੯. ਮਹਾਸਾਰੋਪਮਸੁਤ੍ਤਵਣ੍ਣਨਾ

੩੦੭. ਨਚਿਰਪਕ੍ਕਨ੍ਤੇਤਿ ਨ ਚਿਰਂ ਪਕ੍ਕਨ੍ਤੇ, ਪਕ੍ਕਨ੍ਤਸ੍ਸ ਸਤੋ ਨ ਚਿਰਸ੍ਸੇਵ. ਸਲਿਙ੍ਗੇਨੇਵਾਤਿ ਮੁਣ੍ਡਿਯਕਾਸਾਯਗ੍ਗਹਣਾਦਿਨਾ ਅਤ੍ਤਨੋ ਪੁਰਿਮਲਿਙ੍ਗੇਨੇਵ. ਪਾਟਿਯੇਕ੍ਕੇ ਜਾਤੇਤਿ ਵਿਪਨ੍ਨਾਚਾਰਦਿਟ੍ਠਿਤਾਯ ਪਕਾਸਨੀਯਕਮ੍ਮਕਰਣਤੋ ਪਰਂ ਅਞ੍ਞਤਿਤ੍ਥਿਯਸਦਿਸੇ ਵਿਸੁਂ ਭੂਤੇ. ਕੁਲਪੁਤ੍ਤੋਤਿ ਜਾਤਿਮਤ੍ਤੇਨ ਕੁਲਪੁਤ੍ਤੋ. ਅਸਮ੍ਭਿਨ੍ਨਾਯਾਤਿ ਸਮ੍ਭੇਦਰਹਿਤਾਯ, ਜਾਤਿਸਙ੍ਕਰਵਿਰਹਿਤਾਯਾਤਿ ਅਤ੍ਤੋ. ਜਾਤਿਸੀਸੇਨ ਇਧ ਜਾਤਿਵਤ੍ਥੁਕਂ ਦੁਕ੍ਖਂ ਵੁਤ੍ਤਨ੍ਤਿ ਆਹ ‘‘ਓਤਿਣ੍ਣੋਤਿ ਯਸ੍ਸ ਜਾਤਿ ਅਨ੍ਤੋ ਅਨੁਪਵਿਟ੍ਠਾ’’ਤਿ. ਜਾਤੋ ਹਿ ਸਤ੍ਤੋ ਜਾਤਕਾਲਤੋ ਪਟ੍ਠਾਯ ਜਾਤਿਨਿਮਿਤ੍ਤੇਨ ਦੁਕ੍ਖੇਨ ਅਨ੍ਤੋ ਅਨੁਪਵਿਟ੍ਠੋ ਵਿਯ ਵਿਬਾਧੀਯਤਿ. ਜਰਾਯਾਤਿਆਦੀਸੁਪਿ ਏਸੇਵ ਨਯੋ. ਚਤ੍ਤਾਰੋ ਪਚ੍ਚਯਾ ਲਬ੍ਭਨ੍ਤੀਤਿ ਲਾਭਾ, ਚਤੁਨ੍ਨਂ ਪਚ੍ਚਯਾਨਂ ਲਬ੍ਭਮਾਨਾਨਂ ਸੁਕਤਭਾਵੋ ਸੁਟ੍ਠੁ ਅਭਿਸਙ੍ਖਤਭਾਵੋ. ਵਣ੍ਣਭਣਨਨ੍ਤਿ ਗੁਣਕਿਤ੍ਤਨਂ. ਅਪਞ੍ਞਾਤਾਤਿ ਸਮ੍ਭਾਵਨਾਵਸੇਨ ਨ ਪਞ੍ਞਾਤਾ. ਲਾਭਾਦਿਨਿਬ੍ਬਤ੍ਤਿਯਾਭਾਵਦਸ੍ਸਨਞ੍ਹੇਤਂ. ਤੇਨਾਹ ‘‘ਘਾਸਚ੍ਛਾਦਨਮਤ੍ਤਮ੍ਪਿ ਨ ਲਭਨ੍ਤੀ’’ਤਿ. ਅਪ੍ਪੇਸਕ੍ਖਾਤਿ ਅਪ੍ਪਾਨੁਭਾਵਾ. ਸਾ ਪਨ ਅਪ੍ਪੇਸਕ੍ਖਤਾ ਅਧਿਪਤੇਯ੍ਯਸਮ੍ਪਤ੍ਤਿਯਾ ਚ ਪਰਿਵਾਰਸਮ੍ਪਤ੍ਤਿਯਾ ਚ ਅਭਾਵੇਨ ਪਾਕਟਾ ਹੋਤਿ. ਤਤ੍ਥ ਪਰਿਵਾਰਸਮ੍ਪਤ੍ਤਿਯਾ ਅਭਾਵਂ ਦਸ੍ਸੇਨ੍ਤੋ ‘‘ਅਪ੍ਪਪਰਿਵਾਰਾ’’ਤਿ ਆਹ.

ਸਾਰੇਨਪਿ ਕੇਚਿ ਅਜਾਨਨੇਨ ਅਞ੍ਞਾਲਾਭੇਨ ਵਾ ਅਸਾਰਭੂਤਮ੍ਪਿ ਕਤ੍ਤਬ੍ਬਂ ਕਰੋਨ੍ਤੀਤਿ ਤਤੋ ਵਿਸੇਸਨਤ੍ਥਂ ‘‘ਸਾਰੇਨ ਸਾਰਕਰਣੀਯ’’ਨ੍ਤਿ ਵੁਤ੍ਤਨ੍ਤਿ ਤਂ ਦਸ੍ਸੇਨ੍ਤੋ ‘‘ਅਕ੍ਖਚਕ੍ਕਯੁਗਨਙ੍ਗਲਾਦਿਕ’’ਨ੍ਤਿ ਆਹ. ਬ੍ਰਹ੍ਮਚਰਿਯਸ੍ਸਾਤਿ ਸਿਕ੍ਖਾਤ੍ਤਯਸਙ੍ਗਹਸ੍ਸ ਸਾਸਨਬ੍ਰਹ੍ਮਚਰਿਯਸ੍ਸ. ਮਹਾਰੁਕ੍ਖਸ੍ਸ ਮਗ੍ਗਫਲਸਾਰਸ੍ਸ ਞਾਣਦਸ੍ਸਨਫੇਗ੍ਗੁਕਸ੍ਸ ਸਮਾਧਿਤਚਸ੍ਸ ਸੀਲਪਪਟਿਕਸ੍ਸ ਚਞ੍ਚਲਸਭਾਵਾ ਸਂਸਪ੍ਪਚਾਰੀਤਿ ਚ ਚਤ੍ਤਾਰੋ ਪਚ੍ਚਯਾ ਸਾਖਾਪਲਾਸਂ ਨਾਮ. ਤੇਨੇਵਾਤਿ ਲਾਭਸਕ੍ਕਾਰਸਿਲੋਕਨਿਬ੍ਬਤ੍ਤਨੇਨੇਵ. ਸਾਰੋ ਮੇ ਪਤ੍ਤੋਤਿ ਇਮਸ੍ਮਿਂ ਸਾਸਨੇ ਅਧਿਗਨ੍ਤਬ੍ਬਸਾਰੋ ਨਾਮ ਇਮਿਨਾ ਲਾਭਾਦਿਨਿਬ੍ਬਤ੍ਤਨੇਨ ਅਨੁਪ੍ਪਤ੍ਤੋਤਿ ਵੋਸਾਨਂ ਨਿਟ੍ਠਿਤਕਿਚ੍ਚਂ ਆਪਨ੍ਨੋ.

੩੧੦. ਞਾਣਦਸ੍ਸਨਨ੍ਤਿ ਞਾਣਭੂਤਂ ਦਸ੍ਸਨਂ ਵਿਸਯਸ੍ਸ ਸਚ੍ਛਿਕਰਣਵਸੇਨ ਪਵਤ੍ਤਂ ਅਭਿਞ੍ਞਾਞਾਣਂ. ਸੁਖੁਮਂ ਰੂਪਨ੍ਤਿ ਦੇਵਾਦੀਨਂ, ਅਞ੍ਞਮ੍ਪਿ ਵਾ ਸੁਖੁਮਸਭਾਵਂ ਰੂਪਂ. ਤੇਨਾਹ ‘‘ਅਨ੍ਤਮਸੋ…ਪੇ… ਵਿਹਰਨ੍ਤੀ’’ਤਿ, ਦਿਬ੍ਬਚਕ੍ਖੁ ਹਿ ਇਧ ਉਕ੍ਕਟ੍ਠਨਿਦ੍ਦੇਸੇਨ ‘‘ਞਾਣਦਸ੍ਸਨ’’ਨ੍ਤਿ ਗਹਿਤਂ.

੩੧੧. ਅਸਮਯਵਿਮੋਕ੍ਖਂ ਆਰਾਧੇਤੀਤਿ ਏਤ੍ਥ ਅਧਿਪ੍ਪੇਤਂ ਅਸਮਯਵਿਮੋਕ੍ਖਂ ਪਾਲ਼ਿਯਾ ਏਵ ਦਸ੍ਸੇਤੁਂ ‘‘ਕਤਮੋ ਅਸਮਯਵਿਮੋਕ੍ਖੋ’’ਤਿਆਦਿ ਵੁਤ੍ਤਂ. ਅਟ੍ਠਨ੍ਨਞ੍ਹਿ ਸਮਾਪਜ੍ਜਨਸਮਯੋਪਿ ਅਤ੍ਥਿ ਅਸਮਯੋਪਿ, ਮਗ੍ਗਵਿਮੋਕ੍ਖੇਨ ਪਨ ਵਿਮੁਚ੍ਚਨਸ੍ਸ ਸਮਯੋ ਵਾ ਅਸਮਯੋ ਵਾ ਨਤ੍ਥਿ. ਯਸ੍ਸ ਸਦ੍ਧਾ ਬਲਵਤੀ, ਵਿਪਸ੍ਸਨਾ ਚ ਆਰਦ੍ਧਾ, ਤਸ੍ਸ ਗਚ੍ਛਨ੍ਤਸ੍ਸ ਤਿਟ੍ਠਨ੍ਤਸ੍ਸ ਨਿਸੀਦਨ੍ਤਸ੍ਸ ਭੁਞ੍ਜਨ੍ਤਸ੍ਸ ਚ ਮਗ੍ਗਫਲਪਟਿਵੇਧੋ ਨਾਮ ਨ ਹੋਤੀਤਿ ਨ ਵਤ੍ਤਬ੍ਬਂ, ਇਤਿ ਮਗ੍ਗਵਿਮੋਕ੍ਖੇਨ ਵਿਮੁਚ੍ਚਨ੍ਤਸ੍ਸ ਸਮਯੋ ਵਾ ਅਸਮਯੋ ਵਾ ਨਤ੍ਥੀਤਿ ਸੋ ਅਸਮਯਵਿਮੋਕ੍ਖੋ. ਤੇਨਾਹ ‘‘ਲੋਕਿਯਸਮਾਪਤ੍ਤਿਯੋ ਹੀ’’ਤਿਆਦਿ.

ਨ ਕੁਪ੍ਪਤਿ, ਨ ਨਸ੍ਸਤੀਤਿ ਅਕੁਪ੍ਪਾ, ਕਦਾਚਿਪਿ ਅਪਰਿਹਾਨਸਭਾਵਾ. ਸਬ੍ਬਸਂਕਿਲੇਸੇਹਿ ਪਟਿਪ੍ਪਸ੍ਸਦ੍ਧਿਵਸੇਨ ਚੇਤਸੋ ਵਿਮੁਤ੍ਤੀਤਿ ਚੇਤੋਵਿਮੁਤ੍ਤਿ. ਤੇਨਾਹ ‘‘ਅਰਹਤ੍ਤਫਲਵਿਮੁਤ੍ਤੀ’’ਤਿ. ਅਯਮਤ੍ਥੋ ਪਯੋਜਨਂ ਏਤਸ੍ਸਾਤਿ ਏਤਦਤ੍ਥਂ, ਸਾਸਨਬ੍ਰਹ੍ਮਚਰਿਯਂ, ਤਸ੍ਸ ਏਸਾ ਪਰਮਕੋਟਿ. ਯਥਾਰਦ੍ਧਸ੍ਸ ਸਾਰੋਪਮੇਨ ਫਲੇਨ ਦੇਸਨਾ ਨਿਟ੍ਠਾਪਿਤਾਤਿ ਆਹ ‘‘ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸੀ’’ਤਿ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਮਹਾਸਾਰੋਪਮਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.