੪. ਪਾਚਿਤ੍ਤਿਯਨਿਦ੍ਦੇਸਵਣ੍ਣਨਾ
੩੦. ਇਦਾਨਿ ਪਾਚਿਤ੍ਤਿਯਂ ਦਸ੍ਸੇਤੁਂ ‘‘ਸਮ੍ਪਜਾਨਮੁਸਾਵਾਦੇ’’ਤ੍ਯਾਦਿ ਆਰਦ੍ਧਂ. ਤਤ੍ਥ ਸਮ੍ਪਜਾਨਮੁਸਾਵਾਦੇਤਿ ਨਿਮਿਤ੍ਤਤ੍ਥੇ ਭੁਮ੍ਮਵਚਨਂ, ਤਸ੍ਮਾ ਯੋ ਭਿਕ੍ਖੁ ਸਮ੍ਪਜਾਨਨ੍ਤੋ ਮੁਸਾ ਵਦਤਿ, ਤਸ੍ਸ ਤਨ੍ਨਿਮਿਤ੍ਤਂ ਤਂਹੇਤੁ ਤਪ੍ਪਚ੍ਚਯਾ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ. ਭਿਕ੍ਖੁਞ੍ਚ ਓਮਸਨ੍ਤਸ੍ਸਾਤਿ ਜਾਤਿਨਾਮਗੋਤ੍ਤਕਮ੍ਮਸਿਪ੍ਪਵਯਆਬਾਧਲਿਙ੍ਗਕਿਲੇਸਾਪਤ੍ਤਿਅਕ੍ਕੋਸੇਸੁ ਭੂਤੇਨ ਵਾ ਅਭੂਤੇਨ ਵਾ ਯੇਨ ਕੇਨਚਿ ਮੁਖਸਤ੍ਤਿਨਾ ਭਿਕ੍ਖੁਂ ਓਵਿਜ੍ਝਨ੍ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ. ਪੇਸੁਞ੍ਞਹਰਣੇਪਿ ਚਾਤਿ ਭਿਕ੍ਖੁਸ੍ਸ ਪੇਸੁਞ੍ਞਹਰਣੇ, ਜਾਤਿਆਦੀਹਿ ਅਕ੍ਕੋਸਵਤ੍ਥੂਹਿ ਭਿਕ੍ਖੁਂ ਅਕ੍ਕੋਸਨ੍ਤਸ੍ਸ ਭਿਕ੍ਖੁਨੋ ਸੁਤ੍ਵਾ ਭਿਕ੍ਖੁਨੋ ਪਿਯਕਮ੍ਯਤਾਯ ਵਾ ਭੇਦਾਧਿਪ੍ਪਾਯੇਨ ਵਾ ਯੋ ਅਕ੍ਕੁਦ੍ਧੋ, ਤਸ੍ਸ ਭਿਕ੍ਖੁਸ੍ਸ ਕਾਯੇਨ ਵਾ ਵਾਚਾਯ ਵਾ ਪੇਸੁਞ੍ਞਹਰਣਵਚਨੇ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ.
੩੧. ਸਙ੍ਗੀਤਿਤ੍ਤਯਮਾਰੁਲ਼੍ਹਂ ਪਿਟਕਤ੍ਤਯਂ ਧਮ੍ਮਂ ਭਿਕ੍ਖੁਞ੍ਚ ਭਿਕ੍ਖੁਨਿਞ੍ਚ ਠਪੇਤ੍ਵਾ ਅਞ੍ਞੇਨ ਪੁਗ੍ਗਲੇਨ ਸਦ੍ਧਿਂ ਏਕਤੋ ਪਦਂ ਪਦਂ ਭਣਨ੍ਤਸ੍ਸ ਭਿਕ੍ਖੁਨੋ ਪਦਗਣਨਾਯ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਸਮੁਦਾਯਤ੍ਥੋ.
੩੨. ਅਨੁਪਸਮ੍ਪਨ੍ਨੇਨੇਵਾਤਿ ਭਿਕ੍ਖੁਂ ਠਪੇਤ੍ਵਾ ਅਨ੍ਤਮਸੋ ਪਾਰਾਜਿਕਵਤ੍ਥੁਭੂਤੇਨ ਤਿਰਚ੍ਛਾਨਗਤੇਨਾਪਿ ਸਹ ਤਿਰਤ੍ਤਿਯਂ ਸਯਿਤ੍ਵਾ ਚਤੁਤ੍ਥਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਪੁਨ ਸਹਸੇਯ੍ਯਾਯ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਸਹਸੇਯ੍ਯਾਯਾਤਿ ਸਬ੍ਬਚ੍ਛਨ੍ਨਪਰਿਚ੍ਛਿਨ੍ਨੇ, ਯੇਭੁਯ੍ਯੇਨਚ੍ਛਨ੍ਨਪਰਿਚ੍ਛਿਨ੍ਨੇ ਵਾ ਸੇਨਾਸਨੇ ਪੁਬ੍ਬਾਪਰਿਯੇਨ ਵਾ ਏਕਕ੍ਖਣੇ ਵਾ ਏਕਤੋ ਨਿਸਜ੍ਜਨਾਯ. ਤਤ੍ਥ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਚ੍ਛਿਨ੍ਨਮ੍ਪਿ ਸਬ੍ਬਪਰਿਚ੍ਛਿਨ੍ਨਮਿਚ੍ਚੇਵ ਵੇਦਿਤਬ੍ਬਂ.
੩੩. ਏਕਰਤ੍ਤਮ੍ਪਿ ਇਤ੍ਥਿਯਾ ਸਦ੍ਧਿਂ ਸੇਯ੍ਯਂ ਕਪ੍ਪਯਤੋ ਤਸ੍ਸ ਭਿਕ੍ਖੁਨੋਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ਇਤ੍ਥਿਯਾਤਿ ਅਨ੍ਤਮਸੋ ਤਦਹੁਜਾਤਾਯਪਿ ਮਨੁਸ੍ਸਿਤ੍ਥਿਯਾ. ਦੇਸੇਨ੍ਤਸ੍ਸ ਵਿਨਾ ਵਿਞ੍ਞੁਂ, ਧਮ੍ਮਞ੍ਚ ਛਪ੍ਪਦੁਤ੍ਤਰਿਨ੍ਤਿ ਵਿਞ੍ਞੁਂ ਪੁਰਿਸਂ ਵਿਨਾ ਇਤ੍ਥਿਯਾ ਛਪ੍ਪਦਤੋ ਉਤ੍ਤਰਿਂ ਧਮ੍ਮਂ ਦੇਸੇਨ੍ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ‘‘ਛਪ੍ਪਦੁਤ੍ਤਰਿ’’ਨ੍ਤਿ ਏਤ੍ਥ ਏਕੋ ਗਾਥਾਪਾਦੋ ਏਕਂ ਪਦਨ੍ਤਿ ਏਵਂ ਸਬ੍ਬਤ੍ਥ ਪਦਪ੍ਪਮਾਣਂ ਵੇਦਿਤਬ੍ਬਂ. ਛ ਪਦਾਨਿ ਛਪ੍ਪਦਂ, ਛਪ੍ਪਦਤੋ ਉਤ੍ਤਰਿਂ ਛਪ੍ਪਦੁਤ੍ਤਰਿਂ.
੩੪. ਭਿਕ੍ਖੁਸਮ੍ਮੁਤਿਂ ਠਪੇਤ੍ਵਾ ਭਿਕ੍ਖੁਨੋ ਦੁਟ੍ਠੁਲ੍ਲਂ ਵਜ੍ਜਂ ਅਭਿਕ੍ਖੁਨੋ ਵਦਨ੍ਤਸ੍ਸ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ. ਤਤ੍ਥ ਦੁਟ੍ਠੁਲ੍ਲਨ੍ਤਿ ਇਧ ਸਙ੍ਘਾਦਿਸੇਸਂ ਅਧਿਪ੍ਪੇਤਂ. ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਅਭਿਣ੍ਹਾਪਤ੍ਤਿਕਸ੍ਸ ਭਿਕ੍ਖੁਨੋ ਆਯਤਿਂ ਸਂਵਰਤ੍ਥਾਯ ਆਪਤ੍ਤੀਨਞ੍ਚ ਕੁਲਾਨਞ੍ਚ ਪਰਿਯਨ੍ਤਂ ਕਤ੍ਵਾ ਵਾ ਅਕਤ੍ਵਾ ਵਾ ਤਿਕ੍ਖਤ੍ਤੁਂ ਅਪਲੋਕੇਤ੍ਵਾ ਕਤਿਕਂ ਕਰੋਤਿ, ਤਂ ਠਪੇਤ੍ਵਾ. ਅਭਿਕ੍ਖੁਨੋਤਿ ਅਨੁਪਸਮ੍ਪਨ੍ਨਸ੍ਸ. ਵਦਨ੍ਤਸ੍ਸਾਤਿ ਆਰੋਚੇਨ੍ਤਸ੍ਸ.
੩੫. ਯੋ ਅਕਪ੍ਪਿਯਂ ਪਥਵਿਂ ਖਣੇਯ੍ਯ ਵਾ ਖਣਾਪੇਯ੍ਯ ਵਾ, ਤਸ੍ਸ ਪਾਚਿਤ੍ਤਿਯਂ ਸਿਯਾ. ਤਤ੍ਥ ਅਕਪ੍ਪਿਯਨ੍ਤਿ ਉਦ੍ਧਨਪਚਨਾਦਿਵਸੇਨ ਵਾ ਤਥਾ ਤਥਾ ਅਦਡ੍ਢਾ ਵਾ ਜਾਤਪਥਵੀ ਵੁਚ੍ਚਤਿ. ਸਾ ਤਿਵਿਧਾ ਸੁਦ੍ਧਮਿਸ੍ਸਪੁਞ੍ਜਵਸੇਨ. ਤਤ੍ਥ ਸੁਦ੍ਧਪਥਵੀ ਨਾਮ ਪਕਤਿਯਾ ਸੁਦ੍ਧਪਂਸੁ ਵਾ ਸੁਦ੍ਧਮਤ੍ਤਿਕਾ ਵਾ. ਮਿਸ੍ਸਪਥਵੀ ਨਾਮ ਯਤ੍ਥ ਪਂਸੁਤੋ ਵਾ ਮਤ੍ਤਿਕਤੋ ਵਾ ਪਾਸਾਣਸਕ੍ਖਰਕਥਲਮਰੁਮ੍ਬਵਾਲੁਕਾਸੁ ਅਞ੍ਞਤਰਸ੍ਸ ਤਤਿਯਭਾਗੋ ਹੋਤਿ. ਪੁਞ੍ਜਪਥਵੀ ਨਾਮ ਅਤਿਰੇਕਚਾਤੁਮਾਸਂ ਓਵਟ੍ਠੋ ਪਂਸੁਪੁਞ੍ਜੋ ਵਾ ਮਤ੍ਤਿਕਾਪੁਞ੍ਜੋ ਵਾ ਹੋਤਿ. ਵੁਤ੍ਤਲਕ੍ਖਣੇਨ ਪਨ ਮਿਸ੍ਸਕਪੁਞ੍ਜੋਪਿ ਪਿਟ੍ਠਿਪਾਸਾਣੇ ਠਿਤਸੁਖੁਮਰਜਮ੍ਪਿ ਚ ਦੇਵੇ ਫੁਸਯਨ੍ਤੇ ਸਕਿਂ ਚੇ ਤਿਨ੍ਤਂ, ਚਾਤੁਮਾਸਚ੍ਚਯੇਨ ਤਿਨ੍ਤੋਕਾਸੋ ਪੁਞ੍ਜਪਥਵੀਸਙ੍ਖਮੇਵ ਗਚ੍ਛਤਿ. ਯੋ ਭਿਕ੍ਖੁ ਭੂਤਗਾਮਂ ਵਿਕੋਪੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਭੂਤਗਾਮਨ੍ਤਿ ਭਵਨ੍ਤਿ, ਅਭਵੁਂ ਚਾਤਿ ਭੂਤਾ, ਜਾਯਨ੍ਤਿ ਵਡ੍ਢਨ੍ਤਿ ਜਾਤਾ ਵਡ੍ਢਿਤਾ ਚਾਤਿ ਅਤ੍ਥੋ, ਗਾਮੋਤਿ ਰਾਸਿ, ਭੂਤਾਨਂ ਗਾਮੋ, ਭੂਤਾ ਏਵ ਵਾ ਗਾਮੋਤਿ ਭੂਤਗਾਮੋ, ਪਤਿਟ੍ਠਿਤਹਰਿਤਤਿਣਰੁਕ੍ਖਾਦੀਨਮੇਤਂ ਅਧਿਵਚਨਂ. ਤਂ ਭੂਤਗਾਮਂ. ਵਿਕੋਪੇਯ੍ਯਾਤਿ ਛੇਦਨਭੇਦਨਾਦੀਨਿ ਕਰੇਯ੍ਯ.
੩੬. ਯੋ ਭਿਕ੍ਖੁ ਸਙ੍ਘਿਕਂ ਮਞ੍ਚਾਦਿਂ ਅਜ੍ਝੋਕਾਸੇ ਸਨ੍ਥਰਣਾਦਿਕਂ ਕਤ੍ਵਾ ਆਪੁਚ੍ਛਨਾਦਿਕਂ ਅਕਤ੍ਵਾ ਯਾਤਿ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ. ਮਞ੍ਚਾਦਿਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਪੀਠਭਿਸਿਕੋਚ੍ਛਾਦਿਂ ਸਙ੍ਗਣ੍ਹਾਤਿ. ਸਨ੍ਥਰਣਾਦਿਕਨ੍ਤਿ ਸਨ੍ਥਰਣਾਦਿਂ ਕਤ੍ਵਾ ਵਾ ਕਾਰਾਪੇਤ੍ਵਾ ਵਾ. ਆਪੁਚ੍ਛਨਾਦਿਕਨ੍ਤਿ ਆਪੁਚ੍ਛਨਂ ਵਾ ਉਦ੍ਧਰਣਂ ਵਾ ਉਦ੍ਧਰਾਪਨਂ ਵਾਤਿ ਅਤ੍ਥੋ. ਯਾਤੀਤਿ ਗਚ੍ਛਤਿ.
੩੭. ਯੋ ਭਿਕ੍ਖੁ ਸਙ੍ਘਿਕਾਵਸਥੇ ਸੇਯ੍ਯਂ ਸਨ੍ਥਰਣਾਦਿਕਂ ਕਤ੍ਵਾ ਆਪੁਚ੍ਛਨਾਦਿਕਂ ਅਕਤ੍ਵਾ ਯਾਤਿ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ਸਙ੍ਘਿਕਾਵਸਥੇਤਿ ਸਙ੍ਘਸ੍ਸ ਸਨ੍ਤਕੇ ਆਵਸਥੇ ਵਿਹਾਰੇ ਗਬ੍ਭੇ ਵਾ ਅਞ੍ਞਸ੍ਮਿਂ ਵਾ ਸਬ੍ਬਪਰਿਚ੍ਛਿਨ੍ਨੇ ਗੁਤ੍ਤਸੇਨਾਸਨੇ. ਸੇਯ੍ਯਨ੍ਤਿ ਭਿਸਿ ਚਿਮਿਲਿਕਾ ਪਾਵੁਰਣਂ ਉਤ੍ਤਰਤ੍ਥਰਣਂ ਭੂਮਤ੍ਥਰਣਂ ਤਟ੍ਟਿਕਾ ਚਮ੍ਮਕ੍ਖਣ੍ਡਂ ਨਿਸੀਦਨਂ ਪਚ੍ਚਤ੍ਥਰਣਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ ਏਵਮਾਦਿਕਂ. ਸਨ੍ਥਰਣਾਦਿਕਨ੍ਤਿ ਤੇਸੁ ਯੇਨ ਕੇਨਚਿ ਅਤ੍ਥਰਣਾਦਿਕਂ ਕਤ੍ਵਾ ਵਾ ਕਾਰਾਪੇਤ੍ਵਾ ਵਾ.
੩੮-੯. ਯੋ ਪਨ ਭਿਕ੍ਖੁ ਜਾਨਂ ਸਪ੍ਪਾਣਕਂ ਤੋਯਂ ਪਰਿਭੁਞ੍ਜਯੇ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਯੋਜਨਾ. ਤਤ੍ਥ ਜਾਨਂ ਸਪ੍ਪਾਣਕਨ੍ਤਿ ‘‘ਸਪ੍ਪਾਣਕਮਿਦ’’ਨ੍ਤਿ ਦਿਸ੍ਵਾ ਵਾ ਸੁਤ੍ਵਾ ਵਾ ਯੇਨ ਕੇਨਚਿ ਆਕਾਰੇਨ ਜਾਨਨ੍ਤੋ. ਤੋਯਨ੍ਤਿ ਉਦਕਂ. ਪਰਿਭੁਞ੍ਜਯੇਤਿ ਪਰਿਭੁਞ੍ਜੇਯ੍ਯ. ਯੋ ਭਿਕ੍ਖੁ ਪਾਰਿਵਤ੍ਤਕਂ ਠਪੇਤ੍ਵਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਦੇਤਿ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾ. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦੇ ਭਿਕ੍ਖੁ ਪਟਿਗ੍ਗਾਹਕੋ ਇਧ ਭਿਕ੍ਖੁਨੀ, ਅਯਂ ਵਿਸੇਸੋ. ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਤੋਪਿ ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਚੀਵਰਨ੍ਤਿ ਨਿਵਾਸਨਪਾਰੁਪਨੂਪਗਂ. ਸਿਬ੍ਬਤੋਤਿ ਸਯਂ ਸਿਬ੍ਬਨ੍ਤਸ੍ਸ ਸੂਚਿਂ ਪਵੇਸੇਤ੍ਵਾ ਨੀਹਰਣੇ ਪਯੋਗਗਣਨਾਯ ਪਾਚਿਤ੍ਤਿ. ਸਿਬ੍ਬਾਪੇਨ੍ਤਸ੍ਸ ਪਨ ‘‘ਸਿਬ੍ਬਾ’’ਤਿ ਵੁਤ੍ਤੋ ਸਚੇਪਿ ਸਬ੍ਬਂ ਸੂਚਿਕਮ੍ਮਂ ਨਿਟ੍ਠਾਪੇਸਿ, ਏਕਮੇਵ ਪਾਚਿਤ੍ਤਿ, ਆਣਤ੍ਤਸ੍ਸ ਪਯੋਗਗਣਨਾਯ ਪਾਚਿਤ੍ਤਿ ਹੋਤਿ. ਪਵਾਰੇਤ੍ਵਾਨ ਅਤਿਰਿਤ੍ਤਂ ਅਕਾਰੇਤ੍ਵਾ ਭੁਞ੍ਜਤੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਰਾਯਂ ਵਿਨਿਚ੍ਛਯੋ – ਓਦਨੋ ਸਤ੍ਤੁ ਕੁਮ੍ਮਾਸੋ ਮਚ੍ਛੋ ਮਂਸਨ੍ਤਿ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਸਾਸਪਮਤ੍ਤਮ੍ਪਿ ਅਜ੍ਝੋਹਰਿਤ੍ਵਾ ਭੋਜਨਂ ਪਟਿਕ੍ਖੇਪਂ ਕਤ੍ਵਾ ਅਞ੍ਞੇਨ ਇਰਿਯਾਪਥੇਨ ‘‘ਅਲਮੇਤਂ ਸਬ੍ਬ’’ਨ੍ਤਿ ਅਤਿਰਿਤ੍ਤਂ ਅਕਾਰੇਤ੍ਵਾ ਪਰਿਭੁਞ੍ਜਤੋ ਪਾਚਿਤ੍ਤਿ ਹੋਤੀਤਿ.
੪੦. ਯੋ ਭਿਕ੍ਖੁ ਆਸਾਦਨਾਪੇਕ੍ਖੋ ਭੁਤ੍ਤਾਵਿਂ ਪਵਾਰਿਤਂ ਭਿਕ੍ਖੁਂ ‘‘ਹਨ੍ਦ, ਭਿਕ੍ਖੁ, ਖਾਦ ਵਾ ਭੁਞ੍ਜ ਵਾ’’ਤਿ ਅਨਤਿਰਿਤ੍ਤੇਨ ਪਵਾਰੇਤਿ, ਭੋਜਨੇ ਭੁਤ੍ਤੇ ਤਸ੍ਸ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ. ਤਤ੍ਥ ਆਸਾਦਨਾਪੇਕ੍ਖੋਤਿ ਆਸਾਦਨਂ ਚੋਦਨਂ ਮਙ੍ਕੁਕਰਣਭਾਵਂ ਅਪੇਕ੍ਖਮਾਨੋ.
੪੧-੨. ਯੋ ਭਿਕ੍ਖੁ ਸਨ੍ਨਿਧਿਭੋਜਨਂ ਭੁਞ੍ਜੇਯ੍ਯ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ਸਨ੍ਨਿਧਿਭੋਜਨਨ੍ਤਿ ਪਟਿਗ੍ਗਹੇਤ੍ਵਾ ਏਕਰਤ੍ਤਂ ਵੀਤਿਨਾਮਿਤਭੋਜਨਂ. ਵਿਕਾਲੇ ਯਾਵਕਾਲਿਕਂ ਭੁਞ੍ਜਤੋ ਵਾਪਿ ਪਾਚਿਤ੍ਤਿ ਸਿਯਾਤਿ ਯੋਜਨਾ. ਤਤ੍ਥ ਵਿਕਾਲੇਤਿ ਵਿਗਤਕਾਲੇ, ਮਜ੍ਝਨ੍ਹਿਕਾਤਿਕ੍ਕਮਤੋ ਪਟ੍ਠਾਯ ਯਾਵ ਅਰੁਣੁਗ੍ਗਮਨਾਤਿ ਅਤ੍ਥੋ. ਯਾਵਕਾਲਿਕਨ੍ਤਿ ਵਨਮੂਲਫਲਾਦਿਕਂ ਆਮਿਸਭੋਜਨਂ. ਅਗਿਲਾਨੋ ਭਿਕ੍ਖੁ ਪਣੀਤਕਂ ਸਪ੍ਪਿਭਤ੍ਤਾਦਿਕਮ੍ਪਿ ਵਿਞ੍ਞਾਪੇਤ੍ਵਾਨ ਭੁਞ੍ਜੇਯ੍ਯ, ਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਯੋਜਨਾ. ਤਤ੍ਥ ਅਗਿਲਾਨੋਤਿ ਕਲ੍ਲਕੋ. ਪਣੀਤਕਨ੍ਤਿ ਸਪ੍ਪਿਤੇਲਮਧੁਫਾਣਿਤਮਚ੍ਛਮਂਸਖੀਰਦਧਿਸਙ੍ਖਾਤੇਹਿ ਸਂਸਟ੍ਠਂ ਸਤ੍ਤਧਞ੍ਞਨਿਬ੍ਬਤ੍ਤਂ ਪਣੀਤਭੋਜਨਂ. ਯੋ ਭਿਕ੍ਖੁ ਦਨ੍ਤਕਟ੍ਠੋਦਕਂ ਵਜ੍ਜੇਤ੍ਵਾ ਅਪ੍ਪਟਿਗ੍ਗਹਿਤਕਂ ਭੁਞ੍ਜੇਯ੍ਯ, ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਤਤ੍ਥ ਅਪ੍ਪਟਿਗ੍ਗਹਿਤਨ੍ਤਿ ਕਾਯੇਨ ਵਾ ਕਾਯਪ੍ਪਟਿਬਦ੍ਧੇਨ ਵਾ ਗਣ੍ਹਨ੍ਤਸ੍ਸ ਹਤ੍ਥਪਾਸੇ ਠਤ੍ਵਾ ਕਾਯਕਾਯਪ੍ਪਟਿਬਦ੍ਧਨਿਸ੍ਸਗ੍ਗਿਯਾਨਂ ਅਞ੍ਞਤਰੇਨ ਨ ਦਿਨ੍ਨਂ ਅਪ੍ਪਟਿਗ੍ਗਹਿਤਂ ਨਾਮ.
੪੩. ਯੋ ਭਿਕ੍ਖੁ ਤਿਤ੍ਥਿਯਸ੍ਸ ਸਹਤ੍ਥਤੋ ਕਿਞ੍ਚਿ ਭੁਞ੍ਜਿਤਬ੍ਬਂ ਦਦੇਯ੍ਯ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਤਿਤ੍ਥਿਯਸ੍ਸਾਤਿ ਅਞ੍ਞਤਿਤ੍ਥਿਯਸ੍ਸ. ਕਿਞ੍ਚਿ ਭੁਞ੍ਜਿਤਬ੍ਬਨ੍ਤਿ ਯਂ ਕਿਞ੍ਚਿ ਭੋਜਨੀਯਂ. ਸਹਤ੍ਥਤੋਤਿ ਸਹਤ੍ਥਾ. ਯੋ ਭਿਕ੍ਖੁ ਮਾਤੁਗਾਮੇਨ ਏਕਤੋ ਰਹੋ ਨਿਸਜ੍ਜਂ ਕਪ੍ਪੇਯ੍ਯ, ਤਸ੍ਸ ਪਾਚਿਤ੍ਤਿ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਰਹੋਤਿ ਪਟਿਚ੍ਛਨ੍ਨੇ. ਕਪ੍ਪੇਤਿ ਕਪ੍ਪੇਯ੍ਯ. ਏਕਤੋਤਿ ਸਦ੍ਧਿਂ.
੪੪. ਸੁਰਾਮੇਰਯਪਾਨੇਪੀਤਿ ਏਤ੍ਥ ਪਿਟ੍ਠਾਦੀਹਿ ਕਤਂ ਮਜ੍ਜਂ ਸੁਰਾ. ਪੁਪ੍ਫਾਦੀਹਿ ਕਤੋ ਆਸਵੋ ਮੇਰਯਂ. ਯੋ ਭਿਕ੍ਖੁ ਤਦੁਭਯਮ੍ਪਿ ਬੀਜਤੋ ਪਟ੍ਠਾਯ ਕੁਸਗ੍ਗੇਨਾਪਿ ਪਿਵਤਿ, ਤਸ੍ਸ ਤਪ੍ਪਾਨਪਚ੍ਚਯਾ ਪਾਚਿਤ੍ਤਿਯਂ ਉਦੀਰਿਤਨ੍ਤਿ ਅਤ੍ਥੋ. ਅਙ੍ਗੁਲਿਪਤੋਦਕੇ ਚਾਪੀਤਿ ਅਙ੍ਗੁਲੀਹਿ ਉਪਕਚ੍ਛਕਾਦੀਨਂ ਘਟ੍ਟਨਪਚ੍ਚਯਾ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਹਸਧਮ੍ਮੇਪਿ ਚੋਦਕੇਤਿ ਉਪਰਿਗੋਪ੍ਫਕੇ ਉਦਕੇ ਹਸਧਮ੍ਮੇ ਕੀਲ਼ਾਨਿਮਿਤ੍ਤਂ ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ.
੪੫. ਅਨਾਦਰੇਪਿ ਪਾਚਿਤ੍ਤੀਤਿ ਪੁਗ੍ਗਲਸ੍ਸ ਵਾ ਧਮ੍ਮਸ੍ਸ ਵਾ ਅਨਾਦਰਕਰਣੇਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਯੋ ਭਿਕ੍ਖੁ ਉਪਸਮ੍ਪਨ੍ਨੇਨ ਪਞ੍ਞਤ੍ਤੇਨ ਵੁਚ੍ਚਮਾਨੋ ਤਸ੍ਸ ਵਾ ਵਚਨਂ ਅਕਤ੍ਤੁਕਾਮਤਾਯ, ਤਂ ਵਾ ਧਮ੍ਮਂ ਅਸਿਕ੍ਖਿਤੁਕਾਮਤਾਯ ਅਨਾਦਰਿਯਂ ਕਰੋਤਿ, ਤਸ੍ਸ ਤਸ੍ਮਿਂ ਅਨਾਦਰਿਯੇ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਭਯਾਨਕਂ ਕਥਂ ਕਤ੍ਵਾ ਵਾ ਭਯਾਨਕਂ ਰੂਪਂ ਦਸ੍ਸੇਤ੍ਵਾ ਵਾ ਭਿਕ੍ਖੁਂ ਭੀਸਯਤੋਪਿ ਪਾਚਿਤ੍ਤਿ ਸਿਯਾਤਿ ਅਤ੍ਥੋ.
੪੬. ਯੋ ਭਿਕ੍ਖੁ ਅਗਿਲਾਨੋ ਕਿਞ੍ਚਿ ਪਚ੍ਚਯਂ ਠਪੇਤ੍ਵਾ ਜੋਤਿਂ ਜਲੇਯ੍ਯ ਵਾ ਜਲਾਪੇਯ੍ਯ ਵਾ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਕਿਞ੍ਚਿ ਪਚ੍ਚਯਨ੍ਤਿ ਪਦੀਪੁਜ੍ਜਲਨਂ ਵਾ ਪਤ੍ਤਪਚਨਾਦੀਸੁ ਜੋਤਿਕਰਣਂ ਵਾਤਿ ਏਵਰੂਪਂ ਪਚ੍ਚਯਂ ਠਪੇਤ੍ਵਾ. ਜੋਤਿਨ੍ਤਿ ਅਗ੍ਗਿਂ.
੪੭-੮. ਕਪ੍ਪਬਿਨ੍ਦੁਂ ਅਨਾਦਾਯ ਨਵਚੀਵਰਭੋਗਿਨੋ ਨਵਂ ਚੀਵਰਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਕਪ੍ਪਬਿਨ੍ਦੁਨ੍ਤਿ ਮੋਰਕ੍ਖਿਮਣ੍ਡਲਮਙ੍ਗੁਲਪਿਟ੍ਠੀਨਂ ਅਞ੍ਞਤਰਪ੍ਪਮਾਣਂ ਕਪ੍ਪਬਿਨ੍ਦੁਂ. ਅਨਾਦਾਯਾਤਿ ਅਨਾਦਿਯਿਤ੍ਵਾ. ਭਿਕ੍ਖੁਨੋ ਚੀਵਰਾਦਿਕਂ ਪਰਿਕ੍ਖਾਰਂ ਅਪਨੇਤ੍ਵਾ ਨਿਧੇਨ੍ਤਸ੍ਸ ਵਾ ਨਿਧਾਪੇਨ੍ਤਸ੍ਸ ਵਾ ਹਸਾਪੇਕ੍ਖਸ੍ਸ ਭਿਕ੍ਖੁਨੋ ਪਾਚਿਤ੍ਤਿ ਸਿਯਾਤਿ ਅਤ੍ਥੋ. ਚੀਵਰਾਦਿਕਨ੍ਤਿ ਆਦਿ-ਸਦ੍ਦੇਨ ਪਤ੍ਤਨਿਸੀਦਨਸੂਚਿਘਰਕਾਯਬਨ੍ਧਨਾਦਿਂ ਸਙ੍ਗਣ੍ਹਾਤਿ. ਨਿਧੇਨ੍ਤਸ੍ਸਾਤਿ ਨਿਦਹਨ੍ਤਸ੍ਸ. ਹਸਾਪੇਕ੍ਖਸ੍ਸਾਤਿ ਹਸਾਧਿਪ੍ਪਾਯਸ੍ਸ. ਜਾਨਂ ਪਾਣਂ ਹਨੇ ਭਿਕ੍ਖੁ, ਤਿਰਚ੍ਛਾਨਗਤਮ੍ਪਿ ਚਾਤਿ ਯੋ ਭਿਕ੍ਖੁ ‘‘ਪਾਣੋ’’ਤਿ ਜਾਨਨ੍ਤੋ ਤਿਰਚ੍ਛਾਨਗਤਂ ਪਾਣਂ ਖੁਦ੍ਦਕਮ੍ਪਿ ਮਹਨ੍ਤਮ੍ਪਿ ਹਨੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ.
੪੯. ਛਾਦੇਤੁਕਾਮੋ ਛਾਦੇਤਿ, ਦੁਟ੍ਠੁਲ੍ਲਂ ਭਿਕ੍ਖੁਨੋਪਿ ਚਾਤਿ ਯੋ ਭਿਕ੍ਖੁ ਭਿਕ੍ਖੁਨੋ ਦੁਟ੍ਠੁਲ੍ਲਸਙ੍ਖਾਤਂ ਸਙ੍ਘਾਦਿਸੇਸਂ ਛਾਦੇਤੁਕਾਮੋ ਹੁਤ੍ਵਾ ਛਾਦੇਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ. ਇਤ੍ਥਿਯਾ ਸਹ ਸਂਵਿਧਾਯ ਗਾਮਨ੍ਤਰਗਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ.
੫੦. ਭਿਕ੍ਖੁਂ ਵਾ ਪਹਰੇਯ੍ਯਾਥਾਤਿ ਯੋ ਭਿਕ੍ਖੁ ਭਿਕ੍ਖੁਂ ਪਹਰੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਯੋਜਨਾ. ਤਲਸਤ੍ਤਿਕਮੁਗ੍ਗਿਰੇਤਿ ਯੋ ਭਿਕ੍ਖੁ ਪਹਰਣਾਕਾਰਂ ਦਸ੍ਸੇਨ੍ਤੋ ਕਾਯਂ ਵਾ ਕਾਯਪ੍ਪਟਿਬਦ੍ਧਂ ਵਾ ਉਗ੍ਗਿਰੇਯ੍ਯ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ. ਚੋਦੇਯ੍ਯ ਵਾ ਚੋਦਾਪੇਯ੍ਯ, ਭਿਕ੍ਖੁਂ ਅਮੂਲਕੇਨ ਚਾਤਿ ਯੋ ਭਿਕ੍ਖੁ ਭਿਕ੍ਖੁਂ ਅਮੂਲਕੇਨ ਸਙ੍ਘਾਦਿਸੇਸੇਨ ਚੋਦੇਯ੍ਯ ਵਾ ਚੋਦਾਪੇਯ੍ਯ ਵਾ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ. ਤਤ੍ਥ ਅਮੂਲਕੇਨਾਤਿ ਦਿਟ੍ਠਾਦਿਮੂਲਵਿਰਹਿਤੇਨ.
੫੧. ਕੁਕ੍ਕੁਚ੍ਚੁਪ੍ਪਾਦਨੇ ਚਾਪੀਤਿ ‘‘ਊਨਵੀਸਤਿਵਸ੍ਸੋ ਤ੍ਵਂ ਮਞ੍ਞੇ’’ਤਿਆਦੀਨਿ ਭਣਨ੍ਤੋ ਕੁਕ੍ਕੁਚ੍ਚਂ ਉਪ੍ਪਾਦੇਯ੍ਯ, ਤਸ੍ਸ ਕੁਕ੍ਕੁਚ੍ਚੁਪ੍ਪਾਦਨਪਚ੍ਚਯਾ ਪਾਚਿਤ੍ਤਿਯਂ ਹੋਤਿ. ਯੋ ਭਿਕ੍ਖੁ ਭਣ੍ਡਨਤ੍ਥਾਯ ਭਣ੍ਡਨਜਾਤਾਨਂ ਵਚਨਂ ਸੋਤੁਂ ਉਪਸ੍ਸੁਤਿਂ ਯਾਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਭਣ੍ਡਨਤ੍ਥਾਯਾਤਿ ਕਲਹਤ੍ਥਾਯ. ਭਣ੍ਡਨਜਾਤਾਨਨ੍ਤਿ ਕਲਹਜਾਤਾਨਂ. ਉਪਸ੍ਸੁਤਿਨ੍ਤਿ ਸੁਤਿਸਮੀਪਂ.
੫੨. ਯੋ ਭਿਕ੍ਖੁ ਸਙ੍ਘਸ੍ਸ ਪਰਿਣਾਮਿਤਂ ਯਂ ਲਾਭਂ, ਤਂ ਪਰਪੁਗ੍ਗਲਸ੍ਸ ਨਾਮੇਤਿ, ਤਸ੍ਸ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਨਾਮੇਤੀਤਿ ਪਰਿਣਾਮੇਤਿ. ਪੁਚ੍ਛਂ ਅਕਤ੍ਵਾਤਿ ‘‘ਵਿਕਾਲੇ ਗਾਮਪ੍ਪਵੇਸਨਂ ਆਪੁਚ੍ਛਾਮੀ’’ਤਿ ਵਾ ‘‘ਗਾਮਂ ਪਵਿਸਿਸ੍ਸਾਮੀ’’ਤਿ ਵਾ ਅਨਾਪੁਚ੍ਛਿਤ੍ਵਾ. ਸਨ੍ਤਭਿਕ੍ਖੁਨ੍ਤਿ ਅਨ੍ਤੋਉਪਚਾਰਸੀਮਾਯ ਦਸ੍ਸਨੂਪਚਾਰੇ ਭਿਕ੍ਖੁਂ ਦਿਸ੍ਵਾ ਯਂ ਸਕ੍ਕਾ ਹੋਤਿ ਪਕਤਿਵਚਨੇਨ ਆਪੁਚ੍ਛਿਤੁਂ, ਤਾਦਿਸਂ ਵਿਜ੍ਜਮਾਨਂ ਭਿਕ੍ਖੁਂ. ਗਾਮਸ੍ਸਾਤਿ ਗਾਮਂ, ਕਮ੍ਮਤ੍ਥੇ ਸਾਮਿਵਚਨਂ. ਗਤੇਤਿ ਸਮ੍ਪਦਾਨਤ੍ਥੇ ਭੁਮ੍ਮਵਚਨਂ, ਗਤਸ੍ਸਾਤਿ ਅਤ੍ਥੋ. ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਿਤ੍ਵਾ ਵਿਕਾਲੇ ਗਾਮਂ ਗਤਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵਾਤਿ.
ਪਾਚਿਤ੍ਤਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.