੮. ਅਭਯਰਾਜਕੁਮਾਰਸੁਤ੍ਤਵਣ੍ਣਨਾ

੮੩. ਜਾਤਿਯਾ ਅਸਮਾਨੋ ਨਿਹੀਨਾਚਰਿਯੋ ਪਰਦਤ੍ਤੂਪਜੀਵਿਕਾਯ ਮਾਤੁਯਾ ਕੁਚ੍ਛਿਯਂ ਜਾਤੋ ਪਾਦਸਿਕਪੁਤ੍ਤੋ. ਨਿਨ੍ਦਾਵਸੇਨ ਵਦਤਿ ਏਤੇਨਾਤਿ ਵਾਦੋ ਅਗੁਣੋਤਿ ਆਹ – ‘‘ਵਾਦਂ ਆਰੋਪੇਹੀਤਿ ਦੋਸਂ ਆਰੋਪੇਹੀ’’ਤਿ. ਨਿਬ੍ਬਤ੍ਤਵਸੇਨ ਨਿਰਯਂ ਅਰਹਤਿ, ਨਿਰਯਸਂਵਤ੍ਤਨਿਯੇਨ ਵਾ ਕਮ੍ਮੇਨ ਨਿਰਯੇ ਨਿਯੁਤ੍ਤੋ ਨੇਰਯਿਕੋ. ਆਪਾਯਿਕੋਤਿ ਏਤ੍ਥਾਪਿ ਏਸੇਵ ਨਯੋ. ਅਵੀਚਿਮ੍ਹਿ ਉਪ੍ਪਜ੍ਜਿਤ੍ਵਾ ਤਤ੍ਥ ਆਯੁਕਪ੍ਪਸਞ੍ਞਿਤਂ ਅਨ੍ਤਰਕਪ੍ਪਂ ਤਿਟ੍ਠਤੀਤਿ ਕਪ੍ਪਟ੍ਠੋ. ਨਿਰਯੂਪਪਤ੍ਤਿਪਰਿਹਰਣਵਸੇਨ ਤਿਕਿਚ੍ਛਿਤੁਂ ਸਕ੍ਕੁਣੇਯ੍ਯੋਤਿ ਤੇਕਿਚ੍ਛੋ, ਨ ਤੇਕਿਚ੍ਛੋ ਅਤੇਕਿਚ੍ਛੋ. ਦ੍ਵੇ ਅਨ੍ਤੇ ਮੋਚੇਤ੍ਵਾਤਿ ਫਰੁਸਂ ਵਾ ਅਪ੍ਪਿਯਂ ਵਾ ਕਪ੍ਪੇਯ੍ਯਾਤਿ ਦ੍ਵੇ ਕੋਟ੍ਠਾਸੇ ਮੁਞ੍ਚਿਤ੍ਵਾ ਤੇ ਅਨਾਮਸਿਤ੍ਵਾ ਪੁਚ੍ਛਿਤਂ ਅਤ੍ਥਂ ਤਤੋ ਬਹਿ ਕਰੋਨ੍ਤੋ ਉਗ੍ਗਿਲਤਿ ਨਾਮ. ਤਂ ਪਨ ਏਵਂ ਕਾਤੁਂ ਨ ਸਕ੍ਕੋਤੀਤਿ ਆਹ – ‘‘ਉਗ੍ਗਿਲਿਤੁਂ ਬਹਿ ਨੀਹਰਿਤੁਂ ਨ ਸਕ੍ਖਿਤੀ’’ਤਿ. ਏਵਮੇਵਾਯਂ ਪੁਚ੍ਛਾ ਨ ਗਹੇਤਬ੍ਬਾ, ਅਯਮੇਤ੍ਥ ਦੋਸੋਤਿ ਤਂ ਅਪੁਚ੍ਛਂ ਕਰੋਨ੍ਤੋ ਅਪਨਯਨ੍ਤੋ ਓਗਿਲਤਿ ਨਾਮ, ਤਥਾ ਪਨ ਅਸਕ੍ਕੋਨ੍ਤੋ ਪਤਿਟ੍ਠਾਪੇਨ੍ਤੋ ਨ ਓਗਿਲਤਿ ਨਾਮ, ਭਗਵਾ ਪਨ ਤਮਤ੍ਥਂ ਓਕਾਸਮ੍ਪਿ ਅਕਰੋਨ੍ਤੋ ਉਭਯਥਾਪਿ ਅਸਕ੍ਖੀਤਿ ਵੇਦਿਤਬ੍ਬੋ. ਕਥਂ? ਭਗਵਾ ਹਿ ‘‘ਨ ਖ੍ਵੇਤ੍ਥ ਰਾਜਕੁਮਾਰ ਏਕਂਸੇਨਾ’’ਤਿ ਵਦਨ੍ਤੋ ਨਿਗਣ੍ਠਸ੍ਸ ਅਧਿਪ੍ਪਾਯਂ ਵਿਪਰਿਵਤ੍ਤੇਤਿ, ਉਭੋ ਅਨ੍ਤੇ ਮੋਚੇਤ੍ਵਾ ਪਞ੍ਹਂ ਵਿਸ੍ਸਜ੍ਜੇਸਿ, ਏਵਂ ਤਾਵ ਉਗ੍ਗਿਲਿਤੁਂ ਅਸਕ੍ਖਿ. ‘‘ਨ ਤਤ੍ਰ ਰਾਜਕੁਮਾਰ ਏਕਂਸੇਨਾ’’ਤਿ ਵਦਨ੍ਤੋ ਏਵ ਚ ‘‘ਨਾਯਂ ਪੁਚ੍ਛਾ ਏਵਂ ਅਵਿਭਾਗੇਨ ਪੁਚ੍ਛਿਤਬ੍ਬਾ, ਵਿਭਜਿਤ੍ਵਾ ਪਨ ਪੁਚ੍ਛਿਤਬ੍ਬਾ’’ਤਿ ਪੁਚ੍ਛਾਯ ਦੋਸਂ ਦੀਪੇਨ੍ਤੋ ਤਂ ਹਾਰੇਨ੍ਤੋ ਓਗਿਲਿਤੁਮ੍ਪਿ ਸਕ੍ਖਤੀਤਿ.

ਉਟ੍ਠਾਤੁਂ ਨ ਸਕ੍ਖਿਸ੍ਸਤਿ ਚਿਤ੍ਤਸ੍ਸ ਅਞ੍ਞਥਾ ਪਵਤ੍ਤਿਯਾ. ਅਭਯੋ ਦ੍ਵੇ ਮਗ੍ਗੇ ਕਤਪਰਿਚਯੋ ਛੇਕੋ ਨਿਪੁਣੋ ਵਾਦਸੀਲੋ ਚ ਹੁਤ੍ਵਾ ਵਿਚਰਤਿ. ਤੇਨਾਹ – ‘‘ਸੋ ਵਾਦਜ੍ਝਾਸਯਤਾਯ ਤਸ੍ਸ ਵਚਨਂ ਸਮ੍ਪਟਿਚ੍ਛਨ੍ਤੋ ‘ਏਵਂ, ਭਨ੍ਤੇ’ਤਿ ਆਹਾ’’ਤਿ.

੮੫. ਏਵਰੂਪਨ੍ਤਿ ਯਾ ਪਰੇਸਂ ਅਪ੍ਪਿਯਾ ਅਮਨਾਪਾ ਦੁਰੁਤ੍ਤਵਾਚਾ, ਏਵਰੂਪਾ ਵਾਚਾ, ਨ ਪਨ ਫਰੁਸਵਾਚਾ. ਫਰੁਸਵਾਚਾਯ ਹਿ ਸੇਤੁਘਾਤੋ ਤਥਾਗਤਾਨਂ. ਚੇਤਨਾਫਰੁਸਤਾਯ ਹਿ ਫਰੁਸਵਾਚਾ ਇਚ੍ਛਿਤਾ, ਨ ਪਰੇਸਂ ਅਪ੍ਪਿਯਤਾਮਤ੍ਤੇਨ. ਨਟ੍ਠਾ ਨਿਗਣ੍ਠਾ ਓਗਿਲਿਕਾਦਿਸਮ੍ਮਤਸ੍ਸ ਪਞ੍ਹਸ੍ਸ ਏਕਵਚਨੇਨ ਵਿਦ੍ਧਂਸਿਤਤ੍ਤਾ.

੮੬. ਦਾਰਕਸ੍ਸ ਅਙ੍ਕੇ ਨਿਸੀਦਨਸ੍ਸ ਕਾਰਣਂ ਦਸ੍ਸੇਤੁਂ ‘‘ਲੇਸਵਾਦਿਨੋ’’ਤਿਆਦਿ ਵੁਤ੍ਤਂ. ਤਤ੍ਥ ਲੇਸਵਾਦਿਨੋਤਿ ਛਲਵਾਦਿਨੋ, ਵਾਦਮਗ੍ਗੇ ਵਾ ਅਪਰਿਪੁਣ੍ਣਤਾਯ ਲੇਸਮਤ੍ਤੇਨੇਵ ਵਾਦਸੀਲਾ. ਓਸਟਸਙ੍ਗਾਮੋਤਿ ਅਨੇਕਵਾਰਂ ਪਰਵਾਦਮਦ੍ਦਨਵਸੇਨ ਓਤਿਣ੍ਣਵਾਦਸਙ੍ਗਾਮੋ. ਵਿਜ੍ਝਿਤ੍ਵਾਤਿ ਨਖੇਨ ਵਿਜ੍ਝਿਤ੍ਵਾ. ਇਮਮੇਵਾਤਿ ਯ੍ਵਾਯਂ ਦਾਰਕੋ ਅਤ੍ਤਨੋ ਵਾਦਭਙ੍ਗਪਰਿਹਰਣਤ੍ਥਂ ਇਮਿਨਾ ਅਙ੍ਕੇ ਨਿਸੀਦਾਪਿਤੋ, ਇਮਮੇਵ ਅਸ੍ਸ ਦਾਰਕਂ ਉਪਮਂ ਨਿਸ੍ਸਯਂ ਕਤ੍ਵਾ ਵਾਦਂ ਭਿਨ੍ਦਿਸ੍ਸਾਮਿ. ‘‘ਅਸ੍ਸ ਵਾਦਂ ਅਪ੍ਪਟਿਤਤਾਯ ਉਪਮਾਯ ਭਞ੍ਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ.

ਅਪਨੇਯ੍ਯਂ ਅਸ੍ਸ ਅਹਨ੍ਤਿ ਅਸ੍ਸ ਦਾਰਕਸ੍ਸ ਮੁਖਤੋ ਅਹਂ ਤਂ ਅਪਨੇਯ੍ਯਂ. ਅਭੂਤਤ੍ਥੋਵ ਅਭੂਤਂ ਉਤ੍ਤਰਪਦਲੋਪੇਨਾਤਿ ਆਹ ‘‘ਅਭੂਤਨ੍ਤਿ ਅਭੂਤਤ੍ਥ’’ਨ੍ਤਿ. ਅਤਚ੍ਛਨ੍ਤਿ ਤਸ੍ਸੇਵ ਵੇਵਚਨਨ੍ਤਿ ਆਹ ‘‘ਅਤਚ੍ਛਨ੍ਤਿ ਨ ਤਚ੍ਛ’’ਨ੍ਤਿ. ਅਭੂਤਨ੍ਤਿ ਵਾ ਅਸਨ੍ਤਂ ਅਵਿਜ੍ਜਮਾਨਂ. ਅਤਚ੍ਛਨ੍ਤਿ ਅਤਥਾਕਾਰਂ. ਅਨਤ੍ਥਸਂਹਿਤਨ੍ਤਿ ਦਿਟ੍ਠਧਮ੍ਮਿਕੇਨ, ਸਮ੍ਪਰਾਯਿਕੇਨ ਵਾ ਅਨਤ੍ਥੇਨ ਸਂਹਿਤਂ, ਅਨਤ੍ਥੇ ਵਾ ਸਂਹਿਤਂ, ਨ ਅਤ੍ਥੋਤਿ ਵਾ ਅਨਤ੍ਥੋ, ਅਤ੍ਥਸ੍ਸ ਪਟਿਪਕ੍ਖੋ ਸਭਾਵੋ, ਤੇਨ ਸਂਹਿਤਨ੍ਤਿ ਅਨਤ੍ਥਸਂਹਿਤਂ, ਪਿਸੁਣਵਾਚਂ ਸਮ੍ਫਪ੍ਪਲਾਪਞ੍ਚਾਤਿ ਅਤ੍ਥੋ. ਏਵਮੇਤ੍ਥ ਚਤੁਬ੍ਬਿਧਸ੍ਸਪਿ ਵਚੀਦੁਚ੍ਚਰਿਤਸ੍ਸ ਗਹਿਤਤਾ ਦਟ੍ਠਬ੍ਬਾ.

ਦੁਪ੍ਪਯੁਤ੍ਤੋਤਿ ਦੁਪ੍ਪਟਿਪਨ੍ਨੋ. ਨ ਤਂ ਤਥਾਗਤੋ ਭਾਸਤਿ ਅਭੂਤਤਾਦਿਦੋਸਦੁਟ੍ਠਤ੍ਤਾ. ਤਮ੍ਪਿ ਤਥਾਗਤੋ ਨ ਭਾਸਤਿ ਭੂਤਤ੍ਥੇਪਿ ਅਨਤ੍ਥਸਂਹਿਤਤਾਦਿਦੋਸਦੁਟ੍ਠਤ੍ਤਾ.

ਠਾਨਂ ਕਾਰਣਂ ਏਤਿਸ੍ਸਾ ਅਤ੍ਥੀਤਿ ਠਾਨਿਯਾ ਕ-ਕਾਰਸ੍ਸ ਯ-ਕਾਰਂ ਕਤ੍ਵਾ, ਨ ਠਾਨਿਯਾਤਿ ਅਟ੍ਠਾਨਿਯਾ, ਨਿਕ੍ਕਾਰਣਾ ਅਯੁਤ੍ਤਿਯੁਤ੍ਤਾ, ਸਾ ਏਵ ਕਥਾਤਿ ਅਟ੍ਠਾਨਿਯਕਥਾ. ਅਤ੍ਤਪਚ੍ਚਕ੍ਖਕਥਂ ਕਥੇਮਾਤਿ ਅਤ੍ਤਨਾ ਏਵ ਪਚ੍ਚਕ੍ਖਂ ਕਤ੍ਵਾ ਪਵਤ੍ਤਿਯਮਾਨਂ ਛਲਕਥਂ ਕਥੇਮ.

ਗਾਮਿਕਮਹਲ੍ਲਕੋ ‘‘ਇਮੇ ਮਂ ਵਞ੍ਚੇਤੁਕਾਮਾ, ਅਹਮੇਵ ਦਾਨਿ ਇਮੇ ਵਞ੍ਚੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਏਵਂ ਭਵਿਸ੍ਸਤੀ’’ਤਿਆਦਿਮਾਹ. ‘‘ਨ ਮਯਂ ਦਾਸਾ’’ਤਿਪਿ ਵਤ੍ਤੁਂ ਨਾਸਕ੍ਖਿਂਸੁ ਪੁਬ੍ਬੇ ਤਥਾਕਤਿਕਾਯ ਕਤਤ੍ਤਾ.

ਤਤਿਯਂ ਤਤਿਯਮੇਵਾਤਿ ਦ੍ਵੀਸੁਪਿ ਪਕ੍ਖੇਸੁ ਤਤਿਯਂ ਤਤਿਯਮੇਵ ਵਾਚਂ. ਭਾਸਿਤਬ੍ਬਕਾਲਂ ਅਨਤਿਕ੍ਕਮਿਤ੍ਵਾਤਿ ਯਸ੍ਸ ਯਦਾ ਯਥਾ ਭਾਸਿਤਬ੍ਬਂ, ਤਸ੍ਸ ਤਦਾ ਤਥੇਵ ਚ ਭਾਸਨਤੋ ਭਾਸਿਤਬ੍ਬਂ ਕਾਰਣਂ ਭਾਸਿਤਬ੍ਬਕਾਲਞ੍ਚ ਅਨਤਿਕ੍ਕਮਿਤ੍ਵਾਵ ਭਾਸਤਿ.

੮੭. ਠਾਨੁਪ੍ਪਤ੍ਤਿਕਞਾਣੇਨਾਤਿ ਠਾਨੇ ਏਵ ਉਪ੍ਪਜ੍ਜਨਕਞਾਣੇਨ. ਤਸ੍ਮਿਂ ਤਸ੍ਮਿਂ ਕਾਰਣੇ ਤਸ੍ਸ ਤਂ ਤਂ ਅਵਤ੍ਥਾਯ ਉਪ੍ਪਜ੍ਜਨਕਞਾਣੇਨ, ਧਮ੍ਮਾਨਂ ਯਥਾਸਭਾਵਤੋ ਅਵਬੁਜ੍ਝਨਸਭਾਵੋਤਿ ਧਮ੍ਮਸਭਾਵੋ. ਧਮ੍ਮੇ ਸਭਾਵਧਮ੍ਮੇ ਅਨਵਸੇਸੇ ਵਾ ਯਾਥਾਵਤੋ ਉਪਧਾਰੇਤੀਤਿ ਧਮ੍ਮਧਾਤੁ, ਸਬ੍ਬਞ੍ਞੁਤਾ. ਤੇਨਾਹ ‘‘ਸਬ੍ਬਞ੍ਞੁਤਞ੍ਞਾਣਸ੍ਸੇਤਂ ਅਧਿਵਚਨ’’ਨ੍ਤਿ. ਸੁਪ੍ਪਟਿਵਿਦ੍ਧਨ੍ਤਿ ਸਬ੍ਬਂ ਞੇਯ੍ਯਧਮ੍ਮਂ ਸੁਟ੍ਠੁ ਪਟਿਵਿਜ੍ਝਨਵਸੇਨ, ਸੁਟ੍ਠੁ ਪਟਿਵਿਦ੍ਧਨ੍ਤਿ ਅਤ੍ਥੋ. ਤੇਨਾਹ ‘‘ਹਤ੍ਥਗਤਂ ਭਗਵਤੋ’’ਤਿ. ਨੇਯ੍ਯਪੁਗ੍ਗਲਵਸੇਨ ਪਰਿਨਿਟ੍ਠਿਤਾਤਿ ਕਥਾਪਰਿਵਿਭਾਗੇਨ ਅਯਮੇਵ ਦੇਸਨਾ ਚਤ੍ਤਾਰਿ ਅਰਿਯਸਚ੍ਚਾਨਿ ਦਸ੍ਸੇਨ੍ਤੋ ਅਰਹਤ੍ਤਂ ਪਚ੍ਚਕ੍ਖਾਸੀਤਿ.

ਅਭਯਰਾਜਕੁਮਾਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.