੬. ਪਾਸਰਾਸਿਸੁਤ੍ਤਵਣ੍ਣਨਾ

੨੭੨. ਸਾਧੁਮਯਨ੍ਤਿ ਏਤ੍ਥ ਸਾਧੁ-ਸਦ੍ਦੋ ਆਯਾਚਨਤ੍ਥੋ, ਨ ‘‘ਸਾਧਾਵੁਸੋ’’ਤਿਆਦੀਸੁ (ਸਂ. ਨਿ. ੧.੨੪੬; ਸੁ. ਨਿ. ੧੮੨) ਵਿਯ ਅਭਿਨਨ੍ਦਨਾਦਿਅਤ੍ਥੋਤਿ ਆਹ ‘‘ਆਯਾਚਨ੍ਤਾ’’ਤਿ. ਤੇਨਾਹ ਪਾਲ਼ਿਯਂ ‘‘ਲਭੇਯ੍ਯਾਮਾ’’ਤਿਆਦਿ ਵੁਤ੍ਤਂ. ਨ ਸਕ੍ਕੋਨ੍ਤਿ, ਕਸ੍ਮਾ? ਬੁਦ੍ਧਾ ਹਿ ਗਰੂ ਹੋਨ੍ਤਿ, ਪਰਮਗਰੂ ਉਤ੍ਤਮਂ ਗਾਰਵਟ੍ਠਾਨਂ, ਨ ਯਥਾ ਤਥਾ ਉਪਸਙ੍ਕਮਨੀਯਾ. ਤੇਨਾਹ ‘‘ਏਕਚਾਰਿਕੋ ਸੀਹੋ’’ਤਿਆਦਿ.

‘‘ਪਾਕਟਕਿਰਿਯਾਯਾ’’ਤਿ ਸਙ੍ਖੇਪੇਨ ਵੁਤ੍ਤਂ ਵਿਵਰਿਤੁਂ ‘‘ਯਂ ਹੀ’’ਤਿਆਦਿ ਵੁਤ੍ਤਂ. ਭਗਵਾ ਸਬ੍ਬਕਾਲਂ ਕਿਮੇਵਮਕਾਸੀਤਿ? ਨ ਸਬ੍ਬਕਾਲਮੇਵਮਕਾਸਿ. ਯਦਾ ਪਨ ਅਕਾਸਿ, ਤਂ ਦਸ੍ਸੇਤੁਂ ‘‘ਭਗਵਾ ਪਠਮਬੋਧਿਯ’’ਨ੍ਤਿਆਦਿ ਵੁਤ੍ਤਂ. ਮਨੁਸ੍ਸਤ੍ਤਭਾਵੇਤਿ ਇਮਿਨਾ ਪੁਰਿਸਤ੍ਤਭਾਵਂ ਉਲ੍ਲਿਙ੍ਗੇਤਿ. ਧਨਪਰਿਚ੍ਚਾਗੋ ਕਤੋ ਨਾਮ ਨਤ੍ਥਿ ਭਗਵਤੋ ਧਰਮਾਨਕਾਲੇਤਿ ਅਧਿਪ੍ਪਾਯੋ.

ਮਾਲਾਕਚਵਰਨ੍ਤਿ ਮਿਲਾਤਮਾਲਾਕਚਵਰਂ. ਰਜੋਜਲ੍ਲਂ ਨ ਉਪਲਿਮ੍ਪਤਿ ਅਚ੍ਛਤਰਛਵਿਭਾਵਤੋ. ਵੁਤ੍ਤਞ੍ਹੇਤਂ ‘‘ਸੁਖੁਮਤ੍ਤਾ ਛਵਿਯਾ ਕਾਯੇ ਰਜੋਜਲ੍ਲਂ ਨ ਲਿਮ੍ਪਤੀ’’ਤਿ. ਯਦਿ ਏਵਂ ਕਸ੍ਮਾ ਭਗਵਾ ਨਹਾਯਤੀਤਿ ਆਹ ‘‘ਉਤੁਗ੍ਗਹਣਤ੍ਥ’’ਨ੍ਤਿ.

ਵਿਹਾਰੋਤਿ ਜੇਤਵਨਵਿਹਾਰੋ. ਵੀਸਤਿਉਸਭਂ ਗਾਵੁਤਸ੍ਸ ਚਤੁਤ੍ਥੋ ਭਾਗੋਤਿ ਵਦਨ੍ਤਿ. ਕਦਾਚੀਤਿ ਕਸ੍ਮਿਞ੍ਚਿ ਬੁਦ੍ਧੁਪ੍ਪਾਦੇ. ਅਚਲਮੇਵਾਤਿ ਅਪਰਿਵਤ੍ਤਮੇਵ ਅਨਞ੍ਞਭਾਵਤੋ, ਮਞ੍ਚਾਨਂ ਪਨ ਅਪ੍ਪਮਹਨ੍ਤਤਾਹਿ ਪਾਦਾਨਂ ਪਤਿਟ੍ਠਿਤਟ੍ਠਾਨਸ੍ਸ ਹਾਨਿਵਡ੍ਢਿਯੋ ਹੋਨ੍ਤਿਯੇਵ.

ਯਨ੍ਤਨਾਲ਼ਿਕਾਹਿ ਪਰਿਪੁਣ੍ਣਸੁਵਣ੍ਣਰਸਧਾਰਾਹਿ. ਨ੍ਹਾਨਵਤ੍ਤਨ੍ਤਿ ‘‘ਪਬ੍ਬਜਿਤੇਨ ਨਾਮ ਏਵਂ ਨ੍ਹਾਯਿਤਬ੍ਬ’’ਨ੍ਤਿ ਨਹਾਨਚਾਰਿਤ੍ਤਂ ਦਸ੍ਸੇਤ੍ਵਾ. ਯਸ੍ਮਾ ਭਗਵਤੋ ਸਰੀਰਂ ਸੁਧਨ੍ਤਚਾਮੀਕਰਸਮਾਨਵਣ੍ਣਂ ਸੁਪਰਿਸੋਧਿਤਪਵਾਲ਼ਰੁਚਿਰਕਰਚਰਣਾਵਰਂ ਸੁਵਿਸੁਦ੍ਧਨੀਲਰਤਨਾਵਲ਼ਿਸਦਿਸਕੇਸਤਨੁਰੁਹਂ, ਤਸ੍ਮਾ ਤਹਂ ਤਹਂ ਵਿਨਿਸ੍ਸਤਜਾਤਿਹਿਙ੍ਗੁਲਕਰਸੂਪਸੋਭਿਤਂ ਉਪਰਿ ਮਹਗ੍ਘਰਤਨਾਵਲ਼ਿਸਞ੍ਛਾਦਿਤਂ ਜਙ੍ਗਮਮਿਵ ਕਨਕਗਿਰਿਸਿਖਰਂ ਵਿਰੋਚਿਤ੍ਥ. ਤਸ੍ਮਿਞ੍ਚ ਸਮਯੇ ਦਸਬਲਸ੍ਸ ਸਰੀਰਤੋ ਨਿਕ੍ਖਮਿਤ੍ਵਾ ਛਬ੍ਬਣ੍ਣਰਸ੍ਮਿਯੋ ਸਮਨ੍ਤਤੋ ਅਸੀਤਿਹਤ੍ਥਪ੍ਪਮਾਣੇ ਪਦੇਸੇ ਆਧਾਵਨ੍ਤੀ ਵਿਧਾਵਨ੍ਤੀ ਰਤਨਾਵਲ਼ਿਰਤਨਦਾਮ-ਰਤਨਚੁਣ੍ਣ-ਵਿਪ੍ਪਕਿਣ੍ਣਂ ਵਿਯ, ਪਸਾਰਿਤਰਤਨਚਿਤ੍ਤਕਞ੍ਚਨਪਟ੍ਟਮਿਵ, ਆਸਿਞ੍ਚਮਾਨਲਾਖਾਰਸਧਾਰਾ-ਚਿਤਮਿਵ, ਉਕ੍ਕਾਸਤਨਿਪਾਤਸਮਾਕੁਲਮਿਵ, ਨਿਰਨ੍ਤਰਂ ਵਿਪ੍ਪਕਿਣ੍ਣ-ਕਣਿਕਾਰ-ਕਿਙ੍ਕਿਣਿਕ-ਪੁਪ੍ਫਮਿਵ, ਵਾਯੁਵੇਗਸਮੁਦ੍ਧਤ-ਚਿਨਪਿਟ੍ਠਚੁਣ੍ਣ-ਰਞ੍ਜਿਤਮਿਵ, ਇਨ੍ਦਧਨੁ-ਵਿਜ੍ਜੁਲਤਾ-ਵਿਤਾਨਸਨ੍ਥਤਮਿਵ, ਗਗਨਤਲਂ ਤਂ ਠਾਨਂ ਪਵਨਞ੍ਚ ਸਮ੍ਮਾ ਫਰਨ੍ਤਿ. ਤੇਨ ਵੁਤ੍ਤਂ ‘‘ਵਣ੍ਣਭੂਮਿ ਨਾਮੇਸਾ’’ਤਿਆਦਿ. ਅਤ੍ਥਨ੍ਤਿ ਉਪਮੇਯ੍ਯਤ੍ਥਂ. ਉਪਮਾਯੋਤਿ ‘‘ਈਦਿਸੋ ਚ ਹੋਤੀ’’ਤਿ ਯਥਾਰਹਂ ਤਦਨੁਚ੍ਛਵਿਕਾ ਉਪਮਾ. ਕਾਰਣਾਨੀਤਿ ਉਪਮੁਪਮੇਯ੍ਯਸਮ੍ਬਨ੍ਧਵਿਭਾਵਨਾਨਿ ਕਾਰਣਾਨਿ. ਪੂਰੇਤ੍ਵਾਤਿ ਵਣ੍ਣਨਂ ਪਰਿਪੁਣ੍ਣਂ ਕਤ੍ਵਾ. ਥਾਮੋ ਵੇਦਿਤਬ੍ਬੋ ‘‘ਅਤਿਤ੍ਥੇ ਪਕ੍ਖਨ੍ਦੋ’’ਤਿ ਅਵਤ੍ਤਬ੍ਬਤ੍ਤਾ.

੨੭੩. ਕਣ੍ਣਿਕਾਤਿ ਸਰੀਰਗਤਬਿਨ੍ਦੁਕਤਾਨਿ ਮਣ੍ਡਲਾਨਿ. ਪਰਿਕ੍ਖਾਰਭਣ੍ਡਨ੍ਤਿ ਉਤ੍ਤਰਾਸਙ੍ਗਂ ਸਙ੍ਘਾਟਿਞ੍ਚ ਸਨ੍ਧਾਯ ਵਦਤਿ. ਕਿਂ ਪਨਾਯਂ ਨਯੋ ਬੁਦ੍ਧਾਨਮ੍ਪਿ ਸਰੀਰੇ ਹੋਤੀਤਿ? ਨ ਹੋਤਿ, ਵਤ੍ਤਦਸ੍ਸਨਤ੍ਥਂ ਪਨੇਤਂ ਕਤਨ੍ਤਿ ਦਸ੍ਸੇਤੁਂ ‘‘ਬੁਦ੍ਧਾਨਂ ਪਨਾ’’ਤਿਆਦਿ ਵੁਤ੍ਤਂ. ਗਮਨਵਸੇਨ ਕਾਯਸ੍ਸਾਭਿਨੀਹਰਣਂ ਗਮਨਾਭਿਹਾਰੋ. ਯਥਾਧਿਪ੍ਪਾਯਾਵਤ੍ਤਨਂ ਅਧਿਪ੍ਪਾਯਕੋਪਨਂ.

ਅਞ੍ਞਤਰਾਯ ਪਾਰਮਿਯਾਤਿ ਨੇਕ੍ਖਮ੍ਮਪਾਰਮਿਯਾ. ਵੀਰਿਯਪਾਰਮਿਯਾਤਿ ਅਪਰੇ. ਮਹਾਭਿਨਿਕ੍ਖਮਨਸ੍ਸਾਤਿ ਮਹਨ੍ਤਸ੍ਸ ਚਰਿਮਭਵੇ ਅਭਿਨਿਕ੍ਖਮਨਸ੍ਸ. ਤਞ੍ਹਿ ਮਹਨ੍ਤਂ ਭੋਗਕ੍ਖਨ੍ਧਂ ਮਹਨ੍ਤਞ੍ਚ ਞਾਤਿਪਰਿਵਟ੍ਟਂ ਮਹਨ੍ਤਞ੍ਚ ਚਕ੍ਕਵਤ੍ਤਿਸਿਰਿਂ ਪਜਹਿਤ੍ਵਾ ਸਦੇਵਕਸ੍ਸ ਲੋਕਸ੍ਸ ਸਮਾਰਕਸ੍ਸ ਚ ਅਚਿਨ੍ਤੇਯ੍ਯਾਪਰਿਮੇਯ੍ਯਭੇਦਸ੍ਸ ਮਹਤੋ ਅਤ੍ਥਾਯ ਹਿਤਾਯ ਸੁਖਾਯ ਪਵਤ੍ਤਤ੍ਤਾ ਮਹਨੀਯਤਾਯ ਚ ਮਹਨ੍ਤਂ ਅਭਿਨਿਕ੍ਖਮਨਨ੍ਤਿ ਵੁਚ੍ਚਤਿ.

ਪੁਰਿਮੋਤਿ ‘‘ਕਤਮਾਯ ਨੁ ਕਥਾਯ ਸਨ੍ਨਿਸਿਨ੍ਨਾ ਭਵਥਾ’’ਤਿ ਏਵਂ ਵੁਤ੍ਤਅਤ੍ਥੋ. ਕਾ ਚ ਪਨ ਵੋਤਿ ਏਤ੍ਥ ਚ-ਸਦ੍ਦੋ ਬ੍ਯਤਿਰੇਕੇ. ਤੇਨ ਯਥਾਪੁਚ੍ਛਿਤਾਯ ਕਥਾਯ ਵਕ੍ਖਮਾਨਂ ਵਿਪ੍ਪਕਤਭਾਵਂ ਜੋਤੇਤਿ. ਪਨ-ਸਦ੍ਦੋ ਵਚਨਾਲਙ੍ਕਾਰੇ. ਯਾਯ ਹਿ ਕਥਾਯ ਤੇ ਭਿਕ੍ਖੂ ਸਨ੍ਨਿਸਿਨ੍ਨਾ, ਸਾ ਏਵ ਅਨ੍ਤਰਾਕਥਾਭੂਤਾ ਵਿਪ੍ਪਕਤਾ ਵਿਸੇਸੇਨ ਪੁਨ ਪੁਚ੍ਛੀਯਤਿ. ਅਞ੍ਞਾਤਿ ਅਨ੍ਤਰਾ-ਸਦ੍ਦਸ੍ਸ ਅਤ੍ਥਮਾਹ. ਅਞ੍ਞਤ੍ਥੋ ਹਿ ਅਯਂ ਅਨ੍ਤਰਾ-ਸਦ੍ਦੋ ‘‘ਭੂਮਨ੍ਤਰਂ (ਧ. ਸ. ਅਟ੍ਠ. ਨਿਦਾਨਕਥਾ) ਸਮਯਨ੍ਤਰ’’ਨ੍ਤਿਆਦੀਸੁ ਵਿਯ, ਅਨ੍ਤਰਾਤਿ ਵਾ ਵੇਮਜ੍ਝੇਤਿ ਅਤ੍ਥੋ. ਦਸਕਥਾਵਤ੍ਥੁਨਿਸ੍ਸਿਤਾਤਿ ‘‘ਕਿਂ ਸੀਲਂ ਨਾਮ, ਕਥਞ੍ਚ ਪੂਰੇਤਬ੍ਬਂ, ਕਾਨਿ ਚਸ੍ਸ ਸਂਕਿਲੇਸਵੋਦਾਨਾਨੀ’’ਤਿਆਦਿਨਾ ਅਪ੍ਪਿਚ੍ਛਾਦਿਨਿਸ੍ਸਿਤਾ ਸੀਲਾਦਿਨਿਸ੍ਸਿਤਾ ਚ ਕਥਾ. ਅਰਿਯੋਤਿ ਨਿਦ੍ਦੋਸੋ. ਅਥ ਵਾ ਅਤ੍ਥਕਾਮੇਹਿ ਅਰਣੀਯੋਤਿ ਅਰਿਯੋ, ਅਰਿਯਾਨਂ ਅਯਨ੍ਤਿ ਵਾ ਅਰਿਯੋਤਿ. ਭਾਵਨਾਮਨਸਿਕਾਰਵਸੇਨ ਤੁਣ੍ਹੀ ਭਵਨ੍ਤਿ, ਨ ਏਕਚ੍ਚਬਾਹਿਰਕਪਬ੍ਬਜਿਤਾ ਵਿਯ ਮੂਗਬ੍ਬਤਸਮਾਦਾਨੇਨ. ਦੁਤਿਯਜ੍ਝਾਨਮ੍ਪਿ ਅਰਿਯੋ ਤੁਣ੍ਹੀਭਾਵੋ ਵਚੀਸਙ੍ਖਾਰਪਹਾਨਤੋ. ਮੂਲਕਮ੍ਮਟ੍ਠਾਨਨ੍ਤਿ ਪਾਰਿਹਾਰਿਯ ਕਮ੍ਮਟ੍ਠਾਨਮ੍ਪਿ. ਝਾਨਨ੍ਤਿ ਦੁਤਿਯਜ੍ਝਾਨਂ.

੨੭੪. ‘‘ਸਨ੍ਨਿਪਤਿਤਾਨਂ ਵੋ, ਭਿਕ੍ਖਵੇ, ਦ੍ਵਯ’’ਨ੍ਤਿ (ਮ. ਨਿ. ੧.੨੭੩; ਉਦਾ. ੧੨, ੨੮, ੨੯) ਅਟ੍ਠੁਪ੍ਪਤ੍ਤਿਵਸੇਨ ਦੇਸਨਾ ਪਵਤ੍ਤਾਤਿ ਤਸ੍ਸਾ ਉਪਰਿਦੇਸਨਾਯ ਸਮ੍ਬਨ੍ਧਂ ਦਸ੍ਸੇਤੁਂ ‘‘ਦ੍ਵੇਮਾ, ਭਿਕ੍ਖਵੇ, ਪਰਿਯੇਸਨਾਤਿ ਕੋ ਅਨੁਸਨ੍ਧੀ’’ਤਿ ਅਨੁਸਨ੍ਧਿਂ ਪੁਚ੍ਛਤਿ. ਅਯਂ ਤੁਮ੍ਹਾਕਂ ਪਰਿਯੇਸਨਾਤਿ ਯਾ ਮਹਾਭਿਨਿਕ੍ਖਮਨਪਟਿਬਦ੍ਧਾ ਧਮ੍ਮੀ ਕਥਾ, ਸਾ ਤੁਮ੍ਹਾਕਂ ਧਮ੍ਮਪਰਿਯੇਸਨਾ ਧਮ੍ਮਵਿਚਾਰਣਾ ਅਰਿਯਪਰਿਯੇਸਨਾ ਨਾਮ. ਅਪਾਯਮਗ੍ਗਨ੍ਤਿ ਅਨਤ੍ਥਾਵਹਂ ਮਗ੍ਗਂ. ਉਦ੍ਦੇਸਾਨੁਕ੍ਕਮਂ ਭਿਨ੍ਦਿਤ੍ਵਾਤਿ ਉਦ੍ਦੇਸਾਨੁਪੁਬ੍ਬਿਂ ਲਙ੍ਘਿਤ੍ਵਾ. ਧਮ੍ਮ-ਸਦ੍ਦੋ ‘‘ਅਮੋਸਧਮ੍ਮਂ ਨਿਬ੍ਬਾਨ’’ਨ੍ਤਿਆਦੀਸੁ ਵਿਯ ਪਕਤਿਪਰਿਯਾਯੋ. ਜਾਯਨਸਭਾਵੋਤਿ ਜਾਯਨਪਕਤਿਕੋਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.

ਸਬ੍ਬਤ੍ਥਾਤਿ ਯਥਾ ‘‘ਪੁਤ੍ਤਭਰਿਯ’’ਨ੍ਤਿ ਦ੍ਵਨ੍ਦਸਮਾਸਵਸੇਨ ਏਕਤ੍ਤਂ, ਏਸ ਨਯੋ ਸਬ੍ਬਤ੍ਥ ‘‘ਦਾਸਿਦਾਸ’’ਨ੍ਤਿਆਦੀਸੁ ਸਬ੍ਬਪਦੇਸੁ. ਪਰਤੋ ਵਿਕਾਰਂ ਅਨਾਪਜ੍ਜਿਤ੍ਵਾ ਸਬ੍ਬਦਾ ਜਾਤਰੂਪਮੇਵ ਹੋਤੀਤਿ ਜਾਤਰੂਪਂ, ਸੁਵਣ੍ਣਂ. ਧਵਲਸਭਾਵਤਾਯ ਰਞ੍ਜੀਯਤੀਤਿ ਰਜਤਂ, ਰੂਪਿਯਂ. ਇਧ ਪਨ ਸੁਵਣ੍ਣਂ ਠਪੇਤ੍ਵਾ ਯਂ ਕਿਞ੍ਚਿ ਉਪਭੋਗਪਰਿਭੋਗਾਰਹਂ ਰਜਤਂਤੇਵ ਗਹਿਤਂ. ਉਪਧੀਯਤਿ ਏਤ੍ਥ ਦੁਕ੍ਖਨ੍ਤਿ ਉਪਧਯੋ. ਚੁਤੀਸਙ੍ਖਾਤਂ ਮਰਣਨ੍ਤਿ ਏਕਭਵਪਰਿਯਾਪਨ੍ਨਂ ਖਨ੍ਧਨਿਰੋਧਸਙ੍ਖਾਤਂ ਮਰਣਮਾਹ. ਖਣਿਕਨਿਰੋਧੋ ਪਨ ਖਣੇ ਖਣੇ. ਤੇਨਾਹ ‘‘ਸਤ੍ਤਾਨਂ ਵਿਯਾ’’ਤਿ. ਸਂਕਿਲਿਸ੍ਸਤੀਤਿ ਦੂਸਵਿਸੇਨ ਵਿਯ ਅਤ੍ਤਾਨਂ ਦੂਸਿਸ੍ਸਤਿ. ਤੇਨਾਹ ਭਗਵਾ – ‘‘ਪਞ੍ਚਿਮੇ, ਭਿਕ੍ਖਵੇ, ਜਾਤਰੂਪਸ੍ਸ ਉਪਕ੍ਕਿਲੇਸਾ ਅਯੋ ਲੋਹ’’ਨ੍ਤਿਆਦਿ (ਅ. ਨਿ. ੫.੨੩). ਮਲਂ ਗਹੇਤ੍ਵਾਤਿ ਯੇਹਿ ਸਹਯੋਗਤੋ ਮਲਿਨਂ ਹੋਤਿ, ਤੇਸਂ ਮਲਿਨਭਾਵਪਚ੍ਚਯਾਨਂ ਵਸੇਨ ਮਲਂ ਗਹੇਤ੍ਵਾ. ਜੀਰਣਤੋ ਜਰਾਧਮ੍ਮਵਾਰੇ ਜਾਤਰੂਪਂ ਗਹਿਤਨ੍ਤਿ ਯੋਜਨਾ. ਯੇ ਪਨ ਜਾਤਿਧਮ੍ਮਵਾਰੇਪਿ ਜਾਤਰੂਪਂ ਨ ਪਠਨ੍ਤਿ, ਤੇਸਂ ਇਤਰੇਸਂ ਵਿਯ ਜੀਰਣਧਮ੍ਮਵਾਰੇ ਸਰੂਪਤੋ ਅਨਾਗਤਮ੍ਪਿ ਉਪਧਿਗ੍ਗਹਣੇਨ ਗਹਿਤਮੇਵਾਤਿ ਦਟ੍ਠਬ੍ਬਂ. ਪਰਿਗ੍ਗਹੇ ਠਿਤਾਨਂ ਪਨ ਵਸੇਨ ਵੁਚ੍ਚਮਾਨੇ ਅਪਾਕਟਾਨਮ੍ਪਿ ਜਾਤਿਜਰਾਮਰਣਾਨਂ ਵਸੇਨ ਯੋਜਨਾ ਲਬ੍ਭਤੇਵ. ਜਾਤਰੂਪਸੀਸੇਨ ਚੇਤ੍ਥ ਸਬ੍ਬਸ੍ਸਪਿ ਅਨਿਨ੍ਦ੍ਰਿਯਬਦ੍ਧਸ੍ਸ ਗਹਣਂ ਦਟ੍ਠਬ੍ਬਂ, ਪੁਤ੍ਤਭਰਿਯਾਦਿਗ੍ਗਹਣੇਨ ਵਿਯ ਮਿਤ੍ਤਾਮਚ੍ਚਾਦਿਗ੍ਗਹਣਂ.

੨੭੫. ਅਰਿਯੇਹਿ ਪਰਿਯੇਸਨਾ, ਅਰਿਯਾਨਂ ਪਰਿਯੇਸਨਾਤਿ ਵਾ ਅਰਿਯਪਰਿਯੇਸਨਾਤਿ ਸਮਾਸਦ੍ਵਯਂ ਦਸ੍ਸੇਤਿ ‘‘ਅਯਂ, ਭਿਕ੍ਖਵੇ’’ਤਿਆਦਿਨਾ.

੨੭੬. ਮੂਲਤੋ ਪਟ੍ਠਾਯਾਤਿ ਯਂ ਮਹਾਭਿਨਿਕ੍ਖਮਨਸ੍ਸ ਮੂਲਭਾਵੇਸੁਆਦੀਨਵਦਸ੍ਸਨਂ, ਤਤੋ ਪਟ੍ਠਾਯ. ਯਸ੍ਮਾ ਤੇ ਭਿਕ੍ਖੂ ਤਤ੍ਥ ਮਹਾਭਿਨਿਕ੍ਖਮਨਕਥਾਯ ਸਨ੍ਨਿਸਿਨ੍ਨਾ, ਸਾ ਚ ਨੇਸਂ ਅਨ੍ਤਰਾਕਥਾ ਵਿਪ੍ਪਕਤਾ, ਤਸ੍ਮਾ ਭਗਵਾ ਤੇਸਂ ਮੂਲਤੋ ਪਟ੍ਠਾਯ ਮਹਾਭਿਨਿਕ੍ਖਮਨਕਥਂ ਕਥੇਤੁਂ ਆਰਭਿ. ਅਹਮ੍ਪਿ ਪੁਬ੍ਬੇਤਿ ਵਿਸੇਸਵਚਨਂ ਅਪਰਿਪਕ੍ਕਞਾਣੇਨ ਸਯਂ ਚਰਿਮਭਵੇ ਤੀਸੁ ਪਾਸਾਦੇਸੁ ਤਿਵਿਧਨਾਟਕਪਰਿਵਾਰਸ੍ਸ ਦਿਬ੍ਬਸਮ੍ਪਤ੍ਤਿਸਦਿਸਾਯ ਮਹਾਸਮ੍ਪਤ੍ਤਿਯਾ ਅਨੁਭਵਨਂ, ਅਭਿਨਿਕ੍ਖਮਿਤ੍ਵਾ ਪਧਾਨਪਦਹਨਵਸੇਨ ਅਤ੍ਤਕਿਲਮਥਾਨੁਯੋਗਞ੍ਚ ਸਨ੍ਧਾਯਾਹ. ਅਨਰਿਯਪਰਿਯੇਸਨਂ ਪਰਿਯੇਸਿਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਪਞ੍ਚਵਗ੍ਗਿਯਾਪੀਤਿ ਯਥਾਸਕਂ ਗਿਹਿਭੋਗਂ ਅਨੁਯੁਤ੍ਤਾ ਤਂ ਪਹਾਯ ਪਬ੍ਬਜਿਤ੍ਵਾ ਅਤ੍ਤਕਿਲਮਥਾਨੁਯੋਗੇ ਠਿਤਾ ਸਤ੍ਥੁ ਧਮ੍ਮਚਕ੍ਕਪਵਤ੍ਤਨਦੇਸਨਾਯ (ਸਂ. ਨਿ. ੫.੧੦੮੧; ਮਹਾਵ. ੧੩; ਪਟਿ. ਮ. ੨.੩੦) ਤਮ੍ਪਿ ਪਹਾਯ ਅਰਿਯਪਰਿਯੇਸਨਂ ਪਰਿਯੇਸਿਂਸੂਤਿ.

੨੭੭. ਕਾਮਂ ਦਹਰ-ਸਦ੍ਦੋ ‘‘ਦਹਰਂ ਕੁਮਾਰਂ ਮਨ੍ਦਂ ਉਤ੍ਤਾਨਸੇਯ੍ਯਕ’’ਨ੍ਤਿ (ਮ. ਨਿ. ੧.੪੯੬) ਏਤ੍ਥ ਬਾਲਦਾਰਕੇ ਆਗਤੋ, ‘‘ਭਦ੍ਰੇਨ ਯੋਬ੍ਬਨੇਨ ਸਮਨ੍ਨਾਗਤੋ’’ਤਿ ਪਨ ਵਕ੍ਖਮਾਨਤ੍ਤਾ ਯੁਵਾਵਤ੍ਥਾ ਇਧ ਦਹਰ-ਸਦ੍ਦੇਨ ਵੁਤ੍ਤਾਤਿ ਆਹ ‘‘ਤਰੁਣੋਵ ਸਮਾਨੋ’’ਤਿ. ਪਠਮਵਯੇਨ ਏਕੂਨਤਿਂਸਵਯਤ੍ਤਾ. ਜਾਤਿਯਾ ਹਿ ਯਾਵ ਤੇਤ੍ਤਿਂਸਵਯਾ ਪਠਮਵਯੋ. ਅਨਾਦਰਤ੍ਥੇ ਸਾਮਿਵਚਨਂ ਯਥਾ ‘‘ਦੇਵਦਤ੍ਤਸ੍ਸ ਰੁਦਨ੍ਤਸ੍ਸ ਪਬ੍ਬਜੀ’’ਤਿ. ਕਾਮਂ ਅਸ੍ਸੁਮੁਚ੍ਚਨਂ ਰੋਦਨਂ, ਤਂ ਅਸ੍ਸੁਮੁਖਾਨਨ੍ਤਿ ਇਮਿਨਾ ਪਕਾਸਿਤਂ, ਤਂ ਪਨ ਵਤ੍ਵਾ ‘‘ਰੁਦਨ੍ਤਾਨ’’ਨ੍ਤਿ ਵਚਨਂ ਬਲਵਸੋਕਸਮੁਟ੍ਠਾਨਂ ਆਰੋਦਨਵਤ੍ਥੁਂ ਪਕਾਸੇਤੀਤਿ ਆਹ ‘‘ਕਨ੍ਦਿਤ੍ਵਾ ਰੋਦਮਾਨਾਨ’’ਨ੍ਤਿ. ਕਿਂ ਕੁਸਲਨ੍ਤਿ ਗਵੇਸਮਾਨੋਤਿ ਕਿਨ੍ਤਿ ਸਬ੍ਬਸੋ ਅਵਜ੍ਜਰਹਿਤਂ ਏਕਨ੍ਤ ਨਿਯ੍ਯਾਨਿਕਂ ਪਰਿਯੇਸਮਾਨੋ. ਵਰਪਦਨ੍ਤਿ ਵਟ੍ਟਦੁਕ੍ਖਨਿਸ੍ਸਰਣਤ੍ਥਿਕੇਹਿ ਏਕਨ੍ਤੇਨ ਵਰਣੀਯਟ੍ਠੇਨ ਵਰਂ, ਪਜ੍ਜਿਤਬ੍ਬਟ੍ਠੇਨ ਪਦਂ. ਤੁਙ੍ਗਸਰੀਰਤਾਯ ਦੀਘੋ, ਪਿਙ੍ਗਲਚਕ੍ਖੁਤਾਯ ਪਿਙ੍ਗਲੋਤਿ ਦੀਘਪਿਙ੍ਗਲੋ. ਧਮ੍ਮੋਤਿ ਵਿਨਯੋ, ਸਮਯੋਤਿ ਅਤ੍ਥੋ. ਸੁਤ੍ਵਾਵ ਉਗ੍ਗਣ੍ਹਿਨ੍ਤਿ ਤੇਨ ਵੁਚ੍ਚਮਾਨਸ੍ਸ ਸਵਨਮਤ੍ਤੇਨੇਵ ਉਗ੍ਗਣ੍ਹਿਂ ਵਾਚੁਗ੍ਗਤਂ ਅਕਾਸਿਂ.

ਪਟਿਲਪਨਮਤ੍ਤਕੇਨਾਤਿ ਪੁਨ ਲਪਨਮਤ੍ਤਕੇਨ. ਜਾਨਾਤੀਤਿ ਞਾਣੋ, ਞਾਣੋਤਿ ਵਾਦੋ ਞਾਣਵਾਦੋ, ਤਂ ਞਾਣਵਾਦਂ. ‘‘ਵਦਾਮੀ’’ਤਿ ਆਗਤਤ੍ਤਾ ਅਟ੍ਠਕਥਾਯਂ ‘‘ਜਾਨਾਮੀ’’ਤਿ ਉਤ੍ਤਮਪੁਰਿਸਵਸੇਨ ਅਤ੍ਥੋ ਵੁਤ੍ਤੋ. ਅਞ੍ਞੇਪਿ ਬਹੂਤਿ ਅਞ੍ਞੇਪਿ ਬਹੂ ਮਮ ਤਥਾਭਾਵਂ ਜਾਨਨ੍ਤਾ ‘‘ਅਯਂ ਇਮਂ ਧਮ੍ਮਂ ਜਾਨਾਤੀ’’ਤਿ, ‘‘ਅਕਮ੍ਪਨੀਯਤਾਯ ਥਿਰੋ’’ਤਿ ਵਾ ਏਵਂ ਵਦਨ੍ਤਿ. ਲਾਭੀਤਿ ਅਞ੍ਞਾਸੀਤਿ ਧਮ੍ਮਸ੍ਸ ਉਦ੍ਦਿਸਨੇਨ ਮਹਾਪਞ੍ਞਤਾਯ ‘‘ਅਯਂ ਅਤ੍ਤਨਾ ਗਤਮਗ੍ਗਂ ਪਵੇਦੇਤਿ, ਨ ਅਨੁਸ੍ਸੁਤਿਕੋ’’ਤਿ ਅਞ੍ਞਾਸਿ. ਅਸ੍ਸਾਤਿ ਬੋਧਿਸਤ੍ਤਸ੍ਸ. ਏਤਦਹੋਸੀਤਿ ਏਤਂ ‘‘ਨ ਖੋ ਆਲ਼ਾਰੋ ਕਾਲਾਮੋ’’ਤਿਆਦਿ ਮਨਸਿ ਅਹੋਸਿ, ਚਿਨ੍ਤੇਸੀਤਿ ਅਤ੍ਥੋ.

ਹੇਟ੍ਠਿਮਸਮਾਪਤ੍ਤੀਹਿ ਵਿਨਾ ਉਪਰਿਮਸਮਾਪਤ੍ਤੀਨਂ ਸਮ੍ਪਾਦਨਸ੍ਸ ਅਸਮ੍ਭਵਤੋ ‘‘ਸਤ੍ਤ ਸਮਾਪਤ੍ਤਿਯੋ ਮਂ ਜਾਨਾਪੇਸੀ’’ਤਿ ਆਹ. ਪਯੋਗਂ ਕਰੇਯ੍ਯਨ੍ਤਿ ਭਾਵਨਂ ਅਨੁਯੁਞ੍ਜੇਯ੍ਯਨ੍ਤਿ ਅਤ੍ਥੋ. ਏਵਮਾਹਾਤਿ ਏਵਂ ‘‘ਅਹਂ, ਆਵੁਸੋ’’ਤਿਆਦਿਮਾਹ, ਸਤ੍ਤਨ੍ਨਂ ਸਮਾਪਤ੍ਤੀਨਂ ਅਧਿਗਮਂ ਪਚ੍ਚਞ੍ਞਾਸੀਤਿ ਅਤ੍ਥੋ.

ਅਨੁਸੂਯਕੋਤਿ ਅਨਿਸ੍ਸੁਕੀ. ਤੇਨ ਮਹਾਪੁਰਿਸੇ ਪਸਾਦਂ ਪਵੇਦੇਸਿ. ਬੋਧਿਸਤ੍ਤਸ੍ਸ ਤਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਠਿਤਸ੍ਸ ਪੁਰਿਮਜਾਤਿਪਰਿਚਯੇਨ ਞਾਣਸ੍ਸ ਚ ਮਹਨ੍ਤਤਾਯ ਤਾਸਂ ਗਤਿ ਚ ਅਭਿਸਮ੍ਪਰਾਯੋ ਚ ਉਪਟ੍ਠਾਸਿ. ਤੇਨ ‘‘ਵਟ੍ਟਪਰਿਯਾਪਨ੍ਨਾ ਏਵੇਤਾ’’ਤਿ ਨਿਚ੍ਛਯੋ ਉਦਪਾਦਿ. ਤੇਨਾਹ ‘‘ਨਾਯਂ ਧਮ੍ਮੋ ਨਿਬ੍ਬਿਦਾਯਾ’’ਤਿਆਦਿ. ਏਕਚ੍ਚਾਨਂ ਵਿਰਾਗਭਾਵਨਾਸਮਤਿਕ੍ਕਮਾਵਹੋਪਿ ਨੇਵ ਤੇਸਮ੍ਪਿ ਅਚ੍ਚਨ੍ਤਾਯ ਸਮਤਿਕ੍ਕਮਾਵਹੋ, ਸਯਞ੍ਚ ਵਟ੍ਟਪਰਿਯਾਪਨ੍ਨੋਯੇਵ, ਤਸ੍ਮਾ ਨੇਵ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯ, ਯਦਗ੍ਗੇਨ ਨ ਨਿਬ੍ਬਿਦਾਯ, ਤਦਗ੍ਗੇਨ ਨ ਵਿਰਜ੍ਜਨਤ੍ਥਾਯ, ਰਾਗਾਦੀਨਂ ਪਾਪਧਮ੍ਮਾਨਂ ਨ ਨਿਰੁਜ੍ਝਨਤ੍ਥਾਯ, ਨ ਉਪਸਮਤ੍ਥਾਯ, ਤਸ੍ਮਾ ਤਂ ਅਭਿਞ੍ਞੇਯ੍ਯਧਮ੍ਮਂ ਨ ਅਭਿਜਾਨਨਤ੍ਥਾਯ…ਪੇ… ਸਂਵਤ੍ਤਤੀਤਿ ਯੋਜਨਾ.

ਯਾਵਦੇਵ ਆਕਿਞ੍ਚਞ੍ਞਾਯਤਨੁਪਪਤ੍ਤਿਯਾਤਿ ਸਤ੍ਤਸੁ ਸਮਾਪਤ੍ਤੀਸੁ ਉਕ੍ਕਟ੍ਠਂ ਗਹੇਤ੍ਵਾ ਵਦਤਿ. ਉਟ੍ਠਾਯ ਸਮੁਟ੍ਠਾਯ ਅਚੁਤਿਧਮ੍ਮਂ ਪਰਿਯੇਸਿਤੁਂ ਯੁਤ੍ਤਤ੍ਤਾ ਤਞ੍ਚ ਅਨਤਿਕ੍ਕਨ੍ਤਜਾਤਿਧਮ੍ਮਮੇਵਾਤਿ ਮਹਾਸਤ੍ਤੋ ਪਜਹਤੀਤਿ ਆਹ ‘‘ਯਞ੍ਚ ਠਾਨਂ ਪਾਪੇਤੀ’’ਤਿਆਦਿ. ਤਤੋ ਪਟ੍ਠਾਯਾਤਿ ਯਦਾ ਸਮਾਪਤ੍ਤਿਧਮ੍ਮਸ੍ਸ ਗਤਿਞ੍ਚ ਅਭਿਸਮ੍ਪਰਾਯਞ੍ਚ ਅਬ੍ਭਞ੍ਞਾਸਿ, ਤਤੋ ਪਟ੍ਠਾਯ. ਮਕ੍ਖਿਕਾਵਸੇਨਾਤਿ ਭੋਜਨਸ੍ਸ ਮਕ੍ਖਿਕਾਮਿਸ੍ਸਤਾਵਸੇਨ. ਮਨਂ ਨ ਉਪ੍ਪਾਦੇਤਿ ਭੁਞ੍ਜਿਤੁਨ੍ਤਿ ਅਧਿਪ੍ਪਾਯੋ. ਮਹਨ੍ਤੇਨ ਉਸ੍ਸਾਹੇਨਾਤਿ ਇਦਂ ਕਤਿਪਾਹਂ ਤਤ੍ਥ ਭਾਵਨਾਨੁਯੋਗਮਤ੍ਤਂ ਸਨ੍ਧਾਯ ਵੁਤ੍ਤਂ, ਨ ਅਞ੍ਞੇਸਂ ਵਿਯ ਕਸਿਣਪਰਿਕਮ੍ਮਾਦਿਕਰਣਂ. ਨ ਹਿ ਅਨ੍ਤਿਮਭਵਿਕਬੋਧਿਸਤ੍ਤਾਨਂ ਸਮਾਪਤ੍ਤਿਨਿਬ੍ਬਤ੍ਤਨੇ ਭਾਰਿਯਂ ਨਾਮ. ਅਨਲਙ੍ਕਰਿਤ੍ਵਾਤਿ ਅਨੁ ਅਨੁ ਅਲਂਕਤ੍ਵਾ ਪੁਨਪ੍ਪੁਨਂ ‘‘ਇਮਿਨਾ ਨ ਕਿਞ੍ਚਿ ਪਯੋਜਨ’’ਨ੍ਤਿ ਕਤ੍ਵਾ.

੨੭੮. ਵਾਚਾਯ ਉਗ੍ਗਹਿਤਮਤ੍ਤੋਵਾਤਿ ਏਤ੍ਥ ਪੁਬ੍ਬੇ ਵੁਤ੍ਤਨਯਾਨੁਸਾਰੇਨ ਅਤ੍ਥੋ ਵੇਦਿਤਬ੍ਬੋ.

੨੭੯. ਮਹਾਵੇਲਾ ਵਿਯ ਮਹਾਵੇਲਾ, ਵਿਪੁਲਵਾਲਿਕਪੁਞ੍ਜਤਾਯ ਮਹਨ੍ਤੋ ਵੇਲਾਤਟੋ ਵਿਯਾਤਿ ਅਤ੍ਥੋ. ਤੇਨਾਹ ‘‘ਮਹਾਵਾਲਿਕਰਾਸੀਤਿ ਅਤ੍ਥੋ’’ਤਿ. ਉਰੁ ਮਰੁ ਸਿਕਤਾ ਵਾਲੁਕਾ ਵਣ੍ਣੁ ਵਾਲਿਕਾਤਿ ਇਮੇ ਸਦ੍ਦਾ ਸਮਾਨਤ੍ਥਾ, ਬ੍ਯਞ੍ਜਨਮੇਵ ਨਾਨਂ.

ਸੇਨਾ ਨਿਗਚ੍ਛਿ ਨਿਵਿਸਿ ਏਤ੍ਥਾਤਿ ਸੇਨਾਨਿਗਮੋ, ਸੇਨਾਯ ਨਿਵਿਟ੍ਠਟ੍ਠਾਨਂ. ਸੇਨਾਨਿਗਾਮੋਤਿ ਪਨ ਅਯਂ ਸਮਞ੍ਞਾ ਅਪਰਕਾਲਿਕਾ. ਗੋਚਰਗਾਮਨਿਦਸ੍ਸਨਞ੍ਚੇਤਂ. ਉਪਰਿਸੁਤ੍ਤਸ੍ਮਿਨ੍ਤਿ ਮਹਾਸਚ੍ਚਕਸੁਤ੍ਤੇ. ਇਧ ਪਨ ਬੋਧਿਪਲ੍ਲਙ੍ਕੋ ਅਧਿਪ੍ਪੇਤੋ ਅਰਿਯਪਰਿਯੇਸਨਾਯ ਵੁਚ੍ਚਮਾਨਤ੍ਤਾ.

੨੮੦. ‘‘ਞਾਣਦਸ੍ਸਨ’’ਨ੍ਤਿ ਚ ਏਕਜ੍ਝਂ ਗਹਿਤਪਦਦ੍ਵਯਵਿਸਯਵਿਸੇਸਸ੍ਸ ਅਨਾਮਟ੍ਠਤ੍ਤਾ ‘‘ਮੇ’’ਤਿ ਚ ਗਹਿਤਤ੍ਤਾ ਅਨਵਸੇਸਞੇਯ੍ਯਾਵਬੋਧਨਸਮਤ੍ਥਮੇਵ ਞਾਣਵਿਸੇਸਂ ਬੋਧੇਤਿ, ਨ ਞਾਣਮਤ੍ਤਂ, ਨ ਦਸ੍ਸਨਮਤ੍ਤਨ੍ਤਿ ਆਹ ‘‘ਸਬ੍ਬਧਮ੍ਮਦਸ੍ਸਨਸਮਤ੍ਥਞ੍ਚ ਮੇ ਸਬ੍ਬਞ੍ਞੁਤਞ੍ਞਾਣਂ ਉਦਪਾਦੀ’’ਤਿ. ਅਕੁਪ੍ਪਤਾਯਾਤਿ ਵਿਮੋਕ੍ਖਨ੍ਤਤਾਯ ਸਬ੍ਬਸੋ ਪਟਿਪਕ੍ਖਧਮ੍ਮੇਹਿ ਅਸਙ੍ਖੋਭਨੀਯਤਾਯ. ਤੇਨਾਹ ‘‘ਰਾਗਾਦੀਹਿ ਨ ਕੁਪ੍ਪਤੀ’’ਤਿ. ਆਰਮ੍ਮਣਸਨ੍ਤਤਾਯਪਿ ਤਦਾਰਮ੍ਮਣਾਨਂ ਅਤ੍ਥਿ ਵਿਸੇਸੋ ਯਥਾ ਤਂ ‘‘ਆਨੇਞ੍ਜਵਿਹਾਰੇ’’ਤਿ ਆਹ ‘‘ਅਕੁਪ੍ਪਾਰਮ੍ਮਣਤਾਯ ਚਾ’’ਤਿ. ਪਚ੍ਚਵੇਕ੍ਖਣਞਾਣਮ੍ਪੀਤਿ ਨ ਕੇਵਲਂ ਸਬ੍ਬਞ੍ਞੁਤਞ੍ਞਾਣਮੇਵ, ਅਥ ਖੋ ਯਥਾਧਿਗਤੇ ਪਟਿਵੇਧਸਦ੍ਧਮ੍ਮੇ ਏਕੂਨਵੀਸਤਿਵਿਧਪਚ੍ਚਵੇਕ੍ਖਣਞਾਣਮ੍ਪਿ.

੨੮੧. ਪਟਿਵਿਦ੍ਧੋਤਿ (ਦੀ. ਨਿ. ਟੀ. ੨.੬੪; ਸਂ. ਨਿ. ਟੀ. ੧.੧.੧੭੨; ਸਾਰਤ੍ਥ. ਟੀ. ਮਹਾਵਗ੍ਗ ੩.੭) ਸਯਮ੍ਭੁਞਾਣੇਨ ‘‘ਇਦਂ ਦੁਕ੍ਖ’’ਨ੍ਤਿਆਦਿਨਾ ਪਟਿਮੁਖਂ ਨਿਬ੍ਬਿਜ੍ਝਨਵਸੇਨ ਪਤ੍ਤੋ, ਯਥਾਭੂਤਂ ਅਵਬੁਦ੍ਧੋਤਿ ਅਤ੍ਥੋ. ਗਮ੍ਭੀਰੋਤਿ ਮਹਾਸਮੁਦ੍ਦੋ ਵਿਯ ਮਕਸਤੁਣ੍ਡਸੂਚਿਯਾ ਅਞ੍ਞਤ੍ਰ ਸਮੁਪਚਿਤਪਰਿਪਕ੍ਕਞਾਣਸਮ੍ਭਾਰੇਹਿ ਅਞ੍ਞੇਸਂ ਞਾਣੇਨ ਅਲਬ੍ਭਨੇਯ੍ਯਪਤਿਟ੍ਠੋ. ਤੇਨਾਹ ‘‘ਉਤ੍ਤਾਨਭਾਵਪਟਿਕ੍ਖੇਪਵਚਨਮੇਤ’’ਨ੍ਤਿ. ਯੋ ਅਲਬ੍ਭਨੇਯ੍ਯਪਤਿਟ੍ਠੋ, ਸੋ ਓਗਾਹਿਤੁਮਸਕ੍ਕੁਣੇਯ੍ਯਤਾਯ ਸਰੂਪਤੋ ਚ ਪਸ੍ਸਿਤੁਂ ਨ ਸਕ੍ਕਾਤਿ ਆਹ ‘‘ਗਮ੍ਭੀਰਤ੍ਤਾਵ ਦੁਦ੍ਦਸੋ’’ਤਿ. ਦੁਕ੍ਖੇਨ ਦਟ੍ਠਬ੍ਬੋਤਿ ਕਿਚ੍ਛੇਨ ਕੇਨਚਿਦੇਵ ਦਟ੍ਠਬ੍ਬੋ. ਯਂ ਪਨ ਦਟ੍ਠੁਮੇਵ ਨ ਸਕ੍ਕਾ, ਤਸ੍ਸ ਓਗਾਹੇਤ੍ਵਾ ਅਨੁ ਅਨੁ ਬੁਜ੍ਝਨੇ ਕਥਾ ਏਵ ਨਤ੍ਥੀਤਿ ਆਹ ‘‘ਦੁਦ੍ਦਸਤ੍ਤਾਵ ਦੁਰਨੁਬੋਧੋ’’ਤਿ. ਦੁਕ੍ਖੇਨ ਅਵਬੁਜ੍ਝਿਤਬ੍ਬੋ ਅਵਬੋਧਸ੍ਸ ਦੁਕ੍ਕਰਭਾਵਤੋ. ਇਮਸ੍ਮਿਂ ਠਾਨੇ – ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਕਤਮਂ ਨੁ ਖੋ ਦੁਕ੍ਕਰਤਰਂ ਵਾ ਦੁਰਭਿਸਮ੍ਭਵਤਰਂ ਵਾ’’ਤਿ ਸੁਤ੍ਤਪਦਂ (ਸਂ. ਨਿ. ੫.੧੧੧੫) ਵਤ੍ਤਬ੍ਬਂ. ਸਨ੍ਤਾਰਮ੍ਮਣਤਾਯ ਵਾ ਸਨ੍ਤੋ. ਨਿਬ੍ਬੁਤਸਬ੍ਬਪਰਿਲ਼ਾਹਤਾਯ ਨਿਬ੍ਬੁਤੋ. ਪਧਾਨਭਾਵਂ ਨੀਤੋਤਿ ਵਾ ਪਣੀਤੋ. ਅਤਿਤ੍ਤਿਕਰਟ੍ਠੇਨ ਅਤਪ੍ਪਕੋ ਸਾਦੁਰਸਭੋਜਨਂ ਵਿਯ. ਏਤ੍ਥ ਚ ਨਿਰੋਧਸਚ੍ਚਂ ਸਨ੍ਤਂ ਆਰਮ੍ਮਣਨ੍ਤਿ ਸਨ੍ਤਾਰਮ੍ਮਣਂ, ਮਗ੍ਗਸਚ੍ਚਂ ਸਨ੍ਤਂ ਸਨ੍ਤਾਰਮ੍ਮਣਞ੍ਚਾਤਿ ਸਨ੍ਤਾਰਮ੍ਮਣਂ. ਅਨੁਪਸਨ੍ਤਸਭਾਵਾਨਂ ਕਿਲੇਸਾਨਂ ਸਙ੍ਖਾਰਾਨਞ੍ਚ ਅਭਾਵਤੋ ਨਿਬ੍ਬੁਤਸਬ੍ਬਪਰਿਲ਼ਾਹਤਾਯ ਸਨ੍ਤਪਣੀਤਭਾਵੇਨੇਵ ਚ ਅਸੇਚਨਕਤਾਯ ਅਤਪ੍ਪਕਤਾ ਦਟ੍ਠਬ੍ਬਾ. ਤੇਨਾਹ ‘‘ਇਦਂ ਦ੍ਵਯਂ ਲੋਕੁਤ੍ਤਰਮੇਵ ਸਨ੍ਧਾਯ ਵੁਤ੍ਤ’’ਨ੍ਤਿ. ਉਤ੍ਤਮਞਾਣਵਿਸਯਤ੍ਤਾ ਨ ਤਕ੍ਕੇਨ ਅਵਚਰਿਤਬ੍ਬੋ, ਤਤੋ ਏਵ ਨਿਪੁਣਞਾਣਗੋਚਰਤਾਯ ਚ ਸਣ੍ਹੋ. ਸੁਖੁਮਸਭਾਵਤ੍ਤਾ ਚ ਨਿਪੁਣੋ, ਬਾਲਾਨਂ ਅਵਿਸਯਤ੍ਤਾ ਪਣ੍ਡਿਤੇਹਿ ਏਵ ਵੇਦਿਤਬ੍ਬੋਤਿ ਪਣ੍ਡਿਤਵੇਦਨੀਯੋ. ਆਲੀਯਨ੍ਤਿ ਅਭਿਰਮਿਤਬ੍ਬਟ੍ਠੇਨ ਸੇਵੀਯਨ੍ਤੀਤਿ ਆਲਯਾ, ਪਞ੍ਚ ਕਾਮਗੁਣਾ. ਆਲਯਨ੍ਤਿ ਅਲ੍ਲੀਯਨ੍ਤੀ ਅਭਿਰਮਣਵਸੇਨ ਸੇਵਨ੍ਤੀਤਿ ਆਲਯਾ, ਤਣ੍ਹਾਵਿਚਰਿਤਾਨਿ. ਰਮਨ੍ਤੀਤਿ ਰਤਿਂ ਵਿਨ੍ਦਨ੍ਤਿ ਕੀਲ਼ਨ੍ਤਿ ਲਲ਼ਨ੍ਤਿ. ਆਲਯਰਤਾਤਿ ਆਲਯਨਿਰਤਾ.

ਠਾਨਂ ਸਨ੍ਧਾਯਾਤਿ ਠਾਨ-ਸਦ੍ਦਂ ਸਨ੍ਧਾਯ. ਅਤ੍ਥਤੋ ਪਨ ਠਾਨਨ੍ਤਿ ਚ ਪਟਿਚ੍ਚਸਮੁਪ੍ਪਾਦੋ ਏਵ ਅਧਿਪ੍ਪੇਤੋ. ਤਿਟ੍ਠਤਿ ਫਲਂ ਤਦਾਯਤ੍ਤਵੁਤ੍ਤਿਤਾਯਾਤਿ ਠਾਨਂ, ਸਙ੍ਖਾਰਾਦੀਨਂ ਪਚ੍ਚਯਭੂਤਾ ਅਵਿਜ੍ਜਾਦਯੋ. ਇਮੇਸਂ ਸਙ੍ਖਾਰਾਦੀਨਂ ਪਚ੍ਚਯਾਤਿ ਇਦਪ੍ਪਚ੍ਚਯਾ, ਅਵਿਜ੍ਜਾਦਯੋਵ. ਇਦਪ੍ਪਚ੍ਚਯਾ ਏਵ ਇਦਪ੍ਪਚ੍ਚਯਤਾ ਯਥਾ ‘‘ਦੇਵੋ ਏਵ ਦੇਵਤਾ’’ਤਿ, ਇਦਪ੍ਪਚ੍ਚਯਾਨਂ ਵਾ ਅਵਿਜ੍ਜਾਦੀਨਂ ਅਤ੍ਤਨੋ ਫਲਂ ਪਤਿ ਪਚ੍ਚਯਭਾਵੋ ਉਪ੍ਪਾਦਨਸਮਤ੍ਥਤਾ ਇਦਪ੍ਪਚ੍ਚਯਤਾ. ਤੇਨ ਸਮਤ੍ਥਪਚ੍ਚਯਲਕ੍ਖਣੋ ਪਟਿਚ੍ਚਸਮੁਪ੍ਪਾਦੋ ਦਸ੍ਸਿਤੋ ਹੋਤਿ. ਪਟਿਚ੍ਚ ਸਮੁਪ੍ਪਜ੍ਜਤਿ ਫਲਂ ਏਤਸ੍ਮਾਤਿ ਪਟਿਚ੍ਚਸਮੁਪ੍ਪਾਦੋ. ਪਦਦ੍ਵਯੇਨਪਿ ਧਮ੍ਮਾਨਂ ਪਚ੍ਚਯਟ੍ਠੋ ਏਵ ਵਿਭਾਵਿਤੋ. ਤੇਨਾਹ ‘‘ਸਙ੍ਖਾਰਾਦਿਪਚ੍ਚਯਾਨਂ ਏਤਂ ਅਧਿਵਚਨ’’ਨ੍ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗਸਂਵਣ੍ਣਨਾਯਂ (ਵਿਸੁਦ੍ਧਿ. ਮਹਾਟੀ. ੨.੫੭੨-੫੭੩) ਵੁਤ੍ਤਨਯੇਨ ਵੇਦਿਤਬ੍ਬੋ.

ਸਬ੍ਬਸਙ੍ਖਾਰਸਮਥੋਤਿਆਦਿ ਸਬ੍ਬਨ੍ਤਿ ਸਬ੍ਬਸਙ੍ਖਾਰਸਮਥਾਦਿਸਦ੍ਦਾਭਿਧੇਯ੍ਯਂ ਸਬ੍ਬਂ ਅਤ੍ਥਤੋ ਨਿਬ੍ਬਾਨਮੇਵ. ਇਦਾਨਿ ਤਸ੍ਸ ਨਿਬ੍ਬਾਨਭਾਵਂ ਦਸ੍ਸੇਤੁਂ ‘‘ਯਸ੍ਮਾ ਹੀ’’ਤਿਆਦਿ ਵੁਤ੍ਤਂ. ਨ੍ਤਿ ਨਿਬ੍ਬਾਨਂ. ਆਗਮ੍ਮਾਤਿ ਪਟਿਚ੍ਚ ਅਰਿਯਮਗ੍ਗਸ੍ਸ ਆਰਮ੍ਮਣਪਚ੍ਚਯਭਾਵਹੇਤੁ. ਸਮ੍ਮਨ੍ਤੀਤਿ ਅਪ੍ਪਟਿਸਨ੍ਧਿਕੂਪਸਮਵਸੇਨ ਸਮ੍ਮਨ੍ਤਿ. ਤਥਾ ਸਨ੍ਤਾ ਸਵਿਸੇਸਂ ਉਪਸਨ੍ਤਾ ਨਾਮ ਹੋਨ੍ਤੀਤਿ ਆਹ ‘‘ਵੂਪਸਮ੍ਮਨ੍ਤੀ’’ਤਿ. ਏਤੇਨ ‘‘ਸਬ੍ਬੇ ਸਙ੍ਖਾਰਾ ਸਮ੍ਮਨ੍ਤਿ ਏਤ੍ਥਾਤਿ ਸਬ੍ਬਸਙ੍ਖਾਰਸਮਥੋ, ਨਿਬ੍ਬਾਨ’’ਨ੍ਤਿ ਦਸ੍ਸੇਤਿ. ਸਬ੍ਬਸਙ੍ਖਤਵਿਸਂਯੁਤ੍ਤੇ ਚ ਨਿਬ੍ਬਾਨੇ ਸਬ੍ਬਸਙ੍ਖਾਰਵੂਪਸਮਪਰਿਯਾਯੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸੇਸਪਦੇਸੁਪਿ ਏਸੇਵ ਨਯੋ. ਪਟਿਨਿਸ੍ਸਟ੍ਠਾਤਿ ਸਮੁਚ੍ਛੇਦਵਸੇਨ ਪਰਿਚ੍ਚਤ੍ਤਾ ਹੋਨ੍ਤਿ. ਸਬ੍ਬਾ ਤਣ੍ਹਾਤਿ ਅਟ੍ਠਸਤਪ੍ਪਭੇਦਾ ਸਬ੍ਬਾਪਿ ਤਣ੍ਹਾ. ਸਬ੍ਬੇ ਕਿਲੇਸਰਾਗਾਤਿ ਕਾਮਰਾਗਰੂਪਰਾਗਾਦਿਭੇਦਾ ਸਬ੍ਬੇਪਿ ਕਿਲੇਸਭੂਤਾ ਰਾਗਾ, ਸਬ੍ਬੇਪਿ ਵਾ ਕਿਲੇਸਾ ਇਧ ‘‘ਕਿਲੇਸਰਾਗਾ’’ਤਿ ਵੇਦਿਤਬ੍ਬਾ, ਨ ਲੋਭਵਿਸੇਸਾ ਏਵ ਚਿਤ੍ਤਸ੍ਸ ਵਿਪਰਿਣਤਭਾਵਾਪਾਦਨਤੋ. ਯਥਾਹ ‘‘ਰਤ੍ਤਮ੍ਪਿ ਚਿਤ੍ਤਂ ਵਿਪਰਿਣਤਂ, ਦੁਟ੍ਠਮ੍ਪਿ ਚਿਤ੍ਤਂ ਵਿਪਰਿਣਤਂ, ਮੂਲ਼੍ਹਮ੍ਪਿ ਚਿਤ੍ਤਂ ਵਿਪਰਿਣਤ’’ਨ੍ਤਿ (ਪਾਰਾ. ੨੭੧). ਵਿਰਜ੍ਜਨ੍ਤੀਤਿ ਪਲੁਜ੍ਜਨ੍ਤਿ.

ਚਿਰਨਿਸਜ੍ਜਾਚਿਰਭਾਸਨੇਹਿ ਪਿਟ੍ਠਿਆਗਿਲਾਯਨਤਾਲੁਗਲਸੋਸਾਦਿਵਸੇਨ ਕਾਯਕਿਲਮਥੋ ਚੇਵ ਕਾਯਵਿਹੇਸਾ ਚ ਵੇਦਿਤਬ੍ਬਾ. ਸਾ ਚ ਖੋ ਦੇਸਨਾਯ ਅਤ੍ਥਂ ਅਜਾਨਨ੍ਤਾਨਂ ਵਸੇਨ ਵੁਤ੍ਤਾ, ਜਾਨਨ੍ਤਾਨਂ ਪਨ ਦੇਸਨਾਯ ਕਾਯਪਰਿਸ੍ਸਮੋਪਿ ਸਤ੍ਥੁ ਅਪਰਿਸ੍ਸਮੋਵ. ਤੇਨਾਹ ਭਗਵਾ – ‘‘ਨ ਚ ਮਂ ਧਮ੍ਮਾਧਿਕਰਣਂ ਵਿਹੇਸੇਸੀ’’ਤਿ (ਉਦਾ. ੧੦). ਤੇਨੇਵਾਹ ‘‘ਯਾ ਅਜਾਨਨ੍ਤਾਨਂ ਦੇਸਨਾ ਨਾਮ, ਸੋ ਮਮ ਕਿਲਮਥੋ ਅਸ੍ਸਾ’’ਤਿ. ਉਭਯਨ੍ਤਿ ਚਿਤ੍ਤਕਿਲਮਥੋ ਚੇਵ ਚਿਤ੍ਤਵਿਹੇਸਾ ਚਾਤਿ ਉਭਯਮ੍ਪੇਤਂ ਬੁਦ੍ਧਾਨਂ ਨਤ੍ਥਿ ਬੋਧਿਮੂਲੇਯੇਵ ਸਮੁਚ੍ਛਿਨ੍ਨਤ੍ਤਾ.

ਅਨੁਬ੍ਰੂਹਨਂ ਸਮ੍ਪਿਣ੍ਡਨਂ. ਸੋਤਿ ‘‘ਅਪਿਸ੍ਸੂ’’ਤਿ ਨਿਪਾਤੋ. ਮਨ੍ਤਿ ਪਟਿ-ਸਦ੍ਦਯੋਗੇਨ ਸਾਮਿਅਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਮਮਾ’’ਤਿ. ਵੁਦ੍ਧਿਪ੍ਪਤ੍ਤਾ ਵਾ ਅਚ੍ਛਰਿਯਾ ਅਨਚ੍ਛਰਿਯਾ. ਵੁਦ੍ਧਿਅਤ੍ਥੋਪਿ ਹਿ ਅ-ਕਾਰੋ ਹੋਤਿ ਯਥਾ ‘‘ਅਸੇਕ੍ਖਾ ਧਮ੍ਮਾ’’ਤਿ (ਧ. ਸ. ੧੧.ਤਿਕਮਾਤਿਕਾ). ਕਪ੍ਪਾਨਂ ਸਤਸਹਸ੍ਸਂ ਚਤ੍ਤਾਰਿ ਚ ਅਸਙ੍ਖ੍ਯੇਯ੍ਯਾਨਿ ਸਦੇਵਕਸ੍ਸ ਲੋਕਸ੍ਸ ਧਮ੍ਮਸਂਵਿਭਾਗਕਰਣਤ੍ਥਮੇਵ ਪਾਰਮਿਯੋ ਪੂਰੇਤ੍ਵਾ ਇਦਾਨਿ ਅਧਿਗਤਧਮ੍ਮਰਜ੍ਜਸ੍ਸ ਤਤ੍ਥ ਅਪ੍ਪੋਸ੍ਸੁਕ੍ਕਤਾਪਤ੍ਤਿਦੀਪਨਤਾ, ਗਾਥਾਤ੍ਥਸ੍ਸ ਅਚ੍ਛਰਿਯਤਾ, ਤਸ੍ਸ ਵੁਦ੍ਧਿਪ੍ਪਤ੍ਤਿ ਚਾਤਿ ਵੇਦਿਤਬ੍ਬਂ. ਅਤ੍ਥਦ੍ਵਾਰੇਨ ਹਿ ਗਾਥਾਨਂ ਅਨਚ੍ਛਰਿਯਤਾ. ਗੋਚਰਾ ਅਹੇਸੁਨ੍ਤਿ ਉਪਟ੍ਠਹੇਸੁਂ. ਉਪਟ੍ਠਾਨਞ੍ਚ ਵਿਤਕ੍ਕੇਤਬ੍ਬਤਾਤਿ ਆਹ ‘‘ਪਰਿਵਿਤਕ੍ਕਯਿਤਬ੍ਬਤਂ ਪਾਪੁਣਿਂਸੂ’’ਤਿ.

ਯਦਿ ਸੁਖਾਪਟਿਪਦਾਵ, ਕਥਂ ਕਿਚ੍ਛਤਾਤਿ ਆਹ ‘‘ਪਾਰਮੀਪੂਰਣਕਾਲੇ ਪਨਾ’’ਤਿਆਦਿ. ਏਵਮਾਦੀਨਿ ਦੁਪ੍ਪਰਿਚ੍ਚਜਾਨਿ ਦੇਨ੍ਤਸ੍ਸ. ਹ-ਇਤਿ ਵਾ ‘‘ਬ੍ਯਤ੍ਤ’’ਨ੍ਤਿ ਏਤਸ੍ਮਿਂ ਅਤ੍ਥੇ ਨਿਪਾਤੋ. ਏਕਂਸਤ੍ਥੇਤਿ ਕੇਚਿ. ਹ ਬ੍ਯਤ੍ਤਂ, ਏਕਂਸੇਨ ਵਾ ਅਲਂ ਨਿਪ੍ਪਯੋਜਨਂ ਏਵਂ ਕਿਚ੍ਛੇਨ ਅਧਿਗਤਸ੍ਸ ਧਮ੍ਮਸ੍ਸ ਦੇਸਿਤਨ੍ਤਿ ਯੋਜਨਾ. ਹਲਨ੍ਤਿ ਵਾ ‘‘ਅਲ’’ਨ੍ਤਿ ਇਮਿਨਾ ਸਮਾਨਤ੍ਥਂ ਪਦਂ ‘‘ਹਲਨ੍ਤਿ ਵਦਾਮੀ’’ਤਿਆਦੀਸੁ (ਦੀ. ਨਿ. ਟੀ. ੨.੬੫; ਸਂ. ਨਿ. ਟੀ. ੧.੧.੧੭੨) ਵਿਯ. ਰਾਗਦੋਸਪਰਿਫੁਟ੍ਠੇਹੀਤਿ ਫੁਟ੍ਠਵਿਸੇਨ ਵਿਯ ਸਪ੍ਪੇਨ ਰਾਗੇਨ ਦੋਸੇਨ ਚ ਸਮ੍ਫੁਟ੍ਠੇਹਿ ਅਭਿਭੂਤੇਹਿ. ਰਾਗਦੋਸਾਨੁਗਤੇਹੀਤਿ ਰਾਗੇਨ ਚ ਦੋਸੇਨ ਚ ਅਨੁਬਨ੍ਧੇਹਿ.

ਕਾਮਰਾਗਰਤ੍ਤਾ ਭਵਰਾਗਰਤ੍ਤਾ ਚ ਨੀਵਰਣੇਹਿ ਨਿਵੁਤਤਾਯ, ਦਿਟ੍ਠਿਰਾਗਰਤ੍ਤਾ ਵਿਪਰੀਤਾਭਿਨਿਵੇਸੇਨ. ਨ ਦਕ੍ਖਨ੍ਤੀਤਿ ਯਾਥਾਵਤੋ ਧਮ੍ਮਂ ਨ ਪਟਿਵਿਜ੍ਝਿਸ੍ਸਨ੍ਤਿ. ਏਵਂ ਗਾਹਾਪੇਤੁਨ੍ਤਿ ‘‘ਅਨਿਚ੍ਚ’’ਨ੍ਤਿਆਦਿਨਾ ਸਭਾਵੇਨ ਯਾਥਾਵਤੋ ਧਮ੍ਮਂ ਜਾਨਾਪੇਤੁਂ. ਰਾਗਦੋਸਪਰੇਤਤਾਪਿ ਨੇਸਂ ਸਮ੍ਮੂਲ਼੍ਹਭਾਵੇਨੇਵਾਤਿ ਆਹ ‘‘ਤਮੋਖਨ੍ਧੇਨ ਆਵੁਟਾ’’ਤਿ.

੨੮੨. ਧਮ੍ਮਦੇਸਨਾਯ ਅਪ੍ਪੋਸ੍ਸੁਕ੍ਕਤਾਪਤ੍ਤਿਯਾ ਕਾਰਣਂ ਵਿਭਾਵੇਤੁਂ ‘‘ਕਸ੍ਮਾ ਪਨਾ’’ਤਿਆਦਿਨਾ ਸਯਮੇਵ ਚੋਦਨਂ ਸਮੁਟ੍ਠਾਪੇਤਿ. ਤਤ੍ਥ ਅਞ੍ਞਾਤਵੇਸੇਨਾਤਿ ਇਮਸ੍ਸ ਭਗਵਤੋ ਸਾਵਕਭਾਵੂਪਗਮਨੇਨ ਅਞ੍ਞਾਤਰੂਪੇਨ. ਤਾਪਸਵੇਸੇਨਾਤਿ ਕੇਚਿ. ਸੋ ਪਨ ਅਰਹਤ੍ਤਾਧਿਗਮੇਨੇਵ ਵਿਗਚ੍ਛੇਯ੍ਯ. ਤਿਵਿਧਂ ਕਾਰਣਂ ਅਪ੍ਪੋਸ੍ਸੁਕ੍ਕਤਾਪਤ੍ਤਿਯਾ ਪਟਿਪਕ੍ਖਸ੍ਸ ਬਲਵਭਾਵੋ, ਧਮ੍ਮਸ੍ਸ ਗਮ੍ਭੀਰਤਾ, ਤਤ੍ਥ ਚ ਸਾਤਿਸਯਂ ਗਾਰਵਨ੍ਤਿ, ਤ ਦਸ੍ਸੇਤੁਂ ‘‘ਤਸ੍ਸ ਹੀ’’ਤਿਆਦਿ ਆਰਦ੍ਧਂ. (ਤਤ੍ਥ ਪਟਿਪਕ੍ਖਾ ਨਾਮ ਰਾਗਾਦਯੋ ਕਿਲੇਸਾ ਸਮ੍ਮਾਪਟਿਪਤ੍ਤਿਯਾ ਅਨ੍ਤਰਾਯਕਰਤ੍ਤਾ. ਤੇਸਂ ਬਲਵਭਾਵਤੋ ਚਿਰਪਰਿਭਾਵਨਾਯ ਸਤ੍ਤਸਨ੍ਤਾਨਤੋ ਦੁਬ੍ਬਿਸੋਧਿਯਤਾਯ ਤੇ ਸਤ੍ਤੇ ਮਤ੍ਤਹਤ੍ਥਿਨੋ ਵਿਯ ਦੁਬ੍ਬਲਪੁਰਿਸਂ ਅਧਿਭਵਿਤ੍ਵਾ ਅਜ੍ਝੋਤ੍ਥਰਿਤ੍ਵਾ ਅਨਯਬ੍ਯਸਨਂ ਆਪਾਦੇਨ੍ਤਾ ਅਨੇਕਸਤਯੋਜਨਾਯਾਮਵਿਤ੍ਥਾਰਂ ਸੁਨਿਚਿਤਂ ਘਨਸਨ੍ਨਿਵੇਸਂ ਕਣ੍ਟਕਦੁਗ੍ਗਮ੍ਪਿ ਅਧਿਸੇਨ੍ਤਿ. ਦੂਰਪ੍ਪਭੇਦਦੁਚ੍ਛੇਜ੍ਜਤਾਹਿ ਦੁਬ੍ਬਿਸੋਧਿਯਤਂ ਪਨ ਦਸ੍ਸੇਤੁਂ ‘‘ਅਥਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਚ ਅਨ੍ਤੋ ਅਮਟ੍ਠਤਾਯ ਕਞ੍ਜਿਯਪੁਣ੍ਣਾ ਲਾਬੁ. ਚਿਰਪਾਰਿਵਾਸਿਕਤਾਯ ਤਕ੍ਕਭਰਿਤਾ ਚਾਟਿ. ਸ੍ਨੇਹਤਿਨ੍ਤਦੁਬ੍ਬਲਭਾਵੇਨ ਵਸਾਪੀਤਪਿਲੋਤਿਕਾ. ਤੇਲਮਿਸ੍ਸਿਤਤਾਯ ਅਞ੍ਜਨਮਕ੍ਖਿਤਹਤ੍ਥੋ ਦੁਬ੍ਬਿਸੋਧਨੀਯਾ ਵੁਤ੍ਤਾ, ਹੀਨੂਪਮਾ ਚੇਤਾ ਰੂਪਪਬਨ੍ਧਭਾਵਤੋ ਅਚਿਰਕਾਲਿਕਤ੍ਤਾ ਚ ਮਲੀਨਤਾਯ, ਕਿਲੇਸਸਂਕਿਲੇਸੋ ਏਵ ਪਨ ਦੁਬ੍ਬਿਸੋਧਨੀਯਤਰੋ ਅਨਾਦਿਕਾਲਿਕਤ੍ਤਾ ਅਨੁਸਯਿਤਤ੍ਤਾ ਚ. ਤੇਨਾਹ ‘‘ਅਤਿਸਂਕਿਲਿਟ੍ਠਾ’’ਤਿ. ਯਥਾ ਚ ਦੁਬ੍ਬਿਸੋਧਨੀਯਤਰਤਾਯ, ਏਵਂ ਗਮ੍ਭੀਰਦੁਦ੍ਦਸਦੁਰਨੁਬੋਧਾਨਮ੍ਪਿ ਵੁਤ੍ਤਉਪਮਾ ਹੀਨੂਪਮਾਵ).

ਪਟਿਪਕ੍ਖਵਿਗਮਨੇਨ ਗਮ੍ਭੀਰੋਪਿ ਧਮ੍ਮੋ ਸੁਪਾਕਟੋ ਭਵੇਯ੍ਯ. ਪਟਿਪਕ੍ਖਵਿਗਮਨਂ ਪਨ ਸਮ੍ਮਾਪਟਿਪਤ੍ਤਿਪਟਿਬਦ੍ਧਂ, ਸਾ ਸਦ੍ਧਮ੍ਮਸ੍ਸਵਨਾਧੀਨਾ. ਤਂ ਸਤ੍ਥਰਿ ਧਮ੍ਮੇ ਚ ਪਸਾਦਾਯਤ੍ਤਂ, ਸੋ ਗਰੁਟ੍ਠਾਨਿਯਾਨਂ ਅਜ੍ਝੇਸਨਹੇਤੁਕੋਤਿ ਪਨਾਲ਼ਿਕਾਯ ਸਤ੍ਤਾਨਂ ਧਮ੍ਮਸਮ੍ਪਟਿਪਤ੍ਤਿਯਾ ਬ੍ਰਹ੍ਮਯਾਚਨਾਨਿਮਿਤ੍ਤਨ੍ਤਿ ਤਂ ਦਸ੍ਸੇਨ੍ਤੋ ‘‘ਅਪਿਚਾ’’ਤਿਆਦਿਮਾਹ.

ਉਪਕ੍ਕਿਲੇਸਭੂਤਂ ਅਪ੍ਪਂ ਰਾਗਾਦਿਰਜਂ ਏਤਸ੍ਸਾਤਿ ਅਪ੍ਪਰਜਂ, ਅਪ੍ਪਰਜਂ ਅਕ੍ਖਿ ਪਞ੍ਞਾਚਕ੍ਖੁ ਯੇਸਂ ਤੇ ਤਂਸਭਾਵਾਤਿ ਕਤ੍ਵਾ ਅਪ੍ਪਰਜਕ੍ਖਜਾਤਿਕਾਤਿ ਅਯਮਤ੍ਥੋ ਵਿਭਾਵਿਤੋ ‘‘ਪਞ੍ਞਾਮਯੇ’’ਤਿਆਦਿਨਾ. ਅਪ੍ਪਂ ਰਾਗਾਦਿਰਜਂ ਯੇਸਂ ਤਂਸਭਾਵਾ ਅਪ੍ਪਰਜਕ੍ਖਜਾਤਿਕਾਤਿ ਏਵਮ੍ਪਿ ਸਦ੍ਦਤ੍ਥੋ ਸਮ੍ਭਵਤਿ. ਦਾਨਾਦਿਦਸਪੁਞ੍ਞਕਿਰਿਯਵਤ੍ਥੂਨਿ ਸਰਣਗਮਨਪਰਹਿਤਪਰਿਣਾਮਨੇਹਿ ਸਦ੍ਧਿਂ (ਦ੍ਵਾਦਸ ਹੋਨ੍ਤੀਤਿ) ‘‘ਦ੍ਵਾਦਸਪੁਞ੍ਞਕਿਰਿਯਵਸੇਨਾ’’ਤਿ ਵੁਤ੍ਤਂ.

ਰਾਗਾਦਿਮਲੇਨ ਸਮਲੇਹਿ ਪੂਰਣਾਦੀਹਿ ਛਹਿ ਸਤ੍ਥਾਰੇਹਿ ਸਤ੍ਥੁਪਟਿਞ੍ਞੇਹਿ ਕਬ੍ਬਰਚਨਾਵਸੇਨ ਚਿਨ੍ਤਾਕਵਿਆਦਿਭਾਵੇ ਠਤ੍ਵਾ ਤਕ੍ਕਪਰਿਯਾਹਤਂ ਵੀਮਂਸਾਨੁਚਰਿਤਂ ਸਯਂਪਟਿਭਾਨਂ ਚਿਨ੍ਤਿਤੋ. ਤੇ ਕਿਰ ਬੁਦ੍ਧਕੋਲਾਹਲਾਨੁਸ੍ਸਵੇਨ ਸਞ੍ਜਾਤਕੁਤੂਹਲਂ ਲੋਕਂ ਵਞ੍ਚੇਤ੍ਵਾ ਕੋਹਞ੍ਞੇ ਠਤ੍ਵਾ ਸਬ੍ਬਞ੍ਞੁਤਂ ਪਟਿਜਾਨਨ੍ਤਾ ਯਂ ਕਿਞ੍ਚਿ ਅਧਮ੍ਮਂਯੇਵ ਧਮ੍ਮੋਤਿ ਦੀਪੇਸੁਂ. ਤੇਨਾਹ ‘‘ਤੇ ਹਿ ਪੁਰੇਤਰਂ ਉਪ੍ਪਜ੍ਜਿਤ੍ਵਾ’’ਤਿਆਦਿ. ਅਪਾਪੁਰੇਤਨ੍ਤਿ ਏਤਂ ਕਸ੍ਸਪਸ੍ਸ ਭਗਵਤੋ ਸਾਸਨਨ੍ਤਰਧਾਨਤੋ ਪਭੁਤਿ ਪਿਹਿਤਂ ਨਿਬ੍ਬਾਨਨਗਰਸ੍ਸ ਮਹਾਦ੍ਵਾਰਂ ਅਰਿਯਮਗ੍ਗਂ ਸਦ੍ਧਮ੍ਮਦੇਸਨਾਹਤ੍ਥੇਨ ਅਪਾਪੁਰ ਵਿਵਰ.

ਸੇਲਪਬ੍ਬਤੋ ਉਚ੍ਚੋ ਹੋਤਿ ਥਿਰੋ ਚ, ਨ ਪਂਸੁਪਬ੍ਬਤੋ ਮਿਸ੍ਸਕਪਬ੍ਬਤੋ ਚਾਤਿ ਆਹ ‘‘ਸੇਲੇ ਯਥਾ ਪਬ੍ਬਤਮੁਦ੍ਧਨੀ’’ਤਿ. ਧਮ੍ਮਮਯਂ ਪਾਸਾਦਨ੍ਤਿ ਲੋਕੁਤ੍ਤਰਧਮ੍ਮਮਾਹ. ਸੋ ਹਿ ਸਬ੍ਬਸੋ ਪਸਾਦਾਵਹੋ, ਸਬ੍ਬਧਮ੍ਮੇ ਅਤਿਕ੍ਕਮ੍ਮ ਅਬ੍ਭੁਗ੍ਗਤਟ੍ਠੇਨ ਪਾਸਾਦਸਦਿਸੋ ਚ. ਪਞ੍ਞਾਪਰਿਯਾਯੋ ਵਾ ਇਧ ਧਮ੍ਮ-ਸਦ੍ਦੋ. ਸਾ ਹਿ ਅਬ੍ਭੁਗ੍ਗਤਟ੍ਠੇਨ ‘‘ਪਾਸਾਦੋ’’ਤਿ ਅਭਿਧਮ੍ਮੇ (ਧ. ਸ. ਅਟ੍ਠ. ੧੬) ਨਿਦ੍ਦਿਟ੍ਠਾ. ਤਥਾ ਚਾਹ –

‘‘ਪਞ੍ਞਾਪਾਸਾਦਮਾਰੁਯ੍ਹ, ਅਸੋਕੋ ਸੋਕਿਨਿਂ ਪਜਂ;

ਪਬ੍ਬਤਟ੍ਠੋਵ ਭੂਮਟ੍ਠੇ, ਧੀਰੋ ਬਾਲੇ ਅਵੇਕ੍ਖਤੀ’’ਤਿ. (ਧ. ਪ. ੨੮);

ਉਟ੍ਠੇਹੀਤਿ ਵਾ ਧਮ੍ਮਦੇਸਨਾਯ ਅਪ੍ਪੋਸ੍ਸੁਕ੍ਕਤਾਸਙ੍ਖਾਤਸਙ੍ਕੋਚਾਪਤ੍ਤਿਤੋ ਕਿਲਾਸੁਭਾਵਤੋ ਉਟ੍ਠਹ.

੨੮੩. ਗਰੁਟ੍ਠਾਨਿਯਂ ਪਯਿਰੁਪਾਸਿਤ੍ਵਾ ਗਰੁਤਰਂ ਪਯੋਜਨਂ ਉਦ੍ਦਿਸ੍ਸ ਅਭਿਪਤ੍ਥਨਾ ਅਜ੍ਝੇਸਨਾ, ਸਾਪਿ ਅਤ੍ਥਤੋ ਯਾਚਨਾਵ ਹੋਤੀਤਿ ਆਹ ‘‘ਅਜ੍ਝੇਸਨਨ੍ਤਿ ਯਾਚਨ’’ਨ੍ਤਿ. ਪਦੇਸਵਿਸਯਂ ਞਾਣਦਸ੍ਸਨਂ ਅਹੁਤ੍ਵਾ ਬੁਦ੍ਧਾਨਂਯੇਵ ਆਵੇਣਿਕਭਾਵਤੋ ਇਦਂ ਞਾਣਦ੍ਵਯਂ ‘‘ਬੁਦ੍ਧਚਕ੍ਖੂ’’ਤਿ ਵੁਚ੍ਚਤੀਤਿ ਆਹ ‘‘ਇਮੇਸਞ੍ਹਿ ਦ੍ਵਿਨ੍ਨਂ ਞਾਣਾਨਂ ਬੁਦ੍ਧਚਕ੍ਖੂਤਿ ਨਾਮ’’ਨ੍ਤਿ. ਤਿਣ੍ਣਂ ਮਗ੍ਗਞਾਣਾਨਨ੍ਤਿ ਹੇਟ੍ਠਿਮਾਨਂ ਤਿਣ੍ਣਂ ਮਗ੍ਗਞਾਣਾਨਂ ‘‘ਧਮ੍ਮਚਕ੍ਖੂ’’ਤਿ ਨਾਮਂ ਚਤੁਸਚ੍ਚਧਮ੍ਮਦਸ੍ਸਨਮਤ੍ਤਭਾਵਤੋ. ਯਤੋ ਤਾਨਿ ਞਾਣਾਨਿ ਵਿਜ੍ਜੂਪਮਭਾਵੇਨ ਵੁਤ੍ਤਾਨਿ, ਅਗ੍ਗਮਗ੍ਗਞਾਣਂ ਪਨ ਞਾਣਕਿਚ੍ਚਸ੍ਸ ਸਿਖਾਪ੍ਪਤ੍ਤਿਯਾ ਨ ਦਸ੍ਸਨਮਤ੍ਤਂ ਹੋਤੀਤਿ ‘‘ਧਮ੍ਮਚਕ੍ਖੂ’’ਤਿ ਨ ਵੁਚ੍ਚਤਿ, ਤਤੋ ਤਂ ਵਜਿਰੂਪਮਭਾਵੇਨ ਵੁਤ੍ਤਂ. ਵੁਤ੍ਤਨਯੇਨਾਤਿ ‘‘ਅਪ੍ਪਰਜਕ੍ਖਾ’’ਤਿ ਏਤ੍ਥ ਵੁਤ੍ਤਨਯੇਨ. ਯਸ੍ਮਾ ਮਨ੍ਦਕਿਲੇਸਾ ‘‘ਅਪ੍ਪਰਜਕ੍ਖਾ’’ਤਿ ਵੁਤ੍ਤਾ, ਤਸ੍ਮਾ ਬਹਲਕਿਲੇਸਾ ‘‘ਮਹਾਰਜਕ੍ਖਾ’’ਤਿ ਵੇਦਿਤਬ੍ਬਾ. ਪਟਿਪਕ੍ਖਵਿਧਮਨਸਮਤ੍ਥਤਾਯ ਤਿਕ੍ਖਾਨਿ ਸੂਰਾਨਿ ਵਿਸਦਾਨਿ, ਵੁਤ੍ਤਵਿਪਰਿਯਾਯੇਨ ਮੁਦੂਨਿ. ਸਦ੍ਧਾਦਯੋ ਆਕਾਰਾਤਿ ਸਦ੍ਦਹਨਾਦਿਪ੍ਪਕਾਰੇ ਵਦਤਿ. ਸੁਨ੍ਦਰਾਤਿ ਕਲ੍ਯਾਣਾ. ਸਮ੍ਮੋਹਵਿਨੋਦਨਿਯਂ (ਵਿਭ. ਅਟ੍ਠ. ੮੧੪) ਪਨ ‘‘ਯੇਸਂ ਆਸਯਾਦਯੋ ਕੋਟ੍ਠਾਸਾ ਸੁਨ੍ਦਰਾ, ਤੇ ਸ੍ਵਾਕਾਰਾ, ਵਿਪਰੀਤਾ ਦ੍ਵਾਕਾਰਾ’’ਤਿ ਵੁਤ੍ਤਂ, ਤਂ ਇਮਾਯ ਅਤ੍ਥਵਣ੍ਣਨਾਯ ਅਞ੍ਞਦਤ੍ਥੁ ਸਂਸਨ੍ਦਤਿ ਸਮੇਤੀਤਿ ਦਟ੍ਠਬ੍ਬਂ. ਕਾਰਣਂ ਨਾਮ ਪਚ੍ਚਯਾਕਾਰੋ, ਸਚ੍ਚਾਨਿ ਵਾ.

ਅਯਂ ਪਨੇਤ੍ਥ ਪਾਲ਼ੀਤਿ ਏਤ੍ਥ ਅਪ੍ਪਰਜਕ੍ਖਾਦਿਪਦਾਨਂ ਅਤ੍ਥਵਿਭਾਵਨੇ ਅਯਂ ਤਸ੍ਸਤ੍ਥਸ੍ਸ ਵਿਭਾਵਨੀ ਪਾਲ਼ਿ. ਸਦ੍ਧਾਦੀਨਂ ਵਿਮੁਤ੍ਤਿਪਰਿਪਾਚਕਧਮ੍ਮਾਨਂ ਬਲਵਭਾਵੋ ਤਪ੍ਪਟਿਪਕ੍ਖਾਨਂ ਪਾਪਧਮ੍ਮਾਨਂ ਦੁਬ੍ਬਲਭਾਵੇਨੇਵ ਹੋਤਿ, ਤੇਸਞ੍ਚ ਬਲਵਭਾਵੋ ਸਦ੍ਧਾਦੀਨਂ ਦੁਬ੍ਬਲਭਾਵੇਨਾਤਿ ਵਿਮੁਤ੍ਤਿਪਰਿਪਾਚਕਧਮ੍ਮਾਨਂ ਅਤ੍ਥਿਤਾਨਤ੍ਥਿਤਾਵਸੇਨ ਅਪ੍ਪਰਜਕ੍ਖਮਹਾਰਜਕ੍ਖਤਾਦਯੋ ਪਾਲ਼ਿਯਂ ਵਿਭਜਿਤ੍ਵਾ ਦਸ੍ਸਿਤਾ. ਖਨ੍ਧਾਦਯੋ ਏਵ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋ. ਸਮ੍ਪਤ੍ਤਿਭਵਭੂਤੋ ਲੋਕੋ ਸਮ੍ਪਤ੍ਤਿਭਵਲੋਕੋ, ਸੁਗਤਿਸਙ੍ਖਾਤੋ ਉਪਪਤ੍ਤਿਭਵੋ. ਸਮ੍ਪਤ੍ਤਿ ਸਮ੍ਭਵਤਿ ਏਤੇਨਾਤਿ ਸਮ੍ਪਤ੍ਤਿਸਮ੍ਭਵਲੋਕੋ. ਸੁਗਤਿਸਂਵਤ੍ਤਨਿਯੋ ਕਮ੍ਮਭਵੋ. ਦੁਗ੍ਗਤਿ ਸਙ੍ਖਾਤਉਪਪਤ੍ਤਿਭਵਦੁਗ੍ਗਤਿ ਸਂਵਤ੍ਤਨਿਯਕਮ੍ਮਭਵਾ ਵਿਪਤ੍ਤਿਭਵਲੋਕਵਿਪਤ੍ਤਿਸਮ੍ਭਵਲੋਕਾ.

ਪੁਨ ਏਕਕਦੁਕਾਦਿਵਸੇਨ ਲੋਕਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਏਕੋ ਲੋਕੋ’’ਤਿਆਦਿ ਵੁਤ੍ਤਂ. ਆਹਾਰਾਦਯੋ ਵਿਯ ਹਿ ਆਹਾਰਟ੍ਠਿਤਿਕਾ ਸਙ੍ਖਾਰਾ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਤਿ. ਏਤ੍ਥ ਏਕੋ ਲੋਕੋ ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾਤਿ ਯਾਯਂ ਪੁਗ੍ਗਲਾਧਿਟ੍ਠਾਨਾਯ ਕਥਾਯ ਸਬ੍ਬਸਙ੍ਖਾਰਾਨਂ ਪਚ੍ਚਯਾਯਤ੍ਤਵੁਤ੍ਤਿ, ਤਾਯ ਸਬ੍ਬੇ ਸਙ੍ਖਾਰਾ ਏਕੋਵ ਲੋਕੋ ਏਕਵਿਧੋ ਪਕਾਰਨ੍ਤਰਸ੍ਸ ਅਭਾਵਤੋ. ਦ੍ਵੇ ਲੋਕਾਤਿਆਦੀਸੁਪਿ ਇਮਿਨਾ ਨਯੇਨ ਅਤ੍ਥੋ ਵੇਦਿਤਬ੍ਬੋ. ਨਾਮਗ੍ਗਹਣੇਨ ਚੇਤ੍ਥ ਨਿਬ੍ਬਾਨਸ੍ਸ ਅਗ੍ਗਹਣਂ ਤਸ੍ਸ ਅਲੋਕਸਭਾਵਤ੍ਤਾ. ਨਨੁ ਚ ਆਹਾਰਟ੍ਠਿਤਿਕਾਤਿ ਏਤ੍ਥ ਪਚ੍ਚਯਾਯਤ੍ਤਵੁਤ੍ਤਿਤਾਯ ਮਗ੍ਗਫਲਾਨਮ੍ਪਿ ਲੋਕਤਾ ਆਪਜ੍ਜਤੀਤਿ? ਨਾਪਜ੍ਜਤਿ ਪਰਿਞ੍ਞੇਯ੍ਯਾਨਂ ਦੁਕ੍ਖਸਚ੍ਚਧਮ੍ਮਾਨਂ ਇਧ ‘‘ਲੋਕੋ’’ਤਿ ਅਧਿਪ੍ਪੇਤਤ੍ਤਾ. ਅਥ ਵਾ ਨ ਲੁਜ੍ਜਤਿ ਨ ਪਲੁਜ੍ਜਤੀਤਿ ਯੋ ਗਹਿਤੋ ਤਥਾ ਨ ਹੋਤਿ, ਸੋ ਲੋਕੋਤਿ ਤਂ-ਗਹਣਰਹਿਤਾਨਂ ਲੋਕੁਤ੍ਤਰਾਨਂ ਨਤ੍ਥਿ ਲੋਕਤਾ. ਉਪਾਦਾਨਾਨਂ ਆਰਮ੍ਮਣਭੂਤਾ ਖਨ੍ਧਾ ਉਪਾਦਾਨਕ੍ਖਨ੍ਧਾ. ਦਸਾਯਤਨਾਨੀਤਿ ਦਸ ਰੂਪਾਯਤਨਾਨਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਵਿਵਟ੍ਟਜ੍ਝਾਸਯਸ੍ਸ ਅਧਿਪ੍ਪੇਤਤ੍ਤਾ ਤਸ੍ਸ ਚ ਸਬ੍ਬਂ ਤੇਭੂਮਕਕਮ੍ਮਂ ਗਰਹਿਤਬ੍ਬਂ ਵਜ੍ਜਿਤਬ੍ਬਞ੍ਚ ਹੁਤ੍ਵਾ ਉਪਟ੍ਠਾਤੀਤਿ ਵੁਤ੍ਤਂ ‘‘ਸਬ੍ਬੇ ਅਭਿਸਙ੍ਖਾਰਾ ਵਜ੍ਜਂ, ਸਬ੍ਬੇ ਭਵਗਾਮਿਕਮ੍ਮਾ ਵਜ੍ਜ’’ਨ੍ਤਿ. ਅਪ੍ਪਰਜਕ੍ਖਮਹਾਰਜਕ੍ਖਾਦੀਸੁ ਪਞ੍ਚਸੁ ਦੁਕੇਸੁ ਏਕੇਕਸ੍ਮਿਂ ਦਸ ਦਸ ਕਤ੍ਵਾ ‘‘ਪਞ੍ਞਾਸਾਯ ਆਕਾਰੇਹਿ ਇਮਾਨਿ ਪਞ੍ਚਿਨ੍ਦ੍ਰਿਯਾਨਿ ਜਾਨਾਤੀ’’ਤਿ ਵੁਤ੍ਤਂ. ਅਥ ਵਾ ਅਨ੍ਵਯਤੋ ਬ੍ਯਤਿਰੇਕਤੋ ਚ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਪਰੋਪਰਿਯਤ੍ਤਂ ਜਾਨਾਤੀਤਿ ਕਤ੍ਵਾ ਤਥਾ ਵੁਤ੍ਤਂ. ਏਤ੍ਥ ਚ ਅਪ੍ਪਰਜਕ੍ਖਾਦਿਭਬ੍ਬਾਦਿਵਸੇਨ ਆਵਜ੍ਜੇਨ੍ਤਸ੍ਸ ਭਗਵਤੋ ਤੇ ਸਤ੍ਤਾ ਪੁਞ੍ਜਪੁਞ੍ਜਾਵ ਹੁਤ੍ਵਾ ਉਪਟ੍ਠਹਨ੍ਤਿ, ਨ ਏਕੇਕਾ.

ਉਪ੍ਪਲਾਨਿ ਏਤ੍ਥ ਸਨ੍ਤੀਤਿ ਉਪ੍ਪਲਿਨੀ, ਗਚ੍ਛੋਪਿ ਜਲਾਸਯੋਪਿ, ਇਧ ਪਨ ਜਲਾਸਯੋ ਅਧਿਪ੍ਪੇਤੋਤਿ ਆਹ ‘‘ਉਪ੍ਪਲਵਨੇ’’ਤਿ. ਯਾਨਿ ਉਦਕਸ੍ਸ ਅਨ੍ਤੋ ਨਿਮੁਗ੍ਗਾਨੇਵ ਹੁਤ੍ਵਾ ਪੁਸਨ੍ਤਿ ਵਡ੍ਢਨ੍ਤਿ, ਤਾਨਿ ਅਨ੍ਤੋਨਿਮੁਗ੍ਗਪੋਸੀਨਿ. ਦੀਪਿਤਾਨੀਤਿ ਅਟ੍ਠਕਥਾਯਂ ਪਕਾਸਿਤਾਨਿ, ਇਧੇਵ ਵਾ ‘‘ਅਞ੍ਞਾਨਿਪੀ’’ਤਿਆਦਿਨਾ ਭਾਸਿਤਾਨਿ.

ਉਗ੍ਘਟਿਤਞ੍ਞੂਤਿ ਉਗ੍ਘਟਿਤਂ ਨਾਮ ਞਾਣੁਗ੍ਘਟਨਂ, ਞਾਣੇ ਉਗ੍ਘਟਿਤਮਤ੍ਤੇ ਏਵ ਜਾਨਾਤੀਤਿ ਅਤ੍ਥੋ. ਵਿਪਞ੍ਚਿਤਂ ਵਿਤ੍ਥਾਰਿਤਮੇਵ ਅਤ੍ਥਂ ਜਾਨਾਤੀਤਿ ਵਿਪਞ੍ਚਿਤਞ੍ਞੂ. ਉਦ੍ਦੇਸਾਦੀਹਿ ਨੇਤਬ੍ਬੋਤਿ ਨੇਯ੍ਯੋ. ਸਹ ਉਦਾਹਟਵੇਲਾਯਾਤਿ ਉਦਾਹਾਰੇ ਉਦਾਹਟਮਤ੍ਤੇਯੇਵ. ਧਮ੍ਮਾਭਿਸਮਯੋਤਿ ਚਤੁਸਚ੍ਚਧਮ੍ਮਸ੍ਸ ਞਾਣੇਨ ਸਦ੍ਧਿਂ ਅਭਿਸਮਯੋ. ਅਯਂ ਵੁਚ੍ਚਤੀਤਿ ਅਯਂ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ ਨਯੇਨ ਸਂਖਿਤ੍ਤੇਨ ਮਾਤਿਕਾਯ ਠਪਿਯਮਾਨਾਯ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਅਰਹਤ੍ਤਂ ਗਣ੍ਹਿਤੁਂ ਸਮਤ੍ਥੋ ਪੁਗ੍ਗਲੋ ‘‘ਉਗ੍ਘਟਿਤਞ੍ਞੂ’’ਤਿ ਵੁਚ੍ਚਤਿ. ਅਯਂ ਵੁਚ੍ਚਤੀਤਿ ਅਯਂ ਸਂਖਿਤ੍ਤੇਨ ਮਾਤਿਕਂ ਠਪੇਤ੍ਵਾ ਵਿਤ੍ਥਾਰੇਨ ਅਤ੍ਥੇ ਵਿਭਜਿਯਮਾਨੇ ਅਰਹਤ੍ਤਂ ਪਾਪੁਣਿਤੁਂ ਸਮਤ੍ਥੋ ਪੁਗ੍ਗਲੋ ‘‘ਵਿਪਞ੍ਚਿਤਞ੍ਞੂ’’ਤਿ ਵੁਚ੍ਚਤਿ. ਉਦ੍ਦੇਸਤੋਤਿ ਉਦ੍ਦੇਸਹੇਤੁ, ਉਦ੍ਦਿਸਨ੍ਤਸ੍ਸ, ਉਦ੍ਦਿਸਾਪੇਨ੍ਤਸ੍ਸ ਵਾਤਿ ਅਤ੍ਥੋ. ਪਰਿਪੁਚ੍ਛਤੋਤਿ ਅਤ੍ਥਂ ਪਰਿਪੁਚ੍ਛਨ੍ਤਸ੍ਸ. ਅਨੁਪੁਬ੍ਬੇਨ ਧਮ੍ਮਾਭਿਸਮਯੋ ਹੋਤੀਤਿ ਅਨੁਕ੍ਕਮੇਨ ਅਰਹਤ੍ਤਪ੍ਪਤ੍ਤਿ ਹੋਤਿ. ਨ ਤਾਯ ਜਾਤਿਯਾ ਧਮ੍ਮਾਭਿਸਮਯੋ ਹੋਤੀਤਿ ਤੇਨ ਅਤ੍ਤਭਾਵੇਨ ਮਗ੍ਗਂ ਵਾ ਫਲਂ ਵਾ ਅਨ੍ਤਮਸੋ ਝਾਨਂ ਵਾ ਵਿਪਸ੍ਸਨਂ ਵਾ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਪਦਪਰਮੋਤਿ ਅਯਂ ਪੁਗ੍ਗਲੋ ਬ੍ਯਞ੍ਜਨਪਦਮੇਵ ਪਰਮਂ ਅਸ੍ਸਾਤਿ ਪਦਪਰਮੋਤਿ ਵੁਚ੍ਚਤਿ.

ਕਮ੍ਮਾਵਰਣੇਨਾਤਿ (ਵਿਭ. ਅਟ੍ਠ. ੮੨੬) ਪਞ੍ਚਵਿਧੇਨ ਆਨਨ੍ਤਰਿਯਕਮ੍ਮੇਨ. ਵਿਪਾਕਾਵਰਣੇਨਾਤਿ ਅਹੇਤੁਕਪਟਿਸਨ੍ਧਿਯਾ. ਯਸ੍ਮਾ ਪਨ ਦੁਹੇਤੁਕਾਨਮ੍ਪਿ ਅਰਿਯਮਗ੍ਗਪਟਿਵੇਧੋ ਨਤ੍ਥਿ, ਤਸ੍ਮਾ ਦੁਹੇਤੁਕਾ ਪਟਿਸਨ੍ਧਿਪਿ ‘‘ਵਿਪਾਕਾਵਰਣਮੇਵਾ’’ਤਿ ਵੇਦਿਤਬ੍ਬਾ. ਕਿਲੇਸਾਵਰਣੇਨਾਤਿ ਨਿਯਤਮਿਚ੍ਛਾਦਿਟ੍ਠਿਯਾ. ਅਸ੍ਸਦ੍ਧਾਤਿ ਬੁਦ੍ਧਾਦੀਸੁ ਸਦ੍ਧਾਰਹਿਤਾ. ਅਚ੍ਛਨ੍ਦਿਕਾਤਿ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦਰਹਿਤਾ. ਉਤ੍ਤਰਕੁਰੁਕਾ ਮਨੁਸ੍ਸਾ ਅਚ੍ਛਨ੍ਦਿਕਟ੍ਠਾਨਂ ਪਵਿਟ੍ਠਾ. ਦੁਪ੍ਪਞ੍ਞਾਤਿ ਭਵਙ੍ਗਪਞ੍ਞਾਯ ਪਰਿਹੀਨਾ. ਭਵਙ੍ਗਪਞ੍ਞਾਯ ਪਨ ਪਰਿਪੁਣ੍ਣਾਯਪਿ ਯਸ੍ਸ ਭਵਙ੍ਗਂ ਲੋਕੁਤ੍ਤਰਸ੍ਸ ਪਚ੍ਚਯੋ ਨ ਹੋਤਿ, ਸੋਪਿ ਦੁਪ੍ਪਞ੍ਞੋ ਏਵ ਨਾਮ. ਅਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨਿਯਾਮਸਙ੍ਖਾਤਂ ਮਗ੍ਗਂ ਓਕ੍ਕਮਿਤੁਂ ਅਧਿਗਨ੍ਤੁਂ ਅਭਬ੍ਬਾ. ਨ ਕਮ੍ਮਾਵਰਣੇਨਾਤਿਆਦੀਨਿ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾਨਿ.

ਨਿਬ੍ਬਾਨਸ੍ਸ ਦ੍ਵਾਰਂ ਪਵਿਸਨਮਗ੍ਗੋ. ਵਿਵਰਿਤ੍ਵਾ ਠਪਿਤੋ ਮਹਾਕਰੁਣੂਪਨਿਸ੍ਸਯੇਨ ਸਯਮ੍ਭੁਞਾਣੇਨ ਅਧਿਗਤਤ੍ਤਾ. ਸਦ੍ਧਂ ਪਮੁਞ੍ਚਨ੍ਤੂਤਿ ਅਤ੍ਤਨੋ ਸਦ੍ਧਂ ਪਵੇਸੇਨ੍ਤੁ, ਸਦ੍ਦਹਨਾਕਾਰਂ ਉਪਟ੍ਠਪੇਨ੍ਤੂਤਿ ਅਤ੍ਥੋ. ਸੁਖੇਨ ਅਕਿਚ੍ਛੇਨ ਪਵਤ੍ਤਨੀਯਤਾਯ ਸੁਪ੍ਪਵਤ੍ਤਿਤਂ. ਨ ਭਾਸਿਂ ਨ ਭਾਸਿਸ੍ਸਾਮੀਤਿ ਚਿਨ੍ਤੇਸਿਂ.

੨੮੪. ਧਮ੍ਮਂ ਦੇਸੇਸ੍ਸਾਮੀਤਿ ਏਵਂ ਪਵਤ੍ਤਿਤਧਮ੍ਮਦੇਸਨਾਪਟਿਸਂਯੁਤ੍ਤਸ੍ਸ ਵਿਤਕ੍ਕਸ੍ਸ ਸਤ੍ਤਮਸਤ੍ਤਾਹਤੋ ਪਰਂ ਅਟ੍ਠਮਸਤ੍ਤਾਹੇਯੇਵ ਉਪ੍ਪਨ੍ਨਤ੍ਤਾ ਵੁਤ੍ਤਂ ‘‘ਅਟ੍ਠਮੇ ਸਤ੍ਤਾਹੇ’’ਤਿ. ਨ ਇਤਰਸਤ੍ਤਾਹਾਨਿ ਵਿਯ ਪਟਿਨਿਯਤਕਿਚ੍ਚਲਕ੍ਖਿਤਸ੍ਸ ਅਟ੍ਠਮਸਤ੍ਤਾਹਸ੍ਸ ਨਾਮ ਪਵਤ੍ਤਿਤਸ੍ਸ ਸਬ੍ਭਾਵਾ.

ਵਿਵਟਨ੍ਤਿ ਦੇਵਤਾਵਿਗ੍ਗਹੇਨ ਵਿਵਟਅਙ੍ਗਪਚ੍ਚਙ੍ਗਨਿਦ੍ਦਾਯ ਜਨਾਨਂ ਪਾਕਟਂ ਵਿਪ੍ਪਕਾਰਨ੍ਤਿ ਅਤ੍ਥੋ. ‘‘ਬੁਦ੍ਧਤ੍ਤਂ ਅਨਧਿਗਨ੍ਤ੍ਵਾ ਨ ਪਚ੍ਚਾਗਮਿਸ੍ਸਾਮੀ’’ਤਿ ਉਪ੍ਪਨ੍ਨਵਿਤਕ੍ਕਾਤਿਸਯਹੇਤੁਕੇਨ ਪਥਵੀਪਰਿਵਤ੍ਤਨਚੇਤਿਯਂ ਨਾਮ ਦਸ੍ਸੇਤ੍ਵਾ. ਸਾਕਿਯਕੋਲਿਯਮਲ੍ਲਰਜ੍ਜਵਸੇਨ ਤੀਣਿ ਰਜ੍ਜਾਨਿ. ਰੁਕ੍ਖਮੂਲੇਤਿ ਨਿਗ੍ਰੋਧਮੂਲੇ. ਵਤ੍ਵਾ ਪਕ੍ਕਾਮਿ, ਪਕ੍ਕਮਨ੍ਤਿਯਾ ਚਸ੍ਸਾ ਮਹਾਸਤ੍ਤੋ ਆਕਾਰਂ ਦਸ੍ਸੇਸਿ ਸੁਵਣ੍ਣਥਾਲਗ੍ਗਹਣਾਯ, ਸਾ ‘‘ਤੁਮ੍ਹਾਕਂ ਤਂ ਪਰਿਚ੍ਚਤ੍ਤਮੇਵਾ’’ਤਿ ਪਕ੍ਕਾਮਿ.

ਦਿਵਾਵਿਹਾਰਂ ਕਤ੍ਵਾਤਿ ਨਾਨਾਸਮਾਪਤ੍ਤਿਯੋ ਸਮਾਪਜ੍ਜਨੇਨ ਦਿਵਾਵਿਹਾਰਂ ਵਿਹਰਿਤ੍ਵਾ. ‘‘ਕਾਮਂ ਤਚੋ ਚ ਨ੍ਹਾਰੁ ਚ, ਅਟ੍ਠਿ ਚ ਅਵਸਿਸ੍ਸਤੁ, ਉਪਸੁਸ੍ਸਤੁ ਸਰੀਰੇ ਮਂਸਲੋਹਿਤ’’ਨ੍ਤਿਆਦਿਨਾ ਸੁਤ੍ਤੇ (ਮ. ਨਿ. ੨.੧੮੪; ਸਂ. ਨਿ. ੨.੨੩੭; ਅ. ਨਿ. ੨.੫; ੮.੧੩; ਮਹਾਨਿ. ੧੭, ੧੯੬) ਆਗਤਨਯੇਨ ਚਤੁਰਙ੍ਗਵੀਰਿਯਂ ਅਧਿਟ੍ਠਹਿਤ੍ਵਾ.

ਨਵਯੋਜਨਨ੍ਤਿ ਉਬ੍ਬੇਧਤੋ ਵੁਤ੍ਤਂ, ਪੁਥੁਲਤੋ ਦ੍ਵਾਦਸਯੋਜਨਾ, ਦੀਘਤੋ ਯਾਵ ਚਕ੍ਕਵਾਲ਼ਾ ਆਯਤਾਤਿ ਵਦਨ੍ਤਿ. ਅਜ੍ਝੋਤ੍ਥਰਨ੍ਤੋ ਉਪਸਙ੍ਕਮਿਤ੍ਵਾ – ‘‘ਉਟ੍ਠੇਹਿ ਸੋ, ਸਿਦ੍ਧਤ੍ਥ, ਅਹਂ ਇਮਸ੍ਸ ਪਲ੍ਲਙ੍ਕਸ੍ਸ ਅਨੁਚ੍ਛਵਿਕੋ’’ਤਿ ਵਤ੍ਵਾ ਤਤ੍ਥ ਸਕ੍ਖਿਂ ਓਤਾਰੇਨ੍ਤੋ ਅਤ੍ਤਨੋ ਪਰਿਸਂ ਨਿਦ੍ਦਿਸਿ. ਏਕਪ੍ਪਹਾਰੇਨੇਵ – ‘‘ਅਯਮੇਵ ਅਨੁਚ੍ਛਵਿਕੋ, ਅਯਮੇਵ ਅਨੁਚ੍ਛਵਿਕੋ’’ਤਿ ਕੋਲਾਹਲਮਕਾਸਿ, ਤਂ ਸੁਤ੍ਵਾ ਮਹਾਸਤ੍ਤੋ…ਪੇ… ਹਤ੍ਥਂ ਪਸਾਰੇਤਿ. ਯਂ ਸਨ੍ਧਾਯ ਵੁਤ੍ਤਂ –

‘‘ਅਚੇਤਨਾਯਂ ਪਥਵੀ, ਅਵਿਞ੍ਞਾਯ ਸੁਖਂ ਦੁਖਂ;

ਸਾਪਿ ਦਾਨਬਲਾ ਮਯ੍ਹਂ, ਸਤ੍ਤਕ੍ਖਤ੍ਤੁਂ ਪਕਮ੍ਪਥਾ’’ਤਿ. (ਚਰਿਯਾ. ੧.੧੨੪);

ਪੁਬ੍ਬੇਨਿਵਾਸਞਾਣਂ ਵਿਸੋਧੇਤ੍ਵਾਤਿ ਆਨੇਤ੍ਵਾ ਸਮ੍ਬਨ੍ਧੋ ਸੀਹਾਵਲੋਕਨਞਾਯੇਨ. ਵਟ੍ਟਵਿਵਟ੍ਟਂ ਸਮ੍ਮਸਿਤ੍ਵਾਤਿ ਚਤੁਸਚ੍ਚਮਨਸਿਕਾਰਂ ਸਨ੍ਧਾਯਾਹ. ਇਮਸ੍ਸ ਪਲ੍ਲਙ੍ਕਸ੍ਸ ਅਤ੍ਥਾਯਾਤਿ ਪਲ੍ਲਙ੍ਕਸੀਸੇਨ ਅਧਿਗਤਵਿਸੇਸਂ ਦਸ੍ਸੇਤਿ. ਤਤ੍ਥ ਹਿ ਸਿਖਾਪ੍ਪਤ੍ਤਵਿਮੁਤ੍ਤਿਸੁਖਂ ਅਵਿਜਹਨ੍ਤੋ ਅਨ੍ਤਰਨ੍ਤਰਾ ਚ ਪਟਿਚ੍ਚਸਮੁਪ੍ਪਾਦਙ੍ਗਂ ਮਨਸਿਕਰੋਨ੍ਤੋ ਏਕਪਲ੍ਲਙ੍ਕੇਨ ਨਿਸੀਦਿ. ਏਕਚ੍ਚਾਨਨ੍ਤਿ ਯਾ ਅਧਿਗਤਮਗ੍ਗਾ ਸਚ੍ਛਿਕਤਨਿਰੋਧਾ ਏਕਦੇਸੇਨ ਚ ਬੁਦ੍ਧਗੁਣੇ ਜਾਨਨ੍ਤਿ, ਤਾ ਠਪੇਤ੍ਵਾ ਤਦਞ੍ਞੇਸਂ ਦੇਵਤਾਨਂ. ਅਞ੍ਞੇਪਿ ਬੁਦ੍ਧਤ੍ਤਕਰਾਤਿ ਵਿਸਾਖਾਪੁਣ੍ਣਮਤੋ ਪਟ੍ਠਾਯ ਰਤ੍ਤਿਨ੍ਦਿਵਂ ਏਵਂ ਨਿਚ੍ਚਸਮਾਹਿਤਭਾਵਹੇਤੁਕਾਨਂ ਬੁਦ੍ਧਗੁਣਾਨਂ ਉਪਰਿ ਅਞ੍ਞੇਪਿ ਬੁਦ੍ਧਤ੍ਤਸਾਧਕਾ, ‘‘ਅਯਂ ਬੁਦ੍ਧੋ’’ਤਿ ਬੁਦ੍ਧਭਾਵਸ੍ਸ ਪਰੇਸਂ ਵਿਭਾਵਨਾ ਧਮ੍ਮਾ ਕਿਂ ਨੁ ਖੋ ਅਤ੍ਥੀਤਿ ਯੋਜਨਾ.

ਅਨਿਮਿਸੇਹੀਤਿ ਧਮ੍ਮਪੀਤਿਵਿਪ੍ਫਾਰਵਸੇਨ ਪਸਾਦਵਿਕਸਿਤਨਿਚ੍ਚਲਤਾਯ ਨਿਮੇਸਰਹਿਤੇਹਿ. ਰਤਨਚਙ੍ਕਮੇਤਿ ਦੇਵਤਾਹਿ ਮਾਪਿਤੇ ਰਤਨਮਯਚਙ੍ਕਮੇ. ਰਤਨਭੂਤਾਨਂ ਸਤ੍ਤਨ੍ਨਂ ਪਕਰਣਾਨਂ ਤਤ੍ਥ ਚ ਅਨਨ੍ਤਨਯਸ੍ਸ ਧਮ੍ਮਰਤਨਸ੍ਸ ਸਮ੍ਮਸਨੇਨ ਤਂ ਠਾਨਂ ਰਤਨਘਰਚੇਤਿਯਂ ਨਾਮ ਜਾਤਨ੍ਤਿਪਿ ਵਦਨ੍ਤਿ. ਏਵਨ੍ਤਿ ਵਕ੍ਖਮਾਨਾਕਾਰੇਨ. ਛਬ੍ਬਣ੍ਣਾਨਂ ਰਸ੍ਮੀਨਂ ਦਨ੍ਤੇਹਿ ਨਿਕ੍ਖਮਨਤੋ ਛਦ੍ਦਨ੍ਤਨਾਗਕੁਲਂ ਵਿਯਾਤਿ ਨਿਦਸ੍ਸਨਂ ਵੁਤ੍ਤਂ.

ਹੇਟ੍ਠਾ ਲੋਹਪਾਸਾਦਪ੍ਪਮਾਣੋਤਿ ਨਵਭੂਮਕਸ੍ਸ ਸਬ੍ਬਪਠਮਸ੍ਸ ਲੋਹਪਾਸਾਦਸ੍ਸ ਹੇਟ੍ਠਾ ਲੋਹਪਾਸਾਦਪ੍ਪਮਾਣੋ. ਖਨ੍ਧਕਟ੍ਠਕਥਾਯਂ (ਮਹਾਵ. ਅਟ੍ਠ. ੫) ਪਨ ਤਤ੍ਥ ‘‘ਭਣ੍ਡਾਗਾਰਗਬ੍ਭਪ੍ਪਮਾਣ’’ਨ੍ਤਿ ਵੁਤ੍ਤਂ.

ਪਚ੍ਚਗ੍ਘੇਤਿ ਅਭਿਨਵੇ. ਪਚ੍ਚੇਕਂ ਮਹਗ੍ਘਤਾਯ ਪਚ੍ਚਗ੍ਘੇਤਿ ਕੇਚਿ, ਤਂ ਨ ਸੁਨ੍ਦਰਂ. ਨ ਹਿ ਬੁਦ੍ਧਾ ਭਗਵਨ੍ਤੋ ਮਹਗ੍ਘਂ ਪਟਿਗ੍ਗਣ੍ਹਨ੍ਤਿ ਪਰਿਭੁਞ੍ਜਨ੍ਤਿ ਵਾ. ਪਿਣ੍ਡਪਾਤਨ੍ਤਿ ਏਤ੍ਥ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ ਸਨ੍ਧਾਯ ਵਦਤਿ. ਅਯਂ ਵਿਤਕ੍ਕੋਤਿ – ‘‘ਕਸ੍ਸ ਨੁ ਖੋ ਅਹਂ ਪਠਮਂ ਧਮ੍ਮਂ ਦੇਸੇਯ੍ਯ’’ਨ੍ਤਿ ਅਯਂ ਪਰਿਵਿਤਕ੍ਕੋ.

ਪਣ੍ਡਿਚ੍ਚੇਨਾਤਿ ਸਮਾਪਤ੍ਤਿਪਟਿਲਾਭਸਂਸਿਦ੍ਧੇਨ ਅਧਿਗਮਬਾਹੁਸਚ੍ਚਸਙ੍ਖਾਤੇਨ ਪਣ੍ਡਿਤਭਾਵੇਨ. ਵੇਯ੍ਯਤ੍ਤਿਯੇਨਾਤਿ ਸਮਾਪਤ੍ਤਿਪਟਿਲਾਭਪਚ੍ਚਯੇਨ ਪਾਰਿਹਾਰਿਯਪਞ੍ਞਾਸਙ੍ਖਾਤੇਨ ਬ੍ਯਤ੍ਤਭਾਵੇਨ. ਮੇਧਾਵੀਤਿ ਤਿਹੇਤੁਕਪਟਿਸਨ੍ਧਿਪਞ੍ਞਾਸਙ੍ਖਾਤਾਯ ਤਂਤਂਇਤਿਕਤ੍ਤਬ੍ਬਤਾਪਞ੍ਞਾਸਙ੍ਖਾਤਾਯ ਚ ਮੇਧਾਯ ਸਮਨ੍ਨਾਗਤੋਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਮਹਾਜਾਨਿਯੋਤਿ ਮਹਾਪਰਿਹਾਨਿਕੋ. ਆਗਮਨਪਾਦਾਪਿ ਨਤ੍ਥੀਤਿ ਇਦਂ ਪਠਮਂ ਵਤ੍ਤਬ੍ਬਂ, ਅਥਾਹਂ ਤਤ੍ਥ ਗਚ੍ਛੇਯ੍ਯਂ, ਗਨ੍ਤ੍ਵਾ ਦੇਸਿਯਮਾਨਂ ਧਮ੍ਮਮ੍ਪਿਸ੍ਸ ਸੋਤੁਂ ਸੋਤਪਸਾਦੋਪਿ ਨਤ੍ਥੀਤਿ ਯੋਜਨਾ. ਕਿਂ ਪਨ ਭਗਵਤਾ ਅਤ੍ਤਨੋ ਬੁਦ੍ਧਾਨੁਭਾਵੇਨ ਤੇ ਧਮ੍ਮਂ ਞਾਪੇਤੁਂ ਨ ਸਕ੍ਕਾਤਿ? ਆਮ, ਨ ਸਕ੍ਕਾ. ਨ ਹਿ ਪਰਤੋ ਘੋਸਂ ਅਨ੍ਤਰੇਨ ਸਾਵਕਾਨਂ ਧਮ੍ਮਾਭਿਸਮਯੋ ਸਮ੍ਭਵਤਿ, ਅਞ੍ਞਥਾ ਇਤਰਪਚ੍ਚਯਰਹਿਤਸ੍ਸਪਿ ਧਮ੍ਮਾਭਿਸਮਯੇਨ ਭਵਿਤਬ੍ਬਂ, ਨ ਚ ਤਂ ਅਤ੍ਥਿ. ਵੁਤ੍ਤਞ੍ਹੇਤਂ – ‘‘ਦ੍ਵੇਮੇ, ਭਿਕ੍ਖਵੇ, ਪਚ੍ਚਯਾ ਸਮ੍ਮਾਦਿਟ੍ਠਿਯਾ ਉਪ੍ਪਾਦਾਯ ਪਰਤੋ ਚ ਘੋਸੋ ਅਜ੍ਝਤ੍ਤਞ੍ਚ ਯੋਨਿਸੋਮਨਸਿਕਾਰੋ’’ਤਿ (ਅ. ਨਿ. ੨.੧੨੭). ਪਾਲ਼ਿਯਂ ਰਾਮਸ੍ਸੇਵ ਸਮਾਪਤ੍ਤਿਲਾਭਿਤਾ ਆਗਤਾ, ਨ ਉਦਕਸ੍ਸ, ਤਂ ਤਸ੍ਸ ਬੋਧਿਸਤ੍ਤੇਨ ਸਮਾਗਤਕਾਲਵਸੇਨ ਵੁਤ੍ਤਂ. ਸੋ ਹਿ ਪੁਬ੍ਬੇਪਿ ਤਤ੍ਥ ਯੁਤ੍ਤਪ੍ਪਯੁਤ੍ਤੋ ਵਿਹਰਨ੍ਤੋ ਮਹਾਪੁਰਿਸੇਨ ਖਿਪ੍ਪਞ੍ਞੇਵ ਸਮਾਪਤ੍ਤੀਨਂ ਨਿਬ੍ਬਤ੍ਤਿਤਭਾਵਂ ਸੁਤ੍ਵਾ ਸਂਵੇਗਜਾਤੋ ਮਹਾਸਤ੍ਤੇ ਤਤੋ ਨਿਬ੍ਬਿਜ੍ਜ ਪਕ੍ਕਨ੍ਤੇ ਘਟੇਨ੍ਤੋ ਵਾਯਮਨ੍ਤੋ ਨਚਿਰਸ੍ਸੇਵ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਸਿ. ਤੇਨ ਵੁਤ੍ਤਂ ‘‘ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ਅਦ੍ਦਸਾ’’ਤਿ. ਏਤੇ ਅਟ੍ਠ ਬ੍ਰਾਹ੍ਮਣਾਤਿ ਸਮ੍ਬਨ੍ਧੋ. ਛਲ਼ਙ੍ਗਵਾਤਿ ਛਲ਼ਙ੍ਗਵਿਦੁਨੋ. ਮਨ੍ਤਨ੍ਤਿ ਮਨ੍ਤਪਦਂ. ‘‘ਨਿਜ੍ਝਾਯਿਤ੍ਵਾ’’ਤਿ ਵਚਨਸੇਸੋ, ਮਨ੍ਤੇਤ੍ਵਾਤਿ ਅਤ੍ਥੋ. ਵਿਯਾਕਰਿਂਸੂਤਿ ਕਥੇਸੁਂ.

ਯਥਾਮਨ੍ਤਪਦਨ੍ਤਿ ਲਕ੍ਖਣਮਨ੍ਤਸਙ੍ਖਾਤਵੇਦਵਚਨਾਨੁਰੂਪਂ. ਗਤਾਤਿ ਪਟਿਪਨ੍ਨਾ. ‘‘ਦ੍ਵੇਵ ਗਤਿਯੋ ਭਵਨ੍ਤਿ ਅਨਞ੍ਞਾ’’ਤਿ (ਦੀ. ਨਿ. ੨.੩੩; ੩.੧੯੯-੨੦੦; ਮ. ਨਿ. ੨.੩੮੪, ੩੯੮) ਵੁਤ੍ਤਨਿਯਾਮੇਨ ਨਿਚ੍ਛਿਨਿਤੁਂ ਅਸਕ੍ਕੋਨ੍ਤਾ ਬ੍ਰਾਹ੍ਮਣਾ ਵੁਤ੍ਤਮੇਵ ਪਟਿਪਜ੍ਜਿਂਸੁ, ਨ ਮਹਾਪੁਰਿਸਸ੍ਸ ਬੁਦ੍ਧਭਾਵਪ੍ਪਤ੍ਤਿਂ ਪਚ੍ਚਾਸੀਸਿਂਸੁ. ਇਮੇ ਪਨ ਕੋਣ੍ਡਞ੍ਞਾਦਯੋ ਪਞ੍ਚ ‘‘ਏਕਂਸਤੋ ਬੁਦ੍ਧੋ ਭਵਿਸ੍ਸਤੀ’’ਤਿ ਜਾਤਨਿਚ੍ਛਯਤ੍ਤਾ ਮਨ੍ਤਪਦਂ ਅਤਿਕ੍ਕਨ੍ਤਾ. ਪੁਣ੍ਣਪਤ੍ਤਨ੍ਤਿ ਤੁਟ੍ਠਿਦਾਨਂ. ਨਿਬ੍ਬਿਤਕ੍ਕਾਤਿ ਨਿਬ੍ਬਿਕਪ੍ਪਾ, ਨ ਦ੍ਵੇਧਾ ਤਕ੍ਕਾ.

ਵਪ੍ਪਕਾਲੇਤਿ ਵਪਨਕਾਲੇ. ਵਪਨਤ੍ਥਂ ਬੀਜਾਨਿ ਨੀਹਰਣਨ੍ਤੇਨ ਤਤ੍ਥ ਅਗ੍ਗਂ ਗਹੇਤ੍ਵਾ ਦਾਨਂ ਬੀਜਗ੍ਗਦਾਨਂ ਨਾਮ. ਲਾਯਨਗ੍ਗਾਦੀਸੁਪਿ ਏਸੇਵ ਨਯੋ. ਧਞ੍ਞਫਲਸ੍ਸ ਨਾਤਿਪਰਿਣਤਕਾਲੇ ਪੁਥੁਕਕਾਲੇ. ਲਾਯਨੇਤਿ ਸਸ੍ਸਲਾਯਨੇ. ਯਥਾ ਲੂਨਂ ਹਤ੍ਥਕਂ ਕਤ੍ਵਾ ਵੇਣਿਵਸੇਨ ਬਨ੍ਧਨਂ ਵੇਣਿਕਰਣਂ. ਵੇਣਿਯੋ ਪਨ ਪੁਰਿਸਭਾਰਵਸੇਨ ਬਨ੍ਧਨਂ ਕਲਾਪੋ. ਖਲੇ ਕਲਾਪਾਨਂ ਠਪਨਦਿਵਸੇ ਅਗ੍ਗਂ ਗਹੇਤ੍ਵਾ ਦਾਨਂ ਖਲਗ੍ਗਂ. ਮਦ੍ਦਿਤ੍ਵਾ ਵੀਹੀਨਂ ਰਾਸਿਕਰਣਦਿਵਸੇ ਅਗ੍ਗਂ ਗਹੇਤ੍ਵਾ ਦਾਨਂ ਭਣ੍ਡਗ੍ਗਂ. ਕੋਟ੍ਠਾਗਾਰੇ ਧਞ੍ਞਸ੍ਸ ਪਕ੍ਖਿਪਨਦਿਵਸੇ ਦਾਨਂ ਕੋਟ੍ਠਗ੍ਗਂ. ਉਦ੍ਧਰਿਤ੍ਵਾਤਿ ਖਲਤੋ ਧਞ੍ਞਸ੍ਸ ਉਦ੍ਧਰਿਤ੍ਵਾ. ਨਵਨ੍ਨਂ ਅਗ੍ਗਦਾਨਾਨਂ ਦਿਨ੍ਨਤ੍ਤਾਤਿ ਇਦਂ ਤਸ੍ਸ ਰਤ੍ਤਞ੍ਞੂਨਂ ਅਗ੍ਗਭਾਵਤ੍ਥਾਯ ਕਤਾਭਿਨੀਹਾਰਾਨੁਰੂਪਂ ਪਵਤ੍ਤਿਤਸਾਵਕਪਾਰਮਿਯਾ ਚਿਣ੍ਣਨ੍ਤੇ ਪਵਤ੍ਤਿਤਤ੍ਤਾ ਵੁਤ੍ਤਂ. ਤਿਣ੍ਣਮ੍ਪਿ ਹਿ ਬੋਧਿਸਤ੍ਤਾਨਂ ਤਂਤਂਪਾਰਮਿਯਾ ਸਿਖਾਪ੍ਪਤ੍ਤਕਾਲੇ ਪਵਤ੍ਤਿਤਂ ਪੁਞ੍ਞਂ ਅਪੁਞ੍ਞਂ ਵਾ ਗਰੁਤਰਵਿਪਾਕਮੇਵ ਹੋਤਿ, ਧਮ੍ਮਸ੍ਸ ਚ ਸਬ੍ਬਪਠਮਂ ਸਚ੍ਛਿਕਿਰਿਯਾਯ ਵਿਨਾ ਕਥਂ ਰਤ੍ਤਞ੍ਞੂਨਂ ਅਗ੍ਗਭਾਵਸਿਦ੍ਧੀਤਿ. ਬਹੁਕਾਰਾ ਖੋ ਇਮੇ ਪਞ੍ਚਵਗ੍ਗਿਯਾਤਿ ਇਦਂ ਪਨ ਉਪਕਾਰਾਨੁਸ੍ਸਰਣਮਤ੍ਤਕਮੇਵ ਪਰਿਚਯਵਸੇਨ ਆਲ਼ਾਰੁਦਕਾਨੁਸ੍ਸਰਣਂ ਵਿਯ.

੨੮੫. ਵਿਵਰੇਤਿ ਮਜ੍ਝੇ. ਤੇਨਾਹ ‘‘ਤਿਗਾਵੁਤਨ੍ਤਰੇ ਠਾਨੇ’’ਤਿ. ਅਯੋਜਿਯਮਾਨੇ ਉਪਯੋਗਵਚਨਂ ਨ ਪਾਪੁਣਾਤਿ ਸਾਮਿਵਚਨਸ੍ਸ ਪਸਙ੍ਗੇ ਅਨ੍ਤਰਾ-ਸਦ੍ਦਯੋਗੇਨ ਉਪਯੋਗਵਚਨਸ੍ਸ ਇਚ੍ਛਿਤਤ੍ਤਾ. ਤੇਨਾਹ ‘‘ਅਨ੍ਤਰਾਸਦ੍ਦੇਨ ਪਨ ਯੁਤ੍ਤਤ੍ਤਾ ਉਪਯੋਗਵਚਨਂ ਕਤ’’ਨ੍ਤਿ.

ਸਬ੍ਬਂ ਤੇਭੂਮਕਧਮ੍ਮਂ ਅਭਿਭਵਿਤ੍ਵਾ ਪਰਿਞ੍ਞਾਭਿਸਮਯਵਸੇਨ ਅਤਿਕ੍ਕਮਿਤ੍ਵਾ. ਚਤੁਭੂਮਕਧਮ੍ਮਂ ਅਨਵਸੇਸਂ ਞੇਯ੍ਯਂ ਸਬ੍ਬਸੋ ਞੇਯ੍ਯਾਵਰਣਸ੍ਸ ਪਹੀਨਤ੍ਤਾ ਸਬ੍ਬਞ੍ਞੁਤਞ੍ਞਾਣੇਨ ਅਵੇਦਿਂ. ਰਜ੍ਜਨਦੁਸ੍ਸਨਮੁਯ੍ਹਨਾਦਿਨਾ ਕਿਲੇਸੇਨ. ਅਪ੍ਪਹਾਤਬ੍ਬਮ੍ਪਿ ਕੁਸਲਾਬ੍ਯਾਕਤਂ ਤਪ੍ਪਟਿਬਦ੍ਧਕਿਲੇਸਮਥਨੇਨ ਪਹੀਨਤ੍ਤਾ ਨ ਹੋਤੀਤਿ ਆਹ ‘‘ਸਬ੍ਬਂ ਤੇਭੂਮਕਧਮ੍ਮਂ ਜਹਿਤ੍ਵਾ ਠਿਤੋ’’ਤਿ. ਆਰਮ੍ਮਣਤੋਤਿ ਆਰਮ੍ਮਣਕਰਣਵਸੇਨ.

ਕਿਞ੍ਚਾਪਿ ਲੋਕਿਯਧਮ੍ਮਾਨਮ੍ਪਿ ਯਾਦਿਸੋ ਲੋਕਨਾਥਸ੍ਸ ਅਧਿਗਮੋ, ਨ ਤਾਦਿਸੋ ਅਧਿਗਮੋ ਪਰੂਪਦੇਸੋ ਅਤ੍ਥਿ, ਲੋਕੁਤ੍ਤਰਧਮ੍ਮੇ ਪਨਸ੍ਸ ਲੇਸੋਪਿ ਨਤ੍ਥੀਤਿ ਆਹ ‘‘ਲੋਕੁਤ੍ਤਰਧਮ੍ਮੇ ਮਯ੍ਹਂ ਆਚਰਿਯੋ ਨਾਮ ਨਤ੍ਥੀ’’ਤਿ. ਪਟਿਭਾਗਪੁਗ੍ਗਲੋਤਿ ਸੀਲਾਦੀਹਿ ਗੁਣੇਹਿ ਪਟਿਨਿਧਿਭੂਤੋ ਪੁਗ੍ਗਲੋ. ਸਹੇਤੁਨਾਤਿ ਸਹਧਮ੍ਮੇਨ ਸਪਾਟਿਹੀਰਕਤਾਯ. ਨਯੇਨਾਤਿ ਅਭਿਜਾਨਨਤਾਦਿਵਿਧਿਨਾ. ਚਤ੍ਤਾਰਿ ਸਚ੍ਚਾਨੀਤਿ ਇਦਂ ਤਬ੍ਬਿਨਿਮੁਤ੍ਤਸ੍ਸ ਞੇਯ੍ਯਸ੍ਸ ਅਭਾਵਤੋ ਵੁਤ੍ਤਂ. ਸਯਂ ਬੁਦ੍ਧੋਤਿ ਸਯਮੇਵ ਸਯਮ੍ਭੁਞਾਣੇਨ ਬੁਦ੍ਧੋ. ਵਿਗਤਪਰਿਲ਼ਾਹਤਾਯ ਸੀਤਿਭੂਤੋ. ਤਤੋ ਏਵ ਨਿਬ੍ਬੁਤੋ. ਆਹਞ੍ਛਨ੍ਤਿ ਆਹਨਿਸ੍ਸਾਮਿ. ਵੇਨੇਯ੍ਯਾਨਂ ਅਮਤਾਧਿਗਮਾਯ ਉਗ੍ਘੋਸਨਾਦਿਂ ਕਤ੍ਵਾ ਸਤ੍ਥੁ ਧਮ੍ਮਦੇਸਨਾ ਅਮਤਦੁਨ੍ਦੁਭੀਤਿ ਵੁਤ੍ਤਾ.

ਅਨਨ੍ਤਞਾਣੋ ਜਿਤਕਿਲੇਸੋਤਿ ਅਨਨ੍ਤਜਿਨੋ. ਏਵਮ੍ਪਿ ਨਾਮ ਭਵੇਯ੍ਯਾਤਿ ਏਵਂਵਿਧੇ ਨਾਮ ਰੂਪਰਤਨੇ ਈਦਿਸੇਨ ਞਾਣੇਨ ਭਵਿਤਬ੍ਬਨ੍ਤਿ ਅਧਿਪ੍ਪਾਯੋ. ਅਯਂ ਹਿਸ੍ਸ ਪਬ੍ਬਜ੍ਜਾਯ ਪਚ੍ਚਯੋ ਜਾਤੋ, ਕਤਾਧਿਕਾਰੋ ਚੇਸ. ਤਥਾ ਹਿ ਭਗਵਾ ਤੇਨ ਸਮਾਗਮਤ੍ਥਂ ਪਦਸਾਵ ਤਂ ਮਗ੍ਗਂ ਪਟਿਪਜ੍ਜਿ.

ਕੋਟ੍ਠਾਸਸਮ੍ਪਨ੍ਨਾਤਿ ਅਙ੍ਗਪਚ੍ਚਙ੍ਗਸਙ੍ਖਾਤਅਵਯਵਸਮ੍ਪਨ੍ਨਾ. ਅਟ੍ਟੀਯਤੀਤਿ ਅਟ੍ਟੋ ਹੋਤਿ, ਦੋਮਨਸ੍ਸਂ ਆਪਜ੍ਜਤੀਤਿ ਅਤ੍ਥੋ.

ਅਵਿਹਂ ਉਪਪਨ੍ਨਾਸੇਤਿ ਅਵਿਹੇਸੁ ਨਿਬ੍ਬਤ੍ਤਾ. ਵਿਮੁਤ੍ਤਾਤਿ ਅਗ੍ਗਫਲਵਿਮੁਤ੍ਤਿਯਾ ਵਿਮੁਤ੍ਤਾ. ਤੇ ਹਿਤ੍ਵਾ ਮਾਨੁਸਂ ਦੇਹਂ, ਦਿਬ੍ਬਯੋਗਂ ਉਪਜ੍ਝਗੁਨ੍ਤਿ ਤੇ ਉਪਕਾ ਦਯੋ ਮਾਨੁਸਂ ਅਤ੍ਤਭਾਵਂ ਜਹਿਤ੍ਵਾ ਓਰਮ੍ਭਾਗਿਯਸਂਯੋਜਨਪ੍ਪਹਾਨੇਨ ਅਵਿਹੇਸੁ ਨਿਬ੍ਬਤ੍ਤਮਤ੍ਤਾਵ ਅਗ੍ਗਮਗ੍ਗਾਧਿਗਮੇਨ ਦਿਬ੍ਬਯੋਗਂ ਉਦ੍ਧਮ੍ਭਾਗਿਯਸਂਯੋਜਨਂ ਸਮਤਿਕ੍ਕਮਿਂਸੁ.

੨੮੬. ਸਣ੍ਠਪੇਸੁਨ੍ਤਿ ‘‘ਨੇਵ ਅਭਿਵਾਦੇਤਬ੍ਬੋ’’ਤਿਆਦਿਨਾ (ਮਹਾਵ. ੧੨) ਸਣ੍ਠਂ ਕਿਰਿਯਾਕਾਰਂ ਅਕਂਸੁ. ਤੇਨਾਹ ‘‘ਕਤਿਕਂ ਅਕਂਸੂ’’ਤਿ. ਪਧਾਨਤੋਤਿ ਪੁਬ੍ਬੇ ਅਨੁਟ੍ਠਿਤਦੁਕ੍ਕਰਚਰਣਤੋ. ਪਭਾਵਿਤਨ੍ਤਿ ਵਾਚਾਸਮੁਟ੍ਠਾਨਂ, ਵਚੀਨਿਚ੍ਛਾਰਣਨ੍ਤਿ ਅਤ੍ਥੋ. ‘‘ਅਯਂ ਨ ਕਿਞ੍ਚਿ ਵਿਸੇਸਂ ਅਧਿਗਮਿਸ੍ਸਤੀ’’ਤਿ ਅਨੁਕ੍ਕਣ੍ਠਨਤ੍ਥਂ. ‘‘ਮਯਂ ਯਤ੍ਥ ਕਤ੍ਥਚਿ ਗਮਿਸ੍ਸਾਮਾ’’ਤਿ ਮਾ ਵਿਤਕ੍ਕਯਿਤ੍ਥ. ਓਭਾਸੋਤਿ ਵਿਪਸ੍ਸਨੋਭਾਸੋ. ਨਿਮਿਤ੍ਤਨ੍ਤਿ ਕਮ੍ਮਟ੍ਠਾਨਨਿਮਿਤ੍ਤਂ. ਏਕਪਦੇਨੇਵਾਤਿ ਏਕਵਚਨੇਨੇਵ. ‘‘ਅਨੇਨ ਪੁਬ੍ਬੇਪਿ ਨ ਕਿਞ੍ਚਿ ਮਿਚ੍ਛਾ ਵੁਤ੍ਤਪੁਬ੍ਬ’’ਨ੍ਤਿ ਸਤਿਂ ਲਭਿਤ੍ਵਾ. ਯਥਾਭੂਤਵਾਦੀਤਿ ਉਪ੍ਪਨ੍ਨਗਾਰਵਾ.

ਅਨ੍ਤੋਵਿਹਾਰੇਯੇਵ ਅਹੋਸਿ ਦਹਰਕੁਮਾਰੋ ਵਿਯ ਤੇਹਿ ਭਿਕ੍ਖੂਹਿ ਪਰਿਹਰਿਤੋ. ਮਲੇਤਿ ਸਂਕਿਲੇਸੇ. ਗਾਮਤੋ ਭਿਕ੍ਖੂਹਿ ਨੀਹਟਂ ਉਪਨੀਤਂ ਭਤ੍ਤਂ ਏਤਸ੍ਸਾਤਿ ਨੀਹਟਭਤ੍ਤੋ, ਤੇਨ ਨੀਹਟਭਤ੍ਤੇਨ ਭਗਵਤਾ. ਏਤ੍ਤਕਂ ਕਥਾਮਗ੍ਗਨ੍ਤਿ – ‘‘ਦ੍ਵੇਮਾ, ਭਿਕ੍ਖਵੇ, ਪਰਿਯੇਸਨਾ’’ਤਿ ਆਰਭਿਤ੍ਵਾ ਯਾਵ – ‘‘ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ ਪਦਂ, ਏਤ੍ਤਕਂ ਦੇਸਨਾਮਗ੍ਗਂ. ਕਾਮਞ੍ਚੇਤ੍ਥ – ‘‘ਤੁਮ੍ਹੇਪਿ ਮਮਞ੍ਚੇਵ ਪਞ੍ਚਵਗ੍ਗਿਯਾਨਞ੍ਚ ਮਗ੍ਗਂ ਆਰੂਲ਼੍ਹਾ, ਅਰਿਯਪਰਿਯੇਸਨਾ ਤੁਮ੍ਹਾਕਂ ਪਰਿਯੇਸਨਾ’’ਤਿ ਅਟ੍ਠਕਥਾਵਚਨਂ. ਤੇਨ ਪਨ – ‘‘ਸੋ ਖੋ ਅਹਂ, ਭਿਕ੍ਖਵੇ, ਅਤ੍ਤਨਾ ਜਾਤਿਧਮ੍ਮੋ ਸਮਾਨੋ…ਪੇ… ਅਸਂਕਿਲਿਟ੍ਠਂ ਅਨੁਤ੍ਤਰਂ ਯੋਗਕ੍ਖੇਮਂ ਨਿਬ੍ਬਾਨਂ ਅਜ੍ਝਗਮਨ੍ਤਿ, ਅਥ ਖੋ, ਭਿਕ੍ਖਵੇ, ਪਞ੍ਚਵਗ੍ਗਿਯਾ ਭਿਕ੍ਖੂ ਮਯਾ ਏਵਂ ਓਵਦਿਯਮਾਨਾ…ਪੇ… ਅਨੁਤ੍ਤਰਂ ਯੋਗਕ੍ਖੇਮਂ ਨਿਬ੍ਬਾਨਂ ਅਜ੍ਝਗਮਂਸੁ…ਪੇ… ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ ਇਮਸ੍ਸੇਵ ਸੁਤ੍ਤਪਦਸ੍ਸ ਅਤ੍ਥੋ ਵਿਭਾਵਿਤੋਤਿ ਕਤ੍ਵਾ ਵੁਤ੍ਤਂ ‘‘ਭਗਵਾ ਯਂ ਪੁਬ੍ਬੇ ਅਵਚ ਤੁਮ੍ਹੇਪਿ ਮਮਞ੍ਚੇਵ ਪਞ੍ਚਵਗ੍ਗਿਯਾਨਞ੍ਚ ਮਗ੍ਗਂ ਆਰੁਲ਼੍ਹਾ, ਅਰਿਯਪਰਿਯੇਸਨਾ ਤੁਮ੍ਹਾਕਂ ਪਰਿਯੇਸਨਾਤਿ. ਇਮਂ ਏਕਮੇਵ ਅਨੁਸਨ੍ਧਿਂ ਦਸ੍ਸੇਨ੍ਤੋ ਆਹਰੀ’’ਤਿ.

੨੮੭. ਅਨਗਾਰਿਯਾਨਮ੍ਪੀਤਿ ਪਬ੍ਬਜਿਤਾਨਮ੍ਪਿ. ਪਞ੍ਚਕਾਮਗੁਣਵਸੇਨ ਅਨਰਿਯਪਰਿਯੇਸਨਾ ਹੋਤਿ ਗਧਿਤਾਦਿਭਾਵੇਨ ਪਰਿਭੁਞ੍ਜਨਤੋ. ਮਿਚ੍ਛਾਜੀਵਵਸੇਨਪਿ ਅਨਰਿਯਪਰਿਯੇਸਨਾ ਹੋਤੀਤਿ ਤਤੋ ਵਿਸੇਸਨਤ੍ਥਂ ‘‘ਪਞ੍ਚਕਾਮਗੁਣਵਸੇਨਾ’’ਤਿ ਵੁਤ੍ਤਂ ਸਚ੍ਛਨ੍ਦਰਾਗਪਰਿਭੋਗਸ੍ਸ ਅਧਿਪ੍ਪੇਤਤ੍ਤਾ. ਇਦਾਨਿ ਚਤੂਸੁ ਪਚ੍ਚਯੇਸੁ ਕਾਮਗੁਣੇ ਨਿਦ੍ਧਾਰੇਤੁਂ ‘‘ਤਤ੍ਥਾ’’ਤਿਆਦਿ ਵੁਤ੍ਤਂ. ਪਰਿਭੋਗਰਸੋਤਿ ਪਰਿਭੋਗਪਚ੍ਚਯਪੀਤਿਸੋਮਨਸ੍ਸਂ. ਅਯਂ ਪਨ ਰਸਸਮਾਨਤਾਵਸੇਨ ਗਹਣਂ ਉਪਾਦਾਯ ‘‘ਰਸੋ’’ਤਿ ਵੁਤ੍ਤੋ, ਨ ਸਭਾਵਤੋ. ਸਭਾਵੇਨ ਗਹਣਂ ਉਪਾਦਾਯ ਪੀਤਿਸੋਮਨਸ੍ਸਂ ਧਮ੍ਮਾਰਮ੍ਮਣਂ ਸਿਯਾ, ਨ ਰਸਾਰਮ੍ਮਣਂ. ਅਪ੍ਪਚ੍ਚਵੇਕ੍ਖਣਪਰਿਭੋਗੋਤਿ ਪਚ੍ਚਵੇਕ੍ਖਣਰਹਿਤੋ ਪਰਿਭੋਗੋ, ਇਦਮਤ੍ਥਿਤਂ ਅਨਿਸ੍ਸਾਯ ਗਧਿਤਾਦਿਭਾਵੇਨ ਪਰਿਭੋਗੋਤਿ ਅਤ੍ਥੋ. ਗਧਿਤਾਤਿ ਤਣ੍ਹਾਯ ਬਦ੍ਧਾ. ਮੁਚ੍ਛਿਤਾਤਿ ਮੁਚ੍ਛਂ ਮੋਹਂ ਪਮਾਦਂ ਆਪਨ੍ਨਾ. ਅਜ੍ਝੋਗਾਲ਼੍ਹਾਤਿ ਅਧਿਓਗਾਲ਼੍ਹਾ, ਤਂ ਤਂ ਆਰਮ੍ਮਣਂ ਅਨੁਪਵਿਸਿਤ੍ਵਾ ਠਿਤਾ. ਆਦੀਨਵਂ ਅਪਸ੍ਸਨ੍ਤਾਤਿ ਸਚ੍ਛਨ੍ਦਰਾਗਪਰਿਭੋਗੇ ਦੋਸਂ ਅਜਾਨਨ੍ਤਾ. ਅਪਚ੍ਚਵੇਕ੍ਖਿਤਪਰਿਭੋਗਹੇਤੁਆਦੀਨਵਂ ਨਿਸ੍ਸਰਤਿ ਅਤਿਕ੍ਕਮਤਿ ਏਤੇਨਾਤਿ ਨਿਸ੍ਸਰਣਂ, ਪਚ੍ਚਵੇਕ੍ਖਣਞਾਣਂ.

ਪਾਸਰਾਸਿਨ੍ਤਿ ਪਾਸਸਮੁਦਾਯਂ. ਲੁਦ੍ਦਕੋ ਹਿ ਪਾਸਂ ਓਡ੍ਡੇਨ੍ਤੋ ਨ ਏਕਂਯੇਵ, ਨ ਚ ਏਕਸ੍ਮਿਂਯੇਵ ਠਾਨੇ ਓਡ੍ਡੇਤਿ, ਅਥ ਖੋ ਤਂਤਂਮਿਗਾਨਂ ਆਗਮਨਮਗ੍ਗਂ ਸਲ੍ਲਕ੍ਖੇਤ੍ਵਾ ਤਤ੍ਥ ਤਤ੍ਥ ਓਡ੍ਡੇਨ੍ਤੋ ਬਹੂਯੇਵ ਓਡ੍ਡੇਤਿ, ਤਸ੍ਮਾ ਤੇ ਚਿਤ੍ਤੇਨ ਏਕਤੋ ਗਹੇਤ੍ਵਾ ‘‘ਪਾਸਰਾਸੀ’’ਤਿ ਵੁਤ੍ਤਂ. ਵਾਗੁਰਸ੍ਸ ਵਾ ਪਾਸਪਦੇਸਾਨਂ ਬਹੁਭਾਵਤੋ ‘‘ਪਾਸਰਾਸੀ’’ਤਿ ਵੁਤ੍ਤਂ.

ਪਾਸਰਾਸਿਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.