੪. ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤਵਣ੍ਣਨਾ

੧੭੫. ਸਕ੍ਕੇਸੂਤਿ ਏਤ੍ਥ ਯਂ ਵਤ੍ਤਬ੍ਬਂ, ਤਂ ਸਤਿਪਟ੍ਠਾਨਸੁਤ੍ਤਵਣ੍ਣਨਾਯਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ ਤਂ ਏਕਦੇਸੇਨ ਦਸ੍ਸੇਨ੍ਤੋ ‘‘ਸੋ ਹੀ’’ਤਿ ਆਹ. ਤਤ੍ਥ ਯੇਨ ਰਾਜਕੁਮਾਰਾ ਸਕ੍ਯਾ ਨਾਮ ਜਾਤਾ, ਯਤੋ ਤੇਸਂ ਨਿਵਾਸਟ੍ਠਾਨਤਾਯ ਜਨਪਦੋ ਤਥਾ ਵੁਚ੍ਚਤਿ, ਤਂ ਵਤ੍ਤਬ੍ਬਨ੍ਤਿ ਆਹ ‘‘ਸਕ੍ਯਾਨਂ ਪਨ ਉਪ੍ਪਤ੍ਤਿ ਅਮ੍ਬਟ੍ਠਸੁਤ੍ਤੇ ਆਗਤਾਵਾ’’ਤਿ. ਕਪਿਲਵਤ੍ਥੂਤਿ ਵੁਤ੍ਤਂ ਪੁਰਿਮਸਞ੍ਞਾਵਸੇਨ.

ਨਾਨਪ੍ਪਕਾਰਕਨ੍ਤਿ ‘‘ਲੋਭਧਮ੍ਮਾ’’ਤਿ ਬਹੁਵਚਨਸ੍ਸ ਨਿਮਿਤ੍ਤਂ ਵਦਤਿ. ਲੋਭੋ ਹਿ ਤੇਨ ਤੇਨ ਅਵਤ੍ਥਾਵਿਸੇਸੇਨ ਪਵਤ੍ਤਿਆਕਾਰਭੇਦੇਨ ‘‘ਛਨ੍ਦੋ ਰਾਗੋਤਣ੍ਹਾ ਆਸਤ੍ਤਿ ਅਪੇਕ੍ਖਾ’’ਤਿਆਦਿਨਾ ਅਨੇਕਪ੍ਪਭੇਦੋ, ਲੁਬ੍ਭਨਲਕ੍ਖਣੇਨ ਪਨ ‘‘ਲੋਭੋ’’ਤ੍ਵੇਵ ਵੁਚ੍ਚਤਿ. ਤੇਨਾਹ ‘‘ਨਾਨਪ੍ਪਕਾਰਕਂ ਲੋਭਂਯੇਵਾ’’ਤਿ. ਤਥਾ ‘‘ਦੋਸੋ ਪਟਿਘੋ ਕੋਧੋ ਉਪਨਾਹੋ ਵਿਰੋਧੋ’’ਤਿਆਦਿਨਾ, ‘‘ਮੁਯ੍ਹਨਂ ਅਸਮਪੇਕ੍ਖਨਂ ਅਪਚ੍ਚਵੇਕ੍ਖਣਾ ਦੁਮ੍ਮੇਜ੍ਝਂ ਬਾਲ੍ਯ’’ਨ੍ਤਿਆਦਿਨਾ (ਧ. ਸ. ੩੯੦) ਚ ਦੋਸਮੋਹਾਨਂ ਨਾਨਪ੍ਪਕਾਰਤਂ ਸਨ੍ਧਾਯਾਹ ‘‘ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ’’ਤਿ. ਪਰਿਯਾਦਿਯਿਤ੍ਵਾਤਿ ਪਰਿਤੋ ਸਬ੍ਬਸੋ ਆਦਾਯ. ਗਹੇਤ੍ਵਾਤਿ ਅਯਮੇਤ੍ਥ ਅਤ੍ਥੋਤਿ ਆਹ ‘‘ਗਹਣੇ ਆਗਤ’’ਨ੍ਤਿ. ਪਰਿਯਾਦਿਯਤੀਤਿ ਪਰਿਕ੍ਖੀਣੋਤਿ. ਦੀ-ਸਦ੍ਦਞ੍ਹਿ ਸਦ੍ਦਵਿਦੂ ਖਯਤ੍ਥਂ ਵਦਨ੍ਤਿ.

ਏਕਦਾਤਿ ਆਮੇਡਿਤਲੋਪੇਨ ਨਿਦ੍ਦੇਸੋਤਿ ਆਹ ‘‘ਏਕੇਕਸ੍ਮਿਂ ਕਾਲੇ’’ਤਿ. ਲੋਭਦੋਸਮੋਹਾਤਿ ਪਠਮਮਗ੍ਗੇਨ ਪਹੀਨਾਵਸੇਸਾ ਲੋਭਦੋਸਮੋਹਾ. ਨਿਰਵਸੇਸਾ ਪਹੀਯਨ੍ਤਿ, ਅਞ੍ਞਥਾ ਦੁਤਿਯਮਗ੍ਗੇਨ ਕਿਂ ਕਤਂ ਸਿਯਾਤਿ ਅਧਿਪ੍ਪਾਯੋ. ਸਮੁਦਾਚਾਰਪ੍ਪਤ੍ਤਂ ਪਨ ਦਿਸ੍ਵਾ ‘‘ਅਪ੍ਪਹੀਨਂ ਮੇ ਅਤ੍ਥੀ’’ਤਿਪਿ ਜਾਨਾਤਿ. ਏਵਂ ਕਥਂ ਨਿਰਵਸੇਸਪ੍ਪਹਾਨਸਞ੍ਞਾਤਿ ਆਹ ‘‘ਅਪ੍ਪਹੀਨਕਂ…ਪੇ… ਸਞ੍ਞੀ ਹੋਤੀ’’ਤਿ. ਏਵਂ ਪਠਮਮਗ੍ਗੇਨੇਵ ਸਮੁਚ੍ਛਿਨ੍ਨਸਂਸਯਸ੍ਸ ‘‘ਕੋ ਸੁ ਨਾਮ ਮੇ ਧਮ੍ਮੋ ਅਜ੍ਝਤ੍ਤਂ ਅਪ੍ਪਹੀਨੋਤਿ ਏਵਂ ਸਨ੍ਧੇਹੋ ਕਥਂ ਉਪ੍ਪਜ੍ਜਤੀ’’ਤਿ ਵਤ੍ਵਾ ‘‘ਪਣ੍ਣਤ੍ਤਿਯਾ ਅਕੋਵਿਦਤ੍ਤਾ’’ਤਿ ਕਾਰਣਮਾਹ. ਵਿਨਯਕੁਕ੍ਕੁਚ੍ਚਂ ਵਿਯ ਹਿ ਪਣ੍ਣਤ੍ਤਿਯਂ ਅਕੁਸਲਤਾਯ ਅਰਿਯਾਨਮ੍ਪਿ ਕਤ੍ਥਚਿ ਵਿਮਤਿਮਤ੍ਤਂ ਉਪ੍ਪਜ੍ਜਤਿ ਯਥਾ ਤਂ ਸਬ੍ਬਸੋ ਅਪ੍ਪਹੀਨਸਮ੍ਮੋਹਾਨਨ੍ਤਿ. ਅਤ੍ਤਨੋ ਅਵਿਸਯੇ ਅਨਭਿਜਾਨਨਂ ਪਣ੍ਣਤ੍ਤਿਕੋਸਲ੍ਲੇਨ ਕਿਮੇਤ੍ਥ ਪਯੋਜਨਂ, ਪਚ੍ਚਵੇਕ੍ਖਣਾਮਤ੍ਤੇਨ ਅਯਮਤ੍ਥੋ ਸਿਜ੍ਝਤੀਤਿ ਦਸ੍ਸੇਨ੍ਤੋ ‘‘ਕਿਂ ਤਸ੍ਸ ਪਚ੍ਚਵੇਕ੍ਖਣਾ ਨਤ੍ਥੀ’’ਤਿ ਆਹ. ਇਤਰੋ ‘‘ਨਤ੍ਥੀ’’ਤਿ ਨ ਸਕ੍ਕਾ ਵਤ੍ਤੁਨ੍ਤਿ ਕਤ੍ਵਾ ‘‘ਅਤ੍ਥੀ’’ਤਿ ਵਤ੍ਵਾ ਤਤ੍ਥ ਲਬ੍ਭਮਾਨਵਿਭਾਗਂ ਦਸ੍ਸੇਨ੍ਤੋ ‘‘ਸਾ ਪਨਾ’’ਤਿਆਦਿਮਾਹ. ਤਤ੍ਥ ਸਾਤਿ ਪਚ੍ਚਵੇਕ੍ਖਣਾ. ਸਬ੍ਬੇਸਨ੍ਤਿ ਸਬ੍ਬੇਸਂ ਅਰਿਯਾਨਂ. ਯਥਾ ਪਰਿਪੁਣ੍ਣਾ ਨ ਹੋਤਿ, ਨ ਏਵਂ ਸਬ੍ਬਸੋ ਨ ਹੋਤੀਤਿ ਆਹ ‘‘ਇਮਾਸੁ ਪਨਾ’’ਤਿਆਦਿ.

੧੭੬. ਅਜ੍ਝਤ੍ਤਨ੍ਤਿ ਨਿਯਕਜ੍ਝਤ੍ਤਂ ਅਧਿਪ੍ਪੇਤਨ੍ਤਿ ਆਹ ‘‘ਤਵ ਸਨ੍ਤਾਨੇ’’ਤਿ. ਅਪ੍ਪਹੀਨੋਤਿ ਅਨਵਸੇਸਤੋ ਅਪ੍ਪਹੀਨੋ. ਦੁਵਿਧੇਤਿ ਵਤ੍ਥੁਕਾਮਕਿਲੇਸਕਾਮੇ. ਕਿਲੇਸਕਾਮੋਪਿ ਹਿ ਯਦਗ੍ਗੇਨ ਅਸ੍ਸਾਦੀਯਤਿ, ਤਦਗ੍ਗੇਨ ਪਰਿਭੁਞ੍ਜੀਯਤਿ.

੧੭੭. ਅਸ੍ਸਾਦੀਯਤੀਤਿ ਅਸ੍ਸਾਦੋ, ਸੁਖਂ. ਅਪ੍ਪੋ ਅਪ੍ਪਮਤ੍ਤਕੋ ਅਸ੍ਸਾਦੋ ਏਤੇਸੂਤਿ ਅਪ੍ਪਸ੍ਸਾਦਾ. ਤੇਨਾਹ ‘‘ਪਰਿਤ੍ਤਸੁਖਾ’’ਤਿ. ਪਰਿਯੇਸਨਦੁਕ੍ਖਾਦਿਹੇਤੁਕਂ ਦਿਟ੍ਠਧਮ੍ਮਿਕਂ ਤਤ੍ਥ ਦੁਚ੍ਚਰਿਤਚਰਣੇਨ ਸਮ੍ਪਰਾਯਿਕਞ੍ਚ ਦੁਕ੍ਖਮੇਤ੍ਥ ਕਾਮੇਸੁ ਬਹੁਕਨ੍ਤਿ ਬਹੁਦੁਕ੍ਖਾ. ਬਹੁਪਾਯਾਸਾਤਿ ਬਹੁਪਰਿਕ੍ਕਿਲੇਸਾ. ਤੇ ਪਨ ਪਰਿਕ੍ਕਿਲੇਸਾ ਵਕ੍ਖਮਾਨਨਯੇਨ ਬਹੂਯੇਵੇਤ੍ਥ ਦਿਟ੍ਠਧਮ੍ਮਿਕਾਪੀਤਿ ਆਹ ‘‘ਦਿਟ੍ਠਧਮ੍ਮਿਕ…ਪੇ… ਬਹੂ’’ਤਿ. ਤੇ ਚ ਪਰਿਕ੍ਕਿਲੇਸਾ ਯਸ੍ਮਾ ਤਂਸਮਙ੍ਗਿਨੋ ਹਿਤਪਟਿਪਤ੍ਤਿਯਾ ਅਨ੍ਤਰਾਯਕਰਾ ਇਧ ਚੇਵ ਪਰਲੋਕੇ ਚ ਆਦੀਨਵਕਾਰਣਞ੍ਚ ਪਵਤ੍ਤਨ੍ਤਿ, ਤਸ੍ਮਾ ਵੁਤ੍ਤਂ ‘‘ਦਿਟ੍ਠਧਮ੍ਮਿਕ…ਪੇ… ਬਹੂ’’ਤਿ. ਏਵਂ ਚੇਪੀਤਿ ਏਵਂ ‘‘ਅਪ੍ਪਸ੍ਸਾਦਾ ਕਾਮਾ’’ਤਿਆਦਿਨਾ ਆਕਾਰੇਨ. ਨਯੇਨਾਤਿ ਧਮ੍ਮੇਨ. ਕਾਰਣੇਨਾਤਿ ਯੁਤ੍ਤਿਯਾ. ਸੁਟ੍ਠੁ ਦਿਟ੍ਠਂ ਹੋਤੀਤਿ ਸਮ੍ਬਨ੍ਧੋ. ਵਿਪਸ੍ਸਨਾਪਞ੍ਞਾਯਾਤਿ ਅਰਿਯਮਗ੍ਗਪਞ੍ਞਾਯ. ਸਾ ਚਤ੍ਤਾਰਿਪਿ ਸਚ੍ਚਾਨਿ ਵਿਸੇਸਤੋ ਪਸ੍ਸਤੀਤਿ ਵਿਪਸ੍ਸਨਾਤਿ ਅਧਿਪ੍ਪੇਤਾ. ਤੇਨਾਹ ‘‘ਹੇਟ੍ਠਾਮਗ੍ਗਦ੍ਵਯਞਾਣੇਨਾਤਿ ਅਤ੍ਥੋ’’ਤਿ. ਪੀਤਿਸੁਖਨ੍ਤਿ ਪੀਤਿਸੁਖਵਨ੍ਤਂ ਝਾਨਦ੍ਵਯਂ. ਦ੍ਵੇ ਮਗ੍ਗੇਤਿ ਹੇਟ੍ਠਾਮਗ੍ਗੇ. ਆਵਟ੍ਟਨਸੀਲੋ ਆਭੁਜਨਸੀਲੋ ਨ ਹੋਤੀਤਿ ਅਨਾਵਟ੍ਟੀ ਨੇਵ ਹੋਤਿ ਸਬ੍ਬਸੋ ਅਪ੍ਪਹੀਨਕਾਮਰਾਗਛਨ੍ਦੋ. ਤੇਨਾਹ ‘‘ਕਸ੍ਮਾ’’ਤਿਆਦਿ. ਓਰੋਧਨਾਟਕਾ ਪਜਹਨਪਞ੍ਞਾਤਿ ਆਦੀਨਵਾਨੁਪਸ੍ਸਨਾਞਾਣਮਾਹ.

੧੭੯. ਅਸ੍ਸਾਦੋਪਿ ਕਥਿਤੋ, ‘‘ਅਪ੍ਪਸ੍ਸਾਦਾ’’ਤਿ ਹਿ ਇਮਿਨਾ ਯਾਵਤਕੋ ਕਾਮੇਸੁ ਅਸ੍ਸਾਦੋ, ਤਂ ਸਬ੍ਬਂ ਅਨਵਸੇਸਤੋ ਪਰਿਗ੍ਗਹੇਤ੍ਵਾ ਚਸ੍ਸ ਪਰਿਤ੍ਤਭਾਵੋ ਦਸ੍ਸਿਤੋਤਿ ਆਦੀਨਵੋਪਿ ਕਥਿਤੋ ਸਙ੍ਖੇਪੇਨੇਵ ਸੇਸਸ੍ਸਆਦੀਨਵਸ੍ਸ ਦਸ੍ਸਿਤਤ੍ਤਾ. ਤਂ ਕਥੇਤੁਨ੍ਤਿ ਤਂ ਨਿਸ੍ਸਰਣਂ ‘‘ਏਕਨ੍ਤਸੁਖਪਟਿਸਂਵੇਦੀ’’ਤਿ ਇਮਿਨਾ ਕਥੇਤੁਂ. ਇਮੇਹਿ ਅਨ੍ਤੇਹੀਤਿ ‘‘ਪਞ੍ਚਿਮੇ, ਮਹਾਨਾਮ, ਕਾਮਗੁਣਾ’’ਤਿਆਦਿਨਾ ਕਾਮਗੁਣਦਸ੍ਸਨਮੁਖੇਨ ਕਾਮਸੁਖਲ੍ਲਿਕਾਨੁਯੋਗਂ ‘‘ਉਬ੍ਭਟ੍ਠਕਾ ਹੋਨ੍ਤਿ ਆਸਨਪਟਿਕ੍ਖਿਤ੍ਤਾ’’ਤਿਆਦਿਨਾ ਅਤ੍ਤਕਿਲਮਥਾਨੁਯੋਗਞ੍ਚ ਦਸ੍ਸੇਤ੍ਵਾ ਇਮੇਹਿ ਦ੍ਵੀਹਿ ਅਨ੍ਤੇਹਿ ਮੁਤ੍ਤਂ ਮਮ ਸਾਸਨਨ੍ਤਿ, ਫਲਸਮਾਪਤ੍ਤਿਪਰਿਯੋਸਾਨਤ੍ਤਾ ਸਾਸਨਸਮ੍ਪਤ੍ਤਿਯਾ ‘‘ਉਪਰਿਫਲਸਮਾਪਤ੍ਤਿਸੀਸੇਨ ਸਕਲਸਾਸਨਂ ਦਸ੍ਸੇਤੁ’’ਨ੍ਤਿ ਆਹ. ਗਿਜ੍ਝਸਦਿਸੋ ਕੂਟੋਤਿ ਮਜ੍ਝੇਪਦਲੋਪੀਸਮਾਸੋ ਯਥਾ ‘‘ਸਾਕਪਤ੍ਥਿਵੋ’’ਤਿ (ਪਾਣਿਨਿ. ੨.੧.੬੦). ਦੁਤਿਯੇ ਪਨੇਤ੍ਥ ਗਿਜ੍ਝਵਨ੍ਤਤਾਯ ਗਿਜ੍ਝਾ ਕੂਟੇ ਏਤਸ੍ਸਾਤਿ ਗਿਜ੍ਝਕੂਟੋ. ਉਦ੍ਧਂਯੇਵ ਤਿਟ੍ਠਨਕਾ ਨਿਸਜ੍ਜਾਯ ਵੁਟ੍ਠਿਤਕਾਲਤੋ ਪਟ੍ਠਾਯ ਏਕਟ੍ਠਾਨੇਨੇਵ ਤਿਟ੍ਠਨਕਾ. ਤੇਨਾਹ ‘‘ਅਨਿਸਿਨ੍ਨਾ’’ਤਿ. ਨਿਗਣ੍ਠਸ੍ਸਾਤਿ ਨਾਟਪੁਤ੍ਤਸ੍ਸ. ਨਤ੍ਥਿ ਏਤਸ੍ਸ ਪਰਿਸੇਸਨ੍ਤਿ ਅਪਰਿਸੇਸਂ. ਏਵਂ ਸਙ੍ਖਾਭਵਚਨਮਤ੍ਤਮਸ੍ਸਾਤਿ ਆਹ ‘‘ਅਪਰਿਸੇਸਸਙ੍ਖਾਤ’’ਨ੍ਤਿ. ਨਿਚ੍ਚਟ੍ਠੇਨ ਸਤਤ-ਸਦ੍ਦੇਨ ਅਭਿਣ੍ਹਪ੍ਪਵਤ੍ਤਿ ਜੋਤਿਤਾ ਸਿਯਾਤਿ ‘‘ਸਮਿਤ’’ਨ੍ਤਿ ਵੁਤ੍ਤਂ. ਤੇਨ ਨਿਰਨ੍ਤਰਪ੍ਪਵਤ੍ਤਿਂ ਦਸ੍ਸੇਤੀਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ.

੧੮੦. ਯਂ ਕਰੋਤਿ, ਤਂ ਜਾਨਾਤੀਤਿ ਦੁਕ੍ਖਸ੍ਸ ਨਿਜ੍ਜਰਣਖੇਪਨਂ ਨਾਮ ਵਿਞ੍ਞੂਨਂ ਕਿਚ੍ਚਂ, ਵਿਞ੍ਞੁਨਾ ਚ ਪੁਰਿਸੇਨ ਕਤਾਕਤਂ ਜਾਨਿਤਬ੍ਬਂ, ਤਸ੍ਮਾ ਤੁਮ੍ਹੇਹਿ ਪੁਰਾਣਾਨਂ ਕਮ੍ਮਾਨਂ ਬ੍ਯਨ੍ਤਿਭਾਵਂ ਕਰੋਨ੍ਤੇਹਿ ਪਠਮਂ ਤਾਵ ਏਤ੍ਤਕਾਨਿ ਪੁਰਾਣਾਨਿ ਕਮ੍ਮਾਨੀਤਿ ਜਾਨਿਤਬ੍ਬਾਨਿ, ਤਤੋ ‘‘ਏਤ੍ਤਕਂ ਕਾਲਂ ਕਤੇਨ ਤਪਸਾ ਏਤ੍ਤਕਾਨਿ ਤਾਨਿ ਬ੍ਯਨ੍ਤਿਕਤਾਨਿ, ਇਦਾਨਿ ਏਤ੍ਤਕਾਨਿ ਕਾਤਬ੍ਬਾਨੀ’’ਤਿਆਦਿਨਾ ਅਯਂ ਵਿਧਿ ਪੁਰਿਸੇਨ ਵਿਯ ਅਤ੍ਤਨਾ ਕਾਤਬ੍ਬਕਿਚ੍ਚਂ ਪਰਿਚ੍ਛਿਨ੍ਦਿਤਬ੍ਬਨ੍ਤਿ ਦਸ੍ਸੇਤਿ. ਤੇਨਾਹ ‘‘ਤੁਮ੍ਹੇਹਿਪਿ ਤਥਾ ਞਾਤਬ੍ਬਂ ਸਿਯਾ’’ਤਿ. ਸੁਦ੍ਧਨ੍ਤਨ੍ਤਿ ਸੁਦ੍ਧਕੋਟ੍ਠਾਸਂ, ਆਯਤਿਂ ਅਨਵਸ੍ਸਵਸਿਦ੍ਧਂ ਕਮ੍ਮਕ੍ਖਯਂ, ਤਤੋ ਵਾ ਦੁਕ੍ਖਕ੍ਖਯਨ੍ਤਿ ਅਤ੍ਥੋ. ਸੁਦ੍ਧਨ੍ਤਂ ਪਤ੍ਤੋ ਅਤ੍ਥੀਤਿ ਪੁਚ੍ਛਤੀਤਿ ਇਮਿਨਾ ਅਕੁਸਲਾਨਂ ਪਹਾਨਂ, ਕੁਸਲਾਨਂ ਭਾਵਨਾ ਚ ਸਬ੍ਬੇਨ ਸਬ੍ਬਂ ਨਿਗਣ੍ਠਸਮਯੇ ਨਤ੍ਥਿ ਸਬ੍ਬਸੋ ਵਿਸੁਦ੍ਧਿਭਾਵਨਾਯ ਅਭਾਵਤੋ, ਤਸ੍ਮਾ ਕੁਤੋ ਦੁਕ੍ਖਕ੍ਖਯਸ੍ਸ ਸਮ੍ਭਵੋਤਿ ਦਸ੍ਸੇਤਿ.

ਏਵਂ ਅਜਾਨਨਭਾਵੇ ਸਤੀਤਿ ‘‘ਅਹੁਵਮ੍ਹੇਵ ਮਯ’’ਨ੍ਤਿਆਦਿਨਾ ਵੁਤ੍ਤਪ੍ਪਕਾਰਸ੍ਸ ਅਜਾਨਨੇ ਸਤਿ, ਤਸ੍ਮਿਂ ਤੁਮ੍ਹੇਹਿ ਅਞ੍ਞਾਯਮਾਨੇਤਿ ਅਤ੍ਥੋ. ਲੁਦ੍ਦਾਤਿ ਘੋਰਾ. ਤੇ ਪਨ ਯਸ੍ਮਾ ਕਾਯਵਾਚਾਹਿ ਨਿਹੀਨਮੇਵ ਕਰੋਨ੍ਤਿ, ਤਸ੍ਮਾ ਵੁਤ੍ਤਂ ‘‘ਲੁਦ੍ਦਾਚਾਰਾ’’ਤਿ. ਲੋਹਿਤਪਾਣਿਤ੍ਵੇਵ ਵੁਚ੍ਚਤਿ ਤਜ੍ਜਾਕਿਰਿਯਾਚਰਣਤੋ. ਮਾਗਵਿਕਕੇਵਟ੍ਟਚੋਰਘਾਤਕਾਦਯੋ ਮਾਗਵਿਕਾਦਯੋ. ਕਕ੍ਖਲ਼ਕਮ੍ਮਾਤਿ ਫਰੁਸਕਮ੍ਮਾ. ਤੇ ਨਿਗਣ੍ਠੇਸੁ ਪਬ੍ਬਜਨ੍ਤੀਤਿ ਪੁਬ੍ਬੇ ਮਹਾਦੁਕ੍ਖਸਂਵਤ੍ਤਨਿਯਕਮ੍ਮਸ੍ਸ ਕਤਤ੍ਤਾ ਹਿ ਤੁਮ੍ਹੇ ਏਤਰਹਿ ਈਦਿਸਂ ਮਹਾਦੁਕ੍ਖਂ ਪਚ੍ਚਨੁਭਵਥਾਤਿ ਦਸ੍ਸੇਤਿ.

ਵਾਦੇਤਿ ਦਿਟ੍ਠਿਯਂ, ਸਮਯੇਤਿ ਅਤ੍ਥੋ. ਸੁਖੇਨ ਸੁਖਨ੍ਤਿ ਏਤ੍ਥ ਸੁਖੇਨਾਤਿ ਪਟਿਪਤ੍ਤਿਸੁਖੇਨ, ਸੁਖਾਯ ਪਟਿਪਤ੍ਤਿਯਾਤਿ ਅਤ੍ਥੋ. ਸੁਖਨ੍ਤਿ ਵਿਮੋਕ੍ਖਸੁਖਂ, ਇਧ ਲੋਕੇ ਸੁਖਂ ਅਧਿਗਚ੍ਛਨ੍ਤਾ ਕਸਿਵਣਿਜ੍ਜਾਦਿਦੁਕ੍ਖਪਟਿਪਤ੍ਤਿਯਾਵ ਅਧਿਗਚ੍ਛਨ੍ਤਿ, ਏਵਂ ਮੋਕ੍ਖਸੁਖਮ੍ਪੀਤਿ ਅਧਿਪ੍ਪਾਯੋ. ਸਰੀਰਾਵਯਵਸਮ੍ਪਤ੍ਤਿਯਾਪਿ ਬਿਮ੍ਬਿਨੋ ਸਾਰੋਤਿ ਬਿਮ੍ਬਿਸਾਰੋ. ਤੇ ਨਿਗਣ੍ਠਾ…ਪੇ… ਸਨ੍ਧਾਯ ਵਦਨ੍ਤਿ, ਨ ਪਨ ਭਗਵਤੋ ਅਚ੍ਚਨ੍ਤਸਨ੍ਤਪਣੀਤਂ ਨਿਬ੍ਬਾਨਸੁਖਪਟਿਵੇਦਨਂ ਜਾਨਨ੍ਤਿ. ਸਹਸਾਤਿ ਰਵਾ. ਅਪ੍ਪਟਿਸਙ੍ਖਾਤਿ ਨ ਪਟਿਸਙ੍ਖਾਯ ਅਵਿਚਾਰੇਤ੍ਵਾ. ਤੇਨਾਹ ‘‘ਸਾਹਸਂ ਕਤ੍ਵਾ’’ਤਿਆਦਿ.

ਅਞ੍ਞਾਹਿ ਵੇਦਨਾਹਿ ਅਵੋਮਿਸ੍ਸਂ ਏਕਨ੍ਤਂ ਸੁਖਂ ਏਕਨ੍ਤਸੁਖਂ, ਤਸ੍ਸ ਪਟਿਸਂਵੇਦੀ. ਤੇਨਾਹ ‘‘ਨਿਰਨ੍ਤਰਸੁਖਪਟਿਸਂਵੇਦੀ’’ਤਿ. ਕਥਾਪਤਿਟ੍ਠਾਪਨਤ੍ਥਨ੍ਤਿ ‘‘ਏਕਨ੍ਤਸੁਖਪਟਿਸਂਵੇਦੀ’’ਤਿ ਏਵਂ ਆਰਦ੍ਧਕਥਾਯ ਪਤਿਟ੍ਠਾਪਨਤ੍ਥਂ. ਰਾਜਵਾਰੇਤਿ ਰਾਜਾਨਂ ਉਦ੍ਦਿਸ੍ਸ ਆਗਤਦੇਸਨਾਵਾਰੇ. ਸੁਖਂ ਪੁਚ੍ਛਿਤੁਂ ਹੋਤੀਤਿ ‘‘ਯਦਿ ਸਤ੍ਤ ਰਤ੍ਤਿਨ੍ਦਿਵਾਨਿ ਨਪ੍ਪਹੋਤਿ, ਕਿਂ ਛ ਰਤ੍ਤਿਨ੍ਦਿਵਾਨਿ ਪਹੋਤੀ’’ਤਿਆਦਿਨਾ ਪੁਚ੍ਛਨਸੁਖਂ ਹੋਤਿ. ‘‘ਅਹਂ ਖੋ’’ਤਿਆਦਿਨਾ ਪਵਤ੍ਤੋ ਸੁਦ੍ਧਵਾਰੋ ਸੁਦ੍ਧਨਿਸ੍ਸਨ੍ਦਸ੍ਸ ਫਲਸਮਾਪਤ੍ਤਿਸੁਖਸ੍ਸ ਵਸੇਨ ਆਗਤਤ੍ਤਾ. ਅਨਚ੍ਛਰਿਯਂ ਹੋਤਿ, ਸਤ੍ਤ ਰਤ੍ਤਿਨ੍ਦਿਵਾਨਿ ਪਹੋਨ੍ਤਸ੍ਸ ਏਕਸ੍ਮਿਂ ਰਤ੍ਤਿਨ੍ਦਿਵੇ ਕਿਂ ਵਤ੍ਤਬ੍ਬਨ੍ਤਿ. ਉਤ੍ਤਾਨਤ੍ਥਮੇਵ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਤ੍ਤਾ.

ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.