੯. ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਵਣ੍ਣਨਾ

੫੦੧. ‘‘ਸਸ੍ਸਤੋ ਅਤ੍ਤਾ ਚ ਲੋਕੋ ਚਾ’’ਤਿ (ਦੀ. ਨਿ. ੧.੩੦) ਏਵਂ ਪਵਤ੍ਤਾ ਦਿਟ੍ਠਿ ਸਸ੍ਸਤਦਿਟ੍ਠਿ (ਸਂ. ਨਿ. ਟੀ. ੧.੧.੧੭੫). ਸਹ ਕਾਯੇਨਾਤਿ ਸਹ ਤੇਨ ਬ੍ਰਹ੍ਮਤ੍ਤਭਾਵੇਨ. ਬ੍ਰਹ੍ਮਟ੍ਠਾਨਨ੍ਤਿ ਅਤ੍ਤਨੋ ਬ੍ਰਹ੍ਮਵਤ੍ਥੁਂ. ‘‘ਅਨਿਚ੍ਚਂ ਨਿਚ੍ਚ’’ਨ੍ਤਿ ਵਦਤਿ ਅਨਿਚ੍ਚਤਾਯ ਅਤ੍ਤਨੋ ਅਪਞ੍ਞਾਯਮਾਨਤ੍ਤਾ. ਥਿਰਨ੍ਤਿ ਦਲ਼੍ਹਂ, ਵਿਨਾਸਾਭਾਵਤੋ ਸਾਰਭੂਤਨ੍ਤਿ ਅਤ੍ਥੋ. ਉਪ੍ਪਾਦਵਿਪਰਿਣਾਮਾਭਾਵਤੋ ਸਦਾ ਵਿਜ੍ਜਮਾਨਂ. ਕੇਵਲਨ੍ਤਿ ਪਰਿਪੁਣ੍ਣਂ. ਤੇਨਾਹ ‘‘ਅਖਣ੍ਡ’’ਨ੍ਤਿ. ਕੇਵਲਨ੍ਤਿ ਵਾ ਜਾਤਿਆਦੀਹਿ ਅਮਿਸ੍ਸਂ, ਵਿਰਹਿਤਨ੍ਤਿ ਅਧਿਪ੍ਪਾਯੋ. ਉਪ੍ਪਾਦਾਦੀਨਂ ਅਭਾਵਤੋ ਏਵ ਅਚਵਨਧਮ੍ਮਂ. ਕੋਚਿ ਜਾਯਨਕੋ ਵਾ…ਪੇ… ਉਪਪਜ੍ਜਨਕੋ ਵਾ ਨਤ੍ਥਿ ਨਿਚ੍ਚਭਾਵਤੋ. ਠਾਨੇਨ ਸਦ੍ਧਿਂ ਤਨ੍ਨਿਵਾਸੀਨਂ ਨਿਚ੍ਚਭਾਵਞ੍ਹਿ ਸੋ ਪਟਿਜਾਨਾਤਿ. ਤਿਸ੍ਸੋ ਝਾਨਭੂਮਿਯੋਤਿ ਦੁਤਿਯਤਤਿਯਚਤੁਤ੍ਥਜ੍ਝਾਨਭੂਮਿਯੋ. ਚਤੁਤ੍ਥਜ੍ਝਾਨਭੂਮਿਵਿਸੇਸਾ ਹਿ ਅਸਞ੍ਞਸੁਦ੍ਧਾਵਾਸਾਰੁਪ੍ਪਭਵਾ. ਪਟਿਬਾਹਤੀਤਿ ਸਨ੍ਤਂਯੇਵ ਸਮਾਨਂ ਅਜਾਨਨ੍ਤੋਵ ਨਤ੍ਥੀਤਿ ਪਟਿਕ੍ਖਿਪਤਿ. ਅਵਿਜ੍ਜਾਯ ਗਤੋਤਿ ਅਵਿਜ੍ਜਾਯ ਸਹ ਗਤੋ ਪਵਤ੍ਤੋ. ਸਹਯੋਗੇ ਹਿ ਇਦਂ ਕਰਣਵਚਨਂ. ਤੇਨਾਹ ‘‘ਸਮਨ੍ਨਾਗਤੋ’’ਤਿ. ਅਞ੍ਞਾਣੀਤਿ ਅਵਿਦ੍ਵਾ. ਪਞ੍ਞਾਚਕ੍ਖੁਵਿਰਹਤੋ ਅਨ੍ਧੋ ਭੂਤੋ, ਅਨ੍ਧਭਾਵਂ ਵਾ ਪਤ੍ਤੋਤਿ ਅਨ੍ਧੀਭੂਤੋ.

੫੦੨. ਤਦਾ ਭਗਵਤੋ ਸੁਭਗਵਨੇ ਵਿਹਰਣਸ੍ਸ ਅਵਿਚ੍ਛਿਨ੍ਨਤਂ ਸਨ੍ਧਾਯ ਵੁਤ੍ਤਂ ‘‘ਸੁਭਗਵਨੇ ਵਿਹਰਤੀਤਿ ਞਤ੍ਵਾ’’ਤਿ. ਤਤ੍ਥ ਪਨ ਤਦਾਸ੍ਸ ਭਗਵਤੋ ਅਦਸ੍ਸਨਂ ਸਨ੍ਧਾਯਾਹ ‘‘ਕਤ੍ਥ ਨੁ ਖੋ ਗਤੋਤਿ ਓਲੋਕੇਨ੍ਤੋ’’ਤਿ. ਬ੍ਰਹ੍ਮਲੋਕਂ ਗਚ੍ਛਨ੍ਤਂ ਦਿਸ੍ਵਾਤਿ ਇਮਿਨਾ ਕਤਿਪਯਚਿਤ੍ਤਵਾਰਵਸੇਨ ਤਦਾ ਭਗਵਤੋ ਬ੍ਰਹ੍ਮਲੋਕਗਮਨਂ ਜਾਤਂ, ਨ ਏਕਚਿਤ੍ਤਕ੍ਖਣੇਨਾਤਿ ਦਸ੍ਸੇਤਿ. ਨ ਚੇਤ੍ਥ ਕਾਯਗਤਿਯਾ ਚਿਤ੍ਤਪਰਿਣਾਮਨਂ ਅਧਿਪ੍ਪੇਤਂ – ‘‘ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯਾ’’ਤਿਆਦਿਵਚਨਤੋ (ਮ. ਨਿ. ੧.੫੦੧). ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਵਿਛਨ੍ਦਨ੍ਤਿ ਛਨ੍ਦਵਿਗਮਂ. ਅਪਸਾਦਿਤੋਤਿ ਦਿਟ੍ਠਿਯਾ ਗਾਹਸ੍ਸ ਵਿਪਰਿਵਤ੍ਤਨੇਨ ਸਨ੍ਤਜ੍ਜਿਤੋ. ‘‘ਮੇਤਮਾਸਦੋ’’ਤਿ ਵਚਨੇਨ ਉਪਤ੍ਥਮ੍ਭੋ ਹੁਤ੍ਵਾ.

ਅਨ੍ਵਾਵਿਸਿਤ੍ਵਾਤਿ ਆਵਿਸਨਵਸੇਨ ਤਸ੍ਸ ਅਤ੍ਤਭਾਵਂ ਅਧਿਭਵਿਤ੍ਵਾ. ਤਥਾ ਅਭਿਭਵਤੋ ਹਿ ਤਸ੍ਸ ਸਰੀਰਂ ਪਵਿਟ੍ਠੋ ਵਿਯ ਹੋਤੀਤਿ ਵੁਤ੍ਤਂ ‘‘ਸਰੀਰਂ ਪਵਿਸਿਤ੍ਵਾ’’ਤਿ. ਯਞ੍ਹਿ ਸਤ੍ਤਂ ਦੇਵਯਕ੍ਖਨਾਗਾਦਯੋ ਆਵਿਸਨ੍ਤਿ, ਤਸ੍ਸ ਪਾਕਤਿਕਕਿਰਿਯਮਯਂ ਚਿਤ੍ਤਪ੍ਪਵਤ੍ਤਿਂ ਨਿਵਾਰੇਤ੍ਵਾ ਅਤ੍ਤਨੋ ਇਦ੍ਧਾਨੁਭਾਵੇਨ ਯਂ ਇਚ੍ਛਿਤਂ ਹਸਿਤਲਪਿਤਾਦਿ, ਤਂ ਤੇਨ ਕਾਰਾਪੇਨ੍ਤਿ, ਕਾਰੇਨ੍ਤਾ ਚ ਆਵਿਟ੍ਠਪੁਗ੍ਗਲਸ੍ਸ ਚਿਤ੍ਤਵਸੇਨ ਕਾਰੇਨ੍ਤਿ. ‘‘ਅਤ੍ਤਨੋਵਾ’’ਤਿ ਨ ਵਤ੍ਤਬ੍ਬਮੇਤਂ ਅਚਿਨ੍ਤੇਯ੍ਯਤ੍ਤਾ ਕਮ੍ਮਜਸ੍ਸ ਇਦ੍ਧਾਨੁਭਾਵਸ੍ਸਾਤਿ ਕੇਚਿ. ਅਪਰੇ ਪਨ ਯਥਾ ਤਦਾ ਚਕ੍ਖੁਵਿਞ੍ਞਾਣਾਦਿਪਵਤ੍ਤਿ ਆਵਿਟ੍ਠਪੁਗ੍ਗਲਸ੍ਸੇਵ, ਏਵਂ ਕਿਰਿਯਮਯਚਿਤ੍ਤਪਵਤ੍ਤਿਪਿ ਤਸ੍ਸੇਵ, ਆਵੇਸਕਾਨੁਭਾਵੇਨ ਪਨ ਸਾਮਞ੍ਞਤਾ ਪਰਿਵਤ੍ਤਤਿ. ਤਥਾ ਹਿ ਮਹਾਨੁਭਾਵਂ ਪੁਗ੍ਗਲਂ ਤੇ ਆਵਿਸਿਤੁਂ ਨ ਸਕ੍ਕੋਨ੍ਤਿ, ਤਿਕਿਚ੍ਛਾਵੁਟ੍ਠਾਪਨੇ ਪਨ ਛਵਸਰੀਰਂ ਅਨੁਪਵਿਸਿਤ੍ਵਾ ਸਤਨ੍ਤਂ ਕਰੋਤਿ ਵਿਜ੍ਜਾਨੁਭਾਵੇਨ. ਕੋਰਖਤ੍ਤਿਯਾਦੀਨਂ ਪਨ ਛਵਸਰੀਰਸ੍ਸ ਉਟ੍ਠਾਨਂ ਵਚੀਨਿਚ੍ਛਾਰਣਞ੍ਚ ਕੇਵਲਂ ਬੁਦ੍ਧਾਨੁਭਾਵੇਨ. ਅਚਿਨ੍ਤੇਯ੍ਯਾ ਹਿ ਬੁਦ੍ਧਾਨਂ ਬੁਦ੍ਧਾਨੁਭਾਵਾਤਿ. ਅਭਿਭਵਿਤ੍ਵਾ ਠਿਤੋਤਿ ਸਕਲਲੋਕਂ ਅਤ੍ਤਨੋ ਆਨੁਭਾਵੇਨ ਅਭਿਭਵਿਤ੍ਵਾ ਠਿਤੋ. ਜੇਟ੍ਠਕੋਤਿ ਪਧਾਨੋ, ਤਾਦਿਸਂ ਵਾ ਆਨੁਭਾਵਸਮ੍ਪਨ੍ਨਤ੍ਤਾ ਉਤ੍ਤਮੋ. ਪਸ੍ਸਤੀਤਿ ਦਸੋ. ਵਿਸੇਸਵਚਨਿਚ੍ਛਾਯ ਅਭਾਵਤੋ ਅਨਵਸੇਸਵਿਸਯੋ ਦਸੋ-ਸਦ੍ਦੋਤਿ ਆਹ ‘‘ਸਬ੍ਬਂ ਪਸ੍ਸਤੀ’’ਤਿ. ਸਬ੍ਬਜਨਨ੍ਤਿ ਲਦ੍ਧਨਾਮਂ ਸਬ੍ਬਸਤ੍ਤਕਾਯਂ. ਵਸੇ ਵਤ੍ਤੇਤਿ, ਸੇਟ੍ਠਤ੍ਤਾ ਨਿਮ੍ਮਾਪਕਤ੍ਤਾ ਚ ਅਤ੍ਤਨੋ ਵਸੇ ਵਤ੍ਤੇਤਿ. ਲੋਕਸ੍ਸ ਈਸਨਸੀਲਤਾਯ ਇਸ੍ਸਰੋ. ਸਤ੍ਤਾਨਂ ਕਮ੍ਮਸ੍ਸ ਕਾਰਕਭਾਵੇਨ ਕਤ੍ਤਾ. ਥਾਵਰਜਙ੍ਗਮਵਿਭਾਗਂ ਸਕਲਂ ਲੋਕਂ ਨਿਮ੍ਮਾਨੇਤੀਤਿ ਨਿਮ੍ਮਾਤਾ.

ਗੁਣਵਿਸੇਸੇਨ ਲੋਕੇ ਪਾਸਂਸਤ੍ਤਾ ਸੇਟ੍ਠੋ. ਤਾਦਿਸੋ ਚ ਉਕ੍ਕਟ੍ਠਤਮੋ ਹੋਤੀਤਿ ਆਹ ‘‘ਉਤ੍ਤਮੋ’’ਤਿ. ਸਤ੍ਤਾਨਂ ਨਿਮ੍ਮਾਨਂ ਤਥਾ ਤਥਾ ਸਜਨਂ ਵਿਸਜਨਂ ਵਿਯ ਹੋਤੀਤਿ ਆਹ ‘‘ਤ੍ਵਂ ਖਤ੍ਤਿਯੋ’’ਤਿਆਦਿ. ਝਾਨਾਦੀਸੁ ਅਤ੍ਤਨੋ ਚਿਤ੍ਤੇ ਚ ਚਿਣ੍ਣਵਸਿਤ੍ਤਾ ਵਸੀ. ਭੂਤਾਨਨ੍ਤਿ ਨਿਬ੍ਬਤ੍ਤਾਨਂ. ਭਵਂ ਅਭਿਜਾਤਂ ਅਰਹਨ੍ਤੀਤਿ ਭਬ੍ਯਾ, ਸਮ੍ਭਵੇਸਿਨੋ, ਤੇਸਂ ਭਬ੍ਯਾਨਂ. ਤੇਨਾਹ ‘‘ਅਣ੍ਡਜਜਲਾਬੁਜਾ ਸਤ੍ਤਾ’’ਤਿਆਦਿ.

ਪਥਵੀਆਦਯੋ ਨਿਚ੍ਚਾ ਧੁਵਾ ਸਸ੍ਸਤਾ. ਯੇ ਤੇਸਂ ‘‘ਅਨਿਚ੍ਚਾ’’ਤਿਆਦਿਨਾ ਗਰਹਕਾ ਜਿਗੁਚ੍ਛਾ ਸਤ੍ਤਾ, ਤੇ ਅਯਥਾਭੂਤਵਾਦਿਤਾਯ ਮਤਕਾਲੇ ਅਪਾਯਨਿਟ੍ਠਾ ਅਹੇਸੁਂ. ਯੇ ਪਨ ਪਥਵੀਆਦੀਨਂ ‘‘ਨਿਚ੍ਚਾ ਧੁਵਾ’’ਤਿਆਦਿਨਾ ਪਸਂਸਕਾ, ਤੇ ਯਥਾਭੂਤਵਾਦਿਤਾਯ ਬ੍ਰਹ੍ਮਕਾਯੂਪਗਾ ਅਹੇਸੁਨ੍ਤਿ ਮਾਰੋ ਪਾਪਿਮਾ ਅਨ੍ਵਯਤੋ ਬ੍ਯਤਿਰੇਕਤੋ ਚ ਪਥਵੀਆਦਿਮੁਖੇਨ ਸਙ੍ਖਾਰਾਨਂ ਪਰਿਞ੍ਞਾਪਞ੍ਞਾਪਨੇ ਆਦੀਨਵਂ ਵਿਭਾਵੇਤਿ ਤਤੋ ਵਿਵੇਚੇਤੁਕਾਮੋ. ਤੇਨਾਹ ‘‘ਪਥਵੀਗਰਹਕਾ’’ਤਿਆਦਿ. ਏਤ੍ਥ ਚ ਮਾਰੋ ਪਥਵੀਆਦਿਧਾਤੁਮਹਾਭੂਤਗ੍ਗਹਣੇਨ ਮਨੁਸ੍ਸਲੋਕਂ, ਭੂਤਗ੍ਗਹਣੇਨ ਚਾਤੁਮਹਾਰਾਜਿਕੇ, ਦੇਵਗ੍ਗਹਣੇਨ ਅਵਸੇਸਕਾਮਦੇਵਲੋਕਂ, ਪਜਾਪਤਿਗ੍ਗਹਣੇਨ ਅਤ੍ਤਨੋ ਠਾਨਂ, ਬ੍ਰਹ੍ਮਗ੍ਗਹਣੇਨ ਬ੍ਰਹ੍ਮਕਾਯਿਕੇ ਗਣ੍ਹਿ. ਆਭਸ੍ਸਰਾਦਯੋ ਪਨ ਅਵਿਸਯਤਾਯ ਏਵ ਅਨੇਨ ਅਗ੍ਗਹਿਤਾਤਿ ਦਟ੍ਠਬ੍ਬਂ. ਤਣ੍ਹਾਦਿਟ੍ਠਿਵਸੇਨਾਤਿ ਤਣ੍ਹਾਭਿਨਨ੍ਦਨਾਯ ਦਿਟ੍ਠਾਭਿਨਨ੍ਦਨਾਯ ਚ ਵਸੇਨ. ‘‘ਏਤਂ ਮਮ, ਏਸੋ ਮੇ ਅਤ੍ਤਾ’’ਤਿ ਅਭਿਨਨ੍ਦਿਨੋ ਅਭਿਨਨ੍ਦਕਾ, ਅਭਿਨਨ੍ਦਨਸੀਲਾ ਵਾ. ਬ੍ਰਹ੍ਮੁਨੋ ਓਵਾਦੇ ਠਿਤਾਨਂ ਇਦ੍ਧਾਨੁਭਾਵਂ ਦਸ੍ਸੇਤੀਤਿ ਤੇਸਂ ਤਤ੍ਥ ਸਨ੍ਨਿਪਤਿਤਬ੍ਰਹ੍ਮਾਨਂ ਇਦ੍ਧਾਨੁਭਾਵਂ ਤਸ੍ਸ ਮਹਾਬ੍ਰਹ੍ਮੁਨੋ ਓਵਾਦੇ ਠਿਤਤ੍ਤਾ ਨਿਬ੍ਬਤ੍ਤਂ ਕਤ੍ਵਾ ਦਸ੍ਸੇਤਿ. ਯਸੇਨਾਤਿ ਆਨੁਭਾਵੇਨ. ਸਿਰਿਯਾਤਿ ਸੋਭਾਯ. ਮਂ ਬ੍ਰਹ੍ਮਪਰਿਸਂ ਉਪਨੇਸੀਤਿ ਯਾਦਿਸਾ ਬ੍ਰਹ੍ਮਪਰਿਸਾ ਇਸ੍ਸਰਿਯਾਦਿਸਮ੍ਪਤ੍ਤਿਯਾ, ਤਤ੍ਥ ਮਂ ਉਯ੍ਯੋਜੇਸਿ. ਮਹਾਜਨਸ੍ਸ ਮਾਰਣਤੋਤਿ ਮਹਾਜਨਸ੍ਸ ਵਿਵਟ੍ਟੂਪਨਿਸ੍ਸਯਗੁਣਵਿਨਾਸਨੇਨ ਆਨੁਭਾਵੇਨ ਮਾਰਣਤੋ. ਅਯਸਨ੍ਤਿ ਯਸਪਟਿਪਕ੍ਖਂ ਅਕਿਤ੍ਤਿਕਮ੍ਮਾਨੁਭਾਵਞ੍ਚਾਤਿ ਅਤ੍ਥੋ.

੫੦੩. ਕਸਿਣਂ ਆਯੁਨ੍ਤਿ ਵਸ੍ਸਸਤਂ ਸਨ੍ਧਾਯ ਵਦਤਿ. ਉਪਨਿਸ੍ਸਾਯ ਸੇਤੀਤਿ ਉਪਸਯੋ, ਉਪਸਯੋਵ ਓਪਸਾਯਿਕੋ ਯਥਾ ‘‘ਵੇਨਯਿਕੋ’’ਤਿ (ਮ. ਨਿ. ੧.੨੪੬; ਅ. ਨਿ. ੮.੧੧; ਪਾਰਾ. ੮) ਆਹ ‘‘ਸਮੀਪਸਯੋ’’ਤਿ. ਸਯਗ੍ਗਹਣਞ੍ਚੇਤ੍ਥ ਨਿਦਸ੍ਸਨਮਤ੍ਤਨ੍ਤਿ ਦਸ੍ਸੇਤੁਂ ‘‘ਮਂ ਗਚ੍ਛਨ੍ਤ’’ਨ੍ਤਿਆਦਿ ਵੁਤ੍ਤਂ. ਅਨੇਕਤ੍ਥਤ੍ਤਾ ਧਾਤੂਨਂ ਵਤ੍ਤਨਤ੍ਥੋ ਦਟ੍ਠਬ੍ਬੋ. ਮਮ ਵਤ੍ਥੁਸ੍ਮਿਂ ਸਯਨਕੋਤਿ ਮਯ੍ਹਂ ਠਾਨੇ ਵਿਸਯੇ ਵਤ੍ਤਨਕੋ. ਬਾਹਿਤ੍ਵਾਤਿ ਨੀਚਂ ਕਤ੍ਵਾ, ਅਭਿਭਵਿਤ੍ਵਾ ਵਾ. ਜਜ੍ਝਰਿਕਾਗੁਮ੍ਬਤੋਤਿ ਏਤ੍ਥ ਜਜ੍ਝਰਿਕਾ ਨਾਮ ਪਥਵਿਂ ਪਤ੍ਥਰਿਤ੍ਵਾ ਜਾਤਾ ਏਕਾ ਗਚ੍ਛਜਾਤਿ.

ਇਮਿਨਾਤਿ ‘‘ਸਚੇ ਖੋ ਤ੍ਵਂ ਭਿਕ੍ਖੂ’’ਤਿਆਦਿਵਚਨੇਨ. ਏਸ ਬ੍ਰਹ੍ਮਾ. ਉਪਲਾਪੇਤੀਤਿ ਸਙ੍ਗਣ੍ਹਾਤਿ. ਅਪਸਾਦੇਤੀਤਿ ਨਿਗ੍ਗਣ੍ਹਾਤਿ. ਸੇਸਪਦੇਹੀਤਿ ਵਤ੍ਥੁਸਾਯਿਕੋ ਯਥਾਕਾਮਕਰਣੀਯੋ ਬਾਹਿਤੇਯ੍ਯੋਤਿ ਇਮੇਹਿ ਪਦੇਹਿ. ਮਯ੍ਹਂ ਆਰਕ੍ਖਂ ਗਣ੍ਹਿਸ੍ਸਸੀਤਿ ਮਮ ਆਰਕ੍ਖਕੋ ਭਵਿਸ੍ਸਸਿ. ਲਕੁਣ੍ਡਕਤਰਨ੍ਤਿ ਨੀਚਤਰਂ ਨਿਹੀਨਵੁਤ੍ਤਿਸਰੀਰਂ.

ਫੁਸਿਤੁਮ੍ਪਿ ਸਮਤ੍ਥਂ ਕਿਞ੍ਚਿ ਨ ਪਸ੍ਸਤਿ, ਪਗੇਵ ਞਾਣਵਿਭਵਨ੍ਤਿ ਅਧਿਪ੍ਪਾਯੋ. ਨਿਪ੍ਫਤ੍ਤਿਨ੍ਤਿ ਨਿਪ੍ਫਜ੍ਜਨਂ, ਫਲਨ੍ਤਿ ਅਤ੍ਥੋ. ਤਞ੍ਹਿ ਕਾਰਣਵਸੇਨ ਗਨ੍ਤਬ੍ਬਤੋ ਅਧਿਗਨ੍ਤਬ੍ਬਤੋ ਗਤੀਤਿ ਵੁਚ੍ਚਤਿ. ਆਨੁਭਾਵਨ੍ਤਿ ਪਭਾਵਂ. ਸੋ ਹਿ ਜੋਤਨਟ੍ਠੇਨ ਵਿਰੋਚਨਟ੍ਠੇਨ ਜੁਤੀਤਿ ਵੁਚ੍ਚਤਿ. ਮਹਤਾ ਆਨੁਭਾਵੇਨ ਪਰੇਸਂ ਅਭਿਭਵਨਤੋ ਮਹੇਸੋਤਿ ਅਕ੍ਖਾਯਤੀਤਿ ਮਹੇਸਕ੍ਖੋ. ਤਯਿਦਂ ਅਭਿਭਵਨਂ ਕਿਤ੍ਤਿਸਮ੍ਪਤ੍ਤਿਯਾ ਪਰਿਵਾਰਸਮ੍ਪਤ੍ਤਿਯਾ ਚਾਤਿ ਆਹ ‘‘ਮਹਾਯਸੋ ਮਹਾਪਰਿਵਾਰੋ’’ਤਿ.

ਪਰਿਹਰਨ੍ਤੀਤਿ ਸਿਨੇਰੁਂ ਦਕ੍ਖਿਣਤੋ ਕਤ੍ਵਾ ਪਰਿਵਤ੍ਤਨ੍ਤਿ. ਦਿਸਾਤਿ ਭੁਮ੍ਮਤ੍ਥੇ ਏਤਂ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਦਿਸਾਸੁ ਵਿਰੋਚਮਾਨਾ’’ਤਿ. ਅਤ੍ਤਨੋ ਜੁਤਿਯਾ ਦਿਬ੍ਬਮਾਨਾਯ ਵਾ. ਤੇਹੀਤਿ ਚਨ੍ਦਿਮਸੂਰਿਯੇਹਿ. ਤਤ੍ਤਕੇਨ ਪਮਾਣੇਨਾਤਿ ਯਤ੍ਤਕੇ ਚਨ੍ਦਿਮਸੂਰਿਯੇਹਿ ਓਭਾਸਿਯਮਾਨੋ ਲੋਕਧਾਤੁਸਙ੍ਖਾਤੋ ਏਕੋ ਲੋਕੋ, ਤਤ੍ਤਕੇਨ ਪਮਾਣੇਨ. ਇਦਂ ਚਕ੍ਕਵਾਲ਼ਂ ਬੁਦ੍ਧਾਨਂ ਉਪ੍ਪਤ੍ਤਿਟ੍ਠਾਨਭੂਤਂ ਸੇਟ੍ਠਂ ਉਤ੍ਤਮਂ ਪਧਾਨਂ, ਤਸ੍ਮਾ ਯੇਭੁਯ੍ਯੇਨ ਏਤ੍ਥੁਪਪਨ੍ਨਾ ਦੇਵਤਾ ਅਞ੍ਞੇਸੁ ਚਕ੍ਕਵਾਲ਼ੇਸੁ ਦੇਵਤਾ ਅਭਿਭੁਯ੍ਯ ਵਤ੍ਤਨ੍ਤਿ. ਤਥਾ ਹਿ ਬ੍ਰਹ੍ਮਾ ਸਹਮ੍ਪਤਿ ਦਸਸਹਸ੍ਸਬ੍ਰਹ੍ਮਪਰਿਵਾਰੋ ਭਗਵਤੋ ਸਨ੍ਤਿਕਂ ਉਪਗਞ੍ਛਿ. ਤੇਨਾਹ ‘‘ਏਤ੍ਥ ਚਕ੍ਕਵਾਲ਼ਸਹਸ੍ਸੇ ਤੁਯ੍ਹਂ ਵਸੋ ਵਤ੍ਤਤੀ’’ਤਿ. ਇਦਾਨਿ ‘‘ਏਤ੍ਥ ਤੇ ਵਤ੍ਤਤੇ ਵਸੋ’’ਤਿ ਵੁਤ੍ਤਂ ਵਸੇ ਵਤ੍ਤਨਂ ਸਰੂਪਤੋ ਦਸ੍ਸੇਤੁਂ ‘‘ਪਰੋਪਰਞ੍ਚ ਜਾਨਾਸੀ’’ਤਿਆਦਿ ਵੁਤ੍ਤਂ. ਤਤ੍ਥ ਪਠਮਗਾਥਾਯਂ ਵੁਤ੍ਤਂ ਏਤ੍ਥ-ਸਦ੍ਦਂ ਆਨੇਤ੍ਵਾ ਅਤ੍ਥੋ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ‘‘ਏਤ੍ਥ ਚਕ੍ਕਵਾਲ਼ਸਹਸ੍ਸੇ’’ਤਿ ਆਹ. ਉਚ੍ਚਨੀਚੇਤਿ ਜਾਤਿਕੁਲਰੂਪਭੋਗਪਰਿਵਾਰਾਦਿਵਸੇਨ ਉਲ਼ਾਰੇ ਚ ਅਨੁਲ਼ਾਰੇ ਚ. ਅਯਂ ਇਦ੍ਧੋਅਯਂ ਪਕਤਿਮਨੁਸ੍ਸੋਤਿ ਇਮਿਨਾ ‘‘ਸਰੂਪਤੋ ਏਵਸ੍ਸ ਸਤ੍ਤਾਨਂ ਪਰੋਪਰਜਾਨਨਂ, ਨ ਸਮੁਦਾਗਮਤੋ’’ਤਿ ਦਸ੍ਸੇਤਿ. ਯਂ ਪਨ ਵਕ੍ਖਤਿ ‘‘ਸਤ੍ਤਾਨਂ ਆਗਤਿਂ ਗਤਿਨ੍ਤਿ, ਤਂ ਕਾਮਲੋਕੇ ਸਤ੍ਤਾਨਂ ਆਦਾਨਨਿਕ੍ਖੇਪਜਾਨਨਮਤ੍ਤਂ ਸਨ੍ਧਾਯ ਵੁਤ੍ਤਂ, ਨ ਕਮ੍ਮਵਿਪਾਕਜਾਨਨਂ. ਯਦਿ ਹਿ ਸਮੁਦਾਗਮਤੋ ਜਾਨੇਯ੍ਯ, ਅਤ੍ਤਨੋਪਿ ਜਾਨੇਯ੍ਯ, ਨ ਚਸ੍ਸ ਤਂ ਅਤ੍ਥੀਤਿ, ਤਥਾ ਆਹ ‘‘ਇਤ੍ਥਮ੍ਭਾਵੋਤਿ ਇਦਂ ਚਕ੍ਕਵਾਲ਼’’ਨ੍ਤਿਆਦਿ. ਰਾਗਯੋਗਤੋ ਰਾਗੋ ਏਤਸ੍ਸ ਅਤ੍ਥੀਤਿ ਵਾ ਰਾਗੋ, ਵਿਰਜ੍ਜਨਸੀਲੋ ਵਿਰਾਗੀ, ਤਂ ਰਾਗਵਿਰਾਗਿਨਂ. ਸਹਸ੍ਸਿਬ੍ਰਹ੍ਮਾ ਨਾਮ ਤ੍ਵਂ ਚੂਲ਼ਨਿਯਾ ਏਵ ਲੋਕਧਾਤੁਯਾ ਜਾਨਨਤੋ. ਤਯਾਤਿ ਨਿਸ੍ਸਕ੍ਕੇ ਕਰਣਵਚਨਂ. ਚਤੁਹਤ੍ਥਾਯਾਤਿ ਅਨੇਕਹਤ੍ਥੇਨ ਸਾਣਿਪਾਕਾਰੇਨ ਕਾਤਬ੍ਬਪਟਪ੍ਪਮਾਣਂ ਦੀਘਤੋ ਚਤੁਹਤ੍ਥਾਯ, ਵਿਤ੍ਥਾਰਤੋ ਦ੍ਵਿਹਤ੍ਥਾਯ ਪਿਲੋਤਿਕਾਯ ਕਾਤੁਂ ਵਾਯਮਨ੍ਤੋ ਵਿਯ ਗੋਪ੍ਫਕੇ ਉਦਕੇ ਨਿਮੁਜ੍ਜਿਤੁਕਾਮੋ ਵਿਯ ਚ ਪਮਾਣਂ ਅਜਾਨਨ੍ਤੋ ਵਿਹਞ੍ਞਤੀਤਿ ਨਿਗ੍ਗਣ੍ਹਾਤਿ.

੫੦੪. ਤਂ ਕਾਯਨ੍ਤਿ ਤਦੇਵ ਨਿਕਾਯਂ. ਜਾਨਿਤਬ੍ਬਟ੍ਠਾਨਂ ਪਤ੍ਵਾਪੀਤਿ ਅਨਞ੍ਞਸਾਧਾਰਣਾ ਮਯ੍ਹਂ ਸੀਲਾਦਯੋ ਗੁਣਵਿਸੇਸਾ ਤਾਵ ਤਿਟ੍ਠਨ੍ਤੁ, ਈਦਿਸਂ ਲੋਕਿਯਂ ਪਰਿਤ੍ਤਕਂ ਜਾਨਿਤਬ੍ਬਟ੍ਠਾਨਮ੍ਪਿ ਪਤ੍ਵਾ. ਅਯਂ ਇਮੇਸਂ ਅਤਿਸਯੇਨ ਨੀਚੋਤਿ ਨੀਚੇਯ੍ਯੋ, ਤਸ੍ਸ ਭਾਵੋ ਨੀਚੇਯ੍ਯਨ੍ਤਿ ਆਹ ‘‘ਤਯਾ ਨੀਚਤਰਭਾਵੋ ਪਨ ਮਯ੍ਹਂ ਕੁਤੋ’’ਤਿ.

ਹੇਟ੍ਠੂਪਪਤ੍ਤਿਕੋਤਿ ਉਪਰੂਪਰਿਤੋ ਚਵਿਤ੍ਵਾ ਹੇਟ੍ਠਾ ਲਦ੍ਧੂਪਪਤ੍ਤਿਕੋ. ਏਵਂ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਅਨੁਪ੍ਪਨ੍ਨੇ ਬੁਦ੍ਧੁਪ੍ਪਾਦੇ’’ਤਿ ਆਹ. ਹੇਟ੍ਠੂਪਪਤ੍ਤਿਕਂ ਕਤ੍ਵਾਤਿ ਹੇਟ੍ਠੂਪਪਤ੍ਤਿਕਂ ਪਤ੍ਥਨਂ ਕਤ੍ਵਾ. ਯਥਾ ਕੇਨਚਿ ਬਹੂਸੁ ਆਨਨ੍ਤਰਿਯੇਸੁ ਕਤੇਸੁ ਯਂ ਤਤ੍ਥ ਗਰੁਤਰਂ ਬਲਵਂ, ਤਦੇਵ ਪਟਿਸਨ੍ਧਿਂ ਦੇਤਿ, ਇਤਰਾਨਿ ਪਨ ਤਸ੍ਸ ਅਨੁਬਲਪ੍ਪਦਾਯਕਾਨਿ ਹੋਨ੍ਤਿ, ਨ ਪਟਿਸਨ੍ਧਿਦਾਯਕਾਨਿ, ਏਵਂ ਚਤੂਸੁ ਰੂਪਜ੍ਝਾਨੇਸੁ ਭਾਵਿਤੇਸੁ ਯਂ ਤਤ੍ਥ ਗਰੁਤਰਂ ਛਨ੍ਦਪਣਿਧਿਅਧਿਮੋਕ੍ਖਾਦਿਵਸੇਨ ਸਾਭਿਸਙ੍ਖਾਰਞ੍ਚ, ਤਦੇਵ ਚ ਪਟਿਸਨ੍ਧਿਂ ਦੇਤਿ, ਇਤਰਾਨਿ ਪਨ ਅਲਦ੍ਧੋਕਾਸਤਾਯ ਤਸ੍ਸ ਅਨੁਬਲਪ੍ਪਦਾਯਕਾਨਿ ਹੋਨ੍ਤਿ, ਨ ਪਟਿਸਨ੍ਧਿਦਾਯਕਾਨਿ, ਤਨ੍ਨਿਬ੍ਬਤ੍ਤਿਤਜ੍ਝਾਨੇਨੇਵ ਆਯਤਿਂ ਪੁਨਬ੍ਭਵਾਭਿਨਿਬ੍ਬਤ੍ਤਿ ਹੋਤੀਤਿ ਆਹ ‘‘ਤਤਿਯਜ੍ਝਾਨਂ ਪਣੀਤਂ ਭਾਵੇਤ੍ਵਾ’’ਤਿ. ਤਤ੍ਥਾਤਿ ਸੁਭਕਿਣ੍ਹਬ੍ਰਹ੍ਮਲੋਕੇ. ਪੁਨ ਤਤ੍ਥਾਤਿ ਆਭਸ੍ਸਰਬ੍ਰਹ੍ਮਲੋਕੇ. ਪਠਮਕਾਲੇਤਿ ਤਸ੍ਮਿਂ ਭਵੇ ਪਠਮਸ੍ਮਿਂ ਕਾਲੇ. ਉਭਯਨ੍ਤਿ ਅਤੀਤਂ ਅਤ੍ਤਨੋ ਨਿਬ੍ਬਤ੍ਤਟ੍ਠਾਨਂ, ਤਤ੍ਥ ਨਿਬ੍ਬਤ੍ਤਿਯਾ ਹੇਤੁਭੂਤਂ ਅਤ੍ਤਨੋ ਕਤਕਮ੍ਮਨ੍ਤਿ ਉਭਯਂ. ਪਮੁਸ੍ਸਿਤ੍ਵਾ ਕਾਲਸ੍ਸ ਚਿਰਤਰਭਾਵਤੋ. ਵੀਤਿਨਾਮੇਤਿ ਪਟਿਪਜ੍ਜਨ੍ਤੀਤਿ ਚ ਤਦਾ ਤਸ੍ਸਾ ਕਿਰਿਯਾਯ ਪਵਤ੍ਤਿਕ੍ਖਣਂ ਉਪਾਦਾਯ ਪਵਤ੍ਤਮਾਨਪਯੋਗੋ.

ਅਪਾਯੇਸੀਤਿ ਪਾਯੇਸਿ. ਪਿਪਾਸਿਤੇਤਿ ਤਸਿਤੇ. ਘਮ੍ਮਨੀਤਿ ਘਮ੍ਮਕਾਲੇ. ਸਮ੍ਪਰੇਤੇਤਿ ਘਮ੍ਮਪਰਿਲ਼ਾਹੇਨ ਪਿਪਾਸਾਯ ਅਭਿਭੂਤੇ. ਨ੍ਤਿ ਪਾਨੀਯਦਾਨਂ. ਵਤਸੀਲਵਤ੍ਤਨ੍ਤਿ ਸਮਾਦਾਨਵਸੇਨ ਵਤਭੂਤਂ ਚਾਰਿਤ੍ਤਸੀਲਭਾਵੇਨ ਸਮਾਚਿਣ੍ਣਤ੍ਤਾ ਸੀਲਵਤ੍ਤਂ. ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮੀਤਿ ਸੁਪਿਤ੍ਵਾ ਪਬੁਦ੍ਧਮਤ੍ਤੋ ਵਿਯ ਸੁਪਿਨਂ ਤਵ ਪੁਬ੍ਬਨਿਵੁਤ੍ਥਂ ਮਮ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣੇਨ ਅਨੁਸ੍ਸਰਾਮਿ, ਸਬ੍ਬਞ੍ਞੁਤਞ੍ਞਾਣੇਨ ਵਿਯ ਪਚ੍ਚਕ੍ਖਤੋ ਪਸ੍ਸਾਮੀਤਿ ਅਤ੍ਥੋ.

ਕਰਮਰੇਤਿ ਵਿਲੁਮ੍ਪਿਤ੍ਵਾ ਆਨੀਤੇ. ਕਮ੍ਮਸਜ੍ਜਨ੍ਤਿ ਯੁਦ੍ਧਸਜ੍ਜਂ, ਆਵੁਧਾਦਾਯਿਨਿਨ੍ਤਿ ਅਤ੍ਥੋ.

ਏਣੀਕੂਲਸ੍ਮਿਨ੍ਤਿ ਏਣੀਮਿਗਬਾਹੁਲ੍ਲੇਨ ‘‘ਏਣੀਕੂਲ’’ਨ੍ਤਿ ਸਙ੍ਖਂ ਗਤੇ ਗਙ੍ਗਾਯ ਤੀਰਪ੍ਪਦੇਸੇ. ਗਯ੍ਹਕ ਨੀਯਮਾਨਨ੍ਤਿ ਗਯ੍ਹਵਸੇਨ ਕਰਮਰਭਾਵੇਨ ਚੋਰੇਹਿ ਅਤ੍ਤਨੋ ਠਾਨਂ ਨੀਯਮਾਨਂ.

ਆਵਾਹਵਿਵਾਹਵਸੇਨ ਮਿਤ੍ਤਸਨ੍ਥਵਂ ਕਤ੍ਵਾ. ‘‘ਏਵਂ ਅਮ੍ਹੇਸੁ ਕੀਲ਼ਨ੍ਤੇਸੁ ਗਙ੍ਗੇਯ੍ਯਕੋ ਨਾਗੋ ਕੁਪਿਤੋ’’ਤਿ ਮਯਿ ਸਞ੍ਞਮ੍ਪਿ ਨ ਕਰੋਨ੍ਤੀਤਿ. ਸੁਸੁਕਾਰਨ੍ਤਿ ਸੁਸੂਤਿ ਪਵਤ੍ਤਂ ਭੇਰਵਨਾਗਨਿਸ੍ਸਾਸਂ.

ਗਹੀਤਨਾਵਨ੍ਤਿ ਵਿਹੇਠੇਤੁਕਾਮਤਾਯ ਗਤਿਨਿਵਾਰਣਵਸੇਨ ਗਹਿਤਂ ਨਿਗ੍ਗਹਿਤਂ ਨਾਵਂ. ਲੁਦ੍ਦੇਨਾਤਿ ਕੁਰੂਰੇਨ. ਮਨੁਸ੍ਸਕਪ੍ਪਾਤਿ ਨਾਵਾਗਤਾਨਂ ਮਨੁਸ੍ਸਾਨਂ ਵਿਹੇਠੇਤੁਕਾਮਤਾਯ.

ਬਦ੍ਧਚਰੋਤਿ ਪਟਿਬਦ੍ਧਚਰਿਯੋ. ਤੇਨਾਹ ‘‘ਅਨ੍ਤੇਵਾਸਿਕੋ’’ਤਿ. ਤਂ ਨਿਸ੍ਸਾਯੇਵਾਤਿ ਰਞ੍ਞਾ ਉਪਟ੍ਠਿਯਮਾਨੋਪਿ ਰਾਜਾਨਂ ਪਹਾਯ ਤਂ ਕਪ੍ਪਂ ਅਨ੍ਤੇਵਾਸਿਂ ਨਿਸ੍ਸਾਯੇਵ.

ਸਮ੍ਬੁਦ੍ਧਿਮਨ੍ਤਂ ਵਤਿਨਂ ਅਮਞ੍ਞੀਤਿ ਅਯਂ ਸਮ੍ਮਦੇਵ ਬੁਦ੍ਧਿਮਾ ਵਤਸਮ੍ਪਨ੍ਨੋਤਿ ਅਮਞ੍ਞਿ ਸਮ੍ਭਾਵੇਸਿ ਚ.

ਨਾਨਤ੍ਤਭਾਵੇਸੂਤਿ ਨਾਨਾ ਵਿਸੁਂ ਵਿਸੁਂ ਅਤ੍ਤਭਾਵੇਸੁ.

ਅਦ੍ਧਾਤਿ ਏਕਂਸੇਨ. ਮਮੇਤਮਾਯੁਨ੍ਤਿ ਮਯ੍ਹਂ ਏਤਂ ਯਥਾਵੁਤ੍ਤਂ ਤਤ੍ਥ ਤਤ੍ਥ ਭਵੇ ਪਵਤ੍ਤਂ ਆਯੁਂ. ਨ ਕੇਵਲਂ ਮਮ ਆਯੁਮੇਵ, ਅਥ ਖੋ ਅਞ੍ਞਮ੍ਪਿ ਸਬ੍ਬਞ੍ਞੇਯ੍ਯਂ ਜਾਨਾਸਿ, ਨ ਤੁਯ੍ਹਂ ਅਵਿਦਿਤਂ ਨਾਮ ਅਤ੍ਥਿ. ਤਥਾ ਹਿ ਬੁਦ੍ਧੋ ਸਮ੍ਮਾਸਮ੍ਬੁਦ੍ਧੋ ਤੁਵਂ. ਨੋ ਚੇ ਕਥਮਯਮਤ੍ਥੋ ਞਾਤੋ? ਤਥਾ ਹਿ ਸਮ੍ਮਾਸਮ੍ਬੁਦ੍ਧਤ੍ਤਾ ਏਵ ਤੇ ਅਯਂ ਜਲਿਤੋ ਜੋਤਮਾਨੋ ਆਨੁਭਾਵੋ ਓਭਾਸਯਂ ਸਬ੍ਬਮ੍ਪਿ ਬ੍ਰਹ੍ਮਲੋਕਂ ਓਭਾਸੇਨ੍ਤੋ ਦਿਬ੍ਬਮਾਨੋ ਤਿਟ੍ਠਤੀਤਿ ਸਤ੍ਥੁ ਅਸਮਸਮਤਂ ਪਵੇਦੇਸਿ.

ਪਥਵਤ੍ਤੇਨਾਤਿ ਪਥਵੀਅਤ੍ਤੇਨ. ਤੇਨਾਹ ‘‘ਪਥਵੀਸਭਾਵੇਨਾ’’ਤਿ. ਏਤ੍ਥ ਚ ਯਸ੍ਮਾ – ‘‘ਸਬ੍ਬਸਙ੍ਖਾਰਸਮਥੋਤਿ’’ਆਦਿਨਾ (ਮਹਾਵ. ੭; ਦੀ. ਨਿ. ੨.੬੪, ੬੭; ਮ. ਨਿ. ੧.੨੮੧; ਸਂ. ਨਿ. ੧.੧੭੨) ਸਾਧਾਰਣਤੋ, ‘‘ਯਤ੍ਥ ਨੇਵ ਪਥਵੀ’’ਤਿ ਅਸਾਧਾਰਣਤੋ ਚ ਪਥਵਿਯਾ ਅਸਭਾਵੇਨ ਨਿਬ੍ਬਾਨਸ੍ਸ ਗਹੇਤਬ੍ਬਤਾ ਅਤ੍ਥਿ, ਤਂ ਨਿਵਤ੍ਤੇਤ੍ਵਾ ਪਥਵਿਯਾ ਅਨਞ੍ਞਸਾਧਾਰਣਂ ਸਭਾਵਂ ਗਹੇਤੁਂ ‘‘ਪਥਵਿਯਾ ਪਥਵਤ੍ਤੇਨਾ’’ਤਿ ਵੁਤ੍ਤਂ. ਨਾਪਹੋਸਿਨ੍ਤਿ ਨ ਪਾਪੁਣਿਂ. ਇਧ ਪਥਵਿਯਾ ਪਾਪੁਣਨਂ ਨਾਮ ‘‘ਏਤਂ ਮਮਾ’’ਤਿਆਦਿਨਾ ਗਹਣਨ੍ਤਿ ਆਹ ‘‘ਤਣ੍ਹਾਦਿਟ੍ਠਿਮਾਨਗ੍ਗਾਹੇਹਿ ਨ ਗਣ੍ਹਿ’’ਨ੍ਤਿ.

ਵਾਦਿਤਾਯਾਤਿ ਵਾਦਸੀਲਤਾਯ. ਸਬ੍ਬਨ੍ਤਿ ਅਕ੍ਖਰਂ ਨਿਦ੍ਦਿਸਿਤ੍ਵਾਤਿ ‘‘ਸਬ੍ਬਂ ਖੋ ਅਹਂ ਬ੍ਰਹ੍ਮੇ’’ਤਿਆਦਿਨਾ ਭਗਵਤਾ ਵੁਤ੍ਤਂ ਸਬ੍ਬ-ਸਦ੍ਦਂ – ‘‘ਸਚੇ ਖੋ ਤੇ ਮਾਰਿਸ ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤ’’ਨ੍ਤਿ ਪਚ੍ਚਨੁਭਾਸਨਵਸੇਨ ਨਿਦ੍ਦਿਸਿਤ੍ਵਾ. ਅਕ੍ਖਰੇ ਦੋਸਂ ਗਣ੍ਹਨ੍ਤੋਤਿ ਭਗਵਤਾ ਸਕ੍ਕਾਯਸਬ੍ਬਂ ਸਨ੍ਧਾਯ ਸਬ੍ਬ-ਸਦ੍ਦੇ ਗਹਿਤੇ ਸਬ੍ਬਸਬ੍ਬਵਸੇਨ ਤਦਤ੍ਥਪਰਿਵਤ੍ਤਨੇਨ ਸਬ੍ਬ-ਸਦ੍ਦਵਚਨੀਯਤਾਸਾਮਞ੍ਞੇਨ ਚ ਦੋਸਂ ਗਣ੍ਹਨ੍ਤੋ. ਤੇਨਾਹ ‘‘ਸਤ੍ਥਾ ਪਨਾ’’ਤਿਆਦਿ. ਤਤ੍ਥ ਯਦਿ ਸਬ੍ਬਂ ਅਨਨੁਭੂਤਂ ‘‘ਨਤ੍ਥਿ ਸਬ੍ਬ’’ਨ੍ਤਿ ਲੋਕੇ ਅਨਵਸੇਸਂ ਪੁਚ੍ਛਤਿ. ਸਚੇ ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਵਸੇਸਸਭਾਵੇਨ ਅਨਨੁਭੂਤਂ ਅਪ੍ਪਤ੍ਤਂ, ਤਂ ਗਗਨਕੁਸੁਮਂ ਵਿਯ ਕਿਞ੍ਚਿ ਨ ਸਿਯਾ. ਅਥਸ੍ਸ ਅਨਨੁਭੂਤਂ ਅਤ੍ਥੀਤਿ ਅਸ੍ਸ ਸਬ੍ਬਤ੍ਤੇਨ ਅਨਨੁਭੂਤਂ ਯਦਿ ਅਤ੍ਥਿ, ‘‘ਸਬ੍ਬ’’ਨ੍ਤਿ ਇਦਂ ਵਚਨਂ ਮਿਚ੍ਛਾ, ਸਬ੍ਬਂ ਨਾਮ ਤਂ ਨ ਹੋਤੀਤਿ ਅਧਿਪ੍ਪਾਯੋ. ਤੇਨਾਹ ‘‘ਮਾ ਹੇਵ ਤੇ ਰਿਤ੍ਤਕਮੇਵਾ’’ਤਿਆਦਿ.

ਅਹਂ ਸਬ੍ਬਞ੍ਚ ਵਕ੍ਖਾਮਿ, ਅਨਨੁਭੂਤਞ੍ਚ ਵਕ੍ਖਾਮੀਤਿ ਅਹਂ ‘‘ਸਬ੍ਬ’’ਨ੍ਤਿ ਚ ਵਕ੍ਖਾਮਿ, ‘‘ਅਨਨੁਭੂਤ’’ਨ੍ਤਿ ਚ ਵਕ੍ਖਾਮਿ, ਏਤ੍ਥ ਕੋ ਦੋਸੋਤਿ ਅਧਿਪ੍ਪਾਯੋ. ਕਾਰਣਂ ਆਹਰਨ੍ਤੋਤਿ ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤਸ੍ਸ ਅਤ੍ਥਿਭਾਵੇ ਕਾਰਣਂ ਨਿਦ੍ਦਿਸਨ੍ਤੋ. ਵਿਜਾਨਿਤਬ੍ਬਨ੍ਤਿ ਮਗ੍ਗਫਲਪਚ੍ਚਵੇਕ੍ਖਣਞਾਣੇਹਿ ਵਿਸੇਸਤੋ ਸਬ੍ਬਸਙ੍ਖਤਵਿਸਿਟ੍ਠਤਾਯ ਜਾਨਿਤਬ੍ਬਂ. ਅਨਿਦਸ੍ਸਨਨ੍ਤਿ ਇਦਂ ਨਿਬ੍ਬਾਨਸ੍ਸ ਸਨਿਦਸ੍ਸਨਦੁਕੇ ਦੁਤਿਯਪਦਸਹਿਤਤਾਦਸ੍ਸਨਨ੍ਤਿ ਅਧਿਪ੍ਪਾਯੇਨ ‘‘ਚਕ੍ਖੁਵਿਞ੍ਞਾਣਸ੍ਸ ਆਪਾਥਂ ਅਨੁਪਗਮਨਤੋ ਅਨਿਦਸ੍ਸਨਂ ਨਾਮਾ’’ਤਿ ਵੁਤ੍ਤਂ. ਸਬ੍ਬਸਙ੍ਖਤਵਿਧੁਰਤਾਯ ਵਾ ਨਤ੍ਥਿ ਏਤਸ੍ਸ ਨਿਦਸ੍ਸਨਨ੍ਤਿ ਅਨਿਦਸ੍ਸਨਂ. ਨਤ੍ਥਿ ਏਤਸ੍ਸ ਅਨ੍ਤੋਤਿ ਅਨਨ੍ਤਂ. ਤੇਨ ਵੁਤ੍ਤਂ ‘‘ਤਯਿਦ’’ਨ੍ਤਿਆਦਿ.

ਭੂਤਾਨੀਤਿ ਪਚ੍ਚਯਸਮ੍ਭੂਤਾਨਿ. ਅਸਮ੍ਭੂਤਨ੍ਤਿ ਪਚ੍ਚਯੇਹਿ ਅਸਮ੍ਭੂਤਂ, ਨਿਬ੍ਬਾਨਨ੍ਤਿ ਅਤ੍ਥੋ. ਅਪਭਸ੍ਸਰਭਾਵਹੇਤੂਨਂ ਸਬ੍ਬਸੋ ਅਭਾਵਾ ਸਬ੍ਬਤੋ ਪਭਾਤਿ ਸਬ੍ਬਤੋਪਭਂ. ਤੇਨਾਹ ‘‘ਨਿਬ੍ਬਾਨਤੋ ਹੀ’’ਤਿਆਦਿ. ਤਥਾ ਹਿ ਵੁਤ੍ਤਂ – ‘‘ਤਮੋ ਤਤ੍ਥ ਨ ਵਿਜ੍ਜਤੀ’’ਤਿ. (ਨੇਤ੍ਤਿ. ੧੦੪) ਪਭੂਤਮੇਵਾਤਿ ਪਕਟ੍ਠਭਾਵੇਨ ਉਕ੍ਕਟ੍ਠਭਾਵੇਨ ਵਿਜ੍ਜਮਾਨਮੇਵ. ਅਰੂਪੀਭਾਵੇਨ ਅਦੇਸਿਕਤ੍ਤਾ ਸਬ੍ਬਤੋ ਪਭਵਤਿ ਵਿਜ੍ਜਤੀਤਿ ਸਬ੍ਬਤੋਪਭਂ. ਤੇਨਾਹ ‘‘ਪੁਰਤ੍ਥਿਮਦਿਸਾਦੀਸੂ’’ਤਿਆਦਿ. ਪਵਿਸਨ੍ਤਿ ਏਤ੍ਥਾਤਿ ਪਵਿਸਂ, ਤਦੇਵ ਸ-ਕਾਰਸ੍ਸ ਭ-ਕਾਰਂ, ਵਿ-ਕਾਰਸ੍ਸ ਚ ਲੋਪਂ ਕਤ੍ਵਾ ਵੁਤ੍ਤਂ ‘‘ਪਭ’’ਨ੍ਤਿ. ਤੇਨਾਹ ‘‘ਤਿਤ੍ਥਸ੍ਸ ਨਾਮ’’ਨ੍ਤਿ. ਵਾਦਂ ਪਤਿਟ੍ਠਪੇਸੀਤਿ ਏਵਂ ਮਯਾ ਸਬ੍ਬਞ੍ਚ ਵੁਤ੍ਤਂ, ਅਨਨੁਭੂਤਞ੍ਚ ਵੁਤ੍ਤਂ, ਤਤ੍ਥ ਯਂ ਤਯਾ ਅਧਿਪ੍ਪਾਯਂ ਅਜਾਨਨ੍ਤੇਨ ਸਹਸਾ ਅਪ੍ਪਟਿਸਙ੍ਖਾਯ ਦੋਸਗ੍ਗਹਣਂ, ਤਂ ਮਿਚ੍ਛਾਤਿ ਬ੍ਰਹ੍ਮਾਨਂ ਨਿਗ੍ਗਣ੍ਹਨ੍ਤੋ ਭਗਵਾ ਅਤ੍ਤਨੋ ਵਾਦਂ ਪਤਿਟ੍ਠਪੇਸਿ.

ਗਹਿਤਗਹਿਤਨ੍ਤਿ ‘‘ਇਦਂ ਨਿਚ੍ਚ’’ਨ੍ਤਿਆਦਿਨਾ ਗਹਿਤਗਹਿਤਂ ਗਾਹਂ. ਤਤ੍ਥ ਤਤ੍ਥ ਦੋਸਦਸ੍ਸਨਮੁਖੇਨ ਨਿਗ੍ਗਣ੍ਹਨ੍ਤੇਨ ਸਤ੍ਥਾਰਾ ਵਿਸ੍ਸਜ੍ਜਾਪਿਤੋ ਕਿਞ੍ਚਿ ਗਹੇਤਬ੍ਬਂ ਅਤ੍ਤਨੋ ਪਟਿਸਰਣਂ ਅਦਿਸ੍ਵਾ ਪਰਾਜਯਂ ਪਟਿਚ੍ਛਾਦੇਤੁਂ ਲਲ਼ਿਤਕਂਕਾਤੁਕਾਮੋ ਵਾਦਂ ਪਹਾਯ ਇਦ੍ਧਿਯਾ ਪਾਟਿਹਾਰਿਯਲੀਲ਼ਂ ਦਸ੍ਸੇਤੁਕਾਮੋ. ਯਦਿ ਸਕ੍ਕੋਸਿ ਮਯ੍ਹਂ ਅਨ੍ਤਰਧਾਯਿਤੁਂ, ਨ ਪਨ ਸਕ੍ਖਿਸ੍ਸਸੀਤਿ ਅਧਿਪ੍ਪਾਯੋ. ਮੂਲਪਟਿਸਨ੍ਧਿਂ ਗਨ੍ਤੁਕਾਮੋਤਿ ਅਤ੍ਤਨੋ ਪਾਕਤਿਕੇਨ ਅਤ੍ਤਭਾਵੇਨ ਠਾਤੁਕਾਮੋ. ਸੋ ਹਿ ਪਟਿਸਨ੍ਧਿਕਾਲੇ ਨਿਬ੍ਬਤ੍ਤਸਦਿਸਤਾਯ ਮੂਲਪਟਿਸਨ੍ਧੀਤਿ ਵੁਤ੍ਤੋ. ਅਞ੍ਞੇਸਨ੍ਤਿ ਹੇਟ੍ਠਾ ਅਞ੍ਞਕਾਯਿਕਾਨਂ ਬ੍ਰਹ੍ਮੂਨਂ. ਨ ਅਦਾਸਿ ਅਭਿਸਙ੍ਖਤਕਾਯੇਨੇਵਾਯਂ ਤਿਟ੍ਠਤੁ, ਨ ਪਾਕਤਿਕਰੂਪੇਨਾਤਿ ਚਿਤ੍ਤਂ ਉਪ੍ਪਾਦੇਸਿ. ਤੇਨ ਸੋ ਅਭਿਸਙ੍ਖਤਕਾਯਂ ਅਪਨੇਤੁਂ ਅਵਿਸਹਨ੍ਤੋ ਅਤ੍ਤਭਾਵਪਟਿਚ੍ਛਾਦਕਂ ਅਨ੍ਧਕਾਰਂ ਨਿਮ੍ਮਿਨਿਤੁਂ ਆਰਭਿ. ਸਤ੍ਥਾ ਤਂ ਤਮਂ ਵਿਦ੍ਧਂਸੇਤਿ. ਤੇਨ ਵੁਤ੍ਤਂ ‘‘ਮੂਲਪਟਿਸਨ੍ਧਿਂ ਵਾ’’ਤਿਆਦਿ.

ਭਵੇਵਾਹਨ੍ਤਿ ਭਵੇ ਏਵ ਅਹਂ. ਅਯਞ੍ਚ ਏਵ-ਸਦ੍ਦੋ ਅਟ੍ਠਾਨਪਯੁਤ੍ਤੋਤਿ ਦਸ੍ਸੇਨ੍ਤੋ ਆਹ ‘‘ਅਹਂ ਭਵੇ ਭਯਂ ਦਿਸ੍ਵਾਯੇਵਾ’’ਤਿ, ਸਬ੍ਬਸ੍ਮਿਂ ਭਵੇ ਜਾਤਿਆਦਿਭਯਂ ਞਾਣਚਕ੍ਖੁਨਾ ਯਾਥਾਵਤੋ ਦਿਸ੍ਵਾ. ਸਤ੍ਤਭਵਨ੍ਤਿ ਸਤ੍ਤਸਙ੍ਖਾਤਂ ਭਵਂ. ਕਮ੍ਮਭਵਪਚ੍ਚਯੇ ਹਿ ਉਪਪਤ੍ਤਿਭਵੇ ਸਤ੍ਤਸਮਞ੍ਞਾ. ਵਿਭਵਨ੍ਤਿ ਵਿਮੁਤ੍ਤਿਂ. ਪਰਿਯੇਸਮਾਨਮ੍ਪਿ ਉਪਾਯਸ੍ਸ ਅਨਧਿਗਤਤ੍ਤਾ ਭਵੇਯੇਵ ਦਿਸ੍ਵਾ. ਭਵਞ੍ਚ ਵਿਭਵੇਸਿਨਂ ਵਿਭਵਂ ਨਿਬ੍ਬੁਤਿਂ ਏਸਮਾਨਾਨਂ ਸਤ੍ਤਾਨਂ ਭਵਂ, ਭਵੇਸੁ ਉਪ੍ਪਤ੍ਤਿਞ੍ਚ ਦਿਸ੍ਵਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਨ ਅਭਿਵਦਿਨ੍ਤਿ ‘‘ਅਹੋ ਵਤ ਸੁਖ’’ਨ੍ਤਿ ਏਵਂ ਅਭਿਵਦਾਪਨਾਕਾਰਾਭਾਵਤੋ ਨ ਅਭਿਨਿਵਿਸਿਂ, ਲਕ੍ਖਣਵਚਨਮੇਤਂ. ਗਾਹਤ੍ਥੋ ਏਵ ਵਾ ਅਭਿਵਾਦ-ਸਦ੍ਦੋਤਿ ਆਹ ‘‘ਨਾਭਿਵਦਿ’’ਨ੍ਤਿ, ‘‘ਨ ਗਵੇਸਿ’’ਨ੍ਤਿ. ਭਵਗ੍ਗਹਣੇਨੇਤ੍ਥ ਦੁਕ੍ਖਸਚ੍ਚਂ, ਨਨ੍ਦੀਗਹਣੇਨ ਸਮੁਦਯਸਚ੍ਚਂ, ਵਿਭਵਗ੍ਗਹਣੇਨ ਨਿਰੋਧਸਚ੍ਚਂ, ਨਨ੍ਦਿਞ੍ਚ ਨ ਉਪਾਦਿਯਿਨ੍ਤਿ ਇਮਿਨਾ ਮਗ੍ਗਸਚ੍ਚਂ ਪਕਾਸਿਤਨ੍ਤਿ ਆਹ ‘‘ਇਤਿ ਚਤ੍ਤਾਰਿ ਸਚ੍ਚਾਨਿ ਪਕਾਸੇਨ੍ਤੋ’’ਤਿ. ਤਦਿਦਂ ਚਤੁਨ੍ਨਂ ਅਰਿਯਸਚ੍ਚਾਨਂ ਗਾਥਾਯ ਵਿਭਾਵਨਦਸ੍ਸਨਂ. ਸਤ੍ਥਾ ਪਨ ਤੇਸਂ ਬ੍ਰਹ੍ਮੂਨਂ ਅਜ੍ਝਾਸਯਾਨੁਰੂਪਂ ਸਚ੍ਚਾਨਿ ਵਿਤ੍ਥਾਰਤੋ ਪਕਾਸੇਨ੍ਤੋ ਵਿਪਸ੍ਸਨਂ ਪਾਪੇਤ੍ਵਾ ਅਰਹਤ੍ਤੇਨ ਦੇਸਨਾਯ ਕੂਟਂ ਗਣ੍ਹਿ. ਤੇ ਚ ਬ੍ਰਹ੍ਮਾਨੋ ਕੇਚਿ ਸੋਤਾਪਤ੍ਤਿਫਲੇ, ਕੇਚਿ ਸਕਦਾਗਾਮਿਫਲੇ, ਕੇਚਿ ਅਨਾਗਾਮਿਫਲੇ, ਕੇਚਿ ਅਰਹਤ੍ਤੇ ਚ ਪਤਿਟ੍ਠਹਿਂਸੁ. ਤੇਨ ਵੁਤ੍ਤਂ ‘‘ਸਚ੍ਚਾਨਿ ਪਕਾਸੇਨ੍ਤੋ ਸਤ੍ਥਾ ਧਮ੍ਮਂ ਦੇਸੇਸੀ’’ਤਿਆਦਿ. ਅਚ੍ਛਰਿਯਜਾਤਾਤਿ ਸਞ੍ਜਾਤਚ੍ਛਰਿਯਾ. ਸਮੂਲਂ ਭਵਨ੍ਤਿ ਤਣ੍ਹਾਵਿਜ੍ਜਾਹਿ ਸਮੂਲਂ ਭਵਂ.

੫੦੫. ਮਮ ਵਸਂ ਅਤਿਵਤ੍ਤਿਤਾਨੀਤਿ ਸਬ੍ਬਸੋ ਕਾਮਧਾਤੁਸਮਤਿਕ੍ਕਮਨਪਟਿਪਦਾਯ ਮਯ੍ਹਂ ਵਿਸਯਂ ਅਤਿਕ੍ਕਮਿਤਾਨਿ. ਕਥਂ ਪਨਾਯਂ ਤੇਸਂ ਅਰਿਯਭੂਮਿਸਮੋਕ੍ਕਮਨਂ ਜਾਨਾਤੀਤਿ? ਨਯਗ੍ਗਾਹਤੋ – ‘‘ਸਮਣੋ ਗੋਤਮੋ ਧਮ੍ਮਂ ਦੇਸੇਨ੍ਤੋ ਸਂਸਾਰੇ ਆਦੀਨਵਂ, ਨਿਬ੍ਬਾਨੇ ਚ ਆਨਿਸਂਸਂ ਪਕਾਸੇਨ੍ਤੋ ਵੇਨੇਯ੍ਯਜਨਂ ਨਿਬ੍ਬਾਨਂ ਦਿਟ੍ਠਮੇਵ ਕਰੋਤਿ, ਤਸ੍ਸ ਦੇਸਨਾ ਅਵਞ੍ਝਾ ਅਮੋਘਾ ਇਨ੍ਦੇਨ ਵਿਸ੍ਸਟ੍ਠਵਜਿਰਸਦਿਸਾ, ਤਸ੍ਸ ਚ ਆਣਾਯ ਠਿਤਾ ਸਂਸਾਰੇ ਨ ਦਿਸ੍ਸਨ੍ਤੇਵਾ’’ਤਿ ਨਯਗ੍ਗਾਹੇਨ ਅਨੁਮਾਨੇਨ ਜਾਨਾਤਿ. ਸਚੇ ਤ੍ਵਂ ਏਵਂ ਅਨੁਬੁਦ੍ਧੋਤਿ ਯਥਾ ਤ੍ਵਂ ਪਰੇਸਂ ਸਚ੍ਚਾਭਿਸਮ੍ਬੋਧਂ ਵਦਤਿ, ਏਵਂ ਤ੍ਵਂ ਅਤ੍ਤਨੋ ਅਨੁਰੂਪਤੋ ਸਯਮ੍ਭੁਞਾਣੇਨ ਬੁਦ੍ਧੋ ਧਮ੍ਮਂ ਪਟਿਵਿਜ੍ਝਿਤ੍ਵਾ ਠਿਤੋ. ਤਂ ਧਮ੍ਮਂ ਮਾ ਉਪਨਯਸੀਤਿ ਤਯਾ ਪਟਿਵਿਦ੍ਧਧਮ੍ਮਂ ਮਾ ਸਾਵਕਪਟਿਵੇਧਂ ਪਾਪੇਸਿ. ਇਦਨ੍ਤਿ ਇਦਂ ਅਨਨ੍ਤਰਂ ਵੁਤ੍ਤਂ ਬ੍ਰਹ੍ਮਲੋਕੇ ਪਤਿਟ੍ਠਾਨਂਯੇਵ ਸਨ੍ਧਾਯ ਮਾਰੋ ਵਦਤਿ, ਤੇ ਦਸ੍ਸੇਨ੍ਤੋ ‘‘ਅਨੁਪ੍ਪਨ੍ਨੇ ਹੀ’’ਤਿਆਦਿਮਾਹ. ਅਪਾਯਪਤਿਟ੍ਠਾਨਂ ਪਨ ਆਜੀਵਕਨਿਗਣ੍ਠਾਦਿਪਬ੍ਬਜ੍ਜਂ ਉਪਗਤੇ ਤਿਤ੍ਥਕਰੇ, ਯੇ ਕੇਚਿ ਵਾ ਪਬ੍ਬਜਿਤ੍ਵਾ ਮਿਚ੍ਛਾਪਟਿਪਨ੍ਨੇ ਜਨੇ ਸਨ੍ਧਾਯ ਵਦਤਿ. ਅਨੁਪ੍ਪਨ੍ਨੇਤਿ ਅਸਞ੍ਜਾਤੇ, ਅਪ੍ਪਤ੍ਤੇਤਿ ਅਤ੍ਥੋ. ਅਨੁਲ੍ਲਪਨਤਾਯਾਤਿ ਯਥਾ ਮਾਰੋ ਉਪਰਿ ਕਿਞ੍ਚਿ ਉਤ੍ਤਰਂ ਲਪਿਤੁਂ ਨ ਸਕ੍ਕੋਤਿ, ਏਵਂ ਤਥਾ ਉਤ੍ਤਰਭਾਸਨੇਨ. ਨਿਮਨ੍ਤਨਵਚਨੇਨਾਤਿ ਵਿਞ੍ਞਾਪਨਵਚਨੇਨ. ਬ੍ਰਹ੍ਮਂ ਸੇਟ੍ਠਂ ਨਿਮਨ੍ਤਨਂ, ਬ੍ਰਹ੍ਮੁਨੋ ਵਾ ਨਿਮਨ੍ਤਨਂ ਏਤ੍ਥ ਅਤ੍ਥੀਤਿ ਬ੍ਰਹ੍ਮਨਿਮਨ੍ਤਨਿਕਂ, ਸੁਤ੍ਤਂ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.