੧੦. ਅਪਣ੍ਣਕਸੁਤ੍ਤਵਣ੍ਣਨਾ

੯੩. ਨਾਨਾਵਿਧਾਤਿ ਨਾਨਾਵਿਧਦਿਟ੍ਠਿਕਾ ਸਮਣਬ੍ਰਾਹ੍ਮਣਾਤਿ ਪਬ੍ਬਜ੍ਜਾਮਤ੍ਤੇਨ ਸਮਣਾ, ਜਾਤਿਮਤ੍ਤੇਨ ਬ੍ਰਾਹ੍ਮਣਾ ਚ. ਦਸ੍ਸਨਨ੍ਤਿ ਦਿਟ੍ਠਿ. ਗਹਿਤਨ੍ਤਿ ਅਭਿਨਿਵਿਸ੍ਸ ਗਹਿਤਂ. ਇਤਿ ਤੇ ਅਤ੍ਤਨੋ ਦਸ੍ਸਨਂ ਗਹੇਤੁਕਾਮਾ ਪੁਚ੍ਛਨ੍ਤਿ. ਵਿਨਾ ਦਸ੍ਸਨੇਨ ਲੋਕੋ ਨ ਨਿਯ੍ਯਾਤੀਤਿ ਵਿਮੋਕ੍ਖਭਾਵਨਾਯ ਏਕੇਨ ਦਸ੍ਸਨੇਨ ਵਿਨਾ ਲੋਕੋ ਸਂਸਾਰਦੁਕ੍ਖਤੋ ਨ ਨਿਗਚ੍ਛਤਿ. ਏਕਦਿਟ੍ਠਿਯਮ੍ਪਿ ਪਤਿਟ੍ਠਾਤੁਂ ਨਾਸਕ੍ਖਿਂਸੁ ਸਦ੍ਧਾਕਾਰਾਭਾਵਤੋ. ਤਥਾ ਹਿ ਤੇ ਇਮਾਯ ਦੇਸਨਾਯ ਸਰਣੇਸੁ ਪਤਿਟ੍ਠਹਿਂਸੁ. ਯਸ੍ਮਾ ਅਵਿਪਰੀਤੇ ਸਦ੍ਧੇਯ੍ਯਵਤ੍ਥੁਸ੍ਮਿਂ ਉਪ੍ਪਨ੍ਨਸਦ੍ਧਾ ‘‘ਆਕਾਰਵਤੀ’’ਤਿ ਅਧਿਪ੍ਪੇਤਾ, ਤਸ੍ਮਾ ਯੋ ਲੋਕੇ ਅਵਿਪਰੀਤਧਮ੍ਮਦੇਸਨਾ, ਅਯਮੇਵੇਸਾਤਿ ਪਵਤ੍ਤਾ ਮਗ੍ਗਸਾਧਨਗਤਾਯ ਸਦ੍ਧਾਯ ਕਾਰਣਭਾਵਤੋ ਤਨ੍ਨਿਸ੍ਸਯਾ ਸਦ੍ਧਾ, ਸਾ ਆਕਾਰਵਤੀਤਿ ਵੁਤ੍ਤਾ. ਅਵਤ੍ਥੁਸ੍ਮਿਞ੍ਹਿ ਸਦ੍ਧਾ ਅਯੁਤ੍ਤਕਾਰਣਤਾਯ ਨ ਆਕਾਰਵਤੀ. ਆਕਾਰਵਤੀਤਿ ਏਤ੍ਥ ਵਤੀ-ਸਦ੍ਦੋ ਨ ਕੇਵਲਂ ਅਤ੍ਥਿਤਾਮਤ੍ਤਦੀਪਕੋ, ਅਥ ਖੋ ਅਤਿਸਯਤ੍ਥਦੀਪਕੋ ਪਾਸਂਸਤ੍ਥਦੀਪਕੋ ਵਾ ਦਟ੍ਠਬ੍ਬੋ. ਤੇਨ ਆਕਾਰਵਤੀਤਿ ਸਦ੍ਧੇਯ੍ਯਵਤ੍ਥੁਵਸੇਨ ਅਤਿਸਯਕਾਰਣਵਤੀਤਿ ਵਾ ਪਾਸਂਸਕਾਰਣਵਤੀਤਿ ਵਾ ਅਯਮੇਤ੍ਥ ਅਤ੍ਥੋ. ਅਪਣ੍ਣਕੋਤਿ ਏਤ੍ਥ ਯਥਾ ਕਞ੍ਚਿ ਅਤ੍ਥਂ ਸਾਧੇਤੁਂ ਆਰਦ੍ਧਸ੍ਸ ਪਯੋਗੋ ਵਿਰਦ੍ਧੋ, ਤਤ੍ਥ ਅਕਾਰਕੋ ਵਿਯ ਹੋਤਿ ਪੁਨਪਿ ਆਰਭਿਤਬ੍ਬਤਾਯ. ਅਵਿਰਦ੍ਧੋ ਪਨ ਅਤ੍ਥਸ੍ਸ ਸਾਧਨਤੋ ਅਪਣ੍ਣਕੋ, ਏਵਂ ਅਯਮ੍ਪਿ ਧਮ੍ਮੋ ਅਭਿਭਵਿਤ੍ਵਾ ਪਵਤ੍ਤਨਤੋ ਏਕਂਸਤੋ ‘‘ਅਪਣ੍ਣਕੋ’’ਤਿ ਵੁਤ੍ਤੋ. ਤੇਨਾਹ ‘‘ਅਵਿਰਦ੍ਧੋ ਅਦ੍ਵੇਜ੍ਝਗਾਮੀ ਏਕਂਸਗਾਹਿਕੋ’’ਤਿ.

੯੪. ਤਬ੍ਬਿਪਚ੍ਚਨੀਕਭੂਤਾਤਿ ਤਸ੍ਸਾ ਮਿਚ੍ਛਾਦਿਟ੍ਠਿਯਾ ਪਚ੍ਚਨੀਕਭੂਤਾ.

੯੫. ਨੇਸਨ੍ਤਿ ਕੁਸਲਾਨਂ ਧਮ੍ਮਾਨਂ. ਅਕੁਸਲਤੋ ਨਿਕ੍ਖਨ੍ਤਭਾਵੇਤਿ ਅਸਂਕਿਲਿਟ੍ਠਭਾਵੇ. ਆਨਿਸਂਸੋਤਿ ਸੁਦ੍ਧਵਿਪਾਕਤਾ. ਵਿਸੁਦ੍ਧਿਪਕ੍ਖੋਤਿ ਵਿਸੁਦ੍ਧਿਭਾਵੋ ਪਰਿਯੋਦਾਤਤਾ. ਅਭੂਤਧਮ੍ਮਸ੍ਸ ਦਿਟ੍ਠਿਭਾਵਸ੍ਸ ਸਞ੍ਞਾਪਨਾ ਆਚਿਕ੍ਖਨਾ ਅਭੂਤਧਮ੍ਮਸਞ੍ਞਾਪਨਾ. ਸਾਵਜ੍ਜੇਸੁ ਪਰਮਵਜ੍ਜੇ ਮਿਚ੍ਛਾਦਸ੍ਸਨੇ ਪਗ੍ਗਹਣਨ੍ਤਿ ਕੁਤੋ ਸੁਸੀਲ੍ਯਸ੍ਸ ਪਗ੍ਗਹੋਤਿ ਆਹ – ‘‘ਮਿਚ੍ਛਾਦਸ੍ਸਨਂ ਗਣ੍ਹਨ੍ਤਸ੍ਸੇਵ ਸੁਸੀਲ੍ਯਂ ਪਹੀਨਂ ਹੋਤੀ’’ਤਿ. ਮਿਚ੍ਛਾਦਿਟ੍ਠਿਆਦਯੋਤਿ ਏਤ੍ਥ ਮਿਚ੍ਛਾਸਙ੍ਕਪ੍ਪੋ ਪਰਲੋਕਾਭਾਵਚਿਨ੍ਤਾ, ਮਿਚ੍ਛਾਵਾਚਾ ਪਰਲੋਕਾਭਾਵਵਾਦਭੂਤੋ ਮੁਸਾਵਾਦੋ, ਅਰਿਯਾਨਂ ਪਚ੍ਚਨੀਕਤਾਦਯੋ. ਅਪਰਾਪਰਂ ਉਪ੍ਪਜ੍ਜਨਵਸੇਨਾਤਿ ਪੁਨਪ੍ਪੁਨਂ ਚਿਤ੍ਤੇ ਉਪ੍ਪਜ੍ਜਨਵਸੇਨ. ਪਾਪਕਾ ਅਕੁਸਲਾ ਧਮ੍ਮਾਤਿ ਪਚ੍ਚਵੇਕ੍ਖਣਸਞ੍ਞਾਪਨਾਦਿਕਾਲੇ ਉਪ੍ਪਜ੍ਜਨਕਾ ਤਥਾਪਵਤ੍ਤਾ ਅਕੁਸਲਖਨ੍ਧਾ.

ਕਲਿਗ੍ਗਹੋਤਿ ਅਨਤ੍ਥਪਰਿਗ੍ਗਹੋ. ਸੋ ਪਨ ਯਸ੍ਮਾ ਦਿਟ੍ਠੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚ ਪਰਾਜਯੋ ਹੋਤੀਤਿ ਆਹ ‘‘ਪਰਾਜਯਗ੍ਗਾਹੋ’’ਤਿ. ਦੁਸ੍ਸਮਤ੍ਤੋਤਿ ਏਤ੍ਥ ਦੁ-ਸਦ੍ਦੋ ‘‘ਸਮਾਦਿਨ੍ਨੋ’’ਤਿ ਏਤ੍ਥਾਪਿ ਆਨੇਤ੍ਵਾ ਯੋਜੇਤਬ੍ਬੋਤਿ ਆਹ ‘‘ਦੁਪ੍ਪਰਾਮਟ੍ਠੋ’’ਤਿ. ਯਥਾ ਦੁਪ੍ਪਰਾਮਟ੍ਠੋ ਹੋਤਿ, ਏਵਂ ਸਮਾਦਿਨ੍ਨੋ ਦੁਸ੍ਸਮਤ੍ਤੋ ਦੁਸਮਾਦਿਨ੍ਨੋ ਵੁਤ੍ਤੋ. ਸਕਵਾਦਮੇਵ ਫਰਿਤ੍ਵਾਤਿ ਅਤ੍ਤਨੋ ਨਤ੍ਥਿਕਵਾਦਮੇਵ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ (ਮ. ਨਿ. ੨.੧੮੭; ੩.੨੭-੨੮) ਅਵਧਾਰੇਨ੍ਤੋ ਅਞ੍ਞਸ੍ਸ ਓਕਾਸਅਦਾਨਵਸੇਨ ਫਰਿਤ੍ਵਾ. ਤੇਨਾਹ ‘‘ਅਧਿਮੁਚ੍ਚਿਤ੍ਵਾ’’ਤਿ. ‘‘ਸਮ੍ਬੁਦ੍ਧੋ’’ਤਿਆਦਿ ਅਧਿਮੁਚ੍ਚਨਾਕਾਰਦਸ੍ਸਨਂ. ਰਿਞ੍ਚਤੀਤਿ ਵਿਵੇਚੇਤਿ ਅਪਨੇਤਿ. ਤੇਨਾਹ ‘‘ਵਜ੍ਜੇਤੀ’’ਤਿ.

੯੬. ਕਟਗ੍ਗਹੋਤਿ ਕਤਂ ਸਬ੍ਬਸੋ ਸਿਦ੍ਧਿਮੇਵ ਕਤ੍ਵਾ ਗਹਣਂ. ਸੋ ਪਨ ਜਯਲਾਭੋ ਹੋਤੀਤਿ ਵੁਤ੍ਤਂ ‘‘ਜਯਗ੍ਗਾਹੋ’’ਤਿ. ਸੁਗ੍ਗਹਿਤੋਤਿ ਸੁਟ੍ਠੁਕਰਣਵਸੇਨ ਗਹਿਤੋ. ਸੁਪਰਾਮਟ੍ਠੋਤਿ ਸੁਟ੍ਠੁ ਪਰਾਪਰਂ ਆਸੇਵਨਵਸੇਨ ਆਮਟ੍ਠੋ. ਉਭਯੇਨਪਿ ਤਸ੍ਸ ਕਮ੍ਮਸ੍ਸ ਕਤੂਪਚਿਤਭਾਵਂ ਦਸ੍ਸੇਤਿ, ਸੋਤ੍ਥਿਭਾਵਾਵਹਤ੍ਤਞ੍ਚ ਸਗ੍ਗੁਪਪਤ੍ਤਿਸਂਵਤ੍ਤਨਤੋ ਪਾਪਸਭਾਵਪਹਾਨਤੋ ਚ.

੯੭. ਸਹਤ੍ਥਾ ਕਰੋਨ੍ਤਸ੍ਸਾਤਿ (ਦੀ. ਨਿ. ਟੀ. ੧.੧੬੬; ਸਂ. ਨਿ. ਟੀ. ੨.੩.੨੧੧) ਸਹਤ੍ਥੇਨੇਵ ਕਰੋਨ੍ਤਸ੍ਸ. ਨਿਸ੍ਸਗ੍ਗਿਯਥਾਵਰਾਦਯੋਪਿ ਇਧ ਸਹਤ੍ਥਕਰਣੇਨੇਵ ਸਙ੍ਗਹਿਤਾ. ਪਚਨਂ ਦਹਨਂ ਵਿਬਾਧਨਨ੍ਤਿ ਆਹ ‘‘ਦਣ੍ਡੇਨ ਪੀਲ਼ੇਨ੍ਤਸ੍ਸਾ’’ਤਿ. ਸੋਕਂ ਸਯਂ ਕਰੋਨ੍ਤਸ੍ਸਾਤਿ ਪਰਸ੍ਸ ਸੋਕਕਾਰਣਂ ਸਯਂ ਕਰੋਨ੍ਤਸ੍ਸ, ਸੋਕਂ ਵਾ ਉਪ੍ਪਾਦੇਨ੍ਤਸ੍ਸ. ਪਰੇਹਿ ਅਤ੍ਤਨੋ ਵਚਨਕਰੇਹਿ. ਸਯਮ੍ਪਿ ਫਨ੍ਦਤੋਤਿ ਪਰਸ੍ਸ ਵਿਬਾਧਨਪਯੋਗੇਨ ਸਯਮ੍ਪਿ ਫਨ੍ਦਤੋ. ਅਤਿਪਾਤਯਤੋਤਿ ਪਦਂ ਸੁਦ੍ਧਕਤ੍ਤੁਅਤ੍ਥੇ ਹੇਤੁਕਤ੍ਤੁਅਤ੍ਥੇ ਚ ਵਤ੍ਤਤੀਤਿ ਆਹ ‘‘ਹਨਨ੍ਤਸ੍ਸਪਿ ਹਨਾਪੇਨ੍ਤਸ੍ਸਾਪੀ’’ਤਿ.

ਘਰਸ੍ਸ ਭਿਤ੍ਤਿ ਅਨ੍ਤੋ ਬਹਿ ਚ ਸਨ੍ਧਿਤਾ ਹੁਤ੍ਵਾ ਠਿਤਾ ਘਰਸਨ੍ਧਿ. ਕਿਞ੍ਚਿਪਿ ਅਸੇਸੇਤ੍ਵਾ ਨਿਰਵਸੇਸਮੇਵ ਲੋਪੋਤਿ ਨਿਲ੍ਲੋਪੋ. ਏਕਾਗਾਰੇ ਨਿਯੁਤ੍ਤੋ ਵਿਲੋਪੋ ਏਕਾਗਾਰਿਕੋ. ਪਰਿਤੋ ਸਬ੍ਬਸੋ ਪਨ੍ਥੇ ਹਨਨਂ ਪਰਿਪਨ੍ਥੋ. ਪਾਪਂ ਨ ਕਰੀਯਤਿ ਪੁਬ੍ਬੇ ਅਸਤੋ ਉਪ੍ਪਾਦੇਤੁਂ ਅਸਕ੍ਕੁਣੇਯ੍ਯਤ੍ਤਾ, ਤਸ੍ਮਾ ਨਤ੍ਥਿ ਪਾਪਂ. ਯਦਿ ਏਵਂ ਕਥਂ ਸਤ੍ਤਾ ਪਾਪਂ ਪਟਿਪਜ੍ਜਨ੍ਤੀਤਿ ਆਹ – ‘‘ਸਤ੍ਤਾ ਪਨ ਕਰੋਮਾਤਿ ਏਵਂਸਞ੍ਞਿਨੋ ਹੋਨ੍ਤੀ’’ਤਿ. ਏਵਂ ਕਿਰਸ੍ਸ ਹੋਤਿ ‘‘ਇਮੇਸਞ੍ਹਿ ਸਤ੍ਤਾਨਂ ਹਿਂਸਾਦਿਕਿਰਿਯਾ ਨ ਅਤ੍ਤਾਨਂ ਫੁਸਤਿ ਤਸ੍ਸ ਨਿਚ੍ਚਤਾਯ ਨਿਬ੍ਬਿਕਾਰਤ੍ਤਾ, ਸਰੀਰਂ ਪਨ ਅਚੇਤਨਂ ਕਟ੍ਠਕਲਿਙ੍ਗਰੂਪਮਂ, ਤਸ੍ਮਿਂ ਵਿਕੋਪਿਤੇਪਿ ਨ ਕਿਞ੍ਚਿ ਪਾਪ’’ਨ੍ਤਿ. ਖੁਰਨੇਮਿਨਾਤਿ ਨਿਸਿਤਖੁਰਮਯਨੇਮਿਨਾ. ਗਙ੍ਗਾਯ ਦਕ੍ਖਿਣਦਿਸਾ ਅਪ੍ਪਤਿਰੂਪਦੇਸੋ, ਉਤ੍ਤਰਦਿਸਾ ਪਤਿਰੂਪਦੇਸੋਤਿ ਅਧਿਪ੍ਪਾਯੇਨ ‘‘ਦਕ੍ਖਿਣਞ੍ਚੇ’’ਤਿਆਦਿ ਵੁਤ੍ਤਨ੍ਤਿ ‘‘ਦਕ੍ਖਿਣਤੀਰੇ ਮਨੁਸ੍ਸਾ ਕਕ੍ਖਲ਼ਾ’’ਤਿਆਦਿਮਾਹ.

ਮਹਾਯਾਗਨ੍ਤਿ ਮਹਾਵਿਜਿਤਯਞ੍ਞਸਦਿਸਂ ਮਹਾਯਾਗਂ. ਸੀਲਸਂਯਮੇਨਾਤਿ ਕਾਯਿਕਵਾਚਸਿਕਸਂਵਰੇਨ. ਸਚ੍ਚਵਚਨੇਨਾਤਿ ਸਚ੍ਚਵਾਚਾਯ. ਤਸ੍ਸ ਵਿਸੁਂ ਵਚਨਂ ਲੋਕੇ ਗਰੁਤਰਪੁਞ੍ਞਸਮ੍ਮਤਭਾਵਤੋ. ਯਥਾ ਹਿ ਪਾਪਧਮ੍ਮੇਸੁ ਮੁਸਾਵਾਦੋ ਗਰੁ, ਏਵਂ ਪੁਞ੍ਞਧਮ੍ਮੇਸੁ ਸਚ੍ਚਵਾਚਾ. ਤੇਨਾਹ ਭਗਵਾ – ‘‘ਏਕਂ ਧਮ੍ਮਮਤੀਤਸ੍ਸਾ’’ਤਿਆਦਿ (ਧ. ਪ. ੧੭੬). ਵੁਤ੍ਤਨਯੇਨੇਵਾਤਿ ਕਣ੍ਹਪਕ੍ਖੇ ਵੁਤ੍ਤਨਯੇਨ. ਤਤ੍ਥ ਹਿ – ‘‘ਨਤ੍ਥਿ ਪਾਪਂ, ਨਤ੍ਥਿ ਪਾਪਸ੍ਸ ਆਗਮੋ’’ਤਿ ਆਗਤਂ, ਇਧ ‘‘ਅਤ੍ਥਿ ਪੁਞ੍ਞਂ, ਅਤ੍ਥਿ ਪੁਞ੍ਞਸ੍ਸ ਆਗਮੋ’’ਤਿ ਆਗਤਂ, ਅਯਮੇਵ ਵਿਸੇਸੋ. ਸੇਸਂ ਵੁਤ੍ਤਸਦਿਸਮੇਵਾਤਿ ‘‘ਤੇਸਮੇਤਂ ਪਾਟਿਕਙ੍ਖ’’ਨ੍ਤਿ ਏਵਮਾਦਿਂ ਸਨ੍ਧਾਯ ਵਦਤਿ, ਤਂ ਹੇਟ੍ਠਾ ਪੁਰਿਮਵਾਰਸਦਿਸਂ.

੧੦੦. ਉਭਯੇਨਾਤਿ ਹੇਤੁਪਚ੍ਚਯਪਟਿਸੇਧਵਚਨੇਨ. ਸਂਕਿਲੇਸਪਚ੍ਚਯਨ੍ਤਿ ਸਂਸਾਰੇ ਪਰਿਬ੍ਭਮਨੇਨ ਕਿਲਿਨ੍ਨਸ੍ਸ ਮਲਿਨਭਾਵਸ੍ਸ ਕਾਰਣਂ. ਵੁਤ੍ਤਵਿਪਰਿਯਾਯੇਨ ਵਿਸੁਦ੍ਧਿਪਚ੍ਚਯਨ੍ਤਿ ਸਦ੍ਦਤ੍ਥੋ ਵੇਦਿਤਬ੍ਬੋ. ਬਲਨ੍ਤਿਆਦੀਸੁ ਸਤ੍ਤਾਨਂ ਸਂਕਿਲੇਸਾਵਹਂ ਵੋਦਾਨਾਵਹਞ੍ਚ ਉਸ੍ਸਾਹਸਙ੍ਖਾਤਂ ਬਲਂ ਵਾ, ਸੂਰਵੀਰਭਾਵਸਙ੍ਖਾਤਂ ਵੀਰਿਯਂ ਵਾ, ਪੁਰਿਸੇਨ ਕਤ੍ਤਬ੍ਬੋ ਪੁਰਿਸਥਾਮੋ ਵਾ, ਸੋ ਏਵ ਪਰਂ ਪਰਂ ਠਾਨਂ ਅਕ੍ਕਮਨਪ੍ਪਤ੍ਤਿਯਾ ਪੁਰਿਸਪਰਕ੍ਕਮੋ ਵਾ ਨਤ੍ਥਿ ਨ ਉਪਲਬ੍ਭਤਿ.

ਸਤ੍ਵਯੋਗਤੋ, ਰੂਪਾਦੀਸੁ ਸਤ੍ਤਵਿਸਤ੍ਤਤਾਯ ਚ ਸਤ੍ਤਾ. ਪਾਣਨਤੋ ਅਸ੍ਸਾਸਪਸ੍ਸਾਸਵਸੇਨ ਪਵਤ੍ਤਿਯਾ ਪਾਣਾ. ਤੇ ਪਨ ਸੋ ਏਕਿਨ੍ਦ੍ਰਿਯਾਦਿਵਸੇਨ ਵਿਭਜਿਤ੍ਵਾ ਵਦਤੀਤਿ ਆਹ ‘‘ਏਕਿਨ੍ਦ੍ਰਿਯੋ’’ਤਿਆਦਿ. ਅਣ੍ਡਕੋਸਾਦੀਸੁ ਭਵਨਤੋ ਭੂਤਾਤਿ ਵੁਚ੍ਚਨ੍ਤੀਤਿ ਆਹ ‘‘ਅਣ੍ਡਕੋਸ…ਪੇ… ਵਦਨ੍ਤੀ’’ਤਿ. ਜੀਵਨਤੋ ਪਾਣਂ ਧਾਰੇਨ੍ਤੋ ਵਿਯ ਵਡ੍ਢਨਤੋ ਜੀਵਾਤਿ ਏਵਂ ਸਤ੍ਤਪਾਣਭੂਤਜੀਵੇਸੁ ਸਦ੍ਦਤ੍ਥੋ ਵੇਦਿਤਬ੍ਬੋ. ਨਤ੍ਥਿ ਏਤੇਸਂ ਸਂਕਿਲੇਸਵਿਸੁਦ੍ਧੀਸੁ ਵਸੋਤਿ ਅਵਸਾ. ਨਤ੍ਥਿ ਨੇਸਂ ਬਲਂ ਵੀਰਿਯਞ੍ਚਾਤਿ ਅਬਲਾ ਅਵੀਰਿਯਾ. ਨਿਯਤਤਾਤਿ ਅਚ੍ਛੇਜ੍ਜਸੁਤ੍ਤਾਵੁਤਾਭੇਜ੍ਜਮਣਿ ਵਿਯ ਨਿਯਤਪਵਤ੍ਤਨਤਾਯ ਗਤਿਜਾਤਿਬਨ੍ਧਪਜਹਵਸੇਨ ਨਿਯਾਮੋ. ਤਤ੍ਥ ਤਤ੍ਥ ਗਮਨਨ੍ਤਿ ਛਨ੍ਨਂ ਅਭਿਜਾਤੀਨਂ ਤਾਸੁ ਤਾਸੁ ਗਤੀਸੁ ਉਪਗਮਨਂ ਸਮਵਾਯੇਨ ਸਮਾਗਮੋ. ਸਭਾਵੋਯੇਵਾਤਿ ਯਥਾ ਕਣ੍ਟਕਸ੍ਸ ਤਿਕ੍ਖਤਾ, ਕਬਿਟ੍ਠਫਲਾਨਂ ਪਰਿਮਣ੍ਡਲਤਾ, ਮਿਗਪਕ੍ਖੀਨਂ ਵਿਚਿਤ੍ਤਾਕਾਰਤਾ, ਏਵਂ ਸਬ੍ਬਸ੍ਸਪਿ ਲੋਕਸ੍ਸ ਹੇਤੁਪਚ੍ਚਯੇਨ ਵਿਨਾ ਤਥਾ ਤਥਾ ਪਰਿਣਾਮੋ, ਅਯਂ ਸਭਾਵੋਯੇਵ ਅਕਿਤ੍ਤਿਮੋਯੇਵ. ਤੇਨਾਹ ‘‘ਯੇਨ ਹੀ’’ਤਿਆਦਿ.

ਸਕੁਣੇ ਹਨਤੀਤਿ ਸਾਕੁਣਿਕੋ, ਤਥਾ ਸੂਕਰਿਕੋ. ਲੁਦ੍ਦੋਤਿ ਅਞ੍ਞੋਪਿ ਯੋ ਕੋਚਿ ਮਾਗਵਿਕੋ ਨੇਸਾਦੋ. ਪਾਪਕਮ੍ਮਪਸੁਤਤਾਯ ਕਣ੍ਹਾਭਿਜਾਤਿ ਨਾਮ. ਭਿਕ੍ਖੂਤਿ ਸਾਕਿਯਾ ਭਿਕ੍ਖੂ, ਮਚ੍ਛਮਂਸਖਾਦਨਤੋ ਨੀਲਾਭਿਜਾਤੀਤਿ ਵਦਨ੍ਤਿ. ਞਾਯਲਦ੍ਧੇਪਿ ਪਚ੍ਚਯੇ ਭੁਞ੍ਜਮਾਨਾ ਆਜੀਵਕਸਮਯਸ੍ਸ ਵਿਲੋਮਗਾਹਿਤਾਯ ‘‘ਪਚ੍ਚਯੇਸੁ ਕਣ੍ਟਕੇ ਪਕ੍ਖਿਪਿਤ੍ਵਾ ਖਾਦਨ੍ਤੀ’’ਤਿ ਵਦਨ੍ਤਿ. ਏਕੇ ਪਬ੍ਬਜਿਤਾ, ਯੇ ਸਵਿਸੇਸਂ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ. ਤਥਾ ਹਿ ਤੇ ਕਣ੍ਟਕੇ ਵਤ੍ਤੇਨ੍ਤਾ ਵਿਯ ਹੋਨ੍ਤੀਤਿ ਕਣ੍ਟਕਵੁਤ੍ਤਿਕਾਤਿ ਵੁਤ੍ਤਾ. ਠਤ੍ਵਾ ਭੁਞ੍ਜਨਦਾਨਪਟਿਕ੍ਖੇਪਾਦਿਵਤਸਮਾਯੋਗੇਨ ਪਣ੍ਡਰਤਰਾ. ਅਚੇਲਕਸਾਵਕਾਤਿ ਆਜੀਵਕਸਾਵਕੇ ਵਦਤਿ. ਤੇ ਕਿਰ ਆਜੀਵਕਲਦ੍ਧਿਯਾ ਵਿਸੁਦ੍ਧਚਿਤ੍ਤਤਾਯ ਨਿਗਣ੍ਠੇਹਿਪਿ ਪਣ੍ਡਰਤਰਾ. ਨਨ੍ਦਾਦਯੋ ਹਿ ਤਥਾਰੂਪਾਯ ਪਟਿਪਤ੍ਤਿਯਾ ਪਤ੍ਤਬ੍ਬਾ, ਤਸ੍ਮਾ ਨਨ੍ਦਾਦਯੋ ਨਿਗਣ੍ਠੇਹਿ ਆਜੀਵਕਸਾਵਕੇਹਿ ਚ ਪਣ੍ਡਰਤਰਾਤਿ ਵੁਤ੍ਤਾ ‘‘ਸੁਕ੍ਕਾਭਿਜਾਤੀ’’ਤਿ.

ਅਯਮੇਤੇਸਂ ਲਦ੍ਧੀਤਿ ਸਾਕੁਣਿਕਾਦਿਭਾਵੂਪਗਮਨੇਨ ਕਣ੍ਹਾਭਿਜਾਤਿਆਦੀਸੁ ਦੁਕ੍ਖਂ ਸੁਖਞ੍ਚ ਪਟਿਸਂਵੇਦੇਨ੍ਤਾ ਅਨੁਕ੍ਕਮੇਨ ਮਹਾਕਪ੍ਪਾਨਂ ਚੁਲ੍ਲਾਸੀਤਿਸਹਸ੍ਸਾਨਿ ਖੇਪੇਤ੍ਵਾ ਆਜੀਵਕਭਾਵੂਪਗਮਨੇਨ ਪਰਮਸੁਕ੍ਕਾਭਿਜਾਤਿਯਂ ਠਤ੍ਵਾ ਸਂਸਾਰਤੋ ਸੁਜ੍ਝਨ੍ਤੀਤਿ ਅਯਂ ਤੇਸਂ ਨਿਯਤਿ ਆਜੀਵਕਾਨਂ ਲਦ੍ਧਿ.

‘‘ਨਤ੍ਥਿ ਦਿਨ੍ਨ’’ਨ੍ਤਿ ਵਦਨ੍ਤੋ ਨਤ੍ਥਿਕੋ ਦਾਨਸ੍ਸ ਫਲਂ ਪਟਿਕ੍ਖਿਪਤੀਤਿ ਆਹ – ‘‘ਨਤ੍ਥਿਕਦਿਟ੍ਠਿ ਵਿਪਾਕਂ ਪਟਿਬਾਹਤੀ’’ਤਿ. ਤਥਾ ਚੇਵ ਹੇਟ੍ਠਾ ਸਂਵਣ੍ਣਿਤਂ ‘‘ਨਤ੍ਥਿਕਦਿਟ੍ਠਿ ਹਿ ਨਤ੍ਥਿਤਮਾਹਾ’’ਤਿ. ਅਹੇਤੁਕਦਿਟ੍ਠਿ ਉਭਯਨ੍ਤਿ ਕਮ੍ਮਂ ਵਿਪਾਕਞ੍ਚ ਉਭਯਂ. ਸੋ ਹਿ ‘‘ਅਹੇਤੂ ਅਪਚ੍ਚਯਾ ਸਤ੍ਤਾ ਸਂਕਿਲਿਸ੍ਸਨ੍ਤਿ ਵਿਸੁਜ੍ਝਨ੍ਤੀ’’ਤਿ ਵਦਨ੍ਤੋ ਕਮ੍ਮਸ੍ਸ ਵਿਯ ਵਿਪਾਕਸ੍ਸਪਿ ਸਂਕਿਲੇਸਵਿਸੁਦ੍ਧੀਨਂ ਪਚ੍ਚਯਤ੍ਤਾਭਾਵਵਚਨਤੋ ਤਦੁਭਯਂ ਪਟਿਬਾਹਤਿ ਨਾਮ. ਵਿਪਾਕੋ ਪਟਿਬਾਹਿਤੋ ਹੋਤਿ ਅਸਤਿ ਕਮ੍ਮੇ ਵਿਪਾਕਾਭਾਵਤੋ. ਕਮ੍ਮਂ ਪਟਿਬਾਹਿਤਂ ਹੋਤਿ ਅਸਤਿ ਵਿਪਾਕੇ ਕਮ੍ਮਸ੍ਸ ਨਿਰਤ੍ਥਕਭਾਵਾਪਤ੍ਤਿਤੋ. ਅਤ੍ਥਤੋਤਿ ਸਰੂਪੇਨ. ਉਭਯਪਟਿਬਾਹਕਾਤਿ ਵਿਸੁਂ ਵਿਸੁਂ ਤਂਤਂਦਿਟ੍ਠਿਤਾ ਵੁਤ੍ਤਾਪਿ ਸਬ੍ਬੇ ਤੇ ਨਤ੍ਥਿਕਾਦਯੋ ਨਤ੍ਥਿਕਦਿਟ੍ਠਿਆਦਿਵਸੇਨ ਪਚ੍ਚੇਕਂ ਤਿਵਿਧਦਿਟ੍ਠਿਕਾ ਏਵ ਉਭਯਪਟਿਬਾਹਕਤ੍ਤਾ. ‘‘ਉਭਯਪਟਿਬਾਹਕਾ’’ਤਿ ਹਿ ਹੇਤੁਵਚਨਂ. ਅਹੇਤੁਕਵਾਦਾ ਚਾਤਿਆਦਿ ਪਟਿਞ੍ਞਾਵਚਨਂ. ਯੋ ਹਿ ਵਿਪਾਕਪਟਿਬਾਹਨੇਨ ਨਤ੍ਥਿਕਦਿਟ੍ਠਿਕੋ, ਸੋ ਅਤ੍ਥਤੋ ਕਮ੍ਮਪਟਿਬਾਹਨੇਨ ਅਕਿਰਿਯਦਿਟ੍ਠਿਕੋ, ਉਭਯਪਟਿਬਾਹਨੇਨ ਅਹੇਤੁਕਦਿਟ੍ਠਿਕੋ ਚ ਹੋਤਿ. ਸੇਸਦ੍ਵਯੇਪਿ ਏਸੇਵ ਨਯੋ.

ਸਜ੍ਝਾਯਨ੍ਤੀਤਿ ਤਂ ਦਿਟ੍ਠਿਦੀਪਕਂ ਗਨ੍ਥਂ ਉਗ੍ਗਹੇਤ੍ਵਾ ਪਠਨ੍ਤਿ. ਵੀਮਂਸਨ੍ਤੀਤਿ ਤਸ੍ਸ ਅਤ੍ਥਂ ਵਿਚਾਰੇਨ੍ਤਿ. ਤੇਸਨ੍ਤਿਆਦਿ ਵੀਮਂਸਨਾਕਾਰਦਸ੍ਸਨਂ. ਤਸ੍ਮਿਂ ਆਰਮ੍ਮਣੇਤਿ ਯਥਾਪਰਿਕਪ੍ਪਿਤਕਮ੍ਮਫਲਾਭਾਵਦੀਪਕੇ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾਯ ਲਦ੍ਧਿਯਾ ਆਰਮ੍ਮਣੇ. ਮਿਚ੍ਛਾਸਤਿ ਸਨ੍ਤਿਟ੍ਠਤੀਤਿ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਵਸੇਨ ਅਨੁਸ੍ਸਵੂਪਲਦ੍ਧੇ ਅਤ੍ਥੇ ਤਦਾਕਾਰਪਰਿਵਿਤਕ੍ਕਨੇਹਿ ਸਵਿਗ੍ਗਹੇ ਵਿਯ ਸਰੂਪਤੋ ਚਿਤ੍ਤਸ੍ਸ ਪਚ੍ਚੁਪਟ੍ਠਿਤੇ ਚਿਰਕਾਲਪਰਿਚਯੇਨ ‘‘ਏਵਮੇਤ’’ਨ੍ਤਿ ਨਿਜ੍ਝਾਨਕ੍ਖਮਭਾਵੂਪਗਮਨੇਨ ਨਿਜ੍ਝਾਨਕ੍ਖਨ੍ਤਿਯਾ ਤਥਾ ਗਹਿਤੇ ਪੁਨਪ੍ਪੁਨਂ ਤਥੇਵ ਆਸੇਵਨ੍ਤਸ੍ਸ ਬਹੁਲੀਕਰੋਨ੍ਤਸ੍ਸ ਮਿਚ੍ਛਾਵਿਤਕ੍ਕੇਨ ਸਮਾਦਿਯਮਾਨਾ ਮਿਚ੍ਛਾਵਾਯਾਮੁਪਤ੍ਥਮ੍ਭਿਤਾ ਅਤਂਸਭਾਵਂ ‘‘ਤਂਸਭਾਵ’’ਨ੍ਤਿ ਗਣ੍ਹਨ੍ਤੀ ਮਿਚ੍ਛਾਸਤੀਤਿ ਲਦ੍ਧਨਾਮਾ ਤਂਲਦ੍ਧਿਸਹਗਤਾ ਤਣ੍ਹਾ ਸਨ੍ਤਿਟ੍ਠਤਿ. ਚਿਤ੍ਤਂ ਏਕਗ੍ਗਂ ਹੋਤੀਤਿ ਯਥਾਵੁਤ੍ਤਵਿਤਕ੍ਕਾਦਿਪਚ੍ਚਯਲਾਭੇਨ ਤਸ੍ਮਿਂ ਆਰਮ੍ਮਣੇ ਅਵਟ੍ਠਿਤਤਾਯ ਅਨੇਕਗ੍ਗਂ ਪਹਾਯ ਏਕਗ੍ਗਂ ਅਪ੍ਪਿਤਂ ਵਿਯ ਹੋਤਿ. ਮਿਚ੍ਛਾਸਮਾਧਿਪਿ ਹਿ ਪਚ੍ਚਯਵਿਸੇਸੇਹਿ ਲਦ੍ਧਭਾਵਨਾਬਲੇਹਿ ਕਦਾਚਿ ਸਮਾਧਾਨਪਤਿਰੂਪਕਿਚ੍ਚਕਰੋ ਹੋਤਿਯੇਵ ਵਾਲਵਿਜ੍ਝਨਾਦੀਸੁ ਵਿਯਾਤਿ ਦਟ੍ਠਬ੍ਬਂ. ਜਵਨਾਨਿ ਜਵਨ੍ਤੀਤਿ ਅਨੇਕਕ੍ਖਤ੍ਤੁਂ ਤੇਨਾਕਾਰੇਨ ਪੁਬ੍ਬਭਾਗਿਯੇਸੁ ਜਵਨਵਾਰੇਸੁ ਪਵਤ੍ਤੇਸੁ ਸਬ੍ਬਪਚ੍ਛਿਮੇ ਜਵਨਵਾਰੇ ਸਤ੍ਤ ਜਵਨਾਨਿ ਜਵਨ੍ਤਿ. ਪਠਮਜਵਨੇ ਪਨ ਸਤੇਕਿਚ੍ਛਾ ਹੋਨ੍ਤਿ, ਤਥਾ ਦੁਤਿਯਾਦੀਸੂਤਿ ਧਮ੍ਮਸਭਾਵਦਸ੍ਸਨਮੇਤਂ, ਨ ਪਨ ਤਸ੍ਮਿਂ ਖਣੇ ਤੇਸਂ ਸਤੇਕਿਚ੍ਛਭਾਵਾਪਾਦਨਂ ਕੇਨਚਿ ਸਕ੍ਕਾ ਕਾਤੁਂ.

ਤਤ੍ਥਾਤਿ ਤੇਸੁ ਤੀਸੁ ਮਿਚ੍ਛਾਦਸ੍ਸਨੇਸੁ. ਕੋਚਿ ਏਕਂ ਦਸ੍ਸਨਂ ਓਕ੍ਕਮਤੀਤਿ ਯਸ੍ਸ ਏਕਸ੍ਮਿਂਯੇਵ ਅਭਿਨਿਵੇਸੋ ਆਸੇਵਨਾ ਚ ਪਵਤ੍ਤਾ, ਸੋ ਏਕਂਯੇਵ ਦਸ੍ਸਨਂ ਓਕ੍ਕਮਤਿ. ਯਸ੍ਸ ਪਨ ਦ੍ਵੀਸੁ, ਤੀਸੁਪਿ ਵਾ ਅਭਿਨਿਵੇਸਨਾ ਪਵਤ੍ਤਾ, ਸੋ ਦ੍ਵੇ ਤੀਣਿ ਓਕ੍ਕਮਤਿ. ਏਤੇਨ ਯਾ ਪੁਬ੍ਬੇ ਉਭਯਪਟਿਬਾਹਨਤਾਮੁਖੇਨ ਵੁਤ੍ਤਾ ਅਤ੍ਥਸਿਦ੍ਧਾ ਸਬ੍ਬਦਿਟ੍ਠਿਕਤਾ, ਸਾ ਪੁਬ੍ਬਭਾਗਿਯਾ. ਯਾ ਪਨ ਮਿਚ੍ਛਤ੍ਤਨਿਯਾਮੋਕ੍ਕਨ੍ਤਿ ਭੂਤਾ, ਸਾ ਯਥਾਸਕਂ ਪਚ੍ਚਯਸਮੁਦਾਗਮਸਿਦ੍ਧਿਤੋ ਭਿਨ੍ਨਾਰਮ੍ਮਣਾਨਂ ਵਿਯ ਵਿਸੇਸਾਧਿਗਮਾਨਂ ਅਞ੍ਞਮਞ੍ਞਂ ਏਕਜ੍ਝਂ ਅਨੁਪ੍ਪਤ੍ਤਿਯਾ ਅਸਂਕਿਣ੍ਣਾ ਏਵਾਤਿ ਦਸ੍ਸੇਤਿ. ਏਕਸ੍ਮਿਂ ਓਕ੍ਕਨ੍ਤੇਪੀਤਿਆਦਿਨਾ ਤਿਸ੍ਸਨ੍ਨਮ੍ਪਿ ਦਿਟ੍ਠੀਨਂ ਸਮਾਨਬਲਤਂ ਸਮਾਨਫਲਤਞ੍ਚ ਦਸ੍ਸੇਤਿ, ਤਸ੍ਮਾ ਤਿਸ੍ਸੋਪਿ ਚੇਤਾ ਏਕਸ੍ਸ ਉਪ੍ਪਨ੍ਨਾ ਅਞ੍ਞਮਞ੍ਞਂ ਅਬ੍ਬੋਕਿਣ੍ਣਾ ਏਵ, ਏਕਾਯ ਵਿਪਾਕੇ ਦਿਨ੍ਨੇ ਇਤਰਾ ਅਨੁਬਲਪ੍ਪਦਾਯਿਕਾ ਹੋਨ੍ਤਿ. ਵਟ੍ਟਖਾਣੁ ਨਾਮਾਤਿ ਇਦਂ ਵਚਨਂ ਨੇਯ੍ਯਤ੍ਥਂ, ਨ ਨੀਤਤ੍ਥਨ੍ਤਿ ਤਂ ਵਿਵਰਿਤ੍ਵਾ ਦਸ੍ਸੇਤੁਂ ਕਿਂ ਪਨੇਸਾਤਿਆਦਿ ਵੁਤ੍ਤਂ, ਅਕੁਸਲਂ ਨਾਮੇਤਂ ਅਬਲਂ ਦੁਬ੍ਬਲਂ, ਨ ਕੁਸਲਂ ਵਿਯ ਮਹਾਬਲਨ੍ਤਿ ਆਹ – ‘‘ਏਕਸ੍ਮਿਂਯੇਵ ਅਤ੍ਤਭਾਵੇ ਨਿਯਤੋ’’ਤਿ. ਅਞ੍ਞਥਾ ਸਮ੍ਮਤ੍ਤਨਿਯਾਮੋ ਵਿਯ ਮਿਚ੍ਛਤ੍ਤਨਿਯਾਮੋਪਿ ਅਚ੍ਚਨ੍ਤਿਕੋ ਸਿਯਾ. ਯਦਿ ਏਵਂ ਵਟ੍ਟਖਾਣੁਕਜੋਤਨਾ ਕਥਨ੍ਤਿ ਆਹ ‘‘ਆਸੇਵਨਵਸੇਨ ਪਨਾ’’ਤਿਆਦਿ, ਤਸ੍ਮਾ ਯਥਾ ‘‘ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤੀ’’ਤਿ (ਅ. ਨਿ. ੭.੧੫) ਵੁਤ੍ਤਂ, ਏਵਂ ਵਟ੍ਟਖਾਣੁਕਜੋਤਨਾ. ਯਾਦਿਸੇ ਹਿ ਪਚ੍ਚਯੇ ਪਟਿਚ੍ਚ ਅਯਂ ਤਂਤਂਦਸ੍ਸਨਂ ਓਕ੍ਕਨ੍ਤੋ ਪੁਨ ਕਦਾਚਿ ਤਪ੍ਪਟਿਪਕ੍ਖੇ ਪਚ੍ਚਯੇ ਪਟਿਚ੍ਚ ਤਤੋ ਸੀਸੁਕ੍ਖਿਪਨਮਸ੍ਸ ਨ ਹੋਤੀਤਿ ਨ ਵਤ੍ਤਬ੍ਬਂ. ਤੇਨ ਵੁਤ੍ਤਂ ‘‘ਯੇਭੁਯ੍ਯੇਨਾ’’ਤਿ.

ਤਸ੍ਮਾਤਿ ਯਸ੍ਮਾ ਏਵਂ ਸਂਸਾਰਖਾਣੁਭਾਵਸ੍ਸਪਿ ਪਚ੍ਚਯੋ ਅਕਲ੍ਯਾਣਜਨੋ, ਤਸ੍ਮਾ. ਭੂਤਿਕਾਮੋਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥਾਨਂ ਵਸੇਨ ਅਤ੍ਤਨੋ ਗੁਣੇਹਿ ਵਡ੍ਢਿਕਾਮੋ. ਯਂ ਪਨੇਤ੍ਥ ਕੇਚਿ ਵਦਨ੍ਤਿ ‘‘ਯਥਾ ਚਿਰਕਾਲਭਾਵਨਾਯ ਪਰਿਪਾਕੂਪਗਮਲਦ੍ਧਬਲਤ੍ਤਾ ਉਪਨਿਸ੍ਸਯਕੁਸਲਾ ਅਕੁਸਲੇ ਸਬ੍ਬਸੋ ਸਮੁਚ੍ਛਿਨ੍ਦਨ੍ਤਿ, ਏਵਂ ਅਕੁਸਲਧਮ੍ਮਾ ਤਤੋਪਿ ਚਿਰਕਾਲਭਾਵਨਾਸਮ੍ਭਵਤੋ ਲਦ੍ਧਬਲਾ ਹੁਤ੍ਵਾ ਕਦਾਚਿ ਕੁਸਲਧਮ੍ਮੇਪਿ ਸਮੁਚ੍ਛਿਨ੍ਦਨ੍ਤਿ. ਏਵਞ੍ਚ ਕਤ੍ਵਾ ਦਲ਼੍ਹਮਿਚ੍ਛਾਭਿਨਿਵੇਸਸ੍ਸ ਮਿਚ੍ਛਾਦਿਟ੍ਠਿਕਸ੍ਸ ਵਟ੍ਟਖਾਣੁਕਭਾਵਜੋਤਨਾਪਿ ਸਮਤ੍ਥਿਤਾ ਹੋਤੀ’’ਤਿ ਯਥਾ ਤਂ ‘‘ਵਸ੍ਸਭਞ੍ਞਾਨਂ ਦਿਟ੍ਠੀ’’ਤਿ, ਤਂ ਨ, ਮਿਚ੍ਛਤ੍ਤਨਿਯਤਧਮ੍ਮਾਨਂ ਚਿਰਕਾਲਭਾਵਨਾਮਤ੍ਤੇਨ ਨ ਪਟਿਪਕ੍ਖਸ੍ਸ ਪਜਹਨਸਮਤ੍ਥਤਾ, ਅਥ ਖੋ ਧਮ੍ਮਤਾਸਿਦ੍ਧੇਨ ਪਚ੍ਚਯਵਿਸੇਸਾਹਿਤਸਾਮਤ੍ਥਿਯੇਨ ਅਤ੍ਤਨੋ ਪਹਾਯਕਸਭਾਵੇਨ ਪਹਾਯਕਭਾਵੋ ਭਾਵਨਾਕੁਸਲਾਨਂਯੇਵ ਵੁਤ੍ਤੋ, ਅਕੁਸਲਾਨਂਯੇਵ ਚ ਪਹਾਤਬ੍ਬਭਾਵੋ ‘‘ਦਸ੍ਸਨੇਨ ਪਹਾਤਬ੍ਬਾ’’ਤਿਆਦਿਨਾ ਨਯੇਨ, ਅਕੁਸਲਾਨਂਯੇਵ ਦੁਬ੍ਬਲਭਾਵੋ ‘‘ਅਬਲਾਨਂ ਬਲੀਯਨ੍ਤੀ’’ਤਿਆਦਿਨਾ (ਸੁ. ਨਿ. ੭੭੬; ਮਹਾਨਿ. ੫) (ਯੁਤ੍ਤਿਨਾਪਿ ਨਾਮਤੋ ਵਾ ਅਧਿਗਮਨਿਯੋ ਆਲੋਕੋ ਆਲੋਕਭਾਵਤੋ ਬਾਹਿਰਾਰਣੇਕਾ ਵਿਯ ਨ ਚੇਤ੍ਥ ਪਟਿਞ੍ਞਤ੍ਤੇ ਭਾਵੇਸਤਾ ਸੋਤੁਨੋ ਆਸਂਕਿਤਬ੍ਬਾ ਵਿਸੇਸਵਸ੍ਸ ਸਾਧੇਤਬ੍ਬਤੋ ਸਾਮਞ੍ਞਸ੍ਸ ਚ ਸੋਤੁਭਾਵੇਨ ਅਧਿਪ੍ਪੇਤਤ੍ਤਾ ਵੇਦ-ਸਦ੍ਦਸ੍ਸ ਲੋਪੋ ਦੀਪੇ ਸਭਾਵੇ ਸਾਧਨੇ ਯਥਾ ਤਂ ਸਦ੍ਦਯਭਾਵਸ੍ਸ ਨਾਪਿ ਵਿਸੁਦ੍ਧਕਅਨੁਮਾਨਾਦਿਵਿਰੋਧਸਮ੍ਭਾਵਤੋ. ਨ ਹਿ ਸਕ੍ਕਾ ਅਨ੍ਤਰਾਲੋਕਸ੍ਸ ਬਾਹਿਰਾਲੋਕਸ੍ਸ ਵਿਯ ਰੂਪਕਾਯਂ ਉਪਾਦਾਯ ਰੂਪਤਾ ਚਕ੍ਖੁਵਿਞ੍ਞੇਯ੍ਯਤ੍ਤਾਦਿਕੇ ਪਤਿਟ੍ਠਾਪੇਤੁਂ ਸਕ੍ਕਾਤਿ ਵੁਤ੍ਤਂ, ਨਨੁਪਿ ਅਨ੍ਤਰਾਲੋਕੋ ਅਵਿਗ੍ਗਹਤ੍ਤਾ ਵੇਦਨਾ ਵਿਯਾਤਿ ਸਦ੍ਧੇਵ ਞਾਣਾਲੋਕਸ੍ਸ ਅਵਿਜ੍ਜਨ੍ਧਕਾਰਾ ਵਿਯ ਵਿਧਮਨਿਯਭਾਵੇ ਸਬ੍ਬੇਸਮ੍ਪਿ ਕੁਸਲਧਮ੍ਮਾਨਂ ਕੇਨਚਿਪਿ ਅਕੁਸਲਧਮ੍ਮੇਨ ਸਮੁਚ੍ਛਿਨ੍ਦਨਿਯਤਾ ਸਿਦ੍ਧਾਵ ਹੋਤਿ). ਵਟ੍ਟਖਾਣੁਕਚੋਦਨਾਯ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵਾਤਿ ਤਿਟ੍ਠਤੇਸਾ ਬਾਲਜਨਵਿਕਤ੍ਥਨਾ.

੧੦੩. ਝਾਨਚਿਤ੍ਤਮਯਾਤਿ ਰੂਪਾਵਚਰਜ੍ਝਾਨਚਿਤ੍ਤੇਨ ਨਿਬ੍ਬਤ੍ਤਾ. ਤਥਾ ਹਿ ਤੇਸਂ ਵਿਸੇਸੇਨ ਝਾਨਮਨਸਾ ਨਿਬ੍ਬਤ੍ਤਤ੍ਤਾ ‘‘ਮਨੋਮਯਾ’’ਤਿ ਵੁਤ੍ਤਾ, ਅਵਿਸੇਸੇਨ ਪਨ ਅਭਿਸਙ੍ਖਾਰਮਨਸਾ ਸਬ੍ਬੇਪਿ ਸਤ੍ਤਾ ਮਨੋਮਯਾ ਏਵ. ਸਞ੍ਞਾਮਯਾਤਿ ਏਤ੍ਥਾਪਿ ਏਸੇਵ ਨਯੋ. ਤੇਨਾਹ ‘‘ਅਰੂਪਜ੍ਝਾਨਸਞ੍ਞਾਯਾ’’ਤਿ. ਅਯਨ੍ਤਿ ਰੂਪਿਤਾਭਾਵਪਟਿਪਜ੍ਜਨਕਪੁਗ੍ਗਲੋ. ਅਪ੍ਪਟਿਲਦ੍ਧਜ੍ਝਾਨੋਤਿ ਅਨਧਿਗਤਰੂਪਜ੍ਝਾਨੋ. ਤਸ੍ਸਪੀਤਿ ਤਕ੍ਕਿਨੋਪਿ. ਰੂਪਜ੍ਝਾਨੇ ਕਙ੍ਖਾ ਨਤ੍ਥਿ ਅਨੁਸ੍ਸਵਵਸੇਨ ਲਦ੍ਧਵਿਨਿਚ੍ਛਯਤ੍ਤਾ.

੧੦੪. ਸਾਰਾਗਾਯਾਤਿ ਸਰਾਗਭਾਵਾਯ. ਸਨ੍ਤਿਕੇਤਿ ਸਮੀਪੇ, ਨ ਥਾਮਗਤਾ ਦਿਟ੍ਠਿਨਾਤਿਦੂਰਤ੍ਤਾ ਸਰਾਗਾ, ਨ ਸਮ੍ਪਯੁਤ੍ਤਤ੍ਤਾ. ਸਾ ਹਿ ਨ ਥਾਮਗਤਾ ਵਟ੍ਟਪਰਿਯਾਪਨ੍ਨੇਸੁ ਧਮ੍ਮੇਸੁ ਰਜ੍ਜਤੀਤਿ ਵਿਞ੍ਞਾਯਤੀਤਿ ਆਹ – ‘‘ਰਾਗਵਸੇਨ ਵਟ੍ਟੇ ਰਜ੍ਜਨਸ੍ਸਾ’’ਤਿ. ਸਬ੍ਬੇਪਿ ਸਂਯੋਜਨਾ ਤਣ੍ਹਾਵਸੇਨੇਵ ਸਮ੍ਭਵਨ੍ਤੀਤਿ ਆਹ – ‘‘ਤਣ੍ਹਾਵਸੇਨ ਸਂਯੋਜਨਤ੍ਥਾਯਾ’’ਤਿ. ਆਰੁਪ੍ਪੇ ਪਨਸ੍ਸ ਕਙ੍ਖਾ ਨਤ੍ਥੀਤਿ ਅਨੁਸ੍ਸਵਵਸੇਨ ਲਦ੍ਧਨਿਚ੍ਛਯਂ ਸਨ੍ਧਾਯ ਵੁਤ੍ਤਂ. ਕਾਮਂ ਦੁਗ੍ਗਤਿਦੁਕ੍ਖਾਨਂ ਏਕਨ੍ਤਸਂਵਤ੍ਤਨੇਨ ਨਤ੍ਥਿਕਦਿਟ੍ਠਿਆਦੀਨਂ ਅਪਣ੍ਣਕਤਾ ਪਾਕਟਾ ਏਵ, ਨਿਪ੍ਪਰਿਯਾਯੇਨ ਪਨ ਅਨਵਜ੍ਜਸ੍ਸ ਅਤ੍ਥਸ੍ਸ ਏਕਨ੍ਤਸਾਧਕਂ ਅਪਣ੍ਣਕਨ੍ਤਿ ਕਤ੍ਵਾ ਚੋਦਨਾ, ਸਾਵਜ੍ਜਸ੍ਸਪਿ ਅਤ੍ਥਸ੍ਸ ਸਾਧਨੇ ਏਕਂਸਿਕਭਾਵਂ ਗਹੇਤ੍ਵਾ ਪਰਿਹਾਰੋ. ਤੇਨਾਹ ‘‘ਗਹਣਵਸੇਨਾ’’ਤਿਆਦਿ. ਤੇਨ ਰੁਲ਼੍ਹੀਵਸੇਨ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦੀਨਿ ਅਪਣ੍ਣਕਙ੍ਗਾਨਿ ਜਾਤਾਨੀਤਿ ਦਸ੍ਸੇਤਿ.

੧੦੫. ਹੇਟ੍ਠਾ ਤਯੋ ਪੁਗ੍ਗਲਾਵ ਹੋਨ੍ਤੀਤਿ ਅਤ੍ਤਨ੍ਤਪੋ ਪਰਨ੍ਤਪੋਤਿ ਇਮਸ੍ਮਿਂ ਚਤੁਕ੍ਕੇ ਹੇਟ੍ਠਾ ਤਯੋ ਪੁਗ੍ਗਲਾ ਹੋਨ੍ਤਿ. ਯਥਾਵੁਤ੍ਤਾ ਪਞ੍ਚਪਿ ਪੁਗ੍ਗਲਾ ਦੁਪ੍ਪਟਿਪਨ੍ਨਾਵ, ਤਤੋ ਅਤ੍ਥਿਕਵਾਦਾਦਯੋ ਪਞ੍ਚਪੁਗ੍ਗਲਾ ਸਮ੍ਮਾਪਟਿਪਨ੍ਨਤਾਯ ਇਮਸ੍ਮਿਂ ਚਤੁਕ੍ਕੇ ਏਕੋ ਚਤੁਤ੍ਥਪੁਗ੍ਗਲੋਵ ਹੋਤਿ. ਏਤਮਤ੍ਥਂ ਦਸ੍ਸੇਤੁਨ੍ਤਿ ਇਧ ਹੇਟ੍ਠਾ ਵੁਤ੍ਤਪੁਗ੍ਗਲਪਞ੍ਚਕਦ੍ਵਯਂ ਇਮਸ੍ਮਿਂ ਚਤੁਕ੍ਕੇ ਏਵ ਸਙ੍ਗਹਂ ਗਚ੍ਛਤੀਤਿ ਵਿਭਾਗੇਨ ਦੁਪ੍ਪਟਿਪਤ੍ਤਿਸੁਪ੍ਪਟਿਪਤ੍ਤਿਯੋ ਦਸ੍ਸੇਤੁਂ ਭਗਵਾ ਇਮਂ ਦੇਸਨਂ ਆਰਭੀਤਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਅਪਣ੍ਣਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਗਹਪਤਿਵਗ੍ਗਵਣ੍ਣਨਾ.