੫. ਅਨੁਮਾਨਸੁਤ੍ਤਵਣ੍ਣਨਾ

੧੮੧. ਵੁਤ੍ਤਾਨੁਸਾਰੇਨਾਤਿ ‘‘ਕੁਰੂਸੁ, ਸਕ੍ਕੇਸੂ’’ਤਿ ਚ ਏਤ੍ਥ ਵੁਤ੍ਤਨਯਾਨੁਸਾਰੇਨ, ‘‘ਭਗ੍ਗਾ ਨਾਮ ਜਾਨਪਦਿਨੋ ਰਾਜਕੁਮਾਰਾ’’ਤਿਆਦਿਨਾ ਨਯੇਨ ਵਚਨਤ੍ਥੋ ਵੇਦਿਤਬ੍ਬੋਤਿ ਅਤ੍ਥੋ. ਵਤ੍ਥੁਪਰਿਗ੍ਗਹਦਿਵਸੇਤਿ ਨਗਰਮਾਪਨਤ੍ਥਂ ਵਤ੍ਥੁਵਿਜ੍ਜਾਚਰਿਯੇਨ ਨਗਰਟ੍ਠਾਨਸ੍ਸ ਪਰਿਗ੍ਗਣ੍ਹਨਦਿਵਸੇ. ਅਥਾਤਿ ਪਚ੍ਛਾ. ਨਗਰੇ ਨਿਮ੍ਮਿਤੇਤਿ ਤਤ੍ਥ ਅਨਨ੍ਤਰਾਯੇਨ ਨਗਰੇ ਮਾਪਿਤੇ. ਤਮੇਵ ਸੁਸੁਮਾਰਗਿਰਣਂ ਸੁਭਨਿਮਿਤ੍ਤਂ ਕਤ੍ਵਾ ‘‘ਸੁਸੁਮਾਰਗਿਰਿ’’ਤ੍ਵੇਵਸ੍ਸ ਨਾਮਂ ਅਕਂਸੁ. ਸੁਸੁਮਾਰਸਣ੍ਠਾਨਤ੍ਤਾ ਸੁਸੁਮਾਰੋ ਨਾਮ ਏਕੋ ਗਿਰਿ, ਸੋ ਤਸ੍ਸ ਨਗਰਸ੍ਸ ਸਮੀਪੇ, ਤਸ੍ਮਾ ਤਂ ਸੁਸੁਮਾਰਗਿਰਿ ਏਤਸ੍ਸ ਅਤ੍ਥੀਤਿ ‘‘ਸੁਸੁਮਾਰਗਿਰੀ’’ਤਿ ਵੁਚ੍ਚਤੀਤਿ ਕੇਚਿ. ਭੇਸਕਲ਼ਾਤਿ ਵੁਚ੍ਚਤਿ ਘਮ੍ਮਣ੍ਡਗਚ੍ਛਂ, ਕੇਚਿ ‘‘ਸੇਤਰੁਕ੍ਖ’’ਨ੍ਤਿ ਵਦਨ੍ਤਿ, ਤੇਸਂ ਬਹੁਲਤਾਯ ਪਨ ਤਂ ਵਨਂ ਭੇਸਕਲ਼ਾਵਨਨ੍ਤੇਵ ਪਞ੍ਞਾਯਿਤ੍ਥ. ਭੇਸੋ ਨਾਮ ਏਕੋ ਯਕ੍ਖੋ ਅਯੁਤ੍ਤਕਾਰੀ, ਤਸ੍ਸ ਤਤੋ ਗਲ਼ਿਤਟ੍ਠਾਨਤਾਯ ਤਂ ਵਨਂ ਭੇਸਗਲ਼ਾਵਨਂ ਨਾਮ ਜਾਤਨ੍ਤਿ ਕੇਚਿ. ਅਭਯਦਿਨ੍ਨਟ੍ਠਾਨੇ ਜਾਤਂ ਵਿਰੂਲ਼੍ਹਂ, ਸਂਵਦ੍ਧਨ੍ਤਿ ਅਤ੍ਥੋ.

ਇਚ੍ਛਾਪੇਤੀਤਿ ਯਂ ਕਿਞ੍ਚਿ ਅਤ੍ਤਨਿ ਗਰਹਿਤਬ੍ਬਂ ਵਤ੍ਤੁਂ ਸਬ੍ਰਹ੍ਮਚਾਰੀਨਂ ਇਚ੍ਛਂ ਉਪ੍ਪਾਦੇਤਿ, ਤਦਤ੍ਥਾਯ ਤੇਸਂ ਅਤ੍ਤਾਨਂ ਵਿਸ੍ਸਜ੍ਜੇਤੀਤਿ ਅਤ੍ਥੋ. ਪਠਮਂ ਦਿਨ੍ਨੋ ਹਿਤੂਪਦੇਸੋ ਓਵਾਦੋ, ਅਪਰਾਪਰਂ ਦਿਨ੍ਨੋ ਅਨੁਸਾਸਨੀ. ਪਚ੍ਚੁਪ੍ਪਨ੍ਨਾਤੀਤਵਿਸਯੋ ਵਾ ਓਵਾਦੋ, ਅਨਾਗਤਵਿਸਯੋ ਅਨੁਸਾਸਨੀ. ਓਤਿਣ੍ਣਵਤ੍ਥੁਕੋ ਓਵਾਦੋ, ਇਤਰੋ ਅਨੁਸਾਸਨੀ. ਸੋ ਚਾਤਿ ਏਵਂ ਪਵਾਰੇਤਾ ਸੋ ਭਿਕ੍ਖੁ. ਦੁਕ੍ਖਂ ਵਚੋ ਏਤਸ੍ਮਿਂ ਵਿਪ੍ਪਟਿਕੂਲਗ੍ਗਾਹੇ ਵਿਪਚ੍ਚਨੀਕਸਾਤੇ ਅਨਾਦਰੇ ਪੁਗ੍ਗਲੇਤਿ ਦੁਬ੍ਬਚੋ. ਤੇਨਾਹ ‘‘ਦੁਕ੍ਖੇਨ ਵਤ੍ਤਬ੍ਬੋ’’ਤਿ. ਉਪਰਿ ਆਗਤੇਹੀਤਿ ‘‘ਪਾਪਿਚ੍ਛੋ ਹੋਤੀ’’ਤਿਆਦਿਨਾ (ਮ. ਨਿ. ੧.੧੮੧) ਆਗਤੇਹਿ ਸੋਲ਼ਸਹਿ ਪਾਪਧਮ੍ਮੇਹਿ. ਪਕਾਰੇਹਿ ਆਵਹਂ ਪਦਕ੍ਖਿਣਂ, ਤਤੋ ਪਦਕ੍ਖਿਣਤੋ ਗਹਣਸੀਲੋ ਪਦਕ੍ਖਿਣਗ੍ਗਾਹੀ, ਨ ਪਦਕ੍ਖਿਣਗ੍ਗਾਹੀ ਅਪ੍ਪਦਕ੍ਖਿਣਗ੍ਗਾਹੀ. ਵਾਮਤੋਤਿ ਅਪਸਬ੍ਯਤੋ, ਵੁਤ੍ਤਵਿਪਰਿਯਾਯਤੋਤਿ ਅਧਿਪ੍ਪਾਯੋ.

ਅਸਨ੍ਤਸਮ੍ਭਾਵਨਪਤ੍ਥਨਾਨਨ੍ਤਿ ਅਸਨ੍ਤੇਹਿ ਅਵਿਜ੍ਜਮਾਨੇਹਿ ਗੁਣੇਹਿ ਸਮ੍ਭਾਵਨਸ੍ਸ ਪਤ੍ਥਨਾਭੂਤਾਨਂ. ਪਟਿ-ਸਦ੍ਦੋ ਪਚ੍ਚਤ੍ਤਿਕਪਰਿਯਾਯੋ, ਫਰਣਂ ਵਾਯਮਨਂ ਇਧ ਤਥਾਵਟ੍ਠਾਨਨ੍ਤਿ ਆਹ ‘‘ਪਟਿਪ੍ਫਰਤੀਤਿ ਪਟਿਵਿਰੁਦ੍ਧੋ ਪਚ੍ਚਨੀਕੋ ਹੁਤ੍ਵਾ ਤਿਟ੍ਠਤੀ’’ਤਿ. ਅਪਸਾਦੇਤੀਤਿ ਖਿਪੇਤਿ ਤਜ੍ਜੇਤਿ. ਤਥਾਭੂਤੋ ਚ ਪਰਂ ਘਟ੍ਟੇਨ੍ਤੋ ਨਾਮ ਹੋਤੀਤਿ ਆਹ ‘‘ਘਟ੍ਟੇਤੀ’’ਤਿ. ਪਟਿਆਰੋਪੇਤੀਤਿ ਯਾਦਿਸੇਨ ਵੁਤ੍ਤੋ, ਤਸ੍ਸ ਪਟਿਭਾਗਭੂਤਂ ਦੋਸਂ ਚੋਦਕਸ੍ਸ ਉਪਰਿ ਆਰੋਪੇਤਿ.

ਪਟਿਚਰਤੀਤਿ (ਅ. ਨਿ. ਟੀ. ੨.੩.੬੮) ਪਟਿਚ੍ਛਾਦਨਵਸੇਨ ਚਰਤਿ ਪਵਤ੍ਤਤਿ, ਪਟਿਚ੍ਛਾਦਨਤ੍ਥੋ ਏਵ ਵਾ ਚਰਤਿ-ਸਦ੍ਦੋ ਅਨੇਕਤ੍ਥਤ੍ਤਾ ਧਾਤੂਨਨ੍ਤਿ ਆਹ ‘‘ਪਟਿਚ੍ਛਾਦੇਤੀ’’ਤਿ. ਅਞ੍ਞੇਨਞ੍ਞਨ੍ਤਿ ਪਟਿਚ੍ਛਾਦਨਾਕਾਰਦਸ੍ਸਨਨ੍ਤਿ ਆਹ ‘‘ਅਞ੍ਞੇਨ ਕਾਰਣੇਨਾ’’ਤਿਆਦਿ. ਤਤ੍ਥ ਅਞ੍ਞਂ ਕਾਰਣਂ ਵਚਨਂ ਵਾਤਿ ਯਂ ਚੋਦਕੇਨ ਚੁਦਿਤਕਸ੍ਸ ਦੋਸਵਿਭਾਵਨਂ ਕਾਰਣਂ, ਵਚਨਂ ਵਾ ਵੁਤ੍ਤਂ, ਤਤੋ ਅਞ੍ਞੇਨੇਵ ਕਾਰਣੇਨ, ਵਚਨੇਨ ਵਾ ਪਟਿਚ੍ਛਾਦੇਤਿ. ਕਾਰਣੇਨਾਤਿ ਚੋਦਨਾਯ ਅਮੂਲਿਕਭਾਵਦੀਪਨਿਯਾ ਯੁਤ੍ਤਿਯਾ. ਵਚਨੇਨਾਤਿ ਤਦਤ੍ਥਬੋਧਨੇਨ. ਕੋ ਆਪਨ੍ਨੋਤਿਆਦਿਨਾ ਚੋਦਨਂ ਅਵਿਸ੍ਸਜ੍ਜੇਤ੍ਵਾ ਵਿਕ੍ਖੇਪਾਪਜ੍ਜਨਂ ਅਞ੍ਞੇਨਞ੍ਞਂ ਪਟਿਚਰਣਨ੍ਤਿ ਦਸ੍ਸੇਤਿ, ਬਹਿਦ੍ਧਾ ਕਥਾਅਪਨਾਮਨਂ ਵਿਸ੍ਸਜ੍ਜੇਤ੍ਵਾਤਿ ਅਯਮੇਵ ਤੇਸਂ ਵਿਸੇਸੋ. ਤੇਨਾਹ ‘‘ਇਤ੍ਥਨ੍ਨਾਮ’’ਨ੍ਤਿਆਦਿ.

ਅਪਦੀਯਨ੍ਤਿ ਦੋਸਾ ਏਤੇਨ ਰਕ੍ਖੀਯਨ੍ਤਿ, ਲੂਯਨ੍ਤਿ, ਛਿਜ੍ਜਨ੍ਤੀਤਿ ਵਾ ਅਪਦਾਨਂ, (ਅ. ਨਿ. ਟੀ. ੨.੩.੨) ਸਤ੍ਤਾਨਂ ਸਮ੍ਮਾ, ਮਿਚ੍ਛਾ ਵਾ ਪਵਤ੍ਤਪਯੋਗੋ. ਤੇਨਾਹ ‘‘ਅਤ੍ਤਨੋ ਚਰਿਯਾਯਾ’’ਤਿ.

੧੮੩. ਅਨੁਮਿਨਿਤਬ੍ਬਨ੍ਤਿ ਅਨੁ ਅਨੁ ਮਿਨਿਤਬ੍ਬੋ ਜਾਨਿਤਬ੍ਬੋ. ਅਤ੍ਤਾਨਂ ਅਨੁਮਿਨਿਤਬ੍ਬਨ੍ਤਿ ਚ ਇਦਂ ਪਚ੍ਚਤ੍ਤੇ ਉਪਯੋਗਵਚਨਂ. ਤੇਨਾਹ ‘‘ਅਨੁਮਿਨਿਤਬ੍ਬੋ ਤੁਲੇਤਬ੍ਬੋ ਤੀਰੇਤਬ੍ਬੋ’’ਤਿ. ਅਤ੍ਤਾਨਂ ਅਨੁਮਿਨਿਤਬ੍ਬਨ੍ਤਿ ਵਾ ਅਤ੍ਤਨਿ ਅਨੁਮਾਨਞਾਣਂ ਪਵਤ੍ਤੇਤਬ੍ਬਂ. ਤਤ੍ਰਾਯਂ ਨਯੋ – ਅਪ੍ਪਿਯਭਾਵਾਵਹਾ ਮਯਿ ਪਵਤ੍ਤਾ ਪਾਪਿਚ੍ਛਤਾ ਪਾਪਿਚ੍ਛਾਭਾਵਤੋ ਪਰਸ੍ਮਿਂ ਪਵਤ੍ਤਪਾਪਿਚ੍ਛਤਾ ਵਿਯ. ਏਸ ਨਯੋ ਸੇਸਧਮ੍ਮੇਸੁਪਿ. ਅਪਰੋ ਨਯੋ – ਸਬ੍ਰਹ੍ਮਚਾਰੀਨਂ ਪਿਯਭਾਵਂ ਇਚ੍ਛਨ੍ਤੇਨ ਪਾਪਿਚ੍ਛਤਾ ਪਹਾਤਬ੍ਬਾ ਸੀਲਵਿਸੁਦ੍ਧਿਹੇਤੁਭਾਵਤੋ ਅਤ੍ਤੁਕ੍ਕਂਸਨਾਦਿਪ੍ਪਹਾਨਂ ਵਿਯ. ਸੇਸਧਮ੍ਮੇਸੁਪਿ ਏਸੇਵ ਨਯੋ.

੧੮੪. ਪਚ੍ਚਵੇਕ੍ਖਿਤਬ੍ਬੋਤਿ ‘‘ਨ ਪਾਪਿਚ੍ਛੋ ਭਵਿਸ੍ਸਾਮਿ, ਨ ਪਾਪਿਕਾਨਂ ਇਚ੍ਛਾਨਂ ਵਸਂ ਗਤੋ’’ਤਿਆਦਿਨਾ ਪਤਿ ਪਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਵਾ ਞਾਣਚਕ੍ਖੁਨਾ ਅਵੇਕ੍ਖਿਤਬ੍ਬਂ, ਞਾਣਂ ਪਵਤ੍ਤੇਤਬ੍ਬਨ੍ਤਿ ਅਤ੍ਥੋ. ਪਾਪਿਚ੍ਛਤਾਦੀਨਂ ਪਹਾਨਂ ਪਤਿ ਅਵੇਕ੍ਖਿਤਬ੍ਬਂ, ਅਯਞ੍ਚ ਅਤ੍ਥੋ ਤਬ੍ਬ-ਸਦ੍ਦਸ੍ਸ ਭਾਵਤ੍ਥਤਾਵਸੇਨ ਵੇਦਿਤਬ੍ਬੋ, ਕਮ੍ਮਤ੍ਥਤਾਵਸੇਨ ਪਨ ਅਟ੍ਠਕਥਾਯਂ ‘‘ਅਤ੍ਤਾਨ’’ਨ੍ਤਿ ਪਚ੍ਚਤ੍ਤੇ ਉਪਯੋਗਵਚਨਂ ਕਤ੍ਵਾ ਵੁਤ੍ਤਂ. ਸਿਕ੍ਖਨ੍ਤੇਨਾਤਿ ਤਿਸ੍ਸੋਪਿ ਸਿਕ੍ਖਾ ਸਿਕ੍ਖਨ੍ਤੇਨ. ਤੇਨਾਹ ‘‘ਕੁਸਲੇਸੁ ਧਮ੍ਮੇਸੂ’’ਤਿ.

ਤਿਲਕਨ੍ਤਿ ਕਾਲ਼ਤਿਲਸੇਤਤਿਲਾਦਿਤਿਲਕਂ. ਸਬ੍ਬਪ੍ਪਹਾਨਨ੍ਤਿ ਸਬ੍ਬਪ੍ਪਕਾਰਪ੍ਪਹਾਨਂ. ਫਲੇ ਆਗਤੇਤਿ ਫਲੇ ਉਪ੍ਪਨ੍ਨੇ. ਨਿਬ੍ਬਾਨੇ ਆਗਤੇਤਿ ਨਿਬ੍ਬਾਨਸ੍ਸ ਅਧਿਗਤਤ੍ਤਾ. ਭਿਕ੍ਖੁਪਾਤਿਮੋਕ੍ਖਨ੍ਤਿ ‘‘ਸੋ ਸਮਣੋ, ਸ ਭਿਕ੍ਖੂ’’ਤਿ ਏਵਂ ਵੁਤ੍ਤਭਿਕ੍ਖੂਨਂ ਪਾਤਿਮੋਕ੍ਖਂ, ਨ ਉਪਸਮ੍ਪਨ੍ਨਾਨਂ ਏਵ ਨ ਪਬ੍ਬਜਿਤਾਨਂ ਏਵਾਤਿ ਦਟ੍ਠਬ੍ਬਂ. ਯਸ੍ਮਾ ਚਿਦਂ ਭਿਕ੍ਖੁਪਾਤਿਮੋਕ੍ਖਂ, ਤਸ੍ਮਾ ਵੁਤ੍ਤਂ ‘‘ਇਦਂ ਦਿਵਸਸ੍ਸ ਤਿਕ੍ਖਤ੍ਤੁ’’ਨ੍ਤਿਆਦਿ. ਅਪਚ੍ਚਵੇਕ੍ਖਿਤੁਂ ਨ ਵਟ੍ਟਤਿ ਅਤ੍ਤਵਿਸੁਦ੍ਧਿਯਾ ਏਕਨ੍ਤਹੇਤੁਭਾਵਤੋ.

ਅਨੁਮਾਨਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.