੧. ਪਾਰਾਜਿਕਨਿਦ੍ਦੇਸੋ

੧. ਸਂ ਨਿਮਿਤ੍ਤਂ ਪਵੇਸਨ੍ਤੋ, ਭਿਕ੍ਖੁ ਮਗ੍ਗਤ੍ਤਯੇ ਚੁਤੋ;

ਪਵੇਸਨਟ੍ਠਿਤੁਦ੍ਧਾਰ-ਪਵਿਟ੍ਠੇ ਚੇਪਿ ਸਾਦਿਯਂ.

੨. ਅਦਿਨ੍ਨਂ ਮਾਨੁਸਂ ਭਣ੍ਡਂ, ਥੇਯ੍ਯਾਯੇਕੇਨ ਆਦਿਯਂ;

ਪਞ੍ਚਵੀਸਾਵਹਾਰੇਸੁ, ਗਰੁਕਂ ਚੇ ਚੁਤੋ ਭਵੇ.

੩. ਆਦਿਯਨ੍ਤੋ ਹਰਨ੍ਤੋਵ-ਹਰਨ੍ਤੋਪਿਰਿਯਾਪਥਂ;

ਵਿਕੋਪੇਨ੍ਤੋ ਤਥਾ ਠਾਨਾ, ਚਾਵੇਨ੍ਤੋਪਿ ਪਰਾਜਿਕੋ.

੪. ਤਤ੍ਥ ਨਾਨੇਕਭਣ੍ਡਾਨਂ, ਪਞ੍ਚਕਾਨਂ ਵਸਾ ਪਨ;

ਅਵਹਾਰਾ ਦਸਞ੍ਚੇਤਿ, ਵਿਞ੍ਞਾਤਬ੍ਬਾ ਵਿਭਾਵਿਨਾ.

੫. ਸਾਹਤ੍ਥਾਣਤ੍ਤਿਕੋ ਚੇਵ, ਨਿਸ੍ਸਗ੍ਗੋ ਚਾਤ੍ਥਸਾਧਕੋ;

ਧੁਰਨਿਕ੍ਖੇਪਨਞ੍ਚੇਵ, ਇਦਂ ਸਾਹਤ੍ਥਪਞ੍ਚਕਂ.

੬. ਪੁਬ੍ਬਸਹਪ੍ਪਯੋਗੋ ਚ, ਸਂਵਿਧਾਹਰਣਮ੍ਪਿ ਚ;

ਸਙ੍ਕੇਤਕਮ੍ਮਂ ਨਿਮਿਤ੍ਤਂ, ਪੁਬ੍ਬਪ੍ਪਯੋਗਪਞ੍ਚਕਂ.

੭. ਥੇਯ੍ਯਾਪਸਯ੍ਹਪਰਿਕਪ੍ਪ-ਪ੍ਪਟਿਚ੍ਛਨ੍ਨਕੁਸਾਦਿਕਾ;

ਅਵਹਾਰਾ ਇਮੇ ਪਞ੍ਚ, ਵਿਞ੍ਞਾਤਬ੍ਬਾ ਵਿਭਾਵਿਨਾ.

੮. ਮਨੁਸ੍ਸਪਾਣਂ ਪਾਣੋਤਿ, ਜਾਨਂ ਵਧਕਚੇਤਸਾ;

ਜੀਵਿਤਾ ਯੋ ਵਿਯੋਜੇਤਿ, ਸਾਸਨਾ ਸੋ ਪਰਾਜਿਤੋ.

੯. ਝਾਨਾਦਿਭੇਦਂ ਹਦਯੇ ਅਸਨ੍ਤਂ,

ਅਞ੍ਞਪਦੇਸਞ੍ਚ ਵਿਨਾਧਿਮਾਨਂ;

ਮਨੁਸ੍ਸਜਾਤਿਸ੍ਸ ਵਦੇਯ੍ਯ ਭਿਕ੍ਖੁ,

ਞਾਤਕ੍ਖਣੇ ਤੇਨ ਪਰਾਜਿਕੋ ਭਵੇਤਿ.