੭. ਵੀਮਂਸਕਸੁਤ੍ਤਵਣ੍ਣਨਾ

੪੮੭. ਅਤ੍ਥਵੀਮਂਸਕੋਤਿ ਅਤ੍ਤਤ੍ਥਪਰਤ੍ਥਾਦਿਅਤ੍ਥਵਿਜਾਨਨਕੋ. ਸਙ੍ਖਾਰਵੀਮਂਸਕੋਤਿ ਸਙ੍ਖਤਧਮ੍ਮੇ ਸਲਕ੍ਖਣਤੋ ਸਾਮਞ੍ਞਲਕ੍ਖਣਤੋ ਵਾ ਆਯਤਨਾਦਿਵਿਭਾਗਤੋ ਚ ਵੀਮਂਸਕੋ. ਸਤ੍ਥੁਵੀਮਂਸਕੋਤਿ ‘‘ਸਤ੍ਥਾ ਨਾਮ ਗੁਣਤੋ ਏਦਿਸੋ ਏਦਿਸੋ ਚਾ’’ਤਿ ਸਤ੍ਥੁ ਉਪਪਰਿਕ੍ਖਕੋ. ਵੀਮਂਸਕੋਤਿ ਵਿਚਾਰਕੋ. ਯਂ ਚੇਤਸੋ ਸਰਾਗਾਦਿਵਿਭਾਗਤੋ ਪਰਿਚ੍ਛਿਨ੍ਦਨਂ, ਤਂ ਚੇਤੋਪਰਿਯਾਯੋ. ਤੇਨਾਹ ‘‘ਚਿਤ੍ਤਪਰਿਚ੍ਛੇਦ’’ਨ੍ਤਿ. ਯਸ੍ਮਾ ਚੇਤੋਪਰਿਯਾਯਞਾਣਲਾਭੀ – ‘‘ਇਦਂ ਚਿਤ੍ਤਂ ਇਤੋ ਪਰਂ ਪਵਤ੍ਤਂ ਇਦਮਿਤੋ ਪਰ’’ਨ੍ਤਿ ਪਰਸ੍ਸ ਚਿਤ੍ਤੁਪ੍ਪਤ੍ਤਿਂ ਪਜਾਨਾਤਿ, ਤਸ੍ਮਾ ਵੁਤ੍ਤਂ ‘‘ਚੇਤੋਪਰਿਯਾਯਨ੍ਤਿ ਚਿਤ੍ਤਵਾਰ’’ਨ੍ਤਿ. ਵਾਰਤ੍ਥੇਪਿ ਹਿ ਪਰਿਯਾਯ-ਸਦ੍ਦੋ ਹੋਤਿ – ‘‘ਕਸ੍ਸ ਨੁ ਖੋ, ਆਨਨ੍ਦ, ਪਰਿਯਾਯੋ ਅਜ੍ਜ ਭਿਕ੍ਖੁਨਿਯੋ ਓਵਦਿਤੁ’’ਨ੍ਤਿਆਦੀਸੁ (ਮ. ਨਿ. ੩.੩੯੮). ਚਿਤ੍ਤਚਾਰਨ੍ਤਿਪਿ ਪਾਠੋ, ਚਿਤ੍ਤਪਵਤ੍ਤਿਨ੍ਤਿ ਅਤ੍ਥੋ. ਏਵਂ ਵਿਜਾਨਨਤ੍ਥਾਯਾਤਿ ਇਦਾਨਿ ਵੁਚ੍ਚਮਾਨਾਕਾਰੇਨ ਵੀਮਂਸਨਤ੍ਥਾਯ.

੪੮੮. ਕਲ੍ਯਾਣਮਿਤ੍ਤੂਪਨਿਸ੍ਸਯਨ੍ਤਿ ਕਲ੍ਯਾਣਮਿਤ੍ਤਸਙ੍ਖਾਤਂ ਬ੍ਰਹ੍ਮਚਰਿਯਵਾਸਸ੍ਸ ਬਲਵਸਨ੍ਨਿਸ੍ਸਯਂ. ਉਪਡ੍ਢਂ ਅਤ੍ਤਨੋ ਆਨੁਭਾਵੇਨਾਤਿ ਇਮਿਨਾ ਪੁਗ੍ਗਲੇਨ ਸਮ੍ਪਾਦਿਯਮਾਨਸ੍ਸ ਬ੍ਰਹ੍ਮਚਰਿਯਸ੍ਸ ਉਪਡ੍ਢਭਾਗਮਤ੍ਤਂ ਅਤ੍ਤਨੋ ਵਿਮੁਤ੍ਤਿਪਰਿਪਾਚਕਧਮ੍ਮਾਨੁਭਾਵੇਨ ਸਿਜ੍ਝਤਿ. ਉਪਡ੍ਢਂ ਕਲ੍ਯਾਣਮਿਤ੍ਤਾਨੁਭਾਵੇਨਾਤਿ ਇਤਰੋ ਪਨ ਉਪਡ੍ਢਭਾਗੋ ਯਂ ਨਿਸ੍ਸਾਯ ਬ੍ਰਹ੍ਮਚਰਿਯਂ ਵੁਸ੍ਸਤਿ, ਤਸ੍ਸ ਕਲ੍ਯਾਣਮਿਤ੍ਤਸ੍ਸ ਉਪਦੇਸਾਨੁਭਾਵੇਨ ਹੋਤਿ, ਸਿਜ੍ਝਤੀਤਿ ਅਤ੍ਥੋ. ਲੋਕਸਿਦ੍ਧੋ ਏਵ ਅਯਮਤ੍ਥੋ. ਲੋਕਿਯਾ ਹਿ –

‘‘ਪਾਦੋ ਸਿਦ੍ਧੋ ਆਚਰਿਯਾ, ਪਾਦੋ ਹਿਸ੍ਸਾਨੁਭਾਵਤੋ;

ਤਂਵਿਜ੍ਜਾਸੇਵਕਾ ਪਾਦੋ, ਪਾਦੋ ਕਾਲੇਨ ਪਚ੍ਚਤੀ’’ਤਿ. –

ਵਦਨ੍ਤਿ. ਅਤ੍ਤਨੋ ਧਮ੍ਮਤਾਯਾਤਿ ਅਤ੍ਤਨੋ ਸਭਾਵੇਨ, ਞਾਣੇਨਾਤਿ ਅਤ੍ਥੋ. ਕਲ੍ਯਾਣਮਿਤ੍ਤਤਾਤਿ ਕਲ੍ਯਾਣੋ ਭਦ੍ਰੋ ਸੁਨ੍ਦਰੋ ਮਿਤ੍ਤੋ ਏਤਸ੍ਸਾਤਿ ਕਲ੍ਯਾਣਮਿਤ੍ਤੋ, ਤਸ੍ਸ ਭਾਵੋ ਕਲ੍ਯਾਣਮਿਤ੍ਤਤਾ, ਕਲ੍ਯਾਣਮਿਤ੍ਤਵਨ੍ਤਤਾ. ਸੀਲਾਦਿਗੁਣਸਮ੍ਪਨ੍ਨੇਹਿ ਕਲ੍ਯਾਣਪੁਗ੍ਗਲੇਹੇਵ ਅਯਨਂ ਪਵਤ੍ਤਿ ਕਲ੍ਯਾਣਸਹਾਯਤਾ. ਤੇਸੁ ਏਵ ਚਿਤ੍ਤੇਨ ਚੇਵ ਕਾਯੇਨ ਚ ਨਿਨ੍ਨਪੋਣਪਬ੍ਭਾਰਭਾਵੇਨ ਪਵਤ੍ਤਿ ਕਲ੍ਯਾਣਸਮ੍ਪਵਙ੍ਕਤਾ. ਮਾਹੇਵਨ੍ਤਿ ਏਵਂ ਮਾ ਆਹ, ‘‘ਉਪਡ੍ਢਂ ਬ੍ਰਹ੍ਮਚਰਿਯਸ੍ਸਾ’’ਤਿ ਮਾ ਕਥੇਹੀਤਿ ਅਤ੍ਥੋ. ਤਦਮਿਨਾਤਿ ਏਤ੍ਥ ਨ੍ਤਿ ਨਿਪਾਤਮਤ੍ਤਂ ਦ-ਕਾਰੋ ਪਦਸਨ੍ਧਿਕਰੋ ਇ-ਕਾਰਸ੍ਸ ਅ-ਕਾਰਂ ਕਤ੍ਵਾ ਨਿਦ੍ਦੇਸੋ. ਇਮਿਨਾਪੀਤਿ ਇਦਾਨਿ ਵੁਚ੍ਚਮਾਨੇਨਪੀਤਿ ਅਤ੍ਥੋ. ਪਰਿਯਾਯੇਨਾਤਿ ਕਾਰਣੇਨ. ਇਦਾਨਿ ਤਂ ਕਾਰਣਂ ਦਸ੍ਸੇਤੁਂ ‘‘ਮਮਂ ਹੀ’’ਤਿਆਦਿ ਵੁਤ੍ਤਂ.

ਯਥਾ ਚੇਤ੍ਥ, ਅਞ੍ਞੇਸੁਪਿ ਸੁਤ੍ਤੇਸੁ ਕਲ੍ਯਾਣਮਿਤ੍ਤੁਪਨਿਸ੍ਸਯਮੇਵ ਵਿਸੇਸੋਤਿ ਦਸ੍ਸੇਨ੍ਤੋ ‘‘ਭਿਕ੍ਖੂਨਂ ਬਾਹਿਰਙ੍ਗਸਮ੍ਪਤ੍ਤਿਂ ਕਥੇਨ੍ਤੋਪੀ’’ਤਿਆਦਿਮਾਹ. ਤਤ੍ਥ ਵਿਮੁਤ੍ਤਿਪਰਿਪਾਚਨਿਯਧਮ੍ਮੇਤਿ ਵਿਮੁਤ੍ਤਿਯਾ ਅਰਹਤ੍ਤਸ੍ਸ ਪਰਿਪਾਚਕਧਮ੍ਮੇ. ਪਚ੍ਚਯੇਤਿ ਗਿਲਾਨਪਚ੍ਚਯਭੇਸਜ੍ਜੇ. ਮਹਾਜਚ੍ਚੋਤਿ ਮਹਾਕੁਲੀਨੋ.

ਕਾਯਿਕੋ ਸਮਾਚਾਰੋਤਿ ਅਭਿਕ੍ਕਮਪਟਿਕ੍ਕਮਾਦਿਕੋ ਸਤਿਸਮ੍ਪਜਞ੍ਞਪਰਿਕ੍ਖਤੋ ਪਾਕਤਿਕੋ ਚ. ਵੀਮਂਸਕਸ੍ਸ ਉਪਪਰਿਕ੍ਖਕਸ੍ਸ. ਚਕ੍ਖੁਵਿਞ੍ਞੇਯ੍ਯੋ ਨਾਮ ਚਕ੍ਖੁਦ੍ਵਾਰਾਨੁਸਾਰੇਨ ਵਿਞ੍ਞਾਤਬ੍ਬਤ੍ਤਾ. ਸੋਤਵਿਞ੍ਞੇਯ੍ਯੋਤਿ ਏਤ੍ਥਾਪਿ ਏਸੇਵ ਨਯੋ. ਸਂਕਿਲਿਟ੍ਠਾਤਿ ਰਾਗਾਦਿਸਂਕਿਲੇਸਧਮ੍ਮੇਹਿ ਵਿਬਾਧਿਤਾ, ਉਪਤਾਪਿਤਾ ਵਿਦੂਸਿਤਾ ਮਲੀਨਾ ਚਾਤਿ ਅਤ੍ਥੋ. ਤੇ ਪਨ ਤੇਹਿ ਸਮਨ੍ਨਾਗਤਾ ਹੋਨ੍ਤੀਤਿ ਆਹ ‘‘ਕਿਲੇਸਸਮ੍ਪਯੁਤ੍ਤਾ’’ਤਿ. ਯਦਿ ਨ ਚਕ੍ਖੁਸੋਤਵਿਞ੍ਞੇਯ੍ਯਾ, ਪਾਲ਼ਿਯਂ ਕਥਂ ਤਥਾ ਵੁਤ੍ਤਾਤਿ ਆਹ ‘‘ਯਥਾ ਪਨਾ’’ਤਿਆਦਿ. ਕਾਯਵਚੀਸਮਾਚਾਰਾਪਿਸਂਕਿਲਿਟ੍ਠਾਯੇਵ ਨਾਮ ਸਂਕਿਲਿਟ੍ਠਚਿਤ੍ਤਸਮੁਟ੍ਠਾਨਤੋ. ਭਵਤਿ ਹਿ ਤਂਹੇਤੁਕੇਪਿ ਤਦੁਪਚਾਰੋ ਯਥਾ ‘‘ਸੇਮ੍ਹੋ ਗੁਲ਼ੋ’’ਤਿ. ‘‘ਮਾ ਮੇ ਇਦਂ ਅਸਾਰੁਪ੍ਪਂ ਪਰੋ ਅਞ੍ਞਾਸੀ’’ਤਿ ਪਨ ਪਟਿਚ੍ਛਨ੍ਨਤਾਯ ਨ ਨ ਉਪਲਬ੍ਭਨ੍ਤਿ. ‘‘ਨ ਖੋ ਮਯਂ, ਭਨ੍ਤੇ, ਭਗਵਤੋ ਕਿਞ੍ਚਿ ਗਰਹਾਮਾ’’ਤਿ ਵਤ੍ਵਾ ਗਰਹਿਤਬ੍ਬਾਭਾਵਂ ਦਸ੍ਸੇਨ੍ਤੋ ‘‘ਭਗਵਾ ਹੀ’’ਤਿਆਦਿਮਾਹ. ਅਭਾਵਿਤਮਗ੍ਗਸ੍ਸ ਹਿ ਗਰਹਿਤਬ੍ਬਤਾ ਨਾਮ ਸਿਯਾ, ਨ ਭਾਵਿਤਮਗ੍ਗਸ੍ਸ. ਏਸ ਉਤ੍ਤਰੋ ਮਾਣਵੋ ‘‘ਬੁਦ੍ਧਮ੍ਪਿ ਗਰਹਿਤ੍ਵਾ ਪਕ੍ਕਮਿਸ੍ਸਾਮੀ’’ਤਿ ਕਤ੍ਵਾ ਅਨੁਬਨ੍ਧਿ. ਏਵਂ ਚਿਨ੍ਤੇਸਿ ਮਹਾਭਿਨਿਕ੍ਖਮਨਦਿਵਸੇ ਅਤ੍ਤਨੋ ਵਚਨੇ ਅਟ੍ਠਿਤਤ੍ਤਾ. ਕਿਞ੍ਚਿ ਵਜ੍ਜਂ ਅਪਸ੍ਸਨ੍ਤੋ ਮਾਰੋ ਏਵਮਾਹ –

‘‘ਸਤ੍ਤ ਵਸ੍ਸਾਨਿ ਭਗਵਨ੍ਤਂ, ਅਨੁਬਨ੍ਧਿਂ ਪਦਾਪਦਂ;

ਓਤਾਰਂ ਨਾਧਿਗਚ੍ਛਿਸ੍ਸਂ, ਸਮ੍ਬੁਦ੍ਧਸ੍ਸ ਸਤੀਮਤੋ’’ਤਿ. (ਸੁ. ਨਿ. ੪੪੮);

ਕਾਲੇ ਕਣ੍ਹਾ, ਕਾਲੇ ਸੁਕ੍ਕਾਤਿ ਯਥਾਸਮਾਦਿਨ੍ਨਂ ਸਮ੍ਮਾਪਟਿਪਤ੍ਤਿਂ ਪਰਿਸੁਦ੍ਧਂ ਕਤ੍ਵਾ ਪਵਤ੍ਤੇਤੁਂ ਅਸਕ੍ਕੋਨ੍ਤਸ੍ਸ ਕਦਾਚਿ ਕਣ੍ਹਾ ਅਪਰਿਸੁਦ੍ਧਾ ਕਾਯਸਮਾਚਾਰਾਦਯੋ, ਕਦਾਚਿ ਸੁਕ੍ਕਾ ਪਰਿਸੁਦ੍ਧਾਤਿ ਏਵਂ ਅਨ੍ਤਰਨ੍ਤਰਾ ਬ੍ਯਾਮਿਸ੍ਸਵਸੇਨ ਵੋਮਿਸ੍ਸਕਾ. ਨਿਕ੍ਕਿਲੇਸਾਤਿ ਨਿਰੁਪਕ੍ਕਿਲੇਸਾ ਅਨੁਪਕ੍ਕਿਲਿਟ੍ਠਾ.

ਅਨਵਜ੍ਜਂ ਵਜ੍ਜਰਹਿਤਤ੍ਤਾ. ਦੀਘਰਤ੍ਤਨ੍ਤਿ ਅਚ੍ਚਨ੍ਤਸਂਯੋਗੇ ਉਪਯੋਗਵਚਨਂ. ਸਮਾਪਨ੍ਨੋਤਿ ਸਮ੍ਮਾ ਆਪਨ੍ਨੋ ਸਮਙ੍ਗੀਭੂਤੋ. ਤੇਨਾਹ ‘‘ਸਮਨ੍ਨਾਗਤੋ’’ਤਿ. ਅਤ੍ਤਨਾ ਕਤਸ੍ਸ ਅਸਾਰੁਪ੍ਪਸ੍ਸ ਪਟਿਚ੍ਛਾਦਨਤ੍ਥਂ ਆਰਞ੍ਞਕੋ ਵਿਯ ਹੁਤ੍ਵਾ. ਤਸ੍ਸ ਪਰਿਹਾਰਨ੍ਤਿ ਉਲ਼ਾਰੇਹਿ ਪੂਜਾਸਕ੍ਕਾਰੇਹਿ ਮਨੁਸ੍ਸੇਹਿ ਤਸ੍ਸ ਪਰਿਹਰਿਯਮਾਨਤਂ. ਅਤਿਦਪ੍ਪਿਤੋਤਿ ਏਵਂ ਮਨੁਸ੍ਸਾਨਂ ਸਮ੍ਭਾਵਨਾਯ ਅਤਿਵਿਯ ਦਤ੍ਤੋ ਗਬ੍ਬਿਤੋ.

ਨ ਇਤ੍ਤਰਸਮਾਪਨ੍ਨੋਤਿ ਜਾਨਾਤਿ. ਕਸ੍ਮਾ? ਸੀਲਂ ਨਾਮ ਦੀਘੇਨ ਅਦ੍ਧੁਨਾ ਜਾਨਿਤਬ੍ਬਂ, ਨ ਇਤ੍ਤਰੇਨ. ਇਦਾਨਿ ਅਨੇਕਜਾਤਿਸਮੁਦਾਚਾਰਵਸੇਨ ਤਥਾਗਤੋ ਇਮਂ ਕੁਸਲਂ ਧਮ੍ਮਂ ਦੀਘਰਤ੍ਤਂ ਸਮਾਪਨ੍ਨੋ, ਤਞ੍ਚਸ੍ਸ ਅਤਿਵਿਯ ਅਚ੍ਛਰਿਯਨ੍ਤਿ ਦਸ੍ਸੇਤੁਂ ‘‘ਅਨਚ੍ਛਰਿਯਂ ਚੇਤ’’ਨ੍ਤਿਆਦਿ ਵੁਤ੍ਤਂ.

ਅਰਞ੍ਞਗਾਮਕੇਤਿ ਅਰਞ੍ਞਪਦੇਸੇ ਏਕਸ੍ਮਿਂ ਖੁਦ੍ਦਕਗਾਮੇ. ਤਤ੍ਥ ਨੇਸਂ ਦਿਵਸੇ ਦਿਵਸੇ ਪਿਣ੍ਡਾਯ ਚਰਣਸ੍ਸ ਅਵਿਚ੍ਛਿਨ੍ਨਤਂ ਦਸ੍ਸੇਤੁਂ ‘‘ਪਿਣ੍ਡਾਯ ਚਰਨ੍ਤੀ’’ਤਿ ਵੁਤ੍ਤਂ. ਪਿਵਨ੍ਤੀਤਿ ਏਤ੍ਥਾਪਿ ਏਸੇਵ ਨਯੋ. ਦੁਲ੍ਲਭਲੋਣੋ ਹੋਤਿ ਸਮੁਦ੍ਦਸ੍ਸ ਦੂਰਤਾਯ.

ਤਦਾ ਕਿਰ ਵਿਦੇਹਰਟ੍ਠੇ ਸੋਲ਼ਸ ਗਾਮਸਹਸ੍ਸਾਨਿ ਮਹਨ੍ਤਾਨੇਵ. ਤੇਨਾਹ – ‘‘ਹਿਤ੍ਵਾ ਗਾਮਸਹਸ੍ਸਾਨਿ, ਪਰਿਪੁਣ੍ਣਾਨਿ ਸੋਲ਼ਸਾ’’ਤਿ. ਇਦਾਨਿ ਕਸ੍ਮਾ ‘‘ਸਨ੍ਨਿਧਿਂ ਦਾਨਿ ਕੁਬ੍ਬਸੀ’’ਤਿ ਮਂ ਘਟ੍ਟੇਥਾਤਿ ਵਤ੍ਥੁਕਾਮੋ ਤਂ ਅਨਾਵਿਕਤ੍ਵਾ ‘‘ਲੋਣ…ਪੇ… ਨ ਕਰੋਥਾ’’ਤਿ ਆਹ. ਗਨ੍ਧਾਰੋ ਤਸ੍ਸਾਧਿਪ੍ਪਾਯਂ ਵਿਭਾਵੇਤੁਕਾਮੋ ‘‘ਕਿਂ ਮਯਾ ਕਤਂ ਵੇਦੇਹੀਸੀ’’ਤਿ ਆਹ.

ਇਤਰੋ ਅਤ੍ਤਨੋ ਅਧਿਪ੍ਪਾਯਂ ਵਿਭਾਵੇਨ੍ਤੋ ‘‘ਹਿਤ੍ਵਾ’’ਤਿ ਗਾਥਮਾਹ. ਇਤਰੋ ‘‘ਧਮ੍ਮਂ ਭਣਾਮੀ’’ਤਿ ਗਾਥਨ੍ਤਿ ਏਵਂ ਸਬ੍ਬਾਪਿ ਨੇਸਂ ਵਚਨਪਟਿਵਚਨਗਾਥਾ. ਤਤ੍ਥ ਪਸਾਸਸੀਤਿ ਘਟ੍ਟੇਨ੍ਤੋ ਵਿਯ ਅਨੁਸਾਸਸਿ. ਨ ਪਾਪਮੁਪਲਿਮ੍ਪਤਿ ਚਿਤ੍ਤਪ੍ਪਕੋਪਾਭਾਵਤੋ. ਮਹਤ੍ਥਿਯਨ੍ਤਿ ਮਹਾਅਤ੍ਥਸਂਹਿਤਂ. ਨੋ ਚੇ ਅਸ੍ਸ ਸਕਾ ਬੁਦ੍ਧੀਤਿਆਦਿ ਵੇਦੇਹਇਸਿਨੋ – ‘‘ਆਚਰਿਯੋ ਮਮ ਹਿਤੇਸਿਤਾਯ ਠਤ੍ਵਾ ਧਮ੍ਮਂ ਏਵ ਭਣਤੀ’’ਤਿ ਯੋਨਿਸੋ ਉਮ੍ਮੁਜ੍ਜਨਾਕਾਰਦਸ੍ਸਨਂ. ਤੇਨਾਹ ‘‘ਏਵਞ੍ਚ ਪਨ ਵਤ੍ਵਾ’’ਤਿਆਦਿ.

‘‘ਞਤ੍ਤਾ’’ਤਿ ਲੋਕੇ ਞਾਯਤਿ ਵਿਸ੍ਸੁਤੋਤਿ ਞਾਤੋ, ਞਾਤਸ੍ਸ ਭਾਵੋ ਞਤ੍ਤਂ. ਅਜ੍ਝਾਪਨ੍ਨੋਤਿ ਉਪਗਤੋ. ਞਤ੍ਤ-ਗ੍ਗਹਣੇਨ ਪਤ੍ਥਟਯਸਤਾ ਵਿਭਾਵਿਤਾਤਿ ਆਹ ‘‘ਯਸਞ੍ਚ ਪਰਿਵਾਰਸਮ੍ਪਤ੍ਤਿ’’ਨ੍ਤਿ. ਕਿਨ੍ਤਿ ਕਿਂਪਯੋਜਨਂ, ਕੋ ਏਤ੍ਥ ਦੋਸੋਤਿ ਅਧਿਪ੍ਪਾਯੋ.

ਤਤ੍ਥ ਤਤ੍ਥ ਵਿਜ੍ਝਨ੍ਤੋਤਿ ਯਸਮਦੇਨ ਪਰਿਵਾਰਮਦੇਨ ਚ ਮਤ੍ਤੋ ਹੁਤ੍ਵਾ ਗਾਮੇਪਿ ਵਿਹਾਰੇਪਿ ਜਨਵਿਵਿਤ੍ਤੇਪਿ ਸਙ੍ਘਮਜ੍ਝੇਪਿ ਅਞ੍ਞੇ ਭਿਕ੍ਖੂ ਘਟ੍ਟੇਨ੍ਤੋ ‘‘ਮਯ੍ਹਂ ਨਾਮ ਪਾਦਾ ਇਤਰੇਸਂ ਪਾਦਫੁਸਨਟ੍ਠਾਨਂ ਫੁਸਨ੍ਤੀ’’ਤਿ ਅਫੁਸਿਤੁਕਾਮਤਾਯ ਅਗ੍ਗਪਾਦੇਨ ਭੂਮਿਂ ਫੁਸਨ੍ਤੋ ਵਿਯ ਚਰਤਿ. ਓਨਮਤੀਤਿ ਨਿਵਾਤਵੁਤ੍ਤਿਤਾਯ ਅਵਨਮਤਿ ਅਨੁਦ੍ਧਤੋ ਅਤ੍ਥਦ੍ਧੋ ਹੋਤਿ. ਅਕਿਞ੍ਚਨਭਾਵਨ੍ਤਿ ‘‘ਪਬ੍ਬਜਿਤੇਨ ਨਾਮ ਅਕਿਞ੍ਚਨਞਾਣੇਨ ਸਮਪਰਿਗ੍ਗਹੇਨ ਭਵਿਤਬ੍ਬ’’ਨ੍ਤਿ ਅਕਿਞ੍ਚਨਜ੍ਝਾਸਯਂ ਪਟਿਅਵੇਕ੍ਖਿਤ੍ਵਾ. ਲਾਭੇਪਿ ਤਾਦੀ, ਅਲਾਭੇਪਿ ਤਾਦੀਤਿ ਯਥਾ ਅਲਾਭਕਾਲੇ ਲਾਭਸ੍ਸ ਲਦ੍ਧਕਾਲੇਪਿ ਤਥੇਵਾਤਿ ਤਾਦੀ ਏਕਸਦਿਸੋ. ਯਸੇ ਸਤਿਪਿ ਮਹਾਪਰਿਵਾਰਕਾਲੇਪਿ.

ਅਭਯੋ ਹੁਤ੍ਵਾ ਉਪਰਤੋਤਿ ਨਿਬ੍ਭਯੋ ਹੁਤ੍ਵਾ ਭਯਸ੍ਸ ਅਭਾਵੇਨੇਵ ਓਰਮਿਤਬ੍ਬਤੋ ਉਪਰਤੋ ਭਯਹੇਤੂਨਂ ਪਹੀਨਤ੍ਤਾ. ਤਞ੍ਚ ਖੋ ਨ ਕਤਿਪਯਕਾਲਂ, ਅਥ ਖੋ ਅਚ੍ਚਨ੍ਤਮੇਵ ਉਪਰਤੋਤਿ ਅਚ੍ਚਨ੍ਤੂਪਰਤੋ. ਅਥ ਖੋ ਭਾਯਿਤਬ੍ਬਵਤ੍ਥੁਂ ਅਵੇਕ੍ਖਿਤ੍ਵਾ ਤਤੋ ਭਯੇਨ ਉਪਰਤੋ. ਕਿਲੇਸਾ ਏਵ ਭਾਯਿਤਬ੍ਬਤੋ ਕਿਲੇਸਭਯਂ. ਏਸ ਨਯੋ ਸੇਸੇਸੁਪਿ. ਸਤ੍ਤ ਸੇਕ੍ਖਾਤਿ ਸਤ੍ਤ ਸੇਕ੍ਖਾਪਿ ਭਯੂਪਰਤਾ, ਪਗੇਵ ਪੁਥੁਜ੍ਜਨੋਤਿ ਅਧਿਪ੍ਪਾਯੋ.

ਥਣ੍ਡਿਲਪੀਠਕਨ੍ਤਿ ਥਣ੍ਡਿਲਮਞ੍ਚਸਦਿਸਂ ਪੀਠਕਨ੍ਤਿ ਅਤ੍ਥੋ. ਨਿਸ੍ਸਾਯਾਤਿ ਅਪਸ੍ਸਾਯ ਤਂ ਅਪਸ੍ਸਾਯਂ ਕਤ੍ਵਾ. ਦ੍ਵਿਨ੍ਨਂ ਮਜ੍ਝੇ ਥਣ੍ਡਿਲਪੀਠਕਾ ਦ੍ਵਾਰੇ ਠਤ੍ਵਾ ਓਲੋਕੇਨ੍ਤਸ੍ਸ ਨੇਵਾਸਿਕਭਿਕ੍ਖੁਸ੍ਸ ਨ ਪਞ੍ਞਾਯਿ. ਅਸਞ੍ਞਤਨੀਹਾਰੇਨਾਤਿ ਨ ਸਞ੍ਞਤਾਕਾਰੇਨ. ‘‘ਮਂ ਭਾਯਨ੍ਤੋ ਹੇਟ੍ਠਾਮਞ੍ਚਂ ਪਵਿਟ੍ਠੋ ਭਵਿਸ੍ਸਤੀ’’ਤਿ ਹੇਟ੍ਠਾਮਞ੍ਚਂ ਓਲੋਕੇਤ੍ਵਾ. ਉਕ੍ਕਾਸਿ ‘‘ਬਹਿ ਗਚ੍ਛਨ੍ਤੋ ਅਕ੍ਕੋਸਿਤ੍ਵਾ ਮਾ ਅਪੁਞ੍ਞਂ ਪਸਵੀ’’ਤਿ. ਅਧਿਵਾਸੇਤੁਨ੍ਤਿ ਤਾਦਿਸਂ ਇਦ੍ਧਾਨਭਾਵਂ ਦਿਸ੍ਵਾਪਿ ਪਟਪਟਾਯਨ੍ਤੋ ਅਤ੍ਤਨੋ ਕੋਧਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ.

ਖਯੇਨੇਵਾਤਿ ਰਾਗਸ੍ਸ ਅਚ੍ਚਨ੍ਤਕ੍ਖਯੇਨੇਵ ਵੀਤਰਾਗਤ੍ਤਾ. ਨ ਪਟਿਸਙ੍ਖਾਯ ਵਾਰੇਤ੍ਵਾਤਿ ਨ ਪਟਿਸਙ੍ਖਾਨਬਲੇਨ ਰਾਗਪਰਿਯੁਟ੍ਠਾਨਂ ਨਿਵਾਰੇਤ੍ਵਾ ਵੀਤਰਾਗਤ੍ਤਾ. ਏਵਂ ਵੁਤ੍ਤਪ੍ਪਕਾਰੇਨ. ਕਾਯਸਮਾਚਾਰਾਦੀਨਂ ਸਂਕਿਲਿਟ੍ਠਾਨਂ ਵੀਤਿਕ੍ਕਮਿਯਾਨਞ੍ਚ ਅਭਾਵਂ ਆਚਾਰਸ੍ਸ ਵੋਦਾਨਂ ਚਿਰਕਾਲਸਮਾਚਿਣ੍ਣਤਾਯ ਞਾਤਸ੍ਸ ਸਹਿਤਭਾਵੇਪਿ ਅਨੁਪਕ੍ਕਿਲਿਟ੍ਠਤਾਯ ਅਭਯੂਪਰਤਭਾਵਸਮਨ੍ਨੇਸਨਾਯ ਆਕਰੀਯਤਿ ਞਾਪੇਤੁਂ ਇਚ੍ਛਿਤੋ ਅਤ੍ਥੋ ਪਕਾਰਤੋ ਞਾਪੀਯਤਿ ਏਤੇਹੀਤਿ ਆਕਾਰਾ, ਉਪਪਤ੍ਤਿਸਾਧਨਕਾਰਣਾਨਿ. ਤਾਨਿ ਪਨ ਯਸ੍ਮਾ ਅਤ੍ਤਨੋ ਯਥਾਨੁਮਤਸ੍ਸ ਅਤ੍ਥਸ੍ਸ ਞਾਪਕਭਾਵੇਨ ਵਵਤ੍ਥੀਯਨ੍ਤਿ, ਤਸ੍ਮਾ ਤਾਨਿ ਤੇਸਂ ਮੂਲਕਾਰਣਭੂਤਾਨਿ ਅਨੁਮਾਨਞਾਣਾਨਿ ਚ ਦਸ੍ਸੇਨ੍ਤੋ ਭਗਵਾ – ‘‘ਕੇ ਪਨਾਯਸ੍ਮਤੋ ਆਕਾਰਾ ਕੇ ਅਨ੍ਵਯਾ’’ਤਿ ਅਵੋਚਾਤਿ ਇਮਮਤ੍ਥਂ ਵਿਭਾਵੇਨ੍ਤੋ ‘‘ਆਕਾਰਾਤਿ ਕਾਰਣਾਨਿ, ਅਨ੍ਵਯਾਤਿ ਅਨੁਬੁਦ੍ਧਿਯੋ’’ਤਿ ਆਹ. ਯਥਾ ਹਿ ਲੋਕੇ ਦਿਟ੍ਠੇਨ ਧੂਮੇਨ ਅਦਿਟ੍ਠਂ ਅਗ੍ਗਿਂ ਅਨ੍ਵੇਤਿ ਅਨੁਮਾਨਤੋ ਜਾਨਾਤਿ, ਏਵਂ ਵੀਮਂਸਕੋ ਭਿਕ੍ਖੁ – ‘‘ਭਗਵਾ ਏਕੇਕਵਿਹਾਰੇਸੁ ਸੁਪ੍ਪਟਿਪਨ੍ਨੇਸੁ ਦੁਪ੍ਪਟਿਪਨ੍ਨੇਸੁ ਚ ਯਥਾ ਏਕਸਦਿਸਤਾਦਸ੍ਸਨੇਨ ਅਭਯੂਪਰਤਤਂ ਅਨ੍ਵੇਤਿ ਅਨੁਮਾਨਤੋ ਜਾਨਾਤਿ, ਸੁਪ੍ਪਟਿਪਨ੍ਨਦੁਪ੍ਪਟਿਪਨ੍ਨਪੁਗ੍ਗਲੇਸੁ ਅਨੁਸ੍ਸਾਦਨਾਨਪਸਾਦਨਪ੍ਪਤ੍ਤਾਯ ਸਤ੍ਥੁ ਅਵਿਪਰੀਤਧਮ੍ਮਦੇਸਨਤਾਯ ਸਮ੍ਮਾਸਮ੍ਬੁਦ੍ਧਤਂ ਸਙ੍ਘਸੁਪ੍ਪਟਿਪਤ੍ਤਿਞ੍ਚ ਅਨ੍ਵੇਤਿ ਅਨੁਮਾਨਤੋ ਜਾਨਾਤਿ, ਏਵਂ ਜਾਨਨ੍ਤੋ ਚ ਅਭਯੂਪਰਤੋ ਤਥਾਗਤੋ ਸਬ੍ਬਧਿ ਵੀਤਰਾਗਤ੍ਤਾ, ਯੋ ਯਤ੍ਥ ਵੀਤਰਾਗੋ, ਨ ਸੋ ਤਨ੍ਨਿਮਿਤ੍ਤਂ ਕਿਞ੍ਚਿ ਭਯਂ ਪਸ੍ਸਤਿ ਸੇਯ੍ਯਥਾਪਿ ਬ੍ਰਹ੍ਮਾ ਕਾਮਭਵਨਿਮਿਤ੍ਤਂ, ਤਥਾ ਸਮ੍ਮਾਸਮ੍ਬੁਦ੍ਧੋ ਭਗਵਾ ਅਵਿਪਰੀਤਧਮ੍ਮਦੇਸਨਤ੍ਤਾ, ਸ੍ਵਾਖਾਤੋ ਧਮ੍ਮੋ ਏਕਨ੍ਤਨਿਯ੍ਯਾਨਿਕਤ੍ਤਾ, ਸੁਪ੍ਪਟਿਪਨ੍ਨੋ ਸਙ੍ਘੋ ਅਵੇਚ੍ਚਪ੍ਪਸਨ੍ਨਤ੍ਤਾ’’ਤਿ ਵਤ੍ਥੁਤ੍ਤਯਂ ਗੁਣਤੋ ਯਾਥਾਵਤੋ ਜਾਨਾਤਿ.

ਗਣਬਨ੍ਧਨੇਨਾਤਿ ‘‘ਮਮ ਸਦ੍ਧਿਵਿਹਾਰਿਕਾ ਮਮ ਅਨ੍ਤੇਵਾਸਿਕਾ’’ਤਿ ਏਵਂ ਗਣੇ ਅਪੇਕ੍ਖਾਸਙ੍ਖਾਤੇਨ ਬਨ੍ਧਨੇਨ ਬਦ੍ਧਾ ਪਯੁਤ੍ਤਾ. ਤਾਯ ਤਾਯ ਪਟਿਪਤ੍ਤਿਯਾਤਿ ‘‘ਸੁਗਤਾ ਦੁਗ੍ਗਤਾ’’ਤਿ ਵੁਤ੍ਤਾਯ ਸੁਪ੍ਪਟਿਪਤ੍ਤਿਯਾ ਦੁਪ੍ਪਟਿਪਤ੍ਤਿਯਾ ਚ. ਉਸ੍ਸਾਦਨਾਤਿ ਗੁਣਵਸੇਨ ਉਕ੍ਕਂਸਨਾ. ਅਪਸਾਦਨਾਤਿ ਹੀਲ਼ਨਾ. ਉਭਯਤ੍ਥ ਗੇਹਸ੍ਸਿਤਵਸੇਨਾਤਿ ਇਮਿਨਾ ਸਮ੍ਮਾਪਟਿਪਤ੍ਤਿਯਾ ਪਰੇਸਂ ਉਯ੍ਯੋਜਨਤ੍ਥਂ – ‘‘ਪਣ੍ਡਿਤੋ, ਭਿਕ੍ਖਵੇ, ਮਹਾਕਚ੍ਚਾਨੋ’’ਤਿਆਦਿਨਾ (ਮ. ਨਿ. ੧.੨੦੫; ੩.੨੮੫, ੩੨੨) ਗੁਣਤੋ ਉਕ੍ਕਂਸਨਮ੍ਪਿ ਆਯਤਿਂ ਸਂਵਰਾਯ ਯਥਾਪਰਾਧਂ ਗਰਹਣਮ੍ਪਿ ਨ ਨਿਵਾਰੇਤਿ.

੪੮੯. ਵੀਮਂਸਕਸ੍ਸਪਿ ਅਧਿਪ੍ਪਾਯੋ ਵੀਮਂਸਨਵਸੇਨ ਪਵਤ੍ਤੋ. ਮੂਲਵੀਮਂਸਕੋ ਹੇਤੁਵਾਦਿਤਾਯ. ਗਣ੍ਠਿਵੀਮਂਸਕਸ੍ਸ ਅਨੁਸ੍ਸੁਤਿਭਾਵਤੋ ਵੁਤ੍ਤਂ ‘‘ਪਰਸ੍ਸੇਵ ਕਥਾਯ ਨਿਟ੍ਠਙ੍ਗਤੋ’’ਤਿ. ਤੇਨਾਹ ਭਗਵਾ – ‘‘ਪਰਸ੍ਸ ਚੇਤੋਪਰਿਯਾਯਂ ਅਜਾਨਨ੍ਤੇਨਾ’’ਤਿ. ਤਥਾਗਤੋਵ ਪਟਿਪੁਚ੍ਛਿਤਬ੍ਬੋਤਿ ਇਮਿਨਾ ਪੁਬ੍ਬੇ ਸਾਧਾਰਣਤੋ ਵੁਤ੍ਤਂ ਅਨੁਮਾਨਂ ਉਕ੍ਕਂਸਂ ਪਾਪੇਤ੍ਵਾ ਵਦਤਿ. ਉਕ੍ਕਂਸਗਤਞ੍ਹੇਤਂ ਅਨੁਮਾਨਂ, ਯਦਿਦਂ ਸਬ੍ਬਞ੍ਞੁਵਚਨਂ ਅਵਿਸਂਵਾਦਂ ਸਾਮਞ੍ਞਤੋ ਅਪੁਥੁਜ੍ਜਨਗੋਚਰਸ੍ਸ ਅਤ੍ਥਸ੍ਸ ਅਨੁਮਾਨਤੋ. ਤਿਵਿਧੋ ਹਿ ਅਤ੍ਥੋ, ਕੋਚਿ ਪਚ੍ਚਕ੍ਖਸਿਦ੍ਧੋ, ਯੋ ਰੂਪਾਦਿਧਮ੍ਮਾਨਂ ਪਚ੍ਚਤ੍ਤਵੇਦਨਿਯੋ ਅਨਿਦ੍ਦਿਸਿਤਬ੍ਬਾਕਾਰੋ. ਕੋਚਿ ਅਨੁਮਾਨਸਿਦ੍ਧੋ, ਯੋ ਘਟਾਦੀਸੁ ਪਸਿਦ੍ਧੇਨ ਪਚ੍ਚਯਾਯਤ੍ਤਭਾਵੇਨ ਸਾਧਿਯਮਾਨੋ ਸਦ੍ਦਾਦੀਨਂ ਅਨਿਚ੍ਚਤਾਦਿਆਕਾਰੋ. ਕੋਚਿ ਓਕਪ੍ਪਨਸਿਦ੍ਧੋ, ਯੋ ਪਚੁਰਜਨਸ੍ਸ ਅਚ੍ਚਨ੍ਤਮਦਿਟ੍ਠੋ ਸਦ੍ਧਾਵਿਸਯੋ ਪਰਲੋਕਨਿਬ੍ਬਾਨਾਦਿ. ਤਤ੍ਥ ਯਸ੍ਸ ਸਤ੍ਥੁਨੋ ਵਚਨਂ ਪਚ੍ਚਕ੍ਖਸਿਦ੍ਧੇ ਅਨੁਮਾਨਸਿਦ੍ਧੇ ਚ ਅਤ੍ਥੇ ਨ ਵਿਸਂਵਾਦੇਤਿ ਅਵਿਪਰੀਤਪ੍ਪਵਤ੍ਤਿਯਾ, ਤਸ੍ਸ ਵਚਨੇਨ ਸਦ੍ਧੇਯ੍ਯਤ੍ਥਸਿਦ੍ਧਿ, ਸਦ੍ਧੇਯ੍ਯਰੂਪਾ ਏਵ ਚ ਯੇਭੁਯ੍ਯੇਨ ਸਤ੍ਥੁਗੁਣਾ ਅਚ੍ਚਨ੍ਤਸਮ੍ਭਵਤੋ.

ਏਸ ਮਯ੍ਹਂ ਪਥੋਤਿ ਯ੍ਵਾਯਂ ਆਜੀਵਟ੍ਠਮਕਸੀਲਸਙ੍ਖਾਤੋ ਮਯ੍ਹਂ ਓਰਮਤ੍ਤਕੋ ਗੁਣੋ, ਏਸ ਅਪਰਚਿਤ੍ਤਵਿਦੁਨੋ ਵੀਮਂਸਕਸ੍ਸ ਭਿਕ੍ਖੁਨੋ ਮਮ ਜਾਨਨਪਥੋ ਜਾਨਨਮਗ੍ਗੋ. ਏਸ ਗੋਚਰੋਤਿ ਏਸੋ ਏਤ੍ਤਕੋ ਏਵ ਤਸ੍ਸ ਮਯਿ ਗੋਚਰੋ, ਨ ਇਤੋ ਪਰਂ. ਤਥਾ ਹਿ ਬ੍ਰਹ੍ਮਜਾਲੇਪਿ (ਦੀ. ਨਿ. ੧.੭) ਭਗਵਤਾ ਆਜੀਵਟ੍ਠਮਕਸੀਲਮੇਵ ਨਿਦ੍ਦਿਟ੍ਠਂ. ਏਤਾਪਾਥੋਤਿ ਏਤ੍ਤਕਾਪਾਥੋ. ਯੋ ਸੀਲੇ ਪਤਿਟ੍ਠਿਤੋ ‘‘ਏਤਂ ਮਮਾ’’ਤਿ, ‘‘ਇਮਿਨਾਹਂ ਸੀਲੇਨ ਦੇਵੋ ਵਾ ਭਵਿਸ੍ਸਾਮਿ ਦੇਵਞ੍ਞਤਰੋ ਵਾ’’ਤਿ ਤਣ੍ਹਾਯ ਪਰਾਮਸਨ੍ਤੋ, ਤਸ੍ਸ ਵਿਸੇਸਭਾਗਿਯਤਾਯ, ਨਿਬ੍ਬੇਧਭਾਗਿਯਤਾਯ ਵਾ ਅਕਾਰਣੇਨ ਤਣ੍ਹਂ ਅਨਤਿਵਤ੍ਤਨਤੋ ਸੋ ਤਮ੍ਮਯੋ ਨਾਮ. ਤੇਨਾਹ ‘‘ਨ ਤਮ੍ਮਯੋ ਨ ਸਤਣ੍ਹੋ’’ਤਿਆਦਿ.

ਸੁਤਸ੍ਸ ਉਪਰੂਪਰਿ ਵਿਸੇਸਾਵਹਭਾਵੇਨ ਉਤ੍ਤਰੁਤ੍ਤਰਞ੍ਚੇਵ ਤਸ੍ਸ ਚ ਵਿਸੇਸਸ੍ਸ ਅਨੁਕ੍ਕਮੇਨ ਪਣੀਤਤਰਭਾਵਤੋ ਪਣੀਤਤਰਞ੍ਚ ਕਤ੍ਵਾ ਦੇਸੇਤਿ. ਸਵਿਪਕ੍ਖਨ੍ਤਿ ਪਹਾਤਬ੍ਬਪਹਾਯਕਭਾਵੇਨ ਸਪ੍ਪਟਿਪਕ੍ਖਂ. ਕਣ੍ਹਂ ਪਟਿਬਾਹਿਤ੍ਵਾ ਸੁਕ੍ਕਨ੍ਤਿ ਇਦਂ ਧਮ੍ਮਜਾਤਂ ਕਣ੍ਹਂ ਨਾਮ, ਇਮਸ੍ਸ ਪਹਾਯਕਂ ਇਦਂ ਸੁਕ੍ਕਂ ਨਾਮਾਤਿ ਏਵਂ ਕਣ੍ਹਂ ਪਟਿਬਾਹਿਤ੍ਵਾ ਸੁਕ੍ਕਂ. ਸੁਕ੍ਕਂ ਪਟਿਬਾਹਿਤ੍ਵਾ ਕਣ੍ਹਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਇਧ ਪਨ ‘‘ਇਮਿਨਾ ਪਹਾਤਬ੍ਬ’’ਨ੍ਤਿ ਵਤ੍ਤਬ੍ਬਂ. ਸਉਸ੍ਸਾਹਨ੍ਤਿ ਸਬ੍ਯਾਪਾਰਂ. ਕਿਰਿਯਮਯਚਿਤ੍ਤਾਨਞ੍ਹਿ ਅਨੁਪਚ੍ਛਿਨ੍ਨਾਵਿਜ੍ਜਾਤਣ੍ਹਾਮਾਨਾਦਿਕੇ ਸਨ੍ਤਾਨੇ ਸਬ੍ਯਾਪਾਰਤਾ ਸਉਸ੍ਸਾਹਤਾ, ਸਵਿਪਾਕਧਮ੍ਮਤਾਤਿ ਅਤ੍ਥੋ. ਤਸ੍ਮਿਂ ਦੇਸਿਤੇ ਧਮ੍ਮੇਤਿ ਤਸ੍ਮਿਂ ਸਤ੍ਥਾਰਾ ਦੇਸਿਤੇ ਲੋਕਿਯਲੋਕੁਤ੍ਤਰਧਮ੍ਮੇ. ਏਕਚ੍ਚਂ ਏਕਦੇਸਭੂਤਂ ਮਗ੍ਗਫਲਨਿਬ੍ਬਾਨਸਙ੍ਖਾਤਂ ਪਟਿਵੇਧਧਮ੍ਮਂ ਅਭਿਞ੍ਞਾਯ ਅਭਿਵਿਸਿਟ੍ਠਾਯ ਮਗ੍ਗਪਞ੍ਞਾਯ ਜਾਨਿਤ੍ਵਾ. ਪਟਿਵੇਧਧਮ੍ਮੇਨ ਮਗ੍ਗੇਨ. ਦੇਸਨਾਧਮ੍ਮੇਤਿ ਦੇਸਨਾਰੁਲ਼੍ਹੇ ਪੁਬ੍ਬਭਾਗਿਯੇ ਬੋਧਿਪਕ੍ਖਿਯਧਮ੍ਮੇ ਨਿਟ੍ਠਂ ਗਚ੍ਛਤਿ – ‘‘ਅਦ੍ਧਾ ਇਮਾਯ ਪਟਿਪਦਾਯ ਜਰਾਮਰਣਤੋ ਮੁਚ੍ਚਿਸ੍ਸਾਮੀ’’ਤਿ. ਪੁਬ੍ਬੇ ਪੋਥੁਜ੍ਜਨਿਕਸਦ੍ਧਾਯਪਿ ਪਸਨ੍ਨੋ, ਤਤੋ ਭਿਯ੍ਯੋਸੋਮਤ੍ਤਾਯ ਅਵਿਪਰੀਤਧਮ੍ਮਦੇਸਨੋ ਸਮ੍ਮਾਸਮ੍ਬੁਦ੍ਧੋ ਸੋ ਭਗਵਾਤਿ ਸਤ੍ਥਰਿ ਪਸੀਦਤਿ. ਨਿਯ੍ਯਾਨਿਕਤ੍ਤਾਤਿ ਵਟ੍ਟਦੁਕ੍ਖਤੋ ਏਵ ਤਤੋ ਨਿਯ੍ਯਾਨਾਵਹਤ੍ਤਾ. ਵਙ੍ਕਾਦੀਤਿ ਆਦਿ-ਸਦ੍ਦੇਨ ਅਞ੍ਞਂ ਅਸਾਮੀਚਿਪਰਿਯਾਯਂ ਸਬ੍ਬਂ ਦੋਸਂ ਸਙ੍ਗਣ੍ਹਾਤਿ.

੪੯੦. ਇਮੇਹਿ ਸਤ੍ਥੁਵੀਮਂਸਨਕਾਰਣੇਹੀਤਿ ‘‘ਪਰਿਸੁਦ੍ਧਕਾਯਸਮਾਚਾਰਤਾਦੀਹਿ ਚੇਵ ਉਤ੍ਤਰੁਤ੍ਤਰਿਪਣੀਤਪਣੀਤਅਵਿਪਰੀਤਧਮ੍ਮਦੇਸਨਾਹਿ ਚਾ’’ਤਿ ਇਮੇਹਿ ਯਥਾਵੁਤ੍ਤੇਹਿ ਸਤ੍ਥੁਉਪਪਰਿਕ੍ਖਨਕਾਰਣੇਹਿ. ਅਕ੍ਖਰਸਮ੍ਪਿਣ੍ਡਨਪਦੇਹੀਤਿ ਤੇਸਂਯੇਵ ਕਾਰਣਾਨਂ ਸਮ੍ਬੋਧਨੇਹਿ ਅਕ੍ਖਰਸਮੁਦਾਯਲਕ੍ਖਣੇਹਿ ਪਦੇਹਿ. ਇਧ ਵੁਤ੍ਤੇਹਿ ਅਕ੍ਖਰੇਹੀਤਿ ਇਮਸ੍ਮਿਂ ਸੁਤ੍ਤੇ ਵੁਤ੍ਤੇਹਿ ਯਥਾਵੁਤ੍ਤਸ੍ਸ ਅਤ੍ਥਸ੍ਸ ਅਭਿਬ੍ਯਞ੍ਜਨਤੋ ਬ੍ਯਞ੍ਜਨਸਞ੍ਞਿਤੇਹਿ ਅਕ੍ਖਰੇਹਿ. ਓਕਪ੍ਪਨਾਤਿ ਸਦ੍ਧੇਯ੍ਯਵਤ੍ਥੁਂ ਓਕ੍ਕਨ੍ਤਿਤ੍ਵਾ ਪਸੀਦਨਤੋ ਓਕਪ੍ਪਨਲਕ੍ਖਣਾ. ਸਦ੍ਧਾਯ ਮੂਲਂ ਨਾਮਾਤਿ ਅਵੇਚ੍ਚਪ੍ਪਸਾਦਭੂਤਾਯ ਸਦ੍ਧਾਯ ਮੂਲਂ ਨਾਮ ਕਾਰਣਨ੍ਤਿ ਸਦ੍ਦਹਨਸ੍ਸ ਕਾਰਣਂ ਪਰਿਸੁਦ੍ਧਕਾਯਸਮਾਚਾਰਾਦਿਕਂ. ਥਿਰਾ ਪਟਿਪਕ੍ਖਸਮੁਚ੍ਛੇਦੇਨ ਸੁਪ੍ਪਤਿਟ੍ਠਿਤਤ੍ਤਾ. ਹਰਿਤੁਂ ਨ ਸਕ੍ਕਾਤਿ ਅਪਨੇਤੁਂ ਅਸਕ੍ਕੁਣੇਯ੍ਯਾ. ਇਤਰੇਸੁ ਸਮਣਬ੍ਰਾਹ੍ਮਣਦੇਵੇਸੁ ਵਤ੍ਤਬ੍ਬਮੇਵ ਨਤ੍ਥੀਤਿ ਆਹ ‘‘ਸਮਿਤਪਾਪਸਮਣੇਨ ਵਾ’’ਤਿਆਦਿ.

‘‘ਬੁਦ੍ਧਾਨਂ ਕੇਸਞ੍ਚਿ ਸਾਵਕਾਨਞ੍ਚ ਵਿਬਾਧਨਤ੍ਥਂ ਮਾਰੋ ਉਪਗਚ੍ਛਤੀ’’ਤਿ ਸੁਤਪੁਬ੍ਬਤ੍ਤਾ ‘‘ਅਯਂ ਮਾਰੋ ਆਗਤੋ’’ਤਿ ਚਿਨ੍ਤੇਸਿ. ਆਨੁਭਾਵਸਮ੍ਪਨ੍ਨੇਨ ਅਰਿਯਸਾਵਕੇਨ ਪੁਚ੍ਛਿਤਤ੍ਤਾ ਮੁਸਾਵਾਦਂ ਕਾਤੁਂ ਨਾਸਕ੍ਖਿ. ਏਤੇਤਿ ਯਥਾਵੁਤ੍ਤੇ ਸਮਿਤਪਾਪਸਮਣਾਦਯੋ ਠਪੇਤ੍ਵਾ. ਸਭਾਵਸਮਨ੍ਨੇਸਨਾਤਿ ਯਾਥਾਵਸਮਨ੍ਨੇਸਨਾ ਅਵਿਪਰੀਤਵੀਮਂਸਾ. ਸਭਾਵੇਨੇਵਾਤਿ ਸਬ੍ਭਾਵੇਨੇਵ ਯਥਾਭੂਤਗੁਣਤੋ ਏਵ. ਸੁਟ੍ਠੁ ਸਮ੍ਮਦੇਵ. ਸਮਨ੍ਨੇਸਿਤੋਤਿ ਉਪਪਰਿਕ੍ਖਿਤੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵੀਮਂਸਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.