੧੦. ਚੂਲ਼ਸਾਰੋਪਮਸੁਤ੍ਤਵਣ੍ਣਨਾ

੩੧੨. ਪਿਙ੍ਗਲਧਾਤੁਕੋਤਿ ਪਿਙ੍ਗਲਸਭਾਵੋ ਪਿਙ੍ਗਲਚ੍ਛਵਿਕੋ, ਪਿਙ੍ਗਲਕ੍ਖੋਤਿ ਵਾ ਅਤ੍ਥੋ. ਪਬ੍ਬਜਿਤਸਮੂਹਸਙ੍ਖਾਤੋ ਸਙ੍ਘੋ, ਨ ਸੀਲਾਦਿਗੁਣੇਹਿ ਸਙ੍ਗਹਿਤਬ੍ਬਭਾਵੇਨ. ਸਙ੍ਘੋ ਏਤੇਸਂ ਅਤ੍ਥਿ ਪਰਿਵਾਰਭੂਤੋਤਿ ਸਙ੍ਘਿਨੋ. ਸ੍ਵੇਵਾਤਿ ਸੋ ਏਵ ਪਬ੍ਬਜਿਤਸਮੂਹਸਙ੍ਖਾਤੋ. ਆਚਾਰਸਿਕ੍ਖਾਪਨਵਸੇਨਾਤਿ ਅਤ੍ਤਨਾ ਪਰਿਕਪ੍ਪਿਤਅਚੇਲਵਤਾਦਿਆਚਾਰਸਿਕ੍ਖਾਪਨਵਸੇਨ. ਪਞ੍ਞਾਤਾਤਿ ਯਥਾਸਕਂ ਸਮਾਦਿਨ੍ਨਵਤਵਸੇਨ ਚੇਵ ਵਿਞ੍ਞਾਤਲਦ੍ਧਿਵਸੇਨ ਚ ਪਞ੍ਞਾਤਾ. ਲਦ੍ਧਿਕਰਾਤਿ ਤਸ੍ਸਾ ਮਿਚ੍ਛਾਦਿਟ੍ਠਿਯਾ ਉਪ੍ਪਾਦਕਾ. ਬਹੁਜਨਸ੍ਸਾਤਿ ਪੁਥੁਜਨਸ੍ਸ. ਤਸ੍ਸ ਪਨ ਆਗਮਸਮ੍ਪਦਾਪਿ ਨਾਮ ਨਤ੍ਥਿ, ਕੁਤੋ ਅਧਿਗਮੋਤਿ ਏਕਂਸਤੋ ਅਨ੍ਧਪੁਥੁਜ੍ਜਨੋ ਏਵਾਤਿ ਆਹ ‘‘ਅਸ੍ਸੁਤਵਤੋ ਅਨ੍ਧਬਾਲਪੁਥੁਜ੍ਜਨਸ੍ਸਾ’’ਤਿ. ਨ ਹਿ ਵਿਞ੍ਞੂ ਅਪ੍ਪਸਾਦਨੀਯੇ ਪਸੀਦਨ੍ਤਿ. ਮਙ੍ਗਲੇਸੁ ਕਾਤਬ੍ਬਦਾਸਕਿਚ੍ਚਕਰੋ ਦਾਸੋ ਮਙ੍ਗਲਦਾਸੋ.

ਤਨ੍ਤਾਵੁਤਾਨਨ੍ਤਿ ਤਨ੍ਤੇ ਪਸਾਰੇਤ੍ਵਾ ਵੀਤਾਨਂ. ਗਣ੍ਠਨਕਿਲੇਸੋਤਿ ਸਂਸਾਰੇ ਬਨ੍ਧਨਕਿਲੇਸੋ. ਏਵਂ ਵਾਦਿਤਾਯਾਤਿ ਏਵਂ ਪਟਿਞ੍ਞਤਾਯ, ਏਵਂ ਦਿਟ੍ਠਿਤਾਯ ਵਾ. ਨਿਯ੍ਯਾਨਿਕਾਤਿ ਨਿਯ੍ਯਾਨਗਤਿਸਪ੍ਪਾਟਿਹੀਰਕਾ ਅਨੁਪਾਰਮ੍ਭਭੂਤਤ੍ਤਾਤਿ ਅਧਿਪ੍ਪਾਯੋ. ਨੋ ਚੇ ਨਿਯ੍ਯਾਨਿਕਾਤਿ ਆਨੇਤ੍ਵਾ ਯੋਜਨਾ. ਤੇਸਂ ਸਬ੍ਬਞ੍ਞੁਪਟਿਞ੍ਞਾਯ ਅਭੂਤਤ੍ਤਾ ਤਸ੍ਸਾ ਅਭੂਤਭਾਵਕਥਨੇਨ ਤਸ੍ਸ ਬ੍ਰਾਹ੍ਮਣਸ੍ਸ ਨ ਕਾਚਿ ਅਤ੍ਥਸਿਦ੍ਧੀਤਿ ਆਹ ‘‘ਨੇਸਂ ਅਨਿਯ੍ਯਾਨਿਕਭਾਵਕਥਨੇਨ ਅਤ੍ਥਾਭਾਵਤੋ’’ਤਿ.

੩੧੮. ਨਿਹੀਨਲੋਕਾਮਿਸੇ ਲੀਨੋ ਅਜ੍ਝਾਸਯੋ ਏਤਸ੍ਸ, ਨ ਪਨ ਨਿਬ੍ਬਾਨੇਤਿ. ਲੀਨਜ੍ਝਾਸਯੋ. ਸਾਸਨਂ ਸਿਥਿਲਂ ਕਤ੍ਵਾ ਗਣ੍ਹਾਤਿ ਸਿਕ੍ਖਾਯ ਨ ਤਿਬ੍ਬਗਾਰਵਤ੍ਤਾ.

੩੨੩. ਹੇਟ੍ਠਾਤਿ ਅਨਨ੍ਤਰਾਤੀਤਸੁਤ੍ਤੇ ਮਹਾਸਾਰੋਪਮੇ. ਪਠਮਜ੍ਝਾਨਾਦਿਧਮ੍ਮਾ ਵਿਪਸ੍ਸਨਾਪਾਦਕਾਤਿ ਵਿਪਸ੍ਸਨਾਯ ਪਦਟ੍ਠਾਨਭੂਤਾ. ਇਧਾਤਿ ਇਮਸ੍ਮਿਂ ਚੂਲ਼ਸਾਰੋਪਮੇ ਆਗਤਾ. ਨਿਰੋਧਪਾਦਕਾਤਿ ਅਨਾਗਾਮਿਨੋ, ਅਰਹਨ੍ਤੋ ਵਾ ਨਿਰੋਧਸਮਾਪਤ੍ਤਿਂ ਸਮਾਪਜ੍ਜਿਤੁਂ ਸਮਤ੍ਥਾ. ਤਸ੍ਮਾਤਿ ਨਿਰੋਧਪਾਦਕਤ੍ਤਾ. ਪਠਮਜ੍ਝਾਨਾਦਿਧਮ੍ਮਾ ਞਾਣਦਸ੍ਸਨਤੋ ਉਤ੍ਤਰਿਤਰਾਤਿ ਵੇਦਿਤਬ੍ਬਾ.

ਚੂਲ਼ਸਾਰੋਪਮਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.

ਨਿਟ੍ਠਿਤਾ ਚ ਓਪਮ੍ਮਵਗ੍ਗਵਣ੍ਣਨਾ.