ੍ਸ ਨ ਜਾਨਾਸੀ’’ਤਿ ਅਤ੍ਥੋ ਵੁਤ੍ਤੋ. ਏਵਂ ਸਨ੍ਤੇਤਿ ਨਨੁ ਮਯਂ ਰਟ੍ਠਪਾਲ ਮਰਣਾਦੀਸੁ ਕੇਨਚਿ ਉਪਾਯੇਨ ਅਪ੍ਪਤੀਕਾਰੇਨ ਮਰਣੇਨਪਿ ਤਯਾ ਅਕਾਮਕਾਪਿ ਵਿਨਾ ਭਵਿਸ੍ਸਾਮ, ਏਵਂ ਸਤਿ. ਯੇਨਾਤਿ ਯੇਨ ਕਾਰਣੇਨ. ਕਿਂ ਪਨਾਤਿ ਏਤ੍ਥ ਕਿਨ੍ਤਿ ਕਾਰਣਤ੍ਥੇ ਪਚ੍ਚਤ੍ਤਵਚਨਨ੍ਤਿ ਦਸ੍ਸੇਨ੍ਤੋ ਆਹ ‘‘ਕੇਨ ਪਨ ਕਾਰਣੇਨਾ’’ਤਿ.

੨੯੬. ਪਰਿਚਾਰੇਹੀਤਿ ਪਰਿਤੋ ਤਤ੍ਥ ਤਤ੍ਥ ਯਥਾਸਕਂ ਵਿਸਯੇਸੁ ਚਾਰੇਹਿ. ਤੇਨਾਹ ‘‘ਇਤੋ ਚਿਤੋ ਚ ਉਪਨੇਹੀ’’ਤਿ. ਪਰਿਚਾਰੇਹੀਤਿ ਵਾ ਸੁਖੂਪਕਰਣੇਹਿ ਅਤ੍ਤਾਨਂ ਪਰਿਚਾਰੇਹਿ, ਅਤ੍ਤਨੋ ਪਰਿਚਰਣਂ ਕਾਰੇਹਿ. ਤਥਾਭੂਤੋ ਚ ਯਸ੍ਮਾ ਲਲ਼ਨ੍ਤੋ ਕੀਲ਼ਨ੍ਤੋ ਨਾਮ ਹੋਤਿ, ਤਸ੍ਮਾ ‘‘ਲਲ਼ਾ’’ਤਿਆਦਿ ਵੁਤ੍ਤਂ. ਨਿਚ੍ਚਦਾਨਂ ਦਾਨਂ ਨਾਮ, ਉਪੋਸਥਦਿਵਸਾਦੀਸੁ ਦਾਤਬ੍ਬਂ ਅਤਿਰੇਕਦਾਨਂ ਪਦਾਨਂ ਨਾਮ. ਪਵੇਣੀਰਕ੍ਖਣਵਸੇਨ ਵਾ ਦੀਯਮਾਨਂ ਦਾਨਂ ਨਾਮ, ਅਤ੍ਤਨਾਵ ਪਟ੍ਠਪੇਤ੍ਵਾ ਦੀਯਮਾਨਂ ਪਦਾਨਂ ਨਾਮ. ਪਚੁਰਜਨਸਾਧਾਰਣਂ ਵਾ ਨਾਤਿਉਲ਼ਾਰਂ ਦਾਨਂ ਨਾਮ, ਅਨਞ੍ਞਸਾਧਾਰਣਂ ਅਤਿਉਲ਼ਾਰਂ ਪਦਾਨਂ ਨਾਮ. ਉਦ੍ਦਸ੍ਸੇਤਬ੍ਬਾਤਿ ਉਦ੍ਧਂ ਦਸ੍ਸੇਤਬ੍ਬਾ. ਕੁਤੋ ਉਦ੍ਧਂ ਤੇ ਦਸ੍ਸੇਤਬ੍ਬਾ? ਪਬ੍ਬਜਿਤਤੋ ਉਦ੍ਧਂ ਅਤ੍ਤਾਨਂ ਮਾਤਾਪਿਤਰੋ ਦਸ੍ਸੇਤਬ੍ਬਾ, ਤੇਨਾਹ ‘‘ਯਥਾ’’ਤਿਆਦਿ.

੨੯੯. ਬਲਂ ਗਹੇਤ੍ਵਾਤਿ ਏਤ੍ਥ ਬਲਗ੍ਗਹਣਂ ਨਾਮ ਕਾਯਬਲਸ੍ਸ ਉਪ੍ਪਾਦਨਮੇਵਾਤਿ ਆਹ ‘‘ਕਾਯਬਲਂ ਜਨੇਤ੍ਵਾ’’ਤਿ. ਏਵਂ ਵਿਹਰਨ੍ਤੋਤਿ ਯਥਾ ਪਾਲ਼ਿਯਂ ਵੁਤ੍ਤਂ ਏਵਂ ਏਕੋ ਵੂਪਕਟ੍ਠੋ ਅਪ੍ਪਮਤ੍ਤੋ ਵਿਹਰਨ੍ਤੋ. ਤਸ੍ਮਾਤਿ ਯਸ੍ਮਾ ਨੇਯ੍ਯੋ, ਨ ਉਗ੍ਘਟਿਤਞ੍ਞੂ, ਨ ਚ ਵਿਪਞ੍ਚਿਤਞ੍ਞੂ, ਤਸ੍ਮਾ. ਚਿਰੇਨ ਪਬ੍ਬਜਿਤੋ ਦ੍ਵਾਦਸਮੇ ਵਸ੍ਸੇ ਅਰਹਤ੍ਤਂ ਪਾਪੁਣਿ. ਯਂ ਪਨ ਵੁਤ੍ਤਂ ਪਾਲ਼ਿਯਂ ‘‘ਨ ਚਿਰਸ੍ਸੇਵਾ’’ਤਿ, ਤਂ ਸਟ੍ਠਿ ਵਸ੍ਸਾਨਿ ਤਤੋ ਅਧਿਕਮ੍ਪਿ ਵਿਪਸ੍ਸਨਾਪਰਿਵਾਸਂ ਵਸਨ੍ਤੇ ਉਪਾਦਾਯ ਵੁਤ੍ਤਂ.

ਸਤ੍ਤਦ੍ਵਾਰਕੋਟ੍ਠਕਸ੍ਸਾਤਿ ਸਤ੍ਤਗਬ੍ਭਨ੍ਤਰਦ੍ਵਾਰਕੋਟ੍ਠਕਸੀਸੇਨ ਗਬ੍ਭਨ੍ਤਰਾਨਿ ਵਦਤਿ. ਪਹਰਾਪੇਤੀਤਿ ਵਯੋਵੁਡ੍ਢਾਨੁਰੂਪਂ ਕਪ੍ਪਾਪਨਾਦਿਨਾ ਅਲਙ੍ਕਾਰਾਪੇਤਿ. ਅਨ੍ਤੋਜਾਤਤਾਯ ਞਾਤਿਸਦਿਸੀ ਦਾਸੀ ਞਾਤਿਦਾਸੀ. ਪੂਤਿਭਾਵੇਨੇਵ ਲਕ੍ਖਿਤਬ੍ਬੋ ਦੋਸੋ ਵਾ ਅਭਿਦੋਸੋ, ਸੋਵ ਆਭਿਦੋਸਿਕੋ, ਅਭਿਦੋਸਂ ਵਾ ਪਚ੍ਚੂਸਕਾਲਂ ਗਤੋ ਪਤ੍ਤੋ ਅਤਿਕ੍ਕਨ੍ਤੋਤਿ ਆਭਿਦੋਸਿਕੋ. ਤੇਨਾਹ ‘‘ਏਕਰਤ੍ਤਾਤਿਕ੍ਕਨ੍ਤਸ੍ਸਾ’’ਤਿਆਦਿ. ਅਪਰਿਭੋਗਾਰਹੋ ਪੂਤਿਭੂਤਭਾਵੇਨ. ਅਰਿਯਵੋਹਾਰੇਨਾਤਿ ਅਰਿਯਸਮੁਦਾਚਾਰੇਨ. ਅਰਿਯਾ ਹਿ ਮਾਤੁਗਾਮਂ ਭਗਿਨਿਵਾਦੇਨ ਸਮੁਦਾਚਰਨ੍ਤਿ. ਨਿਸ੍ਸਟ੍ਠਪਰਿਗ੍ਗਹਨ੍ਤਿ ਪਰਿਚ੍ਚਤ੍ਤਾਲਯਂ. ਵਤ੍ਤੁਂ ਵਟ੍ਟਤੀਤਿ ਨਿਰਪੇਕ੍ਖਭਾਵਤੋ ਵੁਤ੍ਤਂ, ਇਧ ਪਨ ਵਿਸੇਸਤੋ ਅਪਰਿਭੋਗਾਰਹਤ੍ਤਾਵ ਵਤ੍ਥੁਨੋ. ਨਿਮੀਯਤਿ ਸਞ੍ਞਾਯਤੀਤਿ ਨਿਮਿਤ੍ਤਂ, ਤਥਾਸਲ੍ਲਕ੍ਖਿਤੋ ਆਕਾਰੋਤਿ ਆਹ ‘‘ਆਕਾਰਂ ਅਗ੍ਗਹੇਸੀ’’ਤਿ.

੩੦੦. ਘਰਂ ਪਵਿਸਿਤ੍ਵਾਤਿ ਗੇਹਸਾਮਿਨਿਯਾ ਨਿਸੀਦਿਤਬ੍ਬਟ੍ਠਾਨਭੂਤਂ ਅਨ੍ਤੋਗੇਹਂ ਪਵਿਸਿਤ੍ਵਾ. ਆਲਪਨੇਤਿ ਦਾਸਿਜਨਸ੍ਸ ਆਲਪਨੇ. ਬਹਿ ਨਿਕ੍ਖਮਨ੍ਤਾਤਿ ਯਥਾਵੁਤ੍ਤਅਨ੍ਤੋਗੇਹਤੋ ਬਹਿ ਨਿਕ੍ਖਮਨ੍ਤਿਯੋ. ਘਰੇਸੁ ਸਾਲਾ ਹੋਨ੍ਤੀਤਿ ਘਰੇਸੁ ਏਕਮਨ੍ਤੇ ਭੋਜਨਸਾਲਾ ਹੋਨ੍ਤਿ ਪਾਕਾਰਪਰਿਕ੍ਖਿਤ੍ਤਾ ਸੁਸਂਵਿਹਿਤਦ੍ਵਾਰਬਨ੍ਧਾ ਸੁਸਮ੍ਮਟ੍ਠਵਾਲਿਕਙ੍ਗਣਾ.

ਅਨੋਕਪ੍ਪਨਂ ਅਸਦ੍ਦਹਨਂ. ਅਮਰਿਸਨਂ ਅਸਹਨਂ. ਅਨਾਗਤਵਚਨਂ ਅਨਾਗਤਸਦ੍ਦਪ੍ਪਯੋਗੋ, ਅਤ੍ਥੋ ਪਨ ਵਤ੍ਤਮਾਨਕਾਲਿਕੋਵ. ਤੇਨਾਹ ‘‘ਪਚ੍ਚਕ੍ਖਮ੍ਪੀ’’ਤਿ. ਅਰਿਯਿਦ੍ਧਿਯਨ੍ਤਿ ‘‘ਪਟਿਕੂਲੇ ਅਪਟਿਕੂਲਸਞ੍ਞੀ ਵਿਹਰਤੀ’’ਤਿ (ਅ. ਨਿ. ੫.੧੪੪) ਏਵਂ ਵੁਤ੍ਤਅਰਿਯਿਦ੍ਧਿਯਂ.

ਪੂਤਿਕੁਮ੍ਮਾਸੋ ਛਡ੍ਡਨੀਯਧਮ੍ਮੋ ਤਸ੍ਸ ਗੇਹਤੋ ਲਦ੍ਧੋਪਿ ਨ ਦਾਤਬ੍ਬਯੁਤ੍ਤਕੋ ਦਾਸਿਜਨੇਨ ਦਿਨ੍ਨੋਤਿ ਆਹ ‘‘ਦੇਯ੍ਯਧਮ੍ਮਵਸੇਨ ਨੇਵ ਦਾਨਂ ਅਲਤ੍ਥਮ੍ਹਾ’’ਤਿ. ‘‘ਇਮੇਹਿ ਮੁਣ੍ਡਕੇਹੀ’’ਤਿਆਦਿਨਾ ਨਿਤ੍ਥੁਨਨਵਚਨੇਨ ਪਚ੍ਚਕ੍ਖਾਨਂ ਅਤ੍ਥਤੋ ਲਦ੍ਧਮੇਵ, ਤਸ੍ਸ ਪਨ ਉਜੁਕਫਾਸੁਸਮਾਚਾਰਵਸੇਨ ਅਲਦ੍ਧਤ੍ਤਾ ਵੁਤ੍ਤਂ ‘‘ਨ ਪਚ੍ਚਕ੍ਖਾਨ’’ਨ੍ਤਿ. ਤੇਨਾਹ – ‘‘ਪਟਿਸਨ੍ਥਾਰਵਸੇਨ ਪਚ੍ਚਕ੍ਖਾਨਮ੍ਪਿ ਨ ਅਲਤ੍ਥਮ੍ਹਾ’’ਤਿ. ‘‘ਨੇਵ ਦਾਨ’’ਨ੍ਤਿਆਦਿ ਪਚ੍ਚਾਸੀਸਾਯ ਅਕ੍ਖਨ੍ਤਿਯਾ ਚ ਵੁਤ੍ਤਂ ਵਿਯ ਪਚੁਰਜਨੋ ਮਞ੍ਞੇਯ੍ਯਾਤਿ ਤਨ੍ਨਿਵਤ੍ਤਨਤ੍ਥਂ ਅਧਿਪ੍ਪਾਯਮਸ੍ਸ ਵਿਵਰਿਤੁਂ ‘‘ਕਸ੍ਮਾ ਪਨਾ’’ਤਿਆਦਿ ਵੁਤ੍ਤਂ. ਸੁਤ੍ਤਿਕਾਪਟਿਚ੍ਛਨ੍ਨਨ੍ਤਿ ਸਿਪ੍ਪਿਕਾਛਦਾਹਿ ਛਨ੍ਨਂ.

ਉਕ੍ਕਟ੍ਠਏਕਾਸਨਿਕਤਾਯਾਤਿ ਇਦਂ ਭੂਤਕਥਨਮਤ੍ਤਂ ਥੇਰਸ੍ਸ ਤਥਾਭਾਵਦੀਪਨਤੋ. ਮੁਦੁਕਸ੍ਸਪਿ ਹਿ ਏਕਾਸਨਿਕਸ੍ਸ ਯਾਯ ਨਿਸਜ੍ਜਾਯ ਕਿਞ੍ਚਿਮਤ੍ਤਂ ਭੋਜਨਂ ਭੁਤ੍ਤਂ, ਵਤ੍ਤਸੀਸੇਨਪਿ ਤਤੋ ਵੁਟ੍ਠਿਤਸ੍ਸ ਪੁਨ ਭੁਞ੍ਜਿਤੁਂ ਨ ਵਟ੍ਟਤਿ. ਤੇਨਾਹ ਤਿਪਿਟਕਚੂਲ਼ਾਭਯਤ੍ਥੇਰੋ ‘‘ਆਸਨਂ ਵਾ ਰਕ੍ਖੇਯ੍ਯ ਭੋਜਨਂ ਵਾ’’ਤਿ. ਉਕ੍ਕਟ੍ਠਸਪਦਾਨਚਾਰਿਕੋਤਿ ਪੁਰਤੋ ਪਚ੍ਛਤੋ ਚ ਆਹਟਭਿਕ੍ਖਮ੍ਪਿ ਅਗ੍ਗਹੇਤ੍ਵਾ ਬਹਿਦ੍ਵਾਰੇ ਠਤ੍ਵਾ ਪਤ੍ਤਵਿਸ੍ਸਜ੍ਜਨਮੇਵ ਕਰੋਤਿ. ਏਤੇਨੇਵ ਥੇਰਸ੍ਸ ਉਕ੍ਕਟ੍ਠਪਿਣ੍ਡਪਾਤਿਕਭਾਵੋ ਦੀਪਿਤੋ. ਤੇਨਾਹ – ‘‘ਸ੍ਵਾਤਨਾਯ ਭਿਕ੍ਖਂ ਨਾਮ ਨਾਧਿਵਾਸੇਤੀ’’ਤਿ. ਅਥ ਕਸ੍ਮਾ ਅਧਿਵਾਸੇਸੀਤਿ ਆਹ ‘‘ਮਾਤੁ ਅਨੁਗ੍ਗਹੇਨਾ’’ਤਿਆਦਿ. ਪਣ੍ਡਿਤਾ ਹਿ ਮਾਤਾਪਿਤੂਨਂ ਆਚਰਿਯੁਪਜ੍ਝਾਯਾਨਂ ਵਾ ਕਾਤਬ੍ਬਂ ਅਨੁਗ੍ਗਹਂ ਅਜ੍ਝੁਪੇਕ੍ਖਿਤ੍ਵਾ ਧੁਤਙ੍ਗਸੁਦ੍ਧਿਕਾ ਨ ਭਵਨ੍ਤਿ.

੩੦੧. ਪਯੁਤ੍ਤਨ੍ਤਿ ਵਦ੍ਧਿਵਸੇਨ ਪਯੋਜਿਤਂ, ਤਦ੍ਧਿਤਲੋਪਂ ਕਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ ਯਥਾ ਅਞ੍ਞਤ੍ਥਾਪਿ ‘‘ਪਿਤਾਮਹਂ ਧਨਂ ਲਦ੍ਧਾ, ਸੁਖਂ ਜੀਵਤਿ ਸਞ੍ਚਯੋ’’ਤਿ. ਜੇਟ੍ਠਕਿਤ੍ਥਿਯੋਤਿ ਪਧਾਨਿਤ੍ਥਿਯੋ. ਇਤੋਤਿ ਇਮਸ੍ਮਿਂ ਕੁਲੇ ਅਨੁਭਵਿਤਬ੍ਬਵਿਭਵਸਮ੍ਪਤ੍ਤਿਤੋ. ਅਞ੍ਞਤੋਤਿ ਇਮਸ੍ਸ ਦਿਨ੍ਨਤ੍ਤਾ ਅਞ੍ਞਸ੍ਮਿਂ ਕੁਲੇ ਅਨੁਭਵਿਤਬ੍ਬਸਮ੍ਪਤ੍ਤਿਤੋ.

੩੦੨. ਚਿਤ੍ਤਵਿਚਿਤ੍ਤਨ੍ਤਿ ਕਪ੍ਪਨਾਯ ਚੇਵ ਅਰਹਰੂਪੇਨ ਅਲਙ੍ਕਾਰਾਦਿਨਾ ਚ ਚਿਤ੍ਤਿਤਞ੍ਚੇਵ ਵਿਚਿਤ੍ਤਿਤਞ੍ਚ. ਵਣਕਾਯਨ੍ਤਿ ਵਣਭੂਤਂ ਕਾਯਂ. ਸਮਨ੍ਤਤੋ ਉਸ੍ਸਿਤਨ੍ਤਿ ਹੇਟ੍ਠਿਮਕਾਯਵਸੇਨ ਹੇਟ੍ਠਾ ਉਪਰਿ ਚ ਸਨ੍ਨਿਸ੍ਸਿਤਂ. ਨਿਚ੍ਚਾਤੁਰਨ੍ਤਿ ਅਭਿਣ੍ਹਪ੍ਪਟਿਪੀਲ਼ਿਤਂ, ਸਦਾ ਦੁਕ੍ਖਿਤਂ ਵਾ. ਬਹੁਸਙ੍ਕਪ੍ਪਨ੍ਤਿ ਰਾਗਵਤ੍ਥੁਭਾਵੇਨ ਅਭਿਜਨੇਹਿ ਹਾਵਭਾਵਵਿਲਾਸਵਸੇਨ, ਆਮਿਸਵਸੇਨ ਚ ਸੋਣਸਿਙ੍ਗਾਲਾਦੀਹਿ ਬਹੂਹਿ ਸਙ੍ਕਪ੍ਪੇਤਬ੍ਬਂ. ਠਿਤੀਤਿ ਅਵਟ੍ਠਾਨਂ ਅਵਿਪਰਿਣਾਮੋ ਨਤ੍ਥਿ. ਤੇਨਾਹ – ‘‘ਭਿਜ੍ਜਨਧਮ੍ਮਤਾਵ ਨਿਯਤਾ’’ਤਿ, ਪਰਿਸ੍ਸਵਭਾਵਾਪਤ੍ਤਿ ਚੇਵ ਵਿਨਾਸਪਤ੍ਤਿ ਚ ਏਕਨ੍ਤਿਕਾਤਿ ਅਤ੍ਥੋ.

ਚਿਤ੍ਤਕਤਮ੍ਪੀਤਿ ਗਨ੍ਧਾਦੀਹਿ ਚਿਤ੍ਤਕਤਮ੍ਪਿ. ਰੂਪਨ੍ਤਿ ਸਰੀਰਂ.

ਅਲਤ੍ਤਕਕਤਾਤਿ ਪਿਣ੍ਡਿਅਲਤ੍ਤਕੇਨ ਸੁਵਣ੍ਣਕਤਾ. ਤੇਨਾਹ ‘‘ਅਲਤ੍ਤਕੇਨ ਰਞ੍ਜਿਤਾ’’ਤਿ. ਚੁਣ੍ਣਕਮਕ੍ਖਿਤਨ੍ਤਿ ਦੋਸਨੀਹਰਣੇਹਿ ਤਾਪਦਹਨਾਦੀਹਿ ਕਤਾਭਿਸਙ੍ਖਾਰਮੁਖਂ ਗੋਰੋਚਨਾਦੀਹਿ ਓਭਾਸਨਕਚੁਣ੍ਣੇਹਿ ਮਕ੍ਖਿਤਂ, ਤੇਨਾਹ ‘‘ਸਾਸਪਕਕ੍ਕੇਨਾ’’ਤਿਆਦਿ.

ਰਸੋਦਕੇਨਾਤਿ ਸਰਲਨਿਯ੍ਯਾਸਰਸਮਿਸ੍ਸੇਨ ਉਦਕੇਨ. ਆਵਤ੍ਤਨਪਰਿਵਤ੍ਤੇ ਕਤ੍ਵਾਤਿ ਆਵਤ੍ਤਨਪਰਿਵਤ੍ਤਨਵਸੇਨ ਨਤੇ ਕਤ੍ਵਾ. ਅਟ੍ਠਪਦਕਰਚਨਾਯਾਤਿ ਭਿਤ੍ਤਿਕੂਟਦ੍ਧਚਨ੍ਦਾਦਿਵਿਭਾਗਾਯ ਅਟ੍ਠਪਦਕਰਚਨਾਯ.

ਵਿਰਵਮਾਨੇਤਿ ‘‘ਅਯਂ ਪਲਾਯਤਿ, ਗਣ੍ਹ ਗਣ੍ਹਾ’’ਤਿ ਵਿਰਵਮਾਨੇ. ਹਿਰਞ੍ਞਸੁਵਣ੍ਣਓਰੋਧੇਤਿ ਵਤ੍ਤਬ੍ਬਂ.

੩੦੩. ਉਸ੍ਸਿਤਾਯ ਉਸ੍ਸਿਤਾਯਾਤਿ ਕੁਲਵਿਭਵਬਾਹੁਸਚ੍ਚਪਞ੍ਞਾਸਮ੍ਪਤ੍ਤਿਯਾ ਉਗ੍ਗਤਾਯ ਉਗ੍ਗਤਾਯ. ਅਭਿਲਕ੍ਖਿਤੋ ਉਲ਼ਾਰਭਾਵੇਨ.

੩੦੪. ਪਰਿਜੁਞ੍ਞਾਨੀਤਿ ਪਰਿਹਾਨਾਨਿ. ਯੇ ਬ੍ਯਾਧਿਨਾ ਅਭਿਭੂਤਾ ਸਤ੍ਤਾ ਜਿਣ੍ਣਕਪ੍ਪਾ ਵਯੋਹਾਨਿਸਤ੍ਤਾ ਵਿਯ ਹੋਨ੍ਤਿ, ਤਤੋ ਨਿਵਤ੍ਤੇਨ੍ਤੋ ‘‘ਜਰਾਜਿਣ੍ਣੋ’’ਤਿ ਆਹ. ਵਯੋਵੁਡ੍ਢੋ, ਨ ਸੀਲਾਦਿਵੁਡ੍ਢੋ. ਮਹਤ੍ਤਂ ਲਾਤਿ ਗਣ੍ਹਾਤੀਤਿ ਮਹਲ੍ਲਕੋ, ਜਾਤਿਯਾ ਮਹਲ੍ਲਕੋ, ਨ ਵਿਭਵਾਦਿਨਾਤਿ ਜਾਤਿਮਹਲ੍ਲਕੋ. ਦ੍ਵਤ੍ਤਿਰਾਜਪਰਿਵਤ੍ਤਸਙ੍ਖਾਤਂ ਅਦ੍ਧਾਨਂ ਕਾਲਂ ਗਤੋ ਵੀਤਿਵਤ੍ਤੋਤਿ ਅਦ੍ਧਗਤੋ. ਤਥਾ ਚ ਪਠਮਵਯਂ ਮਜ੍ਝਿਮਵਯਞ੍ਚ ਅਤੀਤੋ ਹੋਤੀਤਿ ਆਹ ‘‘ਅਦ੍ਧਾਨਂ ਅਤਿਕ੍ਕਨ੍ਤੋ’’ਤਿ. ਜਿਣ੍ਣਾਦਿਪਦੇਹਿ ਪਠਮਵਯਮਜ੍ਝਿਮਵਯਸ੍ਸ ਬੋਧਿਤਤ੍ਤਾ ਅਨੁਪ੍ਪਤ੍ਤਤਾਵਿਸਿਟ੍ਠੋ ਵਯ-ਸਦ੍ਦੋ ਓਸਾਨਵਯਵਿਸਯੋਤਿ ਆਹ ‘‘ਪਚ੍ਛਿਮਵਯਂ ਅਨੁਪ੍ਪਤ੍ਤੋ’’ਤਿ.

‘‘ਅਪ੍ਪਿਚ੍ਛੋ, ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸੋ’’ਤਿ (ਅ. ਨਿ. ੧੦.੧੧) ਏਵਮਾਦੀਸੁ ਵਿਯ ਅਪ੍ਪ-ਸਦ੍ਦੋ ਅਭਾਵਤ੍ਥੋਤਿ ਅਧਿਪ੍ਪਾਯੇਨਾਹ ‘‘ਅਪ੍ਪਾਬਾਧੋਤਿ ਅਰੋਗੋ, ਅਪ੍ਪਾਤਙ੍ਕੋਤਿ ਨਿਦ੍ਦੁਕ੍ਖੋ’’ਤਿ. ਅਪ੍ਪਤ੍ਥੋ ਵਾ ਇਧ, ਤਤ੍ਥਾਪਿ ਅਪ੍ਪ-ਸਦ੍ਦੋ ਦਟ੍ਠਬ੍ਬੋ. ਏਵਞ੍ਹਿ ‘‘ਯੋ ਹਿ, ਗਹਪਤਿ, ਇਮਂ ਪੂਤਿਕਾਯਂ ਪਰਿਹਰਨ੍ਤੋ ਮੁਹੁਤ੍ਤਮ੍ਪਿ ਆਰੋਗ੍ਯਂ ਪਟਿਜਾਨੇਯ੍ਯ ਕਿਮਞ੍ਞਤ੍ਰ ਬਾਲ੍ਯਾ’’ਤਿ (ਸਂ. ਨਿ. ੩.੧) ਸੁਤ੍ਤਪਦਂ ਸਮਤ੍ਥਿਤਂ ਹੋਤਿ. ਵਿਪਚ੍ਚਨਂ ਵਿਪਾਕੋ, ਸੋ ਏਵ ਵੇਪਾਕੋ. ਸਮੋ ਵੇਪਾਕੋ ਏਤਿਸ੍ਸਾ ਅਤ੍ਥੀਤਿ ਸਮਵੇਪਾਕਿਨੀ, ਤਾਯ. ਤੇਨੇਵ ਸਮਵੇਪਾਕਿਨਿਭਾਵੇਨ ਸਬ੍ਬਮ੍ਪਿ ਸਮ੍ਮਦੇਵ ਗਣ੍ਹਾਤਿ ਧਾਰੇਤੀਤਿ ਗਹਣੀ. ਗਹਣਿਸਮ੍ਪਤ੍ਤਿਯਾ ਹਿ ਯਥਾਭੁਤ੍ਤਆਹਾਰੋ ਸਮ੍ਮਦੇਵ ਜੀਰਨ੍ਤੋ ਸਰੀਰੇ ਤਿਟ੍ਠਤਿ, ਨੋ ਅਞ੍ਞਥਾ ਭੁਤ੍ਤਭੁਤ੍ਤੋ ਆਹਾਰੋ ਜੀਰਤਿ ਗਹਣਿਯਾ ਤਿਕ੍ਖਭਾਵੇਨ. ਤਥੇਵ ਤਿਟ੍ਠਤੀਤਿ ਭੁਤ੍ਤਾਕਾਰੇਨੇਵ ਤਿਟ੍ਠਤਿ ਗਹਣਿਯਾ ਮਨ੍ਦਭਾਵਤੋ. ਭਤ੍ਤਚ੍ਛਨ੍ਦੋ ਉਪ੍ਪਜ੍ਜਤੇਵ ਭੁਤ੍ਤਆਹਾਰਸ੍ਸ ਸਮ੍ਮਾ ਪਰਿਣਾਮਂ ਗਤਤ੍ਤਾ. ਤੇਨੇਵਾਤਿ ਸਮਵੇਪਾਕਿਨਿਭਾਵੇਨੇਵ. ਪਤ੍ਤਾਨਂ ਭੋਗਾਨਂ ਪਰਿਕ੍ਖਿਯਮਾਨਂ ਨ ਸਹਸਾ ਏਕਜ੍ਝਂਯੇਵ ਪਰਿਕ੍ਖਯਂ ਗਚ੍ਛਨ੍ਤਿ, ਅਥ ਖੋ ਅਨੁਕ੍ਕਮੇਨ, ਤਥਾ ਞਾਤਯੋਪੀਤਿ ਆਹ ‘‘ਅਨੁਪੁਬ੍ਬੇਨਾ’’ਤਿ. ਛਾਤਕਭਯਾਦਿਨਾਤਿ ਆਦਿ-ਸਦ੍ਦੇਨ ਬ੍ਯਾਧਿਭਯਾਦਿਂ ਸਙ੍ਗਣ੍ਹਾਤਿ.

੩੦੫. ਉਦ੍ਦੇਸਸੀਸੇਨ ਨਿਦ੍ਦੇਸੋ ਗਹਿਤੋਤਿ ਆਹ ‘‘ਧਮ੍ਮਨਿਦ੍ਦੇਸਾ ਉਦ੍ਦਿਟ੍ਠਾ’’ਤਿ. ਯਸ੍ਮਾ ਵਾ ਯੇ ਧਮ੍ਮਾ ਉਦ੍ਦਿਸਿਤਬ੍ਬਟ੍ਠੇਨ ‘‘ਉਦ੍ਦੇਸਾ’’ਤਿ ਵੁਚ੍ਚਨ੍ਤਿ. ਤੇਵ ਧਮ੍ਮਾ ਨਿਦ੍ਦਿਸਿਤਬ੍ਬਟ੍ਠੇਨ ਨਿਦ੍ਦੇਸਾਤਿ ‘‘ਧਮ੍ਮਨਿਦ੍ਦੇਸਾ ਉਦ੍ਦਿਟ੍ਠਾ’’ਤਿ ਅਤ੍ਥੋ ਵੁਤ੍ਤੋ. ਅਥ ਵਾ ਯੇ ਧਮ੍ਮਾ ਅਨਿਚ੍ਚਤਾਦਿਵਿਭਾਵਨਵਸੇਨ ਉਦ੍ਧਂ ਉਦ੍ਧਂ ਦੇਸੇਸ੍ਸਨ੍ਤਿ, ਤੇ ਧਮ੍ਮਾ ਤਥੇਵ ਨਿਸ੍ਸੇਸਤੋ ਦੇਸੇਸ੍ਸਨ੍ਤੀਤਿ ਏਵਂ ਉਦ੍ਦੇਸਨਿਦ੍ਦੇਸਪਦਾਨਂ ਅਨਤ੍ਥਨ੍ਤਰਤਾ ਵੇਦਿਤਬ੍ਬਾ. ਤਤ੍ਥਾਤਿ ਜਰਾਮਰਣਸਨ੍ਤਿਕੇ. ਅਦ੍ਧੁਵੋਤਿ ਨਿਦ੍ਧੁਵੋ ਨ ਥਿਰੋ, ਅਨਿਚ੍ਚੋਤਿ ਅਤ੍ਥੋ. ਤੇਨਾਹ ‘‘ਧੁਵਟ੍ਠਾਨਵਿਰਹਿਤੋ’’ਤਿ, ਅਜਾਤਾਭੂਤਾਸਙ੍ਖਤਧੁਵਭਾਵਕਾਰਣਵਿਵਿਤ੍ਤੋਤਿ ਅਤ੍ਥੋ. ਉਪਨੀਯ੍ਯਤੀਤਿ ਵਾ ਜਰਾਮਰਣੇਨ ਲੋਕੋ ਸਮ੍ਮਾ ਨੀਯਤਿ, ਤਸ੍ਮਾ ਅਦ੍ਧੁਵੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਤਾਯਿਤੁਨ੍ਤਿ ਜਾਤਿਆਦਿਬ੍ਯਸਨਤੋ ਰਕ੍ਖਿਤੁਂ ਸਮਤ੍ਥੇਨ ਇਸ੍ਸਰੇਨ ਅਤ੍ਤਨਾ ਵਿਰਹਿਤੋਤਿ. ‘‘ਇਮਂ ਲੋਕਂ ਇਤੋ ਵਟ੍ਟਦੁਕ੍ਖਤੋ ਮੋਚੇਸ੍ਸਾਮਿ, ਜਰਾਬ੍ਯਾਧਿਮਰਣਾਨਂ ਤਂ ਅਧਿਭਵਿਤੁਂ ਨ ਦਸ੍ਸਾਮੀ’’ਤਿ ਏਵਂ ਅਭਿਸਰਤੀਤਿ ਅਭਿਸ੍ਸਰਣਂ, ਲੋਕਸ੍ਸ ਸੁਖਸ੍ਸ ਦਾਤਾ ਹਿਤਸ੍ਸ ਵਿਧਾਤਾ ਕੋਚਿ ਇਸ੍ਸਰੋ, ਤਦਭਾਵਤੋ ਆਹ ‘‘ਅਨਭਿਸ੍ਸਰੋਤਿ ਅਸਰਣੋ’’ਤਿ. ਨਿਸ੍ਸਕੋ ਮਮਾਯਿਤਬ੍ਬਵਤ੍ਥੁਅਭਾਵਤੋ, ਤੇਨਾਹ ‘‘ਸਕਭਣ੍ਡਵਿਰਹਿਤੋ’’ਤਿਆਦਿ. ਤਣ੍ਹਾਯ ਵਸੇ ਜਾਤੋ ਤਣ੍ਹਾਯ ਵਿਜਿਤੋਤਿ ਕਤ੍ਵਾ ‘‘ਤਣ੍ਹਾਯ ਦਾਸੋ’’ਤਿ ਵੁਤ੍ਤਂ.

੩੦੬. ਹਤ੍ਥਿਵਿਸਯਤ੍ਤਾ ਹਤ੍ਥਿਸਨ੍ਨਿਸ੍ਸਿਤਤ੍ਤਾ ਵਾ ਹਤ੍ਥਿਸਿਪ੍ਪਂ ‘‘ਹਤ੍ਥੀ’’ਤਿ ਗਹਿਤਨ੍ਤਿ ਆਹ – ‘‘ਹਤ੍ਥਿਸ੍ਮਿਨ੍ਤਿ ਹਤ੍ਥਿਸਿਪ੍ਪੇ’’ਤਿ, ਸੇਸਪਦੇਸੁਪਿ ਏਸੇਵ ਨਯੋ. ਸਾਤਿਸਯਂ ਊਰੁਬਲਂ ਏਤਸ੍ਸ ਅਤ੍ਥੀਤਿ ਊਰੁਬਲੀਤਿ ਆਹ – ‘‘ਊਰੁਬਲਸਮ੍ਪਨ੍ਨੋ’’ਤਿ, ਤਮੇਵਤ੍ਥਂ ਪਾਕਟਂ ਕਤ੍ਵਾ ਦਸ੍ਸੇਤੁਂ ‘‘ਯਸ੍ਸ ਹੀ’’ਤਿਆਦਿ ਵੁਤ੍ਤਂ. ਅਭਿਨ੍ਨਂ ਪਰਸੇਨਂ ਭਿਨ੍ਦਤੋ ਭਿਨ੍ਨਂ ਸਕਸੇਨਂ ਸਨ੍ਧਾਰਯਤੋ ਉਪਤ੍ਥਮ੍ਭਯਤੋ. ਬਾਹੁਬਲੀਤਿ ਏਤ੍ਥਾਪਿ ‘‘ਯਸ੍ਸ ਹਿ ਫਲਕਞ੍ਚ ਆਵੁਧਞ੍ਚ ਗਹੇਤ੍ਵਾ’’ਤਿਆਦਿਨਾ ਅਤ੍ਥੋ ਵਤ੍ਤਬ੍ਬੋ, ਇਧ ਪਨ ਪਰਹਤ੍ਥਗਤਂ ਰਜ੍ਜਂ ਆਹਰਿਤੁਂ ਬਾਹੁਬਲਨ੍ਤਿ ਯੋਜਨਾ. ਯਥਾ ਹਿ ‘‘ਊਰੁਬਲੀ’’ਤਿ ਏਤ੍ਥਾਪਿ ਬਾਹੁਬਲਂ ਅਨਾਮਸਿਤ੍ਵਾ ਅਤ੍ਥੋ, ਏਵਂ ‘‘ਬਾਹੁਬਲੀ’’ਤਿ ਏਤ੍ਥ ਊਰੁਬਲਂ ਅਨਾਮਸਿਤ੍ਵਾ ਅਤ੍ਥੋ ਵੇਦਿਤਬ੍ਬੋ, ਆਹਿਤੋ ਅਹਂਮਾਨੋ ਏਤ੍ਥਾਤਿ ਅਤ੍ਤਾ, ਅਤ੍ਤਭਾਵੋ. ਅਲਂ ਸਮਤ੍ਥੋ ਅਤ੍ਤਾ ਏਤਸ੍ਸਾਤਿ ਅਲਮਤ੍ਥੋਤਿ ਆਹ ‘‘ਸਮਤ੍ਥਅਤ੍ਤਭਾਵੋ’’ਤਿ.

ਪਰਿਯੋਧਾਯਾਤਿ ਵਾ ਪਰਿਤੋ ਆਰਕ੍ਖਂ ਓਦਹਿਤ੍ਵਾ. ‘‘ਸਂਵਿਜ੍ਜਨ੍ਤੇ ਖੋ, ਭੋ ਰਟ੍ਠਪਾਲ, ਇਮਸ੍ਮਿਂ ਰਾਜਕੁਲੇ ਹਤ੍ਥਿਕਾਯਾਪਿ…ਪੇ… ਵਤ੍ਤਿਸ੍ਸਨ੍ਤੀ’’ਤਿ ਇਦਮ੍ਪਿ ਸੋ ਰਾਜਾ ਉਪਰਿ ਧਮ੍ਮੁਦ੍ਦੇਸਸ੍ਸ ਕਾਰਣਂ ਆਹਰਨ੍ਤੋ ਆਹ.

ਵੁਤ੍ਤਸ੍ਸੇਵ ਅਨੁ ਪਚ੍ਛਾ ਗਾਯਨਵਸੇਨ ਕਥਨਂ ਅਨੁਗੀਤਿ. ਤਾ ਪਨ ਗਾਥਾ ਧਮ੍ਮੁਦ੍ਦੇਸਾਨਂ ਦੇਸਨਾਨੁਪੁਬ੍ਬਿਂ ਅਨਾਦਿਯਿਤ੍ਵਾਪਿ ਯਥਾਰਹਂ ਸਙ੍ਗਣ੍ਹਨਵਸੇਨ ਅਨੁਗੀਤਾਤਿ ਆਹ ‘‘ਚਤੁਨ੍ਨਂ ਧਮ੍ਮੁਦ੍ਦੇਸਾਨਂ ਅਨੁਗੀਤਿ’’ਨ੍ਤਿ.

੩੦੭. ਏਕਨ੍ਤਿ ਏਕਜਾਤਿਯਂ. ਵਤ੍ਥੁਕਾਮਕਿਲੇਸਕਾਮਾ ਵਿਸਯਭੇਦੇਨ ਭਿਨ੍ਦਿਤ੍ਵਾ ਤਥਾ ਵੁਤ੍ਤਾਤਿ ਦਟ੍ਠਬ੍ਬੋ.

ਸਾਗਰਨ੍ਤੇਨਾਤਿ ਸਾਗਰਪਰਿਯਨ੍ਤੇਨ.

ਅਹੋ ਵਤਾਤਿ ਸੋਚਨੇ ਨਿਪਾਤੋ, ‘‘ਅਹੋ ਵਤ ਪਾਪਂ ਕਤਂ ਮਯਾ’’ਤਿਆਦੀਸੁ ਵਿਯ. ਅਮਰਾਤਿਆਦੀਸੁ ਆਹੂਤਿ ਕਥੇਨ੍ਤਿ. ਮਤਂ ਉਦ੍ਦਿਸ੍ਸ ‘‘ਅਮ੍ਹ’’ਨ੍ਤਿ ਵਤ੍ਤਬ੍ਬੇ ਸੋਕਵਸੇਨ ‘‘ਅਮਰ’’ਨ੍ਤਿ ਵੁਚ੍ਚਤਿ.

ਵੋਸਾਨਨ੍ਤਿ ਨਿਟ੍ਠਂ, ਪਰਿਯੋਸਾਨਨ੍ਤਿ ਅਤ੍ਥੋ. ਸਾਵਾਤਿ ਪਞ੍ਞਾ ਏਵ. ਧਨਤੋਤਿ ਸਬ੍ਬਧਨਤੋ. ਉਤ੍ਤਮਤਰਾ ਸੇਟ੍ਠਾ, ਤੇਨੇਵਾਹ ‘‘ਪਞ੍ਞਾਜੀਵਿਂ ਜੀਵਿਤਮਾਹੁ ਸੇਟ੍ਠ’’ਨ੍ਤਿ (ਸਂ. ਨਿ. ੧.੨੪੬; ਸੁ. ਨਿ. ੧੮੪).

ਤੇਸੁ ਪਾਪਂ ਕਰੋਨ੍ਤੇਸੁ ਸਤ੍ਤੇਸੁ, ਨਿਦ੍ਧਾਰਣੇ ਚੇਤਂ ਭੁਮ੍ਮਵਚਨਂ. ਪਰਮ੍ਪਰਾਯਾਤਿ ਅਤ੍ਤਭਾਵਪਰਮ੍ਪਰਾਯ. ਸਂਸਾਰਂ ਆਪਜ੍ਜਿਤ੍ਵਾਤਿ ਭਵਾਦੀਸੁ ਸਂਸਾਰਸ੍ਸ ਆਪਜ੍ਜਨਹੇਤੁਂ ਆਪਜ੍ਜਨ੍ਤੋ ਪਰਲੋਕਂ ਉਪੇਤਿ, ਪਰਲੋਕਂ ਉਪੇਨ੍ਤੋਵ ਬਹੁਵਿਧਦੁਕ੍ਖਸਙ੍ਖਾਤਂ ਗਬ੍ਭਞ੍ਚ ਉਪੇਤਿ. ਤਾਦਿਸਸ੍ਸਾਤਿ ਤਥਾਰੂਪਸ੍ਸ ਗਬ੍ਭਵਾਸਦੁਕ੍ਖਾਦੀਨਂ ਅਧਿਟ੍ਠਾਨਭੂਤਸ੍ਸ ਅਪ੍ਪਪਞ੍ਞਸ੍ਸ ਅਞ੍ਞੋ ਅਪ੍ਪਪਞ੍ਞੋ ਚ ਅਭਿਸਦ੍ਦਹਨ੍ਤੋ ਹਿਤਸੁਖਾਵਹਨ੍ਤਿ ਪਤ੍ਤਿਯਾਯਨ੍ਤੋ.

‘‘ਪਾਪਧਮ੍ਮੋ’’ਤਿ ਵੁਤ੍ਤਤ੍ਤਾ ਤਾਦਿਸਸ੍ਸ ਪਰਲੋਕੋ ਨਾਮ ਦੁਗ੍ਗਤਿ ਏਵਾਤਿ ਆਹ ‘‘ਪਰਮ੍ਹਿ ਅਪਾਯਲੋਕੇ’’ਤਿ.

ਵਿਵਿਧਰੂਪੇਨਾਤਿ ਰੂਪਸਦ੍ਦਾਦਿਵਸੇਨ ਤਤ੍ਥਪਿ ਪਣੀਤਤਰਾਦਿਵਸੇਨ ਬਹੁਵਿਧਰੂਪੇਨ.

ਸਾਮਞ੍ਞਮੇਵਾਤਿ ਸਮਣਭਾਵੋ ਏਵ ਸੇਯ੍ਯੋ. ਏਤ੍ਥ ਚ ਆਦਿਤੋ ਦ੍ਵੀਹਿ ਗਾਥਾਹਿ ਚਤੁਤ੍ਥੋ ਧਮ੍ਮੁਦ੍ਦੇਸੋ ਅਨੁਗੀਤੋ. ਚਤੁਤ੍ਥਗਾਥਾਯ ਤਤਿਯੋ. ਪਞ੍ਚਮਗਾਥਾਯ ਦੁਤਿਯੋ. ਛਟ੍ਠਗਾਥਾਯ ਦੁਤਿਯਤਤਿਯਾ. ਸਤ੍ਤਮਗਾਥਾਯ ਪਠਮੋ ਧਮ੍ਮੁਦ੍ਦੇਸੋ ਅਨੁਗੀਤੋ, ਅਟ੍ਠਮਾਦੀਹਿ ਪਵਤ੍ਤਿਨਿਵਤ੍ਤੀਸੁ ਕਾਮੇਸੁ ਨੇਕ੍ਖਮ੍ਮੇ ਚ ਯਥਾਰਹਂ ਆਦੀਨਵਾਨਿਸਂਸਂ ਵਿਭਾਵੇਤ੍ਵਾ ਅਤ੍ਤਨੋ ਪਬ੍ਬਜ੍ਜਕਾਰਣਂ ਪਰਮਤੋ ਦਸ੍ਸੇਨ੍ਤੋ ਯਥਾਵੁਤ੍ਤਧਮ੍ਮੁਦ੍ਦੇਸਂ ਨਿਗਮੇਤਿ, ਤੇਨ ਵੁਤ੍ਤਂ ‘‘ਤਾ ਪਨ ਗਾਥਾ ਧਮ੍ਮੁਦ੍ਦੇਸਾਨਂ ਦੇਸਨਾਨੁਪੁਬ੍ਬਿਂ ਅਨਾਦਿਯਿਤ੍ਵਾਪਿ ਯਥਾਰਹਂ ਸਙ੍ਗਣ੍ਹਨਵਸੇਨ ਅਨੁਗੀਤਾ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਰਟ੍ਠਪਾਲਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੩. ਮਘਦੇਵਸੁਤ੍ਤਵਣ੍ਣਨਾ

੩੦੮. ਪੁਬ੍ਬੇ ਮਘਦੇਵੋ ਨਾਮ ਰਾਜਾਤਿ ਅਤੀਤਕਾਲੇ ਇਮਸ੍ਮਿਂਯੇਵ ਕਪ੍ਪੇ ਅਨੇਕਵਸ੍ਸਸਹਸ੍ਸਾਯੁਕੇਸੁ ਮਨੁਸ੍ਸੇਸੁ ਪਟਿਪਾਟਿਯਾ ਉਪ੍ਪਨ੍ਨਾਨਂ ਚਤੁਰਾਸੀਤਿਸਹਸ੍ਸਾਨਂ ਚਕ੍ਕਵਤ੍ਤਿਰਾਜੂਨਂ ਆਦਿਪੁਰਿਸੋ ਮਘਦੇਵੋਤਿ ਏਵਂਨਾਮੋ ਰਾਜਾ.

ਧਮ੍ਮੋਤਿ ਰਾਜਧਮ੍ਮੋਤਿ ਲੋਕਿਕਾ ਵਦਨ੍ਤਿ. ਮਹਾਬੋਧਿਨਿਧਾਨਪਾਰਮਿਤਾਸਙ੍ਖਾਤੋ ਪਨ ਧਮ੍ਮੋ ਅਤ੍ਥੀਤਿ ਧਮ੍ਮਿਕੋ. ਧਮ੍ਮੇਨਾਤਿ ਞਾਯੇਨ. ਤਦਾ ਬ੍ਰਹ੍ਮਵਿਹਾਰਾਦਿਭਾਵਨਾਧਮ੍ਮਸ੍ਸ ਰਞ੍ਞੋ ਅਨਧਿਗਤਤ੍ਤਾ ਤਸ੍ਸਪਿ ਵਾ ਅਨਭਿਜ੍ਝਾਦੀਹਿ ਸਮਾਨਯੋਗਕ੍ਖਮਤ੍ਤਾ ਵੁਤ੍ਤਂ ‘‘ਦਸਕੁਸਲਕਮ੍ਮਪਥੇ ਠਿਤੋ’’ਤਿ. ਧਮ੍ਮਨ੍ਤਿ ਧਮ੍ਮਤੋ ਅਨਪੇਤਂ. ਤਥਾ ਹਿ ਚ ਸੋ ਪਕ੍ਖਪਾਤਾਭਾਵਤੋ ‘‘ਸਮੋ’’ਤਿ ਵੁਚ੍ਚਤੀਤਿ ਆਹ ‘‘ਸਮਂ ਚਰਤੀ’’ਤਿ. ਪਕਤਿਨਿਯਾਮੇਨੇਵਾਤਿ ਪਵੇਣਿਯਾ ਆਗਤਨਿਯਾਮੇਨੇਵ. ਯਸ੍ਮਾ ਨਿਗਮਜਨਪਦੇਸੁ ਯੇਭੁਯ੍ਯੇਨ ਗਹਪਤੀਨਂ ਸਙ੍ਗਹੋ, ਤਸ੍ਮਾ ਅਟ੍ਠਕਥਾਯਂ ‘‘ਗਹਪਤਿਕਾਨ’’ਨ੍ਤ੍ਵੇਵ ਵੁਤ੍ਤਂ. ਪਾਲ਼ਿਯਂ ਪਨ ਅਞ੍ਞਮੇਵ ਨਾਗਰਚਾਰਿਤ੍ਤਂ, ਅਞ੍ਞਂ ਨੇਗਮਜਨਪਦਚਾਰਿਤ੍ਤਨ੍ਤਿ ਤੇ ਵਿਸੁਂ ਗਹਿਤਾ ‘‘ਨੇਗਮੇਸੁ ਚੇਵ ਜਨਪਦੇਸੁ ਚਾ’’ਤਿ. ਪਚ੍ਚੁਗ੍ਗਮਨਨਿਗ੍ਗਮਨਵਸੇਨ ਉਪੋਸਥਸ੍ਸ ਪਟਿਹਰਣਂ ਪਾਟਿਹਾਰਿਯੋ, ਸੋ ਏਵ ਪਾਟਿਹਾਰਿਕੋ, ਪਕ੍ਖੋ. ਇਮੇ ਦਿਵਸਾਤਿ ਇਮੇ ਚਤ੍ਤਾਰੋ ਦਿਵਸਾ.

੩੦੯. ਦੇਵੋਤਿ ਮਚ੍ਚੁ ਅਭਿਭਵਨਟ੍ਠੇਨ. ਯਥਾ ਹਿ ਦੇਵੋ ਪਕਤਿਸਤ੍ਤੇ ਅਭਿਭਵਤਿ, ਏਵਂ ਮਚ੍ਚੁ ਸਤ੍ਤੇ ਅਭਿਭਵਤਿ. ‘‘ਅਹਂ ਅਸੁਕਂ ਮਦ੍ਦਿਤੁਂ ਆਗਮਿਸ੍ਸਾਮਿ, ਤ੍ਵਂ ਤਸ੍ਸ ਕੇਸੇ ਗਹੇਤ੍ਵਾ ਮਾ ਵਿਸ੍ਸਜ੍ਜੇਹੀ’’ਤਿ ਮਚ੍ਚੁਦੇਵਸ੍ਸ ਆਣਾਕਰਾ ਦੂਤਾ ਵਿਯਾਤਿ ਦੂਤਾਤਿ ਵੁਚ੍ਚਨ੍ਤਿ. ਅਲਙ੍ਕਤਪਟਿਯਤ੍ਤਾਯਾਤਿ ਇਦਂ ਅਤ੍ਤਨੋ ਦਿਬ੍ਬਾਨੁਭਾਵਂ ਆਵਿਕਤ੍ਵਾ ਠਿਤਾਯਾਤਿ ਦਸ੍ਸੇਤੁਂ ਵੁਤ੍ਤਂ. ਦੇਵਤਾਬ੍ਯਾਕਰਣਸਦਿਸਮੇਵ ਹੋਤਿ ਨ ਚਿਰੇਨੇਵ ਮਰਣਸਮ੍ਭਵਤੋ. ਵਿਸੁਦ੍ਧਿਦੇਵਾਨਨ੍ਤਿ ਖੀਣਾਸਵਬ੍ਰਹ੍ਮਾਨਂ. ਤੇ ਹਿ ਚਰਿਮਭਵੇ ਬੋਧਿਸਤ੍ਤਾਨਂ ਜਿਣ੍ਣਾਦਿਕੇ ਦਸ੍ਸੇਨ੍ਤਿ.

ਦੁਖਿਤਞ੍ਚ ਬ੍ਯਾਧਿਤਨ੍ਤਿ ਬ੍ਯਾਧਿਭਾਵੇਨ ਸਞ੍ਜਾਤਦੁਕ੍ਖਨ੍ਤਿ ਅਤ੍ਥੋ. ਅਨ੍ਤਿਮਭਵਿਕਬੋਧਿਸਤ੍ਤਾਨਂ ਵਿਸੁਦ੍ਧਿਦੇਵੇਹਿ ਉਪਟ੍ਠਾਪਿਤਭਾਵਂ ਉਪਾਦਾਯ ਤਦਞ੍ਞੇਸਂ ਤੇਹਿ ਅਨੁਪਟ੍ਠਾਪਿਤਾਨਮ੍ਪਿ ਪਣ੍ਡਿਤਾਨਂ ਤਥਾ ਵੋਹਰਿਤਬ੍ਬਤਾ ਪਰਿਯਾਯਸਿਦ੍ਧਾਤਿ ਆਹ ‘‘ਇਮਿਨਾ ਪਰਿਯਾਯੇਨਾ’’ਤਿ.

ਦਿਸਮ੍ਪਤੀਤਿ ਵਿਭਤ੍ਤਿਅਲੋਪੇਨ ਨਿਦ੍ਦੇਸੋ, ਦਿਸਾਸੀਸੇਨ ਦੇਸਾ ਵੁਤ੍ਤਾਤਿ ਦੇਸਾਨਂ ਅਧਿਪਤਿਰਾਜਾਤਿ ਅਤ੍ਥੋ. ਉਤ੍ਤਮਙ੍ਗੇ ਸਿਰਸਿ ਰੁਹਨ੍ਤੀਤਿ ਉਤ੍ਤਮਙ੍ਗਰੁਹਾ, ਕੇਸਾ. ਤੇ ਪਨੇਤ੍ਥ ਯਸ੍ਮਾ ਪਲਿਤਤ੍ਤਾ ਅਵਿਸੇਸਤੋ ਸਬ੍ਬਪਚ੍ਛਿਮਵਯਸਨ੍ਦਸ੍ਸਕਾ ਹੋਨ੍ਤਿ, ਤਸ੍ਮਾ ‘‘ਵਯੋਹਰਾ’’ਤਿ ਵੁਤ੍ਤਾ.

ਪੁਰਿਸਯੁਗੋ ਯਸ੍ਮਾ ਤਸ੍ਮਿਂ ਵਂਸੇ ਸਞ੍ਜਾਤਪੁਰਿਸਟ੍ਠਿਤਿਯਾ ਪਰਿਚ੍ਛਿਨ੍ਨੋ, ਤਸ੍ਮਾ ਆਹ ‘‘ਵਂਸਸਮ੍ਭਵੇ ਪੁਰਿਸੇ’’ਤਿ. ਰਾਜਗੇਹਤੋ ਆਹਟਭਿਕ੍ਖਾਯ ਯਾਪੇਨ੍ਤੋਤਿ ਇਮਿਨਾ ਕੁਮਾਰਕਪਬ੍ਬਜ੍ਜਾਯ ਉਪਗਤਭਾਵਂ ਦਸ੍ਸੇਤਿ.

ਪਰਿਹਰਿਯਮਾਨੋਵਾਤਿ ਅਞ੍ਞੇਨ ਅਞ੍ਞੇਨ ਪਰਿਹਰਿਯਮਾਨੋ ਵਿਯ ਵੇਲਾਯ ਵੇਲਾਯ ਤੇਨ ਮਹਤਾ ਪਰਿਜਨੇਨ ਉਪਟ੍ਠਿਯਮਾਨੋ ਕੁਮਾਰਕੀਲ਼ਂ ਕੀਲ਼ੀਤਿ ਅਤ੍ਥੋ. ਕੇਚਿ ਪਨ ‘‘ਪਰਿਹਰਿਯਮਾਨੋ ਏਵਾ’’ਤਿ ਅਵਧਾਰਣਵਸੇਨ ਅਤ੍ਥਂ ਵਦਨ੍ਤਿ, ਤਥਾ ਸਤਿ ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਥਞ੍ਞਪਾਯੀ ਤਰੁਣਦਾਰਕੋ ਅਹੋਸੀਤਿ ਆਪਜ੍ਜਤੀਤਿ ਤਦਯੁਤ੍ਤਂ. ਕੁਮਾਰਕਾਲਂ ਵਤ੍ਵਾ ਤਦਨਨ੍ਤਰਂ ਓਪਰਜ੍ਜਵਚਨਤੋ ਵਿਰੁਦ੍ਧਞ੍ਚੇਤਂ. (ਪਞ੍ਚਮਙ੍ਗਲਵਚਨੇਨ ਉਨ੍ਨਙ੍ਗਲਮਙ੍ਗਲਉਕ੍ਕਨ੍ਤਨਮਙ੍ਗਲਕਮ੍ਮਹਾਯਮਙ੍ਗਲਦੁਸ੍ਸਮਙ੍ਗਲਾਨਿ ਸਮੁਪਗਤਾਨਿ ਏਵ ਅਹੇਸੁਨ੍ਤਿ ਦਟ੍ਠਬ੍ਬਂ).

੩੧੧. ਸਵਂਸਵਸੇਨ ਆਗਤਾ ਪੁਤ੍ਤਨਤ੍ਤੁਆਦਯੋ ਪੁਤ੍ਤਾ ਚ ਪਪੁਤ੍ਤਾ ਚ ਏਤਿਸ੍ਸਾਤਿ ਪੁਤ੍ਤਪਪੁਤ੍ਤਕਾ ਪਰਮ੍ਪਰਾ. ਨਿਹਤਨ੍ਤਿ ਨਿਹਿਤਂ ਠਪਿਤਂ, ਪਵਤ੍ਤਿਤਨ੍ਤਿ ਅਤ੍ਥੋ. ਨਿਹਤਨ੍ਤਿ ਵਾ ਸਤਤਂ ਪਤਿਟ੍ਠਿਤਭਾਵੇਨ ਵਲ਼ਞ੍ਜਿਤਨ੍ਤਿ ਅਤ੍ਥੋ. ਤੇਨਾਹ ‘‘ਕਲ੍ਯਾਣਵਤ੍ਤ’’ਨ੍ਤਿ. ਅਤਿਰੇਕਤਰਾ ਦ੍ਵੇ ਗੁਣਾਤਿ ਮਹਾਸਤ੍ਤਸ੍ਸ ਮਘਦੇਵਕਾਲਤੋ ਅਤਿਰੇਕਤਰਾ ਦ੍ਵੇ ਗੁਣਾ ਇਤਰਰਾਜੂਹਿ ਪਨ ਅਤਿਰੇਕਤਰਾ ਅਨੇਕਸਤਸਹਸ੍ਸਪ੍ਪਭੇਦਾ ਏਵ ਗੁਣਾ ਅਹੇਸੁਨ੍ਤਿ.

੩੧੨. ਤੇਤ੍ਤਿਂਸ ਸਹਪੁਞ੍ਞਕਾਰਿਨੋ ਏਤ੍ਥ ਨਿਬ੍ਬਤ੍ਤਾਤਿ ਤਂਸਹਚਰਿਤਟ੍ਠਾਨਂ ਤੇਤ੍ਤਿਂਸਂ, ਤਦੇਵ ਤਾਵਤਿਂਸਂ, ਤਂਨਿਵਾਸੋ ਏਤੇਸਨ੍ਤਿ ਤਾਵਤਿਂਸਾ. ਨਿਵਾਸਭਾਵੋ ਚ ਤੇਸਂ ਤਤ੍ਥ ਨਿਬ੍ਬਤ੍ਤਨਪੁਬ੍ਬਕੋਤਿ ਆਹ – ‘‘ਦੇਵਾਨਂ ਤਾਵਤਿਂਸਾਨਨ੍ਤਿ ਤਾਵਤਿਂਸਭਵਨੇ ਨਿਬ੍ਬਤ੍ਤਦੇਵਾਨ’’ਨ੍ਤਿ. ਰਞ੍ਞੋਤਿ ਨਿਮਿਮਹਾਰਾਜਸ੍ਸ. ਓਵਾਦੇ ਠਤ੍ਵਾਤਿ ‘‘ਸੀਲਂ ਅਰਕ੍ਖਨ੍ਤੋ ਮਮ ਸਨ੍ਤਿਕਂ ਮਾ ਆਗਚ੍ਛਤੂ’’ਤਿ ਨਿਗ੍ਗਣ੍ਹਨਵਸੇਨਪਿ, ‘‘ਏਕਨ੍ਤਤੋ ਮਮ ਵਿਜਿਤੇ ਵਸਨ੍ਤੇਨ ਸੀਲਂ ਰਕ੍ਖਿਤਬ੍ਬ’’ਨ੍ਤਿ ਏਵਂ ਪਵਤ੍ਤਿਤਓਵਾਦਵਸੇਨਪਿ ਓਵਾਦੇ ਠਤ੍ਵਾ.

ਅਥ ਨਨ੍ਤਿ ਮਹਾਜੁਤਿਕਂ ਮਹਾਵਿਪ੍ਫਾਰਂ ਮਹਾਨੁਭਾਵਂ ਨਿਮਿਰਾਜਾਨਂ. ‘‘ਸਕ੍ਕੋਹਮਸ੍ਮਿ ਦੇਵਿਨ੍ਦੋ, ਤਵ ਸਨ੍ਤਿਕਮਾਗਤੋ’’ਤਿ ਅਤ੍ਤਨੋ ਸਕ੍ਕਭਾਵਂ ਪਵੇਦੇਤ੍ਵਾ ‘‘ਕਙ੍ਖਂ ਤੇ ਪਟਿਵਿਨੋਦੇਸ੍ਸਾਮੀ’’ਤਿ ਆਹ. ਤੇਨਾਹ ‘‘ਸਬ੍ਬਭੂਤਾਨਮਿਸ੍ਸਰਾ’’ਤਿਆਦਿ.

ਸੀਲਂ ਉਪਾਦਾਯ ਓਮਕਤਾਯ ‘‘ਕਿ’’ਨ੍ਤਿ ਹੀਲ਼ੇਨ੍ਤੋ ਵਦਤਿ. ਗੁਣਵਿਸਿਟ੍ਠਤਾਯਾਤਿ ਲਾਭਯਸਾਦੀਨਞ੍ਚੇਵ ਪਿਯਮਨਾਪਤਾਦੀਨਞ੍ਚ ਆਸਵਕ੍ਖਯਪਰਿਯੋਸਾਨਾਨਂ ਨਿਮਿਤ੍ਤਭਾਵੇਨ ਉਤ੍ਤਮਗੁਣਤਾਯ. ਤਦਾ ਸਕ੍ਕੋ ਅਨੁਰੁਦ੍ਧਤ੍ਥੇਰੋ, ਸੋ ਅਤ੍ਤਨੋ ਪੁਰਿਮਜਾਤਿਯਂ ਪਚ੍ਚਕ੍ਖਸਿਦ੍ਧਂਵ ਦਾਨਤੋ ਸੀਲਂ ਮਹਨ੍ਤਂ ਵਿਭਾਵੇਨ੍ਤੋ ‘‘ਅਹਞ੍ਹੀ’’ਤਿਆਦਿਮਾਹ. ਤਤ੍ਥ ਅਤ੍ਤਨਾ ਵਸਿਯਮਾਨਂ ਕਾਮਾਵਚਰਦੇਵਲੋਕਂ ਸਨ੍ਧਾਯ ‘‘ਪੇਤ੍ਤਿਵਿਸਯਤੋ’’ਤਿ ਵੁਤ੍ਤਂ. ਤਸ੍ਸ ਹਿ ਕਪ੍ਪਸਤਸਹਸ੍ਸਂ ਵਿਵਟ੍ਟਜ੍ਝਾਸਯਸ੍ਸ ਪੂਰਿਤਪਾਰਮਿਸ੍ਸ ਦੇਵਲੋਕੋ ਪੇਤਲੋਕੋ ਵਿਯ ਉਪਟ੍ਠਾਸਿ. ਤੇਨੇਵਾਹ ‘‘ਅਚ੍ਛਰਾਗਣਸਙ੍ਘੁਟ੍ਠਂ, ਪਿਸਾਚਗਣਸੇਵਿਤ’’ਨ੍ਤਿ (ਸਂ. ਨਿ. ੧.੪੬).

ਖਤ੍ਤਿਯੇਤਿ ਖਤ੍ਤਿਯਜਾਤਿਯਂ. ਵਿਸੁਜ੍ਝਤੀਤਿ ਬ੍ਰਹ੍ਮਲੋਕੂਪਪਤ੍ਤਿਂ ਸਨ੍ਧਾਯ ਵਦਤਿ ਕਾਮਸਂਕਿਲੇਸਵਿਸੁਜ੍ਝਨਤੋ. ਕਾਯਾਤਿ ਚ ਬ੍ਰਹ੍ਮਕਾਯਮਾਹ.

ਇਮਸ੍ਸ ਮਮ ਅਦਿਟ੍ਠਪੁਬ੍ਬਰੂਪਂ ਦਿਸ੍ਵਾ ‘‘ਅਹੁਦੇਵ ਭਯ’’ਨ੍ਤਿ ਚਿਨ੍ਤੇਤ੍ਵਾ ਆਹ ‘‘ਅਵਿਕਮ੍ਪਮਾਨੋ’’ਤਿ. ਭਾਯਨ੍ਤੋ ਹਿ ਚਿਤ੍ਤਸ੍ਸ ਅਞ੍ਞਥਤ੍ਤੇਨ ਕਾਯਸ੍ਸ ਚ ਛਮ੍ਭਿਤਤ੍ਤੇਨ ਵਿਕਮ੍ਪਤਿ ਨਾਮ. ਤੇਨਾਹ ‘‘ਅਭਾਯਮਾਨੋ’’ਤਿ. ਸੁਖਂ ਕਥੇਤੁਂ ਹੋਤੀਤਿ ਪੁਞ੍ਞਫਲਂ ਕਥੇਤੁਂ ਸੁਖਂ ਹੋਤਿ.

੩੧੩. ਮਨਂ ਆਗਮ੍ਮ ਯੁਤ੍ਤਾਯੇਵ ਹੋਨ੍ਤੀਤਿ ਮਾਤਲਿਸ੍ਸ ਸਕ੍ਕਸ੍ਸੇਵ ਚਿਤ੍ਤਂ ਜਾਨਿਤ੍ਵਾ ਯੁਤ੍ਤਾ ਵਿਯ ਹੋਨ੍ਤਿ, ਰਥੇ ਯੁਤ੍ਤਆਜਾਨੀਯਕਿਚ੍ਚਂ ਕਰੋਨ੍ਤਿ ਦੇਵਪੁਤ੍ਤਾ. ਏਵਂ ਤਾਦਿਸੇ ਕਾਲੇ ਤਥਾ ਪਟਿਪਜ੍ਜਨ੍ਤਿ, ਯਥਾ ਏਰਾਵਣੋ ਦੇਵਪੁਤ੍ਤੋ ਹਤ੍ਥਿਕਿਚ੍ਚਂ. ਨਦ੍ਧਿਤੋ ਪਟ੍ਠਾਯਾਤਿ ਰਥਪਞ੍ਜਰਪਰਿਯਨ੍ਤੇਨ ਅਕ੍ਖਸ੍ਸ ਸਮ੍ਬਨ੍ਧਟ੍ਠਾਨਂ ਨਦ੍ਧੀ, ਤਤੋ ਪਟ੍ਠਾਯ. ਅਕ੍ਖੋ ਬਜ੍ਝਤਿ ਏਤ੍ਥਾਤਿ ਅਕ੍ਖਬਦ੍ਧੋ, ਅਕ੍ਖੇਨ ਰਥਸ੍ਸ ਬਦ੍ਧਟ੍ਠਾਨਂ. ਯਥਾ ਦੇਵਲੋਕਤੋ ਯਾਵ ਚਨ੍ਦਮਣ੍ਡਲਸ੍ਸ ਗਮਨਵੀਥਿ, ਤਾਵ ਅਤ੍ਤਨੋ ਆਨੁਭਾਵੇਨ ਹੇਟ੍ਠਾਮੁਖਮੇਵ ਰਥਂ ਪੇਸੇਸਿ, ਏਵਂ ਚਨ੍ਦਮਣ੍ਡਲਸ੍ਸ ਗਮਨਵੀਥਿਤੋ ਯਾਵ ਰਞ੍ਞੋ ਪਾਸਾਦੋ, ਤਾਵ ਤਥੇਵ ਪੇਸੇਸਿ. ਦ੍ਵੇ ਮਗ੍ਗੇ ਦਸ੍ਸੇਤ੍ਵਾਤਿ ਪਤੋਦਲਟ੍ਠਿਯਾ ਆਕਾਸਂ ਵਿਲਿਖਨ੍ਤੋ ਵਿਯ ਅਤ੍ਤਨੋ ਆਨੁਭਾਵੇਨ ਨਿਰਯਗਾਮੀ ਦੇਵਲੋਕਗਾਮੀ ਚਾਤਿ ਦ੍ਵੇ ਮਗ੍ਗੇ ਦਸ੍ਸੇਤ੍ਵਾ. ਕਤਮੇਨਾਤਿਆਦਿ ਦੇਸਨਾਮਤ੍ਤਂ, ਯਥਾ ਤੇਨ ਰਥੇਨ ਗਚ੍ਛਨ੍ਤਸ੍ਸ ਨਿਰਯੋ ਦੇਵਲੋਕੋ ਚ ਪਾਕਟਾ ਹੋਨ੍ਤਿ, ਤਥਾ ਕਰਣਂ ਅਧਿਪ੍ਪੇਤਂ.

ਵੁਤ੍ਤਕਾਰਣਮੇਵ ਸਨ੍ਧਾਯਾਹ ਮਹਾਸਤ੍ਤੋ ‘‘ਉਭਯੇਨੇਵ ਮਂ ਮਾਤਲਿ ਨੇਹੀ’’ਤਿ. ਦੁਗ੍ਗਨ੍ਤਿ ਦੁਗ੍ਗਮਂ. ਵੇਤ੍ਤਰਣਿਨ੍ਤਿ ਏਵਂਨਾਮਕਂ ਨਿਰਯਂ. ਕੁਥਿਤਨ੍ਤਿ ਪਕ੍ਕੁਥਿਤਂ ਨਿਪਕ੍ਕਤੇਲਸਦਿਸਜਾਲਂ. ਖਾਰਸਂਯੁਤ੍ਤਨ੍ਤਿ ਖਾਰੋਦਕਸਦਿਸਂ.

ਰਥਂ ਨਿਵਤ੍ਤੇਤ੍ਵਾਤਿ ਨਿਰਯਾਭਿਮੁਖਤੋ ਨਿਵਤ੍ਤੇਤ੍ਵਾ. ਬੀਰਣੀਦੇਵਧੀਤਾਯਾਤਿ ‘‘ਬੀਰਣੀ’’ਤਿ ਏਵਂਨਾਮਿਕਾਯ ਅਚ੍ਛਰਾਯ. ਸੋਣਦਿਨ੍ਨਦੇਵਪੁਤ੍ਤਸ੍ਸਾਤਿ ‘‘ਸੋਣਦਿਨ੍ਨੋ’’ਤਿ ਏਵਂਨਾਮਕਸ੍ਸ ਦੇਵਪੁਤ੍ਤਸ੍ਸ. ਗਣਦੇਵਪੁਤ੍ਤਾਨਨ੍ਤਿ ਗਣਵਸੇਨ ਪੁਞ੍ਞਂ ਕਤ੍ਵਾ ਗਣਵਸੇਨੇਵ ਨਿਬ੍ਬਤ੍ਤਦੇਵਪੁਤ੍ਤਾਨਂ.

ਪਤ੍ਤਕਾਲੇਤਿ ਉਪਕਟ੍ਠਾਯ ਵੇਲਾਯ. ਅਤਿਥਿਨ੍ਤਿ ਪਚ੍ਚੇਕਸਮ੍ਬੁਦ੍ਧਂ. ਕਸ੍ਸਪਸ੍ਸ ਭਗਵਤੋ ਸਾਸਨੇ ਏਕਂ ਖੀਣਾਸਵਤ੍ਥੇਰਨ੍ਤਿਪਿ ਵਦਨ੍ਤਿ. ਮਾਤਾਵ ਪੁਤ੍ਤਂ ਸਕਿਮਾਭਿਨਨ੍ਦੀਤਿ ਯਥਾ ਪਵਾਸਤੋ ਆਗਤਂ ਪੁਤ੍ਤਂ ਮਾਤਾ ਸਕਿਂ ਏਕਵਾਰਂ ਆਗਤਕਾਲੇ ਅਭਿਨਨ੍ਦਤਿ, ਤਥਾ ਨਿਚ੍ਚਕਾਲੇ ਅਭਿਨਨ੍ਦਿ ਸਕ੍ਕਚ੍ਚਂ ਪਰਿਵਿਸਿ. ਸਂਯਮਾ ਸਂਵਿਭਾਗਾਤਿ ਸੀਲਸਂਯਮਾ ਸਂਵਿਭਾਗਸੀਲਾ. ਜਾਤਕੇਤਿ ਨਿਮਿਜਾਤਕੇ.

ਚਿਤ੍ਤਕੂਟਨ੍ਤਿ ਦੇਵਨਗਰਸ੍ਸ ਦਕ੍ਖਿਣਦਿਸਾਯ ਦ੍ਵਾਰਕੋਟ੍ਠਕਂ. ਸਕ੍ਕੋ ਚਿਤ੍ਤਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋਤਿ ਮਹਾਸਤ੍ਤੇ ਪਵਤ੍ਤਂ ਦੇਵਤਾਨਂ ਸਕ੍ਕਾਰਸਮ੍ਮਾਨਂ ਪਟਿਚ੍ਚ ਉਪ੍ਪਨ੍ਨਂ ਅਤ੍ਤਨੋ ਉਸੂਯਚਿਤ੍ਤਂ ਬਹਿ ਅਨਾਵਿਕਤ੍ਵਾ ਅਬ੍ਭਨ੍ਤਰੇਯੇਵ ਚ ਨਂ ਠਪੇਤੁਂ ਅਸਕ੍ਕੋਨ੍ਤੋ. ਅਞ੍ਞੇਸਂ ਪੁਞ੍ਞੇਨ ਵਸਾਹੀਤਿ ਸਕ੍ਕਸ੍ਸ ਮਹਾਸਤ੍ਤਂ ਰੋਸੇਤੁਕਾਮਤਾਯ ਆਰਾਧਨਂ ਨਿਦਸ੍ਸੇਤਿ. ਪੁਰਾਣਸਕ੍ਕੋ ਦੀਘਾਯੁਕੋ, ਤਂ ਉਪਾਦਾਯ ਜਰਾਜਿਣ੍ਣਂ ਵਿਯ ਕਤ੍ਵਾ ‘‘ਜਰਸਕ੍ਕੋ’’ਤਿ ਵੁਤ੍ਤਂ.

੩੧੫. ਸੇਸਂ ਸਬ੍ਬਨ੍ਤਿ ਪਬ੍ਬਜ੍ਜੁਪਗਮਨਾ ਸੇਸਂ ਅਤ੍ਤਨੋ ਵਂਸੇ ਪੋਰਾਣਰਾਜੂਨਂ ਰਾਜਚਾਰਿਤ੍ਤਂ. ਪਾਕਤਿਕਨ੍ਤਿ ਪੁਨ ਸਭਾਵਤ੍ਤਮੇਵ ਗਤੋ ਅਹੋਸਿ, ਅਪਬ੍ਬਜਿਤਭਾਵਵਚਨੇਨੇਵਸ੍ਸ ਬ੍ਰਹ੍ਮਵਿਹਾਰਭਾਵਨਾਦੀਨਂ ਪਬ੍ਬਜ੍ਜਾਗੁਣਾਨਂ ਅਭਾਵੋ ਦੀਪਿਤੋ ਹੋਤਿ.

੩੧੬. ਵੀਰਿਯਂ ਅਕਰੋਨ੍ਤੋ ਸਮੁਚ੍ਛਿਨ੍ਦਤਿ, ਨ ਤਾਵ ਸਮੁਚ੍ਛਿਨ੍ਨਂ, ਕਲ੍ਯਾਣਮਿਤ੍ਤਸਂਸਗ੍ਗਾਦਿਪਚ੍ਚਯਸਮਵਾਯੇ ਸਤਿ ਸੀਲਵਤਂ ਕਲ੍ਯਾਣਵਤ੍ਤਂ ਪਵਤ੍ਤੇਤੁਂ ਸਕ੍ਕੋਤਿ. ਦੁਸ੍ਸੀਲੇਨ ਸਮੁਚ੍ਛਿਨ੍ਨਂ ਨਾਮ ਹੋਤਿ ਤਸ੍ਸ ਤਤ੍ਥ ਨਿਰਾਸਭਾਵੇਨ ਪਟਿਪਤ੍ਤਿਯਾ ਏਵ ਅਸਮ੍ਭਵਤੋ. ਸਤ੍ਤ ਸੇਖਾ ਪਵਤ੍ਤੇਨ੍ਤਿ ਕਲ੍ਯਾਣਵਤ੍ਤਸ੍ਸ ਅਪਰਿਨਿਟ੍ਠਿਤਕਿਚ੍ਚਤ੍ਤਾ. ਖੀਣਾਸਵੇਨ ਪਵਤ੍ਤਿਤਂ ਨਾਮ ਪਰਿਨਿਟ੍ਠਿਤਕਿਚ੍ਚਤ੍ਤਾ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਮਘਦੇਵਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੪. ਮਧੁਰਸੁਤ੍ਤਵਣ੍ਣਨਾ

੩੧੭. ਮਧੁਰਾਯਨ੍ਤਿ ਉਤ੍ਤਰਮਧੁਰਾਯਂ. ਗੁਨ੍ਦਾਵਨੇਤਿ ਕਾਲ਼ਸਿਪ੍ਪਲਿਵਨੇ. ਅਤਿਮੁਤ੍ਤਕਵਨੇਤਿ ਚ ਵਦਨ੍ਤਿ. ਚਤੂਸੁ ਵਣ੍ਣੇਸੁ ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ. ਪਣ੍ਡਰੋਤਿ ਪਰਿਸੁਦ੍ਧੋ. ਕਾਲ਼ਕੋਤਿ ਅਪਰਿਸੁਦ੍ਧੋ. ਜਾਤਿਗੋਤ੍ਤਾਦਿਪਞ੍ਞਾਪਨਟ੍ਠਾਨੇਸੂਤਿ ਜਾਤਿਗੋਤ੍ਤਾਦਿਵਸੇਨ ਸੁਦ੍ਧਚਿਨ੍ਤਾਯਂ ਬ੍ਰਾਹ੍ਮਣਾ ਏਵ ਸੁਦ੍ਧਜਾਤਿਕਾ, ਨ ਇਤਰੇਤਿ ਅਧਿਪ੍ਪਾਯੋ. ਸਂਸਾਰਤੋ ਵਾ ਸੁਦ੍ਧਚਿਨ੍ਤਾਯਂ ਬ੍ਰਾਹ੍ਮਣਾਵ ਸੁਜ੍ਝਨ੍ਤਿ ਵੇਦਵਿਹਿਤਸ੍ਸ ਸੁਦ੍ਧਵਿਧਿਨੋ ਅਞ੍ਞੇਸਂ ਅਵਿਸਯਤ੍ਤਾਤਿ ਅਧਿਪ੍ਪਾਯੋ. ਤਂ ਪਨੇਤਂ ਤੇਸਂ ਵਿਰੁਜ੍ਝਤਿ ਖਤ੍ਤਿਯਵੇਸ੍ਸਾਨਮ੍ਪਿ ਮਨ੍ਤਜ੍ਝੇਨਸ੍ਸ ਅਨੁਞ੍ਞਾਤਤ੍ਤਾ, ਮਨ੍ਤਜ੍ਝੇਨਵਿਧਿਨਾ ਚ ਸਂਸਾਰਸੁਦ੍ਧਿਯਾਭਾਵਤੋ. ਪੁਤ੍ਤਾ ਨਾਮ ਅਨੋਰਸਾਪਿ ਹੋਨ੍ਤਿ, ਨ ਤਥਾ ਇਮੇਤਿ ਆਹ ‘‘ਓਰਸਾ’’ਤਿ. ਉਰੇ ਸਂਵਡ੍ਢਿਤਪੁਤ੍ਤੋਪਿ ‘‘ਓਰਸ’’ਨ੍ਤਿ ਵੁਚ੍ਚਤਿ. ਇਮੇ ਪਨ ਮੁਖਤੋ ਨਿਗ੍ਗਤੋ ਹੁਤ੍ਵਾ ਉਰੇ ਸਂਵਡ੍ਢਾਤਿ ਦਸ੍ਸੇਤੁਂ ‘‘ਓਰਸਾ ਮੁਖਤੋ ਜਾਤਾ’’ਤਿ ਵੁਤ੍ਤਂ. ਤਤੋ ਏਵ ਬ੍ਰਹ੍ਮਤੋ ਜਾਤਾਤਿ ਬ੍ਰਹ੍ਮਜਾ, ਬ੍ਰਹ੍ਮਸਮ੍ਭੂਤਾਪਿ ‘‘ਬ੍ਰਹ੍ਮਜਾ’’ਤਿ ਵੁਚ੍ਚਨ੍ਤਿ, ਨ ਤਥਾ ਇਮੇ. ਇਮੇ ਪਨ ਪਚ੍ਚਕ੍ਖਤੋ ਬ੍ਰਹ੍ਮੁਨਾ ਨਿਮ੍ਮਿਤਾਤਿ ਬ੍ਰਹ੍ਮਨਿਮ੍ਮਿਤਾ, ਤਤੋ ਏਵ ਬ੍ਰਹ੍ਮਤੋ ਲਦ੍ਧਬ੍ਬਵਿਜ੍ਜਾਦਿਦਾਯਜ੍ਜਦਾਯਾਦਾਤਿ ਬ੍ਰਹ੍ਮਦਾਯਾਦਾਤਿ ਸਬ੍ਬਮੇਤਂ ਬ੍ਰਾਹ੍ਮਣਾਨਂ ਕਤ੍ਥਨਾਪਲਾਪਸਦਿਸਂ ਵਿਞ੍ਞੂਨਂ ਅਪ੍ਪਮਾਣਂ ਅਵਿਮਦ੍ਦਕ੍ਖਮਂ ਵਾਚਾਵਤ੍ਥੁਮਤ੍ਤਂ ਬ੍ਰਹ੍ਮਕੁਤ੍ਤਸ੍ਸੇਵ ਅਭਾਵਤੋ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗਵਣ੍ਣਨਾਯਂ ਵੁਤ੍ਤਮੇਵ. ਤੇਨਾਹ ‘‘ਘੋਸੋਯੇਵਾ’’ਤਿਆਦਿ. ਵੋਹਾਰਮਤ੍ਤਮੇਵੇਤਨ੍ਤਿ ਏਤਂ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿਆਦਿ ਵਚਨਮਤ੍ਤਮੇਵ, ਨ ਤਸ੍ਸ ਅਤ੍ਥੋ ਤੇਹਿ ਅਧਿਪ੍ਪੇਤਪ੍ਪਕਾਰੋ ਅਤ੍ਥਿ.

੩੧੮. ਸਮਿਜ੍ਝੇਯ੍ਯਾਤਿ ਦਿਟ੍ਠਿਦੀਪਨਵਸੇਨ ਅਤ੍ਤਨੋ ਅਜ੍ਝਾਸਯੋ ਨਿਪ੍ਫਜ੍ਜੇਯ੍ਯ. ਤੇਨਾਹ ‘‘ਮਨੋਰਥੋ ਪੂਰੇਯ੍ਯਾ’’ਤਿ. ਖਤ੍ਤਿਯੋਪੀਤਿ ਪਰਖਤ੍ਤਿਯੋਪਿ. ਅਸ੍ਸਾਤਿ ਸਮਿਦ੍ਧਧਨਾਦਿਂ ਪਤ੍ਤਸ੍ਸ. ਤੇਨਾਹ – ‘‘ਇਸ੍ਸਰਿਯਸਮ੍ਪਤ੍ਤਸ੍ਸਾ’’ਤਿ ਨੇਸਨ੍ਤਿ ਏਤੇਸਂ ਚਤੁਨ੍ਨਂ ਵਣ੍ਣਾਨਂ ਏਤ੍ਥ ਪੁਬ੍ਬੁਟ੍ਠਾਯਿਭਾਵਾਦਿਨਾ ਇਤਰੇਹਿ ਉਪਚਰਿਤਬ੍ਬਤਾਯ ਨ ਕਿਞ੍ਚਿ ਨਾਨਾਕਰਣਨ੍ਤਿ ਯੋਜਨਾ.

੩੨੨. ਅਹਂ ਚੀਵਰਾਦੀਹਿ ਉਪਟ੍ਠਾਕੋ, ਤੁਮ੍ਹਾਕਂ ਇਚ੍ਛਿਤਚ੍ਛਿਤਕ੍ਖਣੇ ਵਦੇਯ੍ਯਾਥ ਯੇਨਤ੍ਥੋਤਿ ਯੋਜਨਾ. ਚੋਰਾਦਿਉਪਦ੍ਦਵਨਿਸੇਧਨੇਨ ਰਕ੍ਖਾਗੁਤ੍ਤਿ, ਦਾਨਾਦਿਨਿਮਿਤ੍ਤਉਪਦ੍ਦਵਨਿਸੇਧਨੇਨ ਆਵਰਣਗੁਤ੍ਤਿ. ਪਚ੍ਚੁਪ੍ਪਨ੍ਨਾਨਤ੍ਥਨਿਸੇਧਨੇਨ ਵਾ ਰਕ੍ਖਾਗੁਤ੍ਤਿ, ਆਗਾਮਿਅਨਤ੍ਥਨਿਸੇਧਨੇਨ ਆਵਰਣਗੁਤ੍ਤਿ. ਏਤ੍ਥ ਚ ਖਤ੍ਤਿਯਾਦੀਸੁ ਯੋ ਯੋ ਇਸ੍ਸਰੋ, ਤਸ੍ਸ ਇਤਰੇਨ ਅਨੁਵਤ੍ਤੇਤਬ੍ਬਭਾਵੇ, ਕੁਸਲਾਕੁਸਲਕਰਣੇਨ ਨੇਸਂ ਵਸੇਨ ਲਦ੍ਧਬ੍ਬਅਭਿਸਮ੍ਪਰਾਯੇ, ਪਬ੍ਬਜਿਤੇਹਿ ਲਦ੍ਧਬ੍ਬਸਾਮੀਚਿਕਿਰਿਯਾਯ ਚ ਅਣੁਮਤ੍ਤੋਪਿ ਵਿਸੇਸੋ ਨਤ੍ਥਿ, ਤਸ੍ਮਾ ਸੋ ਵਿਸੇਸਾਭਾਵੋ ਪਾਲ਼ਿਯਂ ਤਤ੍ਥ ਤਤ੍ਥ ਵਾਰੇ ‘‘ਏਵਂ ਸਨ੍ਤੇ’’ਤਿਆਦਿਨਾ ਵਿਭਾਵਿਤੋ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਮਧੁਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੫. ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾ

੩੨੪. ਓਲੋਕਨਕਪਦੁਮਨ੍ਤਿ ਲੀਲਾਅਰਵਿਨ੍ਦਂ. ਤਸ੍ਮਾਤਿ ਕੋਕਨਦਸਣ੍ਠਾਨਤ੍ਤਾ ਕੋਕਨਦੋਤਿ ਸਙ੍ਖਂ ਲਭਿ.

੩੨੫. ਯਾਵ ਪਚ੍ਛਿਮ…ਪੇ… ਫਲਕਂ ਵੁਤ੍ਤਂ ਤਸ੍ਸ ਸਬ੍ਬਪਚ੍ਛਾ ਸਨ੍ਥਤਤ੍ਤਾ. ਉਪਰਿਮਫਲਗਤਞ੍ਹਿ ਸੋਪਾਨਮਤ੍ਥਕਂ. ਓਲੋਕਨਤ੍ਥਂਯੇਵਾਤਿ ਨ ਕੇਵਲਂ ਭਗਵਤੋ ਆਗਮਨਞ੍ਞੇਵ ਓਲੋਕਨਤ੍ਥਂ, ਅਥ ਖੋ ਅਤ੍ਤਨੋ ਪਤ੍ਥਨਾਯ ਸਨ੍ਥਰਾਪਿਤਾਯ ਚੇਲਪਟਿਕਾਯ ਅਕ੍ਕਮਨਸ੍ਸਪਿ.

ਸਕੁਣਪੋਤਕੇਤਿ ਕਾਦਮ੍ਬਟਿਟ੍ਟਿਭਪੁਤ੍ਤਕੇ. ਅਞ੍ਞੋਵ ਭਵੇਯ੍ਯਾਤਿ ਤਸ੍ਮਿਂ ਅਤ੍ਤਭਾਵੇ ਮਾਤੁਗਾਮਤੋ ਅਞ੍ਞੋ ਇਦਾਨਿ ਭਰਿਯਾਭੂਤੋ ਮਾਤੁਗਾਮੋ ਭਵੇਯ੍ਯ. ਪੁਤ੍ਤਂ ਲਭੇਯ੍ਯਾਤਿ ਅਤ੍ਤਨੋ ਕਮ੍ਮਵਸੇਨ ਪੁਤ੍ਤਂ, ਨੋ ਤਸ੍ਸ. ਉਭੋਹੀਤਿ ਇਮੇਹਿ ਏਵ ਉਭੋਹਿ. ਇਮੇਹਿ ਕਾਰਣੇਹੀਤਿ ਤਸ੍ਸ ਰਾਜਕੁਮਾਰਸ੍ਸ ਬੁਦ੍ਧਂ ਪਟਿਚ੍ਚ ਮਿਚ੍ਛਾਗਹਣਂ, ਤਿਤ੍ਥਿਯਾਨਂ ਉਜ੍ਝਾਯਨਂ, ਅਨਾਗਤੇ ਮਨੁਸ੍ਸਾਨਂ ਭਿਕ੍ਖੂਨਂ ਉਦ੍ਦਿਸ੍ਸ ਵਿਪ੍ਪਟਿਸਾਰੋਤਿ ਇਮੇਹਿ ਤੀਹਿ ਕਾਰਣੇਹਿ. ਪਞ੍ਞਤ੍ਤਨ੍ਤਿ ਸਨ੍ਥਤਂ ਚੇਲਪਟਿਕਂ. ਮਙ੍ਗਲਂ ਇਚ੍ਛਨ੍ਤੀਤਿ ਮਙ੍ਗਲਿਕਾ.

੩੨੬. ਤਤਿਯਂ ਕਾਰਣਨ੍ਤਿ ਇਮਿਨਾ ਭਿਕ੍ਖੂਸੁ ਵਿਪ੍ਪਟਿਸਾਰਾਨੁਪ੍ਪਾਦਨਮਾਹ. ਯਂ ਕਿਞ੍ਚਿ ਪਰਿਭੁਞ੍ਜਨ-ਸੁਖਂ ਕਾਮਸੁਖਲ੍ਲਿਕਾਨੁਯੋਗੋਤਿ ਅਧਿਪ੍ਪਾਯੇਨ ਕਾਮਸੁਖਲ੍ਲਿਕਾਨੁਯੋਗਸਞ੍ਞੀ ਹੁਤ੍ਵਾ…ਪੇ… ਮਞ੍ਞਮਾਨੋ ਏਵਮਾਹ.

੩੨੭. ਅਥ ਨਂ ਭਗਵਾ ਤਤੋ ਮਿਚ੍ਛਾਭਿਨਿਵੇਸਤੋ ਵਿਵੇਚੇਤੁਕਾਮੋ ‘‘ਸੋ ਖੋ ਅਹ’’ਨ੍ਤਿਆਦਿਨਾ ਅਤ੍ਤਨੋ ਦੁਕ੍ਕਰਚਰਿਯਂ ਦਸ੍ਸੇਤੁਂ ਆਰਭਿ. ਮਹਾਸਚ੍ਚਕੇ(ਮ. ਨਿ. ੧.੩੬੪ ਆਦਯੋ) ਵੁਤ੍ਤਨਯੇਨੇਵ ਵੇਦਿਤਬ੍ਬਂ ‘‘ਸੋ ਖੋ ਅਹ’’ਨ੍ਤਿਆਦਿਪਾਠਸ੍ਸ ਤਤ੍ਥ ਆਗਤਨਿਯਾਮੇਨੇਵ ਆਗਤਤ੍ਤਾ. ਪਾਸਰਾਸਿਸੁਤ੍ਤੇ (ਮ. ਨਿ. ੧.੨੭੨ ਆਦਯੋ) ਵੁਤ੍ਤਨਯੇਨਾਤਿ ਏਤ੍ਥਾਪਿ ਏਸੇਵ ਨਯੋ.

੩੪੩. ਅਙ੍ਕੁਸਂ ਗਣ੍ਹਨ੍ਤਿ ਏਤੇਨ ਤਸ੍ਸ ਗਹਣੇ ਛੇਕੋ ਹੋਤੀਤਿ ਅਙ੍ਕੁਸਗਹਣਸਿਪ੍ਪਂ. ਮੇਘਉਤੁਨ੍ਤਿ ਮੇਘਂ ਪਟਿਚ੍ਚ ਉਪ੍ਪਨ੍ਨਸੀਤਉਤੁਂ. ਪਬ੍ਬਤਉਤੁਨ੍ਤਿ ਪਬ੍ਬਤਂ ਪਟਿਚ੍ਚ ਉਣ੍ਹਉਤੁਂ. ਉਭਯਵਸੇਨ ਚ ਤਸ੍ਸ ਤਥਾ ਸੀਤੁਣ੍ਹਉਤੁਤੋ ਏਨੋ ਆਗਤੋਤਿ ਤ-ਕਾਰਸ੍ਸ ਦ-ਕਾਰਂ ਕਤ੍ਵਾ ਉਦੇਨੋਤਿ ਨਾਮਂ ਅਕਾਸਿ.

ਤਾਪਸੋ ਓਗਾਲ਼੍ਹਞਾਣਵਸੇਨ ਰਞ੍ਞੋ ਮਤਭਾਵਂ ਞਤ੍ਵਾ. ਆਦਿਤੋ ਪਟ੍ਠਾਯਾਤਿ ਕੋਸਮ੍ਬਿਨਗਰੇ ਪਰਨ੍ਤਪਰਞ੍ਞੋ ਅਗ੍ਗਮਹੇਸਿਭਾਵਤੋ ਪਟ੍ਠਾਯ. ਪੁਬ੍ਬੇਤਿ ਸੀਲਵਨ੍ਤਕਾਲੇ. ਹਤ੍ਥਿਗਨ੍ਥਨ੍ਤਿ ਹਤ੍ਥੀਨਂ ਅਤ੍ਤਨੋ ਵਸੇ ਵਤ੍ਤਾਪਨਸਤ੍ਥਂ. ਤੇਨੇਵਸ੍ਸ ਤਂ ਸਿਕ੍ਖਾਪੇਤਿ, ਕਿਚ੍ਚਞ੍ਚ ਇਜ੍ਝਤਿ.

੩੪੪. ਪਦਹਨਭਾਵੋਤਿ ਭਾਵਨਾਨੁਯੋਗੋ. ਪਧਾਨੇ ਵਾ ਨਿਯੁਤ੍ਤੋ ਪਧਾਨਿਯੋ, ਪਧਾਨਿਯਸ੍ਸ ਭਿਕ੍ਖੁਨੋ, ਤਸ੍ਸੇਵ ਪਧਾਨਿਯਭਾਵਸ੍ਸ ਅਙ੍ਗਾਨਿ ਕਾਰਣਾਨਿ ਪਧਾਨਿਯਙ੍ਗਾਨਿ. ਸਦ੍ਧਾ ਏਤਸ੍ਸ ਅਤ੍ਥੀਤਿ ਸਦ੍ਧੋ. ਕਿਞ੍ਚਾਪਿ ਪਚ੍ਚੇਕਬੋਧਿਸਤ੍ਤਾਨਮ੍ਪਿ ਅਭਿਨੀਹਾਰਤੋ ਪਟ੍ਠਾਯ ਆਗਤਾ ਆਗਮਨਸਦ੍ਧਾ ਏਵ, ਮਹਾਬੋਧਿਸਤ੍ਤਾਨਂ ਪਨ ਸਦ੍ਧਾ ਗਰੁਤਰਾਤਿ ਸਾ ਏਵ ਗਹਿਤਾ. ਅਚਲਭਾਵੇਨ ਓਕਪ੍ਪਨਂ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਖ੍ਯਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਕੇਨਚਿ ਅਕਮ੍ਪਿਯਭਾਵੇਨ ਰਤਨਤ੍ਤਯਗੁਣੇ ਓਗਾਹਿਤ੍ਵਾ ਕਪ੍ਪਨਂ. ਪਸਾਦੁਪ੍ਪਤ੍ਤਿ ਰਤਨਤ੍ਤਯੇ ਪਸੀਦਨਮੇਵ. ਬੋਧਿਨ੍ਤਿ ਚਤੁਮਗ੍ਗਞਾਣਨ੍ਤਿ ਵੁਤ੍ਤਂ ਤਂਨਿਮਿਤ੍ਤਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ, ਬੋਧੀਤਿ ਵਾ ਸਮ੍ਮਾਸਮ੍ਬੋਧਿ. ਸਬ੍ਬਞ੍ਞੁਤਞ੍ਞਾਣਪਦਟ੍ਠਾਨਞ੍ਹਿ ਮਗ੍ਗਞਾਣਂ, ਮਗ੍ਗਞਾਣਪਦਟ੍ਠਾਨਞ੍ਚ ਸਬ੍ਬਞ੍ਞੁਤਞ੍ਞਾਣਂ ‘‘ਸਮ੍ਮਾਸਮ੍ਬੋਧੀ’’ਤਿ ਵੁਚ੍ਚਤਿ. ਨਿਚ੍ਛਿਤਸੁਬੁਦ੍ਧਤਾਯ ਧਮ੍ਮਸ੍ਸ ਸੁਧਮ੍ਮਤਾ ਸਙ੍ਘਸ੍ਸ ਸੁਪ੍ਪਟਿਪਤ੍ਤਿ ਵਿਨਿਚ੍ਛਿਤਾ ਏਵ ਹੋਤੀਤਿ ਆਹ ‘‘ਦੇਸਨਾਸੀਸਮੇਵ ਚੇਤ’’ਨ੍ਤਿਆਦਿ. ਤਸ੍ਸ ਪਧਾਨਂ ਵੀਰਿਯਂ ਇਜ੍ਝਤਿ ਰਤਨਤ੍ਤਯਸਦ੍ਧਾਯ ‘‘ਇਮਾਯ ਪਟਿਪਦਾਯ ਜਰਾਮਰਣਤੋ ਮੁਚ੍ਚਿਸ੍ਸਾਮੀ’’ਤਿ ਪਧਾਨਾਨੁਯੋਗੇ ਅਵਂਮੁਖਸਮ੍ਭਵਤੋ.

ਅਪ੍ਪਾਬਾਧੋਤਿਆਦਿ ਹੇਟ੍ਠਾ ਵੁਤ੍ਤਮੇਵ. ਅਗੁਣਂ ਪਕਾਸੇਤਾ ਆਯਤਿਂ ਸਂਵਰਂ ਆਪਜ੍ਜਿਤਾ ਸਮ੍ਮਾਪਟਿਪਤ੍ਤਿਯਾ ਵਿਸੋਧਨਤ੍ਥਂ. ਉਦਯਞ੍ਚ ਅਤ੍ਥਞ੍ਚ ਗਨ੍ਤੁਨ੍ਤਿ ‘‘ਅਵਿਜ੍ਜਾਸਮੁਦਯਾ’’ਤਿਆਦਿਨਾ ਪਞ੍ਚਨ੍ਨਂ ਉਪਾਦਾਨਕ੍ਖਨ੍ਧਾਨਂ ਉਦਯਞ੍ਚ ਵਯਞ੍ਚ ਜਾਨਿਤੁਂ. ਤੇਨਾਹ ‘‘ਏਤੇਨਾ’’ਤਿਆਦਿ. ਪਰਿਸੁਦ੍ਧਾਯ ਉਪਕ੍ਕਿਲੇਸਵਿਨਿਮੁਤ੍ਤਾਯ. ਨਿਬ੍ਬਿਜ੍ਝਿਤੁਨ੍ਤਿ ਤਦਙ੍ਗਵਸੇਨ ਪਜਹਿਤੁਂ ਸਮੁਚ੍ਛੇਦਪ੍ਪਹਾਨਸ੍ਸ ਪਚ੍ਚਯੋ ਭਵਿਤੁਂ. ਯਂ ਦੁਕ੍ਖਂ ਖੀਯਤੀਤਿ ਕਿਲੇਸੇਸੁ ਅਪ੍ਪਹੀਨੇਸੁ ਤੇਨ ਤਦੁਪਨਿਸ੍ਸਯਕਮ੍ਮਂ ਪਟਿਚ੍ਚ ਯਂ ਦੁਕ੍ਖਂ ਉਪ੍ਪਜ੍ਜੇਯ੍ਯ, ਤਂ ਸਨ੍ਧਾਯ ਵੁਤ੍ਤਂ.

੩੪੫. ਸੇਸਦਿਵਸੇਤਿ ਸਤ੍ਤਦਿਵਸਤੋ ਪਟ੍ਠਾਯ ਯਾਵ ਦ੍ਵੇ ਰਤ੍ਤਿਨ੍ਦਿਵਾ.

੩੪੬. ਕੁਚ੍ਛਿਸਨ੍ਨਿਸ੍ਸਿਤੋ ਗਬ੍ਭੋ ਨਿਸ੍ਸਯਵੋਹਾਰੇਨ ‘‘ਕੁਚ੍ਛੀ’’ਤਿ ਵੁਚ੍ਚਤਿ, ਸੋ ਏਤਿਸ੍ਸਾ ਅਤ੍ਥੀਤਿ ਕੁਚ੍ਛਿਮਤੀ. ਤੇਨਾਹ ‘‘ਆਪਨ੍ਨਸਤ੍ਤਾ’’ਤਿ. ਆਰਕ੍ਖੋ ਪਨਸ੍ਸ ਪਚ੍ਚੁਪਟ੍ਠਿਤੋ ਹੋਤੀਤਿ ਮਾਤਰਾ ਗਹਿਤਸਰਣਂ ਗਬ੍ਭਵੁਟ੍ਠਿਤਸ੍ਸ ਤਸ੍ਸ ਸਰਣਗਮਨਂ ਪਵੇਦਯਿਤਸ੍ਸ ਕੁਸਲਂ ਸਰਣਂ ਨਾਮ, ਮਾਤੁ ਕਤਰਕ੍ਖੋ ਪੁਤ੍ਤਸ੍ਸਪਿ ਪਚ੍ਚੁਪਟ੍ਠਿਤੋਤਿ. ਮਹਲ੍ਲਕਕਾਲੇਤਿ ਵਚਨਤ੍ਥਂ ਜਾਨਨਕਾਲੇ. ਸਾਰੇਨ੍ਤੀਤਿ ਯਥਾਦਿਟ੍ਠਂ ਯਥਾਬਲਂ ਰਤਨਤ੍ਤਯਗੁਣਪਤਿਟ੍ਠਾਪਨਵਸੇਨ ਅਸ੍ਸ ਸਾਰੇਨ੍ਤਿ. ਸਲ੍ਲਕ੍ਖੇਤ੍ਵਾਤਿ ਵੁਤ੍ਤਮਤ੍ਥਂ ਉਪਧਾਰੇਤ੍ਵਾ. ਸਰਣਂ ਗਹਿਤਂ ਨਾਮ ਹੋਤਿ ਰਤਨਤ੍ਤਯਸ੍ਸ ਸਰਣਭਾਵਸਲ੍ਲਕ੍ਖਣਪੁਬ੍ਬਕਤਨ੍ਨਿਨ੍ਨਚਿਤ੍ਤਭਾਵਤੋਵ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਬੋਧਿਰਾਜਕੁਮਾਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੬. ਅਙ੍ਗੁਲਿਮਾਲਸੁਤ੍ਤਵਣ੍ਣਨਾ

੩੪੭. ਅਙ੍ਗੁਲੀਨਂ ਮਾਲਂ ਧਾਰੇਤੀਤਿ ਇਮਿਨਾ ਅਨ੍ਵਤ੍ਥਾ ਤਸ੍ਸ ਸਮਞ੍ਞਾਤਿ ਦਸ੍ਸੇਤਿ. ਤਤ੍ਰਾਤਿ ਤਸ੍ਮਿਂ ਆਚਰਿਯਵਚਨੇਨ ਅਙ੍ਗੁਲਿਮਾਲਸ੍ਸ ਧਾਰਣੇ. ਕਰੀਸਸਹਸ੍ਸਖੇਤ੍ਤੇ ਏਕਸਾਲਿਸੀਸਂ ਵਿਯ ਅਪਞ੍ਞਾਯਮਾਨਸਕਕਿਚ੍ਚੋ ਹੋਤੀਤਿ ਅਧਿਪ੍ਪਾਯੋ. ਤਕ੍ਕਸੀਲਂ ਪੇਸਯਿਂਸੁ ‘‘ਤਾਦਿਸਸ੍ਸ ਆਚਰਿਯਸ੍ਸ ਸਨ੍ਤਿਕੇ ਸਿਪ੍ਪੁਗ੍ਗਹਸਮ੍ਮਾਪਯੋਗੇਨ ਦਿਟ੍ਠਧਮ੍ਮਿਕੇ ਸਮ੍ਪਰਾਯਿਕੇ ਚ ਅਤ੍ਥੇ ਜਾਨਨ੍ਤੋ ਭਾਰਿਯਂ ਨ ਕਰੇਯ੍ਯਾ’’ਤਿ. ਬਾਹਿਰਕਾ ਅਹੇਸੁਂ ਅਹਿਂਸਕਸ੍ਸ ਵਤ੍ਤਸਮ੍ਪਤ੍ਤਿਯਾ ਆਚਰਿਯਸ੍ਸ ਚਿਤ੍ਤਸਭਾਵਤੋ ਨਿਬ੍ਬਤ੍ਤਨਤਿਭਾਵੇਨ. ਸਿਨੇਹੇਨੇਵ ਵਦਨ੍ਤੇਤਿ ਸਿਨੇਹੇਨ ਵਿਯ ਵਦਨ੍ਤੇ.

ਗਣਨਮ੍ਪਿ ਨ ਉਗ੍ਗਣ੍ਹਾਤੀਤਿ ਗਣਨਵਿਧਿਮ੍ਪਿ ਨ ਸਲ੍ਲਕ੍ਖੇਤਿ. ਤਤ੍ਥ ਕਾਰਣਮਾਹ ‘‘ਪਕਤਿਯਾ’’ਤਿਆਦਿਨਾ. ਠਪਿਤਟ੍ਠਾਨੇਤਿ ਰੁਕ੍ਖਗਚ੍ਛਨ੍ਤਰਾਦਿਕੇ ਠਪਿਤਟ੍ਠਾਨੇ ਸਕੁਨ੍ਤਸਿਙ੍ਗਾਲਾਨਂ ਵਸੇਨ ਅਙ੍ਗੁਲਿਯੋ ਵਿਨਸ੍ਸਨ੍ਤਿ. ਭਗ੍ਗਵੋਤਿ ਕੋਸਲਰਞ੍ਞੋ ਪੁਰੋਹਿਤਂ ਗੋਤ੍ਤੇਨ ਵਦਤਿ. ਚੋਰੋ ਅਵਿਸ੍ਸਾਸਨੀਯੋ ਸਾਹਸਿਕਭਾਵਤੋ. ਪੁਰਾਣਸਨ੍ਥਤਾ ਸਾਖਾ ਅਵਿਸ੍ਸਾਸਨੀਯਾ ਵਿਚ੍ਛਿਕਾਦੀਨਂ ਪਵੇਸਨਯੋਗ੍ਯਤ੍ਤਾ. ਰਾਜਾ ਅਵਿਸ੍ਸਾਸਨੀਯੋ ਇਸ੍ਸਰਿਯਮਦੇਨ ਧਨਲੋਭੇਨ ਚ ਕਦਾਚਿ ਜੀਵਿਤੇ ਸਙ੍ਕਾਭਾਵਤੋ. ਇਤ੍ਥੀ ਅਵਿਸ੍ਸਾਸਨੀਯਾ ਲੋਲਸੀਲਚਿਤ੍ਤਭਾਵਤੋ. ਅਨੁਦ੍ਧਰਣੀਯੋ ਭਵਿਸ੍ਸਤਿ ਸਂਸਾਰਪਙ੍ਕਤੋ.

੩੪੮. ਸਙ੍ਕਰਿਤ੍ਵਾਤਿ ‘‘ਮਯਂ ਏਕਜ੍ਝਂ ਸਨ੍ਨਿਪਤਿਤ੍ਵਾ ਚੋਰਂ ਮਾਰੇਤ੍ਵਾ ਵਾ ਪਲਾਪੇਤ੍ਵਾ ਗਮਿਸ੍ਸਾਮਾ’’ਤਿ ਸਙ੍ਕਰਂ ਕਤ੍ਵਾ. ਇਦ੍ਧਾਭਿਸਙ੍ਖਾਰਨ੍ਤਿ ਅਭਿਸਙ੍ਖਰਣਂ ਅਧਿਟ੍ਠਾਨਂ. ਅਭਿਸਙ੍ਖਾਸੀਤਿ ਅਧਿਟ੍ਠਹਿ. ਸਂਹਰਿਤ੍ਵਾਤਿ ਸਂਖਿਪਿਤ੍ਵਾ. ਓਰਭਾਗੇਤਿ ਚੋਰਸ੍ਸ ਓਰਭਾਗੇ.

੩੪੯. ਦਣ੍ਡੋਤਿ ਪਹਰਣਹਤ੍ਥਚ੍ਛੇਦਨਾਦਿਕੋ ਦਣ੍ਡਨਸਙ੍ਖਾਤੋ ਦਣ੍ਡੋ. ਪਵਤ੍ਤਯਿਤਬ੍ਬੋਤਿ ਆਨੇਤਬ੍ਬੋ. ਅਪਨੇਤ੍ਵਾਤਿ ਅਤ੍ਤਨੋ ਸਨ੍ਤਾਨਤੋ ਸਮੁਚ੍ਛੇਦਵਸੇਨ ਪਹਾਯ. ਪਟਿਸਙ੍ਖਾਯਾਤਿ ਪਟਿਸਙ੍ਖਾਨੇਨ. ਅਵਿਹਿਂਸਾਯਾਤਿ ਕਰੁਣਾਯ. ਸਾਰਣੀਯਧਮ੍ਮੇਸੂਤਿ ਛਸੁਪਿ ਸਾਰਣੀਯਧਮ੍ਮੇਸੁ, ਠਿਤੋ ਅਟ੍ਠਿਤਾਨਂ ਪਾਪਧਮ੍ਮਾਨਂ ਬੋਧਿਮੂਲੇ ਏਵ ਸਮੁਚ੍ਛਿਨ੍ਨਤ੍ਤਾ. ਯਥਾ ਅਤੀਤੇ ਅਪਰਿਮਿਤਂ ਕਾਲਂ ਸਨ੍ਧਾਵਿਤਂ, ਏਵਂ ਇਮਾਯ ਪਟਿਪਤ੍ਤਿਯਾ ਅਨਾਗਤੇਪਿ ਸਨ੍ਧਾਵਿਸ੍ਸਤੀਤਿ ਦਸ੍ਸੇਨ੍ਤੋ ‘‘ਇਦਾਨੀ’’ਤਿਆਦਿਮਾਹ.

ਇਤ੍ਵੇਵਾਤਿ ਇਤਿ ਏਵ, ਇਤਿ-ਸਦ੍ਦੋ ਨਿਦਸ੍ਸਨਤ੍ਥੋ. ਤੇਨਾਹ ‘‘ਏਵਂ ਵਤ੍ਵਾ ਯੇਵਾ’’ਤਿ. ਅਕਿਰੀਤਿ ਆਕਿਰਿ, ਪਞ੍ਚਪਿ ਆਵੁਧਾਨਿ ਵਿਕਿਰਿ. ਤੇਨ ਵੁਤ੍ਤਂ ‘‘ਖਿਪਿ ਛਡ੍ਡੇਸੀ’’ਤਿ.

੩੫੦. ਏਤ੍ਤੋਵਾਤਿ ਅਤੋ ਏਵ ਆਗਤਮਗ੍ਗੇਨੇਵ ਸਾਵਤ੍ਥਿਂ ਗਤਾ. ਅਧਿਵਾਸੇਸ੍ਸਤੀਤਿ ‘‘ਚੋਰਂ ਪਟਿਸੇਧੇਤੁਂ ਗਮਿਸ੍ਸਾਮੀ’’ਤਿ ਵੁਤ੍ਤੇ ਤੁਣ੍ਹੀ ਭਵਿਸ੍ਸਤਿ. ਦਾਰੁਣਕਮ੍ਮੇਨ ਉਪ੍ਪਨ੍ਨਨਾਮਨ੍ਤਿ ‘‘ਅਙ੍ਗੁਲਿਮਾਲੋ’’ਤਿ ਇਮਂ ਨਾਮਂ ਸਨ੍ਧਾਯ ਵਦਤਿ.

੩੫੧. ਹਤ੍ਥੀ ਅਰਞ੍ਞਹਤ੍ਥੀ ਹੋਨ੍ਤਿ ਮਨੁਸ੍ਸਾਨਂ ਤਤ੍ਥ ਗਨ੍ਤੁਂ ਅਸਕ੍ਕੁਣੇਯ੍ਯਤ੍ਤਾ, ਏਵਂ ਅਸ੍ਸਾਪਿ. ਕੂਟਸਹਸ੍ਸਾਨਂ ਭਿਜ੍ਜਨਕਾਰਣਂ ਹੋਤਿ ਥੇਰਸ੍ਸ ਆਗਮਨਭਯੇਨ ਘਟੇ ਛਡ੍ਡੇਤ੍ਵਾ ਪਲਾਯਨੇਨ. ਗਬ੍ਭਮੂਲ਼੍ਹਾਯਾਤਿ ਬ੍ਯਾਕੁਲਗਬ੍ਭਾਯ. ਪਬ੍ਬਜ੍ਜਾਬਲੇਨਾਤਿ ਵੁਤ੍ਤਂ, ਸਤ੍ਥੁ ਦੇਸਨਾਨੁਭਾਵੇਨਾਤਿ ਪਨ ਵਤ੍ਤਬ੍ਬਂ. ਸੋ ਹਿ ਤਸ੍ਸਾਪਿ ਕਾਰਣਨ੍ਤਿ. ਅਰਿਯਾ ਨਾਮ ਜਾਤਿ ਪਬ੍ਬਜ੍ਜਾ ਅਰਿਯਭਾਵਤ੍ਥਾਯ ਜਾਤੀਤਿ ਕਤ੍ਵਾ.

ਮਹਾਪਰਿਤ੍ਤਂ ਨਾਮੇਤਨ੍ਤਿ ਮਹਾਨੁਭਾਵਂ ਪਰਿਤ੍ਤਂ ਨਾਮੇਤਂ. ਤਥਾ ਹਿ ਨਂ ਥੇਰੋ ਸਬ੍ਬਭਾਵੇਨ ਅਰਿਯਾਯ ਜਾਤੋ ਸਚ੍ਚਾਧਿਟ੍ਠਾਨੇਨ ਅਕਾਸਿ. ਤੇਨਾਹ ‘‘ਸਚ੍ਚਕਿਰਿਯਕਤਟ੍ਠਾਨੇ’’ਤਿ. ਗਬ੍ਭਮੂਲ਼੍ਹਨ੍ਤਿ ਮੂਲ਼੍ਹਗਬ੍ਭਂ. ਗਬ੍ਭੋ ਹਿ ਪਰਿਪਕ੍ਕੋ ਸਮ੍ਪਜ੍ਜਮਾਨੋ ਵਿਜਾਯਨਕਾਲੇ ਕਮ੍ਮਜਵਾਤੇਹਿ ਸਞ੍ਚਾਲੇਤ੍ਵਾ ਪਰਿਵਤ੍ਤਿਤੋ ਉਦ੍ਧਂਪਾਦੋ ਅਧੋਸੀਸੋ ਹੁਤ੍ਵਾ ਯੋਨਿਮੁਖਾਭਿਮੁਖੋ ਹੋਤਿ, ਏਵਂ ਸੋ ਕਸ੍ਸਚਿ ਅਲਗ੍ਗੋ ਸੋਤ੍ਥਿਨਾ ਬਹਿ ਨਿਕ੍ਖਮਤਿ, ਵਿਪਜ੍ਜਮਾਨੋ ਪਨ ਵਿਪਰਿਵਤ੍ਤਨਵਸੇਨ ਯੋਨਿਮਗ੍ਗਂ ਪਿਦਹਿਤ੍ਵਾ ਤਿਰਿਯਂ ਨਿਪਜ੍ਜਤਿ, ਤਥਾ ਯਸ੍ਸਾ ਯੋਨਿਮਗ੍ਗੋ ਪਿਦਹਤਿ, ਸਾ ਤਤ੍ਥ ਕਮ੍ਮਜਵਾਤੇਹਿ ਅਪਰਾਪਰਂ ਪਰਿਵਤ੍ਤਮਾਨਾ ਬ੍ਯਾਕੁਲਾ ਮੂਲ਼੍ਹਗਬ੍ਭਾਤਿ ਵੁਚ੍ਚਤਿ, ਤਂ ਸਨ੍ਧਾਯ ਵੁਤ੍ਤਂ ‘‘ਗਬ੍ਭਮੂਲ਼੍ਹ’’ਨ੍ਤਿ.

ਸਚ੍ਚਕਿਰਿਯਾ ਨਾਮ ਬੁਦ੍ਧਾਸਯਂ ਅਤ੍ਤਨੋ ਸੀਲਂ ਪਚ੍ਚਵੇਕ੍ਖਿਤ੍ਵਾ ਕਤਾ, ਤਸ੍ਮਾ ਸਚ੍ਚਕਿਰਿਯਾ ਵੇਜ੍ਜਕਮ੍ਮਂ ਨ ਹੋਤੀਤਿ ਦਟ੍ਠਬ੍ਬਂ. ਥੇਰਸ੍ਸਪਿ ਚਾਤਿਆਦਿਨਾ ਉਪਸਙ੍ਕਮਿਤਬ੍ਬਕਾਰਣਂ ਵਦਤਿ. ਇਮੇ ਦ੍ਵੇ ਹੇਤੂ ਪਟਿਚ੍ਚ ਭਗਵਾ ਥੇਰਂ ਸਚ੍ਚਕਿਰਿਯਂ ਕਾਰੇਸਿ. ਜਾਤਿਨ੍ਤਿ ਮੂਲਜਾਤਿਂ.

੩੫੨. ਪਰਿਯਾਦਾਯ ਆਹਚ੍ਚ ਭਿਨ੍ਨੇਨ ਸੀਸੇਨ. ਸਭਾਗਦਿਟ੍ਠਧਮ੍ਮਵੇਦਨੀਯਕਮ੍ਮਨ੍ਤਿ ਨਿਰਯੇ ਨਿਬ੍ਬਤ੍ਤਨਸਕਕਮ੍ਮਸਭਾਗਭੂਤਂ ਦਿਟ੍ਠਧਮ੍ਮਵੇਦਨੀਯਕਮ੍ਮਂ. ਸਭਾਗਤਾ ਚ ਸਮਾਨਵਤ੍ਥੁਕਤਾ ਸਮਾਨਾਰਮ੍ਮਣਤਾਏਕਵੀਥਿਪਰਿਯਾਪਨ੍ਨਤਾਦਿਵਸੇਨ ਸਬ੍ਬਥਾ ਸਰਿਕ੍ਖਤਾ, ਸਦਿਸਮ੍ਪਿ ਚ ਨਾਮ ਤਦੇਵਾਹਰੀਯਤਿ ਯਥਾ ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕੋ’’ਤਿ ਚ ‘‘ਸਾ ਏਵ ਤਿਤ੍ਤਿਰੀ ਤਾਨੇਵ ਓਸਧਾਨੀ’’ਤਿ ਚ. ਇਦਾਨਿ ਤਮੇਵ ਸਭਾਗਤਂ ਦਸ੍ਸੇਤੁਂ ‘‘ਕਮ੍ਮਂ ਹੀ’’ਤਿਆਦਿ ਆਰਦ੍ਧਂ. ਕਰਿਯਮਾਨਮੇਵਾਤਿ ਪਚ੍ਚਯਸਮਵਾਯੇਨ ਪਟਿਪਾਟਿਯਾ ਨਿਬ੍ਬਤ੍ਤਿਯਮਾਨਮੇਵ. ਤਯੋ ਕੋਟ੍ਠਾਸੇ ਪੂਰੇਤਿ, ਦਿਟ੍ਠਧਮ੍ਮਵੇਦਨੀਯਅਪਰਾਪਰਿਯਾਯਵੇਦਨੀਯਉਪਪਜ੍ਜਵੇਦਨੀਯਸਙ੍ਖਾਤੇ ਤਯੋ ਭਾਗੇ ਪੂਰੇਤਿ, ਤੇਸਂ ਤਿਣ੍ਣਂ ਭਾਗਾਨਂ ਵਸੇਨ ਪਵਤ੍ਤਤਿ.

ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਪਚ੍ਚੁਪ੍ਪਨ੍ਨੋ ਅਤ੍ਤਭਾਵੋ, ਤਤ੍ਥ ਵੇਦਿਤਬ੍ਬਫਲਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ. ਪਚ੍ਚੁਪ੍ਪਨ੍ਨਭਵਤੋ ਅਨਨ੍ਤਰਂ ਵੇਦਿਤਬ੍ਬਫਲਂ ਕਮ੍ਮਂ ਉਪਪਜ੍ਜਵੇਦਨੀਯਂ. ਦਿਟ੍ਠਧਮ੍ਮਾਨਨ੍ਤਰਭਵਤੋ ਅਞ੍ਞਸ੍ਮਿਂ ਅਤ੍ਤਭਾਵਪਰਿਯਾਯੇ ਅਤ੍ਤਭਾਵਪਰਿਵਤ੍ਤੇ ਵੇਦਿਤਬ੍ਬਫਲਂ ਕਮ੍ਮਂ ਅਪਰਾਪਰਿਯਾਯਵੇਦਨੀਯਂ. ਪਟਿਪਕ੍ਖੇਹਿ ਅਨਭਿਭੂਤਤਾਯ, ਪਚ੍ਚਯਵਿਸੇਸੇਨ ਪਟਿਲਦ੍ਧਵਿਸੇਸਤਾਯ ਚ ਬਲਵਭਾਵਪ੍ਪਤ੍ਤਾ ਤਾਦਿਸਸ੍ਸ ਪੁਬ੍ਬਾਭਿਸਙ੍ਖਾਰਸ੍ਸ ਵਸੇਨ ਸਾਤਿਸਯਾ ਹੁਤ੍ਵਾ ਪਵਤ੍ਤਾ ਪਠਮਜਵਨਚੇਤਨਾ ਤਸ੍ਮਿਂਯੇਵ ਅਤ੍ਤਭਾਵੇ ਫਲਦਾਯਿਨੀ ਦਿਟ੍ਠਧਮ੍ਮਵੇਦਨੀਯਾ ਨਾਮ. ਸਾ ਹਿ ਵੁਤ੍ਤਾਕਾਰੇਨ ਬਲਵਤਿ ਜਵਨਸਨ੍ਤਾਨੇ ਗੁਣਵਿਸੇਸਯੁਤ੍ਤੇਸੁ ਉਪਕਾਰਾਨੁਪਕਾਰਵਸਪ੍ਪਵਤ੍ਤਿਯਾ ਆਸੇਵਨਾਲਾਭੇਨ ਅਪ੍ਪਵਿਪਾਕਤਾਯ ਚ ਇਤਰਦ੍ਵਯਂ ਵਿਯ ਪਵਤ੍ਤਸਨ੍ਤਾਨੁਪਰਮਾਪੇਕ੍ਖਂ ਓਕਾਸਲਾਭਾਪੇਕ੍ਖਞ੍ਚ ਕਮ੍ਮਂ ਨ ਹੋਤੀਤਿ ਇਧੇਵ ਪੁਪ੍ਫਮਤ੍ਤਂ ਵਿਯ ਪਵਤ੍ਤਿਵਿਪਾਕਮਤ੍ਤਂ ਫਲਂ ਦੇਤਿ.

ਤਥਾ ਅਸਕ੍ਕੋਨ੍ਤਨ੍ਤਿ ਕਮ੍ਮਸ੍ਸ ਫਲਦਾਨਂ ਨਾਮ ਉਪਧਿਪਯੋਗਾਦਿਪਚ੍ਚਯਨ੍ਤਰਸਮਵਾਯੇਨੇਵ ਹੋਤੀਤਿ ਤਦਭਾਵਤੋ ਤਸ੍ਮਿਂਯੇਵ ਅਤ੍ਤਭਾਵੇ ਵਿਪਾਕਂ ਦਾਤੁਂ ਅਸਕ੍ਕੋਨ੍ਤਂ. ਅਹੋਸਿਕਮ੍ਮਨ੍ਤਿ ਕਮ੍ਮਂਯੇਵ ਅਹੋਸਿ, ਨ ਤਸ੍ਸ ਵਿਪਾਕੋ ਅਹੋਸਿ, ਅਤ੍ਥਿ ਭਵਿਸ੍ਸਤਿ ਵਾਤਿ ਏਵਂ ਵਤ੍ਤਬ੍ਬਂ ਕਮ੍ਮਂ. ਅਤ੍ਥਸਾਧਿਕਾਤਿ ਦਾਨਾਦਿਪਾਣਾਤਿਪਾਤਾਦਿਅਤ੍ਥਸ੍ਸ ਨਿਪ੍ਫਾਦਿਕਾ. ਕਾ ਪਨ ਸਾਤਿ ਆਹ ‘‘ਸਤ੍ਤਮਜਵਨਚੇਤਨਾ’’ਤਿ. ਸਾ ਹਿ ਸਨ੍ਨਿਟ੍ਠਾਪਕਚੇਤਨਾ ਵੁਤ੍ਤਨਯੇਨ ਪਟਿਲਦ੍ਧਵਿਸੇਸਾ ਪੁਰਿਮਜਵਨਚੇਤਨਾਹਿ ਲਦ੍ਧਾਸੇਵਨਾ ਚ ਸਮਾਨਾ ਅਨਨ੍ਤਰੇ ਅਤ੍ਤਭਾਵੇ ਵਿਪਾਕਦਾਯਿਨੀ ਉਪਪਜ੍ਜਵੇਦਨੀਯਕਮ੍ਮਂ ਨਾਮ. ਤੇਨਾਹ ‘‘ਅਨਨ੍ਤਰੇ ਅਤ੍ਤਭਾਵੇ ਵਿਪਾਕਂ ਦੇਤੀ’’ਤਿ. ਸਤਿ ਸਂਸਾਰਪ੍ਪਵਤ੍ਤਿਯਾਤਿ ਇਮਿਨਾ ਅਸਤਿ ਸਂਸਾਰਪ੍ਪਵਤ੍ਤਿਯਾ ਅਹੋਸਿਕਮ੍ਮਪਕ੍ਖੇ ਤਿਟ੍ਠਤਿ ਵਿਪਚ੍ਚਨੋਕਾਸਸ੍ਸ ਅਭਾਵਤੋਤਿ.

ਸਮੁਗ੍ਘਾਟਿਤਾਨਿ ਵਿਪਚ੍ਚਨੋਕਾਸਸ੍ਸ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ. ਦਿਟ੍ਠਧਮ੍ਮਵੇਦਨੀਯਂ ਅਤ੍ਥਿ ਵਿਪਾਕਾਰਹਾਭਾਵਸ੍ਸ ਅਨਿਬ੍ਬਤ੍ਤਿਤਤ੍ਤਾ ਵਿਪਚ੍ਚਨੋਕਾਸਸ੍ਸ ਅਨੁਪਚ੍ਛਿਨ੍ਨਤ੍ਤਾ. ਕਤੂਪਚਿਤਞ੍ਹਿ ਕਮ੍ਮਂ ਸਤਿ ਵਿਪਚ੍ਚਨੋਕਾਸੇ ਯਾਵ ਨ ਫਲਂ ਦੇਤਿ, ਤਾਵ ਅਤ੍ਥੇਵ ਨਾਮ ਵਿਪਾਕਾਰਹਭਾਵਤੋ. ‘‘ਯਸ੍ਸ ਖੋ’’ਤਿ ਇਦਂ ਅਨਿਯਮਾਕਾਰਵਚਨਂ ਭਗਵਤਾ ਕਮ੍ਮਸਰਿਕ੍ਖਤਾਵਸੇਨ ਸਾਧਾਰਣਤੋ ਵੁਤ੍ਤਨ੍ਤਿ ਆਹ ‘‘ਯਾਦਿਸਸ੍ਸ ਖੋ’’ਤਿ.

ਪਮਾਦਕਿਲੇਸਵਿਮੁਤ੍ਤੋਤਿ ਪਮਾਦਹੇਤੁਕੇਹਿ ਸਬ੍ਬੇਹਿ ਕਿਲੇਸੇਹਿ ਵਿਮੁਤ੍ਤੋ.

ਪਾਪਸ੍ਸ ਪਿਧਾਨਂ ਨਾਮ ਅਵਿਪਾਕਧਮ੍ਮਤਾਪਾਦਨਨ੍ਤਿ ਆਹ ‘‘ਅਪ੍ਪਟਿਸਨ੍ਧਿਕਂ ਕਰੀਯਤੀ’’ਤਿ. ਬੁਦ੍ਧਸਾਸਨੇਤਿ ਸਿਕ੍ਖਾਤ੍ਤਯਸਙ੍ਗਹੇ ਬੁਦ੍ਧਸ੍ਸ ਭਗਵਤੋ ਸਾਸਨੇ. ਯੁਤ੍ਤਪ੍ਪਯੁਤ੍ਤੋ ਵਿਹਰਤੀਤਿ ਅਕਤ੍ਤਬ੍ਬਸ੍ਸ ਅਕਰਣਵਸੇਨ, ਕਤ੍ਤਬ੍ਬਸ੍ਸ ਚ ਪਰਿਪੂਰਣਵਸੇਨ ਪਵਤ੍ਤਤਿ.

ਦਿਸ੍ਸਨ੍ਤਿ ਕੁਜ੍ਝਨ੍ਤੀਤਿ ਦਿਸਾ, ਪਟਿਪਕ੍ਖਾਤਿ ਆਹ ‘‘ਸਪਤ੍ਤਾ’’ਤਿ. ਤਪ੍ਪਸਂਸਪਕਾਰਨ੍ਤਿ ਮੇਤ੍ਤਾਨਿਸਂਸਕਿਤ੍ਤਨਾਕਾਰਂ. ਕਾਲੇਨਾਤਿ ਆਮੇਡਿਤਲੋਪੇਨ ਨਿਦ੍ਦੇਸੋਤਿ ਆਹ ‘‘ਖਣੇ ਖਣੇ’’ਤਿ. ਅਨੁਕਰੋਨ੍ਤੂਤਿ ਯੇਸਂ ਕਲ੍ਯਾਣਮਿਤ੍ਤਾਨਂ ਸਨ੍ਤਿਕੇ ਸੁਣਨ੍ਤਿ, ਯਥਾਸੁਤਂ ਧਮ੍ਮਂ ਤੇਸਂ ਅਨੁਕਰੋਨ੍ਤੁ ਦਿਟ੍ਠਾਨੁਗਤਿਕਰਣਂ ਆਪਜ੍ਜਨ੍ਤੁ, ਅਤ੍ਤਨੋ ਵੇਰਿਪੁਗ੍ਗਲਾਨਮ੍ਪਿ ਭਗਵਤੋ ਸਨ੍ਤਿਕੇ ਧਮ੍ਮਸ੍ਸਵਨਂ ਸਮ੍ਮਾਪਟਿਪਤ੍ਤਿਞ੍ਚ ਪਚ੍ਚਾਸੀਸਤਿ.

ਤਸਨ੍ਤਿ ਗਤਿਂ ਪਤ੍ਥਯਨ੍ਤੀਤਿ ਤਸਾ ਭਵਨ੍ਤਰਾਦੀਸੁ ਸਂਸਰਣਭਾਵਤੋ. ਤੇਨਾਹ ‘‘ਤਸਾ ਵੁਚ੍ਚਨ੍ਤਿ ਸਤਣ੍ਹਾ’’ਤਿ.

ਨੇਤਬ੍ਬਟ੍ਠਾਨਂ ਉਦਕਂ ਨਯਨ੍ਤੀਤਿ ਨੇਤ੍ਤਿਕਾ. ਬਨ੍ਧਿਤ੍ਵਾਤਿ ਦਲ਼੍ਹਂ ਬਨ੍ਧਿਤ੍ਵਾ. ਤੇਲਕਞ੍ਜਿਕੇਨਾਤਿ ਤੇਲਮਿਸ੍ਸਿਤੇਨ ਕਞ੍ਜਿਕੇਨ.

ਯਾਦਿਸੋਵ ਅਨਿਟ੍ਠੇ, ਤਾਦਿਸੋਵ ਇਟ੍ਠੇਤਿ ਇਟ੍ਠਾਨਿਟ੍ਠੇ ਨਿਬ੍ਬਿਕਾਰੇਨ ਤਾਦੀ. ਯੇਸਂ ਪਨ ਕਾਮਾਮਿਸਾਦੀਨਂ ਵਨ੍ਤਤ੍ਤਾ ਰਾਗਾਦੀਨਂ ਚਤ੍ਤਤ੍ਤਾ ਕਾਮੋਘਾਦੀਨਂ ਤਿਣ੍ਣਤ੍ਤਾ ਤਾਦਿਭਾਵੋ ਭਵੇਯ੍ਯ, ਤੇਸਂ ਭਗਵਤਾ ਸਬ੍ਬਸੋ ਵਨ੍ਤਾ ਚਤ੍ਤਾ ਤਿਣ੍ਣਾ, ਤਸ੍ਮਾ ਭਗਵਾ ਵਨ੍ਤਾਵੀਤਿ ਤਾਦੀ, ਚਤ੍ਤਾਵੀਤਿ ਤਾਦੀ, ਤਿਣ੍ਣਾਵੀਤਿ ਤਾਦੀ, ਯੇਹਿ ਅਨਞ੍ਞਸਾਧਾਰਣੇਹਿ ਸੀਲਾਦਿਗੁਣੇਹਿ ਸਮਨ੍ਨਾਗਤਤ੍ਤਾ ਭਗਵਾ ਤਾਦਿਭਾਵੇਨ ਉਕ੍ਕਂਸਪਾਰਮਿਪ੍ਪਤ੍ਤੋ ਤਂਨਿਦ੍ਦੇਸੋ, ਤੇਹਿ ਗੁਣੇਹਿ ਯਾਥਾਵਤੋ ਨਿਦ੍ਦਿਸਿਤਬ੍ਬਤੋਪਿ ਤਾਦੀ. ਯਥਾ ਯਨ੍ਤਰਜ੍ਜੁਯਾ ਯਨ੍ਤਂ ਨੀਯਤਿ, ਏਵਂ ਯਾਯ ਤਣ੍ਹਾਯ ਭਵੋ ਨੀਯਤਿ, ਸਾ ‘‘ਭਵਨੇਤ੍ਤਿ ਭਵਰਜ੍ਜੂ’’ਤਿ ਵੁਤ੍ਤਾ. ਤੇਨਾਹ ‘‘ਤਾਯ ਹੀ’’ਤਿਆਦਿ, ਕਮ੍ਮਾਨਿ ਕੁਸਲਾਦੀਨਿ ਵਿਪਚ੍ਚਯਨ੍ਤਿ ਅਪਚ੍ਚਯਨ੍ਤਿ ਏਤਾਯਾਤਿ ਕਮ੍ਮਵਿਪਾਕੋ. ਅਪਚ੍ਚਯਭਾਵੋ ਨਾਮ ਅਰਿਯਮਗ੍ਗਚੇਤਨਾਯਾਤਿ ਆਹ ‘‘ਮਗ੍ਗਚੇਤਨਾਯਾ’’ਤਿ. ਯਾਵ ਨ ਕਿਲੇਸਾ ਪਹੀਯਨ੍ਤਿ, ਤਾਵ ਇਮੇ ਸਤ੍ਤਾ ਸਇਣਾ ਏਵ ਅਸੇਰਿਵਿਹਾਰਭਾਵਤੋਤਿ ਆਹ ‘‘ਅਣਣੋ ਨਿਕ੍ਕਿਲੇਸੋ ਜਾਤੋ’’ਤਿ.

ਥੇਯ੍ਯਪਰਿਭੋਗੋ (ਵਿਸੁਦ੍ਧਿ. ਟੀ. ੧.੯੧) ਨਾਮ ਸਾਮਿਪਰਿਭੋਗਾਭਾਵਤੋ. ਭਗਵਤਾਪਿ ਹਿ ਅਤ੍ਤਨੋ ਸਾਸਨੇ ਸੀਲਵਤੋ ਪਚ੍ਚਯਾ ਅਨੁਞ੍ਞਾਤਾ, ਨ ਦੁਸ੍ਸੀਲਸ੍ਸ, ਦਾਯਕਾਨਂ ਸੀਲਵਤੋਯੇਵ ਪਰਿਚ੍ਚਾਗੋ, ਨ ਦੁਸ੍ਸੀਲਸ੍ਸ ਅਤ੍ਤਨੋ ਕਾਰਾਨਂ ਮਹਪ੍ਫਲਭਾਵਸ੍ਸ ਪਚ੍ਚਾਸੀਸਨਤੋ. ਇਤਿ ਸਤ੍ਥਾਰਾ ਅਨਨੁਞ੍ਞਾਤਤ੍ਤਾ ਦਾਯਕੇਹਿ ਚ ਅਪਰਿਚ੍ਚਤ੍ਤਤ੍ਤਾ ‘‘ਦੁਸ੍ਸੀਲਸ੍ਸ ਪਰਿਭੋਗੋ ਥੇਯ੍ਯਪਰਿਭੋਗੋ ਨਾਮਾ’’ਤਿ ਵੁਤ੍ਤਂ. ਇਣਵਸੇਨ ਪਰਿਭੋਗੋ ਇਣਪਰਿਭੋਗੋ. ਪਟਿਗ੍ਗਾਹਕਤੋ ਦਕ੍ਖਿਣਾਵਿਸੁਦ੍ਧਿਯਾ ਅਭਾਵਤੋ ਇਣਂ ਗਹੇਤ੍ਵਾ ਪਰਿਭੋਗੋ ਵਿਯਾਤਿ ਅਤ੍ਥੋ. ਯਸ੍ਮਾ ਸੇਕ੍ਖਾ ਭਗਵਤੋ ਓਰਸਪੁਤ੍ਤਾ, ਤਸ੍ਮਾ ਤੇ ਪਿਤੁਸਨ੍ਤਕਾਨਂ ਪਚ੍ਚਯਾਨਂ ਦਾਯਾਦਾ ਹੁਤ੍ਵਾ ਤੇ ਪਚ੍ਚਯੇ ਪਰਿਭੁਞ੍ਜਨ੍ਤੀਤਿ ਤੇਸਂ ਪਰਿਭੋਗੋ ਦਾਯਜ੍ਜਪਰਿਭੋਗੋ ਨਾਮ. ਕਿਂ ਪਨ ਤੇ ਭਗਵਤੋ ਪਚ੍ਚਯੇ ਪਰਿਭੁਞ੍ਜਨ੍ਤਿ, ਉਦਾਹੁ ਗਿਹੀਹਿ ਦਿਨ੍ਨਨ੍ਤਿ? ਗਿਹੀਹਿ ਦਿਨ੍ਨਾਪਿ ਤੇ ਭਗਵਤਾ ਅਨੁਞ੍ਞਾਤਤ੍ਤਾ ਭਗਵਤੋ ਸਨ੍ਤਕਾ ਹੋਨ੍ਤਿ ਅਨਨੁਞ੍ਞਾਤੇਸੁ ਸਬ੍ਬੇਨ ਸਬ੍ਬਂ ਪਰਿਭੋਗਾਭਾਵਤੋ ਅਨੁਞ੍ਞਾਤੇਸੁਯੇਵ ਪਰਿਭੋਗਸਮ੍ਭਵਤੋ. ਧਮ੍ਮਦਾਯਾਦਸੁਤ੍ਤਞ੍ਚੇਤ੍ਥ (ਮ. ਨਿ. ੧.੨੯ ਆਦਯੋ) ਸਾਧਕਂ.

ਅਵੀਤਰਾਗਾਨਂ ਤਣ੍ਹਾਪਰਵਸਤਾਯ ਪਚ੍ਚਯਪਰਿਭੋਗੇ ਸਾਮਿਭਾਵੋ ਨਤ੍ਥਿ, ਤਦਭਾਵੇਨ ਵੀਤਰਾਗਾਨਂ ਤਤ੍ਥ ਸਾਮਿਭਾਵੋ ਯਥਾਰੁਚਿ ਪਰਿਭੋਗਸਮ੍ਭਵਤੋ. ਤਥਾ ਹਿ ਤੇ ਪਟਿਕੂਲਮ੍ਪਿ ਅਪ੍ਪਟਿਕੂਲਾਕਾਰੇਨ, ਅਪ੍ਪਟਿਕੂਲਮ੍ਪਿ ਪਟਿਕੂਲਾਕਾਰੇਨ ਤਦੁਭਯਂ ਵਿਵਜ੍ਜੇਤ੍ਵਾ ਉਪੇਕ੍ਖਾਕਾਰੇਨ ਚ ਪਚ੍ਚਯੇ ਪਰਿਭੁਞ੍ਜਨ੍ਤਿ, ਦਾਯਕਾਨਞ੍ਚ ਮਨੋਰਥਂ ਪਰਿਪੂਰੇਨ੍ਤਿ. ਸੇਸਮੇਤ੍ਥ ਯਂ ਵਤ੍ਤਬ੍ਬਂ, ਤਂ ਵਿਸੁਦ੍ਧਿਮਗ੍ਗੇ, ਤਂਸਂਵਣ੍ਣਨਾਸੁ ਚ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਕਿਲੇਸਇਣਾਨਂ ਅਭਾਵਂ ਸਨ੍ਧਾਯ ‘‘ਅਣਣੋ’’ਤਿ ਵੁਤ੍ਤਂ, ਨ ਪਚ੍ਚਵੇਕ੍ਖਿਤਪਰਿਭੋਗਮਤ੍ਤਂ. ਤੇਨਾਹ ਆਯਸ੍ਮਾ ਚ ਬਾਕੁਲੋ – ‘‘ਸਤ੍ਤਾਹਮੇਵ ਖੋ ਅਹਂ, ਆਵੁਸੋ, ਸਰਣੋ ਰਟ੍ਠਪਿਣ੍ਡਂ ਭੁਞ੍ਜਿ’’ਨ੍ਤਿ (ਮ. ਨਿ. ੩.੨੧੧).

ਵਤ੍ਥੁਕਾਮਕਿਲੇਸਕਾਮੇਹਿ ਤਣ੍ਹਾਯ ਪਵਤ੍ਤਿਆਕਾਰਂ ਪਟਿਚ੍ਚ ਅਤ੍ਥਿ ਰਮਣਵੋਹਾਰੋਤਿ ਆਹ – ‘‘ਦੁਵਿਧੇਸੁਪਿ ਕਾਮੇਸੁ ਤਣ੍ਹਾਰਤਿਸਨ੍ਥਵ’’ਨ੍ਤਿ. ਮਨ੍ਤਿਤਨ੍ਤਿ ਕਥਿਤਂ. ਉਪ੍ਪਨ੍ਨੇਹਿ ਸਤ੍ਥੁਪਟਿਞ੍ਞੇਹਿ. ਸਂਵਿਭਤ੍ਤਾਤਿ ਕੁਸਲਾਦਿਵਸੇਨ ਖਨ੍ਧਾਦੀਹਿ ਆਕਾਰੇਹਿ ਵਿਭਤ੍ਤਾ. ਸੁਨ੍ਦਰਂ ਆਗਮਨਨ੍ਤਿ ਸ੍ਵਾਗਤਂ. ਤਤੋ ਏਵ ਨ ਕੁਚ੍ਛਿਤਂ ਆਗਤਂ. ਸੋਲ਼ਸਵਿਧਕਿਚ੍ਚਸ੍ਸ ਪਰਿਯੋਸਿਤਤ੍ਤਾ ਆਹ ‘‘ਤਂ ਸਬ੍ਬਂ ਮਯਾ ਕਤ’’ਨ੍ਤਿ. ਮਗ੍ਗਪਞ੍ਞਾਯਮੇਵ ਤਤਿਯਵਿਜ੍ਜਾਸਮਞ੍ਞਾਤਿ ਆਹ – ‘‘ਤੀਹਿ ਵਿਜ੍ਜਾਹਿ ਨਵਹਿ ਚ ਲੋਕੁਤ੍ਤਰਧਮ੍ਮੇਹੀ’’ਤਿ.

ਅਙ੍ਗੁਲਿਮਾਲਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੭. ਪਿਯਜਾਤਿਕਸੁਤ੍ਤਵਣ੍ਣਨਾ

੩੫੩. ਪਕਤਿਨਿਯਾਮੇਨਾਤਿ ਯਥਾ ਸੋਕੁਪ੍ਪਤ੍ਤਿਤੋ ਪੁਬ੍ਬੇ ਇਤਿ ਕਤ੍ਤਬ੍ਬੇਸੁ ਅਸਮ੍ਮੋਹਵਸੇਨ ਚਿਤ੍ਤਂ ਪਕ੍ਖਨ੍ਦਤਿ, ਤਾਨਿ ਚਸ੍ਸ ਉਪਟ੍ਠਹਨ੍ਤਿ, ਨ ਏਵਂ ਸੋਕਸ੍ਸ ਚਿਤ੍ਤਸਙ੍ਕੋਚਸਭਾਵਤੋ. ਤੇਨ ਵੁਤ੍ਤਂ ‘‘ਪਕਤਿਨਿਯਾਮੇਨ ਪਨ ਨ ਪਟਿਭਨ੍ਤੀ’’ਤਿ. ਕੇਚਿ ਪਨ ‘‘ਸਾਮਨ੍ਤਾ ਕਤਿਪਯੇ ਨ ਕੁਟੁਮ੍ਬਂ ਸਨ੍ਧਾਰੇਤਿ. ਤੇਨਾਹ ‘ਨ ਸਬ੍ਬੇਨ ਸਬ੍ਬਂ ਪਟਿਭਨ੍ਤੀ’ਤਿ’’ ਵਦਨ੍ਤਿ. ਏਤ੍ਥਾਤਿ ਦੁਤਿਯਪਦੇ. ਅਨੇਕਤ੍ਥਤ੍ਤਾ ਧਾਤੂਨਂ ‘‘ਨ ਪਟਿਭਾਤੀ’’ਤਿ ਪਦਸ੍ਸ ‘‘ਨ ਰੁਚ੍ਚਤੀ’’ਤਿ ਅਤ੍ਥਮਾਹ. ਨ ਪਟਿਭਾਤੀਤਿ ਵਾ ਭੁਞ੍ਜਿਤੁਕਾਮਤਾਚਿਤ੍ਤਂ ਨ ਉਪਟ੍ਠਿਤਨ੍ਤਿ ਅਤ੍ਥੋ. ਪਤਿਟ੍ਠਿਤੋਕਾਸਨ੍ਤਿ ਇਨ੍ਦ੍ਰਿਯਾਵਿਟ੍ਠਟ੍ਠਾਨਂ ਵਦਤਿ. ਪਿਯਾਯਿਤਬ੍ਬਤੋ ਪਿਯੋ ਜਾਤਿ ਉਪ੍ਪਤ੍ਤਿਟ੍ਠਾਨਂ ਏਤੇਸਨ੍ਤਿ ਪਿਯਜਾਤਿਕਾ. ਪਿਯੋ ਪਭੁਤਿ ਏਤੇਸਨ੍ਤਿ ਪਿਯਪ੍ਪਭੁਤਿਕਾਤਿ ਵਤ੍ਤਬ੍ਬੇ, ਉ-ਕਾਰਸ੍ਸ ਵ-ਕਾਰਂ, ਤ-ਕਾਰਸ੍ਸ ਚ ਲੋਪਂ ਕਤ੍ਵਾ ‘‘ਪਿਯਪ੍ਪਭਾਵਿਕਾ’’ਤਿ ਵੁਤ੍ਤਂ. ਤੇਨਾਹ ‘‘ਪਿਯਤੋ ਪਭਵਨ੍ਤੀ’’ਤਿ.

੩੫੫. ਪਰ-ਸਦ੍ਦੇਨ ਸਮਾਨਤ੍ਥਂ ਅਜ੍ਝਤ੍ਤਿਕਭਾਵਨਿਸੇਧਨਤ੍ਥਂ ‘‘ਪਿਰੇ’’ਤਿ ਪਦਨ੍ਤਿ ਆਹ ‘‘ਅਮ੍ਹਾਕਂ ਪਰੇ’’ਤਿ. ਪਿਰੇਤਿ ਵਾ ‘‘ਪਰਤੋ’’ਤਿ ਇਮਿਨਾ ਸਮਾਨਤ੍ਥਂ ਨਿਪਾਤਪਦਨ੍ਤਿ ਆਹ ‘‘ਚਰ ਪਿਰੇਤਿ ਪਰਤੋ ਗਚ੍ਛਾ’’ਤਿ.

੩੫੬. ਦ੍ਵਿਧਾ ਛੇਤ੍ਵਾਤਿ ਏਤ੍ਥ ਯਦਿ ਇਤ੍ਥੀ ਤਸ੍ਸ ਪੁਰਿਸਸ੍ਸ ਪਿਯਾ, ਕਥਂ ਦ੍ਵਿਧਾ ਛਿਨ੍ਦਤੀਤਿ ਆਹ ‘‘ਯਦਿ ਹੀ’’ਤਿਆਦਿ.

੩੫੭. ਕਥਂ ਕਥੇਯ੍ਯਨ੍ਤਿ ਯਥਾ ਭਗਵਾ ਏਤਸ੍ਸ ਬ੍ਰਾਹ੍ਮਣਸ੍ਸ ਕਥੇਸਿ, ਸੋ ਚ ਮੇ ਕਥੇਸਿ, ਤਥਾ ਚਾਹਂ ਕਥੇਯ੍ਯਂ. ਮਰਣਵਸੇਨ ਵਿਪਰਿਣਾਮੋ ਅਤ੍ਤਭਾਵਸ੍ਸ ਪਰਿਵਤ੍ਤਤ੍ਤਾ. ਪਲਾਯਿਤ੍ਵਾ ਗਮਨਵਸੇਨ ਅਞ੍ਞਥਾਭਾਵੋ ਮਿਤ੍ਤਸਨ੍ਥਵਸ੍ਸ ਸਮਾਗਮਸ੍ਸ ਚ ਅਞ੍ਞਥਾਭੂਤਤ੍ਤਾ.

ਛਡ੍ਡਿਤਭਾਵੇਨਾਤਿ ਪਰਿਵਤ੍ਤਿਤਭਾਵੇਨ. ਹਤ੍ਥਗਮਨਵਸੇਨ ਅਞ੍ਞਥਾਭਾਵੋ ਪੁਬ੍ਬੇ ਸਵਸੇ ਵਤ੍ਤਿਤਾਨਂ ਇਦਾਨਿ ਵਸੇ ਅਵਤ੍ਤਨਭਾਵੇਨ.

ਆਚਮੇਹੀਤਿ ਆਚਮਨਂ ਮੁਖਵਿਕ੍ਖਾਲਨਂ ਕਾਰੇਹਿ. ਯਸ੍ਮਾ ਮੁਖਂ ਵਿਕ੍ਖਾਲੇਨ੍ਤਾ ਹਿ ਹਤ੍ਥਪਾਦੇ ਧੋਵਿਤ੍ਵਾ ਵਿਕ੍ਖਾਲੇਨ੍ਤਿ, ਤਸ੍ਮਾ ‘‘ਆਚਮਿਤ੍ਵਾ’’ਤਿ ਵਤ੍ਵਾ ਪਚ੍ਛਾਪਿ ਤਸ੍ਸ ਅਤ੍ਥਂ ਦਸ੍ਸੇਨ੍ਤੋ ‘‘ਮੁਖਂ ਵਿਕ੍ਖਾਲੇਤ੍ਵਾ’’ਤਿ ਆਹ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਪਿਯਜਾਤਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੮. ਬਾਹਿਤਿਕਸੁਤ੍ਤਵਣ੍ਣਨਾ

੩੫੯. ਸਾਵਜ੍ਜਤਾਯ ਉਪਾਰਮ੍ਭਂ ਅਰਹਤੀਤਿ ਓਪਾਰਮ੍ਭੋ. ਤੇਨਾਹ ‘‘ਦੋਸਂ ਆਰੋਪਨਾਰਹੋ’’ਤਿ. ਬਾਲਾ ਉਪਾਰਮ੍ਭਵਤ੍ਥੁਮਞ੍ਞਂ ਅਮੂਲਕਮ੍ਪਿ ਨਂ ਆਰੋਪੇਨ੍ਤਾ ਉਗ੍ਘੋਸੇਨ੍ਤਿ, ਤਸ੍ਮਾ ਤੇ ਅਨਾਮਸਿਤ੍ਵਾ ‘‘ਵਿਞ੍ਞੂਹੀ’’ਤਿ ਇਦਂ ਪਦਂ ਗਹੇਤ੍ਵਾ ਪਞ੍ਹੇਨ ਞਾਤੁਂ ਇਚ੍ਛਿਤੇਨ ਅਤ੍ਥੇਨ ਉਪਾਰਮ੍ਭਾਦੀਨਂ ਉਪਰਿ ਉਤ੍ਤਰਂ ਪਰਿਪੂਰੇਤੁਂ ਨਾਸਕ੍ਖਿਮ੍ਹਾ. ਤਂ ਕਾਰਣਨ੍ਤਿ ਤਂ ਉਪ੍ਪਤ੍ਤਿਕਾਰਣਂ. ਯਦਿ ਹਿ ਮਯਾ ‘‘ਵਿਞ੍ਞੂਹੀ’’ਤਿ ਪਦਂ ਪਕ੍ਖਿਪਿਤ੍ਵਾ ਵੁਤ੍ਤਂ ਭਵੇਯ੍ਯ, ਪਞ੍ਹਾ ਮੇ ਪਰਿਪੁਣ੍ਣਾ ਭਵੇਯ੍ਯ, ਨ ਪਨ ਵੁਤ੍ਤਾ. ਇਦਾਨਿ ਪਨ ਤਂ ਕਾਰਣਂ ਉਤ੍ਤਰਂ ਆਯਸ੍ਮਤਾ ਆਨਨ੍ਦੇਨ ‘‘ਵਿਞ੍ਞੂਹੀ’’ਤਿ ਏਵਂ ਵਦਨ੍ਤੇਨ ਪਰਿਪੂਰਿਤਂ.

੩੬੦. ਕੋਸਲ੍ਲਪਟਿਪਕ੍ਖਤੋ ਅਕੋਸਲ੍ਲਂ ਵੁਚ੍ਚਤਿ ਅਵਿਜ੍ਜਾ, ਤਂਸਮੁਟ੍ਠਾਨਤੋ ਅਕੋਸਲ੍ਲਸਮ੍ਭੂਤੋ. ਅਵਜ੍ਜਂ ਵੁਚ੍ਚਤਿ ਗਰਹਿਤਬ੍ਬਂ, ਸਹ ਅਵਜ੍ਜੇਹੀਤਿ ਸਾਵਜ੍ਜੋ, ਗਾਰਯ੍ਹੋ. ਰਾਗਾਦਿਦੋਸੇਹਿ ਸਦੋਸੋ. ਤੇਹਿ ਏਵ ਸਬ੍ਯਾਬਜ੍ਝੋ, ਤਤੋ ਏਵ ਸਮ੍ਪਤਿ ਆਯਤਿਞ੍ਚ ਸਦੁਕ੍ਖੋ. ਸਬ੍ਯਾਬਜ੍ਝਾਦਿਕੋ ਨਿਸ੍ਸਨ੍ਦਵਿਪਾਕੋ.

ਤਥਾ ਅਤ੍ਥੋ ਵੁਤ੍ਤੋ ਭਵੇਯ੍ਯਾਤਿ ਪੁਚ੍ਛਾਸਭਾਗੇਨਪਿ ਅਤ੍ਥੋ ਵੁਤ੍ਤੋ ਭਵੇਯ੍ਯ, ਪੁਚ੍ਛਨ੍ਤਸ੍ਸ ਪਨ ਨ ਤਾਵ ਚਿਤ੍ਤਾਰਾਧਨਂ. ਤੇਨਾਹ – ‘‘ਏਵਂ ਬ੍ਯਾਕਰਣਂ ਪਨ ਨ ਭਾਰਿਯ’’ਨ੍ਤਿ, ਗਰੁਕਰਣਂ ਨ ਹੋਤਿ ਵਿਸਾਰਜ੍ਜਂ ਨ ਸਿਯਾਤਿ ਅਧਿਪ੍ਪਾਯੋ. ਤੇਨਾਹ – ‘‘ਅਪ੍ਪਹੀਨਅਕੁਸਲੋਪਿ ਹਿ ਪਹਾਨਂ ਵਣ੍ਣੇਯ੍ਯਾ’’ਤਿ. ਏਵਰੂਪੋ ਪਨ ਯਥਾਕਾਰੀ ਤਥਾਵਾਦੀ ਨ ਹੋਤਿ, ਨ ਏਵਂ ਭਗਵਾਤਿ ਆਹ ‘‘ਭਗਵਾ’’ਤਿਆਦਿ. ਏਵਂ ਬ੍ਯਾਕਾਸੀਤਿ ‘‘ਸਬ੍ਬਾਕੁਸਲਧਮ੍ਮਪਹੀਨੋ ਖੋ, ਮਹਾਰਾਜ, ਤਥਾਗਤੋ’’ਤਿ ਏਵਂ ਬ੍ਯਾਕਾਸਿ. ਸੁਕ੍ਕਪਕ੍ਖੇਪਿ ਏਸੇਵ ਨਯੋਤਿ ਇਮਿਨਾ ‘‘ਸਬ੍ਬੇਸਂਯੇਵ ਕੁਸਲਾਨਂ ਧਮ੍ਮਾਨਂ ਉਪਸਮ੍ਪਦਂ ਵਣ੍ਣੇਤੀ’’ਤਿ ਵੁਤ੍ਤੇ ਯਥਾ ਪੁਚ੍ਛਾ, ਤਥਾ ਅਤ੍ਥੋ ਵੁਤ੍ਤੋ ਭਵੇਯ੍ਯ, ਏਵਂ ਬ੍ਯਾਕਰਣਂ ਪਨ ਨ ਭਾਰਿਯਂ, ਅਸਮ੍ਪਾਦਿਤਕੁਸਲਧਮ੍ਮੋਪਿ ਉਪਸਮ੍ਪਦਂ ਵਣ੍ਣੇਯ੍ਯ. ਭਗਵਾ ਪਨ ਸਮ੍ਮਦੇਵ ਸਮ੍ਪਾਦਿਤਕੁਸਲਤ੍ਤਾ ਯਥਾਕਾਰੀ ਤਥਾਵਾਦੀਤਿ ਦਸ੍ਸੇਤੁਂ ‘‘ਏਵਂ ਬ੍ਯਾਕਾਸੀ’’ਤਿ ਇਮਮਤ੍ਥਂ ਦਸ੍ਸੇਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਬਾਹਿਤਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੯. ਧਮ੍ਮਚੇਤਿਯਸੁਤ੍ਤਵਣ੍ਣਨਾ

੩੬੪. ਮੇਦਵਣ੍ਣਾ ਉਲ਼ੁਪਵਣ੍ਣਾ ਚ ਤਤ੍ਥ ਤਤ੍ਥ ਪਾਸਾਣਾ ਉਸ੍ਸਨ੍ਨਾ ਅਹੇਸੁਨ੍ਤਿ ਮੇਦਾਲ਼ੁਪਨ੍ਤਿ ਗਾਮਸ੍ਸ ਸਮਞ੍ਞਾ ਜਾਤਾ. ਉਲ਼ੁਪਵਣ੍ਣਾਤਿ ਚਨ੍ਦਸਮਾਨਵਣ੍ਣਤਾਯ ਮੇਦਪਾਸਾਣਾ ਵੁਤ੍ਤਾਤਿ ਕੇਚਿ. ਅਟ੍ਠਕਥਾਯਂ ਪਨ ‘‘ਮੇਦਵਣ੍ਣਾ ਪਾਸਾਣਾ ਕਿਰੇਤ੍ਥ ਉਸ੍ਸਨ੍ਨਾ ਅਹੇਸੁ’’ਨ੍ਤਿ ਇਦਂ ਵੁਤ੍ਤਂ. ਅਸ੍ਸਾਤਿ ਸੇਨਾਪਤਿਸ੍ਸ. ਕਥਾਸਮੁਟ੍ਠਾਪਨਤ੍ਥਨ੍ਤਿ ਮਲ੍ਲਿਕਾਯ ਸੋਕਵਿਨੋਦਨਧਮ੍ਮਕਥਾਸਮੁਟ੍ਠਾਪਨਤ੍ਥਂ.

ਰਞ੍ਞਾਤਿ ਪਸੇਨਦੀਕੋਸਲਰਞ੍ਞਾ. ਮਹਚ੍ਚਾਤਿ ਮਹਤਿਯਾ. ਪਦਵਿਪਲ੍ਲਾਸੇਨ ਚੇਤਂ ਵੁਤ੍ਤਂ. ਪਸਾਦਮਰਹਨ੍ਤੀਤਿ ਪਾਸਾਦਿਕਾਨਿ. ਤੇਨਾਹ ‘‘ਸਹ ਰਞ੍ਜਨਕਾਨੀ’’ਤਿ. ਯਾਨਿ ਪਨ ਪਾਸਾਦਿਕਾਨਿ, ਤਾਨਿ ਪਸ੍ਸਿਤੁਂ ਯੁਤ੍ਤਾਨਿ. ਪਾਸਾਦਿਕਾਨੀਤਿ ਵਾ ਸਦ੍ਦਹਨਸਹਿਤਾਨਿ. ਤੇਨਾਹ ‘‘ਪਸਾਦਜਨਕਾਨੀ’’ਤਿ. ‘‘ਅਪ੍ਪਾਬਾਧ’’ਨ੍ਤਿ ਆਦੀਸੁ ਵਿਯ ਅਪ੍ਪਸਦ੍ਦੋ ਅਭਾਵਤ੍ਥੋਤਿ ਆਹ ‘‘ਨਿਸ੍ਸਦ੍ਦਾਨੀ’’ਤਿ. ਅਨਿਯਮਤ੍ਥਵਾਚੀ ਯ-ਸਦ੍ਦੋ ਅਨਿਯਮਾਕਾਰਵਾਚਕੋਪਿ ਹੋਤੀਤਿ ‘‘ਯਤ੍ਥਾ’’ਤਿ ਪਦਸ੍ਸ ‘‘ਯਾਦਿਸੇਸੂ’’ਤਿਆਦਿਮਾਹ. ਤਥਾ ਹਿ ਅਙ੍ਗੁਲਿਮਾਲਸੁਤ੍ਤੇ (ਮ. ਨਿ. ਅਟ੍ਠ. ੨.੩੪੭ ਆਦਯੋ) ‘‘ਯਸ੍ਸ ਖੋ’’ਤਿ ਪਦਸ੍ਸ ‘‘ਯਾਦਿਸਸ੍ਸ ਖੋ’’ਤਿ ਅਤ੍ਥੋ ਵੁਤ੍ਤੋ.

੩੬੬. ਪਟਿਚ੍ਛਦਨ੍ਤਿ ਪਟਿਚ੍ਛਾਦਕਂ. ਰਾਜਕਕੁਧਭਣ੍ਡਾਨੀਤਿ ਰਾਜਭਣ੍ਡਭੂਤਾਨਿ. ਰਹਾਯਤੀਤਿ ਰਹੋ ਕਰੋਤਿ, ਮਂ ਅਜ੍ਝੇਸਤੀਤਿ ਅਤ੍ਥੋ.

੩੬੭. ਯਥਾਸਭਾਵਤੋ ਞੇਯ੍ਯਂ ਧਾਰੇਤਿ ਅਵਧਾਰੇਤੀਤਿ ਧਮ੍ਮੋ, ਞਾਣਨ੍ਤਿ ਆਹ ‘‘ਪਚ੍ਚਕ੍ਖਞਾਣਸਙ੍ਖਾਤਸ੍ਸ ਧਮ੍ਮਸ੍ਸਾ’’ਤਿ. ਅਨੁਨਯੋਤਿ ਅਨੁਗਚ੍ਛਨਕੋ. ਦਿਟ੍ਠੇਨ ਹਿ ਅਦਿਟ੍ਠਸ੍ਸ ਅਨੁਮਾਨਂ. ਤੇਨਾਹ ‘‘ਅਨੁਮਾਨਂ ਅਨੁਬੁਦ੍ਧੀ’’ਤਿ. ਆਪਾਣਕੋਟਿਕਨ੍ਤਿ ਯਾਵ ਪਾਣਕੋਟਿ, ਤਾਵ ਜੀਵਿਤਪਰਿਯੋਸਾਨਂ. ਏਤਨ੍ਤਿ ਧਮ੍ਮਨ੍ਵਯਸਙ੍ਖਾਤਂ ਅਨੁਮਾਨਂ. ਏਵਨ੍ਤਿ ‘‘ਇਧ ਪਨਾਹ’’ਨ੍ਤਿ ਵੁਤ੍ਤਪ੍ਪਕਾਰੇਨ.

੩੬੯. ਚਕ੍ਖੁਂ ਅਬਨ੍ਧਨ੍ਤੇ ਵਿਯਾਤਿ ਅਪਾਸਾਦਿਕਤਾਯ ਪਸ੍ਸਨ੍ਤਾਨਂ ਚਕ੍ਖੁਂ ਅਤ੍ਤਨਿ ਅਬਨ੍ਧਨ੍ਤੇ ਵਿਯ. ਕੁਲਸਨ੍ਤਾਨਾਨੁਬਨ੍ਧੋ ਰੋਗੋ ਕੁਲਰੋਗੋ. ਉਲ਼ਾਰਨ੍ਤਿ ਸਾਨੁਭਾਵਂ. ਯੋ ਹਿ ਆਨੁਭਾਵਸਮ੍ਪਨ੍ਨੋ, ਤਂ ‘‘ਮਹੇਸਕ੍ਖ’’ਨ੍ਤਿ ਵਦਨ੍ਤਿ. ਅਰਹਤ੍ਤਂ ਗਣ੍ਹਨ੍ਤੋਤਿ ਉਕ੍ਕਟ੍ਠਨਿਦ੍ਦੇਸੋਯਂ, ਹੇਟ੍ਠਿਮਫਲਾਨਿ ਗਣ੍ਹਨ੍ਤੋਪਿ.

੩੭੩. ਜੀਵਿਕਾ ਜੀਵਿਤਵੁਤ੍ਤਿ.

੩੭੪. ਧਮ੍ਮਂ ਚੇਤੇਤਿ ਸਂਵੇਦੇਤਿ ਏਤੇਹੀਤਿ ਧਮ੍ਮਚੇਤਿਯਾਨਿ, ਧਮ੍ਮਸ੍ਸ ਪੂਜਾਵਚਨਾਨਿ. ਨਨੁ ਚੇਤਾਨਿ ਬੁਦ੍ਧਸਙ੍ਘਗੁਣਦੀਪਨਾਨਿਪਿ ਸਨ੍ਤਿ? ਕਥਂ ‘‘ਧਮ੍ਮਚੇਤਿਯਾਨੀਤਿ ਧਮ੍ਮਸ੍ਸ ਚਿਤ੍ਤੀਕਾਰਵਚਨਾਨੀ’’ਤਿ ਵੁਤ੍ਤਨ੍ਤਿ ਆਹ ‘‘ਤੀਸੁ ਹੀ’’ਤਿਆਦਿ. ਤਤ੍ਥ ਯਸ੍ਮਾ ਬੁਦ੍ਧਰਤਨਮੂਲਕਾਨਿ ਸੇਸਰਤਨਾਨਿ ਤਸ੍ਸ ਵਸੇਨ ਲਦ੍ਧਬ੍ਬਤੋ. ਕੋਸਲਰਞ੍ਞਾ ਚੇਤ੍ਥ ਬੁਦ੍ਧਗਾਰਵੇਨ ਧਮ੍ਮਸਙ੍ਘਗਾਰਵਂ ਪਵੇਦਿਤਂ, ਤਸ੍ਮਾ ‘‘ਭਗਵਤਿ ਚਿਤ੍ਤੀਕਾਰੇ ਕਤੇ ਧਮ੍ਮੋਪਿ ਕਤੋਵ ਹੋਤੀ’’ਤਿ ਵੁਤ੍ਤਂ. ਯਸ੍ਮਾ ਚ ਰਤਨਤ੍ਤਯਪਸਾਦਪੁਬ੍ਬਿਕਾ ਸਾਸਨੇ ਸਮ੍ਮਾਪਟਿਪਤ੍ਤਿ, ਤਸ੍ਮਾ ਵੁਤ੍ਤਂ – ‘‘ਆਦਿਬ੍ਰਹ੍ਮਚਰਿਯਕਾਨੀਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਆਦਿਭੂਤਾਨੀ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਧਮ੍ਮਚੇਤਿਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

੧੦. ਕਣ੍ਣਕਤ੍ਥਲਸੁਤ੍ਤਵਣ੍ਣਨਾ

੩੭੫. ਅਨਨ੍ਤਰਸੁਤ੍ਤੇ ਵੁਤ੍ਤਕਰਣੀਯੇਨੇਵਾਤਿ ‘‘ਪਾਸਾਦੇ ਵਾ ਨਾਟਕੇਸੁ ਵਾ ਚਿਤ੍ਤਸ੍ਸਾਦਂ ਅਲਭਮਾਨੋ ਤਤ੍ਥ ਤਤ੍ਥ ਵਿਚਰਿਤੁਂ ਆਰਦ੍ਧੋ’’ਤਿ ਵੁਤ੍ਤਕਰਣੀਯੇਨ. ਅਪ੍ਪਦੁਟ੍ਠਪਦੋਸੀਨਞ੍ਹਿ ਏਵਂ ਹੋਤੀਤਿ.

੩੭੬. ਪੁਚ੍ਛਿਤੋਤਿ ‘‘ਅਞ੍ਞਂ ਦੂਤਂ ਨਾਲਤ੍ਥੁ’’ਨ੍ਤਿ ਪੁਚ੍ਛਿਤੋ. ਸੋਤਿ ਰਾਜਾ. ਤਾਸਂ ਵਨ੍ਦਨਾ ਸਚੇ ਉਤ੍ਤਰਕਾਲਂ, ਅਤ੍ਤਨੋ ਆਗਮਨਕਾਰਣਂ ਕਥੇਸ੍ਸਤਿ.

੩੭੮. ਏਕਾਵਜ੍ਜਨੇਨਾਤਿ ਏਕਵੀਥਿਜਵਨੇਨ. ਤੇਨ ਏਕਚਿਤ੍ਤਂ ਤਾਵ ਤਿਟ੍ਠਤੁ, ਏਕਚਿਤ੍ਤਵੀਥਿਯਾਪਿ ਸਬ੍ਬਂ ਜਾਨਿਤੁਂ ਨ ਸਕ੍ਕਾਤਿ ਦਸ੍ਸੇਤਿ. ‘‘ਇਦਂ ਨਾਮ ਅਤੀਤਂ ਜਾਨਿਸ੍ਸਾਮੀ’’ਤਿ ਅਨਿਯਮੇਤ੍ਵਾ ਆਵਜ੍ਜਤੋ ਯਂ ਕਿਞ੍ਚਿ ਅਤੀਤਂ ਜਾਨਾਤਿ, ਨਿਯਮਿਤੇ ਪਨ ਨਿਯਮਿਤਮੇਵਾਤਿ ਆਹ – ‘‘ਏਕੇਨ ਹਿ…ਪੇ… ਏਕਦੇਸਮੇਵ ਜਾਨਾਤੀ’’ਤਿ. ਤੇਨ ਚਿਤ੍ਤੇਨਾਤਿ ‘‘ਅਤੀਤਂ ਸਬ੍ਬਂ ਜਾਨਿਸ੍ਸਾਮੀ’’ਤਿ ਏਵਂ ਪਵਤ੍ਤਚਿਤ੍ਤੇਨ. ਇਤਰੇਸੂਤਿ ਅਨਾਗਤਪਚ੍ਚੁਪ੍ਪਨ੍ਨੇਸੁ. ਕਾਰਣਜਾਤਿਕਨ੍ਤਿ ਯੁਤ੍ਤਿਸਭਾਵਂ, ਯੁਤ੍ਤਿਯਾ ਯੁਤ੍ਤਨ੍ਤਿ ਅਤ੍ਥੋ. ਸਮ੍ਪਰਾਯਗੁਣਨ੍ਤਿ ਸਮ੍ਪਰਾਯੇ ਕਤਕਮ੍ਮਸ੍ਸ ਵਿਸੇਸਂ.

੩੭੯. ਲੋਕੁਤ੍ਤਰਮਿਸ੍ਸਕਾਨਿ ਕਥਿਤਾਨਿ ਬੋਧਿਰਾਜਕੁਮਾਰਸੁਤ੍ਤੇ ਵਿਯ ਲੋਕਿਯਾ ਚੇਵ ਲੋਕੁਤ੍ਤਰਾ ਚ. ਯਥਾਲਾਭਵਸੇਨ ਚੇਤ੍ਥ ਪਧਾਨਿਯਙ੍ਗਾਨਂ ਲੋਕੁਤ੍ਤਰਗ੍ਗਹਣਂ ਵੇਦਿਤਬ੍ਬਂ. ਪਚ੍ਚੇਕਂ ਏਵ ਨੇਸਞ੍ਚ ਪਧਾਨਿਯਙ੍ਗਤਾ ਦਟ੍ਠਬ੍ਬਾ ਯਥਾ ‘‘ਅਟ੍ਠਵਿਮੋਕ੍ਖਾ ਸਨ੍ਦਿਸ੍ਸਨ੍ਤਿ ਲੋਕੁਤ੍ਤਰਮਿਸ੍ਸਕਾ’’ਤਿ. ਲੋਕੁਤ੍ਤਰਾਨੇਵਾਤਿ ਚੇਤ੍ਥ ਯਂ ਵਤ੍ਤਬ੍ਬਂ, ਤਂ ਪਰਤੋ ਆਵਿ ਭਵਿਸ੍ਸਤਿ. ਪਧਾਨਨਾਨਤ੍ਤਨ੍ਤਿ ਪਦਹਨਨਾਨਤ੍ਤਂ, ਭਾਵਨਾਨੁਯੋਗਵਿਸੇਸਨ੍ਤਿ ਅਤ੍ਥੋ. ਸਙ੍ਖਾਰੇ ਪਰਿਮਦ੍ਦਿਤ੍ਵਾ ਪਟਿਪਕ੍ਖਧਮ੍ਮੇ ਏਕਦੇਸਤੋ ਪਜਹਿਤ੍ਵਾ ਠਿਤਸ੍ਸ ਭਾਵਨਾਨੁਯੋਗੋ ਸਬ੍ਬੇਨ ਸਬ੍ਬਂ ਅਪਰਿਮਦ੍ਦਿਤਸਙ੍ਖਾਰਸ੍ਸ ਅਪ੍ਪਹੀਨਪਟਿਪਕ੍ਖਸ੍ਸ ਭਾਵਨਾਨੁਯੋਗਤੋ ਸੁਖੁਮੋ ਵਿਸਦੋਵ ਹੋਤਿ, ਸਚ੍ਚਾਭਿਸਮਯੇਨ ਸਨ੍ਤਾਨਸ੍ਸ ਆਹਿਤਵਿਸੇਸਤ੍ਤਾਤਿ ਆਹ – ‘‘ਅਞ੍ਞਾਦਿਸਮੇਵ ਹਿ ਪੁਥੁਜ੍ਜਨਸ੍ਸ ਪਧਾਨਂ, ਅਞ੍ਞਾਦਿਸਂ ਸੋਤਾਪਨ੍ਨਸ੍ਸਾ’’ਤਿਆਦਿ. ਅਯਞ੍ਚ ਵਿਸੇਸੋ ਨ ਕੇਵਲਂ ਅਨਰਿਯਅਰਿਯਪੁਗ੍ਗਲਤੋ ਏਵ, ਅਥ ਖੋ ਅਰਿਯੇਸੁਪਿ ਸੇਕ੍ਖਾਦਿਵਿਸੇਸਤੋਪਿ ਲਬ੍ਭਤਿ ਅਭਿਸਙ੍ਖਾਰਵਿਸੇਸਤੋ ਅਭਿਨੀਹਾਰਤੋ ਚ ਇਜ੍ਝਨਤੋਤਿ ਦਸ੍ਸੇਨ੍ਤੋ ‘‘ਅਞ੍ਞਾਦਿਸਂ ਸਕਦਾਗਾਮਿਨੋ’’ਤਿਆਦਿਮਾਹ. ਨ ਪਾਪੁਣਾਤੀਤਿ ਯਸ੍ਮਾ ਪੁਥੁਜ੍ਜਨੋ ਸਬ੍ਬਥਾਵ ਪਧਾਨਂ ਪਦਹਨ੍ਤੋ ਸੋਤਾਪਤ੍ਤਿਮਗ੍ਗਂ ਅਧਿਗਚ੍ਛਤਿ, ਸੋਤਾਪਨ੍ਨੋ ਚ ਸਕਦਾਗਾਮਿਮਗ੍ਗਨ੍ਤਿ ਹੇਟ੍ਠਿਮਂ ਉਪਰਿਮਤੋ ਓਲ਼ਾਰਿਕਂ, ਉਪਰਿਮਞ੍ਚ ਇਤਰਤੋ ਸੁਖੁਮਂ ਤੇਨ ਪਹਾਤੁਂ ਅਸਕ੍ਕੁਣੇਯ੍ਯਸ੍ਸ ਪਜਹਨਤੋ, ਇਤਿ ਅਧਿਗਨ੍ਤਬ੍ਬਵਿਸੇਸੇਨ ਚ ਅਧਿਗਮਪਟਿਪਦਾਯ ਸਣ੍ਹਸੁਖੁਮਤਾ ਤਿਕ੍ਖਵਿਸਦਤਾ ਚ ਵਿਞ੍ਞਾਯਤੀਤਿ ਆਹ – ‘‘ਪੁਥੁਜ੍ਜਨਸ੍ਸ ਪਧਾਨਂ ਸੋਤਾਪਨ੍ਨਸ੍ਸ ਪਧਾਨਂ ਨ ਪਾਪੁਣਾਤੀ’’ਤਿਆਦਿ.

ਅਕੂਟਕਰਣਨ੍ਤਿ ਅਵਞ੍ਚਨਕਿਰਿਯਂ. ਅਨਵਚ੍ਛਿਨ੍ਦਨਨ੍ਤਿ ਅਤਿਯਾਨਂ. ਅਵਿਞ੍ਛਨਂ ਨ ਆਕਡ੍ਢਨਂ, ਨਿਯੁਤ੍ਤਤਂ ਵਿਨਿਵੇਠੇਤ੍ਵਾ ਸਮਨ੍ਤਾ ਵਿਪਰਿਵਤ੍ਤਿਤ੍ਵਾ ਸਮਧਾਰਾਯ ਛਡ੍ਡਨਂ ਵਾ. ਤਸ੍ਸ ਕਾਰਣਂ ਤਂਕਾਰਣਂ, ਤਂ ਕਾਰਣਨ੍ਤਿ ਵਾ ਤਂ ਕਿਰਿਯਂ ਤਂ ਅਧਿਕਾਰਂ. ਦਨ੍ਤੇਹਿ ਗਨ੍ਤਬ੍ਬਭੂਮਿਨ੍ਤਿ ਦਨ੍ਤੇਹਿ ਪਤ੍ਤਬ੍ਬਟ੍ਠਾਨਂ, ਪਤ੍ਤਬ੍ਬਵਤ੍ਥੁਂ ਵਾ. ਚਤ੍ਤਾਰੋਪਿ ਅਸ੍ਸਦ੍ਧਾ ਨਾਮ ਉਪਰਿਮਉਪਰਿਮਸਦ੍ਧਾਯ ਅਭਾਵਤੋ. ਯੇਨ ਹਿ ਯਂ ਅਪ੍ਪਤ੍ਤਂ, ਤਸ੍ਸ ਤਂ ਨਤ੍ਥਿ. ਅਰਿਯਸਾਵਕਸ੍ਸ…ਪੇ… ਨਤ੍ਥਿ ਪਠਮਮਗ੍ਗੇਨੇਵ ਮਾਯਾਸਾਠੇਯ੍ਯਾਨਂ ਪਹਾਤਬ੍ਬਤ੍ਤਾ. ਤੇਨੇਵਾਤਿ ਸਮ੍ਮਦੇਵ ਵਿਰੁਦ੍ਧਪਕ੍ਖਾਨਂ ਸਦ੍ਧਾਦੀਨਂ ਇਧਾਧਿਪ੍ਪੇਤਤ੍ਤਾ. ਯਦਿ ਏਵਂ ਕਥਂ ਮਿਸ੍ਸਕਕਥਾਤਿ ਆਹ ‘‘ਅਸ੍ਸਖਲ਼ੁਙ੍ਕਸੁਤ੍ਤਨ੍ਤੇ ਪਨਾ’’ਤਿਆਦਿ. ਚਤ੍ਤਾਰੋਵ ਹੋਨ੍ਤਿ ਪੁਥੁਜ੍ਜਨਾਦਿਵਸੇਨ.

ਓਪਮ੍ਮਸਂਸਨ੍ਦਨੇ ਅਦਨ੍ਤਹਤ੍ਥਿਆਦਯੋ ਵਿਯਾਤਿਆਦਿਨਾ ਕਣ੍ਹਪਕ੍ਖੇ, ਯਥਾ ਪਨ ਦਨ੍ਤਹਤ੍ਥਿਆਦਯੋਤਿਆਦਿਨਾ ਸੁਕ੍ਕਪਕ੍ਖੇ ਚ ਸਾਧਾਰਣਤੋ ਏਕਜ੍ਝਂ ਕਤ੍ਵਾ ਵੁਤ੍ਤਂ, ਅਸਾਧਾਰਣਤੋ ਭਿਨ੍ਦਿਤ੍ਵਾ ਦਸ੍ਸੇਤੁਂ ‘‘ਇਦਂ ਵੁਤ੍ਤਂ ਹੋਤੀ’’ਤਿਆਦਿ ਵੁਤ੍ਤਂ.

੩੮੦. ਸਮ੍ਮਪ੍ਪਧਾਨਾ ਨਿਬ੍ਬਿਸਿਟ੍ਠਵੀਰਿਯਾ. ਤੇਨਾਹ – ‘‘ਨ ਕਿਞ੍ਚਿ ਨਾਨਾਕਰਣਂ ਵਦਾਮਿ, ਯਦਿਦਂ ਵਿਮੁਤ੍ਤਿਯਾ ਵਿਮੁਤ੍ਤਿ’’ਨ੍ਤਿ. ਨ ਹਿ ਸੁਕ੍ਖਵਿਪਸ੍ਸਕਤੇਵਿਜ੍ਜਛਲ਼ਭਿਞ੍ਞਾਨਂ ਵਿਮੁਤ੍ਤਿਯਾ ਨਾਨਾਕਰਣਂ ਅਤ੍ਥਿ. ਤੇਨ ਵੁਤ੍ਤਂ ‘‘ਯਂ ਏਕਸ੍ਸਾ’’ਤਿਆਦਿ. ਕਿਂ ਤ੍ਵਂ ਨ ਜਾਨਾਸੀਤਿ ਸਮ੍ਬਨ੍ਧੋ. ਆਗਚ੍ਛਨ੍ਤੀਤਿ ਉਪ੍ਪਜ੍ਜਨਵਸੇਨ ਆਗਚ੍ਛਨ੍ਤਿ. ਨਾਗਚ੍ਛਨ੍ਤੀਤਿ ਏਤ੍ਥਾਪਿ ਏਸੇਵ ਨਯੋ. ਇਦਂ ਪੁਚ੍ਛਨ੍ਤੋਤਿ ਇਦਂ ਪੁਚ੍ਛਾਮੀਤਿ ਦਸ੍ਸੇਨ੍ਤੋ. ਅਪ੍ਪਹੀਨਚੇਤਸਿਕਦੁਕ੍ਖਾ ਅਨਧਿਗਤਅਨਾਗਾਮਿਤਾ. ਤੇਨਾਹ ‘‘ਉਪਪਤ੍ਤਿਵਸੇਨ ਆਗਨ੍ਤਾਰੋ’’ਤਿ. ਸਮੁਚ੍ਛਿਨ੍ਨਦੁਕ੍ਖਾਤਿ ਸਮੁਗ੍ਘਾਟਿਤਚੇਤਸਿਕਦੁਕ੍ਖਾ.

੩੮੧. ਤਮ੍ਹਾ ਠਾਨਾਤਿ ਤਤੋ ਯਥਾਧਿਗਤਇਸ੍ਸਰਿਯਟ੍ਠਾਨਤੋ. ਪੁਨ ਤਮ੍ਹਾ ਠਾਨਾਤਿ ਤਤੋ ਦੁਗ੍ਗਤਾ. ਸਮ੍ਪਨ੍ਨਕਾਮਗੁਣਨ੍ਤਿ ਉਲ਼ਾਰਕਾਮਗੁਣਸਮਨ੍ਨਾਗਤਂ.