੧੦. ਚੂਲ਼ਅਸ੍ਸਪੁਰਸੁਤ੍ਤਵਣ੍ਣਨਾ

੪੩੫. ਪੁਰਿਮਸਦਿਸਮੇਵਾਤਿ ‘‘ਅਸ੍ਸਪੁਰਵਾਸੀਨਂ ਭਿਕ੍ਖੁਸਙ੍ਘੇ ਗਾਰਵਬਹੁਮਾਨਂ ਨਿਪਚ੍ਚਕਾਰਞ੍ਚ ਦਿਸ੍ਵਾ ਭਿਕ੍ਖੂ ਪਿਣ੍ਡਪਾਤਾਪਚਾਯਨੇ ਨਿਯੋਜੇਨ੍ਤੋ ਇਦਂ ਸੁਤ੍ਤਂ ਅਭਾਸੀ’’ਤਿ ਪੁਰਿਮਸੁਤ੍ਤੇ ਮਹਾਅਸ੍ਸਪੁਰੇ (ਮ. ਨਿ. ਅਟ੍ਠ. ੨.੪੧੫) ਵੁਤ੍ਤਸਦਿਸਮੇਵ. ਸਮਣਾਨਂ ਅਨੁਚ੍ਛਵਿਕਾਤਿ ਸਮਣਾਨਂ ਸਮਣਭਾਵਸ੍ਸ ਅਨੁਚ੍ਛਵਿਕਾ ਪਤਿਰੂਪਾ. ਸਮਣਾਨਂ ਅਨੁਲੋਮਪ੍ਪਟਿਪਦਾਤਿ ਸਮਣਾਨਂ ਸਾਮਞ੍ਞਸਙ੍ਖਾਤਸ੍ਸ ਅਰਿਯਮਗ੍ਗਸ੍ਸ ਅਨੁਕੂਲਪ੍ਪਟਿਪਦਾ.

੪੩੬. ਏਤੇ ਧਮ੍ਮਾਤਿ ਏਤੇ ਪਾਲ਼ਿਯਂ ਆਗਤਾ ਅਭਿਜ੍ਝਾਬ੍ਯਾਪਾਦਾਦਯੋ ਪਾਪਧਮ੍ਮਾ. ਉਪ੍ਪਜ੍ਜਮਾਨਾਤਿ ਉਪ੍ਪਜ੍ਜਮਾਨਾ ਏਵ, ਪਗੇਵ ਸਨ੍ਤਾਨੇ ਭਾਵਿਤਾ. ਮਲਿਨੇਤਿ ਮਲਵਨ੍ਤੇ ਕਿਲਿਟ੍ਠੇ. ਮਲਗ੍ਗਹਿਤੇਤਿ ਗਹਿਤਮਲੇ ਸਞ੍ਜਾਤਮਲੇ. ਸਮਣਮਲਾਤਿ ਸਮਣਾਨਂ ਸਮਣਭਾਵਸ੍ਸ ਮਲਾ. ਦੁਸ੍ਸਨ੍ਤੀਤਿ ਵਿਪਜ੍ਜਨ੍ਤਿ ਵਿਨਸ੍ਸਨ੍ਤਿ. ਸਮਣਦੋਸਾਤਿ ਸਮਣਾਨਂ ਸਮਣਭਾਵਦੂਸਨਾ. ਕਸਟੇਤਿ ਅਸਾਰੇ. ਨਿਰੋਜੇਤਿ ਨਿਤ੍ਤੇਜੇ. ਅਯਤੋ ਸੁਖਤੋ ਅਪੇਤਾਤਿ ਅਪਾਯਾ, ਨਿਰਯਾਦਯੋ, ਤਂ ਫਲਂ ਅਰਹਨ੍ਤਿ, ਤਂ ਪਯੋਜਨਂ ਵਾ ਏਤੇਸਨ੍ਤਿ ਆਪਾਯਿਕਾ. ਠਾਨਾਨਿ ਅਭਿਜ੍ਝਾਦਯੋ. ਤੇਨਾਹ ‘‘ਅਪਾਯੇ’’ਤਿਆਦਿ. ਕਾਰਣਭਾਵੇਨ ਦੁਗ੍ਗਤਿਪਰਿਯਾਪਨ੍ਨਾਯ ਵੇਦਨਾਯ ਹਿਤਾਨੀਤਿ ਦੁਗ੍ਗਤਿਵੇਦਨਿਯਾਨਿ. ਤੇਨ ਵੁਤ੍ਤਂ ‘‘ਦੁਗ੍ਗਤਿਯਂ ਵਿਪਾਕਵੇਦਨਾਯ ਪਚ੍ਚਯਾਨ’’ਨ੍ਤਿ. ਤਿਖਿਣਂ ਅਯਨ੍ਤਿ ਵੇਕਨ੍ਤਕਸਦਿਸਂ ਸਾਰਅਯਂ. ਅਯੇਨਾਤਿ ਅਯੋਘਂਸਕੇਨ. ਕੋਞ੍ਚਸਕੁਣਾਨਂ ਕਿਰ ਕੁਚ੍ਛਿਯਂ ਨਿਵੁਤ੍ਥਂ ਯਂ ਕਿਞ੍ਚਿ ਖਰਂ ਤਿਖਿਣਞ੍ਚ ਹੋਤਿ. ਤਥਾ ਹਿ ਤੇਸਂ ਵਚ੍ਚਂ ਅਟ੍ਠਿਮ੍ਪਿ ਪਾਸਾਣਮ੍ਪਿ ਵਿਲੀਯਾਪੇਤਿ. ਤੇਨ ਵੁਤ੍ਤਂ ‘‘ਕੋਞ੍ਚਸਕੁਣੇ ਖਾਦਾਪੇਨ੍ਤੀ’’ਤਿ. ਤਂ ਕਿਰ ਅਯਚੁਣ੍ਣਂ ਅਗ੍ਗਿਨਾਪਿ ਕਿਚ੍ਛੇਨ ਦਯ੍ਹਤਿ, ਭੇਸਜ੍ਜਬਲੇਨ ਪਨ ਸੁਖੇਨ ਦਯ੍ਹੇਯ੍ਯ. ਤੇਨ ਵੁਤ੍ਤਂ ‘‘ਸੁਸਿਕ੍ਖਿਤਾ ਚ ਨਂ ਅਯਕਾਰਾ ਬਹੁਹਤ੍ਥਕਮ੍ਮਮੂਲਂ ਲਭਿਤ੍ਵਾ ਕਰੋਨ੍ਤੀ’’ਤਿਆਦਿ. ਅਤਿਤਿਖਿਣਂ ਹੋਤਿ, ਅਞ੍ਞਤਰਂ ਅਯੋਬਨ੍ਧਨਂ ਫੇਗ੍ਗੁਦਣ੍ਡਂ ਵਿਯ ਸੁਖੇਨੇਵ ਛਿਨ੍ਦਨ੍ਤਿ. ਸਸਬਿਲ਼ਾਰਚਮ੍ਮੇਹਿ ਸਙ੍ਘਟਿਤਟ੍ਠੇਨ ਸਙ੍ਘਾਟੀਤਿ ਵੁਚ੍ਚਤਿ ਆਵੁਧਪਰਿਚ੍ਛਦੋਤਿ ਆਹ ‘‘ਸਙ੍ਘਾਟਿਯਾਤਿ ਕੋਸਿਯਾ’’ਤਿ. ਪਰਿਯੋਨਦ੍ਧਨ੍ਤਿ ਪਰਿਤੋ ਓਨਦ੍ਧਂ ਛਾਦਿਤਂ. ਸਮਨ੍ਤਤੋ ਵੇਠਿਤਨ੍ਤਿ ਸਬ੍ਬਸੋ ਪਿਹਿਤਂ.

੪੩੭. ਰਜੋਤਿ ਆਗਨ੍ਤੁਕਰਜੋ. ਜਲ੍ਲਨ੍ਤਿ ਸਰੀਰੇ ਉਟ੍ਠਾਨਕਲੋਣਾਦਿਮਲਂ. ਰਜੋਜਲ੍ਲਞ੍ਚ ਵਤਸਮਾਦਾਨਵਸੇਨ ਅਨਪਨੀਤਂ ਏਤਸ੍ਸ ਅਤ੍ਥੀਤਿ ਰਜੋਜਲ੍ਲਿਕੋ, ਤਸ੍ਸ. ਤੇਨਾਹ ‘‘ਰਜੋਜਲ੍ਲਧਾਰਿਨੋ’’ਤਿ. ਉਦਕਂ ਓਰੋਹਨ੍ਤਸ੍ਸਾਤਿਆਦੀਨਮਤ੍ਥੋ ਮਹਾਸੀਹਨਾਦਸੁਤ੍ਤਵਣ੍ਣਨਾਯਂ ਵੁਤ੍ਤੋਯੇਵ. ਸਬ੍ਬਮੇਤਨ੍ਤਿਆਦੀਸੁ ਸਬ੍ਬਸੋਪਿ ਵਤਸਮਾਦਾਨਵਸੇਨਾਤਿ ਅਧਿਪ੍ਪਾਯੋ. ਯਸ੍ਮਾ ਸਬ੍ਬਮੇਤਂ ਬਾਹਿਰਸਮਯਵਸੇਨੇਵ ਕਥਿਤਂ, ਤਸ੍ਮਾ ਸਙ੍ਘਾਟਿਕਸ੍ਸਾਤਿ ਪਿਲੋਤਿਕਖਣ੍ਡੇਹਿ ਸਙ੍ਘਟਿਤਤ੍ਤਾ ‘‘ਸਙ੍ਘਾਟੀ’’ਤਿ ਲਦ੍ਧਨਾਮਵਤ੍ਥਧਾਰਿਨੋਤਿ ਅਤ੍ਥੋ. ਤਥਾ ਹਿ ਪਾਲ਼ਿਯਂ ‘‘ਸਙ੍ਘਾਟਿਕਸ੍ਸ’’ਇਚ੍ਚੇਵ ਵੁਤ੍ਤਂ, ਨ ‘‘ਭਿਕ੍ਖੁਨੋ’’ਤਿ. ਤੇਨਾਹ ‘‘ਇਮਸ੍ਮਿਂ ਹੀ’’ਤਿਆਦਿ. ਕਸ੍ਮਾ ਪਨੇਤ੍ਥ ਭਗਵਤਾ ਸਙ੍ਘਾਟਿਕਤ੍ਤਾਦੀਨਿਯੇਵ ਵਤਸਮਾਦਾਨਾਨਿ ਪਟਿਕ੍ਖਿਤ੍ਤਾਨੀਤਿ? ਨਯਦਸ੍ਸਨਮੇਤਂ ਅਞ੍ਞੇਸਮ੍ਪਿ ਪਞ੍ਚਾਤਪਮੂਗਵਤਾਦੀਨਂ ਤਪ੍ਪਟਿਕ੍ਖੇਪੇਨੇਵ ਪਸਿਦ੍ਧਿਤੋ. ਅਪਰੇ ਪਨ ਭਣਨ੍ਤਿ – ‘‘ਨਾਹਂ, ਭਿਕ੍ਖਵੇ, ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ ਵਦਾਮੀ’’ਤਿ ਵੁਤ੍ਤੇ ਤਤ੍ਥ ਨਿਸਿਨ੍ਨੋ ਕੋਚਿ ਤਿਤ੍ਥਨ੍ਤਰਲਦ੍ਧਿਕੋ ਅਚੇਲਕਤ੍ਤਂ ਨੁ ਖੋ ਕਥਨ੍ਤਿ ਚਿਨ੍ਤੇਸਿ, ਅਪਰੇ ਰਜੋਜਲ੍ਲਕਤ੍ਤਂ ਨੁ ਖੋ ਕਥਨ੍ਤਿ, ਏਵਂ ਤਂ ਤਂ ਚਿਨ੍ਤੇਨ੍ਤਾਨਂ ਅਜ੍ਝਾਸਯਵਸੇਨ ਭਗਵਾ ਇਮਾਨੇਵ ਵਤਸਮਾਦਾਨਾਨਿ ਇਧ ਪਟਿਕ੍ਖਿਪੀਤਿ. ਸਙ੍ਘਾਟਿਕਨ੍ਤਿ ਨਿਵਾਸਨਪਾਰੁਪਨਵਸੇਨ ਸਙ੍ਘਾਟਿਵਨ੍ਤਂ. ਤੇਨਾਹ ‘‘ਸਙ੍ਘਾਟਿਕਂ ਵਤ੍ਥ’’ਨ੍ਤਿਆਦਿ. ਅਤ੍ਤਨੋ ਰੁਚਿਯਾ ਮਿਤ੍ਤਾਦਯੋ ਸਙ੍ਘਾਟਿਕਂ ਕਰੇਯ੍ਯੁਂ, ਪਚ੍ਛਾ ਵਿਞ੍ਞੁਤਂ ਪਤ੍ਤਕਾਲੇ ਸਙ੍ਘਾਟਿਕਤ੍ਤੇ ਸਮਾਦਪੇਯ੍ਯੁਂ.

੪੩੮. ਅਤ੍ਤਾਨਂ ਵਿਸੁਜ੍ਝਨ੍ਤਂ ਪਸ੍ਸਤਿ ਅਭਿਜ੍ਝਾਦੀਨਂ ਸਮੁਦਾਚਾਰਾਭਾਵਤੋ. ਮਗ੍ਗੇਨ ਅਸਮੁਚ੍ਛਿਨ੍ਨਤ੍ਤਾ ਵਿਸੁਦ੍ਧੋਤਿ ਪਨ ਨ ਵਤ੍ਤਬ੍ਬੋ. ਪਾਮੋਜ੍ਜਨ੍ਤਿ ਤਰੁਣਪੀਤਿਮਾਹ. ਤਸ੍ਸ ਹਿ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਕਿਲੇਸਾਨਂ ਵਿਕ੍ਖਮ੍ਭਿਤਤ੍ਤਾ ਚਿਤ੍ਤਸ੍ਸ ਵਿਸੁਦ੍ਧਤਂ ਪਸ੍ਸਨ੍ਤਸ੍ਸ ਪਾਮੋਜ੍ਜਂ ਜਾਯਤਿ, ਤਂ ਤੁਟ੍ਠਾਕਾਰਂ. ਤੇਨਾਹ ‘‘ਤੁਟ੍ਠਾਕਾਰੋ’’ਤਿ. ਪੀਤੀਤਿ ਪਸ੍ਸਦ੍ਧਿਆਵਹਾ ਬਲਵਪੀਤਿ. ਨਾਮਕਾਯੋ ਪਸ੍ਸਮ੍ਭਤੀਤਿ ਇਮਿਨਾ ਉਭਯਮ੍ਪਿ ਪਸ੍ਸਦ੍ਧਿਂ ਵਦਤਿ. ਵੇਦਿਯਤੀਤਿ ਅਨੁਭਵਤਿ ਵਿਨ੍ਦਤਿ. ਇਦਾਨਿ ਤੇਨ ਨੀਵਰਣੇਹਿ ਚਿਤ੍ਤਸ੍ਸ ਵਿਸੋਧਨਤ੍ਤਂ ਲਦ੍ਧਨ੍ਤਿ ਆਹ ‘‘ਅਪ੍ਪਨਾਪ੍ਪਤ੍ਤਂ ਵਿਯ ਹੋਤੀ’’ਤਿ. ਅਞ੍ਞਤ੍ਥ ਉਟ੍ਠਿਤਾ ਅਞ੍ਞਂ ਠਾਨਂ ਉਪਗਤਾਤਿ ਏਤ੍ਤਕੇਨ ਉਪਮਾਭਾਵੇਨ ਉਚ੍ਚਨੀਚਤਾਸਾਮਞ੍ਞੇਨ ਹੇਟ੍ਠਾ ਅਸਦ੍ਧਮ੍ਮਾਨਂ ਪਟਿਪਕ੍ਖਵਸੇਨ ਦੇਸਨਾਯ ਪਰਿਯੋਸਾਪਿਤਤ੍ਤਾ ਵੁਤ੍ਤਂ ‘‘ਯਥਾਨੁਸਨ੍ਧਿਨਾ’’ਤਿ. ਮਹਾਸੀਹਨਾਦਸੁਤ੍ਤੇ ਮਗ੍ਗੋ ਪੋਕ੍ਖਰਣਿਯਾ ਉਪਮਿਤੋ ‘‘ਸੇਯ੍ਯਥਾਪਿ, ਸਾਰਿਪੁਤ੍ਤ, ਪੋਕ੍ਖਰਣੀ’’ਤਿਆਦਿਂ (ਮ. ਨਿ. ੧.੧੫੪) ਆਰਭਿਤ੍ਵਾ ਉਪਮਾਸਂਸਨ੍ਦਨੇ ‘‘ਤਥਾਯਂ ਪੁਗ੍ਗਲੋ ਪਟਿਪਨ੍ਨੋ, ਤਥਾ ਚ ਇਰਿਯਤਿ, ਤਞ੍ਚ ਮਗ੍ਗਂ ਸਮਾਰੁਲ਼੍ਹੋ, ਯਥਾ ਆਸਵਾਨਂ ਖਯਾ’’ਤਿ (ਮ. ਨਿ. ੧.੧੫੪) ਵੁਤ੍ਤਤ੍ਤਾ. ਯਥਾ ਹਿ ਪੁਰਤ੍ਥਿਮਾਦਿਦਿਸਾਹਿ ਆਗਤਾ ਪੁਰਿਸਾ ਤਂ ਪੋਕ੍ਖਰਣਿਂ ਆਗਮ੍ਮ ਵਿਸੁਦ੍ਧਰੂਪਕਾਯਾ ਵਿਗਤਪਰਿਲ਼ਾਹਾ ਚ ਹੋਨ੍ਤਿ, ਏਵਂ ਖਤ੍ਤਿਯਾਦਿਕੁਲਤੋ ਆਗਤਾ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਸਾਸਨਂ ਆਗਮ੍ਮ ਵਿਸੁਦ੍ਧਨਾਮਕਾਯਾ ਵਿਗਤਕਿਲੇਸਪਰਿਲ਼ਾਹਾ ਚ ਹੋਨ੍ਤਿ. ਤਸ੍ਮਾ ਸਬ੍ਬਕਿਲੇਸਾਨਂ ਸਮਿਤਤ੍ਤਾ ਪਰਮਤ੍ਥਸਮਣੋ ਹੋਤੀਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਚੂਲ਼ਅਸ੍ਸਪੁਰਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਮਹਾਯਮਕਵਗ੍ਗਵਣ੍ਣਨਾ.