੬. ਉਪਾਲਿਸੁਤ੍ਤਵਣ੍ਣਨਾ

੫੬. ਪਾਵਾਰਂ ਪਾਰੁਪਤੀਤਿ ਪਾਵਾਰਿਕੋ, ਇਦਂ ਤਸ੍ਸ ਕੁਲਸਮੁਦਾਗਤਂ ਨਾਮਂ, ਸੋ ਪਨ ਮਹਦ੍ਧਨੋ ਮਹਾਭੋਗੋ ਨਗਰੇ ਸੇਟ੍ਠਿਟ੍ਠਾਨੇ ਠਿਤੋ. ਤੇਨਾਹ ‘‘ਦੁਸ੍ਸਪਾਵਾਰਿਕਸੇਟ੍ਠਿਨੋ’’ਤਿ. ਦੀਘਤ੍ਤਾ ਦੀਘਤਮਤ੍ਤਾ. ਸੋ ਕਿਰ ਪਮਾਣਤੋ ਉਪਵਚ੍ਛਯਤੋ ਦਿਯਡ੍ਢਰਤਨਂ ਅਤਿਕ੍ਕਮ੍ਮ ਠਿਤੋ. ਏਵਂਲਦ੍ਧਨਾਮੋਤਿ ‘‘ਦੀਘਤਪਸ੍ਸੀ’’ਤਿ ਲਦ੍ਧਸਮਞ੍ਞੋ. ਬਾਹਿਰਾਯਤਨੇਤਿ ਤਿਤ੍ਥਿਯਸਮਯੇ ਪਿਣ੍ਡਪਾਤੋਤਿ ਵੋਹਾਰੋ ਨਤ੍ਥਿ, ਤਸ੍ਮਾ ਸਾਸਨਵੋਹਾਰੇਨ ‘‘ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ’’ਤਿ ਵੁਤ੍ਤਨ੍ਤਿ ਅਧਿਪ੍ਪਾਯੋ.

ਦਸ੍ਸੇਤੀਤਿ ਦੇਸੇਤਿ. ਠਪੇਤੀਤਿ ਅਞ੍ਞਮਞ੍ਞਸਙ੍ਕਰਤੋ ਵਵਤ੍ਥਪੇਤਿ. ਕਿਰਿਯਾਯਾਤਿ ਕਰਣੇਨ. ਪਵਤ੍ਤਿਯਾਤਿ ਪਵਤ੍ਤਨੇਨ. ਦਣ੍ਡਾਨਿ ਪਞ੍ਞਪੇਤੀਤਿ ਏਤ੍ਥ ਕਸ੍ਮਾ ਭਗਵਤਾ ਆਦਿਤੋਵ ਤਥਾ ਨ ਪੁਚ੍ਛਿਤਨ੍ਤਿ? ਯਸ੍ਮਾ ਸਾ ਤਸ੍ਮਿਂ ਅਤ੍ਥੇ ਸਭਾਵਨਿਰੁਤ੍ਤਿ ਨ ਹੋਤਿ, ਸਾਸਨੇ ਲੋਕੇ ਸਮਯਨ੍ਤਰੇਸੁ ਚ ਤਾਦਿਸੋ ਸਮੁਦਾਚਾਰੋ ਨਤ੍ਥਿ, ਕੇਵਲਂ ਪਨ ਤਸ੍ਸੇਵ ਨਿਗਣ੍ਠਸ੍ਸਾਯਂ ਕੋਟ੍ਠਾਲਕਸਦਿਸੋ ਸਮੁਦਾਚਾਰੋਤਿ ਇਮਮਤ੍ਥਂ ਦਸ੍ਸੇਤੁਂ ‘‘ਕਮ੍ਮਾਨਿ ਪਞ੍ਞਪੇਤਿ’’ ਇਚ੍ਚੇਵਾਹ. ਅਚਿਤ੍ਤਕਨ੍ਤਿ ਚਿਤ੍ਤਰਹਿਤਂ, ਚਿਤ੍ਤੇਨ ਅਸਮੁਟ੍ਠਾਪਿਤਨ੍ਤਿ ਅਤ੍ਥੋ. ਕਥਂ ਪਨ ਤਦੁਭਯਸ੍ਸ ਚਿਤ੍ਤੇਨ ਵਿਨਾ ਸਮ੍ਭਵੋਤਿ ਚੋਦਨਂ ਸਨ੍ਧਾਯ ਤਤ੍ਥ ਨਿਦਸ੍ਸਨਮਾਹ ‘‘ਯਥਾ ਕਿਰਾ’’ਤਿਆਦਿ. ਪਟਿਵਿਭਤ੍ਤਾਨਨ੍ਤਿ ਅਤ੍ਥਤੋ ਭਿਨ੍ਨਾਨਂ. ਪਟਿਵਿਸਿਟ੍ਠਾਨਨ੍ਤਿ ਵਿਸੇਸਨਪਦਵਸੇਨ ਸਦ੍ਦਤੋਪਿ ਭਿਨ੍ਨਾਨਂ. ਵਚਨਂ ਪਤਿਟ੍ਠਪੇਤੁਕਾਮੋਤਿ ਦੀਘਤਪਸ੍ਸਿਨੋ ਯਥਾਵੁਤ੍ਤਵਚਨਂ ਪਤਿਟ੍ਠਪੇਤੁਕਾਮੋ. ਤਸ੍ਮਿਞ੍ਹਿ ਪਤਿਟ੍ਠਾਪਿਤੇ ਤੇਨਪ੍ਪਸਙ੍ਗੇਨ ਆਗਤੋ, ਉਪਾਲਿ ਗਹਪਤਿ ਤਸ੍ਮਿਂ ਪਦੇਸੇ ਧਮ੍ਮਂ ਦਿਸ੍ਵਾ ਸਾਸਨੇ ਅਭਿਪ੍ਪਸੀਦਿਸ੍ਸਤਿ.

ਕਥਾ ਏਵ ਉਪਰਿ ਵਾਦਾਰੋਪਨਸ੍ਸ ਵਤ੍ਥੁਭਾਵਤੋ ਕਥਾਵਤ੍ਥੁ. ਕਥਾਯਂ ਪਤਿਟ੍ਠਪੇਸੀਤਿ ਕਥਾਵਤ੍ਥੁਸ੍ਮਿਂ, ਤਦਤ੍ਥੇ ਵਾ ਪਤਿਟ੍ਠਪੇਸਿ. ਯਥਾ ਤਂ ਵਾਦਾਰੋਪਨਭਯੇਨ ਨ ਅਵਜਾਨਾਤਿ, ਏਵਂ ਤਸ੍ਸਂ ਕਥਾਯਂ, ਤਸ੍ਮਿਂ ਵਾ ਅਤ੍ਥੇ ਦੀਘਤਪਸ੍ਸਿਂ ਯਾਵਤਤਿਯਂ ਵਾਦੇ ਪਤਿਟ੍ਠਪੇਸਿ. ਵਾਦਨ੍ਤਿ ਦੋਸਂ.

੫੭. ਇਦਾਨਿ ਚੇਤਨਾਸਮ੍ਪਯੁਤ੍ਤਧਮ੍ਮਮ੍ਪਿ ਗਹੇਤ੍ਵਾ ਕਾਯਕਮ੍ਮਾਦਿਵਸੇਨ ਸਙ੍ਗਹੇਤ੍ਵਾ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਿਵਿਧਂ ਕਾਯਦੁਚ੍ਚਰਿਤਂ ਕਾਯਕਮ੍ਮਂ ਨਾਮਾਤਿਆਦਿ ‘‘ਕਮ੍ਮਸ੍ਸ ਕਿਰਿਯਾਯਾ’’ਤਿ ਪਾਲ਼ਿਯਂ ਅਕੁਸਲਕਮ੍ਮਸ੍ਸ ਅਧਿਗਤਤ੍ਤਾ ਵੁਤ੍ਤਂ, ਪੁਬ੍ਬੇ ਪਨ ਅਟ੍ਠਕਾਮਾਵਚਰਕੁਸਲਚੇਤਨਾਤਿਆਦਿ ਸਾਵਜ੍ਜਂ ਅਨਵਜ੍ਜਞ੍ਚ ਸਾਮਞ੍ਞਤੋ ਏਕਜ੍ਝਂ ਕਤ੍ਵਾ ਦਸ੍ਸਿਤਂ. ਕਸ੍ਮਾ ਪਨੇਤ੍ਥ ਚੇਤਨਾ ਨ ਗਹਿਤਾਤਿ ਆਹ ‘‘ਇਮਸ੍ਮਿਂ ਸੁਤ੍ਤੇ ਕਮ੍ਮਂ ਧੁਰ’’ਨ੍ਤਿ. ਕਾਯਕਮ੍ਮਾਦਿਭੇਦਂ ਕਮ੍ਮਮੇਵ ਧੁਰਂ ਜੇਟ੍ਠਕਂ ਪੁਬ੍ਬਙ੍ਗਮਂ, ਨ ਚੇਤਨਾਮਤ੍ਤਮੇਵ. ਏਵਮਾਗਤੇਪੀਤਿ ਕਮ੍ਮਾਨੀਤਿ ਏਵਂ ਨਾਮੇਨ ਆਗਤੇਪਿ ਚੇਤਨਾ ਧੁਰਂ, ਤਤ੍ਥ ਚੇਤਨਂ ਜੇਟ੍ਠਕਂ ਪੁਬ੍ਬਙ੍ਗਮਂ ਕਤ੍ਵਾ ਵੁਤ੍ਤਨ੍ਤਿ ਅਧਿਪ੍ਪਾਯੋ. ਕਥਂ ਪਨ ਤਤ੍ਥ ਕਮ੍ਮਨ੍ਤਿ ਵਾ ਕਮ੍ਮਾਨੀਤਿ ਵਾ ਆਗਤੇ ਤੇਸਂ ਚੇਤਨਾਯ ਧੁਰਭਾਵੋਤਿ ਆਹ ‘‘ਯਤ੍ਥ ਕਤ੍ਥਚਿ…ਪੇ… ਲਭਤੀ’’ਤਿ. ਤਤ੍ਥ ਯਤ੍ਥ ਕਤ੍ਥਚੀਤਿ ਯਸ੍ਮਿਂ ਕਿਸ੍ਮਿਞ੍ਚਿ ਦ੍ਵਾਰੇ. ਸਾ ਵੁਤ੍ਤਾਵਾਤਿ ਸਾ ਚੇਤਨਾ ਵੁਤ੍ਤਾਵ, ਯਾ ਕਾਯਸਙ੍ਖਾਰਾਦਿਪਰਿਯਾਯੇਨ (ਯਸ੍ਸ ਕਸ੍ਸਚਿ ਕਮ੍ਮਸ੍ਸ ਕਾਯਦ੍ਵਾਰਾਦੀਸੁ ਪਵਤ੍ਤਾਪਨਚੇਤਨਾ) ਸਮ੍ਪਯੁਤ੍ਤਧਮ੍ਮਾਪਿ ਤਦਗ੍ਗੇਨ ਲੋਕਿਯਾਪਿ ਲੋਕੁਤ੍ਤਰਾਪਿ ਕਮ੍ਮਮੇਵ, ਅਭਿਜ੍ਝਾਦਯੋ ਪਨ ਚੇਤਨਾਪਕ੍ਖਿਕਾਤਿ ਦਟ੍ਠਬ੍ਬਂ.

ਮਹਨ੍ਤਨ੍ਤਿ ਕਟੁਕਫਲਂ. ਨ ਕਿਲਮਤਿ ਸਪ੍ਪਾਟਿਹਾਰਿਯਤ੍ਤਾ ਪਟਿਞ੍ਞਾਯ. ਇਦਾਨਿ ਤੇਸਂ ਸਪ੍ਪਾਟਿਹਾਰਿਯਤਂ ਦਸ੍ਸੇਤੁਂ ‘‘ਤਥਾ ਹੀ’’ਤਿਆਦਿ ਵੁਤ੍ਤਂ. ਯਦਿ ਅਕੁਸਲਂ ਪਤ੍ਵਾ ਕਾਯਕਮ੍ਮਂ ਵਚੀਕਮ੍ਮਂ ਮਹਨ੍ਤਨ੍ਤਿ ਵਦਨ੍ਤੋ ਨ ਕਿਲਮਤਿ, ਅਥ ਕਸ੍ਮਾ ਭਗਵਾ ਇਧ ਅਕੁਸਲਂ ਮਨੋਕਮ੍ਮਂ ਮਹਾਸਾਵਜ੍ਜਂ ਕਥੇਸੀਤਿ ਆਹ ‘‘ਇਮਸ੍ਮਿਂ ਪਨ ਠਾਨੇ’’ਤਿਆਦਿ. ਯਾਵਤਤਿਯਂ ਪਤਿਟ੍ਠਾਪਨਮਤ੍ਤੇਨ ਗਤਮਗ੍ਗਂ ਪਟਿਪਜ੍ਜਨ੍ਤੋ. ਤੇਨਾਹ ‘‘ਕਿਞ੍ਚਿ ਅਤ੍ਥਨਿਪ੍ਫਤ੍ਤਿਂ ਅਪਸ੍ਸਨ੍ਤੋਪੀ’’ਤਿ.

੫੮. ਨਿਵਾਸਟ੍ਠਾਨਭੂਤੋ ਬਾਲਕੋ ਏਤਿਸ੍ਸਾ ਅਤ੍ਥੀਤਿ ਬਾਲਕਿਨੀ. ਸਤ੍ਥੁਪਟਿਞ੍ਞਾਤਤਾਯ ਨਿਗਣ੍ਠਾਨਂ ਮਹਾਤਿ ਸਮ੍ਭਾਵਿਤਤ੍ਤਾ ਮਹਾਨਿਗਣ੍ਠੋ.

੬੦. ਆਵਟ੍ਟੇਤਿ ਪੁਰਿਮਾਕਾਰਤੋ ਨਿਵਤ੍ਤੇਤਿ ਅਤ੍ਤਨੋ ਵਸੇ ਵਤ੍ਤੇਤਿ ਏਤਾਯਾਤਿ ਆਵਟ੍ਟਨੀ, ਮਾਯਾ. ਤੇਨਾਹ ‘‘ਆਵਟ੍ਟੇਤ੍ਵਾ ਗਹਣਮਾਯ’’ਨ੍ਤਿ. ਸਤ੍ਥੁਪਟਿਞ੍ਞਾਨਂ ਬੁਦ੍ਧਦਸ੍ਸਨੇ ਚਿਤ੍ਤਮੇਵ ਨ ਉਪ੍ਪਜ੍ਜਤਿ, ਅਯਮੇਤ੍ਥ ਧਮ੍ਮਤਾ. ਸਚੇ ਪਨ ਸੋ ਤਂ ਪਟਿਞ੍ਞਂ ਅਪ੍ਪਹਾਯ ਬੁਦ੍ਧਾਨਂ ਸਮ੍ਮੁਖੀਭਾਵਂ ਉਪਗਚ੍ਛੇਯ੍ਯ, ਸਤ੍ਤਧਾ ਮੁਦ੍ਧਾ ਫਲੇਯ੍ਯ, ਤਸ੍ਮਾ ਭਗਵਾ ‘‘ਮਾ ਅਯਂ ਬਾਲੋ ਵਿਨਸ੍ਸੀ’’ਤਿਆਦਿਤੋਵ ਯਥਾ ਸਮ੍ਮੁਖੀਭਾਵਂ ਨ ਲਭਤਿ, ਤਥਾ ਕਰੋਤਿ. ਸ੍ਵਾਯਮਤ੍ਥੋ ਪਾਥਿਕਪੁਤ੍ਤਸਮਾਗਮੇਨ ਦੀਪੇਤਬ੍ਬੋ. ਦਸ੍ਸਨਸਮ੍ਪਤ੍ਤਿਨਿਯਾਮਮਾਹ ‘‘ਤਥਾਗਤਂ ਹੀ’’ਤਿਆਦਿ. ਆਗਮਾ ਨੁ ਖੋ ਇਧ ਤੁਮ੍ਹਾਕਂ ਸਨ੍ਤਿਕਂ.

੬੧. ਵਚੀਸਚ੍ਚੇ ਪਤਿਟ੍ਠਹਿਤ੍ਵਾਤਿ ਯਥਾਪਟਿਞ੍ਞਾਤਾਯ ਪਟਿਞ੍ਞਾਯ ਠਤ੍ਵਾ.

੬੨. ਸੀਤੋਦਕੇ ਅਮਤਾ ਪਾਣਾ ਪਾਨਕਾਲੇ ਪਨ ਮਰਨ੍ਤਿ, ਤੇਪਿ ਤੇਨ ਸੀਤੋਦਕਪਰਿਭੋਗੇਨ ਮਾਰਿਤਾ ਹੋਨ੍ਤਿ, ਤਸ੍ਮਾ ਤਪਸ੍ਸਿਨਾ ਨਾਮ ਸਬ੍ਬੇਨ ਸਬ੍ਬਂ ਸੀਤੋਦਕਂ ਨ ਪਰਿਭੁਞ੍ਜਿਤਬ੍ਬਨ੍ਤਿ ਤੇਸਂ ਲਦ੍ਧਿ. ਪਾਕਤਿਕਂ ਵਾ ਉਦਕਂ ਸਤ੍ਤੋਤਿ ਪੁਰਾਤਨਾਨਂ ਨਿਗਣ੍ਠਾਨਂ ਲਦ੍ਧਿ. ਤੇਨਾਹ ‘‘ਸਤ੍ਤਸਞ੍ਞਾਯ ਸੀਤੋਦਕਂ ਪਟਿਕ੍ਖਿਪਨ੍ਤੀ’’ਤਿ. ਤੇਸਂ ਤਂ ਅਧੁਨਾਤਨਨਿਗਣ੍ਠਾਨਂ ਵਾਦੇਨ ਵਿਰੁਜ੍ਝਤਿ. ਤੇ ਹਿ ਪਥਵੀਆਦਿਨਵਪਦਤ੍ਥਤੋ ਅਞ੍ਞਮੇਵ ਜੀਵਿਤਂ ਪਟਿਜਾਨਨ੍ਤਿ. ਚਿਤ੍ਤੇਨ ਸੀਤੋਦਕਂ ਪਾਤੁਕਾਮੋ ਪਰਿਭੁਞ੍ਜਿਤੁਕਾਮੋ ਹੋਤਿ ਰੋਗੇ ਠਤ੍ਵਾਪਿ ਸਤ੍ਤਾਨਂ ਚਿਤ੍ਤਸ੍ਸ ਤਥਾ ਨ ਵਿਤਤਤਾ. ਤੇਨਾਹ – ‘‘ਤੇਨਸ੍ਸ ਮਨੋਦਣ੍ਡੋ ਤਤ੍ਥੇਵ ਭਿਜ੍ਜਤੀ’’ਤਿ. ਤੇਨਾਤਿ ਸੀਤੋਦਕਂ ਪਾਤੁਂ ਪਰਿਭੁਞ੍ਜਿਤੁਞ੍ਚ ਇਚ੍ਛਨੇਨ. ਅਸ੍ਸਾਤਿ ਯਥਾਵੁਤ੍ਤਸ੍ਸ ਨਿਗਣ੍ਠਸ੍ਸ. ਤਤ੍ਥੇਵਾਤਿ ਤਥਾਚਿਤ੍ਤੁਪ੍ਪਾਦਨੇ ਏਵ. ਭਿਜ੍ਜਤਿ ਸਂਵਰਸ੍ਸ ਵਿਕੋਪਿਤਤ੍ਤਾ. ਤਥਾਭੂਤੋ ਸੋ ਨਿਗਣ੍ਠੋ ਸੀਤੋਦਕਂ ਚੇ ਲਭੇਯ੍ਯ, ਕਤਿਪਯਂ ਕਾਲਂ ਜੀਵੇਯ੍ਯ, ਅਲਾਭੇਨ ਪਨ ਪਰਿਸੁਸ੍ਸਮਾਨਕਣ੍ਠੋਟ੍ਠਤਾਲੁਜਿਵ੍ਹਾਆਦਿਕੋ ਸਬ੍ਬਸੋ ਪਰਿਦਾਹਾਭਿਭੂਤੋ ਮਰੇਯ੍ਯ. ਤੇਨਾਹ – ‘‘ਸੀਤੋਦਕਂ ਅਲਭਮਾਨੋ ਕਾਲਂ ਕਰੇਯ੍ਯਾ’’ਤਿ. ਕਸ੍ਮਾ? ਯਸ੍ਮਾ ਸੀਤੋਦਕਂ ਪਿਵਾਯ ਸਨ੍ਨਿਸ੍ਸਿਤਚਿਤ੍ਤਸ੍ਸ ਮਰਣਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਮਨੋਦਣ੍ਡੋ ਪਨ ਭਿਨ੍ਨੋਪਿ ਚੁਤਿਮ੍ਪਿ ਆਕਡ੍ਢਤੀ’’ਤਿ. ਯਸ੍ਮਾ ਪਨ ਤਥਾਭੂਤਚਿਤ੍ਤਸ੍ਸ ਨਿਗਣ੍ਠਸ੍ਸ ਮਨੋਸਤ੍ਤੇਸੁ ਨਾਮ ਦੇਵੇਸੁ ਉਪਪਤ੍ਤਿ ਹੋਤੀਤਿ ਤਿਤ੍ਥਿਯਾਨਂ ਲਦ੍ਧਿ, ਤਸ੍ਮਾ ਵੁਤ੍ਤਂ ‘‘ਮਨੋਦਣ੍ਡੋ ਪਨ ਭਿਨ੍ਨੋਪਿ ਪਟਿਸਨ੍ਧਿਮ੍ਪਿ ਆਕਡ੍ਢਤੀ’’ਤਿ. ਇਤੀਤਿ ਏਵਂ ‘‘ਇਧਾਸ੍ਸ ਨਿਗਣ੍ਠੋ’’ਤਿਆਦਿਆਕਾਰੇਨ. ਨਨ੍ਤਿ ਉਪਾਲਿਂ ਗਹਪਤਿਂ. ਮਹਨ੍ਤੋਤਿ ਵਦਾਪੇਸਿ ‘‘ਮਨੋਪਟਿਬਦ੍ਧੋ ਕਾਲਙ੍ਕਰੋਤੀ’’ਤਿ ਵਦਨ੍ਤੋਤਿ ਅਧਿਪ੍ਪਾਯੋ.

ਉਪਾਸਕਸ੍ਸਾਤਿ ਉਪਾਲਿਸ੍ਸ ਗਹਪਤਿਸ੍ਸ. ਮੁਚ੍ਛਾਵਸੇਨਾਤਿਆਦਿਨਾ ਅਨ੍ਵਯਤੋ ਬ੍ਯਤਿਰੇਕਤੋ ਚ ਮਨੋਦਣ੍ਡਸ੍ਸ ਮਹਨ੍ਤਤਂ ਵਿਭਾਵੇਤਿ. ਚਿਤ੍ਤਸਨ੍ਤਤਿਪ੍ਪਵਤ੍ਤਿਮਤ੍ਤੇਨੇਵਾਤਿ ਵਿਨਾ ਕਾਯਦਣ੍ਡੇਨ ਵਚੀਦਣ੍ਡੇਨ ਚ ਕੇਵਲਂ ਚਿਤ੍ਤਸਨ੍ਤਤਿਪ੍ਪਵਤ੍ਤਿਮਤ੍ਤੇਨ. ਭਿਜ੍ਜਿਤ੍ਵਾਪੀਤਿ ਏਤ੍ਥ ਪਿ-ਸਦ੍ਦੇਨ ਅਭਿਜ੍ਜਿਤ੍ਵਾਪਿ. ਅਨਿਯ੍ਯਾਨਿਕਾਤਿ ਅਪ੍ਪਾਟਿਹੀਰਾ, ਅਯੁਤ੍ਤਾਤਿ ਅਤ੍ਥੋ. ਸਲ੍ਲਕ੍ਖੇਸਿ ਉਪਾਸਕੋਤਿ ਵਿਭਤ੍ਤਿਂ ਵਿਪਰਿਣਾਮੇਤ੍ਵਾ ਯੋਜਨਾ. ਪਞ੍ਹਪਟਿਭਾਨਾਨੀਤਿ ਞਾਤੁਂ ਇਚ੍ਛਿਤੇ ਅਤ੍ਥੇ ਉਪ੍ਪਜ੍ਜਨਕਪਟਿਭਾਨਾਨਿ.

‘‘ਮਨੋਪਟਿਬਦ੍ਧੋ ਕਾਲਂ ਕਰੋਤੀ’’ਤਿ ਵਦਨ੍ਤੇਨ ਅਤ੍ਥਤੋ ਮਨੋਦਣ੍ਡਸ੍ਸ ਤਦੁਤ੍ਤਰਭਾਵੋ ਪਟਿਞ੍ਞਾਤੋ ਹੋਤੀਤਿ ਆਹ ‘‘ਇਦਾਨਿ ਮਨੋਦਣ੍ਡੋ ਮਹਨ੍ਤੋਤਿ ਇਦਂ ਵਚਨ’’ਨ੍ਤਿ. ਤਥਾ ਚੇਵ ਵੁਤ੍ਤਂ – ‘‘ਮਨੋਦਣ੍ਡੋਵ ਬਲਵਾ ਮਹਨ੍ਤੋਤਿ ਵਦਾਪੇਸੀ’’ਤਿ.

੬੩. ਪਾਣਾਤਿਪਾਤਾਦਿਤੋ ਯਮਨਂ ਯਾਮੋ, ਚਤੁਬ੍ਬਿਧੋ ਯਾਮੋ ਚਤੁਯਾਮੋ, ਚਤੁਯਾਮਸਙ੍ਖਾਤੇਨ ਸਂਵਰੇਨ ਸਂਵੁਤੋ ਚਾਤੁਯਾਮਸਂਵਰਸਂਵੁਤੋ. ਅਟ੍ਠਕਥਾਯਂ ਪਨ ਯਾਮ-ਸਦ੍ਦੋ ਕੋਟ੍ਠਾਸਪਰਿਯਾਯੋਤਿ ‘‘ਇਮਿਨਾ ਚਤੁਕੋਟ੍ਠਾਸੇਨਾ’’ਤਿ ਵੁਤ੍ਤਂ. ਪਿਯਜਾਤਿਕਂ ਰੂਪਾਦਿਆਰਮ੍ਮਣਂ ਰਾਗਵਸੇਨ ਬਾਲੇਹਿ ਭਾਵਨੀਯਤ੍ਤਾ ‘‘ਭਾਵਿਤ’’ਨ੍ਤਿ ਵੁਚ੍ਚਤੀਤਿ ਆਹ ‘‘ਭਾਵਿਤਨ੍ਤਿ ਪਞ੍ਚ ਕਾਮਗੁਣਾ’’ਤਿ.

ਯੋ ਸਬ੍ਬਂ ਪਾਪਂ ਆਸਵਞ੍ਚ ਵਾਰੇਤੀਤਿ ਸਬ੍ਬਵਾਰੀ, ਤਸ੍ਸ ਨਵਸੁ ਪਦਤ੍ਥੇਸੁ ਸਤ੍ਤਮੋ ਪਦਤ੍ਥੋ, ਤੇਨ ਸਬ੍ਬਵਾਰਿਨਾ ਪਾਪਂ ਵਾਰਿਤ੍ਵਾ ਠਿਤੋਤਿ ਸਬ੍ਬਵਾਰਿਵਾਰਿਤੋ. ਤੇਨਾਹ ‘‘ਸਬ੍ਬੇਨ ਪਾਪਵਾਰਣੇਨ ਵਾਰਿਤਪਾਪੋ’’ਤਿ. ਤਤੋ ਏਵ ਸਬ੍ਬਸ੍ਸ ਵਾਰਿਤਬ੍ਬਸ੍ਸ ਆਸਵਸ੍ਸ ਧੁਨਨਤੋ ਸਬ੍ਬਵਾਰਿਧੁਤੋ. ਵਾਰਿਤਬ੍ਬਸ੍ਸ ਨਿਵਾਰਣਵਸੇਨ ਸਬ੍ਬਵਾਰਿਨੋ ਫੁਟੋ ਫੁਸਿਤੋਤਿ ਸਬ੍ਬਵਾਰਿਫੁਟੋ. ਸਙ੍ਘਾਤਨ੍ਤਿ ਸਹਸਾ ਹਨਨਂ, ਅਸਞ੍ਚੇਤਨਿਕਵਧਨ੍ਤਿ ਅਤ੍ਥੋ. ਕਤਰਸ੍ਮਿਂ ਕੋਟ੍ਠਾਸੇਤਿ ਤੀਸੁ ਦਣ੍ਡਕੋਟ੍ਠਾਸੇਸੁ ਕਤਰਕੋਟ੍ਠਾਸੇ.

੬੪. ਖਲਿਯਤਿ ਸਮਾਦਿਯਤੀਤਿ ਖਲਂ, ਰਾਸੀਤਿ ਆਹ – ‘‘ਏਕਂ ਮਂਸਖਲਨ੍ਤਿ ਏਕਂ ਮਂਸਰਾਸਿ’’ਨ੍ਤਿ. ਵਿਜ੍ਜਾਧਰਇਦ੍ਧਿਯਾ ਇਦ੍ਧਿਮਾ. ਸਾ ਪਨ ਇਦ੍ਧਿ ਯਸ੍ਮਾ ਆਨੁਭਾਵਸਮ੍ਪਨ੍ਨਸ੍ਸੇਵ ਇਜ੍ਝਤਿ, ਨ ਯਸ੍ਸ ਕਸ੍ਸਚਿ. ਤਸ੍ਮਾ ਆਹ ‘‘ਆਨੁਭਾਵਸਮ੍ਪਨ੍ਨੋ’’ਤਿ. ਵਿਜ੍ਜਾਨੁਭਾਵਵਸੇਨੇਵ ਆਨੁਭਾਵਸਮ੍ਪਨ੍ਨੋ. ਚਿਤ੍ਤੇ ਵਸੀਭਾਵਪ੍ਪਤ੍ਤੋ ਆਨੁਭਾਵਾਯ ਏਵ ਵਿਜ੍ਜਾਯ ਪਗੁਣਭਾਵਾਪਾਦਨੇਨ. ਏਤੇਨ ਵਸੀਭਾਵਂ ਲੋਕਿਯਸਮਞ੍ਞਾਵਸੇਨ ਭਗਵਾ ਉਪਾਲਿਂ ਗਹਪਤਿਂ ਪਞ੍ਞਪੇਤੁਕਾਮੋ ਏਵਮਾਹ. ਲੋਕਿਕਾ ਹਿ ‘‘ਭਾਵਨਾਮਯਇਦ੍ਧਿਯਾ ਇਦ੍ਧਿਮਾ ਚੇਤੋਵਸੀਭਾਵਪ੍ਪਤ੍ਤੋ ਪਰੂਪਘਾਤਂ ਕਰੋਤੀ’’ਤਿ ਮਞ੍ਞਨ੍ਤਿ. ਤਥਾ ਹਿ ਤੇ ਇਸਯੋ ਪਰੇਸਂ ਸਂਵਣ੍ਣੇਨ੍ਤਿ, ਇਸੀਨਂ ਆਨੁਭਾਵਂ ਕਿਤ੍ਤੇਨ੍ਤਿ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਪਰਤੋ ਆਗਮਿਸ੍ਸਤੀਤਿ.

੬੫. ਅਰਞ੍ਞਮੇਵ ਹੁਤ੍ਵਾਤਿ ਸਬ੍ਬਸੋ ਅਰਞ੍ਞਮੇਵ ਹੁਤ੍ਵਾ. ਅਰਞ੍ਞਭਾਵੇਨ ਅਰਞ੍ਞਂ ਜਾਤਂ, ਨ ਨਾਮਮਤ੍ਤੇਨ. ਇਸੀਨਂ ਅਤ੍ਥਾਯਾਤਿ ਇਸੀਨਂ ਆਸਾਦਨਤ੍ਥਾਯ.

ਗੋਧਾਵਰੀਤੀਰਤੋ ਨਾਤਿਦੂਰੇ. ਉਸੂਯਮਾਨੋਤਿ ‘‘ਨ ਮਂ ਏਸ ਜਨੋ ਪਰਿਵਾਰੇਤੀ’’ਤਿ ਉਸੂਯਂ ਕਰੋਨ੍ਤੋ. ਕਿਲਿਟ੍ਠੋ ਵਤਾਤਿ ਪਙ੍ਕਦਨ੍ਤਰਜਸਿਰਤਾਦੀਹਿ ਕਿਲਿਟ੍ਠਸਰੀਰੋ. ਅਨਞ੍ਜਿਤਮਣ੍ਡਿਤੋਤਿ ਅਨਞ੍ਜਿਤਕ੍ਖਿਕੋ ਸਬ੍ਬੇਨ, ਸਬ੍ਬਂ ਅਮਣ੍ਡਿਤੋ ਚ. ਤਸ੍ਮਿਂ ਕਾਲੇ ‘‘ਕਾਲਸ੍ਸੇਵ ਅਕ੍ਖੀਨਂ ਅਞ੍ਜਨਂ ਮਙ੍ਗਲ’’ਨ੍ਤਿ ਮਨੁਸ੍ਸਾਨਂ ਲਦ੍ਧਿ, ਤਸ੍ਮਾ ਅਨਞ੍ਜਨਂ ਵਿਸੁਂ ਗਹਿਤਂ.

ਰਾਜਾ ਤਸ੍ਸ ਵਚਨਂ ਗਹੇਤ੍ਵਾਤਿ ‘‘ਵੇਦੇਸੁ ਈਦਿਸਂ ਆਗਤਂ ਭਵਿਸ੍ਸਤੀਤਿ ਏਵਂ, ਭਨ੍ਤੇ’’ਤਿ ਰਾਜਾ ਤਸ੍ਸ ਪੁਰੋਹਿਤਸ੍ਸ ਵਚਨਂ ਗਹੇਤ੍ਵਾ. ਉਸੁਮਜਾਤਹਦਯੋਤਿ ਉਤ੍ਤਤ੍ਤਹਦਯੋ. ਨਾਸਿਕਾਨਂ ਅਪ੍ਪਹੋਨ੍ਤੇ ਮੁਖੇਨ ਅਸ੍ਸਸਨ੍ਤੋ.

ਵਿਜਿਤਜਯੇਹਿ ਆਗਨ੍ਤ੍ਵਾ ਨਕ੍ਖਤ੍ਤਯੁਤ੍ਤਂ ਆਗਮੇਨ੍ਤੇਹਿ ਨਿਸੀਦਿਤਬ੍ਬਟ੍ਠਾਨਂ ਜਯਖਨ੍ਧਾਵਾਰਟ੍ਠਾਨਂ. ਉਦਕਵੁਟ੍ਠਿਪਾਤਨਾਦਿ ਤਸ੍ਮਿਂ ਪਾਪਕਮ੍ਮੇ ਅਸਮਙ੍ਗਿਭੂਤਾਨਮ੍ਪਿ ਸਮਨੁਞ੍ਞਤਾਯ ਅਨ੍ਤੋਕਰਣਤ੍ਥਂ ਕਤਂ. ਕਤਭਣ੍ਡਵੁਟ੍ਠੀਤਿ ਆਭਰਣਵਸ੍ਸਂ. ਮਹਾਜਨੋ ਸਮਨੁਞ੍ਞੋ ਜਾਤੋਤਿ ਯੋਜਨਾ. ਮਾਤੁਪੋਸਕਰਾਮੋਤਿ ਮਾਤਰਿ ਸਮ੍ਮਾਪਟਿਪਨ੍ਨੋ ਰਾਮੋ ਨਾਮ ਏਕੋ ਪੁਰਿਸੋ. ਅਸਮਙ੍ਗਿਭੂਤਾਨਨ੍ਤਿ ਅਸਮਨੁਞ੍ਞਾਨਂ.

ਅਵਕਿਰਿਯਾਤਿ ਅਸੁਸ੍ਸੂਸਤਂ ਪਟਿਚ੍ਚ. ਫੁਲਿਙ੍ਗਾਨੀਤਿ ਅਗ੍ਗਿਕਣਾਨਿ. ਪਤਨ੍ਤਿ ਕਾਯੇਤਿ ਕਾਯੇ ਇਤੋ ਚਿਤੋ ਨਿਪਤਨ੍ਤਿ. ਏਤੇ ਕਿਰ ਨਿਰਯਂ ਵਿਵਰਿਤ੍ਵਾ ਮਹਾਜਨਸ੍ਸ ਦਸ੍ਸੇਨ੍ਤਿ.

ਯਥਾਫਾਸੁਕਟ੍ਠਾਨਨ੍ਤਿ ਮਯਂ ਕਞ੍ਚਿਪਿ ਦੇਸਂ ਉਦ੍ਦਿਸ੍ਸ ਨ ਗਚ੍ਛਾਮ, ਯਤ੍ਥ ਪਨ ਵਸਨ੍ਤਸ੍ਸ ਪਬ੍ਬਜਿਤਸ੍ਸ ਫਾਸੁ ਹੋਤਿ, ਤਂ ਯਥਾਫਾਸੁਕਟ੍ਠਾਨਂ ਗਚ੍ਛਾਮਾਤਿ ਅਧਿਪ੍ਪਾਯੋ. ਸਙ੍ਘਾਤਿ ਸਂਹਤਾ. ਗਣਾਤਿ ਤਂਤਂਸੇਣਿਭਾਵੇਨ ਗਣਿਤਬ੍ਬਤਾਯ ਗਣਾ. ਗਣੀਭੂਤਾਤਿ ਏਕਜ੍ਝਾਸਯਾ ਹੁਤ੍ਵਾ ਰਾਸਿਭੂਤਾ. ਅਦਿਨ੍ਨਾਦਾਨਨ੍ਤਿਆਦੀਸੁਪਿ ਨਿਰਯੇ ਪਚ੍ਚਿਤ੍ਵਾ ਮਨੁਸ੍ਸਲੋਕਂ ਆਗਤਸ੍ਸ ਵਿਪਾਕਾਵਸੇਸੇਨਾਤਿ ਆਨੇਤ੍ਵਾ ਯੋਜੇਤਬ੍ਬਂ.

ਪਗ੍ਗਣ੍ਹਿਸ੍ਸਾਮੀਤਿ ਸਮ੍ਭਾਵਨਂ ਉਪ੍ਪਾਦੇਸ੍ਸਾਮਿ. ਨੇਸਂ ਕਤ੍ਤਬ੍ਬਨ੍ਤਿ ਚਿਨ੍ਤੇਸੀਤਿ ਯੋਜਨਾ. ਕਿਂ ਚਿਨ੍ਤੇਸਿ? ਆਘਾਤਂ ਉਪ੍ਪਾਦੇਤ੍ਵਾ ਅਨਤ੍ਥਕਰਣੂਪਾਯਂ. ਤੇਨਾਹ ‘‘ਸੋ ਧਮ੍ਮਕਥਾਪਰਿਯੋਸਾਨੇ’’ਤਿਆਦਿ. ਨਾਗਬਲਪਿਚ੍ਛਿਲ੍ਲਾਦੀਨਨ੍ਤਿ ਨਾਗਬਲਸਾਸਪਅਙ੍ਕੋਲਤੇਲਕਣਿਕਾਰਨਿਯ੍ਯਾਸਾਦੀਨਂ ਚਿਕ੍ਖਲ੍ਲਾਨਂ. ਵਿਹੇਠਯਿਂਸੁ ਨਿਰਯਾਦਿਕਥਾਹਿ ਘਟ੍ਟੇਨ੍ਤਾ. ਛਦ੍ਵਾਰਾਰਮ੍ਮਣੇਤਿ ਚਕ੍ਖਾਦੀਨਂ ਛਨ੍ਨਂ ਦ੍ਵਾਰਾਨਂ ਆਰਮ੍ਮਣਭੂਤੇ ਰੂਪਾਦਿਵਿਸਯੇ.

ਨਵ ਵੁਟ੍ਠਿਯੋਤਿ ਉਦਕਵੁਟ੍ਠਿ ਸੁਮਨਪੁਪ੍ਫਵੁਟ੍ਠਿ ਮਾਸਕਵੁਟ੍ਠਿ ਕਹਾਪਣਵੁਟ੍ਠਿ ਆਭਰਣਵੁਟ੍ਠਿ ਆਵੁਧਵੁਟ੍ਠਿ ਅਙ੍ਗਾਰਵੁਟ੍ਠਿ ਪਾਸਾਣਵੁਟ੍ਠਿ ਵਾਲਿਕਾਵੁਟ੍ਠੀਤਿ ਇਮਾ ਨਵ ਵੁਟ੍ਠਿਯੋ. ਅਵਞ੍ਚਯੀਤਿ ਸਕ੍ਕਾਰਂ ਕਰੋਨ੍ਤੋ ਵਿਯ ਹੁਤ੍ਵਾ ਅਸਕ੍ਕਾਰਂ ਕਰੋਨ੍ਤੋ ਅਨਤ੍ਥਚਰਣੇਨ ਵਞ੍ਚਯਿ. ਅਦੂਸਕੇਤਿ ਅਨਪਰਾਧੇ.

‘‘ਦਿਟ੍ਠਮਙ੍ਗਲਿਕਾ ਬ੍ਰਾਹ੍ਮਣਕਞ੍ਞਾ’’ਤਿ ਜਾਤਕਟ੍ਠਕਥਾਦੀਸੁ (ਜਾ. ਅਟ੍ਠ. ੪.੧੫.ਮਾਤਙ੍ਗਜਾਤਕਵਣ੍ਣਨਾ) ਆਗਤਂ, ਇਧ ਪਨ ‘‘ਸੇਟ੍ਠਿਧੀਤਾ’’ਤਿ. ਵਾਰੇਯ੍ਯਤ੍ਥਾਯਾਤਿ ਆਵਾਹਤ੍ਥਾਯ, ਅਸ੍ਸਾਤਿ ਪੇਸਿਤਪੁਗ੍ਗਲਸ੍ਸ. ਤਾਦਿਸੇਨ ਨੀਚਕੁਲਸਂਵਤ੍ਤਨਿਯੇਨ ਕਮ੍ਮੁਨਾ ਲਦ੍ਧੋਕਾਸੇਨ ਚਣ੍ਡਾਲਯੋਨਿਯਂ ਨਿਬ੍ਬਤ੍ਤੋ.

ਚਮ੍ਮਗੇਹੇਤਿ ਚਮ੍ਮੇਨ ਛਾਦਿਤੇ ਗੇਹੇ. ਮਾਤਙ੍ਗੋਤ੍ਵੇਵਸ੍ਸ ਨਾਮਂ ਅਹੋਸਿ ਜਾਤਿਸਮੁਦਾਗਤਂ. ਤਨ੍ਤਿ ਘਣ੍ਟਂ. ਵਾਦੇਨ੍ਤੋ ਤਾਲਨੇਨ ਸਦ੍ਦਂ ਕਰੋਨ੍ਤੋ. ਮਹਾਪਥਂ ਪਟਿਪਜ੍ਜਿ ਦਿਟ੍ਠਮਙ੍ਗਲਿਕਾਯ ਗੇਹਦ੍ਵਾਰਸਮੀਪੇਨ.

ਤਸ੍ਸਾ ਵੇਯ੍ਯਾਵਚ੍ਚਕਰਾ ਚੇਵ ਉਪਟ੍ਠਾਕਮਨੁਸ੍ਸਾ ਪਟਿਬਦ੍ਧਾ ਚ ਸੁਰਾਸੋਣ੍ਡਾਦਯੋ ਜਾਣੁਕਪ੍ਪਰਾਦੀਹਿ ਸੁਕੋਟ੍ਟਿਤਂ ਕੋਟ੍ਟਿਤਭਾਵੇਨ ਮੁਚ੍ਛਂ ਆਪਨ੍ਨਤ੍ਤਾ ਮਤੋਤਿ ਸਞ੍ਞਾਯ ਛਡ੍ਡੇਸੁਂ.

ਅਥ ਬੋਧਿਸਤ੍ਤੋ ਆਯੁਅਵਸੇਸਸ੍ਸ ਅਤ੍ਥਿਤਾਯ ਮਨ੍ਦਮਨ੍ਦੇ ਵਾਤੇ ਵਾਯਨ੍ਤੇ ਚਿਰੇਨ ਸਞ੍ਞਂ ਪਟਿਲਭਤਿ. ਤੇਨਾਹ ‘‘ਮਹਾਪੁਰਿਸੋ’’ਤਿਆਦਿ. ਗੇਹਙ੍ਗਣੇਤਿ ਗੇਹਸ੍ਸ ਮਹਾਦ੍ਵਾਰਤੋ ਬਹਿ ਵਿਵਟਙ੍ਗਣੇ. ਪਤਿਤੋਤਿ ਪਾਤਂ ਕਤ੍ਵਾ ਇਚ੍ਛਿਤਤ੍ਥਨਿਪ੍ਫਤ੍ਤਿਂ ਅਨ੍ਤਰਂ ਕਤ੍ਵਾ ਅਨੁਪ੍ਪਵੇਸੇਨ ਨਿਪਨ੍ਨੋ. ਦਿਟ੍ਠਮਙ੍ਗਲਿਕਾਯਾਤਿ ਦਿਟ੍ਠਮਙ੍ਗਲਿਕਾਕਾਰਣੇਨ.

ਯਸਨ੍ਤਿ ਵਿਭਵਂ ਕਿਤ੍ਤਿਸਦ੍ਦਞ੍ਚ. ਚਨ੍ਦਨ੍ਤਿ ਚਨ੍ਦਮਣ੍ਡਲਂ, ਚਨ੍ਦਵਿਮਾਨਨ੍ਤਿ ਅਤ੍ਥੋ. ਉਚ੍ਛਿਟ੍ਠਗੇਹੇਤਿ ਪਰੇਹਿ ਪਰਿਭੁਤ੍ਤਗੇਹੇ. ਮਣ੍ਡਪੇਤਿ ਨਗਰਮਜ੍ਝੇ ਮਹਾਮਣ੍ਡਪੇ.

ਖੀਰਮਣਿਮੂਲਨ੍ਤਿ ਖੀਰਮੂਲਂ, ਪਾਦੇਸੁ ਬਦ੍ਧਮਣਿਮੂਲਞ੍ਚ. ਯਾਵਤਾ ਵਾਚੁਗ੍ਗਤਾ ਪਰਿਯਤ੍ਤੀਤਿ ਯਤ੍ਤਕੋ ਮਨੁਸ੍ਸਵਚੀਦ੍ਵਾਰਤੋ ਉਗ੍ਗਤੋ ਨਿਕ੍ਖਨ੍ਤੋ ਪਵਤ੍ਤੋ, ਯਂਕਿਞ੍ਚਿ ਵਚੀਮਯਨ੍ਤਿ ਅਤ੍ਥੋ. ਆਕਾਸਙ੍ਗਣੇਤਿ ਵਿਵਟਙ੍ਗਣੇ.

ਦੁਮ੍ਮਵਾਸੀਤਿ ਧੂਮੋ ਧੂਸਰੋ, ਅਨਞ੍ਜਿਤਾਮਣ੍ਡਿਤੋਤਿ ਅਧਿਪ੍ਪਾਯੋ. ਓਤਲ੍ਲਕੋਤਿ ਨਿਹੀਨਜ੍ਝਾਸਯੋ, ਅਪ੍ਪਾਨੁਭਾਵੋਤਿ ਅਤ੍ਥੋ. ਪਟਿਮੁਞ੍ਚ ਕਣ੍ਠੇਤਿ ਯਾਵ ਗਲਵਾਟਕਾ ਪਾਰੁਪਿਤ੍ਵਾ. ਕੋ ਰੇ ਤੁਵਨ੍ਤਿ ਅਰੇ ਕੋ ਨਾਮ ਤ੍ਵਂ.

ਪਕਤਨ੍ਤਿ ਪਟਿਯਤ੍ਤਂ ਨਾਨਪ੍ਪਕਾਰਤੋ ਅਭਿਸਙ੍ਖਤਂ. ਉਤ੍ਤਿਟ੍ਠਪਿਣ੍ਡਨ੍ਤਿ ਅਨ੍ਤਰਘਰਂ ਉਪਗਮ੍ਮ ਠਤ੍ਵਾ ਲਦ੍ਧਬ੍ਬਪਿਣ੍ਡਂ, ਭਿਕ੍ਖਾਹਾਰਨ੍ਤਿ ਅਤ੍ਥੋ. ਲਭਤਨ੍ਤਿ ਲਚ੍ਛਤੁ. ਸਪਾਕੋਤਿ ਮਹਾਸਤ੍ਤੋ ਜਾਤਿਵਸੇਨ ਯਥਾਭੂਤਂ ਅਤ੍ਤਾਨਂ ਆਵਿਕਰੋਤਿ.

ਅਤ੍ਥਤ੍ਥਿਤਂ ਸਦ੍ਦਹਤੋਤਿ ਸਮ੍ਪਰਾਯਿਕਸ੍ਸ ਅਤ੍ਥਸ੍ਸ ਅਤ੍ਥਿਭਾਵਂ ਸਦ੍ਦਹਨ੍ਤਸ੍ਸ. ਅਪੇਹੀਤਿ ਅਪਗਚ੍ਛ. ਏਤ੍ਤੋਤਿ ਇਮਸ੍ਮਾ ਠਾਨਾ. ਜਮ੍ਮਾਤਿ ਲਾਮਕ.

ਅਨੂਪਖੇਤ੍ਤੇਤਿ ਅਜਙ੍ਗਲੇ ਉਦਕਸਮ੍ਪਨ੍ਨੇ ਖੇਤ੍ਤੇ ਫਲਵਿਸੇਸਂ ਪਚ੍ਚਾਸੀਸਨ੍ਤਾ. ਏਤਾਯ ਸਦ੍ਧਾਯ ਦਦਾਹਿ ਦਾਨਨ੍ਤਿ ਨਿਨ੍ਨਂ ਥਲਞ੍ਚ ਪੂਰੇਨ੍ਤੋ ਮੇਘੋ ਵਿਯ ਗੁਣਵਨ੍ਤੇ ਨਿਗ੍ਗੁਣੇ ਚ ਦਾਨਂ ਦੇਹਿ, ਏਵਂ ਦੇਨ੍ਤੋ ਚ ਅਪ੍ਪੇਵ ਆਰਾਧਯੇ ਦਕ੍ਖਿਣੇਯ੍ਯੇਤਿ. ਦਕ੍ਖਿਣੇਯ੍ਯੇਤਿ ਸੀਲਾਦਿਗੁਣਸਮਨ੍ਨਾਗਤੇ.

ਤਾਨੀਤਿ ਤੇ ਬ੍ਰਾਹ੍ਮਣਾ. ਵੇਣੁਪਦਰੇਨਾਤਿ ਵੇਲ਼ੁਵਿਲੀਵੇਨ.

ਗਿਰਿਂ ਨਖੇਨ ਖਣਸੀਤਿ ਪਬ੍ਬਤਂ ਅਤ੍ਤਨੋ ਨਖੇਨ ਖਣਨ੍ਤੋ ਵਿਯ ਅਹੋਸਿ. ਅਯੋਤਿ ਕਾਲਲੋਹਂ. ਪਦਹਸੀਤਿ ਅਭਿਭਵਸਿ, ਅਤ੍ਤਨੋ ਸਰੀਰੇਨ ਅਭਿਭਵਨ੍ਤੋ ਵਿਯ ਅਹੋਸਿ.

ਆਵੇਧਿਤਨ੍ਤਿ ਚਲਿਤਂ ਵਿਪਰਿਵਤ੍ਤੇਤ੍ਵਾ ਠਿਤਂ. ਪਿਟ੍ਠਿਤੋਤਿ ਪਿਟ੍ਠਿਪਸ੍ਸੇਨ. ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਨ੍ਤਿ ਅਕਮ੍ਮਕ੍ਖਮਂ ਬਾਹੁਦ੍ਵਯਂ ਥਦ੍ਧਂ ਸੁਕ੍ਖਦਣ੍ਡਕਂ ਵਿਯ ਕੇਵਲਂ ਪਸਾਰੇਤਿ, ਨ ਸਮਿਞ੍ਜੇਤਿ, ਸੇਤਾਨਿ ਅਕ੍ਖੀਨਿ ਪਰਿਵਤ੍ਤਨੇਨ ਕਣ੍ਹਮਣ੍ਡਲਸ੍ਸ ਅਦਿਸ੍ਸਨਤੋ.

ਜੀਵਿਤਨ੍ਤਿ ਜੀਵਨਂ.

ਵੇਹਾਯਸਨ੍ਤਿ ਆਕਾਸੇ. ਪਥਦ੍ਧੁਨੋਤਿ ਪਥਭੂਤਦ੍ਧੁਨੋ ਵਿਯ.

ਸਞ੍ਞਮ੍ਪਿ ਨ ਕਰੋਤੀਤਿ ‘‘ਇਮੇ ਕੁਲਪ੍ਪਸੁਤਾ’’ਤਿ ਸਞ੍ਞਾਮਤ੍ਤਮ੍ਪਿ ਨ ਕਰੋਤਿ. ਦਨ੍ਤਕਟ੍ਠਕੁਚ੍ਛਿਟ੍ਠਕਨ੍ਤਿ ਖਾਦਿਤਦਨ੍ਤਕਟ੍ਠਤ੍ਤਾ ਵੁਤ੍ਤਂ. ਏਤਸ੍ਸੇਵ ਉਪਰਿ ਪਤਿਸ੍ਸਤਿ ਅਪ੍ਪਦੁਟ੍ਠਪਦੋਸਭਾਵਤੋ, ਮਹਾਸਤ੍ਤਸ੍ਸ ਤਦਾ ਉਕ੍ਕਂਸਗਤਖੇਤ੍ਤਭਾਵਤੋ. ਇਦ੍ਧਿਵਿਸਯੋ ਨਾਮ ਅਚਿਨ੍ਤੇਯ੍ਯੋ, ਤਸ੍ਮਾ ਕਥਂ ਸੂਰਿਯਸ੍ਸ ਉਗ੍ਗਨ੍ਤੁਂ ਨਾਦਾਸੀਤਿ ਨ ਚਿਨ੍ਤੇਤਬ੍ਬਂ. ਅਰੁਣੁਗ੍ਗਂ ਨ ਪਞ੍ਞਾਯਤੀਤਿ ਤਸ੍ਮਿਂ ਪਦੇਸੇ ਅਰੁਣਪਭਾ ਨ ਪਞ੍ਞਾਯਤਿ, ਅਨ੍ਧਕਾਰੋ ਏਵ ਹੋਤਿ.

ਯਕ੍ਖਾਵਟ੍ਟੋ ਨੁ ਖੋ ਅਯਂ ਕਾਲਵਿਪਰਿਯਾਯੋ. ਮਹਾਪਞ੍ਞਨ੍ਤਿ ਮਹਨ੍ਤਾਨਂ ਪਞ੍ਞਾਨਂ ਅਧਿਟ੍ਠਾਨਭੂਤਂ. ਜਨਪਦਸ੍ਸ ਮੁਖਂ ਪਸ੍ਸਥਾਤਿ ਇਮਸ੍ਸ ਜਨਪਦਵਾਸਿਨੋ ਜਨਸ੍ਸ ਉਪਦ੍ਦਵੇਨ ਮਙ੍ਕੁਭੂਤਂ ਮੁਖਂ ਪਸ੍ਸਥ.

ਏਤਸ੍ਸ ਕਥਾ ਏਤਸ੍ਸੇਵ ਉਪਰਿ ਪਤਿਸ੍ਸਤੀਤਿ ਯਾਹਿ ਤੇਨ ਪਾਰਮਿਤਾਪਰਿਭਾਵਨਸਮਿਦ੍ਧਾਹਿ ਨਾਨਾਸਮਾਪਤ੍ਤਿਵਿਹਾਰਪਰਿਪੂਰਿਤਾਹਿ ਸੀਲਦਿਟ੍ਠਿਸਮ੍ਪਦਾਹਿ ਸੁਸਙ੍ਖਤਸਨ੍ਤਾਨੇ ਮਹਾਕਰੁਣਾਧਿਵਾਸੇ ਮਹਾਸਤ੍ਤੇ ਅਰਿਯੂਪਵਾਦਕਮ੍ਮਅਭਿਸਪਸਙ੍ਖਾਤਾ ਫਰੁਸਵਾਚਾ ਪਵਤ੍ਤਿਤਾ, ਸਾ ਅਭਿਸਪਿ ਤਸ੍ਸ ਖੇਤ੍ਤਵਿਸੇਸਭਾਵਤੋ ਤਸ੍ਸ ਚ ਅਜ੍ਝਾਸਯਫਰੁਸਤਾਯ ਦਿਟ੍ਠਧਮ੍ਮਵੇਦਨਿਯਕਮ੍ਮਂ ਹੁਤ੍ਵਾ ਸਚੇ ਸੋ ਮਹਾਸਤ੍ਤਂ ਨ ਖਮਾਪੇਤਿ, ਸਤ੍ਤਮੇ ਦਿਵਸੇ ਵਿਪਚ੍ਚਨਸਭਾਵਂ ਜਾਤਂ, ਖਮਾਪਿਤੇ ਪਨ ਮਹਾਸਤ੍ਤੇ ਪਯੋਗਸਮ੍ਪਤ੍ਤਿ ਪਟਿਬਾਹਿਤਤ੍ਤਾ ਅਵਿਪਾਕਧਮ੍ਮਤਂ ਆਪਜ੍ਜਤਿ ਅਹੋਸਿਕਮ੍ਮਭਾਵਤੋ. ਅਯਞ੍ਹਿ ਅਰਿਯੂਪਵਾਦਪਾਪਸ੍ਸ ਦਿਟ੍ਠਧਮ੍ਮਵੇਦਨਿਯਸ੍ਸ ਧਮ੍ਮਤਾ, ਤੇਨ ਵੁਤ੍ਤਂ ‘ਏਤਸ੍ਸ ਕਥਾ ਏਤਸ੍ਸੇਵ ਉਪਰਿ ਪਤਿਸ੍ਸਤੀ’ਤਿਆਦਿ. ਮਹਾਸਤ੍ਤੋ ਪਨ ਤਂ ਤਸ੍ਸ ਉਪਰਿ ਪਤਿਤੁਂ ਨ ਅਦਾਸਿ, ਉਪਾਯੇਨ ਮੋਚੇਸਿ. ਤੇਨ ਵੁਤ੍ਤਂ ਚਰਿਯਾਪਿਟਕੇ (ਚਰਿਯਾ. ੨.੬੪) –

‘‘ਯਂ ਸੋ ਤਦਾ ਮਂ ਅਭਿਸਪਿ, ਕੁਪਿਤੋ ਦੁਟ੍ਠਮਾਨਸੋ;

ਤਸ੍ਸੇਵ ਮਤ੍ਥਕੇ ਨਿਪਤਿ, ਯੋਗੇਨ ਤਂ ਪਮੋਚਯਿ’’ਨ੍ਤਿ.

ਯਞ੍ਹਿ ਤਤ੍ਥ ਸਤ੍ਤਮੇ ਦਿਵਸੇ ਬੋਧਿਸਤ੍ਤੇਨ ਸੂਰਿਯੁਗ੍ਗਮਨਨਿਵਾਰਣਂ ਕਤਂ, ਅਯਮੇਤ੍ਥ ਯੋਗੋਤਿ ਅਧਿਪ੍ਪੇਤੋ. ਯੋਗੇਨ ਹਿ ਉਬ੍ਬਲ਼੍ਹਾ ਸਰਾਜਿਕਾ ਪਰਿਸਾ ਨਗਰਵਾਸਿਨੋ ਨੇਗਮਾ ਚੇਵ ਜਾਨਪਦਾ ਚ ਬੋਧਿਸਤ੍ਤਸ੍ਸ ਸਨ੍ਤਿਕਂ ਤਾਪਸਂ ਆਨੇਤ੍ਵਾ ਖਮਾਪੇਸੁਂ. ਸੋ ਚ ਬੋਧਿਸਤ੍ਤਸ੍ਸ ਗੁਣੇ ਜਾਨਿਤ੍ਵਾ ਤਸ੍ਮਿਂ ਚਿਤ੍ਤਂ ਪਸਾਦੇਸਿ. ਯਂ ਪਨਸ੍ਸ ਮਤ੍ਥਕੇ ਮਤ੍ਤਿਕਾਪਿਣ੍ਡਸ੍ਸ ਠਪਨਂ, ਤਸ੍ਸ ਚ ਸਤ੍ਤਧਾ ਫਾਲਨਂ ਕਤਂ, ਤਂ ਮਨੁਸ੍ਸਾਨਂ ਚਿਤ੍ਤਾਨੁਰਕ੍ਖਣਤ੍ਥਂ. ਅਞ੍ਞਥਾ ਹਿ – ‘‘ਇਮੇ ਪਬ੍ਬਜਿਤਾ ਸਮਾਨਾ ਚਿਤ੍ਤਸ੍ਸ ਵਸੇ ਵਤ੍ਤਨ੍ਤਿ, ਨ ਪਨ ਚਿਤ੍ਤਂ ਅਤ੍ਤਨੋ ਵਸੇ ਵਤ੍ਤਾਪੇਨ੍ਤੀ’’ਤਿ ਮਹਾਸਤ੍ਤਮ੍ਪਿ ਤੇਨ ਸਦਿਸਂ ਕਤ੍ਵਾ ਗਣ੍ਹੇਯ੍ਯੁਂ, ਤਦਸ੍ਸ ਤੇਸਂ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾਤਿ. ਤੇਨਾਹ ‘‘ਅਥਸ੍ਸਾ’’ਤਿਆਦਿ.

ਲੋਹਕੂਟਵਸ੍ਸਨ੍ਤਿ ਅਯਗੁਲ਼ਵਸ੍ਸਂ. ਤਦਾ ਹਿ ਰਤਨਮਤ੍ਤਾਨਿ ਦਿਯਡ੍ਢਰਤਨਮਤ੍ਤਾਨਿਪਿ ਤਿਖਿਣਂਸਾਨਿ ਅਯਗੁਲ਼ਮਣ੍ਡਲਾਨਿ ਇਤੋ ਚਿਤੋ ਚ ਨਿਪਤਨ੍ਤਾ ਮਨੁਸ੍ਸਾਨਂ ਸਰੀਰਾਨਿ ਖਣ੍ਡਖਣ੍ਡਕਾਨਿ ਅਕਂਸੁ. ਕਲਲਵਸ੍ਸਨ੍ਤਿ ਤਨੁਕਕਦ੍ਦਮਪਟਲਕਦ੍ਦਮਂ. ਉਪਹਚ੍ਚਾਤਿ ਆਘਾਟੇਤ੍ਵਾ. ਤਦੇਵ ਮਜ੍ਝਾਰਞ੍ਞਂ.

੬੭. ਅਨੁਵਿਚ੍ਚਕਾਰਨ੍ਤਿ ਅਨੁਵਿਚ੍ਚਕਰਣਂ. ਕਾਰਣੇਹਿ ਦ੍ਵੀਹਿ ਅਨਿਯ੍ਯਾਨਿਕਸਾਸਨੇ ਠਿਤਾਨਂ ਅਤ੍ਤਨੋ ਸਾਵਕਤ੍ਤਂ ਉਪਗਤੇ ਪਗ੍ਗਹਨਿਗ੍ਗਹਾਨਿ ਦਸ੍ਸੇਤੁਂ ‘‘ਕਸ੍ਮਾ’’ਤਿਆਦਿ ਵੁਤ੍ਤਂ.

੬੯. ਅਨੁਪੁਬ੍ਬਿਂ ਕਥਨ੍ਤਿ (ਦੀ. ਨਿ. ਟੀ. ੨.੭੫-੭੬; ਅ. ਨਿ. ਟੀ. ੩.੮.੧੨) ਅਨੁਪੁਬ੍ਬਿਯਾ ਅਨੁਪੁਬ੍ਬਂ ਕਥੇਤਬ੍ਬਕਥਂ, ਕਾ ਪਨ ਸਾ? ਦਾਨਾਦਿਕਥਾ. ਦਾਨਕਥਾ ਤਾਵ ਪਚੁਰਜਨੇਸੁਪਿ ਪਵਤ੍ਤਿਯਾ ਸਬ੍ਬਸਾਧਾਰਣਤ੍ਤਾ ਸੁਕਰਤ੍ਤਾ ਸੀਲੇ ਪਤਿਟ੍ਠਾਨਸ੍ਸ ਉਪਾਯਭਾਵਤੋ ਚ ਆਦਿਤੋਵ ਕਥਿਤਾ. ਪਰਿਚ੍ਚਾਗਸੀਲੋ ਹਿ ਪੁਗ੍ਗਲੋ ਪਰਿਗ੍ਗਹਵਤ੍ਥੂਸੁ ਨਿਸ੍ਸਙ੍ਗਭਾਵਤੋ ਸੁਖੇਨੇਵ ਸੀਲਾਨਿ ਸਮਾਦਿਯਤਿ, ਤਤ੍ਥ ਚ ਸੁਪ੍ਪਤਿਟ੍ਠਿਤੋ ਹੋਤਿ. ਸੀਲੇਨ ਦਾਯਕਪਟਿਗ੍ਗਹਣਵਿਸੁਦ੍ਧਿਤੋ ਪਰਾਨੁਗ੍ਗਹਂ ਵਤ੍ਵਾ ਪਰਪੀਲ਼ਾਨਿਵਤ੍ਤਿਵਚਨਤੋ, ਕਿਰਿਯਧਮ੍ਮਂ ਵਤ੍ਵਾ ਅਕਿਰਿਯਧਮ੍ਮਵਚਨਤੋ, ਭੋਗਯਸਸਮ੍ਪਤ੍ਤਿਹੇਤੁਂ ਵਤ੍ਵਾ ਭਵਸਮ੍ਪਤ੍ਤਿਹੇਤੁਵਚਨਤੋ ਚ ਦਾਨਕਥਾਨਨ੍ਤਰਂ ਸੀਲਕਥਾ ਕਥਿਤਾ. ਤਞ੍ਚ ਸੀਲਂ ਵਟ੍ਟਨਿਸ੍ਸਿਤਂ, ਅਯਂ ਭਵਸਮ੍ਪਤ੍ਤਿ ਤਸ੍ਸ ਫਲਨ੍ਤਿ ਦਸ੍ਸਨਤ੍ਥਂ, ਇਮੇਹਿ ਚ ਦਾਨਸੀਲਮਯੇਹਿ ਪਣੀਤਚਰਿਯਭੇਦਭਿਨ੍ਨੇਹਿ ਪੁਞ੍ਞਕਿਰਿਯਵਤ੍ਥੂਹਿ ਏਤਾ ਚਾਤੁਮਹਾਰਾਜਿਕਾਦੀਸੁ ਪਣੀਤਤਰਾਦਿਭੇਦਭਿਨ੍ਨਾ ਅਪਰਿਮੇਯ੍ਯਾ ਭੋਗਭਵਸਮ੍ਪਤ੍ਤਿਯੋਤਿ ਦਸ੍ਸਨਤ੍ਥਂ ਤਦਨਨ੍ਤਰਂ ਸਗ੍ਗਕਥਾ. ਸ੍ਵਾਯਂ ਸਗ੍ਗੋ ਰਾਗਾਦੀਹਿ ਉਪਕ੍ਕਿਲਿਟ੍ਠੋ ਸਬ੍ਬਦਾ ਅਨੁਪਕ੍ਕਿਲਿਟ੍ਠੋ ਅਰਿਯਮਗ੍ਗੋਤਿ ਦਸ੍ਸਨਤ੍ਥਂ ਸਗ੍ਗਾਨਨ੍ਤਰਂ ਮਗ੍ਗੋ, ਮਗ੍ਗਞ੍ਚ ਕਥੇਨ੍ਤੇਨ ਤਦਧਿਗਮੂਪਾਯਸਨ੍ਦਸ੍ਸਨਤ੍ਥਂ ਸਗ੍ਗਪਰਿਯਾਪਨ੍ਨਾਪਿ ਪਗੇਵ ਇਤਰੇ ਸਬ੍ਬੇਪਿ ਕਾਮਾ ਨਾਮ ਬਹ੍ਵਾਦੀਨਵਾ ਅਨਿਚ੍ਚਾ ਅਦ੍ਧੁਵਾ ਵਿਪਰਿਣਾਮਧਮ੍ਮਾਤਿ ਕਾਮਾਨਂ ਆਦੀਨਵੋ. ਹੀਨਾ ਗਮ੍ਮਾ ਪੋਥੁਜ੍ਜਨਿਕਾ ਅਨਰਿਯਾ ਅਨਤ੍ਥਸਞ੍ਹਿਤਾਤਿ ਤੇਸਂ ਓਕਾਰੋ ਲਾਮਕਭਾਵੋ, ਸਬ੍ਬੇਪਿ ਭਵਾ ਕਿਲੇਸਾਨਂ ਵਤ੍ਥੁਭੂਤਾਤਿ ਤਤ੍ਥ ਸਂਕਿਲੇਸੋ. ਸਬ੍ਬਸੋ ਕਿਲੇਸਵਿਪ੍ਪਮੁਤ੍ਤਂ ਨਿਬ੍ਬਾਨਨ੍ਤਿ ਨੇਕ੍ਖਮ੍ਮੇ ਆਨਿਸਂਸੋ ਚ ਕਥੇਤਬ੍ਬੋਤਿ ਅਯਮਤ੍ਥੋ ਮਗ੍ਗਨ੍ਤੀਤਿ ਏਤ੍ਥ ਇਤਿ-ਸਦ੍ਦੇਨ ਦਸ੍ਸਿਤੋਤਿ ਵੇਦਿਤਬ੍ਬਂ.

ਸੁਖਾਨਂ ਨਿਦਾਨਨ੍ਤਿ ਦਿਟ੍ਠਧਮ੍ਮਿਕਾਨਂ ਸਮ੍ਪਰਾਯਿਕਾਨਂ ਨਿਬ੍ਬਾਨਸਞ੍ਹਿਤਾਨਞ੍ਚਾਤਿ ਸਬ੍ਬੇਸਮ੍ਪਿ ਸੁਖਾਨਂ ਕਾਰਣਂ. ਯਞ੍ਹਿ ਕਿਞ੍ਚਿ ਲੋਕੇ ਭੋਗਸੁਖਂ ਨਾਮ, ਤਂ ਸਬ੍ਬਂ ਦਾਨਨਿਦਾਨਨ੍ਤਿ ਪਾਕਟੋ ਅਯਮਤ੍ਥੋ. ਯਂ ਪਨ ਝਾਨਵਿਪਸ੍ਸਨਾਮਗ੍ਗਫਲਨਿਬ੍ਬਾਨਪਟਿਸਂਯੁਤ੍ਤਂ ਸੁਖਂ, ਤਸ੍ਸਪਿ ਦਾਨਂ ਉਪਨਿਸ੍ਸਯਪਚ੍ਚਯੋ ਹੋਤਿਯੇਵ. ਸਮ੍ਪਤ੍ਤੀਨਂ ਮੂਲਨ੍ਤਿ ਯਾ ਇਮਾ ਲੋਕੇ ਪਦੇਸਰਜ੍ਜਸਿਰਿਸ੍ਸਰਿਯਸਤ੍ਤਰਤਨਸਮੁਜ੍ਜਲਚਕ੍ਕਵਤ੍ਤਿਸਮ੍ਪਦਾਤਿ ਏਵਂਪਭੇਦਾ ਮਾਨੁਸਿਕਾ ਸਮ੍ਪਤ੍ਤਿਯੋ, ਯਾ ਚ ਚਾਤੁਮਹਾਰਾਜਾਦਿਗਤਾ ਦਿਬ੍ਬਾ ਸਮ੍ਪਤ੍ਤਿਯੋ, ਯਾ ਵਾ ਪਨਞ੍ਞਾਪਿ ਸਮ੍ਪਤ੍ਤਿਯੋ, ਤਾਸਂ ਸਬ੍ਬਾਸਂ ਇਦਂ ਮੂਲਕਾਰਣਂ. ਭੋਗਾਨਨ੍ਤਿ ਭੁਞ੍ਜਿਤਬ੍ਬਟ੍ਠੇਨ ‘‘ਭੋਗੋ’’ਨ੍ਤਿ ਲਦ੍ਧਨਾਮਾਨਂ ਮਨਾਪਿਯਰੂਪਾਦੀਨਂ, ਤਨ੍ਨਿਸ੍ਸਯਾਨਂ ਵਾ ਉਪਭੋਗਸੁਖਾਨਂ, ਪਤਿਟ੍ਠਾ ਨਿਚ੍ਚਲਾਧਿਟ੍ਠਾਨਤਾਯ. ਵਿਸਮਗਤਸ੍ਸਾਤਿ ਬ੍ਯਸਨਪ੍ਪਤ੍ਤਸ੍ਸ. ਤਾਣਨ੍ਤਿ ਰਕ੍ਖਾ ਤਤੋ ਪਰਿਪਾਲਨਤੋ. ਲੇਣਨ੍ਤਿ ਬ੍ਯਸਨੇਹਿ ਪਰਿਪਾਤਿਯਮਾਨਸ੍ਸ ਓਲੀਯਨਪਦੇਸੋ. ਗਤੀਤਿ ਗਨ੍ਤਬ੍ਬਟ੍ਠਾਨਂ. ਪਰਾਯਣਨ੍ਤਿ ਪਟਿਸਰਣਂ. ਅਵਸ੍ਸਯੋਤਿ ਵਿਨਿਪਤਿਤੁਂ ਅਦੇਨ੍ਤੋ ਨਿਸ੍ਸਯੋ. ਆਰਮ੍ਮਣਨ੍ਤਿ ਓਲੁਬ੍ਭਾਰਮ੍ਮਣਂ.

ਰਤਨਮਯਸੀਹਾਸਨਸਦਿਸਨ੍ਤਿ ਸਬ੍ਬਰਤਨਮਯਸਤ੍ਤਙ੍ਗਮਹਾਸੀਹਾਸਨਸਦਿਸਂ, ਮਹਗ੍ਘਂ ਹੁਤ੍ਵਾ ਸਬ੍ਬਸੋ ਵਿਨਿਪਤਿਤੁਂ ਅਪ੍ਪਦਾਨਤੋ. ਮਹਾਪਥਵਿਸਦਿਸਂ ਗਤਗਤਟ੍ਠਾਨੇ ਪਤਿਟ੍ਠਾਸਮ੍ਭਵਤੋ. ਯਥਾ ਦੁਬ੍ਬਲਸ੍ਸ ਪੁਰਿਸਸ੍ਸ ਆਲਮ੍ਬਨਰਜ੍ਜੁ ਉਤ੍ਤਿਟ੍ਠਤੋ ਤਿਟ੍ਠਤੋ ਚ ਉਪਤ੍ਥਮ੍ਭੋ, ਏਵਂ ਦਾਨਂ ਸਤ੍ਤਾਨਂ ਸਮ੍ਪਤ੍ਤਿਭਵੇ ਉਪਪਤ੍ਤਿਯਾ ਠਿਤਿਯਾ ਚ ਪਚ੍ਚਯੋ ਹੋਤੀਤਿ ਆਹ ‘‘ਆਲਮ੍ਬਨਟ੍ਠੇਨ ਆਲਮ੍ਬਨਰਜ੍ਜੁਸਦਿਸ’’ਨ੍ਤਿ. ਦੁਕ੍ਖਨਿਤ੍ਥਰਣਟ੍ਠੇਨਾਤਿ ਦੁਗ੍ਗਤਿਦੁਕ੍ਖਨਿਤ੍ਥਰਣਟ੍ਠੇਨ. ਸਮਸ੍ਸਾਸਨਟ੍ਠੇਨਾਤਿ ਲੋਭਮਚ੍ਛਰਿਯਾਦਿਪਟਿਸਤ੍ਤੁਪਦ੍ਦਵਤੋ ਸਮ੍ਮਦੇਵ ਅਸ੍ਸਾਸਨਟ੍ਠੇਨ. ਭਯਪਰਿਤ੍ਤਾਣਟ੍ਠੇਨਾਤਿ ਦਾਲਿਦ੍ਦਿਯਭਯਤੋ ਪਰਿਪਾਲਨਟ੍ਠੇਨ. ਮਚ੍ਛੇਰਮਲਾਦੀਹੀਤਿ ਮਚ੍ਛੇਰਲੋਭਦੋਸਇਸ੍ਸਾਮਿਚ੍ਛਾਦਿਟ੍ਠਿਵਿਚਿਕਿਚ੍ਛਾਦਿ ਚਿਤ੍ਤਮਲੇਹਿ. ਅਨੁਪਲਿਤ੍ਤਟ੍ਠੇਨਾਤਿ ਅਨੁਪਕ੍ਕਿਲਿਟ੍ਠਤਾਯ. ਤੇਸਨ੍ਤਿ ਮਚ੍ਛੇਰਮਲਾਦੀਨਂ. ਏਤੇਸਂ ਏਵ ਦੁਰਾਸਦਟ੍ਠੇਨ. ਅਸਨ੍ਤਾਸਨਟ੍ਠੇਨਾਤਿ ਅਸਨ੍ਤਾਸਹੇਤੁਭਾਵੇਨ. ਯੋ ਹਿ ਦਾਯਕੋ ਦਾਨਪਤਿ, ਸੋ ਸਮ੍ਪਤਿਪਿ ਨ ਕੁਤੋਚਿ ਸਨ੍ਤਸਤਿ, ਪਗੇਵ ਆਯਤਿਂ. ਬਲਵਨ੍ਤਟ੍ਠੇਨਾਤਿ ਮਹਾਬਲਵਤਾਯ. ਦਾਯਕੋ ਹਿ ਦਾਨਪਤਿ ਸਮ੍ਪਤਿ ਪਕ੍ਖਬਲੇਨ ਬਲਵਾ ਹੋਤਿ, ਆਯਤਿਂ ਪਨ ਕਾਯਬਲਾਦੀਹਿ. ਅਭਿਮਙ੍ਗਲਸਮ੍ਮਤਟ੍ਠੇਨਾਤਿ ‘‘ਵੁਡ੍ਢਿਕਾਰਣ’’ਨ੍ਤਿ ਅਭਿਸਮ੍ਮਤਭਾਵੇਨ. ਵਿਪਤ੍ਤਿਤੋ ਸਮ੍ਪਤ੍ਤਿਯਾ ਨਯਨਂ ਖੇਮਨ੍ਤਭੂਮਿਸਮ੍ਪਾਪਨਂ.

ਇਦਾਨਿ ਮਹਾਬੋਧਿਚਰਿਯਭਾਵੇਨਪਿ ਦਾਨਗੁਣਂ ਦਸ੍ਸੇਤੁਂ ਦਾਨਂ ਨਾਮੇਤਨ੍ਤਿਆਦਿ ਵੁਤ੍ਤਂ. ਤਤ੍ਥ ਅਤ੍ਤਾਨਂ ਨਿਯ੍ਯਾਦੇਨ੍ਤੇਨਾਤਿ ਏਤੇਨ ਦਾਨਫਲਂ ਸਮ੍ਮਦੇਵ ਪਸ੍ਸਨ੍ਤਾ ਮਹਾਪੁਰਿਸਾ ਅਤ੍ਤਨੋ ਜੀਵਿਤਮ੍ਪਿ ਪਰਿਚ੍ਚਜਨ੍ਤਿ, ਤਸ੍ਮਾ ਕੋ ਨਾਮ ਵਿਞ੍ਞੁਜਾਤਿਕੋ ਬਾਹਿਰੇ ਵਤ੍ਥੁਮ੍ਹਿ ਸਙ੍ਗਂ ਕਰੇਯ੍ਯਾਤਿ ਓਵਾਦਂ ਦੇਤਿ. ਇਦਾਨਿ ਯਾ ਲੋਕਿਯਾ ਲੋਕੁਤ੍ਤਰਾ ਚ ਉਕ੍ਕਂਸਗਤਾ ਸਮ੍ਪਤ੍ਤਿਯੋ, ਤਾ ਸਬ੍ਬਾ ਦਾਨਤੋਯੇਵ ਪਵਤ੍ਤਨ੍ਤੀਤਿ ਦਸ੍ਸੇਨ੍ਤੋ ‘‘ਦਾਨਞ੍ਹੀ’’ਤਿਆਦਿਮਾਹ. ਤਤ੍ਥ ਸਕ੍ਕਮਾਰਬ੍ਰਹ੍ਮਸਮ੍ਪਤ੍ਤਿਯੋ ਅਤ੍ਤਹਿਤਾਯ ਏਵ, ਚਕ੍ਕਵਤ੍ਤਿਸਮ੍ਪਤ੍ਤਿ ਪਨ ਅਤ੍ਤਹਿਤਾਯ ਚ ਪਰਹਿਤਾਯ ਚਾਤਿ ਦਸ੍ਸੇਤੁਂ ਸਾ ਤਾਸਂ ਪਰਤੋ ਵੁਤ੍ਤਾ. ਏਤਾ ਲੋਕਿਯਾ, ਇਮਾ ਪਨ ਲੋਕੁਤ੍ਤਰਾਤਿ ਦਸ੍ਸੇਤੁਂ ‘‘ਸਾਵਕਪਾਰਮੀਞਾਣ’’ਨ੍ਤਿਆਦਿ ਵੁਤ੍ਤਂ. ਤਾਸੁਪਿ ਉਕ੍ਕਟ੍ਠੁਕ੍ਕਟ੍ਠਤਰੁਕ੍ਕਟ੍ਠਤਮਮੇਵ ਦਸ੍ਸੇਤੁਂ ਕਮੇਨ ਞਾਣਤ੍ਤਯਂ ਵੁਤ੍ਤਂ. ਤੇਸਂ ਪਨ ਦਾਨਸ੍ਸ ਪਚ੍ਚਯਭਾਵੋ ਹੇਟ੍ਠਾ ਵੁਤ੍ਤੋਯੇਵ. ਏਤੇਨੇਵ ਤਸ੍ਸ ਬ੍ਰਹ੍ਮਸਮ੍ਪਤ੍ਤਿਯਾਪਿ ਪਚ੍ਚਯਭਾਵੋ ਦੀਪਿਤੋਤਿ ਵੇਦਿਤਬ੍ਬੋ.

ਦਾਨਞ੍ਚ ਨਾਮ ਹਿਤਜ੍ਝਾਸਯੇਨ, ਪੂਜਾਵਸੇਨ ਵਾ ਅਤ੍ਤਨੋ ਸਨ੍ਤਕਸ੍ਸ ਪਰੇਸਂ ਪਰਿਚ੍ਚਜਨਂ, ਤਸ੍ਮਾ ਦਾਯਕੋ ਪੁਰਿਸਪੁਗ੍ਗਲੋ ਪਰੇਸਂ ਸਨ੍ਤਕਂ ਹਰਿਸ੍ਸਤੀਤਿ ਅਟ੍ਠਾਨਮੇਤਨ੍ਤਿ ਆਹ – ‘‘ਦਾਨਂ ਦਦਨ੍ਤੋ ਸੀਲਂ ਸਮਾਦਾਤੁਂ ਸਕ੍ਕੋਤੀ’’ਤਿ. ਸੀਲਾਲਙ੍ਕਾਰਸਦਿਸੋ ਅਲਙ੍ਕਾਰੋ ਨਤ੍ਥਿ ਸੋਭਾਵਿਸੇਸਾਵਹਤ੍ਤਾ ਸੀਲਸ੍ਸ. ਸੀਲਪੁਪ੍ਫਸਦਿਸਂ ਪੁਪ੍ਫਂ ਨਤ੍ਥੀਤਿ ਏਤ੍ਥਾਪਿ ਏਸੇਵ ਨਯੋ. ਸੀਲਗਨ੍ਧਸਦਿਸੋ ਗਨ੍ਧੋ ਨਤ੍ਥੀਤਿ ਏਤ੍ਥ ‘‘ਚਨ੍ਦਨਂ ਤਗਰਂ ਵਾਪੀ’’ਤਿਆਦਿਕਾ (ਧ. ਪ. ੫੫; ਮਿ. ਪ. ੪.੧.੧) ਗਾਥਾ – ‘‘ਗਨ੍ਧੋ ਇਸੀਨਂ ਚਿਰਦਿਕ੍ਖਿਤਾਨਂ, ਕਾਯਾ ਚੁਤੋ ਗਚ੍ਛਤਿ ਮਾਲੁਤੇਨਾ’’ਤਿਆਦਿਕਾ (ਜਾ. ੨.੧੭.੫੫) ਜਾਤਕਗਾਥਾਯੋ ਚ ਆਹਰਿਤ੍ਵਾ ਵਤ੍ਤਬ੍ਬਾ, ਸੀਲਞ੍ਹਿ ਸਤ੍ਤਾਨਂ ਆਭਰਣਞ੍ਚੇਵ ਅਲਙ੍ਕਾਰੋ ਚ ਗਨ੍ਧਵਿਲੇਪਨਞ੍ਚ ਦਸ੍ਸਨੀਯਭਾਵਾਵਹਞ੍ਚ. ਤੇਨਾਹ ‘‘ਸੀਲਾਲਙ੍ਕਾਰੇਨ ਹੀ’’ਤਿਆਦਿ.

ਅਯਂ ਸਗ੍ਗੋ ਲਬ੍ਭਤੀਤਿ ਇਦਂ ਮਜ੍ਝਿਮੇਹਿ ਛਨ੍ਦਾਦੀਹਿ ਸਮਾਦਾਨਸੀਲਂ ਸਨ੍ਧਾਯਾਹ. ਤੇਨਾਹ ਸਕ੍ਕੋ ਦੇਵਰਾਜਾ –

‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;

ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤੀ’’ਤਿ. (ਜਾ. ੧.੮.੭੫; ੨.੨੨.੪੨੯; ਦੀ. ਨਿ. ਟੀ. ੨.੭੫-੭੬);

ਇਟ੍ਠੋਤਿ ਸੁਖੋ. ਕਨ੍ਤੋਤਿ ਕਮਨੀਯੋ. ਮਨਾਪੋਤਿ ਮਨਵਡ੍ਢਨਕੋ. ਤਂ ਪਨ ਤਸ੍ਸ ਇਟ੍ਠਾਦਿਭਾਵਂ ਦਸ੍ਸੇਤੁਂ ‘‘ਨਿਚ੍ਚਮੇਤ੍ਥ ਕੀਲ਼ਾ’’ਤਿਆਦਿ ਵੁਤ੍ਤਂ.

ਦੋਸੋਤਿ ਅਨਿਚ੍ਚਤਾਦਿਨਾ ਅਪ੍ਪਸ੍ਸਾਦਾਦਿਨਾ ਚ ਦੂਸਿਤਭਾਵੋ, ਯਤੋ ਤੇ ਵਿਞ੍ਞੂਨਂ ਚਿਤ੍ਤਂ ਨਾਰਾਧੇਨ੍ਤਿ. ਅਥ ਵਾ ਆਦੀਨਂ ਵਾਤਿ ਪਵਤ੍ਤੇਤੀਤਿ ਆਦੀਨਵੋ, ਪਰਮਕਪਣਤਾ. ਤਥਾ ਚ ਕਾਮਾ ਯਥਾਭੂਤਂ ਪਚ੍ਚਵੇਕ੍ਖਨ੍ਤਾਨਂ ਪਚ੍ਚੁਪਤਿਟ੍ਠਨ੍ਤਿ. ਲਾਮਕਭਾਵੋਤਿ ਅਸੇਟ੍ਠੇਹਿ ਸੇਵਿਤਬ੍ਬੋ, ਸੇਟ੍ਠੇਹਿ ਨ ਸੇਵਿਤਬ੍ਬੋ ਨਿਹੀਨਭਾਵੋ. ਸਂਕਿਲਿਸ੍ਸਨਨ੍ਤਿ ਵਿਬਾਧਕਤਾ ਉਪਤਾਪਤਾ ਚ.

ਨੇਕ੍ਖਮ੍ਮੇ ਆਨਿਸਂਸਨ੍ਤਿ ਏਤ੍ਥ ਯਤ੍ਤਕਾ ਕਾਮੇਸੁ ਆਦੀਨਵਾ, ਤਪ੍ਪਟਿਪਕ੍ਖਤੋ ਤਤ੍ਤਕਾ ਨੇਕ੍ਖਮ੍ਮੇ ਆਨਿਸਂਸਾ. ਅਪਿਚ – ‘‘ਨੇਕ੍ਖਮ੍ਮਂ ਨਾਮੇਤਂ ਅਸਮ੍ਬਾਧਂ ਅਸਂਕਿਲਿਟ੍ਠਂ ਨਿਕ੍ਖਨ੍ਤਂ ਕਾਮੇਹਿ, ਨਿਕ੍ਖਨ੍ਤਂ ਕਾਮਸਞ੍ਞਾਯ, ਨਿਕ੍ਖਨ੍ਤਂ ਕਾਮਵਿਤਕ੍ਕੇਹਿ, ਨਿਕ੍ਖਨ੍ਤਂ ਕਾਮਪਰਿਲ਼ਾਹੇਹਿ, ਨਿਕ੍ਖਨ੍ਤਂ ਬ੍ਯਾਪਾਦਸਞ੍ਞਾਯਾ’’ਤਿਆਦਿਨਾ (ਸਾਰਤ੍ਥ. ਟੀ. ਮਹਾਵਗ੍ਗ ੩.੨੬; ਦੀ. ਨਿ. ਟੀ. ੨.੭੫-੭੬) ਨਯੇਨ ਨੇਕ੍ਖਮ੍ਮੇ ਆਨਿਸਂਸੇ ਪਕਾਸੇਸਿ, ਪਬ੍ਬਜ੍ਜਾਯ ਝਾਨਾਦੀਸੁ ਚ ਗੁਣੇ ਵਿਭਾਵੇਸਿ ਵਣ੍ਣੇਸਿ. ਕਲ੍ਲਚਿਤ੍ਤਨ੍ਤਿ ਹੇਟ੍ਠਾ ਪਵਤ੍ਤਿਤਦੇਸਨਾਯ ਅਸ੍ਸਦ੍ਧਿਯਾਦੀਨਂ ਚਿਤ੍ਤਦੋਸਾਨਂ ਵਿਗਤਤ੍ਤਾ ਉਪਰਿਦੇਸਨਾਯ ਭਾਜਨਭਾਵੂਪਗਮਨੇਨ ਕਮ੍ਮਕ੍ਖਮਚਿਤ੍ਤਂ. ਅਟ੍ਠਕਥਾਯਂ ਪਨ ਯਸ੍ਮਾ ਅਸ੍ਸਦ੍ਧਿਯਾਦਯੋ ਚਿਤ੍ਤਸ੍ਸ ਰੋਗਭੂਤਾ, ਤਦਾ ਤੇ ਵਿਗਤਾ, ਤਸ੍ਮਾ ਆਹ ‘‘ਅਰੋਗਚਿਤ੍ਤ’’ਨ੍ਤਿ. ਦਿਟ੍ਠਿਮਾਨਾਦਿਕਿਲੇਸਵਿਗਮੇਨ ਮੁਦੁਚਿਤ੍ਤਂ. ਕਾਮਚ੍ਛਨ੍ਦਾਦਿਵਿਗਮੇਨ ਵਿਨੀਵਰਣਚਿਤ੍ਤਂ. ਸਮ੍ਮਾਪਟਿਪਤ੍ਤਿਯਂ ਉਲ਼ਾਰਪੀਤਿਪਾਮੋਜ੍ਜਯੋਗੇਨ ਉਦਗ੍ਗਚਿਤ੍ਤਂ. ਤਤ੍ਥ ਸਦ੍ਧਾਸਮ੍ਪਤ੍ਤਿਯਾ ਪਸਨ੍ਨਚਿਤ੍ਤਂ. ਯਦਾ ਭਗਵਾ ਅਞ੍ਞਾਸੀਤਿ ਸਮ੍ਬਨ੍ਧੋ. ਅਥ ਵਾ ਕਲ੍ਲਚਿਤ੍ਤਨ੍ਤਿ ਕਾਮਚ੍ਛਨ੍ਦਵਿਗਮੇਨ ਅਰੋਗਚਿਤ੍ਤਂ. ਮੁਦੁਚਿਤ੍ਤਨ੍ਤਿ ਬ੍ਯਾਪਾਦਵਿਗਮੇਨ ਮੇਤ੍ਤਾਵਸੇਨ ਅਕਥਿਨਚਿਤ੍ਤਂ. ਵਿਨੀਵਰਣਚਿਤ੍ਤਨ੍ਤਿ ਉਦ੍ਧਚ੍ਚਕੁਕ੍ਕੁਚ੍ਚਵਿਗਮੇਨ ਵਿਕ੍ਖੇਪਸ੍ਸ ਵਿਗਤਤ੍ਤਾ ਤੇਨ ਅਪਿਹਿਤਚਿਤ੍ਤਂ. ਉਦਗ੍ਗਚਿਤ੍ਤਨ੍ਤਿ ਥਿਨਮਿਦ੍ਧਵਿਗਮੇਨ ਸਮ੍ਪਗ੍ਗਹਿਤਵਸੇਨ ਅਲੀਨਚਿਤ੍ਤਂ. ਪਸਨ੍ਨਚਿਤ੍ਤਨ੍ਤਿ ਵਿਚਿਕਿਚ੍ਛਾਵਿਗਮੇਨ ਸਮ੍ਮਾਪਟਿਪਤ੍ਤਿਯਂ ਅਧਿਮੁਤ੍ਤਚਿਤ੍ਤਨ੍ਤਿ ਏਵਮੇਤ੍ਥ ਸੇਸਪਦਾਨਂ ਅਤ੍ਥੋ ਵੇਦਿਤਬ੍ਬੋ.

ਸੇਯ੍ਯਥਾਪੀਤਿਆਦਿਨਾ ਉਪਮਾਵਸੇਨ ਉਪਾਲਿਸ੍ਸ ਸਂਕਿਲੇਸਪ੍ਪਹਾਨਂ ਅਰਿਯਮਗ੍ਗਨਿਪ੍ਫਾਦਨਞ੍ਚ ਦਸ੍ਸੇਤਿ. ਅਪਗਤਕਾਲ਼ਕਨ੍ਤਿ ਵਿਗਤਕਾਲ਼ਕਂ. ਸਮ੍ਮਦੇਵਾਤਿ ਸੁਟ੍ਠੁ ਏਵ. ਰਜਨਨ੍ਤਿ ਨੀਲਪੀਤਾਦਿਰਙ੍ਗਜਾਤਂ. ਪਟਿਗ੍ਗਣ੍ਹੇਯ੍ਯਾਤਿ ਗਣ੍ਹੇਯ੍ਯ ਪਭਸ੍ਸਰਂ ਭਵੇਯ੍ਯ. ਤਸ੍ਮਿਂਯੇਵ ਆਸਨੇਤਿ ਤਿਸ੍ਸਂ ਏਵ ਨਿਸਜ੍ਜਾਯਂ. ਏਤੇਨਸ੍ਸ ਲਹੁਵਿਪਸ੍ਸਕਤਾ ਤਿਕ੍ਖਪਞ੍ਞਤਾ ਸੁਖਪਟਿਪਦਾਖਿਪ੍ਪਾਭਿਞ੍ਞਤਾ ਚ ਦਸ੍ਸਿਤਾ ਹੋਤਿ. ਵਿਰਜਨ੍ਤਿ ਅਪਾਯਗਮਨੀਯਰਾਗਰਜਾਦੀਨਂ ਵਿਗਮੇਨ ਵਿਰਜਂ. ਅਨਵਸੇਸਦਿਟ੍ਠਿਵਿਚਿਕਿਚ੍ਛਾਮਲਾਪਗਮੇਨ ਵੀਤਮਲਂ. ਤਿਣ੍ਣਂ ਮਗ੍ਗਾਨਨ੍ਤਿ ਹੇਟ੍ਠਿਮਾਨਂ ਤਿਣ੍ਣਂ ਮਗ੍ਗਾਨਂ. ਤਸ੍ਸ ਉਪ੍ਪਤ੍ਤਿਆਕਾਰਦਸ੍ਸਨਨ੍ਤਿ ਕਸ੍ਮਾ ਵੁਤ੍ਤਂ? ਨਨੁ ਮਗ੍ਗਞਾਣਂ ਅਸਙ੍ਖਤਧਮ੍ਮਾਰਮ੍ਮਣਨ੍ਤਿ ਚੋਦਨਂ ਸਨ੍ਧਾਯਾਹ ‘‘ਤਂ ਹੀ’’ਤਿਆਦਿ. ਤਤ੍ਥ ਪਟਿਵਿਜ੍ਝਨ੍ਤਨ੍ਤਿ ਅਸਮ੍ਮੋਹਪਟਿਵੇਧਵਸੇਨ ਪਟਿਵਿਜ੍ਝਨ੍ਤਂ. ਤੇਨਾਹ ‘‘ਕਿਚ੍ਚਵਸੇਨਾ’’ਤਿ.

ਤਤ੍ਰਿਦਂ ਉਪਮਾਸਂਸਨ੍ਦਨਂ – ਵਤ੍ਥਂ ਵਿਯ ਚਿਤ੍ਤਂ, ਵਤ੍ਥਸ੍ਸ ਆਗਨ੍ਤੁਕਮਲੇਹਿ ਕਿਲਿਟ੍ਠਭਾਵੋ ਵਿਯ ਚਿਤ੍ਤਸ੍ਸ ਰਾਗਾਦਿਮਲੇਹਿ ਸਂਕਿਲਿਟ੍ਠਭਾਵੋ, ਧੋਵਨਸਿਲਾ ਵਿਯ ਅਨੁਪੁਬ੍ਬੀਕਥਾ, ਉਦਕਂ ਵਿਯ ਸਦ੍ਧਾ, ਉਦਕੇ ਤੇਮੇਤ੍ਵਾ ਊਸਗੋਮਯਛਾਰਿਕਾਭਰੇਹਿ ਕਾਲ਼ਕਪਦੇਸੇ ਸਮ੍ਮਦ੍ਦਿਤ੍ਵਾ ਵਤ੍ਥਸ੍ਸ ਧੋਵਨਪਯੋਗੋ ਵਿਯ ਸਦ੍ਧਾਸਿਨੇਹੇਨ ਤੇਮੇਤ੍ਵਾ ਸਤਿਸਮਾਧਿਪਞ੍ਞਾਹਿ ਦੋਸੇ ਸਿਥਿਲੇ ਕਤ੍ਵਾ ਸੁਤਾਦਿਵਿਧਿਨਾ ਚਿਤ੍ਤਸ੍ਸ ਸੋਧਨੇ ਵੀਰਿਯਾਰਮ੍ਭੋ. ਤੇਨ ਪਯੋਗੇਨ ਵਤ੍ਥੇ ਕਾਲ਼ਕਾਪਗਮੋ ਵਿਯ ਵੀਰਿਯਾਰਮ੍ਭੇਨ ਕਿਲੇਸਵਿਕ੍ਖਮ੍ਭਨਂ, ਰਙ੍ਗਜਾਤਂ ਵਿਯ ਅਰਿਯਮਗ੍ਗੋ, ਤੇਨ ਸੁਦ੍ਧਸ੍ਸ ਵਤ੍ਥਸ੍ਸ ਪਭਸ੍ਸਰਭਾਵੋ ਵਿਯ ਵਿਕ੍ਖਮ੍ਭਿਤਕਿਲੇਸਸ੍ਸ ਚਿਤ੍ਤਸ੍ਸ ਮਗ੍ਗੇਨ ਪਰਿਯੋਦਪਨਨ੍ਤਿ.

ਦਿਟ੍ਠਧਮ੍ਮੋਤਿ ਵਤ੍ਵਾ ਦਸ੍ਸਨਂ ਨਾਮ ਞਾਣਦਸ੍ਸਨਤੋ ਅਞ੍ਞਮ੍ਪਿ ਅਤ੍ਥੀਤਿ ਤਨ੍ਨਿਵਤ੍ਤਨਤ੍ਥਂ ‘‘ਪਤ੍ਤਧਮ੍ਮੋ’’ਤਿ ਵੁਤ੍ਤਂ. ਪਤ੍ਤਿ ਚ ਞਾਣਸਮ੍ਪਤ੍ਤਿਤੋ ਅਞ੍ਞਾਪਿ ਵਿਜ੍ਜਤੀਤਿ ਤਤੋ ਵਿਸੇਸਨਤ੍ਥਂ ‘‘ਵਿਦਿਤਧਮ੍ਮੋ’’ਤਿ ਵੁਤ੍ਤਂ. ਸਾ ਪਨੇਸਾ ਵਿਦਿਤਧਮ੍ਮਤਾ ਧਮ੍ਮੇਸੁ ਏਕਦੇਸਨਾਪਿ ਹੋਤੀਤਿ ਨਿਪ੍ਪਦੇਸਤੋ ਵਿਦਿਤਭਾਵਂ ਦਸ੍ਸੇਤੁਂ ‘‘ਪਰਿਯੋਗਾਲ਼੍ਹਧਮ੍ਮੋ’’ਤਿ ਵੁਤ੍ਤਂ. ਤੇਨਸ੍ਸ ਸਚ੍ਚਾਭਿਸਮ੍ਬੋਧਂਯੇਵ ਦੀਪੇਤਿ. ਮਗ੍ਗਞਾਣਞ੍ਹਿ ਏਕਾਭਿਸਮਯਵਸੇਨ ਪਰਿਞ੍ਞਾਦਿਕਿਚ੍ਚਂ ਸਾਧੇਨ੍ਤਂ ਨਿਪ੍ਪਦੇਸੇਨ ਚਤੁਸਚ੍ਚਧਮ੍ਮਂ ਸਮਨ੍ਤਤੋ ਓਗਾਹਨ੍ਤਂ ਨਾਮ ਹੋਤਿ. ਤੇਨਾਹ – ‘‘ਦਿਟ੍ਠੋ ਅਰਿਯਸਚ੍ਚਧਮ੍ਮੋ ਏਤੇਨਾਤਿ ਦਿਟ੍ਠਧਮ੍ਮੋ’’ਤਿ. ਤਿਣ੍ਣਾ ਵਿਚਿਕਿਚ੍ਛਾਤਿ ਸਪ੍ਪਟਿਭਯਕਨ੍ਤਾਰਸਦਿਸਾ ਸੋਲ਼ਸਵਤ੍ਥੁਕਾ ਅਟ੍ਠਵਤ੍ਥੁਕਾ ਚ ਤਿਣ੍ਣਾ ਵਿਚਿਕਿਚ੍ਛਾ ਤਿਣ੍ਣਵਿਚਿਕਿਚ੍ਛਾ. ਵਿਗਤਕਥਂਕਥੋਤਿ ਪਵਤ੍ਤਿਆਦੀਸੁ ‘‘ਏਵਂ ਨੁ ਖੋ, ਕਿਂ ਨੁ ਖੋ’’ਤਿ ਏਵਂ ਪਵਤ੍ਤਿਕਾ ਵਿਗਤਾ ਸਮੁਚ੍ਛਿਨ੍ਨਾ ਕਥਂਕਥਾ. ਸਾਰਜ੍ਜਕਰਾਨਂ ਪਾਪਧਮ੍ਮਾਨਂ ਪਹੀਨਤ੍ਤਾ ਤਪ੍ਪਟਿਪਕ੍ਖੇਸੁ ਸੀਲਾਦਿਗੁਣੇਸੁ ਸੁਪ੍ਪਤਿਟ੍ਠਿਤਤ੍ਤਾ ਵੇਸਾਰਜ੍ਜਂ ਵਿਸਾਰਦਭਾਵਂ ਵੇਯ੍ਯਤ੍ਤਿਯਂ ਪਤ੍ਤੋ. ਅਤ੍ਤਨਾ ਏਵ ਪਚ੍ਚਕ੍ਖਤੋ ਦਿਟ੍ਠਤ੍ਤਾ ਨ ਤਸ੍ਸ ਪਰੋ ਪਚ੍ਚੇਤਬ੍ਬੋ ਅਤ੍ਥੀਤਿ ਅਪਰਪ੍ਪਚ੍ਚਯੋ.

੭੧. ਪਣ੍ਡਿਤੋਤਿ ਪਞ੍ਞਵਾ.

੭੨. ਤੇਨ ਹਿ ਸਮ੍ਮਾਤਿ ਦੋਵਾਰਿਕੇਨ ਸਦ੍ਧਿਂ ਸਲ੍ਲਪਤਿਯੇਵ, ‘‘ਏਤ੍ਥੇਵਾ’’ਤਿ ਤੇਨ ਵੁਤ੍ਤਵਚਨਂ ਸੁਤ੍ਵਾਪਿ ਤਸ੍ਸ ਅਤ੍ਥਂ ਅਸਲ੍ਲਕ੍ਖੇਨ੍ਤੋ. ਕਸ੍ਮਾ? ਪਰਿਦੇਵਤਾਯ. ਤੇਨਾਹ ‘‘ਬਲਵਸੋਕੇਨ ਅਭਿਭੂਤੋ’’ਤਿ.

੭੩. ਤੇਨੇਵਾਤਿ ਯੇਨ ਉਤ੍ਤਰਾਸਙ੍ਗੇਨ ਆਸਨਂ ਸਮ੍ਮਜ੍ਜਤਿ, ਤੇਨੇਵ ਉਦਰੇ ਪਰਿਕ੍ਖਿਪਨ੍ਤੋ ‘‘ਮਾਹਂ ਸਤ੍ਥਾਰਂ ਮਮ ਸਰੀਰੇਨ ਫੁਸਿ’’ਨ੍ਤਿ ਅਨ੍ਤਰਂ ਕਰੋਨ੍ਤੋ ਉਤ੍ਤਰਾਸਙ੍ਗੇਨ ਤਂ ਉਦਰੇ ਪਰਿਕ੍ਖਿਪਨ੍ਤੋ ਪਰਿਗ੍ਗਹੇਤ੍ਵਾ. ‘‘ਦਤ੍ਤਪਞ੍ਞਤ੍ਤ’’ਨ੍ਤਿਆਦੀਸੁ (ਦੀ. ਨਿ. ੧.੧੭੧) ਵਿਯ ਦਤ੍ਤ-ਸਦ੍ਦੋ ਏਤ੍ਥ ਬਾਲਪਰਿਯਾਯੋਤਿ ਆਹ ‘‘ਜਲ਼ੋਸਿ ਜਾਤੋ’’ਤਿ. ਉਪਟ੍ਠਾਕਸ੍ਸ ਅਞ੍ਞਥਾਭਾਵੇਨਾਤਿ ਪੁਬ੍ਬੇ ਅਤ੍ਤਨੋ ਉਪਟ੍ਠਾਕਸ੍ਸ ਇਦਾਨਿ ਅਨੁਪਟ੍ਠਾਕਭਾਵੇਨ.

੭੫. ਅਵਿਞ੍ਞਾਣਕਂ ਦਾਰੁਸਾਖਾਦਿਮਯਂ. ਬਹਲਬਹਲਂ ਪੀਤਾਵਲੇਪਨਂ ਰਙ੍ਗਜਾਤਨ੍ਤਿ ਅਤਿਵਿਯ ਬਹਲਂ ਪੀਤਵਣ੍ਣਮਞ੍ਜਿਟ੍ਠਆਦਿਅਵਲੇਪਨਰਜਨਂ. ਘਟ੍ਟੇਤ੍ਵਾ ਉਪ੍ਪਾਦਿਤਚ੍ਛਵਿਂ, ਯਾ ਰਙ੍ਗਂ ਪਿਵਤਿ. ਨਿਲ੍ਲੋਮਤਨ੍ਤਿ ਪੁਨਪ੍ਪੁਨਂ ਅਨੁਲਿਮ੍ਪਨੇਨ. ਖਣ੍ਡਖਣ੍ਡਿਤਨ੍ਤਿ ਖਣ੍ਡਖਣ੍ਡਿਤਭਾਵਂ. ਰਙ੍ਗਕ੍ਖਮੋ ਰਜਨਿਯੋ. ਤੇਨਾਹ ‘‘ਰਾਗਮਤ੍ਤਂ ਜਨੇਤੀ’’ਤਿ. ਅਨੁਯੋਗਨ੍ਤਿ ਚੋਦਨਂ. ਵੀਮਂਸਨ੍ਤਿ ਵਿਚਾਰਣਂ. ਥੁਸੇ ਕੋਟ੍ਟੇਤ੍ਵਾ ਤਣ੍ਡੁਲਪਰਿਯੇਸਨਂ ਵਿਯ ਕਦਲਿਯਂ ਸਾਰਪਰਿਯੇਸਨਂ ਵਿਯ ਚ ਨਿਗਣ੍ਠਵਾਦੇ ਸਾਰਵੀਮਂਸਨਂ. ਤਤੋ ਏਵ ਚ ਤਂ ਵੀਮਂਸਨ੍ਤੋ ਰਿਤ੍ਤਕੋ ਤੁਚ੍ਛਕੋਵ ਹੋਤੀਤਿ. ਸਬ੍ਬਮ੍ਪਿ ਬੁਦ੍ਧਵਚਨਂ ਚਤੁਸਚ੍ਚਵਿਨਿਮੁਤ੍ਤਂ ਨਤ੍ਥਿ, ਤਞ੍ਚ ਵੀਮਂਸਿਯਮਾਨਂ ਵਿਞ੍ਞੂਨਂ ਪੀਤਿਸੋਮਨਸ੍ਸਮੇਵ ਜਨੇਤਿ, ਅਤਪ੍ਪਕਞ੍ਚ ਅਸੇਚਨਾਭਾਵੇਨਾਤਿ ਆਹ ‘‘ਚਤੁਸਚ੍ਚਕਥਾ ਹੀ’’ਤਿਆਦਿ. ਯਥਾ ਯਥਾਤਿ ਯਦਿ ਖਨ੍ਧਮੁਖੇਨ ਯਦਿ ਧਾਤਾਯਤਨਾਦੀਸੁ ਅਞ੍ਞਤਰਮੁਖੇਨ ਬੁਦ੍ਧਵਚਨਂ ਓਗਾਹਿਸ੍ਸਤਿ, ਤਥਾ ਤਥਾ ਗਮ੍ਭੀਰਞਾਣਾਨਂਯੇਵ ਗੋਚਰਭਾਵਤੋ ਗਮ੍ਭੀਰਮੇਵ ਹੋਤਿ. ਯੋ ਚੇਤ੍ਥ ਪਣ੍ਡਿਤੋ ਨਿਪੁਣੋ ਕਤਪਰਪ੍ਪਵਾਦੋ ਪਣਿਧਾਯ ਸਬ੍ਬਥਾਮੇਨ ਚੋਦਨਂ ਆਰਮ੍ਭਤਿ ਤਸ੍ਸ ਚੋਦਨਾ ਕੇਸਗ੍ਗਮਤ੍ਤਮ੍ਪਿ ਚਾਲੇਤੁਂ ਨ ਸਕ੍ਕੋਤਿ. ਪੁਨ ਸੁਚਿਰਮ੍ਪਿ ਕਾਲਂ ਵਿਚਾਰੇਨ੍ਤੇਸੁਪਿ ਵਿਮਦ੍ਦਕ੍ਖਮਤੋ, ਏਵਂ ਤਥਾਗਤਵਾਦੋ ਸ੍ਵਾਖ੍ਯਾਤਭਾਵਤੋਤਿ ਆਹ ‘‘ਅਨੁਯੋਗਕ੍ਖਮੋ ਵਿਮਜ੍ਜਨਕ੍ਖਮੋ ਚਾ’’ਤਿ.

੭੬. ਵਿਸਯਪਰਿਞ੍ਞਾਣੇਨ ਦਹਤਿ ਪਟਿਪਕ੍ਖੇ ਸੋਧੇਤੀਤਿ ਧੀਰੋ, ਸ੍ਵਾਯਮਸ੍ਸ ਧੀਰਭਾਵੋ ਸਬ੍ਬਸੋ ਸਮ੍ਮੋਹਵਿਦ੍ਧਂਸਨਤਾਯਾਤਿ ਆਹ – ‘‘ਯਾ ਪਞ੍ਞਾ…ਪੇ… ਤੇਨ ਸਮਨ੍ਨਾਗਤਸ੍ਸਾ’’ਤਿ. ਪਭਿਨ੍ਨਖੀਲਸ੍ਸਾਤਿ ਸਮੁਚ੍ਛਿਨ੍ਨਸਬ੍ਬਚੇਤੋਖੀਲਸ੍ਸ, ਕਿਲੇਸਮਚ੍ਚੁਮਾਰਵਿਜਯੇਨੇਵ ਅਭਿਸਙ੍ਖਾਰਖਨ੍ਧਮਾਰਾ ਜਿਤਾਵ ਹੋਨ੍ਤੀਤਿ ਤੇਸਂ ਦ੍ਵਿਨ੍ਨਂ ਇਧ ਅਗ੍ਗਹਣਂ. ਈਘ-ਸਦ੍ਦੋ ਦੁਕ੍ਖਪਰਿਯਾਯੋਤਿ ਆਹ ‘‘ਨਿਦ੍ਦੁਕ੍ਖਸ੍ਸਾ’’ਤਿ. ਤਤ੍ਥ ਸਉਪਾਦਿਸੇਸਨਿਬ੍ਬਾਨਪ੍ਪਤ੍ਤਿਯਾ ਕਿਲੇਸੇਨ ਨਿਦ੍ਦੁਕ੍ਖਤਾ, ਅਨੁਪਾਦਿਸੇਸਨਿਬ੍ਬਾਨਪ੍ਪਤ੍ਤਿਯਾ ਵਿਪਾਕਦੁਕ੍ਖੇਨ ਨਿਦ੍ਦੁਕ੍ਖਤਾ. ਰਜ੍ਜਨਦੁਸ੍ਸਨਮੁਯ੍ਹਨਾਦਿਵਸੇਨ ਵਿਵਿਧਂ ਈਸਨਤੋ ਵੀਸਂ, ਵੀਸਮੇਵ ਵੇਸਂ, ਰਾਗਾਦੀਤਿ ਆਹ – ‘‘ਵੇਸਨ੍ਤਰਸ੍ਸਾਤਿ ਰਾਗਾਦਿਵੀਸਂ ਤਰਿਤ੍ਵਾ ਵਿਤਰਿਤ੍ਵਾ ਠਿਤਸ੍ਸਾ’’ਤਿ.

ਤੁਸਿਤਸ੍ਸਾਤਿ ਕਰੁਣਾਯਨਵਸੇਨ ਤੁਸਿਯਾ ਇਤਸ੍ਸ ਸਂਵਤ੍ਤਸ੍ਸ. ਏਵਂ ਸਤਿ ‘‘ਮੁਦਿਤਸ੍ਸਾ’’ਤਿ ਇਦਂ ਪੁਨਰੁਤ੍ਤਮੇਵ ਹੋਤਿ. ਮਨੁਜਸ੍ਸਾਤਿ ਪਠਮਾਯ ਜਾਤਿਯਾ ਭਗਵਾ ਮਨੁਸ੍ਸਜਾਤਿਯੋ ਹੁਤ੍ਵਾ ਵੁਤ੍ਤਾਨਂ ਵਕ੍ਖਮਾਨਾਨਞ੍ਚ ਵਸੇਨ ਸਦੇਵਕਂ ਅਭਿਭਵਿਤ੍ਵਾ ਠਿਤੋ ਅਚ੍ਛਰਿਯੋ ਭਗਵਾਤਿ ਦਸ੍ਸੇਤਿ. ਸਦੇਵਕਂ ਲੋਕਂ ਸਂਸਾਰਤੋ ਨਿਬ੍ਬਾਨਸੁਖਂ ਨਰਤਿ ਨੇਤਿ ਪਾਪੇਤੀਤਿ ਨਰੋ, ਨਾਯਕੋਤਿ ਅਤ੍ਥੋ, ਤਸ੍ਸ ਨਰਸ੍ਸ, ਤੇਨਾਹ ‘‘ਪੁਨਰੁਤ੍ਤ’’ਨ੍ਤਿ. ‘‘ਮਨੁਜਸ੍ਸਾ’’ਤਿ ਵਤ੍ਵਾ ‘‘ਨਰਸ੍ਸਾ’’ਤਿ ਪੁਨਰੁਤ੍ਤਂ ਪਦਂ. ਅਤ੍ਥਵਸੇਨ ਅਞ੍ਞਥਾ ਵੁਚ੍ਚਮਾਨੇ ਏਕੇਕਗਾਥਾਯ ਦਸਗੁਣਾ ਨਪ੍ਪਹੋਨ੍ਤਿ, ਨ ਪੂਰੇਨ੍ਤੀਤਿ ਅਤ੍ਥੋ.

ਵਿਨੇਤੀਤਿ ਵਿਨਯੋ, ਵਿਨਯੋ ਏਵ ਵੇਨੇਯਿਕੋਤਿ ਆਹ ‘‘ਸਤ੍ਤਾਨਂ ਵਿਨਾਯਕਸ੍ਸਾ’’ਤਿ. ਵਿਞ੍ਞੂਨਂ ਰੁਚਿਂ ਰਾਤਿ, ਈਰੇਤੀਤਿ ਵਾ ਰੁਚਿਰੋ, ਸ੍ਵਾਯਮਸ੍ਸ ਰੁਚਿਰਭਾਵੋ ਕੁਸਲਤਾਯਾਤਿ ਆਹ ‘‘ਸੁਚਿਧਮ੍ਮਸ੍ਸਾ’’ਤਿ. ਪਭਾਸਕਸ੍ਸਾਤਿ ਞਾਣਾਲੋਕੇਨ ਪਭਸ੍ਸਰਭਾਵਕਰਸ੍ਸ. ਨਿਸ੍ਸਙ੍ਗਸ੍ਸਾਤਿ ਅਟ੍ਠਸੁਪਿ ਪਰਿਸਾਸੁ, ਸਦੇਵੇ ਵਾ ਸਬ੍ਬਸ੍ਮਿਂ ਲੋਕੇ ਅਗ੍ਗਣ੍ਹਾਪਨਪਰਿਚ੍ਚਾਗੇਨ ਨਿਸ੍ਸਟਸ੍ਸ. ਗਮ੍ਭੀਰਗੁਣਸ੍ਸਾਤਿ ਪਰੇਸਂ ਞਾਣੇਨ ਅਪ੍ਪਤਿਟ੍ਠਭਾਵਾ ਗਮ੍ਭੀਰਗੁਣਸ੍ਸ. ਤੇਨਾਹ ਭਗਵਾ – ‘‘ਅਤ੍ਥਿ, ਭਿਕ੍ਖਵੇ, ਅਞ੍ਞੇਵ ਧਮ੍ਮਾ ਗਮ੍ਭੀਰਾ’’ਤਿਆਦਿ (ਦੀ. ਨਿ. ੧.੨੮). ਅਰਿਯਾਯ ਵਾ ਤੁਣ੍ਹੀਭਾਵੇਨ ਮੋਨਪ੍ਪਤ੍ਤਸ੍ਸ. ਧਮ੍ਮੇ ਠਿਤਸ੍ਸਾਤਿ ਧਮ੍ਮਕਾਯੇ ਸੁਪ੍ਪਤਿਟ੍ਠਿਤਸ੍ਸ. ਸਂਵੁਤਤ੍ਤਸ੍ਸਾਤਿ ਅਰਕ੍ਖਿਯਕਾਯਸਮਾਚਾਰਾਦਿਤਾਯ ਸਂਵੁਤਸਭਾਵਸ੍ਸ.

ਆਗੁਂ ਨ ਕਰੋਤੀਤਿਆਦੀਹਿ ਚਤੂਹਿ ਕਾਰਣੇਹਿ, ਪਨ੍ਤਸੇਨਾਸਨਸ੍ਸਾਤਿ ਵਿਵਿਤ੍ਤਸੇਨਾਸਨਸ੍ਸ. ਪਟਿਮਨ੍ਤਨਪਞ੍ਞਾਯਾਤਿ ਸਬ੍ਬਪਰਪ੍ਪਵਾਦਾਨਂ ਵਿਪਰਾਵਤ੍ਤਮਨ੍ਤਨਪਞ੍ਞਾਯ. ਮੋਨਂ ਵੁਚ੍ਚਤਿ ਞਾਣਂ ਸਬ੍ਬਤੋ ਕਿਲੇਸਾਨਂ ਨਿਧੁਨਨਤੋ.

ਇਸਿਸਤ੍ਤਮਸ੍ਸਾਤਿ ਸਬ੍ਬਇਸੀਸੁ ਜੇਟ੍ਠਸ੍ਸ ਸਾਧੁਤਮਸ੍ਸ. ਸੇਟ੍ਠਪ੍ਪਤ੍ਤਸ੍ਸਾਤਿ ਸੇਟ੍ਠਂ ਉਤ੍ਤਮਂ ਸਮ੍ਮਾਸਮ੍ਬੋਧਿਂ ਪਤ੍ਤਸ੍ਸ. ਅਕ੍ਖਰਾਦੀਨੀਤਿ ਅਕ੍ਖਰਪਦਬ੍ਯਞ੍ਜਨਾਕਾਰ-ਨਿਰੁਤ੍ਤਿਨਿਦ੍ਦੇਸ-ਸਂਕਾਸਨਪਕਾਸਨ-ਵਿਵਰਣ-ਵਿਭਜਨੁਤ੍ਤਾਨੀਕਰਣਾਨੀਤਿ ਬ੍ਯਞ੍ਜਨਤ੍ਥਪਦਾਨਿ. ਸਮੋਧਾਨੇਤ੍ਵਾ ਵਿਨੇਯ੍ਯਜ੍ਝਾਸਯਾਨੁਰੂਪਂ ਪਕਾਸਨਤੋ ਕਥਨਤੋ ਪਦਕਸ੍ਸ. ਪੁਰਿ-ਸਦ੍ਦੋ ‘‘ਪੁਬ੍ਬੇ’’ਤਿ ਇਮਿਨਾ ਸਮਾਨਤ੍ਥੋਤਿ ਆਹ – ‘‘ਪੁਰਿਨ੍ਦਦਸ੍ਸਾਤਿ ਸਬ੍ਬਪਠਮਂ ਧਮ੍ਮਦਾਨਦਾਯਕਸ੍ਸਾ’’ਤਿ. ਭਗਵਾ ਅਸਯ੍ਹਂ ਸਹਿਤੁਂ ਸਮਤ੍ਥੋਤਿ ਆਹ ‘‘ਸਮਤ੍ਥਸ੍ਸਾ’’ਤਿ. ਤੇਨਾਹ – ‘‘ਤਥਾਗਤਂ ਬੁਦ੍ਧਮਸਯ੍ਹਸਾਹਿਨ’’ਨ੍ਤਿ (ਇਤਿਵੁ. ੩੮). ਤੇ ਪਤ੍ਤਸ੍ਸਾਤਿ ਤੇ ਗੁਣੇ ਅਨਵਸੇਸਤੋ ਪਤ੍ਤਸ੍ਸ. ਵਿਤ੍ਥਾਰੇਤ੍ਵਾ ਸਂਕਿਲੇਸਵੋਦਾਨਧਮ੍ਮਂ ਬ੍ਯਾਕਰੋਤੀਤਿ ਬ੍ਯਾਕਰਣੋ, ਬ੍ਯਾਕਰਣੋ ਏਵ ਵੇਯ੍ਯਾਕਰਣੋ. ਤਨ੍ਤਿਪਦਨ੍ਤਿ ਤਨ੍ਤਿਂ ਆਰੋਪੇਤ੍ਵਾ ਠਪਿਤਂ ਪਦਂ.

ਤਣ੍ਹਾਬਨ੍ਧਨੇਨ ਸਬ੍ਬੇਨ ਵਾ ਕਿਲੇਸਬਨ੍ਧਨੇਨ ਅਬਦ੍ਧਸ੍ਸ. ਮਹਾਪਞ੍ਞਾਯਾਤਿ ਮਹਾਨੁਭਾਵਾਯ ਪਞ੍ਞਾਯ, ਮਹਾਵਿਸਯਾਯ ਵਾ ਪਞ੍ਞਾਯ. ਸਬ੍ਬਾ ਹਿ ਭਗਵਤੋ ਪਞ੍ਞਾ ਮਹਾਨੁਭਾਵਾ, ਯਥਾਸਕਂ ਵਿਸਯੇ ਮਹਾਵਿਸਯਾ ਚ ਏਕਾਦਿਵਸੇਨ ਅਨਵਸੇਸਤੋ ਮਹਾਵਿਸਯਾ ਨਾਮ ਸਬ੍ਬਞ੍ਞੁਤਾਵ. ਆਨੁਭਾਵਦਸ੍ਸਨਟ੍ਠੇਨਾਤਿ ਅਚ੍ਛਰਿਯਾਚਿਨ੍ਤੇਯ੍ਯਾਪਰਿਮੇਯ੍ਯਸ੍ਸ ਅਤ੍ਤਨੋ ਆਨੁਭਾਵਸ੍ਸ ਲੋਕਸ੍ਸ ਦਸ੍ਸਨਟ੍ਠੇਨ. ਯਕ੍ਖਸ੍ਸਾਤਿ ਵਾ ਲੋਕੇਨ ਪੂਜਨੀਯਸ੍ਸ. ਅਯਂ ਉਪਾਸਕੋ ਖੁਜ੍ਜੁਤ੍ਤਰਾ ਵਿਯ ਉਪਾਸਿਕਾ ਸੇਖਪਟਿਸਮ੍ਭਿਦਾਪ੍ਪਤ੍ਤੋਤਿ ਆਹ ‘‘ਸੋਤਾਪਤ੍ਤਿਮਗ੍ਗੇਨੇਵ ਪਟਿਸਮ੍ਭਿਦਾ ਆਗਤਾ’’ਤਿ. ਕਿਲੇਸਪ੍ਪਹਾਨਵਣ੍ਣਂ ਕਥੇਨ੍ਤੋਤਿ ਕਿਲੇਸਪ੍ਪਹਾਨਂ ਵਿਸਯਂ ਨਿਮਿਤ੍ਤਂ ਕਤ੍ਵਾ ਵਣ੍ਣਂ ਕਥੇਨ੍ਤੋ.

੭੭. ਸਮ੍ਪਿਣ੍ਡਿਤਾਤਿ ਸਨ੍ਨਿਚਿਤਾ, ਗਨ੍ਥਿਤਾਤਿ ਅਤ੍ਥੋ. ਇਮੇ ਸਤ੍ਤਾਤਿ ਯਂ ਯਦੇਵ ਪਰਿਬ੍ਭਮਨ੍ਤਾ ਸਤ੍ਤਾ. ਅਤ੍ਤਨੋਵ ਚਿਨ੍ਤਯਨ੍ਤੀਤਿ ਅਵੀਤਤਣ੍ਹਤਾਯ ਸਕਂਯੇਵ ਪਯੋਜਨਂ ਚਿਨ੍ਤੇਨ੍ਤਿ. ਤਥਾ ਹਿ ਮਤੇ ਞਾਤਕੇ ਅਨੁਸੋਚਨ੍ਤਾਪਿ ਤੇਹਿ ਸਾਧੇਤਬ੍ਬਸ੍ਸ ਅਤ੍ਤਨੋ ਪਯੋਜਨਸ੍ਸੇਵ ਵਸੇਨ ਅਨੁਸੋਚਨ੍ਤਿ. ਉਣ੍ਹਂ ਅਹੋਸੀਤਿ ਬਲਵਤਾ ਚਿਤ੍ਤਸ੍ਸ ਸਨ੍ਤਾਪੇਨ ਸਨ੍ਤਤ੍ਤਂ ਅਬ੍ਭਨ੍ਤਰਂ ਹਦਯਟ੍ਠਾਨਂ ਖਦਿਰਙ੍ਗਾਰਸਨ੍ਤਾਪਿਤਂ ਵਿਯ ਉਣ੍ਹਂ ਅਹੋਸਿ. ਤੇਨਾਹ ‘‘ਲੋਹਿਤਂ ਵਿਲੀਯਿਤ੍ਥਾ’’ਤਿ. ਪਤ੍ਤਮਤ੍ਤਨ੍ਤਿ ਏਕਪਤ੍ਤਪੂਰਮਤ੍ਤਂ. ਅਭਿਸਮਯਸਾਧਿਕਾਯ ਚਤੁਸਚ੍ਚਦੇਸਨਾਯ ਸਙ੍ਖੇਪੇਨੇਵ ਦੇਸਿਤਤ੍ਤਾ ਆਹ – ‘ਉਗ੍ਘਟਿਤਞ੍ਞੁਪੁਗ੍ਗਲਸ੍ਸ ਵਸੇਨ ਧਮ੍ਮਦੇਸਨਾ ਪਰਿਨਿਟ੍ਠਿਤਾ’’ਤਿ.

ਉਪਾਲਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.