੫. ਲਕ੍ਖਣਹਾਰਵਿਭਙ੍ਗਵਣ੍ਣਨਾ

੨੩. ‘‘ਲਕ੍ਖਣਹਾਰਸ੍ਸ ਵਿਸਯਂ ਪੁਚ੍ਛਤੀ’’ਤਿ ਵੁਤ੍ਤਂ, ‘‘ਕੋ ਪਨ ਤਸ੍ਸ ਵਿਸਯੋ’’ਤਿ ਵੁਤ੍ਤੇ ਸਮਾਨਲਕ੍ਖਣਾ ਅਵੁਤ੍ਤਧਮ੍ਮਾ. ਕਾਯਾਨੁਪਸ੍ਸਨਾਯ ਸਮਾਰਦ੍ਧਾਯ ਵੇਦਨਾਨੁਪਸ੍ਸਨਾਦਯੋ ਸੁਖੇਨੇਵ ਸਿਜ੍ਝਨ੍ਤੀਤਿ ਤਬ੍ਬਚਨੇਨ ਵੇਦਨਾਗਤਾਸਤਿਆਦੀਨਂ ਵੁਤ੍ਤਭਾਵੋ ਦਸ੍ਸਿਤੋ ਸਤਿਪਟ੍ਠਾਨਭਾਵੇਨ ਏਕਲਕ੍ਖਣਤ੍ਤਾਤਿ ਕਾਯਾਨੁਪਸ੍ਸਨਾਸਤਿਪਟ੍ਠਾਨਸ੍ਸ ਸਦ੍ਧਾਨੁਗ੍ਗਹਿਤਾਨਿ ਵੀਰਿਯਸਤਿਸਮਾਧਿਪਞ੍ਞਿਨ੍ਦ੍ਰਿਯਾਨਿ ਸਾਧਨਂ, ਏਵਂ ਇਤਰੇਸਮ੍ਪੀਤਿ ਕਤ੍ਵਾ ਵੁਤ੍ਤਂ. ਅਯਂ ਅਤ੍ਥੋ ਅਟ੍ਠਕਥਾਯਮੇਵ (ਨੇਤ੍ਤਿ. ਅਟ੍ਠ. ੫੧) ਪਰਤੋ ਆਗਮਿਸ੍ਸਤਿ. ਇਮਿਨਾ ਨਯੇਨ ਸੇਸੇਸੁਪਿ ਏਕਲਕ੍ਖਣਤਾਨਿਦ੍ਦੇਸੇਸੁ ਅਤ੍ਥੋ ਵੇਦਿਤਬ੍ਬੋ. ਪਰਤੋਤਿ ਚਤੁਬ੍ਯੂਹਹਾਰਵਣ੍ਣਨਾਯਂ (ਨੇਤ੍ਤਿ. ਅਟ੍ਠ. ੨੦).

ਅਸਮ੍ਮਿਸ੍ਸਤੋਤਿ ਵੇਦਨਾਦਯੋਪਿ ਏਤ੍ਥ ਸਿਤਾ ਏਤ੍ਥ ਪਟਿਸਨ੍ਧਾਤਿ ਕਾਯੇ ਵੇਦਨਾਦਿਅਨੁਪਸ੍ਸਨਾਪਸਙ੍ਗੇਪਿ ਆਪਨ੍ਨੇ ਤਦਸਮ੍ਮਿਸ੍ਸਤੋਤਿ ਅਤ੍ਥੋ.

ਅਵਯਵਿਗਾਹਸਮਞ੍ਞਾਤਿਧਾਵਨਸਾਰਾਦਾਨਾਭਿਨਿਵੇਸਨਿਸੇਧਨਤ੍ਥਂ ਕਾਯਂ ਅਙ੍ਗਪਚ੍ਚਙ੍ਗੇਹਿ, ਤਾਨਿ ਚ ਕੇਸਾਦੀਹਿ, ਕੇਸਾਦਿਕੇ ਚ ਭੂਤੁਪਾਦਾਯਰੂਪੇਹਿ ਵਿਨਿਬ੍ਭੁਜਿਤੁਂ ‘‘ਤਥਾ ਨ ਕਾਯੇ’’ਤਿਆਦਿਮਾਹ. ਪਾਸਾਦਾਦਿਨਗਰਾਵਯਵਸਮੂਹੇ ਅਵਯਵਿਵਾਦਿਨੋਪਿ ਅਵਯਵਿਗਾਹਣਂ ਕਰੋਨ੍ਤਿ. ਨਗਰਂ ਨਾਮ ਕੋਚਿ ਅਤ੍ਥੋ ਅਤ੍ਥੀਤਿ ਪਨ ਕੇਸਞ੍ਚਿ ਸਮਞ੍ਞਾਤਿਧਾਵਨਂ ਸਿਯਾਤਿ ਇਤ੍ਥਿਪੁਰਿਸਾਦਿਸਮਞ੍ਞਾਤਿਧਾਵਨੇ ਨਗਰਨਿਦਸ੍ਸਨਂ ਵੁਤ੍ਤਂ. ਅਞ੍ਞੋ ਕੋਚਿ ਸਤ੍ਤਾਦਿਕੋ. ਯਂ ਪਸ੍ਸਤਿ ਇਤ੍ਥਿਂ, ਪੁਰਿਸਂ ਵਾ. ਨਨੁ ਚਕ੍ਖੁਨਾ ਇਤ੍ਥਿਪੁਰਿਸਦਸ੍ਸਨਂ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ‘‘ਇਤ੍ਥਿਂ ਪਸ੍ਸਾਮਿ, ਪੁਰਿਸਂ ਪਸ੍ਸਾਮੀ’’ਤਿ ਪਨ ਪਵਤ੍ਤਸਮਞ੍ਞਾਵਸੇਨ ‘‘ਯਂ ਪਸ੍ਸਤੀ’’ਤਿ ਵੁਤ੍ਤਂ. ਮਿਚ੍ਛਾਦਸ੍ਸਨੇਨ ਵਾ ਦਿਟ੍ਠਿਯਾ ਯਂ ਪਸ੍ਸਤਿ, ਨ ਤਂ ਦਿਟ੍ਠਂ ਰੂਪਾਯਤਨਂ ਹੋਤਿ, ਰੂਪਾਯਤਨਂ ਵਾ ਤਂ ਨ ਹੋਤੀਤਿ ਅਤ੍ਥੋ. ਅਥ ਵਾ ਤਂ ਕੋਸਾਦਿਭੂਤੁਪਾਦਾਯਸਮੂਹਸਙ੍ਖਾਤਂ ਦਿਟ੍ਠਂ ਨ ਹੋਤਿ, ਦਿਟ੍ਠਂ ਵਾ ਯਥਾਵੁਤ੍ਤਂ ਨ ਹੋਤੀਤਿ ਅਤ੍ਥੋ. ਯਂ ਦਿਟ੍ਠਂ ਤਂ ਨ ਪਸ੍ਸਤੀਤਿ ਯਂ ਰੂਪਾਯਤਨਂ, ਕੇਸਾਦਿਭੂਤੁਪਾਦਾਯਸਮੂਹਸਙ੍ਖਾਤਂ ਵਾ ਦਿਟ੍ਠਂ, ਤਂ ਪਞ੍ਞਾਚਕ੍ਖੁਨਾ ਭੂਤਤੋ ਨ ਪਸ੍ਸਤੀਤਿ ਅਤ੍ਥੋ.

ਨ ਅਞ੍ਞਧਮ੍ਮਾਨੁਪਸ੍ਸੀਤਿ ਨ ਅਞ੍ਞਸਭਾਵਾਨੁਪਸ੍ਸੀ, ਅਸੁਭਾਦਿਤੋ ਅਞ੍ਞਾਕਾਰਾਨੁਪਸ੍ਸੀ ਨ ਹੋਤੀਤਿ ਵੁਤ੍ਤਂ ਹੋਤਿ.

ਪਥਵੀਕਾਯਨ੍ਤਿ ਕੇਸਾਦਿਂ ਪਥਵੀਧਮ੍ਮਸਮੂਹਤ੍ਤਾ ‘‘ਕਾਯੋ’’ਤਿ ਵਦਤਿ, ਲਕ੍ਖਣਪਥਵਿਮੇਵ ਵਾ ਅਨੇਕਭੇਦਭਿਨ੍ਨਂ ਸਕਲਸਰੀਰਗਤਂ ਪੁਬ੍ਬਾਪਰਿਯਭਾਵੇਨ ਪਵਤ੍ਤਮਾਨਂ ਸਮੂਹਵਸੇਨ ਗਹੇਤ੍ਵਾ ‘‘ਕਾਯੋ’’ਤਿ ਵਦਤਿ. ਏਵਂ ਅਞ੍ਞਤ੍ਥਾਪਿ.

ਆਕਾਰਸਮੂਹਸਙ੍ਖਾਤਸ੍ਸਾਤਿ ਅਨਿਚ੍ਚਤਾਦਿਆਕਾਰਸਮੁਦਾਯਪਰਿਯਾਯਸ੍ਸ.

ਤੀਸੁ ਭਵੇਸੁ ਕਿਲੇਸੇਤਿ ਭਵਤ੍ਤਯਵਿਸਯਕਿਲੇਸੇ. ਸਬ੍ਬਤ੍ਥਿਕਨ੍ਤਿ ਸਬ੍ਬਤ੍ਥ ਲੀਨੇ, ਉਦ੍ਧਤੇ ਚ ਚਿਤ੍ਤੇ ਇਚ੍ਛਿਤਬ੍ਬਤ੍ਥਾ, ਸਬ੍ਬੇ ਵਾ ਲੀਨੇ, ਉਦ੍ਧਤੇ ਚ ਭਾਵੇਤਬ੍ਬਾ ਬੋਜ੍ਝਙ੍ਗਾ ਅਤ੍ਥਿਕਾ ਏਤਾਯਾਤਿ ਸਬ੍ਬਤ੍ਥਿਕਾ. ਅਨ੍ਤੋ ਸਙ੍ਕੋਚੋਤਿ ਅਨ੍ਤੋ ਓਲੀਯਨਾ, ਕੋਸਜ੍ਜਨ੍ਤਿ ਅਤ੍ਥੋ.

੨੪. ਗਹਿਤੇਸੂਤਿ ਭਾਵਨਾਗ੍ਗਹਣੇਨ ਗਹਿਤੇਸੁ, ਭਾਵਿਤੇਸੂਤਿ ਅਤ੍ਥੋ, ਵਚਨੇਨ ਵਾ ਗਹਿਤੇਸੁ. ਭਾਵਨਾਗ੍ਗਹਣਦੀਪਨਤ੍ਥਤ੍ਤਾ ਪਨ ਵਚਨੇਨ ਗਹਣਸ੍ਸ ਭਾਵਨਾਗ੍ਗਹਣਮੇਤ੍ਥ ਪਧਾਨਂ. ਯਸ੍ਸ ਸਤਿਪਟ੍ਠਾਨਾ ਭਾਵਿਤਾ, ਤਸ੍ਸ ਸਮ੍ਮਪ੍ਪਧਾਨਾਦਯੋ ਬੋਧਿਪਕ੍ਖਿਯਧਮ੍ਮਾ ਨ ਭਾਵਿਤਾਤਿ ਨੇਤਂ ਠਾਨਂ ਵਿਜ੍ਜਤੀਤਿ ਚ ਸਮਾਨਲਕ੍ਖਣਤਾਪਦੇਸੇਨ ਇਮਮਤ੍ਥਂ ਦਸ੍ਸੇਤੁਂ ਪਾਲ਼ਿਯਂ ‘‘ਚਤੂਸੁ ਸਤਿਪਟ੍ਠਾਨੇਸੁ ਭਾਵਿਯਮਾਨੇਸੁ ਚਤ੍ਤਾਰੋ ਸਮ੍ਮਪ੍ਪਧਾਨਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤੀ’’ਤਿਆਦਿ ਵੁਤ੍ਤਂ.

ਵਿਪਲ੍ਲਾਸਾ ਪਹੀਯਨ੍ਤਿ ਉਜੁਵਿਪਚ੍ਚਨੀਕਭਾਵਤੋ. ‘‘ਆਹਾਰਸਮੁਦਯਾ ਕਾਯਸ੍ਸ ਸਮੁਦਯੋ, ਫਸ੍ਸਸਮੁਦਯਾ ਵੇਦਨਾਨਂ ਸਮੁਦਯੋ (ਸਂ. ਨਿ. ੫.੪੦੮), ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ (ਸਂ. ਨਿ. ੧.੧, ੩੯; ਮ. ਨਿ. ੩.੧੨੬; ਮਹਾਵ. ੧; ਉਦਾ. ੧; ਵਿਭ. ੨੨੫) ਵਚਨਤੋ ਕਾਯਾਦੀਨਂ ਸਮੁਦਯਭੂਤਾ ਕਬਲ਼ੀਕਾਰਾਹਾਰਫਸ੍ਸਮਨੋਸਞ੍ਚੇਤਨਾਵਿਞ੍ਞਾਣਾਹਾਰਾਕਾਯਾਦੀਨਂ ਪਰਿਜਾਨਨੇਨ ਪਰਿਞ੍ਞਾਤਾ ਹੋਨ੍ਤਿ ਤਪ੍ਪਟਿਪਕ੍ਖਪ੍ਪਹਾਨਤੋਤਿ ਦਸ੍ਸੇਨ੍ਤੋ ‘‘ਚਤ੍ਤਾਰੋ ਆਹਾਰਾ’’ਤਿਆਦਿਮਾਹ. ਸਬ੍ਬਤ੍ਥਾਤਿ ‘‘ਉਪਾਦਾਨੇਹਿ ਅਨੁਪਾਦਾਨੋ ਭਵਤੀ’’ਤਿ ਏਵਮਾਦੀਸੁ.

ਤਤ੍ਥ ਯਸ੍ਮਾ ਪਞ੍ਚ ਕਾਮਗੁਣਾ ਸਵਿਸੇਸਾ ਕਾਯੇ ਲਬ੍ਭਨ੍ਤੀਤਿ ਵਿਸੇਸੇਨ ਕਾਯੋ ਕਾਮੁਪਾਦਾਨਸ੍ਸ ਵਤ੍ਥੁ, ਸੁਖਵੇਦਨਸ੍ਸਾਦਵਸੇਨ ਪਰਲੋਕਨਿਰਪੇਕ੍ਖੋ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿ (ਦੀ. ਨਿ. ੧.੧੭੧; ਮ. ਨਿ. ੧.੪੪੫; ੨.੯੪-੯੫, ੨੨੫; ੩.੯੧, ੧੧੬; ਸਂ. ਨਿ. ੩.੨੧੦; ਧ. ਸ. ੧੨੨੧; ਵਿਭ. ੯੩੮) ਪਰਾਮਾਸਂ ਉਪ੍ਪਾਦੇਤੀਤਿ ਦਿਟ੍ਠੁਪਾਦਾਨਸ੍ਸ ਵੇਦਨਾ, ਚਿਤ੍ਤੇ ਨਿਚ੍ਚਗ੍ਗਹਣਵਸੇਨ ਸਸ੍ਸਤਸ੍ਸ ‘‘ਅਤ੍ਤਨੋ ਸੀਲਾਦਿਵਸੇਨ ਪਰਿਸੁਦ੍ਧਪਰਾਮਸਨਂ ਹੋਤੀ’’ਤਿ ਸੀਲਬ੍ਬਤੁਪਾਦਾਨਸ੍ਸ ਚਿਤ੍ਤਂ, ਨਾਮਰੂਪਪਰਿਚ੍ਛੇਦੇਨ ਭੂਤਂ ਭੂਤਤੋ ਅਪਸ੍ਸਨ੍ਤਸ੍ਸ ‘‘ਅਤ੍ਤਾਭਿਨਿਵੇਸੋ ਹੋਤੀ’’ਤਿ ਅਤ੍ਤਵਾਦੁਪਾਦਾਨਸ੍ਸ ਧਮ੍ਮਾ ਵਤ੍ਥੁ, ਤਸ੍ਮਾ ‘‘ਚਤੂਸੁ ਸਤਿਪਟ੍ਠਾਨੇਸੁ ਭਾਵਿਯਮਾਨੇਸੁ ਉਪਾਦਾਨੇਹਿ ਅਨੁਪਾਦਾਨੋ ਭਵਤੀ’’ਤਿ ਵੁਤ੍ਤਂ.

ਯਸ੍ਮਾ ਪਨ ਵੁਤ੍ਤਨਯੇਨੇਵ ਕਾਯੋ ਕਾਮਯੋਗਸ੍ਸ ਵਤ੍ਥੁ, ਭਵੇਸੁ ਸੁਖਗ੍ਗਹਣਵਸੇਨ ਭਵਸ੍ਸਾਦੋ ਹੋਤੀਤਿ ਭਵਯੋਗਸ੍ਸ ਵੇਦਨਾ, ਸਨ੍ਤਤਿਘਨਗ੍ਗਹਣਵਸੇਨ ਚਿਤ੍ਤੇ ਅਤ੍ਤਾਭਿਨਿਵੇਸੋ ਹੋਤੀਤਿ ਦਿਟ੍ਠਿਯੋਗਸ੍ਸਚਿਤ੍ਤਂ, ਧਮ੍ਮਵਿਨਿਬ੍ਭੋਗਸ੍ਸ ਦੁਕ੍ਕਰਤ੍ਤਾ, ਧਮ੍ਮਾਨਂ ਧਮ੍ਮਮਤ੍ਤਤਾਯ ਚ ਦੁਪ੍ਪਟਿਵਿਜ੍ਝਤ੍ਤਾ ਸਮ੍ਮੋਹੋ ਹੋਤੀਤਿ ਅਵਿਜ੍ਜਾਯੋਗਸ੍ਸ ਧਮ੍ਮਾ, ਵਤ੍ਥੁ, ਤਸ੍ਮਾ ਚਤੁਸਤਿਪਟ੍ਠਾਨਭਾਵਨਾਯ ਤੇਸੁ ਤੇਸਂ ਪਹਾਨਸਿਦ੍ਧਿਤੋ ਯੋਗੇਹਿ ਵਿਸਂਯੁਤ੍ਤਤਾ ਵੁਤ੍ਤਾ. ਏਤੇਨੇਵ ਆਸਵੇਹਿ ਅਨਾਸਵਤਾ, ਓਘੇਹਿ ਨਿਤ੍ਤਿਣ੍ਣਤਾ ਚ ਸਂਵਣ੍ਣਿਤਾ ਹੋਤਿ ਕਾਮਰਾਗਾਦੀਨਂ ਏਵ ਕਾਮਯੋਗਕਾਮਾਸਵਕਾਮੋਘਾਦਿਭਾਵਤੋ.

ਵੁਤ੍ਤਨਯੇਨੇਵ ਕਾਯੋ ਅਭਿਜ੍ਝਾਕਾਯਗਨ੍ਥਸ੍ਸ ਵਤ੍ਥੁ, ‘‘ਦੁਕ੍ਖਾਯ ਵੇਦਨਾਯ ਪਟਿਘਾਨੁਸਯੋ ਅਨੁਸੇਤੀ’’ਤਿ (ਮ. ਨਿ. ੧.੪੬੫) ਦੁਕ੍ਖਦੁਕ੍ਖਵਿਪਰਿਣਾਮਦੁਕ੍ਖਸਙ੍ਖਾਰਦੁਕ੍ਖਭੂਤਾ ਵੇਦਨਾ ਵਿਸੇਸੇਨ ਬ੍ਯਾਪਾਦਕਾਯਗਨ੍ਥਸ੍ਸ ਵਤ੍ਥੁ, ਚਿਤ੍ਤੇ ਨਿਚ੍ਚਾਭਿਨਿਵੇਸਵਸੇਨ ਸਸ੍ਸਤਸ੍ਸ ‘‘ਅਤ੍ਤਨੋ ਸੀਲੇਨ ਸੁਦ੍ਧੀ’’ਤਿਆਦਿਪਰਾਮਸਨਂ ਹੋਤੀਤਿ ਸੀਲਬ੍ਬਤਪਰਾਮਾਸਸ੍ਸ ਚਿਤ੍ਤਂ ਵਤ੍ਥੁ, ਸਪ੍ਪਚ੍ਚਯਨਾਮਰੂਪਦਸ੍ਸਨਾਭਾਵਤੋ ਭਵਵਿਭਵਦਿਟ੍ਠਿਸਙ੍ਖਾਤੋ ਇਦਂਸਚ੍ਚਾਭਿਨਿਵੇਸੋ ਹੋਤੀਤਿ ਤਸ੍ਸ ਧਮ੍ਮਾ ਵਤ੍ਥੂਤਿ ਚਤੁਸਤਿਪਟ੍ਠਾਨਾਤਿ ਯੋਜੇਤਬ੍ਬਂ.

ਵੁਤ੍ਤਨਯੇਨੇਵ ਵਿਸੇਸਤੋ ਕਾਯੋ ਰਾਗਸਲ੍ਲਸ੍ਸ ਵਤ੍ਥੁ, ਵੇਦਨਾ ਦੋਸਸਲ੍ਲਸ੍ਸ, ‘‘ਚਿਤ੍ਤਂ ਨਿਚ੍ਚਗ੍ਗਹਣਵਸੇਨ ਅਤ੍ਤਾਭਿਨਿਵੇਸਂ ਅਤ੍ਤਾਨਂ ਸੇਯ੍ਯਾਦਿਤੋ ਦਹਤੀ’’ਤਿ ਚਿਤ੍ਤਂ ਮਾਨਸਲ੍ਲਸ੍ਸ, ਵੁਤ੍ਤਨਯੇਨੇਵ ਧਮ੍ਮਾ ਮੋਹਸਲ੍ਲਸ੍ਸ ਵਤ੍ਥੂਤਿ ਚਤੁਸਤਿਪਟ੍ਠਾਨਾਤਿ ਯੋਜੇਤਬ੍ਬਂ.

ਯਸ੍ਮਾ ਪਨ ਕਾਯਾਨੁਪਸ੍ਸਨਾਦੀਹਿ ਕਾਯਵੇਦਨਾਚਿਤ੍ਤਧਮ੍ਮੇਸੁ ਪਰਿਞ੍ਞਾਤੇਸੁ ਰੂਪਵੇਦਨਾਸਞ੍ਞਾਸਙ੍ਖਾਰਕ੍ਖਨ੍ਧਾ ਪਰਿਞ੍ਞਾਤਾ ਹੋਨ੍ਤਿ, ਚਿਤ੍ਤੇ ਹਿ ਪਰਿਞ੍ਞਾਤੇ ਸਞ੍ਞਾਪਿ ਪਰਿਞ੍ਞਾਤਾਵ ਹੋਤਿ, ਤਸ੍ਮਾ ‘‘ਵਿਞ੍ਞਾਣਟ੍ਠਿਤਿਯੋ ਚਸ੍ਸ ਪਰਿਞ੍ਞਂ ਗਚ੍ਛਨ੍ਤੀ’’ਤਿ ਵੁਤ੍ਤਂ.

ਤਥਾ ਵਿਸੇਸਤੋ ਕਾਯੇ ਸਾਪੇਕ੍ਖਾ ਛਨ੍ਦਾਗਤਿਂ ਗਚ੍ਛਤੀਤਿ ਕਾਯੋ ਛਨ੍ਦਾਗਤਿਯਾ ਵਤ੍ਥੁ, ਵੁਤ੍ਤਨਯੇਨੇਵ ਵੇਦਨਾ ਬ੍ਯਾਪਾਦਸ੍ਸ ਨਿਮਿਤ੍ਤਨ੍ਤਿ ਸਾ ਦੋਸਾਗਤਿਯਾ ਵਤ੍ਥੁ, ਸਨ੍ਤਤਿਘਨਗ੍ਗਹਣਵਸੇਨ ਸਰਾਗਾਦਿਚਿਤ੍ਤੇ ਸਮ੍ਮੋਹੋ ਹੋਤੀਤਿ ਮੋਹਾਗਤਿਯਾ ਚਿਤ੍ਤਂ, ਧਮ੍ਮਸਭਾਵਾਨਵਬੋਧੇਨ ਭਯਂ ਹੋਤੀਤਿ ਭਯਾਗਤਿਯਾ ਧਮ੍ਮਾ ਵਤ੍ਥੂਤਿ ਚਤੁਸਤਿਪਟ੍ਠਾਨਭਾਵਨਾਯ ਅਗਤਿਗਮਨਪ੍ਪਹਾਨਂ ਹੋਤੀਤਿ ਆਹ ‘‘ਅਗਤਿਗਮਨੇਹਿ ਚ ਨ ਅਗਤਿਂ ਗਚ੍ਛਤੀ’’ਤਿ.

‘‘ਅਕੁਸਲਸ੍ਸ ਸੋਮਨਸ੍ਸਸ੍ਸ ਵਸੇਨਾ’’ਤਿ ਇਦਂ ‘‘ਅਯਮ੍ਪਿ ਅਤ੍ਥੋ ਸਮ੍ਭਵਤੀ’’ਤਿ ਕਤ੍ਵਾ ਵੁਤ੍ਤਂ. ‘‘ਸੁਖਾਯ ਵੇਦਨਾਯ ਰਾਗਾਨੁਸਯੋ ਅਨੁਸੇਤੀ’’ਤਿ (ਮ. ਨਿ. ੧.੪੬੫) ਪਨ ਵਚਨਤੋ ਸੁਖਵੇਦਨਾਗ੍ਗਹਣੇਨ ਤਤ੍ਥਾਨੁਸਯਨੇਨ ਸਮੁਦਯਸਚ੍ਚਂ ਦੇਸਿਤਨ੍ਤਿ ਵੇਦਿਤਬ੍ਬਂ. ਦੇਸਿਤਂ ਦੁਕ੍ਖਂ ਅਰਿਯਸਚ੍ਚਨ੍ਤਿ ਦੁਕ੍ਖਦੁਕ੍ਖਗ੍ਗਹਣੇਨ ਸਾਤਿਸਯਂ ਦੁਕ੍ਖਂ ਅਰਿਯਸਚ੍ਚਂ ਪਕਾਸਿਤਂ ਹੋਤੀਤਿ ਪਾਲ਼ਿਯਂ ‘‘ਦੁਕ੍ਖਂ ਅਰਿਯਸਚ੍ਚਂ ਦੇਸਿਤ’’ਨ੍ਤਿ ਵੁਤ੍ਤਂ. ਸਹਚਰਣਾਦੀਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਨਿਦ੍ਦੇਸਵਾਰਵਣ੍ਣਨਾਯਂ (ਨੇਤ੍ਤਿ. ਅਟ੍ਠ. ੫ ਆਦਯੋ) ਵੁਤ੍ਤਂ.

ਲਕ੍ਖਣਹਾਰਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.