੨. ਗਰੁਕਾਪਤ੍ਤਿਨਿਦ੍ਦੇਸਵਣ੍ਣਨਾ

੧੦. ਇਦਾਨਿ ਸਙ੍ਘਾਦਿਸੇਸਂ ਪਕਾਸੇਤੁਂ ‘‘ਮੋਚੇਤੁਕਾਮਚਿਤ੍ਤੇਨਾ’’ਤਿਆਦਿਮਾਰਦ੍ਧਂ. ਤਤ੍ਥ ਮੋਚੇਤੁਂ ਕਾਮੇਤੀਤਿ ਮੋਚੇਤੁਕਾਮਂ, ਮੋਚੇਤੁਕਾਮਞ੍ਚ ਤਂ ਚਿਤ੍ਤਞ੍ਚਾਤਿ ਮੋਚੇਤੁਕਾਮਚਿਤ੍ਤਂ, ਤੇਨ, ਮੋਚਨਸ੍ਸਾਦਚਿਤ੍ਤੇਨਾਤਿ ਅਤ੍ਥੋ. ਏਕਾਦਸਨ੍ਨਞ੍ਹਿ ਰਾਗਾਨਂ ਏਕੇਨ ਮੋਚਨਸ੍ਸਾਦੇਨ ਆਪਤ੍ਤਿ ਹੋਤੀਤਿ ਵੁਤ੍ਤਂ ਹੋਤਿ.

ਤਤ੍ਰਿਮੇ ਏਕਾਦਸ ਅਸ੍ਸਾਦਾ ਮੋਚਨਸ੍ਸਾਦੋ ਮੁਚ੍ਚਨਸ੍ਸਾਦੋ ਮੁਤ੍ਤਸ੍ਸਾਦੋ ਮੇਥੁਨਸ੍ਸਾਦੋ ਫਸ੍ਸਸ੍ਸਾਦੋ ਕਣ੍ਡੂਵਨਸ੍ਸਾਦੋ ਦਸ੍ਸਨਸ੍ਸਾਦੋ ਨਿਸਜ੍ਜਸ੍ਸਾਦੋ ਵਾਚਸ੍ਸਾਦੋ ਗੇਹਸਿਤਪੇਮਂ ਵਨਭਙ੍ਗਿਯਨ੍ਤਿ. ਤਤ੍ਥ ਮੋਚਨਸ੍ਸਾਦਚੇਤਨਾਯ ਚੇਤੇਨ੍ਤੋ ਚੇਵ ਅਸ੍ਸਾਦੇਨ੍ਤੋ ਚ ਉਪਕ੍ਕਮਤਿ, ਮੁਚ੍ਚਤਿ, ਸਙ੍ਘਾਦਿਸੇਸੋ, ਨ ਮੁਚ੍ਚਤਿ ਚੇ, ਥੁਲ੍ਲਚ੍ਚਯਂ. ਸਚੇ ਪਨ ਸਯਨਕਾਲੇ ਰਾਗਪਰਿਯੁਟ੍ਠਿਤੋ ਹੁਤ੍ਵਾ ਊਰੁਨਾ ਵਾ ਮੁਟ੍ਠਿਨਾ ਵਾ ਅਙ੍ਗਜਾਤਂ ਗਾਲ਼੍ਹਂ ਪੀਲ਼ੇਤ੍ਵਾ ਮੋਚਨਤ੍ਥਾਯ ਸਉਸ੍ਸਾਹੋ ਸੁਪਤਿ, ਸੁਪਨ੍ਤਸ੍ਸ ਚਸ੍ਸ ਅਸੁਚਿ ਮੁਚ੍ਚਤਿ, ਸਙ੍ਘਾਦਿਸੇਸੋ. ਮੁਚ੍ਚਨਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਚ੍ਚਮਾਨਂ ਅਸ੍ਸਾਦੇਤਿ, ਨ ਉਪਕ੍ਕਮਤਿ, ਮੁਚ੍ਚਤਿ, ਅਨਾਪਤ੍ਤਿ. ਮੁਤ੍ਤਸ੍ਸਾਦੇ ਅਤ੍ਤਨੋ ਧਮ੍ਮਤਾਯ ਮੁਤ੍ਤੇ ਠਾਨਾ ਚੁਤੇ ਅਸੁਚਿਮ੍ਹਿ ਪਚ੍ਛਾ ਅਸ੍ਸਾਦੇਨ੍ਤਸ੍ਸ ਵਿਨਾ ਉਪਕ੍ਕਮੇਨ ਮੁਚ੍ਚਤਿ, ਅਨਾਪਤ੍ਤਿ. ਮੇਥੁਨਸ੍ਸਾਦੇ ਮੇਥੁਨਰਾਗੇਨ ਮਾਤੁਗਾਮਂ ਗਣ੍ਹਾਤਿ, ਤੇਨ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਦੁਕ੍ਕਟਂ ਪਨ ਆਪਜ੍ਜਤਿ. ਫਸ੍ਸਸ੍ਸਾਦੋ ਦੁਵਿਧੋ ਅਜ੍ਝਤ੍ਤਿਕੋ ਬਾਹਿਰੋ ਚਾਤਿ. ਤਤ੍ਥ ਅਤ੍ਤਨੋ ਨਿਮਿਤ੍ਤਂ ‘‘ਥਦ੍ਧਂ, ਮੁਦੁਕਨ੍ਤਿ ਜਾਨਿਸ੍ਸਾਮੀ’’ਤਿ ਵਾ ਲੋਲਭਾਵੇਨ ਵਾ ਕੀਲ਼ਾਪਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਬਾਹਿਰਫਸ੍ਸਸ੍ਸਾਦੇ ਪਨ ਕਾਯਸਂਸਗ੍ਗਰਾਗੇਨ ਇਤ੍ਥਿਂ ਫੁਸਤੋ, ਆਲਿਙ੍ਗਤੋ ਚ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਕਾਯਸਂਸਗ੍ਗਸਙ੍ਘਾਦਿਸੇਸਂ ਪਨ ਆਪਜ੍ਜਤਿ.

ਕਣ੍ਡੂਵਨਸ੍ਸਾਦੇ ਦਦ੍ਦੁਕਚ੍ਛੁਪਿਲ਼ਕਪਾਣਕਾਦੀਨਂ ਅਞ੍ਞਤਰੇਨ ਖਜ੍ਜਮਾਨਂ ਨਿਮਿਤ੍ਤਂ ਕਣ੍ਡੂਵਨਸ੍ਸਾਦੇਨ ਕਣ੍ਡੂਵਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ. ਦਸ੍ਸਨਸ੍ਸਾਦੇ ਇਤ੍ਥਿਯਾ ਅਨੋਕਾਸਂ ਉਪਨਿਜ੍ਝਾਯਤੋ ਅਸੁਚਿ ਮੁਚ੍ਚਤਿ, ਅਨਾਪਤ੍ਤਿ, ਦੁਕ੍ਕਟਂ ਪਨ ਹੋਤਿ. ਨਿਸਜ੍ਜਸ੍ਸਾਦੇ ਮਾਤੁਗਾਮੇਨ ਸਦ੍ਧਿਂ ਰਹੋ ਨਿਸਿਨ੍ਨਸ੍ਸ ਮੁਤ੍ਤੇਪਿ ਅਨਾਪਤ੍ਤਿ, ਰਹੋਨਿਸਜ੍ਜਾਪਤ੍ਤਿ ਪਨ ਹੋਤਿ. ਵਾਚਸ੍ਸਾਦੇ ਮਾਤੁਗਾਮਂ ਮੇਥੁਨਪ੍ਪਟਿਸਂਯੁਤ੍ਤਾਹਿ ਵਾਚਾਹਿ ਓਭਾਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ, ਦੁਟ੍ਠੁਲ੍ਲਵਾਚਾਸਙ੍ਘਾਦਿਸੇਸਂ ਪਨ ਆਪਜ੍ਜਤਿ. ਗੇਹਸਿਤਪੇਮੇ ਮਾਤਾਦੀਨਂ ਮਾਤਾਦਿਪੇਮੇਨ ਆਲਿਙ੍ਗਨਾਦਿਂ ਕਰੋਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤਿ. ਵਨਭਙ੍ਗਂ ਸਨ੍ਥਵਕਰਣਤ੍ਥਾਯ ਇਤ੍ਥਿਯਾ ਪੇਸਿਤਪੁਪ੍ਫਾਦਿਵਨਭਙ੍ਗਸਞ੍ਞਿਤਂ ਪਣ੍ਣਾਕਾਰਂ ‘‘ਇਤ੍ਥਨ੍ਨਾਮਾਯ ਇਮਂ ਪੇਸਿਤ’’ਨ੍ਤਿ ਅਸ੍ਸਾਦੇਨ ਆਮਸਨ੍ਤਸ੍ਸ ਮੁਤ੍ਤੇਪਿ ਅਨਾਪਤ੍ਤੀਤਿ. ਏਵਮੇਤੇਸੁ ਮੋਚਨਸ੍ਸਾਦੇਨ ਆਪਤ੍ਤਿ ਹੋਤੀਤਿ ਦਸ੍ਸੇਤੁਂ ‘‘ਮੋਚੇਤੁ…ਪੇ… ਨਾ’’ਤਿ ਵੁਤ੍ਤਂ. ਅਥ ਵਾ ਮੋਚੇਤੁਕਾਮਂ ਚਿਤ੍ਤਂ ਯਸ੍ਸ ਸੋਯਂ ਮੋਚੇਤੁਕਾਮਚਿਤ੍ਤੋ, ਤੇਨ, ਇਤ੍ਥਮ੍ਭੂਤੇ ਕਰਣਵਚਨਂ, ਮੋਚੇਤੁਕਾਮਚਿਤ੍ਤੋ ਹੁਤ੍ਵਾਤਿ ਅਤ੍ਥੋ.

ਉਪਕ੍ਕਮ੍ਮਾਤਿ ਹਤ੍ਥਾਦੀਸੁ ਯੇਨ ਕੇਨਚਿ ਨਿਮਿਤ੍ਤੇ ਉਪਕ੍ਕਮਿਤ੍ਵਾਤਿ ਅਤ੍ਥੋ. ਵਿਮੋਚਯਨ੍ਤਿ ਯਂ ਅਨ੍ਤਮਸੋ ਏਕਾ ਖੁਦ੍ਦਕਮਕ੍ਖਿਕਾ ਪਿਵੇਯ੍ਯ, ਤਤ੍ਤਕਮ੍ਪਿ ਵਿਮੋਚੇਨ੍ਤੋਤਿ ਅਤ੍ਥੋ. ਸੁਕ੍ਕਨ੍ਤਿ ਨੀਲਪੀਤਲੋਹਿਤੋਦਾਤਤਕ੍ਕਤੇਲਦਕਖੀਰਦਧਿਸਪ੍ਪਿਵਣ੍ਣਸਙ੍ਖਾਤੇਸੁ ਦਸਵਿਧੇਸੁ ਸੁਕ੍ਕੇਸੁ ਯਂ ਕਿਞ੍ਚਿ ਸੁਕ੍ਕਂ. ਅਞ੍ਞਤ੍ਰ ਸੁਪਿਨਾਤਿ ਯਾ ਸੁਪਿਨਨ੍ਤੇ ਸੁਕ੍ਕਵਿਸ੍ਸਟ੍ਠਿ ਹੋਤਿ, ਤਂ ਠਪੇਤ੍ਵਾਤਿ ਅਤ੍ਥੋ. ਸਮਣੋਤਿ ਯੋ ਕੋਚਿ ਉਪਸਮ੍ਪਨ੍ਨੋ. ਗਰੁਕਨ੍ਤਿ ਸਙ੍ਘਾਦਿਸੇਸਂ. ਫੁਸੇਤਿ ਆਪਜ੍ਜੇਯ੍ਯਾਤਿ ਅਤ੍ਥੋ. ਚੇਤਨਾ ਉਪਕ੍ਕਮੋ ਮੁਚ੍ਚਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨੀਤਿ. ਸੁਕ੍ਕਵਿਸ੍ਸਟ੍ਠਿਸਿਕ੍ਖਾਪਦਂ.

੧੧. ਇਦਾਨਿ ਕਾਯਸਂਸਗ੍ਗਂ ਦਸ੍ਸੇਤੁਂ ‘‘ਕਾਯਸਂਸਗ੍ਗਰਾਗੇਨਾ’’ਤਿਆਦਿਮਾਰਦ੍ਧਂ. ਭਿਕ੍ਖੁ ਮਨੁਸ੍ਸਿਤ੍ਥਿਯਾ ਮਨੁਸ੍ਸਿਤ੍ਥਿਸਞ੍ਞੀ ਹੁਤ੍ਵਾ ਕਾਯਸਂਸਗ੍ਗਰਾਗੇਨ ਉਪਕ੍ਕਮਿਤ੍ਵਾ ਮਨੁਸ੍ਸਿਤ੍ਥਿਂ ਪਰਾਮਸਨ੍ਤੋ ਸਙ੍ਘਾਦਿਸੇਸਂ ਆਪਜ੍ਜੇਯ੍ਯਾਤਿ ਯੋਜਨਾ. ਤਤ੍ਥ ਕਾਯਸਂਸਗ੍ਗਰਾਗੇਨਾਤਿ ਹਤ੍ਥਗ੍ਗਹਣਾਦਿਕਾਯਸਮ੍ਫਸ੍ਸੇਨ ਰਾਗੇਨ ਕਾਯਮਿਸ੍ਸਰਾਗੇਨ. ਮਨੁਸ੍ਸਿਤ੍ਥਿਨ੍ਤਿ ਤਦਹੁਜਾਤਮ੍ਪਿ ਜੀਵਮਾਨਕਮਨੁਸ੍ਸਿਤ੍ਥਿਂ. ਪਰਾਮਸਨ੍ਤਿ ਪਰਾਮਸਨ੍ਤੋ, ਇਤ੍ਥੀਤਿ ਸਞ੍ਞਾ ਇਤ੍ਥਿਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਇਤ੍ਥਿਸਞ੍ਞੀ, ਇਤ੍ਥਿਸਞ੍ਞੀ ਹੁਤ੍ਵਾਤਿ ਅਤ੍ਥੋ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਕਾਯਸਂਸਗ੍ਗਰਾਗੋ, ਤੇਨ ਰਾਗੇਨ ਵਾਯਾਮੋ, ਹਤ੍ਥਗ੍ਗਾਹਾਦਿਸਮਾਪਜ੍ਜਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਕਾਯਸਂਸਗ੍ਗਸਿਕ੍ਖਾਪਦਂ.

੧੨. ਇਦਾਨਿ ਦੁਟ੍ਠੁਲ੍ਲਂ ਦਸ੍ਸੇਤੁਂ ‘‘ਦੁਟ੍ਠੁਲ੍ਲਵਾਚਸ੍ਸਾਦੇਨਾ’’ਤਿਆਦਿ ਆਰਦ੍ਧਂ. ਤਤ੍ਥ ਦੁਟ੍ਠੁਲ੍ਲਵਾਚਸ੍ਸਾਦੇਨਾਤਿ ਵਚ੍ਚਮਗ੍ਗਪਸ੍ਸਾਵਮਗ੍ਗਮੇਥੁਨਧਮ੍ਮਪ੍ਪਟਿਸਂਯੁਤ੍ਤਵਾਚਸ੍ਸਾਦਰਾਗੇਨ. ਮਗ੍ਗਂ ਵਾਰਬ੍ਭ ਮੇਥੁਨਨ੍ਤਿ ਵਚ੍ਚਮਗ੍ਗਪਸ੍ਸਾਵਮਗ੍ਗਾਨਂ ਅਞ੍ਞਤਰਂ ਮਗ੍ਗਂ ਵਾ ਮੇਥੁਨਂ ਵਾ ਆਰਬ੍ਭਾਤਿ ਅਤ੍ਥੋ. ਓਭਾਸਨ੍ਤੋਤਿ ਅਵਭਾਸਨ੍ਤੋ. ਮਨੁਸ੍ਸਿਤ੍ਥਿਨ੍ਤਿ ਵਿਞ੍ਞੁਂ ਪਟਿਬਲਂ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਸਲ੍ਲਕ੍ਖਣਸਮਤ੍ਥਂ ਮਨੁਸ੍ਸਿਤ੍ਥਿਂ. ਸੁਣਮਾਨਨ੍ਤਿ ਸੁਣਨ੍ਤਿਂ. ਇਮਿਨਾ ਪਟਿਬਲਾਯਪਿ ਇਤ੍ਥਿਯਾ ਅਵਿਞ੍ਞਤ੍ਤਿਪਥੇ ਠਿਤਾਯ ਦੂਤੇਨ ਵਾ ਪਣ੍ਣੇਨ ਵਾ ਆਰੋਚੇਨ੍ਤਸ੍ਸ ਦੁਟ੍ਠੁਲ੍ਲਵਾਚਾਪਤ੍ਤਿ ਨ ਹੋਤੀਤਿ ਦੀਪਿਤਂ ਹੋਤਿ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਦੁਟ੍ਠੁਲ੍ਲਵਾਚਸ੍ਸਾਦਰਾਗੋ, ਤੇਨ ਰਾਗੇਨ ਓਭਾਸਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਦੁਟ੍ਠੁਲ੍ਲਵਾਚਸ੍ਸਾਦਸਿਕ੍ਖਾਪਦਂ.

੧੩. ਇਦਾਨਿ ਅਤ੍ਤਕਾਮਪਾਰਿਚਰਿਯਂ ਦਸ੍ਸੇਤੁਂ ‘‘ਵਣ੍ਣ’’ਨ੍ਤ੍ਯਾਦਿ ਵੁਤ੍ਤਂ. ਤਤ੍ਥ ਯੋ ਭਿਕ੍ਖੁ ਅਤ੍ਤਨੋ ਕਾਮਪਾਰਿਚਰਿਯਾਯ ਵਣ੍ਣਂ ਵਤ੍ਵਾ ਮੇਥੁਨਰਾਗੇਨ ਇਤ੍ਥਿਂ ਮੇਥੁਨਂ ਯਾਚਮਾਨੋ ਗਰੁਂ ਫੁਸੇਤਿ ਸਮ੍ਬਨ੍ਧੋ. ਵਣ੍ਣਂ ਵਤ੍ਵਾਤਿ ਗੁਣਂ ਆਨਿਸਂਸਂ ਪਕਾਸੇਤ੍ਵਾ. ਅਤ੍ਤਨੋਕਾਮਪਾਰਿਚਰਿਯਾਯਾਤਿ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨ ਪਾਰਿਚਰਿਯਾ ਕਾਮਪਾਰਿਚਰਿਯਾ, ਅਤ੍ਤਨੋ ਅਤ੍ਥਾਯ ਕਾਮਪਾਰਿਚਰਿਯਾ ਅਤ੍ਤਨੋਕਾਮਪਾਰਿਚਰਿਯਾ, ਅਲੁਤ੍ਤਸਮਾਸੋਯਂ. ਅਥ ਵਾ ਅਤ੍ਤਨੋਤਿ ਕਤ੍ਵਤ੍ਥੇ ਸਾਮਿਵਚਨਂ, ਅਤ੍ਤਨੋ ਕਾਮਿਤਾ ਇਚ੍ਛਿਤਾਤਿ ਅਤ੍ਤਨੋਕਾਮਾ, ਸਯਂ ਮੇਥੁਨਰਾਗਵਸੇਨ ਪਤ੍ਥਿਤਾਤਿ ਅਤ੍ਥੋ, ਅਤ੍ਤਨੋਕਾਮਾ ਚ ਸਾ ਪਾਰਿਚਰਿਯਾ ਚਾਤਿ ਅਤ੍ਤਨੋਕਾਮਪਾਰਿਚਰਿਯਾ, ਤਾਯ ਅਤ੍ਤਨੋਕਾਮਪਾਰਿਚਰਿਯਾਯ, ‘‘ਏਤਦਗ੍ਗਂ, ਭਗਿਨਿ, ਪਾਰਿਚਰਿਯਾਨਂ, ਯਾ ਮਾਦਿਸਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਬ੍ਰਹ੍ਮਚਾਰਿਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯਾ’’ਤਿ ਏਵਂ ਵਣ੍ਣਂ ਵਤ੍ਵਾਤਿ ਅਤ੍ਥੋ. ਯਾਚਧਾਤੁਨੋ ਦ੍ਵਿਕਮ੍ਮਿਕਤ੍ਤਾ ‘‘ਇਤ੍ਥਿਂ ਮੇਥੁਨਂ ਯਾਚਮਾਨੋ’’ਤਿ ਵੁਤ੍ਤਂ. ਤਤ੍ਥ ਇਤ੍ਥਿਨ੍ਤਿ ਦੁਟ੍ਠੁਲ੍ਲੋਭਾਸਨੇ ਵੁਤ੍ਤਪ੍ਪਕਾਰਂ ਇਤ੍ਥਿਂ. ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ ਵਣ੍ਣਭਣਨਂ, ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਂ.

੧੪. ਇਦਾਨਿ ਸਞ੍ਚਰਿਤ੍ਤਂ ਦਸ੍ਸੇਤੁਂ ‘‘ਸਨ੍ਦੇਸ’’ਨ੍ਤ੍ਯਾਦਿਮਾਰਦ੍ਧਂ. ਤਤ੍ਥ ਭਿਕ੍ਖੁ ਪੁਰਿਸਸ੍ਸ ਵਾ ਸਨ੍ਦੇਸਂ, ਇਤ੍ਥਿਯਾ ਵਾ ਸਨ੍ਦੇਸਂ ਪਟਿਗ੍ਗਹੇਤ੍ਵਾ ਵੀਮਂਸਿਤ੍ਵਾ ਪਚ੍ਚਾਹਰਨ੍ਤੋ ਗਰੁਕਂ ਫੁਸੇਤਿ ਸਮ੍ਬਨ੍ਧੋ. ਤਤ੍ਥ ਸਨ੍ਦੇਸਨ੍ਤਿ ‘‘ਗਚ੍ਛ, ਭਨ੍ਤੇ, ਇਤ੍ਥਨ੍ਨਾਮਂ ਮਾਤੁਰਕ੍ਖਿਤਂ ਬ੍ਰੂਹਿ ‘ਹੋਹਿ ਕਿਰ ਇਤ੍ਥਨ੍ਨਾਮਸ੍ਸ ਭਰਿਯਾ ਧਨਕ੍ਕੀਤਾ’’ਤਿ (ਪਾਰਾ. ੩੦੫) ਏਵਂ ਵੁਤ੍ਤਂ ਪੁਰਿਸਸ੍ਸ ਸਾਸਨਂ, ‘‘ਗਚ੍ਛ, ਭਨ੍ਤੇ, ਇਤ੍ਥਨ੍ਨਾਮਂ ਪੁਰਿਸਂ ਬ੍ਰੂਹਿ ‘ਅਹਂ ਤਸ੍ਸ ਭਰਿਯਾ ਭਵਿਸ੍ਸਾਮੀ’’ਤਿ (ਪਾਰਾ. ੩੨੬-੩੨੭ ਥੋਕਂ ਵਿਸਦਿਸਂ) ਏਵਂ ਵੁਤ੍ਤਂ ਇਤ੍ਥਿਯਾ ਸਾਸਨਂ. ਪਟਿਗ੍ਗਣ੍ਹਿਤ੍ਵਾਤਿ ‘‘ਸਾਧੁ ਉਪਾਸਕਾ’’ਤਿ ਵਾ ‘‘ਹੋਤੂ’’ਤਿ ਵਾ ‘‘ਆਰੋਚੇਸ੍ਸਾਮੀ’’ਤਿ ਵਾ ਯੇਨ ਕੇਨਚਿ ਆਕਾਰੇਨ ਵਚੀਭੇਦਂ ਕਤ੍ਵਾ ਵਾ ਸੀਸਕਮ੍ਪਨਾਦੀਹਿ ਵਾ ਪਟਿਗ੍ਗਣ੍ਹਿਤ੍ਵਾ ਸਮ੍ਪਟਿਚ੍ਛਿਤ੍ਵਾਤਿ ਅਤ੍ਥੋ. ਵੀਮਂਸਿਤ੍ਵਾਤਿ ਵੁਤ੍ਤਪ੍ਪਕਾਰੇਨ ਸਾਸਨਂ ਗਹੇਤ੍ਵਾ ਪੁਰਿਸਸ੍ਸ ਵਾ ਇਤ੍ਥਿਯਾ ਵਾ ਤੇਸਂ ਅਵਸ੍ਸਾਰੋਚਨਕਾਨਂ ਮਾਤਾਪਿਤਾਭਾਤਾਭਗਿਨਿਆਦੀਨਂ ਵਾ ਆਰੋਚੇਤ੍ਵਾਤਿ ਅਤ੍ਥੋ. ਹਰਂਪਚ੍ਚਾਤਿ ਏਤ੍ਥ ‘‘ਪਚ੍ਚਾਹਰ’’ਨ੍ਤਿ ਵਤ੍ਤਬ੍ਬੇ ਛਨ੍ਦਹਾਨਿਭਯਾ ਹਰ-ਸਦ੍ਦਂ ਪੁਬ੍ਬਨਿਪਾਤਂ ਕਤ੍ਵਾ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਤ੍ਥ ਪਹਿਤੇਨ ਤਤ੍ਥ ਗਨ੍ਤ੍ਵਾ ਤੇਨ ਆਰੋਚਿਤਾ ਸਾ ਇਤ੍ਥੀ ‘‘ਸਾਧੂ’’ਤਿ ਸਮ੍ਪਟਿਚ੍ਛਤੁ ਵਾ ਪਟਿਕ੍ਖਿਪਤੁ ਵਾ ਲਜ੍ਜਾਯ ਵਾ ਤੁਣ੍ਹੀ ਹੋਤੁ, ਪੁਨ ਆਗਨ੍ਤ੍ਵਾ ਤਸ੍ਸ ਪੁਰਿਸਸ੍ਸ ਹਰਨ੍ਤੋ ਏਤ੍ਤਾਵਤਾ ਇਮਾਯ ਪਟਿਗ੍ਗਹਣਾਰੋਚਨਪ੍ਪਚ੍ਚਾਹਰਣਸਙ੍ਖਾਤਾਯ ਤਿਵਙ੍ਗਸਮ੍ਪਤ੍ਤਿਯਾ ਸੋ ਭਿਕ੍ਖੁ ਸਙ੍ਘਾਦਿਸੇਸਂ ਆਪਜ੍ਜੇਯ੍ਯਾਤਿ ਅਤ੍ਥੋ. ਤੇਸਂ ਮਨੁਸ੍ਸਜਾਤਿਕਤਾ, ਅਲਂਵਚਨੀਯਤਾ, ਪਟਿਗ੍ਗਣ੍ਹਨਵੀਮਂਸਨਪ੍ਪਚ੍ਚਾਹਰਣਾਨੀਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਸਞ੍ਚਰਿਤ੍ਤਸਿਕ੍ਖਾਪਦਂ.

੧੫. ਇਦਾਨਿ ਅਮੂਲਕਂ ਪਕਾਸੇਤੁਂ ‘‘ਚਾਵੇਤੁਕਾਮੋ’’ਤਿਆਦਿਮਾਰਦ੍ਧਂ. ਚਾਵੇਤੁਕਾਮੋ ਭਿਕ੍ਖੁ ਅਮੂਲਨ੍ਤਿਮਵਤ੍ਥੁਨਾ ਅਞ੍ਞਂ ਸੁਣਮਾਨਂ ਭਿਕ੍ਖੁਂ ਚੋਦੇਨ੍ਤੋ ਵਾ ਚੋਦਾਪੇਨ੍ਤੋ ਵਾ ਗਰੁਂ ਫੁਸੇਤਿ ਸਮ੍ਬਨ੍ਧੋ. ਤਤ੍ਥ ਚਾਵੇਤੁਕਾਮੋਤਿ ਬ੍ਰਹ੍ਮਚਰਿਯਾ ਚਾਵੇਤੁਕਾਮੋ. ਚੋਦੇਨ੍ਤੋਤਿ ‘‘ਤ੍ਵਂ ਪਾਰਾਜਿਕਂ ਧਮ੍ਮਂ ਆਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸੀ’’ਤਿਆਦੀਹਿ ਵਚਨੇਹਿ ਸਯਂ ਚੋਦੇਨ੍ਤੋਤਿ ਅਤ੍ਥੋ. ਏਵਂ ਚੋਦੇਨ੍ਤਸ੍ਸ ਵਾਚਾਯ ਵਾਚਾਯ ਸਙ੍ਘਾਦਿਸੇਸੋ. ਅਮੂਲਨ੍ਤਿਮਵਤ੍ਥੁਨਾਤਿ ਯਂ ਚੋਦਕੇਨ ਚੁਦਿਤਕਮ੍ਹਿ ਪੁਗ੍ਗਲੇ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ, ਇਦਂ ਏਤੇਸਂ ਦਸ੍ਸਨਸਵਨਪਰਿਸਙ੍ਕਿਤਸਙ੍ਖਾਤਾਨਂ ਮੂਲਾਨਂ ਅਭਾਵਤੋ ਨਾਸ੍ਸ ਮੂਲਨ੍ਤਿ ਅਮੂਲਂ, ਅਨ੍ਤਿਮਂ ਵਤ੍ਥੁ ਯਸ੍ਸ ਪਾਰਾਜਿਕਸ੍ਸ ਤਦਿਦਂ ਅਨ੍ਤਿਮਵਤ੍ਥੁ, ਅਮੂਲਞ੍ਚ ਤਂ ਅਨ੍ਤਿਮਵਤ੍ਥੁ ਚੇਤਿ ਅਮੂਲਨ੍ਤਿਮਵਤ੍ਥੁ, ਤੇਨ ਅਮੂਲਨ੍ਤਿਮਵਤ੍ਥੁਨਾ, ਭਿਕ੍ਖੁਨੋ ਅਨੁਰੂਪੇਸੁ ਏਕੂਨਵੀਸਤਿਯਾ ਪਾਰਾਜਿਕੇਸੁ ਅਞ੍ਞਤਰੇਨਾਤਿ ਅਤ੍ਥੋ. ਚੋਦਾਪਯਨ੍ਤਿ ਚੋਦਾਪਯਨ੍ਤੋ, ਤਸ੍ਸ ਸਮੀਪੇ ਠਤ੍ਵਾ ਅਞ੍ਞਂ ਭਿਕ੍ਖੁਂ ਆਣਾਪੇਤ੍ਵਾ ਚੋਦਾਪੇਨ੍ਤੋ ਤਸ੍ਸ ਆਣਤ੍ਤਸ੍ਸ ਵਾਚਾਯ ਵਾਚਾਯ ਗਰੁਂ ਫੁਸੇਤਿ ਅਤ੍ਥੋ. ਸੁਣਮਾਨਨ੍ਤਿ ਇਮਿਨਾ ਪਰਮ੍ਮੁਖਾ ਦੂਤੇਨ ਵਾ ਪਣ੍ਣੇਨ ਵਾ ਚੋਦੇਨ੍ਤਸ੍ਸ ਨ ਰੁਹਤੀਤਿ ਦੀਪਿਤਂ ਹੋਤਿ. ਪਰਮ੍ਮੁਖਾ ਪਨ ਸਤ੍ਤਹਿ ਆਪਤ੍ਤਿਕ੍ਖਨ੍ਧੇਹਿ ਵਦਨ੍ਤਸ੍ਸ ਦੁਕ੍ਕਟਂ. ਯਂ ਚੋਦੇਤਿ, ਤਸ੍ਸ ਉਪਸਮ੍ਪਨ੍ਨੋਤਿ ਸਙ੍ਖ੍ਯੂਪਗਮਨਂ, ਤਸ੍ਮਿਂ ਸੁਦ੍ਧਸਞ੍ਞਿਤਾ, ਯੇਨ ਪਾਰਾਜਿਕੇਨ ਚੋਦੇਤਿ, ਤਸ੍ਸ ਦਿਟ੍ਠਾਦਿਵਸੇਨ ਅਮੂਲਕਤਾ, ਚਾਵਨਾਧਿਪ੍ਪਾਯੇਨ ਸਮ੍ਮੁਖਾ ਚੋਦਨਾ, ਤਸ੍ਸ ਤਙ੍ਖਣਵਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ. ਅਮੂਲਕਸਿਕ੍ਖਾਪਦਂ.

੧੬. ਇਦਾਨਿ ਅਞ੍ਞਭਾਗਿਯਂ ਦਸ੍ਸੇਤੁਂ ‘‘ਲੇਸਮਤ੍ਤ’’ਨ੍ਤਿਆਦਿਮਾਹ. ਤਤ੍ਥ ਲੇਸਮਤ੍ਤਮੁਪਾਦਾਯਾਤਿ ਜਾਤਿਨਾਮਗੋਤ੍ਤਲਿਙ੍ਗਾਪਤ੍ਤਿਪਤ੍ਤਚੀਵਰੂਪਜ੍ਝਾਯਾਚਰਿਯਸੇਨਾਸਨਲੇਸਸਙ੍ਖਾਤੇਸੁ ਦਸਸੁ ਲੇਸੇਸੁ ਯੋ ਤਸ੍ਮਿਂ ਪੁਗ੍ਗਲੇ ਦਿਸ੍ਸਤਿ, ਤਂ ਲੇਸਮਤ੍ਤਂ ਉਪਾਦਾਯ ਨਿਸ੍ਸਾਯ ਭਿਕ੍ਖੁਂ ਬ੍ਰਹ੍ਮਚਰਿਯਾ ਚਾਵੇਤੁਕਾਮੋ ਅਮੂਲਨ੍ਤਿਮਵਤ੍ਥੁਨਾ ਸੁਣਮਾਨਂ ਭਿਕ੍ਖੁਂ ਚੋਦੇਨ੍ਤੋ ਗਰੁਂ ਫੁਸੇਤਿ ਅਤ੍ਥੋ. ਕਥਂ? ਅਞ੍ਞੋ ਖਤ੍ਤਿਯਜਾਤਿਕੋ ਇਮਿਨਾ ਚੋਦਕੇਨ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸੋ ਅਞ੍ਞਂ ਅਤ੍ਤਨੋ ਵੇਰਿਂ ਖਤ੍ਤਿਯਜਾਤਿਕਂ ਭਿਕ੍ਖੁਂ ਪਸ੍ਸਿਤ੍ਵਾ ਤਂ ਖਤ੍ਤਿਯਜਾਤਿਲੇਸਂ ਗਹੇਤ੍ਵਾ ਏਵਂ ‘‘ਖਤ੍ਤਿਯੋ ਮਯਾ ਦਿਟ੍ਠੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ, ਤ੍ਵਂ ਖਤ੍ਤਿਯੋ ਪਾਰਾਜਿਕਂ ਧਮ੍ਮਂ ਆਪਨ੍ਨੋਸੀ’’ਤਿ ਵਾ ‘‘ਤ੍ਵਂ ਸੋ ਖਤ੍ਤਿਯੋ, ਨਾਞ੍ਞੋ, ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸੀ’’ਤਿ ਵਾ ਚੋਦੇਤਿ, ਏਵਂ ਨਾਮਲੇਸਾਦਯੋਪਿ ਵੇਦਿਤਬ੍ਬਾ. ਅਙ੍ਗਾਨਿ ਪਨੇਤ੍ਥ ਅਨਨ੍ਤਰਸਦਿਸਾਨਿ. ਅਞ੍ਞਭਾਗਿਯਸਿਕ੍ਖਾਪਦਂ.

ਗਰੁਕਾਪਤ੍ਤਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.