੧੦. ਮਾਰਤਜ੍ਜਨੀਯਸੁਤ੍ਤਵਣ੍ਣਨਾ

੫੦੬. ਕੋਟ੍ਠਮਨੁਪਵਿਟ੍ਠੋਤਿ ਆਸਯੋ ਵਚ੍ਚਗੁਤ੍ਤਟ੍ਠਾਨਤਾਯ ਕੋਟ੍ਠਂ, ਤਸ੍ਸ ਅਬ੍ਭਨ੍ਤਰਞ੍ਹੇਤ੍ਥ ਕੋਟ੍ਠਂ. ਅਨੁਰੂਪੋ ਹੁਤ੍ਵਾ ਪਵਿਟ੍ਠੋ ਅਨੁਪਵਿਟ੍ਠੋ. ਸੁਖੁਮਞ੍ਹਿ ਤਦਨੁਚ੍ਛਵਿਕਂ ਅਤ੍ਤਭਾਵਂ ਮਾਪੇਤ੍ਵਾ ਅਯਂ ਤਤ੍ਥ ਪਵਿਟ੍ਠੋ. ਗਰੁਗਰੋ ਵਿਯਾਤਿ ਗਰੁਕਗਰੁਕੋ ਵਿਯ. ਉ-ਕਾਰਸ੍ਸ ਹਿ ਓ-ਕਾਰਂ ਕਤ੍ਵਾ ਅਯਂ ਨਿਦ੍ਦੇਸੋ, ਅਤਿਵਿਯ ਗਰੁਕੋ ਮਞ੍ਞੇਤਿ ਅਤ੍ਥੋ. ਗਰੁਗਰੁ ਵਿਯ ਇਚ੍ਚੇਵ ਵਾ ਪਾਠੋ. ਮਾਸਭਤ੍ਤਂ ਮਾਸੋ ਉਤ੍ਤਰਪਦਲੋਪੇਨ, ਮਾਸਭਤ੍ਤੇਨ ਆਚਿਤਂ ਪੂਰਿਤਂ ਮਾਸਾਚਿਤਂ ਮਞ੍ਞੇ. ਤੇਨਾਹ ‘‘ਮਾਸਭਤ੍ਤਂ ਭੁਤ੍ਤਸ੍ਸ ਕੁਚ੍ਛਿ ਵਿਯਾ’’ਤਿ. ਉਤ੍ਤਰਪਦਲੋਪੇਨ ਵਿਨਾ ਅਤ੍ਥਂ ਦਸ੍ਸੇਤੁਂ ‘‘ਮਾਸਪੂਰਿਤਪਸਿਬ੍ਬਕੋ ਵਿਯਾ’’ਤਿ ਵੁਤ੍ਤਂ. ਤਿਨ੍ਤਮਾਸੋ ਵਿਯਾਤਿ ਤਿਨ੍ਤਮਾਸੋ ਪਸਿਬ੍ਬਕੋ ਵਿਯ. ਕਿਂ ਨੁ ਖੋ ਏਤਂ ਮਮ ਕੁਚ੍ਛਿਯਂ ਪੁਬ੍ਬਂ ਭਾਰਿਕਤ੍ਤਂ, ਕਿਂ ਨੁ ਖੋ ਕਥਂ ਨੁ ਖੋ ਜਾਤਨ੍ਤਿ ਅਧਿਪ੍ਪਾਯੋ? ਉਪਾਯੇਨਾਤਿ ਪਥੇਨ ਞਾਯੇਨ. ਬ੍ਯਤਿਰੇਕਤੋ ਪਨਸ੍ਸ ਅਨੁਪਾਯਂ ਦਸ੍ਸੇਤੁਂ ‘‘ਸਚੇ ਪਨਾ’’ਤਿਆਦਿ ਵੁਤ੍ਤਂ. ਅਤ੍ਤਾਨਮੇਵ ਵਾ ਸਨ੍ਧਾਯ ‘‘ਮਾ ਤਥਾਗਤਂ ਵਿਹੇਸੇਸੀ’’ਤਿ ਆਹ. ਯਥਾ ਹਿ ਅਰਿਯਸਙ੍ਘੋ ‘‘ਤਥਾਗਤਂ ਦੇਵਮਨੁਸ੍ਸਪੂਜਿਤਂ, ਸਙ੍ਘਂ ਨਮਸ੍ਸਾਮ ਸੁਵਤ੍ਥਿ ਹੋਤੂ’’ਤਿਆਦੀਸੁ (ਖੁ. ਪਾ. ੬.੧੮; ਸੁ. ਨਿ. ੨੪੧) ਤਥਾਗਤੋਤਿ ਵੁਚ੍ਚਤਿ, ਏਵਂ ਤਪ੍ਪਰਿਯਾਪਨ੍ਨਾ ਅਰਿਯਪੁਗ੍ਗਲਾ, ਯਥਾ ਚ ਪੁਰਿਮਕਾ ਦੁਤਿਯਅਗ੍ਗਸਾਵਕਾ ਕਪ੍ਪਾਨਂ ਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਪਾਰਮਿਯੋ ਪੂਰੇਤ੍ਵਾ ਆਗਤਾ, ਅਯਮ੍ਪਿ ਮਹਾਥੇਰੋ ਤਥਾ ਆਗਤੋਤਿ ਤਥਾਗਤੋਤਿ. ਪਤਿਅਗ੍ਗਲ਼ੇਵ ਅਟ੍ਠਾਸੀਤਿ ਅਗ੍ਗਲ਼ਸ੍ਸ ਬਹਿਭਾਗੇ ਅਟ੍ਠਾਸਿ.

੫੦੭. ਰੁਕ੍ਖਦੇਵਤਾ ਨਾਮ ਚਾਤੁਮਹਾਰਾਜਿਕੇਸੁ ਨਿਹੀਨੋ ਕਾਯੋ, ਤਸ੍ਮਾ ਨੇਸਂ ਮਨੁਸ੍ਸਗਨ੍ਧੋ ਪਰਿਚਿਤਤ੍ਤਾ ਨਾਤਿਜੇਗੁਚ੍ਛੋਤਿ ਆਹ ‘‘ਆਕਾਸਟ੍ਠਦੇਵਤਾਨ’’ਨ੍ਤਿ. ਆਬਾਧਂ ਕਰੋਤੀਤਿ ਦੁਕ੍ਖਂ ਜਨੇਤਿ. ਨਾਗਰਿਕੋਤਿ ਸੁਕੁਮਾਰੋ. ਪਰਿਚੋਕ੍ਖੋਤਿ ਸਬ੍ਬਸੋ ਸੁਚਿਰੂਪੋ. ਞਾਤਿਕੋਟਿਨ੍ਤਿ ਞਾਤਿਭਾਗਂ. ਅਨਾਦਿਮਤਿ ਹਿ ਸਂਸਾਰੇ ਞਾਤਿਭਾਗਰਹਿਤੋ ਨਾਮ ਸਤ੍ਤੋ ਕਸ੍ਸਚਿਪਿ ਨਤ੍ਥੀਤਿ ਅਧਿਪ੍ਪਾਯੋ. ਇਦਨ੍ਤਿ ‘‘ਸੋ ਮੇ ਤ੍ਵਂ ਭਾਗਿਨੇਯ੍ਯੋ ਹੋਸੀ’’ਤਿ ਇਦਂ ਵਚਨਂ. ਪਵੇਣਿਵਸੇਨਾਤਿ ਤਦਾ ਮਯ੍ਹਂ ਭਾਗਿਨੇਯ੍ਯੋ ਹੁਤ੍ਵਾ ਇਦਾਨਿ ਮਾਰਟ੍ਠਾਨੇ ਠਿਤੋਤਿ ਇਮਿਸ੍ਸਾ ਪਵੇਣਿਯਾ ਵਸੇਨ ਵੁਤ੍ਤਂ. ਅਞ੍ਞਸ੍ਸ ਵਾ ਵੇਸਮਂ ਧੁਰੋ ਵਿਧੁਰੋ. ਤੇਨਾਹ ‘‘ਅਞ੍ਞੇਹਿ ਸਦ੍ਧਿਂ ਅਸਦਿਸੋ’’ਤਿ. ਅਪ੍ਪਦੁਕ੍ਖੇਨਾਤਿ ਸੁਖੇਨੇਵ. ਪਨ੍ਥਾਨਂ ਅਵਨ੍ਤਿ ਗਚ੍ਛਨ੍ਤੀਤਿ ਪਥਾਵਿਨੋ. ਏਤ੍ਤਕੇਨਾਤਿ ਏਤ੍ਤਾਵਤਾ ਚਿਤਕਸਨ੍ਨਿਸਯੇਨ. ਉਦਕਲੇਣਨ੍ਤਿ ਉਦਕਨਿਸ੍ਸਨ੍ਦਨਲੇਣਂ. ਸਮਾਪਤ੍ਤਿਤੋਤਿ ਨਿਰੋਧਸਮਾਪਤ੍ਤਿਤੋ. ਸਮਾਪਤ੍ਤਿਫਲਨ੍ਤਿ ਨਿਰੋਧਸਮਾਪਤ੍ਤਿਫਲਂ.

੫੦੮. ਦਸਹਿ ਅਕ੍ਕੋਸਵਤ੍ਥੂਹੀਤਿ ਦਸਹਿਪਿ ਅਕ੍ਕੋਸਵਤ੍ਥੂਹਿ, ਤਤੋ ਕਿਞ੍ਚਿ ਅਹਾਪੇਨ੍ਤਾ. ਪਰਿਭਾਸਥਾਤਿ ਗਰਹਥ. ਘਟ੍ਟੇਥਾਤਿ ਅਨੂਨਾਹਿ ਕਥਾਹਿ ਇਮੇਸੁ ਓਵਿਜ੍ਝਥ. ਦੁਕ੍ਖਾਪੇਥਾਤਿ ਚਿਤ੍ਤੇ ਦੁਕ੍ਖਂ ਜਨੇਥ. ਏਤੇਸਨ੍ਤਿ ਤੇਸਂ ਭਿਕ੍ਖੂਨਂ ਤੁਮ੍ਹਾਕਂ ਅਕ੍ਕੋਸਨਾਦੀਹਿ ਭਿਕ੍ਖੂਨਂ ਕਿਲੇਸੁਪ੍ਪਤ੍ਤਿਯਾ. ਤੇਨੇਤ੍ਥ ਦੂਸੀ ਮਾਰੋ ਓਤਾਰਂ ਲਭਤਿ ਨਾਮਾਤਿ ਅਧਿਪ੍ਪਾਯੋ. ਉਪਟ੍ਠਾਤਬ੍ਬਂ ਇਭਂ ਅਰਹਨ੍ਤੀਤਿ ਇਬ੍ਭਾ, ਹਤ੍ਥਿਭਣ੍ਡਕਾ, ਹੀਨਜੀਵਿਕਤਾਯ ਹੇਤੇ ਇਬ੍ਭਾ ਵਿਯਾਤਿ ਇਬ੍ਭਾ, ਤੇ ਪਨ ਸਦੁਤਿਯਕਵਸੇਨ ‘‘ਗਹਪਤਿਕਾ’’ਤਿ ਵੁਤ੍ਤਾ. ਕਣ੍ਹਾਤਿ ਕਣ੍ਹਾਭਿਜਾਤਿਕਾ. ਪਾਦਤੋ ਜਾਤਤ੍ਤਾ ਪਾਦਾਨਂ ਅਪਚ੍ਚਾ. ਆਲਸਿਯਜਾਤਾਤਿ ਕਸਿਵਣਿਜ੍ਜਾਦਿਕਮ੍ਮਸ੍ਸ ਅਕਰਣੇਨ ਸਞ੍ਜਾਤਾਲਸਿਯਾ. ਗੂਥਨਿਦ੍ਧਮਨਪਨਾਲ਼ੀਤਿ ਵਚ੍ਚਕੂਪਤੋ ਗੂਥਸ੍ਸ ਨਿਕ੍ਖਮਪਦੇਸੋ.

ਮਨੁਸ੍ਸਾਨਂ ਅਕੁਸਲਂ ਨ ਭਵੇਯ੍ਯ ਤੇਸਂ ਤਾਦਿਸਾਯ ਅਭਿਸਨ੍ਧਿਯਾ ਅਭਾਵਤੋ. ਆਵੇਸਕਸ੍ਸ ਆਨੁਭਾਵੇਨ ਆਵਿਟ੍ਠਸ੍ਸ ਚਿਤ੍ਤਸਨ੍ਤਤਿ ਵਿਪਰਿਵਤ੍ਤਤੀਤਿ ਵੁਤ੍ਤੋਵਾਯਮਤ੍ਥੋ. ਵਿਸਭਾਗਵਤ੍ਥੁਨ੍ਤਿ ਭਿਕ੍ਖੂਨਂ ਸਨ੍ਤਿਕੇ ਇਤ੍ਥਿਰੂਪਂ, ਭਿਕ੍ਖੁਨੀਨਂ ਸਨ੍ਤਿਕੇ ਪੁਰਿਸਰੂਪਨ੍ਤਿ ਈਦਿਸਂ, ਅਞ੍ਞਂ ਵਾ ਪਬ੍ਬਜਿਤਾਨਂ ਅਸਾਰੁਪ੍ਪਂ ਵਿਸਭਾਗਵਤ੍ਥੁਂ. ਵਿਪ੍ਪਟਿਸਾਰਾਰਮ੍ਮਣਨ੍ਤਿ ਪਸ੍ਸਨ੍ਤਾਨਂ ਵਿਪ੍ਪਟਿਸਾਰਸ੍ਸ ਪਚ੍ਚਯਂ. ਲੇਪਯਟ੍ਠਿਨ੍ਤਿ ਲੇਪਲਿਤ੍ਤਂ ਵਾਕੁਰਯਟ੍ਠਿਂ.

੫੧੦. ਸੋਮਨਸ੍ਸਵਸੇਨਾਤਿ ਗੇਹਸ੍ਸਿਤਸੋਮਨਸ੍ਸਵਸੇਨ. ਅਞ੍ਞਥਤ੍ਤਨ੍ਤਿ ਉਪ੍ਪਿਲਾਵਿਤਤ੍ਤਂ. ਪੁਰਿਮਨਯੇਨੇਵਾਤਿ ‘‘ਸਚੇ ਮਾਰੋ ਮਨੁਸ੍ਸਾਨਂ ਸਰੀਰੇ ਅਧਿਮੁਚ੍ਚਿਤ੍ਵਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ. ਯਦਿ ਮਾਰੋਵ ਤਥਾ ਕਰੇਯ੍ਯ, ਮਨੁਸ੍ਸਾਨਂ ਕੁਸਲਂ ਨ ਭਵੇਯ੍ਯ, ਮਾਰਸ੍ਸੇਵ ਭਵੇਯ੍ਯ, ਸਰੀਰੇ ਪਨ ਅਨਧਿਮੁਚ੍ਚਿਤ੍ਵਾ ਤਾਦਿਸਂ ਪਸਾਦਨੀਯਂ ਪਸਾਦਵਤ੍ਥੁਂ ਦਸ੍ਸੇਸਿ. ਤੇਨਾਹ ‘‘ਯਥਾ ਹੀ’’ਤਿਆਦਿ.

੫੧੧. ਅਸੁਭਸਞ੍ਞਾਪਰਿਚਿਤੇਨਾਤਿ ਸਕਲਂ ਕਾਯਂ ਅਸੁਭਨ੍ਤਿ ਪਵਤ੍ਤਾਯ ਸਞ੍ਞਾਯ ਸਹਗਤਜ੍ਝਾਨਂ ਅਸੁਭਸਞ੍ਞਾ, ਤੇਨ ਪਰਿਚਿਤੇਨ ਪਰਿਭਾਵਿਤੇਨ. ਚੇਤਸਾ ਚਿਤ੍ਤੇਨ. ਬਹੁਲਨ੍ਤਿ ਅਭਿਣ੍ਹਂ. ਵਿਹਰਤੋਤਿ ਵਿਹਰਨ੍ਤਸ੍ਸ, ਅਸੁਭਸਮਾਪਤ੍ਤਿਬਹੁਲਸ੍ਸਾਤਿ ਅਤ੍ਥੋ. ਪਤਿਲੀਯਤੀਤਿ ਸਙ੍ਕੁਚਤਿ ਤਤ੍ਥ ਪਟਿਕੂਲਤਾਯ ਸਣ੍ਠਿਤਤ੍ਤਾ. ਪਤਿਕੁਟਤੀਤਿ ਅਪਸਕ੍ਕਤਿ. ਪਤਿਵਤ੍ਤਤੀਤਿ ਨਿਵਤ੍ਤਤਿ. ਤਤੋ ਏਵ ਨ ਸਮ੍ਪਸਾਰਿਯਤਿ. ਰਸਤਣ੍ਹਾਯਾਤਿ ਮਧੁਰਾਦਿਰਸਵਿਸਯਾਯ ਤਣ੍ਹਾਯ.

ਸਬ੍ਬਲੋਕੇ ਅਨਭਿਰਤਿਸਞ੍ਞਾਤਿ ਤੀਸੁਪਿ ਭਵੇਸੁ ਅਰੁਚ੍ਚਨਵਸੇਨ ਪਵਤ੍ਤਾ ਵਿਪਸ੍ਸਨਾਭਾਵਨਾ. ਨਿਬ੍ਬਿਦਾਨੁਪਸ੍ਸਨਾ ਹੇਸਾ. ਲੋਕਚਿਤ੍ਰੇਸੂਤਿ ਹਤ੍ਥਿਅਸ੍ਸਰਥਪਾਸਾਦਕੂਟਾਗਾਰਾਦਿਭੇਦੇਸੁ ਚੇਵ ਆਰਾਮਰਾਮਣੇਯ੍ਯਕਾਦਿਭੇਦੇਸੁ ਚ ਲੋਕੇ ਚਿਤ੍ਤਵਿਚਿਤ੍ਤੇਸੁ. ਰਾਗਸਨ੍ਤਾਨਿ ਵੂਪਸਨ੍ਤਰਾਗਾਨਿ. ਦੋਸਮੋਹਸਨ੍ਤਾਨੀਤਿ ਏਤ੍ਥਾਪਿ ਏਸੇਵ ਨਯੋ. ਇਮੇਸਂ ਏਵਂ ਕਮ੍ਮਟ੍ਠਾਨਗ੍ਗਹਣਂ ਸਬ੍ਬੇਸਂ ਸਪ੍ਪਾਯਭਾਵਤੋ.

੫੧੨. ਸਕ੍ਖਰਂ ਗਹੇਤ੍ਵਾਤਿ ਸਕ੍ਖਰਾਸੀਸੇਨ ਤਤ੍ਤਕਂ ਭਿਨ੍ਨਪਾਸਾਣਮੁਟ੍ਠਿਨ੍ਤਿ ਆਹ ‘‘ਅਨ੍ਤੋਮੁਟ੍ਠਿਯਂ ਤਿਟ੍ਠਨਪਮਾਣਂ ਪਾਸਾਣ’’ਨ੍ਤਿ. ਮੁਟ੍ਠਿਪਰਿਯਾਪਨ੍ਨਨ੍ਤਿ ਅਤ੍ਥੋ. ਅਯਞ੍ਹਿ ਪਾਸਾਣਸ੍ਸ ਹੇਟ੍ਠਿਮਕੋਟਿ. ਹਤ੍ਥਿਨਾਗੋਤਿ ਮਹਾਹਤ੍ਥੀ. ਮਹਨ੍ਤਪਰਿਯਾਯੋ ਨਾਗ-ਸਦ੍ਦੋਤਿ ਕੇਚਿ. ਅਹਿਨਾਗਾਦਿਤੋ ਵਾ ਵਿਸੇਸਨਤ੍ਥਂ ਹਤ੍ਥਿਨਾਗੋਤਿ ਵੁਤ੍ਤਂ. ਸਕਲਸਰੀਰੇਨੇਵ ਨਿਵਤ੍ਤਿਤ੍ਵਾ ਅਪਲੋਕੇਸੀਤਿ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਨ ਵਾਯਨ੍ਤਿ ਏਤ੍ਥ ਵਾ-ਸਦ੍ਦੋ ਅਵਧਾਰਣਤ੍ਥੋਤਿ ਆਹ ‘‘ਨੇਵ ਪਮਾਣਂ ਅਞ੍ਞਾਸੀ’’ਤਿ. ਸਹਾਪਲੋਕਨਾਯਾਤਿ ਚ ਵਚਨਤੋਤਿ ਇਮਿਨਾ ਵਚਨੇਨ ਇਮਂ ਵਚਨਮਤ੍ਤਂ ਗਹੇਤ੍ਵਾਤਿ ਅਧਿਪ੍ਪਾਯੋ. ਉਲ਼ਾਰੇਤਿ ਉਲ਼ਾਰਗੁਣੇ. ਭਗਵਨ੍ਤਞ੍ਹਿ ਠਪੇਤ੍ਵਾ ਨਤ੍ਥਿ ਤਦਾ ਸਦੇਵਕੇ ਲੋਕੇ ਤਾਦਿਸੋ ਗੁਣਵਿਸੇਸਯੁਤ੍ਤੋਤਿ.

ਵਿਸੁਂ ਵਿਸੁਂ ਪਚ੍ਚਤ੍ਤਵੇਦਨਿਯੋ ਅਯਸੂਲੇਨ ਸਦ੍ਧਿਂ ਭੂਤਾਨਿ ਛ ਫਸ੍ਸਾਯਤਨਾਨਿ ਏਤਸ੍ਸਾਤਿ ਛ ਫਸ੍ਸਾਯਤਨਂ, ਦੁਕ੍ਖਂ. ਤਂ ਏਤ੍ਥ ਅਤ੍ਥੀਤਿ ਛ ਫਸ੍ਸਾਯਤਨਿਕੋ, ਨਿਰਯੋ. ਤੇਨਾਹ ‘‘ਛਸੁ ਫਸ੍ਸਾ…ਪੇ… ਪਚ੍ਚਯੋ’’ਤਿ. ਸਮਾਹਨਤੀਤਿ ਸਮਾਹਤੋ, ਅਨੇਕਸਤਭੇਦੋ ਸਙ੍ਕੁਸਮਾਹਤੋ ਏਤ੍ਥ ਅਤ੍ਥੀਤਿ ਸਙ੍ਕੁਸਮਾਹਤੋ, ਨਿਰਯੋ. ਵਿਸੇਸਪਚ੍ਚਯਤਾਯ ਵੇਦਨਾਯ ਠਿਤੋਤਿ ਵੇਦਨਿਯੋ, ਕਾਰਣਾਕਾਰਕੇਨ ਵਿਨਾ ਪਚ੍ਚਤ੍ਤਂ ਸਯਮੇਵ ਵੇਦਨਿਯੋਤਿ ਪਚ੍ਚਤ੍ਤਵੇਦਨਿਯੋ. ਅਯਸੂਲੇਨ ਸਦ੍ਧਿਂ ਅਯਸੂਲਨ੍ਤਿ ਪਾਦਪਦੇਸਤੋ ਪਟ੍ਠਾਯ ਨਿਰਨ੍ਤਰਂ ਅਭਿਹਨਨਵਸੇਨ ਆਗਤੇਨ ਪਣ੍ਣਾਸਾਯ ਜਨੇਹਿ ਗਹਿਤੇਨ ਅਯਸੂਲੇਨ ਸਹ ਸੀਸਪਦੇਸਤੋ ਪਟ੍ਠਾਯ ਆਗਤਂ. ਅਯਸੂਲਭਾਵਸਾਮਞ੍ਞੇਨ ਚੇਤਂ ਏਕਵਚਨਂ, ਸਤਮਤ੍ਤਾਨਿ ਪਤਿਤਾਨਿ ਸੂਲਾਨਿ. ਇਮਿਨਾ ਤੇ ਠਾਨੇਨ ਚਿਨ੍ਤੇਤ੍ਵਾਤਿ ਨਿਸ੍ਸਿਤਵੋਹਾਰੇਨ ਨਿਸ੍ਸਯਂ ਵਦਤਿ. ਏਵਂ ਵੁਤ੍ਤਨ੍ਤਿ ‘‘ਤਦਾ ਜਾਨੇਯ੍ਯਾਸਿ ਵਸ੍ਸਸਹਸ੍ਸਂ ਮੇ ਨਿਰਯੇ ਪਚ੍ਚਮਾਨਸ੍ਸਾ’’ਤਿ ਏਵਂ ਵੁਤ੍ਤਂ. ਵੁਟ੍ਠਾਨਿਮਨ੍ਤਿ ਵੁਟ੍ਠਾਨੇ ਭਵਂ, ਅਨ੍ਤਿਮਨ੍ਤਿ ਅਤ੍ਥੋ. ਤੇਨਾਹ ‘‘ਵਿਪਾਕਵੁਟ੍ਠਾਨਵੇਦਨ’’ਨ੍ਤਿ, ਵਿਪਾਕਸ੍ਸ ਪਰਿਯੋਸਾਨਂ ਵੇਦਨਨ੍ਤਿ ਅਤ੍ਥੋ. ਦੁਕ੍ਖਤਰਾ ਹੋਤਿ ਪਦੀਪਸ੍ਸ ਵਿਜ੍ਝਾਯਨਕ੍ਖਣੇ ਮਹਨ੍ਤਭਾਵੋ ਵਿਯ.

੫੧੩. ਘਟ੍ਟਯਿਤ੍ਵਾ ਪੋਥੇਤ੍ਵਾ. ਪਾਟਿਯੇਕ੍ਕਵੇਦਨਾਜਨਕਾਤਿ ਪਚ੍ਚੇਕਂ ਮਹਾਦੁਕ੍ਖਸਮੁਪ੍ਪਾਦਕਾ. ਅਯਤੋ ਅਪਗਤੋ ਨਿਰਯੋ, ਸੋ ਦੇਵਦੂਤਸੁਤ੍ਤੇਨ (ਮ. ਨਿ. ੩.੨੬੧) ਦੀਪੇਤਬ੍ਬੋ. ਅਤ੍ਥਵਣ੍ਣਨਾ ਪਨਸ੍ਸ ਪਰਤੋ ਸਯਮੇਵ ਆਗਮਿਸ੍ਸਤਿ. ਇਮਂ ਪਨ ਅਤੀਤਵਤ੍ਥੁਂ ਆਹਰਿਤ੍ਵਾ ਅਤ੍ਤਨੋ ਞਾਣਾਨੁਭਾਵਦੀਪਨਮੁਖੇਨ ਮਾਰਂ ਸਨ੍ਤਜ੍ਜੇਨ੍ਤੋ ਮਹਾਥੇਰੋ ‘‘ਯੋਏਤਮਭਿਜਾਨਾਤੀ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯੋ ਮਹਾਭਿਞ੍ਞੋ ਏਤਂ ਕਮ੍ਮਂ ਕਮ੍ਮਫਲਞ੍ਚ ਹਤ੍ਥਤਲੇ ਠਪਿਤਂ ਆਮਲਕਂ ਵਿਯ ਅਭਿਮੁਖਂ ਕਤ੍ਵਾ ਪਚ੍ਚਕ੍ਖਤੋ ਜਾਨਾਤਿ. ਸਬ੍ਬਸੋ ਭਿਨ੍ਨਕਿਲੇਸਤਾਯ ਭਿਕ੍ਖੁ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕੋ, ਤਾਦਿਸਂ ਉਲ਼ਾਰਗੁਣਂ ਆਸਜ੍ਜ ਘਟ੍ਟਯਿਤ੍ਵਾ ਏਕਨ੍ਤਕਾਲ਼ਕੇਹਿ ਪਾਪਧਮ੍ਮੇਹਿ ਸਮਨ੍ਨਾਗਤਤ੍ਤਾ ਕਣ੍ਹ ਮਾਰ ਆਯਤਿਂ ਮਹਾਦੁਕ੍ਖਂ ਵਿਨ੍ਦਿਸ੍ਸਸਿ.

ਉਦਕਂ ਵਤ੍ਥੁਂ ਕਤ੍ਵਾਤਿ ਤਤ੍ਥ ਨਿਬ੍ਬਤ੍ਤਨਕਸਤ੍ਤਾਨਂ ਸਾਧਾਰਣਕਮ੍ਮਫਲੇਨ ਮਹਾਸਮੁਦ੍ਦਉਦਕਮੇਵ ਅਧਿਟ੍ਠਾਨਂ ਕਤ੍ਵਾ. ਤਥਾ ਹਿ ਤਾਨਿ ਕਪ੍ਪਟ੍ਠਿਤਿਕਾਨਿ ਹੋਨ੍ਤਿ. ਤੇਨਾਹ ‘‘ਕਪ੍ਪਟ੍ਠਾਯਿਨੋ’’ਤਿ. ਤੇਸਨ੍ਤਿ ਵਿਮਾਨਾਨਂ. ਏਤਂ ਯਥਾਵੁਤ੍ਤਵਿਮਾਨਵਤ੍ਥੁਂ ਤਾਸਂ ਅਚ੍ਛਰਾਨਂ ਸਮ੍ਪਤ੍ਤਿਂ, ਤਸ੍ਸ ਚ ਕਾਰਣਂ ਅਤ੍ਤਪਚ੍ਚਕ੍ਖਂ ਕਤ੍ਵਾ ਜਾਨਾਤਿ. ਪਾਦਙ੍ਗੁਟ੍ਠੇਨ ਕਮ੍ਪਯੀਤਿ ਪੁਬ੍ਬਾਰਾਮੇ ਵਿਸਾਖਾਯ ਮਹਾਉਪਾਸਿਕਾਯ ਕਾਰਿਤਂ ਸਹਸ੍ਸਗਬ੍ਭਪਟਿਮਣ੍ਡਿਤਮਹਾਪਾਸਾਦਂ ਅਤ੍ਤਨੋ ਪਾਦਙ੍ਗੁਟ੍ਠੇਨ ਕਮ੍ਪੇਸਿ. ਤੇਨਾਹ ‘‘ਇਦਂ ਪਾਸਾਦਕਮ੍ਪਨਸੁਤ੍ਤੇਨ ਦੀਪੇਤਬ੍ਬ’’ਨ੍ਤਿ. ਇਦਨ੍ਤਿ ‘‘ਯੋ ਵੇਜਯਨ੍ਤ’’ਨ੍ਤਿ ਇਮਿਸ੍ਸਾ ਗਾਥਾਯ ਅਤ੍ਥਜਾਤਂ ਚੂਲ਼ਤਣ੍ਹਾਸਙ੍ਖਯਵਿਮੁਤ੍ਤਿਸੁਤ੍ਤੇਨੇਵ (ਮ. ਨਿ. ੧.੩੯੩) ਦੀਪੇਤਬ੍ਬਂ.

ਤਸ੍ਸ ਬ੍ਰਹ੍ਮਗਣਸ੍ਸ ਤਥਾਚਿਨ੍ਤਨਸਮਨਨ੍ਤਰਮੇਵ ਤਸ੍ਮਿਂ ਬ੍ਰਹ੍ਮਲੋਕੇ ਸੁਧਮ੍ਮਂ ਬ੍ਰਹ੍ਮਸਭਂ ਗਨ੍ਤ੍ਵਾ. ਤੇਪੀਤਿ ਮਹਾਮੋਗ੍ਗਲ੍ਲਾਨਾਦਯੋ. ਪਚ੍ਚੇਕਂ ਦਿਸਾਸੂਤਿ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪੁਰਤ੍ਥਿਮਦਿਸਾਯਂ, ਮਹਾਕਸ੍ਸਪਤ੍ਥੇਰੋ ਦਕ੍ਖਿਣਦਿਸਾਯਂ, ਮਹਾਕਪ੍ਪਿਨਤ੍ਥੇਰੋ ਪਚ੍ਛਿਮਦਿਸਾਯਂ, ਅਨੁਰੁਦ੍ਧਤ੍ਥੇਰੋ ਉਤ੍ਤਰਦਿਸਾਯਨ੍ਤਿ ਏਵਂ ਚਤ੍ਤਾਰੋ ਥੇਰਾ ਬ੍ਰਹ੍ਮਪਰਿਸਮਤ੍ਥਕੇ ਮਜ੍ਝੇ ਨਿਸਿਨ੍ਨਸ੍ਸ ਭਗਵਤੋ ਸਮਨ੍ਤਤੋ ਚਤੁਦ੍ਦਿਸਾ ਨਿਸੀਦਿਂਸੁ. ਗਾਥਾ ਵੁਤ੍ਤਾਤਿ ‘‘ਯੋ ਬ੍ਰਹ੍ਮਂ ਪਰਿਪੁਚ੍ਛਤੀ’’ਤਿ ਗਾਥਾ ਵੁਤ੍ਤਾ. ਅਞ੍ਞਤਰਬ੍ਰਹ੍ਮਸੁਤ੍ਤੇਨਾਤਿ – ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਬ੍ਰਹ੍ਮੁਨੋ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤੀ’’ਤਿਆਦਿਨਾ (ਸਂ. ਨਿ. ੧.੧੭੬) ਮਹਾਵਗ੍ਗੇ ਆਗਤੇਨ ਅਞ੍ਞਤਰਬ੍ਰਹ੍ਮਸੁਤ੍ਤੇਨ.

ਝਾਨਵਿਮੋਕ੍ਖੇਨ ਫੁਸੀਤਿ ਝਾਨਵਿਮੋਕ੍ਖਸਨ੍ਨਿਸ੍ਸਯੇਨ ਅਭਿਞ੍ਞਾਞਾਣੇਨ ਫਸ੍ਸਯਿ. ਵਨਨ੍ਤਿ ਜਮ੍ਬੁਦੀਪਂ ਅਫਸ੍ਸਯੀਤਿ ਸਮ੍ਬਨ੍ਧੋ. ਜਮ੍ਬੁਦੀਪੋ ਹਿ ਵਨਬਹੁਲਤਾਯ ਇਧ ‘‘ਵਨ’’ਨ੍ਤਿ ਵੁਤ੍ਤੋ. ਤੇਨਾਹ ‘‘ਜਮ੍ਬੁਸਣ੍ਡਸ੍ਸ ਇਸ੍ਸਰੋ’’ਤਿ. ਪੁਬ੍ਬਵਿਦੇਹਾਨਂ ਦੀਪਨ੍ਤਿ ਪੁਬ੍ਬਵਿਦੇਹਵਾਸੀਨਂ ਦੀਪਂ, ਪੁਬ੍ਬਵਿਦੇਹਦੀਪਨ੍ਤਿ ਅਤ੍ਥੋ. ਭੂਮਿਸਯਾ ਨਰਾ ਨਾਮ ਅਪਰਗੋਯਾਨਕਾ ਉਤ੍ਤਰਕੁਰੁਕਾ ਚ. ਯਸ੍ਮਾ ਤੇ ਗੇਹਪਰਿਗ੍ਗਹਾਭਾਵਤੋ ਭੂਮਿਯਂਯੇਵ ਸਯਨ੍ਤਿ, ਨ ਪਾਸਾਦਾਦੀਸੁ. ਪਟਿਲਭੀਤਿ ਉਪ੍ਪਾਦੇਸਿ. ਏਤਂ ਆਸਂ ਮਾ ਅਕਾਸੀਤਿ ਏਸਾ ਯਥਾ ਪੁਬ੍ਬੇ ਦੂਸਿਮਾਰਸ੍ਸ, ਏਵਂ ਤੁਯ੍ਹਂ ਆਸਾ ਦੀਘਰਤ੍ਤਂ ਅਨਤ੍ਥਾਵਹਾ, ਤਸ੍ਮਾ ਏਦਿਸਂ ਆਸਂ ਮਾ ਅਕਾਸੀਤਿ ਮਾਰਸ੍ਸ ਓਵਾਦਂ ਅਦਾਸਿ. ਸੇਸਂ ਸਬ੍ਬਤ੍ਥ ਸੁਵਿਞ੍ਞੇਯ੍ਯਮੇਵ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਾਰਤਜ੍ਜਨੀਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਚੂਲ਼ਯਮਕਵਗ੍ਗਵਣ੍ਣਨਾ.

ਮੂਲਪਣ੍ਣਾਸਟੀਕਾ ਸਮਤ੍ਤਾ.

ਦੁਤਿਯੋ ਭਾਗੋ ਨਿਟ੍ਠਿਤੋ.