੬. ਮਹਾਸਚ੍ਚਕਸੁਤ੍ਤਵਣ੍ਣਨਾ

੩੬੪. ਏਕਂ ਸਮਯਂ ਭਗਵਾ ਵੇਸਾਲਿਯਂ ਵਿਹਰਤੀਤਿ ਇਮਿਨਾ ਤਦਾ ਭਗਵਤੋ ਵੇਸਾਲਿਯਂ ਨਿਵਾਸਪਰਿਚ੍ਛਿਨ੍ਨੋ ਪੁਬ੍ਬਣ੍ਹਾਦਿਭੇਦੋ ਸਬ੍ਬੋ ਸਮਯੋ ਸਾਧਾਰਣਤੋ ਗਹਿਤੋ, ਤਥਾ ਤੇਨ ਖੋ ਪਨ ਸਮਯੇਨਾਤਿ ਚ ਇਮਿਨਾ. ਪੁਬ੍ਬਣ੍ਹਸਮਯਨ੍ਤਿ ਪਨ ਇਮਿਨਾ ਤਬ੍ਬਿਸੇਸੋ, ਯੋ ਭਿਕ੍ਖਾਚਾਰਤ੍ਥਾਯ ਪਚ੍ਚਵੇਕ੍ਖਣਕਾਲੋ. ਅਟ੍ਠਕਥਾਯਂ ਪਨ ‘‘ਤੀਹਿ ਪਦੇਹਿ ਏਕੋਵ ਸਮਯੋ ਵੁਤ੍ਤੋ’’ਤਿ ਵੁਤ੍ਤਂ ਵਿਸੇਸਸ੍ਸ ਸਾਮਞ੍ਞਨ੍ਤੋਗਧਤ੍ਤਾ. ਮੁਖਧੋਵਨਸ੍ਸ ਪੁਬ੍ਬਕਾਲਕਿਰਿਯਾਭਾਵਸਾਮਞ੍ਞਤੋ ਵੁਤ੍ਤਂ ‘‘ਮੁਖਂ ਧੋਵਿਤ੍ਵਾ’’ਤਿ. ਮੁਖਂ ਧੋਵਿਤ੍ਵਾ ਏਵ ਹਿ ਵਾਸਧੁਰੋ ਚੇ, ਵੇਲਂ ਸਲ੍ਲਕ੍ਖੇਤ੍ਵਾ ਯਥਾਚਿਣ੍ਣਂ ਭਾਵਨਾਨੁਯੋਗਂ, ਗਨ੍ਥਧੁਰੋ ਚੇ, ਗਨ੍ਥਪਰਿਚਯੇ ਕਤਿਪਯੇ ਨਿਸਜ੍ਜਵਾਰੇ ਅਨੁਯੁਞ੍ਜਿਤ੍ਵਾ ਪਤ੍ਤਚੀਵਰਂ ਆਦਾਯ ਵਿਤਕ੍ਕਮਾਲ਼ਂ ਉਪਗਚ੍ਛਤਿ.

ਕਾਰਣਂ ਯੁਤ੍ਤਂ, ਅਨੁਚ੍ਛਵਿਕਨ੍ਤਿ ਅਤ੍ਥੋ. ਪੁਬ੍ਬੇ ਯਥਾਚਿਨ੍ਤਿਤਂ ਪਞ੍ਹਂ ਅਪੁਚ੍ਛਿਤ੍ਵਾ ਅਞ੍ਞਂ ਪੁਚ੍ਛਨ੍ਤੋ ਮਗ੍ਗਂ ਠਪੇਤ੍ਵਾ ਉਮ੍ਮਗ੍ਗਤੋ ਪਰਿਵਤ੍ਤੇਨ੍ਤੋ ਵਿਯ ਹੋਤੀਤਿ ਆਹ ‘‘ਪਸ੍ਸੇਨ ਤਾਵ ਪਰਿਹਰਨ੍ਤੋ’’ਤਿ.

੩੬੫. ਊਰੁਕ੍ਖਮ੍ਭੋਪਿ ਨਾਮ ਭਵਿਸ੍ਸਤੀਤਿ ਏਤ੍ਥ ਨਾਮ-ਸਦ੍ਦੋ ਵਿਮ੍ਹਯਤ੍ਥੋਤਿ ਕਤ੍ਵਾ ਵੁਤ੍ਤਂ ‘‘ਵਿਮ੍ਹਯਤ੍ਥਵਸੇਨਾ’’ਤਿਆਦਿ. ‘‘ਅਨ੍ਧੋ ਨਾਮ ਪਬ੍ਬਤਂ ਅਭਿਰੁਹਿਸ੍ਸਤੀ’’ਤਿਆਦੀਸੁ ਵਿਯ ਵਿਮ੍ਹਯਵਾਚੀਸਦ੍ਦਯੋਗੇਨ ਹਿ ‘‘ਭਵਿਸ੍ਸਤੀ’’ਤਿ ਅਨਾਗਤਵਚਨਂ. ਕਾਯਨ੍ਵਯਨ੍ਤਿ ਕਾਯਾਨੁਗਤਂ. ‘‘ਅਯਮ੍ਪਿ ਖੋ ਕਾਯੋ ਏਵਂਧਮ੍ਮੋ ਏਵਂਭਾਵੀ ਏਵਂਅਨਤੀਤੋ’’ਤਿਆਦਿਨਾ (ਦੀ. ਨਿ. ੨.੩੭੯; ਮ. ਨਿ. ੧.੧੧੨; ਮ. ਨਿ. ੩.੧੫੪) ਕਾਯਸ੍ਸ ਅਸੁਭਾਨਿਚ੍ਚਾਦਿਤਾਯ ਅਨੁਪਸ੍ਸਨਾ ਕਾਯਭਾਵਨਾਤਿ ਆਹ ‘‘ਕਾਯਭਾਵਨਾਤਿ ਪਨ ਵਿਪਸ੍ਸਨਾ ਵੁਚ੍ਚਤੀ’’ਤਿ. ਅਨਾਗਤਰੂਪਨ੍ਤਿ ਅਭੀਤੇ ਅਤ੍ਥੇ ਅਨਾਗਤਸਦ੍ਦਾਰੋਪਨਂ ਅਨਾਗਤਪ੍ਪਯੋਗੋ ਨ ਸਮੇਤਿ. ਅਤ੍ਥੋਪੀਤਿ ‘‘ਊਰੁਕ੍ਖਮ੍ਭੋਪਿ ਨਾਮ ਭਵਿਸ੍ਸਤੀ’’ਤਿ ਵੁਤ੍ਤਅਤ੍ਥੋਪਿ ਨ ਸਮੇਤਿ. ਅਯਨ੍ਤਿ ਅਤ੍ਤਕਿਲਮਥਾਨੁਯੋਗੋ. ਤੇਸਨ੍ਤਿ ਨਿਗਣ੍ਠਾਨਂ.

੩੬੬. ਅਤ੍ਤਨੋ ਅਧਿਪ੍ਪੇਤਕਾਯਭਾਵਨਂ ਵਿਤ੍ਥਾਰੇਨ੍ਤੋ ਵਿਤ੍ਥਾਰਤੋ ਦਸ੍ਸੇਨ੍ਤੋ ਯੇ ਤਂ ਅਨੁਯੁਤ੍ਤਾ, ਤੇ ਨਾਮਗੋਤ੍ਤਤੋ ਵਿਭਾਵੇਨ੍ਤੋ ‘‘ਨਨ੍ਦੋ ਵਚ੍ਛੋ’’ਤਿਆਦਿਮਾਹ. ਕਿਲਿਟ੍ਠਤਪਾਨਨ੍ਤਿ ਕਾਯਸ੍ਸ ਕਿਲੇਸਨਤਪਾਨਂ ਪੁਗ੍ਗਲਾਨਂ. ਜਾਤਮੇਦਨ੍ਤਿ ਮੇਦਭਾਵਾਪਤ੍ਤਿਵਸੇਨ ਉਪ੍ਪਨ੍ਨਮੇਦਂ. ਪੁਰਿਮਂ ਪਹਾਯਾਤਿ ਕਾਲਪਰਿਚ੍ਛੇਦੇਨ ਅਨਾਹਾਰਅਪ੍ਪਾਹਾਰਤਾਦਿਵਸੇਨ ਕਾਯਸ੍ਸ ਅਪਚਿਨਨਂ ਖੇਦਨਂ ਪਰਿਚ੍ਚਜਿਤ੍ਵਾ. ਕਾਯਭਾਵਨਾ ਪਨ ਨ ਪਞ੍ਞਾਯਤੀਤਿ ਨਿਯਮਂ ਪਰਮਤ੍ਥਤੋ ਕਾਯਭਾਵਨਾਪਿ ਤਵ ਞਾਣੇਨ ਨ ਞਾਯਤਿ, ਸੇਸਤੋਪਿ ਨ ਦਿਸ੍ਸਤਿ.

੩੬੭. ਇਮਸ੍ਮਿਂ ਪਨ ਠਾਨੇਤਿ ‘‘ਕਾਯਭਾਵਨਮ੍ਪਿ ਖੋ ਤ੍ਵਂ, ਅਗ੍ਗਿਵੇਸ੍ਸਨ, ਨ ਅਞ੍ਞਾਸਿ, ਕੁਤੋ ਪਨ ਤ੍ਵਂ ਚਿਤ੍ਤਭਾਵਨਂ ਜਾਨਿਸ੍ਸਸੀ’’ਤਿ ਇਮਸ੍ਮਿਂ ਠਾਨੇ. ਤਥਾ ‘‘ਯੋ ਤ੍ਵਂ ਏਵਂ ਓਲ਼ਾਰਿਕਂ ਦੁਬ੍ਬਲਂ ਕਾਯਭਾਵਨਂ ਨ ਜਾਨਾਸਿ, ਸੋ ਤ੍ਵਂ ਕੁਤੋ ਸਨ੍ਤਸੁਖੁਮਂ ਚਿਤ੍ਤਭਾਵਨਂ ਜਾਨਿਸ੍ਸਸੀ’’ਤਿ ਏਤਸ੍ਮਿਂ ਅਤ੍ਥਵਣ੍ਣਨਾਠਾਨੇ. ਅਬੁਦ੍ਧਵਚਨਂ ਨਾਮੇਤਂ ਪਦਨ੍ਤਿ ਕਾਯਭਾਵਨਾਸਞ੍ਞਿਤਵਿਪਸ੍ਸਨਾਤੋ ਚਿਤ੍ਤਭਾਵਨਾ ਸਨ੍ਤਾ, ਵਿਪਸ੍ਸਨਾ ਪਨ ਪਾਦਕਜ੍ਝਾਨਤੋ ਓਲ਼ਾਰਿਕਾ ਚੇਵ ਦੁਬ੍ਬਲਾ ਚਾਤਿ ਅਯਞ੍ਚ ਏਤਸ੍ਸ ਪਦਸ੍ਸ ਅਤ੍ਥੋ. ‘‘ਅਬੁਦ੍ਧਵਚਨਂ ਨਾਮੇਤਂ ਵਚਨਂ ਸਿਯਾ’’ਤਿ ਵਤ੍ਵਾ ਥੇਰੋ ਪਕ੍ਕਮਿਤੁਂ ਆਰਭਤਿ. ਅਥ ਨਂ ਮਹਾਸੀਵਤ੍ਥੇਰੋ ‘‘ਵਿਪਸ੍ਸਨਾ ਨਾਮੇਸਾ ਨ ਆਦਿਤੋ ਸੁਬ੍ਰੂਹਿਤਾ ਬਲਵਤੀ ਤਿਕ੍ਖਾ ਵਿਸਦਾ ਹੋਤਿ, ਤਸ੍ਮਾ ਤਰੁਣਵਸੇਨਾਯਮਤ੍ਥੋ ਵੇਦਿਤਬ੍ਬੋ’’ਤਿ ਦਸ੍ਸੇਨ੍ਤੋ ‘‘ਦਿਸ੍ਸਤਿ, ਭਿਕ੍ਖਵੇ’’ਤਿ ਸੁਤ੍ਤਪਦਂ (ਸਂ. ਨਿ. ੨.੬੨) ਆਹਰਿ. ਤਤ੍ਥ ਆਦਾਨਨ੍ਤਿ ਪਟਿਸਨ੍ਧਿ. ਨਿਕ੍ਖੇਪਨਨ੍ਤਿ ਚੁਤਿ. ਓਲ਼ਾਰਿਕਨ੍ਤਿ ਅਰੂਪਧਮ੍ਮੇਹਿ ਦੁਟ੍ਠੁਲ੍ਲਭਾਵਤ੍ਤਾ ਓਲ਼ਾਰਿਕਂ. ਕਾਯਨ੍ਤਿ ਚਤੁਸਨ੍ਤਤਿਰੂਪਸਮੂਹਭੂਤਂ ਕਾਯਂ. ਓਲ਼ਾਰਿਕਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਓਲ਼ਾਰਿਕਾਕਾਰੇਨਾਤਿ ਅਤ੍ਥੋ. ਤੇਨੇਵ ਵੁਤ੍ਤਂ ‘‘ਆਦਾਨਮ੍ਪਿ ਨਿਕ੍ਖੇਪਨਮ੍ਪੀ’’ਤਿ.

੩੬੮. ਸੁਖਸਾਰਾਗੇਨ ਸਮਨ੍ਨਾਗਤੋਤਿ ਸੁਖਵੇਦਨਾਯ ਬਲਵਤਰਰਾਗੇਨ ਸਮਙ੍ਗੀਭੂਤੋ. ਪਟ੍ਠਾਨੇ ਪਟਿਸਿਦ੍ਧਾ ਅਵਚਨੇਨੇਵ. ਤਸ੍ਮਾਤਿ ਸੁਖੇ ਠਿਤੇ ਏਵ ਦੁਕ੍ਖਸ੍ਸਾਨੁਪ੍ਪਜ੍ਜਨਤੋ. ਏਵਂ ਵੁਤ੍ਤਨ੍ਤਿ ‘‘ਸੁਖਾਯ ਵੇਦਨਾਯ ਨਿਰੋਧਾ ਉਪ੍ਪਜ੍ਜਤਿ ਦੁਕ੍ਖਾ ਵੇਦਨਾ’’ਤਿ ਏਵਂ ਵੁਤ੍ਤਂ, ਨ ਅਨਨ੍ਤਰਾਵ ਉਪ੍ਪਜ੍ਜਨਤੋ. ਖੇਪੇਤ੍ਵਾਤਿ ਕੁਸਲਾਨਿ ਖੇਪੇਤ੍ਵਾ. ਗਣ੍ਹਿਤ੍ਵਾ ਅਤ੍ਤਨੋ ਏਵ ਓਕਾਸਂ ਗਹੇਤ੍ਵਾ. ਉਭਤੋਪਕ੍ਖਂ ਹੁਤ੍ਵਾਤਿ ‘‘ਕਦਾਚਿ ਸੁਖਵੇਦਨਾ, ਕਦਾਚਿ ਦੁਕ੍ਖਵੇਦਨਾ’’ਤਿ ਪਕ੍ਖਦ੍ਵਯਵਸੇਨਪਿ ਵੇਦਨਾ ਚਿਤ੍ਤਸ੍ਸ ਪਰਿਯਾਦਾਯ ਹੋਤਿ ਯਥਾਕ੍ਕਮਂ ਅਭਾਵਿਤਕਾਯਸ੍ਸ ਅਭਾਵਿਤਚਿਤ੍ਤਸ੍ਸ.

੩੬੯. ਵਿਪਸ੍ਸਨਾ ਚ ਸੁਖਸ੍ਸ ਪਚ੍ਚਨੀਕਾਤਿ ਸੁਕ੍ਖਵਿਪਸ੍ਸਕਸ੍ਸਆਦਿਕਮ੍ਮਿਕਸ੍ਸ ਮਹਾਭੂਤਪਰਿਗ੍ਗਹਾਦਿਕਾਲੇ ਬਹਿ ਚਿਤ੍ਤਚਾਰਂ ਨਿਸੇਧੇਤ੍ਵਾ ਕਮ੍ਮਟ੍ਠਾਨੇ ਏਵ ਸਤਿਂ ਸਂਹਰਨ੍ਤਸ੍ਸ ਅਲਦ੍ਧਸ੍ਸਾਦਂ ਕਾਯਸੁਖਂ ਨ ਵਿਨ੍ਦਤਿ, ਸਮ੍ਬਾਧੇ ਵਜੇ ਸਨ੍ਨਿਰੁਦ੍ਧੋ ਗੋਗਣੋ ਵਿਯ ਵਿਹਞ੍ਞਤਿ ਵਿਪ੍ਫਨ੍ਦਤਿ, ਅਚ੍ਚਾਸਨ੍ਨਹੇਤੁਕਞ੍ਚ ਸਰੀਰੇ ਦੁਕ੍ਖਂ ਉਪ੍ਪਜ੍ਜਤੇਵ. ਤੇਨ ਵੁਤ੍ਤਂ ‘‘ਦੁਕ੍ਖਸ੍ਸ ਆਸਨ੍ਨਾ’’ਤਿ. ਤੇਨਾਹ ‘‘ਵਿਪਸ੍ਸਨਂ ਪਟ੍ਠਪੇਤ੍ਵਾ’’ਤਿਆਦਿ. ਅਦ੍ਧਾਨੇ ਗਚ੍ਛਨ੍ਤੇ ਗਚ੍ਛਨ੍ਤੇਤਿ ਮਹਾਭੂਤਪਰਿਗ੍ਗਹਾਦਿਵਸੇਨ ਕਾਲੇ ਗਚ੍ਛਨ੍ਤੇ. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਸਰੀਰਪਦੇਸੇ. ਦੁਕ੍ਖਂ ਦੂਰਾਪਗਤਂ ਹੋਤਿ ਸਮਾਪਤ੍ਤਿਬਲੇਨ ਵਿਕ੍ਖਮ੍ਭਿਤਤ੍ਤਾ ਅਪ੍ਪਨਾਭਾਵਤੋ. ਅਨਪ੍ਪਕਂ ਵਿਪੁਲਂ. ਸੁਖਨ੍ਤਿ ਝਾਨਸੁਖਂ. ਓਕ੍ਕਮਤੀਤਿ ਝਾਨਸਮੁਟ੍ਠਾਨਪਣੀਤਰੂਪਵਸੇਨ ਰੂਪਕਾਯਂ ਅਨੁਪਵਿਸਤਿ, ਨਾਮਕਾਯੋਕ੍ਕਮਨੇ ਵਤ੍ਤਬ੍ਬਮੇਵ ਨਤ੍ਥਿ. ਕਾਯਪਸ੍ਸਦ੍ਧਿਕਮ੍ਮਿਕਸ੍ਸਪਿ ਸਮ੍ਮਸਨਭਾਵਨਾ ਪਟ੍ਠਪੇਤ੍ਵਾ ਨਿਸਿਨ੍ਨਸ੍ਸ ਕਸ੍ਸਚਿ ਆਦਿਤੋਵ ਕਾਯਕਿਲਮਥਚਿਤ੍ਤੁਪਘਾਤਾਪਿ ਸਮ੍ਭਵਨ੍ਤਿ, ਸਮਾਧਿਸ੍ਸ ਪਨ ਅਪਚ੍ਚਨੀਕਤ੍ਤਾ ਸਿਨਿਦ੍ਧਭਾਵਤੋ ਚ ਨ ਸੁਕ੍ਖਵਿਪਸ੍ਸਨਾ ਵਿਯ ਸੁਖਸ੍ਸ ਵਿਪਚ੍ਚਨੀਕੋ, ਅਨੁਕ੍ਕਮੇਨ ਚ ਦੁਕ੍ਖਂ ਵਿਕ੍ਖਮ੍ਭੇਤੀਤਿ ਆਹ ‘‘ਯਥਾ ਸਮਾਧੀ’’ਤਿ. ਯਥਾ ਸਮਾਧਿ, ਵਿਪਸ੍ਸਨਾਯ ਪਨੇਤਂ ਨਤ੍ਥੀਤਿ ਆਹ ‘‘ਨ ਚ ਤਥਾ ਵਿਪਸ੍ਸਨਾ’’ਤਿ. ਤੇਨ ਵੁਤ੍ਤਨ੍ਤਿ ਯਸ੍ਮਾ ਵਿਪਸ੍ਸਨਾ ਸੁਖਸ੍ਸ ਪਚ੍ਚਨੀਕਾ, ਸਾ ਚ ਕਾਯਭਾਵਨਾ, ਤੇਨ ਵੁਤ੍ਤਂ ‘‘ਉਪ੍ਪਨ੍ਨਾਪਿ ਸੁਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਕਾਯਸ੍ਸਾ’’ਤਿ. ਤਥਾ ਯਸ੍ਮਾ ਸਮਾਧਿ ਦੁਕ੍ਖਸ੍ਸ ਪਚ੍ਚਨੀਕੋ, ਸੋ ਚ ਚਿਤ੍ਤਭਾਵਨਾ, ਤੇਨ ਵੁਤ੍ਤਂ ‘‘ਉਪ੍ਪਨ੍ਨਾਪਿ ਦੁਕ੍ਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਚਿਤ੍ਤਸ੍ਸਾ’’ਤਿ ਯੋਜਨਾ.

੩੭੦. ਗੁਣੇ ਘਟ੍ਟੇਤ੍ਵਾਤਿ ਅਪਦੇਸੇਨ ਵਿਨਾ ਸਮੀਪਮੇਵ ਨੇਤ੍ਵਾ. ਤਂ ਵਤ ਮਮ ਚਿਤ੍ਤਂ ਉਪ੍ਪਨ੍ਨਾ ਸੁਖਾ ਵੇਦਨਾ ਪਰਿਯਾਦਾਯ ਠਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤੀਤਿ ਯੋਜਨਾ.

੩੭੧. ਕਿਂ ਨ ਭਵਿਸ੍ਸਤਿ, ਸੁਖਾਪਿ ਦੁਕ੍ਖਾਪਿ ਵੇਦਨਾ ਯਥਾਪਚ੍ਚਯਂ ਉਪ੍ਪਜ੍ਜਤੇਵਾਤਿ ਅਤ੍ਥੋ. ਤਮਤ੍ਥਨ੍ਤਿ ਸੁਖਦੁਕ੍ਖਵੇਦਨਾਨਂ ਉਪ੍ਪਤ੍ਤਿਯਾ ਅਤ੍ਤਨੋ ਚਿਤ੍ਤਸ੍ਸ ਅਨਭਿਭਵਨੀਯਤਾਸਙ੍ਖਾਤਂ ਅਤ੍ਥਂ. ਤਤ੍ਥ ਤਾਵ ਪਾਸਰਾਸਿਸੁਤ੍ਤੇ ਬੋਧਿਪਲ੍ਲਙ੍ਕੇ ਨਿਸਜ੍ਜਾ ‘‘ਤਤ੍ਥੇਵ ਨਿਸੀਦਿ’’ਨ੍ਤਿ ਵੁਤ੍ਤਾ. ਇਧ ਮਹਾਸਚ੍ਚਕਸੁਤ੍ਤੇ ਦੁਕ੍ਕਰਕਾਰਿਕਾਯ ਦੁਕ੍ਕਰਚਰਣੇ ਨਿਸਜ੍ਜਾ ‘‘ਤਤ੍ਥੇਵ ਨਿਸੀਦਿ’’ਨ੍ਤਿ ਵੁਤ੍ਤਾ.

੩੭੪. ਛਨ੍ਦਕਰਣਵਸੇਨਾਤਿ ਤਣ੍ਹਾਯਨਵਸੇਨਾਤਿ ਅਤ੍ਥੋ. ਸਿਨੇਹਕਰਣਵਸੇਨਾਤਿ ਸਿਨੇਹਨਵਸੇਨ. ਮੁਚ੍ਛਾਕਰਣਵਸੇਨਾਤਿ ਮੋਹਨਵਸੇਨ ਪਮਾਦਾਪਾਦਨੇਨ. ਵਿਪਾਸਾਕਰਣਵਸੇਨਾਤਿ ਪਾਤੁਕਮ੍ਯਤਾਵਸੇਨ. ਅਨੁਦਹਨਵਸੇਨਾਤਿ ਰਾਗਗ੍ਗਿਨਾ ਅਨੁਦਹਨਵਸੇਨ. ਲੋਕੁਤ੍ਤਰਮਗ੍ਗਵੇਵਚਨਮੇਵ ਵਟ੍ਟਨਿਸ੍ਸਰਣਸ੍ਸ ਅਧਿਪ੍ਪੇਤਤ੍ਤਾ.

ਅਲ੍ਲਗ੍ਗਹਣੇਨ ਕਿਲੇਸਾਨਂ ਅਸਮੁਚ੍ਛਿਨ੍ਨਭਾਵਂ ਦਸ੍ਸੇਤਿ, ਸਸ੍ਨੇਹਗ੍ਗਹਣੇਨ ਅਵਿਕ੍ਖਮ੍ਭਿਤਭਾਵਂ, ਉਦਕੇ ਪਕ੍ਖਿਤ੍ਤਭਾਵਗ੍ਗਹਣੇਨ ਸਮੁਦਾਚਾਰਾਵਤ੍ਥਂ, ਉਦੁਮ੍ਬਰਕਟ੍ਠਗ੍ਗਹਣੇਨ ਅਤ੍ਤਭਾਵਸ੍ਸ ਅਸਾਰਕਤ੍ਤਂ. ਇਮਿਨਾਵ ਨਯੇਨਾਤਿ ‘‘ਅਲ੍ਲਂ ਉਦੁਮ੍ਬਰਕਟ੍ਠ’’ਨ੍ਤਿਆਦਿਨਾ ਵੁਤ੍ਤਨਯੇਨ. ਸਪੁਤ੍ਤਭਰਿਯਪਬ੍ਬਜ੍ਜਾਯਾਤਿ ਪੁਤ੍ਤਭਰਿਯੇਹਿ ਸਦ੍ਧਿਂ ਕਤਪਰਿਬ੍ਬਾਜਕਪਬ੍ਬਜ੍ਜਾਵਸੇਨ ਵੇਦਿਤਬ੍ਬਾ. ਕੁਟੀਚਕਬਹੂਦਕਹਂਸ-ਪਰਮਹਂਸਾਦਿਭੇਦਾ ਬ੍ਰਾਹ੍ਮਣਪਬ੍ਬਜ੍ਜਾ.

੩੭੬. ਕੁਤੋਪਿ ਇਮਸ੍ਸ ਆਪੋਸਿਨੇਹੋ ਨਤ੍ਥੀਤਿ ਕੋਲ਼ਾਪਂ. ਤੇਨਾਹ ‘‘ਛਿਨ੍ਨਸਿਨੇਹਂ ਨਿਰਾਪ’’ਨ੍ਤਿ. ਕੋਲ਼ਨ੍ਤਿ ਵਾ ਸੁਕ੍ਖਕਲਿਙ੍ਗਰਂ ਵੁਚ੍ਚਤਿ, ਕੋਲ਼ਂ ਕੋਲ਼ਭਾਵਂ ਆਪਨ੍ਨਨ੍ਤਿ ਕੋਲ਼ਾਪਂ. ਪਟਿਪਨ੍ਨਸ੍ਸ ਉਪਕ੍ਕਮਮਹਤ੍ਤਨਿਸ੍ਸਿਤਤਾ ਪਕਤਿਯਾ ਕਿਲੇਸੇਹਿ ਅਨਭਿਭੂਤਤਾਯ. ਅਤਿਨ੍ਤਤਾ ਪਟਿਪਕ੍ਖਭਾਵਨਾਯ. ਤਥਾ ਹਿ ਸੁਕ੍ਖਕੋਲ਼ਾਪਭਾਵੋ, ਆਰਕਾ ਉਦਕਾ ਥਲੇ ਨਿਕ੍ਖਿਤ੍ਤਭਾਵੋ ਚ ਨਿਦਸ੍ਸਿਤੋ. ਓਪਕ੍ਕਮਿਕਾਹੀਤਿ ਕਿਲੇਸਅਤਿਨਿਗ੍ਗਣ੍ਹਨੁਪਕ੍ਕਮਪ੍ਪਭਵਾਹਿ. ਵੇਦਨਾਹੀਤਿ ਪਟਿਪਤ੍ਤਿਵੇਦਨਾਹਿ. ਦੁਕ੍ਖਾ ਪਟਿਪਦਾ ਹਿ ਇਧਾਧਿਪ੍ਪੇਤਾ.

੩੭੭. ਕਿਂ ਪਨ ਨ ਸਮਤ੍ਥੋ, ਯਤੋ ਏਵਂ ਪਰੇਹਿ ਚਿਨ੍ਤਿਤੁਮ੍ਪਿ ਅਸਕ੍ਕੁਣੇਯ੍ਯਂ ਦੁਕ੍ਕਰਚਰਿਯਂ ਛਬ੍ਬਸ੍ਸਾਨਿ ਅਕਾਸੀਤਿ ਅਧਿਪ੍ਪਾਯੋ. ਕਤ੍ਵਾਪਿ ਅਕਤ੍ਵਾਪਿ ਸਮਤ੍ਥੋਵ ਕਾਰਣਸ੍ਸ ਨਿਪ੍ਫਨ੍ਨਤ੍ਤਾ. ‘‘ਯਥਾਪਿ ਸਬ੍ਬੇਸਮ੍ਪਿ ਖੋ ਬੋਧਿਸਤ੍ਤਾਨਂ ਚਰਿਮਭਵੇ ਅਨ੍ਤਮਸੋ ਸਤ੍ਤਾਹਮਤ੍ਤਮ੍ਪਿ ਧਮ੍ਮਤਾਵਸੇਨ ਦੁਕ੍ਕਰਚਰਿਯਾ ਹੋਤਿਯੇਵ, ਏਵਂ ਭਗਵਾ ਸਮਤ੍ਥੋ ਦੁਕ੍ਕਰਚਰਿਯਂ ਕਾਤੁਂ, ਏਵਞ੍ਚ ਨਂ ਅਕਾਸਿ, ਨ ਪਨ ਤਾਯ ਬੁਦ੍ਧੋ ਜਾਤੋ, ਅਥ ਖੋ ਮਜ੍ਝਿਮਾਯ ਏਵ ਪਟਿਪਤ੍ਤਿਯਾ’’ਤਿ ਤਸ੍ਸਾ ਬ੍ਯਤਿਰੇਕਮੁਖੇਨ ਸਦੇਵਕਸ੍ਸ ਲੋਕਸ੍ਸ ਬੋਧਾਯ ਅਮਗ੍ਗਭਾਵਦੀਪਨਤ੍ਥਂ, ਇਮਸ੍ਸ ਪਨ ਭਗਵਤੋ ਕਮ੍ਮਵਿਪਾਕਵਸੇਨ ਛਬ੍ਬਸ੍ਸਾਨਿ ਦੁਕ੍ਕਰਚਰਿਯਾ ਅਹੋਸਿ. ਵੁਤ੍ਤਞ੍ਹੇਤਂ –

‘‘ਅਵਚਾਹਂ ਜੋਤਿਪਾਲੋ, ਕਸ੍ਸਪਂ ਸੁਗਤਂ ਤਦਾ;

ਕੁਤੋ ਨੁ ਬੋਧਿ ਮੁਣ੍ਡਸ੍ਸ, ਬੋਧਿ ਪਰਮਦੁਲ੍ਲਭਾ.

ਤੇਨ ਕਮ੍ਮਵਿਪਾਕੇਨ, ਅਚਰਿਂ ਦੁਕ੍ਕਰਂ ਬਹੁਂ;

ਛਬ੍ਬਸ੍ਸਾਨੁਰੁਵੇਲਾਯਂ, ਤਤੋ ਬੋਧਿਮਪਾਪੁਣਿਂ.

ਨਾਹਂ ਏਤੇਨ ਮਗ੍ਗੇਨ, ਪਾਪੁਣਿਂ ਬੋਧਿਮੁਤ੍ਤਮਂ;

ਕੁਮਗ੍ਗੇਨ ਗਵੇਸਿਸ੍ਸਂ, ਪੁਬ੍ਬਕਮ੍ਮੇਨ ਵਾਰਿਤੋ’’ਤਿ.

ਦੁਕ੍ਕਰਚਰਿਯਾਯ ਬੋਧਾਯ ਅਮਗ੍ਗਭਾਵਦਸ੍ਸਨਤ੍ਥਂ ਦੁਕ੍ਕਰਚਰਿਯਂ ਅਕਾਸੀਤਿ ਕੇਚਿ. ਅਥ ਵਾ ਲੋਕਨਾਥਸ੍ਸ ਅਤ੍ਤਨੋ ਪਰਕ੍ਕਮਸਮ੍ਪਤ੍ਤਿਦਸ੍ਸਨਤ੍ਥਾਯ ਦੁਕ੍ਕਰਚਰਿਯਾ. ਪਣੀਤਾਧਿਮੁਤ੍ਤਿਯਾ ਹਿ ਪਰਮੁਕ੍ਕਂਸਗਤਭਾਵਤੋ ਅਭਿਨੀਹਾਰਾਨੁਰੂਪਂ ਸਮ੍ਬੋਧਿਯਂ ਤਿਬ੍ਬਛਨ੍ਦਤਾਯ ਸਿਖਾਪ੍ਪਤ੍ਤਿਯਾ ਤਦਤ੍ਥਂ ਈਦਿਸਮ੍ਪਿ ਨਾਮ ਦੁਕ੍ਕਰਚਰਿਯਂ ਅਕਾਸੀਤਿ ਲੋਕੇ ਅਤ੍ਤਨੋ ਵੀਰਿਯਾਨੁਭਾਵਂ ਵਿਭਾਵੇਤੁਂ – ‘‘ਸੋ ਚ ਮੇ ਪਚ੍ਛਾ ਪੀਤਿਸੋਮਨਸ੍ਸਾਵਹੋ ਭਵਿਸ੍ਸਤੀ’’ਤਿ ਲੋਕਨਾਥੋ ਦੁਕ੍ਕਰਚਰਿਯਂ ਅਕਾਸਿ. ਤੇਨਾਹ ‘‘ਸਦੇਵਕਸ੍ਸ ਲੋਕਸ੍ਸਾ’’ਤਿਆਦਿ. ਤਤ੍ਥ ਵੀਰਿਯਨਿਮ੍ਮਥਨਗੁਣੋਤਿ ਵੀਰਿਯਸ੍ਸ ਸਂਵਡ੍ਢਨਸਮ੍ਪਾਦਨਗੁਣੋ. ਯਥਾਵੁਤ੍ਤਮਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਪਾਸਾਦੇ’’ਤਿਆਦਿ ਵੁਤ੍ਤਂ. ਸਙ੍ਗਾਮੇ ਦ੍ਵੇ ਤਯੋ ਸਮ੍ਪਹਾਰੇਤਿ ਦ੍ਵਿਕ੍ਖਤ੍ਤੁਂ ਤਿਕ੍ਖਤ੍ਤੁਂ ਵਾ ਪਰਸੇਨਾਯ ਪਹਾਰਪਯੋਗੇ. ਪਧਾਨਵੀਰਿਯਨ੍ਤਿ ਸਮ੍ਮਪ੍ਪਧਾਨੇਹਿ ਆਸੇਵਨਵੀਰਿਯਂ, ਸਬ੍ਬਂ ਵਾ ਪੁਬ੍ਬਭਾਗਵੀਰਿਯਂ.

ਅਭਿਦਨ੍ਤਨ੍ਤਿ ਅਭਿਭਵਨਦਨ੍ਤਂ, ਉਪਰਿਦਨ੍ਤਨ੍ਤਿ ਅਤ੍ਥੋ. ਤੇਨਾਹ ‘‘ਉਪਰਿਦਨ੍ਤ’’ਨ੍ਤਿ. ਸੋ ਹਿ ਇਤਰਂ ਮੁਸਲਂ ਵਿਯ ਉਦੁਕ੍ਖਲਂ ਵਿਸੇਸਤੋ ਕਸ੍ਸਚਿ ਖਾਦਨਕਾਲੇ ਅਭਿਭੁਯ੍ਯ ਵਤ੍ਤਤਿ. ਕੁਸਲਚਿਤ੍ਤੇਨਾਤਿ ਬਲਵਸਮ੍ਮਾਸਙ੍ਕਪ੍ਪਯੁਤ੍ਤੇਨ ਕੁਸਲਚਿਤ੍ਤੇਨ. ਅਕੁਸਲਚਿਤ੍ਤਨ੍ਤਿ ਕਾਮਵਿਤਕ੍ਕਾਦਿਸਹਿਤਂ ਅਕੁਸਲਚਿਤ੍ਤਂ. ਅਕੁਸਲਚਿਤ੍ਤਸ੍ਸ ਪਵਤ੍ਤਿਤੁਂ ਅਪ੍ਪਦਾਨਂ ਨਿਗ੍ਗਹੋ. ਤਂਤਂਪਟਿਕ੍ਖੇਪਵਸੇਨ ਵਿਨੋਦਨਂ ਅਭਿਨਿਪ੍ਪੀਲ਼ਨਂ. ਵੀਰਿਯਤਾਪੇਨ ਵਿਕ੍ਖਮ੍ਭਨਂ ਅਭਿਸਨ੍ਤਾਪਨਂ. ਸਦਰਥੋਤਿ ਸਪਰਿਲ਼ਾਹੋ. ਪਧਾਨੇਨਾਤਿ ਪਦਹਨੇਨ, ਕਾਯਸ੍ਸ ਕਿਲਮਥੁਪ੍ਪਾਦਕੇਨ ਵੀਰਿਯੇਨਾਤਿ ਅਤ੍ਥੋ. ਵਿਦ੍ਧਸ੍ਸਾਤਿ ਤੁਦਸ੍ਸ. ਸਤੋਤਿ ਸਮਾਨਸ੍ਸ.

੩੭੮. ਸੀਸਵੇਠਨਨ੍ਤਿ ਸੀਸਂ ਰਜ੍ਜੁਯਾ ਬਨ੍ਧਿਤ੍ਵਾ ਦਣ੍ਡਕੇਨ ਪਰਿਵਤ੍ਤਕਵੇਠਨਂ. ਅਰਹਨ੍ਤੋ ਨਾਮ ਏਵਰੂਪਾ ਹੋਨ੍ਤੀਤਿ ਇਮਿਨਾ ਯਥਾਯਂ, ਏਵਂ ਵਿਸਞ੍ਞੀਭੂਤਾਪਿ ਹੁਤ੍ਵਾ ਵਿਹਰਨ੍ਤੀਤਿ ਦਸ੍ਸੇਤਿ. ਤੇਨਾਹ ‘‘ਮਤਕਸਦਿਸਾ’’ਤਿ, ਵੇਦਨਾਪ੍ਪਤ੍ਤਾ ਵਿਯ ਹੋਨ੍ਤੀਤਿ ਅਤ੍ਥੋ. ਸੁਪਿਨਪ੍ਪਟਿਗ੍ਗਹਣਤੋ ਪਟ੍ਠਾਯਾਤਿ ਪਟਿਸਨ੍ਧਿਗ੍ਗਹਣੇ ਸੇਤਵਾਰਣਸੁਪਿਨਂ ਪਸ੍ਸਿਤ੍ਵਾ ਬ੍ਰਾਹ੍ਮਣੇਹਿ ਬ੍ਯਾਕਤਕਾਲਤੋ ਪਟ੍ਠਾਯ.

੩੭੯. ਧਮ੍ਮਸਰੀਰਸ੍ਸ ਅਰੋਗਭਾਵੇਨ ਸਾਧੂਤਿ ਮਰਿਸਨਿਯੋਤਿ ਮਾਰਿਸੋ, ਪਿਯਾਯਨਵਚਨਮੇਤਂ. ਤੇਨਾਹ ‘‘ਸਮ੍ਪਿਯਾਯਮਾਨਾ’’ਤਿਆਦਿ. ਅਜਜ੍ਜਿਤਨ੍ਤਿ ਏਵਂ ਅਭੁਞ੍ਜਿਤਂ ਭਕਾਰਸ੍ਸ ਜਕਾਰਾਦੇਸਂ ਕਤ੍ਵਾ. ਤੇਨਾਹ ‘‘ਅਭੋਜਨ’’ਨ੍ਤਿ. ਏਵਂ ਮਾ ਕਰਿਤ੍ਥਾਤਿ ‘‘ਲੋਮਕੂਪੇਹਿ ਅਜ੍ਝੋਹਾਰੇਸ੍ਸਾਮ ਅਨੁਪ੍ਪਵੇਸੇਸ੍ਸਾਮਾ’’ਤਿ ਯਥਾ ਤੁਮ੍ਹੇਹਿ ਵੁਤ੍ਤਂ, ਏਵਂ ਮਾ ਕਰਿਤ੍ਥ. ਕਸ੍ਮਾ? ਯਾਪੇਸ੍ਸਾਮਹਨ੍ਤਿ ਅਹਞ੍ਚ ਯਾਵਦਤ੍ਥਂ ਆਹਾਰਮਤ੍ਤਂ ਭੁਞ੍ਜਨ੍ਤੋ ਯਥਾ ਯਾਪੇਸ੍ਸਾਮਿ, ਏਵਂ ਆਹਾਰਂ ਪਟਿਸੇਵਿਸ੍ਸਾਮਿ.

੩੮੦-੮੧. ਏਤਾਵ ਪਰਮਨ੍ਤਿ ਏਤ੍ਤਕਂ ਪਰਮਂ, ਨ ਇਤੋ ਪਰਂ ਓਪਕ੍ਕਮਿਕਦੁਕ੍ਖਵੇਦਨਾਵੇਦਿਯਨਂ ਅਤ੍ਥੀਤਿ ਅਤ੍ਥੋ. ਰਞ੍ਞੋ ਗਹੇਤਬ੍ਬਨਙ੍ਗਲਤੋ ਅਞ੍ਞਾਨਿ ਸਨ੍ਧਾਯ ‘‘ਏਕੇਨ ਊਨ’’ਨ੍ਤਿ ਵੁਤ੍ਤਂ. ਤਂ ਸੁਵਣ੍ਣਪਰਿਕ੍ਖਤਂ, ਇਤਰਾਨਿ ਰਜਤਪਰਿਕ੍ਖਤਾਨਿ. ਤੇਨਾਹ ‘‘ਅਮਚ੍ਚਾ ਏਕੇਨੂਨਅਟ੍ਠਸਤਰਜਤਨਙ੍ਗਲਾਨੀ’’ਤਿ. ਆਲ਼ਾਰੁਦਕਸਮਾਗਮੇ ਲਦ੍ਧਜ੍ਝਾਨਾਨਿ ਵਟ੍ਟਪਾਦਕਾਨਿ, ਆਨਾਪਾਨਸਮਾਧਿ ਪਨ ਕਾਯਗਤਾਸਤਿਪਰਿਯਾਪਨ੍ਨਤ੍ਤਾ ਸਬ੍ਬੇਸਞ੍ਚ ਬੋਧਿਸਤ੍ਤਾਨਂ ਵਿਪਸ੍ਸਨਾਪਾਦਕਤ੍ਤਾ ‘‘ਬੋਧਾਯ ਮਗ੍ਗੋ’’ਤਿ ਵੁਤ੍ਤੋ. ਬੁਜ੍ਝਨਤ੍ਥਾਯਾਤਿ ਚਤੁਨ੍ਨਂ ਅਰਿਯਸਚ੍ਚਾਨਂ, ਸਬ੍ਬਸ੍ਸੇਵ ਵਾ ਞੇਯ੍ਯਧਮ੍ਮਸ੍ਸ ਅਭਿਸਮ੍ਬੁਜ੍ਝਨਾਯ. ਸਤਿਯਾ ਅਨੁਸ੍ਸਰਣਕਵਿਞ੍ਞਾਣਂ ਸਤਾਨੁਸਾਰਿਵਿਞ੍ਞਾਣਂ. ਕਸ੍ਸਾ ਪਨ ਸਤਿਯਾਤਿ ਤਂ ਦਸ੍ਸੇਤੁਂ ‘‘ਨਯਿਦ’’ਨ੍ਤਿਆਦਿ ਵੁਤ੍ਤਂ.

੩੮੨. ਪਚ੍ਚੁਪਟ੍ਠਿਤਾਤਿ ਤਂਤਂਵਤ੍ਤਕਰਣਵਸੇਨ ਪਤਿਉਪਟ੍ਠਿਤਾ ਉਪਟ੍ਠਾਯਕਾ. ਤੇਨਾਹ ‘‘ਪਣ੍ਣਸਾਲਾ’’ਤਿਆਦਿ. ਪਚ੍ਚਯਬਾਹੁਲ੍ਲਿਕੋਤਿ ਪਚ੍ਚਯਾਨਂ ਬਾਹੁਲ੍ਲਾਯ ਪਟਿਪਨ੍ਨੋ. ਆਵਤ੍ਤੋਤਿ ਪੁਬ੍ਬੇ ਪਚ੍ਚਯਗੇਧਪ੍ਪਹਾਨਾਯ ਪਟਿਪਨ੍ਨੋ, ਇਦਾਨਿ ਤਤੋ ਪਟਿਨਿਵਤ੍ਤੋ. ਤੇਨਾਹ ‘‘ਰਸਗਿਦ੍ਧੋ…ਪੇ… ਆਵਤ੍ਤੋ’’ਤਿ. ਧਮ੍ਮਨਿਯਾਮੇਨਾਤਿ ਧਮ੍ਮਤਾਯ. ਤਮੇਵ ਧਮ੍ਮਤਂ ਦਸ੍ਸੇਤੁਂ ‘‘ਬੋਧਿਸਤ੍ਤਸ੍ਸਾ’’ਤਿਆਦਿਮਾਹ. ਬਾਰਾਣਸਿਮੇਵ ਤਤ੍ਥਾਪਿ ਚ ਸਬ੍ਬਬੁਦ੍ਧਾਨਂ ਅਵਿਜਹਿਤਧਮ੍ਮਚਕ੍ਕਪਵਤ੍ਤਨਟ੍ਠਾਨਮੇਵ ਅਗਮਂਸੁ. ਪਞ੍ਚਵਗ੍ਗਿਯਾ ਕਿਰ ਵਿਸਾਖਮਾਸਸ੍ਸ ਅਦ੍ਧਮਾਸਿਯਂ ਗਤਾ. ਤੇਨਾਹ ‘‘ਤੇਸੁ ਗਤੇਸੁ ਅਡ੍ਢਮਾਸਂ ਕਾਯਵਿਵੇਕਂ ਲਭਿਤ੍ਵਾ’’ਤਿ.

੩੮੭. ‘‘ਅਦ੍ਧਾਭੋਤੋ ਗੋਤਮਸ੍ਸ ਸਾਵਕਾਚਿਤ੍ਤਭਾਵਨਾਨੁਯੋਗਮਨੁਯੁਤ੍ਤਾ ਵਿਹਰਨ੍ਤਿ, ਨੋ ਕਾਯਭਾਵਨ’’ਨ੍ਤਿ ਇਮਂ ਸਨ੍ਧਾਯਾਹ ‘‘ਏਕਂ ਪਞ੍ਹਂ ਪੁਚ੍ਛਿ’’ਨ੍ਤਿ. ਇਮਂ ਧਮ੍ਮਦੇਸਨਨ੍ਤਿ ‘‘ਅਭਿਜਾਨਾਮਿ ਖੋ ਪਨਾਹ’’ਨ੍ਤਿਆਦਿਕਂ ਧਮ੍ਮਦੇਸਨਂ. ਅਸਲ੍ਲੀਨੋ ਤਣ੍ਹਾਦਿਟ੍ਠਿਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾ ਤੇਹਿ ਸਬ੍ਬਸੋ ਨ ਲਿਤ੍ਤੋ. ਅਨੁਪਲਿਤ੍ਤੋਤਿ ਤਸ੍ਸੇਵ ਵੇਵਚਨਂ ਤਣ੍ਹਾਨਨ੍ਦਿਯਾ ਅਭਾਵੇਨ. ਗੋਚਰਜ੍ਝਤ੍ਤਮੇਵਾਤਿ ਗੋਚਰਜ੍ਝਤ੍ਤਸਞ੍ਞਿਤੇ ਫਲਸਮਾਪਤ੍ਤਿਯਾ ਆਰਮ੍ਮਣੇ, ਨਿਬ੍ਬਾਨੇਤਿ ਅਤ੍ਥੋ. ਯਂ ਸਨ੍ਧਾਯ ਪਾਲ਼ਿਯਂ ‘‘ਪੁਰਿਮਸ੍ਮਿਂ ਸਮਾਧਿਨਿਮਿਤ੍ਤੇ’’ਤਿ ਵੁਤ੍ਤਂ ਸਨ੍ਨਿਸੀਦਾਪੇਮੀਤਿ ਫਲਸਮਾਪਤ੍ਤਿਸਮਾਧਿਨਾ ਅਚ੍ਚਨ੍ਤਸਮਾਦਾਨਵਸੇਨ ਚਿਤ੍ਤਂ ਸਮ੍ਮਦੇਵ ਨਿਸੀਦਾਪੇਮਿ. ਪੁਬ੍ਬਾਭੋਗੇਨਾਤਿ ਸਮਾਪਜ੍ਜਨਤੋ ਪੁਬ੍ਬੇ ਪਵਤ੍ਤਆਭੋਗੇਨ. ਪਰਿਚ੍ਛਿਨ੍ਦਿਤ੍ਵਾਤਿ ਸਮਾਪਜ੍ਜਨਕ੍ਖਣਂ ਪਰਿਚ੍ਛਿਨ੍ਦਿਤ੍ਵਾ. ਤੇਨਾਹ ‘‘ਸਾਧੁਕਾਰ…ਪੇ… ਅਵਿਚ੍ਛਿਨ੍ਨੇਯੇਵਾ’’ਤਿ. ਏਵਮਸ੍ਸ ਪਰਿਚ੍ਛਿਨ੍ਨਕਾਲਸਮਾਪਜ੍ਜਨਂ ਯਥਾਪਰਿਚ੍ਛਿਨ੍ਨਕਾਲਂ ਵੁਟ੍ਠਾਨਞ੍ਚ ਬੁਦ੍ਧਾਨਂ ਨ ਭਾਰਿਯਂ ਵਸੀਭਾਵਸ੍ਸ ਤਥਾਸੁਪ੍ਪਗੁਣਭਾਵਤੋਤਿ ਦਸ੍ਸੇਨ੍ਤੋ ਆਹ ‘‘ਬੁਦ੍ਧਾਨਂ ਹੀ’’ਤਿਆਦਿ. ਧਮ੍ਮਸਮ੍ਪਟਿਗ੍ਗਾਹਕਾਨਂ ਅਸ੍ਸਾਸਵਾਰੇ ਵਾ. ਤਦਾ ਹਿ ਦੇਸਿਯਮਾਨਂ ਧਮ੍ਮਂ ਉਪਧਾਰੇਤੁਂ ਨ ਸਕ੍ਕੋਨ੍ਤਿ, ਤਸ੍ਮਾ ਤਸ੍ਮਿਂ ਖਣੇ ਦੇਸਿਤਦੇਸਨਾ ਨਿਰਤ੍ਥਕਾ ਸਿਯਾ. ਨ ਹਿ ਬੁਦ੍ਧਾਨਂ ਨਿਰਤ੍ਥਕਾ ਕਿਰਿਯਾ ਅਤ੍ਥਿ.

ਓਕਪ੍ਪਨੀਯਮੇਤਨ੍ਤਿ ‘‘ਤਸ੍ਸਾ ਏਵ ਕਥਾਯਾ’’ਤਿਆਦਿਨਾ ਵੁਤ੍ਤਂ ਅਤਿਵਿਯ ਅਚ੍ਛਰਿਯਗਤਂ ਅਟ੍ਠੁਪ੍ਪਤ੍ਤਿਂ ਸੁਤ੍ਵਾ ਈਦਿਸੀ ਪਟਿਪਤ੍ਤਿ ਸਮ੍ਮਾਸਮ੍ਬੁਦ੍ਧਸ੍ਸੇਵ ਹੋਤੀਤਿ ਉਪਵਾਦਵਸੇਨ ਵਦਤਿ, ਨ ਸਭਾਵੇਨ. ਤੇਨਾਹ ‘‘ਸਤ੍ਥਰਿ ਪਸਾਦਮਤ੍ਤਮ੍ਪਿ ਨ ਉਪ੍ਪਨ੍ਨ’’ਨ੍ਤਿ. ਕਾਯਦਰਥੋਤਿ ਪਚ੍ਚਯਵਿਸੇਸਵਸੇਨ ਰੂਪਕਾਯਸ੍ਸ ਪਰਿਸ੍ਸਮਾਕਾਰੋ. ਉਪਾਦਿਨ੍ਨਕੇਤਿ ਇਨ੍ਦ੍ਰਿਯਬਦ੍ਧੇ. ਅਨੁਪਾਦਿਨ੍ਨਕੇਤਿ ਅਨਿਨ੍ਦ੍ਰਿਯਬਦ੍ਧੇ. ਵਿਕਸਨ੍ਤਿ ਸੂਰਿਯਰਸ੍ਮਿਸਮ੍ਫਸ੍ਸੇਨ. ਤਦਭਾਵੇਨ ਮਕੁਲਾਨਿ ਹੋਨ੍ਤਿ. ਕੇਸਞ੍ਚਿ ਤਿਨ੍ਤਿਨਿਕਾਦਿਰੁਕ੍ਖਾਨਂ. ਪਤਿਲੀਯਨ੍ਤਿ ਨਿਸ੍ਸਯਰੂਪਧਮ੍ਮਅਵਿਪ੍ਫਾਰਿਕਤਾਯ. ਅਰੂਪਧਮ੍ਮਤਾਯ ਪਞ੍ਚਵਿਞ੍ਞਾਣਾਨਞ੍ਚੇਵ ਕਿਰਿਯਾਮਯਵਿਞ੍ਞਾਣਾਨਞ੍ਚ ਅਪ੍ਪਵਤ੍ਤਿਸਞ੍ਞਿਤਾ ਅਵਿਪ੍ਫਾਰਿਕਤਾ ਹੋਤਿ, ਯਤ੍ਥ ਨਿਦ੍ਦਾਸਮਞ੍ਞਾ. ਤੇਨਾਹ ‘‘ਦਰਥਵਸੇਨ ਭਵਙ੍ਗਸੋਤਞ੍ਚ ਇਧ ਨਿਦ੍ਦਾਤਿ ਅਧਿਪ੍ਪੇਤ’’ਨ੍ਤਿ. ਤਤ੍ਥ ਦਰਥਵਸੇਨਾਤਿ ਦਰਥਵਸੇਨੇਵ, ਨ ਥਿਨਮਿਦ੍ਧਵਸੇਨਾਤਿ ਅਵਧਾਰਣਂ ਅਵਧਾਰਣਫਲਞ੍ਚ ਨਿਦ੍ਧਾਰੇਤਬ੍ਬਂ. ਤਂ ਸਨ੍ਧਾਯਾਤਿ ਕਾਯਸ੍ਸ ਦਰਥਸਙ੍ਖਾਤਸਰੀਰਗਿਲਾਨਹੇਤੁਕਂ ਨਿਦ੍ਦਂ ਸਨ੍ਧਾਯ. ਸਰੀਰਗਿਲਾਨਞ੍ਚ ਭਗਵਤੋ ਨਤ੍ਥੀਤਿ ਨ ਸਕ੍ਕਾ ਵਤ੍ਤੁਂ ‘‘ਪਿਟ੍ਠਿ ਮੇ ਆਗਿਲਾਯਤੀ’’ਤਿ (ਦੀ. ਨਿ. ੩.੩੦੦; ਮ. ਨਿ. ੨.੨੨; ਚੂਲ਼ਵ. ੩੪੫) ਵਚਨਤੋ. ਸਮ੍ਮੋਹਵਿਹਾਰਸ੍ਮਿਨ੍ਤਿ ਪਚ੍ਚਤ੍ਤੇ ਏਤਂ ਭੁਮ੍ਮਵਚਨਨ੍ਤਿ ਆਹ ‘‘ਸਮ੍ਮੋਹਵਿਹਾਰੋਤਿ ਵਦਨ੍ਤੀ’’ਤਿ, ਸਮ੍ਮੋਹਵਿਹਾਰਸ੍ਮਿਂ ਵਾ ਪਰਿਯਾਪਨ੍ਨਂ ਏਤਂ ਵਦਨ੍ਤਿ, ਯਦਿਦਂ ਦਿਵਾ ਨਿਦ੍ਦੋਕ੍ਕਮਨਨ੍ਤਿ ਯੋਜਨਾ.

੩੮੯. ਉਪਨੀਤੇਹੀਤਿ ਦੋਸਮਗ੍ਗਂ ਨਿਨ੍ਦਾਪਥਂ ਉਪਨੀਤੇਹਿ. ਅਭਿਨਨ੍ਦਿਤ੍ਵਾਤਿ ਸਮ੍ਪਿਯਾਯਿਤ੍ਵਾ. ਤੇਨਾਹ ‘‘ਚਿਤ੍ਤੇਨ ਸਮ੍ਪਟਿਚ੍ਛਨ੍ਤੋ’’ਤਿ. ਅਨੁਮੋਦਿਤ੍ਵਾਤਿ ‘‘ਸਾਧੁ ਸਾਧੂ’’ਤਿ ਦੇਸਨਾਯ ਥੋਮਨਵਸੇਨ ਅਨੁਮੋਦਿਤ੍ਵਾ. ਤੇਨਾਹ ‘‘ਵਾਚਾਯਪਿ ਪਸਂਸਨ੍ਤੋ’’ਤਿ. ਸਮ੍ਪਤ੍ਤੇ ਕਾਲੇਤਿ ਪਬ੍ਬਜ੍ਜਾਯੋਗ੍ਗੇ ਕਾਲੇ ਅਨੁਪ੍ਪਤ੍ਤੇ.

ਗਣਂ ਵਿਨੋਦੇਤ੍ਵਾਤਿ ਗਣਂ ਅਪਨੇਤ੍ਵਾ ਗਣਪਲਿਬੋਧਂ ਛਿਨ੍ਦਿਤ੍ਵਾ. ਪਪਞ੍ਚਨ੍ਤਿ ਅਵਸੇਸਕਿਲੇਸਂ. ‘‘ਪੁਞ੍ਞਵਾ ਰਾਜਪੂਜਿਤੋ’’ਤਿ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਤਸ੍ਮਿਞ੍ਹਿ ਕਾਲੇ’’ਤਿਆਦਿ ਵੁਤ੍ਤਂ. ਛਨ੍ਦਵਾਸਹਰਣੇਨ ਉਪੋਸਥਕਮ੍ਮਂ ਕਰੋਨ੍ਤੋ.

ਸਕਲਂ ਰਤ੍ਤਿਂ ਬੁਦ੍ਧਗੁਣਾਨਂਯੇਵ ਕਥਿਤਤ੍ਤਾ ਥੇਰਸ੍ਸ ਞਾਣਂ ਦੇਸਨਾਵਿਭਵਞ੍ਚ ਵਿਭਾਵੇਨ੍ਤੋ ਆਹ ‘‘ਏਤ੍ਤਕਾਵ, ਭਨ੍ਤੇ, ਬੁਦ੍ਧਗੁਣਾ’’ਤਿ. ਇਮਾਯ, ਭਨ੍ਤੇ, ਤੁਮ੍ਹਾਕਂ ਧਮ੍ਮਕਥਾਯ ਅਨਵਸੇਸਤੋ ਬੁਦ੍ਧਗੁਣਾ ਕਥਿਤਾ ਵਿਯ ਜਾਯਨ੍ਤਿ, ਏਵਂ ਸਨ੍ਤੇਪਿ ਅਨਨ੍ਤਾਪਰਿਮੇਯ੍ਯਾਵ ਤੇ, ਕਿਂ ਇਤੋ ਪਰੇਪਿ ਵਿਜ੍ਜਨ੍ਤੇਵਾਤਿ ਥੇਰਂ ਤਤ੍ਥ ਸੀਹਨਾਦਂ ਨਦਾਪੇਤੁਕਾਮੋ ਆਹ ‘‘ਉਦਾਹੁ ਅਞ੍ਞੇਪਿ ਅਤ੍ਥੀ’’ਤਿਆਦਿ. ਰਜ੍ਜਸ੍ਸ ਪਦੇਸਿਕਤ੍ਤਾ, ਯਥਾਵੁਤ੍ਤਸੁਭਾਸਿਤਸ੍ਸ ਚ ਅਨਗ੍ਘਤ੍ਤਾ ਵੁਤ੍ਤਂ ‘‘ਅਯਂ ਮੇ ਦੁਗ੍ਗਤਪਣ੍ਣਾਕਾਰੋ’’ਤਿ. ਤਿਯੋਜਨਸਤਿਕਨ੍ਤਿ ਇਦਂ ਪਰਿਕ੍ਖੇਪਵਸੇਨ ਵੁਤ੍ਤਂ, ਤਞ੍ਚ ਖੋ ਮਨੁਸ੍ਸਾਨਂ ਪਰਿਭੋਗਵਸੇਨਾਤਿ ਦਟ੍ਠਬ੍ਬਂ.

ਮਹਾਸਚ੍ਚਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.