੨. ਗਰੁਕਾਪਤ੍ਤਿਨਿਦ੍ਦੇਸੋ

੧੦. ਮੋਚੇਤੁਕਾਮਚਿਤ੍ਤੇਨ, ਉਪਕ੍ਕਮ੍ਮ ਵਿਮੋਚਯਂ;

ਸੁਕ੍ਕਮਞ੍ਞਤ੍ਰ ਸੁਪਿਨਾ, ਸਮਣੋ ਗਰੁਕਂ ਫੁਸੇ.

੧੧. ਕਾਯਸਂਸਗ੍ਗਰਾਗੇਨ, ਮਨੁਸ੍ਸਿਤ੍ਥਿਂ ਪਰਾਮਸਂ;

ਇਤ੍ਥਿਸਞ੍ਞੀ ਉਪਕ੍ਕਮ੍ਮ, ਸਮਣੋ ਗਰੁਕਂ ਫੁਸੇ.

੧੨. ਦੁਟ੍ਠੁਲ੍ਲਵਾਚਸ੍ਸਾਦੇਨ, ਮਗ੍ਗਂ ਵਾਰਬ੍ਭ ਮੇਥੁਨਂ;

ਓਭਾਸਨ੍ਤੋ ਮਨੁਸ੍ਸਿਤ੍ਥਿਂ, ਸੁਣਮਾਨਂ ਗਰੁਂ ਫੁਸੇ.

੧੩. ਵਣ੍ਣਂ ਵਤ੍ਵਾਤ੍ਤਨੋਕਾਮ-ਪਾਰਿਚਰਿਯਾਯ ਮੇਥੁਨਂ;

ਇਤ੍ਥਿਂ ਮੇਥੁਨਰਾਗੇਨ, ਯਾਚਮਾਨੋ ਗਰੁਂ ਫੁਸੇ.

੧੪. ਸਨ੍ਦੇਸਂ ਪਟਿਗ੍ਗਣ੍ਹਿਤ੍ਵਾ, ਪੁਰਿਸਸ੍ਸਿਤ੍ਥਿਯਾਪਿ ਵਾ;

ਵੀਮਂਸਿਤ੍ਵਾ ਹਰਂਪਚ੍ਚਾ, ਸਮਣੋ ਗਰੁਕਂ ਫੁਸੇ.

੧੫. ਚਾਵੇਤੁਕਾਮੋ ਚੋਦੇਨ੍ਤੋ, ਅਮੂਲਨ੍ਤਿਮਵਤ੍ਥੁਨਾ;

ਚੋਦਾਪਯਂ ਵਾ ਸਮਣੋ, ਸੁਣਮਾਨਂ ਗਰੁਂ ਫੁਸੇ.

੧੬. ਲੇਸਮਤ੍ਤਂ ਉਪਾਦਾਯ, ਅਮੂਲਨ੍ਤਿਮਵਤ੍ਥੁਨਾ;

ਚਾਵੇਤੁਕਾਮੋ ਚੋਦੇਨ੍ਤੋ, ਸੁਣਮਾਨਂ ਗਰੁਂ ਫੁਸੇਤਿ.