੫. ਨਿਵਾਪਸੁਤ੍ਤਵਣ੍ਣਨਾ

੨੬੧. ਨਿਵਪ੍ਪਤੀਤਿ ਨਿਵਾਪੋ, ਨਿਵਾਪਂ ਵਤ੍ਤੇਤਿ, ਨਿਵਾਪਭੋਜਨਂ ਵਾ ਏਤਸ੍ਸਾਤਿ ਨੇਵਾਪਿਕੋ, ਨਿਵਾਪੇਨ ਮਿਗੇ ਪਲੋਭੇਤ੍ਵਾ ਗਣ੍ਹਨਕਮਾਗਵਿਕੋ. ਤਿਣਬੀਜਾਨੀਤਿ ਨਿਵਾਪਤਿਣਬੀਜਾਨਿ. ਵਪ੍ਪਨ੍ਤਿ ਸਸ੍ਸਂ ਵਿਯ ਵਪਿਤਬ੍ਬਟ੍ਠੇਨ ਵਪ੍ਪਂ. ‘‘ਮਯਂ ਵਿਯ ਅਞ੍ਞੇ ਕੇ ਈਦਿਸਂ ਲਭਿਸ੍ਸਨ੍ਤੀ’’ਤਿ ਮਾਨਮਦਂ ਆਪਜ੍ਜਿਸ੍ਸਨ੍ਤਿ. ਵਿਸ੍ਸਟ੍ਠਸਤਿਭਾਵਨ੍ਤਿ ਅਨੁਸ੍ਸਙ੍ਕਿਤਪਰਿਸਙ੍ਕਿਤਭਾਵਂ. ਤਿਰਚ੍ਛਾਨਾ ਹਿ ਵਿਜਾਤਿਯਬਲਵਤਿਰਚ੍ਛਾਨਵਸਨਟ੍ਠਾਨੇਸੁ ਸਾਸਙ੍ਕਾ ਉਬ੍ਬਿਗ੍ਗਹਦਯਾ ਅਪ੍ਪਮਤ੍ਤਾ ਹੋਨ੍ਤਿ ਵਿਸੇਸਤੋ ਮਾਗਵਿਕਾਦਿਮਨੁਸ੍ਸੂਪਚਾਰੇ, ਰਸਤਣ੍ਹਾਯ ਪਨ ਬਦ੍ਧਾ ਪਮਾਦਂ ਆਪਜ੍ਜਸ੍ਸਨ੍ਤਿ. ਨਿਵਪਤਿ ਏਤ੍ਥਾਤਿ ਨਿਵਾਪੋ, ਨਿਵਾਪਭੂਮਿ ਨਿਵਾਪਟ੍ਠਾਨਂ. ਤੇਨਾਹ ‘‘ਨਿਵਾਪਟ੍ਠਾਨੇ’’ਤਿ. ‘‘ਯਥਾਕਾਮਕਰਣੀਯਾ’’ਤਿ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਏਕਂ ਕਿਰਾ’’ਤਿਆਦਿ ਵੁਤ੍ਤਂ. ਤਤ੍ਥ ਨੀਵਾਰਵਨਂ ਵਿਯਾਤਿ ਨੀਵਾਰਸ੍ਸ ਸਮੂਹੋ ਵਿਯ. ਨੀਵਾਰੋ ਨਾਮ ਅਰਞ੍ਞੇ ਸਯਂਜਾਤਵੀਹਿਜਾਤਿ. ਮੇਘਮਾਲਾ ਵਿਯਾਤਿ ਮੇਘਘਟਾ ਵਿਯ. ਏਕਗ੍ਘਨਨ੍ਤਿ ਏਕਜ੍ਝਂ ਵਿਯ ਅਵਿਰਟ੍ਠਂ. ਪਕ੍ਕਮਨ੍ਤੀਤਿ ਆਸਙ੍ਕਪਰਿਸਙ੍ਕਾ ਹੁਤ੍ਵਾ ਪਕ੍ਕਮਨ੍ਤਿ. ਕਣ੍ਣੇ ਚਾਲਯਮਾਨਾਤਿ ਅਨਾਸਙ੍ਕਨ੍ਤਾਨਂ ਪਹਟ੍ਠਾਕਾਰਦਸ੍ਸਨਂ. ਮਣ੍ਡਲਗੁਮ੍ਬਨ੍ਤਿ ਮਣ੍ਡਲਕਾਕਾਰੇਨ ਠਿਤਂ ਗੁਮ੍ਬਂ.

੨੬੨. ਕਪ੍ਪੇਤ੍ਵਾਤਿ ਉਪਮਾਭਾਵੇਨ ਪਰਿਕਪ੍ਪੇਤ੍ਵਾ. ਮਿਗੇ ਅਤ੍ਤਨੋ ਵਸੇ ਵਤ੍ਤਾਪਨਂ ਵਸੀਭਾਵੋ. ਸੋ ਏਵ ਇਜ੍ਝਨਟ੍ਠੇਨ ਇਦ੍ਧਿ, ਪਭਾਵਨਟ੍ਠੇਨ ਆਨੁਭਾਵੋ.

੨੬੩. ਭਯੇਨ ਭੋਗਤੋਤਿ ਭਯੇਨ ਸਹ ਸਭਯਂ ਨਿਵਾਪਪਰਿਭੋਗਤੋ. ਬਲਵੀਰਿਯਨ੍ਤਿ ਕਾਯਬਲਞ੍ਚ ਉਟ੍ਠਾਨਵੀਰਿਯਞ੍ਚ. ਅਟ੍ਠਕਥਾਯਂ ਪਨ ਬਲਮੇਵ ਵੀਰਿਯਂ. ਬਲਨ੍ਤਿ ਚ ਸਰੀਰਬਲਂ, ਤਞ੍ਚ ਅਤ੍ਥਤੋ ਮਨਸਿਕਾਰਮਗ੍ਗੇਹਿ ਅਪਰਾਪਰਂ ਸਞ੍ਚਰਣਕਵਾਤੋਤਿ ਵੁਤ੍ਤਂ ‘‘ਅਪਰਾਪਰਂ ਸਞ੍ਚਰਣਵਾਯੋਧਾਤੂ’’ਤਿ.

੨੬੪. ਸਿਕ੍ਖਿਤਕੇਰਾਟਿਕਾਤਿ ਪਰਿਚਿਤਸਾਠੇਯ੍ਯਾ, ਵਞ੍ਚਕਾਤਿ ਅਤ੍ਥੋ. ਇਦ੍ਧਿਮਨ੍ਤੋ ਵਿਯ ਆਨੁਭਾਵਵਨ੍ਤੋ ਵਿਯ. ਪਚੁਰਜਨੇਹਿ ਪਰਭੂਤਾ ਜਾਤਾਤਿ ਪਰਜਨਾ, ਮਹਾਭੂਤਾ. ਤੇਨਾਹ ‘‘ਯਕ੍ਖਾ’’ਤਿ. ਸਮਨ੍ਤਾ ਸਪ੍ਪਦੇਸਨ੍ਤਿ ਸਮਨ੍ਤਤੋ ਪਦੇਸਵਨ੍ਤਂ ਵਿਪੁਲੋਕਾਸਸਨ੍ਨਿਵਾਸਟ੍ਠਾਨਂ. ਤਸ੍ਸ ਪਨ ਸਪ੍ਪਦੇਸਤਾ ਮਹਾਓਕਾਸਤਾਯਾਤਿ ਵੁਤ੍ਤਂ ‘‘ਮਹਨ੍ਤਂ ਓਕਾਸ’’ਨ੍ਤਿ.

੨੬੫. ਘਟ੍ਟੇਸ੍ਸਨ੍ਤੀਤਿ ‘‘ਸਭਯਸਮੁਟ੍ਠਾਨ’’ਨ੍ਤਿ ਸਞ੍ਞਾਦਾਨਵਸੇਨ ਚਿਤ੍ਤਂ ਚੇਤੇਸ੍ਸਨ੍ਤਿ, ਤਾਸੇਸ੍ਸਨ੍ਤੀਤਿ ਅਤ੍ਥੋ. ਪਰਿਚ੍ਚਜਿਸ੍ਸਨ੍ਤੀਤਿ ਨਿਬ੍ਬਿਸਿਸ੍ਸਨ੍ਤਿ. ਮਹਲ੍ਲਕੋਤਿ ਜਾਤਿਯਾ ਮਹਲ੍ਲਕੋ ਜਿਣ੍ਣੋ. ਦੁਬ੍ਬਲੋਤਿ ਬ੍ਯਾਧਿਵਸੇਨ, ਪਕਤਿਯਾ ਵਾ ਬਲਵਿਰਹਿਤੋ.

੨੬੭. ਨਿਵਾਪਸਦਿਸਤਾਯ ਨਿਵਾਪੋਤਿ ਵਾ. ਲੋਕਪਰਿਯਾਪਨ੍ਨਂ ਹੁਤ੍ਵਾ ਕਿਲੇਸੇਹਿ ਆਮਸਿਤਬ੍ਬਤਾਯ ਲੋਕਾਮਿਸਾਨੀਤਿ ਵਾ. ਵਟ੍ਟੇ ਆਮਿਸਭੂਤਤ੍ਤਾ ਵਟ੍ਟਾਮਿਸਭੂਤਾਨਂ. ਵਸਂ ਵਤ੍ਤੇਤੀਤਿ ਕਾਮਗੁਣੇਹਿ ਕਾਮਗੁਣੇ ਗਿਦ੍ਧੇ ਸਤ੍ਤੇ ਤਸ੍ਸੇਵ ਗੇਧਸ੍ਸ ਵਸੇਨ ਅਤ੍ਤਨੋ ਵਸੇ ਵਤ੍ਤੇਤੀਤਿ. ਤੇਨਾਹ –

‘‘ਅਨ੍ਤਲਿਕ੍ਖਚਰੋ ਪਾਸੋ, ਯ੍ਵਾਯਂ ਚਰਤਿ ਮਾਨਸੋ;

ਤੇਨ ਤਂ ਬਾਧਯਿਸ੍ਸਾਮਿ, ਨ ਮੇ ਸਮਣ ਮੋਕ੍ਖਸੀ’’ਤਿ. (ਸਂ. ਨਿ. ੧.੧੫੧; ਮਹਾਵ. ੩੩);

ਅਯਨ੍ਤਿ ਪਠਮਮਿਗਜਾਤੂਪਮਾ. ਵਾਨਪਤ੍ਥਸ੍ਸ ਸਤੋਵ ਪਪਞ੍ਚਪਰਦਤ੍ਤਿਕਾਦਿਸਪੁਤ੍ਤਦਾਰਨਿਕ੍ਖਮਨਂ ਸਨ੍ਧਾਯਾਹ ‘‘ਸਪੁਤ੍ਤਭਰਿਯਪਬ੍ਬਜ੍ਜਾਯਾ’’ਤਿ.

੨੬੮. ਕਾਮਤੋ ਚਿਤ੍ਤਸ੍ਸ ਵਿਮੁਤ੍ਤਿ ਇਧ ਚੇਤੋਵਿਮੁਤ੍ਤੀਤਿ ਅਧਿਪ੍ਪੇਤਾਤਿ ਆਹ ‘‘ਚੇਤੋਵਿਮੁਤ੍ਤਿ ਨਾਮ…ਪੇ… ਉਪ੍ਪਨ੍ਨਅਜ੍ਝਾਸਯੋ’’ਤਿ. ਕਾਮੇ ਵਿਸ੍ਸਜ੍ਜੇਤ੍ਵਾ ਪੁਨ ਤਤ੍ਥ ਨਿਮੁਗ੍ਗਤਾਯ ਦੁਤਿਯਸਮਣਬ੍ਰਾਹ੍ਮਣਾ ਦੁਤਿਯਮਿਗਜਾਤੂਪਮਾ ਵੁਤ੍ਤਾ.

੨੬੯. ਤਤਿਯਸਮਣਬ੍ਰਾਹ੍ਮਣਾ ਯਥਾਪਰਿਚ੍ਚਤ੍ਤੇ ਕਾਮੇ ਪਰਿਚ੍ਚਜਿਤ੍ਵਾ ਏਵਂ ਠਿਤਾ, ਨ ਦੁਤਿਯਾ ਵਿਯ ਤਤ੍ਥ ਨਿਮੁਗ੍ਗਾਤਿ ਅਧਿਪ੍ਪਾਯੇਨ ‘‘ਕਿਂ ਪਨ ਤੇ ਅਕਂਸੂ’’ਤਿ ਪੁਚ੍ਛਤਿ. ਇਤਰੇ ਕਾਮਂ ਉਜੁਕਂ ਕਾਮਗੁਣੇਸੁ ਨ ਨਿਮੁਗ੍ਗਾ, ਪਰਿਯਾਯੇਨ ਪਨ ਨਿਮੁਗ੍ਗਾ ਦਿਟ੍ਠਿਜਾਲੇਨ ਚ ਅਜ੍ਝੋਤ੍ਥਟਾਤਿ ਦਸ੍ਸੇਨ੍ਤੋ ‘‘ਗਾਮਨਿਗਮਜਨਪਦਰਾਜਧਾਨਿਯੋ’’ਤਿਆਦਿਮਾਹ. ਦਿਟ੍ਠਿਜਾਲਮ੍ਪਿ ਤਣ੍ਹਾਜਾਲਾਨੁਗਤਮੇਵਾਤਿ ਆਹ ‘‘ਮਾਰਸ੍ਸ ਪਾਪਿਮਤੋ ਦਿਟ੍ਠਿਜਾਲੇਨ ਪਰਿਕ੍ਖਿਪਿਤ੍ਵਾ’’ਤਿ.

੨੭੧. ਖਨ੍ਧਕਿਲੇਸਾਭਿਸਙ੍ਖਾਰਮਾਰਾ ਵਾ ਇਧ ਮਾਰਗ੍ਗਹਣੇਨ ਗਹਿਤਾਤਿ ਦਟ੍ਠਬ੍ਬਂ. ਅਕ੍ਖੀਨਿ ਭਿਨ੍ਦਿ ਦਟ੍ਠੁਂ ਅਸਮਤ੍ਥਭਾਵਾਪਾਦਨੇਨ. ਤੇਨਾਹ ‘‘ਵਿਪਸ੍ਸਨਾਪਾਦਕਜ੍ਝਾਨ’’ਨ੍ਤਿਆਦਿ. ਕਿਞ੍ਚਾਪਿ ਮਾਰੋ ਯਂ ਕਿਞ੍ਚਿ ਝਾਨਂ ਸਮਾਪਨ੍ਨਸ੍ਸਪਿ ਭਿਕ੍ਖੁਨੋ ਚਿਤ੍ਤਂ ਇਮਂ ਨਾਮ ਆਰਮ੍ਮਣਂ ਨਿਸ੍ਸਾਯ ਵਤ੍ਤਤੀਤਿ ਨ ਜਾਨਾਤਿ, ਇਧਾਧਿਪ੍ਪੇਤਸ੍ਸ ਪਨ ਭਿਕ੍ਖੁਨੋ ਵਸੇਨ ‘‘ਵਿਪਸ੍ਸਨਾਪਾਦਕਜ੍ਝਾਨ’’ਨ੍ਤਿ ਵੁਤ੍ਤਂ. ਤੇਨੇਵ ਪਰਿਯਾਯੇਨਾਤਿ ‘‘ਨ ਮਾਰਸ੍ਸ ਅਕ੍ਖੀਨਿ ਭਿਨ੍ਦੀ’’ਤਿ ਏਵਮਾਦਿਨਾ ਯਥਾਵੁਤ੍ਤਪਰਿਯਾਯੇਨ. ਅਦਸ੍ਸਨਂ ਗਤੋਤਿ ਏਤ੍ਥਾਪਿ ਏਸੇਵ ਨਯੋ. ਚਕ੍ਖੁਸ੍ਸ ਪਦਂ ਪਤਿਟ੍ਠਾਤਿ ਚ ਇਧ ਆਰਮ੍ਮਣਂ ਅਧਿਪ੍ਪੇਤਂ ਤਂ ਪਰਿਗ੍ਗਯ੍ਹ ਪਵਤ੍ਤਨਤੋਤਿ ਆਹ ‘‘ਅਪ੍ਪਤਿਟ੍ਠਂ ਨਿਰਾਰਮ੍ਮਣ’’ਨ੍ਤਿ. ਸੋਤਿ ਮਾਰੋ. ਦਿਸ੍ਵਾਤਿ ਦਸ੍ਸਨਹੇਤੁ. ਯਸ੍ਮਾ ਮਗ੍ਗੇਨ ਚਤੁਸਚ੍ਚਦਸ੍ਸਨਹੇਤੁ ਆਸਵਾ ਨ ਪਰਿਕ੍ਖੀਣਾ. ਫਲਕ੍ਖਣੇ ਹਿ ਤੇ ਖੀਣਾਤਿ ਵੁਚ੍ਚਨ੍ਤੀਤਿ.

ਲੋਕੇਤਿ ਸਤ੍ਤਲੋਕੇ ਸਙ੍ਖਾਰਲੋਕੇ ਚ. ਸਤ੍ਤਵਿਸਤ੍ਤਭਾਵੇਨਾਤਿ ਲਗ੍ਗਭਾਵੇਨ ਚੇਵ ਸਵਿਸੇਸਂ ਆਸਤ੍ਤਭਾਵੇਨ ਚ. ਅਥ ਵਾਤਿਆਦਿਨਾ ਨਿਦ੍ਦੇਸਨਯਵਸੇਨ (ਮਹਾਨਿ. ੩, ਚੂਲ਼ਨਿ. ਮੇਤ੍ਤਗੂਮਾਣਵਪੁਚ੍ਛਾਨਿਦ੍ਦੇਸ ੨੨, ੨੩; ਚੂਲ਼ਨਿ. ਖਗ੍ਗਵਿਸਾਣਸੁਤ੍ਤਨਿਦ੍ਦੇਸ ੧੨੪) ਵਿਸਤ੍ਤਿਕਾਪਦਂ ਨਿਦ੍ਦਿਸਤਿ. ਵਿਸਤਾਤਿ ਵਿਤ੍ਥਟਾ ਰੂਪਾਦੀਸੁ ਤੇਭੂਮਕਧਮ੍ਮੇਸੁ ਬ੍ਯਾਪਨਵਸੇਨ ਵਿਸਟਾਤਿ ਪੁਰਿਮਵਚਨਮੇਵ ਤਕਾਰਸ੍ਸ ਟਕਾਰਂ ਕਤ੍ਵਾ ਵੁਤ੍ਤਂ. ਵਿਸਾਲਾਤਿ ਵਿਪੁਲਾ. ਵਿਸਕ੍ਕਤੀਤਿ ਪਰਿਸਕ੍ਕਤਿ ਸਹਤਿ. ਰਤ੍ਤੋ ਹਿ ਰਾਗਵਤ੍ਥੁਨਾ ਪਾਦੇਨ ਤਾਲਿਯਮਾਨੋਪਿ ਸਹਤਿ. ਓਸਕ੍ਕਨਂ, ਵਿਪ੍ਫਨ੍ਦਨਂ ਵਾ ਵਿਸਕ੍ਕਨਨ੍ਤਿਪਿ ਵਦਨ੍ਤਿ. ਵਿਸਂਹਰਤੀਤਿ ਯਥਾ ਤਥਾ ਕਾਮੇਸੁ ਆਨਿਸਂਸਂ ਦਸ੍ਸੇਨ੍ਤੀ ਵਿਵਿਧੇਹਿ ਆਕਾਰੇਹਿ ਨੇਕ੍ਖਮ੍ਮਾਭਿਮੁਖਪ੍ਪਵਤ੍ਤਿਤੋ ਚਿਤ੍ਤਂ ਸਂਹਰਤਿ ਸਙ੍ਖਿਪਤਿ, ਵਿਸਂ ਵਾ ਦੁਕ੍ਖਂ, ਤਂ ਹਰਤਿ ਉਪਨੇਤੀਤਿ ਅਤ੍ਥੋ. ਵਿਸਂਵਾਦਿਕਾਤਿ ਅਨਿਚ੍ਚਾਦਿਂ ਨਿਚ੍ਚਾਦਿਤੋ ਗਣ੍ਹਾਪੇਨ੍ਤੀ ਵਿਸਂਵਾਦਿਕਾ ਹੋਤਿ. ਦੁਕ੍ਖਨਿਬ੍ਬਤ੍ਤਕਸ੍ਸ ਕਮ੍ਮਸ੍ਸ ਹੇਤੁਭਾਵਤੋ ਵਿਸਮੂਲਾ, ਵਿਸਂ ਵਾ ਦੁਕ੍ਖਦੁਕ੍ਖਾਦਿਭੂਤਾ ਵੇਦਨਾ ਮੂਲਂ ਏਤਿਸ੍ਸਾਤਿ ਵਿਸਮੂਲਾ. ਦੁਕ੍ਖਸਮੁਦਯਤ੍ਤਾ ਵਿਸਂ ਫਲਂ ਏਤਿਸ੍ਸਾਤਿ ਵਿਸਫਲਾ. ਤਣ੍ਹਾਯ ਰੂਪਾਦਿਕਸ੍ਸ ਦੁਕ੍ਖਸ੍ਸੇਵ ਪਰਿਭੋਗੋ ਹੋਤਿ, ਨ ਅਮਤਸ੍ਸਾਤਿ ਸਾ ‘‘ਵਿਸਪਰਿਭੋਗਾ’’ਤਿ ਵੁਤ੍ਤਾ. ਸਬ੍ਬਤ੍ਥ ਨਿਰੁਤ੍ਤਿਵਸੇਨ ਸਦ੍ਦਸਿਦ੍ਧਿ ਵੇਦਿਤਬ੍ਬਾ. ਯੋ ਪਨੇਤ੍ਥ ਪਧਾਨੋ ਅਤ੍ਥੋ, ਤਂ ਦਸ੍ਸੇਤੁਂ ਪੁਨ ‘‘ਵਿਸਾਲਾ ਵਾ ਪਨਾ’’ਤਿਆਦਿ ਵੁਤ੍ਤਂ. ਨਿਤ੍ਤਿਣ੍ਣੋ ਉਤ੍ਤਿਣ੍ਣੋਤਿ ਉਪਸਗ੍ਗਵਸੇਨ ਪਦਂ ਵਡ੍ਢਿਤਂ. ਨਿਰਵਸੇਸਤੋ ਵਾ ਤਿਣ੍ਣੋ ਨਿਤ੍ਤਿਣ੍ਣੋ. ਤੇਨ ਤੇਨ ਮਗ੍ਗੇਨ ਉਦ੍ਧਮੁਦ੍ਧਂ ਤਿਣ੍ਣੋ ਉਤ੍ਤਿਣ੍ਣੋ. ਯਂ ਪਨੇਤ੍ਥ ਅਤ੍ਥਤੋ ਅਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਮੇਵ.

ਨਿਵਾਪਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.