੭. ਕੁਕ੍ਕੁਰਵਤਿਕਸੁਤ੍ਤਵਣ੍ਣਨਾ

੭੮. ਕੋਲਿਯੇਸੂਤਿ ਬਹੁਵਚਨਵਸੇਨਾਯਂ ਪਾਲ਼ਿ ਆਗਤਾ. ਏਵਂਨਾਮਕੇ ਜਨਪਦੇਤਿ ਅਤ੍ਥਵਚਨਂ ਕਸ੍ਮਾ ਵੁਤ੍ਤਨ੍ਤਿ ਆਹ ‘‘ਸੋ ਹੀ’’ਤਿਆਦਿ. ਨ ਨਿਯਮਿਤੋਤਿ ‘‘ਅਸੁਕਮ੍ਹਿ ਨਾਮ ਵਿਹਾਰੇ’’ਤਿ ਨ ਨਿਯਮੇਤ੍ਵਾ ਵੁਤ੍ਤੋ. ਸੇਨਾਸਨੇਯੇਵਾਤਿ ਆਵਾਸੇਯੇਵ, ਨ ਰੁਕ੍ਖਮੂਲਾਦਿਕੇ. ਵੇਸਕਿਰਿਯਾ ਘਾਸਗ੍ਗਹਣਾਦਿਨਾ ਸਮਾਦਾਤਬ੍ਬਟ੍ਠੇਨ ਗੋਵਤਂ, ਤਸ੍ਮਿਂ ਨਿਯੁਤ੍ਤੋ ਗੋਵਤਿਕੋ. ਤੇਨਾਹ ‘‘ਸਮਾਦਿਨ੍ਨਗੋਵਤੋ’’ਤਿ. ਯਂ ਸਨ੍ਧਾਯਾਹੁ ਵੇਦਵੇਦਿਨੋ – ‘‘ਗਚ੍ਛਂ ਭਕ੍ਖੇਤਿ, ਤਿਟ੍ਠਂ ਮੁਤ੍ਤੇਤਿ, ਉਪਾਹਾ ਉਦਕਂ ਧੂਪੇਤਿ, ਤਿਣਾਨਿ ਛਿਨ੍ਦਤੀ’’ਤਿਆਦਿ. ਅਯਂ ਅਚੇਲੋਤਿ ਅਚੇਲਕਪਬ੍ਬਜ੍ਜਾਵਸੇਨ ਅਚੇਲੋ, ਪੁਰਿਮੋ ਪਨ ਗੋਵਤਿਕੋ ਕੁਕ੍ਕੁਰਵਤਿਕੋਤਿ ਏਤ੍ਥ ਵੁਤ੍ਤਨਯਾਨੁਸਾਰੇਨ ਅਤ੍ਥੋ ਵਤ੍ਤਬ੍ਬੋ. ਪਲਿਕੁਣ੍ਠਿਤ੍ਵਾਤਿ ਉਭੋ ਹਤ੍ਥੇ ਉਭੋ ਪਾਦੇ ਚ ਸਮਿਞ੍ਜਿਤ੍ਵਾ. ‘‘ਉਕ੍ਕੁਟਿਕੋ ਹੁਤ੍ਵਾ’’ਤਿਪਿ ਵਦਨ੍ਤਿ. ਗਮਨਂ ਨਿਪ੍ਫਜ੍ਜਨਂ ਗਤੀਤਿ ਆਹ – ‘‘ਕਾ ਗਤੀਤਿ ਕਾ ਨਿਪ੍ਫਤ੍ਤੀ’’ਤਿ. ਨਿਪ੍ਫਤ੍ਤਿਪਰਿਯੋਸਾਨਾ ਹਿ ਵਿਪਾਕਧਮ੍ਮਪ੍ਪਵਤ੍ਤਿ. ਕਤੂਪਚਿਤਕਮ੍ਮਵਸੇਨ ਅਭਿਸਮ੍ਪਰੇਤਿ ਏਤ੍ਥਾਤਿ ਅਭਿਸਮ੍ਪਰਾਯੋ, ਪਰਲੋਕੋ. ਤਤ੍ਥਸ੍ਸ ਚ ਨਿਪ੍ਫਤ੍ਤਿਂ ਪੁਚ੍ਛਤੀਤਿ ਆਹ – ‘‘ਅਭਿਸਮ੍ਪਰਾਯਮ੍ਹਿ ਕਤ੍ਥ ਨਿਬ੍ਬਤ੍ਤੀ’’ਤਿ. ਕੁਕ੍ਕੁਰਵਤਸਮਾਦਾਨਨ੍ਤਿ ਕੁਕ੍ਕੁਰਭਾਵਸਮਾਦਾਨਂ, ‘‘ਅਜ੍ਜ ਪਟ੍ਠਾਯ ਅਹਂ ਕੁਕ੍ਕੁਰੋ’’ਤਿ ਕੁਕ੍ਕੁਰਭਾਵਾਧਿਟ੍ਠਾਨਂ.

੭੯. ਪਰਿਪੁਣ੍ਣਨ੍ਤਿ ਯਤ੍ਤਕਾ ਕੁਕ੍ਕੁਰਵਿਕਾਰਾ, ਤੇਹਿ ਪਰਿਪੁਣ੍ਣਂ. ਤੇਨਾਹ ‘‘ਅਨੂਨ’’ਨ੍ਤਿ. ਅਬ੍ਬੋਕਿਣ੍ਣਨ੍ਤਿ ਤੇਹਿ ਅਵੋਮਿਸ੍ਸਂ. ਕੁਕ੍ਕੁਰਾਚਾਰਨ੍ਤਿ ਕੁਕ੍ਕੁਰਾਨਂ ਗਮਨਾਕਾਰੋਤਿਆਦਿਆਚਾਰੇਨ ਕੁਕ੍ਕੁਰਭਾਵਾਧਿਟ੍ਠਾਨਚਿਤ੍ਤਮਾਹ. ਤਥਾ ਤਥਾ ਆਕਪ੍ਪੇਤਬ੍ਬਤੋ ਆਕਪ੍ਪੋ, ਪਵਤ੍ਤਿਆਕਾਰੋ. ਸੋ ਪਨੇਤ੍ਥ ਗਮਨਾਦਿਕੋਤਿ ਆਹ ‘‘ਕੁਕ੍ਕੁਰਾਨਂ ਗਮਨਾਕਾਰੋ’’ਤਿਆਦਿ. ਆਚਾਰੇਨਾਤਿ ਕੁਕ੍ਕੁਰਸੀਲਾਚਾਰੇਨ. ਵਤਸਮਾਦਾਨੇਨਾਤਿ ਕੁਕ੍ਕੁਰਵਤਾਧਿਟ੍ਠਾਨੇਨ. ਕੁਕ੍ਕੁਰਚਰਿਯਾਦਿਯੇਵ ਦੁਕ੍ਕਰਤਪਚਰਣਂ. ਤੇਨ ਗਤਿਵਿਪਰਿਯੇਸਾਕਾਰੇਨ ਪਵਤ੍ਤਾ ਲਦ੍ਧਿ. ਅਸ੍ਸ ਕੁਕ੍ਕੁਰਵਤਿਕਸ੍ਸ ਅਞ੍ਞਾ ਗਤਿ ਨਤ੍ਥੀਤਿ ਇਤਰਗਤਿਂ ਪਟਿਕ੍ਖਿਪਤਿ, ਇਤਰਾਸਂ ਪਨ ਸਮ੍ਭਵੋ ਏਵ ਨਤ੍ਥੀਤਿ. ਨਿਪਜ੍ਜਮਾਨਨ੍ਤਿ ਵਤਸੀਲਾਦੀਨਂ ਸਂਗੋਪਨਵਸੇਨ ਸਿਜ੍ਝਮਾਨਂ. ਯਥਾ ਸਕਮ੍ਮਕਧਾਤੁਸਦ੍ਦਾ ਅਤ੍ਥਵਿਸੇਸਵਸੇਨ ਅਕਮ੍ਮਕਾ ਹੋਨ੍ਤਿ ‘‘ਵਿਬੁਦ੍ਧੋ ਪੁਰਿਸੋ ਵਿਬੁਦ੍ਧੋ ਕਮਲਸਣ੍ਡੋ’’ਤਿ, ਏਵਂ ਅਤ੍ਥਵਿਸੇਸਵਸੇਨ ਅਕਮ੍ਮਕਾਪਿ ਸਕਮ੍ਮਕਾ ਹੋਨ੍ਤੀਤਿ ਦਸ੍ਸੇਨ੍ਤੋ ‘‘ਨ ਪਰਿਦੇਵਾਮਿ ਨ ਅਨੁਤ੍ਥੁਨਾਮੀ’’ਤਿਆਦਿਮਾਹ. ਅਨੁਤ੍ਥੁਨਸਦ੍ਦੋ ਚ ਸਕਮ੍ਮਕਵਸੇਨ ਪਯੁਜ੍ਜਤਿ ‘‘ਪੁਰਾਣਾਨਿ ਅਨੁਤ੍ਥੁਨ’’ਨ੍ਤਿਆਦੀਸੁ. ਅਯਞ੍ਚੇਤ੍ਥ ਪਯੋਗੋਤਿ ਇਮਿਨਾ ਗਾਥਾਯਞ੍ਚ ਅਨੁਤ੍ਥੁਨਨਰੋਦਨਂ ਅਧਿਪ੍ਪੇਤਨ੍ਤਿ ਦਸ੍ਸੇਤਿ.

੮੦. ਵੁਤ੍ਤਨਯੇਨੇਵਾਤਿ ਇਮਿਨਾ ਗੋਵਤਨ੍ਤਿ ਗੋਵਤਸਮਾਦਾਨਂ. ਗੋਸੀਲਨ੍ਤਿ ਗਵਾਚਾਰਂ. ਗੋਚਿਤ੍ਤਨ੍ਤਿ ‘‘ਅਜ੍ਜ ਪਟ੍ਠਾਯ ਗੋਹਿ ਕਾਤਬ੍ਬਂ ਕਰਿਸ੍ਸਾਮੀ’’ਤਿ ਉਪ੍ਪਨ੍ਨਚਿਤ੍ਤਨ੍ਤਿ ਇਮਮਤ੍ਥਂ ਅਤਿਦਿਸਤਿ. ਗ੍ਵਾਕਪ੍ਪੇ ਪਨ ਵਤ੍ਤਬ੍ਬਂ ਅਵਸਿਟ੍ਠਂ ‘‘ਕੁਕ੍ਕੁਰਾਕਪ੍ਪੇ ਵੁਤ੍ਤਸਦਿਸਮੇਵਾ’’ਤਿ ਇਮਿਨਾਵ ਅਤਿਦਿਟ੍ਠਂ, ਵਿਸਿਟ੍ਠਞ੍ਚ ਯਥਾ ਪਨ ਤਤ੍ਥਾਤਿਆਦਿਨਾ ਵੁਤ੍ਤਮੇਵ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਕੁਕ੍ਕੁਰਵਤਾਦੀਸੁ ਵੁਤ੍ਤਨਯਮੇਵ.

੮੧. ਏਕਚ੍ਚਕਮ੍ਮਕਿਰਿਯਾਵਸੇਨਾਤਿ ਏਕਚ੍ਚਸ੍ਸ ਅਕੁਸਲਕਮ੍ਮਸ੍ਸ ਕੁਸਲਕਮ੍ਮਸ੍ਸ ਕਰਣਪ੍ਪਸਙ੍ਗੇਨ. ਇਮੇਸਨ੍ਤਿ ਗੋਵਤਿਕਕੁਕ੍ਕੁਰਵਤਿਕਾਨਂ. ਕਿਰਿਯਾਤਿ ਗੋਵਤਭਾਵਨਾਦਿਵਸੇਨ ਪਵਤ੍ਤਾ ਕਿਰਿਯਾ. ਪਾਕਟਾ ਭਵਿਸ੍ਸਤੀਤਿ ‘‘ਇਮਸ੍ਮਿਂ ਕਮ੍ਮਚਤੁਕ੍ਕੇ ਇਦਂ ਨਾਮ ਕਮ੍ਮਂ ਭਜਤੀ’’ਤਿ ਪਾਕਟਾ ਭਵਿਸ੍ਸਤਿ.

ਕਾਲ਼ਕਨ੍ਤਿ (ਅ. ਨਿ. ਟੀ. ੨.੪.੨੩੨) ਮਲੀਨਂ, ਚਿਤ੍ਤਸ੍ਸ ਅਪਭਸ੍ਸਰਭਾਵਕਰਣਨ੍ਤਿ ਅਤ੍ਥੋ. ਤਂ ਪਨੇਤ੍ਥ ਕਮ੍ਮਪਥਸਮ੍ਪਤ੍ਤਮੇਵ ਅਧਿਪ੍ਪੇਤਨ੍ਤਿ ਆਹ ‘‘ਦਸਅਕੁਸਲਕਮ੍ਮਪਥ’’ਨ੍ਤਿ. ਕਣ੍ਹਨ੍ਤਿ ਕਣ੍ਹਾਭਿਜਾਤਿਹੇਤੁਤੋ ਵਾ ਕਣ੍ਹਂ. ਤੇਨਾਹ ‘‘ਕਣ੍ਹਵਿਪਾਕ’’ਨ੍ਤਿ. ਅਪਾਯੂਪਪਤ੍ਤਿ ਮਨੁਸ੍ਸੇਸੁ ਚ ਦੋਭਗ੍ਗਿਯਂ ਕਣ੍ਹਵਿਪਾਕੋ, ਯਥਾ ਤਮਭਾਵੋ ਵੁਤ੍ਤੋ, ਏਕਤ੍ਤਨਿਦ੍ਦੇਸੇਨ ਪਨ ‘‘ਅਪਾਯੇ ਨਿਬ੍ਬਤ੍ਤਨਤੋ’’ਤਿ ਵੁਤ੍ਤਂ, ਨਿਬ੍ਬਤ੍ਤਾਪਨਤੋਤਿ ਅਤ੍ਥੋ. ਸੁਕ੍ਕਨ੍ਤਿ ਓਦਾਤਂ, ਚਿਤ੍ਤਸ੍ਸ ਪਭਸ੍ਸਰਭਾਵਕਰਣਨ੍ਤਿ ਅਤ੍ਥੋ, ਸੁਕ੍ਕਾਭਿਜਾਤਿਹੇਤੁਤੋ ਵਾ ਸੁਕ੍ਕਂ. ਤੇਨਾਹ ‘‘ਸੁਕ੍ਕਵਿਪਾਕ’’ਨ੍ਤਿ. ਸਗ੍ਗੂਪਪਤ੍ਤਿ ਮਨੁਸ੍ਸਲੋਕੇ ਸੋਭਗ੍ਗਿਯਞ੍ਚ ਸੁਕ੍ਕਵਿਪਾਕੋ, ਯਥਾ ਚ ਜੋਤਿਭਾਵੋ ਵੁਤ੍ਤੋ, ਏਕਤ੍ਤਨਿਦ੍ਦੇਸੇਨ ਪਨ ‘‘ਸਗ੍ਗੇ ਨਿਬ੍ਬਤ੍ਤਨਤੋ’’ਤਿ ਵੁਤ੍ਤਂ, ਨਿਬ੍ਬਤ੍ਤਾਪਨਤੋਤਿ ਅਤ੍ਥੋ, ਵੋਮਿਸ੍ਸਕਕਮ੍ਮਨ੍ਤਿ ਕਾਲੇਨ ਕਣ੍ਹਂ, ਕਾਲੇਨ ਸੁਕ੍ਕਨ੍ਤਿ ਏਵਂ ਮਿਸ੍ਸਕਵਸੇਨ ਕਤਕਮ੍ਮਂ. ‘‘ਸੁਖਦੁਕ੍ਖਵਿਪਾਕ’’ਨ੍ਤਿ ਵਤ੍ਵਾ ਸੁਖਦੁਕ੍ਖਾਨਂ ਪਵਤ੍ਤਿਆਕਾਰਂ ਦਸ੍ਸੇਤੁਂ ‘‘ਮਿਸ੍ਸਕਕਮ੍ਮਞ੍ਹੀ’’ਤਿਆਦਿ ਵੁਤ੍ਤਂ. ਕਮ੍ਮਸ੍ਸ ਕਣ੍ਹਸੁਕ੍ਕਸਮਞ੍ਞਾ ਕਣ੍ਹਸੁਕ੍ਕਾਭਿਜਾਤਿਹੇਤੁਤਾਯਾਤਿ, ਅਪਚ੍ਚਯਗਾਮਿਤਾਯ ਤਦੁਭਯਵਿਨਿਮੁਤ੍ਤਸ੍ਸ ਕਮ੍ਮਕ੍ਖਯਕਰਕਮ੍ਮਸ੍ਸ ਇਧ ਸੁਕ੍ਕਪਰਿਯਾਯੋਪਿ ਨ ਇਚ੍ਛਿਤੋਤਿ ਆਹ – ‘‘ਉਭਯ…ਪੇ… ਅਸੁਕ੍ਕਨ੍ਤਿ ਵੁਤ੍ਤ’’ਨ੍ਤਿ. ਤਤ੍ਥ ਉਭਯਵਿਪਾਕਸ੍ਸਾਤਿ ਯਥਾਧਿਗਤਸ੍ਸ ਵਿਪਾਕਸ੍ਸ. ਸਮ੍ਪਤ੍ਤਿਭਵਪਰਿਯਾਪਨ੍ਨੋ ਹਿ ਵਿਪਾਕੋ ਇਧ ‘‘ਸੁਕ੍ਕਵਿਪਾਕੋ’’ਤਿ ਅਧਿਪ੍ਪੇਤੋ, ਨ ਅਚ੍ਚਨ੍ਤਪਰਿਸੁਦ੍ਧੋ.

ਸਦੁਕ੍ਖਨ੍ਤਿ ਅਤ੍ਤਨਾ ਉਪ੍ਪਾਦੇਤਬ੍ਬੇਨ ਦੁਕ੍ਖੇਨ ਸਦੁਕ੍ਖਂ, ਦੁਕ੍ਖਸਂਵਤ੍ਤਨਿਕਨ੍ਤਿ ਅਤ੍ਥੋ. ‘‘ਇਮਸ੍ਮਿਂ ਸੁਤ੍ਤੇ ਚੇਤਨਾ ਧੁਰਂ, ਉਪਾਲਿਸੁਤ੍ਤੇ (ਮ. ਨਿ. ੨.੫੬) ਕਮ੍ਮ’’ਨ੍ਤਿ ਹੇਟ੍ਠਾ ਵੁਤ੍ਤਮ੍ਪਿ ਅਤ੍ਥਂ ਇਧ ਸਾਧਯਤਿ ਵਿਜਾਨਨਤ੍ਥਂ. ਅਭਿਸਙ੍ਖਰਿਤ੍ਵਾਤਿ ਆਯੂਹਿਤ੍ਵਾ. ਤਂ ਪਨ ਪਚ੍ਚਯਸਮਵਾਯਸਿਦ੍ਧਿਤੋ ਸਂਕਡ੍ਢਨਂ ਪਿਣ੍ਡਨਂ ਵਿਯ ਹੋਤੀਤਿ ਆਹ – ‘‘ਸਙ੍ਕਡ੍ਢਿਤ੍ਵਾ, ਪਿਣ੍ਡਂ ਕਤ੍ਵਾਤਿ ਅਤ੍ਥੋ’’ਤਿ, ਸਦੁਕ੍ਖਂ ਲੋਕਨ੍ਤਿ ਅਪਾਯਲੋਕਮਾਹ. ਵਿਪਾਕਫਸ੍ਸਾਤਿ ਫਸ੍ਸਸੀਸੇਨ ਤਤ੍ਥ ਵਿਪਾਕਪਵਤ੍ਤਮਾਹ. ਭੂਤਕਮ੍ਮਤੋਤਿ ਨਿਬ੍ਬਤ੍ਤਕਮ੍ਮਤੋ ਅਤ੍ਤਨਾ ਕਤੂਪਚਿਤਕਮ੍ਮਤੋ. ਯਥਾਭੂਤਨ੍ਤਿ ਯਾਦਿਸਂ. ਕਮ੍ਮਸਭਾਗਵਸੇਨਾਤਿ ਕਮ੍ਮਸਰਿਕ੍ਖਕਵਸੇਨ. ਉਪਪਤ੍ਤਿ ਹੋਤੀਤਿ ਅਪਦਾਦਿਭੇਦਾ ਉਪਪਤ੍ਤਿ. ਕਮ੍ਮੇਨ ਵਿਯ ਵੁਤ੍ਤਾਤਿ ਯਂ ਕਰੋਤਿ, ਤੇਨ ਉਪਪਜ੍ਜਤੀਤਿ ਏਕਕਮ੍ਮੇਨੇਵ ਜਾਯਮਾਨਾ ਵਿਯ ਵੁਤ੍ਤਾ ਅਪਦਾਦਿਭੇਦਾ. ਉਪਪਤ੍ਤਿ ਚ ਨਾਮ ਵਿਪਾਕੇਨ ਹੋਤਿ ਵਿਪਾਕੇ ਸਮ੍ਭਵਨ੍ਤੇ ਏਕਂਸੇਨ ਤੇ ਉਪਪਤ੍ਤਿਵਿਸੇਸਾ ਸਮ੍ਭਵਨ੍ਤਿ. ਯਦਿ ਏਵਂ ਕਸ੍ਮਾ ‘‘ਤੇਨ ਉਪਪਜ੍ਜਤੀ’’ਤਿ ਉਪਪਤ੍ਤਿਕਮ੍ਮਹੇਤੁਕਾ ਵੁਤ੍ਤਾਤਿ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਯੇਨ ਕਮ੍ਮਵਿਪਾਕੇਨ ਨਿਬ੍ਬਤ੍ਤੋਤਿ ਯੇਨ ਕਮ੍ਮਵਿਪਾਕੇਨ ਵਿਪਚ੍ਚਮਾਨੇਨ ਅਯਂ ਸਤ੍ਤੋ ਨਿਬ੍ਬਤ੍ਤੋਤਿ ਵੁਚ੍ਚਤਿ. ਤਂਕਮ੍ਮਵਿਪਾਕਫਸ੍ਸਾਤਿ ਤਸ੍ਸ ਤਸ੍ਸ ਕਮ੍ਮਸ੍ਸ ਵਿਪਾਕਭੂਤਾ ਫਸ੍ਸਾ. ਕਮ੍ਮੇਨ ਦਾਤਬ੍ਬਂ ਦਾਯਂ ਤਬ੍ਬਿਪਾਕਂ ਆਦਿਯਨ੍ਤੀਤਿ ਕਮ੍ਮਦਾਯਾਦਾ, ਫਸ੍ਸਾ. ਕਮ੍ਮਸ੍ਸ ਦਾਯਜ੍ਜਤਾ ਕਮ੍ਮਫਲਸ੍ਸ ਦਾਯਜ੍ਜਂ, ਤਸ੍ਮਾ ਵੁਤ੍ਤਂ ‘‘ਕਮ੍ਮਦਾਯਜ੍ਜਾ’’ਤਿ. ਤੇਨਾਹ ‘‘ਕਮ੍ਮਮੇਵ ਨੇਸਂ ਦਾਯਜ੍ਜਂ ਸਨ੍ਤਕ’’ਨ੍ਤਿ.

ਤਿਸ੍ਸੋ ਚ ਹੇਟ੍ਠਿਮਜ੍ਝਾਨਚੇਤਨਾਤਿ ਇਦਂ ਅਬ੍ਯਾਬਜ੍ਝਵੇਦਨਂ ਵੇਦਿਯਨਏਕਨ੍ਤਸੁਖੁਪ੍ਪਤ੍ਤਿਯਾ ਹੇਤੁਭਾਵਸਾਧਨਂ. ਯਦਿ ਏਵਂ ਯਥਾਵੁਤ੍ਤਾ ਝਾਨਚੇਤਨਾ ਤਾਵ ਹੋਤੁ ਏਕਨ੍ਤਸੁਖੁਪ੍ਪਤ੍ਤਿਹੇਤੁਭਾਵਤੋ. ਕਾਮਾਵਚਰਾ ਕਿਨ੍ਤੀਤਿ ਕਾਮਾਵਚਰਾ ਪਨ ਕੁਸਲਚੇਤਨਾ ਤਂਸਭਾਵਾਭਾਵਤੋ ਕਿਨ੍ਤਿ ਕੇਨ ਪਕਾਰੇਨ ਅਬ੍ਯਾਬਜ੍ਝਮਨੋਸਙ੍ਖਾਰੋ ਨਾਮ ਜਾਤੋਤਿ ਚੋਦੇਤਿ, ਇਤਰੋ ਪਨ ਨ ਸਬ੍ਬਾ ਕਾਮਾਵਚਰਕੁਸਲਚੇਤਨਾ ਤਥਾ ਗਹਿਤਾ, ਅਥ ਖੋ ਏਕਚ੍ਚਾ ਝਾਨਚੇਤਨਾਨੁਕੂਲਾਤਿ ਦਸ੍ਸੇਨ੍ਤੋ ‘‘ਕਸਿਣਸਜ੍ਜਨਕਾਲੇ ਕਸਿਣਾਸੇਵਨਕਾਲੇ ਲਬ੍ਭਨ੍ਤੀ’’ਤਿ ਆਹ. ਤਤ੍ਥ ਕਸਿਣਾਸੇਵਨਚੇਤਨਾ ਗਹੇਤਬ੍ਬਾ, ਸਾ ਉਪਚਾਰਜ੍ਝਾਨਸ੍ਸ ਸਾਧਿਕਾ. ਤੇਨ ਕਾਮਾਵਚਰਚੇਤਨਾ ਪਠਮਜ੍ਝਾਨਚੇਤਨਾਯ ਘਟਿਤਾਤਿ ਕਸਿਣਸਜ੍ਜਨਚੇਤਨਾਪਿ ਕਦਾਚਿ ਤਾਦਿਸਾ ਹੋਤੀਤਿ ਗਹਿਤਾ. ਪਰਿਕਮ੍ਮਾਦਿਵਸੇਨ ਹਿ ਪਵਤ੍ਤਾ ਭਾਵਨਾਮਯਾ ਕਾਮਾਵਚਰਕੁਸਲਚੇਤਨਾ ਪਠਮਜ੍ਝਾਨਸ੍ਸ ਆਸਨ੍ਨਤਾਯ ਵੁਤ੍ਤਾ. ਚਤੁਤ੍ਥਜ੍ਝਾਨਚੇਤਨਾ ਤਤਿਯਜ੍ਝਾਨਚੇਤਨਾਯ ਘਟਿਤਾਤਿ ਇਦਂ ਏਕਤ੍ਤਕਾਯਏਕਤ੍ਤਸਞ੍ਞੀਸਤ੍ਤਾਵਾਸਵਤਾਯ ਤਂਸਰਿਕ੍ਖਕਾ ਉਪੇਕ੍ਖਾਪਿ ਈਦਿਸੇਸੁ ਠਾਨੇਸੁ ਸੁਖਸਰਿਕ੍ਖਤਾ, ਏਵਂ ਸਨ੍ਤਸਭਾਵਤਾ ਞਾਣਸਹਿਤਤਾ ਚ. ਕੇਚਿ ਪਨ ਚਤੁਤ੍ਥਜ੍ਝਾਨਚੇਤਨਾਨੁਗੁਣਾਤਿ ਨਿਦਸ੍ਸੇਨ੍ਤਾ ਕਸਿਣਸਜ੍ਜਨਕਾਲੇ ਕਸਿਣਜ੍ਝਾਨਕਾਲੇ ਕਸਿਣਾਸੇਵਨਕਾਲੇ ਲਬ੍ਭਤੀਤਿ ਤਤਿਯਜ੍ਝਾਨਚੇਤਨਾਯ ਆਸਨ੍ਨਘਟਿਤਤਾ ਵੁਤ੍ਤਾਤਿ ਵਦਨ੍ਤਿ, ਤਂ ਤੇਸਂ ਮਤਿਮਤ੍ਤਂ, ਵੁਤ੍ਤਨਯੇਨੇਵ ਤਾਸਂ ਘਟਿਤਤਾ ਵੇਦਿਤਬ੍ਬਾ. ਉਭਯਮਿਸ੍ਸਕਵਸੇਨਾਤਿ ਉਭਯੇਸਂ ਕੁਸਲਾਕੁਸਲਸਙ੍ਖਾਰਾਨਂ ਸੁਖਦੁਕ੍ਖਾਨਞ੍ਚ ਮਿਸ੍ਸਕਭਾਵਵਸੇਨ. ਵੇਮਾਨਿਕਪੇਤਾਨਨ੍ਤਿ ਇਦਂ ਬਾਹੁਲ੍ਲਤੋ ਵੁਤ੍ਤਂ, ਇਤਰੇਸਮ੍ਪਿ ਵਿਨਿਪਾਤਿਕਾਨਂ ਕਾਲੇਨ ਦੁਕ੍ਖਂ ਹੋਤਿਯੇਵ.

ਤਸ੍ਸ ਪਹਾਨਾਯਾਤਿ ਤਸ੍ਸ ਯਥਾਵੁਤ੍ਤਸ੍ਸ ਕਮ੍ਮਸ੍ਸ ਅਨੁਪ੍ਪਤ੍ਤਿਧਮ੍ਮਤਾਪਾਦਨਾਯ. ਯਾ ਚੇਤਨਾਤਿ ਯਾ ਅਪਚਯਗਾਮਿਨਿਚੇਤਨਾ. ਕਮ੍ਮਂ ਪਤ੍ਵਾਤਿ ਸੁਖਕਮ੍ਮਨ੍ਤਿ ਵੁਚ੍ਚਮਾਨੇ ਮਗ੍ਗਚੇਤਨਾਯ ਅਞ੍ਞੋ ਪਣ੍ਡਰਤਰੋ ਧਮ੍ਮੋ ਨਾਮ ਨਤ੍ਥਿ ਅਚ੍ਚਨ੍ਤਪਾਰਿਸੁਦ੍ਧਿਭਾਵਤੋ. ਅਕਣ੍ਹਾ ਅਸੁਕ੍ਕਾਤਿ ਆਗਤਾਤਿ ਏਤ੍ਥ ਸੁਕ੍ਕਭਾਵਪਟਿਕ੍ਖੇਪਕਾਰਣਂ ਹੇਟ੍ਠਾ ਵੁਤ੍ਤਨਯਮੇਵ. ਤੇਨਾਹ ‘‘ਇਦਂ ਪਨ ਕਮ੍ਮਚਤੁਕ੍ਕਂ ਪਤ੍ਵਾ’’ਤਿਆਦਿ.

੮੨. ਅਨਿਯ੍ਯਾਨਿਕਪਕ੍ਖੇਤਿ ਅਚੇਲ਼ਕਪਬ੍ਬਜ੍ਜਾਯ ਕੁਕ੍ਕੁਰਵਤੇ ਚ. ਯੋਗੇਤਿ ਞਾਯਧਮ੍ਮਪਟਿਪਤ੍ਤਿਯਨ੍ਤਿ ਅਤ੍ਥੋ. ਯੋਨੇਨਾਤਿ ਯੋ ਤਿਤ੍ਥਿਯਪਰਿਵਾਸੋ ਤੇਨ ਭਗਵਤਾ ਪਞ੍ਞਤ੍ਤੋ. ਯਂ ਤਿਤ੍ਥਿਯਪਰਿਵਾਸਂ ਸਮਾਦਿਯਿਤ੍ਵਾਤਿ ਅਯਮੇਤ੍ਥ ਯੋਜਨਾ. ਘਂਸਿਤ੍ਵਾ ਸੁਵਣ੍ਣਂ ਵਿਯ ਨਿਘਂਸੋਪ੍ਪਲੇ. ਕੋਟ੍ਟੇਤ੍ਵਾ ਹਤ੍ਥੇਨ ਵਿਯ ਕੁਲਾਲਭਾਜਨਂ.

ਵੂਪਕਟ੍ਠੋਤਿ ਵਿਵਿਤ੍ਤੋ ਏਕੀਭੂਤੋ. ਪੇਸਿਤਤ੍ਤੋਤਿ ਨਿਬ੍ਬਾਨਂ ਪਤਿ ਪੇਸਿਤਤ੍ਤੋ. ਕਾਮਂ ਤਦਨੁਤ੍ਤਰਂ ਬ੍ਰਹ੍ਮਚਰਿਯਪਰਿਯੋਸਾਨਂ…ਪੇ… ਵਿਹਾਸੀਤਿ ਇਮਿਨਾਵ ਅਰਹਤ੍ਤਨਿਕੂਟੇਨ ਦੇਸਨਾ ਨਿਟ੍ਠਾਪਿਤਾ ਹੋਤਿ, ਆਯਸ੍ਮਤੋ ਪਨ ਸੇਨਿਯਸ੍ਸ ਪਟਿਪਤ੍ਤਿਕਿਤ੍ਤਨਪਰਮੇਤਂ ਉਜੁਕਂ ਆਪਨ੍ਨਅਰਹਤ੍ਤਭਾਵਦੀਪਨਂ, ਯਦਿਦਂ ‘‘ਅਞ੍ਞਤਰੋ ਖੋ ਪਨਾ’’ਤਿਆਦਿਵਚਨਨ੍ਤਿ ਆਹ ‘‘ਅਰਹਤ੍ਤਨਿਕੂਟੇਨੇਵਾ’’ਤਿ. ਅਰਹਤ੍ਤਾਧਿਗਮੋਯੇਵ ਤਸ੍ਸ ਤੇਸਂ ਅਬ੍ਭਨ੍ਤਰਤਾ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵ.

ਕੁਕ੍ਕੁਰਵਤਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.