੭. ਵਨਪਤ੍ਥਪਰਿਯਾਯਸੁਤ੍ਤਵਣ੍ਣਨਾ

੧੯੦. ਵਨੀਯਤਿ ਵਿਵੇਕਕਾਮੇਹਿ ਭਜੀਯਤਿ, ਵਨੁਤੇ ਵਾ ਤੇ ਅਤ੍ਤਸਮ੍ਪਤ੍ਤਿਯਾ ਵਸਨਤ੍ਥਾਯ ਯਾਚਨ੍ਤੋ ਵਿਯ ਹੋਤੀਤਿ ਵਨਂ, ਪਤਿਟ੍ਠਨ੍ਤਿ ਏਤ੍ਥ ਵਿਵੇਕਕਾਮਾ ਯਥਾਧਿਪ੍ਪੇਤਵਿਸੇਸਾਧਿਗਮੇਨਾਤਿ ਪਤ੍ਥਂ, ਵਨੇਸੁ ਪਤ੍ਥਂ ਗਹਨਟ੍ਠਾਨੇ ਸੇਨਾਸਨਂ ਵਨਪਤ੍ਥਂ. ਪਰਿਯਾਯਤਿ ਅਤ੍ਤਨੋ ਫਲਂ ਪਰਿਗ੍ਗਹੇਤ੍ਵਾ ਵਤ੍ਤਤੀਤਿ ਪਰਿਯਾਯੋ, ਕਾਰਣਨ੍ਤਿ ਆਹ ‘‘ਵਨਪਤ੍ਥਪਰਿਯਾਯਨ੍ਤਿ ਵਨਪਤ੍ਥਕਾਰਣ’’ਨ੍ਤਿ. ਵਨਪਤ੍ਥਞ੍ਹਿ ਤਂ ਉਪਨਿਸ੍ਸਾਯ ਵਿਹਰਤੋ ਉਪਨਿਸ੍ਸਯਕਾਰਣਂ. ਤੇਨਾਹ ‘‘ਵਨਪਤ੍ਥਂ ਉਪਨਿਸ੍ਸਾਯ ਵਿਹਰਤੀ’’ਤਿ. ਪਰਿਯਾਯਤਿ ਦੇਸੇਤਬ੍ਬਮਤ੍ਥਂ ਪਤਿਟ੍ਠਪੇਤੀਤਿ ਪਰਿਯਾਯੋ, ਦੇਸਨਾ. ਵਨਪਤ੍ਥਂ ਆਰਬ੍ਭ ਪਵਤ੍ਤਾ ਦੇਸਨਾ ਵਨਪਤ੍ਥਦੇਸਨਾ, ਤਂ, ਉਭਯਤ੍ਥਾਪਿ ਵਨਪਤ੍ਥਗ੍ਗਹਣਂ ਲਕ੍ਖਣਮਤ੍ਤਂ ਗਾਮਾਦੀਨਮ੍ਪੇਤ੍ਥ ਕਾਰਣਭਾਵਸ੍ਸ, ਦੇਸਨਾਯ ਵਿਸਯਭਾਵਸ੍ਸ ਚ ਲਬ੍ਭਮਾਨਤ੍ਤਾ.

੧੯੧. ਨਿਸ੍ਸਾਯਾਤਿ ਅਪਸ੍ਸਾਯ, ਵਿਵੇਕਵਾਸਸ੍ਸ ਅਪਸ੍ਸਯਂ ਕਤ੍ਵਾਤਿ ਅਤ੍ਥੋ. ਨ ਉਪਟ੍ਠਾਤੀਤਿਆਦੀਹਿ ਤਸ੍ਮਿਂ ਵਨਪਤ੍ਥੇ ਸੇਨਾਸਨਸਪ੍ਪਾਯਾਭਾਵਂ, ਉਤੁਪੁਗ੍ਗਲਧਮ੍ਮਸ੍ਸਵਨਸਪ੍ਪਾਯਾਭਾਵਮ੍ਪਿ ਵਾ ਦਸ੍ਸੇਤਿ. ਜੀਵਿਤਸਮ੍ਭਾਰਾਤਿ (ਅ. ਨਿ. ਟੀ. ੩.੯.੬) ਜੀਵਿਤਪ੍ਪਵਤ੍ਤਿਯਾ ਸਮ੍ਭਾਰਾ ਪਚ੍ਚਯਾ. ਸਮੁਦਾਨੇਤਬ੍ਬਾਤਿ ਸਮ੍ਮਾ ਞਾਯੇਨ ਅਨਵਜ੍ਜਉਞ੍ਛਾਚਰਿਯਾਦਿਨਾ ਉਦ੍ਧਂ ਉਦ੍ਧਂ ਆਨੇਤਬ੍ਬਾ ਪਾਪੁਣਿਤਬ੍ਬਾ. ਤੇ ਪਨ ਤਥਾ ਸਮੁਦਾਨਿਤਾ ਸਮਾਹਟਾ ਨਾਮ ਹੋਨ੍ਤੀਤਿ ਆਹ ‘‘ਸਮਾਹਰਿਤਬ੍ਬਾ’’ਤਿ. ਦੁਕ੍ਖੇਨ ਉਪ੍ਪਜ੍ਜਨ੍ਤੀਤਿ ਸੁਲਭੁਪ੍ਪਾਦਾ ਨ ਹੋਨ੍ਤਿ. ਏਤੇਨ ਭੋਜਨਸਪ੍ਪਾਯਾਦਿਅਭਾਵਂ ਦਸ੍ਸੇਤਿ. ਰਤ੍ਤਿਭਾਗਂ ਵਾ ਦਿਵਸਭਾਗਂ ਵਾਤਿ ਭੁਮ੍ਮਤ੍ਥੇ ਉਪਯੋਗਵਚਨਨ੍ਤਿ ਆਹ ‘‘ਰਤ੍ਤਿਕੋਟ੍ਠਾਸੇ ਵਾ ਦਿਵਸਕੋਟ੍ਠਾਸੇ ਵਾ’’ਤਿ. ਰਤ੍ਤਿਂਯੇਵ ਪਕ੍ਕਮਿਤਬ੍ਬਂ ਸਮਣਧਮ੍ਮਸ੍ਸ ਤਤ੍ਥ ਅਨਿਪ੍ਫਜ੍ਜਨਤੋ.

੧੯੨-੩. ਸਙ੍ਖਾਪੀਤਿ ‘‘ਯਦਤ੍ਥਮਹਂ ਪਬ੍ਬਜਿਤੋ, ਨ ਮੇਤਂ ਇਧ ਨਿਪ੍ਫਜ੍ਜਤਿ, ਚੀਵਰਾਦਿ ਪਨ ਸਮੁਦਾਗਚ੍ਛਤਿ, ਨਾਹਂ ਤਦਤ੍ਥਂ ਪਬ੍ਬਜਿਤੋ, ਕਿਂ ਮੇ ਇਧ ਵਾਸੇਨਾ’’ਤਿ ਪਟਿਸਙ੍ਖਾਯਪਿ. ਅਨਨ੍ਤਰਵਾਰੇ ਸਙ੍ਖਾਪੀਤਿ ‘‘ਯਦਤ੍ਥਮਹਂ ਪਬ੍ਬਜਿਤੋ, ਤਂ ਮੇ ਇਧ ਨਿਪ੍ਫਜ੍ਜਤਿ, ਚੀਵਰਾਦਿ ਪਨ ਨ ਸਮੁਦਾਗਚ੍ਛਤਿ, ਨਾਹਂ ਤਦਤ੍ਥਂ ਪਬ੍ਬਜਿਤੋ’’ਤਿ ਪਟਿਸਙ੍ਖਾਯਪੀਤਿ ਅਤ੍ਥੋ. ਤੇਨਾਹ ‘‘ਸਮਣਧਮ੍ਮਸ੍ਸ ਨਿਪ੍ਫਜ੍ਜਨਭਾਵਂ ਜਾਨਿਤ੍ਵਾ’’ਤਿ.

੧੯੫-੭. ਸੋ ਪੁਗ੍ਗਲੋ ਅਨਾਪੁਚ੍ਛਾ ਪਕ੍ਕਮਿਤਬ੍ਬਂ, ਨਾਨੁਬਨ੍ਧਿਤਬ੍ਬੋਤਿ ‘‘ਸੋ ਪੁਗ੍ਗਲੋ’’ਤਿ ਪਦਸ੍ਸ ‘‘ਨਾਨੁਬਨ੍ਧਿਤਬ੍ਬੋ’’ਤਿ ਇਮਿਨਾ ਸਮ੍ਬਨ੍ਧੋ. ਯਸ੍ਸ ਯੇਨ ਹਿ ਸਮ੍ਬਨ੍ਧੋ, ਦੂਰਟ੍ਠੇਨਪਿ ਸੋ ਭਵਤਿ. ਤਂ ਪੁਗ੍ਗਲਨ੍ਤਿ ‘‘ਸੋ ਪੁਗ੍ਗਲੋ’’ਤਿ ਪਚ੍ਚਤ੍ਤਵਚਨਂ ਉਪਯੋਗਵਸੇਨ ਪਰਿਣਾਮੇਤ੍ਵਾ ਤਂ ਪੁਗ੍ਗਲਂ ਅਨਾਪੁਚ੍ਛਾ ਪਕ੍ਕਮਿਤਬ੍ਬਨ੍ਤਿ ਅਤ੍ਥੋ. ਅਤ੍ਥਵਸੇਨ ਹਿ ਵਿਭਤ੍ਤਿਵਿਪਰਿਣਾਮੋਤਿ. ਤਂ ਆਪੁਚ੍ਛਾ ਪਕ੍ਕਮਿਤਬ੍ਬਨ੍ਤਿ ਏਤ੍ਥਾਪਿ ਏਸੇਵ ਨਯੋ. ਆਪੁਚ੍ਛਾ ਪਕ੍ਕਮਿਤਬ੍ਬਨ੍ਤਿ ਚ ਕਤਞ੍ਞੁਤਕਤਵੇਦਿਤਾਯ ਨਿਯੋਜਨਂ.

੧੯੮. ਏਵਰੂਪੋਤਿ ਯਂ ਨਿਸ੍ਸਾਯ ਭਿਕ੍ਖੁਨੋ ਗੁਣੇਹਿ ਵੁਦ੍ਧਿਯੇਵ ਪਾਟਿਕਙ੍ਖਾ, ਪਚ੍ਚਯੇਹਿ ਚ ਨ ਪਰਿਸ੍ਸਮੋ, ਏਵਰੂਪੋ ਦਣ੍ਡਕਮ੍ਮਾਦੀਹਿ ਨਿਗ੍ਗਣ੍ਹਾਤਿ ਚੇਪਿ, ਨ ਪਰਿਚ੍ਚਜਿਤਬ੍ਬੋਤਿ ਦਸ੍ਸੇਤਿ ‘‘ਸਚੇਪੀ’’ਤਿਆਦਿਨਾ.

ਵਨਪਤ੍ਥਪਰਿਯਾਯਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.