੫. ਚੂਲ਼ਧਮ੍ਮਸਮਾਦਾਨਸੁਤ੍ਤਵਣ੍ਣਨਾ

੪੬੮. ਧਮ੍ਮੋਤਿ ਗਹਿਤਗਹਣਾਨੀਤਿ ਧਮ੍ਮੋ ਵਾ ਹੋਤੁ ਇਤਰੋ ਵਾ, ਧਮ੍ਮੋਤਿ ਪਗ੍ਗਹਿਤਗ੍ਗਾਹਪ੍ਪਵਤ੍ਤਾ ਚਰਿਯਾਵ. ਆਯੂਹਨਕ੍ਖਣੇਤਿ ਤਸ੍ਸ ਧਮ੍ਮੋਤਿ ਗਹਿਤਸ੍ਸ ਪਵਤ੍ਤਨਕ੍ਖਣੇ. ਸੁਖਨ੍ਤਿ ਅਕਿਚ੍ਛਂ. ਤੇਨਾਹ ‘‘ਸੁਕਰ’’ਨ੍ਤਿ. ਦੁਕ੍ਖਵਿਪਾਕਨ੍ਤਿ ਅਨਿਟ੍ਠਫਲਵਿਪਚ੍ਚਨਂ.

੪੬੯. ਯਥਾ ਚਕ੍ਖਾਦੀਨਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਯਥਾਸਕਂ ਵਿਸਯਗ੍ਗਹਣਂ ਸਭਾਵਸਿਦ੍ਧਂ, ਏਵਂ ਮਨਸੋਪਿ. ਤੇ ਚ ਵਿਸਯਾ ਇਟ੍ਠਾਕਾਰਤੋ ਗਹਣੇ ਨ ਕੋਚਿ ਦੋਸੋ, ਪੁਰਿਸਤ੍ਤਭਾਵੇ ਨ ਚ ਤੇ ਦੋਸਂ ਪਵਤ੍ਤੇਨ੍ਤੀਤਿ ਅਯਂ ਤੇਸਂ ਸਮਣਬ੍ਰਾਹ੍ਮਣਾਨਂ ਲਦ੍ਧੀਤਿ ਆਹ ‘‘ਵਤ੍ਥੁਕਾਮੇਸੁਪਿ ਕਿਲੇਸਕਾਮੇਸੁਪਿ ਦੋਸੋ ਨਤ੍ਥੀ’’ਤਿ, ਅਸ੍ਸਾਦੇਤ੍ਵਾ ਵਿਸਯਪਰਿਭੋਗੇ ਨਤ੍ਥਿ ਆਦੀਨਵੋ, ਤਪ੍ਪਚ੍ਚਯਾ ਨ ਕੋਚਿ ਅਨ੍ਤਰਾਯੋਤਿ ਅਧਿਪ੍ਪਾਯੋ. ਪਾਤਬ੍ਯਤਂ ਆਪਜ੍ਜਨ੍ਤੀਤਿ ਪਰਿਭੁਞ੍ਜਨਕਤਂ ਉਪਗਚ੍ਛਨ੍ਤਿ. ਪਰਿਭੋਗਤ੍ਥੋ ਹਿ ਅਯਂ ਪਾ-ਸਦ੍ਦੋ ਕਤ੍ਤੁਸਾਧਨੋ ਚ ਤਬ੍ਯ-ਸਦ੍ਦੋ, ਯਥਾਰੁਚਿ ਪਰਿਭੁਞ੍ਜਨ੍ਤੀਤਿ ਅਤ੍ਥੋ. ਕਿਲੇਸਕਾਮੋਪਿ ਅਸ੍ਸਾਦਿਯਮਾਨੋ ਵਤ੍ਥੁਕਾਮਨ੍ਤੋਗਧੋਯੇਵ, ਕਿਲੇਸਕਾਮਵਸੇਨ ਪਨ ਨੇਸਂ ਅਸ੍ਸਾਦੇਤਬ੍ਬਤਾਤਿ ਆਹ ‘‘ਵਤ੍ਥੁਕਾਮੇਸੁ ਕਿਲੇਸਕਾਮੇਨ ਪਾਤਬ੍ਯਤ’’ਨ੍ਤਿ. ਕਿਲੇਸਕਾਮੇਨਾਤਿ ਕਰਣਤ੍ਥੇ ਕਰਣਵਚਨਂ. ਪਾਤਬ੍ਯਤਂ ਪਰਿਭੁਞ੍ਜਿਤਬ੍ਬਤਨ੍ਤਿ ਏਤ੍ਥਾਪਿ ਕਤ੍ਤੁਵਸੇਨੇਵ ਅਤ੍ਥੋ ਵੇਦਿਤਬ੍ਬੋ. ਮੋਲ਼ਿਂ ਕਤ੍ਵਾਤਿ ਵੇਣਿਬਨ੍ਧਵਸੇਨ ਮੋਲ਼ਿਂ ਕਤ੍ਵਾ. ਤਾਪਸਪਰਿਬ੍ਬਾਜਿਕਾਹੀਤਿ ਤਾਪਸਪਬ੍ਬਜ੍ਜੂਪਗਤਾਹਿ. ਪਰਿਞ੍ਞਂ ਪਞ੍ਞਪੇਨ੍ਤੀਤਿ ਇਦਂ ‘‘ਪਹਾਨਮਾਹਂਸੂ’’ਤਿ ਪਦਸ੍ਸੇਵ ਵੇਵਚਨਨ੍ਤਿ ‘‘ਪਹਾਨਂ ਸਮਤਿਕ੍ਕਮਂ ਪਞ੍ਞਪੇਨ੍ਤੀ’’ਤਿ ਵੁਤ੍ਤਂ. ਤੇਨ ਕਾਮਾ ਨਾਮੇਤੇ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾਤਿ ਯਾਥਾਵਤੋ ਪਰਿਜਾਨਨਂ ਇਧ ‘‘ਪਹਾਨ’’ਨ੍ਤਿ ਅਧਿਪ੍ਪੇਤਂ, ਨ ਵਿਨਾਭਾਵਮਤ੍ਤਨ੍ਤਿ ਦਸ੍ਸੇਤਿ. ਮਾਲੁਵਾਸਿਪਾਟਿਕਾਤਿ ਮਾਲੁਵਾਵਿਦਲਂ ਮਾਲੁਵਾਫਲੇ ਪੋਟ੍ਟਲਿਕਾ. ਸਨ੍ਤਾਸਂ ਆਪਜ੍ਜੇਯ੍ਯਾਤਿ ਸਾਲੇ ਅਧਿਵਤ੍ਥਦੇਵਤਾਯ ਪਵਤ੍ਤਿਂ ਗਹੇਤ੍ਵਾ ਵੁਤ੍ਤਂ. ਤਦਾ ਹਿ ਤਸ੍ਸਾ ਏਵਂ ਹੋਤਿ. ਕੋਵਿਲ਼ਾਰਪਤ੍ਤਸਦਿਸੇਹੀਤਿ ਮਹਾਕੋਵਿਲ਼ਾਰਪਤ੍ਤਸਣ੍ਠਾਨੇਹਿ. ਸਣ੍ਠਾਨਵਸੇਨ ਹੇਤਂ ਵੁਤ੍ਤਂ, ਮਾਲੁਵਾਪਤ੍ਤਾ ਪਨ ਕੋਵਿਲ਼ਾਰਪਤ੍ਤੇਹਿ ਮਹਨ੍ਤਤਰਾਨਿ ਚੇਵ ਘਨਤਰਾਨਿ ਚ ਹੋਨ੍ਤਿ. ਵਿਪੁਲਬਹੁਘਨਗਰੁਪਤ੍ਤਤਾਯ ਮਹਨ੍ਤਂ ਭਾਰਂ ਜਨੇਤ੍ਵਾ. ਸਾਤਿ ਮਾਲੁਵਾਲਤਾ. ਓਘਨਨ੍ਤਿ ਹੇਟ੍ਠਤੋ ਓਲਮ੍ਬਨਹੇਤੁਭੂਤਂ ਘਨਭਾਵਂ.

ਅਨ੍ਧਵਨਸੁਭਗਵਨਗ੍ਗਹਣਂ ਤੇਸਂ ਅਭਿਲਕ੍ਖਿਤਭਾਵਤੋ. ਨਾਲ਼ਿਕੇਰਾਦੀਸੁ ਤਿਣਜਾਤੀਸੁ. ਖਾਦਨੁਪਲਕ੍ਖਣਂ ਉਪਚਿਕਾਨਂ ਉਟ੍ਠਹਨਗ੍ਗਹਣਨ੍ਤਿ ਆਹ ‘‘ਉਟ੍ਠਹੇਯ੍ਯੁ’’ਨ੍ਤਿ. ਕੇਲ਼ਿਂ ਕਰੋਨ੍ਤੀ ਵਿਯਾਤਿ ਵਿਲਮ੍ਬਨਨਦੀ ਵਿਯ ਕੇਲ਼ਿਂ ਕਰੋਨ੍ਤੀ. ਇਦਾਨਿ ਅਹਂ ਤਂ ਅਜ੍ਝੋਤ੍ਥਰਿਨ੍ਤਿ ਪਮੋਦਮਾਨਾ ਵਿਯ ਇਤੋ ਚਿਤੋ ਚ ਵਿਪ੍ਫਨ੍ਦਮਾਨਾ ਵਿਲਮ੍ਬਨ੍ਤੀ. ਸਮ੍ਫਸ੍ਸੋਪਿ ਸੁਖੋ ਮੁਦੁਤਲੁਣਕੋਮਲਭਾਵਤੋ. ਦਸ੍ਸਨਮ੍ਪਿ ਸੁਖਂ ਘਨਬਹਲਪਤ੍ਤਸਂਹਤਤਾਯ. ਸੋਮਨਸ੍ਸਜਾਤਾਤਿ ਪੁਬ੍ਬੇ ਅਨੁਸ੍ਸਵਵਸੇਨ ਭਵਨਵਿਨਾਸਭਯਾ ਸਨ੍ਤਾਸਂ ਆਪਜ੍ਜਿ, ਇਦਾਨਿ ਤਸ੍ਸਾ ਸਮ੍ਪਤ੍ਤਿਦਸ੍ਸਨੇਨ ਪਲੋਭਿਤਾ ਸੋਮਨਸ੍ਸਜਾਤਾ ਅਹੋਸਿ.

ਵਿਟਭਿਂ ਕਰੇਯ੍ਯਾਤਿ ਆਤਾਨਵਿਤਾਨਵਸੇਨ ਜਟੇਨ੍ਤੀ ਜਾਲਂ ਕਰੇਯ੍ਯ. ਤਥਾਭੂਤਾ ਚ ਘਨਪਤ੍ਤਸਞ੍ਛਨ੍ਨਤਾਯ ਛਤ੍ਤਸਦਿਸੀ ਹੋਤੀਤਿ ਆਹ ‘‘ਛਤ੍ਤਾਕਾਰੇਨ ਤਿਟ੍ਠੇਯ੍ਯਾ’’ਤਿ. ਸਕਲਂ ਰੁਕ੍ਖਨ੍ਤਿ ਉਪਰਿ ਸਬ੍ਬਸਾਖਾਪਸਾਖਂ ਸਬ੍ਬਰੁਕ੍ਖਂ. ਭਸ੍ਸਮਾਨਾਤਿ ਪਲਿਵੇਠਨਵਸੇਨੇਵ ਓਤਰਮਾਨਾ. ਯਾਵ ਮੂਲਾ ਓਤਿਣ੍ਣਸਾਖਾਹੀਤਿ ਮਾਲੁਵਾ ਭਾਰੇਨ ਓਨਮਿਤ੍ਵਾ ਰੁਕ੍ਖਸ੍ਸ ਯਾਵ ਮੂਲਾ ਓਤਿਣ੍ਣਸਾਖਾਹਿ ਪੁਨ ਅਭਿਰੁਹਮਾਨਾ. ਸਬ੍ਬਸਾਖਾਤਿ ਹੇਟ੍ਠਾ ਮਜ੍ਝੇ ਉਪਰਿ ਚਾਤਿ ਸਬ੍ਬਾਪਿ ਸਾਖਾਯੋ ਪਲਿਵੇਠੇਨ੍ਤੀ. ਸਂਸਿਬ੍ਬਿਤ੍ਵਾ ਜਾਲਸਨ੍ਤਾਨਕਨਿਯਾਮੇਨ ਜਟੇਤ੍ਵਾ. ਏਵਂ ਅਪਰਾਪਰਂ ਸਂਸਿਬ੍ਬਨੇਨ ਅਜ੍ਝੋਤ੍ਥਰਨ੍ਤੀ. ਸਬ੍ਬਸਾਖਾ ਹੇਟ੍ਠਾ ਕਤ੍ਵਾ ਸਯਂ ਉਪਰਿ ਠਤ੍ਵਾ ਮਹਾਭਾਰਭਾਵੇਨ ਵਾਤੇ ਵਾ ਵਾਯਨ੍ਤੇ ਦੇਵੇ ਵਾ ਵਸ੍ਸਨ੍ਤੇ ਪਦਾਲੇਯ੍ਯ. ਸਾਖਟ੍ਠਕਵਿਮਾਨਨ੍ਤਿ ਸਾਖਾਪਟਿਬਦ੍ਧਂ ਵਿਮਾਨਂ. ਯਸ੍ਮਾ ਇਧ ਸਤ੍ਥਾਰਾ ‘‘ਸੇਯ੍ਯਥਾਪਿ, ਭਿਕ੍ਖਵੇ’’ਤਿਆਦਿਨਾ ਭੂਤਪੁਬ੍ਬਮੇਵ ਵਤ੍ਥੁ ਉਪਮਾਭਾਵੇਨ ਆਹਟਂ, ਤਸ੍ਮਾ ‘‘ਇਦਂ ਪਨ ਵਿਮਾਨ’’ਨ੍ਤਿਆਦਿ ਵੁਤ੍ਤਂ.

੪੭੧. ਬਹਲਰਾਗਸਭਾਵੋਤਿ ਪਚ੍ਚਵੇਕ੍ਖਣਾਹਿ ਨੀਹਰਿਤੁਂ ਅਸਕ੍ਕੁਣੇਯ੍ਯਤਾਯ ਬਲਵਾ ਹੁਤ੍ਵਾ ਅਭਿਭਵਨਰਾਗਧਾਤੁਕੋ. ਰਾਗਜਨ੍ਤਿ ਰਾਗਨਿਮਿਤ੍ਤਜਾਤਂ. ਦਿਟ੍ਠੇ ਦਿਟ੍ਠੇ ਆਰਮ੍ਮਣੇਤਿ ਦਿਟ੍ਠੇ ਦਿਟ੍ਠੇ ਵਿਸਭਾਗਾਰਮ੍ਮਣੇ. ਨਿਮਿਤ੍ਤਂ ਗਣ੍ਹਾਤੀਤਿ ਕਿਲੇਸੁਪ੍ਪਤ੍ਤਿਯਾ ਕਾਰਣਭੂਤਂ ਅਨੁਬ੍ਯਞ੍ਜਨਸੋ ਨਿਮਿਤ੍ਤਂ ਗਣ੍ਹਾਤਿ, ਸਿਕ੍ਖਾਗਾਰਵੇਨ ਪਨ ਕਿਲੇਸੇਹਿ ਨਿਸ੍ਸਿਤਂ ਮਗ੍ਗਂ ਨ ਪਟਿਪਜ੍ਜਤਿ, ਤਤੋ ਏਵ ਆਚਰਿਯੁਪਜ੍ਝਾਯੇਹਿ ਆਣਤ੍ਤਂ ਦਣ੍ਡਕਮ੍ਮਂ ਕਰੋਤੇਵ. ਤੇਨਾਹ ‘‘ਨ ਤ੍ਵੇਵ ਵੀਤਿਕ੍ਕਮਂ ਕਰੋਤੀ’’ਤਿ. ਹਤ੍ਥਪਰਾਮਾਸਾਦੀਨੀਤਿ – ‘‘ਏਹਿ ਤਾਵ ਤਯਾ ਵੁਤ੍ਤਂ ਮਯਾ ਵੁਤ੍ਤਞ੍ਚ ਅਮੁਤ੍ਰ ਗਨ੍ਤ੍ਵਾ ਵੀਮਂਸਿਸ੍ਸਾਮਾ’’ਤਿਆਦਿਨਾ ਹਤ੍ਥਗ੍ਗਹਣਾਦੀਨਿ ਕਰੋਨ੍ਤੋ, ਨ ਕਰੁਣਾਮੇਤ੍ਤਾਨਿਦਾਨਵਸੇਨ. ਮੋਹਜਾਤਿਕੋਤਿ ਬਹਲਮੋਹਸਭਾਵੋ.

੪੭੨. ਕਮ੍ਮਨਿਯਾਮੇਨਾਤਿ ਪੁਰਿਮਜਾਤਿਸਿਦ੍ਧੇਨ ਲੋਭੁਸ੍ਸਦਤਾਦਿਨਿਯਮਿਤੇਨ ਕਮ੍ਮਨਿਯਾਮੇਨ. ਇਦਾਨਿ ਤਂ ਲੋਭੁਸ੍ਸਦਤਾਦਿਂ ਵਿਭਾਗੇਨ ਦਸ੍ਸੇਤੁਂ ‘‘ਯਸ੍ਸ ਹੀ’’ਤਿਆਦਿ ਆਰਦ੍ਧਂ. ਤਤ੍ਥ ਕਮ੍ਮਾਯੂਹਨਕ੍ਖਣੇਤਿ ਕਮ੍ਮਕਰਣਵੇਲਾਯ. ਲੋਭੋ ਬਲਵਾਤਿ ਤਜ੍ਜਾਯ ਸਾਮਗ੍ਗਿਯਾ ਸਾਮਤ੍ਥਿਯਤੋ ਲੋਭੋ ਅਧਿਕੋ ਹੋਤਿ. ਅਲੋਭੋ ਮਨ੍ਦੋਤਿ ਤਪ੍ਪਟਿਪਕ੍ਖੋ ਅਲੋਭੋ ਦੁਬ੍ਬਲੋ ਹੋਤਿ. ਕਥਂ ਪਨੇਤੇ ਲੋਭਾਲੋਭਾ ਅਞ੍ਞਮਞ੍ਞਂ ਉਜੁਵਿਪਚ੍ਚਨੀਕਭੂਤਾ ਏਕਕ੍ਖਣੇ ਪਵਤ੍ਤਨ੍ਤਿ? ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ ‘‘ਏਕਕ੍ਖਣੇ ਪਵਤ੍ਤਨ੍ਤੀ’’ਤਿ, ਨਿਕਨ੍ਤਿਕ੍ਖਣਂ ਪਨ ਆਯੂਹਨਕ੍ਖਣਮੇਵ ਕਤ੍ਵਾ ਏਵਂ ਵੁਤ੍ਤਂ. ਏਸ ਨਯੋ ਸੇਸੇਸੁ. ਪਰਿਯਾਦਾਤੁਨ੍ਤਿ ਅਭਿਭਵਿਤੁਂ ਨ ਸਕ੍ਕੋਤਿ. ਯੋ ਹਿ ‘‘ਏਵਂਸੁਨ੍ਦਰਂ ਏਵਂਵਿਪੁਲਂ ਏਵਂਮਹਗ੍ਘਞ੍ਚ ਨ ਸਕ੍ਕਾ ਪਰਸ੍ਸ ਦਾਤੁ’’ਨ੍ਤਿਆਦਿਨਾ ਅਮੁਤ੍ਤਚਾਗਤਾਦਿਵਸੇਨ ਪਵਤ੍ਤਾਯ ਚੇਤਨਾਯ ਸਮ੍ਪਯੁਤ੍ਤੋ ਅਲੋਭੋ ਸਮ੍ਮਦੇਵ ਲੋਭਂ ਪਰਿਯਾਦਾਤੁਂ ਨ ਸਕ੍ਕੋਤਿ. ਦੋਸਮੋਹਾਨਂ ਅਨੁਪ੍ਪਤ੍ਤਿਯਂ ਤਾਦਿਸਪਚ੍ਚਯਲਾਭੇਨੇਵ ਅਦੋਸਾਮੋਹਾ ਬਲਵਨ੍ਤੋ. ਤਸ੍ਮਾਤਿ ਲੋਭਾਦੋਸਾਮੋਹਾਨਂ ਬਲਵਭਾਵਤੋ ਅਲੋਭਦੋਸਮੋਹਾਨਞ੍ਚ ਦੁਬ੍ਬਲਭਾਵਤੋਤਿ ਵੁਤ੍ਤਮੇਵ ਕਾਰਣਂ ਪਚ੍ਚਾਮਸਤਿ. ਸੋਤਿ ਤਂਸਮਙ੍ਗੀ. ਤੇਨ ਕਮ੍ਮੇਨਾਤਿ ਤੇਨ ਲੋਭਾਦਿਉਪਨਿਸ੍ਸਯਵਤਾ ਕੁਸਲਕਮ੍ਮੁਨਾ. ਸੁਖਸੀਲੋਤਿ ਸਖਿਲੋ. ਤਮੇਵਤ੍ਥਂ ਅਕ੍ਕੋਧਨੋਤਿ ਪਰਿਯਾਯੇਨ ਵਦਤਿ.

ਮਨ੍ਦਾ ਅਲੋਭਾਦੋਸਾ ਲੋਭਦੋਸੇ ਪਰਿਯਾਦਾਤੁਂ ਨ ਸਕ੍ਕੋਨ੍ਤਿ, ਅਮੋਹੋ ਪਨ ਬਲਵਾ ਮੋਹਂ ਪਰਿਯਾਦਾਤੁਂ ਸਕ੍ਕੋਤੀਤਿ ਏਵਂ ਯਥਾਰਹਂ ਪਠਮਵਾਰੇ ਵੁਤ੍ਤਨਯੇਨੇਵ ਅਤਿਦੇਸਤ੍ਥੋ ਵੇਦਿਤਬ੍ਬੋ. ਪੁਰਿਮਨਯੇਨੇਵਾਤਿ ਪੁਬ੍ਬੇ ਵੁਤ੍ਤਨਯਾਨੁਸਾਰੇਨ. ਦੁਟ੍ਠੋਤਿ ਕੋਧਨੋ. ਦਨ੍ਧੋਤਿ ਮਨ੍ਦਮਞ੍ਞੋ. ਸੁਖਸੀਲਕੋਤਿ ਸੁਖਸੀਲੋ.

ਏਤ੍ਥ ਚ ਲੋਭਵਸੇਨ, ਦੋਸਮੋਹ-ਲੋਭਦੋਸ-ਲੋਭਮੋਹ-ਦੋਸਮੋਹ-ਲੋਭਦੋਸਮੋਹਵਸੇਨਾਤਿ ਤਯੋ ਏਕਕਾ, ਤਯੋ ਦੁਕਾ, ਏਕੋ ਤਿਕੋਤਿ ਲੋਭਾਦਿਉਸ੍ਸਦਵਸੇਨ ਅਕੁਸਲਪਕ੍ਖੇ ਏਵ ਸਤ੍ਤ ਵਾਰਾ, ਤਥਾ ਕੁਸਲਪਕ੍ਖੇ ਅਲੋਭਾਦਿਉਸ੍ਸਦਵਸੇਨਾਤਿ ਚੁਦ੍ਦਸ ਵਾਰਾ ਲਬ੍ਭਨ੍ਤਿ. ਤਤ੍ਥ ਅਲੋਭਦੋਸਮੋਹਾ, ਅਲੋਭਾਦੋਸਮੋਹਾ, ਅਲੋਭਦੋਸਾਮੋਹਾ ਬਲਵਨ੍ਤੋਤਿ ਆਗਤੇਹਿ ਕੁਸਲਪਕ੍ਖੇ ਤਤਿਯਦੁਤਿਯਪਠਮਵਾਰੇਹਿ ਦੋਸੁਸ੍ਸਦਮੋਹੁਸ੍ਸਦਦੋਸਮੋਹੁਸ੍ਸਦਵਾਰਾ ਗਹਿਤਾ ਏਵ ਹੋਨ੍ਤਿ. ਤਥਾ ਅਕੁਸਲਪਕ੍ਖੇ ਲੋਭਾਦੋਸਾਮੋਹਾ, ਲੋਭਦੋਸਾਮੋਹਾ, ਲੋਭਾਦੋਸਮੋਹਾ ਬਲਵਨ੍ਤੋਤਿ ਆਗਤੇਹਿ ਤਤਿਯਦੁਤਿਯਪਠਮਵਾਰੇਹਿ ਅਦੋਸੁਸ੍ਸਦਅਮੋਹੁਸ੍ਸਦਅਦੋਸਾਮੋਹੁਸ੍ਸਦਵਾਰਾ ਗਹਿਤਾ ਏਵਾਤਿ ਅਕੁਸਲਕੁਸਲਪਕ੍ਖੇਸੁ ਤਯੋ ਤਯੋ ਵਾਰੇ ਅਨ੍ਤੋਗਧੇ ਕਤ੍ਵਾ ਅਟ੍ਠੇਵ ਵਾਰਾ ਦਸ੍ਸਿਤਾ. ਯੇ ਪਨ ਉਭਯਸਮ੍ਮਿਸ੍ਸਤਾਵਸੇਨ ਲੋਭਾਲੋਭੁਸ੍ਸਦਵਾਰਾਦਯੋ ਅਪਰੇ ਏਕੂਨਪਞ੍ਞਾਸ ਵਾਰਾ ਕਾਮਂ ਦਸ੍ਸੇਤਬ੍ਬਾ, ਤੇਸਂ ਅਸਮ੍ਭਵਤੋ ਏਵ ਨ ਦਸ੍ਸਿਤਾ. ਨ ਹਿ ‘‘ਏਕਸ੍ਮਿਂ ਸਨ੍ਤਾਨੇ ਅਨ੍ਤਰੇਨ ਅਵਤ੍ਥਨ੍ਤਰਂ ਲੋਭੋ ਚ ਬਲਵਾ ਅਲੋਭੋ ਚਾ’’ਤਿਆਦਿ ਯੁਜ੍ਜਤਿ. ਪਟਿਪਕ੍ਖਵਸੇਨ ਵਾਪਿ ਏਤੇਸਂ ਬਲਵਦੁਬ੍ਬਲਭਾਵੋ ਸਹਜਾਤਧਮ੍ਮਵਸੇਨ ਵਾ. ਤਤ੍ਥ ਲੋਭਸ੍ਸ ਤਾਵ ਪਟਿਪਕ੍ਖਵਸੇਨ ਅਨਭਿਭੂਤਤਾਯ ਬਲਵਭਾਵੋ, ਤਥਾ ਦੋਸਮੋਹਾਨਂ ਅਦੋਸਾਮੋਹੇਹਿ. ਅਲੋਭਾਦੀਨਂ ਪਨ ਲੋਭਾਦਿਅਨਭਿਭਵਨਤੋ. ਸਬ੍ਬੇਸਞ੍ਚ ਸਮਾਨਜਾਤਿਯਸਮਧਿਭੁਯ੍ਯ ਪਵਤ੍ਤਿਵਸੇਨ ਸਹਜਾਤਧਮ੍ਮਤੋ ਬਲਵਭਾਵੋ. ਤੇਨ ਵੁਤ੍ਤਂ ਅਟ੍ਠਕਥਾਯਂ (ਮ. ਨਿ. ਅਟ੍ਠ. ੨.੪੭੨) – ‘‘ਲੋਭੋ ਬਲਵਾ, ਅਲੋਭੋ ਮਨ੍ਦੋ. ਅਦੋਸਾਮੋਹਾ ਬਲਵਨ੍ਤੋ, ਦੋਸਮੋਹਾ ਮਨ੍ਦਾ’’ਤਿਆਦਿ, ਸੋ ਚ ਨੇਸਂ ਮਨ੍ਦਬਲਵਭਾਵੋ ਪੁਰਿਮੂਪਨਿਸ੍ਸਯਤੋ ਤਥਾ ਆਸਯਸ੍ਸ ਪਰਿਭਾਵਿਤਤਾਯ ਵੇਦਿਤਬ੍ਬੋ. ਤੇਨੇਵਾਹ ‘‘ਕਮ੍ਮਨਿਯਾਮੇਨਾ’’ਤਿ. ਸੇਸਂ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.

ਚੂਲ਼ਧਮ੍ਮਸਮਾਦਾਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.