੫. ਪਕਿਣ੍ਣਕਨਿਦ੍ਦੇਸਵਣ੍ਣਨਾ

੫੩. ਇਦਾਨਿ ਪਕਿਣ੍ਣਕਂ ਦਸ੍ਸੇਤੁਂ ‘‘ਸਙ੍ਘਿਕ’’ਨ੍ਤ੍ਯਾਦਿ ਆਰਦ੍ਧਂ. ਤਤ੍ਥ ਯੋ ਭਿਕ੍ਖੁ ਇਸ੍ਸਰੋ ਹੁਤ੍ਵਾ ਸਙ੍ਘਿਕਂ ਗਰੁਭਣ੍ਡਂ ਅਞ੍ਞਸ੍ਸ ਦੇਤਿ, ਤਸ੍ਸ ਥੁਲ੍ਲਚ੍ਚਯਂ ਸਿਯਾ. ਥੇਯ੍ਯਾਯ ਅਞ੍ਞਸ੍ਸ ਦੇਤਿ, ਯਥਾਵਤ੍ਥੁ ਪਾਰਾਜਿਕਾਦਿ ਸਿਯਾ, ਦੁਕ੍ਕਟਵਤ੍ਥੁ ਦੁਕ੍ਕਟਂ, ਥੁਲ੍ਲਚ੍ਚਯਵਤ੍ਥੁ ਥੁਲ੍ਲਚ੍ਚਯਂ, ਪਾਰਾਜਿਕਵਤ੍ਥੁ ਪਾਰਾਜਿਕਂ ਸਿਯਾਤਿ ਵੁਤ੍ਤਂ ਹੋਤਿ.

੫੪. ਕੁਸਾਦਿਮਯਚੀਰਾਨੀਤਿ ਏਤ੍ਥ ਆਦਿ-ਸਦ੍ਦੋ ਵਾਕਫਲਕਂ ਸਙ੍ਗਣ੍ਹਾਤਿ, ਕੁਸਮਯਚੀਰਂ ਵਾਕਮਯਚੀਰਂ ਫਲਕਮਯਚੀਰਨ੍ਤਿ. ਤਤ੍ਥ ਕੁਸੇ ਗਨ੍ਥੇਤ੍ਵਾ ਕਤਚੀਰਂ ਕੁਸਮਯਚੀਰਂ. ਵਾਕਮਯਚੀਰਂ ਨਾਮ ਤਾਪਸਾਨਂ ਵਕ੍ਕਲਂ. ਫਲਕਮਯਚੀਰਂ ਨਾਮ ਫਲਕਸਣ੍ਠਾਨਾਨਿ ਫਲਕਾਨਿ ਸਿਬ੍ਬੇਤ੍ਵਾ ਕਤਚੀਰਂ. ਕਮ੍ਬਲਂ ਕੇਸਵਾਲਜਨ੍ਤਿ ਕੇਸਜਂ ਕਮ੍ਬਲਂ ਵਾਲਜਂ ਕਮ੍ਬਲਂ, ਕੇਸਕਮ੍ਬਲਂ ਵਾਲਕਮ੍ਬਲਨ੍ਤਿ ਅਤ੍ਥੋ. ਕੇਸੇਹਿ ਤਨ੍ਤੇ ਵਾਯਿਤ੍ਵਾ ਕਤਕਮ੍ਬਲਂ ਕੇਸਕਮ੍ਬਲਂ. ਚਮਰਿਵਾਲੇਹਿ ਵਾਯਿਤ੍ਵਾ ਕਤਕਮ੍ਬਲਂ ਵਾਲਕਮ੍ਬਲਂ. ਸਮਯਂ ਵਿਨਾਤਿ ਨਟ੍ਠਚੀਵਰਕਾਲਂ ਠਪੇਤ੍ਵਾ. ਧਾਰਯਤੋ ਧਾਰਯਨ੍ਤਸ੍ਸ. ਲੂਕਪਕ੍ਖਾਜਿਨਕ੍ਖਿਪਨ੍ਤਿ ਉਲੂਕਪਕ੍ਖਿਅਜਿਨਕ੍ਖਿਪਂ. ਤਤ੍ਥ ਉਲੂਕਪਕ੍ਖੀਤਿ ਉਲੂਕਸਕੁਣਪਕ੍ਖੇਹਿ ਕਤਨਿਵਾਸਨਂ. ਅਜਿਨਕ੍ਖਿਪਨ੍ਤਿ ਸਲੋਮਂ ਸਖੁਰਂ ਅਜਿਨਮਿਗਚਮ੍ਮਂ. ਨਟ੍ਠਚੀਵਰਕਾਲਂ ਠਪੇਤ੍ਵਾ ਇਮੇਸੁ ਸਤ੍ਤਸੁ ਵਤ੍ਥੂਸੁ ਯਂ ਕਿਞ੍ਚਿ ਧਾਰਯਤੋ ਥੁਲ੍ਲਚ੍ਚਯਂ ਸਿਯਾਤਿ ਅਤ੍ਥੋ.

੫੫. ਸਤ੍ਥਕੇਨ ਕਤ੍ਤਬ੍ਬਂ ਕਮ੍ਮਂ ਸਤ੍ਥਕਮ੍ਮਂ, ਤਸ੍ਮਿਂ ਸਤ੍ਥਕਮ੍ਮੇ. ਵਤ੍ਥਿਮ੍ਹਿ ਕਤ੍ਤਬ੍ਬਂ ਕਮ੍ਮਂ ਵਤ੍ਥਿਕਮ੍ਮਂ, ਤਸ੍ਮਿਂ ਵਤ੍ਥਿਕਮ੍ਮੇ. ਸਂ ਨਿਮਿਤ੍ਤਨ੍ਤਿ ਅਤ੍ਤਨੋ ਅਙ੍ਗਜਾਤਂ. ਤਂ ਛਿਨ੍ਦਤੋ ਥੁਲ੍ਲਚ੍ਚਯਂ ਸਿਯਾਤਿ ਸਮ੍ਬਨ੍ਧੋ. ਮਂਸਾਦਿਭੋਜਨੇਤਿ ਏਤ੍ਥ ਆਦਿ-ਸਦ੍ਦੋ ਅਟ੍ਠਿਲੋਹਿਤਚਮ੍ਮਲੋਮਾਨਿ ਸਙ੍ਗਣ੍ਹਾਤਿ. ਤਸ੍ਮਾ ਮਨੁਸ੍ਸਾਨਂ ਮਂਸਅਟ੍ਠਿਲੋਹਿਤਚਮ੍ਮਲੋਮਭੋਜਨਪਚ੍ਚਯਾ ਥੁਲ੍ਲਚ੍ਚਯਂ ਸਿਯਾਤਿ ਅਤ੍ਥੋ.

੫੬. ਕਦਲੇਰਕਕ੍ਕਦੁਸ੍ਸਾਨੀਤਿ ਏਤ੍ਥ ਕਦਲਿਏਰਕਅਕ੍ਕਵਾਕੇਹਿ ਕਤਾਨਿ ਵਤ੍ਥਾਨਿ ਧਾਰਯਨ੍ਤਸ੍ਸ ਦੁਕ੍ਕਟਂ. ਪੋਤ੍ਥਕਨ੍ਤਿ ਮਕਚਿਵਾਕੇਹਿ ਕਤਂ ਪੋਤ੍ਥਕਦੁਸ੍ਸਂ. ਸਬ੍ਬਪੀਤਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਸਬ੍ਬਲੋਹਿਤਕਸਬ੍ਬਕਣ੍ਹਕਸਬ੍ਬਮਞ੍ਜੇਟ੍ਠਿਕਂ ਸਙ੍ਗਣ੍ਹਾਤਿ. ਤਤ੍ਥ ਸਬ੍ਬਮੇਵ ਨੀਲਕਂ ਸਬ੍ਬਨੀਲਕਂ. ਏਵਂ ਸੇਸੇਸੁਪਿ. ਨੀਲਂ ਉਮ੍ਮਾਰਪੁਪ੍ਫਵਣ੍ਣਂ. ਪੀਤਂ ਕਣਿਕਾਰਪੁਪ੍ਫਵਣ੍ਣਂ. ਲੋਹਿਤਂ ਜਯਸੁਮਨਪੁਪ੍ਫਵਣ੍ਣਂ. ਕਣ੍ਹਕਂ ਅਦ੍ਦਾਰਿਟ੍ਠਕਵਣ੍ਣਂ. ਮਞ੍ਜੇਟ੍ਠਿਕਂ ਲਾਖਾਰਸਵਣ੍ਣਂ. ਇਮੇਸੁ ਅਟ੍ਠਸੁ ਵਤ੍ਥੂਸੁ ਯਂ ਕਿਞ੍ਚਿ ਧਾਰਯਨ੍ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੫੭-੮. ਹਤ੍ਥਿਸ੍ਸੁਰਗਸੋਣਾਨਨ੍ਤਿ ਹਤ੍ਥਿਅਸ੍ਸਉਰਗਸੋਣਾਨਂ ਮਂਸਂ ਅਟ੍ਠਿਰੁਧਿਰਚਮ੍ਮਲੋਮਾਨਿ. ਸੀਹਬ੍ਯਗ੍ਘਚ੍ਛਦੀਪਿਨਨ੍ਤਿ ਸੀਹਬ੍ਯਗ੍ਘਅਚ੍ਛਦੀਪੀਨਂ ਮਂਸਾਦੀਨਿ. ਤਰਚ੍ਛਸ੍ਸ ਚ ਮਂਸਾਦਿਂ ਉਦ੍ਦਿਸ੍ਸਕਤਮਂਸਞ੍ਚ ਅਨਾਪੁਚ੍ਛਿਤਮਂਸਞ੍ਚ ਭੁਞ੍ਜਤੋ ਦੁਕ੍ਕਟਂ ਸਿਯਾ. ਦਕਤਿਤ੍ਥਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੋ ਵਚ੍ਚਪਸ੍ਸਾਵਕੁਟਿਯੋ ਸਙ੍ਗਣ੍ਹਾਤਿ. ਤੇਨ ਯਾਤਾਨੁਪੁਬ੍ਬਂ ਆਗਤਪ੍ਪਟਿਪਾਟਿਂ ਹਿਤ੍ਵਾਨ ਵਜ੍ਜੇਤ੍ਵਾ ਨਹਾਨਤਿਤ੍ਥਞ੍ਚ ਵਚ੍ਚਕੁਟਿਞ੍ਚ ਪਸ੍ਸਾਵਕੁਟਿਞ੍ਚ ਵਜੇ ਵਜੇਯ੍ਯ ਗਚ੍ਛੇਯ੍ਯ, ਦੁਕ੍ਕਟਂ ਤਸ੍ਸ ਸਿਯਾਤਿ ਅਤ੍ਥੋ.

੫੯. ਸਹਸਾਤਿ ਵੇਗਸਾ ਵੇਗੇਨ. ਵੁਬ੍ਭਜਿਤ੍ਵਾਨਾਤਿ ਅਨ੍ਤਰਵਾਸਕਂ ਦੂਰਤੋਵ ਉਕ੍ਖਿਪਿਤ੍ਵਾ, ਵ-ਕਾਰੋ ਸਨ੍ਧਿਵਸੇਨਾਗਤੋ. ਪਵਿਸੇਤਿ ਪਵਿਸੇਯ੍ਯ. ਵਚ੍ਚਪਸ੍ਸਾਵਕੁਟਿਕਨ੍ਤਿ ਵਚ੍ਚਕੁਟਿਕਂ ਪਸ੍ਸਾਵਕੁਟਿਕਂ. ਵਿਸੇਤਿ ਪਵਿਸੇਯ੍ਯ. ਯੋ ਭਿਕ੍ਖੁ ਵਚ੍ਚਪਸ੍ਸਾਵਕੁਟਿਕਂ ਸਹਸਾ ਪਵਿਸੇਯ੍ਯ ਵਾ ਨਿਕ੍ਖਮੇਯ੍ਯ ਵਾ, ਉਬ੍ਭਜਿਤ੍ਵਾ ਵਾ ਪਵਿਸੇਯ੍ਯ ਵਾ ਨਿਕ੍ਖਮੇਯ੍ਯ ਵਾ, ਉਕ੍ਕਾਸਿਕਂ ਵਜ੍ਜੇਤ੍ਵਾ ਤਂ ਪਵਿਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਯੋਜਨਾ.

੬੦. ਨਿਤ੍ਥੁਨਨ੍ਤੋ ਵਚ੍ਚਂ ਕਰੇਯ੍ਯ ਦਨ੍ਤਕਟ੍ਠਞ੍ਚ ਖਾਦਨ੍ਤੋ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਵਚ੍ਚਪਸ੍ਸਾਵਦੋਣੀਨਂ ਬਹਿ ਵਚ੍ਚਾਦਿਕਂ ਵਚ੍ਚਪਸ੍ਸਾਵਂ ਕਰੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ.

੬੧. ਖਰੇਨ ਚਾਵਲੇਖੇਯ੍ਯਾਤਿ ਫਾਲਿਤਕਟ੍ਠੇਨ ਵਾ ਫਰੁਸੇਨ ਵਾ ਗਣ੍ਠਿਕੇਨ ਵਾ ਪੂਤਿਕਟ੍ਠੇਨ ਵਾ ਸੁਸਿਰੇਨ ਵਾ ਅਵਲੇਖੇਯ੍ਯਾਤਿ ਅਤ੍ਥੋ. ਕਟ੍ਠਨ੍ਤਿ ਅਵਲੇਖਨਕਟ੍ਠਂ. ਕੂਪਕੇਤਿ ਵਚ੍ਚਕੂਪਕੇ. ਊਹਤਞ੍ਚਾਤਿ ਗੂਥਮਕ੍ਖਿਤਞ੍ਚ. ਨ ਧੋਵੇਯ੍ਯਾਤਿ ਅਤ੍ਤਨਾ ਵਾ ਨ ਧੋਵੇਯ੍ਯ ਪਰੇਨ ਵਾ ਨ ਧੋਵਾਪੇਯ੍ਯ. ਉਕ੍ਲਾਪਞ੍ਚਾਤਿ ਕਚਵਰਞ੍ਚ. ਨ ਸੋਧਯੇਨ ਸਮ੍ਮਜ੍ਜੇਯ੍ਯ.

੬੨. ਚਪੁਚਪੂਤਿ ਸਦ੍ਦਂ ਕਤ੍ਵਾ ਉਦਕਕਿਚ੍ਚਂ ਕਰੋਨ੍ਤਸ੍ਸ ਆਚਮਨ੍ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਅਨਜ੍ਝਿਟ੍ਠੋਵਾਤਿ ਅਨਾਣਤ੍ਤੋਯੇਵ. ਥੇਰੇਨਾਤਿ ਸਙ੍ਘਤ੍ਥੇਰੇਨ. ਪਾਤਿਮੋਕ੍ਖਨ੍ਤਿ ਪਾਤਿਮੋਕ੍ਖੁਦ੍ਦੇਸਂ. ਉਦ੍ਦਿਸੇ ਉਦ੍ਦਿਸੇਯ੍ਯ, ਦੁਕ੍ਕਟਂ ਸਿਯਾ.

੬੩. ਅਨਾਪੁਚ੍ਛਾਯ ਪਞ੍ਹਸ੍ਸ ਕਥਨੇ, ਅਨਾਪੁਚ੍ਛਾਯ ਪਞ੍ਹਸ੍ਸ ਵਿਸ੍ਸਜ੍ਜਨੇ, ਅਨਾਪੁਚ੍ਛਾਯ ਸਜ੍ਝਾਯਕਰਣੇ, ਅਨਾਪੁਚ੍ਛਾਯ ਪਦੀਪਜਾਲਨੇ, ਅਨਾਪੁਚ੍ਛਾਯ ਪਦੀਪਵਿਜ੍ਝਾਪਨੇਤਿ ਇਮੇਸੁ ਚਤੂਸੁ ਪਚ੍ਚਯੇਸੁ ਤਸ੍ਸ ਦੁਕ੍ਕਟਂ ਸਿਯਾ.

੬੪. ਅਨਾਪੁਚ੍ਛਾ ਵਾਤਪਾਨਕਵਾਟਾਨਿ ਵਿਵਰੇਯ੍ਯ ਵਾ ਥਕੇਯ੍ਯ ਵਾ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਵਨ੍ਦਨਾਦਿਨ੍ਤਿ ਏਤ੍ਥ ਆਦਿ-ਸਦ੍ਦੋ ਵਨ੍ਦਾਪਨਂ ਸਙ੍ਗਣ੍ਹਾਤਿ. ਯੋ ਭਿਕ੍ਖੁ ਨਗ੍ਗੋ ਵਨ੍ਦਨਂ ਕਰੇਯ੍ਯ, ਵਨ੍ਦਾਪਨਂ ਕਰੇਯ੍ਯ, ਗਮਨਂ ਕਰੇਯ੍ਯ, ਭੋਜਨਂ ਕਰੇਯ੍ਯ, ਪਿਵਨਂ ਕਰੇਯ੍ਯ, ਖਾਦਨਂ ਕਰੇਯ੍ਯ, ਗਹਣਂ ਕਰੇਯ੍ਯ, ਦਾਨਂ ਕਰੇਯ੍ਯ, ਤਸ੍ਸ ਸਬ੍ਬਤ੍ਥ ਦੁਕ੍ਕਟਨ੍ਤਿ ਸਮ੍ਬਨ੍ਧੋ.

੬੫. ਤਿਪਟਿਚ੍ਛਨ੍ਨਕਂ ਵਿਨਾਤਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਟਿਚ੍ਛਾਦਿਯੋ ਜਨ੍ਤਾਘਰਪ੍ਪਟਿਚ੍ਛਾਦਿਂ ਉਦਕਪ੍ਪਟਿਚ੍ਛਾਦਿਂ ਵਤ੍ਥਪ੍ਪਟਿਚ੍ਛਾਦਿ’’ਨ੍ਤਿ (ਚੂਲ਼ਵ. ੨੬੧) ਏਵਂ ਵੁਤ੍ਤਾ ਤਿਸ੍ਸੋ ਪਟਿਚ੍ਛਾਦਿਯੋ ਸਮਾਹਟਾਤਿ ‘‘ਤਿਪਟਿਚ੍ਛਾਦੀ’’ਤਿ ਵੁਤ੍ਤਂ. ਤਿਪਟਿਚ੍ਛਨ੍ਨਕਂ ਠਪੇਤ੍ਵਾ ਪਰਿਕਮ੍ਮਂ ਸਯਂ ਕਰੇਯ੍ਯ, ਪਰਂ ਕਾਰਾਪੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਯੋ ਭਿਕ੍ਖੁ ਨਹਾਯਂ ਨਹਾਯਨ੍ਤੋ ਕੁਟ੍ਟੇ ਵਾ ਥਮ੍ਭੇ ਵਾ ਤਰੁਮ੍ਹਿ ਵਾ ਕਾਯਂ ਉਪਘਂਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ.

੬੬. ਯੋ ਭਿਕ੍ਖੁ ਨਹਾਯਨ੍ਤੋ ਕੁਰੁਵਿਨ੍ਦਕਸੁਤ੍ਤੇਨ ਕਾਯਂ ਘਂਸੇਯ੍ਯ, ਕਾਯਤੋ ਕਾਯੇਨ ਅਞ੍ਞਮਞ੍ਞਂ ਘਂਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਯੋ ਅਗਿਲਾਨੋ ਸਉਪਾਹਨੋ ਬਹਾਰਾਮੇ ਬਹਿਆਰਾਮੇ ਚਰੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ.

੬੭. ਸਬ੍ਬਨੀਲਾਦਿਕਮ੍ਪਿ ਚਾਤਿ ਏਤ੍ਥ ਆਦਿ-ਸਦ੍ਦੋ ਲੋਹਿਤੋਦਾਤਪੀਤਕਣ੍ਹਮਞ੍ਜੇਟ੍ਠਮਹਾਰਙ੍ਗਮਹਾਨਾਮਰਙ੍ਗਰਤ੍ਤਾਦਯੋ ਉਪਾਹਨਾਯੋ ਸਙ੍ਗਣ੍ਹਾਤਿ. ਯੋ ਭਿਕ੍ਖੁ ਸਬ੍ਬਨੀਲਸਬ੍ਬਲੋਹਿਤਾਦਿਕਂ ਉਪਾਹਨਂ ਧਾਰੇਤਿ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਯੋ ਭਿਕ੍ਖੁ ਰਤ੍ਤੋ ਰਤ੍ਤਚਿਤ੍ਤੋ ਤਦਹੁਜਾਤਾਯਪਿ ਇਤ੍ਥਿਯਾ ਨਿਮਿਤ੍ਤਂ ਪਸ੍ਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਯੋ ਭਿਕ੍ਖੁ ਭਿਕ੍ਖਦਾਯਿਯਾ ਭਿਕ੍ਖਦਾਯਿਕਾਯ ਇਤ੍ਥਿਯਾ ਮੁਖਂ ਪਸ੍ਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ.

੬੮-੯. ਯੋ ਭਿਕ੍ਖੁ ਉਜ੍ਝਾਨਸਞ੍ਞੀ ਹੁਤ੍ਵਾ ਅਞ੍ਞਸ੍ਸ ਭਿਕ੍ਖੁਨੋ ਪਤ੍ਤਂ ਵਾ ਪਸ੍ਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਆਦਾਸਾਦਿਮ੍ਹਿ ਉਦਕਪਤ੍ਤੇ ਅਤ੍ਤਨੋ ਮੁਖਂ ਪਸ੍ਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਉਚ੍ਚਾਸਨਮਹਾਸਨੇ ਨਿਸਜ੍ਜਾਦਿਂ ਨਿਸੀਦਨਸਯਨਾਦਿਂ ਕਰੋਨ੍ਤਸ੍ਸ ਭਿਕ੍ਖੁਨੋ ਦੁਕ੍ਕਟਂ ਸਿਯਾ. ਉਕ੍ਖਿਤ੍ਤਾਨੁਪਸਮ੍ਪਨ੍ਨਨਾਨਾਸਂਵਾਸਕਾਦੀਨਂ ਵਨ੍ਦਨੇਪਿ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਉਕ੍ਖਿਤ੍ਤੋਤਿ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਤ੍ਤਕੋ, ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖਿਤ੍ਤਕੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖਿਤ੍ਤਕੋਤਿ ਤਿਵਿਧੋਪਿ ਇਧਾਧਿਪ੍ਪੇਤੋ. ਅਨੁਪਸਮ੍ਪਨ੍ਨੋਤਿ ਇਮਿਨਾ ਭਿਕ੍ਖੁਨਿਸਾਮਣੇਰਸਾਮਣੇਰਿਸਿਕ੍ਖਮਾਨਪਣ੍ਡਕਇਤ੍ਥਿਸਿਕ੍ਖਾਪਚ੍ਚਕ੍ਖਾਤਕਾ ਗਹਿਤਾ. ਨਾਨਾਸਂਵਾਸਕਾਤਿ ਲਦ੍ਧਿਨਾਨਾਸਂਵਾਸਕਾ ਗਹਿਤਾ. ਆਦਿ-ਸਦ੍ਦੇਨ ਛਿਨ੍ਨਮੂਲਕਾ ਗਹਿਤਾ.

੭੦-੭੧. ਯੋ ਦੀਘਾਸਨੇ ਪਣ੍ਡਕਿਤ੍ਥੀਹਿ ਪਣ੍ਡਕੇਨ ਵਾ ਇਤ੍ਥਿਯਾ ਵਾ ਉਭਤੋਬ੍ਯਞ੍ਜਨੇਨ ਵਾ ਏਕਤੋ ਨਿਸੀਦੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਅਦੀਘੇ ਆਸਨੇਤਿ ਰਸ੍ਸੇ ਆਸਨੇ. ਯੋ ਭਿਕ੍ਖੁ ਰਸ੍ਸਾਸਨੇ ਮਞ੍ਚੇ ਵਾ ਪੀਠੇ ਵਾ ਅਸਮਾਨਾਸਨਿਕੇਨ ਏਕਤੋ ਸਯੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਫਲਪੁਪ੍ਫਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੇਨ ਵੇਲ਼ੁਚੁਣ੍ਣਦਨ੍ਤਕਟ੍ਠਮਤ੍ਤਿਕਾਦਯੋ ਸਙ੍ਗਹਿਤਾ. ਕੁਲਸਙ੍ਗਹਤ੍ਥਾਯ ਫਲਪੁਪ੍ਫਾਦਿਕਂ ਦਦਤੋ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ.

੭੨-੩. ਯੋ ਭਿਕ੍ਖੁ ਗਨ੍ਥਿਮਾਦਿਂ ਸਯਂ ਕਰੇਯ੍ਯ, ਪਰਂ ਕਾਰਾਪੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਯੋ ਭਿਕ੍ਖੁ ਜਿਨੇਨ ਵਾਰਿਤਪਚ੍ਚਯੇ ਪਰਿਭੁਞ੍ਜੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਅਬ੍ਯਤ੍ਤੋ ਬਾਲੋ ਯੋ ਭਿਕ੍ਖੁ ਆਚਰਿਯੁਪਜ੍ਝਾਯੇ ਅਨਿਸ੍ਸਾਯ ਨਿਸ੍ਸਯਂ ਅਗ੍ਗਹੇਤ੍ਵਾ ਵਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਯੋ ਭਿਕ੍ਖੁ ਅਨੁਞ੍ਞਾਤੇਹਿ ਮਾਤਾਪਿਤੁਆਦੀਹਿ ਪੁਗ੍ਗਲੇਹਿ ਅਞ੍ਞਸ੍ਸ ਪੁਗ੍ਗਲਸ੍ਸ ਭੇਸਜ੍ਜਂ ਕਰੇਯ੍ਯ ਵਾ ਵਦੇਯ੍ਯ ਵਾ, ਤਸ੍ਸ ਦੁਕ੍ਕਟਂ ਸਿਯਾ. ਸਾਪਤ੍ਤਿਕੋ ਯੋ ਭਿਕ੍ਖੁ ਉਪੋਸਥਪ੍ਪਵਾਰਣਂ ਕਰੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਜਿਨੇਨ ਭਗਵਤਾ ਵਾਰਿਤਾ ਜਿਨਵਾਰਿਤਾ, ਜਿਨਵਾਰਿਤਾ ਚ ਤੇ ਪਚ੍ਚਯਾ ਚੇਤਿ ਜਿਨਵਾਰਿਤਪਚ੍ਚਯਾ, ਤੇ ਜਿਨਵਾਰਿਤਪਚ੍ਚਯੇ. ਦ੍ਵੇਮਾਤਿਕਾਅਪ੍ਪਗੁਣਤਾਯ ਅਬ੍ਯਤ੍ਤੋ.

੭੪. ਯੋ ਭਿਕ੍ਖੁ ਆਭੋਗਂ ਵਾ ਨਿਯੋਗਂ ਵਾ ਵਜ੍ਜੇਤ੍ਵਾ ਦ੍ਵਾਰਬਨ੍ਧਾਦਿਕੇ ਠਾਨੇ ਪਰਿਵਤ੍ਤਕਵਾਟਕਂ ਅਪਿਧਾਯ ਦਿਵਾ ਸਯੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਦ੍ਵਾਰਬਨ੍ਧਾਦਿਕੇਤਿ ਯੇਨ ਕੇਨਚਿ ਪਰਿਕ੍ਖਿਤ੍ਤੇ ਅਬ੍ਭੋਕਾਸੇਪਿ ਰੁਕ੍ਖਮੂਲੇਪਿ ਅਨ੍ਤਮਸੋ ਇਮਿਨਾ ਲਕ੍ਖਣੇਨ ਯੁਤ੍ਤਆਕਾਸਙ੍ਗਣੇਪਿ. ਅਪਿਧਾਯਾਤਿ ਅਪਿਦਹਿਤ੍ਵਾ. ਵਿਨਾਭੋਗਨ੍ਤਿ ‘‘ਏਸ ਦ੍ਵਾਰਂ ਜਗ੍ਗਿਸ੍ਸਤੀ’’ਤਿ ਆਭੋਗਂ ਠਪੇਤ੍ਵਾਤਿ ਅਤ੍ਥੋ. ਨਿਯੋਗਨ੍ਤਿ ਅਵਸਟ੍ਠਾਨਂ, ਅਤ੍ਤਨੋ ਅਵਸਂ ਬਹੁਸਾਧਾਰਣਟ੍ਠਾਨਂ ਠਪੇਤ੍ਵਾ. ‘‘ਸਵਸੋ’’ਤਿ ਵਾ ਪਾਠੋ, ਸਵਸੋ ਹੁਤ੍ਵਾਤਿ ਅਤ੍ਥੋ. ਦਿਵਾਤਿ ਦਿਵਾਕਾਲੇ.

੭੫. ਧਞ੍ਞਨ੍ਤਿ ਸਾਲਿ ਵੀਹਿ ਯਵੋ ਗੋਧੁਮੋ ਕਙ੍ਗੁ ਵਰਕੋ ਕੁਦ੍ਰੂਸਕੋਤਿ ਸਤ੍ਤਵਿਧਂ ਧਞ੍ਞਂ. ਇਤ੍ਥਿਰੂਪਨ੍ਤਿ ਦਾਰੁਲੋਹਮਯਾਦਿਇਤ੍ਥਿਰੂਪਂ. ਰਤਨਨ੍ਤਿ ਮੁਤ੍ਤਾਦਿਦਸਵਿਧਂ ਰਤਨਂ. ਆਵੁਧਨ੍ਤਿ ਸਤ੍ਤਿਤੋਮਰਾਦਿਸਬ੍ਬਾਵੁਧਭਣ੍ਡਂ. ਇਤ੍ਥਿਪਸਾਧਨਨ੍ਤਿ ਇਤ੍ਥਿਯਾ ਸੀਸਾਦਿਅਲਙ੍ਕਾਰਂ. ਤੂਰਿਯਭਣ੍ਡਨ੍ਤਿ ਧਮਨਸਙ੍ਖਾਦਿਸਬ੍ਬਂ ਤੂਰਿਯਭਣ੍ਡਂ. ਫਲਰੁਕ੍ਖੇਤਿ ਫਲਿਤਰੁਕ੍ਖੇ. ਪੁਬ੍ਬਣ੍ਣਾਦਿਕਨ੍ਤਿ ਮੁਗ੍ਗਮਾਸਾਦਿਕਂ. ਆਦਿ-ਸਦ੍ਦੇਨ ਵਾਕੁਰਕੁਮਿਨਾਦਯੋ ਗਹਿਤਾ. ਏਤੇਸੁ ਯਂ ਕਿਞ੍ਚਿ ਆਮਸੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੭੬. ਸਸਿਤ੍ਥੋਦਕਤੇਲੇਹੀਤਿ ਯੋ ਪਨ ਮਧੁਸਿਤ੍ਥਕਤੇਲੇਨ ਵਾ ਉਦਕਮਿਸ੍ਸਕਤੇਲੇਨ ਵਾ ਯੇਨ ਕੇਨਚਿ ਚਿਕ੍ਖਲ੍ਲੇਨ ਵਾ. ਫਣਹਤ੍ਥਫਣੇਹਿ ਵਾਤਿ ਦਨ੍ਤਮਯਾਦਿਫਣੇਨ ਵਾ ਫਣਕਿਚ੍ਚਸਾਧਕੇਹਿ ਹਤ੍ਥਙ੍ਗੁਲੀਹਿ ਵਾ ਕੋਚ੍ਛੇਨ ਵਾ ਕੇਸਮੋਸਣ੍ਠਨੇ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਏਕਸ੍ਮਿਂ ਭਾਜਨੇ ਭੋਜਨਨਿਮਿਤ੍ਤੇ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੭੭. ਦ੍ਵੇ ਭਿਕ੍ਖੂ ਏਕਤ੍ਥਰਣਾ ਸਯੇਯ੍ਯੂਂ, ਦ੍ਵੇ ਭਿਕ੍ਖੂ ਏਕਪਾਵੁਰਣਾ ਸਯੇਯ੍ਯੁਂ, ਦ੍ਵੇ ਭਿਕ੍ਖੂ ਏਕਮਞ੍ਚਕੇ ਸਯੇਯ੍ਯੁਂ, ਤੇਸਂ ਦੁਕ੍ਕਟਾਨਿ ਹੋਨ੍ਤੀਤਿ ਸਮ੍ਬਨ੍ਧੋ. ਪਮਾਣਤੋ ਅਧਿਕਂ ਵਾ ਊਨਂ ਵਾ ਦਨ੍ਤਕਟ੍ਠਂ ਖਾਦੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਯੋਜਨਾ. ਤਤ੍ਥ ਅਧਿਕਨ੍ਤਿ ਅਟ੍ਠਙ੍ਗੁਲਤੋ ਅਧਿਕਂ. ਊਨਨ੍ਤਿ ਚਤੁਰਙ੍ਗੁਲਤੋ ਊਨਂ.

੭੮. ਯੋ ਭਿਕ੍ਖੁ ਨਚ੍ਚਞ੍ਚ ਗੀਤਞ੍ਚ ਵਾਦਿਤਞ੍ਚ ਯੋਜੇਤਿ ਵਾ ਯੋਜਾਪੇਤਿ ਵਾ, ਤਸ੍ਸ ਦੁਕ੍ਕਟਂ ਸਿਯਾ. ਤੇਸਂ ਨਚ੍ਚਾਨਂ ਦਸ੍ਸਨਂ, ਤੇਸਂ ਗੀਤਾਨਂ ਸਵਨਂ, ਤੇਸਂ ਵਾਦਿਤਾਨਂ ਸਵਨਞ੍ਚ ਕਰੋਨ੍ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੭੯. ਵੀਹਾਦਿਰੋਪਿਮੇਤਿ ਵੀਹਿਆਦੀਨਂ ਰੁਹਨਟ੍ਠਾਨੇ. ਬਹਿਪਾਕਾਰਕੁਟ੍ਟਕੇਤਿ ਪਾਕਾਰਕੁਟ੍ਟਾਨਂ ਬਹਿ. ਵਚ੍ਚਾਦਿਛਡ੍ਡਨਾਦਿਮ੍ਹੀਤਿ ਵਚ੍ਚਪਸ੍ਸਾਵਸਙ੍ਕਾਰਚਲਕਾਦੀਨਂ ਛਡ੍ਡਨਵਿਸ੍ਸਜ੍ਜਨਪਚ੍ਚਯਾ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਦੀਘਕੇਸਾਦਿਧਾਰਣੇਤਿ ਦੀਘਕੇਸਧਾਰਣੇ ਦੀਘਨਖਧਾਰਣੇ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੮੦. ਨਖਮਟ੍ਠਕਰਣਾਦਿਮ੍ਹੀਤਿ ਏਤ੍ਥ ਆਦਿ-ਸਦ੍ਦੇਨ ਰਜਨਕਰਣਂ ਗਹਿਤਂ. ਸਮ੍ਬਾਧੇ ਲੋਮਹਾਰਣੇਤਿ ਸਮ੍ਬਾਧੇ ਉਪਕਚ੍ਛਕਮੁਤ੍ਤਕਰਣਟ੍ਠਾਨੇ ਲੋਮੁਦ੍ਧਰਣੇ. ਸਉਪਾਹਨੋ ਭਿਕ੍ਖੁ ਪਰਿਕਮ੍ਮਕਤਂ ਭੂਮਿਂ ਅਕ੍ਕਮੇਯ੍ਯਾਤਿ ਸਮ੍ਬਨ੍ਧੋ.

੮੧. ਅਧੋਤਅਲ੍ਲਪਾਦੇਹੀਤਿ ਯੋ ਭਿਕ੍ਖੁ ਅਧੋਤਪਾਦੇਹਿ ਵਾ ਅਲ੍ਲਪਾਦੇਹਿ ਵਾ ਸਙ੍ਘਿਕਂ ਮਞ੍ਚਂ ਵਾ ਪੀਠਂ ਵਾ ਅਕ੍ਕਮੇਯ੍ਯ, ਪਰਿਕਮ੍ਮਕਤਂ ਭਿਤ੍ਤਿਂ ਵਾ ਕਾਯਤੋ ਆਮਸਨ੍ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ.

੮੨-੩. ਸਙ੍ਘਾਟਿਯਾਪਿ ਪਲ੍ਲਤ੍ਥੇਤਿ ਅਧਿਟ੍ਠਿਤਚੀਵਰੇਨ ਵਿਹਾਰੇ ਵਾ ਅਨ੍ਤਰਘਰੇ ਵਾ ਪਲ੍ਲਤ੍ਥਿਕਂ ਕਰੇਯ੍ਯ, ਤਸ੍ਸ ਦੁਕ੍ਕਟਂ. ਦੁਪ੍ਪਰਿਭੁਞ੍ਜੇਯ੍ਯ ਚੀਵਰਨ੍ਤਿ ਤਿਣ੍ਣਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਦੁਪ੍ਪਰਿਭੋਗੇਨ ਪਰਿਭੁਞ੍ਜੇਯ੍ਯ. ਅਕਾਯਬਨ੍ਧਨੋਤਿ ਕਾਯਬਨ੍ਧਨਵਿਰਹਿਤੋ ਭਿਕ੍ਖੁ ਗਾਮਂ ਵਜੇਯ੍ਯ ਗਚ੍ਛੇਯ੍ਯ. ਯੋ ਭਿਕ੍ਖੁ ਵਚ੍ਚਕਂ ਉਚ੍ਚਾਰਂ ਕਤ੍ਵਾਨ ਉਦਕੇ ਸਨ੍ਤੇ ਨਾਚਮੇਯ੍ਯ ਉਦਕਸੁਦ੍ਧਿਂ ਨ ਕਰੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਸਮਾਦੇਯ੍ਯ ਅਕਪ੍ਪਿਯੇਤਿ ਭਿਕ੍ਖੁਂ ਵਾ ਸਾਮਣੇਰਾਦਿਕੇ ਸੇਸਸਹਧਮ੍ਮਿਕੇ ਵਾ ਅਕਪ੍ਪਿਯੇ ਨਿਯੋਜੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਸਭਾਗਾਪਤ੍ਤਿਯਾ ਦੇਸਨਾਰੋਚਨਪਚ੍ਚਯਾ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਸਭਾਗਾਤਿ ਏਤ੍ਥ ਵਤ੍ਥੁਸਭਾਗਤਾਵ ਇਧਾਧਿਪ੍ਪੇਤਾ, ਨ ਆਪਤ੍ਤਿਸਭਾਗਤਾ.

੮੪. ਨ ਵਸੇ ਵਸ੍ਸਨ੍ਤਿ ਯੋ ਭਿਕ੍ਖੁ ਵਸ੍ਸਂ ਨ ਵਸੇਯ੍ਯ ਨ ਉਪਗਚ੍ਛੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਵਿਸਂਵਾਦੇ ਸੁਦ੍ਧਚਿਤ੍ਤੇਤਿ ਏਤ੍ਥ ਸਮ੍ਪਦਾਨਤ੍ਥੇ ਭੁਮ੍ਮਵਚਨਂ, ਪਟਿਸ੍ਸਵਂ ਵਿਸਂਵਾਦੇਨ੍ਤਸ੍ਸ ਸੁਦ੍ਧਚਿਤ੍ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਵਸ੍ਸਂ ਵਸਿਤ੍ਵਾ ਅਨਨੁਞ੍ਞਾਤਕਿਚ੍ਚਤੋ ਅਨਨੁਞ੍ਞਾਤਕਿਚ੍ਚੇਨ ਭਿਕ੍ਖੁਨੋ ਗਮਨੇ ਦੁਕ੍ਕਟਂ ਸਿਯਾਤਿ ਯੋਜਨਾ.

੮੫. ਆਪਦਂ ਵਜ੍ਜੇਤ੍ਵਾ ਤਰੁਸ੍ਸ ਉਦ੍ਧਂ ਪੋਰਿਸਮ੍ਹਾ ਅਭਿਰੁਹਣੇ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਆਪਦਨ੍ਤਿ ਅਨ੍ਤਰਾਯਂ. ਤਰੁਸ੍ਸਾਤਿ ਰੁਕ੍ਖਸ੍ਸ. ਪੋਰਿਸਮ੍ਹਾਤਿ ਏਕਪੋਰਿਸਪ੍ਪਮਾਣਾ ਮਜ੍ਝਿਮਸ੍ਸ ਪੁਰਿਸਸ੍ਸ ਪਞ੍ਚਹਤ੍ਥਾ. ਅਪਰਿਸ੍ਸਾਵਨੋ ਯੋ ਭਿਕ੍ਖੁ ਅਦ੍ਧਾਨਂ ਗਚ੍ਛੇਯ੍ਯ, ਯੋ ਚ ਭਿਕ੍ਖੁ ਤਂ ਪਰਿਸ੍ਸਾਵਨਂ ਯਾਚਤੋ ਨ ਦਦੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਯੋਜਨਾ. ਅਦ੍ਧਾਨਨ੍ਤਿ ਅਦ੍ਧਯੋਜਨਮੇਵ ਅਨ੍ਤਿਮਮਦ੍ਧਾਨਂ.

੮੬. ਅਤ੍ਤਨੋ ਘਾਤਨੇ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਯੋ ਭਿਕ੍ਖੁ ਇਤ੍ਥਿਰੂਪਾਦਿਰੂਪਂ ਕਰੇਯ੍ਯ ਵਾ ਕਾਰਾਪੇਯ੍ਯ ਵਾ, ਤਸ੍ਸ ਦੁਕ੍ਕਟਂ ਸਿਯਾ. ਮਾਲਾਦਿਕਂ ਵਿਚਿਤ੍ਤਂ ਠਪੇਤ੍ਵਾ ਜਾਤਕਾਦਿਵਤ੍ਥੁਂ ਸਯਂ ਕਰੇਯ੍ਯ, ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ.

੮੭. ਭੁਞ੍ਜਨ੍ਤਮੁਟ੍ਠਪੇਤਿ ਯੋ ਭਿਕ੍ਖੁ ਭੁਞ੍ਜਨ੍ਤਂ ਉਟ੍ਠਾਪੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾ. ਭਤ੍ਤਸਾਲਾਦੀਸੁ ਵੁਡ੍ਢਾਨਂ ਓਕਾਸਂ ਅਦਤ੍ਵਾ ਨਿਸੀਦਤੋ ਦੁਕ੍ਕਟਂ ਸਿਯਾਤਿ ਯੋਜਨਾ.

੮੮. ਯਾਨਾਨੀਤਿ ਵਯ੍ਹਂ ਰਥੋ ਸਕਟਂ ਸਨ੍ਦਮਾਨਿਕਾਦੀਨਿ. ਕਲ੍ਲਕੋਤਿ ਅਗਿਲਾਨੋ. ਅਗਿਲਾਨੋ ਯੋ ਭਿਕ੍ਖੁ ਯਾਨਾਨਿ ਅਭਿਰੁਹੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਵਦੇ ਦਵਨ੍ਤਿ ਕੇਲ਼ਿਂ ਵਦੇਯ੍ਯ, ਰਤਨਤ੍ਤਯਂ ਆਰਬ੍ਭ ਕੇਲ਼ਿਂ ਵਦੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਅਞ੍ਞਪਰਿਸਾਯ ਉਪਲਾਲਨੇ ਦੁਕ੍ਕਟਂ ਹੋਤਿ.

੮੯. ਕਾਯਾਦਿਨ੍ਤਿ ਏਤ੍ਥ ਆਦਿ-ਸਦ੍ਦੋ ਊਰੁਨਿਮਿਤ੍ਤਂ ਸਙ੍ਗਣ੍ਹਾਤਿ. ਕਾਯਂ ਵਾ ਊਰੁਂ ਵਾ ਨਿਮਿਤ੍ਤਂ ਵਾ ਵਿਵਰਿਤ੍ਵਾ ਭਿਕ੍ਖੁਨੀਨਂ ਨ ਦਸ੍ਸਯੇ ਨ ਦਸ੍ਸੇਯ੍ਯਾਤਿ ਅਤ੍ਥੋ. ਲੋਕਾਯਤਂ ਤਿਰਚ੍ਛਾਨਾਦਿਵਿਜ੍ਜਂ ਨ ਚ ਸਯਂ ਵਾਚੇਯ੍ਯ, ਪਰਞ੍ਚ ਨ ਵਾਚਾਪੇਯ੍ਯ. ਪਲਿਤਂ ਗਣ੍ਹੇਯ੍ਯ ਵਾ ਗਣ੍ਹਾਪੇਯ੍ਯ ਵਾ, ਤਸ੍ਸ ਦੁਕ੍ਕਟਂ ਸਿਯਾਤਿ ਯੋਜਨਾ.

੯੦-੯੨. ਯਤ੍ਥ ਕਤ੍ਥਚਿ ਪੇਲ਼ਾਯਂ ਪਕ੍ਖਿਪਿਤ੍ਵਾ ਭਤ੍ਤਂ ਭੁਞ੍ਜਨ੍ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਪਤ੍ਤਹਤ੍ਥਕੋ ਯੋ ਭਿਕ੍ਖੁ ਵਾਤਪਾਨਂ ਵਾ ਕਵਾਟਂ ਵਾ ਪਣਾਮੇ ਪਣਾਮੇਯ੍ਯ, ਸੋਦਕਂ ਪਤ੍ਤਂ ਉਣ੍ਹੇਯ੍ਯ ਉਣ੍ਹੇ ਓਤਾਪੇਯ੍ਯ ਵਾ ਪਟਿਸਾਮੇਯ੍ਯ ਵਾ, ਵੋਦਕਂ ਪਤ੍ਤਂ ਅਤਿਉਣ੍ਹੇਯ੍ਯ ਅਤਿਠਪੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਯੋ ਭਿਕ੍ਖੁ ਪਤ੍ਤਂ ਭੂਮਿਯਂ ਵਾ ਅਙ੍ਕੇ ਵਾ ਮਞ੍ਚੇ ਵਾ ਪੀਠੇ ਵਾ ਮਿਡ੍ਢਨ੍ਤੇ ਵਾ ਪਰਿਭਣ੍ਡਨ੍ਤੇ ਵਾ ਪਾਦੇ ਵਾ ਛਤ੍ਤੇ ਵਾ ਠਪੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ. ਭੂਮਿਯਨ੍ਤਿ ਯੇਨ ਕੇਨਚਿ ਅਨਤ੍ਥਤਾਯ ਪਂਸੁਸਕ੍ਖਰਮਿਸ੍ਸਾਯ. ਅਙ੍ਕੇਤਿ ਦ੍ਵਿਨ੍ਨਂ ਊਰੂਨਂ ਮਜ੍ਝੇ. ਮਿਡ੍ਢਨ੍ਤੇਤਿ ਮਿਡ੍ਢਪਰਿਯਨ੍ਤੇ. ਪਰਿਭਣ੍ਡਨ੍ਤੇਤਿ ਬਾਹਿਰਪਸ੍ਸੇ ਕਤਾਯ ਤਨੁਕਮਿਡ੍ਢਿਯਾ ਅਨ੍ਤੇ. ਯੋ ਭਿਕ੍ਖੁ ਚਲਕਾਦਿਂ ਵਾ ਪਤ੍ਤੇ ਠਪੇਯ੍ਯ, ਪਤ੍ਤੇ ਵਾ ਹਤ੍ਥਧੋਵਨੇ ਹਤ੍ਥਸ੍ਸ ਧੋਵਨਪ੍ਪਚ੍ਚਯਾ ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ.

੯੩. ਉਚ੍ਛਿਟ੍ਠਂ ਮੁਖਧੋਵਨਂ ਉਦਕਮ੍ਪਿ ਪਤ੍ਤੇਨ ਨੀਹਰਨ੍ਤਸ੍ਸ ਭਿਕ੍ਖੁਨੋ ਦੁਕ੍ਕਟਂ ਸਿਯਾ. ਯੋ ਭਿਕ੍ਖੁ ਅਕਪ੍ਪਿਯਂ ਪਤ੍ਤਂ ਪਰਿਭੁਞ੍ਜੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਤਤ੍ਥ ਅਕਪ੍ਪਿਯਂ ਪਤ੍ਤਨ੍ਤਿ ਦਾਰੁਮਯਪਤ੍ਤਾਦਿਂ.

੯੪. ਯੋ ਭਿਕ੍ਖੁ ਖਿਪਿਤੇ ‘‘ਜੀਵਾ’’ਤਿ ਵਦੇ ਵਦੇਯ੍ਯ, ਤਸ੍ਸ ਦੁਕ੍ਕਟਂ ਸਿਯਾਤਿ ਅਤ੍ਥੋ. ਯੋ ਭਿਕ੍ਖੁ ਪਰਿਮਣ੍ਡਲਕਾਦਿਮ੍ਹਿ ਪਞ੍ਚਸਤ੍ਤਤਿ ਸੇਖਿਯੇ ਅਨਾਦਰੋ ਹੁਤ੍ਵਾ ਨ ਸਿਕ੍ਖਤਿ, ਤਸ੍ਸ ਦੁਕ੍ਕਟਂ ਸਿਯਾਤਿ ਸਮ੍ਬਨ੍ਧੋ.

੯੫. ਯੋ ਭਿਕ੍ਖੁ ਭਣ੍ਡਾਗਾਰੇ ਪਯੁਤੋ ਮਾਤੁਯਾ ਪਿਤੁਨੋ ਚ ਭਣ੍ਡਕਂ ਗੋਪੇਯ੍ਯ, ਅਸ੍ਸ ਭਿਕ੍ਖੁਨੋ ਪਾਚਿਤ੍ਤਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਪਯੁਤੋਤਿ ਭਣ੍ਡਾਗਾਰੇ ਬ੍ਯਾਪਾਰਵਸੇਨ ਯੁਤ੍ਤਪ੍ਪਯੁਤ੍ਤੋ. ਗੋਪਯੇਤਿ ਗੋਪੇਯ੍ਯ. ਯੋ ਭਿਕ੍ਖੁ ਦਵਾਯ ਹੀਨੇਨ ਜਾਤਿਆਦਿਨਾ ਉਤ੍ਤਮਮ੍ਪਿ ਵਦੇਯ੍ਯ, ਦੁਬ੍ਭਾਸਿਤਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਹੀਨੇਹਿ ਵਾ ਉਕ੍ਕਟ੍ਠੇਹਿ ਵਾ ਜਾਤਿਆਦੀਹਿ ਏਵਂ ਉਕ੍ਕਟ੍ਠਂ ਵਾ ਹੀਨਂ ਵਾ ‘‘ਚਣ੍ਡਾਲੋਸੀ’’ਤਿਆਦਿਨਾ ਨਯੇਨ ਉਜੁਂ ਵਾ ‘‘ਸਨ੍ਤਿ ਇਧੇਕਚ੍ਚੇ ਚਣ੍ਡਾਲਵੇਨਨੇਸਾਦਾ’’ਤਿਆਦਿਨਾ ਨਯੇਨ ਅਞ੍ਞਾਪਦੇਸੇਨ ਵਾ ਉਪਸਮ੍ਪਨ੍ਨਂ ਵਾ ਅਨੁਪਸਮ੍ਪਨ੍ਨਂ ਵਾ ਅਕ੍ਕੋਸਾਧਿਪ੍ਪਾਯਂ ਵਿਨਾ ਕੇਵਲਂ ਕੀਲ਼ਾਧਿਪ੍ਪਾਯੇਨ ਵਦੇਯ੍ਯ, ਦੁਬ੍ਭਾਸਿਤਂ ਸਿਯਾਤਿ.

ਪਕਿਣ੍ਣਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.