੯. ਮਹਾਅਸ੍ਸਪੁਰਸੁਤ੍ਤਵਣ੍ਣਨਾ

੪੧੫. ਜਾਨਪਦਿਨੋਤਿ ਜਨਪਦਵਨ੍ਤੋ, ਜਨਪਦਸ੍ਸ ਵਾ ਇਸ੍ਸਰਾ ਰਾਜਕੁਮਾਰਾ ਗੋਤ੍ਤਵਸੇਨ ਅਙ੍ਗਾ ਨਾਮ. ਤੇਸਂ ਨਿਵਾਸੋ ਯਦਿ ਏਕੋ ਜਨਪਦੋ, ਕਥਂ ਬਹੁਵਚਨਨ੍ਤਿ ਆਹ ‘‘ਰੁਲ਼੍ਹੀਸਦ੍ਦੇਨਾ’’ਤਿ. ਅਕ੍ਖਰਚਿਨ੍ਤਕਾ ਹਿ ਈਦਿਸੇਸੁ ਠਾਨੇਸੁ ਯੁਤ੍ਤੇ ਵਿਯ ਸਲਿਙ੍ਗਵਚਨਾਨਿ (ਪਾਣਿਨਿ ੧.੨.੫੧) ਇਚ੍ਛਨ੍ਤਿ. ਅਯਮੇਤ੍ਥ ਰੁਲ਼੍ਹੀ ਯਥਾ ‘‘ਕੁਰੂਸੁ ਵਿਹਰਤਿ, ਮਲ੍ਲੇਸੁ ਵਿਹਰਤੀ’’ਤਿ ਚ. ਤਬ੍ਬਿਸੇਸਨੇ ਪਨ ਜਨਪਦਸਦ੍ਦੇ ਜਾਤਿਸਦ੍ਦੇ ਏਕਵਚਨਮੇਵ. ਤੇਨਾਹ ‘‘ਅਙ੍ਗੇਸੁ ਜਨਪਦੇ’’ਤਿ. ਅਸ੍ਸਾ ਵੁਚ੍ਚਨ੍ਤਿ ਪਾਸਾਣਾਨਿ, ਤਾਨਿ ਸੁਨ੍ਦਰਾਨਿ ਤਤ੍ਥ ਸਨ੍ਤੀਤਿ ‘‘ਅਸ੍ਸਪੁਰ’’ਨ੍ਤਿ ਸੋ ਨਿਗਮੋ ਵੁਤ੍ਤੋਤਿ ਕੇਚੀ. ਅਪਰੇ ਪਨ ਆਜਾਨੀਯੋ ਅਸ੍ਸੋ ਰਞ੍ਞੋ ਤਤ੍ਥ ਗਹਣਂ ਉਪਗਤੋਤਿ ‘‘ਅਸ੍ਸਪੁਰ’’ਨ੍ਤਿ ਵੁਤ੍ਤੋਤਿ ਵਦਨ੍ਤਿ. ਕਿਂ ਤੇਹਿ, ਨਾਮਮੇਤਂ ਤਸ੍ਸ ਨਿਗਮਸ੍ਸ. ਯਸ੍ਮਾ ਪਨ ਤਤ੍ਥ ਭਗਵਤੋ ਨਿਬਦ੍ਧਵਸਨਟ੍ਠਾਨਂ ਕਿਞ੍ਚਿ ਨਾਹੋਸਿ, ਤਸ੍ਮਾ ‘‘ਤਂ ਗੋਚਰਗਾਮਂ ਕਤ੍ਵਾ ਵਿਹਰਤਿ’’ਚ੍ਚੇਵ ਵੁਤ੍ਤਂ. ਤਥਾ ਹਿ ਪਾਲ਼ਿਯਂ ‘‘ਅਸ੍ਸਪੁਰਂ ਨਾਮ ਅਙ੍ਗਾਨਂ ਨਿਗਮੋ’’ਤਿ ਗੋਚਰਗਾਮਕਿਤ੍ਤਨਮੇਵ ਕਤਂ.

ਏਵਰੂਪੇਨ ਸੀਲੇਨਾਤਿਆਦੀਸੁ ਸੀਲਗ੍ਗਹਣੇਨ ਵਾਰਿਤ੍ਤਸੀਲਮਾਹ. ਤੇਨ ਸਮ੍ਮਾਵਾਚਾਕਮ੍ਮਨ੍ਤਾਜੀਵੇ ਦਸ੍ਸੇਤਿ. ਆਚਾਰਗ੍ਗਹਣੇਨ ਚਾਰਿਤ੍ਤਸੀਲਂ. ਤੇਨ ਪਰਿਸੁਦ੍ਧਂ ਕਾਯਵਚੀਸਮਾਚਾਰਂ. ਪਟਿਪਤ੍ਤਿਗ੍ਗਹਣੇਨ ਸਮਥਵਿਪਸ੍ਸਨਾਮਗ੍ਗਫਲਸਙ੍ਗਹਂ ਸਮ੍ਮਾਪਟਿਪਤ੍ਤਿਂ. ਲਜ੍ਜਿਨੋਤਿ ਇਮਿਨਾ ਯਥਾਵੁਤ੍ਤਸੀਲਾਚਾਰਮੂਲਕਾਰਣਂ. ਪੇਸਲਾਤਿ ਇਮਿਨਾ ਪਾਰਿਸੁਦ੍ਧਿਂ. ਉਲ਼ਾਰਗੁਣਾਤਿ ਇਮਿਨਾ ਪਟਿਪਤ੍ਤਿਯਾ ਪਾਰਿਪੂਰਿਂ. ਭਿਕ੍ਖੁਸਙ੍ਘਸ੍ਸੇਵ ਵਣ੍ਣਂ ਕਥੇਨ੍ਤੀਤਿ ਇਦਂ ਤੇਸਂ ਉਪਾਸਕਾਨਂ ਯੇਭੁਯ੍ਯੇਨ ਭਿਕ੍ਖੂਨਂ ਗੁਣਕਿਤ੍ਤਨਪਸੁਤਤਾਯ ਵੁਤ੍ਤਂ. ਤੇ ਪਨ ਸਦ੍ਧਮ੍ਮੇਪਿ ਸਮ੍ਮਾਸਮ੍ਬੁਦ੍ਧੇਪਿ ਅਭਿਪ੍ਪਸਨ੍ਨਾ ਏਵ. ਤੇਨਾਹ ‘‘ਬੁਦ੍ਧਮਾਮਕਾ ਧਮ੍ਮਮਾਮਕਾ’’ਤਿ. ਵਤ੍ਥੁਤ੍ਤਯੇ ਹਿ ਏਕਸ੍ਮਿਂ ਅਭਿਪ੍ਪਸਨ੍ਨਾ ਇਤਰਦ੍ਵਯੇ ਅਭਿਪ੍ਪਸਨ੍ਨਾ ਏਵ ਤਦਵਿਨਾਭਾਵਤੋ. ਪਿਣ੍ਡਪਾਤਾਪਚਾਯਨੇਤਿ ਲਕ੍ਖਣਵਚਨਮੇਤਂ ਯਥਾ ‘‘ਕਾਕੇਹਿ ਸਪ੍ਪਿ ਰਕ੍ਖਿਤਬ੍ਬ’’ਨ੍ਤਿ, ਤਸ੍ਮਾ ਪਚ੍ਚਯਪਟਿਪੂਜਨੇਤਿ ਵੁਤ੍ਤਂ ਹੋਤਿ. ਪਚ੍ਚਯਦਾਯਕਾਨਞ੍ਹਿ ਕਾਰਸ੍ਸ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਮਹਪ੍ਫਲਭਾਵਸ੍ਸ ਕਰਣਂ ਇਧ ‘‘ਪਿਣ੍ਡਪਾਤਾਪਚਾਯਨ’’ਨ੍ਤਿ ਅਧਿਪ੍ਪੇਤਂ.

ਸਮਣਕਰਣਾਤਿ ਸਮਣਭਾਵਕਰਾ, ਸਮਣਭਾਵਸ੍ਸ ਕਾਰਕਾਤਿ ਅਤ੍ਥੋ. ਤੇ ਪਨ ਏਕਨ੍ਤਤੋ ਅਤ੍ਤਨੋ ਸਨ੍ਤਾਨੇ ਉਪ੍ਪਾਦਿਤਾ ਵਡ੍ਢਿਤਾ ਚ ਹੋਨ੍ਤੀਤਿ ਆਹ ‘‘ਸਮਾਦਾਯ ਪਰਿਪੂਰਿਤਾ’’ਤਿ. ਸਮਣਗ੍ਗਹਣਞ੍ਚੇਤ੍ਥ ਸਮਣਵਸੇਨ, ਨ ਸਾਮਞ੍ਞਮਤ੍ਤੇਨਾਤਿ ਆਹ ‘‘ਸਮਿਤਪਾਪਸਮਣ’’ਨ੍ਤਿ. ਬ੍ਰਾਹ੍ਮਣਕਰਣਾਤਿ ਏਤ੍ਥਾਪਿ ਵੁਤ੍ਤਨਯੇਨੇਵਤ੍ਥੋ ਵੇਦਿਤਬ੍ਬੋ. ਬ੍ਯਞ੍ਜਨਤੋ ਏਵ ਚਾਯਂ ਭੇਦੋ, ਯਦਿਦਂ ਸਮਣਬ੍ਰਾਹ੍ਮਣਾਤਿ, ਨ ਅਤ੍ਥਤੋ. ਸਮਣੇਨਕਤ੍ਤਬ੍ਬਧਮ੍ਮਾਤਿ ਸਮਣਧਮ੍ਮੇ ਠਿਤੇਨ ਸਮ੍ਪਾਦੇਤਬ੍ਬਧਮ੍ਮਾ. ਯੋ ਹਿ ਹੇਟ੍ਠਿਮਸਿਕ੍ਖਾਸਙ੍ਖਾਤਸਮਣਭਾਵੇ ਸੁਪ੍ਪਤਿਟ੍ਠਿਤੋ, ਤੇਨ ਯੇ ਉਪਰਿਸਿਕ੍ਖਾਸਙ੍ਖਾਤਸਮਣਭਾਵਾ ਸਮ੍ਪਾਦੇਤਬ੍ਬਾ, ਤੇਸਂ ਵਸੇਨੇਵ ਵੁਤ੍ਤਸਮਣੇਨ ਕਤ੍ਤਬ੍ਬਧਮ੍ਮਾ ਵੁਤ੍ਤਾਤਿ. ਤਥਾ ਹਿ ਤੇਸਂ ਸਮਣਭਾਵਾਵਹਤਂ ਸਨ੍ਧਾਯਾਹ ‘‘ਤੇਪਿ ਚ ਸਮਣਕਰਣਾ ਹੋਨ੍ਤਿਯੇਵਾ’’ਤਿ. ਇਧ ਪਨਾਤਿ ਮਹਾਅਸ੍ਸਪੁਰੇ. ਹਿਰੋਤ੍ਤਪ੍ਪਾਦਿਵਸੇਨ ਦੇਸਨਾ ਵਿਤ੍ਥਾਰਿਤਾਤਿ ਹਿਰੋਤ੍ਤਪ੍ਪ-ਪਰਿਸੁਦ੍ਧਕਾਯਵਚੀਮਨੋਸਮਾਚਾਰਾਜੀਵਇਨ੍ਦ੍ਰਿਯਸਂਵਰ-ਭੋਜਨੇਮਤ੍ਤਞ੍ਞੁਤ- ਜਾਗਰਿਯਾਨੁਯੋਗਸਤਿਸਮ੍ਪਜਞ੍ਞ-ਝਾਨਵਿਜ੍ਜਾਵਸੇਨ ਸਮਣਕਰਣਧਮ੍ਮਦੇਸਨਾ ਵਿਤ੍ਥਾਰਤੋ ਦੇਸਿਤਾ, ਨ ਤਿਕਨਿਪਾਤੇ ਵਿਯ ਸਙ੍ਖੇਪਤੋ. ਫਲਗ੍ਗਹਣੇਨੇਵ ਵਿਪਾਕਫਲਂ ਗਹਿਤਂ, ਤਂ ਪਨ ਉਕ੍ਕਟ੍ਠਨਿਦ੍ਦੇਸੇਨ ਚਤੁਬ੍ਬਿਧਂ ਸਾਮਞ੍ਞਫਲਂ ਦਟ੍ਠਬ੍ਬਂ. ਆਨਿਸਂਸਗ੍ਗਹਣੇਨ ਪਿਯਮਨਾਪਤਾਦਿਉਦ੍ਰਯੋ. ਤਸ੍ਸੇਵ ਅਤ੍ਥੋਤਿ ਤਸ੍ਸੇਵ ਅਵਞ੍ਚਾਪਦਸ੍ਸੇਵ ਅਤ੍ਥਨਿਦ੍ਦੇਸੋ. ‘‘ਯਸ੍ਸਾ ਹੀ’’ਤਿਆਦਿਨਾ ਬ੍ਯਤਿਰੇਕਵਸੇਨ ਅਤ੍ਥਂ ਵਦਤਿ. ਏਤ੍ਤਕੇਨ ਠਾਨੇਨਾਤਿ ਏਤ੍ਤਕੇਨ ਪਾਲ਼ਿਪਦੇਸੇਨ. ਹਿਰੋਤ੍ਤਪ੍ਪਾਦੀਨਂ ਉਪਰਿ ਪਾਲ਼ਿਯਂ ਵੁਚ੍ਚਮਾਨਾਨਂ ਸਮਣਕਰਣਧਮ੍ਮਾਨਂ. ਵਣ੍ਣਂ ਕਥੇਸੀਤਿ ਗੁਣਂ ਆਨਿਸਂਸਂ ਅਭਾਸਿ. ਸਤਿਪਟ੍ਠਾਨੇ ਵੁਤ੍ਤਨਯੇਨਾਤਿ ‘‘ਅਪਿਚ ਵਣ੍ਣਭਣਨਮੇਤ’’ਨ੍ਤਿਆਦਿਨਾ ਸਤਿਪਟ੍ਠਾਨਵਣ੍ਣਨਾਯਂ (ਦੀ. ਨਿ. ਅਟ੍ਠ. ੨.੩੭੩; ਮ. ਨਿ. ਅਟ੍ਠ. ੧.੧੦੬) ਵੁਤ੍ਤਨਯੇਨ.

੪੧੬. ਯਂ ਹਿਰੀਯਤੀਤਿ ਯੇਨ ਧਮ੍ਮੇਨ ਹੇਤੁਭੂਤੇਨ ਵਾ ਜਿਗੁਚ੍ਛਤਿ. ਕਰਣੇ ਹੇਤਂ ਪਚ੍ਚਤ੍ਤਵਚਨਂ. ਯਨ੍ਤਿ ਵਾ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤੋ, ਧਮ੍ਮੋਤਿ ਅਤ੍ਥੋ. ਹਿਰੀਯਿਤਬ੍ਬੇਨਾਤਿ ਉਪਯੋਗਤ੍ਥੇ ਕਰਣਵਚਨਂ, ਹਿਰੀਯਿਤਬ੍ਬਯੁਤ੍ਤਕਂ ਕਾਯਦੁਚ੍ਚਰਿਤਾਦਿਨ੍ਤਿ ਅਤ੍ਥੋ. ਓਤ੍ਤਪ੍ਪਿਤਬ੍ਬੇਨਾਤਿ ਏਤ੍ਥਾਪਿ ਏਸੇਵ ਨਯੋ. ਅਜ੍ਝਤ੍ਤਂ ਨਿਯਕਜ੍ਝਤ੍ਤਂ ਜਾਤਿਆਦਿ ਸਮੁਟ੍ਠਾਨਂ ਏਤਿਸ੍ਸਾਤਿ ਅਜ੍ਝਤ੍ਤਸਮੁਟ੍ਠਾਨਾ ਹਿਰੀ, ਬਹਿਦ੍ਧਾ ਅਤ੍ਤਤੋ ਬਹਿਭੂਤੋ ਪਰਸਤ੍ਤੋ ਸਮੁਟ੍ਠਾਨਂ ਏਤਿਸ੍ਸਾਤਿ ਬਹਿਦ੍ਧਾਸਮੁਟ੍ਠਾਨਂ ਓਤ੍ਤਪ੍ਪਂ. ਅਤ੍ਤਾਧਿਪਤਿਤੋ ਆਗਤਾ ਅਤ੍ਤਾਧਿਪਤੇਯ੍ਯਾ, ਅਤ੍ਤਾਨਂ ਅਧਿਪਤਿਂ ਕਤ੍ਵਾ ਪਵਤ੍ਤਾ. ਲਜ੍ਜਾਸਭਾਵਸਣ੍ਠਿਤਾਤਿ ਪਾਪਜਿਗੁਚ੍ਛਨਸਭਾਵਟ੍ਠਾਯਿਨੀ. ਸਪ੍ਪਤਿਸ੍ਸਵਲਕ੍ਖਣਤ੍ਤਾ ਗਰੁਨਾ ਕਿਸ੍ਮਿਞ੍ਚਿ ਵੁਤ੍ਤੇ ਗਾਰਵਵਸੇਨ ਪਤਿਸ੍ਸਵਨਂ ਪਤਿਸ੍ਸਵੋ, ਸਹ ਪਤਿਸ੍ਸਵੇਨਾਤਿ ਸਪ੍ਪਤਿਸ੍ਸਵਂ, ਪਤਿਸ੍ਸਵਭੂਤਂ ਤਂਸਭਾਵਞ੍ਚ ਯਂ ਕਿਞ੍ਚਿ ਗਾਰਵਂ. ਜਾਤਿਆਦਿਮਹਤ੍ਤਤਾਪਚ੍ਚਵੇਕ੍ਖਣੇਨ ਉਪ੍ਪਜ੍ਜਮਾਨਾ ਚ ਹਿਰੀ ਤਤ੍ਥ ਗਾਰਵਵਸੇਨ ਪਵਤ੍ਤਤੀਤਿ ਸਪ੍ਪਤਿਸ੍ਸਵਲਕ੍ਖਣਾਤਿ ਵੁਚ੍ਚਤਿ. ਭਯਸਭਾਵਸਣ੍ਠਿਤਨ੍ਤਿ ਪਾਪਤੋ ਭਾਯਨਸਭਾਵਟ੍ਠਾਯੀ, ਵਜ੍ਜਭੀਰੁਕਭਯਦਸ੍ਸਾਵਿਲਕ੍ਖਣਤ੍ਤਾ ਵਜ੍ਜਂ ਭਾਯਤਿ ਤਂ ਭਯਤੋ ਪਸ੍ਸਤੀਤਿ ਵਜ੍ਜਭੀਰੁਕਭਯਦਸ੍ਸਾਵੀ, ਏਵਂਸਭਾਵਂ ਓਤ੍ਤਪ੍ਪਂ. ਅਜ੍ਝਤ੍ਤਸਮੁਟ੍ਠਾਨਾਦਿਤਾ ਚ ਹਿਰੋਤ੍ਤਪ੍ਪਾਨਂ ਤਤ੍ਥ ਤਤ੍ਥ ਪਾਕਟਭਾਵੇਨੇਵ ਵੁਚ੍ਚਤਿ, ਨ ਪਰੇਸਂ ਕਦਾਚਿ ਅਞ੍ਞਮਞ੍ਞਵਿਪ੍ਪਯੋਗਾ. ਨ ਹਿ ਲਜ੍ਜਨਂ ਨਿਬ੍ਭਯਂ, ਪਾਪਭਯਂ ਵਾ ਅਲਜ੍ਜਨਂ ਹੋਤੀਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਅਟ੍ਠਸਾਲਿਨਿਯਂ (ਧ. ਸ. ਅਟ੍ਠ. ੧.ਬਲਰਾਸਿਵਣ੍ਣਨਾ) ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਲੋਕਮਰਿਯਾਦਸ੍ਸ ਪਾਲਨਤੋ ਲੋਕਪਾਲਧਮ੍ਮਾ ਨਾਮ. ਸੁਕ੍ਕਾਤਿ ਓਦਾਤਾ ਪਭਸ੍ਸਰਭਾਵਕਾਰਕਾ, ਸੁਕ੍ਕਾਭਿਜਾਤਿਹੇਤੁਤਾਯ ਵਾ ਸੁਕ੍ਕਾ. ਸਮ੍ਭੇਦਨ੍ਤਿ ਆਚਾਰਮਰਿਯਾਦਾਸਙ੍ਕਰਂ. ਦੇਵਭਾਵਾਵਹਾ ਧਮ੍ਮਾਤਿ ਦੇਵਧਮ੍ਮਾ.

ਸੁਕ੍ਕਧਮ੍ਮਸਮਾਹਿਤਾਤਿ ਯਥਾਵੁਤ੍ਤਸੁਕ੍ਕਧਮ੍ਮਸਮਙ੍ਗਿਨੋ. ਸਨ੍ਤੋਤਿ ਵੂਪਸਨ੍ਤਦੋਸਾ. ਸਪ੍ਪੁਰਿਸਾਤਿ ਸਨ੍ਤਜਨਾ. ਸਪਰਹਿਤਸਾਧਕਾ ਹਿ ਸਾਧਵੋ.

ਅਵਯਵਵਿਨਿਮੁਤ੍ਤਸ੍ਸ ਸਮੁਦਾਯਸ੍ਸ ਅਭਾਵਤੋ, ਅਵਯਵੇਨ ਚ ਸਮੁਦਾਯਸ੍ਸ ਅਪਦਿਸਿਤਬ੍ਬਤੋ ਓਵਾਦੂਪਸਮ੍ਪਦਾਵਹਓਵਾਦੇਕਦੇਸੋ ਓਵਾਦੂਪਸਮ੍ਪਦਾਤਿ. ਇਧਾਤਿ ਇਮਸ੍ਮਿਂ ਅਸ੍ਸਪੁਰੇ. ਏਤੇ ਹਿਰੋਤ੍ਤਪ੍ਪਧਮ੍ਮਾ. ਸਮਣਧਮ੍ਮਾ ਨਾਮਾਤਿ ਦਸ੍ਸਿਤਾ ਮੂਲਭੂਤਸਮਣਭਾਵਕਰਾ ਧਮ੍ਮਾਤਿ ਕਤ੍ਵਾ. ਤਥਾ ਹਿ ਤੇਸਂ ਆਦਿਤੋ ਗਹਣਂ.

ਯਸ੍ਸ ਅਧਿਗਮੇਨ ਨਿਪ੍ਪਰਿਯਾਯਤੋ ਸਮਣਾ ਨਾਮ ਹੋਨ੍ਤਿ, ਸੋ ਅਰਿਯਮਗ੍ਗੋ ‘‘ਸਮਣਸ੍ਸ ਕਮ੍ਮਂ ਪਟਿਪਦਾ’’ਤਿ ਕਤ੍ਵਾ ਸਾਮਞ੍ਞਂ, ਤਸ੍ਸ ਪਨ ਫਲਭਾਵਤੋ, ਆਰਮ੍ਮਣਕਰਣਵਸੇਨ ਅਰਣੀਯਤੋ ਫਲਨਿਬ੍ਬਾਨਾਨਿ ਸਾਮਞ੍ਞਤ੍ਥੋ. ਰਾਗਂ ਖੇਪੇਤੀਤਿ ਰਾਗਕ੍ਖਯੋ, ਅਰਿਯਮਗ੍ਗੋ. ਰਾਗੋ ਖੀਯਤਿ ਏਤ੍ਥਾਤਿ ਰਾਗਕ੍ਖਯੋ, ਨਿਬ੍ਬਾਨਂ. ਫਲਂ ਪਨ ਕਾਰਣੂਪਚਾਰੇਨ ਰਾਗਕ੍ਖਯੋ ਦਟ੍ਠਬ੍ਬੋ. ਦੋਸਕ੍ਖਯੋ ਮੋਹਕ੍ਖਯੋਤਿ ਏਤ੍ਥਾਪਿ ਏਸੇਵ ਨਯੋ. ਸਾਮਞ੍ਞਭੂਤੋ ਅਤ੍ਥੋ ਸਾਮਞ੍ਞਤ੍ਥੋ, ਮਗ੍ਗੋ, ਸਾਮਞ੍ਞਸ੍ਸ ਅਤ੍ਥੋਤਿ ਸਾਮਞ੍ਞਤ੍ਥੋ, ਫਲਨ੍ਤਿ ਆਹ ‘‘ਮਗ੍ਗਮ੍ਪਿ ਫਲਮ੍ਪਿ ਏਕਤੋ ਕਤ੍ਵਾ ਸਾਮਞ੍ਞਤ੍ਥੋ ਕਥਿਤੋ’’ਤਿ. ਤਯਿਦਂ ਉਕ੍ਕਟ੍ਠਨਿਦ੍ਦੇਸੇਨ ਵੁਤ੍ਤਂ. ਸੀਲਾਦਿਪੁਬ੍ਬਭਾਗਪਟਿਪਦਾਪਿ ਹਿ ਇਧ ‘‘ਸਾਮਞ੍ਞਤ੍ਥੋ’’ਤਿ ਗਹਿਤਾ. ਤੇਨੇਵਾਹ ‘‘ਸਤਿ ਉਤ੍ਤਰਿਕਰਣੀਯੇ’’ਤਿ. ਪਟਿਵੇਦਯਾਮੀਤਿ ਪੁਨਪ੍ਪੁਨਂ ਞਾਪੇਮਿ.

੪੧੭. ਕਮ੍ਮਪਥਵਸੇਨੇਵਾਤਿ ਅਕੁਸਲਕਮ੍ਮਪਥਭਾਵੇਨੇਵ, ਤਤੋ ਤਾਦਿਸਮ੍ਪਿ ਅਕੁਸਲਕਮ੍ਮਂ ਭਿਕ੍ਖੁਸ੍ਸ ਕਾਤੁਂ ਨ ਯੁਤ੍ਤਨ੍ਤਿ ਦੁਟ੍ਠੁਲ੍ਲਭਾਵੇਨੇਵ ਤਤੋ ਓਰਮਤੀਤਿ ਅਧਿਪ੍ਪਾਯੋ. ਸਿਕ੍ਖਾਪਦਬਦ੍ਧੇਨਾਤਿ ਸਿਕ੍ਖਾਪਦਪਞ੍ਞਾਪਨੇਨ. ਪਾਨੀਯਘਟੇ ਵਾ ਪਤ੍ਤੇ ਵਾ ਕਾਕਾਨਂ ਹਤ੍ਥਂ ਵਾ ਦਣ੍ਡਂ ਵਾ ਲੇਡ੍ਡੁਂ ਵਾਤਿ ਸਬ੍ਬਮਿਦਂ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ. ਯਤ੍ਥ ਕਤ੍ਥਚਿ ਹਿ ਠਿਤਾਨਂ ਅਞ੍ਞੇਸਮ੍ਪਿ ਪਾਣੀਨਂ ਉਟ੍ਠਾਪਨਾਦਿ ਸਬ੍ਬਂ ਅਨਿਟ੍ਠਕਰਣਂ ਇਧ ਅਪਰਿਸੁਦ੍ਧਕਾਯਸਮਾਚਾਰਭਾਵੇਨੇਵ ਸਙ੍ਗਹਿਤਨ੍ਤਿ. ਉਤ੍ਤਾਨੋਤਿ ਉਦ੍ਧਮੁਦ੍ਧਂ ਤਨੋਤੀਤਿ ਉਤ੍ਤਾਨੋ. ਏਵਂਭੂਤੋ ਚ ਕੇਨਚਿ ਅਨੁਪ੍ਪਾਦਭੂਮਿਯਂ ਸਞ੍ਜਾਤਸਾਲਕਲ੍ਯਾਣੀਖਨ੍ਧੋ ਵਿਯ ਉਪਰੂਪਰਿ ਉਗ੍ਗਤੁਗ੍ਗਤੋ ਪਾਕਟੋ ਚ ਹੋਤੀਤਿ ਆਹ ‘‘ਉਗ੍ਗਤੋ ਪਾਕਟੋ’’ਤਿ. ਅਨਾਵਟੋਤਿ ਅਨਿਵੁਤੋ. ਤੇਨਾਹ ‘‘ਅਸਞ੍ਛਨ੍ਨੋ’’ਤਿ, ਨਚ੍ਛਾਦੇਤਬ੍ਬੋਤਿ ਅਤ੍ਥੋ. ਏਕਸਦਿਸੋ ਵਿਸੁਦ੍ਧਭਾਵੇਨ. ਅਨ੍ਤਰਨ੍ਤਰੇ ਛਿਦ੍ਦਰਹਿਤੋ ਪੁਬ੍ਬੇਨਾਪਰਂ ਸਮ੍ਮਾਪਟਿਪਤ੍ਤਿਯਾ ਸਨ੍ਧਾਨੇਨ. ਸਂਵੁਤੋ ਕਾਯਿਕਸ੍ਸ ਸਂਵਰਸ੍ਸ ਅਨੁਪਕ੍ਕਿਲੇਸਤੋ. ਤੇਨਾਹ ‘‘ਕਿਲੇਸਾਨਂ ਦ੍ਵਾਰਂ ਪਿਦਹਨੇਨਾ’’ਤਿ.

੪੧੮. ਏਤ੍ਥ ਯਥਾ ਲਹੁਕਤਰਂ ਕਾਕੁਟ੍ਠਾਪਨਾਦਿਕਾਯਕਮ੍ਮਂ ਕਾਯਸਮਾਚਾਰਸ੍ਸ ਅਪਰਿਸੁਦ੍ਧਭਾਵਾਵਹਂ ਸਲ੍ਲੇਖਵਿਕੋਪਨਤੋ, ਮਿਚ੍ਛਾਵਿਤਕ੍ਕਨਮਤ੍ਤਞ੍ਚ ਮਨੋਸਮਾਚਾਰਸ੍ਸ, ਏਵਂ ਯਂ ਕਿਞ੍ਚਿ ਅਨਿਯ੍ਯਾਨਕਥਾਕਥਨਮਤ੍ਤਂ ਵਚੀਸਮਾਚਾਰਸ੍ਸ ਅਪਰਿਸੁਦ੍ਧਭਾਵਾਵਹਂ ਸਲ੍ਲੇਖਵਿਕੋਪਨਤੋ, ਨ ਹਸਾਧਿਪ੍ਪਾਯੇਨ ਮੁਸਾਕਥਨਨ੍ਤਿ ਦਟ੍ਠਬ੍ਬਂ. ਹਸਾਧਿਪ੍ਪਾਯੇਨ ਹਿ ਮੁਸਾਕਥਨਂ ਸਿਕ੍ਖਾਪਦਬਦ੍ਧੇਨੇਵ ਪਟਿਕ੍ਖਿਤ੍ਤਨ੍ਤਿ.

੪੨੦. ਆਜੀਵੋਪਿ ਏਕਚ੍ਚੋ ਕਮ੍ਮਪਥਵਸੇਨ ਵਾਰਿਤੋ ਲਬ੍ਭਤਿ. ਸੋ ਪਨ ਅਤਿਓਲ਼ਾਰਿਕੋ ਕਾਯਵਚੀਸਮਾਚਾਰਵਾਰੇਸੁ ਵੁਤ੍ਤਨਯੋ ਏਵਾਤਿ ਨ ਗਹਿਤੋਤਿ ਦਟ੍ਠਬ੍ਬਂ. ਯੇ ਪਨ ‘‘ਤਾਦਿਸੋ ਭਿਕ੍ਖੂਨਂ ਅਯੋਗ੍ਯਤੋ ਨ ਗਹਿਤੋ’’ਤਿ ਵਦਨ੍ਤਿ, ਤਂ ਮਿਚ੍ਛਾ ਤਥਾ ਸਤਿ ਕਾਯਵਚੀਸਮਾਚਾਰਵਾਰੇਪਿ ਤਸ੍ਸ ਅਗ੍ਗਹੇਤਬ੍ਬਭਾਵਾਪਤ੍ਤਿਤੋ. ‘‘ਖਾਦਥ ਪਿਵਥਾ’’ਤਿ ਪੁਚ੍ਛਾ ਅਤ੍ਤਨੋ ਖਾਦਿਤੁਕਾਮਤਾਦੀਪਨੇਨ, ਪਰਿਯਾਯਕਥਾਭਾਵਤੋ ਪਨੇਸਾ ਸਲ੍ਲੇਖਵਿਕੋਪਨਾ ਜਾਤਾ.

੪੨੨. ਅਨੇਸਨਂ ਪਹਾਯ ਧਮ੍ਮੇਨ ਸਮੇਨ ਪਚ੍ਚਯੇ ਪਰਿਯੇਸਨ੍ਤੋ ਪਰਿਯੇਸਨਮਤ੍ਤਞ੍ਞੂ ਨਾਮ. ਦਾਯਕਸ੍ਸ ਦੇਯ੍ਯਧਮ੍ਮਸ੍ਸ ਅਤ੍ਤਨੋ ਚ ਪਮਾਣਞ੍ਞੁਤਾਪਟਿਗ੍ਗਣ੍ਹਨ੍ਤੋ ਪਟਿਗ੍ਗਹਣਮਤ੍ਤਞ੍ਞੂ ਨਾਮ. ਯੋਨਿਸੋ ਪਚ੍ਚਵੇਕ੍ਖਿਤ੍ਵਾ ਪਰਿਭੁਞ੍ਜਨ੍ਤੋ ਪਰਿਭੋਗਮਤ੍ਤਞ੍ਞੂ ਨਾਮ.

੪੨੩. ਏਕਸ੍ਮਿਂ ਕੋਟ੍ਠਾਸੇਤਿ ਮਜ੍ਝਿਮਯਾਮਸਞ੍ਞਿਤੇ ਏਕਸ੍ਮਿਂ ਕੋਟ੍ਠਾਸੇ. ‘‘ਵਾਮੇਨ ਪਸ੍ਸੇਨ ਸੇਨ੍ਤੀ’’ਤਿ ਏਵਂ ਵੁਤ੍ਤਾ. ਦਕ੍ਖਿਣਪਸ੍ਸੇਨ ਸਯਾਨੋ ਨਾਮ ਨਤ੍ਥਿ ਦਕ੍ਖਿਣਹਤ੍ਥਸ੍ਸ ਸਰੀਰਗ੍ਗਹਣਾਦਿਪਯੋਗਕ੍ਖਮਤੋ. ਪੁਰਿਸਵਸੇਨ ਚੇਤਂ ਵੁਤ੍ਤਂ.

ਤੇਜੁਸ੍ਸਦਤ੍ਤਾਤਿ ਇਮਿਨਾ ਸੀਹਸ੍ਸ ਅਭੀਰੁਕਭਾਵਂ ਦਸ੍ਸੇਤਿ. ਭੀਰੁਕਾ ਹਿ ਸੇਸਮਿਗਾ ਅਤ੍ਤਨੋ ਆਸਯਂ ਪਵਿਸਿਤ੍ਵਾ ਸਨ੍ਤਾਸਪੁਬ੍ਬਕਂ ਯਥਾ ਤਥਾ ਸਯਨ੍ਤਿ, ਸੀਹੋ ਪਨ ਅਭੀਰੁਕਭਾਵਤੋ ਸਤੋਕਾਰੀ ਭਿਕ੍ਖੁ ਵਿਯ ਸਤਿਂ ਉਪਟ੍ਠਪੇਤ੍ਵਾਵ ਸਯਤਿ. ਤੇਨਾਹ ‘‘ਦ੍ਵੇ ਪੁਰਿਮਪਾਦੇ’’ਤਿਆਦਿ. ਸੇਤਿ ਅਬ੍ਯਾਵਟਭਾਵੇਨ ਪਵਤ੍ਤਤਿ ਏਤ੍ਥਾਤਿ ਸੇਯ੍ਯਾ, ਚਤੁਤ੍ਥਜ੍ਝਾਨਮੇਵ ਸੇਯ੍ਯਾ. ਕਿਂ ਪਨ ਤਂ ਚਤੁਤ੍ਥਜ੍ਝਾਨਨ੍ਤਿ? ਆਨਾਪਾਨਚਤੁਤ੍ਥਜ੍ਝਾਨਂ. ਤਤ੍ਥ ਹਿ ਠਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਭਗਵਾ ਅਨੁਕ੍ਕਮੇਨ ਅਗ੍ਗਮਗ੍ਗਂ ਅਧਿਗਤੋ ਤਥਾਗਤੋ ਜਾਤੋਤਿ ਕੇਚਿ, ਤਯਿਦਂ ਪਦਟ੍ਠਾਨਂ ਨਾਮ ਨ ਸੇਯ੍ਯਾ. ਅਪਰੇ ਪਨ ‘‘ਚਤੁਤ੍ਥਜ੍ਝਾਨਸਮਨਨ੍ਤਰਾ ਭਗਵਾ ਪਰਿਨਿਬ੍ਬਾਯੀ’’ਤਿ ਵੁਤ੍ਤਪਦਂ ਗਹੇਤ੍ਵਾ ‘‘ਲੋਕਿਯਚਤੁਤ੍ਥਜ੍ਝਾਨਸਮਾਪਤ੍ਤਿ ਤਥਾਗਤਸੇਯ੍ਯਾ’’ਤਿ ਵਦਨ੍ਤਿ, ਤਥਾ ਸਤਿ ਪਰਿਨਿਬ੍ਬਾਨਕਾਲਿਕਾ ਤਥਾਗਤਸੇਯ੍ਯਾਤਿ ਆਪਜ੍ਜਤਿ, ਨ ਚ ਭਗਵਾ ਚਤੁਤ੍ਥਜ੍ਝਾਨਂ ਸਮਾਪਜ੍ਜਨਬਹੁਲੋ ਵਿਹਾਸਿ, ਅਗ੍ਗਫਲਝਾਨਂ ਪਨੇਤ੍ਥ ‘‘ਚਤੁਤ੍ਥਜ੍ਝਾਨ’’ਨ੍ਤਿ ਅਧਿਪ੍ਪੇਤਂ. ਤਤ੍ਥ ਯਥਾ ਸਤ੍ਤਾਨਂ ਨਿਦ੍ਦੁਪਗਮਨਲਕ੍ਖਣਾ ਸੇਯ੍ਯਾ ਭਵਙ੍ਗਚਿਤ੍ਤਵਾਰਵਸੇਨ ਹੋਤਿ, ਤਞ੍ਚ ਤੇਸਂ ਪਠਮਜਾਤਿਸਮਨ੍ਵਯਂ ਯੇਭੁਯ੍ਯਵੁਤ੍ਤਿਕਂ, ਏਵਂ ਭਗਵਤੋ ਅਰਿਯਜਾਤਿਸਮਨ੍ਵਯਂ ਯੇਭੁਯ੍ਯਵੁਤ੍ਤਿਕਂ ਅਗ੍ਗਫਲਭੂਤਂ ਚਤੁਤ੍ਥਜ੍ਝਾਨਂ ‘‘ਤਥਾਗਤਸੇਯ੍ਯਾ’’ਤਿ ਵੇਦਿਤਬ੍ਬਂ. ਸੀਹਸੇਯ੍ਯਾਤਿ ਸੇਟ੍ਠਸੇਯ੍ਯਾਤਿ ਆਹ ‘‘ਉਤ੍ਤਮਸੇਯ੍ਯਾ’’ਤਿ.

੪੨੬. ਵਿਗਤਨ੍ਤਾਨੀਤਿ ਇਣਮੂਲਾਨਿ. ਤੇਸਨ੍ਤਿ ਇਣਮੂਲਾਨਂ. ਪਰਿਯਨ੍ਤੋਤਿ ਅਵਸੇਸੋ.

ਪਵਤ੍ਤਿਨਿਵਾਰਣੇਨ ਚਤੁਇਰਿਯਾਪਥਂ ਛਿਨ੍ਦਨ੍ਤੋ. ਆਬਾਧਤੀਤਿ ਪੀਲ਼ੇਤਿ. ਦੁਕ੍ਖਿਤੋਤਿ ਸਞ੍ਜਾਤਦੁਕ੍ਖੋ. ਅਪ੍ਪਂ ਬਲਂ ਬਲਮਤ੍ਤਾ. ਅਪ੍ਪਤ੍ਥੋ ਹਿ ਅਯਂ ਮਤ੍ਤਾ-ਸਦ੍ਦੋ ‘‘ਮਤ੍ਤਾਸੁਖਪਰਿਚ੍ਚਾਗਾ’’ਤਿਆਦੀਸੁ (ਧ. ਪ. ੨੯੦) ਵਿਯ, ਬਲਵਤ੍ਥੋ ਪਨ ਮਤ੍ਤਾ-ਸਦ੍ਦੋ ਅਨਤ੍ਥਨ੍ਤਰੋ. ਸੇਸਨ੍ਤਿ ‘‘ਤਸ੍ਸ ਹਿ ਬਨ੍ਧਨਾ ਮੁਤ੍ਤੋਮ੍ਹੀਤਿ ਆਵਜ੍ਜਯਤੋ ਤਦੁਭਯਂ ਹੋਤੀ’’ਤਿਆਦਿਨਾ ਵਤ੍ਤਬ੍ਬਂ ਸਨ੍ਧਾਯਾਹ. ਸਬ੍ਬਪਦੇਸੂਤਿ ਵੁਤ੍ਤਾਵਸਿਟ੍ਠੇਸੁ ਸਬ੍ਬਪਦੇਸੁ. ਯੇਨਕਾਮਂ ਯਥਾਰੁਚਿ ਗਚ੍ਛਤੀਤਿ ਯੇਨਕਾਮਂਗਮੋਤਿ ਅਨੁਨਾਸਿਕਲੋਪਂ ਅਕਤ੍ਵਾ ਨਿਦ੍ਦੇਸੋ. ਭੁਜੋ ਅਤ੍ਤਨੋ ਯਥਾਸੁਖਵਿਨਿਯੋਗੋ ਇਸ੍ਸੋ ਇਚ੍ਛਿਤਬ੍ਬੋ ਏਤ੍ਥਾਤਿ ਭੁਜਿਸ੍ਸੋ, ਸਾਮਿਕੋ. ਸੋ ਪਨ ਅਪਰਸਨ੍ਤਕਤਾਯ ‘‘ਅਤ੍ਤਨੋ ਸਨ੍ਤਕੋ’’ਤਿ ਵੁਤ੍ਤੋ. ਦੁਲ੍ਲਭਆਪਤਾਯ ਕਂ ਤਾਰੇਨ੍ਤਿ ਏਤ੍ਥਾਤਿ ਕਨ੍ਤਾਰੋਤਿ ਆਹ ‘‘ਨਿਰੁਦਕਂ ਦੀਘਮਗ੍ਗ’’ਨ੍ਤਿ.

ਵਿਨਾਸੇਤੀਤਿ ਖਾਦਨਦੁਬ੍ਬਿਨਿਯੋਜਨਾਦੀਹਿ ਯਥਾ ਇਣਮੂਲਂ ਕਿਞ੍ਚਿ ਨ ਹੋਤਿ, ਤਥਾ ਕਰੋਤਿ. ਯਮ੍ਹਿ ਰਾਗਵਤ੍ਥੁਮ੍ਹਿ. ਸੋ ਪੁਗ੍ਗਲੋ. ਤੇਨ ਰਾਗਵਤ੍ਥੁਨਾ, ਪੁਰਿਸੋ ਚੇ ਇਤ੍ਥਿਯਾ, ਇਤ੍ਥੀ ਚੇ ਪੁਰਿਸੇਨ. ਇਣਂ ਵਿਯ ਕਾਮਚ੍ਛਨ੍ਦੋ ਦਟ੍ਠਬ੍ਬੋ ਪੀਲ਼ਾਸਮਾਨਤੋ.

ਨ ਵਿਨ੍ਦਤੀਤਿ ਨ ਜਾਨਾਤਿ. ਉਪਦ੍ਦਵੇਥਾਤਿ ਸੁਖਵਿਹਾਰਸ੍ਸ ਉਪਦ੍ਦਵਂ ਕਰੋਥ, ਵਿਬਾਧੇਥਾਤਿ ਅਤ੍ਥੋ. ਰੋਗੋ ਵਿਯ ਬ੍ਯਾਪਾਦੋ ਦਟ੍ਠਬ੍ਬੋ ਸੁਖਭਞ੍ਜਨਸਮਾਨਤੋ.

ਨਾਨਾਵਿਧਹੇਤੂਪਾਯਾਲਙ੍ਕਤਤਾਯ ਖਨ੍ਧਾਯਤਨਧਾਤੁਪਟਿਚ੍ਚਸਮੁਪ੍ਪਾਦਾਦਿਧਮ੍ਮਨੀਤਿਵਿਚਿਤ੍ਤਤਾਯ ਚ ਵਿਚਿਤ੍ਤਨਯੇ. ਧਮ੍ਮਸ੍ਸਵਨੇਤਿ ਧਮ੍ਮਕਥਾਯਂ. ਕਥਾ ਹਿ ਸੋਤਬ੍ਬਟ੍ਠੇਨ ‘‘ਸਵਨ’’ਨ੍ਤਿ ਵੁਤ੍ਤਾ. ਏਵਮੇਤ੍ਥ ਸੀਲਂ ਵਿਭਤ੍ਤਂ, ਏਵਂ ਝਾਨਾਭਿਞ੍ਞਾ, ਏਵਂ ਵਿਪਸ੍ਸਨਾਮਗ੍ਗਫਲਾਨੀਤਿ ਨੇਵ ਤਸ੍ਸ ਧਮ੍ਮਸ੍ਸਵਨਸ੍ਸ ਆਦਿਮਜ੍ਝਪਰਿਯੋਸਾਨਂ ਜਾਨਾਤਿ. ਉਟ੍ਠਿਤੇਤਿ ਨਿਟ੍ਠਿਤੇ. ਅਹੋ ਕਾਰਣਨ੍ਤਿ ਤਤ੍ਥ ਤਤ੍ਥ ਪਟਿਞ੍ਞਾਨੁਰੂਪੇਨ ਨਿਕ੍ਖਿਤ੍ਤਸਾਧਨਵਸੇਨ ਗਹਿਤਕਾਰਣਂ. ਅਹੋ ਉਪਮਾਤਿ ਤਸ੍ਸੇਵ ਕਾਰਣਸ੍ਸ ਪਤਿਟ੍ਠਾਪਨਵਸੇਨ ਅਨ੍ਵਯਤੋ ਬ੍ਯਤਿਰੇਕਤੋ ਚ ਪਤਿਟ੍ਠਂ ਉਦਾਹਰਣਾਦਿ. ਬਨ੍ਧਨਾਗਾਰਂ ਵਿਯ ਥਿਨਮਿਦ੍ਧਂ ਦਟ੍ਠਬ੍ਬਂ ਦੁਕ੍ਖਤੋ ਨਿਯ੍ਯਾਨਸ੍ਸ ਵਿਬਨ੍ਧਨਤੋ.

ਯਸ੍ਮਾ ਕੁਕ੍ਕੁਚ੍ਚਨੀਵਰਣਂ ਉਦ੍ਧਚ੍ਚਰਹਿਤਂ ਨਤ੍ਥਿ, ਯਸ੍ਮਾ ਵਾ ਉਦ੍ਧਚ੍ਚਕੁਕ੍ਕੁਚ੍ਚਂ ਸਮਾਨਕਿਚ੍ਚਾਹਾਰਪਟਿਪਕ੍ਖਂ, ਤਸ੍ਮਾ ਕੁਕ੍ਕੁਚ੍ਚਸ੍ਸ ਵਿਸਯਂ ਦਸ੍ਸੇਨ੍ਤੋ ‘‘ਵਿਨਯੇ ਅਪਕਤਞ੍ਞੁਨਾ’’ਤਿਆਦਿਮਾਹ. ਯਥਾ ਹਿ ਉਦ੍ਧਚ੍ਚਂ ਸਤ੍ਤਸ੍ਸ ਅਵੂਪਸਮਕਰਂ, ਤਥਾ ਕੁਕ੍ਕੁਚ੍ਚਮ੍ਪਿ. ਯਥਾਪਿ ਉਦ੍ਧਚ੍ਚਸ੍ਸ ਞਾਤਿਵਿਤਕ੍ਕਾਦਿ ਆਹਾਰੋ, ਤਥਾ ਕੁਕ੍ਕੁਚ੍ਚਸ੍ਸਪਿ. ਯਥਾ ਚ ਉਦ੍ਧਚ੍ਚਸ੍ਸ ਸਮਥੋ ਪਟਿਪਕ੍ਖੋ, ਤਥਾ ਕੁਕ੍ਕੁਚ੍ਚਸ੍ਸਪੀਤਿ. ਦਾਸਬ੍ਯਂ ਵਿਯ ਉਦ੍ਧਚ੍ਚਕੁਕ੍ਕੁਚ੍ਚਂ ਦਟ੍ਠਬ੍ਬਂ ਅਸੇਰਿਭਾਵਾਪਾਦਨਤੋ.

ਸੋਲ਼ਸਵਤ੍ਥੁਕਾ ਵਿਚਿਕਿਚ੍ਛਾ ਅਟ੍ਠਵਤ੍ਥੁਕਂ ਵਿਚਿਕਿਚ੍ਛਂ ਅਨੁਪਵਿਟ੍ਠਾਤਿ ਆਹ ‘‘ਅਟ੍ਠਸੁ ਠਾਨੇਸੁ ਵਿਚਿਕਿਚ੍ਛਾ’’ਤਿ. ਵਿਚਿਕਿਚ੍ਛਨ੍ਤੋਤਿ ਸਂਸਯਨ੍ਤੋ. ਅਧਿਮੁਚ੍ਚਿਤ੍ਵਾਤਿ ਪਤ੍ਤਿਯਾਯੇਤ੍ਵਾ. ਗਣ੍ਹਿਤੁਨ੍ਤਿ ਸਦ੍ਧੇਯ੍ਯਵਤ੍ਥੁਂ ਪਰਿਗ੍ਗਹੇਤੁਂ. ਅਭਿਮੁਖਂ ਸਪ੍ਪਨਂ ਆਸਪ੍ਪਨਂ, ਪਰਿਤੋ ਸਪ੍ਪਨਂ ਪਰਿਸਪ੍ਪਨਂ. ਪਦਦ੍ਵਯੇਨਪਿ ਚਿਤ੍ਤਸ੍ਸ ਅਨਿਚ੍ਛਨਾਕਾਰਮੇਵ ਵਦਤਿ. ਖੇਮਨ੍ਤਗਾਮਿਮਗ੍ਗਂ ਨ ਪਰਿਯੋਗਾਹਤਿ ਏਤੇਨਾਤਿ ਅਪਰਿਯੋਗਾਹਨਂ, ਉਸ੍ਸਙ੍ਕਿਤਪਰਿਸਙ੍ਕਿਤਭਾਵੇਨ ਛਮ੍ਭਿਤਂ ਹੋਤਿ ਚਿਤ੍ਤਂ ਯਸ੍ਸ ਧਮ੍ਮਸ੍ਸ ਵਸੇਨ, ਸੋ ਧਮ੍ਮੋ ਛਮ੍ਭਿਤਤ੍ਤਨ੍ਤਿ ਵਿਚਿਕਿਚ੍ਛਨਾਕਾਰਮਾਹ. ਤੇਨਾਹ ‘‘ਚਿਤ੍ਤਸ੍ਸ ਉਪ੍ਪਾਦਯਮਾਨਾ’’ਤਿ. ਕਨ੍ਤਾਰਦ੍ਧਾਨਮਗ੍ਗੋ ਵਿਯਾਤਿ ਸਾਸਙ੍ਕਕਨ੍ਤਾਰਦ੍ਧਾਨਮਗ੍ਗੋ ਵਿਯ ਦਟ੍ਠਬ੍ਬਾ ਅਪ੍ਪਟਿਪਤ੍ਤਿਹੇਤੁਭਾਵਤੋ.

ਨਤ੍ਥਿ ਏਤ੍ਥ ਇਣਨ੍ਤਿ ਅਣਣੋ, ਤਸ੍ਸ ਭਾਵੋ ਆਣਣ੍ਯਂ, ਕਸ੍ਸਚਿ ਇਣਸ੍ਸ ਅਧਾਰਣਂ. ਸਮਿਦ੍ਧਕਮ੍ਮਨ੍ਤੋਤਿ ਨਿਪ੍ਫਨ੍ਨਜੀਵਿਕਪ੍ਪਯੋਗੋ. ਪਰਿਬੁਨ੍ਧਤਿ ਉਪਰੋਧੇਤੀਤਿ ਰ-ਕਾਰਸ੍ਸ ਲ-ਕਾਰਂ ਕਤ੍ਵਾ ਪਲਿਬੋਧੋ, ਅਸੇਰਿਵਿਹਾਰੋ, ਤਸ੍ਸ ਮੂਲਂ ਕਾਰਣਨ੍ਤਿ ਪਲਿਬੋਧਮੂਲਂ. ਛ ਧਮ੍ਮੇ ਭਾਵੇਤ੍ਵਾਤਿ ਅਸੁਭਨਿਮਿਤ੍ਤਗ੍ਗਾਹਾਦਿਕੇ ਛ ਧਮ੍ਮੇ ਉਪ੍ਪਾਦੇਤ੍ਵਾ ਵਡ੍ਢੇਤ੍ਵਾ. ਛ ਧਮ੍ਮੇ ਭਾਵੇਤ੍ਵਾਤਿ ਚ ਮੇਤ੍ਤਾਨਿਮਿਤ੍ਤਗ੍ਗਾਹਾਦਯੋ ਚ ਤਤ੍ਥ ਤਤ੍ਥ ਛ ਧਮ੍ਮਾਤਿ ਵੁਤ੍ਤਾਤਿ ਵੇਦਿਤਬ੍ਬੋ. ਪਜਹਤੀਤਿ ਵਿਕ੍ਖਮ੍ਭਨਵਸੇਨ ਪਜਹਤਿ. ਤੇਨਾਹ ‘‘ਆਚਾਰਪਣ੍ਣਤ੍ਤਿਆਦੀਨਿ ਸਿਕ੍ਖਾਪਿਯਮਾਨੋ’’ਤਿਆਦਿ. ਪਰਵਤ੍ਥੁਮ੍ਹੀਤਿ ਵਿਸਭਾਗਵਤ੍ਥੁਸ੍ਮਿਂ, ਪਰਵਿਸਯੇ ਵਾ. ਪਰਵਿਸਯਾ ਹੇਤੇ ਭਿਕ੍ਖੁਨੋ, ਯਦਿਦਂ ਪਞ੍ਚ ਕਾਮਗੁਣਾ. ਆਣਣ੍ਯਮਿਵ ਕਾਮਚ੍ਛਨ੍ਦਪ੍ਪਹਾਨਂ ਆਹ ਪਿਯਵਤ੍ਥੁਅਭਾਵਾਵਹਤੋ.

ਆਚਾਰਵਿਪਤ੍ਤਿਪਟਿਬਾਹਕਾਨਿ ਸਿਕ੍ਖਾਪਦਾਨਿ ਆਚਾਰਪਣ੍ਣਤ੍ਤਿਆਦੀਨਿ. ਆਰੋਗ੍ਯਮਿਵ ਬ੍ਯਾਪਾਦਪ੍ਪਹਾਨਂ ਆਹ ਕਾਯਚਿਤ੍ਤਾਨਂ ਫਾਸੁਭਾਵਾਵਹਤੋ.

ਬਨ੍ਧਨਾ ਮੋਕ੍ਖਮਿਵ ਥਿਨਮਿਦ੍ਧਪ੍ਪਹਾਨਂ ਆਹ ਚਿਤ੍ਤਸ੍ਸ ਨਿਗ੍ਗਹਿਤਭਾਵਾਵਹਤੋ.

ਭੁਜਿਸ੍ਸਂ ਵਿਯ ਉਦ੍ਧਚ੍ਚਕੁਕ੍ਕੁਚ੍ਚਪ੍ਪਹਾਨਂ ਆਹ ਚਿਤ੍ਤਸ੍ਸ ਸੇਰਿਭਾਵਾਵਹਤੋ.

ਤਿਣਂ ਵਿਯਾਤਿ ਤਿਣਮਿਵ ਕਤ੍ਵਾ. ਅਗਣੇਤ੍ਵਾਤਿ ਅਚਿਨ੍ਤੇਤ੍ਵਾ. ਖੇਮਨ੍ਤਭੂਮਿਂ ਵਿਯ ਵਿਚਿਕਿਚ੍ਛਾਪਹਾਨਂ ਆਹ ਅਨੁਸ੍ਸਙ੍ਕਿਤਾਪਰਿਸਙ੍ਕਿਤਭਾਵੇਨ ਸਮ੍ਮਾਪਟਿਪਤ੍ਤਿਹੇਤੁਭਾਵਤੋ.

੪੨੭. ਕਿਰੀਯਤਿ (ਅ. ਨਿ. ਟੀ. ੩.੫.੨੮-੨੯) ਗਬ੍ਭਾਸਯੇ ਖਿਪੀਯਤੀਤਿ ਕਰੋ, ਸਮ੍ਭਵੋ, ਕਰਤੋ ਜਾਤੋਤਿ ਕਰਜੋ, ਮਾਤਾਪੇਤ੍ਤਿਕਸਮ੍ਭਵੋਤਿ ਅਤ੍ਥੋ. ਮਾਤੁਯਾ ਹਿ ਸਰੀਰਸਣ੍ਠਾਪਨਵਸੇਨ ਕਰਤੋ ਜਾਤੋਤਿ ਕਰਜੋਤਿ ਅਪਰੇ. ਉਭਯਥਾਪਿ ਕਰਜਕਾਯਨ੍ਤਿ ਚਤੁਸਨ੍ਤਤਿਰੂਪਮਾਹ. ਤੇਮੇਤੀਤਿ ਤਿਨ੍ਤਂ ਕਰੋਤਿ. ਕੋ ਪਨੇਤ੍ਥ ਤਿਨ੍ਤਭਾਵੋਤਿ ਆਹ ‘‘ਸ੍ਨੇਹੇਤੀ’’ਤਿ, ਪੀਤਿਸ੍ਨੇਹੇਨ ਪੀਣਨਂ ਕਰੋਤੀਤਿ ਅਤ੍ਥੋ. ਤੇਨਾਹ ‘‘ਸਬ੍ਬਤ੍ਥ ਪਵਤ੍ਤਪੀਤਿਸੁਖਂ ਕਰੋਤੀ’’ਤਿ. ਪੀਤਿਸਮੁਟ੍ਠਾਨਪਣੀਤਰੂਪੇਹਿ ਸਕਲਸ੍ਸ ਕਰਜਕਾਯਸ੍ਸ ਪਰਿਫੁਟਤਾਯ ਚੇਤ੍ਥ ਤਂਸਮੁਟ੍ਠਾਪਕਪੀਤਿਸੁਖਾਨਂ ਸਬ੍ਬਤ੍ਥ ਪਵਤ੍ਤਿ ਜੋਤਿਤਾ. ਪਰਿਸਨ੍ਦੇਤੀਤਿਆਦੀਸੁਪਿ ਏਸੇਵ ਨਯੋ. ਤਤ੍ਥਾਪਿ ਹਿ ‘‘ਸਮਨ੍ਤਤੋ ਸਨ੍ਦੇਤਿ ਤੇਮੇਤਿ ਸ੍ਨੇਹੇਤਿ, ਸਬ੍ਬਤ੍ਥ ਪਵਤ੍ਤਪੀਤਿਸੁਖਂ ਕਰੋਤੀ’’ਤਿਆਦਿਨਾ ਯਥਾਰਹਂ ਅਤ੍ਥੋ ਵੇਦਿਤਬ੍ਬੋ. ਪਰਿਪੂਰੇਤੀਤਿ ਵਾਯੁਨਾ ਭਸ੍ਤਂ ਵਿਯ ਇਮਂ ਕਰਜਕਾਯਂ ਪੀਤਿਸੁਖੇਨ ਪੂਰੇਤਿ. ਸਮਨ੍ਤਤੋ ਫੁਸਤੀਤਿ ਇਮਂ ਕਰਜਕਾਯਂ ਪੀਤਿਸੁਖੇਨ ਫੁਸਤਿ. ਸਬ੍ਬਾਵਤੋਤਿ ਅ-ਕਾਰਸ੍ਸ ਆ-ਕਾਰੋ ਕਤੋ, ਸਬ੍ਬਾਵਯਵਵਤੋਤਿ ਅਤ੍ਥੋਤਿ ਆਹ ‘‘ਸਬ੍ਬਕੋਟ੍ਠਾਸਵਤੋ’’ਤਿ, ਮਂਸਾਦਿਸਬ੍ਬਾਭਾਗਵਤੋਤਿ ਅਤ੍ਥੋ. ਅਫੁਟਂ ਨਾਮ ਨ ਹੋਤਿ ਪੀਤਿਸੁਖਸਮੁਟ੍ਠਾਨੇਹਿ ਰੂਪੇਹਿ ਸਬ੍ਬਤ੍ਥਕਮੇਵ ਬ੍ਯਾਪਿਤਤ੍ਤਾ. ਕਾਤੁਞ੍ਚੇਵ ਯੋਜੇਤੁਞ੍ਚ ਛੇਕੋ ਸਨ੍ਨੇਤੁਂ ਪਟਿਬਲੋਤਿ ਯੋਜਨਾ. ਨ੍ਹਾਨੀਯਚੁਣ੍ਣਾਨਂ ਪਰਿਮਦ੍ਦਨਵਸੇਨ ਪਿਣ੍ਡਂ ਕਰੋਨ੍ਤੇਨ ਹਤ੍ਥੇਨ ਭਾਜਨਂ ਨਿਪ੍ਪੀਲ਼ੇਤਬ੍ਬਂ ਹੋਤੀਤਿ ਆਹ ‘‘ਸਨ੍ਨੇਨ੍ਤਸ੍ਸ ਭਿਜ੍ਜਤੀ’’ਤਿ. ਅਨੁਗਤਾਤਿ ਅਨੁਪਵਿਟ੍ਠਾ. ਪਰਿਗਤਾਤਿ ਪਰਿਤੋ ਸਮਨ੍ਤਤੋ ਤਿਨ੍ਤਾ. ਤਿਨ੍ਤਭਾਵੇਨੇਵ ਸਮਂ ਅਨ੍ਤਰਂ ਬਾਹਿਰਞ੍ਚ ਏਤਿਸ੍ਸਾਤਿ ਸਨ੍ਤਰਬਾਹਿਰਾ. ਸਬ੍ਬਤ੍ਥਕਮੇਵਾਤਿ ਸਬ੍ਬਤ੍ਥੇਵ. ਨ ਚ ਪਗ੍ਘਰਿਣੀ ਪਮਾਣਯੁਤ੍ਤਸ੍ਸੇਵ ਉਦਕਸ੍ਸ ਸਿਤ੍ਤਤ੍ਤਾ. ਏਤ੍ਥ ਚ ਨ੍ਹਾਨੀਯਪਿਣ੍ਡਂ ਵਿਯ ਕਰਜਕਾਯੋ, ਤਂ ਤੇਮੇਤ੍ਵਾ ਸਮ੍ਪਿਣ੍ਡਿਤਪਮਾਣਯੁਤ੍ਤਉਦਕਂ ਵਿਯ ਪਠਮਜ੍ਝਾਨਸੁਖਂ ਦਟ੍ਠਬ੍ਬਂ.

੪੨੮. ਹੇਟ੍ਠਾ ਉਬ੍ਭਿਜ੍ਜਿਤ੍ਵਾ ਉਗ੍ਗਚ੍ਛਨਉਦਕੋਤਿ ਰਹਦਸ੍ਸ ਅਧੋਥੂਲਧਾਰਾਵਸੇਨ ਉਬ੍ਭਿਜ੍ਜ ਉਟ੍ਠਹਨਉਦਕੋ. ਅਨ੍ਤੋਯੇਵ ਉਬ੍ਭਿਜ੍ਜਨਉਦਕੋਤਿ ਰਹਦਸ੍ਸ ਅਬ੍ਭਨ੍ਤਰੇਯੇਵ ਥੂਲਧਾਰਾ ਅਹੁਤ੍ਵਾ ਉਟ੍ਠਿਤਉਦਕਸਿਰਾਮੁਖੇਹਿ ਉਬ੍ਭਿਜ੍ਜਨਕੋ. ਆਗਮਨਮਗ੍ਗੋਤਿ ਨਦੀਤਲ਼ਾਕਕਨ੍ਦਰਸਰਆਦਿਤੋ ਆਗਮਨਮਗ੍ਗੋ.

੪੨੯. ਉਪ੍ਪਲਗਚ੍ਛਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀ (ਅ. ਨਿ. ਟੀ. ੩.੫.੨੮-੨੯), ਵਾਰਿ. ਅਯਮੇਤ੍ਥ ਵਿਨਿਚ੍ਛਯੋ, ਤਥਾ ਹਿ ਲੋਕੇ ਰਤ੍ਤਕ੍ਖਿਕੋ ‘‘ਪੁਣ੍ਡਰੀਕਕ੍ਖੋ’’ਤਿ ਵੁਚ੍ਚਤਿ. ਕੇਚਿ ਪਨ ‘‘ਰਤ੍ਤਂ ਪਦੁਮਂ, ਸੇਤਂ ਪੁਣ੍ਡਰੀਕ’’ਨ੍ਤਿ ਵਦਨ੍ਤਿ. ਉਪ੍ਪਲਾਦੀਨਿ ਵਿਯ ਕਰਜਕਾਯੋ, ਉਦਕਂ ਵਿਯ ਤਤਿਯਜ੍ਝਾਨਸੁਖਨ੍ਤਿ ਅਯਮ੍ਪਿ ਅਤ੍ਥੋ ‘‘ਪੁਰਿਮਨਯੇਨਾ’’ਤਿ ਅਤਿਦੇਸੇਨੇਵ ਵਿਭਾਵਿਤੋਤਿ ਦਟ੍ਠਬ੍ਬਂ.

੪੩੦. ਨਿਰੁਪਕ੍ਕਿਲੇਸਟ੍ਠੇਨਾਤਿ ਰਜੋਜਲ੍ਲਾਦਿਨਾ ਅਨੁਪਕ੍ਕਿਲਿਟ੍ਠਤਾਯ ਅਮਲੀਨਭਾਵੇਨ. ਅਮਲੀਨਮ੍ਪਿ ਕਿਞ੍ਚਿ ਵਤ੍ਥੁ ਪਭਸ੍ਸਰਸਭਾਵਂ ਹੋਤੀਤਿ ਵੁਤ੍ਤਂ ‘‘ਪਭਸ੍ਸਰਟ੍ਠੇਨਾ’’ਤਿ. ਉਤੁਫਰਣਨ੍ਤਿ ਉਣ੍ਹਉਤੁਫਰਣਂ. ਸਬ੍ਬਤ੍ਥਕਮੇਵ ਝਾਨਸੁਖੇਨ ਫੁਟ੍ਠੋ ਕਰਜਕਾਯੋ ਯਥਾ ਉਤੁਨਾ ਫੁਟ੍ਠਵਤ੍ਥਸਦਿਸੋਤਿ ਆਹ ‘‘ਵਤ੍ਥਂ ਵਿਯ ਕਰਜਕਾਯੋ’’ਤਿ. ਤਸ੍ਮਾਤਿ ‘‘ਵਤ੍ਥਂ ਵਿਯਾ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਹੇਤੁਭਾਵੇਨ ਪਚ੍ਚਾਮਸਤਿ, ਕਰਜਕਾਯਸ੍ਸ ਵਤ੍ਥਸਦਿਸਤ੍ਤਾ ਚਤੁਤ੍ਥਜ੍ਝਾਨਸੁਖਸ੍ਸ ਚ ਉਤੁਫਰਣਸਦਿਸਤ੍ਤਾਤਿ ਅਤ੍ਥੋ. ਸਨ੍ਤਸਭਾਵਤ੍ਤਾ ਞਾਣੁਤ੍ਤਰਤ੍ਤਾ ਚੇਤ੍ਥ ਉਪੇਕ੍ਖਾਪਿ ਸੁਖੇ ਸਙ੍ਗਹਿਤਾਤਿ ਚਤੁਤ੍ਥਜ੍ਝਾਨੇਪਿ ਸੁਖਗ੍ਗਹਣਂ ਕਤਂ. ‘‘ਪਰਿਸੁਦ੍ਧੇਨ ਪਰਿਯੋਦਾਤੇਨ ਫਰਿਤ੍ਵਾ ਨਿਸਿਨ੍ਨੋ ਹੋਤੀ’’ਤਿ ਵਚਨਤੋ ਚਤੁਤ੍ਥਜ੍ਝਾਨਚਿਤ੍ਤਸ੍ਸ ਵਤ੍ਥਸਦਿਸਤਾ ਵੁਤ੍ਤਾ. ਚਤੁਤ੍ਥਜ੍ਝਾਨਸਮੁਟ੍ਠਾਨਰੂਪੇਹਿ ਭਿਕ੍ਖੁਨੋ ਕਾਯਸ੍ਸ ਫੁਟਭਾਵਂ ਸਨ੍ਧਾਯ ‘‘ਤਂਸਮੁਟ੍ਠਾਨਰੂਪਂ ਉਤੁਫਰਣਂ ਵਿਯਾ’’ਤਿ ਵੁਤ੍ਤਂ. ਪੁਰਿਸਸ੍ਸ ਕਾਯੋ ਵਿਯ ਭਿਕ੍ਖੁਨੋ ਕਰਜਕਾਯੋਤਿ ਅਯਂ ਪਨਤ੍ਥੋ ਪਾਕਟੋਤਿ ਨ ਗਹਿਤੋ, ਗਹਿਤੋ ਏਵ ਵਾ ‘‘ਯਥਾ ਹਿ ਕਤ੍ਥਚਿ…ਪੇ… ਕਾਯੋ ਫੁਟੋ ਹੋਤੀ’’ਤਿ ਵੁਤ੍ਤਤ੍ਤਾ.

੪੩੧. ਪੁਬ੍ਬੇਨਿਵਾਸਞਾਣਉਪਮਾਯਨ੍ਤਿ ਪੁਬ੍ਬੇਨਿਵਾਸਞਾਣਸ੍ਸ ਦਸ੍ਸਿਤਉਪਮਾਯਂ. ਤਂਦਿਵਸਂਕਤਕਿਰਿਯਾਗਹਣਂ ਪਾਕਤਿਕਸਤ੍ਤਸ੍ਸਪਿ ਯੇਭੁਯ੍ਯੇਨ ਪਾਕਟਾ ਹੋਤੀਤਿ ਦਸ੍ਸਨਤ੍ਥਂ. ਤਂਦਿਵਸਗਤਗਾਮਤ੍ਤਯਗ੍ਗਹਣੇਨੇਵ ਮਹਾਭਿਨੀਹਾਰੇਹਿ ਅਞ੍ਞੇਸਮ੍ਪਿ ਪੁਬ੍ਬੇਨਿਵਾਸਞਾਣਲਾਭੀਨਂ ਤੀਸੁ ਭਵੇਸੁ ਕਤਾ ਕਿਰਿਯਾ ਯੇਭੁਯ੍ਯੇਨ ਪਾਕਟਾ ਹੋਤੀਤਿ ਦੀਪਿਤਨ੍ਤਿ ਦਟ੍ਠਬ੍ਬਂ.

੪੩੨. ਸਮ੍ਮੁਖਦ੍ਵਾਰਾਤਿ ਅਞ੍ਞਮਞ੍ਞਸ੍ਸ ਅਭਿਮੁਖਦ੍ਵਾਰਾ. ਅਪਰਾਪਰਂ ਸਞ੍ਚਰਨ੍ਤੇਤਿ ਤਂਤਂਕਿਚ੍ਚਵਸੇਨ ਇਤੋ ਚਿਤੋ ਚ ਸਞ੍ਚਰਨ੍ਤੇ. ਇਤੋ ਪਨ ਗੇਹਾ…ਪੇ… ਪਵਿਸਨਵਸੇਨਪੀਤਿ ਇਦਂ ਚੁਤੂਪਪਾਤਞਾਣਸ੍ਸ ਵਿਸਯਦਸ੍ਸਨਵਸੇਨ ਵੁਤ੍ਤਂ. ਦ੍ਵਿਨ੍ਨਂ ਗੇਹਾਨਂ ਅਨ੍ਤਰੇ ਠਤ੍ਵਾਤਿ ਦ੍ਵਿਨ੍ਨਂ ਗੇਹਦ੍ਵਾਰਾਨਂ ਸਮ੍ਮੁਖਟ੍ਠਾਨਭੂਤੇ ਅਨ੍ਤਰਵੀਥਿਯਂ ਵੇਮਜ੍ਝੇ ਠਤ੍ਵਾ. ਤੇਸੁ ਹਿ ਏਕਸ੍ਸ ਚੇ ਪਾਚੀਨਮੁਖਦ੍ਵਾਰਂ ਇਤਰਸ੍ਸ ਪਚ੍ਛਿਮਮੁਖਂ, ਤਸ੍ਸ ਸਮ੍ਮੁਖਂ ਉਭਿਨ੍ਨਂ ਅਨ੍ਤਰਵੀਥਿਯਂ ਠਿਤਸ੍ਸ ਦਕ੍ਖਿਣਾਮੁਖਸ੍ਸ, ਉਤ੍ਤਰਾਮੁਖਸ੍ਸ ਵਾ ਚਕ੍ਖੁਮਤੋ ਪੁਰਿਸਸ੍ਸ ਤਤ੍ਥ ਪਵਿਸਨਕਨਿਕ੍ਖਮਨਕਪੁਰਿਸਾ ਯਥਾ ਸੁਖੇਨੇਵ ਪਾਕਟਾ ਹੋਨ੍ਤਿ, ਏਵਂ ਦਿਬ੍ਬਚਕ੍ਖੁਞਾਣਸਮਙ੍ਗਿਨੋ ਚਵਨਕਉਪਪਜ੍ਜਨਕਪੁਰਿਸਾ. ਯਥਾ ਪਨ ਤਸ੍ਸ ਪੁਰਿਸਸ੍ਸ ਅਞ੍ਞੇਨੇਵ ਖਣੇਨ ਪਵਿਸਨ੍ਤਸ੍ਸ ਦਸ੍ਸਨਂ, ਅਞ੍ਞੇਨ ਨਿਕ੍ਖਮਨ੍ਤਸ੍ਸ ਦਸ੍ਸਨਂ, ਏਵਂ ਇਮਸ੍ਸਪਿ ਅਞ੍ਞੇਨੇਵ ਖਣੇਨ ਚਵਮਾਨਸ੍ਸ ਦਸ੍ਸਨਂ, ਅਞ੍ਞੇਨ ਉਪਪਜ੍ਜਮਾਨਸ੍ਸ ਦਸ੍ਸਨਨ੍ਤਿ ਦਟ੍ਠਬ੍ਬਂ. ਞਾਣਸ੍ਸ ਪਾਕਟਾਤਿ ਆਨੇਤ੍ਵਾ ਸਮ੍ਬਨ੍ਧੋ. ਤਸ੍ਸਾਤਿ ਞਾਣਸ੍ਸ.

੪੩੩. ਪਬ੍ਬਤਸਿਖਰਂ ਯੇਭੁਯ੍ਯੇਨ ਸਂਖਿਤ੍ਤਂ ਸਙ੍ਕੁਚਿਤਂ ਹੋਤੀਤਿ ਇਧ ਪਬ੍ਬਤਮਤ੍ਥਕਂ ‘‘ਪਬ੍ਬਤਸਙ੍ਖੇਪੋ’’ਤਿ ਵੁਤ੍ਤਂ, ਪਬ੍ਬਤਪਰਿਯਾਪਨ੍ਨੋ ਵਾ ਪਦੇਸੋ ਪਬ੍ਬਤਸਙ੍ਖੇਪੋ. ਅਨਾਵਿਲੋਤਿ ਅਕਾਲੁਸ੍ਸੋ. ਸਾ ਚਸ੍ਸ ਅਨਾਵਿਲਤਾ ਕਦ੍ਦਮਾਭਾਵੇਨ ਹੋਤੀਤਿ ਆਹ ‘‘ਨਿਕ੍ਕਦ੍ਦਮੋ’’ਤਿ. ਠਿਤਾਸੁਪਿ ਨਿਸਿਨ੍ਨਾਸੁਪਿ ਗਾਵੀਸੁ. ਵਿਜ੍ਜਮਾਨਾਸੂਤਿ ਲਬ੍ਭਮਾਨਾਸੁ. ਇਤਰਾ ਠਿਤਾਪਿ ਨਿਸਿਨ੍ਨਾਪਿ ਚਰਨ੍ਤੀਤਿ ਵੁਚ੍ਚਨ੍ਤਿ ਸਹਚਰਣਞਾਯੇਨ. ਤਿਟ੍ਠਨ੍ਤਮੇਵ, ਨ ਕਦਾਚਿਪਿ ਚਰਨ੍ਤਂ. ਦ੍ਵਯਨ੍ਤਿ ਸਿਪ੍ਪਿਸਮ੍ਮੁਕਂ ਮਚ੍ਛਗੁਮ੍ਬਨ੍ਤਿ ਇਮਂ ਉਭਯਂ ਤਿਟ੍ਠਨ੍ਤਨ੍ਤਿ ਵੁਤ੍ਤਂ, ਚਰਨ੍ਤਮ੍ਪੀਤਿ ਅਧਿਪ੍ਪਾਯੋ. ਕਿਂ ਵਾ ਇਮਾਯ ਸਹਚਰਿਯਾਯ, ਯਥਾਲਾਭਗ੍ਗਹਣਂ ਪਨੇਤ੍ਥ ਦਟ੍ਠਬ੍ਬਂ. ਸਕ੍ਖਰਕਥਲਸ੍ਸ ਹਿ ਵਸੇਨ ‘‘ਤਿਟ੍ਠਨ੍ਤ’’ਨ੍ਤਿ, ਸਿਪ੍ਪਿਸਮ੍ਬੁਕਸ੍ਸ ਮਚ੍ਛਗੁਮ੍ਬਸ੍ਸ ਚ ਵਸੇਨ ‘‘ਤਿਟ੍ਠਨ੍ਤਮ੍ਪਿ, ਚਰਨ੍ਤਮ੍ਪੀ’’ਤਿ ਯੋਜਨਾ ਕਾਤਬ੍ਬਾ.

੪੩੪. ਭਿਕ੍ਖੂਤਿ ਭਿਨ੍ਨਕਿਲੇਸੋਤਿ ਭਿਕ੍ਖੁ. ਸੋ ਹਿ ਪਰਮਤ੍ਥਤੋ ਸਮਣੋਤਿਨਾਮਕੋ. ਤਤ੍ਥ ਅਰਿਯਮਗ੍ਗੇਨ ਸਬ੍ਬਸੋ ਪਾਪਾਨਂ ਸਮਿਤਾਵੀਤਿ ਸਮਣੋ. ਤੇਨਾਹ ‘‘ਸਮਿਤਪਾਪਤ੍ਤਾ’’ਤਿ. ਸੇਟ੍ਠਟ੍ਠੇਨ ਬ੍ਰਹ੍ਮਾ ਵੁਚ੍ਚਤਿ ਸਮ੍ਮਾਸਮ੍ਬੁਦ੍ਧੋ, ਤਤੋ ਆਗਤੋਤਿ ਬ੍ਰਹ੍ਮਾ, ਅਰਿਯਮਗ੍ਗੋ, ਤਂ ਅਸਮ੍ਮੋਹਪਟਿਵੇਧਵਸੇਨ ਅਞ੍ਞਾਸੀਤਿ ਬ੍ਰਾਹ੍ਮਣੋ. ਤਂਸਮਙ੍ਗਿਤਾਯ ਹਿਸ੍ਸ ਪਾਪਾਨਂ ਬਾਹਿਤਭਾਵੋ. ਤੇਨਾਹ ‘‘ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋ’’ਤਿ. ਅਟ੍ਠਙ੍ਗਿਕੇਨ ਅਰਿਯਮਗ੍ਗਜਲੇਨ ਨ੍ਹਾਤਵਾ ਨਿਦ੍ਧੋਤਕਿਲੇਸੋਤਿ ਨ੍ਹਾਤਕੋ. ਗਤਤ੍ਤਾਤਿ ਪਹਾਨਾਭਿਸਮਯਵਸੇਨ ਪਟਿਵਿਦ੍ਧਤ੍ਤਾ. ਤੇਨਾਹ ‘‘ਵਿਦਿਤਤ੍ਤਾ’’ਤਿ. ਨਿਸ੍ਸੁਤਤ੍ਤਾਤਿ ਸਮੁਚ੍ਛੇਦਪ੍ਪਹਾਨਵਸੇਨ ਸਨ੍ਤਾਨਤੋ ਸਬ੍ਬਸੋ ਨਿਹਤਤ੍ਤਾ. ਤੇਨਾਹ ‘‘ਅਪਹਤਤ੍ਤਾ’’ਤਿ, ਮਰਿਯਾਦਵਸੇਨ ਕਿਲੇਸਾਨਂ ਹਿਂਸਿਤਤ੍ਤਾ ਅਰਿਯਮਗ੍ਗੇਹਿ ਓਧਿਸੋ ਸਬ੍ਬਸੋ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾਤਿ ਅਤ੍ਥੋ. ਤੇਨਾਹ ‘‘ਹਤਤ੍ਤਾ’’ਤਿ. ਆਰਕਤ੍ਤਾਤਿ ਸੁਪ੍ਪਹੀਨਤਾਯ ਵਿਪ੍ਪਕਟ੍ਠਭਾਵਤੋ. ਤੇਨਾਹ ‘‘ਦੂਰੀਭੂਤਤ੍ਤਾ’’ਤਿ. ਉਭਯਮ੍ਪਿ ਉਭਯਤ੍ਥ ਯੋਜੇਤਬ੍ਬਂ – ਕਿਲੇਸਾਨਂ ਆਰਕਤ੍ਤਾ ਹਤਤ੍ਤਾ ਦੂਰੀਭੂਤਤ੍ਤਾ ਚ ਅਰਿਯੋ, ਤਥਾ ਅਰਹਨ੍ਤਿ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਉਤ੍ਤਾਨਤ੍ਥਤ੍ਤਾ ਸੁਵਿਞ੍ਞੇਯ੍ਯਮੇਵ.

ਮਹਾਅਸ੍ਸਪੁਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.