੯. ਦ੍ਵੇਧਾਵਿਤਕ੍ਕਸੁਤ੍ਤਵਣ੍ਣਨਾ

੨੦੬. ਦ੍ਵੇ ਦ੍ਵੇ ਭਾਗੇਤਿ ਦ੍ਵੇ ਦ੍ਵੇ ਕੋਟ੍ਠਾਸੇ ਕਤ੍ਵਾ. ਕਾਮਞ੍ਚੇਤ੍ਥ ‘‘ਇਮਂ ਏਕਂ ਭਾਗਮਕਾਸਿਂ, ਇਮਂ ਦੁਤਿਯਭਾਗਮਕਾਸਿ’’ਨ੍ਤਿ ਵਚਨਤੋ ਸਬ੍ਬੇਪਿ ਵਿਤਕ੍ਕਾ ਸਂਕਿਲੇਸਵੋਦਾਨਵਿਭਾਗੇਨ ਦ੍ਵੇਵ ਭਾਗਾ ਕਤਾ, ਅਪਰਾਪਰੁਪ੍ਪਤ੍ਤਿਯਾ ਪਨੇਤੇਸਂ ਅਭਿਣ੍ਹਾਚਾਰਂ ਉਪਾਦਾਯ ਪਾਲ਼ਿਯਂ ‘‘ਦ੍ਵਿਧਾ ਕਤ੍ਵਾ’’ਤਿ ਆਮੇਡਿਤਵਚਨਨ੍ਤਿ ‘‘ਦ੍ਵੇ ਦ੍ਵੇ ਭਾਗੇ ਕਤ੍ਵਾ’’ਤਿ ਆਮੇਡਿਤਵਚਨਵਸੇਨੇਵ ਵੁਤ੍ਤੋ. ਅਥ ਵਾ ਭਾਗਦ੍ਵਯਸ੍ਸ ਸਪ੍ਪਟਿਭਾਗਤਾਯ ਤਤ੍ਥ ਯਂ ਯਂ ਦ੍ਵਯਮ੍ਪਿ ਖੋ ਉਜੁਵਿਪਚ੍ਚਨੀਕਂ, ਤਂ ਤਂ ਵਿਸੁਂ ਵਿਸੁਂ ਗਹੇਤੁਕਾਮੋ ਭਗਵਾ ਆਹ ‘‘ਦ੍ਵਿਧਾ ਕਤ੍ਵਾ ਵਿਤਕ੍ਕੇ ਵਿਹਰੇਯ੍ਯ’’ਨ੍ਤਿ. ਏਵਂ ਪਨ ਚਿਨ੍ਤੇਤ੍ਵਾ ਤਤ੍ਥ ਮਿਚ੍ਛਾਵਿਤਕ੍ਕਾਨਂ ਸਮ੍ਮਾਵਿਤਕ੍ਕਾਨਞ੍ਚ ਅਨਵਸੇਸਂ ਅਸਙ੍ਕਰਤੋ ਚ ਗਹਿਤਭਾਵਂ ਦਸ੍ਸੇਨ੍ਤੋ ‘‘ਇਮਂ ਏਕਂ ਭਾਗਮਕਾਸਿਂ, ਇਮਂ ਦੁਤਿਯਭਾਗਮਕਾਸਿ’’ਨ੍ਤਿ ਅਵੋਚ. ਕਾਮਪਟਿਸਂਯੁਤ੍ਤੋਤਿ ਕਾਮਰਾਗਸਙ੍ਖਾਤੇਨ ਕਾਮੇਨ ਸਮ੍ਪਯੁਤ੍ਤੋ, ਕਾਮੇਨ ਪਟਿਬਦ੍ਧੋ ਵਾ. ਸੇਸੇਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਬ੍ਯਾਪਜ੍ਜਤਿ ਚਿਤ੍ਤਂ ਏਤੇਨਾਤਿ ਬ੍ਯਾਪਾਦੋ, ਦੋਸੋ. ਵਿਹਿਂਸਤਿ ਏਤਾਯ ਸਤ੍ਤੇ, ਵਿਹਿਂਸਨਂ ਵਾ ਤੇਸਂ ਏਤਨ੍ਤਿ ਵਿਹਿਂਸਾ, ਪਰੇਸਂ ਵਿਹੇਠਨਾਕਾਰੇਨ ਪਵਤ੍ਤਸ੍ਸ ਕਰੁਣਾਪਟਿਪਕ੍ਖਸ੍ਸ ਪਾਪਧਮ੍ਮਸ੍ਸੇਤਂ ਅਧਿਵਚਨਂ. ਅਜ੍ਝਤ੍ਤਨ੍ਤਿ ਅਜ੍ਝਤ੍ਤਧਮ੍ਮਾਰਮ੍ਮਣਮਾਹ. ਬਹਿਦ੍ਧਾਤਿ ਬਾਹਿਰਧਮ੍ਮਾਰਮ੍ਮਣਂ. ਓਲ਼ਾਰਿਕੋਤਿ ਬਹਲਕਾਮਰਾਗਾਦਿਪਟਿਸਂਯੁਤ੍ਤੋ. ਤਬ੍ਬਿਪਰਿਯਾਯੇਨ ਸੁਖੁਮੋ. ਵਿਤਕ੍ਕੋਅਕੁਸਲਪਕ੍ਖਿਕੋਯੇਵਾਤਿ ਇਮਿਨਾ ਵਿਤਕ੍ਕਭਾਵਸਾਮਞ੍ਞੇਨ ਤਤ੍ਥਾਪਿ ਅਕੁਸਲਭਾਵਸਾਮਞ੍ਞੇਨ ਏਕਭਾਗਕਰਣਂ, ਨ ਏਕਚਿਤ੍ਤੁਪ੍ਪਾਦਪਰਿਯਾਪਨ੍ਨਤਾਦਿਵਸੇਨਾਤਿ ਦਸ੍ਸੇਤਿ.

ਨੇਕ੍ਖਮ੍ਮਂ ਵੁਚ੍ਚਤਿ ਲੋਭਾਤਿਕ੍ਕਨ੍ਤਤ੍ਤਾ ਪਠਮਜ੍ਝਾਨਂ, ਸਬ੍ਬਾਕੁਸਲੇਹਿ ਨਿਕ੍ਖਨ੍ਤਤ੍ਤਾ ਸਬ੍ਬਂ ਕੁਸਲਂ. ਇਧ ਪਨ ਕਾਮਵਿਤਕ੍ਕਪਟਿਪਕ੍ਖਸ੍ਸ ਅਧਿਪ੍ਪੇਤਤ੍ਤਾ ਆਹ ‘‘ਕਾਮੇਹਿ ਨਿਸ੍ਸਟੋ ਨੇਕ੍ਖਮ੍ਮਪਟਿਸਂਯੁਤ੍ਤੋ ਵਿਤਕ੍ਕੋ’’ਤਿ. ਸੋਤਿ ਨੇਕ੍ਖਮ੍ਮਵਿਤਕ੍ਕੋ. ਯਾਵ ਪਠਮਜ੍ਝਾਨਾਤਿ ਪਠਮਸਮਨ੍ਨਾਹਾਰਤੋ ਪਟ੍ਠਾਯ ਯਾਵ ਪਠਮਜ੍ਝਾਨਂ ਏਤ੍ਥੁਪ੍ਪਨ੍ਨੋ ਵਿਤਕ੍ਕੋ ਨੇਕ੍ਖਮ੍ਮਵਿਤਕ੍ਕੋਯੇਵ. ਪਠਮਜ੍ਝਾਨਨ੍ਤਿ ਚ ਇਦਂ ਤਤੋ ਪਰਂ ਵਿਤਕ੍ਕਾਭਾਵਤੋ ਵੁਤ੍ਤਂ. ਨ ਬ੍ਯਾਪਜ੍ਜਤਿ ਚਿਤ੍ਤਂ ਏਤੇਨ, ਬ੍ਯਾਪਾਦਸ੍ਸ ਵਾ ਪਟਿਪਕ੍ਖੋਤਿ ਅਬ੍ਯਾਪਾਦੋ, ਮੇਤ੍ਤਾਪੁਬ੍ਬਭਾਗੋ ਮੇਤ੍ਤਾਭਾਵਨਾਰਮ੍ਭੋ. ਨ ਵਿਹਿਂਸਨ੍ਤਿ ਏਤਾਯ, ਵਿਹਿਂਸਾਯ ਵਾ ਪਟਿਪਕ੍ਖੋਤਿ ਅਵਿਹਿਂਸਾ, ਕਰੁਣਾਪੁਬ੍ਬਭਾਗੋ ਕਰੁਣਾਭਾਵਨਾਰਮ੍ਭੋ.

ਮਹਾਬੋਧਿਸਤ੍ਤਾਨਂ ਮਹਾਭਿਨਿਕ੍ਖਮਨਂ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਲਦ੍ਧਾਵਸਰਾ ਸਮ੍ਮਾਸਙ੍ਕਪ੍ਪਾ ਉਪਰੂਪਰਿ ਸਵਿਸੇਸਂ ਪਵਤ੍ਤਨ੍ਤੀਤਿ ਆਹ ‘‘ਛਬ੍ਬਸ੍ਸਾਨਿ…ਪੇ… ਪਵਤ੍ਤਿਂਸੂ’’ਤਿ. ਞਾਣਸ੍ਸ ਅਪਰਿਪਕ੍ਕਤ੍ਤਾ ਪੁਬ੍ਬਵਾਸਨਾਵਸੇਨ ਸਤਿਸਮ੍ਮੋਸਤੋ ਕਦਾਚਿ ਮਿਚ੍ਛਾਵਿਤਕ੍ਕਲੇਸੋਪਿ ਹੋਤਿਯੇਵਾਤਿ ਤਂ ਦਸ੍ਸੇਤੁਂ ‘‘ਸਤਿਸਮ੍ਮੋਸੇਨ…ਪੇ… ਤਿਟ੍ਠਨ੍ਤੀ’’ਤਿ ਆਹ. ਯਥਾ ਨਿਚ੍ਚਪਿਹਿਤੇਪਿ ਗੇਹੇ ਕਦਾਚਿ ਵਾਤਪਾਨੇ ਵਿਵਟਮਤ੍ਤੇ ਲਦ੍ਧਾਵਸਰੋ ਵਾਤੋ ਅਨ੍ਤੋ ਪਵਿਸੇਯ੍ਯ, ਏਵਂ ਗੁਤ੍ਤਿਨ੍ਦ੍ਰਿਯੇਪਿ ਬੋਧਿਸਤ੍ਤਸਨ੍ਤਾਨੇ ਸਤਿਸਮ੍ਮੋਸਵਸੇਨ ਲਦ੍ਧਾਵਸਰੋ ਅਕੁਸਲਵਿਤਕ੍ਕੋ ਉਪ੍ਪਜ੍ਜਿ, ਉਪ੍ਪਨ੍ਨੋ ਚ ਕੁਸਲਵਾਰਂ ਪਚ੍ਛਿਨ੍ਦਿਤ੍ਵਾ ਅਟ੍ਠਾਸਿ, ਅਥ ਮਹਾਸਤ੍ਤੋ ਤਂਮੁਹੁਤ੍ਤੁਪ੍ਪਨ੍ਨਮੇਵ ਪਟਿਵਿਨੋਦੇਤ੍ਵਾ ਤੇਸਂ ਆਯਤਿਂ ਅਨੁਪ੍ਪਾਦਾਯ ‘‘ਇਮੇ ਮਿਚ੍ਛਾਵਿਤਕ੍ਕਾ, ਇਮੇ ਸਮ੍ਮਾਵਿਤਕ੍ਕਾ’’ਤਿ ਯਾਥਾਵਤੋ ਤੇ ਪਰਿਚ੍ਛਿਨ੍ਦਿਤ੍ਵਾ ਮਿਚ੍ਛਾਵਿਤਕ੍ਕਾਨਂ ਅਵਸਰਂ ਅਦੇਨ੍ਤੋ ਸਮ੍ਮਾਵਿਤਕ੍ਕੇ ਪਰਿਵਡ੍ਢੇਸਿ. ਤੇਨ ਵੁਤ੍ਤਂ ‘‘ਮਯ੍ਹਂ ਇਮੇ’’ਤਿਆਦਿ.

੨੦੭. ਪਮਾਦੋ ਨਾਮ ਸਤਿਵਿਪ੍ਪਵਾਸੋਤਿ ਆਹ ‘‘ਅਪ੍ਪਮਤ੍ਤਸ੍ਸਾਤਿ ਸਤਿਯਾ ਅਵਿਪ੍ਪਵਾਸੇ ਠਿਤਸ੍ਸਾ’’ਤਿ. ਆਤਾਪਵੀਰਿਯਵਨ੍ਤਸ੍ਸਾਤਿ ਕਿਲੇਸਾਨਂ ਨਿਗ੍ਗਣ੍ਹਨਵੀਰਿਯਵਤੋ. ਪੇਸਿਤਚਿਤ੍ਤਸ੍ਸਾਤਿ ਭਵਵਿਮੋਕ੍ਖਾਯ ਵਿਸ੍ਸਟ੍ਠਚਿਤ੍ਤਸ੍ਸ ਕਾਯੇ ਚ ਜੀਵਿਤੇ ਚ ਨਿਰਪੇਕ੍ਖਸ੍ਸ. ‘‘ਏਵਂ ਪਟਿਪਾਕਤਿਕੋ ਜਾਤੋ’’ਤਿ ਅਤ੍ਤਨੋ ਅਤ੍ਤਭਾਵਂ ਨਿਸ੍ਸਾਯ ਪਵਤ੍ਤਂ ਸੋਮਨਸ੍ਸਾਕਾਰਂ ਗੇਹਸ੍ਸਿਤਸੋਮਨਸ੍ਸਪਕ੍ਖਿਕਂ ਅਕਾਸਿ, ਪਞ੍ਞਾਮਹਨ੍ਤਤਾਯ ਸੁਖੁਮਦਸ੍ਸਿਤਾ.

ਅਪਰਿਞ੍ਞਾਯਂ ਠਿਤਸ੍ਸਾਤਿ ਨ ਪਰਿਞ੍ਞਾਯਂ ਠਿਤਸ੍ਸ, ਅਪਰਿਗ੍ਗਹਿਤਪਰਿਞ੍ਞਸ੍ਸਾਤਿ ਅਤ੍ਥੋ. ਵਿਤਕ੍ਕੋ…ਪੇ… ਏਤਾਨਿ ਤੀਣਿ ਨਾਮਾਨਿ ਲਭਤੀਤਿ ਤਾਦਿਸਸ੍ਸ ਉਪ੍ਪਨ੍ਨੋ ਮਿਚ੍ਛਾਵਿਤਕ੍ਕੋ ਯਥਾਰਹਂ ਅਤ੍ਤਬ੍ਯਾਬਾਧਕੋ ਉਭਯਬ੍ਯਾਬਾਧਕੋ ਚ ਨ ਹੋਤੀਤਿ ਨ ਵਤ੍ਤਬ੍ਬੋ ਤਂ ਸਭਾਵਾਨਤਿਵਤ੍ਤਨਤੋਤਿ ਅਧਿਪ੍ਪਾਯੋ. ਅਨੁਪ੍ਪਨ੍ਨਾਨੁਪ੍ਪਾਦਉਪ੍ਪਨ੍ਨਪਰਿਹਾਨਿਨਿਮਿਤ੍ਤਤਾਯ ਪਞ੍ਞਂ ਨਿਰੋਧੇਤੀਤਿ ਪਞ੍ਞਾਨਿਰੋਧਿਕੋ. ਤੇਨਾਹ ‘‘ਅਨੁਪ੍ਪਨ੍ਨਾਯਾ’’ਤਿਆਦਿ. ਨਤ੍ਥਿਭਾਵਂ ਗਚ੍ਛਤੀਤਿ ਪਟਿਸਙ੍ਖਾਨਬਲੇਨ ਵਿਕ੍ਖਮ੍ਭਨਪ੍ਪਹਾਨਮਾਹ. ਨਿਰੁਜ੍ਝਤੀਤਿਆਦੀਹਿਪਿ ਤਦੇਵ ਵਦਤਿ. ਵਿਗਤਨ੍ਤਨ੍ਤਿਆਦੀਹਿ ਪਨ ਸਮੂਲਂ ਉਦ੍ਧਟਂ ਵਿਯ ਤਦਾ ਅਪ੍ਪਵਤ੍ਤਨਕਂ ਅਕਾਸਿਨ੍ਤਿ ਵਦਤਿ.

੨੦੮. ਚਿਤ੍ਤਵਿਪਰਿਣਾਮਭਾਵੋ ਚਿਤ੍ਤਸ੍ਸ ਅਞ੍ਞਥਤ੍ਤਂ ਪਕਤਿਚਿਤ੍ਤਵਿਗਮੋ. ਅਨੇਕਗ੍ਗਤਾਕਾਰੋ ਵਿਕ੍ਖੇਪੋ. ਤਤ੍ਥ ਵਿਤਕ੍ਕੇਨ ਚਿਤ੍ਤਂ ਵਿਹਞ੍ਞਮਾਨਂ ਵਿਯ ਹੋਤੀਤਿ ਆਹ ‘‘ਤਂ ਗਹੇਤ੍ਵਾ ਵਿਹਿਂਸਾਵਿਤਕ੍ਕਂ ਅਕਾਸੀ’’ਤਿ. ਕਾਰੁਞ੍ਞਨ੍ਤਿ ਪਰਦੁਕ੍ਖਨਿਮਿਤ੍ਤਂ ਚਿਤ੍ਤਖੇਦਂ ਵਦਤਿ. ਤੇਨੇਵਾਹ – ‘‘ਪਰਦੁਕ੍ਖੇ ਸਤਿ ਸਾਧੂਨਂ ਮਨਂ ਕਮ੍ਪੇਤੀਤਿ ਕਰੁਣਾ’’ਤਿ (ਮ. ਨਿ. ਟੀ. ੧.੧; ਸਂ. ਨਿ. ਟੀ. ੧.੧.੧). ਨ੍ਤਿ ਕਰੁਣਾਯਨਵਸੇਨ ਪਵਤ੍ਤਚਿਤ੍ਤਪਕਮ੍ਪਨਂ ਸਨ੍ਧਾਯ ‘‘ਉਪ੍ਪਜ੍ਜਤਿ ਵਿਹਿਂਸਾਵਿਤਕ੍ਕੋ’’ਤਿ ਆਹ, ਨ ਸਤ੍ਤੇਸੁ ਵਿਹਿਂਸਾ ਪਵਤ੍ਤਤੀਤਿ ਅਧਿਪ੍ਪਾਯੋ.

ਤੇਨ ਤੇਨ ਚਸ੍ਸਾਕਾਰੇਨਾਤਿ ਯੇਨ ਯੇਨ ਆਕਾਰੇਨ ਭਿਕ੍ਖੁਨਾ ਅਨੁਵਿਤਕ੍ਕਿਤਂ ਅਨੁਵਿਚਾਰਿਤਂ, ਤੇਨ ਤੇਨ ਆਕਾਰੇਨਸ੍ਸ ਚੇਤਸੋ ਨਤਿ ਹੋਤਿ. ਤੇਨੇਵਾਹ ‘‘ਕਾਮਵਿਤਕ੍ਕਾਦੀਸੂ’’ਤਿਆਦਿ. ਪਹਾਸੀਤਿ ਕਾਲਵਿਪਲ੍ਲਾਸੇਨ ਵੁਤ੍ਤਨ੍ਤਿ ਆਹ ‘‘ਪਜਹਤੀ’’ਤਿ. ਪਹਾਨਂ ਪਨਸ੍ਸ ਸਿਦ੍ਧਮੇਵ ਪਟਿਪਕ੍ਖਸ੍ਸ ਸਿਦ੍ਧਤ੍ਤਾਤਿ ਦਸ੍ਸੇਤੁਂ ‘‘ਪਹਾਸੀ’’ਤਿ ਵੁਤ੍ਤਂ ਯਥਾ ‘‘ਅਸਾਮਿਭੋਗੇ ਗਾਮਿਕਾਆਦੀਯਿਂਸੂ’’ਤਿ. ਬਹੁਲਮਕਾਸੀਤਿ ਏਤ੍ਥਾਪਿ ਏਸੇਵ ਨਯੋ. ਏਵਮੇਵਂ ਨਮਤੀਤਿ ਕਾਮਵਿਤਕ੍ਕਸਮ੍ਪਯੋਗਾਕਾਰਮੇਵ ਹੋਤਿ, ਕਾਮਵਿਤਕ੍ਕਸਮ੍ਪਯੁਤ੍ਤਾਕਾਰੇਨ ਵਾ ਪਰਿਣਮਤਿ. ਕਸਨਂ ਕਿਟ੍ਠਂ, ਕਸੀਤਿ ਅਤ੍ਥੋ, ਤਨ੍ਨਿਬ੍ਬਤ੍ਤਤ੍ਤਾ ਪਨ ਕਾਰਣੂਪਚਾਰੇਨ ਸਸ੍ਸਂ ‘‘ਕਿਟ੍ਠ’’ਨ੍ਤਿ ਵੁਤ੍ਤਨ੍ਤਿ ਆਹ ‘‘ਸਸ੍ਸਸਮ੍ਬਾਧੇ’’ਤਿ. ਚਤ੍ਤਾਰਿ ਭਯਾਨੀਤਿ ਵਧਬਨ੍ਧਜਾਨਿਗਰਹਾਨਿ. ਉਪਦ੍ਦਵਨ੍ਤਿ ਅਨਤ੍ਥੁਪ੍ਪਾਦਭਾਵਂ. ਲਾਮਕਨ੍ਤਿ ਨਿਹੀਨਭਾਵਂ. ਧਨ੍ਧੇਸੂਤਿ ਅਤ੍ਤਨੋ ਖਨ੍ਧੇਸੁ. ਓਤਾਰਨ੍ਤਿ ਅਨੁਪ੍ਪਵੇਸਂ ਕਿਲੇਸਾਨਂ. ਸਂਕਿਲੇਸਤੋ ਵਿਸੁਜ੍ਝਨਂ ਵਿਸੁਦ੍ਧਿ, ਸਾ ਏਵ ਵੋਦਾਨਨ੍ਤਿ ਆਹ ‘‘ਵੋਦਾਨਪਕ੍ਖਨ੍ਤਿ ਇਦਂ ਤਸ੍ਸੇਵ ਵੇਵਚਨ’’ਨ੍ਤਿ.

੨੦੯. ਸਬ੍ਬਕੁਸਲਂ ਨੇਕ੍ਖਮ੍ਮਂ ਸਬ੍ਬਾਕੁਸਲਪਟਿਪਕ੍ਖਤਾਯ ਤਤੋ ਨਿਸ੍ਸਟਤ੍ਤਾ. ਨਿਬ੍ਬਾਨਮੇਵ ਨੇਕ੍ਖਮ੍ਮਂ ਸਬ੍ਬਕਿਲੇਸਤੋ ਸਬ੍ਬਸਙ੍ਖਤਤੋ ਚ ਨਿਸ੍ਸਟਤ੍ਤਾ. ਕਿਟ੍ਠਸਮ੍ਬਾਧਂ ਵਿਯ ਰੂਪਾਦਿਆਰਮ੍ਮਣਂ ਪਮਾਦੇ ਸਤਿ ਅਨਤ੍ਥੁਪ੍ਪਤ੍ਤਿਟ੍ਠਾਨਭਾਵਤੋ. ਕੂਟਗਾਵੋ ਵਿਯ ਕੂਟਚਿਤ੍ਤਂ ਦੁਦ੍ਦਮਭਾਵਤੋ. ਪਣ੍ਡਿਤਗੋਪਾਲਕੋ ਵਿਯ ਬੋਧਿਸਤ੍ਤੋ ਉਪਾਯਕੋਸਲ੍ਲਯੋਗਤੋ. ਚਤੁਬ੍ਬਿਧਭਯਂ ਵਿਯ ਮਿਚ੍ਛਾਵਿਤਕ੍ਕਾ ਸਪ੍ਪਟਿਭਯਭਾਵਤੋ. ਪਞ੍ਞਾਯ ਵੁਦ੍ਧਿ ਏਤਸ੍ਸ ਅਤ੍ਥੀਤਿ ਪਞ੍ਞਾਵੁਦ੍ਧਿਕੋ. ਵਿਹਞ੍ਞਤਿ ਚਿਤ੍ਤਂ ਏਤੇਨਾਤਿ ਵਿਘਾਤੋ, ਚੇਤੋਦੁਕ੍ਖਂ, ਤਪ੍ਪਕ੍ਖਿਕੋ ਵਿਘਾਤਪਕ੍ਖਿਕੋ, ਨ ਵਿਘਾਤਪਕ੍ਖਿਕੋਤਿ ਅਵਿਘਾਤਪਕ੍ਖਿਕੋ. ਨਿਬ੍ਬਾਨਸਂਵਤ੍ਤਨਿਕੋ ਨਿਬ੍ਬਾਨਵਹੋ. ਉਗ੍ਘਾਤੀਯੇਯ੍ਯਾਤਿ ਉਦ੍ਧਤਂ ਸਿਯਾ ਵਿਕ੍ਖਿਤ੍ਤਞ੍ਚ ਭਵੇਯ੍ਯਾਤਿ ਅਤ੍ਥੋ. ਸਣ੍ਠਪੇਮੀਤਿ ਸਮ੍ਮਦੇਵ ਪਟ੍ਠਪੇਮਿ. ਯਥਾ ਪਨ ਠਪਿਤਂ ਸਣ੍ਠਪਿਤਂ ਨਾਮ ਹੋਤਿ, ਤਂ ਦਸ੍ਸੇਤੁਂ ‘‘ਸਨ੍ਨਿਸੀਦਾਪੇਮੀ’’ਤਿਆਦਿ ਵੁਤ੍ਤਂ. ਸਨ੍ਨਿਸੀਦਾਪੇਮੀਤਿ ਸਮਾਧਿਪਟਿਪਕ੍ਖੇ ਕਿਲੇਸੇ ਸਨ੍ਨਿਸੀਦਾਪੇਨ੍ਤੋ ਚਿਤ੍ਤਂ ਗੋਚਰਜ੍ਝਤ੍ਤੇ ਸਨ੍ਨਿਸੀਦਾਪੇਮਿ. ਅਬ੍ਯਗ੍ਗਭਾਵਾਪਾਦਕੇਨ ਏਕਗ੍ਗਂ ਕਰੋਮਿ, ਯਥਾ ਆਰਮ੍ਮਣੇ ਸੁਟ੍ਠੁ ਅਪ੍ਪਿਤਂ ਹੋਤਿ, ਏਵਂ ਸਮ੍ਮਾ ਸਮ੍ਮਦੇਵ ਆਦਹਾਮਿ ਸਮਾਹਿਤਂ ਕਰੋਮਿ, ਯਸ੍ਮਾ ਤਥਾਸਮਾਹਿਤਂ ਚਿਤ੍ਤਂ ਸੁਟ੍ਠੁ ਆਰਮ੍ਮਣੇ ਆਰੋਪਿਤਂ ਨਾਮ ਹੋਤਿ, ਨ ਤਤੋ ਪਰਿਪਤਤਿ, ਤਸ੍ਮਾ ਵੁਤ੍ਤਂ ‘‘ਸੁਟ੍ਠੁ ਆਰੋਪੇਮੀਤਿ ਅਤ੍ਥੋ’’ਤਿ. ਮਾ ਉਗ੍ਘਾਤੀਯਿਤ੍ਤਾਤਿ ਮਾ ਹਞ੍ਞਿਤ੍ਥ, ਮਾ ਊਹਤਂ ਅਤ੍ਥਾਤਿ ਅਤ੍ਥੋ.

੨੧੦. ਸੋਯੇਵ…ਪੇ… ਵੁਤ੍ਤੋਤਿ ਇਮਿਨਾ ਕਿਞ੍ਚਾਪਿ ਏਕਂਯੇਵ ਕੁਸਲਵਿਤਕ੍ਕਂ ਮਗ੍ਗਕ੍ਖਣੇ ਵਿਯ ਤਿਵਿਧਤ੍ਤਸਮ੍ਭਵਤੋ ਤਿਵਿਧਨਾਮਿਕਂ ਕਤ੍ਵਾ ਦਸ੍ਸਿਤਂ ਵਿਯ ਹੋਤਿ, ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ. ਪਬਨ੍ਧਪਵਤ੍ਤਞ੍ਹਿ ਉਪਾਦਾਯ ਏਕਤ੍ਤਨਯੇਨ ‘‘ਸੋਯੇਵ ਬ੍ਯਾਪਾਦਪਚ੍ਚਨੀਕਟ੍ਠੇਨਾ’’ਤਿਆਦਿ ਵੁਤ੍ਤਂ. ਏਕਜਾਤਿਯੇਸੁ ਹਿ ਕੁਸਲਚਿਤ੍ਤੇਸੁ ਉਪ੍ਪਨ੍ਨੋ ਵਿਤਕ੍ਕੋ ਸਮਾਨਾਕਾਰਤਾਯ ਸੋ ਏਵਾਤਿ ਵਤ੍ਤਬ੍ਬਤਂ ਲਭਤਿ ਯਥਾ ‘‘ਸਾ ਏਵ ਤਿਤ੍ਤਿਰੀ, ਤਾਨਿ ਏਵ ਓਸਧਾਨੀ’’ਤਿ (ਸਂ. ਨਿ. ਟੀ. ੨.੨.੧੯). ਨ ਹਿ ਤਦਾ ਮਹਾਪੁਰਿਸਸ੍ਸ ਅਸੁਭਮੇਤ੍ਤਾਕਰੁਣਾਸਨ੍ਨਿਸ੍ਸਯਾ ਤੇ ਵਿਤਕ੍ਕਾ ਏਵਂ ਵੁਤ੍ਤਾਤਿ.

ਸਮਾਪਤ੍ਤਿਂ ਨਿਸ੍ਸਾਯਾਤਿ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ, ਤਤੋ ਵੁਟ੍ਠਹਿਤ੍ਵਾਤਿ ਅਤ੍ਥੋ. ਵਿਪਸ੍ਸਨਾਪਿ ਤਰੁਣਾਤਿ ਯੋਜਨਾ. ਕਾਯੋ ਕਿਲਮਤਿ ਸਮਥਵਿਪਸ੍ਸਨਾਨਂ ਤਰੁਣਤਾਯ ਭਾਵਨਾਯ ਪੁਬ੍ਬੇਨਾਪਰਂ ਵਿਸੇਸਸ੍ਸ ਅਲਬ੍ਭਮਾਨਤ੍ਤਾ. ਤੇਨਾਹ ‘‘ਚਿਤ੍ਤਂ ਹਞ੍ਞਤਿ ਵਿਹਞ੍ਞਤੀ’’ਤਿ. ਵਿਪਸ੍ਸਨਾਯਬਹੂਪਕਾਰਾ ਸਮਾਪਤ੍ਤਿ, ਤਥਾ ਹਿ ਵੁਤ੍ਤਂ – ‘‘ਸਮਾਧਿਂ, ਭਿਕ੍ਖਵੇ, ਭਾਵੇਥ, ਸਮਾਹਿਤੋ ਯਥਾਭੂਤਂ ਜਾਨਾਤਿ ਪਸ੍ਸਤੀ’’ਤਿ (ਸਂ. ਨਿ. ੩.੫; ੪.੯੯; ੫.੧੦੭੧).

ਯਥਾ ਵਿਸ੍ਸਮਟ੍ਠਾਨਂ ਯੋਧਾਨਂ ਪਰਿਸ੍ਸਮਂ ਵਿਨੋਦੇਤਿ, ਤਥਾ ਪਰਿਸ੍ਸਮਵਿਨੋਦਨਤ੍ਥਂ ਫਲਕੇਹਿ ਕਾਤਬ੍ਬਂ ਵਿਸ੍ਸਮਟ੍ਠਾਨਂ ਫਲਕਕੋਟ੍ਠਕੋ, ਸਮਾਪਤ੍ਤਿਯਾ ਪਨ ਵਿਪਸ੍ਸਨਾ ਬਹੁਕਾਰਤਰਾ ਸਮਾਧਿਪਰਿਪਨ੍ਥਕਾਨਂ, ਸਬ੍ਬੇਸਮ੍ਪਿ ਵਾ ਕਿਲੇਸਾਨਂ ਵਿਮਥਨੇਨ ਦੁਬ੍ਬਲਭਾਵਾਪਜ੍ਜਨਤੋ. ਤੇਨਾਹ ‘‘ਵਿਪਸ੍ਸਨਾ ਥਾਮਜਾਤਾ ਸਮਾਪਤ੍ਤਿਮ੍ਪਿ ਰਕ੍ਖਤਿ,ਥਾਮਜਾਤਂ ਕਰੋਤੀ’’ਤਿ. ਨਨੁ ਚੇਵਂ ਇਤਰੀਤਰਸਨ੍ਨਿਸ੍ਸਯਦੋਸੋ ਆਪਜ੍ਜਤੀਤਿ? ਨਯਿਦਮੇਕਨ੍ਤਿਕਂ, ਇਤਰੀਤਰਸਨ੍ਨਿਸ੍ਸਯਾਪਿ ਕਿਚ੍ਚਸਿਦ੍ਧਿ ਲੋਕੇ ਲਬ੍ਭਤੀਤਿ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ.

ਗਾਮਨ੍ਤਂ ਆਹਟੇਸੂਤਿ ਗਾਮਸਮੀਪਂ ਉਪਨੀਤੇਸੁ. ਏਤਾਗਾਵੋਤਿ ਸਤਿ ਉਪ੍ਪਾਦਨਮਤ੍ਤਮੇਵ ਕਾਤਬ੍ਬਂ ਯਥਾ ਗਾਵੋ ਰਕ੍ਖਿਤਬ੍ਬਾ, ਤਦਭਾਵਤੋ. ਤਦਾਤਿ ਸਮਥਵਿਪਸ੍ਸਨਾਨਂ ਥਾਮਜਾਤਕਾਲੇ. ਅਨੁਪਸ੍ਸਨਾਨਂ ਲਹੁਂ ਲਹੁਂ ਉਪ੍ਪਤ੍ਤਿਂ ਸਨ੍ਧਾਯ ‘‘ਏਕਪ੍ਪਹਾਰੇਨੇਵ ਆਰੁਲ਼੍ਹੋਵ ਹੋਤੀ’’ਤਿ ਵੁਤ੍ਤਂ, ਕਮੇਨੇਵ ਪਨ ਅਨੁਪਸ੍ਸਨਾਪਟਿਪਾਟਿਂ ਆਰੋਹਤਿ.

੨੧੫. ਏਵਂ ਭਗਵਾ ਅਤ੍ਤਨੋ ਅਪ੍ਪਮਾਦਪਟਿਪਦਂ, ਤਾਯ ਚ ਲਦ੍ਧਂ ਅਨਞ੍ਞਸਾਧਾਰਣਂ ਵਿਸੇਸਂ ਦਸ੍ਸੇਨ੍ਤੋ ਹੇਤੁਸਮ੍ਪਤ੍ਤਿਯਾ ਸਦ੍ਧਿਂ ਫਲਸਮ੍ਪਤ੍ਤਿਂ ਦਸ੍ਸੇਤ੍ਵਾ ਇਦਾਨਿ ਸਤ੍ਤੂਪਕਾਰਸਮ੍ਪਤ੍ਤਿਂ ਦਸ੍ਸੇਤੁਂ ‘‘ਸੇਯ੍ਯਥਾਪੀ’’ਤਿਆਦਿਮਾਹਾਤਿ ਏਵਂ ਏਤ੍ਥ ਅਨੁਸਨ੍ਧਿ ਵੇਦਿਤਬ੍ਬਾ. ਅਰਞ੍ਞਲਕ੍ਖਣਯੋਗ੍ਗਮਤ੍ਤੇਨ ਅਰਞ੍ਞਂ. ਮਹਾਵਨਤਾਯ ਪਵਨਂ. ਪਵਦ੍ਧਞ੍ਹਿ ਵਨਂ ਪਵਨਂ. ਚਤੂਹਿ ਯੋਗੇਹੀਤਿ ਜਿਘਚ੍ਛਾਪਿਪਾਸਾਭਯਪਟਿਪਤ੍ਤਿਸਙ੍ਖਾਤਯੋਗੇਹਿ. ਖੇਮਂ ਅਨੁਪਦ੍ਦਵਤਂ. ਸੁਵਤ੍ਥਿਂ ਅਨੁਪਦ੍ਦਵਂ ਆਵਹਤੀਤਿ ਸੋਵਤ੍ਥਿਕੋ. ਪੀਤਿਂ ਕੁਟ੍ਠਿਂ ਗਮੇਤਿ ਉਪਨੇਤੀਤਿ ਪੀਤਿਗਮਨੀਯੋ. ਪੀਤਂ ਪਾਨਤਿਤ੍ਥਂ ਗਚ੍ਛਤੀਤਿ ਪੀਤਗਮਨੀਯੋ. ਸਾਖਾਦੀਹੀਤਿ ਕਣ੍ਟਕਸਾਖਾਕਣ੍ਟਕਲਤਾਵਨੇਹਿ. ਅਨਾਸਯਗਾਮਿਤਾਯ ਉਦਕਸਨ੍ਨਿਰੁਦ੍ਧੋਪਿ ਅਮਗ੍ਗੋ ਵੁਤ੍ਤੋ, ਇਤਰਾਨਿ ਅਪੀਤਿਗਮਨੀਯਤਾਯਪਿ. ਆਦਿ-ਸਦ੍ਦੇਨ ਗਹਨਂ ਪਰਿਗ੍ਗਣ੍ਹਾਤਿ. ਓਕੇਮਿਗਲੁਦ੍ਦਕਸ੍ਸ ਗੋਚਰੇ ਚਰਤੀਤਿ ਓਕਚਰੋ, ਦੀਪਕਮਿਗੋ. ਅਰਞ੍ਞੇ ਮਿਗੇ ਦਿਸ੍ਵਾ ਤੇਹਿ ਸਦ੍ਧਿਂ ਪਲਾਯੇਯ੍ਯਾਤਿ ਦੀਘਰਜ੍ਜੁਬਨ੍ਧਨਂ.

ਇਧ ਵਸਨ੍ਤੀਤਿ ਮਿਗਾਨਂ ਆਸਯਂ ਵਦਤਿ, ਤਤੋ ਆਸਯਤੋ ਇਮਿਨਾ ਮਗ੍ਗੇਨ ਨਿਕ੍ਖਮਨ੍ਤਿ. ਏਤ੍ਥ ਚਰਨ੍ਤੀਤਿ ਏਤਸ੍ਮਿਂ ਠਾਨੇ ਗੋਚਰਂ ਗਣ੍ਹਨ੍ਤਿ. ਏਤ੍ਥਪਿਵਨ੍ਤੀਤਿ ਏਤਸ੍ਮਿਂ ਨਿਪਾਨਤਿਤ੍ਥੇ ਉਦਕਂ ਪਿਵਨ੍ਤਿ. ਇਮਿਨਾ ਮਗ੍ਗੇਨ ਪਵਿਸਨ੍ਤੀਤਿ ਇਮਿਨਾ ਮਗ੍ਗੇਨ ਨਿਪਾਨਤਿਤ੍ਥਂ ਪਵਿਸਨ੍ਤਿ. ਮਗ੍ਗਂ ਪਿਧਾਯਾਤਿ ਪਕਤਿਮਗ੍ਗਂ ਪਿਦਹਿਤ੍ਵਾ. ਨ ਤਾਵ ਕਿਞ੍ਚਿ ਕਰੋਤਿ ਅਨਵਸੇਸੇ ਵਨਮਿਗੇ ਘਾਤੇਤੁਕਾਮੋ.

ਅਵਿਜ੍ਜਾਯ ਅਞ੍ਞਾਣਾ ਹੁਤ੍ਵਾਤਿ ਅਵਿਜ੍ਜਾਯ ਨਿਵੁਤਤ੍ਤਾ ਞਾਣਰਹਿਤਾ ਹੁਤ੍ਵਾ, ਨਨ੍ਦੀਰਾਗੇਨ ਉਪਨੀਤਾ ਰੂਪਾਰਮ੍ਮਣਾਦੀਨਿ ਆਬਨ੍ਧਿਤ੍ਵਾ. ਪਲੋਭਨਤੋ ਓਕਚਰਂ ਨਨ੍ਦੀਰਾਗੋਤਿ. ਬ੍ਯਾਮੋਹਨਤੋ ਓਕਚਾਰਿਕਂ ਅਵਿਜ੍ਜਾਤਿ ਕਤ੍ਵਾ ਦਸ੍ਸੇਤਿ. ਤੇਸਨ੍ਤਿ ਓਕਚਰੋਕਚਾਰਿਕਾਨਂ. ਸਾਖਾਭਙ੍ਗੇਨਾਤਿ ਤਾਦਿਸੇਨ ਲੂਖਤਰਗਨ੍ਧੇਨ ਸਾਖਾਭਙ੍ਗੇਨ. ਮਨੁਸ੍ਸਗਨ੍ਧਂ ਅਪਨੇਤ੍ਵਾ ਤਸ੍ਸ ਸਾਖਾਭਙ੍ਗਸ੍ਸ ਗਨ੍ਧੇਨ. ਸਮ੍ਮਤ੍ਤੋਤਿ ਸਮ੍ਮਜ੍ਜਿਤੋ ਬ੍ਯਾਮੁਞ੍ਛੋ.

ਬੁਦ੍ਧਾਨਂ ਖੇਮਮਗ੍ਗਵਿਚਰਣਂ ਕੁਮ੍ਮਗ੍ਗਪਿਧਾਨਞ੍ਚ ਸਬ੍ਬਲੋਕਸਾਧਾਰਣਮ੍ਪਿ ਅਤ੍ਥਤੋ ਵੇਨੇਯ੍ਯਪੁਗ੍ਗਲਾਪੇਕ੍ਖਮੇਵਾਤਿ ਦਸ੍ਸੇਨ੍ਤੋ ‘‘ਅਞ੍ਞਾਤਕੋਣ੍ਡਞ੍ਞਾਦੀਨਂ ਭਬ੍ਬਪੁਗ੍ਗਲਾਨ’’ਨ੍ਤਿ ਆਹ. ਊਹਤੋਤਿ ਸਮੂਹਤੋ ਨੀਹਤੋਤਿ ਆਹ ‘‘ਦ੍ਵੇਧਾ ਛੇਤ੍ਵਾ ਪਾਤਿਤੋ’’ਤਿ. ਨਾਸਿਤਾਤਿ ਅਦਸ੍ਸਨਂ ਗਮਿਤਾਤਿ ਆਹ ‘‘ਸਬ੍ਬੇਨ ਸਬ੍ਬਂ ਸਮੁਗ੍ਘਾਟਿਤਾ’’ਤਿ. ਹਿਤੂਪਚਾਰਨ੍ਤਿ ਸਤ੍ਤਾਨਂ ਹਿਤਚਰਿਯਂ.

ਦ੍ਵੇਧਾਵਿਤਕ੍ਕਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.