੬. ਮਹਾਧਮ੍ਮਸਮਾਦਾਨਸੁਤ੍ਤਵਣ੍ਣਨਾ

੪੭੩. ਏਵਂ ਇਦਾਨਿ ਵੁਚ੍ਚਮਾਨਾਕਾਰੋ ਕਾਮੋ ਕਾਮਨਂ ਇਚ੍ਛਾ ਏਤੇਸਨ੍ਤਿ ਏਵਂਕਾਮਾ. ਏਵਂ ਛਨ੍ਦੋ ਛਨ੍ਦਨਂ ਰੋਚਨਂ ਅਜ੍ਝਾਸਯੋ ਏਤੇਸਨ੍ਤਿ ਏਵਂਛਨ੍ਦਾ. ਅਭਿਮੁਖਂ, ਅਭਿਨਿਵਿਸ੍ਸ ਵਾ ਪਕਾਰੇਹਿ ਏਤਿ ਉਪਗਚ੍ਛਤੀਤਿ ਅਧਿਪ੍ਪਾਯੋ, ਲਦ੍ਧਿ. ਸਾ ਹਿ ਲਦ੍ਧਬ੍ਬਵਤ੍ਥੁਂ ਅਭਿਮੁਖਂ ‘‘ਏਵਮੇਤ’’ਨ੍ਤਿ ਅਭਿਨਿਵਿਸਨ੍ਤੀ ਤੇਨ ਤੇਨ ਪਕਾਰੇਨ ਉਪਗਚ੍ਛਤਿ, ਹਤ੍ਥਗਤਂ ਕਤ੍ਵਾ ਤਿਟ੍ਠਤਿ ਨ ਵਿਸ੍ਸਜ੍ਜੇਤਿ. ਏਵਂ ਵੁਚ੍ਚਮਾਨਾਕਾਰੋ ਅਧਿਪ੍ਪਾਯੋ ਏਤੇਸਨ੍ਤਿ ਏਵਂਅਧਿਪ੍ਪਾਯਾ. ਭਗਵਾ ਮੂਲਂ ਕਾਰਣਂ ਏਤੇਸਂ ਯਾਥਾਵਤੋ ਅਧਿਗਮਾਯਾਤਿ ਭਗਵਂਮੂਲਕਾ. ਤੇਨਾਹ ‘‘ਭਗਵਨ੍ਤਞ੍ਹਿ ਨਿਸ੍ਸਾਯ ਮਯਂ ਇਮੇ ਧਮ੍ਮੇ ਆਜਾਨਾਮ ਪਟਿਵਿਜ੍ਝਾਮਾ’’ਤਿ. ਅਮ੍ਹਾਕਂਧਮ੍ਮਾਤਿ ਤੇਹਿ ਅਤ੍ਤਨਾ ਅਧਿਗਨ੍ਤਬ੍ਬਤਾਯ ਵੁਤ੍ਤਂ. ਸੇਵਿਤਬ੍ਬਾਨਞ੍ਹਿ ਯਾਥਾਵਤੋ ਅਧਿਗਮਞਾਣਾਨਿ ਅਧਿਗਚ੍ਛਨਕਸਮ੍ਬਨ੍ਧੀਨਿ, ਤਾਨਿ ਚ ਸਮ੍ਮਾਸਮ੍ਬੁਦ੍ਧਮੂਲਕਾਨਿ ਅਨਞ੍ਞਵਿਸਯਤ੍ਤਾ. ਤੇਨਾਹ ‘‘ਪੁਬ੍ਬੇ ਕਸ੍ਸਪਸਮ੍ਬੁਦ੍ਧੇਨਾ’’ਤਿਆਦਿ. ਭਗਵਾ ਨੇਤਾ ਤੇਸਨ੍ਤਿ ਭਗਵਂਨੇਤ੍ਤਿਕਾ. ਨੇਤਾਤਿ ਸੇਵਿਤਬ੍ਬਧਮ੍ਮੇ ਵਿਨੇਯ੍ਯਸਨ੍ਤਾਨਂ ਪਾਪੇਤਾ. ਵਿਨੇਤਾਤਿ ਅਸੇਵਿਤਬ੍ਬਧਮ੍ਮੇ ਵਿਨੇਯ੍ਯਸਨ੍ਤਾਨਤੋ ਅਪਨੇਤਾ. ਤਦਙ੍ਗਵਿਨਯਾਦਿਵਸੇਨ ਵਾ ਵਿਨੇਤਾ. ਅਨੁਨੇਤਾਤਿ ਇਮੇ ਧਮ੍ਮਾ ਸੇਵਿਤਬ੍ਬਾ, ਇਮੇ ਨ ਸੇਵਿਤਬ੍ਬਾਤਿ ਉਭਯਸਮ੍ਪਾਪਨਾਪਨਯਨਤ੍ਥਂ ਪਞ੍ਞਪੇਤਾ. ਤੇਨਾਹ ‘‘ਯਥਾਸਭਾਵਤੋ’’ਤਿਆਦਿ.

ਪਟਿਸਰਨ੍ਤਿ ਏਤ੍ਥਾਤਿ ਪਟਿਸਰਣਂ, ਭਗਵਾ ਪਟਿਸਰਣਂ ਏਤੇਸਨ੍ਤਿ ਭਗਵਂਪਟਿਸਰਣਾ. ਪਟਿਸਰਤਿ ਸਭਾਵਸਮ੍ਪਟਿਵੇਧਵਸੇਨ ਪਚ੍ਚੇਕਮੁਪਗਚ੍ਛਤੀਤਿ ਵਾ ਪਟਿਸਰਣਂ, ਭਗਵਾ ਪਟਿਸਰਣਂ ਏਤੇਸਨ੍ਤਿ ਭਗਵਂਪਟਿਸਰਣਾ. ਪਟਿਵੇਧਵਸੇਨਾਤਿ ਪਟਿਵਿਜ੍ਝਿਤਬ੍ਬਤਾਵਸੇਨ. ਅਸਤਿਪਿ ਮੁਖੇ ਅਤ੍ਥਤੋ ਏਵਂ ਵਦਨ੍ਤੋ ਵਿਯ ਹੋਤੀਤਿ ਆਹ ‘‘ਫਸ੍ਸੋ ਆਗਚ੍ਛਤਿ, ਅਹਂ ਭਗਵਾ ਕਿਂ ਨਾਮੋ’’ਤਿ. ਪਟਿਭਾਤੂਤਿ ਏਤ੍ਥ ਪਟਿ-ਸਦ੍ਦਾਪੇਕ੍ਖਾਯ ‘‘ਭਗਵਨ੍ਤ’’ਨ੍ਤਿ ਉਪਯੋਗਵਚਨਂ, ਅਤ੍ਥੋ ਪਨ ਸਾਮਿਵਚਨਵਸੇਨੇਵ ਵੇਦਿਤਬ੍ਬੋਤਿ ਦਸ੍ਸੇਨ੍ਤੋ ਆਹ ‘‘ਭਗਵਤੋ’’ਤਿ ਪਟਿਭਾਤੂਤਿ ਚ ਭਗਵਤੋ ਭਾਗੋ ਹੋਤੁ. ਭਗਵਤੋ ਹਿ ਏਸ ਭਾਗੋ, ਯਦਿਦਂ ਧਮ੍ਮਸ੍ਸ ਦੇਸਨਾ, ਅਮ੍ਹਾਕਂ ਪਨ ਭਾਗੋ ਸਵਨਨ੍ਤਿ ਅਧਿਪ੍ਪਾਯੋ. ਕੇਚਿ ਪਨ ਪਟਿਭਾਤੂਤਿ ਪਦਿਸ੍ਸਤੂਤਿ ਅਤ੍ਥਂ ਵਦਨ੍ਤਿ, ਞਾਣੇਨ ਦਿਸ੍ਸਤੁ, ਦੇਸੀਯਤੂਤਿ ਵਾ ਅਤ੍ਥੋ. ਉਪਟ੍ਠਾਤੂਤਿ ਚ ਞਾਣਸ੍ਸ ਪਚ੍ਚੁਪਟ੍ਠਾਤੁ.

੪੭੪. ਨਿਸ੍ਸਯਿਤਬ੍ਬੇਤਿ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਨਵਸੇਨ ਅਪਸ੍ਸਯਿਤਬ੍ਬੇ. ਤਤਿਯਚਤੁਤ੍ਥਧਮ੍ਮਸਮਾਦਾਨਾਨਿ ਹਿ ਅਪਸ੍ਸਾਯ ਸਤ੍ਤਾਨਂ ਏਤਰਹਿ ਆਯਤਿਞ੍ਚ ਸਮ੍ਪਤ੍ਤਿਯੋ ਅਭਿਵਡ੍ਢਨ੍ਤਿ. ਭਜਿਤਬ੍ਬੇਤਿ ਤਸ੍ਸੇਵ ਵੇਵਚਨਂ. ਸੇਵਿਤਬ੍ਬੇਤਿ ਵਾ ਸਪ੍ਪੁਰਿਸੁਪਸ੍ਸਯਸਦ੍ਧਮ੍ਮਸ੍ਸਵਨਯੋਨਿਸੋਮਨਸਿਕਾਰੇ ਸਨ੍ਧਾਯਾਹ. ਭਜਿਤਬ੍ਬੇਤਿ ਤਪ੍ਪਚ੍ਚਯੇ ਦਾਨਾਦਿਪੁਞ੍ਞਧਮ੍ਮੇ.

੪੭੫. ਉਪ੍ਪਟਿਪਾਟਿਆਕਾਰੇਨਾਤਿ ਪਠਮਂ ਸਂਕਿਲੇਸਧਮ੍ਮੇ ਦਸ੍ਸੇਤ੍ਵਾ ਪਚ੍ਛਾ ਵੋਦਾਨਧਮ੍ਮਦਸ੍ਸਨਂ ਸਤ੍ਥੁ ਦੇਸਨਾਪਟਿਪਾਟਿ, ਯਥਾ – ‘‘ਵਾਮਂ ਮੁਞ੍ਚ, ਦਕ੍ਖਿਣਂ ਗਣ੍ਹਾ’’ਤਿ (ਧ. ਸ. ਅਟ੍ਠ. ੪੯੮; ਵਿਸੁਦ੍ਧਿ. ਮਹਾਟੀ. ੧.੧੪), ਤਥਾ ਉਪ੍ਪਟਿਪਾਟਿਪਕਾਰੇਨ, ਸਾ ਚ ਖੋ ਪੁਰਿਮੇਸੁ ਦ੍ਵੀਸੁ ਧਮ੍ਮਸਮਾਦਾਨੇਸੁ, ਪਚ੍ਛਿਮੇਸੁ ਪਨ ਪਟਿਪਾਟਿਯਾਵ ਮਾਤਿਕਾ ਪਟ੍ਠਪਿਤਾ. ਯਥਾਧਮ੍ਮਰਸੇਨੇਵਾਤਿ ਪਹਾਤਬ੍ਬਪਹਾਯਕਧਮ੍ਮਾਨਂ ਯਥਾਸਭਾਵੇਨੇਵ. ਸਭਾਵੋ ਹਿ ਯਾਥਾਵਤੋ ਰਸਿਤਬ੍ਬਤੋ ਜਾਨਿਤਬ੍ਬਤੋ ‘‘ਰਸੋ’’ਤਿ ਵੁਚ੍ਚਤਿ. ਪਠਮਂ ਪਹਾਤਬ੍ਬਧਮ੍ਮੇ ਦਸ੍ਸੇਤ੍ਵਾ ਤਦਨਨ੍ਤਰਂ ‘‘ਇਮੇ ਧਮ੍ਮਾ ਏਤੇਹਿ ਪਹੀਯਨ੍ਤੀ’’ਤਿ ਪਹਾਯਕਧਮ੍ਮਦਸ੍ਸਨਂ ਦੇਸਨਾਨੁਪੁਬ੍ਬੀ. ਗਹਣਂ ਆਦਿਯਨਂ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਨਂ.

੪੭੮. ਵਧਦਣ੍ਡਾਦੀਹਿ ਭੀਤਸ੍ਸ ਉਪਸਙ੍ਕਮਨੇ, ਮਿਚ੍ਛਾ ਚਰਿਤ੍ਵਾ ਤਥਾ ਅਪਗਮਨੇ ਚ ਪੁਬ੍ਬਾਪਰਚੇਤਨਾਨਂ ਵਸੇਨ ਮਿਚ੍ਛਾਚਾਰੋ ਦੁਕ੍ਖਵੇਦਨੋ ਹੋਤਿ, ਤਥਾ ਇਸ੍ਸਾਨਿਨ੍ਦਾਦੀਹਿ ਉਪਦ੍ਦੁਤਸ੍ਸ ਅਪਰਚੇਤਨਾਵਸੇਨ, ਏਵਂ ਅਭਿਜ੍ਝਾਮਿਚ੍ਛਾਦਿਟ੍ਠੀਸੁਪਿ ਯਥਾਰਹਂ ਵੇਦਿਤਬ੍ਬਂ. ਤਿਸ੍ਸਨ੍ਨਮ੍ਪਿ ਚੇਤਨਾਨਨ੍ਤਿ ਪੁਬ੍ਬਾਪਰਸਨ੍ਨਿਟ੍ਠਾਪਕਚੇਤਨਾਨਂ. ਅਦਿਨ੍ਨਾਦਾਨਂ ਮੁਸਾਵਾਦੋ ਪਿਸੁਣਵਾਚਾ ਸਮ੍ਫਪ੍ਪਲਾਪੋਤਿ ਇਮੇਸਂ ਚਤੁਨ੍ਨਂ ਸਨ੍ਨਿਟ੍ਠਾਪਕਚੇਤਨਾਨਂ ਸੁਖਸਮ੍ਪਯੁਤ੍ਤਾ ਵਾ ਉਪੇਕ੍ਖਾਸਮ੍ਪਯੁਤ੍ਤਾ ਵਾਤਿ ਅਯਂ ਨਯੋ ਇਧ ਅਧਿਕਤਤ੍ਤਾ ਨ ਉਦ੍ਧਟੋ. ਦੋਮਨਸ੍ਸਮੇਵ ਚੇਤ੍ਥ ਦੁਕ੍ਖਨ੍ਤਿ ਇਦਂ ਪੁਬ੍ਬਭਾਗਾਪਰਭਾਗਚੇਤਨਾਪਿ ਚੇਤ੍ਥ ਆਸਨ੍ਨਾ ਦੋਮਨਸ੍ਸਸਹਗਤਾ ਏਵ ਹੋਨ੍ਤੀਤਿ ਕਤ੍ਵਾ ਵੁਤ੍ਤਂ. ਅਨਾਸਨ੍ਨਾ ਪਨ ਸਨ੍ਧਾਯ ‘‘ਪਰਿਯੇਟ੍ਠਿਂ ਵਾ ਆਪਜ੍ਜਨ੍ਤਸ੍ਸਾ’’ਤਿਆਦਿ ਵੁਤ੍ਤਂ. ਤੇਨੇਵ ਮਿਚ੍ਛਾਚਾਰਾਭਿਜ੍ਝਾਮਿਚ੍ਛਾਦਿਟ੍ਠੀਨਂ ਪੁਬ੍ਬਭਾਗਾਪਰਭਾਗਚੇਤਨਾ ਆਸਨ੍ਨਾ ਸਨ੍ਨਿਟ੍ਠਾਪਕਚੇਤਨਾਗਤਿਕਾਵਾਤਿ ਦਸ੍ਸਿਤਂ ਹੋਤੀਤਿ ਦਟ੍ਠਬ੍ਬਂ. ਪਰਿਯੇਟ੍ਠਿਨ੍ਤਿ ਮਿਚ੍ਛਾਚਾਰਾਦੀਸੁ ਵੀਤਿਕ੍ਕਮਿਤਬ੍ਬਵਤ੍ਥੁਮਾਲਾਗਨ੍ਧਾਦਿਪਰਿਯੇਸਨਂ. ਪਾਣਾਤਿਪਾਤਾਦੀਸੁ ਮਾਰੇਤਬ੍ਬਵਤ੍ਥੁਆਵੁਧਾਦਿਪਰਿਯੇਸਨਂ ਆਪਜ੍ਜਨ੍ਤਸ੍ਸ. ਅਕਿਚ੍ਛੇਨਪਿ ਤੇਸਂ ਪਰਿਯੇਸਨਂ ਸਮ੍ਭਵਤੀਤਿ ‘‘ਵਟ੍ਟਤਿਯੇਵਾ’’ਤਿ ਸਾਸਙ੍ਕਂ ਵਦਤਿ.

੪੭੯. ਸੁਖਵੇਦਨਾ ਹੋਨ੍ਤੀਤਿ ਸੁਖਵੇਦਨਾਪਿ ਹੋਨ੍ਤੀਤਿ ਅਧਿਪ੍ਪਾਯੋ. ਤਾਸਂ ਚੇਤਨਾਨਂ ਅਸੁਖਵੇਦਨਤਾਪਿ ਲਬ੍ਭਤੀਤਿ ‘‘ਸੁਖਵੇਦਨਾਪਿ ਹੋਨ੍ਤਿਯੇਵਾ’’ਤਿ ਸਾਸਙ੍ਕਵਚਨਂ. ਸੋਮਨਸ੍ਸਮੇਵ ਚੇਤ੍ਥ ਸੁਖਨ੍ਤਿ ਇਦਂ ਪੁਬ੍ਬਭਾਗਾਪਰਭਾਗਚੇਤਨਾਪਿ ਸੋਮਨਸ੍ਸਸਹਗਤਾ ਏਵ ਹੋਨ੍ਤੀਤਿ ਕਤ੍ਵਾ ਵੁਤ੍ਤਂ. ਤਞ੍ਚ ਖੋ ਮਿਚ੍ਛਾਚਾਰਵਜ੍ਜਾਨਂ ਛਨ੍ਨਂ ਵਸੇਨ. ਮਿਚ੍ਛਾਚਾਰਸ੍ਸ ਪਨ ਪੁਬ੍ਬਾਪਰਭਾਗਸ੍ਸ ਵਸੇਨ ‘‘ਕਾਯਿਕਂ ਸੁਖਮ੍ਪਿ ਵਟ੍ਟਤਿਯੇਵਾਤਿ ਸਾਸਙ੍ਕਵਚਨਂ.

੪੮੦. ਦੋਸਜਪਰਿਲ਼ਾਹਵਸੇਨਸ੍ਸ ਸਿਯਾ ਕਾਯਿਕਮ੍ਪਿ ਦੁਕ੍ਖਨ੍ਤਿ ਅਧਿਪ੍ਪਾਯੇਨ ‘‘ਸੋ ਗਣ੍ਹਨ੍ਤੋਪਿ ਦੁਕ੍ਖਿਤੋ’’ਤਿ ਵੁਤ੍ਤਂ. ਚੇਤੋਦੁਕ੍ਖਮੇਵ ਵਾ ਸਨ੍ਧਾਯ ਤਸ੍ਸ ਅਪਰਾਪਰੁਪ੍ਪਤ੍ਤਿਦਸ੍ਸਨਤ੍ਥਂ ‘‘ਦੁਕ੍ਖਿਤੋ ਦੋਮਨਸ੍ਸਿਤੋ’’ਤਿ ਵੁਤ੍ਤਂ.

੪੮੧. ਦਸਸੁਪਿ ਪਦੇਸੂਤਿ ਦਸਸੁਪਿ ਕੋਟ੍ਠਾਸੇਸੁ, ਵਾਕ੍ਯੇਸੁ ਵਾ. ਉਪੇਕ੍ਖਾਸਮ੍ਪਯੁਤ੍ਤਤਾਪਿ ਸਮ੍ਭਵਤੀਤਿ ‘‘ਸੁਖਸਮ੍ਪਯੁਤ੍ਤਾ ਹੋਨ੍ਤਿਯੇਵਾ’’ਤਿ ਇਧ ਸਾਸਙ੍ਕਵਚਨਂ. ਪਾਣਾਤਿਪਾਤਾ ਪਟਿਵਿਰਤਸ੍ਸ ਕਾਯੋਪਿ ਸਿਯਾ ਵਿਗਤਦਰਥਪਰਿਲ਼ਾਹੋਤਿ ਪਾਣਾਤਿਪਾਤਾਵੇਰਮਣਿਆਦਿਪਚ੍ਚਯਾ ਕਾਯਿਕਪਟਿਸਂਵੇਦਨਾਪਿ ਸਮ੍ਭਵਤੀਤਿ ਸਹਾਪਿ ਸੁਖੇਨਾਤਿ ਏਤ੍ਥ ਕਾਯਿਯਸੁਖਮ੍ਪਿ ਵਟ੍ਟਤਿਯੇਵ.

੪੮੨. ਤਿਤ੍ਤਕਾਲਾਬੂਤਿ ਉਪਭੁਤ੍ਤਸ੍ਸ ਉਮ੍ਮਾਦਾਦਿਪਾਪਨੇਨ ਕੁਚ੍ਛਿਤਤਿਤ੍ਤਕਰਸੋ ਅਲਾਬੁ. ਨ ਰੁਚ੍ਚਿਸ੍ਸਤਿ ਅਨਿਟ੍ਠਰਸਤਾਯ ਅਨਿਟ੍ਠਫਲਤਾਯ ਚ.

੪੮੩. ਰਸਂ ਦੇਤੀਤਿ ਰਸਂ ਦਸ੍ਸੇਤਿ ਵਿਭਾਵੇਤਿ.

੪੮੪. ਪੂਤਿਮੁਤ੍ਤਨ੍ਤਿ ਪੂਤਿਸਭਾਵਮੁਤ੍ਤਂ. ਤਰੁਣਨ੍ਤਿ ਧਾਰਾਵਸੇਨ ਨਿਪਤਨ੍ਤਂ ਹੁਤ੍ਵਾ ਉਣ੍ਹਂ. ਤੇਨਸ੍ਸ ਉਪਰਿਮੁਤ੍ਤਤਮਾਹ. ਮੁਤ੍ਤਞ੍ਹਿ ਪਸ੍ਸਾਵਮਗ੍ਗਤੋ ਮੁਚ੍ਚਮਾਨਂ ਕਾਯੁਸ੍ਮਾਵਸੇਨ ਉਣ੍ਹਂ ਹੋਤਿ.

੪੮੫. ਯਂ ਭਗਨ੍ਦਰਸਂਸਟ੍ਠਂ ਲੋਹਿਤਂ ਪਕ੍ਖਨ੍ਦਤੀਤਿ ਭਗਨ੍ਦਰਬ੍ਯਾਧਿਸਹਿਤਾਯ ਲੋਹਿਤਪਕ੍ਖਨ੍ਦਤਾਯ ਵਸੇਨ ਯਂ ਲੋਹਿਤਂ ਵਿਸ੍ਸਵਤਿ. ਪਿਤ੍ਤਸਂਸਟ੍ਠਂ ਲੋਹਿਤਂ ਪਕ੍ਖਨ੍ਦਤੀਤਿ ਆਨੇਤ੍ਵਾ ਸਮ੍ਬਨ੍ਧੋ.

੪੮੬. ਉਬ੍ਬਿਦ੍ਧੇਤਿ ਦੂਰੇ. ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਗਮੇਨ ਹਿ ਆਕਾਸਂ ਉਤ੍ਤੁਙ੍ਗਂ ਵਿਯ ਦੂਰਂ ਵਿਯ ਚ ਖਾਯਤਿ. ਤੇਨਾਹ ‘‘ਦੂਰੀਭੂਤੇ’’ਤਿ. ਤਮਂਯੇਵ ਤਮਗਤਂ ‘‘ਗੂਥਗਤਂ ਮੁਤ੍ਤਗਤ’’ਨ੍ਤਿ (ਮ. ਨਿ. ੨.੧੧੯; ਅ. ਨਿ. ੯.੧੧) ਯਥਾ. ਭਾਸਤੇ ਚ ਤਪਤੇ ਚ ਵਿਰੋਚਤੇ ਚ ਇਦਂ ਚਤੁਤ੍ਥਂ ਧਮ੍ਮਸਮਾਦਾਨਂ ਵਿਭਜਨ੍ਤੇਨ ਕੁਸਲਕਮ੍ਮਪਥਸ੍ਸ ਵਿਭਜਿਤ੍ਵਾ ਦਸ੍ਸਿਤਤ੍ਤਾ.

ਸਙ੍ਗਰਰੁਕ੍ਖੋ ਕਨ੍ਦਮਾਦਸਪੋਵ. ਸਰਭਞ੍ਞਵਸੇਨਾਤਿ ਅਤ੍ਥਂ ਅਵਿਭਜਿਤ੍ਵਾ ਪਦਸੋ ਸਰਭਞ੍ਞਵਸੇਨ. ਓਸਾਰੇਨ੍ਤਸ੍ਸਾਤਿ ਉਚ੍ਚਾਰੇਨ੍ਤਸ੍ਸ. ਸਦ੍ਦੇਤਿ ਓਸਾਰਣਸਦ੍ਦੇ. ਅਧਿਗਤਵਿਸੇਸਂ ਅਨਾਰੋਚੇਤੁਕਾਮਾ ਦੇਵਤਾ ਤਤ੍ਥੇਵ ਅਨ੍ਤਰਧਾਯਿ. ਤਂ ਦਿਵਸਨ੍ਤਿ ਸਤ੍ਥਾਰਾ ਦੇਸਿਤਦਿਵਸੇ. ਇਤਿ ਅਤ੍ਤਨੋ ਵਿਸੇਸਾਧਿਗਮਨਿਮਿਤ੍ਤਤਾਯ ਅਯਂ ਦੇਵਤਾ ਇਮਂ ਸੁਤ੍ਤਂ ਪਿਯਾਯਤਿ. ਸੇਸਂ ਉਤ੍ਤਾਨਮੇਵ.

ਮਹਾਧਮ੍ਮਸਮਾਦਾਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.