੩. ਨਿਸ੍ਸਗ੍ਗਿਯਨਿਦ੍ਦੇਸਵਣ੍ਣਨਾ

੧੭. ਇਦਾਨਿ ਚੀਵਰਵਿਧਿਂ ਦਸ੍ਸੇਤੁਂ ‘‘ਵਿਕਪ੍ਪਨ’’ਨ੍ਤ੍ਯਾਦਿਮੁਦ੍ਧਟਂ. ਯੋ ਭਿਕ੍ਖੁ ਅਕਾਲਚੀਵਰਂ ਵਿਕਪ੍ਪਨਞ੍ਚ ਅਧਿਟ੍ਠਾਨਞ੍ਚ ਅਕਤ੍ਵਾ ਦਸਾਹਂ ਅਤਿਕ੍ਕਾਮੇਤਿ, ਤਸ੍ਸ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਿਯਾਤਿ ਪਿਣ੍ਡਤ੍ਥੋ. ਤਤ੍ਥ ਅਕਾਲਚੀਵਰਨ੍ਤਿ ਅਕਾਲੇ ਚੀਵਰਂ, ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗਨ੍ਤਿ ਜਾਤਿਤੋ ਛ ਚੀਵਰਾਨਿ, ਦੁਕੂਲਂ ਪਟ੍ਟੁਣ੍ਣਂ ਸੋਮਾਰਪਟ੍ਟਂ ਚੀਨਪਟ੍ਟਂ ਇਦ੍ਧਿਜਂ ਦੇਵਦਿਨ੍ਨਨ੍ਤਿ ਇਮਾਨਿ ਪਨ ਛ ਅਨੁਲੋਮਚੀਵਰਾਨਿ. ਤੇਸੁ ਦੁਕੂਲਂ ਸਾਣਸ੍ਸ ਅਨੁਲੋਮਂ ਵਾਕਮਯਤ੍ਤਾ. ਪਟ੍ਟੁਣ੍ਣਾਦੀਨਿ ਤੀਣਿ ਕੋਸੇਯ੍ਯਸ੍ਸ ਅਨੁਲੋਮਾਨਿ ਪਾਣਕੇਹਿ ਕਤਸੁਤ੍ਤਮਯਤ੍ਤਾ. ਇਦ੍ਧਿਜਾਦੀਨਿ ਦ੍ਵਯਾਨਿ ਖੋਮਾਦੀਨਂ ਅਨੁਲੋਮਾਨਿ ਤੇਸਮਞ੍ਞਤਰਭਾਵਤੋ. ਇਮੇਸਂ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਅਕਾਲਚੀਵਰਂ.

ਵਿਕਪ੍ਪਨਮਧਿਟ੍ਠਾਨਨ੍ਤਿ ਏਤ੍ਥ ਪਨ ਵਿਕਪ੍ਪਨੂਪਗਂ ਅਧਿਟ੍ਠਾਨੂਪਗਞ੍ਚ ਏਵਂ ਵੇਦਿਤਬ੍ਬਂ. ਤਤ੍ਰਾਯਂ ਪਾਲ਼ਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਆਯਾਮੇਨ ਅਟ੍ਠਙ੍ਗੁਲਂ ਸੁਗਤਙ੍ਗੁਲੇਨ ਚਤੁਰਙ੍ਗੁਲਵਿਤ੍ਥਤਂ ਪਚ੍ਛਿਮਚੀਵਰਂ ਵਿਕਪ੍ਪੇਤੁ’’ਨ੍ਤਿ (ਮਹਾਵ. ੩੫੮). ਮਜ੍ਝਿਮਸ੍ਸ ਪੁਰਿਸਸ੍ਸ ਦੀਘਸੋ ਦ੍ਵੇ ਵਿਦਤ੍ਥਿਯੋ, ਤਿਰਿਯਂ ਵਿਦਤ੍ਥਿ. ਦ੍ਵੇ ਵਿਕਪ੍ਪਨਾ ਸਮ੍ਮੁਖਾਵਿਕਪ੍ਪਨਾ ਚ ਪਰਮ੍ਮੁਖਾਵਿਕਪ੍ਪਨਾ ਚ. ਕਥਂ? ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ, ਅਯਂ ਸਮ੍ਮੁਖਾਵਿਕਪ੍ਪਨਾ. ‘‘ਮਯ੍ਹਂ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ, ਏਕਸ੍ਸ ਸਨ੍ਤਿਕੇ ‘‘ਇਮਂ ਚੀਵਰਂ ਤਿਸ੍ਸਸ੍ਸ ਭਿਕ੍ਖੁਨੋ ਵਿਕਪ੍ਪੇਮੀ’’ਤਿ ਵਤ੍ਤਬ੍ਬਂ, ਅਯਂ ਅਪਰਾਪਿ ਸਮ੍ਮੁਖਾਵਿਕਪ੍ਪਨਾ. ਤੇਨ ਭਿਕ੍ਖੁਨਾ ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ, ‘‘ਇਮਂ ਚੀਵਰਂ ਤੁਯ੍ਹਂ ਵਿਕਪ੍ਪਨਤ੍ਥਾਯ ਦਮ੍ਮੀ’’ਤਿ ਵਤ੍ਤਬ੍ਬਂ, ਤੇਨ ਵਤ੍ਤਬ੍ਬੋ ‘‘ਕੋ ਤੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ ਸਮ੍ਭਤ੍ਤੋ ਵਾ’’ਤਿ, ਤਤੋ ਇਤਰੇਨ ‘‘ਤਿਸ੍ਸੋ ਭਿਕ੍ਖੂ’’ਤਿ ਵਤ੍ਤਬ੍ਬਂ, ਪੁਨ ਤੇਨ ‘‘ਅਹਂ ਤਿਸ੍ਸਸ੍ਸ ਭਿਕ੍ਖੁਨੋ ਦਮ੍ਮੀ’’ਤਿ ਵਤ੍ਤਬ੍ਬਂ, ਅਯਂ ਪਰਮ੍ਮੁਖਾਵਿਕਪ੍ਪਨਾ. ‘‘ਤਿਸ੍ਸਸ੍ਸ ਭਿਕ੍ਖੁਨੋ ਸਨ੍ਤਕਂ ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਵੁਤ੍ਤੇ ਪਚ੍ਚੁਦ੍ਧਾਰੋ ਨਾਮ ਹੋਤਿ. ਬਹੁਕੇ ‘‘ਇਮਾਨੀ’’ਤਿ, ਅਹਤ੍ਥਪਾਸੇ ‘‘ਏਤਂ, ਏਤਾਨੀ’’ਤਿ ਵਾ. ਏਵਂ ਵਿਕਪ੍ਪਨਞ੍ਚ ਅਕਤ੍ਵਾਤਿ ਅਤ੍ਥੋ.

ਤਿਚੀਵਰਸ੍ਸ ਪਨ ਪਮਾਣਂ ਉਕ੍ਕਟ੍ਠਪਰਿਚ੍ਛੇਦੇਨ ਸੁਗਤਚੀਵਰਤੋ ਊਨਕਂ ਵਟ੍ਟਤਿ, ਲਾਮਕਪਰਿਚ੍ਛੇਦੇਨ ਸਙ੍ਘਾਟਿਯਾ, ਉਤ੍ਤਰਾਸਙ੍ਗਸ੍ਸ ਚ ਦੀਘਤੋ ਮੁਟ੍ਠਿਪਞ੍ਚਕਂ, ਤਿਰਿਯਂ ਮੁਟ੍ਠਿਤ੍ਤਿਕਂ, ਅਨ੍ਤਰਵਾਸਕੋ ਦੀਘਤੋ ਮੁਟ੍ਠਿਪਞ੍ਚਕੋ, ਤਿਰਿਯਂ ਦ੍ਵਿਹਤ੍ਥੋਪਿ ਅਡ੍ਢਤੇਯ੍ਯੋ ਵਾ ਵਟ੍ਟਤਿ. ਵੁਤ੍ਤਪ੍ਪਮਾਣਤੋ ਅਧਿਕਞ੍ਚ ਊਨਕਞ੍ਚ ‘‘ਪਰਿਕ੍ਖਾਰਚੋਲ਼’’ਨ੍ਤਿ ਅਧਿਟ੍ਠਾਤਬ੍ਬਂ. ਦ੍ਵੇ ਚੀਵਰਸ੍ਸ ਅਧਿਟ੍ਠਾਨਾ ਕਾਯੇਨ ਵਾ ਅਧਿਟ੍ਠੇਤਿ, ਵਾਚਾਯ ਵਾ ਅਧਿਟ੍ਠੇਤਿ. ਤਿਚੀਵਰਂ ਅਧਿਟ੍ਠਹਨ੍ਤੇਨ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਪੁਰਾਣਸਙ੍ਘਾਟਿਂ ‘‘ਇਮਂ ਸਙ੍ਘਾਟਿਂ ਪਚ੍ਚੁਦ੍ਧਰਾਮੀ’’ਤਿ ਪਚ੍ਚੁਦ੍ਧਰਿਤ੍ਵਾ ਨਵਂ ਸਙ੍ਘਾਟਿਂ ਹਤ੍ਥੇਨ ਗਹੇਤ੍ਵਾ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਚਿਤ੍ਤੇਨ ਆਭੋਗਂ ਕਤ੍ਵਾ ਕਾਯਵਿਕਾਰਂ ਕਰੋਨ੍ਤੇਨ ਕਾਯੇਨ ਅਧਿਟ੍ਠਾਤਬ੍ਬਾ, ਇਦਂ ਕਾਯੇਨ ਅਧਿਟ੍ਠਾਨਂ. ਤਂ ਯੇਨ ਕੇਨਚਿ ਸਰੀਰਾਵਯਵੇਨ ਅਫੁਸਨ੍ਤਸ੍ਸ ਨ ਵਟ੍ਟਤਿ. ਵਾਚਾਯ ਅਧਿਟ੍ਠਾਨਂ ਪਨ ਵਚੀਭੇਦਂ ਕਤ੍ਵਾ ਵਾਚਾਯ ਅਧਿਟ੍ਠਾਤਬ੍ਬਂ, ਸਚੇ ਹਤ੍ਥਪਾਸੇ ‘‘ਇਮਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ, ਸਚੇ ਅਹਤ੍ਥਪਾਸੇ ਠਪਿਤਟ੍ਠਾਨਂ ਸਲ੍ਲਕ੍ਖੇਤ੍ਵਾ ‘‘ਏਤਂ ਸਙ੍ਘਾਟਿਂ ਅਧਿਟ੍ਠਾਮੀ’’ਤਿ ਵਾਚਾ ਭਿਨ੍ਦਿਤਬ੍ਬਾ. ਏਸ ਨਯੋ ਉਤ੍ਤਰਾਸਙ੍ਗੇ, ਅਨ੍ਤਰਵਾਸਕੇ ਚ. ਤਿਚੀਵਰਾਦੀਨਿ ਸਬ੍ਬਾਨਿ ਏਕਤੋ ਕਤ੍ਵਾ ‘‘ਇਮਾਨਿ ਚੀਵਰਾਨਿ ਪਰਿਕ੍ਖਾਰਚੋਲ਼ਾਨਿ ਅਧਿਟ੍ਠਾਮੀ’’ਤਿ ਅਧਿਟ੍ਠਾਤੁਮ੍ਪਿ ਵਟ੍ਟਤੀਤਿ. ਏਵਂ ਅਧਿਟ੍ਠਾਨਞ੍ਚ ਅਕਤ੍ਵਾਤਿ ਅਤ੍ਥੋ.

ਦਸ ਅਹਾਨਿ ਦਸਾਹਂ. ਅਤਿਮਾਪੇਤੀਤਿ ਅਤਿਕ੍ਕਾਮੇਤਿ. ਤਸ੍ਸਾਤਿ ਤਸ੍ਸ ਭਿਕ੍ਖੁਨੋ. ਨਿਸ੍ਸਗ੍ਗਿਯਨ੍ਤਿ ਨਿਸ੍ਸਜ੍ਜਨਂ ਨਿਸ੍ਸਗ੍ਗਿਯਂ, ਪੁਬ੍ਬਭਾਗੇ ਕਤ੍ਤਬ੍ਬਸ੍ਸ ਵਿਨਯਕਮ੍ਮਸ੍ਸੇਤਂ ਨਾਮਂ, ਨਿਸ੍ਸਗ੍ਗਿਯਮਸ੍ਸ ਅਤ੍ਥੀਤਿ ਨਿਸ੍ਸਗ੍ਗਿਯਂ, ਕਿਂ ਤਂ? ਪਾਚਿਤ੍ਤਿਯਂ, ਤਂ ਅਤਿਕ੍ਕਾਮਯਤੋ ਸਹਨਿਸ੍ਸਗ੍ਗਿਯਵਿਨਯਕਮ੍ਮਂ ਪਾਚਿਤ੍ਤਿਯਂ ਸਿਯਾ, ਅਯਮੇਤ੍ਥ ਅਤ੍ਥੋ. ਤਂ ਪਨੇਤਂ ਚੀਵਰਂ ਯਂ ਦਿਵਸਂ ਉਪ੍ਪਨ੍ਨਂ, ਤਸ੍ਸ ਯੋ ਅਰੁਣੋ, ਸੋ ਉਪ੍ਪਨ੍ਨਦਿਵਸਨਿਸ੍ਸਿਤੋ, ਤਸ੍ਮਾ ਚੀਵਰੁਪ੍ਪਾਦਦਿਵਸੇਨ ਸਦ੍ਧਿਂ ਏਕਾਦਸੇ ਅਰੁਣੁਗ੍ਗਮਨੇ ਦਸਾਹਾਤਿਕ੍ਕਮਿਤਂ ਹੋਤੀਤਿ. ਚੀਵਰਸ੍ਸ ਅਤ੍ਤਨੋ ਸਨ੍ਤਕਤਾ, ਜਾਤਿਪ੍ਪਮਾਣਯੁਤ੍ਤਤਾ, ਛਿਨ੍ਨਪਲਿਬੋਧਭਾਵੋ, ਅਤਿਰੇਕਚੀਵਰਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਪਠਮਕਥਿਨਸਿਕ੍ਖਾਪਦਂ.

੧੮. ਇਦਾਨਿ ਦੁਤਿਯਂ ਦਸ੍ਸੇਤੁਂ ‘‘ਭਿਕ੍ਖੁਸਮ੍ਮੁਤਿਯਾ’’ਤ੍ਯਾਦਿਮਾਰਦ੍ਧਂ. ਯੋ ਭਿਕ੍ਖੁਸਮ੍ਮੁਤਿਂ ਵਜ੍ਜੇਤ੍ਵਾ ਕਾਲਞ੍ਚ ਵਿਨਾ ਅਧਿਟ੍ਠਿਤਂ ਤਿਚੀਵਰਂ ਏਕਾਹਂ ਅਤਿਕ੍ਕਮਾਪੇਤਿ, ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਭਿਕ੍ਖੁਸਮ੍ਮੁਤਿਯਾਞ੍ਞਤ੍ਰਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਤਿਚੀਵਰੇਨ ਵਿਪ੍ਪਵਾਸਸਮ੍ਮੁਤਿਂ ਦੇਤਿ, ਤਂ ਠਪੇਤ੍ਵਾ. ਤਿਚੀਵਰਮਧਿਟ੍ਠਿਤਨ੍ਤਿ ਕਰਣਤ੍ਥੇ ਉਪਯੋਗਵਚਨਂ, ਤੇਨ ਤਿਚੀਵਰਾਧਿਟ੍ਠਾਨਨਯੇਨ ਅਧਿਟ੍ਠਿਤੇਸੁ ਸਙ੍ਘਾਟਿਆਦੀਸੁ ਯੇਨ ਕੇਨਚਿ ਚੀਵਰੇਨ. ਏਕਾਹਨ੍ਤਿ ਏਕਰਤ੍ਤਂ. ਅਤਿਮਾਪੇਤੀਤਿ ਵਿਪ੍ਪਵਸਤਿ, ਵਿਯੁਤ੍ਤੋ ਵਸਤੀਤਿ ਅਤ੍ਥੋ. ਤਸ੍ਸ ਅਲਦ੍ਧਸਮ੍ਮੁਤਿਕਸ੍ਸ ਭਿਕ੍ਖੁਨੋ ਏਕਰਤ੍ਤਮ੍ਪਿ ਚੀਵਰੇਨ ਵਿਪ੍ਪਵਾਸਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਸਿਯਾਤਿ ਅਤ੍ਥੋ. ਸਮਯਂ ਵਿਨਾਤਿ ਚੀਵਰਕਾਲਂ ਵਜ੍ਜੇਤ੍ਵਾ. ਅਧਿਟ੍ਠਿਤਚੀਵਰਤਾ, ਅਨਤ੍ਥਤਕਥਿਨਤਾ, ਅਲਦ੍ਧਸਮ੍ਮੁਤਿਤਾ, ਰਤ੍ਤਿਵਿਪ੍ਪਵਾਸੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਦੁਤਿਯਕਥਿਨਸਿਕ੍ਖਾਪਦਂ.

੧੯. ਇਦਾਨਿ ਪੁਰਾਣਚੀਵਰਂ ਦਸ੍ਸੇਤੁਂ ‘‘ਅਞ੍ਞਾਤਿਕਾ’’ਤ੍ਯਾਦਿ ਆਰਦ੍ਧਂ. ਤਤ੍ਥ ਅਞ੍ਞਾਤਿਕਾਤਿ ਅਞ੍ਞਾਤਿਕਾਯ ‘‘ਪਟਿਸਙ੍ਖਾ ਯੋਨਿਸੋ’’ਤਿਆਦੀਸੁ ਵਿਯ, ਅਞ੍ਞਾਤਿਕਾਯ ਨੇਵ ਮਾਤੁਸਮ੍ਬਨ੍ਧੇਨ ਨ ਪਿਤੁਸਮ੍ਬਨ੍ਧੇਨ ਸਮ੍ਬਦ੍ਧਾਯਾਤਿ ਵੁਤ੍ਤਂ ਹੋਤਿ. ਭਿਕ੍ਖੁਨਿਯਾਤਿ ਅਟ੍ਠਵਾਚਿਕਕਮ੍ਮੇਨ ਉਪਸਮ੍ਪਨ੍ਨਾਯ. ਆਕੋਟਾਪੇਤੀਤਿ ਪਹਰਾਪੇਤਿ. ਤਨ੍ਤਿ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਭਵੇਯ੍ਯਾਤਿ ਅਤ੍ਥੋ. ਪੁਰਾਣਚੀਵਰਤਾ, ਉਪਚਾਰੇ ਠਤ੍ਵਾ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਆਣਾਪਨਂ, ਤਸ੍ਸਾ ਧੋਵਨਾਦੀਨਿ ਚਾਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਪੁਰਾਣਚੀਵਰਸਿਕ੍ਖਾਪਦਂ.

੨੦. ਕਿਞ੍ਚਿ ਮੂਲਕਨ੍ਤਿ ਕਿਞ੍ਚਿ ਪਾਭਤਂ. ਚੀਵਰਾਦਾਨੇਤਿ ਚੀਵਰਸ੍ਸ ਆਦਾਨੇ ਚੀਵਰਪ੍ਪਟਿਗ੍ਗਹਣੇ. ਵਿਕਪ੍ਪਨੂਪਗਚੀਵਰਤਾ, ਪਾਰਿਵਤ੍ਤਕਾਭਾਵੋ, ਅਞ੍ਞਾਤਿਕਾਯ ਹਤ੍ਥਤੋ ਗਹਣਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਚੀਵਰਪ੍ਪਟਿਗ੍ਗਹਣਸਿਕ੍ਖਾਪਦਂ.

੨੧. ਅਪ੍ਪਵਾਰਿਤਨ੍ਤਿ ‘‘ਵਦੇਯ੍ਯਾਥ, ਭਨ੍ਤੇ, ਯੇਨ ਅਤ੍ਥੋ’’ਤਿ ਇਚ੍ਛਾਪਿਤਂ ਇਚ੍ਛਂ ਰੁਚਿਂ ਉਪ੍ਪਾਦਿਤਂ, ਨ ਪਵਾਰਿਤਨ੍ਤਿ ਅਪ੍ਪਵਾਰਿਤਂ. ਵਿਞ੍ਞਾਪੇਨ੍ਤਸ੍ਸਾਤਿ ਯਾਚਨ੍ਤਸ੍ਸ. ਅਞ੍ਞਤ੍ਰ ਸਮਯਾਤਿ ਨਟ੍ਠਚੀਵਰਕਾਲਂ ਠਪੇਤ੍ਵਾ. ਵਿਕਪ੍ਪਨੂਪਗਚੀਵਰਤਾ, ਸਮਯਾਭਾਵੋ, ਅਞ੍ਞਾਤਕਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਅਞ੍ਞਾਤਕਵਿਞ੍ਞਤ੍ਤਿਸਿਕ੍ਖਾਪਦਂ.

੨੨. ਰਜਤਨ੍ਤਿ ਰੂਪਿਯਂ. ਜਾਤਰੂਪਨ੍ਤਿ ਸੁਵਣ੍ਣਂ. ਮਾਸਕਨ੍ਤਿ ਤਯੋ ਮਾਸਕਾ ਲੋਹਮਾਸਕੋ ਦਾਰੁਮਾਸਕੋ ਜਤੁਮਾਸਕੋਤਿ. ਤਤ੍ਥ ਲੋਹਮਾਸਕੋਤਿ ਤਮ੍ਬਲੋਹਾਦੀਹਿ ਕਤਮਾਸਕੋ. ਦਾਰੁਮਾਸਕੋਤਿ ਸਾਰਦਾਰੁਨਾ ਵਾ ਵੇਲ਼ੁਪੇਸਿਕਾਯ ਵਾ ਅਨ੍ਤਮਸੋ ਤਾਲਪਣ੍ਣੇਨਪਿ ਰੂਪਂ ਛਿਨ੍ਦਿਤ੍ਵਾ ਕਤਮਾਸਕੋ. ਜਤੁਮਾਸਕੋਤਿ ਲਾਖਾਯ ਵਾ ਨਿਯ੍ਯਾਸੇਨ ਵਾ ਰੂਪਂ ਸਮੁਟ੍ਠਾਪੇਤ੍ਵਾ ਕਤਮਾਸਕੋ. ਕਹਾਪਣਨ੍ਤਿ ਸੁਵਣ੍ਣਮਯਂ ਵਾ ਰੂਪਿਯਮਯਂ ਵਾ ਪਾਕਤਿਕਂ ਵਾ. ਗਣ੍ਹੇਯ੍ਯਾਤਿ ਅਤ੍ਤਨੋ ਅਤ੍ਥਾਯ ਦੀਯਮਾਨਂ ਵਾ ਕਤ੍ਥਚਿ ਠਿਤਂ ਵਾ ਨਿਪ੍ਪਰਿਗ੍ਗਹਂ ਦਿਸ੍ਵਾ ਸਯਂ ਗਣ੍ਹੇਯ੍ਯ. ਗਣ੍ਹਾਪੇਯ੍ਯਾਤਿ ਤਦੇਵ ਅਞ੍ਞੇਨ ਗਾਹਾਪੇਯ੍ਯ. ਨਿਸ੍ਸਗ੍ਗੀਤਿ ਗਹਣਾਦੀਸੁ ਯਂ ਕਿਞ੍ਚਿ ਕਰੋਨ੍ਤਸ੍ਸ ਅਘਨਬਦ੍ਧੇਸੁ ਵਤ੍ਥੁਗਣਨਾਯ ਨਿਸ੍ਸਗ੍ਗਿ ਸਿਯਾਤਿ ਅਤ੍ਥੋ. ਸਾਦਿਯੇਯ੍ਯ ਵਾਤਿ ਕਾਯਵਾਚਾਹਿ ਅਪ੍ਪਟਿਕ੍ਖਿਪਿਤ੍ਵਾ ਚਿਤ੍ਤੇਨ ਅਧਿਵਾਸੇਯ੍ਯ. ਜਾਤਰੂਪਰਜਤਭਾਵੋ, ਅਤ੍ਤੁਦ੍ਦੇਸਿਕਤਾ, ਗਹਣਾਦੀਸੁ ਅਞ੍ਞਤਰਭਾਵੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਰੂਪਿਯਪ੍ਪਟਿਗ੍ਗਹਣਸਿਕ੍ਖਾਪਦਂ.

੨੩. ਰਜਤਾਦਿਚਤੁਬ੍ਬਿਧਂ ਅਕਪ੍ਪਿਯਂ ਕਪ੍ਪਿਯੇਨਾਪਿ ਪਰਿਵਤ੍ਤੇਯ੍ਯ ਸਹਧਮ੍ਮਿਕੇ ਠਪੇਤ੍ਵਾ, ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਅਕਪ੍ਪਿਯਨ੍ਤਿ ਅਕਪ੍ਪਿਯਵਤ੍ਥੁਂ. ਕਪ੍ਪਿਯੇਨਾਤਿ ਕਪ੍ਪਿਯਵਤ੍ਥੁਨਾ. ਸਹਧਮ੍ਮਿਕੇਤਿ ਭਿਕ੍ਖੁਭਿਕ੍ਖੁਨਿਸਾਮਣੇਰਸਾਮਣੇਰਿਸਿਕ੍ਖਮਾਨਸਙ੍ਖਾਤੇ ਪਞ੍ਚ ਸਹਧਮ੍ਮਿਕੇ. ਰੂਪਿਯਭਾਵੋ, ਪਰਿਵਤ੍ਤਨਞ੍ਚਾਤਿ ਇਮਾਨੇਤ੍ਥ ਦ੍ਵੇ ਅਙ੍ਗਾਨਿ. ਰੂਪਿਯਪਰਿਵਤ੍ਤਨਸਿਕ੍ਖਾਪਦਂ.

੨੪. ‘‘ਇਮਂ ਪਤ੍ਤਂ ਤੁਯ੍ਹਂ ਵਿਕਪ੍ਪੇਮੀ’’ਤਿਆਦਿਨਾ ਵਿਕਪ੍ਪਨਞ੍ਚ ‘‘ਇਮਂ ਪਤ੍ਤਂ ਅਧਿਟ੍ਠਾਮੀ’’ਤਿਆਦਿਨਾ ਅਧਿਟ੍ਠਾਨਞ੍ਚ ਅਕਤ੍ਵਾਤਿ ਅਤ੍ਥੋ. ਪਮਾਣਿਕਨ੍ਤਿ ਏਤ੍ਥਾਯਂ ਵਿਨਿਚ੍ਛਯੋ – ਅਨੁਪਹਤਪੁਰਾਣਸਾਲਿਤਣ੍ਡੁਲਾਨਂ ਸੁਕੋਟ੍ਟਿਤਪਰਿਸੁਦ੍ਧਾਨਂ ਦ੍ਵੇ ਮਗਧਨਾਲ਼ਿਯੋ ਗਹੇਤ੍ਵਾ ਤੇਹਿ ਤਣ੍ਡੁਲੇਹਿ ਅਨੁਤ੍ਤਣ੍ਡੁਲਮਕਿਲਿਨ੍ਨਮਪਿਣ੍ਡਿਤਂ ਸੁਵਿਸਦਂ ਕੁਨ੍ਦਮਕੁਲ਼ਰਾਸਿਸਦਿਸਂ ਅਵਸ੍ਸਾਵਿਤੋਦਨਂ ਪਚਿਤ੍ਵਾ ਨਿਰਵਸੇਸਂ ਪਤ੍ਤੇ ਪਕ੍ਖਿਪਿਤ੍ਵਾ ਤਸ੍ਸ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣੋ ਨਾਤਿਘਨੋ ਨਾਤਿਤਨੁਕੋ ਹਤ੍ਥਹਾਰਿਯੋ ਸਬ੍ਬਸਮ੍ਭਾਰਸਙ੍ਖਤੋ ਮੁਗ੍ਗਸੂਪੋ ਪਕ੍ਖਿਪਿਤਬ੍ਬੋ, ਤਤੋ ਆਲੋਪਸ੍ਸ ਅਨੁਰੂਪਂ ਯਾਵਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਂ ਪਕ੍ਖਿਪਿਤਬ੍ਬਂ. ਸਪ੍ਪਿਤੇਲਤਕ੍ਕਰਸਕਞ੍ਜਿਕਾਦੀਨਿ ਪਨ ਅਗਣਨੂਪਗਾਨਿ ਹੋਨ੍ਤਿ. ਤਾਨਿ ਹਿ ਓਦਨਗਤਿਕਾਨਿ ਨੇਵ ਹਾਪੇਤੁਂ, ਨ ਵਡ੍ਢੇਤੁਂ ਸਕ੍ਕੋਨ੍ਤਿ. ਏਵਮੇਤਂ ਸਬ੍ਬਮ੍ਪਿ ਪਕ੍ਖਿਤ੍ਤਂ ਸਚੇ ਪਨ ਪਤ੍ਤਸ੍ਸ ਮੁਖਵਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ ਵਾ ਹੀਰੇਨ ਵਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ ਵਾ ਹੀਰਸ੍ਸ ਵਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ. ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ, ਅਨ੍ਤੋਗਤਮੇਵ ਹੋਤਿ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ. ਉਕ੍ਕਟ੍ਠਤੋ ਉਪਡ੍ਢਪ੍ਪਮਾਣੋ ਮਜ੍ਝਿਮੋ. ਮਜ੍ਝਿਮਤੋ ਉਪਡ੍ਢਪ੍ਪਮਾਣੋ ਓਮਕੋ. ਤੇਸਮ੍ਪਿ ਵੁਤ੍ਤਨਯੇਨੇਵ ਪਭੇਦੋ ਵੇਦਿਤਬ੍ਬੋ. ਇਚ੍ਚੇਤੇਸੁ ਉਕ੍ਕਟ੍ਠੁਕ੍ਕਟ੍ਠੋ ਚ ਓਮਕੋਮਕੋ ਚਾਤਿ ਦ੍ਵੇ ਅਪਤ੍ਤਾ, ਸੇਸਾ ਸਤ੍ਤ ਪਤ੍ਤਾ ਪਮਾਣਯੁਤ੍ਤਾ ਨਾਮਾਤਿ ਏਵਂ ਪਮਾਣੇਨ ਯੁਤ੍ਤੋ ਪਮਾਣਿਕੋ, ਤਂ ਪਮਾਣਿਕਂ. ਪਤ੍ਤਨ੍ਤਿ ਸਤ੍ਤਸੁ ਪਤ੍ਤੇਸੁ ਅਞ੍ਞਤਰਂ ਪਤ੍ਤਂ. ਪਤ੍ਤਸ੍ਸ ਅਤ੍ਤਨੋ ਸਨ੍ਤਕਤਾ, ਪਮਾਣਯੁਤ੍ਤਤਾ, ਅਧਿਟ੍ਠਾਨੂਪਗਤਾ, ਅਤਿਰੇਕਪਤ੍ਤਤਾ, ਦਸਾਹਾਤਿਕ੍ਕਮੋਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਪਠਮਪਤ੍ਤਸਿਕ੍ਖਾਪਦਂ.

੨੫. ਯੋ ਭਿਕ੍ਖੁ ਪਞ੍ਚਬਨ੍ਧਨਤੋ ਊਨਪਤ੍ਤੇ ਸਤਿ ਪਰਂ ਪਨ ਨਵਂ ਪਤ੍ਤਂ ਵਿਞ੍ਞਾਪੇਤਿ, ਤਸ੍ਸਪਿ ਭਿਕ੍ਖੁਨੋ ਨਿਸ੍ਸਗ੍ਗਿਯਂ ਸਿਯਾਤਿ ਸਮ੍ਬਨ੍ਧੋ. ਤਤ੍ਥ ਪਰਨ੍ਤਿ ਅਞ੍ਞਂ, ‘‘ਨਵਂ ਪਤ੍ਤ’’ਨ੍ਤਿਮਿਨਾ ਤੁਲ੍ਯਾਧਿਕਰਣਂ. ਅਧਿਟ੍ਠਾਨੂਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਕਤਵਿਞ੍ਞਤ੍ਤਿ, ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ. ਊਨਪਞ੍ਚਬਨ੍ਧਨਸਿਕ੍ਖਾਪਦਂ.

੨੬. ਯੋ ਸਪ੍ਪਿਤੇਲਾਦਿਕਂ ਪਨ ਭੇਸਜ੍ਜਂ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਭੁਞ੍ਜਨ੍ਤੋ ਸਤ੍ਤਾਹਂ ਅਤਿਕ੍ਕਾਮੇਤਿ, ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਅਤ੍ਥੋ. ਤਤ੍ਥ ਸਪ੍ਪਿਤੇਲਾਦਿਕਨ੍ਤਿ ਏਤ੍ਥ ਆਦਿ-ਸਦ੍ਦੋ ਨਵਨੀਤਮਧੁਫਾਣਿਤਂ ਸਙ੍ਗਣ੍ਹਾਤਿ. ਤਤ੍ਥ ਸਪ੍ਪਿ ਨਾਮ ਗਵਾਦੀਨਂ ਸਪ੍ਪਿ, ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ, ਤਥਾ ਨਵਨੀਤਂ. ਤੇਲਂ ਨਾਮ ਤਿਲਸਾਸਪਮਧੁਕਏਰਣ੍ਡਵਸਾਦੀਹਿ ਨਿਬ੍ਬਤ੍ਤਂ. ਮਧੁ ਨਾਮ ਮਕ੍ਖਿਕਾਮਧੁਮੇਵ. ਉਚ੍ਛੁਰਸਂ ਉਪਾਦਾਯ ਪਨ ਅਪਕ੍ਕਾ ਵਾ ਅਵਤ੍ਥੁਕਪਕ੍ਕਾ ਵਾ ਸਬ੍ਬਾਪਿ ਉਚ੍ਛੁਵਿਕਤਿ ਫਾਣਿਤਨ੍ਤਿ ਵੇਦਿਤਬ੍ਬਂ. ਭੇਸਜ੍ਜਵਿਧਾਨਸਿਕ੍ਖਾਪਦਂ.

੨੭. ਭਿਕ੍ਖੁਸ੍ਸ ਚੀਵਰਂ ਦਤ੍ਵਾ ਪੁਨ ਤਂ ਚੀਵਰਂ ਸਕਸਞ੍ਞਾਯ ਅਚ੍ਛਿਨ੍ਦਨ੍ਤਸ੍ਸ ਵਾ ਅਚ੍ਛਿਨ੍ਦਾਪਯਤੋਪਿ ਵਾ ਨਿਸ੍ਸਗ੍ਗਿਯਂ ਸਿਯਾਤਿ ਯੋਜਨਾ. ਤਤ੍ਥ ਦਤ੍ਵਾਤਿ ਵੇਯ੍ਯਾਵਚ੍ਚਾਦੀਨਿ ਪਚ੍ਚਾਸੀਸਮਾਨੋ ਦਤ੍ਵਾ. ਅਚ੍ਛਿਨ੍ਦਨ੍ਤਸ੍ਸਾਤਿ ਵੇਯ੍ਯਾਵਚ੍ਚਾਦੀਨਿ ਅਕਰੋਨ੍ਤਂ ਦਿਸ੍ਵਾ ਬਲਕ੍ਕਾਰੇਨ ਗਣ੍ਹਨ੍ਤਸ੍ਸ, ਤਥਾ ਅਚ੍ਛਿਨ੍ਦਾਪਯਤੋਤਿ. ਵਿਕਪ੍ਪਨੂਪਗਚੀਵਰਤਾ, ਸਾਮਂਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧਵਸੇਨ ਅਚ੍ਛਿਨ੍ਦਨਂ ਵਾ ਅਚ੍ਛਿਨ੍ਦਾਪਨਂ ਵਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਅਚ੍ਛਿਨ੍ਦਨਸਿਕ੍ਖਾਪਦਂ.

੨੮. ਅਪ੍ਪਵਾਰਿਤਂ ਅਞ੍ਞਾਤਿਂ ਗਹਪਤਿਂ ਸੁਤ੍ਤਂ ਯਾਚਿਤ੍ਵਾ ਞਾਤਿਪ੍ਪਵਾਰਿਤੇ ਵਜ੍ਜੇਤ੍ਵਾ ਤਨ੍ਤਵਾਯੇਹਿ ਚੀਵਰਂ ਵਾਯਾਪੇਨ੍ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਪਿਣ੍ਡਤ੍ਥੋ. ਤਤ੍ਥ ਸੁਤ੍ਤਨ੍ਤਿ ਛਬ੍ਬਿਧਂ ਖੋਮਸੁਤ੍ਤਾਦਿਕਂ ਵਾ ਤੇਸਂ ਅਨੁਲੋਮਂ ਵਾ. ਯਾਚਿਯਾਤਿ ਚੀਵਰਤ੍ਥਾਯ ਯਾਚਿਤ੍ਵਾ. ਚੀਵਰਤ੍ਥਾਯ ਵਿਞ੍ਞਾਪਿਤਸੁਤ੍ਤਂ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤਵਾਯੇਨ ਅਕਪ੍ਪਿਯਵਿਞ੍ਞਤ੍ਤਿਯਾ ਵਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਸੁਤ੍ਤਵਿਞ੍ਞਤ੍ਤਿਸਿਕ੍ਖਾਪਦਂ.

੨੯. ਯੋ ਭਿਕ੍ਖੁ ਸਙ੍ਘਸ੍ਸ ਪਰਿਣਤਂ ਲਾਭਂ ਜਾਨਨ੍ਤੋ ਅਤ੍ਤਨੋ ਪਰਿਣਾਮੇਤਿ, ਤਸ੍ਸ ਨਿਸ੍ਸਗ੍ਗਿਯਂ ਸਿਯਾਤਿ ਅਤ੍ਥੋ. ਤਤ੍ਥ ਜਾਨਨ੍ਤਿ ਜਾਨਨ੍ਤੋ. ਲਾਭਨ੍ਤਿ ਲਭਿਤਬ੍ਬਂ ਚੀਵਰਾਦਿਵਤ੍ਥੁਂ. ਪਰਿਣਤਨ੍ਤਿ ਸਙ੍ਘਸ੍ਸ ਨਿਨ੍ਨਂ ਸਙ੍ਘਸ੍ਸ ਪੋਣਂ ਸਙ੍ਘਸ੍ਸ ਪਬ੍ਭਾਰਂ ਹੁਤ੍ਵਾ ਠਿਤਂ. ਅਤ੍ਤਨੋ ਪਰਿਣਾਮੇਤੀਤਿ ‘‘ਮਯ੍ਹਂ ਦੇਥਾ’’ਤਿਆਦੀਨਿ ਵਦਨ੍ਤੋ ਅਤ੍ਤਨਿ ਨਿਨ੍ਨਂ ਕਰੋਤਿ. ਸਙ੍ਘੇ ਪਰਿਣਤਭਾਵੋ, ਤਂ ਞਤ੍ਵਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ. ਪਰਿਣਾਮਨਸਿਕ੍ਖਾਪਦਂ.

ਨਿਸ੍ਸਗ੍ਗਿਯਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.