੭. ਚੂਲ਼ਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾ

੩੯੦. ਤਤ੍ਰਾਤਿ ਤਸ੍ਮਿਂ ਪੁਬ੍ਬਾਰਾਮਮਿਗਾਰਮਾਤੁਪਾਸਾਦਾਨਂ ਅਤ੍ਥਵਿਭਾਵਨੇ ਅਯਂ ਇਦਾਨਿ ਵੁਚ੍ਚਮਾਨਾ ਅਨੁਪੁਬ੍ਬੀ ਕਥਾ. ਮਣੀਨਨ੍ਤਿ ਏਤ੍ਥ ਪਦੁਮਰਾਗਮਣੀਨਂ ਅਧਿਪ੍ਪੇਤਤ੍ਤਾ ਆਹ ‘‘ਅਞ੍ਞੇਹਿ ਚਾ’’ਤਿ. ਤੇਨ ਇਨ੍ਦਨੀਲਾਦਿਮਣੀਨਂ ਸਙ੍ਗਹੋ ਦਟ੍ਠਬ੍ਬੋ. ਨੀਲਪੀਤਲੋਹਿਤੋਦਾਤਮਞ੍ਜਿਟ੍ਠਪਭਸ੍ਸਰਕਬਰਵਣ੍ਣਵਸੇਨ ਸਤ੍ਤਵਣ੍ਣੇਹਿ.

ਤਣ੍ਹਾ ਸਬ੍ਬਸੋ ਖੀਯਨ੍ਤਿ ਏਤ੍ਥਾਤਿ ਤਣ੍ਹਾਸਙ੍ਖਯੋ (ਅ. ਨਿ. ਟੀ. ੩.੭.੬੧), ਤਸ੍ਮਿਂ. ਤਣ੍ਹਾਸਙ੍ਖਯੇਤਿ ਚ ਵਿਸਯੇ ਇਦਂ ਭੁਮ੍ਮਨ੍ਤਿ ਆਹ ‘‘ਤਂ ਆਰਮ੍ਮਣਂ ਕਤ੍ਵਾ’’ਤਿ. ਵਿਮੁਤ੍ਤਚਿਤ੍ਤਤਾਯਾਤਿ ਸਬ੍ਬਸਂਕਿਲੇਸੇਹਿ ਵਿਮੁਤ੍ਤਚਿਤ੍ਤਤਾਯ. ਅਪਰਭਾਗਪਟਿਪਦਾ ਨਾਮ ਅਰਿਯਸਚ੍ਚਾਭਿਸਮਯੋ, ਸਾ ਸਾਸਨਚਾਰਿਗੋਚਰਾ ਪਚ੍ਚਤ੍ਤਂ ਵੇਦਿਤਬ੍ਬਤੋਤਿ ਆਹ ‘‘ਪੁਬ੍ਬਭਾਗਪ੍ਪਟਿਪਦਂ ਸਂਖਿਤ੍ਤੇਨ ਦੇਸੇਥਾਤਿ ਪੁਚ੍ਛਤੀ’’ਤਿ. ਅਕੁਪ੍ਪਧਮ੍ਮਤਾਯ ਖਯਵਯਸਙ੍ਖਾਤਂ ਅਨ੍ਤਂ ਅਤੀਤਾਤਿ ਅਚ੍ਚਨ੍ਤਾ, ਸੋ ਏਵ ਅਪਰਿਹਾਨਸਭਾਵਤ੍ਤਾ ਅਚ੍ਚਨ੍ਤਾ ਨਿਟ੍ਠਾ ਏਤਸ੍ਸਾਤਿ ਅਚ੍ਚਨ੍ਤਨਿਟ੍ਠੋ. ਤੇਨਾਹ ‘‘ਏਕਨ੍ਤਨਿਟ੍ਠੋ ਸਤਤਨਿਟ੍ਠੋਤਿ ਅਤ੍ਥੋ’’ਤਿ. ਨ ਹਿ ਪਟਿਵਿਦ੍ਧਸ੍ਸ ਲੋਕੁਤ੍ਤਰਧਮ੍ਮਸ੍ਸ ਦਸ੍ਸਨਂ ਕੁਪ੍ਪਨਂ ਨਾਮ ਅਤ੍ਥਿ. ਅਚ੍ਚਨ੍ਤਮੇਵ ਚਤੂਹਿ ਯੋਗੇਹਿ ਖੇਮੋ ਏਤਸ੍ਸ ਅਤ੍ਥੀਤਿ ਅਚ੍ਚਨ੍ਤਯੋਗਕ੍ਖੇਮੀ. ਮਗ੍ਗਬ੍ਰਹ੍ਮਚਰਿਯਸ੍ਸ ਵੁਸਿਤਤ੍ਤਾ, ਤਸ੍ਸ ਚ ਅਪਰਿਹਾਨਸਭਾਵਤ੍ਤਾ ਅਚ੍ਚਨ੍ਤਂ ਬ੍ਰਹ੍ਮਚਾਰੀਤਿ ਅਚ੍ਚਨ੍ਤਬ੍ਰਹ੍ਮਚਾਰੀ. ਤੇਨਾਹ ‘‘ਨਿਚ੍ਚਬ੍ਰਹ੍ਮਚਾਰੀਤਿ ਅਤ੍ਥੋ’’ਤਿ. ਪਰਿਯੋਸਾਨਨ੍ਤਿ ਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਂ.

ਵੇਗਾਯਤੀਤਿ ਤੁਰਿਤਾਯਤਿ. ਸਲ੍ਲਕ੍ਖੇਸੀਤਿ ਚਿਨ੍ਤੇਸਿ, ਅਤ੍ਤਨਾ ਯਥਾ ਸੁਤਾਯ ਸਤ੍ਥੁ ਦੇਸਨਾਯ ਅਨੁਸ੍ਸਰਣਵਸੇਨ ਉਪਧਾਰੇਸਿ. ਅਨੁਗ੍ਗਣ੍ਹਿਤ੍ਵਾਵਾਤਿ ਅਤ੍ਥਵਿਨਿਚ੍ਛਯਵਸੇਨ ਅਨੁਗ੍ਗਹੇਤ੍ਵਾ ਏਵ. ਛਸੁ ਦ੍ਵਾਰੇਸੁ ਨਿਯੁਤ੍ਤਾਤਿ ਛਦ੍ਵਾਰਿਕਾ, ਤੇਹਿ.

ਪਞ੍ਚਕ੍ਖਨ੍ਧਾਤਿ ਪਞ੍ਚੁਪਾਦਾਨਕ੍ਖਨ੍ਧਾ. ਸਕ੍ਕਾਯਸਬ੍ਬਞ੍ਹਿ ਸਨ੍ਧਾਯ ਇਧ ‘‘ਸਬ੍ਬੇ ਧਮ੍ਮਾ’’ਤਿ ਵੁਤ੍ਤਂ ਵਿਪਸ੍ਸਨਾਵਿਸਯਸ੍ਸ ਅਧਿਪ੍ਪੇਤਤ੍ਤਾ, ਤਸ੍ਮਾ ਆਯਤਨਧਾਤੁਯੋਪਿ ਤਗ੍ਗਤਿਕਾ ਏਵ ਦਟ੍ਠਬ੍ਬਾ. ਤੇਨਾਹ ਭਗਵਾ ‘‘ਨਾਲਂ ਅਭਿਨਿਵੇਸਾਯਾ’’ਤਿ. ਨ ਯੁਤ੍ਤਾ ਅਭਿਨਿਵੇਸਾਯ ‘‘ਏਤਂ ਮਮ, ਏਸੋ ਮੇ ਅਤ੍ਤਾ’’ਤਿ ਅਜ੍ਝੋਸਾਨਾਯ. ‘‘ਅਲਮੇਵ ਨਿਬ੍ਬਿਨ੍ਦਿਤੁਂ ਅਲਂ ਵਿਰਜ੍ਜਿਤੁ’’ਨ੍ਤਿਆਦੀਸੁ (ਦੀ. ਨਿ. ੨.੨੭੨; ਸਂ. ਨਿ. ੨.੧੨੪-੧੨੫, ੧੨੮, ੧੩੪, ੧੪੩) ਵਿਯ ਅਲਂ-ਸਦ੍ਦੋ ਯੁਤ੍ਤਤ੍ਥੋਪਿ ਹੋਤੀਤਿ ਆਹ ‘‘ਨ ਯੁਤ੍ਤਾ’’ਤਿ. ਸਮ੍ਪਜ੍ਜਨ੍ਤੀਤਿ ਭਵਨ੍ਤਿ. ਯਦਿਪਿ ‘‘ਤਤਿਯਾ, ਚਤੁਤ੍ਥੀ’’ਤਿ ਇਦਂ ਵਿਸੁਦ੍ਧਿਦ੍ਵਯਂ ਅਭਿਞ੍ਞਾਪਞ੍ਞਾ, ਤਸ੍ਸਾ ਪਨ ਸਪ੍ਪਚ੍ਚਯਨਾਮਰੂਪਦਸ੍ਸਨਭਾਵਤੋ, ਸਤਿ ਚ ਪਚ੍ਚਯਪਰਿਗ੍ਗਹੇ ਸਪ੍ਪਚ੍ਚਯਤ੍ਤਾ (ਨਾਮਰੂਪਸ੍ਸ ਅਨਿਚ੍ਚਤਾ, ਅਨਿਚ੍ਚਂ ਦੁਕ੍ਖਂ, ਦੁਕ੍ਖਞ੍ਚ ਅਨਤ੍ਤਾਤਿ ਅਤ੍ਥਤੋ) ਲਕ੍ਖਣਤ੍ਤਯਂ ਸੁਪਾਕਟਮੇਵ ਹੋਤੀਤਿ ਆਹ ‘‘ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਞਾਤਪਰਿਞ੍ਞਾਯ ਅਭਿਜਾਨਾਤੀ’’ਤਿ. ਤਥੇਵ ਤੀਰਣਪਰਿਞ੍ਞਾਯਾਤਿ ਇਮਿਨਾ ਅਨਿਚ੍ਚਾਦਿਭਾਵੇਨ ਨਾਲਂ ਅਭਿਨਿਵੇਸਾਯਾਤਿ ਨਾਮਰੂਪਸ੍ਸ ਉਪਸਂਹਰਤਿ, ਨ ਅਭਿਞ੍ਞਾਪਞ੍ਞਾਨਂ ਸਮ੍ਭਾਰਧਮ੍ਮਾਨਂ. ਪੁਰਿਮਾਯ ਹਿ ਅਤ੍ਥਤੋ ਆਪਨ੍ਨਲਕ੍ਖਣਤ੍ਤਯਂ ਗਣ੍ਹਾਤਿ ਸਲਕ੍ਖਣਸਲ੍ਲਕ੍ਖਣਪਰਤ੍ਤਾ ਤਸ੍ਸਾ, ਦੁਤਿਯਾਯ ਸਰੂਪਤੋ ਤਸ੍ਸਾ ਲਕ੍ਖਣਤ੍ਤਯਾਰੋਪਨਵਸੇਨ ਸਮ੍ਮਸਨਭਾਵਤੋ. ਏਕਚਿਤ੍ਤਕ੍ਖਣਿਕਤਾਯ ਅਭਿਨਿਪਾਤਮਤ੍ਤਤਾਯ ਚ ਅਪ੍ਪਮਤ੍ਤਕਮ੍ਪਿ. ਰੂਪਪਰਿਗ੍ਗਹਸ੍ਸ ਓਲ਼ਾਰਿਕਭਾਵਤੋ ਅਰੂਪਪਰਿਗ੍ਗਹਂ ਦਸ੍ਸੇਤਿ. ਦਸ੍ਸੇਨ੍ਤੋ ਚ ਵੇਦਨਾਯ ਆਸਨ੍ਨਭਾਵਤੋ, ਵਿਸੇਸਤੋ ਸੁਖਸਾਰਾਗਿਤਾਯ, ਭਵਸ੍ਸਾਦਗਧਿਤਮਾਨਸਤਾਯ ਚ ਸਕ੍ਕਸ੍ਸ ਵੇਦਨਾਵਸੇਨ ਨਿਬ੍ਬਤ੍ਤੇਤ੍ਵਾ ਦਸ੍ਸੇਤਿ.

ਉਪ੍ਪਾਦਵਯਟ੍ਠੇਨਾਤਿ ਉਦਯਬ੍ਬਯਸਭਾਵੇਨ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨੇਨ. ਅਨਿਚ੍ਚਾਤਿ ਅਦ੍ਧੁ ਵਾ. ਅਨਿਚ੍ਚਲਕ੍ਖਣਂ ਅਨਿਚ੍ਚਤਾ ਉਦਯਵਯਤਾ. ਤਸ੍ਮਾਤਿ ਯਸ੍ਮਾ ਪਞ੍ਚਨ੍ਨਂ ਖਨ੍ਧਾਨਂ ਖਯਤੋ ਵਯਤੋ ਦਸ੍ਸਨਞਾਣਂ ਅਨਿਚ੍ਚਾਨੁਪਸ੍ਸਨਾ, ਤਂਸਮਙ੍ਗੀ ਚ ਪੁਗ੍ਗਲੋ ਅਨਿਚ੍ਚਾਨੁਪਸ੍ਸੀ, ਤਸ੍ਮਾ. ਖਯਵਿਰਾਗੋਤਿ ਖਯਸਙ੍ਖਾਤੋ ਵਿਰਾਗੋ ਸਙ੍ਖਾਰਾਨਂ ਪਲੁਜ੍ਜਨਾ. ਯਂ ਆਗਮ੍ਮ ਸਬ੍ਬਸੋ ਸਙ੍ਖਾਰੇਹਿ ਵਿਰਜ੍ਜਨਾ ਹੋਤਿ, ਤਂ ਨਿਬ੍ਬਾਨਂ ਅਚ੍ਚਨ੍ਤਵਿਰਾਗੋ. ਨਿਰੋਧਾਨੁਪਸ੍ਸਿਮ੍ਹਿਪੀਤਿ ਨਿਰੋਧਾਨੁਪਸ੍ਸਿਪਦੇਪਿ. ‘‘ਏਸੇਵ ਨਯੋ’’ਤਿ ਅਭਿਦਿਸਿਤ੍ਵਾ ਤਂ ਏਕਦੇਸੇਨ ਵਿਵਰਨ੍ਤੋ ‘‘ਨਿਰੋਧੋਪਿ ਹਿ…ਪੇ… ਦੁਵਿਧੋਯੇਵਾ’’ਤਿ ਆਹ. ਸਬ੍ਬਾਸਵਸਂਵਰੇ ਵੁਤ੍ਤਵੋਸ੍ਸਗ੍ਗੋਵ ਇਧ ‘‘ਪਟਿਨਿਸ੍ਸਗ੍ਗੋ’’ਤਿ ਵੁਤ੍ਤੋਤਿ ਦਸ੍ਸੇਨ੍ਤੋ ‘‘ਪਟਿਨਿਸ੍ਸਗ੍ਗੋ ਵੁਚ੍ਚਤਿ ਵੋਸ੍ਸਗ੍ਗੋ’’ਤਿਆਦਿਮਾਹ. ਪਰਿਚ੍ਚਾਗਵੋਸ੍ਸਗ੍ਗੋ ਵਿਪਸ੍ਸਨਾ. ਪਕ੍ਖਨ੍ਦਨਵਸੇਨ ਅਪ੍ਪਨਤੋ ਪਕ੍ਖਨ੍ਦਨਵੋਸ੍ਸਗ੍ਗੋ ਮਗ੍ਗੋ ਅਞ੍ਞਸ੍ਸ ਤਦਭਾਵਤੋ. ਸੋਤਿ ਮਗ੍ਗੋ. ਆਰਮ੍ਮਣਤੋਤਿ ਕਿਚ੍ਚਸਾਧਨਵਸੇਨ ਆਰਮ੍ਮਣਕਰਣਤੋ. ਏਵਞ੍ਹਿ ਮਗ੍ਗਤੋ ਅਞ੍ਞੇਸਂ ਨਿਬ੍ਬਾਨਾਰਮ੍ਮਣਾਨਂ ਪਕ੍ਖਨ੍ਦਨਵੋਸ੍ਸਗ੍ਗਾਭਾਵੋ ਸਿਦ੍ਧੋ ਹੋਤਿ. ਪਰਿਚ੍ਚਜਨੇਨ ਪਕ੍ਖਨ੍ਦਨੇਨ ਚਾਤਿ ਦ੍ਵੀਹਿਪਿ ਵਾ ਕਾਰਣੇਹਿ. ਸਬ੍ਬੇਸਂ ਖਨ੍ਧਾਨਂ ਵੋਸ੍ਸਜ੍ਜਨਂ ਤਪ੍ਪਟਿਬਦ੍ਧਸਂਕਿਲੇਸਪ੍ਪਹਾਨੇਨ ਦਟ੍ਠਬ੍ਬਂ. ਚਿਤ੍ਤਂ ਪਕ੍ਖਨ੍ਦਤੀਤਿ ਮਗ੍ਗਸਮ੍ਪਯੁਤ੍ਤਂ ਚਿਤ੍ਤਂ ਸਨ੍ਧਾਯਾਹ. ਉਭਯਮ੍ਪੇਤਂ ਵੋਸ੍ਸਜ੍ਜਨਂ. ਤਦੁਭਯਸਮਙ੍ਗੀਤਿ ਵਿਪਸ੍ਸਨਾਸਮਙ੍ਗੀ ਮਗ੍ਗਸਮਙ੍ਗੀ ਚ. ‘‘ਅਨਿਚ੍ਚਾਨੁਪਸ੍ਸਨਾਯ ਨਿਚ੍ਚਸਞ੍ਞਂ ਪਜਹਤੀ’’ਤਿਆਦਿਵਚਨਤੋ (ਪਟਿ. ਮ. ੧.੫੨) ਯਥਾ ਵਿਪਸ੍ਸਨਾਯ ਕਿਲੇਸਾਨਂ ਪਰਿਚ੍ਚਾਗਪਟਿਨਿਸ੍ਸਗ੍ਗੋ ਲਬ੍ਭਤਿ, ਏਵਂ ਆਯਤਿਂ ਤੇਹਿ ਕਿਲੇਸੇਹਿ ਉਪ੍ਪਾਦੇਤਬ੍ਬਖਨ੍ਧਾਨਮ੍ਪਿ ਪਰਿਚ੍ਚਾਗਪਟਿਨਿਸ੍ਸਗ੍ਗੋ ਵਤ੍ਤਬ੍ਬੋ, ਪਕ੍ਖਨ੍ਦਨਪਟਿਨਿਸ੍ਸਗ੍ਗੋ ਪਨ ਮਗ੍ਗੇ ਲਬ੍ਭਮਾਨਾਯ ਏਕਨ੍ਤਕਾਰਣਭੂਤਾਯ ਵੁਟ੍ਠਾਨਗਾਮਿਨਿਵਿਪਸ੍ਸਨਾਯ ਵਸੇਨ ਵੇਦਿਤਬ੍ਬੋ, ਮਗ੍ਗੇ ਪਨ ਤਦੁਭਯਮ੍ਪਿ ਞਾਯਾਗਤਮੇਵ ਨਿਪ੍ਪਰਿਯਾਯਤੋਵ ਲਬ੍ਭਮਾਨਤ੍ਤਾ. ਤੇਨਾਹ ‘‘ਤਦੁਭਯਸਮਙ੍ਗੀ ਪੁਗ੍ਗਲੋ’’ਤਿਆਦਿ.

ਪੁਚ੍ਛਨ੍ਤਸ੍ਸ ਅਜ੍ਝਾਸਯਵਸੇਨ ‘‘ਨ ਕਿਞ੍ਚਿ ਲੋਕੇ ਉਪਾਦਿਯਤੀ’’ਤਿ ਏਤ੍ਥ ਕਾਮੁਪਾਦਾਨਵਸੇਨ ਉਪਾਦਿਯਨਂ ਪਟਿਕ੍ਖਿਪੀਯਤੀਤਿ ਆਹ ‘‘ਤਣ੍ਹਾਵਸੇਨ ਨ ਉਪਾਦਿਯਤੀ’’ਤਿ. ਤਣ੍ਹਾਵਸੇਨ ਵਾ ਅਸਤਿ ਉਪਾਦਿਯਨੇ ਦਿਟ੍ਠਿਵਸੇਨ ਉਪਾਦਿਯਨਂ ਅਨਵਕਾਸਮੇਵਾਤਿ ‘‘ਤਣ੍ਹਾਵਸੇਨ’’ਇਚ੍ਚੇਵ ਵੁਤ੍ਤਂ. ਨ ਪਰਾਮਸਤੀਤਿ ਨਾਦਿਯਤਿ, ਦਿਟ੍ਠਿਪਰਾਮਾਸਵਸੇਨ ਵਾ ‘‘ਨਿਚ੍ਚ’’ਨ੍ਤਿਆਦਿਨਾ ਨ ਪਰਾਮਸਤਿ. ਸਂਖਿਤ੍ਤੇਨੇਵ ਖਿਪ੍ਪਂ ਕਥੇਸੀਤਿ ਤਸ੍ਸ ਅਜ੍ਝਾਸਯਵਸੇਨ ਪਪਞ੍ਚਂ ਅਕਤ੍ਵਾ ਕਥੇਸਿ.

੩੯੧. ਅਭਿਸਮਾਗਨ੍ਤ੍ਵਾਤਿ ਅਭਿਮੁਖਞਾਣੇਨ ਞੇਯ੍ਯਂ ਸਮਾਗਨ੍ਤ੍ਵਾ ਯਾਥਾਵਤੋ ਵਿਦਿਤ੍ਵਾ. ਤੇਨਾਹ ‘‘ਜਾਨਿਤ੍ਵਾ’’ਤਿ. ਯਥਾਪਰਿਸਵਿਞ੍ਞਾਪਕਤ੍ਤਾਤਿ ਯਥਾਪਰਿਸਂ ਧਮ੍ਮਸਮ੍ਪਟਿਗ੍ਗਾਹਿਕਾਯ ਮਹਤਿਯਾ, ਅਪ੍ਪਕਾਯ ਵਾ ਪਰਿਸਾਯ ਅਨੁਰੂਪਮੇਵ ਵਿਞ੍ਞਾਪਨਤੋ. ਪਰਿਯਨ੍ਤਂ ਨ ਨਿਚ੍ਛਰਤੀਤਿ ਨ ਪਵਤ੍ਤਤਿ. ਮਾ ਨਿਰਤ੍ਥਕਾ ਅਗਮਾਸੀਤਿ ਇਦਂ ਧਮ੍ਮਤਾਵਸੇਨ ਵੁਤ੍ਤਂ, ਨ ਸਤ੍ਥੁ ਅਜ੍ਝਾਸਯਵਸੇਨ. ਏਕਞ੍ਹੇਤਂ ਸਤ੍ਥੁ ਵਚੀਘੋਸਸ੍ਸ ਅਟ੍ਠਸੁ ਅਙ੍ਗੇਸੁ, ਯਦਿਦਂ ਪਰਿਸਪਰਿਯਨ੍ਤਤਾ. ਛਿਦ੍ਦਵਿਵਰੋਕਾਸੋਤਿ ਛਿਦ੍ਦਭੂਤੋ, ਵਿਵਰਭੂਤੋ ਵਾ ਓਕਾਸੋਪਿ ਨਤ੍ਥਿ, ਭਗਵਤੋ ਸਦ੍ਦਾਸਵਨਕਾਰਣਂ ਵੁਤ੍ਤਮੇਵ. ਤਸ੍ਮਾਤਿ ਯਥਾਵੁਤ੍ਤਕਾਰਣਤੋ.

ਪਞ੍ਚ ਅਙ੍ਗਾਨਿ ਏਤਸ੍ਸਾਤਿ ਪਞ੍ਚਙ੍ਗਂ, ਪਞ੍ਚਙ੍ਗਂ ਏਵ ਪਞ੍ਚਙ੍ਗਿਕਂ. ਮਹਤੀਆਦਿ ਵੀਣਾਵਿਸੇਸੋਪਿ ਆਤਤਮੇਵਾਤਿ ‘‘ਚਮ੍ਮਪਰਿਯੋਨਦ੍ਧੇਸੂ’’ਤਿ ਵਿਸੇਸਿਤਂ. ਏਕਤਲਂ ਕੁਮ੍ਭਥੂਣਦਦ੍ਦਰਾਦਿ. ਚਮ੍ਮਪਰਿਯੋਨਦ੍ਧਂ ਹੁਤ੍ਵਾ ਤਨ੍ਤਿਬਦ੍ਧਂ ਆਤਤਵਿਤਤਂ. ਤੇਨਾਹ ‘‘ਤਨ੍ਤਿਬਦ੍ਧਪਣਵਾਦੀ’’ਤਿ. ਗੋਮੁਖੀਆਦੀਨਮ੍ਪਿ ਏਤ੍ਥੇਵ ਸਙ੍ਗਹੋ ਦਟ੍ਠਬ੍ਬੋ. ਵਂਸਾਦੀਤਿ ਆਦਿ-ਸਦ੍ਦੇਨ ਸਙ੍ਖਸਿਙ੍ਗਾਦੀਨਂ ਸਙ੍ਗਹੋ. ਸਮ੍ਮਾਦੀਤਿ ਸਮ੍ਮਤਾਲ਼ਕਂਸਤਾਲ਼ਸਿਲਾਸਲਾਕਤਾਲ਼ਾਦਿ. ਤਤ੍ਥ ਸਮ੍ਮਤਾਲ਼ਂ ਨਾਮ ਦਣ੍ਡਮਯਤਾਲ਼ਂ. ਕਂਸਤਾਲ਼ਂ ਲੋਹਮਯਂ. ਸਿਲਾਯ ਅਯੋਪਤ੍ਤੇਨ ਚ ਵਾਦਨਤਾਲ਼ਂ ਸਿਲਾਸਲਾਕਤਾਲ਼ਂ. ਸਮਪ੍ਪਿਤੋਤਿ ਸਮ੍ਮਾ ਅਪ੍ਪਿਤੋ ਉਪੇਤੋ. ਤੇਨਾਹ ‘‘ਉਪਗਤੋ’’ਤਿ. ਉਪਟ੍ਠਾਨਵਸੇਨ ਪਞ੍ਚਹਿ ਤੂਰਿਯਸਤੇਹਿ ਉਪੇਤੋ. ਏਵਂਭੂਤੋ ਚ ਯਸ੍ਮਾ ਤੇਹਿ ਉਪਟ੍ਠਿਤੋ ਸਮਨ੍ਨਾਗਤੋ ਨਾਮ ਹੋਤਿ, ਤਸ੍ਮਾ ਵੁਤ੍ਤਂ ‘‘ਸਮਙ੍ਗੀਭੂਤੋਤਿ ਤਸ੍ਸੇਵ ਵੇਵਚਨ’’ਨ੍ਤਿ. ਪਰਿਚਾਰੇਤੀਤਿ ਪਰਿਤੋ ਚਾਰੇਤਿ. ਕਾਨਿ ਪਨ ਚਾਰੇਤਿ, ਕਥਂ ਵਾ ਚਾਰੇਤੀਤਿ ਆਹ ‘‘ਸਮ੍ਪਤ੍ਤਿਂ…ਪੇ… ਚਾਰੇਤੀ’’ਤਿ. ਤਤ੍ਥ ਤਤੋ ਤਤੋਤਿ ਤਸ੍ਮਿਂ ਤਸ੍ਮਿਂ ਵਾਦਿਤੇ ਤਤ੍ਥ ਤਤ੍ਥ ਚ ਵਾਦਕਜਨੇ. ਅਪਨੇਤ੍ਵਾਤਿ ਵਾਦਕਜਨੇ ਨਿਸੇਧੇਤ੍ਵਾ. ਤੇਨਾਹ ‘‘ਨਿਸ੍ਸਦ੍ਦਾਨਿ ਕਾਰਾਪੇਤ੍ਵਾ’’ਤਿ. ਦੇਵਚਾਰਿਕਂ ਗਚ੍ਛਤਿਯੇਵ ਦੇਵਤਾਨਂ ਮਨੁਸ੍ਸਾਨਞ੍ਚ ਅਨੁਕਮ੍ਪਾਯ. ਸ੍ਵਾਯਮਤ੍ਥੋ ਵਿਮਾਨਵਤ੍ਥੂਹਿ (ਵਿ. ਵ. ੧) ਦੀਪੇਤਬ੍ਬੋ.

੩੯੨. ਅਪ੍ਪੇਵ ਸਕੇਨ ਕਰਣੀਯੇਨਾਤਿ ਮਾਰਿਸ, ਮੋਗ੍ਗਲ੍ਲਾਨ, ਮਯਂ ਸਕੇਨ ਕਰਣੀਯੇਨ ਅਪ੍ਪੇਵ ਬਹੁਕਿਚ੍ਚਾਪਿ ਨ ਹੋਮ. ਅਪਿਚ ਦੇਵਾਨਂਯੇਵਾਤਿ ਅਪਿਚ ਖੋ ਪਨ ਦੇਵਾਨਂਯੇਵ ਤਾਵਤਿਂਸਾਨਂ ਕਰਣੀਯੇਨ ਵਿਸੇਸਤੋ ਬਹੁਕਿਚ੍ਚਾਤਿ ਅਤ੍ਥਯੋਜਨਾ. ਭੁਮ੍ਮਟ੍ਠਕਦੇਵਤਾਨਮ੍ਪਿ ਕੇਚਿ ਅਟ੍ਟਾ ਸਕ੍ਕੇਨ ਵਿਨਿਚ੍ਛਿਤਬ੍ਬਾ ਹੋਨ੍ਤੀਤਿ ਆਹ ‘‘ਪਥਵਿਤੋ ਪਟ੍ਠਾਯਾ’’ਤਿ. ਨਿਯਮੇਨ੍ਤੋਤਿ ਅਵਧਾਰੇਨ੍ਤੋ. ਤਂ ਪਨ ਕਰਣੀਯਂ ਸਰੂਪਤੋ ਦਸ੍ਸੇਤੁਂ ‘‘ਦੇਵਾਨਂ ਹੀ’’ਤਿਆਦਿ ਵੁਤ੍ਤਂ. ਤਾਸਨ੍ਤਿ ਦੇਵਧੀਤੁਦੇਵਪੁਤ੍ਤਪਾਦਪਰਿਚਾਰਿਕਾਨਂ. ਮਣ੍ਡਨਪਸਾਧਨਕਾਰਿਕਾਤਿ ਮਣ੍ਡਨਪਸਾਧਨਸਂਵਿਧਾਯਿਕਾ. ਅਟ੍ਟਕਰਣਂ ਨਤ੍ਥਿ ਸਂਸਯਸ੍ਸੇਵ ਅਭਾਵਤੋ.

ਯਨ੍ਤਿ ਸਵਨੁਗ੍ਗਹਣਾਦਿਵਸੇਨ ਸੁਪਰਿਚਿਤਮ੍ਪਿ ਯਂ ਅਤ੍ਥਜਾਤਂ. ਨ ਦਿਸ੍ਸਤਿ, ਪਞ੍ਞਾਚਕ੍ਖੁਨੋ ਸਬ੍ਬਸੋ ਨ ਪਟਿਭਾਤੀਤਿ ਅਤ੍ਥੋ. ਕੇਚੀਤਿ ਸਾਰਸਮਾਸਾਚਰਿਯਾ. ਸੋਮਨਸ੍ਸਸਂਵੇਗਨ੍ਤਿ ਸੋਮਨਸ੍ਸਸਮੁਟ੍ਠਾਨਂ ਸਂਵੇਗਂ, ਨ ਚਿਤ੍ਤਸਨ੍ਤਾਸਂ.

ਸਮੁਪਬ੍ਯੂਲ਼੍ਹੋਤਿ ਯੁਜ੍ਝਨਵਸੇਨ ਸਹਪਤਿਤੋ ਸਮੋਗਾਲ਼੍ਹੋ. ਏਵਂਭੂਤੋ ਚ ਯਸ੍ਮਾ ਸਮੂਹਵਸੇਨ ਸਮ੍ਪਿਣ੍ਡਿਤੋ ਹੋਤਿ, ਤਸ੍ਮਾ ਵੁਤ੍ਤਂ ‘‘ਸਨ੍ਨਿਪਤਿਤੋ ਰਾਸਿਭੂਤੋ’’ਤਿ. ਅਨਨ੍ਤਰੇ ਅਤ੍ਤਭਾਵੇਤਿ ਇਦਂ ਦੁਤਿਯਂ ਸਕ੍ਕਤ੍ਤਭਾਵਂ ਤਤੋ ਅਨਨ੍ਤਰਾਤੀਤੇਨ ਸਕ੍ਕਤ੍ਤਭਾਵੇਨ ਸਕ੍ਕਤ੍ਤਭਾਵਸਾਮਞ੍ਞਤੋ ਏਕਮਿਵ ਕਤ੍ਵਾ ਗਹਣਵਸੇਨ ਵੁਤ੍ਤਂ, ਅਞ੍ਞਥਾ ‘‘ਤਤਿਯੇ ਅਤ੍ਤਭਾਵੇ’’ਤਿ ਵਤ੍ਤਬ੍ਬਂ ਸਿਯਾ. ਮਘਤ੍ਤਭਾਵੋ ਹਿ ਇਤੋ ਤਤਿਯੋਤਿ. ਅਥ ਵਾ ਯਸ੍ਮਿਂ ਅਤ੍ਤਭਾਵੇ ਸੋ ਦੇਵਾਸੁਰਸਙ੍ਗਾਮੋ ਅਹੋਸਿ, ਤਸ੍ਸ ਅਨਨ੍ਤਰਤ੍ਤਾ ਮਘਤ੍ਤਭਾਵਸ੍ਸ ਵੁਤ੍ਤਂ ‘‘ਅਨਨ੍ਤਰੇ ਅਤ੍ਤਭਾਵੇ’’ਤਿ. ਸਤ੍ਤਾਨਂ ਹਿਤੇਸਿਤਾਯ ਮਾਤਾਪਿਤੁਉਪਟ੍ਠਾਨਾਦਿਨਾ ਚਰਿਯਾਹਿ ਬੋਧਿਸਤ੍ਤਚਰਿਯਾ ਵਿਯਸ੍ਸ ਚਰਿਯਾ ਅਹੋਸਿ. ਸਤ੍ਤ ਵਤਪਦਾਨੀਤਿ ਸਤ੍ਤ ਵਤਕੋਟ੍ਠਾਸੇ.

ਮਹਾਪਾਨਨ੍ਤਿ ਮਹਨ੍ਤਂ ਸੁਰਾਪਾਨਂ. ਗਣ੍ਡਪਾਨਨ੍ਤਿ ਗਣ੍ਡਸੁਰਾਪਾਨਂ, ਅਧਿਮਤ੍ਤਪਾਨਨ੍ਤਿ ਅਤ੍ਥੋ. ਪਰਿਹਰਮਾਨਾਤਿ ਪਰਿਵਾਰੇਨ੍ਤਾ. ਵੇਦਿਕਾਪਾਦਾਤਿ ਸਿਨੇਰੁਸ੍ਸ ਪਰਿਯਨ੍ਤੇ ਵੇਦਿਕਾਪਰਿਕ੍ਖੇਪਾ. ਪਞ੍ਚਸੁ ਠਾਨੇਸੂਤਿ ਪਞ੍ਚਸੁ ਪਰਿਭਣ੍ਡਟ੍ਠਾਨੇਸੁ ਨਾਗਸੇਨਾਦੀਹਿ ਆਰਕ੍ਖਂ ਠਪੇਸਿ.

੩੯੩. ਰਾਮਣੇਯ੍ਯਕਨ੍ਤਿ ਰਮਣੀਯਭਾਵਂ. ਮਸਾਰਗਲ੍ਲਤ੍ਥਮ੍ਭੇਤਿ ਕਬਰਮਣਿਮਯੇ ਥਮ੍ਭੇ. ਸੁਵਣ੍ਣਾਦਿਮਯੇ ਘਟਕੇਤਿ ‘‘ਰਜਤਤ੍ਥਮ੍ਭੇਸੁ ਸੁਵਣ੍ਣਮਯੇ, ਸੁਵਣ੍ਣਤ੍ਥਮ੍ਭੇਸੁ ਰਜਤਮਯੇ’’ਤਿਆਦਿਨਾ ਸੁਵਣ੍ਣਾਦਿਮਯੇ ਘਟਕੇ ਵਾਲ਼ਰੂਪਕਾਨਿ ਚ. ਪਬਾਲ਼੍ਹਂ ਮਤ੍ਤੋਤਿ ਪਮਤ੍ਤੋ. ਤੇਨਾਹ ‘‘ਅਤਿਵਿਯ ਮਤ੍ਤੋ’’ਤਿ. ਨਾਟਕਪਰਿਵਾਰੇਨਾਤਿ ਅਚ੍ਛਰਾਪਰਿਵਾਰੇਨ.

ਅਚ੍ਛਰਿਯਬ੍ਭੁਤਨ੍ਤਿ ਪਦਦ੍ਵਯੇਨਪਿ ਵਿਮ੍ਹਯਨਾਕਾਰੋਵ ਵੁਤ੍ਤੋ, ਤਸ੍ਮਾ ਸਞ੍ਜਾਤਂ ਅਚ੍ਛਰਿਯਬ੍ਭੁਤਂ ਵਿਮ੍ਹਯਨਾਕਾਰੋ ਏਤੇਸਨ੍ਤਿ ਸਞ੍ਜਾਤਅਚ੍ਛਰਿਯਅਬ੍ਭੁਤਾ, ਤਥਾ ਪਵਤ੍ਤਚਿਤ੍ਤੁਪ੍ਪਾਦਾ. ਅਚ੍ਛਰਿਯਬ੍ਭੁਤਹੇਤੁਕਾ ਸਞ੍ਜਾਤਾ ਤੁਟ੍ਠਿ ਏਤੇਸਨ੍ਤਿ ਸਞ੍ਜਾਤਤੁਟ੍ਠਿਨੋ. ਸਂਵਿਗ੍ਗਨ੍ਤਿ ਸਞ੍ਜਾਤਸਂਵੇਗਂ. ਸ੍ਵਾਯਂ ਸਂਵੇਗੋ ਯਸ੍ਮਾ ਪੁਰਿਮਾਵਤ੍ਥਾਯ ਚਿਤ੍ਤਸ੍ਸ ਚਲਨਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਚਲਿਤ’’ਨ੍ਤਿ.

੩੯੪. ਤਮਂ ਵਿਨੋਦਿਤਨ੍ਤਿ ਪਾਟਿਹਾਰਿਯਦਸ੍ਸਨੇਨ ‘‘ਅਹੋ ਥੇਰਸ੍ਸ ਇਦ੍ਧਾਨੁਭਾਵੋ’’ਤਿ ਸਮ੍ਮਾਪਟਿਪਤ੍ਤਿਯਂ ਸਞ੍ਜਾਤਬਹੁਮਾਨੋ, ਈਦਿਸਂ ਨਾਮ ਸਾਸਨਂ ਲਭਿਤ੍ਵਾਪਿ ਮਯਂ ਨਿਰਤ੍ਥਕੇਨ ਭੋਗਮਦੇਨ ਸਮ੍ਮਤ੍ਤਾ ਭਵਾਮਾਤਿ ਯੋਨਿਸੋ ਮਨਸਿਕਾਰੁਪ੍ਪਾਦਨੇਨ ਸਮ੍ਮੋਹਤਮਂ ਵਿਨੋਦਿਤਂ ਵਿਧਮਿਤਂ. ਏਤੇਤਿ ਮਹਾਥੇਰੋ ਸਕ੍ਕੋ ਚਾਤਿ ਤੇ ਦ੍ਵੇਪਿ ਸਮਾਨਬ੍ਰਹ੍ਮਚਰਿਯਤਾਯ ਸਬ੍ਰਹ੍ਮਚਾਰਿਨੋ.

੩੯੫. ਪਞ੍ਞਾਤਾਨਨ੍ਤਿ ਪਾਕਟਾਨਂ ਚਾਤੁਮਹਾਰਾਜ-ਸੁਯਾਮ-ਸਨ੍ਤੁਸਿਤ-ਪਰਨਿਮ੍ਮਿਤਵਸਵਤ੍ਤਿਮਹਾਬ੍ਰਹ੍ਮਾਨਂ ਅਞ੍ਞਤਰੋ, ਨ ਯੇਸਂ ਕੇਸਞ੍ਚੀਤਿ ਅਧਿਪ੍ਪਾਯੋ. ਆਰਦ੍ਧਧਮ੍ਮਵਸੇਨੇਵ ਪਰਿਯੋਸਾਪਿਤਤ੍ਤਾ ਯਥਾਨੁਸਨ੍ਧਿਨਾਵ ਨਿਟ੍ਠਪੇਸਿ.

ਚੂਲ਼ਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.